Chapter 98

🌍Chapter 98

"ဘာ​တွေလဲ"

"ပထမတစ်ခုက ​မျှော်စင်တိုက်ခိုက်ခြင်းဂိမ်းထဲက ကစားသမား​တွေက ​မျှော်စင်အထပ်မတူကြဘူး"

ထန်​မော့မှာ ချန်ရှန်းရှန်း ဆိုလိုသည်ကို ချက်ချင်းနားလည်သွားခဲ့သည်။ သူကအံ့အားသင့်လျက်​မေးလိုက်သည်။

"​ပြောချင်တာက မင်းကပထမထပ်ကိုရှင်း​နေ​ပေမယ့် ဒုတိယထပ်ကိုရှင်း​နေတဲ့သူလည်း မင်းနဲ့​မျှော်စင်တစ်ထပ်တည်းမှာကျ​နေတာလား"

ဤသတင်းမှာ အမှန်ပင် ထိတ်လန့်ဖွယ်​ကောင်းလှသည်။ ထန်​မော့​ ​လော့ဖုန်းချန်းကို ကြည့်လိုက်မိသည်။

​လော့ဖုန်းချန်းမှာ သူ့အား​ခေါင်းညိတ်ပြလာခဲ့ပြီး 

"ရှန်းရှန်း​ပြောချင်တာလဲ အဲဒါပဲ...သူ​ဆော့ခဲ့ရတဲ့ ​မျှော်စင်တိုက်ခိုက်ဂိမ်းမှာ ကစားသမား၈​ယောက်ပါတယ်...သူတို့ဂိမ်းထဲ၀င်တာနဲ့ ​မြေ​အောက်နိုင်ငံရဲ့ အကျဥ်းသား​တွေဖြစ်လာကြတယ်...ရှန်းရှန်းတို့အုပ်စုက ၇​ယောက်မှာ သိပ်သတိမထားမိတဲ့ အကျဥ်းသားတစ်​ယောက်ကို သတ်ရဖို့မစ်ရှင်ရှိ​နေတာ... ဒါ​ပေမယ့် သူတို့ထဲက တစ်​ယောက်ရဲ့ တာ၀န်က​တော့ မတူပုံပဲ"

ချန်ရှန်းရှန်းက​ဆက်၍​ပြောလာခဲ့သည်။ 

"အဲဒီကစားသမားလုပ်​နေတာ​တွေကနည်းနည်းထူးဆန်း​နေတာ.. သူကတုန့်ပြန်တာလည်းမြန်​ပေမယ့် ဘာကိုမှသတိမထားမိသလိုလည်း ဟန်​ဆောင်​နေ​သေးတယ်... သူကကျွန်မတို့နဲ့ တာ၀န်ကိုဘယ်လိုပြီး​အောင်လုပ်ရမလဲဆိုတာကိုလည်း ​ဆွေး​နွေး​သေးတယ်... ဒါ​ပေမယ့် ကျွန်မတို့၈​ယောက်လုံးဂိမ်းထဲ​ရောက်သွားတာနဲ့  ကျွန်မတို့၇​ယောက်ကို​တွေ့​တော့ သူကအရမ်းလန့်သွားတာ...အဲကတည်းက သူ့ကိုကျွန်မသတိထားပြီး​စောင့်ကြည့်​နေခဲ့တာ"

​မှော်စင်တိုက်ခိုက်ဂိမ်းထဲအပို့ခံရ​​သော မည်သည့်ကစားသမားမဆို စိတ်လှုပ်ရှားလျက် ပူပန်​နေကြမည်သာ။ ရှန်းရှန်းမှာ အမြန်တည်ငြိမ်​အောင်ထိန်းလျက် အသင်း​ဖော်များကိုလည်း စူးစမ်းရန်မ​မေ့ခဲ့။ ၄င်းမှာ အလွန်ရှားပါး​သော အရည်အချင်းပင်။ ထို့​နောက် သူမပုံမှန်မဟုတ်​သော တစ်ခုခုကိုရှာ​တွေ့ခဲ့သည်။

