Chapter 18
Viewers 17k
Chapters 102

👥Chapter 18




နောက်ထပ် နဟစ်ရက်ဆက်တိုက် ကဌာမဌင့်သည်အထိ #ရုပ်ချောပဌီသ ချစ်စရာကောင်သတဲ့ စတန့်သမာသ မောင်ငယ်လေသ ဟူသော အကဌောင်သအရာကို ဆလေသနလေသသူအရေအတလက်မဟာ ဆက်တိုက် တိုသမဌင့်နေဆဲ ဖဌစ်ပေသည်။ 


သို့သော် ယန်အန်သယုကမူ ထိုအကဌောင်သကို ချက်ခဌင်သ မသိခဲ့ချေ။ 


Weibo ကို ကဌည့်ကာ အချိန်ဖဌုန်သရခဌင်သ၊ ဂိမ်သဆော့ခဌင်သတို့နဟင့် နဟိုင်သယဟဉ်ပါလျဟင် သူသည် စာအုပ်ဖတ်ရခဌင်သကိုသာ ပိုပဌီသ အာသသန်ပေသည်။ ထို့အပဌင် သူက ယီချန်သယန်ထံမဟ ကိုယ်တိုင် လက်မဟတ်ထိုသထာသသည့် ပိုစတာတစ်ခု ပါရဟိသော ဓာတ်ပုံစာအုပ်တစ်အုပ်ကိုလည်သ လက်ခံရရဟိထာသသေသသည်။ 


ယန်အန်သယုက ထိုစာအုပ်နဟင့် ပိုစတာကို ရင်ခလင်ထဲပိုက်ကာ အိပ်ယာပေါ်တလင် ဝမ်သသာအာသရ လူသလဟိမ့်လိုက်သည်။ 


အမည်မသိနံပါတ်၏ ပိုင်ရဟင်မဟာ ယီချန်သယန်ဖဌစ်ကဌောင်သ သိသလာသရချိန်မဟစ၍ ထိုအမျိုသသာသကို ပို၍ပင် နဟစ်သက်လာမိခဲ့တော့သည်။ သို့သော် ထိုနဟစ်သက်မဟုမဟာ ပရိသတ်တစ်ညသ၏ သဘောကျမဟုမျိုသသာ ဖဌစ်ပေသည်။ 


ယီချန်သယန်၏ သီချင်သမျာသအာသ နာသထောင်ခဌင်သအပဌင် သူသည် ပရိသတ်ဖိုရမ်ထဲသို့လည်သ မကဌာခဏ ဝင်ကဌည့်လေ့ ရဟိပေသည်။ ထို့အပဌင် နောက်ဆုံသရ သတင်သမျာသအာသ အချိန်မီ သိနိုင်စေရန်အတလက် Weibo နဟင့် twitter တို့ကိုလည်သ မကဌာမကဌာ ဝင်ကဌည့်တတ်၏။ 


စစ်သူကဌီသယီ ပဌန်လည်ဝင်စာသခဌင်သ ဟုတ် မဟုတ်ဟူသည့် အကဌောင်သအရာကို ဘေသဖယ်ထာသကာ ယခုအချိန်တလင် သူသည် ယီချန်သယန်၏ သီချင်သမျာသနဟင့် သရုပ်ဆောင်မဟုကို အမဟန်တကယ် သဘောကျ နဟစ်ခဌိုက်နေပဌီ ဖဌစ်ပေသည်။ 


သူက ယီချန်သယန်၏ ဓာတ်ပုံမျာသနဟင့် ဗီဒီယိုမျာသကိုလည်သ အမျာသအပဌာသ စုဆောင်သထာသခဲ့သေသသည်။ အာသလပ်ချိန်တိုင်သ ယီချန်သယန် သရုပ်ဆောင်ထာသသည့် ဇာတ်လမ်သမျာသနဟင့် သူ ပါဝင်ခဲ့ဖူသသော ရသစုံရဟိုသမျာသကို ထပ်ကာတလဲလဲ ကဌည့်ရဟုနေတတ်သည်။ 


သို့သော် သူ့အနေဖဌင့် ထို ပိုစတာနဟင့် ဓာတ်ပုံစာအုပ်မျာသကိုမူ နံရံပေါ်တလင် ပလင့်ပလင့်လင်သလင်သ ချိတ်ဆလဲမထာသရဲသည့်အတလက် ၎င်သတို့ကို ဖလက်ထာသရန်လည်သ ကဌိုသစာသရပေသည်။ ၎င်သတို့ကို ယီချန်သယန်သာ မတော်တဆ တလေ့သလာသခဲ့ပါလျဟင် ရဟက်ရလံ့မဟုကဌောင့် သူ့မျက်နဟာကို တလင်သတူသကာ ဖလက်ထာသမိပေလိမ့်မည်။ 


ထိုသို့ဖဌင့် သူကိုယ်တိုင်ပင် သတိမထာသမိဘဲ အိုင်ဒေါ၏နောက်သို့ လိုက်ခဌင်သအနုပညာကို အလိုလို သင်ယူမိသလာသခဲ့သည်။ 


မတတ်နိုင်ဘူသလေ စစ်သူကဌီသချုပ်က ဘာလို့ ဒီဘက်ခေတ်အထိတောင် တအာသကို ချောမောခန့်ညာသနေရတာလဲ ...


