Volume 3 : အမြန်ရထား
Chapter 74 (4 of Hearts – အမြန်ရထား ၀၇၊ သံသယရှိသူကိုစစ်ဆေးမေးမြန်းခြင်း)
ယွီဟန်ကျန်း၏မေးခွန်းသည် တည့်တိုးဆန်လွန်းပြီး ရှောက်လုံလည်း ထိတ်လန့်တကြားဖြင့် သူ့ကိုကြည့်နေသည်။
ထိုလူက လေးနက်ပြီး အေးစက်သော မျက်လုံးများဖြင့် ကြည့်နေသည်။ စစ်ကြောရေးခန်းထဲက ရဲအရာရှိယွီ ပြန်လာသလိုပဲ။
ရှူဖျင်၏မျက်နှာသည် ချက်ချင်းပင် သွေးမရှိတော့ပေ။ သူမသည် ဆုပ်ထားသော လက်သီးများကို ညင်သာစွာ ယမ်းကာ တည်ငြိမ်ဟန်ဆောင်သည်။ "လီကျယ်မင်ရဲ့အင်ဆူလင်ကို ငါခိုးတယ်လို့ နင်ဘာကြောင့်ပြောနေတာလဲ။ နင်က အပြစ်ကင်းတဲ့လူကို မှားယွင်းစွပ်စွဲနေတာပဲ။"
ယွီဟန်ကျန်းသည် သူမကို အေးအေးဆေးဆေး စောင့်ကြည့်နေပြီး အေးစက်စက် မျက်လုံးများက 'ခင်ဗျား ဆက်လိမ်စမ်းပါ'ဟု ပြောနေလေသည်။
ရှူဖျင်၏ ဆံပင်များ ထောင်မတ်လာသော်လည်း သူမပါးစပ်က ဝန်မခံသေးပေ။ "အဲဒီအင်ဆူလင်မှာ လီကျယ်မင်ရဲ့ နာမည်ကို ရေးမထားဘူး။ ငါ ဆေးရုံက ဝယ်ခဲ့တာ။ နင် အဓိပ္ပါယ်မရှိတာမပြောနဲ့။ ငါ ဘာလို့ အခြားသူရဲ့အင်ဆူလင်ကို ခိုးရမှာလဲ။"
ယွီဟန်ကျန်းသည် သူမကို စက္ကန့်အနည်းငယ်ကြာ စိုက်ကြည့်နေသည်။ သူမ စိတ်မသက်မသာနဲ့ အဝေးကို လှမ်းကြည့်လိုက်တော့ ယွီဟန်ကျန်းက သူ့ပါးစပ်ကို ဖွင့်လိုက်သည်။
သူ့အသံက ခံစားချက်မရှိ၊ တည်ငြိမ်ပြီး တိုးလျသည်။ "ခင်ဗျား ကိုယ်အလေးချိန် 50kg ထက်နည်းပြီး ခင်ဗျား နေ့စဉ်အင်ဆူလင်အသုံးပြုမှုက ခန့်မှန်းခြေ 20U ဖြစ်တယ်။ ဒီခရီးစဉ်က 10 ရက်ကြာပြီး ခင်ဗျားယူဆောင်လာတဲ့ အင်ဆူလင်က တစ်လအတွက်လုံလောက်တယ်။ လီကျယ်မင်းက ဆီးချိုရောဂါရှိပေမဲ့ သူ့အိတ်ထဲမှာ အင်ဆူလင်ကို ရှာမတွေ့ဘူး။ ခင်ဗျားခိုးယူတာမဟုတ်ရင် ရှင်းပြဖို့ အခြားနည်းလမ်းရှိသေးလား။"
ရှူဖျင် အံ့သြသွားသည်။
ရထားစောင့်သည် အင်ဆူလင်ပမာဏ တွက်ချက်နည်းကို အမှန်တကယ် သိလိမ့်မည်ဟု သူမ မျှော်လင့်ခဲ့ပေ။
ရှောက်လုံသည် အဖွဲ့ခေါင်းဆောင်ယွီက သက်သေအထောက်အထားများကို အေးအေးဆေးဆေး ထုတ်ပြောခြင်းကို ချီးကျူးမိသည်။ အဖွဲ့ခေါင်းဆောင်ယွီသည် တစ်ဖက်လူ၏ စိတ်ပိုင်းဆိုင်ရာ ခုခံကာကွယ်မှုများကို အနိုင်ယူရန် ခြေလှမ်းစလှမ်းခဲ့ပြီး ထိုအမျိုးသမီးက အာရုံမဲ့ကြောက်ရွံ့နေခဲ့သည်။