"​မျှော်စင်တိုက်ခိုက်ဂိမ်းထဲအပို့ခံရပြီး​တော့ ​ကြောက်လန့်သွားတာ​ရော တည်ငြိမ်​ယောင်​ဆောင်တာ​ရောက ပုံမှန်ပါပဲ... ဒါ​ပေမယ့်ဆရာ​ပြောဖူးတယ်​လေ... ကိုယ့်ကိုယ်ကို ခပ်မြန်မြန်ဖုံးကွယ်ထားနိုင်တဲ့သူက ဥာဏ်​ကောင်းတဲ့သူဆိုတာ... အသင်းအဖွဲ့နဲ့​ဆော့ရတဲ့ ဂိမ်းထဲမှာ စည်းမျဥ်း​တွေ ရန်သူ​တွေထက် ဥာဏ်​ကောင်းတဲ့သူ​တွေကို သတိထားမှရမယ်... ဥာဏ်​ကောင်းတဲ့သူ​တွေက သူတို့ကိုယ်သူတို့ လမ်း​ဖြောင့်​အောင်လုပ်ပြီး အသင်း​ဖော်​တွေကို စ​တေးဖို့၀န်မ​လေးဘူး... သူတို့မှာ တခြားအကြံအစည်​တွေရှိ​နေရင် ၀က်လိုအသင်း​ဖော်​တွေထက် ပို​ကြောက်စရာ​ကောင်းတယ်...သူတို့ကို အရင်ရှင်းပစ်ရမှာ" 

ချန်ရှန်းရှန်းက တည်ငြိမ်စွာပင် လည်ပင်းကိုဖြတ်သည့်ဟန်ပြုလုပ်လာခဲ့သည်။ 

"..."

ထန်​မော့.. ​လော့ဖုန်းချန်းနှင့် ချန်ရှန်းရှန်းကို တလှည့်စီကြည့်လိုက်မိ၏။ 

​လော့ဖုန်းချန်းဒီက​လေးကို ဘာ​တွေသင်​​ပေးထားတာလဲ...

ချန်ရှန်းရှန်း ဆက်၍​ပြောလာခဲ့သည်။

"အစက​တော့ ဒီအမျိုးသမီးမှာ အခြားကိစ္စရှိလို့လားလို့ ထင်ခဲ့တာ...ပြီးမှ သူ့ရဲ့လုပ်ပုံကိုင်ပုံ​တွေက ထူးဆန်း​နေတာကို ကျွန်မသတိထားမိလာတယ်...

တဖြည်းဖြည်းနဲ့ သူ့ရဲ့မစ်ရှင်က ကျွန်မတို့ရဲ့မစ်ရှင်နဲ့မတူ​လောက်ဘူးလို့ ခံစားရတာ" 

သူမကထပ်​ပေါင်းဆိုလိုက်သည်။ 

"ကျွန်မရဲ့ ခန့်မှန်းမှုသက်သက်ပါပဲ ၃၀ရာခိုင်နှုန်းက မျက်မြင်​တွေ့ရတာ​တွေရယ် ၇၀ရာခိုင်နှုန်းက​တော့ အလိုလိုသိစိတ်​ပေါ့... သူ့မစ်ရှင်ကဘာလဲဆိုတာ ကျွန်မမသိပါဘူး... တစ်ညကျ​တော့ကျွန်မတို့ ၇​ယောက်မစ်ရှင်ပြီးသွားတဲ့အချိန် သူက​မြေ​အောက်နိုင်ငံရဲ့ ဧည့်သည်တစ်​ယောက်ဆီက အသတ်ခံလိုက်ရတယ်​လေ... အ​စောင့်က သူ့ရဲ့ရုပ်ပျက်ဆင်းပျက်အ​လောင်းကို ဆွဲလာပြီး​တော့ ကျွန်မတို့ဆီပစ်​ပေးပြီး  ထွက်​ပြေးဖို့ကြိုးစားရင် ဒီလိုဖြစ်မယ်ဆိုပြီး သတိ​ပေးတယ်"

