Chapter 18

👥️Chapter 18

နောက်ထပ် နှစ်ရက်ဆက်တိုက် ကြာမြင့်သည်အထိ #ရုပ်ချောပြီး ချစ်စရာကောင်းတဲ့ စတန့်သမား မောင်ငယ်လေး ဟူသော အကြောင်းအရာကို ဆွေးနွေးသူအရေအတွက်မှာ ဆက်တိုက် တိုးမြင့်နေဆဲ ဖြစ်ပေသည်။ 

သို့သော် ယန်အန်းယုကမူ ထိုအကြောင်းကို ချက်ခြင်း မသိခဲ့ချေ။ 

Weibo ကို ကြည့်ကာ အချိန်ဖြုန်းရခြင်း၊ ဂိမ်းဆော့ခြင်းတို့နှင့် နှိုင်းယှဉ်ပါလျှင် သူသည် စာအုပ်ဖတ်ရခြင်းကိုသာ ပိုပြီး အားသန်ပေသည်။ ထို့အပြင် သူက ယီချန်းယန်ထံမှ ကိုယ်တိုင် လက်မှတ်ထိုးထားသည့် ပိုစတာတစ်ခု ပါရှိသော ဓာတ်ပုံစာအုပ်တစ်အုပ်ကိုလည်း လက်ခံရရှိထားသေးသည်။ 

ယန်အန်းယုက ထိုစာအုပ်နှင့် ပိုစတာကို ရင်ခွင်ထဲပိုက်ကာ အိပ်ယာပေါ်တွင် ဝမ်းသာအားရ လူးလှိမ့်လိုက်သည်။ 

အမည်မသိနံပါတ်၏ ပိုင်ရှင်မှာ ယီချန်းယန်ဖြစ်ကြောင်း သိသွားရချိန်မှစ၍ ထိုအမျိုးသားကို ပို၍ပင် နှစ်သက်လာမိခဲ့တော့သည်။ သို့သော် ထိုနှစ်သက်မှုမှာ ပရိသတ်တစ်ဦး၏ သဘောကျမှုမျိုးသာ ဖြစ်ပေသည်။ 

ယီချန်းယန်၏ သီချင်းများအား နားထောင်ခြင်းအပြင် သူသည် ပရိသတ်ဖိုရမ်ထဲသို့လည်း မကြာခဏ ဝင်ကြည့်လေ့ ရှိပေသည်။ ထို့အပြင် နောက်ဆုံးရ သတင်းများအား အချိန်မီ သိနိုင်စေရန်အတွက် Weibo နှင့် twitter တို့ကိုလည်း မကြာမကြာ ဝင်ကြည့်တတ်၏။ 

စစ်သူကြီးယီ ပြန်လည်ဝင်စားခြင်း ဟုတ် မဟုတ်ဟူသည့် အကြောင်းအရာကို ဘေးဖယ်ထားကာ ယခုအချိန်တွင် သူသည် ယီချန်းယန်၏ သီချင်းများနှင့် သရုပ်ဆောင်မှုကို အမှန်တကယ် သဘောကျ နှစ်ခြိုက်နေပြီ ဖြစ်ပေသည်။ 

သူက ယီချန်းယန်၏ ဓာတ်ပုံများနှင့် ဗီဒီယိုများကိုလည်း အများအပြား စုဆောင်းထားခဲ့သေးသည်။ အားလပ်ချိန်တိုင်း ယီချန်းယန် သရုပ်ဆောင်ထားသည့် ဇာတ်လမ်းများနှင့် သူ ပါဝင်ခဲ့ဖူးသော ရသစုံရှိုးများကို ထပ်ကာတလဲလဲ ကြည့်ရှုနေတတ်သည်။ 

သို့သော် သူ့အနေဖြင့် ထို ပိုစတာနှင့် ဓာတ်ပုံစာအုပ်များကိုမူ နံရံပေါ်တွင် ပွင့်ပွင့်လင်းလင်း ချိတ်ဆွဲမထားရဲသည့်အတွက် ၎င်းတို့ကို ဖွက်ထားရန်လည်း ကြိုးစားရပေသည်။ ၎င်းတို့ကို ယီချန်းယန်သာ မတော်တဆ တွေ့သွားခဲ့ပါလျှင် ရှက်ရွံ့မှုကြောင့် သူ့မျက်နှာကို တွင်းတူးကာ ဖွက်ထားမိပေလိမ့်မည်။ 

ထိုသို့ဖြင့် သူကိုယ်တိုင်ပင် သတိမထားမိဘဲ အိုင်ဒေါ၏နောက်သို့ လိုက်ခြင်းအနုပညာကို အလိုလို သင်ယူမိသွားခဲ့သည်။ 

မတတ်နိုင်ဘူးလေ စစ်သူကြီးချုပ်က ဘာလို့ ဒီဘက်ခေတ်အထိတောင် တအားကို ချောမောခန့်ညားနေရတာလဲ ...