ယွီဟန်ကျန်းက အေးစက်သွားသည်။ "ပွင့်ပွင့်လင်းလင်းပြောရရင် ခင်ဗျားဝန်မခံရင်တောင် ရထားမှတ်တိုင်ရောက်တဲ့အခါ ကျွန်တော်တို့စောင့်နိုင်တယ်။ လီကျယ်မင်းရဲ့လက်ဗွေရာတွေကို စစ်ဆေးဖို့ ခင်ဗျားအိတ်ထဲက အင်ဆူလင်ကို ယူလိုက်မယ်။ အဲဒီအခါမှာ ခင်ဗျားကို ခိုးမှုနဲ့ အပြစ်ချလိမ့်မယ်။"
ရှူဖျင်၏မျက်နှာသည် အစိမ်းရောင်ပြောင်းလိုက်၊ အဖြူရောင်ပြောင်းလိုက် ဖြစ်နေသည်။ သူမသည် ခဏလောက် နှုတ်ဆိတ်ပြီး အားတင်းကာ ထုတ်ပြောလာခဲ့သည်။ "လီကျယ်မင်၊ အဲဒီလူယုတ်မာကို ငါမုန်းတယ်။ မနေ့ညက ငါ့သမီးကို သူ့သားနဲ့ မိတ်ဆက်ပေးဖို့ ပြောလိုက်တာ။ ငါ့သမီးက တက္ကသိုလ်ဘွဲ့ရ၊ လှပပြီး ဉာဏ်ကောင်းတယ်။ သူ့သားလို အရပ်ပုပု၊ ရုပ်ဆိုးဆိုးကို ငါဘာမှမပြောခဲ့ပေမဲ့ ငါ့သမီးက အကျင့်စာရိတ္တမကောင်းဘဲ ပညာမတတ်ဘူးလို့ သူကပြောခဲ့တယ်။"
ရှူဖျင်က ဒေါသတကြီးဖြင့် ဆက်ပြောသည်။ "ဘယ်သူက ပညာမတတ်တာလဲ။ ငါ သူ့ကို စိတ်အနှောင့်အယှက်ဖြစ်နေတာကြာပြီ။ သူ့သားမှာ ပိုက်ဆံနည်းနည်းရှိလို့ ဘုရင်မင်းမြတ်ရဲ့ မိဖုရားတစ်ယောက်လို ပြုမူနေတာ…"
သူမသည် ဒီနေရာအထိပြောပြီး ယွီဟန်ကျန်းကို အပြစ်ရှိစွာ ကြည့်ကာ သူမအသံက တဖြည်းဖြည်း အားပျော့သွားသည်။ "ငါ သူ့ကို သင်ခန်းစာလေးတစ်ခုပေးဖို့ သူ့အင်ဆူလင်ကို ခိုးသွားတာ။ ငါ ဆရာဝန်ကို မေးကြည့်တော့ အမျိုးအစားနှစ် ဆီးချိုရောဂါရှိတဲ့ လူနာက အင်ဆူလင်ပမာဏ လွဲချော်လို့ မသေပါဘူး။ ငါ တိတ်တဆိတ် ပြန်မထားခင် သူက တစ်ရက်နှစ်ရက်လောက် နာကျင်ခံစားရလိမ့်မယ်။"
ရှောက်လုံနှင့် ယွီဟန်ကျန်းတို့သည် တစ်ယောက်ကိုတစ်ယောက် တစ်ချက်ကြည့်လိုက်သည်။
ရှူဖျင်သည် သူတို့၏ အကြည့်တွေကို မြင်ပြီး ချက်ချင်း သူမလက်ကို မြှောက်လိုက်သည်။ "ငါ ကျိန်ဆိုပါတယ်၊ ငါ သူ့ကို သင်ခန်းစာပေးချင်ရုံသက်သက်ပါ။ ငါ့မှာ သတ်ဖို့ သတ္တိမရှိဘူး။ ဟုတ်သား၊ နျိုတဖန်က သူ့ကို သေချာပေါက် သတ်ချင်လိမ့်မယ်။ အဲဒီလူက နင်တို့ သံသယရှိသင့်တယ်။"
ယွီဟန်ကျန်းက မေးလိုက်သည်။ "လီကျယ်မင် အသတ်ခံရတာကို ခင်ဗျား ဘယ်လိုသိတာလဲ။"
ရှူဖျင်: "သူက နှလုံးရောဂါနဲ့ သေဆုံးသွားရင် နင်တို့က ဘာလို့ ငါ့ကိုမေးမြန်းပြီး ခရီးဆောင်အိတ်ကို စစ်ဆေးမှာလဲ။"
ယွီဟန်ကျန်းက ခေါင်းငြိမ့်လိုက်သည်။ "ပြောပါ၊ ခင်ဗျား ဘာလို့ နျိုတဖန်ကို သံသယရှိတာလဲ။"
