MM Story Teller

Chapter 63

Viewers 5k

👻Chapter 63

ဒီလာခဲ့...(13)

ချူဟွိုက်က ချက်ချင်း ပြေးသွားလိုက်ရာ မြင်းကမ္ဘာ၏ အစွန်ဘက်၌ သေလားရှင်လား မသေချာသည့် အမျိုးသမီးတစ်ယောက် လှဲနေသည်ကို တွေ့လိုက်၍ မျက်ဆံများ ကျုံ့ဝင်သွားရသည်။

ချူဟွိုက်က သူ့ဘေးက အော်နေသည့် မိန်းကလေးကို မေးလိုက်သည် " ဘာဖြစ်သွားတာလဲ...."

မိန်းကလေး ဒရမ်တစ်ခုလို ခေါင်းတွင်တွင်ယမ်းနေရင်း ချူဟွိုက်ကို တွေ့လိုက်ချိန် သူမမျက်လုံးတို့ လင်းလက်သွားသည်။ သူမက သူ့ဆီ ချက်ချင်း ပြေးလာရင်း သူ့နားရောက်လာသည်။ ထိုအခါမှ ချူဟွိုက်က ဤမိန်းကလေးက စောစောက ချားရဟတ်တွင် တွေ့ခဲ့သည့် ကောင်မလေးဖြစ်နေမှန်း သိလိုက်ရသည်။

“မမကျောင်း...." ကောင်မလေးက တုန်ယင်နေပြီး လက်များပင် တုန်ချင်နေသည်။

“ညီမ....ညီမက ပရောဂျက်ပြီးလို့ ဒီနားကို ဖြတ်သွားမိတာ....မြေကြီးပေါ် လှဲနေတဲ့ ဒီအစ်မကို တွေ့လိုက်လို့ တစ်ခုခု ဖြစ်နေတယ်ထင်ပြီး လှန်ကြည့်လိုက်ပေမယ့် နောက်တော့..."

ချူဟွိုက်က မေးလာသည် " နောက်တော့ ဘာဖြစ်သွားတာလဲ..."

မိန်းကလေး၏ နှုတ်ခမ်းများက တုန်ယင်နေပြီး နောက်ကိုလည်း လှည့်မကြည့်ရဲချေ။

ထိုအချိန် ကျင်းထျန်းယိက အလောင်းကို လှည့်လိုက်ပြီဖြစ်၍ ချူဟွိုက်က ထိုအမျိုးသမီး၏ မျက်နှာကို မြင်သွားပြီး အံ့သြသွားရသည်။

သူမကို သူမှတ်မိသည်။ သူမက စောစောက အမျိုးသမီးသုံး သန့်စင်ခန်းတွင် သံသယဖြစ်စရာ အမူအရာနှင့် သူတွေ့ခဲ့သည့် တစ်ယောက် ဖြစ်နေသည်။

သူမက လက်မှတ်ကို ခိုးပြီး သူမ၏ ချစ်သူကို သတ်ပစ်ခဲ့သည်။ သူမကိုယ်တိုင်လည်း သေသွားလိမ့်မည်ဟု သူမထင်ထားခဲ့ပေ။

ထိုအမျိုးသမီး၏ တင်းတင်းရင်းရင်း မျက်နှာက ယခုတွင် ကြက်သီးထစရာ အပြုံးကြီးနှင့် ပြုံးပြနေပြီး မျက်နှာအစိတ်အပိုင်းများကလည်း တွန့်လိမ်နေ၍ အလင်းရောင်အောက်တွင် သူမပုံစံက လူပြက်တစ်ယောက်နှင့် တူနေသည်။

ချူဟွိုက် မျက်မှောင်ကြုတ်လိုက်မိသည်

" သေသွားပြီလား...."

ကျင်းထျန်းယိက သူတို့ရှေ့က ဖြေးဖြေးချင်းလည်နေသော မြင်းကမ္ဘာကို ကြည့်ရင်း ခေါင်းညိမ့်ပြလိုက်သည်။ အမျိုးသမီးက မြင်းကမ္ဘာပေါ်တွင် သေသွားခဲ့ခြင်းပင်။

ချူဟွိုက်က ကောင်မလေးကို မေးလိုက်သည်

"မင်းရဲ့ ကောင်လေးကရော..."

