MM Story Teller

Chapter 68

Viewers 7k

🌍Chapter 68

ထိုကြက်သီးထဖွယ် မယ်ရီခရစ်စမတ်သီချင်းအဆုံးသတ်တွင် နေရောင်ခြည်မှာ အနောက်အရပ်သို့ စုန်းစမြုပ်ပျောက်ကွယ်သွားတော့သည်။

ခရစ်စမတ်ပွဲတော်ကား စတင်လေပြီ။

ထန်မော့သူ၏ပစ္စည်းများကို အလျင်အမြန်စစ်ဆေးလျက် ထီးကလေးနှင့် မီးခြစ်ဆံကြီးမှာ ကိုယ်နှင့်မကွာ ရှိမရှိ အတည်ပြုလိုက်သည်။ ထို့နောက်တွင် သူနှင့်မီတာ ၅၀အကွာမှ စတိုးဆိုင်လေး တစ်ခုထံ တရှိန်ထိုးပြေးသွားလိုက်လေသည်။ ထိုစတိုးဆိုင်လေးမှာ ကစားသမားများထံမှ မွှေနှောက်ခံထားရပြီးပုံပေါ်သည်။ စင်ပေါ်မှ ရေနှင့်စားစရာများတစ်ခုမျှမကျန်ရှိတော့ချေ။ ထန်မော့သည် ငွေရှင်းကောင်တာ အံဆွဲထဲမှ ခဲတံချွန်ဓါးလေးနှင့် ဘတ်ထရီနှစ်ခုကိုသာ တွေ့ခဲ့ရသည်။

သူ လီပင်းထံမှရရှိခဲ့သော ဓါတ်မီးကိုသာဆက်တိုက်အသုံးပြုနေခဲ့ခြင်းဖြစ်ကာ မည်သည့်အချိန်တွင် အားကုန်သွားမလဲ မသိနိုင်ပေ။ အကယ်၍ထပ်၀င်ရမည့် ဂိမ်းမှာ ပွေးကြီး၏ဂူကဲ့သို့မှောင်မိုက်သောနေရာမျိုးဖြစ်နေခဲ့လျှင် သူအလင်းရောင်ကို ကြိုတင်ပြင်ဆင်ထားရန်လိုအပ်လေသည်။

၄င်းတို့အားလုံးအဆင်သင့်ဖြစ်ပြီးနောက် ထန်မော့သည် စတိုးဆိုင်၏နံရံပေါ်မှ နာရီကိုကြည့်လိုက်မိသည်။

စက္ကန့်လက်တံမှာ ၁၂ဂဏန်းဆီသို့ တဖြည်းဖြည်းရွေ့လျားနေခဲ့သည်။ ၃မိနစ်ကျော်လွန်သွားချိန်တွင် ထန်မော့အသက်ကိုရှုထုတ်လျက် ဂိမ်းထဲသို့ဆွဲသွင်းခံရရန် အဆင်သင့်ဖြစ်နေခဲ့ချေပြီ။ သို့သော် စက္ကန့်လက်တံတစ်ချက်ရွေ့လျားသွားပြီးနောက်...

ထန်မော့၏ရင်ထဲမှ တင်းကြပ်သွားလျက် မှောင်မည်းကာ တိတ်ဆိတ်နေသော စတိုးဆိုင်ထဲတွင် ထရပ်လိုက်မိသည်။ ထို့နောက်သူ၏အကြည့်တို့မှ နံရံပေါ်မှ နာရီထံတွင် မြဲမြံနေခဲ့သည်။

စက္ကန့်လက်တံမှာ ရွေ့လျားနေဆဲ။

ထန်မော့ ရင်ထဲမှ တိုးတိတ်စွာ အချိန်ကို ရေတွက်နေခဲ့သည်။ သူသည် အနက်ရောင်မျှော်စင်မှ ဟွာရှားကစားသမားများအား ၃မိနစ်အတွင်း ဂိမ်းထဲသို့၀င်ရောက်ရန် ကြေညာချက်ကို ရေတွက်နေမိသည်။ စတိုးဆိုင်ထဲသို့ရောက်ရှိရန် ၁မိနစ်နှင့် မိနစ်၀က်ကြာခဲ့ပြီး ကျန်တစ်မိနစ်နှင့် မိနစ်၀က်ကိုတော့ ပစ္စည်းများကို ရှာဖွေရန်အသုံးပြုခဲ့လေသည်။