လက်မှတ်ထိုးထားသည့် အသစ်စက်စက် ပိုစတာနှင့် ဓာတ်ပုံစာအုပ်ကို သိမ်းထားပြီးနောက် ယန်အန်းယုသည် ဖုန်းထဲရှိ ယီချန်းယန်၏ ပရိသတ် group ထဲသို့ ဝင်ကာ အခြားသူများက ရုပ်ရှင်ဧကရာဇ်၏ B မြို့တော်သို့ သွားသည့် ခရီးစဉ်အကြောင်း ဆွေးနွေးထားသည်များနှင့် fan cam များ ထုတ်ပေးခြင်း ရှိမရှိ ဝင်ကြည့်လိုက်သည်။ 

ဓာတ်ပုံတစ်ပုံကို မြင်လိုက်ရချိန် .. အသေအချာ ကြည့်လိုက်သည့်အခါ ထိုဓာတ်ပုံမှာ သူ့ပုံ ဖြစ်နေသည်ကို တွေ့လိုက်ရတော့သည်။ 

ယန်အန်းယုက မင်သက်ကြောင်အသွားခဲ့၏။ 

ယန်ကောရဲ့ ခြေတံရှည်လေး : ဟားဟားဟား သူက ချောလည်းချော ချစ်စရာလည်း ကောင်းတယ်လို့ မခံစားရဘူးလား 

သို့သို့ကျွင်း : အင်း ဒီ စတန့်သမား မောင်လေးက ချစ်စရာလေးနော် ငါ ကြားတာတော့ သူက အခုမှ ၂၀ ကျော်လေးပဲ ရှိသေးတယ်တဲ့ အိုက်ယား ဒီအရွယ်လေးပဲ ရှိသေးတာတောင် လူကြားထဲမှာ ထင်းထွက်နေပြီနော် ငါတို့လို အန်တီအရွယ်ကြီးတွေက ဘာများ တတ်နိုင်ဦးမှာလဲ ...

အားမူမူ : နိုးနိုးနိုး ငါတို့က အမြဲတမ်း ၁၈ နှစ်လေ (*/ω＼*)

သို့သို့ကျွင်း : ဟီးဟီး.. နင်ပျော်ရင် ပြီးတာပါပဲ ..

နန်နန် : ဘာတွေ ဖြစ်နေတာလဲ နင်တို့တွေ ဘယ်သူ့အကြောင်း ပြောနေကြတာလဲ ..

ယန်ကောရဲ့ ခြေတံရှည်လေး : နန်နန် နင် မသိသေးဘူးလား Weibo hot topic က စတန့်သမား မောင်လေးကို မြန်မြန်လေး သွားကြည့်လိုက်ဦး မြင်လိုက်တာနဲ့တင် နင် တန်းပြီး သဘောပေါက်သွားလိမ့်မယ် 

နန်နန် : အခုပဲ သွားကြည့်လိုက်မယ် …

ယန်အန်းယုက Weibo ကို ဝင်ကြည့်လိုက်သည့်အခါ  #ရုပ်ချောပြီး ချစ်စရာကောင်းတဲ့ စတန့်သမား မောင်ငယ်လေး ဟူသော  hot topic ကို တွေ့လိုက်ရသည့်အတွက် ချက်ခြင်း ကြောင်အသွားရတော့သည်။ 

ထိုပို့စ်ကို ဖွင့်ကြည့်လိုက်သည့်အခါ အနည်းငယ် ပြုံးယောင်သမ်းနေသည့် သူ့မျက်နှာအား ဘေးတိုက် ရိုက်ကူးထားသော ဓာတ်ပုံကို မြင်လိုက်ရ၏။ 

ထိုပို့စ်ကို မားကတ်တင်း ဘလော့ဂါတစ်ဦးမှ စတင်ပြီး တင်ခဲ့ခြင်း ဖြစ်သည်။ သူသည် နာမည်ကျော်ကြယ်ပွင့်များ၏ သတင်းများနှင့် ဗီဒီယိုဖိုင် အတိုလေးများကို မကြာခဏ တင်ပေးလေ့ ရှိသူဖြစ်ကာ ယခုအကြိမ်တွင်မူ သူ၏ အဓိကပစ်မှတ်မှာ ကြယ်ပွင့်များ မဟုတ်ဘဲ စတန့်သမားလေးတစ်ဦး ဖြစ်နေခဲ့သည်။

[မိတ်ဆက် : တရုတ်ပြည်သူ့သမ္မတနိုင်ငံခေတ်ကို အခြေခံထားတဲ့ “လက်ဝှေ့ကျော်” ကို အားလုံးလည်း သိနေပြီး ဖြစ်မှာပါ ဒီဇာတ်လမ်းထဲမှာ အရမ်းကို ချောမောပြီး စိတ်အားထက်သန်မှုတွေ ပြည့်ဝတဲ့ ကျန်းယွင်ရွှယ်ရဲ့ ဇာတ်ကောင်က တကယ်ကို အသိအမှတ်ပြုလောက်အောင်ကို ပြောင်မြောက်ထူးချွန်လွန်းတယ်လို့ ပြောလို့ရပါတယ် ဒါပေမယ့် ရိုက်ကွင်းနောက်ကွယ်က အပိုင်းတွေကို ကြည့်လိုက်တဲ့အခါမှာတော့  အဓိကဇာတ်လိုက် ယွီစစ်ယွမ်ရဲ့ လူစားထိုး စတန့်သမားလေးက တော်တော်လေးကို ချောမောတဲ့အပြင် ချစ်စရာလည်း ကောင်းပြီးတော့ သူ့ကို အိမ်ပြန်ခေါ်သွားချင်စိတ် ပေါက်လိုက်တာလို့ ဆက်တိုက် ခံစားမိနေတော့တာပါပဲ ...  ]