ကောင်မလေး၏ မျက်နှာက ဖြူဖျော့သွားပြီး အားတင်းပြုံးလိုက်ရင်း ရှင်းပြလာသည်။

“ညီမတို့မှာ စုစုပေါင်း ပရောဂျက်ငါးခု ရှိတယ်...စုံတွဲပရောဂျက်ဖြစ်တဲ့ ချားရဟတ်ကလွဲရင် ကျန်တဲ့ လေးခုက တစ်ယောက်တည်းလုပ်ရမယ့် ပရောဂျက်တွေပဲ....သူကစားရမယ့်ဟာက ညီမနဲ့ မတူဘူး....ပြီးတော့ ညီမတို့က ပထမဆုံးလည်း မစီးရဲကြလို့ အချိန်ကလည်း သိပ်မကျန်တော့ဘူး...နောက်ဆုံးမှာ သူက ညီမနဲ့ ခွဲသွားချင်လို့ ညီမကို မစောင့်ခဲ့တော့တာ...."

သူမက ပြောနေရင်း မျက်နှာအမူအရာကလည်း စိုးရိမ်ထိတ်လန့်နေသည့်ပုံပေါ်သည်။

" မင်း စီးတော့မှာလား...."

ကောင်မလေးက ချက်ချင်း မျက်လုံးပင့်မိသွားသည်။ ကျောင်းကျောင်းနှင့် သူမကောင်လေးက အရည်အချင်းရှိ၍ သူတို့နှင့်သာ စီးလိုက်ပါက သူမအတွက် အသက်ရှင်နိုင်ရန် အခွင့်အရေးရလာတော့မည်။

ဆွေးနွေးကြည့်ပြီးနောက် ချူဟွိုက်နှင့် ကျင်းထျန်းယိတို့က တက်စီးရန်ပြင်သည်။

အပေါက်ဝတွင် အဝါရောင်ကြယ်လေးများပါသည့် ရောင်စုံပူဖောင်းလေးများ ကိုင်ထားသော နှာခေါင်းနီနီနှင့် လူပြက်တစ်ယောက်က ရပ်နေသည်။

ချူဟွိုက်က တက်ရန် ခြေလှမ်းလိုက်သည်နှင့် လက်မှတ်ကို အလိုလို ထုတ်ကြည့်မိရာ လက်မှတ်အောက်ခြေ၌ "မြင်းကမ္ဘာ" ဆိုသည့် စာတန်းလေးတစ်ခု ထပ်တိုးနေသည်။

သူ့ခေါင်းထဲ သတိပေးစာတန်းတစ်ခု ပေါ်လာသည် "ရင်းနှီးစွာ အသိပေးအပ်ပါတယ်....ပြိုင်ပွဲဝင်များက တက်စီးလိုက်တာနဲ့ လမ်းတစ်ဝက်မှာတင် ထွက်သွားလို့မရပါဘူး...မဟုတ်ပါက အကျိုးဆက်အနေနဲ့ မစ်ရှင်ကျရှုံးတယ်လို့ ယူဆသွားမှာပါ...."

ချူဟွိုက်က တွန်းအားပေးခံနေရသလိုမျိုး ဖြစ်နေ၍ လှောင်ရယ်မိသည်။

ကျင်းထျန်းယိက စကားဆိုလာသည် " စဖို့ သုံးမိနစ်ပဲ လိုတော့တယ်...." သူက အချိန်ကို တွက်ကြည့်နေခြင်းဖြစ်သည်။

ချူဟွိုက်က အမြန်ပင် အထဲဝင်စီးလိုက်ပြီး မူမမှန်သည်ကို သတိမထားမိ၍ အနီရောင်မြင်းပုလေးကို ရွေးလိုက်သည်။

စီးနေသည့်အချိန်အတွင်း ကြိုမသိနိုင်သည့် အခြေအနေကို ရောက်လာသည့်အခါ မြင်းပုပါက ချက်ချင်း ဆင်းရလွယ်ကူပြီး မြင်းက မြင့်နေလျှင် အချိန်ယူပြီး ဆင်းနေရလိမ့်မည်။

ချူဟွိုက်နှင့်မတူစွာ ကျင်းထျန်းယိက မြင်းကို ရွေးမနေပဲ သူ့ရှိသည့်ဘက်ကို အေးအေးဆေးဆေး လျှောက်လာသည်။

“ရှင် ဘာလုပ်နေတာလဲ...." ချူဟွိုက်က သူ့ကို သံသယဖြစ်သလို ကြည့်လာသည်။

ကျင်းထျန်းယိက ပြုံးလိုက်ပြီး ပျင်းတိပျင်းရွဲပြောလာသည် " ကိုယ် မင်းနောက်မှာ ထိုင်ချင်လို့လေ...."

