MM Story Teller

Chapter 133

Viewers 11k

🌍Chapter 133

မှန်၏။ ထန်မော့မှာ လရောင်ပန်းကိုအသုံးပြုလျက် ဂိမ်းရှင်းလင်းရန်နည်းကို ရရှိခဲ့ခြင်းဖြစ်သည်။ ဤနည်းဖြင့် သူနှင့်ဖူ၀မ်သော်အတွက် ဂိမ်းရှင်းလင်းရန် နည်းလမ်းနှင့် အခြေအနေတို့ကို အတည်ပြုခဲ့သည်။

မူလတွင် သူ့အနေနှင့် ထိုတီကောင်ကြီးကို ၇ရက်အတွင်း ဆပ်ကပ်သို့ မည်သို့ပို့ရမည်ကိုစိတ်ပူနေခဲ့ကာ သတင်းအချက်အလက်များ ပိုလိုချင်ခဲ့သည်။ ထို့နောက် စုံထောက်များ၏အထင်သေးခြင်းရောင်၀ါပွင့်လာပြီး ဂိမ်း၏ခက်ခဲမှုအဆင့်က ပို၍မြင့်လာသဖြင့် လရောင်ပန်းကိုသုံးရန် သင့်တော်သွားခဲ့လေသည်။

သို့သော် လရောင်ပန်းမှာ ဂိမ်းဗျူဟာ၏ ပျက်စီးနေသောဗားရှင်းမျှသာဖြစ်သည်။ ၄င်းကထန်မော့အား မစ်ရှင်ကို သာပြောပြပြီး တခြား နည်းလမ်းတစ်ခုမျှမပေးခဲ့ချေ။

၂ဦးသား ကြမ်းပြင်တွင်ထိုင်လျက် အမောဖြေနေကြစဥ် ထန်မော့မှောင်မည်းနေသော မျက်နှာကျက်ကို မော့ကြည့်လိုက်မိသည်။ ထို၇ရက်အတွင်း ဖြစ်ပျက်ခဲ့သည်တို့ကို တွေးရင်း ပြုံးမိနေစဥ် ဖူ၀မ်သော်က သူ့အားလှည့်ကြည့်လာခဲ့သည်။

ထန်မော့ဆိုလိုက်သည်။

"ကျွန်တော်တို့ ပူးပေါင်းလိုက်ရင် ဂိမ်းရဲ့ခက်ခဲမှုအဆင့်ကမြင့်သွားမယ်ဆိုတာသိပေမယ့် ဒီလောက်ခက်ခဲမှုအဆင့်ကြီးကတော့အတော်များသလိုပဲ"

ဖူ၀မ်သော် မှာ လေသံနိမ့်နိမ့်ဖြင့်ဆိုလာသည်။

"၂ vs ၂၁ယောက် ခက်ခဲမှုကမသေးဘူးလေ"

"အင်း ၂vs၂၁ယောက်နော်"

ဖူ၀မ်သော်ကမေးလိုက်သည်။

"ဘယ်လိုလဲ"

ထန်မော့ ခတ္တမျှတွေးတောလိုက်ကာ

"ပျော်တယ်"

သူအလွန်ပျော်ခဲ့သည်။ သူဂိမ်းများစွာဆော့ဖူးခဲ့သော်လည်း အနိုင်ရရှိပြီးနောက် ဤမျှပျော်ရွှင်မိသည်မှာ ဤတစ်ခါသာရှိသေးသည်။ ဂိမ်း၏ခက်ခဲမှုအဆင့်ကမြင့်လေ ဂိမ်းထဲသို့ ပိုနစ်၀င်မိလေပင်။ ပြိုင်ဘက်၂၁ယောက်ကို ရင်ဆိုင်ပြီး ထိုသည်းထိပ်ရင်ဖိုဆပ်ကပ်၏ ဆုကို ယူခဲ့ရသည့်ခံစားချက်မှာလည်းအလွန်မိုက်လှသည်။