ထန်​မော့နားလည်သွားခဲ့သည်။

"သူ့မစ်ရှင်က ​ထောင်​ဖောက်​ပြေးဖို့လား" 

"ထင်တာပဲ ကျွန်မလည်း မ​သေချာဘူး" 

ချန်ရှန်းရှန်းကဆိုလိုက်သည်။ 

"​ထောင်ထဲမှာ ​အော်သံ​တွေနဲ့ ဆူ​နေတာပဲ... အဆုံးမှာ ကျွန်မတို့၇​ယောက်က ​မျှော်စင်ပထမထပ်ကို ​အောင်​အောင်မြင်မြင်ရှင်းနိုင်လိုက်တယ်​လေ...ထူးဆန်း​နေ​တဲ့ အကျဥ်းသမားကို သတ်လိုက်တာနဲ့ ကျွန်မတို့ ကမ္ဘာ​ပေါ်ကိုပြန်​ရောက်လာတာပဲ...သူရဲ့မစ်ရှင်က ထွက်​ပြေးရမှာဆိုရင် ကျွန်မတို့ရဲ့ မစ်ရှင်က ပိုပြီးလွယ်လွန်း​နေတာ​​လေ... ဒီ​တော့ ကျွန်မ​တွေးမိတာက ကျွန်မတို့မစ်ရှင်က ​မျှော်စင်ပထမထပ်အတွက်ဖြစ်ပြီး​တော့ သူ့မစ်ရှင်က​တော့ ဒုတိယထပ်အတွက် ဖြစ်​လောက်တယ်လို့​လေ"

​​လော့ဖုန်းချန်းက ဆိုလိုက်သည်။ 

"ဘာပဲဖြစ်ဖြစ် အဲတစ်​ယောက်က ​မျှော်စင်ပထမထပ်ကို ရှင်းပြီးသားလားဆိုတာလည်း မ​သေချာပါဘူး ဒါ​ပေမယ့်သူက ၈​ယောက်ထဲမှာ အသန်မာဆုံးပဲ... ဒီ​​တော့ရှန်းရှန်း​တွေးမိတာက တူညီတဲ့​မျှော်စင်အထပ်မှာပဲ အဆင့်မတူတဲ့ ကစားသမား​တွေရှိနိုင်တယ်လို့​ပေါ့...မင်းသိထားရင်ရပြီ" 

ထန်​မော့ခတ္တမျှ​တွေး​တောလိုက်သည်။

"ကျွန်​တော်က​တော့ ဒီ​ကောက်ချက်ချတာကို ယုံတယ်" 

​လော့ဖုန်းချန်းကပြုံးလိုက်သည်။

"ငါလည်း ယုံတယ်"

ကုတင်​ပေါ်လဲ​လျောင်း​နေ​သော က​လေးမ​လေးက သူမ၏ဆရာနှင့် ​လေးစားရ​​သောအစ်ကိုကြီးမှ သူမ၏စကားကို ​ထောက်ခံ​နေကြသည်ကို ကြားလိုက်ရသည်။ သူမအပြုံး​ဖျော့​ဖျော့ကို ချိတ်ဆွဲလျက် သူငယ်ချင်းတစ်ဦးကိုဆုံးရှုံးလိုက်ရ​သော နာကျင်မှုကို ရင်ထဲမှ အနက်ရှိုင်းဆုံး​နေရာတွင် ၀ှက်ထားလိုက်​တော့သည်။

ထန်​မော့က​မေးလိုက်သည်။ 

"တခြား​ပြောစရာ​တွေရှိ​သေးလား" 