ချူဟွိုက်က အံ့သြသွားသော်လည်း ဒေါသထွက်လာသည် " မရဘူး...."

ကျင်းထျန်းယိက အပြုံးလေးနှင့် ဆိုလာသည် " ကိုယ် ပျင်းလို့ပါ...."

သူက ဘေးဘက်ကို သွားလိုက်ရင်း မြင်းဖြူတစ်ကောင်ကို ရွေးလိုက်ပြီး ဝင်ထိုင်လိုက်သည်။ တိုင်လုံးကို ကိုင်ထားပြီး ခြေတံရှည်ကြီးများနှင့် ခွထားကာ ချူဟွိုက်ကို မေ့မေ့မောမော ကြည့်လာ၏။

သားချော့တေးလေးက စတင်ထွက်ပေါ်လာလေသည်

" မြင်းကမ္ဘာကို ကိုယ်အကြိုက်ဆုံးကွယ်....ကစားကွင်းထဲဝယ် တိတ်တဆိတ် လည်ပတ်နေရှာတယ်...."

မြင်းကမ္ဘာက စတင်လည်ပတ်နေပြီဖြစ်သည်။ ချူဟွိုက်က သားချော့တေးသွားက အဓိပ္ပါယ်တစ်ခုခုရှိနေလောက်မည်ဟု ထင်၍ သေသေချာချာ နားထောင်နေချိန် ကိုင်ထားသည့် တိုင်ရှည်ကြီးက စိုစွတ်လာသလို ခံစားရသည်။

သူက ရုတ်တရက် ရှေ့ကို ကြည့်လိုက်ရာ မြင်းခေါင်း၏ အရှေ့ဘက်ရှိ တိုင်အောက်ခြေမှ သွေးတို့ စိမ့်ထွက်လာသည်ကို တွေ့လိုက်ရသည်။

သွေးများက ကမ္ဘာ့ဆွဲအားကို ဆန့်ကျင်ပြီး တိုင်ရှည်ပေါ် တွယ်တက်လာရင်း တိုင်တစ်ခုလုံးကို လျင်မြန်စွာ ဖုံးလွှမ်းသွားလေသည်။

သူက ချက်ချင်း လက်လွှတ်လိုက်ပြီး ငုံ့ကြည့်လိုက်ရာ သူ့လက်က သန့်ရှင်းနေသေးမှန်း တွေ့လိုက်ရသည်။

တိုင်ရှည်မှ သွေးတို့ စိမ့်ထွက်လာပြီး မြင်းခေါင်းပေါ်သို့ စီးကျလာကာ လည်တိုင်နားသို့ ရောက်လာသည်။

ချူဟွိုက်က မျက်မှောင်ကြုပ်ပြီး ကိုယ့်လက်ကို ပြန်ကြည့်နေသော ကျင်းထျန်းယိဘက်ကို နောက်လှည့်ကြည့်မိသည်။

ချူဟွိုက်က တစ်ခဏကြာသည်ထိ အခြေအနေကို မဆုံးဖြတ်နိုင်သေး၍ အလျင်စလို မလှုပ်ရှားသေးပေ။

မြင်းကမ္ဘာက မြန်မြန်ဆန်ဆန် လည်ပတ်လာ၍ အပြင်ဘက်က လူများပင် ခေါင်းမူးလာရသည်။ ရုတ်တရက် ဆံပင်အမြောက်စည်းလေး နှစ်ဖက်နှင့် ကလေးမလေးတစ်ယောက်က မြင်ကွင်းထဲ ပေါ်လာလေသည်။

ကလေးမလေးက စတော်ဘယ်ရီပုံများပါသည့် ဂါဝန်လေး ဝတ်ထားပြီး ခြေအိတ်အဖြူနှင့် ရှူးဖိနပ်အနက်လေး စီးထားသည်။ သူမက အရုပ်ကလေး ကိုင်ထားပြီး မျက်နှာသေးသေးလေးက ချစ်စရာကောင်းကာ နှင်းလို ဖြူစွတ်နေသည်။

