Chapter 181

🌱Arc 5 - [ဖျော်ဖြေရေးနယ်ပယ်တွင် လယ်စိုက်ခြင်း ]

Ch 181

မင်းအတွက် လယ်ကွင်း စပွန်ဆာပေးမယ် (၁)

ဇာတ်လမ်းတိုထဲရှိ သူ၏ အဓိကအပိုင်းကို ထုတ်လွှင့်ပြသသည့်အခါ စွေ့ချီချောင်း၏ ကျော်ကြားမှုမှာ အထွတ်အထိပ်သို့ ရောက်ရှိသွားတော့သည်။ 

အုပ်စုငယ်က ဂြိုဟ်ပေါ်ရှိ ဒေသခံများနှင့် မကြာခဏ ထိပ်တိုက်တွေ့ကြလေ့ ရှိသည်။ တစ်ချိန်တည်းမှာပင် အတွင်းပိုင်း၌လည်း အချို့သော သဘောထားကွဲလွဲမှုများ ရှိနေရာ ထိုအခြေအနေကို အခွင့်ကောင်းယူ၍ ဒေသခံများက သူတို့၏ အခြေစိုက်စခန်းကို ရှင်းလင်းပြီး စွေ့ချီချောင်းနှင့် ထောက်ပံ့ရေးတပ်သားအချို့ကို ပြန်ပေးဆွဲပြီး ကုန်ကြမ်းပစ္စည်းများစွာကိုပါ ယူငင်သွားခဲ့သည်။ 

အဓိကဇာတ်ကောင်များက တစ်ဦးနှင့်တစ်ဦး အပြစ်တင်ကာ အချင်းချင်း ခိုက်ရန်ဖြစ်ပွားကုန်ကြတော့သည်။ သို့သော် နောက်ဆုံးတွင်မူ စွေ့ချီချောင်းအား မကယ်တင်မီ အချင်းချင်း ပြန်လည် စုစည်းသွားခဲ့ကြတော့သည်။ 

သရုပ်ဆောင်များက စွေ့ချီချောင်းတွင် မည်သည့်အဖြစ်အပျက်များ ဖြစ်ပွားနေကြောင်း မသိကြချေ။ ထိုအချိန်တွင် စွေ့ချီချောင်းကညအကျဉ်းသားအဖြစ်မှ ဒေသခံလူမျိုးစုခေါင်းဆောင်၏ ဧည့်သည်တော်အဖြစ်သို့ ပြောင်းလဲသွားနှင့်နေပြီ ဖြစ်သည်။ အစောပိုင်းက ထိုလူများက သူ့ကို လုံးဝ အမှုမထားခဲ့မိပေ။ ရိုးရှင်းလှသည့် အသိဉာဏ်တု အစီရင်ခံစာများအရ သူတို့ရရှိထားသော အချက်အလက်များထဲတွင် စွေ့ချီချောင်းက မတိုက်ခိုက်နိုင်သဖြင့် နောက်တန်းတွင် ချက်ပြုတ်ရေးကို တာဝန်ယူထားရသူ တစ်ဦးမျှသာ ဖြစ်ပေသည်။ 

သို့သော် သူ့ကို ဖမ်းဆီးပြီးနောက်တွင်မူ အားလုံးက အမြင်ပွင့်စရာ အတွေ့အကြုံတစ်ခု ပိုင်ဆိုင်ခဲ့ကြရတော့သည်။ သူတို့က စွေ့ချီချောင်း၏ အပြတ်အသတ် အနိုင်ယူခြင်းကို ခံစားခဲ့ကြရ၏။ ထိုအချိန်တွင် စွေ့ချီချောင်း၏ အဖော်များကလည်း သူ့ကို ကယ်တင်ရန် ထွက်လာကြပြီ ဖြစ်သည့်တိုင် လမ်းတွင်သာ ရှိနေသေးပေသည်။ 

“ငါတို့တွေ အချင်းချင်း ပြဿနာ ဖြစ်နေကြတာနဲ့ အခုလောက်ဆို စွေ့ချီချောင်းနဲ့ အားဟွာတို့ ဘာဖြစ်နေပြီလဲတောင် မသိတော့ဘူး ...”

“သူတို့တွေ အဖမ်းခံထားရတာ တော်တော် ကြာနေပြီ တစ်ခုခု ဖြစ်နေတာတော့ မဟုတ်လောက်ပါဘူးနော် ...”