ယခုအချိန်အထိဆိုလျှင် ၄မိနစ်ခန့်ကျော်လွန်သွားချေပြီ။

သို့သော် အခုချိန်အထိ ဂိမ်းထဲဆွဲခေါ်မခံရသေးချေ။

ထန်မော့သည် ထိုအတိုင်း ငြိမ်သက်စွာ ရပ်တန့်နေမိသည်။ ၁မိနစ်ကျော်လွန်သွားပြီးသည့်တိုင် သူယခုထိဂိမ်းထဲဆွဲခေါ်မခံရသေးချေ။ ထီးကလေးကို ကိုင်လျက်သားသူ စတိုးဆိုင်ထဲမှ ထွက်လာခဲ့သည်။

ထန်မော့ မောလ်သို့ပြန်သွားရန်ဆုံးဖြတ်လိုက်သည်။ လောလောဆည် တိုက်အဖွဲ့အစည်း၏တည်နေရာနှင့် ၂ကီလိုမီတာအကွာသာလျှင် ရှိသေးသည်ပင်။ သူ့ကဲ့သို့ပင် လူတိုင်းမှာ ဂိမ်းထဲသို့ဆွဲခေါ်မခံရသေးသည်လား အတည်ပြုကြည့်လိုသည်။

ထန်မော့အလွန်လျှင်မြန်စွာလျှောက်သွားလိုက်သည်။ သူသည် ထီးကလေးကို တင်းကြပ်စွာ ဆုပ်ကိုင်လျက် ကြုံလာရနိုင်သော အန္တရာယ်များအတွက် အသင့်ပြင်ထားခဲ့သည်။

လမ်းတစ်ဖက်ကို ပြန်ကူးလိုက်စဥ်မှာပင် ကောင်းကင်ပေါ်မှ ကျယ်လောင်သော မီးရှူးမီးပန်းသံများကိုကြားလိုက်ရလေသည်။ ထန်မော့ချက်ချင်းမော့ကြည့်လိုက်မိသည်။

ရောင်စုံ မီးရှူးမီးပန်းများမှာ အနက်ရောင်ကောင်းကင်ကြီးပေါ်တွင် အလွန်အမင်းတောက်ပနေခဲ့သည်။

ထိုမီးရှူးမီးပန်းများတွင် အရွယ်မတူညီသော ‘□□’

ပုံစံလေးများပါရှိကာ တဖြည်းဖြည်းကောင်းကင်ပေါ်မှ မြေပြင်ပေါ်သို့ကျဆင်းလာခဲ့ကြသည်။ မြေပြင်နှင့် ၁၀ကီလိုမီတာခန့်အကွာတွင် ထို ‘□□’ သဏ္ဍာန်၅ခုမှာ ရုတ်ချည်းပေါက်ကွဲသွားခဲ့သည်။

ထို ‘□□’ သဏ္ဍာန်၅ခုထံမှ ထပ်ဆင့်ပေါက်ကွဲထွက်လာသော မီးရှူးမီးပန်းများမှာ မဟူရာညကောင်းကင်အား ပိတ်ကားတစ်ချပ်သဖွယ် လွှမ်းခြုံသွားလျက် ကြီးမားသော ပုံကြီးတစ်ပုံကို ပုံဖော်ပြလာခဲ့သည်။

ထူထဲလှသော အဖြူရောင်မုတ်ဆိတ်များ၊ ထိပ်ဖျားတွင် အဖြူရောင်အလုံးလေးပါရှိသောအနီရောင်ဦးထုပ်ရှည်နှင့် ထိုမီးရှူးမီးပန်းများမှာ ကြီးမားလှသော စန်တာကလော့၏ရုပ်ပုံကြီးကို ပုံဖော်လာခဲ့သည်။ ဤရုပ်ပုံမှ ရှန်ဟိုင်း၏ကစားသမားတိုင်း၏ မျက်လုံးထဲတွင် အရိပ်ထင်နေခဲ့လေသည်။ ထိုစန်တာကလော့ပုံစံတဖြည်းဖြည်းမှိန်ဖျော့သွားလျှင် ကောင်းကင်ပေါ်မှ ရုတ်ချည်း ရယ်မြူသံတစ်ခုကို ကြားလိုက်ရလေသည်။