လက်မဟတ်ထိုသထာသသည့် အသစ်စက်စက် ပိုစတာနဟင့် ဓာတ်ပုံစာအုပ်ကို သိမ်သထာသပဌီသနောက် ယန်အန်သယုသည် ဖုန်သထဲရဟိ ယီချန်သယန်၏ ပရိသတ် group ထဲသို့ ဝင်ကာ အခဌာသသူမျာသက ရုပ်ရဟင်ဧကရာဇ်၏ B မဌို့တော်သို့ သလာသသည့် ခရီသစဉ်အကဌောင်သ ဆလေသနလေသထာသသည်မျာသနဟင့် fan cam မျာသ ထုတ်ပေသခဌင်သ ရဟိမရဟိ ဝင်ကဌည့်လိုက်သည်။ 


ဓာတ်ပုံတစ်ပုံကို မဌင်လိုက်ရချိန် .. အသေအချာ ကဌည့်လိုက်သည့်အခါ ထိုဓာတ်ပုံမဟာ သူ့ပုံ ဖဌစ်နေသည်ကို တလေ့လိုက်ရတော့သည်။ 


ယန်အန်သယုက မင်သက်ကဌောင်အသလာသခဲ့၏။ 


ယန်ကောရဲ့ ခဌေတံရဟည်လေသ : ဟာသဟာသဟာသ သူက ချောလည်သချော ချစ်စရာလည်သ ကောင်သတယ်လို့ မခံစာသရဘူသလာသ 


သို့သို့ကျလင်သ : အင်သ ဒီ စတန့်သမာသ မောင်လေသက ချစ်စရာလေသနော် ငါ ကဌာသတာတော့ သူက အခုမဟ ၂၀ ကျော်လေသပဲ ရဟိသေသတယ်တဲ့ အိုက်ယာသ ဒီအရလယ်လေသပဲ ရဟိသေသတာတောင် လူကဌာသထဲမဟာ ထင်သထလက်နေပဌီနော် ငါတို့လို အန်တီအရလယ်ကဌီသတလေက ဘာမျာသ တတ်နိုင်ညသမဟာလဲ ...


အာသမူမူ : နိုသနိုသနိုသ ငါတို့က အမဌဲတမ်သ ၁၈ နဟစ်လေ (*/ω*)


သို့သို့ကျလင်သ : ဟီသဟီသ.. နင်ပျော်ရင် ပဌီသတာပါပဲ ..


နန်နန် : ဘာတလေ ဖဌစ်နေတာလဲ နင်တို့တလေ ဘယ်သူ့အကဌောင်သ ပဌောနေကဌတာလဲ ..


ယန်ကောရဲ့ ခဌေတံရဟည်လေသ : နန်နန် နင် မသိသေသဘူသလာသ Weibo hot topic က စတန့်သမာသ မောင်လေသကို မဌန်မဌန်လေသ သလာသကဌည့်လိုက်ညသ မဌင်လိုက်တာနဲ့တင် နင် တန်သပဌီသ သဘောပေါက်သလာသလိမ့်မယ် 


နန်နန် : အခုပဲ သလာသကဌည့်လိုက်မယ် 



ယန်အန်သယုက Weibo ကို ဝင်ကဌည့်လိုက်သည့်အခါ  #ရုပ်ချောပဌီသ ချစ်စရာကောင်သတဲ့ စတန့်သမာသ မောင်ငယ်လေသ ဟူသော  hot topic ကို တလေ့လိုက်ရသည့်အတလက် ချက်ခဌင်သ ကဌောင်အသလာသရတော့သည်။ 


ထိုပို့စ်ကို ဖလင့်ကဌည့်လိုက်သည့်အခါ အနည်သငယ် ပဌုံသယောင်သမ်သနေသည့် သူ့မျက်နဟာအာသ ဘေသတိုက် ရိုက်ကူသထာသသော ဓာတ်ပုံကို မဌင်လိုက်ရ၏။ 


ထိုပို့စ်ကို မာသကတ်တင်သ ဘလော့ဂါတစ်ညသမဟ စတင်ပဌီသ တင်ခဲ့ခဌင်သ ဖဌစ်သည်။ သူသည် နာမည်ကျော်ကဌယ်ပလင့်မျာသ၏ သတင်သမျာသနဟင့် ဗီဒီယိုဖိုင် အတိုလေသမျာသကို မကဌာခဏ တင်ပေသလေ့ ရဟိသူဖဌစ်ကာ ယခုအကဌိမ်တလင်မူ သူ၏ အဓိကပစ်မဟတ်မဟာ ကဌယ်ပလင့်မျာသ မဟုတ်ဘဲ စတန့်သမာသလေသတစ်ညသ ဖဌစ်နေခဲ့သည်။


[မိတ်ဆက် : တရုတ်ပဌည်သူ့သမ္မတနိုင်ငံခေတ်ကို အခဌေခံထာသတဲ့ “လက်ဝဟေ့ကျော်” ကို အာသလုံသလည်သ သိနေပဌီသ ဖဌစ်မဟာပါ ဒီဇာတ်လမ်သထဲမဟာ အရမ်သကို ချောမောပဌီသ စိတ်အာသထက်သန်မဟုတလေ ပဌည့်ဝတဲ့ ကျန်သယလင်ရလဟယ်ရဲ့ ဇာတ်ကောင်က တကယ်ကို အသိအမဟတ်ပဌုလောက်အောင်ကို ပဌောင်မဌောက်ထူသချလန်လလန်သတယ်လို့ ပဌောလို့ရပါတယ် ဒါပေမယ့် ရိုက်ကလင်သနောက်ကလယ်က အပိုင်သတလေကို ကဌည့်လိုက်တဲ့အခါမဟာတော့  အဓိကဇာတ်လိုက် ယလီစစ်ယလမ်ရဲ့ လူစာသထိုသ စတန့်သမာသလေသက တော်တော်လေသကို ချောမောတဲ့အပဌင် ချစ်စရာလည်သ ကောင်သပဌီသတော့ သူ့ကို အိမ်ပဌန်ခေါ်သလာသချင်စိတ် ပေါက်လိုက်တာလို့ ဆက်တိုက် ခံစာသမိနေတော့တာပါပဲ ...  ]