ရှူဖျင်သည် သူမအပေါ်သံသယများကို ဖယ်ရှားရန်အတွက် ကိစ္စအားလုံးကို ထုတ်ဖော်ရန် တုံ့ဆိုင်းမနေပါ။ "အရင်တုန်းက နျိုတဖန်ဟာ ငါတို့ကုမ္ပဏီရဲ့ အရောင်းဌာနမှာ အကောင်းဆုံးစွမ်းဆောင်ရည်ရှိခဲ့တယ်။ သူဌေးက သူ့ကို မန်နေဂျာရာထူးပေးဖို့ ဆုံးဖြတ်ခဲ့တယ်။ သူဘာကိုဆိုလိုတာကို ငါမသိပေမဲ့ လီကျယ်မင်က သူဌေးသမီးကိုချိတ်ဖို့ စီစဉ်ခဲ့တယ်။ လူနှစ်ယောက်ကြားက ကိစ္စတွေကို ပြန်ပြင်လို့ မရဘူး။ သူဌေးရဲ့သမီးမှာ ကိုယ်ဝန်ရှိနေပြီဖြစ်ပြီး ဒီဆက်ဆံရေးကို အသိအမှတ်ပြုရတော့မှာ။"
"ရလဒ်အနေနဲ့ သူဌေးက လီကျယ်မင်ကို အထွေထွေမန်နေဂျာအဖြစ် ရာထူးတိုးပေးခဲ့ပြီး နျိုတဖန်ကို ထောက်ပံ့ပို့ဆောင်ရေးဌာနကို ပြောင်းရွှေ့ခဲ့တယ်။ ထောက်ပံ့ပို့ဆောင်ရေးမှာ ငွေဘယ်လောက်ရနိုင်မှာလဲ။ နျိုတဖန်ရဲ့ လစာဟာ ရုတ်တရက် ထက်ဝက် ကျဆင်းသွားပြီး သူ မကျေမနပ် ဖြစ်ခဲ့တယ်။"
"နောက်တော့ နျိုတဖန်ရဲ့ဇနီးက ကင်ဆာဖြစ်သွားတယ်။ သူ့မိန်းမကို ကုသဖို့ ပိုက်ဆံအများကြီး ချေးခဲ့ပေမဲ့ ရလဒ်ကတော့ သူ့မိန်းမက မသက်သာဘူး။ အစောကြီးဆုံးပါးသွားတော့ အကြွေးတွေအများကြီးနဲ့ သားတစ်ယောက်ကျန်ခဲ့တယ်။ သူ့သားက အလယ်တန်းကျောင်းတက်တုန်းက လီကျယ်မင်ရဲ့သားနဲ့ ရန်ဖြစ်ခဲ့ပြီး မျက်လုံးဒဏ်ရာရခဲ့ပါတယ်။ မျက်လုံးတစ်လုံးမှာ အမြဲတမ်း amblyopia ဖြစ်နေတယ်လို့ ပြောကြတယ်။ သူ လီကျယ်မင်ကို မုန်းတီးတာက သဘာဝကျပါတယ်။"
𝗧𝗞'𝘀 𝗡𝗼𝘁𝗲; ”Amblyopia”ဆိုတာ မျက်လုံးတစ်ဖက်က အမြင်အာရုံဝေဝါးသွားတာကို ဆိုလိုပါတယ်။
ဒါတွေအားလုံးသာအမှန်ဆိုရင် နျိုတဖန်က လီကျယ်မင်ကို တကယ်မုန်းသွားလိမ့်မည်။
ရှောက်လုံသည် နျိုတဖန်၏ စာရင်းသွင်းဖောင်ကို အမြန်တွေ့ရှိခဲ့သည်။ မိသားစုဆက်ဆံရေးအကွက်မှာ 'အိမ်ထောင်ဖက် ကွယ်လွန်သွားပြီ' လို့ ပြောထားပြီး သားတစ်ယောက်ရှိသည်။ သားဖြစ်သူက ငယ်ငယ်ရွယ်ရွယ်နဲ့ လုံခြုံရေးအစောင့် လုပ်နေသည်။ ဒီအလုပ်က ရုံးအလုပ်တွေနဲ့ ယှဉ်ရင် မကောင်းဘူး။"
ရှူဖျင်: "နင်တို့တော့ မသိပေမဲ့ နျိုတဖန်ရဲ့သားက ကျောင်းသားကောင်းတစ်ယောက်ဖြစ်ပြီး နှစ်တိုင်း စာမေးပွဲမှာ အမြဲတမ်း ပထမအဆင့်ရတယ်။ လီကျယ်မင်ရဲ့သားက သူ့မျက်လုံးကိုဒဏ်ရာရအောင်လုပ်ပြီး အတန်းတွေကျဆင်းသွားပြီးနောက် ကလေးရဲ့ယုံကြည်မှုကို ထိခိုက်စေခဲ့တယ်။ သူက တက္ကသိုလ်မတတ်နိုင်ဘဲ အသက်မွေးဝမ်းကြောင်းကျောင်းတက်ရတယ်။ နျိုတဖန်က လီမင်ကျယ်ကိုမုန်းတယ်ဆိုတာ ငါတို့အားလုံးသိတယ်။"
