MM Story Teller

Chapter 66

Viewers 5k

👻Chapter 66

အစစ်အမှန် မဟုတ်တဲ့ ခံစားချက်တွေ....(16)

ချူဟွိုက်က တွန့်ဆုတ်နေမိသည်။ အကြောင်းမှာ သူက နံပါတ် နှစ်ဆယ့်ခုနစ်ကို ထုတ်ပြီးသား ဖြစ်နေ၍ပင်။

သူက ပထမအလှည့်တွင် လက်ကောက်ဝတ်များကို စမ်းကြည့်ခဲ့၍ နံပါတ် နှစ်ဆယ့်ခုနစ်အပေါ် အမြင်တစ်ခုရှိသည်။

နံပါတ် နှစ်ဆယ့်ခုနစ်၏ လက်ကောက်ဝတ်တွင် မှဲ့လိုမျိုး အဖုသေးသေးလေးတစ်ခု ရှိနေသည်။ သို့သော်လည်း ကျင်းထျန်းယိလက်က ချောမွေ့ပြီး မှဲ့လုံးဝ မရှိပေ။

ပထမအလှည့် စမ်းသပ်မှုက ဆယ်မိနစ်သာ အချိန်ပေး၍ နံပါတ် နှစ်ဆယ့်ခုနစ်၏ လိင်အမျိုးအစားကို မသိခဲ့ရသော်လည်း ထိုမှဲ့ကိုဖြင့် စိတ်ထဲစွဲနေသည်။

အခု သွေးနံ့ပြင်းပြင်းက သူ့ကို တွန့်ဆုတ်စေသည်။

ကျင်းထျန်းယိက နာရီဝတ်လေ့ရှိတယ်....ဖြစ်နိုင်တာက ကုဗတုံးထဲက ပြိုင်ပွဲဝင်တွေရဲ့ ကိုယ်ပေါ်က ပစ္စည်းတွေကို ချွတ်ခိုင်းထားလို့များလား....ဒါကြောင့် နာရီအောက်က မှဲ့က ပေါ်လာတာလား...

တကယ်လို့ အဲ့ဒီလူက ကျင်းထျန်းယိရဲ့ ရှူးဖိနပ်ကို စီးထားရင်ရော....အဲ့ဒီသူက သရဲဖြစ်နေပြီးတော့ ပြိုင်ပွဲဝင်ဆီက အရွေးခံချင်လို့ဆိုရင် သူ့ရဲ့ သရဲအစိတ်အပိုင်းကို ဖုံးကွယ်ဖို့ ဘာမဆို လုပ်မှာပဲ....သေချာတာတစ်ခုက သွေးနံ့ကပဲ လူနဲ့သရဲကို ခွဲပေးနိုင်တာ.....

ကုဗတုံးထဲက သရဲတွေမှာ အထူးစွမ်းရည်လိုမျိုးရှိနေရင် အခြားသူကို အထင်မှားသွားအောင် သေချာပေါက် လူယောင်ဆောင်ထားမှာပဲ....ကျင်းထျန်းယိလိုမျိုးလည်း အယောင်ဆောင်ထားမှာပဲ....သွေးနံ့ထုတ်ပြတာက ဥာဏ်ကောင်းတဲ့ ရွေးချယ်မှု မဟုတ်ဘူး....

ဒီလိုဆို....

ချူဟွိုက်က မျက်လုံးဖွင့်လိုက်သော်လည်း အမြင်အာရုံက ပိတ်ဆို့ခံထားရ၍ ဘာမှ မမြင်ရချေ။ သူက မျက်မမြင်တစ်ယောက်လို ခံစားရသည်။

ကုဗတုံးထဲမှ ကျင်းထျန်းယိက ချူဟွိုက်မျက်လုံးထဲ စိုက်ကြည့်လိုက်ရာ တွေဝေပြီး တွန့်ဆုတ်နေသည့် အရိပ်အရောင်များ တွေ့လိုက်၍ ခပ်ဖျော့ဖျော့ ပြုံးလိုက်မိသည်။

ရိုးရိုးသားသားပြောရလျှင် သူနှင့်ပတ်သတ်၍ ကြောက်စရာတစ်ခုမှ မရှိပေ။ ချူဟွိုက်သာ မရွေးနိုင်ရင် ဘယ်သူမှ ရွေးနိုင်တော့မှာ မဟုတ်ဘူး....