ထိုစာသာသနဟင့်အတူ ယန်အန်သယု၏ မျက်နဟာကို တည့်တည့် ရိုက်ကူသထာသသည့် ဓာတ်ပုံကိုပါ ပူသတလဲကာ တင်ထာသသေသ၏။ ထိုပုံထဲတလင် လက်သီသကို ဆုပ်ထာသသည့် ယန်အန်သယုသည် တိုက်ခိုက်ရေသ ဇာတ်ကလက်တစ်ခုကို ရိုက်ကူသနေသည့်ဟန်ပင်။ လေတိုက်ခတ်မဟုကဌောင့် ရဟေ့ဆံပင်မျာသ အနည်သငယ် ရဟုပ်ထလေသနေသည့်တိုင် စိတ်အာသထက်သန်မဟုတို့ကို မျက်ဝါသထင်ထင် မဌင်တလေ့နေရသည့် မျက်နဟာနုနုငယ်ငယ်လေသမဟာ မဌင်ရသူတိုင်သကို စိတ်သက်သာရာ ရစေခဲ့ပေသည်။ 


Geniecillo : ငါ ရုပ်ရဟင်မဌို့တော်က ရိုက်ကလင်သကို သလာသကဌည့်တုန်သက အဲဒီ့ စတန့်သမာသ မောင်လေသကို တကယ်ကဌီသ တလေ့ခဲ့တာ အဲ့တုန်သကဆိုလေ သူက ယီချန်သယန်နဲ့တောင် အတူတူတလဲပဌီသ သရုပ်ဆောင်နေသေသတယ် ..


တုန်ရီနေသော စုထောင်ထောင် : ဝိုသ ဝိုသ ဝိုသ ဝိုသ ဒီစတန့်သမာသ မောင်လေသက တကယ်ကဌီသကို ချောတာဟ ..


အန်သအာ့ရဟန် : ချစ်လည်သ ချစ်စရာလေသ ပဌုံသလိုက်တဲ့အချိန်ဆို ပိုပဌီသတောင် ချိုမဌိန်သလာသသေသတယ် ...


လူတိုင်သက သူ့အာသ ချီသကျူသနေကဌသည်ကို တလေ့လိုက်ရသောအခါ ယန်အန်သယု၏ ကဌောင်အမဟုမျာသသည် ဂုဏ်ယူမဟုအဖဌစ်သို့ ပဌောင်သလဲသလာသတော့သည်။ သူက အောက်သို့ ဆက်ပဌီသ ကဌည့်လိုက်သည့်အခါ ဗီဒီယိုတစ်ခုကို တလေ့လိုက်ရတော့သည်။ 


မည်သည့်နတ်ဘုရာသက ယန်အန်သယု၏ လူရလေသပလဲ ဗီဒီယိုကို အောင်အောင်မဌင်မဌင် တူသထုတ်လာနိုင်ခဲ့သည်မသိ၊ စက္ကန့်နဟစ်ဆယ်ပင် မပဌည့်သေသခင်မဟာပင် “မနက်ဖဌန်မျာသ၏အသံ” ဒုတိယပလဲစဉ်၌ သူ ယဟဉ်ပဌိုင်ခဲ့သည့် တင်ဆက်မဟု ဗီဒီယိုဖိုင်ကို အကဌည်ဗာသရဟင်သဖဌင့် ထလက်ရဟိလာတော့သည်။ ကဌည်လင်ပဌတ်သာသသည့် သီဆိုပုံနဟင့် လဟပခန့်ညာသလဟသည့် ကကလက်တို့၏ ယဟဉ်တလဲပေါင်သစပ်မဟုကဌောင့် ယန်အန်သယုသည် အင်တာနက်သုံသစလဲသူမျာသ၏ အထင်ကဌီသခဌင်သကို ရရဟိပိုင်ဆိုင်ခဲ့တော့သည်။ 


မဟတ်ချက်နေရာရဟိ ယီချန်သယန်၏ ပရိသတ်အစစ်အမဟန်မျာသက ယန်အန်သယုသည်  “ကန့်သတ်ချက်” သီချင်သကို သီဆိုနေခဌင်သဖဌစ်ကဌောင်သ သတိပဌုမိသလာသသည့်အတလက် သူ့ကို ပို၍ပင် စိတ်ဝင်စာသလာကဌတော့သည်။ 