ထန်မော့၏ရင်ထဲမှ တင်းကြပ်သွားမိသည်။

ထိုအသံမှာဘာကိုဆိုလိုမှန်း သူနားလည်မိသွား၍ပင်။

မြောက်၀င်ရိုးစွန်းသမင်းလေးကောင်မှာ စန်တာကလော့ပုံမီးရှူးမီးပန်းများထံမှဖောက်ထွက်လာခဲ့လေသည်။

"ဟိုးဟိုးဟိုး...ကလေးတွေအားလုံးပဲ မယ်ရီခရစ်စမတ်ပါကွယ်..."

ထိုသမင်လေးကောင်မှာ တောက်ပသောအနီရောင်စွပ်ဖားတစ်ခုကိုဆွဲလျက် ကောင်းကင်ပေါ်တွင်ပျံသန်းနေခဲ့သည်။ သူတို့သည် အဖြူရောင်မုတ်ဆိတ်နှင့် အဘိုးအိုတစ်ဦးကိုသယ်လျက် ရှန်ဟိုင်းမြို့တခွင်အပေါ်မှ ပျံသန်းနေခဲ့လေသည်။ ထိုအဘိုးကြီးမှ သူ၏လက်မှ ခြူလုံးကလေးကို လှုပ်ခါလျက်ရယ်မောလိုက်သည်။ ထို့နောက်တွင် ထိုရယ်မောသံနှင့်အတူ မြေပြင်ပေါ်သို့ ကြယ်မှုန်များ လက်တစ်ဆုပ်စာ ပက်ဖျန်းလိုက်လေတော့သည်။

စန်တာ၏စွပ်ဖားမှာ အလွန်လျင်မြန်လှသည်။ ၄င်းမှာပူဒုန်ခရိုင်ကိုဖြတ်သွားပြီးနောက် နန်ဖူတံတားကို ကျော်လျက် ပူရှီခရိုင်ထံသို့ ဦးတည်သွားတော့သည်။

ကောင်းကင်ပေါ်တွင် မရေတွက်နိုင်သော ကြယ်မှုန်များမှာ နှင်းပွင့်များနှယ် မြေကြီးပေါ်သို့ကျဆင်းလာနေခဲ့သည်။ ထိုအရာများမှာ လွန်စွာတောက်ပပေသည်။ မြေပြင်ပေါ်တွင် ထိုကြယ်မှုန်များမှာ တဖိတ်ဖိတ်တောက်ပနေခဲ့သည်။

တချိန်ထဲမှာပင် ကလေးငယ်တစ်ဦး၏ စူးရှသော ကြေညာသံက ရှန်ဟိုင်းတစ်ခွင်ပျံ့နှံ့သွားခဲ့ပြန်သည်။

"တင်းတောင်~ မစ်ရှင်ခွဲ ၁ကိုအသက်သွင်းလိုက်ပါပြီ စန်တာကလော့ချန်ထားခဲ့တဲ့ ခရစ်စမတ်သစ်ကိုင်းလေးတွေကိုရှာပြီး မိနစ်၃၀အတွင်း အံ့သြဖွယ် ခရစ်စမတ်ဂိမ်းကလေးကို ၀င်ရောက်ဆင်နွှဲပေးကြပါနော်"

ဤကြေညာသံအား တရုတ်တပြည်လုံး တချိန်ထဲတွင် ကြားလိုက်ရခြင်းပင်။ တရုတ်ပြည်ရှိ အနက်ရောင်မျှော်စင်တိုင်း၏ အနီးတွင် စန်တာကလော့ပေါ်လာခဲ့ပြီး ကြယ်မှုန်များဖြင့်ပင်ဖြန်းခံရလေသည်။