ထိုစာသားနှင့်အတူ ယန်အန်းယု၏ မျက်နှာကို တည့်တည့် ရိုက်ကူးထားသည့် ဓာတ်ပုံကိုပါ ပူးတွဲကာ တင်ထားသေး၏။ ထိုပုံထဲတွင် လက်သီးကို ဆုပ်ထားသည့် ယန်အန်းယုသည် တိုက်ခိုက်ရေး ဇာတ်ကွက်တစ်ခုကို ရိုက်ကူးနေသည့်ဟန်ပင်။ လေတိုက်ခတ်မှုကြောင့် ရှေ့ဆံပင်များ အနည်းငယ် ရှုပ်ထွေးနေသည့်တိုင် စိတ်အားထက်သန်မှုတို့ကို မျက်ဝါးထင်ထင် မြင်တွေ့နေရသည့် မျက်နှာနုနုငယ်ငယ်လေးမှာ မြင်ရသူတိုင်းကို စိတ်သက်သာရာ ရစေခဲ့ပေသည်။ 

Geniecillo : ငါ ရုပ်ရှင်မြို့တော်က ရိုက်ကွင်းကို သွားကြည့်တုန်းက အဲဒီ့ စတန့်သမား မောင်လေးကို တကယ်ကြီး တွေ့ခဲ့တာ အဲ့တုန်းကဆိုလေ သူက ယီချန်းယန်နဲ့တောင် အတူတူတွဲပြီး သရုပ်ဆောင်နေသေးတယ် ..

တုန်ရီနေသော စုထောင်ထောင် : ဝိုး ဝိုး ဝိုး ဝိုး ဒီစတန့်သမား မောင်လေးက တကယ်ကြီးကို ချောတာဟ ..

အန်းအာ့ရှန် : ချစ်လည်း ချစ်စရာလေး ပြုံးလိုက်တဲ့အချိန်ဆို ပိုပြီးတောင် ချိုမြိန်သွားသေးတယ် ...

လူတိုင်းက သူ့အား ချီးကျူးနေကြသည်ကို တွေ့လိုက်ရသောအခါ ယန်အန်းယု၏ ကြောင်အမှုများသည် ဂုဏ်ယူမှုအဖြစ်သို့ ပြောင်းလဲသွားတော့သည်။ သူက အောက်သို့ ဆက်ပြီး ကြည့်လိုက်သည့်အခါ ဗီဒီယိုတစ်ခုကို တွေ့လိုက်ရတော့သည်။ 

မည်သည့်နတ်ဘုရားက ယန်အန်းယု၏ လူရွေးပွဲ ဗီဒီယိုကို အောင်အောင်မြင်မြင် တူးထုတ်လာနိုင်ခဲ့သည်မသိ၊ စက္ကန့်နှစ်ဆယ်ပင် မပြည့်သေးခင်မှာပင် “မနက်ဖြန်များ၏အသံ” ဒုတိယပွဲစဉ်၌ သူ ယှဉ်ပြိုင်ခဲ့သည့် တင်ဆက်မှု ဗီဒီယိုဖိုင်ကို အကြည်ဗားရှင်းဖြင့် ထွက်ရှိလာတော့သည်။ ကြည်လင်ပြတ်သားသည့် သီဆိုပုံနှင့် လှပခန့်ညားလှသည့် ကကွက်တို့၏ ယှဉ်တွဲပေါင်းစပ်မှုကြောင့် ယန်အန်းယုသည် အင်တာနက်သုံးစွဲသူများ၏ အထင်ကြီးခြင်းကို ရရှိပိုင်ဆိုင်ခဲ့တော့သည်။ 

မှတ်ချက်နေရာရှိ ယီချန်းယန်၏ ပရိသတ်အစစ်အမှန်များက ယန်အန်းယုသည်  “ကန့်သတ်ချက်” သီချင်းကို သီဆိုနေခြင်းဖြစ်ကြောင်း သတိပြုမိသွားသည့်အတွက် သူ့ကို ပို၍ပင် စိတ်ဝင်စားလာကြတော့သည်။ 

ထိုမောင်ငယ်လေး၏ နောက်ခံမှာ ထင်သလောက် မရိုးရှင်းဟု ဝိုးတဝါး ထုတ်ပြောလာသည့် အတွင်းလူများလည်း ရှိနေသေး၏။ သူသည် ချန်းယွီရုပ်ရှင်ကျောင်းမှ ကျောင်းသားတစ်ဦးဖြစ်ကာ ယန်မိသားစု၏ အငယ်ဆုံးသခင်လေး ဖြစ်နိုင်သည်ဟူသည့် သတင်းများလည်း ပျံ့နှံ့လာတော့သည်။ 

ကောင်းလိုက်တာ ဒီစတန့်သမား မောင်လေးက ချစ်စရာကောင်းပြီး ရုပ်ချောရုံတင် မကဘူး ချမ်းလည်း ချမ်းသာသေးတယ်တဲ့ သူ့ဆီမှာ “ငါ့ကို လက်ထပ်ပါ” ဆိုပြီး တောင်းဆိုတဲ့ ကောင်မလေးတွေကို တန်းစီနေမှာပဲ ...