ယွီဟန်ကျန်းက မေးလိုက်သည်။ "သူနဲ့ လီကျယ်မင်က ဒီလိုအငြင်းပွားမှုမျိုးရှိထားတာကို ဘာလို့အတူတူ ခရီးထွက်ကြတာလဲ။"
ရှူဖျင်က ရှင်းပြသည်။ "ဒီခရီးစဉ်က အငြိမ်းစားဝန်ထမ်းတွေကို ဆုချတဲ့အနေနဲ့ ကုမ္ပဏီက ငွေကုန်ကြေးကျခံခဲ့တာ။ ဘယ်သူတွေသွားမလဲဆိုတာ ဘယ်သူမှမသိဘူး။ နျိုတဖန်ရဲ့ အိမ်အခြေအနေက အဆင်မပြေဖြစ်ပြီး ခရီးမသွားဖြစ်တာ နှစ်အတော်ကြာနေပြီ။ ဒီအခွင့်အရေးကို အခွင့်ကောင်းယူပြီး အပြင်ထွက်ချင်တာ ဖြစ်နိုင်တယ်။"
ဒီအမျိုးသမီးက နျိုတဖန်ကို အပြစ်ဖို့ခဲ့ပေမဲ့ သူမမှာ နျိုတဖန်ကို လူသတ်သမားလို့ သံသယဖြစ်စရာ အကြောင်းရှိသည်။ နျိုတဖန်နှင့် လီကျယ်မင်တို့ကြားက အမုန်းတရားသည် နက်နဲလွန်းပြီး ရည်ရွယ်ချက်က အလွန်ရှင်းနေတာကြောင့်ဖြစ်သည်။ လီကျယ်မင်းသည် နျိုတဖန်၏ဘဝကို ဖျက်ဆီးခဲ့ပြီး လီကျယ်မင်ကို သူသတ်ခဲ့တယ်ဆိုရင် အံ့သြစရာတော့ မဟုတ်ပါဘူး။
သို့သော်လည်း ယွီဟန်ကျန်းသည် ဤမျှလောက်ရိုးရှင်းလိမ့်မည်ဟု မထင်ခဲ့ပေ။ သူက ရှူဖျင်၏စကားကို အသေးစိတ်မှတ်သားပြီး မေးခဲ့သည်။ "ဒီခရီးမစခင် ဘယ်သူတွေသွားမယ်ဆိုတာ မသိခဲ့ဘူးလို့ ခင်ဗျားဆိုလိုတာလား။"
ရှူဖျင်က ပြန်ဖြေသည်။ "ဟုတ်တယ်၊ ဧည့်လမ်းညွှန်က မထွက်ခွာခင် ညက group chat ဖန်တီးခဲ့တယ်။ အရင်က ဒါဟာ နှစ်တွေအတွင်း ထူးချွန်စွာ ပံ့ပိုးပေးခဲ့တဲ့ ဝန်ထမ်းတွေအတွက် ဆုချတာဖြစ်ကြောင်း ကုမ္ပဏီကနေ အီးမေးလ်တစ်စောင်ပဲ လက်ခံရရှိခဲ့တယ်။ ကုမ္ပဏီက လူတိုင်းကို အခမဲ့လည်ပတ်ခွင့်ပေးမှာ။"
ယွီဟန်ကျန်းသည် သူ့မေးစေ့ကို ထိရင်း စဉ်းစားလိုက်သည်။ ခဏကြာတော့ သူက ပြောလိုက်သည်။ "ခင်ဗျား အရင်ပြန်သွားလိုက်ပါ။ အခန်း 3 က အခြားသူတွေကို လာဖို့ခေါ်လိုက်ပါ။"
ရှူဖျင်သည် ခြေလှမ်းနှစ်လှမ်းလောက်လှမ်းပြီး နောက်သို့လှည့်ကြည့်လိုက်သည်။ "ငါက လောင်လီကို သင်ခန်းစာတစ်ခုပေးချင်ပြီး ခံစားစေချင်ရုံသက်သက်ပါ။ ငါ့သမီးက အိမ်ထောင်မပြုသေးတာကြောင့် သူ့ကိုသတ်ပြီး ငါထောင်ထဲမသွားပါဘူး။"
ယွီဟန်ကျန်းက သူမကို ပြောခဲ့သည်။ "စိတ်ချပါ၊ ကျွန်တော်တို့ သေချာစုံစမ်းပါ့မယ်။"
ရှူဖျင်က သက်ပြင်းချကာ လှည့်ထွက်သွားသည်။