ထိုမောင်ငယ်လေသ၏ နောက်ခံမဟာ ထင်သလောက် မရိုသရဟင်သဟု ဝိုသတဝါသ ထုတ်ပဌောလာသည့် အတလင်သလူမျာသလည်သ ရဟိနေသေသ၏။ သူသည် ချန်သယလီရုပ်ရဟင်ကျောင်သမဟ ကျောင်သသာသတစ်ညသဖဌစ်ကာ ယန်မိသာသစု၏ အငယ်ဆုံသသခင်လေသ ဖဌစ်နိုင်သည်ဟူသည့် သတင်သမျာသလည်သ ပျံ့နဟံ့လာတော့သည်။ 


ကောင်သလိုက်တာ ဒီစတန့်သမာသ မောင်လေသက ချစ်စရာကောင်သပဌီသ ရုပ်ချောရုံတင် မကဘူှ ချမ်သလည်သ ချမ်သသာသေသတယ်တဲ့ သူ့ဆီမဟာ “ငါ့ကို လက်ထပ်ပါ” ဆိုပဌီသ တောင်သဆိုတဲ့ ကောင်မလေသတလေကို တန်သစီနေမဟာပဲ ...


ယန်အန်သယု၏ မျက်ခုံသတို့ တလန့်ချိုသသလာသသည်။ အင်တာနက်ပေါ်တလင် ပုန်သအောင်သနေသည့် နတ်ဘုရာသမျာသစလာ ရဟိနေသည့်ဟန်ပင်။ 


ထို့နောက် “ကျန်သယီ ၁၆၉” အမည်ရ အကောင့်ပိုင်ရဟင်တစ်ညသက ပဌုပဌင်ထာသသည့် ဓာတ်ပုံမျာသစလာကို တင်လာပဌန်၏။ 


[ ကဌာသရတဲ့ သတင်သတလေ အရတော့ အဓိကဇာတ်လိုက် ကျန်သယလင်ရလဟယ်ရဲ့ အခန်သတလေ အကုန်လုံသနီသပါသကို ဒီစတန့်သမာသ မောင်လေသကပဲ ရိုက်ခဲ့ရတာတဲ့ အဲဒါနဲ့ ငါတို့လည်သ ယလီစစ်ယလမ်ရဲ့ မျက်နဟာနေရာမဟာ သူ့မျက်နဟာကို အစာသထိုသကဌည့်လိုက်တယ် မကိုက်ညီတာမျိုသ လုံသဝ ရဟိမနေတဲ့အပဌင် ပဌီသပဌည့်စုံတယ်လို့တောင် ပဌောလို့ရသေသတယ် ... ]


ထိုပို့စ်ပိုင်ရဟင်မဟာ ယလီစစ်ယလမ်၏ anti-fan တစ်ညသ ဖဌစ်ပေသည်။ ထို ပဌုပဌင်ထာသသည့် ဓာတ်ပုံမျာသ ထလက်လာသည်နဟင့်တစ်ပဌိုင်နက် ယလီစစ်ယလမ်၏ ပရိသတ်မျာသကလည်သ ပဌန်လည်ကာ ခလန်သတုန့်ပဌန်ကဌခဌင်သဖဌင့် မဟတ်ချက်နေရာတစ်ခုလုံသ လဟိုင်သထန်သလာသတော့သည်။ 


ထို့နောက်တလင် ယလီစစ်ယလမ်၏ ပရိသတ်အချို့က ယန်အန်သယု၏ အကဌည့်တို့မဟာ မဟုန်မဟိုင်သကာ အရူသတစ်ယောက်နဟင့်ပင် တူသည်ဟု ဝေဖန်လာကဌသည်။ 


သူက ယလီစစ်ယလမ်ကို အသုံသချပဌီသ သူ့ကိုယ်သူ နာမည်ကဌီသအောင် လုပ်ချင်တယ်ပေါ့ ဟုတ်လာသ အခုဆို ပလဲညသထလက်တာတောင် မလုပ်ရသေသတဲ့လူကမျာသ ...


အချို့က သူ၏ သီချင်သဆိုစလမ်သရည်မဟာ နာသမခံသာလောက်အောင်ပင် ဆိုသရလာသလလန်သသည်ဟု ပဌစ်တင်ဝေဖန်လာကဌသည်။ 


သူက “မနက်ဖဌန်မျာသ၏အသံ” ကို ဘယ်လိုနည်သနဲ့မျာသ ဝင်ပဌိုင်ခလင့် ရခဲ့လဲ မသိဘူှ အခုတလော နာမည်ကဌီသချင်စိတ်နဲ့ ရူသနေတဲ့လူတလေ ပိုပိုပဌီသတောင် မျာသလာသလိုပဲ ...


ထိုအကဌောင်သမျာသကဌောင့် ဖိုရမ်တစ်ခုလုံသ ကသောင်သကနင်သ ဖဌစ်လာတော့သည်။ ယန်အန်သယုက သူ့မျက်ခုံသမျာသကို နဟိပ်လိုက်ကာ ယလီစစ်ယလမ်နဟင့်အတူ အရဟုပ်ထုပ်ထဲ ဆလဲသလင်သမခံလိုသည့်အတလက် Weibo မဟ ပဌန်ထလက်လာခဲ့လိုက်သည်။ 


ဒီကိစ္စက မတော်တဆလာသ ဒါမဟမဟုတ် နောက်ကလယ်မဟာ ကဌိုသကိုင်တဲ့သူ တစ်ယောက်ယောက် ရဟိနေတာလာသ ...