ယန်အန်းယု၏ မျက်ခုံးတို့ တွန့်ချိုးသွားသည်။ အင်တာနက်ပေါ်တွင် ပုန်းအောင်းနေသည့် နတ်ဘုရားများစွာ ရှိနေသည့်ဟန်ပင်။ 

ထို့နောက် “ကျန်းယီ ၁၆၉” အမည်ရ အကောင့်ပိုင်ရှင်တစ်ဦးက ပြုပြင်ထားသည့် ဓာတ်ပုံများစွာကို တင်လာပြန်၏။ 

[ ကြားရတဲ့ သတင်းတွေ အရတော့ အဓိကဇာတ်လိုက် ကျန်းယွင်ရွှယ်ရဲ့ အခန်းတွေ အကုန်လုံးနီးပါးကို ဒီစတန့်သမား မောင်လေးကပဲ ရိုက်ခဲ့ရတာတဲ့ အဲဒါနဲ့ ငါတို့လည်း ယွီစစ်ယွမ်ရဲ့ မျက်နှာနေရာမှာ သူ့မျက်နှာကို အစားထိုးကြည့်လိုက်တယ် မကိုက်ညီတာမျိုး လုံးဝ ရှိမနေတဲ့အပြင် ပြီးပြည့်စုံတယ်လို့တောင် ပြောလို့ရသေးတယ် ... ]

ထိုပို့စ်ပိုင်ရှင်မှာ ယွီစစ်ယွမ်၏ anti-fan တစ်ဦး ဖြစ်ပေသည်။ ထို ပြုပြင်ထားသည့် ဓာတ်ပုံများ ထွက်လာသည်နှင့်တစ်ပြိုင်နက် ယွီစစ်ယွမ်၏ ပရိသတ်များကလည်း ပြန်လည်ကာ ခွန်းတုန့်ပြန်ကြခြင်းဖြင့် မှတ်ချက်နေရာတစ်ခုလုံး လှိုင်းထန်သွားတော့သည်။ 

ထို့နောက်တွင် ယွီစစ်ယွမ်၏ ပရိသတ်အချို့က ယန်အန်းယု၏ အကြည့်တို့မှာ မှုန်မှိုင်းကာ အရူးတစ်ယောက်နှင့်ပင် တူသည်ဟု ဝေဖန်လာကြသည်။ 

သူက ယွီစစ်ယွမ်ကို အသုံးချပြီး သူ့ကိုယ်သူ နာမည်ကြီးအောင် လုပ်ချင်တယ်ပေါ့ ဟုတ်လား အခုဆို ပွဲဦးထွက်တာတောင် မလုပ်ရသေးတဲ့လူကများ ...

အချို့က သူ၏ သီချင်းဆိုစွမ်းရည်မှာ နားမခံသာလောက်အောင်ပင် ဆိုးရွားလွန်းသည်ဟု ပြစ်တင်ဝေဖန်လာကြသည်။ 

သူက “မနက်ဖြန်များ၏အသံ” ကို ဘယ်လိုနည်းနဲ့များ ဝင်ပြိုင်ခွင့် ရခဲ့လဲ မသိဘူး အခုတလော နာမည်ကြီးချင်စိတ်နဲ့ ရူးနေတဲ့လူတွေ ပိုပိုပြီးတောင် များလာသလိုပဲ ...

ထိုအကြောင်းများကြောင့် ဖိုရမ်တစ်ခုလုံး ကသောင်းကနင်း ဖြစ်လာတော့သည်။ ယန်အန်းယုက သူ့မျက်ခုံးများကို နှိပ်လိုက်ကာ ယွီစစ်ယွမ်နှင့်အတူ အရှုပ်ထုပ်ထဲ ဆွဲသွင်းမခံလိုသည့်အတွက် Weibo မှ ပြန်ထွက်လာခဲ့လိုက်သည်။ 

ဒီကိစ္စက မတော်တဆလား ဒါမှမဟုတ် နောက်ကွယ်မှာ ကြိုးကိုင်တဲ့သူ တစ်ယောက်ယောက် ရှိနေတာလား ...