ဂိမ်းပြီးသည့်နောက် သူ၏ခေါင်းပင် ထုံကျဥ်ကျန်ရစ်သည့်နှယ်။

ဖူ၀မ်သော်နှင့်သူအသင်းဖွဲ့ပြီးနောက် ခက်ခဲမှုအဆင့်ကအလွန်မြင့်သွားခဲ့သည်။ ထိုခိုး၀င်သူ၄ယောက်ကြောင့်သာမဟုတ်လျှင် သူတို့အတွက် ဂိမ်းကိုရှင်းဖို့မဖြစ်နိုင်သလောက်ပင်။ အခုလည်း လွယ်လွယ်ကူကူအနိုင်ယူခဲ့ရခြင်းတော့မဟုတ်။

အနားယူပြီးနောက် သူတို့၏အိတ်ထဲမှ ရတနာတုံးကို ကိုယ်စီထုတ်ယူလိုက်ကြသည်။

"စိတ်ကြိုက်အကူပစ္စည်းအဆင့်မြှင့်တင်ခြင်း ပက်ကေ့၊ မင်းဘုရင့်ရွှေဒင်္ဂါးကို အဆင့်မြှင့်မှာလား"

ဖူ၀မ်သော်ကအလွန်သေချာနေသောအသံဖြင့်မေးလာခဲ့သည်။

ထန်မော့ မငြင်းခဲ့ချေ။

"ခင်များကရော ဘာကိုအဆင့်မြှင့်မှာလဲ"

"လက်နက်တစ်ခု"

ထိုအဖြေမှာ သာမာန်ပင်။ ဖူ၀မ်သော်တွင် ဘုရင့်ရွှေဒင်္ဂါးသို့မဟုတ် ရှားပါး အကူပစ္စည်းမျိုးမရှိ၍ လက်နက်တစ်ခုကို အဆင့်မြှင့်သည်က အသင့်တော်ဆုံးပင်။ ထန်မော့ကတွေးလိုက်ကာ

"ခင်များ မော့...ကြက်ဆင်ဥကို အဆင့်မြှင့်ချင်လား"

ဖူ၀မ်သော်ကတုန့်ပြန်လိုက်သည်။

"တစ်ပါတ်မှာတစ်ကြိမ်သုံးလို့ရပြီး ၁နာရီစာ ဂိမ်းသိမ်းမှတ်ကိုဖွင့်လို့ရတယ်၊ အဲလောက်က လောလောဆယ် လုံလောက်နေပါပြီ။ "

ထန်မော့ကခေါင်းညိတ်လိုက်သည်။ သူလည်း ကြက်ဆင်ဥကိုအဆင့်မမြှင့်တော့ရန်သာတွေးလိုက်သည်။ လက်ရှိကြက်ဆင်ဥက သူတို့အတွက်လုံလောက်နေပြီဖြစ်၏။

ဖူ၀မ်သော်ကသူ့ကိုကြည့်လာခဲ့သည်။

"မင်းတကယ်ပဲ ဘုရင့်ရွှေဒင်္ဂါးကို အဆင့်မြှင့်ချင်လို့လား"

"ဘာလို့လဲ"

"ဘုရင့်ရွှေဒင်္ဂါးက အနက်ရောင်မျှော်စင်ဂိမ်းတစ်ခုကနေ ကျော်သွားလို့ရတဲ့အခွင့်အရေးပဲ။ သူ့ကိုအဆင့်မြှင့်လို့ရလာမယ့် အကောင်းဆုံးရလဒ်ကတော့ နောက်ထပ် ဂိမ်း၂ခုလောက် ထပ်ကျော်ခွင့်လောက်ပဲဖြစ်မှာပေါ့။ ဒါပေမယ့်၃ကြိမ်ထက်တော့မပိုနိုင်လောက်ဘူး။"

ဖူ၀မ်သော်ကဆိုလိုက်သည်။

"မင်းအတွက် လက်နက်တစ်ခုကိုအဆင့်မြှင့်တာက ပိုသင့်တော်ပါတယ်"

လက်ရှိ ထန်မော့အလိုအပ်ဆုံးမှာ တိုက်ခိုက်ရန်အစွမ်းပင်။

ဤတစ်ကြိမ်တွင် ထန်မော့ဖူ၀မ်သော်ကြောင့်သာ ဂိမ်းကို အောင်အောင်မြင်မြင်ရှင်းနိုင်ခဲ့ခြင်းဖြစ်သည်။