ကျင်းထျန်းယိလက်မှ သွေးတတောက်တောက် ကျနေသည့် မြင်ကွင်းက ထိတ်လန့်ဖွယ်ကောင်းလှသည်။ သူ့မျက်နှာကလည်း ဖြူဖျော့နေပြီ ဖြစ်သည်။

ယခင်ဖြစ်ရပ်မှ အတွေ့အကြုံရသွား၍ ချူဟွိုက်က မစ်ရှင်ထဲ ဝင်လာသည့်အချိန် လက်နက်တစ်ခု ယူလာခဲ့ပြီး ကုဗတုံးရွေ့နေသည့်အချိန်တွင်း အသုံးဝင်လာခဲ့သည်။

ကျင်းထျန်းယိက သူ့ခန္ဓာကိုယ် ဒဏ်မခံနိုင်မှာကိုလည်း စိတ်မပူချေ။ ကြောက်မက်ဖွယ် ကစားကွင်း၏ မစ်ရှင်က ထူးခြားသည်။ ပြိုင်ပွဲဝင်များက သက်ဆိုင်ရာ ပရောဂျက်များ လုပ်ပြီးသည်နှင့် ကစားကွင်းမှ ထွက်ပြီး အိမ်ပြန်နိုင်ပြီဖြစ်သည်။ မစ်ရှင်လုပ်နေစဥ်အတွင်း ရခဲ့သည့် ဒဏ်ရာများကလည်း ပြန်ရောက်သည်နှင့် ချက်ချင်း ပျောက်ကင်းသွားမည် ဖြစ်သည်။

အခု သူ အကောင်းဆုံးလုပ်နိုင်တာက ချူဟွိုက်ကို သဲလွန်စပေးပြီး တိတ်တဆိတ် စောင့်နေရုံပဲ ရှိတော့တယ်....။သူ့ကိုယ်သူ အားကိုးဖို့သာ ရွေးချယ်လိုက်သည်။

တခြားကုဗတုံးတွေရဲ့ အခြေအနေအပေါ် ချူဟွိုက် ဘယ်လိုနားလည်ထားလဲ ဆိုတာ သူ မသိနိုင်လို့ အခုချိန်မှာ ဘာသဲလွန်စကိုမှ မစဥ်းစားကြည့်ရသေးဘူး.....

ကျင်းထျန်းယိ၏ ကုဗတုံးက အလျင်အမြန် ပျောက်ကွယ်သွားသည်။

ချူဟွိုက်က ဆက်ပြီး တရှုံ့ရှုံ့အနံ့ခံမိသည်။

တဖြေးဖြေးနှင့် သူက ဇဝေဇဝါ ဖြစ်လာရသည်။

အထိအတွေ့ အနံ့အသက်နဲ့ လူတစ်ယောက်ကို ခွဲခြားဖို့ ခက်တယ်ဆိုရင် အကြား အမြင်နဲ့ ဆိုရင်ရော....

တစ်ယောက်ယောက်ကို အသံနဲ့ ဆုံးဖြတ်တယ်ဆိုတာ အရမ်း ရိုးရှင်းမယ့်ပုံပဲ....ကိုယ်ချစ်တဲ့သူ မပြောနဲ့ ရင်းနှီးတဲ့သူ ဆိုရင်တောင်မှ သိနိုင်တယ်....

ပြီးတော့ ကုဗတုံးတွေထဲက သရဲတွေက တကယ်ပဲ ဘာထူးခြားစွမ်းရည်မှ မရှိဘူးလား....

အခြေအနေက တကယ်ပဲ အဲ့လောက် ရိုးရှင်းပါ့မလား....သဲလွန်စတွေက ဘာဖြစ်မလဲ....

နံပါတ်သုံးဆယ့်ငါးက ချူဟွိုက်ရှေ့ ရပ်လာ၍ သူ့မျက်နှာက လင်းလက်သွားလေသည်။

ဒီတစ်ခုက ပထမအလှည့်ကတည်းက ကျင်းထျန်းယိနဲ့အတူဆုံးလို သူတွေးထားတဲ့ တစ်ခုပဲ...