“သူတို့တွေ သေချာပေါက် အဆင်ပြေမှာပါ ပုံမှန် ဖြစ်နေကျ ဇာတ်လမ်းအတိုင်းသာဆို “တော်သေးတယ် ငါတို့တွေ အချိန်မီခဲ့လို့ နည်နည်းသာ နောက်ကျသွားရင် မထင်မှတ်ထားတာတွေ ဖြစ်လာနိုင်လောက်တယ်” ဆိုတဲ့ စကားမျိုး ပြောရနိုင်လောက်တယ် ...”

“ပါးစပ်ပုပ်ကြီးနဲ့ လျှောက်ပြောမနေနဲ့ ...”

ထို့နောက် သူတို့က ဒေသခံများ၏ စခန်းထဲသို့ ဝင်လိုက်သည့်အခါ ထင်မှတ်မထားသည့် မြင်ကွင်းတစ်ခုကို တွေ့လိုက်ရတော့သည်။ ဒေသခံအားလုံးက စွေ့ချီချောင်းကို နားချရန် တူညီသော စကားများကိုသာ ထပ်တလဲလဲ ပြောနေကာ ထိုစကားများမှာ ရိုးရှင်းသည့်တိုင် စိတ်အားထက်သန်မှုများဖြင့် ပြည့်ဝနေကြောင်း အတိုင်းသား ပေါ်လွင်လှပေသည်။ သူတို့က အုပ်စုလိုက် တန်းစီကာ ကျယ်လောင်စွာဖြင့် အော်ပြောနေကြသည်။ 

“ကျေးဇူးပြုပြီး သရဖူကို လက်ခံပေးပါ ...”

အားလုံး  “...”

ဖာ့ခ် သူတို့သာ နည်းနည်းလောက် နောက်ကျပြီးမှ ရောက်သွားရင် ဒီတစ်ယောက်က ဘုရင် ဖြစ်နေလောက်ပြီ ... 

ယခု အသေအချာ တွေးကြည့်လိုက်ကာမှ သူတို့က ဒေသခံ လူမျိုးစုများ နေထိုင်ရာ နေရာသို့ ထွက်လာစဉ်ကတည်းက စိတ်ထဲတွင် တစ်ခုခု မှားယွင်းနေသည်ကို ခံစားမိနေခဲ့ကြခြင်း ဖြစ်သည်။ 

ထို ဒေသခံလူမျိုးစုများ၏ အခြေစိုက်စခန်းထဲတွင် စိုက်ပျိုးရေးကိရိယာများစွာ ရှိနေကာ ထိုပစ္စည်းတို့၏ ပုံပန်းသဏ္ဌာန်မှာလည်း သူတို့ထံတွင် ရှိနေသည့် ပစ္စည်းများနှင့် များစွာ ဆင်တူလှပေသည်။ သို့သော် ထိုကိရိယာများကို တွေ့ခဲ့သည့်တိုင် တစ်ဖက်လူများက သူတို့ထံမှ ကူးချထားခြင်း ဖြစ်ရမည်ဟုသာ ထင်ခဲ့ကြသည်။ စင်စစ်အားဖြင့် ထိုအတွေးမှာလည်း မမှန်လှချေ။ ထိုလူမျိုးစုထံ၌ လယ်ယာစိုက်ပျိုးရေးကိရိယာများ ရှိနေရုံမျှသာမက အရာအားလုံးကိုလည်း စည်းကမ်းတကျ သိမ်းဆည်းထားသည်မှာ သူတို့ကို ပစ္စည်းများအား မည်ကဲ့သို့ ထားသိုသိမ်းဆည်းသင့်ကြောင်း ညွှန်ကြားပေးမည့်သူတစ်ဦး ရှိနေသည့်အလားပင်။ အားလုံးမှာ သေသပ် သန့်ရှင်းနေလှသည်။ 

ယခု စွေ့ချီချောင်းကို တွေ့လိုက်ရကာမှ ထိုကဲ့သို့ သန့်ရှင်းနေရခြင်း၏ အကြောင်းအရင်းကို  သဘောပေါက်သွားတော့သည်။ 

လက်စသတ်တော့ သူတို့ကို ကောင်းကောင်း ဦးဆောင်ခဲ့တဲ့လူက စွေ့ချီချောင်း ဖြစ်နေတာကိုး သူ့ကိုယ်သူ “ဧကရာဇ်လုပ်ဖို့ အရည်အချင်း ရှိတယ်” လို့ ပြောခဲ့တာ မထူးဆန်းတော့ပါဘူး ...