မျက်တောင်ခတ်လိုက်သည့်အချိန် ကလေးမလေးက ပျောက်သွား၏။

သူ့စိတ်ထဲ အတွေးတစ်ခု ပေါ်လာ၍ အမြန်လှည့်ကြည့်လိုက်ရာ ကလေးမလေးက သူ့နောက်တွင် ရပ်နေသည်။

"ကိုကို....မမ....မတ်တပ်ရပ်...." ကလေးမလေးက ပျစ်ချွဲချွဲအသံလေးနှင့် ပြောလာသော်လည်း ကျောချမ်းစရာကောင်းနေသည်။

ချူဟွိုက်နှင့် ကျင်းထျန်းယိတို့က အကြည့်ချင်း ဖလှယ်လိုက်ရင်း သူမပြောသည့်အတိုင်း ရပ်ပေးလိုက်သည်။

ကလေးမလေးက ကျေနပ်သွားဟန် စက်ရုပ်လို ခေါင်းစောင်းကြည့်လာပြီး မျက်လုံးဟောက်ပက်ကြီးနှင့် နိမိတ်မကောင်းသည့် အပြုံးတစ်ခု ပြလာသည်။

“မီးမီးကို လာရှာ...." ကလေးမလေးက လက်ဆန့်ပြီး ဖိတ်ခေါ်လာလေသည်။

ချူဟွိုက်က တမင်သက်သက် အသံကို ညင်သာလိုက်ပြီး နူးညံ့သည့်ပုံပေါက်အောင် ကြိုးစားလိုက်သည် " မမတို့က မီးမီးကို ဘယ်လိုရှာရမှာလဲ...."

လစ်ခနဲဆိုသလို ကလေးမလေးက နောက်ထပ် ထောင့်ချိုးတွင် ပေါ်လာသည်။

" ရှို့ရှို့က မြင်းကမ္ဘာထဲမှာ ရှိတယ်....သားချော့တေးမဆုံးခင် ရှို့ရှို့ကို ရှာရမယ်....မတွေ့ရင် ရှို့ရှို့ စိတ်ဆိုးမှာနော်....."

တခစ်ခစ်ရယ်နေသည့် ကလေးမလေးက စကားပြောနေရင်း ခြိမ်းခြောက်သည့်အသံ ပြောင်းသွား၏။

မျက်စိတစ်မှတ်အတွင်း ကလေးမလေးက နေရာပြောင်းသွားပြန်သည်။

" မမတို့မှာ အခွင့်အရေးတစ်ခုပဲ ရှိတယ်....မြင်းကမ္ဘာပေါ် ရောက်ပြီးတာနဲ့ စိတ်ပြောင်းသွားလို့ မရဘူး....လိမ်တာ ညာတာ ခွင့်မပြုဘူး...."

ပြောပြီးသည်နှင့် ရှို့ရှို့ဆိုသည့် ကလေးမလေးက စတင် ကစားနေပြီး မြင်းကမ္ဘာရှိ မြင်းရုပ်များကြား ပျော်မြူးနေကာ ကျောချမ်းစရာရယ်သံကြီးကလည်း အလျဥ်းသင့်သလို ထွက်လာသေးသည်။

ချူဟွိုက်က စိတ်ငြိမ်အောင်လုပ်လိုက်ပြီး သူမ ပြောသွားသည့် စကားလုံးများကို အဓိပ္ပါယ်ဖော်ကြည့်သည်။

ပထမဆုံးအနေနှင့် အချိန်က အကန့်အသတ်ရှိလေသည်။ သူတို့က သီချင်းဆုံးသွားပြီး မြင်းကမ္ဘာရပ်သွားချိန် မတိုင်မီထိ ရှို့ရှို့ကို ရှာရမည် ဖြစ်သည်။

ရှို့ရှို့က မြင်းရုပ်များကြား ရှိနေပြီး သူတို့ကလည်း နေရာမှန်ကို ရွေးရန် အခွင့်အရေးတစ်ခုသာ ရှိသည်။

ရှို့ရှို့က မြင်းကမ္ဘာထဲမှာ ရှိတယ်ဆိုတော့ သွေးထွက်နေတဲ့ တိုင်လုံးတွေနဲ့များ ဆက်စပ်နေမလား....