သူက နံပါတ်သုံးဆယ့်ငါး၏ လက်ကောက်ဝတ်ကိုလည်း စမ်းကြည့်ခဲ့၍ ထိုသူက ကျင်းထျန်းယိ ပတ်ထားသလိုမျိူး သားရေပတ်နှင့် အမျိုးသားဝတ်နာရီတစ်ခု ပတ်ထားလေသည်။

နံပါတ်သုံးဆယ့်ငါးတွင် ထူးခြားသည့်အနံ့ဟူ၍ မရှိချေ။ ချူဟွိုက်က အနည်းငယ် မျှော်လင့်ချက်သန်းလာသော်လည်း ထိုသို့ မရိုးရှင်းလောက်ဟု မသဲမကွဲ ခံစားရသည်။

ဒုတိယပိုင်းက ပြီးသွားပြီဖြစ်သည်။

ချူဟွိုက်က စာရွက်ပေါ် နံပါတ်စဥ်များ အစုလိုက် ရေးလိုက်ပြီး နံပါတ်၂၇နှင့် နံပါတ်၃၅ပေါ် အမှတ်ထပ်ခြစ်လိုက်သည်။

ချူဟွိုက်က စဥ်းစားရန်ပြင်လိုက်စဥ် လော်စပီကာက စကားဆိုလာသည် " ပွဲစဥ်ရဲ့ ပထမတစ်ဝက်က ပြီးသွားပါပြီ....နံပါတ် ၂၂ခုကို ဖယ်ထုတ်ပေးဖို့ ပြိုင်ပွဲဝင်ကို ပြောချင်ပါတယ်....နောက်ထပ်နှစ်ဆင့်ကို ကျန်တဲ့ ကုဗတုံး၂၂ခုနဲ့ ဆက်လုပ်သွားမှာပါ....သုံးမိနစ်ပြည့်ရင် ပြိုင်ပွဲဝင်က အဖြေပေးရမှာ ဖြစ်ပါတယ်...."

ချူဟွိုက်၏ မျက်နှာအမူအရာက တစ်စက္ကန့်မျှ တောင့်ခဲသွားရင်း အကြည့်တို့ မည်းမှောင်သွားသည်။

ဒါကြီးက တစ်ဝက်ကို ဖယ်ထုတ်ဖို့ သူ့ကို တွန်းအားပေးနေတာပဲ....

အမှန်တွင်ဖြင့် လုံလုံလောက်လောက် အာရုံမခံခဲ့ရ၍ ယခုအချိန် ဆုံးဖြတ်လိုက်လျှင် အမှားကြီးမှားသွားနိုင်သည်။

ချူဟွိုက်က လက်ထဲက စာရွက်လေးကို ကြည့်လိုက်ပြီး အတွေးတို့ နစ်နေမိသည်။ လော်စပီကာအသံက ဘာလို့ စိတ်မရှည်သလို ဖြစ်နေရတာလဲ....

သူ့စဥ်းစားပုံအတိုင်းဆို အထုတ်ခံရမယ့် ပထမတစ်သုတ်က အမှားမပါရအောင် လူသားနဲ့ မတူဆုံးသူတွေပဲ ဖြစ်သင့်တာ.....ဒါပေမယ့်....

တကယ်ပဲ ဒီလိုမျိုး ဟုတ်ပါ့မလား....

ချူဟွိုက်က သဲလွန်စကတ်လေးပေါ်မှ စာလုံးများကို တစ်ခုပြီးတစ်ခု ပြန်စဥ်းစားလိုက်ရင်း မျက်လုံးထဲ ဗလာဖြစ်လာသည်။

သူတို့ သုံးပြီးသွားတဲ့ သဲလွန်စတွေကို ဖယ်လိုက်ရင် တော်တော်များများ ကျန်နေသေးတယ်....

အစပိုင်းတွင် သူ့စိတ်ထဲ သဲလွန်စတစ်ခုမှ ပေါ်မလာခဲ့သော်လည်း စာလုံးတစ်လုံးပေါ် စိတ်ရောက်သွားသည်။

" အမှန်တစ်ဝက် အမှားတစ်ဝက်...."