သူက ထိုကိစ္စကို ဖြေရှင်းရန်အတွက် ယန်ကျွယ့်အား သွားရှာရန် စဉ်းစားလိုက်သေးသော်ငြား ထိုအကြံကို ချက်ခြင်း ပယ်ချလိုက်သည်။ 

မိုးရွာသည့်ညက ယီချန်းယန်ကို တွေ့ရန်အတွက် ခွင့်ပြုချက် မတောင်းဘဲ အိမ်မှ ခိုးပြန်လာခဲ့သည့်အတွက် ယန်ကျွယ့်သည်  နောက်တစ်နေ့ မိုးလင်းသည်နှင့်တစ်ပြိုင်နက် ချက်ခြင်းရောက်လာကာ သူ့ကို အပြင်းအထန် ဆူပူခဲ့သည်။ အစ်ကိုကြီးကလည်း သူသာ လိမ္မာသိတတ်နေသရွေ့ အနာဂတ်တွင် ကုမ္ပဏီ၌ အလုပ်လုပ်နိုင်မည်ဖြစ်သည်ဟု မျှော်လင့်ထားသည်။ သူ့အမြင်တွင်မူ အနုပညာလောကသည် အလွန် ရှုပ်ထွေးပွေလီလှသည့် နေရာမျိုး ဖြစ်ပေသည်။ 

အရာအားလုံးတွင် အကြောင်းအရင်းများ ရှိနေနိုင်သော်ငြား ယန်အန်းယုသည် ထိုအကြောင်းအရင်းကို မခန့်မှန်းနိုင်။ ဖြစ်ပျက်နေသည်များအား အချိန်ကုန်ခံကာ လိုက်စဉ်းစားရန်လည်း ပျင်းရိလွန်းလှသည့်အတွက် နားကြပ်ကို တပ်ကာသာ စာအုပ်ဖတ်နေလိုက်တော့သည်။ အင်တာနက်ပေါ်မှ အကြောင်းအရာများမှာ တစ်ခဏမျှတာ ကြာမြင့်သည်ဖြစ်ရာ ရက်အနည်းငယ်အတွင်း အားလုံး ပပျောက်သွားလိမ့်မည်ဟုသာ တွေးထားခဲ့သည်။ 

သို့သော် တစ်ဖက်ရှိ ယွီစစ်ယွမ်မှာမူ သူကဲ့သို့ စိတ်သဘောထား မကျယ်ပြန့်လှချေ။ 

#ချောမောပြီး ချစ်စရာကောင်းတဲ့ စတန့်သမား မောင်ငယ်လေး ... ဟူသော အကြောင်းအရာကိုသာ ကြည့်နေမိသည့် ယွီစစ်ယွမ်သည် လတ်တလောတွင် စိတ်အခြေအနေ မကောင်းသည့်အတွက် အသေးစားကြော်ငြာအချို့ကိုပင် ငြင်းပယ်ခဲ့ရသည်။ 

ယန်ဖုန်းမှာလည်း သေလုမတတ် ဒေါသထွက်မိနေပြီ ဖြစ်သည်။ “လက်ဝှေ့ကျော်” စတင်ပြသသည့်အခါ သူတို့သည် အချို့သော ရုတ်ရုတ်သဲသဲ ဖြစ်ဖွယ်များကို ဖန်တီးရင်း ကျော်ကြားမှုရအောင် ဖန်တီးမည်ဟု ကြံစည်ထားခဲ့ကြသည်။ သို့သော် ကိစ္စများမှာ သူ ထင်ထားသည်နှင့် ဖီလာဆန့်ကျင်နေခဲ့၏။ သို့သော် မည်မျှပင် အခြေအနေဆိုးနေပါစေ သူတို့အနေဖြင့် ယန်အန်းယုကဲ့သို့သော လူစားထိုးစတန့်သမားလေးကို အခြေပြုကာ နာမည်ကြီးရန် မကြိုးစားသင့်ပေ။ 

ထိုသတင်းက ယန်ကျွယ့်၏ နားထဲသို့ အမြန် ရောက်ရှိသွားခဲ့သည်။ သူက ထိုသတင်းကို ကြားလိုက်ရသည့်အခါ ကြောင်အမိသွားပြီး အတွေးနွံထဲ နစ်မြောသွားခဲ့သည်။ အခြေအနေမှာ မြင်နေရသကဲ့သို့ မရိုးရှင်းလှဟု ခံစားမိသည့်အတွက် အားလုံးကို အောက်ခြေအထိ တူးဆွစစ်ဆေးရန် အမိန့်ပေးလိုက်သည်။ 

သူက ထိုသတင်းကို ဖိနှိပ်ရန် ရေတပ်ငှား၍ အခြား အကြောင်းအရာအသစ်တစ်ခုကို ဖန်တီးလိုက်၍ ရသော်ငြား အနုပညာလောကထဲ ဝင်လိုသည့် သူ့ညီလေးကို စဉ်းစားလိုက်မိသည့်အခါ စိတ်ဖိစီးသွားရပြန်တော့သည်။ 