ပြီးခဲ့သောအနက်ရောင်မျှော်စင်တိုက်ခိုက်ဂိမ်းထဲတွင် သူသည် မိမိထက်ပိုသန်မာသော ပိုင်ရို့ယောင်ကို ရင်ဆိုင်ခဲ့ရကာ အသက်ဆုံးရှုံးမတတ်ပင်။

ယခုလည်း ထန်မော့ကတုံးပြောင်ကြီးနှင့် ရင်ဆိုင်ခဲ့ရကာ ထို၀က်၀ံညိုကြီးအဖြစ်ပြောင်းနိုင်သော ကတုံးပြောင်ကြီးမှာ သူ၏ပြိုင်ဘက်မဟုတ်ချေ။ ဖူ၀မ်သော်ကြောင့်သာမဟုတ်ပါက ထန်မော့ ဤဂိမ်းထဲတွင် ရွှေဒင်္ဂါးတစ်ခုအဖြစ်ပြောင်းသွားလောက်ချေပြီ။

မျှော်စင်ဒုတိယထပ်ကိုရှင်းထားသော ကစားသမားများမှာ ပထမထပ်ကစားသမားထက် သာလွန်သည်ဟုမဆိုလိုချေ။ အနက်ရောင်မျှော်စင်က ကစားသမားများအား ခွန်အားချည်းသက်သက်မဟုတ်ပဲ ဥာဏ်ရည်ဥာဏ်စွမ်း ဆုံးဖြတ်နိုင်စွမ်းနှင့် ကံကောင်းခြင်းအပေါ် မူတည်၍လည်း အဆင့်သတ်မှတ်ပေးတတ်သေးသည်။

ဖူ၀မ်သော်ကဆိုလိုက်သည်။

"ဂိမ်းတစ်ခုကိုကျော်သွားလို့ရတာက ဂိမ်းတစ်ခုကိုပဲ နိုင်မှာ။ လက်နက်ကိုအဆင့်မြှင့်တာက မင်းကို ဂိမ်းတွေအများကြီးကို ရင်ဆိုင်နိုင်တဲ့ အစွမ်းမျိုးပေးလိမ့်မယ်"

ထန်မော့တိတ်ဆိတ်နေခဲ့သည်။ အတော်ကြာပြီးမှ တီးတိုးဆိုသံလေးထွက်လာခဲ့သည်။

"ကျေးဇူး"

ဖူ၀မ်သော်၏ နှုတ်ခမ်းတို့တွန့်ကွေးသွားခဲ့သည်။

ထန်မော့ မီးခြစ်ဆံကြီးကို အဆင့်မြှင့်လိုက်လေသည်။ မီးခြစ်ဆံကြီးနှင့် ထီးကလေးတို့က သူအသုံးအများဆုံးပစ္စည်းများဖြစ်သည်။ ထီးကလေးမှာ အလွန်စွမ်းပြီး တိုက်ခိုက်ရန်ရော ခုခံရန်အတွက်ပါ အသုံးပြုနိုင်သော်လည်း တက်တူးထဲထည့်သိမ်း၍မရချေ။ ထီးကိုဖွင့်ရန်လည်းခက်ခဲကာ လျပ်တပြက်တိုက်ခိုက်မှုမျိုးအတွက် အလုပ်မဖြစ်လှ။ အသုံးမပြုမီ ရှက်စရာစကားစုကိုလည်း ရေရွတ်ရသေးသည်။

ထန်မော့မီးခြစ်ဆံကြီးကို အဆင့်မြှင့်ရန် တွန့်ဆုတ်မနေခဲ့ချေ။

[ပစ္စည်း: မျက်နှာပြောင်လေးရဲ့ မီးခြစ်ဆံ]

[ပိုင်ရှင် : ထန်မော့]

[အရည်အသွေး: ထူးရှယ်]

[အဆင့်: ၃]

[အသုံးပြုပုံ: ငြှိမ်းသတ်မရသောမီးတောက်၊ မီးခြစ်ဆံကြီးအား ဆန္ဒရှိသလို မီးမြှိုက်နိုင်၊ အရာ၀တ္တုတစ်ခုကိုရှို့လိုက်သည်နှင့် ကျိုးကြောင်းပြသက်ရောက်မှုကြောင့် ပြာဖြစ်သည်အထိ လောင်ကျွမ်းသွားမည်။ မီးကိုငြိမ်းသတ်ရန်မှာ စိတ်ကူးနှင့်ပင်တွေးမရအောင် ခက်ခဲလွန်း]