ချူဟွိုက်၏ မျက်နှာအမူအရာက ပြောင်းလဲသွားသည်။ ခုနက ရွေးတဲ့အထဲမှာ မျက်စိမှောက်အောင်လုပ်ထားတာ ရှိရမယ်.....

လူသားတွေကို ဥပမာယူကြည့်လိုက်မယ်....သမီးရည်းစား ဆက်ဆံရေးရဲ့ ကနဦးအဆင့်မှာ နှစ်ဖက်လုံးက သူတို့ရဲ့ ကောင်းကွက်တွေကိုပဲ ပြပြီး သူတို့ရဲ့ အပြစ်အနာအဆာတွေကို ဖုံးထားကြတယ်....ဒါက အပေါ်ယံအဆင့်သာသာပဲ...

ပိုပြီး ပြင်းထန်တဲ့ကိစ္စတွေရှိတယ်.... အိပ်ရာထဲ ခေါ်သွားတာမျိုးလို သူတို့လိုချင်တဲ့ ပန်းတိုင်ကို ရောက်ဖို့အတွက်ဆိုရင် တချို့က ငွေကြေးအခြေအနေ အိမ်ထောင်ရေးအခြေအနေတွေ အသက်အမှန်တွေထိတောင် လျှို့ဝှက်ထားတာတွေ ရှိတယ်....

လိင်ပိုင်းဆိုင်ရာ ရွေးချယ်မှု ဖြစ်စဥ်မှာ လှည့်စားတာတွေက ရှိကိုရှိတယ်.... ဒါကြောင့် အမြင် အကြား အထိအတွေ့ အနံ့အသက်စတဲ့ အာရုံလေးပါးမှာ လူကို လှည့်စားပြီး အရွေးမှားအောင် လုပ်သွားနိုင်တဲ့ အာရုံအမှားတွေလည်း ရှိတာပဲလို့ သွယ်ဝိုက်ပြောပြနေတာပဲ....

တကယ်တော့ လိင်ပိုင်းဆိုင်ရာ ရွေးချယ်တယ်ဆိုတာက နှစ်ဦးနှစ်ဖက်လုံး ပါဝင်နေတာ....သူ့ဘက်က ယုံကြည်နေပေမယ့် တစ်ဖက်လူကလည်း ဖောက်ပြန်သွားနိုင်တာပဲ....ဒါကြောင့် သူယုံကြည်ထားတဲ့အရာက မှန်လားမှားလားဆိုတာက အဓိက အကျဆုံးအပိုင်းပဲ....

လော်စပီကာ "အချိန်ပြည့်ပြီ....ပြိုင်ပွဲဝင် ချူဟွိုက်....ကျေးဇူးပြုပြီး တစ်မိနစ်အတွင်း ကျန်ခဲ့ရမယ့် ကုဗတုံးများကို စာရွက်ပေါ် ရေးချပေးပါ....အများဆုံးက ၂၂ခု....သူ့ထက်လျော့လည်း ကိစ္စမရှိဘူး....."

ချူဟွိုက်မှာ စဥ်းစားနေဖို့ အချိန်မရှိတော့ပေ။ တွန့်ဆုတ်မနေပဲ သူက အဆင့်နှစ်ဆင့်လုံးတွင် စုထားခဲ့သည့် ဇယား ၁၆ခုတွင် ဖြည့်လိုက်သည်။ သူ့တွင် ပြန်စရန် အလှည့်မရှိတော့၍ နှုတ်ခမ်းတင်းတင်းစေ့ပြီး ရွေးချယ်လိုက်ရတော့သည်။

လော်စပီကာ စိတ်အားထက်သန်နေပုံရကာ ချက်ချင်း မေးလာသည် " ဇယားကွက်မှာ ဖြည့်လို့ ပြီးသွားပြီလား...."

