MM Story Teller

Chapter 66

Viewers 7k

🌍Chapter 66

"သတိထား..."

ထန်မော့ ချက်ချင်းပင် ရာဘာကြိုးကိုလှမ်း၍ပစ်လျက် ဂျက်၏လက်ကိုပတ်လိုက်သည်။ ထို့နောက် ထိုရာဘာကြိုးဖြင့်ပင် ဂျက်အား မိမိအနားသို့ဆွဲခေါ်လိုက်လေသည်။

မောလ်တွင်းမှာ မှောင်မည်းလွန်းနေရာ ထိုမိန်းကလေးကထန်မော့ ယခုလေးတင် မျက်မှန်နှင့် ယောကျာ်းထံမှ ရရှိခဲ့သော စွမ်းရည်ကို အသုံးပြုလိုက်ကြောင်း မမြင်လိုက်ချေ။ သူမသည် ၁၂ထပ်၏ လှေကားတစ်ဆစ်ချိုး မှန်အကာအရံအနီးတွင်ရပ်လျက် ထန်မော့အား သတိဖြင့် စိုက်ကြည့်နေခဲ့သည်။ ထန်မော့သူမကိုပြန်ကြည့်လိုက်သည်။

ခန္ဓာကိုယ်၅ခုက လဲကျလျက်။

ဂျက်အပါအ၀င် ထန်ရှောင်းနှင့် ကျန်လူများမှာ ကြမ်းပြင်ပေါ်တွင်လဲကျနေခဲ့သည်။ ထိုလူများတွင်လောင်ကျွမ်းဒဏ်ရာများရှိနေရုံသာမက ခွန်အားများလည်း ကုန်ဆုံးနေကြချေပြီ။ ဂျက်၏ရင်ဘတ်မှာလည်း အမည်းရောင်အဖြစ်လောင်ကျွမ်းထားခဲ့သည်။ သူသည်ကယ်တင်ခံရပြီးသည်နှင့် ချက်ချင်းတိုက်ခိုက်ရန် ပြန်ထလာခဲ့သည်။

ထန်မော့သူ့အား တားလိုက်သည်။

"သူတစ်ယောက်တည်းနဲ့ မင်းတို့ဒီလိုဖြစ်သွားတာလား"

ဂျက်ကပြန်ဖြေလိုက်သည်။

"သူတစ်ယောက်တည်းနဲ့ကို ငါဒီလိုဖြစ်နေတာ ထန်ရှောင်းတို့ရောက်လာတော့ ကျန်တဲ့သုံးယောက်က အခြားခိုး၀င်သူတွေကြောင့် ဒဏ်ရာရထားတာ"

ထန်မော့ခေါင်းငြိမ့်လိုက်ကာ စကားစုတစ်ခုကို တိုးတိုးရွတ်ဆိုလိုက်သည်။ ထို့နောက်တွင် ဘွားဘွား၀ံပုလွေကြီး၏ ထီးကလေးကို ဖွင့်လိုက်တော့သည်။

သည်းထန်သောမိုးမှာ ကုန်တိုက်၏ မှန်ပြတင်းများကို ရိုက်ခတ်နေပြီး ကျယ်လောင်သောအသံများ မြည်နေခဲ့သည်။ ထန်မော့ ထီးကလေးကို ကိုင်လျက် ထိုဆံပင်တိုတိုနှင့်အမျိုးသမီးကိုကြည့်လိုက်သည်။ ထိုမိန်းကလေးမှာလည်း သူ့အား အေးစက်စွာ ပြန်ကြည့်လာခဲ့လေသည်။

လူနှစ်ဦးကြားမှ အကွာအဝေးမှာ ၁၀မီတာခန့်အကွာသို့ရောက်လျှင် အက်ကွဲနေသော ယောကျာ်းတစ်ဦး၏အသံကိုကြားလိုက်ရသည်။

"သတိထား သူ့စွမ်းရည်က အသန်မာဆုံးပဲ"

ထန်မော့ အံ့အားသင့်မှုနှင့်အတူ ရင်ထဲမှတချက်ဆောင့်ခုန်သွားခဲ့သည်။ ထို့နောက် ထိုမိန်းကလေးနောက်၌ မျက်စိကာစည်းထားသော ကောင်လေးတစ်ယောက် အမှောင်ထဲတွင်တိတ်တဆိတ်ရပ်လျက် သူ့ကို တည်ငြိမ်စွာစိုက်ကြည့်နေသည်ကို တွေ့လိုက်ရလေသည်။