[ကန့်သတ်ချက်: အကြိမ်များစွာအသုံးပြုမှုက မီးခြစ်ဆံ၏အသက်လျှော့ချနိုင်။ အကြိမ်၅၀အထိအသုံးပြုနိုင်သည်]

[မှတ်ချက်: မျက်နှာပြောင်လေးကပြောတယ် 'လူသတ်ဖို့ မီးတွေရှို့နေပေမယ့် သမီးက လိမ္မာတဲ့ ကောင်မလေးပါနော်' ]

နေ့တစ်၀က်ခန့်အနားယူပြီးနောက် နန်ပူတံတားတွင် မည်သည့်အလစ်တိုက်ခိုက်မည့်သူမျိုးမှရှိမနေမှန်းသေချာသွားခဲ့သည်။ ထို့နောက် ထန်မော့နှင့် ဖူ၀မ်သော်လည်း မောလ်ဆီသို့ပြန်လာခဲ့ကြလေသည်။

သူတို့ လရောင်ပန်းကိုသုံးကာ ဂိမ်းရှင်းလင်းနည်းကိုရှာ၍ ၂ယောက်နှင့် ၂၁ယောက်ကို အနိုင်ယူခဲ့သည်။ အကယ်၍ ထိုကစားသမား၁၀ယောက်မှာ အမှန်တကယ်ဒေါသပုန်ထ၍ ပူးပေါင်းကာလက်စားချေမည်ဆိုပါက သူတို့ လွတ်မြောက်ရန်ခက်ခဲမည်သာ။

ညဘက်တွင် ပုန်းကွယ်နေသောရန်သူများကို သတိထားမိရန်မလွယ်။ မနက်ခင်းနေရောင်တောက်ပလာသောအခါမှ မည်သူမျှပုန်းမနေသည်မှာ သေချာသွားခဲ့သည်။

ထန်မော့ မောလ်ဆီသို့ အမြန်ဆုံးအလျင်ဖြင့်ပြန်လာပြီး ဖူ၀မ်သော်အား အ၀င်၀တွင်နှုတ်ဆက်ခဲ့လိုက်သည်။

လက်နက်အဆင့်မြှင်တင်ခြင်းကဲ့သို့ လူ၂ယောက်တွင်လုပ်စရာများ ကိုယ်စီရှိနေခဲ့ကြသည်။

ထန်မော့ ဖူ၀မ်သော်၏ လက်နက်ကို မသိချေ။ သူသည် ဖူ၀မ်သော်တိုက်ခိုက်ခြင်းကိုတွေ့ခဲ့ရသော်လည်း မည်သည့်အကူပစ္စည်းကိုမျှမမြင်ခဲ့ချေ၊ သူကရန်သူကိုရင်ဆိုင်ရန် သူ၏ပြင်းထန်သောခွန်အားကိုသာအသုံးပြုခဲ့သည်။

လူတိုင်းတွင် လျှို့၀ှက်ချက်ကိုယ်စီရှိကြသည်။

ထန်မော့က ဖူ၀မ်သော်အား သူ၏စွမ်းရည်များအကြောင်းမပြောပြသည်နှင့်အတူတူပင်။

မောလ်ထဲသို့၀င်လာပြီးနောက် သူ လူသူကင်းမဲ့သော မြေအောက်ကားပါကင်ထဲတွင် ဓါတ်မီးကိုဖွင့်လျက် စွမ်းရည်စာအုပ်ကို ထုတ်ယူလိုက်သည်။ နောက်ဆုံးစာမျက်နှာကို လှန်လိုက်လျှင် အနက်ရောင်စာကြောင်းများတဖြည်းဖြည်း ပေါ်လာခဲ့သည်။

[စွမ်းရည်: ကြယ်တာရာကိုယ်စားပြုတရားမျှတမှုရှာဖွေခြင်း]