ချန်ရှန်းရှန်း ပြန်လည်တက်ကြွလာခဲ့သည်။

"ဒီတစ်ခုကကျွန်မ​သေချာတယ်.. ကျွန်မဂိမ်းက​နေထွက်လာ​တော့ ​မျှော်စင်ကကျွန်မကို ​မျှော်စင်ကိုဆက်ပြီးတိုက်ခိုက်ချင်လားလို့ ​မေးခွန်းတစ်ခု​မေးခဲ့တယ်...ကျွန်မ ငြင်းခဲ့တယ်​လေ...  ပြီး​တော့ အနက်​ရောင်​မျှော်စင်က ၃လကိုတစ်ခါ ကစားသမား​တွေက မတူညီတဲ့နယ်​မြေ​တွေက အနက်​ရောင်​​မျှော်စင်​တွေဆီသွားပြီး ​မျှော်စင်တိုက်ခိုက်ဖို့ ​ရွေးချယ်လို့ရတယ်လို့​ပြောခဲ့တယ်...တကယ်လို့ ၃လအတွင်း​မျှော်စင်ကို မတိုက်ခိုက်ဘူးဆိုရင် အတင်းအကြပ်ဆွဲသွင်းခံရမယ်တဲ့"

"​မျှော်စင်ကိုတိုက်ခိုက်ဖို့​ရွေးချယ်လို့ရတယ်လား" 

၄င်းမှာ ထန်​မော့အတွက် ပို​တောင် အံ့အားသင့်စရာ​ကောင်းလှသည်။ 

ချန်ရှန်းရှန်းက​ခေါင်းညိတ်လိုက်သည်။

"အနက်​ရောင်​မျှော်စင်ရဲ့စကားအရဆို ကစားသမားတစ်​ယောက်က ကိုယ့်သ​​ဘောနဲ့ကိုယ် အချိန်မ​ရွေး ​မျှော်စင်ကိုတိုက်ခိုက်လို့ရတယ်...ဒီလိုမဟုတ်ပဲ သူသတိ​ပေးတဲ့အချိန်မှတိုက်ခိုက်မယ်ဆိုရင်​တော့ ​ရွေးချယ်စရာ များများစားစားရှိမှာမဟုတ်ဘူး​လေ... ၃လအတွင်း​မျှော်စင်ကိုမတိုက်ခိုက်ဘူးဆိုရင် ​မျှော်စင်တိုက်ခိုက်ခြင်းဂိမ်းထဲ အတင်းအကြပ်ဆွဲသွင်းခံရမှာ"

​လော့ဖုန်းချန်းကလည်း ၀င်​ပြောလာခဲ့သည်။

"ကစားသမား​တွေက နယ်​မြေစုံက​နေ ​မျှော်စင်ကို တိုက်ခိုက်လို့လည်းရတယ်တဲ့ ဒီ​တော့ ထန်​မော့" 

​လော့ဖုန်းချန်းမှာထန်​မော့ကို ကြည့်လိုက်ကာ 

"ငါ ဂျက်နဲ့ ဖက်တီး​လေးတို့ ပုရှီကပြန်လာတာကို ​​စောင့်မယ်..  ပြီး​တော့ကစားသမား​တွေက ​မျှော်စင်ကို ဆန္ဒအ​​လျောက်တိုက်ခိုက်လို့ရမလား စမ်းကြည့်မယ်"

ချန်ရှန်းရှန်းမှာ အ​ရေးကြီး​​သော သတင်း၂ခုကို သူမနှင့်အတူယူ​ဆောင်လာခဲ့သည်။ 

​မျှော်စင်တိုက်ခိုက်ခြင်းဂိမ်းထဲတွင် မတူညီ​သောအဆင့်မှ ကစားသမားများ ပါ၀င်နိုင်သည်။ 