ထန်မော့၏မျက်လုံးများ မှေးကျဥ်းသွားလျက် နောက်တစ်စက္ကန့်တွင် ထိုကောင်လေးထံ တရှိန်ထိုး ပြေး၀င်သွားတော့သည်။

မီးတောက်နံရံတစ်ခုက သူ၏ရှေ့၌ ၀ုန်းခနဲထတောက်လာလေသည်။

"နင့်ရဲ့ပြိုင်ဘက်က ငါပဲ"

ထန်မော့ ထီးကလေးကိုဖွင့်လျက်မီးတောက်ကို ကာကွယ်လိုက်သည်။ မီးတောက်များမှာ ထီး၏ဘေးနှစ်ဖက်မှ ခွဲဖြာထွက်သွားခဲ့သည်။ ထန်မော့ ထီးကလေးကို တင်းတင်းဆုပ်ကိုင်ထားခဲ့သည်။ ရုတ်ချည်း သူ၏ကျန်လက်တစ်ဖက်ကို မြှောက်လျက် သူ၏လည်ပင်းအနောက်ဘက်သို့ ဖြတ်ခနဲကာလိုက်လေသည်။

ဆံပင်တိုတိုမိန်းကလေး၏ လက်သီးချက်မှာ ထန်မော့၏ လက်ပေါ်သို့ကျရောက်လာသည်။ သူမှ နှစ်ကြိမ်ခန့်လည်လျက်ခုန်ကာ တည်ငြိမ်စွာပြန်ရပ်လိုက်သည်။

ထန်မော့ ထီးကလေးကို ဖယ်လိုက်ပြီး တဖက်လူကို ကြည့်လိုက်သည်။

လူနှစ်ဦးမှာ တစ်ဦးကိုတစ်ဦးအတော်ကြာ တွက်ဆလျက် ကြည့်နေခဲ့ပြီး ရုတ်ချည်းလှုပ်ရှားလာကြပြန်သည်။ ဆံပင်တိုတိုနှင့်မိန်းကလေးမှာ လက်ကိုတစ်ချက်ဝေ့ယမ်းလျက် မီးတောက်များကို ထုတ်ကာ ထန်မော့ထံ ပြေး၀င်လာခဲ့ပြန်သည်။ သူမတွင် အတော်လေး သန်မာသော တိုက်ခိုက်နိုင်စွမ်းရှိလေသည်။ ထိုပြင်းထန်ပြီး ကြမ်းတမ်းသောတိုက်ခိုက်ချက်များကြောင့် ထန်မော့မှာ ထီးကလေးကိုသုံးလျက် ခုခံရုံသာတတ်နိုင်လေသည်။

ထိုစဥ်မီးတောက်များက ထန်မော့၏ မျက်လုံးကိုနီးကပ်လာခဲ့လျှင် သူသည်နောက်သို့လှိမ့်လျက် ရှောင်လိုက်သည်။ ဆံပင်တိုတိုနှင့်မိန်းကလေးမှာ ထိုအခွင့်အရေးကို အသုံးချလျက် သူမ၏ခြေထောက်နှင့် ကန်ရန်ပြင်လိုက်သည်။

ထန်မော့က သူ၏မျက်နှာအနီးသို့ရောက်လာသော ထိုမိန်းကလေး၏ လက်သီးကို လက်မြှောက်လျက်ကာလိုက်သည်။ ပြင်းထန်သော ခွန်အားကြောင့် သူ၏ကိုယ်မှာ လွင့်ထွက်သွားလျက် မှန်အတားအဆီးကိုခွဲကာ ၁၂ထပ်မှ ပြုတ်ကျသွားခဲ့သည်။

ဂျက်ကထိတ်လန့်စွာ အော်လိုက်သည်။

"ထန်မော့"

ထန်မော့ ပြုတ်ကျသွားသည်နှင့် ထီးကိုပိတ်လျက် ဘေးမှ ဓါတ်လှေကားကို ဆောင့်၍ထိုးလိုက်သည်။