ဖြစ်နိုင်ချေကို စဥ်းစားကြည့်ရင်း ချူဟွိုက်၏ မျက်လုံးများ မှေးကျဥ်းမိသွားသည်။

သူက အပေါ်မြောက်မသွားခင် ရေတွက်ကြည့်ရာ စုစုပေါင်း မြင်းရုပ် နှစ်ဆယ့်လေးရုပ် ရှိနေသည်။ မြင်းရုပ်များက အချိန်နှင့်တပြေးညီ ပြေးလွှားနေသည်။

ထို့ပြင် ပြဿနာက သားချော့တေးက ဘယ်လောက်ကြာမည်မှန်း သေချာမသိပေ။

သားချော့တေးက သုံးမိနစ် မဟုတ်ရင် ငါးမိနစ်လောက် ရှိနိုင်တယ်....

ကျင်းထျန်းယိက အမြန် ဆုံးဖြတ်လာသည် " မင်းက ဘယ်ဘက်ခြမ်းကိုယူ....ကိုယ်က ညာဘက်ခြမ်းကို ယူလိုက်မယ်....."

ချူဟွိုက်က ခေါင်းညိမ့်ပြလိုက်ပြီး မြင်းရုပ်များကို စိတ်မြန်လက်မြန် စစ်ဆေးလိုက်သည်။

လည်ပတ်နေတဲ့ မြင်းရုပ်တွေရဲ့ သဲလွန်စက ဘာဖြစ်နိုင်မလဲ....။

ကျန်သည့် သဲလွန်စ အလုံး၂၀တွင်လည်း ရှာဖွေခြင်းနှင့် ပတ်သက်သည့် စကားလုံး ရှိမနေချေ။ ကြည့်ရတာ ဘယ်သူမှလည်း မရှိဘူး....။

ချူဟွိုက် မျက်မှောင်ကြုတ်လိုက်မိသည်။

မြန်မြန်ဆန်ဆန် စစ်ဆေးလိုက်ပြီးနောက် ချူဟွိုက်နှင့် ကျင်းထျန်းယိတို့က ပြန်ဆုံသွားချိန် ဘာမှမတွေ့ကြောင်း တစ်ဖက်နှင့်တစ်ဖက် ခေါင်းယမ်းပြလာကြသည်။

ချူဟွိုက်က မြင်းကိုယ်ထည်ကိုလည်း သင်္ကာမကင်း၍ ကြိုးစားဖွင့်ကြည့်လိုက်သော်လည်း ဖွင့်မရချေ။

ကျင်းထျန်းယိ " အဓိကအပိုဒ်က ပြီးသွားပြီ...."

ချူဟွိုက်ရင်ထဲ တင်းကျပ်သွားပြီးနောက် စိတ်အေးသွားသလို သက်ပြင်းရှိုက်မိသည်။ နောက်ထပ် စာသားအနည်းငယ်ကလည်း အဓိကအပိုဒ်နှင့် ခပ်ဆင်ဆင်လေးများ ဖြစ်၍ စကားလုံးနည်းနည်းသာ ပြောင်းသွားသည်။ အဓိကအပိုဒ်က နှစ်ကြော့ပြန်လာ၍ သားချော့တေးက အရမ်းရှည်လွန်းနေပြီး သူတို့အတွက်တော့ သတင်းကောင်းပင်။ အဓိကအပိုဒ်ပြီးသည်နှင့် သံစဥ်အထွတ်အထိပ် ရောက်လာ၍ သူတို့အချိန်က နည်းပါးလာသည်။

ချူဟွိုက်က မတ်တပ်ရပ်နေဆဲဖြစ်ပြီး မေးထောက်ရင်း အတွေးနစ်နေ၏။ ယခုအချိန်က စိတ်ငြိမ်အောင်ထားမှသာ လွတ်လမ်းတွေ့မည် ဖြစ်သည်။

ကျင်းထျန်းယိက ချူဟွိုက်၏ ချထားသည့် လက်တစ်ဖက်ကို ဆွဲယူလိုက်ပြီး မြင်းရုပ်ကြားထဲ ပျော်ပျော်ကြီး ကစားနေသည့် ကလေးမလေးကို ကြည့်ကာ သူမလက်ထဲက အရုပ်ကိုလည်း ရုတ်တရက် ကြည့်မိသွားသည်။

ကျင်းထျန်းယိက ချူဟွိုက်ကို ပုတ်လိုက်ပြီး အဓိပ္ပါယ်ပါပါ ပြုံးပြလိုက်ရင်း စကားဆိုလာသည် " သီချင်းစာသားထဲက 'အရုပ်နောက် လိုက်ဖမ်းခြင်း' ဆိုတဲ့ စကားလုံးမှာ သဲလွန်စများ ရှိနေတာလား....."