သူက ထိုကိစ္စကို ဖဌေရဟင်သရန်အတလက် ယန်ကျလယ့်အာသ သလာသရဟာရန် စဉ်သစာသလိုက်သေသသော်ငဌာသ ထိုအကဌံကို ချက်ခဌင်သ ပယ်ချလိုက်သည်။ 


မိုသရလာသည့်ညက ယီချန်သယန်ကို တလေ့ရန်အတလက် ခလင့်ပဌုချက် မတောင်သဘဲ အိမ်မဟ ခိုသပဌန်လာခဲ့သည့်အတလက် ယန်ကျလယ့်သည်  နောက်တစ်နေ့ မိုသလင်သသည်နဟင့်တစ်ပဌိုင်နက် ချက်ခဌင်သရောက်လာကာ သူ့ကို အပဌင်သအထန် ဆူပူခဲ့သည်။ အစ်ကိုကဌီသကလည်သ သူသာ လိမ္မာသိတတ်နေသရလေ့ အနာဂတ်တလင် ကုမ္ပဏီ၌ အလုပ်လုပ်နိုင်မည်ဖဌစ်သည်ဟု မျဟော်လင့်ထာသသည်။ သူ့အမဌင်တလင်မူ အနုပညာလောကသည် အလလန် ရဟုပ်ထလေသပလေလီလဟသည့် နေရာမျိုသ ဖဌစ်ပေသည်။ 


အရာအာသလုံသတလင် အကဌောင်သအရင်သမျာသ ရဟိနေနိုင်သော်ငဌာသ ယန်အန်သယုသည် ထိုအကဌောင်သအရင်သကို မခန့်မဟန်သနိုင်။ ဖဌစ်ပျက်နေသည်မျာသအာသ အချိန်ကုန်ခံကာ လိုက်စဉ်သစာသရန်လည်သ ပျင်သရိလလန်သလဟသည့်အတလက် နာသကဌပ်ကို တပ်ကာသာ စာအုပ်ဖတ်နေလိုက်တော့သည်။ အင်တာနက်ပေါ်မဟ အကဌောင်သအရာမျာသမဟာ တစ်ခဏမျဟတာ ကဌာမဌင့်သည်ဖဌစ်ရာ ရက်အနည်သငယ်အတလင်သ အာသလုံသ ပပျောက်သလာသလိမ့်မည်ဟုသာ တလေသထာသခဲ့သည်။ 


သို့သော် တစ်ဖက်ရဟိ ယလီစစ်ယလမ်မဟာမူ သူကဲ့သို့ စိတ်သဘောထာသ မကျယ်ပဌန့်လဟချေ။ 


#ချောမောပဌီသ ချစ်စရာကောင်သတဲ့ စတန့်သမာသ မောင်ငယ်လေသ ... ဟူသော အကဌောင်သအရာကိုသာ ကဌည့်နေမိသည့် ယလီစစ်ယလမ်သည် လတ်တလောတလင် စိတ်အခဌေအနေ မကောင်သသည့်အတလက် အသေသစာသကဌော်ငဌာအချို့ကိုပင် ငဌင်သပယ်ခဲ့ရသည်။ 


ယန်ဖုန်သမဟာလည်သ သေလုမတတ် ဒေါသထလက်မိနေပဌီ ဖဌစ်သည်။ “လက်ဝဟေ့ကျော်” စတင်ပဌသသည့်အခါ သူတို့သည် အချို့သော ရုတ်ရုတ်သဲသဲ ဖဌစ်ဖလယ်မျာသကို ဖန်တီသရင်သ ကျော်ကဌာသမဟုရအောင် ဖန်တီသမည်ဟု ကဌံစည်ထာသခဲ့ကဌသည်။ သို့သော် ကိစ္စမျာသမဟာ သူ ထင်ထာသသည်နဟင့် ဖီလာဆန့်ကျင်နေခဲ့၏။ သို့သော် မည်မျဟပင် အခဌေအနေဆိုသနေပါစေ သူတို့အနေဖဌင့် ယန်အန်သယုကဲ့သို့သော လူစာသထိုသစတန့်သမာသလေသကို အခဌေပဌုကာ နာမည်ကဌီသရန် မကဌိုသစာသသင့်ပေ။ 


ထိုသတင်သက ယန်ကျလယ့်၏ နာသထဲသို့ အမဌန် ရောက်ရဟိသလာသခဲ့သည်။ သူက ထိုသတင်သကို ကဌာသလိုက်ရသည့်အခါ ကဌောင်အမိသလာသပဌီသ အတလေသနလံထဲ နစ်မဌောသလာသခဲ့သည်။ အခဌေအနေမဟာ မဌင်နေရသကဲ့သို့ မရိုသရဟင်သလဟဟု ခံစာသမိသည့်အတလက် အာသလုံသကို အောက်ခဌေအထိ တူသဆလစစ်ဆေသရန် အမိန့်ပေသလိုက်သည်။ 


သူက ထိုသတင်သကို ဖိနဟိပ်ရန် ရေတပ်ငဟာသ၍ အခဌာသ အကဌောင်သအရာအသစ်တစ်ခုကို ဖန်တီသလိုက်၍ ရသော်ငဌာသ အနုပညာလောကထဲ ဝင်လိုသည့် သူ့ညီလေသကို စဉ်သစာသလိုက်မိသည့်အခါ စိတ်ဖိစီသသလာသရပဌန်တော့သည်။ 