[ပိုင်ရှင်: ကျင်း ကျင်းယွမ်(ခိုး၀င်သူ)]

[အမျိုးအစား:လေးဖက်မြင်]

[အသုံးပြုပုံ: နောက်ယောင်ခံလိုက်နိုင်သောကျည်ဆံများကို ပစ်လွှတ်နိုင်။ ပစ်မှတ်ကိုချိန်ရွယ်၍ 'Checkmate'ဟု ရွတ်ပါ။ ကျည်ဆံသည် ပစ်မှတ်ကို ထိမသွားမချင်း သို့မဟုတ် ကျည်ဆံ၏အလျင်ကုန်မသွားမချင်း ရပ်တန့်သွားမည်မဟုတ်]

[အဆင့်:4]

[ကန့်သတ်ချက်: ကျည်ဆံတစ်ချက်တိုင်း စိတ်စွမ်းအင်ဖြင့်ထိန်းချုပ်ရန်လိုအပ်၊ တစ်ကြိမ်တွင် ကျည်ဆံ၅ခုပစ်လွှတ်နိုင်၊ ၅ခုထက်ပိုပစ်ပါက စိတ်စွမ်းအင်ကို ထိခိုက်နိုင်သည်( ကုသနိုင်)]

[မှတ်ချက်: အသိပညာ၊ သတ္တိ၊ လှပခြင်း နဲ့ ဥာဏ်ရည်။ လေပြည်ဟာ ရေခဲကြယ်စင်ဆီက တိုးထွက်လာခဲ့တယ်]

[ထန်မော့ဗားရှင်း အသုံးပြုရန်အညွှန်း: တစ်နေ့တွင် ၁ကြိမ်အသုံးပြုနိုင်၊ တစ်ကြိမ်တွင် ကျည်ဆံ၃ခုအထိပစ်နိုင်။ အသံမပြုမီ'ကြယ်တာရာကိုယ်စားပြု တရားမျှတမှုရှာဖွေခြင်း'ဟု ပစ်မှတ်ကကြားသည်အထိအော်ပေးရမည်။ ကျင်းကျင်းယွမ်က နတ်ဘုရားရဲ့ တမန်တော်ပဲ။ သူ့ရဲ့အဓိကတာ၀န်က ထန်မော့ကို မှော်ဆန်တဲ့ မိန်းကလေးအသွင်ပြောင်းပြီး ကြယ်တာရာတွေအစား ရန်သူတွေကို ဖိုက်တဲ့အခါ ကူညီပေးဖို့လေ။ အခုတော့သူ့တာ၀န်ကို အောင်မြင်သွားရှာပါပြီ။ ရဲဘော်၊ ဘ၀ဟာဂုဏ်ယူစရာဖြစ်ပြီး သေခြင်းတရားက ကြီးမြတ်ရှာပါတယ်]

ငါ့အဘိုးပြန်ပေး စ့မ်းရည်နှင့် ဘွားဘွား၀ံပုလွေကြီး၏ ပန်းရောင်ထီးကလေးကိုရရှိပြီးကတည်းက ထန်မော့အနေဖြင့် ရှက်စရာကောင်းသော စွမ်းရည်နှင့် အကူပစ္စည်းများအပေါ် လက်ခံနိုင်စွမ်းအတော်မြင့်တက်လာခဲ့သည်။ သို့သော်ဤတစ်ကြိမ်တွင်တော့ သူ၏မျက်လုံးများမှာ'ပစ်မှတ်ကြားအောင် အော်ပေးရမည်'ဟူသော စာကြောင်းအပေါ်စွဲမြဲနေခဲ့လေသည်။ အတော်ကြာပြီးနောက် ထန်မော့ဤအပေါစားစာအုပ်ကို ဆောင့်ပိတ်လိုက်ပြီး ဤစွမ်းရည်ကို သုံးစရာလည်း မလိုအပ်ဟု တွေးလိုက်မိသည်။

ထို့နောက် ထန်မော့ရေရွတ်လိုက်မိသည်။

"နောက်ဆုံးအခြေအနေမဟုတ်သ၍ ငါဒီစွမ်းရည်ကို မသုံးဘူး"