ထိုကြေညာသံကိုကြားသည်နှင့် ထန်မော့ဘေးသို့ချက်ချင်းလှည့်ကာအနီးဆုံး ကြယ်ပွင့်တစ်ခုဆီပြေးသွားလိုက်လေသည်။ သို့သော် သူအနည်းငယ်နောက်ကျသွားဆဲပင်။ သူထိုအနီးအနားသို့ရောက်သွားချိန်တွင် မျက်မှန်နှင့် ၁၇နှစ်အရွယ်ကောင်လေးတစ်ဦးမှာ ထိုကြယ်လေးကို ကောက်ယူလိုက်ပြီးဖြစ်သည်။

ထိုကောင်လေး၏လက်မှာ ကြယ်ကလေးကို ထိသွားသည်နှင့် အလင်းမှာမှိန်ဖျော့သွားလျက် သာမာန်သစ်ကိုင်းလေးတစ်ကိုင်းအဖြစ်ပြောင်းလဲသွားခဲ့လေသည်။

ထိုကောင်လေးမှာ ထန်မော့ကိုမြင်လျှင် သတိထားသောအမူအယာမျိုးပြုလုပ်လာခဲ့သည်။ သို့သော် သူဘာမှမလုပ်ရသေးခင်မှာပင် ထိုသစ်ကိုင်းကိုကိုင်လိုက်ပြီးနောက် ထိုကောင်လေး၏ခန္ဓာကိုယ်မှု တဖြည်းဖြည်းမှိန်ဖျော့ပျောက်ကွယ်သွားတော့သည်။

ဤသည်မှာ ဂိမ်းထဲသို့အောင်မြင်စွာ ၀င်ရောက်သွားနိုင်ခြင်းပင် ဖြစ်လိမ့်မည်။

ထန်မော့လည်း တုန့်ဆိုင်းမနေပဲ နောက်ထပ်ကြယ်တစ်ခုပြုတ်ကျလာရာထံ အလျင်အမြန်ပြေးသွားလိုက်ပြန်သည်။

သို့သော်မမီလိုက်ပြန်ချေ။

သူသည် ကြယ်နေရာ၁၀ခုဆက်တိုက် ပြေးလွှားနေခဲ့ရသည်။ တခါတရံတွင် သူကလမ်းတစ်၀က်သာရှိသေးသော်လည်း ထိုအလင်းရောင်မှာ ပျောက်ကွယ်သွားတတ်သည်။ ၄င်းမှာတစ်စုံတစ်ယောက်က ၄င်းကိုကောက်ယူကာဂိမ်းထဲသို့၀င်သွားသည်ဟူသော အဓိပ္ပါယ်ပင်။ တခါတရံတွင်လည်း အခြားကစားသမားက ဂိမ်းထဲ၀င်သွားသည်ကိုသာ ရပ်ကြည့်နေခဲ့ရလေသည်။

မိနစ်များကျော်လွန်သွားလျက် ၅မိနစ်မျှသာကျန်ရစ်တော့သည့်အချိန်ကိုရောက်လာချေပြီ။ စက်ရုံရှေ့မှ ကွက်လပ်တွင် ကြယ်ကလေးတစ်ခုမှာ တိတ်တဆိတ်ပြုတ်ကျနေပြီး အနီးအနားတွင် အခြားကစားသမားများလည်းရှိမနေခဲ့ချေ။

သူ၏မျက်လုံးများတောက်ပသွားလျက် ထန်မော့၏လက်မှာ ထိုကြယ်လေးအားထိလုထိဆဲမှာပင် ရုတ်ခည်းပြန်ဆုတ်လိုက်ရသည်။ သူယခုလေးတင်ဆုတ်လိုက်သောနေရာတွင် ချွန်ထက်သော ဘိုးမရင်းတစ်ခုပေါ်လာခဲ့သည်။ အကယ်၍ ထန်မော့သာ အမြန်မဆုတ်လိုက်ပါက သူ၏လက်မှာ ထုတ်ချင်းပေါက်သွားလောက်သည်။

သူချက်ချင်းလှည့်ကြည့်လိုက်မိသည်။

ကုတ်အင်္ကျီ၀တ်ဆင်ထားသောမိန်းကလေးတစ်ဦးမှာ သူ့အား အေးစက်စွာ ကြည့်နေခဲ့သည်။ သူမ၏ညာလက်ကိုမြှောက်လိုက်ပြီး အဝေးမှ သူမထံတပါတ်ပြန်လည်လာသော ဘိုးမရင်းကိုလှမ်း၍ဖမ်းလိုက်လေသည်။