စင်စစ်အားဖြင့် ဒေသခံများအား သွေးဆောင်သည့် အခန်းနှင့် စပ်လျဉ်း၍ ဇာတ်ညွှန်းကို ပိုပြီး လက်တွေ့ဆန်သွားစေရန် ဇာတ်ညွှန်းရေးဆရာကို အကြံပေးခဲ့သူမှာလည်း စွေ့ချီချောင်းပင် ဖြစ်ပေသည်။ သူက အစစ်အမှန် ဧကရာဇ်တစ်ပါးအဖြစ် တစ်ကြိမ်မှ သရုပ်မဆောင်ခဲ့ဖူးသည့်တိုင် အလယ်ခေတ်ကာလ၏ အုပ်စိုးသူဘဝနှင့် ယိုယွင်းပျက်စီးနေသော ဂြိုဟ်ပေါ်ရှိ အရှင်သခင်တစ်ဦးအဖြစ်ကို ကိုယ်တိုင် ကြုံတွေ့ခဲ့ဖူးသည့်အပြင် ဧကရာဇ်သွေးကို နိုးထထားသူလည်း ဖြစ်သည့်အတွက် သူ့အကြံပြုချက်များမှာ အလွန် လက်တွေ့ကျလှပေသည်။  

စွေ့ချီချောင်းက ဇာတ်လမ်းတိုထဲရှိ သူ၏ "မီးဖိုချောင်ထဲတွင်သာ အမြဲ နေခဲ့ရသည့် ကျွမ်းကျင်သူတစ်ဦး” ဟူသည့် ဇာတ်ရုပ်ကို ရုပ်လုံးပေါ်လာအောင် တင်ဆက်ဖော်ပြနိုင်ခဲ့သည်။ သူ့ကို စိတ်အားထက်သန်စွာဖြင့် နားချရန် ကြိုးပမ်းနေသည့် ဒေသခံမျိုးနွယ်စုတို့၏ စကားသံအောက်တွင် ဤကဲ့သို့ ပြောလိုက်သည်။ 

“မင်းတို့အားလုံး ဒီလို လုပ်နေဖို့ မလိုပါဘူး ငါပြောခဲ့တဲ့ စကားတွေအတိုင်းသာ လိုက်လုပ်ကြ ကောင်းကောင်း တိုးတက်အောင်လုပ် အတူတူ ကြိုးစားကြ... ပြီးတော့ ဉာဏ်ပညာရှိတဲ့ ခေါင်းဆောင်တစ်ယောက်ကို ရွေးကောက်တင်မြှောက်ကြ ...”

ဒေသခံများက တစ်ပြိုင်နက်တည်း ရေရွတ်လိုက်ကြသည်။ 

“မင်းကိုယ်တိုင်က ဉာဏ်ပညာအရှိဆုံး ခေါင်းဆောင်တစ်ယောက်ပဲလေ ...”

“မဟုတ်ဘူး ...”

စွေ့ချီချောင်းက ပြောလိုက်သည်။ 

“ဒီမှာ ငါ့ရဲ့ အဖော်တွေ ရှိနေသေးတယ် ...”

ထိုအကြောင်းကို ပြောလိုက်သည့်အခါမှ ကြည့်ရှုနေသူများမှာ စွေ့ချီချောင်းနှင့်အတူ အဖမ်းခံထားရသူများက သူ့အဖော်များ ဖြစ်သည်ဟု သိလိုက်ရသည်နှင့်တစ်ပြိုင်နက် ဒေသခံအုပ်စုက သူတို့ကို ကောင်းကောင်းမွန်မွန် ဆက်ဆံကြကြောင်း တွေ့လိုက်ရတော့သည်။ ထိုအချိန်အတွင်း ထိုလူအားလုံးက အလွန် စိတ်အေးသက်သာစွာဖြင့် ဘေးနားတွင် တိတ်ဆိတ်စွာ ထိုင်ကြည့်နေခဲ့ကြသည်။ 

ဟုတ်သားပဲ ... ဒီလူတွေက သူတို့ သရဖူဆောင်းပေးချင်တဲ့လူရဲ့ အဖော်အပေါင်းတွေလေ ... အဲဒါကြောင့် သူတို့က အလုပ်လုပ်နေစရာမှ မလိုတာ ...