ရှူထောင့်တချို့အရ ဤစွမ်းရည်မှာ လက်ရှိ ထန်မော့အတွက်မသင့်တော်လှချေ။ အကယ်၍ သူသည်ထိုအရေးမပါသော စကားစုကို ရန်သူကြားအောင် ရွတ်စရာမလိုအပ်လျှင် ၄င်းကို လျှပ်တပြက်တိုက်ခိုက်မှုအဖြစ် အသုံးပြုနိုင်သည်။ သူသည်အမှောင်ထဲတွင်ပုန်းကွယ်နေပြီး ရန်သူကိုမထင်မှတ်ထားချိန်တွင် ဤစွမ်းရည်ကို အသုံးပြုနိုင်ပါက အလွန်အသုံး၀င်သော လူသတ်လက်နက်တစ်ခုဖြစ်လာမှာပင်။

သို့သော် ကန့်သတ်ချက်ရှိနေခြင်းမှာ နှမြောစရာပင်။ ဆိုလိုသည်အရ ထိုကျည်ဆံကိုပစ်လိုက်သည်နှင့် ထန်မော့၏ တည်နေရာကို ဖော်ပြပြီးဖြစ်သွားလိမ့်မည်။

သို့သော်လည်း ထိပ်တိုက်ရင်ဆိုင်နေရချိန်တွင်လည်း ထန်မော့ဤစွမ်းရည်ကို သုံး၍ ရန်သူကို အနှောင့်အယှက်ပေး၍ရသည်။

သူ စာအုပ်ကို လေထဲသို့ပစ်လိုက်ပြီးနောက် ၃ထပ်မြောက် မြေအောက်ကားပါကင်ဆီသွားလိုက်လေသည်။ ထို့နောက် အတွင်းတွင် တစ်ခုခုဆွဲနေပုံပေါ်သော လော့ဖုန်းချန်း၏ အခန်းတံခါးကို ခေါက်လိုက်သည်။

လော့ဖုန်းချန်းမှာ ထန်မော့ကို မော့ကြည့်လာခဲ့သည်။သူကပြုံးလျက်

"ကြည့်ရတာ မင်းနဲ့ ဗိုလ်ချုပ်ဖူနဲ့ နိုင်လာတယ်ထင်တယ်"

သူ၏လေသံမှာ အလွန်သေချာနေပြီး ထန်မော့နှင့် ဖူ၀မ်သော်မှာ ဂိမ်းကို ကျရှုံးမည်ဟူသော အတွေးမျိုး စိုးစင်းမျှမရှိချေ။

၄င်းကို ဖုံးကွယ်ထားစရာလည်း အကြောင်းမရှိချေ။ ထန်မော့စားပွဲဆီလျှောက်သွားလျက် ၀င်ထိုင်လိုက်သည်။

"အင်း နိုင်ဖို့တော့ အတော်ခက်ခဲတာပေါ့"

သူက၄င်းမှာ ၂ယောက် ၂၁ယောက် ရင်ဆိုင်ခဲ့ရသော ဂိမ်းဖြစ်ကြောင်းကိုတော့မပြောခဲ့ချေ။ ထန်မော့ကမေးလိုက်သည်။

"ဒီနေ့ကဘာနေ့လဲ"

လော့ဖုန်းချန်းကတုန့်ပြန်လာသည်။

"ဖေဖော်၀ါရီ ၁၃ရက်၊ မင်းတို့က ၁ရက်နေ့က ဂိမ်းထဲကို၀င်သွားတာ ၁၃ရက်ကျော်သွားပြီ"

ထန်မော့ကဆိုလိုက်သည်။

"ဂိမ်းထဲမှာတော့ တစ်ပတ်လောက်ပဲ ကြာခဲ့တာပဲ"

"ပုံမှန်ပါပဲ။ အနက်ရောင်မျှော်စင်ဂိမ်းနဲ့ အပြင်ကမ္ဘာရဲ့ အချိန်စီးဆင်းမှုက ကွာတယ်လေ။ တစ်ခါတလေကျတော့လည်း တူတယ်၊ တစ်ခါတလေကျတော့ အနက်ရောင်မျှော်စင်ဂိမ်းထဲက ၁ရက်က အပြင်မှ ၂ရက်စာရှိသွားတယ်၊ အနက်ရောင်မျှော်စင်ထဲက ၂ရက်က အပြင်မှာ ၁ရက်နဲ့ ညီနေတဲ့ အခါတွေလည်းရှိတာပဲ"