လူနှစ်ဦးမှာ ၁၀မီတာခန့်အကွာတွင် ရပ်လျက် တစ်ဦးကို တစ်ဦးကြည့်နေခဲ့ကြလေသည်။

နောက်ထပ်စက္ကန့်အနည်းငယ်အတွင်း လူနှစ်ဦးမှာ တချိန်တည်းလှုပ်ရှားလိုက်ကြသည်။ ထန်မော့မှာ စကားစုကိုရွတ်ဆိုလျက် ထီးကိုဖွင့်လိုက်ကာ သူ့ရှေ့သို့ကာကွယ်လိုက်သည်။ ထိုအမျိုးသမီးမှာ လက်ကိုဝေ့လျက် ထက်မြသော ဘိုးမရင်းမှာ ၁၈၀ဒီဂရီပါတ်သွားပြီး ထန်မော့၏ကျောဘက်သို့တိုက်ခိုက်လာခဲ့သည်။

ထန်မော့ထီးကိုနေရာရွေ့လျက် သူ၏နောက်ကျောကို ကာလိုက်သည်။ ဘိုးမရင်းမှာ ထီး၏မျက်နှာပြင်အား အရှိန်ပြင်းစွာ၀င်တိုက်လျက် ထန်မော့အား နောက်တစ်လှမ်းဆုတ်သွားစေလျက် ခရစ်စမတ်သစ်ကိုင်းထံမှ ဝေးကွာသွားစေခဲ့လေသည်။

အမျိုးသမီးမှာ ဘိုးမရင်းကိုဝေ့ယမ်းလိုက်ပြီး ထိုကြယ်လေးဆီသို့ အမြန်ပြေးလိုက်သည်။

ထန်မော့မှာ ထီးကလေးဖြင့် ထိုဘိုးမရင်း၏ တိုက်ခိုက်မှုများကို ဆက်တိုက်ကာကွယ်ထားခဲ့သည်။ ပန်းရောင်ထီးကလေးမှာ ချွန်ထက်သော ဘိုးမရင်းနှင့်ထိခတ်မိရင်း ကျယ်လောင်သောအသံများကို ထွက်ပေါ်လာစေသည်။ ထန်မော့မြေကြီးပေါ် လက်တစ်ဖက်ထောက်လျက် ဘိုးမရင်းကိုရှောင်လိုက်ကာ တချိန်တည်းမှာပင် သူကထီးကိုပိတ်လိုက် ထိုအမျိုးသမီးခေါင်းအနောက်ဘက်သို့ချိန်လိုက်သည်။

ထိုအမျိုးသမီးမှာ ကြယ်ကလေးကို ထိလုဆဲဆဲပင်။ သူမမှာ ထန်မော့သည် ဘိုးမရင်း၏တိုက်ခိုက်မှုကို ကာကွယ်နေရင်း သူမကိုပြန်လည်တိုက်ခိုက်နိုင်လိမ့်မည်ဟု မမျှော်လင့်ထားချေ။ သူမသည် သူမ၏ပုခုံးသို့ဖောက်၀င်လာသော ထီးကလေးကိုမရှောင်နိုင်လိုက်။ သူမအလွန်ဒေါသထွက်သွားခဲ့သည်။ သူမသည် သူမ၏စွမ်းရည်ထိန်းချုပ်မှုတွင် အာရုံအပြည့်အဝစိုက်ထားလိုက်ပြီး ထန်မော့ကို ဆက်တိုက်ဆိုသလိုတိုက်ခိုက်လာခဲ့လေတော့သည်။

ထန်မော့သည် ညစ်ပေမှာကိုဂရုစိုက်မနေပဲ မြေကြီးပေါ်တွင်လှိမ့်လျက်ရှောင်လိုက်ပြီး ကြယ်ကလေးကိုဖမ်းဆုပ်လိုက်သည်။

အမျိုးသမီးမှာ ပေါက်ကွဲစွာ အော်ဟစ်လာခဲ့သည်။

"နင်..."