ချူဟွိုက်က ခေါင်းယမ်းပြလိုက်ပြီး တစ်ခဏမျှ စဥ်းစားကြည့်သည်။ ပထမပိုင်းတုန်းက လူနှင့်မတူဆုံးဟု ထင်သည့် နံပါတ်ခြောက်ခု ကျော်ကျော်လောက်ကို ဖြည့်လိုက်ပြီး ကမ်းပေးလိုက်သည်။

ချူဟွိုက်မှာ သူ့ကိုယ်ပိုင် ဆုံးဖြတ်ချက် ရှိသည်။

အာရုံလေးခုထဲက တစ်ဝက်က အတုတွေဆိုတော့ ပထမနှစ်ခုက အမှန် ကျန်နှစ်ခုက အမှားတွေလိုမျိုးလည်း မဖြစ်နိုင်ဘူး.... ပထမနှစ်ပိုင်းမှာ စစ်ထုတ်ထားပြီးပြီဆိုတော့ ကျန်တဲ့သူတွေက လူဖြစ်ဖို့များတယ်.....ပြီးတော့ နောက်ကျန်တဲ့ နှစ်ခုက အတုတွေ ဆိုရင်လည်း အမှန်ရွေးနိုင်ချေက များပါသေးတယ်....ဒါကြောင့် ပထမနှစ်ပိုင်းမှာ အတုတွေ ရှိရမယ်.....

ဒါပေမယ့် အထိအတွေ့က အတုလား....အနံ့အသက်က အတုလား....နှစ်ခုစလုံး အတုလား....

လော်စပီကာက ဆိုလာသည် " မေးခွန်းစစ်တာ ပြီးသွားပြီဖြစ်လို့ တတိယတစ်ပိုင်း အကြားအာရုံပိုင်းက သုံးမိနစ်အတွင်း စတင်မှာ ဖြစ်ပါတယ်....ပြိုင်ပွဲဝင်ရဲ့ အခြားအာရုံတွေကလည်း အပိတ်ခံရတော့မှာပါ...."

ထိုအသံဆုံးသွားသည်နှင့် ချူဟွိုက်မှ ဘာမှ မမြင်ရတော့၍ အမှောင်ထဲ တိတ်တိတ်လေး ရပ်နေရသည်။

သူမသိခဲ့သည့်အရာက သူ့ရှေ့ရှိ ခပ်လှမ်းလှမ်းတွင် နံပါတ်များ ရေးထားသည့် စက်တစ်ခု ရှိနေခဲ့သည်။ နံပါတ်များက ၃/၁၆ ဟု ရေးထားရာမှ ၈/၂၂ ဟု ပြောင်းသွားလေသည်။

နောက်ပိုင်းမှ ဖြည့်လိုက်သည် ခြောက်ယောက်ထဲတွင် ငါးယောက်က လူသား ဖြစ်နေသည်။

မူလရွေးထားသည့် ဆယ့်ခြောက်ယောက်ထဲတွင်က လူသုံးယောက်သာ ပါသည်။

သူ့ရဲ့ နောက်ဆုံးမိနစ်ပိုင်းမှာ ဖြည့်လိုက်တဲ့ နံပါတ်တွေကြောင့် မဟုတ်ရင် အမှန်ရွေးနိုင်ခြေက ငါးပုံတစ်ပုံထိ လျော့ကျသွားမှာပဲ.....

ချူဟွိုက်က တစ်ခုခုကို ရိပ်ခနဲ သိလိုက်၍ နိုးနိုးကြားကြား နေလိုက်သည်။

ပထမဆုံးအနေနဲ့ ပထမနှစ်ဆင့်မှာ အမှားတွေ ရှိတယ်ဆိုတော့ တတိယတစ်ခုနဲ့ စတုတ္ထတစ်ခုမှာ အမှန်ပါရမယ်....

ပထမနှစ်ဆင့်လုံးက အမှားတွေ ဆိုရင် သူ နောက်ဆုံးဖြည့်လိုက်တဲ့ ခြောက်ယောက်နဲ့ ထူးဆန်းတဲ့ သွေးနံ့ရှိတဲ့ နံပါတ်နှစ်ဆယ့်ခုနစ်က သူ့မျှော်လင့်ချက်ပဲ....။ ပထမနှစ်ဆင့်မှာ အမှန်နည်းနည်းပါတယ်ဆိုရင် နောက်တစ်ဆင့်ကို သူသေချာ ဆုံးဖြတ်ရတော့မယ်....