ထီး၏ထိပ်မှာ ထိုဓါတ်လှေကား တစ်လျှောက်ထိုးခွဲလာပြီး ထိုမှငှားရမ်းရယူထားသောအားဖြင့် ပြုတ်ကျသည့်အရှိန်နှေးသွားလျက် ၈ထပ်မြောက်တွင်ရပ်တန့်သွားခဲ့သည်။ ထန်မော့၏ခြေထောက်အစုံမှာ ဓါတ်လှေကား၏ဘေးဘက်ကို ဆောင့်ကန်လျက် တွန်းကန်အားဖြင့် ၁၂ထပ်သို့ ပြန်တက်သွားခဲ့သည်။

သူ့အားဆီးကြိုနေသည့်အရာမှာ မီးပင်လယ်ကြီးတစ်ခုပင်။

ထန်မော့သတိမလွတ်ရဲခဲ့ချေ။ သူသည်ကျားတစ်ကောင်လို အဝေးမှ စွမ်းအင်များကို စုပ်ယူခြင်း စွမ်းရည်ကို အသုံးပြုလျက် ထိုမီးတောက်များအားလုံးကို မှုတ်ထုတ်လိုက်သည်။ မီးတောက်များပြန့်ကျဲသွားပြီးနောက် ၄င်းနောက်မှ မိန်းကလေး၏ လက်သီးမှာ သူ့ထံသို့ပြေး၀င်လာခဲ့ပြန်သည်။ ထန်မော့မှာ ၄င်းကို မရှောင်နိုင်လိုက်ပဲ နာကျင်မှုနှင့်အတူ သူ၏ နှာခေါင်းရိုးကျိုးသံကထွက်ပေါ်လာခဲ့သည်။

ကမ္ဘာကြီးအွန်လိုင်းပေါ်တက်လာသည်မှစ၍ ဤသည်မှာ ထန်မော့ရင်ဆိုင်ရသော အသန်မာဆုံးရန်သူပင်ဖြစ်လေသည်။ သူမ၏စွမ်းရည်ကပြင်းထန်လွန်းပြီး ၄င်းအပြင်ကို သူမ၏တ်ုက်ခိုက်ရေးစွမ်းအားမှာလည်း သန်မာလှသည်။

ထန်မော့၏လှုပ်ရှားမှုမှန်သမျှကို ကလေးကစားကွက်များနှယ် ကြို၍မြင်နိုင်နေခဲ့သည်။

သူမ၏တိုက်ခိုက်ပုံအရ သူမတွင်မီးစွမ်းရည်အစား အလျင်စွမ်းရည်သာရှိခဲ့ပါက သူ့အနေနှင့် ပြန်လည်တိုက်ခိုက်ရန် အခွင့်အရေး တစ်ချက်မှ ရလိုက်မည်မဟုတ်ချေ၊

ဤအမျိုးသမီး၏ မီးစွမ်းအင်မှာ ထန်မော့၏ ငါ့အဘိုးပြန်ပေးစွမ်းရည်ထက် သန်မာသည်မှာ ပြောနေစရာပင်မလိုအပ်ချေ။ ထို့အပြင် ကျားတစ်ကောင်လို အဝေးမှ စွမ်းအင်များကို စုပ်ယူခြင်းမှာ ယနေ့အဖို့နှစ်ကြိမ်အသုံးပြုပြီးပြီမို့ ထပ်မံအသုံးပြု၍မရတော့ချေ။ ထန်မော့တွင် ပြင်းထန်သော တိုက်ခိုက်စွမ်းရည် ၂မျိုးသာရှိသည်။ သူ၏ဦးနှောက်အား လျှင်မြန်စွာအလုပ်ပေးလျက် ဘာဆက်လုပ်ရမည်အား တွေးတောနေခဲ့လေသည်။

တချိန်တည်းမှာပင် မီးတောက်များလွှမ်းခြုံနေသော ထိုအမျိုးသမီး၏ လက်သီးချက်မှာ ထန်မော့ရှိရာဆီတိုး၀င်လာခဲ့ပြန်သည်။

ထန်မော့၏ မျက်လုံးတို့ကျဥ်းမြောင်းသွားခဲ့ပြီး ကြီးမားသောကျောက်တုံးတစ်တုံးက သူ၏ရှေ့တွင်ကာဆီးလျက် ထိုအမျိုးသမီး၏လက်သီးကို ရိုက်ချပစ်လိုက်သည်။ ထန်မော့နောက်ထပ်တွန့်ဆုတ်မနေတော့ချေ။ သူသည်ဤအမျိုးသမီး၏ ပြိုင်ဘက်လုံး၀ဟုတ်မနေသည်ကို နားလည်သွားခဲ့ပြီးဖြစ်သည်။