သူမထွက်သွားပြီး ယွီဟန်ကျန်းက ရှောက်လုံကို ကြည့်လိုက်သည်။ "ဆီးချိုရောဂါသည်က အင်ဆူလင်ကို ရက်အနည်းငယ်ကြာ ရပ်လိုက်ရင် ပြဿနာတွေရှိနိုင်သလား။"
"ဆီးချိုရောဂါအမျိုးအစားပေါ် မူတည်တယ်။ အမျိုးအစားတစ် ဆီးချိုရောဂါဆိုတာ ခန္ဓာကိုယ်က အင်ဆူလင်ထုတ်လုပ်တဲ့ဆဲလ်တွေ ချို့တဲ့နေပြီး အင်ဆူလင်ကိုမထိုးရင် ချက်ချင်း သူတို့အသက်အန္တရာယ်ဖြစ်စေတယ်။ အမျိုးအစားနှစ် ဆီးချိုရောဂါက အများအားဖြင့် စားသောက်ပုံအလေ့အထနဲ့ လူနေမှုပုံစံရွေးချယ်မှုတွေကြောင့် ဖြစ်တတ်တယ်။ တစ်ခါတစ်ရံမှာ ကောင်းကောင်းထိန်းနိုင်ရင် သွေးတွင်းသကြားဓာတ်ပမာဏကို စောင့်ကြည့်ဖို့ အင်ဆူလင်မထိုးတဲ့ကာလကို ဆရာဝန်က အကြံပြုလိမ့်မယ်။"
ယွီဟန်ကျန်းက ဆိုသည်။ "ဒါဆို သူမက လဲ့စားချေဖို့ လီကျယ်မင်ရဲ့ အင်ဆူလင်ကို တကယ်ခိုးယူသွားတယ်။ ဒါ့အပြင် အဲဒါက သူမသမီး ငြင်းပယ်ခံခဲ့ရခြင်းကြောင့်သာဖြစ်ပြီး လူသတ်ဖို့ရည်ရွယ်ချက်က မလုံလောက်ဘူး။"
"အဖွဲ့ခေါင်းဆောင်ယွီ၊ ဧည့်လမ်းညွှန်က အဖွဲ့ကိုဖန်တီးတုန်းက မနေ့ညမှ ထွက်ခွာမဲ့စာရင်းမှာ ပါဝင်သူစာရင်းကို ခရီးသွားအဖွဲ့က အတည်ပြုတယ်လို့ ပြောခဲ့တယ်။ ဒါပေမဲ့ လီကျယ်မင်သေဆုံးမှုက လူသတ်မှုတစ်ခုဆိုတာ သိသာတယ်။ တစ်ခါသုံးဆေးထိုးအပ်တွေနဲ့ အင်ဆူလင်တွေကို ကြိုဝယ်ထားတာကြောင့် လူသတ်သမားက လီကျယ်မင်ဟာ ဒီခရီးသွားအဖွဲ့မှာ ပါဝင်မယ်ဆိုတာသိနေကြောင်း ညွှန်ပြနေတယ်။"
ယွီဟန်ကျန်းလည်း ထိုအတွေးမျိုးရှိသောကြောင့် အသေးစိတ်အချက်အလက်များကို သူအထူးတလည်မေးခဲ့သည်။ သူ မျက်မှောင်ကြုတ်လိုက်သည်။ "ပထမက လီကျယ်မင်က ဒီခရီးကို သွားမယ်ဆိုတာကိုသိတဲ့သူက ခရီးသွားအေဂျင်စီပဲ။ ရှောင်ချင်က အကြာကြီး ကြိုသိထားလောက်တယ်။ ဒုတိယက လီကျယ်မင်နဲ့ ဆက်ဆံရေးကောင်းသူပဲ။ သူတို့က လောင်လီ ခရီးထွက်မလားဆိုတာကို မေးပြီး ကြိုတင်သတင်းရနိုင်တယ်။"
"ဧည့်လမ်းညွှန်မှာ ရည်ရွယ်ချက်မရှိဘူး။ လီကျယ်မင်နဲ့ ဆက်ဆံရေးကောင်းသူဖြစ်ရမယ်။"
ဤနည်းဖြင့် နျိုတဖန်၏ သံသယများ လျော့ပါးသွားသည်။
သူနှင့် လီကျယ်မင်သည် အပြင်းအထန် မုန်းတီးခဲ့ပြီး လောင်လီ ခရီးထွက်မလားဆိုတာကို သေချာပေါက် မေးမည်မဟုတ်ပေ။ အဲဒီညက အဖွဲ့ကို ဖန်တီးစဉ် နျိုတဖန်သည် လီကျယ်မင်၏နာမည်ကို တွေ့ပြီး မပျော်မရွှင်ဖြစ်ခဲ့တာမျိုး ဖြစ်နိုင်သည်။