ရိုးရိုးသားသား ပြောရရင် သူ့အတွက် လူကို ရွေးဖို့က သိပ်မခက်ပေမယ့် သူက ကျင်းထျန်းယိကိုပဲ ရွေးချင်တာလေ....

တတိယပိုင်းက စတင်လာသည်။

လော်စပီကာ " တတိယအဆင့် စတင်ပါပြီ....ကျန်တဲ့ ပြိုင်ပွဲဝင် နှစ်ဆယ့်နှစ်ယောက်မှာ တစ်ယောက်ကို စကားတစ်ခွန်းစီ ပြောဖို့ အခွင့်အရေး ရပါတယ်....ကုဗတုံးက အသံမဖောက်နိုင်တဲ့အတွက် ကျေးဇူးပြုပြီး အထဲဝင်လို့ ကိုယ့်ဘာကို စစ်ဆေးကြည့်လိုက်ပါ...."

လော်စပီကာမှ ရှင်းလင်းချက် ထွက်လာပြီးသည်နှင့် ချူဟွိုက်၏ အခြားအာရုံများက ချက်ချင်း အပိတ်ခံလိုက်ရသည်။

သူက တရွတ်ဆွဲခံလိုက်ရသလို ပထမဆုံး ကုဗတုံးပေါ် တက်သွားလိုက်သည်။

“ကျွန်မ ချူကျောင်းပါ...." ကျင်းထျန်းယိ အသံပဲ.....

ချူဟွိုက်၏ အရိပ်လေးက တစ်စက္ကန့်မျှ တောင့်ခဲသွားပြီး ပြုံးလိုက်မိသည်။ အရမ်း သိသာလွန်းတယ်....အတုကြီး....

ကျင်းထျန်းယိကို ရှာဖို့ အရမ်းလွယ်လွန်းနေရင် ပထမနှစ်ဆင့်က အလကားပဲပေါ့....

ထင်ထားသည့်အတိုင်း ဒုတိယတစ်ယောက်ကလည်း ပြောလာသည် " ကိုယ့်ကို မင်းနဲ့အတူ ခေါ်သွားပါ....ချူကျောင်း...."

ကျင်းထျန်းယိအသံကြီးပဲ....

ဒါဆို....အကြားအာရုံက အတုကြီးပဲ....ပထမနှစ်ဆင့်ထဲက အနံ့ဖြစ်ဖြစ် အထိအတွေ့ဖြစ်ဖြစ် အစစ်ဖြစ်နေတာပဲ....

တတိယတစ်ယောက်ကလည်း ကျင်းထျန်းယိအသံအတိုင်းပင်။ ထိုသူက ကုဗတုံးနံရံကို တတောက်တောက်ခေါက်ပြပြီး အရိပ်အမြွက်ပြနေသော်လည်း ချူဟွိုက်မှာ တုပ်တုပ်မလှုပ်ပေ။

စတုတ္ထတစ်ယောက်ကလည်း ခေါင်းကို မြေကြီးနှင့် ရိုက်ပြီး အချက်ပြသေးသည်။

ပဥ္စမတစ်ယောက် " ကျွန်မ ချူကျောင်းပါ....ကျွန်မ ရှင့်ကို ချစ်တယ်...."

ချူဟွိုက်က စိတ်ထဲ ကျိတ်ရယ်မိသည်။ ရုတ်တရက်ဆိုသလို အားမကိုးရသော နည်းလမ်းနှင့် ကျင်းထျန်းယိကို ရှာရန် တက်ခဲ့သည်။

ချူဟွိုက်က နံပါတ်သုံးဆယ့်ငါးဆီ တက်သွားလိုက်ပြီး သူ့နည်းလမ်းနှင့် စစ်ဆေးလိုက်သည်။ တစ်မိနစ်ကြာပြီးနောက် စိတ်ပျက်သလို အမူအရာနှင့် ထွက်လာခဲ့သည်။

မဟုတ်ဘူး....မျှော်လင့်ထားခဲ့ရတဲ့ နံပါတ်သုံးဆယ့်ငါးကလည်း ကျင်းထျန်းယိ ဟုတ်မနေဘူး....ဒါဆို အထိအတွေ့အာရုံကလည်း အတုကြီးပဲ....