"ဒါကနင့်ရဲ့စွမ်းရည်လား"

ဆံပင်တိုတိုနှင့်အမျိုးသမီးမှာ အံ့အားသင့်ကာ တစ်ခုခုကို နားလည်သွားပုံဖြင့်ဆိုလာသည်။

"နင့်ရဲ့စွမ်းရည်က လေစွမ်းအင်မဟုတ်ဘူးလား"

ထိုအမျိုးသမီးပြောလိုက်စဥ်မှာပင် ထန်မော့၏ကိုယ်မှာ ငွေရောင်ဖျော့ဖျော့ တောက်ပလာခဲ့သည်။

အချိန်မှာ ရုတ်ချည်းရပ်တန့်သွားခဲ့တော့သည်။

မှောင်မည်းပြီး တိတ်ဆိတ်သော ကုန်တိုက်ထဲတွင် ဂျက်နှင့် ထန်ရှောင်းတို့မှာ ထန်မော့အား စိုးရိမ်တကြီးကြည့်နေလျက် 'သတိထား'ဟုလှမ်းအော်လိုက်သော်လည်း ပထမစကားတွင်သာ ရပ်တန့်သွားခဲ့သည်။ ဆံပင်တိုတိုအမျိုးသမီး၏ လက်သီးမှာ လေထုထဲတွင် ရပ်တန့်သွားလျက် တစ်ခုခုကို သဘောပေါက်သွားသည့်အလား သူမ၏မျက်တောင်များလှုပ်ခတ်သွားခဲ့သည်။ သူမသည် သူမ၏ရှေ့တွင်မီးတောက်အကာအရံတစ်ခုပြုလုပ်ရန် ကြိုးစားလိုက်သည်။

သို့သော်ဤသည်မှာ အလယ်တန်းကျောင်း၏ ကျဥ်းမြောင်းသော လှေကားတစ်ခုမဟုတ်ခဲ့ချေ။ ထန်မော့တွင် ရွေးချယ်စရာ ဦးတည်ချက်များ ကျယ်ပြောလေသည်။

ထန်မော့မှာ ရုတ်ချည်း ထိုအမျိုးသမီးနောက်တွင် ပြန်ပေါ်လာပြီး ချွန်ထက်သော ထီး၏ ထိပ်ဖျားမှာ ထိုအမျိုးသမီး၏ ခေါင်းနောက်ဘက်သို့ ဖောက်၀င်သွားခဲ့လေသည်။

အချိန်မှာ ပုံမှန်ပြန်ဖြစ်သွားခဲ့ပြီး မည်သူကမျှ ထန်မော့ထိုအမျိုးသမီးနောက်သို့ မည်သို့ရောက်သွားပုံကို မမြင်လိုက်ကြချေ။ ထိုအမျိုးသမီးသည်ပင် သူမ၏မျက်လုံးများမှာ မယုံနိုင်စွာ ပြူးကျယ်သွားခဲ့သည်။ သူမ၏နဖူးမှဒဏ်ရာထံမှ သွေးများ ပန်းထွက်လာခဲ့ပြီး နှာခေါင်းမှတဆင့် သူမ၏ကျယ်ကျယ်ဟနေသော ပါးစပ်ထဲသို့ စီး၀င်သွားခဲ့သည်။

ဤစွမ်းရည်၏ ဘေးထွက်ဆိုးကျိုးမှာ အသက်စွမ်းအင်ကုန်ဆုံးသည်ထက်ပိုလေသည်။

ဤတိုတောင်းသော ၂စက္ကန့်စာလေးတွင် ထန်မော့မှာ သူ့ဘ၀သက်တမ်း၏ လေးမိနစ်ကို စတေးလိုက်ရချေပြီ။ တချိန်တည်းမှာပင် သူသည်အားနည်းသွားလျက် အခြေအနေမဟန်တော့မှန်း ခံစားလိုက်ရသည်။ အကယ်၍ ဤအမျိုးသမီးနှင့် ဆက်၍ရင်ဆိုင်ရမည်ဆိုပါက သူအသတ်ခံရရန် သေချာသလောက်ပင်။

သူသည်အသက်ကိုပြင်းပြင်းရှူလျက် စွမ်းရည်ကို ရပ်တန့်လိုက်ပြီး ထီးကိုပြန်ဆွဲနှုတ်လိုက်လေသည်။