“စတန့်သမားမောင်လေး” သည် အင်တာနက်ပေါ်တွင် ထင်မှတ်မထားရလောက်အောင်ကို နာမည်ကြီးသွားခဲ့သည်။ ထို့ကြောင့် ဤရက်ပိုင်းအတွင်း ယန်အန်းယုသည် ကျောင်းသို့ သွားသည့်အခါတိုင်း အားလုံး၏ အကြည့်များကို စုပြုံရရှိခဲ့ကာ အတင်းအဖျင်းများအပေါ် မှီခို၍ ဝမ်းစာရှာရသော သတင်းထောက်များကလည်း သူ့အနောက်သို့ တကောက်ကောက်လိုက်ရန် ကြိုးစားလာကြတော့သည်။ 

ထိုအချိန်တွင် ထန်းကော်က အစစ်အမှန် သက်တော်စောင့်တစ်ဦးကဲ့သို့ ပြုမူဆောင်ရွက်ခဲ့သည်။ အနက်ရောင်ရှပ်အင်္ကျီ၊ အနက်ရောင်ဘောင်းဘီနှင့် နေကာမျက်မှန် အနက်ရောင်ကို ဝတ်ဆင်ထားသည့်အပြင်  တင်းမာခက်ထန်သော မျက်နှာထားနှင့်အတူ ထိုလူအားလုံးကို ဟန့်တားခဲ့သည်။ ထို့အပြင် ယန်အန်းယုကလည်း လျင်မြန်သွက်လက်စွာဖြင့် ရှောင်ထွက်နိုင်ခဲ့၏။ 

အတန်းတစ်ခုနှင့် တစ်ခုကြား အချိန်များတွင် ကောလီရှုက သူ့လည်ပင်းကို လက်မောင်းဖြင့် ရစ်သိုင်းရင်း ရုတ်တရက် တိုက်ခိုက်လေ့ ရှိခဲ့သည်။ 

“မင်း သူဌေးဖြစ်သွားရင် ငါ့ကို မမေ့နဲ့နော် ကြားလား ငါတောင် တီဗီထဲမှာ ပါမလာသေးဘူး ပြိုင်ပွဲကနေ အစောကြီး ပြုတ်သွားတဲ့ မင်းက အံ့ဩစရာ ကောင်းလောက်အောင်ကို နာမည်ကြီးနေပြီ ...”

ထိုသို့ပြောရင်း ယန်အန်းယု၏ ခေါင်းကို ပွတ်သပ်လိုက်သည်။ 

“ငါလည်း ဒီလိုကြီး မဖြစ်ချင်ပါဘူး ...”

ယန်အန်းယုက အခက်တွေ့လေဟန်ဖြင့် ပုခုံးကို တွန့်ပြလိုက်သည်။ 

“တအားကို အားကောင်းလွန်းတဲ့ ငါ့ရဲ့ ဆွဲဆောင်မှုတွေနဲ့ ချောမောမှုတွေကိုပဲ အပြစ်တင်ရတော့မှာပဲ ငါကိုယ်တိုင်တောင် ဒီချောမောမှုတွေကြောင့် အခက်တွေ့နေရပြီ ....”

“ကျစ် ...”

ကောလီရှုက မျက်လုံးကို လှိမ့်ပြကာ သူ့ကို လွှတ်ပေးလိုက်သည်။ 

“ယန်အန်းယု ဟန်ဆောင်နေတာကို အခုချက်ခြင်း ရပ်လိုက်မယ်ဆိုရင် ငါတို့တွေ သူငယ်ချင်း ဆက်လုပ်လို့ ရဦးမယ် ...”

“ဟားဟားဟား ...”

ထို့နောက်တွင် ယန်အန်းယုထံမှ ရယ်သံအကျယ်ကြီး ထွက်လာတော့သည်။ 

“ငါ ..  မရတော့ဘူး မင်းကို မြင်တာနဲ့ကို ရယ်ချင်နေတာ ဘယ်လိုမှ ထိန်းထားလို့ မရတော့ဘူး ...”

“ဟေး ဟေး ငါက အဲဒီ့လောက်အထိ ရယ်စရာ ကောင်းနေလို့လား ဒီသခင်လေးက လူချောလေးပါနော် ...”

“အင်း ... ကုရှောက်က အချောဆုံးပဲ ...”

ယန်အန်းယုက ရယ်ချင်စိတ်ကို မျိုသိပ်ရင်း ပြောလိုက်သည်။

ကောလီရှုအပေါ် သူ၏ ပထမဆုံး အမြင်မှာ ဆိုးရွားလှကာ တစ်ဖက်လူမှာ ရွက်ကြမ်းရည်ကျို ရုပ်ရည်ကို ပိုင်ဆိုင်ထားသည့် တစ်ပါးသူကို အလွန်အမင်း အနိုင်ကျင့်တတ်သော လူချမ်းသာသခင်လေးတစ်ဦးဟု ထင်ခဲ့မိသည်။ သို့သော် သူနှင့် တစ်ဖြည်းဖြည်း ပေါင်းသင်းဆက်ဆံလာသည့်အခါ တစ်ဖက်လူမှာ ပျော်ပါးကစားရခြင်းကို အလွန် သဘောကျသည့်အပြင် EQ မှာလည်း အလွန် နိမ့်လှကြောင်း သိရှိသွားတော့သည်။ သူ့ကို အကောင်းမြင်သည့် မိန်းကလေးများအား မည်ကဲ့သို့ ကိုင်တွယ်ရမည်ကို မသိ၊ အလွန်သန့်စင်ကာ ရိုးသားလှပေသည်။ 

“အော် ဟုတ်သားပဲ ရှောင်ယု ကြည့်ရတာ နွော်ရှီစိတ်ထဲမှာ တစ်ခုခု ဖြစ်နေတယ်ထင်တယ် ...”