သူက နံပါတ်နှစ်ဆယ့်ခုနစ်ဆီ ရောက်သွားချိန် " ကျင်းထျန်းယိ" ဆိုသည့် သူများ၏ ရည်းစားစကားများကြောင့် ခေါင်းအုံနေပြီဖြစ်သည်။

သူ့နည်းလမ်းအတိုင်း စစ်ဆေးကြည့်ပေမယ့် လောလောဆယ်တော့ ဘာရလဒ်မှ မထွက်သေးဘူး....

ကုဗတုံးနံပါတ် နှစ်ဆယ့်ခုနစ်ထဲ ခြေချလိုက်ချိန် ကျင်းထျန်းယိက မျက်မမြင်တစ်ယောက်လို ဖြစ်နေသော ချူဟွိုက်မျက်လုံးများကို စိုက်ကြည့်လိုက်ရင်း အထိအတွေ့အာရုံလည်း မရထားမှန်း သိ၍ မျက်နှာလေးကို ထိလိုက်မိသည်။

မစ်ရှင်က သူ့အသံမထွက်နိုင်အောင် တားမြစ်ထားသည်။

ကုဗတုံးက အထဲတွင် မှောင်မည်းနေသော်လည်း ထိပ်ပိုင်းတွင် အလင်းရောင် တဖျပ်ဖျပ်လက်နေသည့် ကိရိယာတစ်ခုရှိ၍ ကျင်းထျန်းယိက မြင်ရသော်လည်း ချူဟွိုက်က မမြင်ရပေ။

ဦးချိုပုံနဲ့ ကိရိယာပဲ....

ထိုအရာက နှစ်ကြိမ်ခန့် တဖျပ်ဖျပ် လက်သွားပြီး သူ့အသံကြီးက ထွက်လာသည် "ချူကျောင်း....ကိုယ် မင်းကို ချစ်တယ်..."

ကျင်းထျန်းယိ၏ မျက်နှာက တောင့်တင်းသွားသည် "......"

ချူဟွိုက်ရောက်မလာခင် ကုဗတုံးက သီးခြားလို ဖြစ်နေ၍ ကျင်းထျန်းယိမှာ အပြင်က အဖြစ်အပျက်များကို မသိရပေ။ ယခုတွင် သူပြောသလိုမျိုး သူ့အသံကို ကြားလိုက်ရချိန် ချူဟွိုက်ကလည်း သူ့ရှေ့တည့်တည့်ပေါ်လာ၍ ဝန်ခံလိုက်သလို ခံစားရပြီး ရှက်သွားရသည်။

ချူဟွိုက်က စိတ်ရှုပ်သွားဟန်ဆောင်လိုက်ပြီး သူ့နည်းသူ့ဟန်နှင့် စစ်ဆေးလိုက်သည် " ရှင်ကျွန်မကို ချစ်မှန်း သိတယ်....ဟုတ်ပြီလား...."

အမှန်တွင်လည်း ပြိုင်ပွဲဝင်က စကားပြောလို့မရဟု မပြောထားပေ။

ကျင်းထျန်းယိ၏ မျက်နှာက ချက်ချင်း နီရဲသွားသည်။

" နည်းနည်းလောက် ပြောင်းပြောလို့မရဘူးလား....အစ်ကိုကြီး....ဒီစကားကိုပဲ ထပ်ကာထပ်ကာ ကြားနေရတော့ နားကြားပြင်းကပ်လာပြီ....ဒီလိုပြောရင်ရော ဘယ်လိုထင်လဲ...."သူက စကားရပ်သွားသည်။

“ချူကျောင်း....မင်းရဲ့ ခန္ဓာကိုယ်ပေါ်က မှဲ့ရှိတဲ့ နေရာကို ကိုယ်သိတယ်...."