ကလေးမလေးက "ရှို့ရှို့ကို လိုက်ရှာ" ဟု ပြောသွားပြီး ရှို့ရှို့ကလည်း သူတို့ရှေ့တည့်တည့်တွင် ရှိနေသည် မဟုတ်ပါလား....။

ကိုကိုက ဘာလို့ ရှာနေရမှာလဲ.....။ ဖမ်းလိုက်ရုံပဲပေါ့.....။

အရုပ်နောက်လိုက်ဖမ်းတာ.....ရှို့ရှို့ကိုင်ထားတဲ့ အရုပ်လား....ဒါမှမဟုတ် ရှို့ရှို့ကိုယ်တိုင်က အရုပ်လား.....သူတို့အားလုံးက အရုပ်တွေပဲ မဟုတ်ဘူးလား....နောက်ဆုံးမှာ သူတို့က ရှို့ရှို့ကို လိုက်ဖမ်းရမှာပဲလေ.....

ချူဟွိုက်က အံ့သြသွားပြီးနောက် အပြုံးလေးနှင့် ချီးကျူးလာသည် " အထင်ကြီးလောက်စရာပဲ...."

“ ကိုယ်အရင်ဆုံး စမ်းကြည့်လိုက်မယ်...." ကျင်းထျန်းယိက ပြောလိုက်ပြီး ထိုသို့မလွယ်လောက်ဟု အလိုလို ခံစားမိသည်။

သူက ကလေးမလေးရှိသည့် နေရာဆီ ဦးတည်သွားလိုက်သော်လည်း အနားမရောက်ခင် ကလေးမလေးက သူ့ကို သတိထားမိသွားသည်။

သူမက မြေကြီးပေါ် တုန်းလုံးလှဲပြီး ကျောက်စရစ်ခဲများ ဆော့နေသော်လည်း ချက်ချင်း ထရပ်လိုက်ပြီး တစ်ခစ်ခစ်ရယ်ကာ ကျင်းထျန်းယိနှင့် ပိုဝေးသည့်နေရာဆီ အမြန် ရွေ့သွားလေသည်။

ကျင်းထျန်းယိက ကလေးမလေးရှိနေသည့် နေရာကို စိုက်ကြည့်လိုက်ပြီး ဆက်ကြိုးစားလိုက်သည်။ ယခုတစ်ကြိမ်တွင် သူက အနောက်ဘက်မှ ချဥ်းကပ်လိုက်သော်လည်း ကလေးမလေးက နောက်မျက်စိပါနေသည့်အတိုင်း ချက်ချင်း နေရာပြောင်းသွားပြန်သည်။

ကြည့်ရတာ ဒီလို အနားကို သွားတာက အလုပ်မဖြစ်တဲ့ပုံပဲ....။

ချူဟွိုက်က အေးအေးဆေးဆေး စောင့်ကြည့်နေရင်း ကျင်းထျန်းယိကို အလျင်စလို သွားမကူချေ။ အကြိမ်ပေါင်းများစွာ ကြိုးစားပြီးနောက် ကျင်းထျန်းယိက ရပ်သွားပြီး ချူဟွိုက်ဆီ ပြန်လာရှာသည်။

ထိုအချိန် သားချော့တေး၏ ဒုတိယတစ်ကြော့က ပြီးခါနီး၍ အထွပ်ထိပ်ကို ရောက်တော့မည် ဖြစ်သည်

" အို့....ငါ့ရဲ့ သူငယ်ချင်းကောင်းလေးရယ်...မြင်းကမ္ဘာကြီးကကွယ် နတ်သမီးပုံပြင်ထဲဆီ ငါ့ကို ခေါ်သွားပေးပါတယ်....."

ကျင်းထျန်းယိက ဆိုလာသည် " မင်းမြင်တယ်မို့လား..."