“ဘာဖြစ်နေတာလဲ ...”

“နောက်တစ်ပတ်ကျ ငါတို့တွေ “မနက်ဖြန်များ၏အသံ” ကို တရားဝင် စပြီး ရိုက်ရတော့မှာလေ ဒါပေမယ့် ပြီးခဲ့တဲ့ရက်ပိုင်းက ဝတ်စုံပြည် အစမ်းလေ့ကျင့်တာတွေ လုပ်တော့ သူ့စိတ်အခြေအနေက တော်တော်လေးကို ဆိုးနေတာ အာ ပြီးတော့ ဟို ရှန်းသုန်းဟောင်ဆိုတဲ့တစ်ယောက်လေ သူကလည်း နွော်ရှီကို တော်တော်လေး အဆိုးမြင်နေတဲ့ပုံပဲ တစ်ခါတစ်လေဆို တမင်တကာတောင် ပစ်မှတ်ထားနေသေးတယ် ....”

ကောလီရှုက အံကြိတ်ကာ ပြောလိုက်သည်။ 

“သဘောပေါက်ပြီ ...”

ထိုညတွင် ဘားထဲ၌ ယန်အန်းယုသည် ဖျော်ဖြေမှုအပြီး စင်ပေါ်မှ ဆင်းလာကာ အဖျော်ဆရာ ခိုင်လီကောနှင့် စကားပြောနေသော ချင်နွော်ရှီအနီးသို့ ချဉ်းကပ်သွားလိုက်သည်။ 

ခိုင်လီကောက သူ့ကို အရင်ဆုံး မြင်လိုက်ကာ လက်ယမ်းပြလိုက်သည်။ 

“စိတ်ဝင်စားစရာပဲ နောက်ထပ် မစ္စတာယန်တစ်ယောက် ထပ်ရောက်လာပြန်ပြီ ...”

ယန်အန်းယုက ထိုစကားကို နားမလည်သဖြင့် ကြောင်အသွားခဲ့သည်။ 

ချင်နွော်ရှီ၏ မက်မွန်ပွင့်သဏ္ဌာန် မျက်ဝန်းများ ကော့တက်လာကာ အပြုံးမမည်သည့် အပြုံးတစ်ပွင့် ထွက်ပေါ်လာခဲ့၏။ 

“မနေ့က ဥက္ကဌယန် ငါ့ကို လာရှာသေးတယ်လေ ဒီနေ့ မင်း ရောက်လာပြန်ပြီ မင်းတို့ညီအစ်ကိုနှစ်ယောက်က တော်တော်လေး စိတ်ဝင်စားဖို့ကောင်းတာပဲ ...”

“ဒါကတော့ တကယ်ကို တိုက်ဆိုင်တာပါ ...”

ယန်အန်းယုက နေရခက်စွာဖြင့် ရယ်မောလိုက်သည်။ 

ယန်ကျွယ့်မှာ သူ ထင်ထားသည်ထက် ပိုမို၍ပင် ချင်နွော်ရှီကို စိတ်ပူနေသည့်ဟန်ပင်။ 

“အားရှီ ရှောင်ယု ဒါဆို မင်းတို့နှစ်ယောက် အေးအေးဆေးဆေး စကားပြောလိုက်ကြနော် ...”

ခိုင်လီကောက အထဲသို့ ဝင်သွားလိုက်သည်။ ထို့နောက်တွင် ယန်အန်းယုထံမှ စကားတစ်ခွန်းမှ ထွက်မလာသေးမီ ချင်နွော်ရှီက ခါးသီးစွာ ရယ်ရင်း ပြောလိုက်သည်။ 

“မင်းလည်း ငါ့ကို “မနက်ဖြန်များ၏အသံ” ကြောင့် လာရှာတာပဲလား ...”

“အင်း ...”

သူက ခေါင်းငြိမ့်ပြလိုက်သည်။ 

“နွော်ရှီ မင်း စိတ်အခြေအနေ မကောင်းဖြစ်နေတာ ဟို ရှန်သုန်းဟောင်နဲ့ ဆိုင်နေလား ...”

“...”

ချင်နွော်ရှီမှာ လုံးဝဥဿုံ အသံတိတ်သွားကာ ထိုအကြောင်းနှင့် စပ်လျဉ်း၍ ဆွေးနွေးလိုခြင်း မရှိကြောင်း သိသိသာသာ ထုတ်ပြလိုက်သည်။ 

“ဆောရီး ငါ မမေးသင့်တာကို မေးမိသွားတယ်ထင်တယ် မပြောချင်ရင် မပြောပါနဲ့ ...”