ထန်မော့ လော့ဖုန်းချန်း၏ ဆိုလိုရင်းကို နားလည်လေသည်။ သူပါ၀င်ဖူးသော ဂိမ်းတစ်ခုနှင့် ယှဥ်ပြောရမည်ဆိုပါက ရွှေကြွက်ဂိမ်းတွင် အနက်ရောင်မျှော်စင်၏ အချိန်စီးဆင်းမှူမှာ အပြင်ကမ္ဘာနှင့်အတူတူပင်။ ထို့ကြောင့်ပင် ထန်မော့မှာ အချိန်မှားယွင်းနေမှန်းသတိထားမိပြီး ဂိမ်းကိုရှင်းနိုင်ခဲ့လေသည်။ သို့သော် အနီရောင်နှလုံးဘုရင်မ၏ ရတနာကော်ရစ်တာကတော့မတူချေ။ ထန်မော့ထိုနေရာတွင် နာရီပိုင်းသာနေခဲ့ရသော်လည်း ကမ္ဘာပေါ်သို့ပြန်ရောက်ချိန်တွင် ၂ရက်ကုန်လွန်သွားခဲ့ပြီဖြစ်သည်။

လူ၂ဦးမှာ အတော်ကြာ စကားဖလှယ်နေခဲ့ကြသည်။

ထန်မော့က ဖူ၀မ်သော်နှင့်အတူ ဂိမ်းထဲတွင် ကြုံတွေ့ရသည်တို့ကို ရိုးရိုးရှင်းရှင်းပင် ပြောပြလိုက်သည်။ ဂိမ်း၏ အသေးစိတ်ကိုရော ကစားသမား ၂၁ယောက်အား လိမ်ခဲ့သည်ကိုပါ ထည့်မပြောခဲ့ချေ။ သူကထူးဆန်းထွေလာဆပ်ကပ်ကို ပို၍ အဓိကထား၍ ပြောခဲ့သည်။

"ဒီဆပ်ကပ်ကို အခြားဂိမ်းမှာကြားဖူးခဲ့ပေမယ့် ဒီဂိမ်းအတွက်ကတော့ ဆပ်ကပ်ကအဓိကပဲ။ ဒီထူးဆန်းထွေလာဆပ်ကပ်က မြေအောက်နိုင်ငံမှာ အတော်လေး အရေးကြီးတဲ့ အဖွဲ့အစည်းပဲ။ ကျွန်တော့်တွက်ဆမှုအရဆို ဒီဆပ်ကပ်နဲ့ပတ်သတ်တဲ့ အနက်ရောင်မျှော်စင်ဂိမ်းတွေ အတော်များများရှိလောက်တယ်"

လော့ဖုန်းချန်းမှာ စားပွဲကိုခေါက်လိုက်ပြီး ထန်မော့ကို ကြည့်လျက်

"ငှက်ပျောဘုံဆိုင် ထူးဆန်းထွေလာဆပ်ကပ်။ အဲဒီနှစ်ခုက လောလောဆယ် ငါတို့သိထားသမျှ မြေအောက်နိုင်ငံရဲ့ အရေးအကြီးဆုံးအဖွဲ့အစည်းတွေပဲ။

အနက်ရောင်မျှော်စင် 2.0ဗားရှင်းမြှင့်ပြီးကတည်းက သူတို့နဲ့ဆိုင်တဲ့ စုဝေးခြင်းဂိမ်း၂ခုတောင်ထွက်လာတယ်"

လော့ဖုန်းချန်းရုတ်တရက်ဘောပင်ကိုကောက်ကိုင်လျက် စာရွက်တွင်ရေးဆွဲလိုက်သည်။ ၄င်းမှာ မြေပုံတစ်ခုနှင့်တူသော်လည်း အတော်လေးအကြမ်းဆန်လွန်းသည်။

ထန်မော့ ထိုမျဥ်းကွေးများကိုကြည့်၍ ဘာမှန်းသေချာမပြောနိုင်ချေ။

🪩

Prev Next