ချူဟွိုက်က ပြုံးပြလိုက်ပြီး တိုတိုတုတ်တုတ် ပြန်ဖြေလာသည် " ကြယ်ပုံစံ...."

ကလေးမလေး၏ တည်နေရာ အပြောင်းအလဲက နည်းစနစ်ရှိသည်။

မြင်းကမ္ဘာကြီးက ကြယ်ပုံသဏ္ဍာန်ရှိပြီး ကလေးမလေးက ခုန်လိုက်သည့်အချိန်တိုင်း ကြယ်ပုံလို မျဥ်းတစ်ကြောင်းဖြစ်သွားသည်။ မျဥ်းက တစ်ခါတစ်ရံ ရှည်ပြီး တစ်ခါတစ်ရံ တိုလေသည်။

“ကိုယ် သူမနောက်ကို လိုက်လိုက်မယ်...." ကျင်းထျန်းယိက ဆိုလိုက်သည် " မင်းက နောက်ထပ်ထောင့်ချိုးမှာ သူမကို လှမ်းဖမ်းလိုက်...."

ချူဟွိုက်က သဘောတူဟန် ခေါင်းညိမ့်ပြလိုက်ပြီး ထောင့်ချိုးတစ်ခုနား ဖြေးဖြေးချင်း ကပ်သွားကာ ရပ်နေလိုက်သည်။

“ကိုကိုကြီး....ရှို့ရှို့ကို မဖမ်းနိုင်ပါဘူး...." ကလေးမလေးက ကျင်းထျန်းယိနား ရောက်သွားသည်နှင့် စပ်ဖြဲဖြဲလုပ်လာရင်း မမောနိုင်မပန်းနိုင် ဆက်ပြုံးပြနေသည်။

ကျင်းထျန်းယိက မျက်ခုံးပင့်ပြီး ချူဟွိုက်ကို ကြည့်လိုက်သည်။ ထိုကလေးမလေး နောက်ထပ် ရွေ့သွားသည်နှင့် ထောင့်ချိုးနားတွင် အလစ်စောင့်နေသည့် ချူဟွိုက်က သူမထံ ခုန်ဝင်လိုက်ပြီး သူမ၏ အဝတ်အစားများကို တင်းတင်းဆွဲကိုင်ထားလိုက်၏။

ကလေးမလေး၏ တခစ်ခစ်ရယ်သံက ရုတ်တရက် ပျောက်ကွယ်သွားပြီး ချူဟွိုက်၏ ကမ္ဘာကြီးကလည်း အဖြူနှင့်အမည်း ပြောင်းသွားလေသည်။

ခေါင်းလောင်းသံများက သူ့နားထဲ ပဲ့တင်ထပ်နေပြီး သားချော့တေးလေးကလည်း လွင့်ပျယ်သွားလေသည်။

ချူဟွိုက်က ကလေးမလေး၏ အင်္ကျီကို တင်းတင်းဆွဲကိုင်ထားနေရင်း ကောင်းမွန်စွာ ပြုလုပ်ထားသော အင်္ကျီစက ဆွေးနေပြီး သူ့လက်ပေါ် သွေးစက်တို့ကျလာမှန်း သတိထားမိသွားသည်။

ကျောပေးထားသည့် ကလေးမလေးက ရုတ်တရက် နောက်ပြန်လှည့်ကြည့်လာချိန် ချူဟွိုက်က တွန့်လိမ်နေသော မျက်နှာတစ်ခုကို တွေ့လိုက်ရ၏။

ကလေးမလေး၏ နှုတ်ခမ်းထောင့်များက ဆုတ်ဖြဲခံထားရပြီး အမာရွတ်ကြီးက နားရွက်ထိ တောင်လျှောက် ဆန့်ထွက်နေသည်။ မျက်လုံးအိမ်များကလည်း မျက်လုံးမရှိပဲ ဟောက်ပက်ကြီး ဖြစ်နေသည်။

စောစောက သူတို့မြင်ခဲ့ရသည့် ကျောက်စရစ်ခဲနှစ်လုံးက သူမမျက်လုံးများ ဖြစ်နေသည်။

ကလေးမလေး၏ မျက်နှာတွင် စီးကရစ်မီးနှင့် အတို့ခံထားရသည့် အမာရွတ်များရှိကာ ဦးရေပြားတွင်လည်း အပေါက်ပေါင်းများစွာရှိနေ၍ လောက်များ တရွရွထွက်နေသည်။

ချူဟွိုက်က စိတ်ထဲအလိုလို လက်လွှတ်ပစ်လိုက်ချင်သော်လည်း ကလေးမလေး၏ နိမိတ်မကောင်းသလို မျက်နှာအမူအရာနှင့် ရေခဲတမျှ အေးစက်နေသည့် စကားသံက ပေါ်ထွက်လာသည်

" မမ...မမက ရှို့ရှို့ကို တွေ့သွားပြီပေါ့ ဟမ်...."