​ကစားသမားများမှာ ​မျှော်စင်ကို ဆန္ဒအ​လျောက်တိုက်ခိုက်နိုင်သည်။

ထန်​မော့က ဒုတိယတစ်ချက်ကို ပို၍ စိတ်၀င်စား​လေသည်။

ကစားသမားအများစုမှာ အန္တရာယ်များ​သော ​မျှော်စင်တိုက်ခိုက်ခြင်းဂိမ်းကို ၀င်လိုကြမည်မဟုတ်​ချေ။ ​မျှော်စင်တိုက်ခိုက်ခြင်းဂိမ်း၏ လွယ်ကူအဆင့်တွင်ပင် ​သေဆုံးသူအများကြီးရှိလေသည်။ ၃လမကုန်ခင်တွင် ကစားသမားအနည်းစုသာ ​မျှော်စင်ကိုတိုက်ခိုက်ရန်​ရွေးချယ်ကြလိမ့်မည်။ အနက်​ရောင်​မျှော်စင်မှာ အဘယ်​ကြောင့် ကစားသမားများကို ဤအခွင့်အ​ရေးမျိုး ​ပေးလာသနည်း။

သို့​သော် ​မျှော်စင်ကို ဆန္ဒအ​လျောက်တိုက်ခိုက်ရန်​ရွေးချယ်ခြင်းက အတင်းအကြပ်ဆွဲသွင်းခံရခြင်းထက် ပို၍​ကောင်းမွန်​လေသည်။

အသာစီးရမှု...

ထန်​မော့ အဓိကအချက်ကို​တွေးမိလျက် ​လော့ဖုန်းချန်းကို လှည့်ကြည့်လိုက်မိသည်။ ​လော့ဖုန်းချန်းမှာလည်း သူ့ကို ကြည့်​နေခဲ့​လေသည်။

​လော့ဖုန်းချန်းက ထန်​မော့၏မျက်နှာ​ပေါ်မှ သ​ဘော​ပေါက်သွားမှုကို မြင်လျှင် ​မေးလာခဲ့သည်။ 

"မင်းဒီ​လောက်မြန်မြန်နားလည်သွားတယ်လား...မင်းမလာခင်က ငါရှန်းရှန်းနဲ့​ဆွေး​နွေး​နေခဲ့တာ...သာမာန်ကစားသမား​တွေက​တော့ အကျိုးမရှိသ၍ ​မျှော်စင်ကို ကိုယ်ကစပြီး တိုက်ခိုက်ဖို့ဆန္ဒရှိကြမှာမဟုတ်ဘူး... ဖြစ်နိုင်​ချေနှစ်ချက်ရှိတယ်... ပထမတစ်ချက်က ​မျှော်စင်ကို ကိုယ်ကအရင်ဆုံးတိုက်ခိုက်ဖို့​ရွေးချယ်ခဲ့ရင် ဂိမ်းအမျိုးအစားနဲ့ ဂိမ်းရဲ့ ခက်ခဲမှုအဆင့်တို့ဘာတို့ကို ​ရွေးချယ်နိုင်တာ... ဒီဖြစ်နိုင်​ချေက​တော့အ​တော်​လေးနည်းတယ်...ဒုတိယတစ်ချက်က.."

ထန်​မော့တည်ငြိမ်စွာဆိုလာခဲ့သည်။ 

"​မျှော်စင်ကိုတိုက်ခိုက်ဖို့ဆန္ဒအ​လျောက်​ရွေးချယ်တဲ့ သူက ကိုယ့်ရဲ့အသင်း​ဖော်ကို ​ရွေးလို့ရမယ်"

ထန်​မော့ထို​ဆေးခန်းတွင် အ​​တော်ကြာကြာ​နေခဲ့​လေသည်။ ထို့​နောက်သူ၏ဒဏ်ရာများအား ကုသရင်းအနားယူရန် ပြန်သွားပြီး သူရရှိလာ​သော သတင်း၂ခုကို​ ဂရုတစိုက်တွေး​ရန်စဥ်းစားလိုက်သည်။ သူမထွက်ခွာခင်မှာပင် ​လော့ဖုန်းချန်းကဆိုလာသည်။ 

"မင်းဒဏ်ရာရထားတာပဲ လစ်ဇ်ကိုလုပ်ခိုင်းလိုက်ရမလား"

ထန်​မော့​ခေါင်းခါလိုက်သည်။

"အ​ပေါ်ယံ​လေး​တွေပါ...အလုပ်များစရာမလိုဘူး" 

​လော့ဖုန်းချန်းအတင်းမတိုက်တွန်း​တော့။ 

ထန်​မော့အခန်းထဲမှ ထွက်သွားရန်လှမ်းလိုက်စဥ် က​လေးမ​လေး၏အသံကို တဖန်ကြားလိုက်ရသည်။ 

"ပြောစရာကျန်သေးတယ် သတင်း​ကောင်းပါပဲ.." 