၎င်းသည် ညပိုင်းတွင် ဖြစ်ပွားခဲ့ပြီး နောက်နေ့ နံနက်အစောပိုင်းတွင် ထွက်ခွာခဲ့သည်။ ညဉ့်နက်သန်းခေါင်တွင် ဆေးထိုးအပ်များနှင့် အင်ဆူလင်များကို ပြင်ဆင်ရန် အချိန်မလုံလောက်ပါ။
အခန်း 3 မှ အခြားအမျိုးသမီးများသည် မေးမြန်းရန်အတွက် ရုံးခန်းသို့ ရောက်လာသောအခါတွင် သူတို့နှစ်ဦးက ဆွေးနွေးနေကြသည်။
ယွီဟန်ကျန်းသည် ရှူဖျင်ပြောခဲ့သည့် အကြောင်းအရာများစွာကို မေးမြန်းခဲ့ရာ လီကျယ်မင်နှင့် နျိုတဖန်တို့ကြားတွင် ရန်ငြိုးရှိနေကြောင်း လူသုံးဦးက တညီတညွတ်တည်း အတည်ပြုခဲ့သည်။ ခရီးသွားအဖွဲ့ကို မထွက်ခွာမီတစ်ညတွင် ဖွဲ့စည်းထားပြီး လီကျယ်မင် ပါဝင်မည်ကို သူတို့ သုံးဦးမှ မသိရှိခဲ့ကြပေ။
ယွီဟန်ကျန်းက နျိုတဖန်ကို ဆက်လက်မေးမြန်းခဲ့သည်။
အဘိုးအိုသည် သူ့ရွယ်တူများထက် ပို၍ပါးရေနားရေတွန့်နေသည်။ အံ့သြစရာတော့ မရှိပါဘူး။ ဇနီးသည် နေမကောင်းဖြစ်ပြီး ဆုံးပါးသွားကာ သားဖြစ်သူ၏ အလုပ်မှာ အဆင်မပြေချေ။ မိသားစုမှာ ပိုက်ဆံအများကြီးမရှိသဖြင့် သူသည် ဤနှစ်များတွင် အလွန်ခက်ခဲသောဘဝဖြင့် နေထိုင်ခဲ့သည်။ အခု လီကျယ်မင် ဆုံးပါးသွားတော့ အဘိုးအိုသည် အလွန်စိတ်အခြေအနေကောင်းနေတယ်ဆိုတာ သူ့အမူအရာကနေ မြင်နိုင်ပါသည်။
ယွီဟန်ကျန်းက ပွင့်လင်းစွာ မေးမြန်းခဲ့သည်။ "လီကျယ်မင်က ခင်ဗျားရဲ့မန်နေဂျာရာထူးကို လုယူသွားပြီး သူ့သားက ခင်ဗျားသားရဲ့မျက်လုံးကို ထိခိုက်စေခဲ့တယ်။ ခင်ဗျား သူ့ကို အရမ်းမုန်းလား။ သူ့ကို သေစေချင်လား။"
နျိုတဖန်သည် ရထားစောင့်များက အများကြီးသိနေတာကို အံ့ဩသွားပေမဲ့ အဘိုးအိုက မကြာခင်မှာ ငြိမ်သက်သွားပြီး ရက်စက်စွာ ဆိုခဲ့သည်။ "ဟုတ်တယ်၊ ငါသူ့ကို နေ့တိုင်း ကျိန်ဆဲတယ်၊ သူ့သားနဲ့မြေးတွေကို သေအောင် ကျိန်ဆဲတယ်။ အဲဒီတိရစ္ဆာန်က ဘာလို့ ငါ့ထက် ပိုကောင်းမွန်တဲ့ဘဝကို ရတာလဲ။ အခု သူသေသွားပြီ။ ဟားဟားဟား၊ သူနဲ့ထိုက်တန်တယ်။"
သူသည် စိတ်ခံစားမှုရှိပြီး လီကျယ်မင်ကို မုန်းတီးခြင်းအတွက် လျှို့ဝှက်ထားခြင်းမရှိပေ။
ယွီဟန်ကျန်းက သူ့ကို ကြားဖြတ်ပြီး တိုးတိုးပြောသည်။ "ဒီခရီးစဉ်မထွက်ခွာခင် ဒီအဖွဲ့ထဲမှာ လီကျယ်မင်ပါမှန်း ခင်ဗျားသိလား။"
နျိုတဖန်၏ မျက်နှာက တည်ငြိမ်သွားသည်။ "ငါမသိခဲ့ဘူး။ ငါသူ့မျက်နှာကိုမြင်တိုင်း ငါ အော်ဂလီဆန်တယ်။ သူ့ကို ဒီအဖွဲ့မှာ ငါမမြင်ချင်ဘူး။ စာရင်းသွင်းပြီး လက်မှတ်တွေ ကြိုတင်မှာထားလို့ မဟုတ်ရင် ငါလာမှာမဟုတ်ဘူး။ ဒါပေမဲ့ ငါ အဲဒါကို ဖြုန်းတီးဖို့ မတတ်နိုင်ဘူး။"