“ဒါမှမဟုတ်....ဥပမာ....." ချူဟွိုက်က အရှက်မရှိ ဆက်ပြောလာသည် " ကျင်းထျန်းယိ....ငါ မင်းကို ဖာ့ခ်ချင်တယ်...." ချူဟွိုက်က ပြောင်ပြောင်တင်းတင်း ပြောပြီး ရယ်လိုက်သည်။

အမှန်တွင်ဖြင့် ရှေ့က ပြောသွားကြသည့် ချစ်စကားများက ဘာအကျိုးမှ မရှိချေ။

ကျင်းထျန်းယိက တစ်စက္ကန့်မျှ ကြောင်အသွားပြီး ကိုယ်ပင် ကျုံ့သွားရသည်။ သူ၏ နှလုံးခုန်သံက အနည်းငယ် မြန်ဆန်လာပြီး ချူဟွိုက်ကို အစိမ်းရောင်သန်းသည့် အကြည့်နှင့် ကြည့်လာ၏။

စကားဆုံးသည်နှင့် ချူဟွိုက်က ခြေလှမ်းအနည်းငယ် လှမ်းလိုက်ပြီး ကျင်းထျန်းယိမှာ မတုံ့ပြန်နိုင်ခင် သူ့ကိုယ်နှင့် ဖိထားပြီးပြီ ဖြစ်သည်။

ချူဟွိုက်က စောစောက ပြုံးနေသော်လည်း သုံးစက္ကန့်မျှ ငြိမ်ကျသွားပြီးနောက် ကျင်းထျန်းယိဆီမှ ခုန်ထွက်သွားသည်။ သူ့ပုံစံက ရှက်စိတ်ကို ချုပ်တည်းနေရသလိုမျိုး မျက်နှာက နီရဲနေသည်။ သူက တည်တည်ငြိမ်ငြိမ်နှင့် ကုဗတုံးထဲမှ ထွက်သွားလိုက်သည်။

ကျင်းထျန်းယိမှာ အံ့သြသွားရသည်။ ချူဟွိုက်က အထိအတွေ့အာရုံ မရှိဘူးမို့လား....

ချူဟွိုက်က အသံကျယ်ကျယ်နှင့် အော်ပြောလိုက်သည် " တတိယပိုင်းနဲ့တင် အဆုံးသတ်ပြီးတော့ နောက်ဆုံး ရွေးချယ်မှု လုပ်ချင်တယ်...."

လော်စပီကာက ချက်ချင်း ပြန်ဖြေမလာချေ။ အချိန်တစ်ခု ကြာမှ စကားဆိုလာသည် " ပြိုင်ပွဲဝင် ချူဟွိုက်....စောစောစီးစီး ရွေးလိုက်တော့မလို့လား....သတိပေးတာနော်....နံပါတ် နှစ်ဆယ့်ခုနစ်ကို ရွေးလိုက်တာနဲ့ အစားခံရ...."

“အချိန်ဖြုန်းမနေနဲ့တော့...." ချူဟွိုက်က တုံ့ဆိုင်းမနေပဲ ကြားဖြတ်ပြောလိုက်သည် " နံပါတ် နှစ်ဆယ့်ခုနစ်ကို ရွေးတယ်....

လော်စပီကာက တစ်ခဏမျှ အသံတိတ်သွားသည်။

မမြင်နိုင်သော တစ်နေရာမှ ချူဟွိုက်က ရှက်သွေးဖြာနေပြီ ဖြစ်သည်။

သူ့ရဲ့ အားကိုးမရတဲ့ နည်းလမ်းက အလုပ်ဖြစ်သားပဲ.....

သူ၏ အခြားအာရုံများက အပိတ်ခံထားရ၍ အကြားအာရုံက တမူထူးစွာ စူးရှနေခဲ့သည်။

သူက ပြောပြီးသည်နှင့် ကျင်းထျန်းယိနား ကပ်လိုက်ရာ ကျင်းထျန်းယိ၏ မြန်ဆန်ပြီး မူမမှန်သည့် နှလုံးခုန်သံကို ကြားလိုက်ရသည်။

နံပါတ် သုံးဆယ့်ငါးက သူဝန်ခံလိုက်တဲ့အချိန်မှာ ဘာမှဖြစ်မသွားဘူး....

ဝန်ခံစကားက လှည့်စားဖို့အတွက် အတုလုပ်ထားပေမယ့် နှလုံးခုန်သံကတော့ အစစ်ဖြစ်နေတယ်....

👻

Prev Next