ထန်​မော့နှင့် ​လော့ဖုန်းချန်းမှာ သူမကိုလှည့်ကြည့်လိုက်ကြသည်။ 

​ကုတင်​ပေါ်တွင် က​လေးမ​လေးမှာ လဲ​လျောင်းလျက်သား သူမ၏မျက်နှာ​ပေါ်တွင် ​တွေ့ရခဲ​သော သူမ၏အရွယ်နှင့်ကိုက်ညီသည့် အပြုံးတစ်ခုကိုချိတ်ဆွဲလျက်

"အစ်ကိုထန် ဆရာ​လော့ ကျွန်မတရား၀င်ကစားသမားတစ်​ယောက်ဖြစ်လာပြီ..."

ထန်​မော့နှင့်​လော့ဖုန်းချန်းမှာ တုန်လှုပ်သွားခဲ့သည်။ 

လွန်ခဲ့​သောတစ်ခါက ထန်​မော့ ဂိမ်းတစ်ခုထဲကျခဲ့ဖူးကာ ထိုဂိမ်း၏ ​ဘော့စ်မှ​ပြောခဲ့ဖူးသည်။

"အရံကစားသမား​တွေလည်း ​မျှော်စင်ကိုတိုက်ခိုက်ပြီးရင် တရား၀င်ကစားသမား​တွေ ဖြစ်လာမှာ။" 

ထန်​မော့ဤအ​ကြောင်းကို ​မေ့​လျော့​နေခဲ့သည်မှာ အ​တော်ကြာ​လေပြီ။

ကမ္ဘာကြီးအွန်လိုင်း​ပေါ်တက်လာသည်မှာ ၂လခန့်ရှိပြီဖြစ်​​သော်လည်း သူ တရား၀င်ကစားသမားဖြစ်လာ​သော အရံကစားသမားတစ်ဦးကိုမျှ မ​တွေ့ဖူးခဲ့​ချေ။ ​ပွေးကြီးက လိမ်ခဲ့ခြင်းသာဖြစ်ပြီး အရံကစားသမားများက တရား၀င်ကစားသမားဖြစ်မလာတာလည်း ဖြစ်နိုင်​လေသည်။ ယခုမူချန်ရှန်းရှန်းမှာ သူမတရား၀င်ကစားသမား ဖြစ်လာပြီဟု ဆိုလာ​ချေပြီ။

သို့ဆိုလျှင် အရံကစားသမားများရှင်းလင်းရန်လိုအပ်​သောဂိမ်းမှာ သာမာန် ​အနက်​​ရောင်​မျှော်စင်ဂိမ်းမဟုတ်ပဲ အနက်​ရောင်​မျှော်စင်တိုက်ခိုက်ခြင်းဂိမ်းသာဖြစ်​ပေလိမ့်မည်။

ထန်​မော့မှာ ၄င်းကိုနားလည်သွားလျှင် ရယ်ရအခက်ငိုရအခက်ဖြစ်သွားခဲ့သည်။

တရား၀င်ကစားသမားတိုင်းတွင် စွမ်းရည်များရှိကြသည်။ ​လော့ဖုန်းချန်းစိတ်အပူဆုံးမှာ ချန်ရှန်းရှန်း၏စွမ်းရည်အမျိုးအစားဖြစ်​လေသည်။ ချန်းရှန်းရှန်းသည်လည်း ၄င်းကို သိချင်​နေခဲ့သည်။ သူမအ​နေနှင့် စွမ်းရည်တစ်ခုကိုရရှိလိုက်သည်ဟုလည်းမခံစားရ​ချေ။ သူမမှာ အရာ၀တ္တုများကို မ​ရွေ့နိုင်သလို ပိုလည်း သန်မာမလာခဲ့။ တရား၀င်ကစားသမားဖြစ်လာသည့်တိုင် ထူးထူးခြားခြား​ပြောင်းလဲမှုမျိုးမရှိခဲ့​ချေ။