ရှောက်လုံက လျင်မြန်စွာ ရေးမှတ်ပြီး ယွီဟန်ကျန်းက မေးသည်။ "မနေ့ည 2 နာရီလောက်မှာ ခင်ဗျား ဘာလုပ်နေလဲ။ အခန်း 1 ကနေ ထွက်သွားဖူးလား။"
နျိုတဖန်က ပြန်ဖြေသည်။ "မသွားဘူး၊ ဒါပေမဲ့ ငါ ညလယ်မှာ နိုးလာတယ်။ အိမ်သာသွားဖို့အတွက် လျှိုယွီမင်က မီးအိမ်ယူသွားသလိုပဲ ဘေးအခန်းက တစ်ယောက်ယောက် အိမ်သာသွားတာ ငါကြားလိုက်ပြီး တံခါးကနေ မီးအလင်းရောင်ကို မြင်လိုက်ရတယ်။ ငါတို့အထဲမှာ မီးအိမ်ပါတာဆိုလို့ သူတစ်ယောက်ပဲရှိတာ။ နောက်တော့ ကြွက်တစ်ကောင်ရှိနေသလိုပဲ အမှိုက်ပုံးထဲကနေ ထူးဆန်းတဲ့အသံတစ်ခုထွက်လာတယ်။ ငါ အိပ်ချင်မူးတူးဖြစ်နေတာနဲ့ ဂရုမစိုက်လိုက်ဘူး။"
လျှိုယွီမင်က ည 3 နာရီတွင် အိမ်သာသို့သွားခဲ့ကြောင်း ဝန်ခံခဲ့သည်။
အကယ်၍ လျှိုယွီမင်သည် လူသတ်သမားဖြစ်ခဲ့ပါက 3 နာရီတွင် ထကာ လီကျယ်မင်နှင့် အခြားသူငယ်ချင်းနှစ်ဦး အိပ်ပျော်နေကြောင်း အတည်ပြုနိုင်သည်။ ထို့နောက် သူသည် လီကျယ်မင်အား အင်ဆူလင်ထိုးပေးကာ တစ်ဖက်လူကို သတ်ပြီးနောက် အိမ်သာသို့သွားကာ ပြစ်မှုပစ္စည်းများကို အမှိုက်ပုံးထဲသို့ စွန့်ပစ်ခဲ့သည်။
ထို့အပြင် လီကျယ်မင်နှင့်သူ၏ဆက်ဆံရေးသည် အလွန်ကောင်းမွန်ပြီး မကြာခဏဆိုသလို အတူတကွ ကတ်ကစားကြသည်။ လီကျယ်မင်းသည် ဤခရီးစဉ်အဖွဲ့တွင် ပါဝင်ကြောင်း သူက သဘာဝကျကျ ကြိုတင်အတည်ပြုနိုင်ပြီး ပစ္စည်းများကို ပြင်ဆင်နိုင်သည်။ ထိုသို့ဖြစ်လျှင် ရည်ရွယ်ချက်ကဘာလဲ။ လျှိုယွီမင်က လီကျယ်မင်ကို ဘာကြောင့်သတ်တာလဲ။
နျိုတဖန်သည် သူတို့၏အတွေးများကို သိပုံရသည်။ "ဟုတ်တယ်၊ လျှိုယွီမင်က သူဌေးရဲ့သမီးရွေ့ရွေ့ကို အရမ်းချစ်တာ။ သူက သူမနဲ့ချစ်သူတွေဖြစ်ခဲ့ပြီး သူမကို သုံးနှစ်ကြာအောင် လိုက်ပိုးခဲ့ပြီး နေ့တိုင်း ပန်းတွေပို့တယ်။ သူက အရမ်းစွဲလမ်းခဲ့တာ။ အစက မိန်းကလေးက စိတ်လှုပ်ရှားပြီး သူ့ချစ်သူလုပ်မယ်လို့ ကတိပေးခဲ့တယ်။ နောက်တော့ လီကျယ်မင်က ငါတို့ကုမ္ပဏီကို ရောက်လာပြီး တစ်ခုခုဖြစ်ခဲ့တယ်။ မိန်းကလေးက ရုတ်တရက် ကိုယ်ဝန်ရလာပြီး လီကျယ်မင်နဲ့ စေ့စပ်လိုက်တယ်။"
ယွီဟန်ကျန်းက တွေးဆသည်။ "ဒါကြောင့် သူဌေးက သူ့သားမက်ကို မန်နေဂျာဖြစ်အောင် ရာထူးတိုးပေးခဲ့တာလား။ သူက ခင်ဗျားနေရာကို ယူခဲ့တာပေါ့။"