အမျိုးသမီးမှာ ကြမ်းပြင်ပေါ်သို့လဲကျသွားခဲ့သည်။ သူမ၏မျက်လုံးများမှာ ဝေ၀ါးနေခဲ့ပြီး မသေဆုံးခင်စက္ကန့်ပိုင်းတွင် သူမ၏လက်အား ကြမ်းပြင်ကို ရိုက်ချလိုက်လေသည်။

ထန်မော့အံအားသင့်သွားလျက် အမှောင်ထဲတွင် ပုန်းအောင်းနေသော မျက်လုံးကာနှင့်ကောင်လေးကို လှည့်ကြည့်လိုက်သည်။

မြင့်မားသောမီးတောက်နံရံတစ်ခုက သူနှင့် ထိုကောင်လေးအကြားတွင်ပေါ်လာခဲ့သည်။ ထိုကောင်လေး၏ ဦးခေါင်းတ၀ိုက်တွင် အနက်ရောင်မြူတချို့ဆိုင်းနေခဲ့ပြီး လှည့်ကာပြေးတော့သည်။ ထန်မော့ အမြန်လိုက်ရန်ပြင်လိုက်သော်လည်း မီးတောက်နံရံမှာ သူ့အားတားဆီးထားခဲ့လေသည်။ ထန်မော့မီးတောက်ကို ကျော်လျက် ပြေးထွက်လာလျှင် ထိုကောင်လေးမှာ အလျင်အပြည့်နှင့် မှန်ပြတင်းကိုဖောက်ထွက်သွားသည်အား တွေ့လိုက်ရလေသည်။ သေကြောင်းကြံခြင်းတော့မဟုတ်ချေ။ ဘေးအဆောက်အဦးသို့ ခုန်ကူးသွားခြင်းသာ။

ထန်မော့ နောက်မှအမီလိုက်ရန်ပြင်လိုက်လေသည်။ သို့သော် မိုးသည်းသည်းအောက်အမှောင်ထဲ၌ တစ်ဖက်အဆောက်အဦးပေါ်တွင် ဖက်တီးလေးမှာ တိတ်တဆိတ်ရပ်နေခဲ့လေသည်။

မျက်လုံးကာနှင့်ကောင်လေးမှာ ဖက်တီးလေးကို သတိထားမိချိန်တွင် အလွန်နောက်ကျသွားချေပြီ။ သေးငယ်သော သံချောင်းလေးတစ်ခုက သူ၏မျက်ခုံးနှစ်ဖက်ကြားမှ ဖောက်ထွက်သွားနှင့်ခဲ့ပြီဖြစ်သည်။ ထိုကောင်လေးမှာ ချက်ချင်းလဲကျသွားလျက် သွေးများမှ မျက်ခုံးများကြားရှိအပေါက်မှ စီးကျလာခဲ့သည်။

ထန်မော့ တစ်ဖက်အဆောက်အဦးကို ခုန်ကူးလိုက်လျှင် သေဆုံးနေပြီဖြစ်သော ထိုကောင်လေး၏ အလောင်းကိုသာတွေ့လိုက်ရလေသည်။

သူ ရှေ့မှ ဖက်တီးလေးကို ကြည့်လိုက်သည်။

"ဖက်တီးလေး မင်းဒီကိုဘယ်လိုရောက်နေတာလဲ"

သူတို့တွင် လူ၁၁ယောက်ရှိခဲ့သော်လည်း ဖက်တီးလေးမှာ ဒဏ်ရာရနေခဲ့သည်။ ထို့ကြောင့်ထန်မော့က သူ့အား ထိုအသင့်အစားအသောက်ဆိုင်တွင်သာ နေရစ်စေလျက် အခြေအနေအရလှုပ်ရှားရန် ထားခဲ့ခြင်းဖြစ်သည်။