ဘန်း

ထန်မော့ထီးကလေးကိုဖွင့်လျက် ဘိုးမရင်း၏တိုက်ခိုက်မှုကိုကာကွယ်လိုက်သည်။ ထို့နောက်သူသည် ထီးကိုအသာအယာသိမ်းလျက် မနီးမဝေးတွင်ရပ်နေသော ကုတ်အင်္ကျီ၀တ်အမျိုးသမီးကို အမူအယာမဲ့စွာ ကြည့်လိုက်သည်။ ထိုအမျိုးသမီးမှာ အလွန်ပေါက်ကွဲနေသည့်တိုင် သူမတွင် အချိန်မရှိတော့ချေ။ သူမမှာ ထန်မော့ကို မကျေမနပ်ကြည့်လျက် နောက်ထပ် ကြယ်ပွင့်တစ်ခုဆီပြေးသွားရန်သာတတ်နိုင်လေသည်။

ထန်မော့၏ကိုယ်မှာ တဖြည်းဖြည်းမှိန်ဖျော့ပျောက်ကွယ်သွားလျက် အနက်ရောင်မျှော်စင်၏ကြေညာသံကို သူ၏ခေါင်းထဲတွင် ကြားလိုက်ရလေသည်။

"တင်းတောင်~မစ်ရှင်ခွဲပြီးမြောက်သွားပါပြီ ကစားသမားဟာ တရုတ်ပြည်ခရိုင် ၂ နံပါတ် ၄၁၉ခုမြောက် အံ့အားသင့်ဖွယ် ခရစ်စမတ်ဂိမ်းကလေးထဲ၀င်ရောက်လာပါပြီ"

"ကစားသမား၏အချက်အလက်များကို စီစစ်နေပါသည်"

"ဂိမ်း၏အချက်အလက်များကို စီစစ်နေပါသည်..."

တောက်ပသော အဖြူရောင်အလင်းတစ်ခုမှာ သူ၏မျက်လုံးထဲဖျတ်ခနဲလက်သွားလျက် ထန်မော့မျက်လုံးပြန်ဖွင့်လိုက်ချိန်တွင် အဖြူရောင်ကမ္ဘာကြီးတစ်ခုထံရောက်ရှိနေခဲ့လေသည်။ သူသည်မျက်တောင်ကိုတဖြည်းဖြည်းချင်းခတ်နေရင်း ထီးကလေးကို ဆုပ်ကိုင်ထားမိလေသည်။ မွန်းစတားများရုတ်တရက်ပေါ်လာပြီးတိုက်ခိုက်လာမည်ကို သူစိုးရိမ်နေခြင်းပင်။ သို့သော် ထိုအဖြူရောင်အလင်းကတဖြည်းဖြည်းမှိန်ဖျော့သွားချိန်တွင် ထန်မော့လည်း ဂိမ်း၏တည်နေရာကို မြင်လိုက်ရတော့သည်။

ဤသည်မှာ အလျား၅ပေ အနံ ၅ပေကျယ်၀န်းသောအဖြူရောင်ကမ္ဘာတစ်ခုပင်။ ကြမ်းပြင်မှာ အနက်ရောင်အကွက် ၄ကွက်စီအဖြစ်ပိုင်းခြားခံထားရပြီး တစ်ကွက်ချင်းစီမှာ ၅မီတာရှည်ကာ ၂.၅မီတာကျယ်လေသည်။ ထန်မော့၏နေရာမှာမူ ညာဘက်ထောင့်စွန်းမှ အဖြူရောင်အကွက်ဖြစ်သည်။ သူလှည့်ကြည့်လိုက်လျှင် သူ၏ဘေးမှ လူ၃ယောက်ကို တွေ့လိုက်ရလေသည်။

သူတို့၄ဦးလုံးမှာ အတန်းလိုက်ရပ်နေကြခြင်းဖြစ်ပြီး ထန်မော့က ညာဘက်အစွန်ဆုံးတွင်ဖြစ်သည်။ သူ၏ဘယ်ဘက်တွင် သူနှင့်ရွယ်တူဟုထင်ရသော ကောင်လေးတစ်ယောက်နှင့် ၄င်း၏ဘေးတွင် အထက်တန်းကျောင်းသူတစ်ဦးပင်။ ဘယ်ဘက်အစွန်ဆုံးတွင်တော့ သက်လတ်ပိုင်းအရွယ်အမျိုးသမီးတစ်ဦးပင်။