စွေ့ချီချောင်း၏ အပေါင်းအဖော်များမှာ အမျိုးမျိုးသော ကိစ္စများစွာကို ကြုံတွေ့ခဲ့ကြပြီး ဖြစ်သည့်အတွက် မည်သို့သော ကိစ္စမျိုးနှင့် ကြုံတွေ့လာပါစေ သူတို့ကို ခြောက်လှန့်နိုင်သည့်အရာ မရှိတော့ဟု ထင်ထားခဲ့ကြသည်။ 

ထိုစဉ် ဒေသခံမျိုးနွယ်စု၏ အစောင့်အရှောက်တပ်များက စွေ့ချီချောင်းတို့ကို ကယ်တင်ရန် ရောက်လာသူများနှင့် ဆုံမိကာ တိုက်ပွဲ စတင်ဖြစ်ပွားခဲ့တော့သည်။ 

စွေ့ချီချောင်း၏ ပြင်းထန်လှသော အမိန့်စကားကြောင့် ထို ဒေသခံများက စိတ်မပါဘဲ လက်နက်ချလိုက်ရရုံသာမက သူတို့ကိုပါ အပြင်ဘက်အထိ လိုက်ပါပို့ဆောင်ပေးခဲ့ရသည်ဟုပင် ပြော၍ ရပေသည်။ ထိုမြင်ကွင်းကို ဒေသခံမျိုးနွယ်စု၏ အခြားသော မိတ်ဆွေများ မြင်လိုက်ရသည့်အခါ ကိုယ့်မျက်စိကိုပင် မယုံကြည်နိုင်လောက်သည်အထိ အံ့ဩသွားခဲ့ကြသည်။ 

စွေ့ချီချောင်းနှင့် သူ့လူများကို ဒေသခံစခန်းအပြင်ဘက်အထိ လိုက်ပို့ပြီးနောက် ထိုလူများက နောက်ဆုံးအကြိမ် ထပ်ပြောလိုက်ပြန်သည်။ 

“တကယ်လို့ မင်းစိတ်ပြောင်းသွားရင် အချိန်မရွေး ပြန်လာပြီး ခေါင်းဆောင်လုပ်လို့ ရတယ်နော် ...”

စွေ့ချီချောင်းက လက်ကိုသာ ယမ်းပြလိုက်သည်။ 

“သွားကြရအောင် ...”

ထို့နောက် သူက တစ်ခြားလူများဘက်သို့ လှည့်ကာ ပြောလိုက်သည်။ 

“တော်သေးတယ် မင်းတို့တွေ အချိန်မီ ရောက်လာလို့ မဟုတ်ရင် ထင်မထားတာ တစ်ခုခု ဖြစ်သွားနိုင်လောက်တယ် ... သူတို့တွေ ငါ့ကို နားချနေကြတာ အကြိမ်ပေါင်း မနည်းတော့ဘူး ...”

အားလုံး  “...”

အပြင်ဘက်တွင် သူတို့ကို စောင့်ဆိုင်းနေကြသည့် အခြား အဖော်များလည်း ရှိနေသေးပေသည်။ စွေ့ချီချောင်းနှင့် အခြားလူများ ထွက်လာသည်ကို မြင်လိုက်သည့်အခါ အားလုံးက တစ်ယောက်တစ်ပေါက် မေးလိုက်ကြတော့သည်။

“မင်းတို့အားလုံးကို ကြည့်ရတာ ဒဏ်ရာရထားတဲ့ပုံတော့ မပေါ်ပါဘူး စွေ့ချီချောင်းရော ကျန်တဲ့လူတွေရော အဖမ်းခံထားရတဲ့ အချိန်အတွင်း ဘာမှ မဖြစ်ခဲ့ကြဘူး မဟုတ်လား ...”

အမှန်တရားကို လက်တွေ့ ကြုံတွေ့ခဲ့ရသူများ၏ အမူအရာမှာ အလွန်ရှုပ်ထွေးနေကာ မကျေမချမ်းဖြစ်မှုများပင် အနည်းငယ် ရောစွက်နေကြသေးသည်။ 

စွေ့ချီချောင်းကို အဲဒီ့မျိုးနွယ်စုက သူတို့ဘုရင် လုပ်ပေးဖို့တောင် တောင်းပန်နေခဲ့တာကွ ...

ထိုသို့ဖြင့် စွေ့ချီချောင်းက အားလုံး၏ အမြင်တွင် ပုန်းအောင်းနေသော ဘော့စ်တစ်ဦး ဖြစ်လာခဲ့တော့သည်။

ဘုရင်ဖြစ်ဖို့ကို ငြင်းဆန်ပြီး သူတို့အတွက် ချက်ပြုတ်ပေးဖို့ ပြန်လာတယ်ဆိုတာ သိပ်ပြီးတော့ မဟုတ်သလိုပဲနော် ... 