ကျောက်ကျန်းမှာ သူ၏မျက်နှာပေါ်မှ မိုးစက်များကို ပွတ်သုတ်လိုက်သည်။

"ကျွန်တော်တို့ ထွက်မလာခင်က ရှန်းရှန်းကမှာလိုက်တာ အစ်ကိုကကျွန်တော့်ကို ၀င်မပါခိုင်းရင် ဘေးကအဆောက်အဦးရဲ့ အမိုးပေါ်မှာစောင့်နေတဲ့...အဲဒီလူတွေထွက်ပြေးရင် ဒီဘက်ကို ခုန်ကူးပြီးပြေးမှာဆိုတော့ ကျွန်တော်လည်း ပိုက်ကွန်ကလွတ်လာတဲ့ ငါးတစ်လောက်များ မိနိုင်မလားဆိုတဲ့ ရည်ရွယ်ချက်နဲ့ပါ အစ်ကိုထန်ပဲ ကျွန်တော့်ကို ကုန်တိုက်နားကပတ်၀န်းကျင်ကို စောင့်ကြည့်နေလို့ ပြောခဲ့တယ်လေ ကျွန်တော်လည်း ရှန်းရှန်းစကားကိုသတိရတော့ ဒီပေါ်လာစောင့်နေတာ"

သည်းထန်သောမိုးထဲတွင် ထန်မော့ သေဆုံးသွားသော ကောင်လေး၏ မျက်နှာပေါ်မှ အနက်ရောင် အ၀တ်စကို ဖယ်ရှားလိုက်သည်။

လောဖုန်းချန်းဆိုခဲ့သလိုပင် ဤကောင်လေးမှာ မျက်နှာဖြူလေးဟု ခေါ်နိုင်သော အသွင်အပြင်မျိုးပင်။

"ဒါကျွန်တော် ဒုတိအကြိမ်လူသတ်တာပဲ"

မိုးသည်းသည်းထဲတွင် ကျောက်ကျန်း၏အသံကို ကြားလိုက်ရသည်။

"ဒါပေမယ့် ကျွန်တော်မကြောက်တော့ဘူး... အစ်ကိုထန် ဒီလူပဲ လျိုချန်နဲ့ ကျွန်တော်ထွက်ပြေးလာတုန်းက ကျွန်တော်တို့တွေ ဒီလူနဲ့လျှပ်စစ်လူသားက ကျွန်တော်တို့အရွယ်မိန်းကလေးတစ်ယောက်ကို သတ်ပြီး နှလုံးကိုဖောက်စားနေတာကို တွေ့ခဲ့တာ...ဖြစ်ချင်တော့ ဒီလူကကျွန်တော်တို့ကိုမြင်သွားပြီး လျှပ်စစ်လူသားကိုလည်း ကျွန်တော့်စွမ်းရည်က သန်မာတယ်လို့ပြောလိုက်တာလေ အဲဒါကြောင့်ပဲ လျှပ်စစ်လူသားက လက်မလျှော့ပဲ ကျွန်တော်တို့နောက်ကို နေ့ရော ညရောဆက်တိုက်လိုက်လာတာ လျိုချန်းတောင် သူ့လက်ထဲမှသေသွားတော့မလို့"

ထန်မော့လည်း ရှင်းရှင်းလင်းလင်းကို မှတ်မိနေဆဲပင်။ ထိုအဆောက်အဦးထဲတွင် တိုက်ခိုက်နေခဲ့စဥ်က ဤကောင်လေးမှာ ထိုဆံပင်တိုတိုနှင့် မိန်းကလေးအား မိမိ၏စွမ်းရည်ကအသန်မာဆုံးဟု ပြောခဲ့သည်။

ထိုကောင်လေး၏မျက်လုံးကာကို ဖွင့်နေစဥ် ထန်မော့ရင်ထဲတွင် ခန့်မှန်းမှုတချို့ရှိနေခဲ့သည်။

မနေ့ညက သူသည် စက်၀ိုင်းဆွဲပြီး ကျိန်စာတိုက်မယ် စွမ်းရည်ကို အသုံးပြုခဲ့ပြီး ပစ်မှတ်မှာ ဤကောင်လေးကိုဖြစ်သည်။ ထိုသူ လှည့်ပြီးထွက်ပြေးစဥ်တွင် ထန်မော့ ဤကောင်လေး၏ပါတ်ပါတ်လည်တွင် ကျိန်စာစွမ်းအင်တချို့ကို တွေ့လိုက်ရသည်။ ၎င်းမှာ ကျိန်စာကြောင့်လည်းဖြစ်နိုင်သလို သူကသေကိုသေရမှာလည်းဖြစ်နိုင်လေသည်။