ယန်အန်းယုက ပြုံးပြကာ တစ်ဖက်လူ၏ လက်ကို ကိုင်၍ ပြောလိုက်သည်။ 

“ဘာပဲဖြစ်ဖြစ် ငါ မင်းကို အမြဲတမ်း အားပေးနေမှာနော် နွော်ရှီ မင်းသာ တီဗီထဲမှာ ပါလာရင် မင်းသီချင်းကို နားထောင်တဲ့လူတွေ ပိုပြီးတောင် များလာလိမ့်မယ် ...”

ချင်နွော်ရှီ၏ လက်တို့ တဆတ်ဆတ် တုန်ရီသွားကာ မျက်လွှာကို ချလျက် ပြောလိုက်သည်။ 

“ရှောင်ယု ငါ တီဗီထဲမှာ မပါချင်ဘူး နည်းနည်း ကြောက်မိနေတယ် ...”

“ကြောက်တယ် ...”

ယန်အန်းယုက မင်သက်သွားခဲ့သည်။ 

“ငါ့အိမ်က ဒီက မဟုတ်ဘူး ပြီးတော့ အဖေကလည်း သီချင်းဆိုတာကို မကြိုက်ဘူးလေ ...”

ချင်နွော်ရှီသည် အခြားပြည်နယ်တစ်ခုမှ လာခဲ့ခြင်း ဖြစ်သည်။ သူသည် S မြို့သို့ ရောက်လာကာ သင့်တင့်လျောက်ပတ်သည့် အလုပ်တစ်ခုဖြင့် အသက်မွေးဝမ်းကျောင်း ပြုခဲ့ပြီး "မနက်ဖြန်များ၏အသံ" တွင် ပါဝင်သည့် အကြောင်းအား သူ့ဖခင်ကိုပင် အသိမပေးခဲ့ချေ။

“ဒါပေမယ့် မင်းကတော့ စင်ပေါ်တက်ပြီး သီချင်းဆိုရတာကို ကြိုက်တယ် မဟုတ်လား ...”

“...”

ချင်နွော်ရှီမှာ ထိုမေးခွန်းကို ပြန်မဖြေနိုင်။ ယန်အန်းယု၏ ဝင်းလက်တောက်ပနေသည့် အကြည့်တို့နှင့် ရင်ဆိုင်မိလိုက်သည့်အခါ သူ့မျက်နှာထက်တွင် အပြုံးဖျော့ဖျော့တစ်ပွင့် ပေါ်ထွက်လာခဲ့တော့သည်။ 

“အင်း ...”

သူသည် အနုပညာလောက၏ အညှီအဟောက်များကို သိရှိထားသည့်အပြင် နောက်ဆုံးတွင် အနိုင်ရသူမှာ မည်သူဖြစ်ရမည်ဟု ရွေးချယ်ထားပြီး ဖြစ်ကြောင်းကိုလည်း  သဘောပေါက်ပေသည်။ ယန်ကျွယ့်ကလည်း ပြိုင်ပွဲတွင် ဝင်ပြိုင်နေရန် မလိုအပ်ဘဲ သူ့ကုမ္ပဏီနှင့် တိုက်ရိုက် လက်မှတ်ထိုးလိုက်၍ ရသည်ဟု ပြောထားခဲ့ဖူးသည်။ သို့သော် ချင်နွော်ရှီက သူ့အရည်အချင်းကို သက်သေပြကာ သူ့အပေါ် အထင်အမြင် လွဲမှားနေသူ အချို့၏ အမြင်များကို ပြောင်းလဲလိုပေသည်။ ထို့အပြင် သူ့ခွန်သူ့အားဖြင့် မည်သည့်နေရာအထိ လျှောက်လှမ်းနိုင်မည်ကိုလည်း သိလိုသေး၏။ 

“နွော်ရှီ ငါ မင်းကို ယုံကြည်တယ် မင်းက သေချာပေါက်ကို အောင်မြင်မှာ ...”

နောက်ထပ် နှစ်ရက် ကုန်လွန်သွားပြီးနောက် “စတန့်သမားမောင်လေး” နှင့် ပတ်သက်သည့် သတင်းများအားလုံး ငြိမ်သက်သွားတော့သည်။ ထိုမနက်မှာပင် ယန်အန်းယုသည် ဒါရိုက်တာကျိုးထံမှ ဖုန်းခေါ်ဆိုမှုတစ်ခုကို လက်ခံရရှိခဲ့လိုက်သည်။

“ဒါ .. ဒါရိုက်တာကျိုး ကျွန်တော့်ကို တွေ့ချင်တယ်လို့ ပြောလိုက်တာလား ...”

ယန်အန်းယုက မယုံကြည်နိုင်လေဟန်ဖြင့် ပြန်မေးလိုက်သည်။ 

“အင်း .. ရှောင်ယု မင်း ရုပ်ရှင်ထဲမှာ ဝင်ပြီး သရုပ်ဆောင်ချင်လား ...” 

👥️