လူ၄ယောက်မှာ တစ်ဦးကိုတစ်ဦး သတိနှင့် အပြန်အလှန်စိုက်ကြည့်လျက် ကိုယ်ပိုင်လက်နက်ကိုယ်စီကို ကိုင်ထားကြလေသည်။

ထိုအချိန်တွင် မိုးချိန်းသံနှယ်အသံတစ်ခုကိုကြားလိုက်ရလေသည်။ လူ၄ယောက်မှာ ထိုအသံလာရာဆီသို့ ချက်ချင်းလှည့်ကြည့်လိုက်ကြသည်။

သူတို့၏ရှေ့တွင် အဖြူရောင်နံရံက မြင့်တက်သွားခဲ့ပြီး တဖက်ခြမ်းမှ မြင်ကွင်းကိုပြသလာခဲ့သည်။ ထန်မော့သည် မြင့်တက်သွားသော အဖြူရောင်နံရံအား သတိဖြင့်ကြည့်နေခဲ့သည်။

"ဒါက အဖြူရောင်ကမ္ဘာမဟုတ်ဘူးပဲ ခွဲခြားထားတဲ့ကမ္ဘာပဲ ဒီနံရံရဲ့တဖက်ခြမ်းမှာ"

ထို့နောက်သူတဖက်ခြမ်းကိုကြည့်လိုက်သည်။

အမှန်တကယ်ကိုပင် ထိုမျက်နှာချင်းဆိုင်၌ ထန်မော့တို့ ၄ဦးကဲ့သို့ပင် လု၄ယောက်မှာ အတန်းလိုက်ရပ်နေခဲ့ကြသည်။

အဖြူရောင်ကမ္ဘာကြီးမှာ လူ၈ဦး၏ မြင်ကွင်းကို ဖွင့်ပေးလာခဲ့လေသည်။

၎င်းမှာ ၁၀မီတာခန့်ရှည်သော နေရာတစ်ခုဖြစ်ပြီး ကစားသမား ၄ဦးစီမှာ အကွက်လေးကွက်စီ၌ ရပ်နေခဲ့ကြသည်။ နှစ်ဘက်လုံး၏ အလယ်တွင် ၅မီတာခန့်အကျယ်အ၀န်းရှိလေသည်။ အလယ်တွင် ရွှေရောင်ကြယ်တစ်လုံးကတွဲလွဲခိုလျက် နွေးထွေးတောက်ပသောရွှေရောင်အလင်းကိုထုတ်လွှတ်နေခဲ့သည်။

ထန်မော့သည် သူနှင့်မျက်နှာချင်းဆိုင်မှကစားသမား ၄ဦးကို ကြည့်လိုက်မိသည်။ သို့သော် သူသေချာအကဲမခတ်ရသေးခင်မှာပင် ကျယ်လောင်သောအသံတစ်ခုကို ကြားလိုက်ရပြန်သည်။

ဘုန်း...

ငလျင်တစ်ခုနှယ် အဖြူရောင်ကမ္ဘာကြီးတစ်ခုလုံးလှုပ်ခတ်သွားခဲ့သည်။ ထန်မော့သည် ထီးကလေးကို ထောက်လျက် သူ၏ခန္ဓာကိုယ်အား တည်ငြိမ်ရန်ကြိုးစားလိုက်သည်။ သူမော့ကြည့်လိုက်လျှင် ကြီးမားသော သံပြားကြီး ၈ခုကကောင်းကင်ပေါ်မှ ပြုတ်ကျလာသည်ကို တွေ့လိုက်ရလေသည်။ ၄င်းတို့မှာ အဖြူရောင်လိုင်းများနှင့်ကပ်လျက် ကစားသမားတစ်ဦးစီ၏ရှေ့တွင် ကျလာခြင်းဖြစ်သည်။