သူ့တစ်ကိုယ်လုံး မူးဝေလာလေသည်။

သူပြန်နိုးလာသည့်အချိန် ချူဟွိုက်က သစ်သားနှင့်လုပ်ထားသည့် မြင်းနက်ပေါ်တွင် ဒဏ်ရာမရပဲ အကောင်းတိုင်း ထိုင်နေမှန်း သိလိုက်ရသည်။

ချူဟွိုက်က နှလုံးခုန်မြန်နေသေး၍ ပြန်လှည့်ကြည့်လိုက်ချိန် ကလေးမလေးက ပျောက်ကွယ်သွားမှန်း နားလည်သွားသည်။

သီချင်းသံက အဆုံးသတ်နားနီးအချိန် အချိန်မရှိတော့၍ ချူဟွိုက်က ကျင်းထျန်းယိကို အမြန်ခေါ်လိုက်ရသည်

" ဒီတစ်ခုပဲ....အမြန်လာ...."

ကျင်းထျန်းယိက အနောက်ဘက်မှ ရောက်လာလေသည်။

ချူဟွိုက်က ရုတ်တရက် အတွေးတစ်ခု ပေါ်လာ၍ သူ့တစ်ကိုယ်လုံး တင်းကျပ်သွားသည်။ ကြည့်ရတာ အစတုန်းက ကျင်းထျန်းယိက သူနဲ့အတူတူထိုင်မလား မေးခဲ့ပေမယ့် သူ့ဘက်က ငြင်းခဲ့လို့ဖြစ်မယ်....။

ကျင်းထျန်းယိက ချူဟွိုက်အတွေးကို သိနေဟန် နူးနူးညံ့ညံ့ ရယ်မောလာပြီး ချူဟွိုက်၏ ခါးသွယ်သွယ်လေးကို အရှက်မရှိ လာဖက်ပြီး သူ့လည်ပင်းနား မေးစေ့နှင့် ပွတ်သတ်လာသည်။

ချူဟွိုက်က တုန်ယင်လာသည် "...." သူ တကယ်ပဲ ကန်ပစ်ချင်နေပြီနော်.....

ကျင်းထျန်းယိက အမှတ်ရသွားသလို မြင်းခေါင်းကို လက်တစ်ဖက်နှင့် လှမ်းဖွင့်လိုက်သည်။

“ကျွန်မ ကြိုးစားကြည့်ပြီးပြီ....အလုပ်မဖြစ်...."

ချူဟွိုက်က သူလုပ်ချင်သည့်အရာကို သိလိုက်သော်လည်း သူ့စကားမဆုံးမီ ကျင်းထျန်းယိက မြင်းခေါင်းကို အလွယ်လေး ဖွင့်နိုင်သွားသည်။

သွေးနံ့ပြင်းပြင်းနှင့် အော်ဂလီဆန်စရာ အနံ့ကြီးက လှိုက်တက်လာလေသည်။

ကျင်းထျန်းယိက ဆိုလာသည် " ကြည့်ရတာ အစောပိုင်းတုန်းက မင်း ကလေးမလေးကို မဖမ်းနိုင်သေးလို့ သစ်သားမြင်းရုပ်ကို မဖွင့်နိုင်ခဲ့တာဖြစ်မယ်...."

ချူဟွိုက်က အမည်းရောင် အခေါင်းပေါက်ထဲ ကြည့်လိုက်ရာ တည်ငြိမ်တတ်သည့် သူကိုယ်တိုင်ပင် အန်ချင်သွားရသည်။

အခေါင်းပေါက်ထဲတွင် အသားလွှာများပြည့်နေပြီး မသဲမကွဲမြင်နေရသည့် အရိုးတုံးနှင့် အသားစများက ဟော့ပေါ့လို ရောထွေးနေလေသည်။

🤮

👻

Prev Next