အကျဥ်းချုံးဆိုရလျှင် ကောင်လေးမှာ ဖက်တီးလေးလက်ထဲ၌ပင် သေဆုံးသွားခဲ့ခြင်းဖြစ်သည်။

ခိုး၀င်သူ ၆ယောက်လုံးမှာ သေဆုံးသွားခဲ့ချေပြီ။

မိုးသည်းသည်းအောက်တွင် ထန်မော့နှင့်ဖက်တီးလေးမှာ ရုပ်ရှင်ရုံထံသို့ ပြန်လည်လျှောက်သွားလိုက်ကြသည်။

ဂျက်၏ဒဏ်ရာများမှာ ပြန်လည်ကောင်းမွန်သွားခဲ့ချေပြီ။ သူကလျှောက်လာပြီး အက်ကွဲသော အသံဖြင့်

"မင်းတို့သွားနေတုန်း ရှောင်ကျဲသေသွားတယ် သူတောင့်မခံနိုင်ခဲ့ဘူး"

ထန်မော့မှာ တန့်သွားမိလျက် ရုပ်ရှင်ရုံတံခါး၀ထံအမြန်လျှောက်သွားလိုက်မိသည်။ ထို့နောက်သူသည် ထန်ရှောင်းမှ လူငယ်လေးတစ်ဦးကို ပွေ့ထားသည်အားတွေ့လိုက်ရလေသည်။ ထိုကောင်လေး၏ မျက်နှာမှာ မီးတောက်များကြောင့် ပုံပျက်နေခဲ့လေသည်။ ထိုအ၀တ်အစားများအရ ၄င်းမှာ ရဲယွမ်ကျယ်ပင်ဖြစ်လေသည်။ ရဲယွမ်ကျယ်မှာ ကြမ်းပြင်ပေါ်တွင် လဲလျောင်းလျက် အသက်မရှူတော့ချေ။

မိုနိုပိုလီဂိမ်းအပြင်ဘက်တွင် ထန်မော့ဆုံခဲ့သူ ၃ယောက်ထဲ၌ ထန်ရှောင်းတစ်ယောက်သာ ကျန်ရစ်တော့သည်။

နျဲဖေးနှင့် ရဲယွမ်ကျယ်တို့မှာ သေဆုံးသွားခဲ့ချေပြီ။

ထန်မော့ သူတို့အား တိတ်တဆိတ်ကြည့်လျက် ဒဏ်ရာများကို စစ်ဆေးကြည့်လိုက်သည်။ အားလုံးထဲတွင် ဂျက်နှင့် ထန်ရှောင်းတို့က ဒဏ်ရာအနည်းဆုံးဖြစ်လေသည်။ ကျန်သုံးယောက်မှာ ဒဏ်ရာအတော်ပြင်းသည်။ သူတို့မှာ အသက်အန္တာရယ်မရှိတော့သော်လည်း အနားယူရန်လိုအပ်လေသည်။ အချိန်တစ်ခုအထိ လှုပ်လှုပ်ရှားရှားလုပ်နိုင်လိမ့်ဦးမည်မဟုတ်ချေ။

ခိုး၀င်သူ၇ယောက်မှာ အသတ်ခံလိုက်ရချေပြီ။ တိုက်အဖွဲ့အစည်းမှ လူ၄ယောက်ပေးဆပ်လိုက်ရကာ နျဲ့ဖေးသည်လည်း လွန်ခဲ့သောလကအသတ်ခံလိုက်ရသည်။

တစ်ညတာအနားယူပြီးနောက် ထန်မော့နှင့် ဂျက်တို့မှာ လမ်းမလျှောက်နိုင်သော တိုက်အဖွဲ့၀င်များကို ကိုယ်စီသယ်လာခဲ့ကြသည်။ လူ၇ယောက်မှာ မိမိတို့နေရာသို့တဖြည်းဖြည်းပြန်လာကြသည်။

မထွက်ခွာခင်တွင် ထန်မော့သည် ရုပ်ရှင်ရုံတစ်ခုလုံးအား မီးရှို့ပစ်ခဲ့လိုက်လေသည်။

ကောင်းကင်မှာကြည်လင်နေပြီး တောက်ပသောနေရောင်မှာ လောင်ကျွမ်းနေသောအဆောက်အပေါ် ထွန်းလင်းနေခဲ့သည်။ ခိုး၀င်သူများကို ကြောက်ရွံ့စွာ ပုန်းအောင်းနေကြသော သူတို့မှာ ထိုမြင်ကွင်းကိုမြင်လျှင် ပုန်းနေရာမှ အသီးသီးထွက်လာခဲ့ကြလေသည်။

🪩

Prev Next