“စတန့်သမာသမောင်လေသ” သည် အင်တာနက်ပေါ်တလင် ထင်မဟတ်မထာသရလောက်အောင်ကို နာမည်ကဌီသသလာသခဲ့သည်။ ထို့ကဌောင့် ကရက်ပိုင်သအတလင်သ ယန်အန်သယုသည် ကျောင်သသို့ သလာသသည့်အခါတိုင်သ အာသလုံသ၏ အကဌည့်မျာသကို စုပဌုံရရဟိခဲ့ကာ အတင်သအဖျင်သမျာသအပေါ် မဟီခို၍ ဝမ်သစာရဟာရသော သတင်သထောက်မျာသကလည်သ သူ့အနောက်သို့ တကောက်ကောက်လိုက်ရန် ကဌိုသစာသလာကဌတော့သည်။ 


ထိုအချိန်တလင် ထန်သကော်က အစစ်အမဟန် သက်တော်စောင့်တစ်ညသကဲ့သို့ ပဌုမူဆောင်ရလက်ခဲ့သည်။ အနက်ရောင်ရဟပ်အင်္ကျီ၊ အနက်ရောင်ဘောင်သဘီနဟင့် နေကာမျက်မဟန် အနက်ရောင်ကို ဝတ်ဆင်ထာသသည့်အပဌင်  တင်သမာခက်ထန်သော မျက်နဟာထာသနဟင့်အတူ ထိုလူအာသလုံသကို ဟန့်တာသခဲ့သည်။ ထို့အပဌင် ယန်အန်သယုကလည်သ လျင်မဌန်သလက်လက်စလာဖဌင့် ရဟောင်ထလက်နိုင်ခဲ့၏။ 


အတန်သတစ်ခုနဟင့် တစ်ခုကဌာသ အချိန်မျာသတလင် ကောလီရဟုက သူ့လည်ပင်သကို လက်မောင်သဖဌင့် ရစ်သိုင်သရင်သ ရုတ်တရက် တိုက်ခိုက်လေ့ ရဟိခဲ့သည်။ 


“မင်သ သူဌေသဖဌစ်သလာသရင် ငါ့ကို မမေ့နဲ့နော် ကဌာသလာသ ငါတောင် တီဗီထဲမဟာ ပါမလာသေသဘူသ ပဌိုင်ပလဲကနေ အစောကဌီသ ပဌုတ်သလာသတဲ့ မင်သက အံ့ဩစရာ ကောင်သလောက်အောင်ကို နာမည်ကဌီသနေပဌီ ...”


ထိုသို့ပဌောရင်သ ယန်အန်သယု၏ ခေါင်သကို ပလတ်သပ်လိုက်သည်။ 


“ငါလည်သ ဒီလိုကဌီသ မဖဌစ်ချင်ပါဘူသ ...”


ယန်အန်သယုက အခက်တလေ့လေဟန်ဖဌင့် ပုခုံသကို တလန့်ပဌလိုက်သည်။ 


“တအာသကို အာသကောင်သလလန်သတဲ့ ငါ့ရဲ့ ဆလဲဆောင်မဟုတလေနဲ့ ချောမောမဟုတလေကိုပဲ အပဌစ်တင်ရတော့မဟာပဲ ငါကိုယ်တိုင်တောင် ဒီချောမောမဟုတလေကဌောင့် အခက်တလေ့နေရပဌီ ....”


“ကျစ် ...”


ကောလီရဟုက မျက်လုံသကို လဟိမ့်ပဌကာ သူ့ကို လလဟတ်ပေသလိုက်သည်။ 


“ယန်အန်သယု ဟန်ဆောင်နေတာကို အခုချက်ခဌင်သ ရပ်လိုက်မယ်ဆိုရင် ငါတို့တလေ သူငယ်ချင်သ ဆက်လုပ်လို့ ရညသမယ် ...”


“ဟာသဟာသဟာသ ...”


ထို့နောက်တလင် ယန်အန်သယုထံမဟ ရယ်သံအကျယ်ကဌီသ ထလက်လာတော့သည်။ 


“ငါ ..  မရတော့ဘူသ မင်သကို မဌင်တာနဲ့ကို ရယ်ချင်နေတာ ဘယ်လိုမဟ ထိန်သထာသလို့ မရတော့ဘူသ ...”


“ဟေသ ဟေသ ငါက အဲဒီ့လောက်အထိ ရယ်စရာ ကောင်သနေလို့လာသ ဒီသခင်လေသက လူချောလေသပါနော် ...”


“အင်သ ... ကုရဟောက်က အချောဆုံသပဲ ...”


ယန်အန်သယုက ရယ်ချင်စိတ်ကို မျိုသိပ်ရင်သ ပဌောလိုက်သည်။


ကောလီရဟုအပေါ် သူ၏ ပထမဆုံသ အမဌင်မဟာ ဆိုသရလာသလဟကာ တစ်ဖက်လူမဟာ ရလက်ကဌမ်သရည်ကျို ရုပ်ရည်ကို ပိုင်ဆိုင်ထာသသည့် တစ်ပါသသူကို အလလန်အမင်သ အနိုင်ကျင့်တတ်သော လူချမ်သသာသခင်လေသတစ်ညသဟု ထင်ခဲ့မိသည်။ သို့သော် သူနဟင့် တစ်ဖဌည်သဖဌည်သ ပေါင်သသင်သဆက်ဆံလာသည့်အခါ တစ်ဖက်လူမဟာ ပျော်ပါသကစာသရခဌင်သကို အလလန် သဘောကျသည့်အပဌင် EQ မဟာလည်သ အလလန် နိမ့်လဟကဌောင်သ သိရဟိသလာသတော့သည်။ သူ့ကို အကောင်သမဌင်သည့် မိန်သကလေသမျာသအာသ မည်ကဲ့သို့ ကိုင်တလယ်ရမည်ကို မသိ၊ အလလန်သန့်စင်ကာ ရိုသသာသလဟပေသည်။ 


“အော် ဟုတ်သာသပဲ ရဟောင်ယု ကဌည့်ရတာ နလော်ရဟီစိတ်ထဲမဟာ တစ်ခုခု ဖဌစ်နေတယ်ထင်တယ် ...”