ထန်​မော့ကဆိုလိုက်သည်။ 

"မင်းရဲ့စွမ်းရည်က မသိသာတာမျိုးဖြစ်နိုင်တယ်...ဥပမာ... ကိုယ့်ကိုယ်ကိုကုသစွမ်းရည် ဒါမှမဟုတ် ဦး​နှောက် သိပ်​ကောင်းတာမျိုး​ပေါ့" 

​လော့ဖုန်းချန်းနှင့် ချန်ရှန်းရှန်းသည်လည်း ၄င်းကို​တွေးလိုက်ကြသည်။

*****

ထန်​မော့ သူအိပ်စက်​နေကြ ကားဆီ အမြန်သွားလိုက်သည်၊ ထို့​နောက်ကားထဲသို့၀င်ပြီးလျှင် ​​လေထဲမှ စာအုပ်ကိုဆွဲထုတ်လျက် စာမျက်နှာ ၅မျက်နှာ​မြောက်ကို လှန်လိုက်​လေသည်။ မှိန်​ဖျော့​ဖျော့ဓါတ်မီး​ရောင်​အောက်တွင် အနက်​ရောင်စာ​ကြောင်း​လေးများ တဖြည်းဖြည်း​ပေါ်လာခဲ့သည်။ ထန်​မော့၏မျက်လုံးများမှာ ဒုတိယစာ​ကြောင်း​ပေါ် ​ရောက်ရှိသွားခဲ့သည်။

[ပိုင်ရှင်: ချန်ရှန်းရှန်း (အရံကစားသမား)] 

ထန်​မော့ထိုစာ​ကြောင်းကိုစိုက်ကြည့်​နေစဥ် အစွန်ဆုံးမှ စာလုံးတ်ို့တဖြည်းဖြည်း ​ပြောင်းလဲသွားခဲ့သည်။

[ပိုင်ရှင်: ချန်ရှန်းရှန်း(တရား၀င်ကစားသမား)]

တကယ်ကြီး​ပြောင်းသွားတယ်...

ထန်​မော့စာမျက်နှာ​ပေါ်မှ အခြားစာပိုဒ်များကို ဂရုတစိုက်ကြည့်လိုက်သည်။ ထိုပိုင်ရှင် စာ​ကြောင်းမှလွဲလျှင် ကျန်သည့်စာ​ကြောင်းများမှာ ​ပြောင်းလဲခြင်းမရှိ​ချေ။ ချန်ရှန်းရှန်းက ​မျှော်စင်ပထမထပ်ကို ရှင်းခဲ့ပြီဖြစ်၍ သူမ၏စွမ်းရည်မှာ လွန်ခဲ့​သောလ၀က်ကထက် တိုးလာပြီးဖြစ်လိမ့်မည်။ ထန်​မော့သည်လည်း သူမနှင့်စကား​ပြောရင်း ၄င်းကို ခံစားမ်ိလေသည်။

သူမ၏အ​တွေးများမှာပိုရှင်းလင်းလာသည်။ ပိုင်းခြား​ဝေခွဲတတ်မှု နှင့် ထိုးထွင်းသိမြင်မှုကလည်း ပိုစူးရှလာခဲ့သည်။

သို့​သော်ထန်​မော့စာအုပ်ထဲတွင်​တော့ သူမ၏စွမ်းရည်မှာ အဆင့်၃မှမတက်​သေး​ချေ။ 

"သူ့စွမ်းရည်အဆင့်တိုးမလာတာမဟုတ်ရင် ငါသူ့ရဲ့စွမ်းရည်ကို လက်ခံရပြီးကတည်းက ငါ့ဆီမှာရှိတဲ့စွမ်းရည်ဟာ သူနဲ့မဆိုင်​တော့တာလည်း ဖြစ်နိုင်တယ်...သူ့စွမ်းရည်ပိုတိုးလာရင်​တောင် ငါစု​ဆောင်းထားတဲ့စွမ်းရည်က တိုးမလာ​တော့ဘူး"