တစ်ယောက်က ပြောလိုက်သည်။ 

“ငါ့စိတ်ထဲမှာ စွေ့ချီချောင်းက ဧကရာဇ်ဟောင်းတစ်ပါးလားလို့တောင် သံသယဖြစ်မိနေပြီ သူက ဟိုးအရင်ကတည်းက နိုင်ငံအချို့ကို သိမ်းပိုက်ထားပြီးသားပဲ ဖြစ်ရမယ် အဲဒါကြောင့် သူ့ပုံစံက ဒါတွေကို သိပ်ပြီး အရေးမစိုက်တဲ့ပုံစံမျိုး ဖြစ်နေတာများလား ...”

အားလုံးက ထိုမှန်းဆချက်မှာ ဖြစ်နိုင်ချေရှိသည်ဟု လက်ခံလိုက်ကြသည်။ သူတို့က ထိုစကားကို စွေ့ချီချောင်း၏ အရှေ့တွင် မပြောရဲကြသည့်တိုင် သီးသန့်ရှိသည့်အချိန်တွင်မူ ထိုအကြောင်းနှင့် စပ်လျဉ်း၍ meme များ လုပ်လာကြပြန်၏။ 

သို့သော် ဟာသလုပ်လွန်းအားကြီးသည့်အတွက် တစ်ခါတစ်ရံတွင် သူတို့အနီး၌ စွေ့ချီချောင်း ရှိနေသည်ကိုပင် မေ့လျော့သွားတတ်ကြတော့သည်။ ဥပမာအားဖြင့် တစ်ရက်သော အခါ၌ စွေ့ချီချောင်းက နေ့ခင်းကြောင်တောင် အိပ်မက်မက်နေသူ၏ ပုခုံးကို ပုတ်ကာ စကားပြောခဲ့ဖူးသည်။ 

“ဟင်းတွေ အေးကုန်တော့မယ် ဆက်ပြီး မစားတော့ဘူးလား ...”

ထိုအခါ ထိုလူက အလန့်တကြား လန့်နိုးလာကာ ပျာပျာသလဲ ပြောလိုက်သည်။ 

“ဒီငယ်သားက ဗိုက်မဆာသေးပါဘူး ...”

စွေ့ချီချောင်း “...”

အားလုံး “ဖွီး ...”

ဇာတ်ညွှန်းရေးသူက စွေ့ချီချောင်း၏ ဇာတ်ကောင်ကို ပို၍ လက်တွေ့ဆန်သွားစေရန်အတွက် သူ့ကို စွမ်းရည်အသစ်တစ်ရပ် ထပ်ထည့်ပေးလိုက်သည်။ အကြောင်းမှာ သူက လက်တွေ့ဘဝတွင်လည်း တိရိစ္ဆာန် မွေးမြူရေးလုပ်ငန်းကို လုပ်ကိုင်နေ၍ ဖြစ်သည်။ 

ထို့နောက်တွင် အားလုံးက စွေ့ချီချောင်း၏ ဧကရာဇ်စွမ်းရည်မှာ လူသားများအပေါ်တွင်သာမက တိရိစ္ဆာန်များ အပေါ်တွင်လည်း သက်ရောက်မှု ရှိနေကြောင်း သိရှိသွားကြတော့သည်။ သူက အချို့သော သားရဲများကို ထိန်းချုပ်ယဉ်ပါးစေကာ အမဲလိုက်သည့် လုပ်ငန်းစဉ်၌ ပါဝင်ကူညီစေလိုက်၏။ 

ထိုသို့ဖြင့် တိရိစ္ဆာန်များက စွေ့ချီချောင်း၏ သတင်းပေးများ ဖြစ်နေနိုင်လေမလားဟူသော မှန်းဆချက်များ ထွက်ပေါ်လာကာ သူ့အကြောင်းကို အတင်းပြောကြလေတိုင်း တိရိစ္ဆာန်များကို ရှောင်ကြဉ်လာကြတော့သည်။ အကြောင်းမှာ ထိုလူများက ထိုတိရိစ္ဆာန်များမှာ မည်မျှအထိ ဉာဏ်ရည်မြင့်မားကြကြောင်း မသိထား၍ ဖြစ်သည်။ 

စွေ့ချီချောင်းက ထိုတိရိစ္ဆာန်အုပ်စု၏ ခေါင်းဆောင်ဖြစ်သူကို "ရှောင်ပိုင်"ဟူသည့် နာမည်တစ်ခု ပေးထားခဲ့သည်။

....