ထိုငွေဖြူရောင် ကတ်ကြီးများမှာ မြေကြီးအား ငလျင်လှုပ်သည့်နှယ် တုန်ခါစေခဲ့ခြင်းဖြစ်သည်။

ထန်မော့သည် သူ၏ရှေ့မှာ ကတ်ကြီးကိုမော့ကြည့်ပြီးဖြစ်သည်။ သူသည်မိမိရှေ့မှ ကတ်အား တစ်နေရာမှမလွတ်စေရန် သေချာကြည့်ရှူပြီးနောက် ဘေးမှလူ၏ကတ်ကိုလည်း ကြည့်လိုက်သည်။

ကတ်ပေါ်မှ ရုပ်ပုံများမှ မတူညီကြချေ။

ကျန်လူများသတိမထားမိခင်မှာပင် သူ၄င်းကိုသိလိုက်သည်။ ထို့နောက် ထန်မော့မှာ ဘေးမှလူ၏ ကတ်ကိုအလျင်အမြန်အကဲခတ်လိုက်ပြီး မိမိဘက်ခြမ်းမှ လူ၃ဦး၏ ကတ်များအားလုံးကို ဆန်းစစ်ပြီးသည့်နောက် တစ်ဖက်ခြမ်းသို့ လှမ်းကြည့်လိုက်မိလေသည်။

တဖက်ခြမ်းတွင်လည်း လူ၄ယောက်ရှိကာ ထန်မော့နှင့်မျက်နှာချင်းဆိုင်နေရာတွင်မူ သတ်လတ်ပိုင်းအရွယ်အမျိုးသမီးကြီးတစ်ဦးရှိလေသည်။ သူမ၏ဘေးတွင်တော့ မိန်းမငယ်လေးတစ်ဦးနှင့် ထိုဘေးတွင်မူ ဆံပင်ဖြူဖြူများနှင့် လူအိုကြီးတစ်ဦးပင်။

ထန်မော့ဘက်မှ ထိုကတ်များ၏ရုပ်ပုံများကို မမြင်နိုင်ချေ။ ကျောဘက်ကိုသာမြင်ရလေသည်။ ၄င်းမှာ စန်တာကလော့မှ စွပ်ဖားကိုမောင်းနှင်ရင်း ပျော်ရွှင်စွာပျံသန်းနေသောပုံပင်ဖြစ်သည်။

တဖက်ခြမ်းမှ လူ၃ဦးမှာလည်း ကတ်များကို စူးစမ်းနေကြပုံပင်။ ထန်မော့ထိုလူများကို ခတ္တမျှအကဲခတ်နေပြီးနောက် သူ၏မျက်လုံးများက သူနှင့်ထောင့်ဖြတ်အနေအထားအနေအထားတွင်ရပ်နေသော အမျိုးသားထံရောက်ရှိသွားခဲ့လေသည်။

သူသည်တဖက်လူအား တိတ်တဆိတ်ကြည့်နေမိသည်။

မိမိတို့နှစ်ဦးကြား၁၀မီတာခန့်ကွာဝေးပြီး ထိုအမျိုးသားမှာ သူ့ရှေ့မှကတ်အား စစ်ဆေးနေခဲ့သည်။ ထန်မော့မြင်နိုင်သည်က ထိုလူမှာတစ်ကိုယ်လုံး အနက်ရောင်ကိုသာ ၀တ်ဆင်ထားခြင်းပင်။ ထိုလူသည် နေရာတွင် တိတ်ဆိတ်စွာ ရပ်လျက် သူ၏ကျောပြင်မှာ ဖြောင့်တန်းနေခဲ့သည်။

အကြောင်းပြချက်တချို့ကြောင့် ထန်မော့ ထိုလူအား ၂စက္ကန့်ထက်ပင်ပို၍ စိုက်ကြည့်နေခဲ့မိလေသည်။

ထိုစဥ်ရုတ်တရက်ဆိုသလို သိမ်းငှက်နှယ်စူးရှလှသော မျက်၀န်းအစုံမှာ ထန်မော့ရှိရာထံ တိုက်ရိုက်ရောက်ရှိလာခဲ့လေတော့သည်။

🪩

Finally နှစ်ယောက်သား မျက်နှာချင်းဆိုင်မိပါပြီ

Prev Next