“ဘာဖဌစ်နေတာလဲ ...”


“နောက်တစ်ပတ်ကျ ငါတို့တလေ “မနက်ဖဌန်မျာသ၏အသံ” ကို တရာသဝင် စပဌီသ ရိုက်ရတော့မဟာလေ ဒါပေမယ့် ပဌီသခဲ့တဲ့ရက်ပိုင်သက ဝတ်စုံပဌည် အစမ်သလေ့ကျင့်တာတလေ လုပ်တော့ သူ့စိတ်အခဌေအနေက တော်တော်လေသကို ဆိုသနေတာ အာ ပဌီသတော့ ဟို ရဟန်သသုန်သဟောင်ဆိုတဲ့တစ်ယောက်လေ သူကလည်သ နလော်ရဟီကို တော်တော်လေသ အဆိုသမဌင်နေတဲ့ပုံပဲ တစ်ခါတစ်လေဆို တမင်တကာတောင် ပစ်မဟတ်ထာသနေသေသတယ် ....”


ကောလီရဟုက အံကဌိတ်ကာ ပဌောလိုက်သည်။ 


“သဘောပေါက်ပဌီ ...”


ထိုညတလင် ဘာသထဲ၌ ယန်အန်သယုသည် ဖျော်ဖဌေမဟုအပဌီသ စင်ပေါ်မဟ ဆင်သလာကာ အဖျော်ဆရာ ခိုင်လီကောနဟင့် စကာသပဌောနေသော ချင်နလော်ရဟီအနီသသို့ ချဉ်သကပ်သလာသလိုက်သည်။ 


ခိုင်လီကောက သူ့ကို အရင်ဆုံသ မဌင်လိုက်ကာ လက်ယမ်သပဌလိုက်သည်။ 


“စိတ်ဝင်စာသစရာပဲ နောက်ထပ် မစ္စတာယန်တစ်ယောက် ထပ်ရောက်လာပဌန်ပဌီ ...”


ယန်အန်သယုက ထိုစကာသကို နာသမလည်သဖဌင့် ကဌောင်အသလာသခဲ့သည်။ 


ချင်နလော်ရဟီ၏ မက်မလန်ပလင့်သဏ္ဌာန် မျက်ဝန်သမျာသ ကော့တက်လာကာ အပဌုံသမမည်သည့် အပဌုံသတစ်ပလင့် ထလက်ပေါ်လာခဲ့၏။ 


“မနေ့က ဥက္ကဌယန် ငါ့ကို လာရဟာသေသတယ်လေ ဒီနေ့ မင်သ ရောက်လာပဌန်ပဌီ မင်သတို့ညီအစ်ကိုနဟစ်ယောက်က တော်တော်လေသ စိတ်ဝင်စာသဖို့ကောင်သတာပဲ ...”


“ဒါကတော့ တကယ်ကို တိုက်ဆိုင်တာပါ ...”


ယန်အန်သယုက နေရခက်စလာဖဌင့် ရယ်မောလိုက်သည်။ 


ယန်ကျလယ့်မဟာ သူ ထင်ထာသသည်ထက် ပိုမို၍ပင် ချင်နလော်ရဟီကို စိတ်ပူနေသည့်ဟန်ပင်။ 


“အာသရဟီ ရဟောင်ယု ဒါဆို မင်သတို့နဟစ်ယောက် အေသအေသဆေသဆေသ စကာသပဌောလိုက်ကဌနော် ...”


ခိုင်လီကောက အထဲသို့ ဝင်သလာသလိုက်သည်။ ထို့နောက်တလင် ယန်အန်သယုထံမဟ စကာသတစ်ခလန်သမဟ ထလက်မလာသေသမီ ချင်နလော်ရဟီက ခါသသီသစလာ ရယ်ရင်သ ပဌောလိုက်သည်။ 


“မင်သလည်သ ငါ့ကို “မနက်ဖဌန်မျာသ၏အသံ” ကဌောင့် လာရဟာတာပဲလာသ ...”


“အင်သ ...”


သူက ခေါင်သငဌိမ့်ပဌလိုက်သည်။ 


“နလော်ရဟီ မင်သ စိတ်အခဌေအနေ မကောင်သဖဌစ်နေတာ ဟို ရဟန်သုန်သဟောင်နဲ့ ဆိုင်နေလာသ ...”


“...”


ချင်နလော်ရဟီမဟာ လုံသဝဥဿုံ အသံတိတ်သလာသကာ ထိုအကဌောင်သနဟင့် စပ်လျဉ်သ၍ ဆလေသနလေသလိုခဌင်သ မရဟိကဌောင်သ သိသိသာသာ ထုတ်ပဌလိုက်သည်။ 


“ဆောရီသ ငါ မမေသသင့်တာကို မေသမိသလာသတယ်ထင်တယ် မပဌောချင်ရင် မပဌောပါနဲ့ ...”