ကျန်းထန်ဝေ့ :  “ဘာ .. ဘာကြီးလဲ ...”

“ဘာကို 'ဘာကြီးလဲ' လဲ ဘာလို့ အထူးပြုလုပ်ချက် ဖန်တီးတာ မလုပ်ဘဲ ကြုံရာကျပန်း လျှောက်ကြည့်နေတာလဲ ...”

လက်ထောက်ဒါရိုက်တာက သူ့ကို စူးစူးရဲရဲ စိုက်ကြည့်လိုက်သည်။ သူက အမည်ဝှက်တစ်ခု သုံးထားသည့်အတွက် ရိုက်ကွင်းတွင် ရှိသူတိုင်းက သူ့ကို “ရှောင်ကျန်း” ဟုသာ ခေါ်ဆိုကြသည်။ 

ကျန်းထန်ဝေ့က ဇာတ်ညွှန်းကို အပြီးအထိ ဖတ်မကြည့်ရသေးချေ။ မည်သည့်နေရာမှ ရောက်လာမှန်း မသိရသည့် ရှောင်ပိုင်တစ်ယောက် နောက်ထပ် ထပ်ရောက်လာပြန်ရာ သူက မျက်နှာတစ်ခုလုံး မည်းမှောင်လျက် မေးလိုက်သည်။ 

“ ဘာလို့ အဲဒါကို ရှောင်ပိုင်လို့ ခေါ်တာလဲ ....”

လက်ထောက်ဒါရိုက်တာက ပြောလိုက်သည်။ 

“ သေချာစဉ်းစားကြည့်တော့မှ... မင်းက မစ္စတာစွေ့ကို နေ့တိုင်း အနှောင့်အယှက်ပေးနေတာပဲ မင်းက သူ့ရဲ့ အတုအယောင်ပရိသတ်ပဲ ဖြစ်ရမယ်... မစ္စတာစွေ့ရဲ့ တိုက်ရိုက်ထုတ်လွှင့်တဲ့ အစီအစဉ်တိုင်းမှာ ရှောင်ပိုင်လို့ ခေါ်တဲ့ ကြောင်တစ်ကောင် ရှိတယ်ဆိုတာ မင်း မသိဘူးလား ...”

ကျန်းထန်ဝေ့  : “...”

သိတာမှ အရမ်းကို ကောင်းကောင်းကြီး သိတာပေါ့ ဒါပေမယ့် ဘာလို့လဲဆို သူက အရမ်းကို သံသယများတတ်တဲ့သူ ဖြစ်နေလို့လေ အဲဒီ့ရှောင်ပိုင်အတုက ဘယ်ချောင်ထဲကနေ ရောက်လာရတာလဲ ....

“ရှောင်ပိုင်” ကို အထူးပြုလုပ်ချက်ဖြင့် ဖန်တီးနေရန် မလိုအပ်ပေ။ ရိုက်ကူးရေးအဖွဲ့က အပြည့်အဝ သင်ကြားထားပြီး ဖြစ်သည့် ကြောင်တစ်ကောင်ကို ရှာတွေ့ထားပြီး ဖြစ်ပေသည်။ 

လေ့ကျင့်ရေးဆရာက စွေ့ချီချောင်းကို အမိန့်ပေးနည်းမျိုးစုံအား သင်ကြားပေးခဲ့ကာ စွေ့ချီချောင်းကလည်း ကျွမ်းကျင်ပြီး သဘာဝကျစွာဖြင့် အမိန့်ပေးနိုင်ခဲ့သည်. 

ကျန်းထန်ဝေ့မှာ ပို၍ပင် စိတ်ဖိစီးလာသည့်ဟန်ပင်။ 

“ကျွန်တော်ကတော့ ဒါကို သိပ်မဟုတ်သေးဘူးလို့ ထင်တာပဲ ...”

လက်ထောက်ဒါရိုက်တာက ပြောလိုက်သည်။ 

“အာ မင်းမှာ ပိုပြီးကောင်းတဲ့ အကြံပြုချက်မျိုး ရှိနေလို့လား ...”

အတွေးတို့ကို အချိန်အတော်ကြာ ထိန်းချုပ်ထားရသည့် ကျန်းထန်ဝေ့က ပြောလိုက်သည်။ 

“ကျွန်တော်က စွေ့ချီချောင်းရဲ့ တိုက်ရိုက်ထုတ်လွှင့်မှုတွေ အားလုံးကို ကြည့်ဖူးတယ်လေ အဲဒါကြောင့် ဒီကောင်က ရှောင်ပိုင်အစစ်လောက် ချစ်စရာမကောင်းမှန်း သိနေတာ ...”