ဒုတိယအချက်က ပိုဖြစ်နိုင်သည်ဟု ထန်​မော့​တွေးလိုက်မိသညိ။

အကယ်၍ ထန်​မော့စု​ဆောင်းမိ​သောစွမ်းရည်များက ၄င်းတို့၏မူလပိုင်ရှင်နှင့်အတူ တိုးတက်လာနိုင်သည်ဆိုပါက ဤစွမ်းရည်စာအုပ်မှာ BUG  တစ်ခုဖြစ်သွားလိမ့်မည်။ ထန်​မော့ထိုမျှ ​လောဘမကြီး​ချေ။ ထိုစွမ်းရည်စာအုပ်ကို ညင်သာစွာ ပိတ်လိုက်သည်။ သို့​သော် သူစာအုပ်ကိုပိတ်​နေစဥ် ရုတ်ချည်း အံ့အားသင့်သွားမိ​လေသည်။

ထန်မော့စွမ်းရည်စာအုပ်ကို ပြန်ဖွင့်လျက် ​နောက်ဆုံးစာမျက်နှာကို လှန်လိုက်​လေသည်။ 

[စွမ်းရည်: ငါ့ရဲ့ အရည်လဲ့​နေတဲ့ မျက်လုံး၀ိုင်းကြီး​တွေကို ကြည့်လိုက်စမ်း] 

[ပိုင်ရှင်: ရှင်းဖုန်း (တရား၀င်ကစားသမား)] 

[အမျိုးအစား: ရှယ်] 

[အ​သုံးပြုပုံ: လူနှင့် သတ္တ၀ါ​တွေကို အန္တာရယ်မ​ပေးနိုင်တဲ့ သနားကမားမျက်နှာ​လေးရှိ။ စကား​ပြောပုံ လုပ်ပုံကိုင်ပုံ​တွေကို ကျန်လူ​တွေဆီကအသိအမှတ်ပြုခံရတတ်။ ဤစွမ်းရည်ကိုအသုံးပြုလိုက်သည်နှင့် တစ်ဖက်ကစားသမားမှ မိမိိ​ပေါ်သ​ဘော​ထား​ပြောင်းသွားမည်။ စွမ်းရည်ကိုမသုံးရင်​တောင် ရုပ်က​လေးက​တော့ သနားကမား​လေးဖြစ်​နေတုန်းပဲ​လေ]

[အဆင့်:၂]

[ကန့်သတ်ချက်: စွမ်းရည်ကို အသုံးပြု​နေစဥ် ပစ်မှတ်၏ မျက်လုံးကို အနည်းဆုံး၅စက္ကန့်ကြာစိုက်ကြည့်ရမည်]

[မှတ်ချက်: ဟယ်လို သူများကိုကြည့်ပါဦး သူများရဲ့အရည်လဲ့​နေတဲ့မျက်လုံးကြီး​တွေကို ကြည့်ပါဦးလို့ ဘလင်း ဘလင်း ဘလင်း] 

[ထန်​မော့ဗားရှင်း အသုံးပြုရန်အညွှန်း: တစ်​နေ့တွင်တစ်ကြိမ်သာ အသုံးပြုနိုင်။ ပစ်မှတ်နှင့် အနည်းဆုံး ၁၀စက္ကန့်အကြည့်ချင်းဆုံးရမည်။ ထန်​မော့က သူများတကာကို စိုက်ကြည့်ချင်​နေတယ်ဆိုတာ ငါသိသားပဲ။ အခု​တော့သူ့မှာ အ​ကြောင်းပြချက်ရှိသွား​ရော​ပေါ့]

🌍