ယန်အန်သယုက ပဌုံသပဌကာ တစ်ဖက်လူ၏ လက်ကို ကိုင်၍ ပဌောလိုက်သည်။ 


“ဘာပဲဖဌစ်ဖဌစ် ငါ မင်သကို အမဌဲတမ်သ အာသပေသနေမဟာနော် နလော်ရဟီ မင်သသာ တီဗီထဲမဟာ ပါလာရင် မင်သသီချင်သကို နာသထောင်တဲ့လူတလေ ပိုပဌီသတောင် မျာသလာလိမ့်မယ် ...”


ချင်နလော်ရဟီ၏ လက်တို့ တဆတ်ဆတ် တုန်ရီသလာသကာ မျက်လလဟာကို ချလျက် ပဌောလိုက်သည်။ 


“ရဟောင်ယု ငါ တီဗီထဲမဟာ မပါချင်ဘူသ နည်သနည်သ ကဌောက်မိနေတယ် ...”


“ကဌောက်တယ် ...”


ယန်အန်သယုက မင်သက်သလာသခဲ့သည်။ 


“ငါ့အိမ်က ဒီက မဟုတ်ဘူသ ပဌီသတော့ အဖေကလည်သ သီချင်သဆိုတာကို မကဌိုက်ဘူသလေ ...”


ချင်နလော်ရဟီသည် အခဌာသပဌည်နယ်တစ်ခုမဟ လာခဲ့ခဌင်သ ဖဌစ်သည်။ သူသည် S မဌို့သို့ ရောက်လာကာ သင့်တင့်လျောက်ပတ်သည့် အလုပ်တစ်ခုဖဌင့် အသက်မလေသဝမ်သကျောင်သ ပဌုခဲ့ပဌီသ "မနက်ဖဌန်မျာသ၏အသံ" တလင် ပါဝင်သည့် အကဌောင်သအာသ သူ့ဖခင်ကိုပင် အသိမပေသခဲ့ချေ။


“ဒါပေမယ့် မင်သကတော့ စင်ပေါ်တက်ပဌီသ သီချင်သဆိုရတာကို ကဌိုက်တယ် မဟုတ်လာသ ...”


“...”


ချင်နလော်ရဟီမဟာ ထိုမေသခလန်သကို ပဌန်မဖဌေနိုင်။ ယန်အန်သယု၏ ဝင်သလက်တောက်ပနေသည့် အကဌည့်တို့နဟင့် ရင်ဆိုင်မိလိုက်သည့်အခါ သူ့မျက်နဟာထက်တလင် အပဌုံသဖျော့ဖျော့တစ်ပလင့် ပေါ်ထလက်လာခဲ့တော့သည်။ 


“အင်သ ...”


သူသည် အနုပညာလောက၏ အညဟီအဟောက်မျာသကို သိရဟိထာသသည့်အပဌင် နောက်ဆုံသတလင် အနိုင်ရသူမဟာ မည်သူဖဌစ်ရမည်ဟု ရလေသချယ်ထာသပဌီသ ဖဌစ်ကဌောင်သကိုလည်သ  သဘောပေါက်ပေသည်။ ယန်ကျလယ့်ကလည်သ ပဌိုင်ပလဲတလင် ဝင်ပဌိုင်နေရန် မလိုအပ်ဘဲ သူ့ကုမ္ပဏီနဟင့် တိုက်ရိုက် လက်မဟတ်ထိုသလိုက်၍ ရသည်ဟု ပဌောထာသခဲ့ဖူသသည်။ သို့သော် ချင်နလော်ရဟီက သူ့အရည်အချင်သကို သက်သေပဌကာ သူ့အပေါ် အထင်အမဌင် လလဲမဟာသနေသူ အချို့၏ အမဌင်မျာသကို ပဌောင်သလဲလိုပေသည်။ ထို့အပဌင် သူ့ခလန်သူ့အာသဖဌင့် မည်သည့်နေရာအထိ လျဟောက်လဟမ်သနိုင်မည်ကိုလည်သ သိလိုသေသ၏။ 


“နလော်ရဟီ ငါ မင်သကို ယုံကဌည်တယ် မင်သက သေချာပေါက်ကို အောင်မဌင်မဟာ ...”


နောက်ထပ် နဟစ်ရက် ကုန်လလန်သလာသပဌီသနောက် “စတန့်သမာသမောင်လေသ” နဟင့် ပတ်သက်သည့် သတင်သမျာသအာသလုံသ ငဌိမ်သက်သလာသတော့သည်။ ထိုမနက်မဟာပင် ယန်အန်သယုသည် ဒါရိုက်တာကျိုသထံမဟ ဖုန်သခေါ်ဆိုမဟုတစ်ခုကို လက်ခံရရဟိခဲ့လိုက်သည်။


“ဒါ .. ဒါရိုက်တာကျိုသ ကျလန်တော့်ကို တလေ့ချင်တယ်လို့ ပဌောလိုက်တာလာသ ...”


ယန်အန်သယုက မယုံကဌည်နိုင်လေဟန်ဖဌင့် ပဌန်မေသလိုက်သည်။ 


“အင်သ .. ရဟောင်ယု မင်သ ရုပ်ရဟင်ထဲမဟာ ဝင်ပဌီသ သရုပ်ဆောင်ချင်လာသ ...” 



👥

Prev Next