လက်ထောက်ဒါရိုက်တာက ရယ်သံနှောကာ ပြောလိုက်သည်။ 

“တော်လိုက်ပါတော့ ရှောင်ပိုင်အစစ်ကဖြင့် သူ့ကို ဝက်က ဝင်တိုက်ရတဲ့အထိ အူကြောင်ကြောင်နိုင်နေတဲ့ဟာကို ...”

ကျန်းထန်ဝေ့ “...”

လက်ထောက်ဒါရိုက်တာက ဂုဏ်ယူစွာဖြင့် ပြောလိုက်သည်။ 

“ငါတို့ရွေးထားတဲ့ကြောင်ကို အနည်းဆုံးတော့ ဝက်က ဝင်မတိုက်ဘူးလေ... ပြီးတော့ ကိုယ်ထည်ကလည်း အကြီးကြီးပဲ... ဇာတ်ညွှန်းရေးဆရာက ရိုက်ကွင်းနောက်ကွယ်က အခန်းလေးတွေကို ရိုက်ပြီး အင်တာနက်ပေါ် တင်တော့လည်း လူတိုင်းက စွေ့ချီချောင်းနဲ့ ရှောင်ပိုင်ကြားက ဆက်ဆံရေးကို သဘောကျကြတယ်လေ ဒီရှောင်ပိုင်က အရမ်းကို မိုက်တာပဲ ..."

ထို့နောက် သူက တစ်ခုခုကို တွေးမိသွားဟန်ဖြင့် ဆက်ပြောလိုက်သည်။ 

“အိုး ဟုတ်သားပဲ ရှောင်ပိုင်အစစ်က အဖြူရောင်အစစ်လည်း မဟုတ်ဘူးလေ ဟားဟားဟားဟား ...”

သူတို့ ရှာတွေ့ထားသည့် တိရိစ္ဆာန်မှာ လူအရွယ်အစားခန့် ရှိသည့် သက်တံရောင် Albino အမျိုးအစား ဝံပုလွေတစ်ကောင် ဖြစ်သည်။ 

ကျန်းထန်ဝေ့  “...”

ထိုစကားကို သူလည်း မငြင်းဆန်နိုင်ပေ။ သူက CU တွင် ကိုယ်ထည်အဖြူပေါ်၌ အမည်းရောင် အစက်များ ပါဝင်သော ကြောင်တစ်ကောင် ဖြစ်ခဲ့ကာ အလယ်ခေတ်တွင် အနက်ရောင်၊ ABO ကမ္ဘာတွင် လိမ္မော်ရောင်ကြောင်တစ်ကောင် ဖြစ်ခဲ့ပေသည်။ သို့သော် သူ၏ နောက်ဆုံး မှတ်ဉာဏ်တုလေယာဉ်ပေါ်တွင် သူက ဆွတ်ဆွတ်ဖြူ ကြောင်တစ်ကောင် ဖြစ်သည့်အပြင် ယင်းကျန်း၏ ဆက်ခံသူဟူသော အထောက်အထားကိုပင် ရရှိထားသေး၏။ 

ကျန်းထန်ဝေ့က အလုပ်ပြန်လုပ်ရတော့မည် ဖြစ်သည့်အတွက် စွေ့ချီချောင်းနှင့် albino မြေခွေးတို့ အချင်းချင်း ရင်းနှီးအောင် လုပ်နေကြသည့် မြင်ကွင်းကို အချိန်မီ မမြင်လိုက်ရပေ။ လက်ထောက်ဒါရိုက်တာ၏ စကားများနှင့် ရိုက်ကူးရေးနောက်ကွယ်ရှိ ဖြစ်ရပ်များကို လူသိရှင်ကြား ထုတ်ပြခဲ့သော ဇာတ်ညွှန်းရေးဆရာကြောင့် သူ့ဒေါသများမှာ ပို၍ပင် ကြီးမားလာတော့သည်။ 

စွေ့ချီချောင်းက မြေခွေးနှင့် ကစားရန် စားစရာအချို့ ထုတ်ယူလိုက်သည်။ ထိုမြေခွေးမှာ ကောင်းမွန်စွာ ပျိုးထောင်ခြင်း ခံထားရသည့်အပြင် ငယ်စဉ်ကတည်းက အမျိုးမျိုးသော ဖျော်ဖြေရေးအစီအစဉ်များတွင် ပါဝင်တင်ဆက်ရန် မကြာခဏ အပြင်သို့ ခေါ်ထုတ်ခဲ့ဖူးသည့်အတွက် လူသားများနှင့် များစွာ ရင်းနှီးကျွမ်းဝင်လှပေသည်။ တစ်ခဏအတွင်းမှာပင် ၎င်းက စွေ့ချီချောင်းနှင့် ရင်းနှီးသွားကာ စွေ့ချီချောင်း၏ ပုခုံးပေါ်သို့ ခေါင်းတင်လျက် ချစ်စဖွယ်ကောင်းစွာ လှည့်ပတ်ပြလိုက်တော့သည်။ 

သူက အင်တာနက်သုံးစွဲသူများ၏ တိရိစ္ဆာန်များ ပါဝင်လာမည့် အခန်းကို စောင့်မျှော်နေသည်ဟူသော မှတ်ချက်များနှင့် ချီးကျူးမှုအားလုံးကို မြင်တွေ့ခဲ့ရသည်။ ကြည့်ရှုသူအားလုံးက ထိုတိရိစ္ဆာန်၏ ပုံစံမှာ စွေ့ချီချောင်းနှင့် ဆက်သွယ်နိုင်သည့်ဟန် ပေါ်နေသည်ဟုပင် ပြောခဲ့ကြသေးသည်။ ထို့နောက် ဇာတ်ညွှန်းရေးဆရာက ပြောလိုက်သည်။ 

“ဒါ ဘယ်သူလဲ ခန့်မှန်းကြည့်ကြပါဦး ...”

ဝါရင့်ပရိသတ်များက ရယ်ကာမောကာ ပြောလိုက်ကြသည်။ 

“ဒါက ရှောင်ပိုင်တော့ မဟုတ်လောက်ပါဘူးနော် ဟုတ်တယ် မဟုတ်လား ...”

ရှောင်ပိုင်က ဒီမှာလို့ ...

ကျန်းထန်ဝေ့က တိတ်တခိုး ငိုကြွေးလိုက်သည်။ သူ့နှလုံးသားမှာလည်း ဝမ်းနည်းစိတ်ကြောင့် သွေးများပင် စီးကျလာနေပြီ ဖြစ်သည်။ 

အိပ်ယာကနေ နိုးလာကြပါတော့... မင်းတို့တွေ တကယ့် ရှောင်ပိုင်အစစ်ကို မမှတ်မိကြရင်တောင် ရှောင်ပိုင်အစစ်က ဒီလိုမျိုး မုန့်လေးနည်းနည်း စားရဖို့ တစ်ချက်နှစ်ချက်လောက် အပွတ်ခံရဖို့အရေး မြေကြီးပေါ် လူးလှိမ့်ပြဖို့ မဖြစ်နိုင်ဘူးဆိုတာလောက်တော့ သိထားရမယ်လေ ...

ကျန်းထန်ဝေ့က မတ်တပ်ရပ်ကာ ပြောလိုက်သည်။ 

“မရဘူး ကျွန်တော် သဘောမတူဘူး ...”

ထိုစဉ် စွေ့ချီချောင်းက ဝံပုလွေကို သူ့လက်ထဲရှိ စားစရာအား ပေးလိုက်ရင်း မနီးမဝေးရှိ ကျန်းထန်ဝေ့ကို ရည်ရွယ်ကာ ပြောလိုက်သည်။ 

“ရှောင်ပိုင် ထိုင် ...”

ကျန်းထန်ဝေ့က ချက်ခြင်း ကြမ်းပေါ်သို့ ဘုတ်ခနဲ ထိုင်ချလိုက်၏။ 

လက်ထောက်ဒါရိုက်တာ : “ဟမ် ...”

လက်ထောက်ဒါရိုက်တာက သူ့ကို မယုံနိုင်ဟန်တို့ ပြည့်နှက်နေသော မျက်နှာဖြင့် ပြောလိုက်သည်။

“ဘာတွေ ရုတ်ရုတ်သဲသဲ လုပ်နေတာလဲ ဟမ် မင်းမှာ ငါ့အစီအစဉ်ကို သဘောမတူဖို့ အခွင့်အာဏာ မရှိဘူးနော် ဟုတ်ပြီလား ...”

ကျန်းထန်ဝေ့ :  “ ...”

🌲🌲🌲