နျိုတဖန်က မထီမဲ့မြင် လှောင်ပြောင်သည်။ "သူက သူ့ကိုယ်ပိုင်အရည်အချင်းနဲ့ မဟုတ်ဘဲ မိန်းမတစ်ယောက်ကို အသုံးချပြီး အဲဒီနေရာကို ရသွားတာ။ အဲဒီမိန်းကလေးက တကယ်ကို ဝက်တစ်ကောင်ရဲ့ ချုပ်နှောင်ခြင်းခံခဲ့ရတယ်။"
ဤနည်းဖြင့် လျှိုယွီမင်လည်း လူသတ်ရန် ရည်ရွယ်ချက်ရှိသည်။ သူချစ်သောမိန်းမအတွက် သူ့ပြိုင်ဘက်ကို သတ်ခဲ့ပြီး ဒါက အချစ်အတွက် လူသတ်မှုဖြစ်သည်။
ယွီဟန်ကျန်းက တွေးဆခဲ့သည်။ "သူတို့က အချစ်အတွက် ရန်သူတွေဆိုတော့ ဘယ်လိုလုပ်သူငယ်ချင်းတွေ ဖြစ်သွားတာလဲ။"
နျိုတဖန်က အေးစက်စွာ ပြန်ဖြေသည်။ "ဘယ်သူသိလဲ။ မိန်းကလေးရဲ့မင်္ဂလာဆောင်မှာ လျှိုယွီမင်က လီကျယ်မင်ကို ဂုဏ်ပြုဖို့အတွက် ဝိုင်ခွက်ကို မြှောက်လိုက်ပြီး တစ်ဖက်လူပျော်ရွှင်ပြီး လီကျယ်မင်က သူမကို ကောင်းကောင်းဆက်ဆံသရွေ့ အဆင်ပြေတယ်လို့ ပြောခဲ့တယ်။ သူ့နှလုံးသားက တကယ်ကို ကြီးမားလွန်းလှတယ်။ တစ်နှစ်မပြည့်ခင်မှာ ကုမ္ပဏီက လှပတဲ့မိန်းကလေးတစ်ယောက်က လျှိုယွီမင်ကို လိုက်ပိုးပြီး သူက လက်ထပ်ဖို့ သဘောတူလိုက်တယ်။ သူက အရမ်းပျော်နေပုံပေါ်ပေမဲ့ သရုပ်ဆောင်တာဖြစ်နိုင်တယ်။"
ရှောက်လုံက နားထောင်ရင်း ခေါင်းကိုက်လာသည်။ ဒီအဖွဲ့၏ အချစ်သမိုင်းက တကယ်ကို အရောင်အသွေးစုံသည်။ single dog တစ်ယောက်အနေဖြင့် ကတ်များအတူတကွကစားသည့်အတိုင်းအတာအထိ 'ပြိုင်ဘက်ကို သူငယ်ချင်းအဖြစ်သို့ ပြောင်းလဲခြင်း'ဟူသော အယူအဆကို သူနားမလည်နိုင်ခဲ့ပါ။ သူက တကယ်နှလုံးသားကြီးတာလား ဒါမှမဟုတ် ဟန်ဆောင်နေတာလား။
ယွီဟန်ကျန်းသည် လျှိုယွီမင်ကို ဆက်လက်၍ မေးမြန်းခဲ့သည်။
လျှိုယွီမင်က ရှင်းပြသည်။ "အဲဒါက ကြာလှပြီဖြစ်တဲ့ ငါ့အတိတ်ပါ။ ရွေ့ရွေ့နဲ့ ငါက တက္ကသိုလ်အတန်းဖော်တွေဖြစ်ပြီး သူမက ငါ့ရဲ့အချစ်ဦးပဲ။ သူမအတွက် ငါ့ခံစားချက်တွေက နက်ရှိုင်းပေမဲ့ သူမက လီကျယ်မင်ကို သဘောကျပြီး လက်ထပ်ဖို့ ဆုံးဖြတ်လိုက်တဲ့အတွက် သူမရဲ့အမြင်တွေကို ငါလေးစားဖို့ပဲရှိတယ်။ သူမ လက်ထပ်မှာကို မင်းတို့က ငါ့ကို တားစေချင်တာလား။"
အဘိုးအိုသည် သူ့အမှတ်တရများထဲတွင် နှစ်မြုပ်သွားကာ သက်ပြင်းချလိုက်သည်။ "ငါ့အချစ်ဦးကို ဆုံးရှုံးလိုက်ရပြီးတဲ့နောက် ငါစိတ်ဓာတ်ကျနေခဲ့တယ်။ နောက်တော့ ငါ့မိန်းမနဲ့တွေ့တယ်။ သူမက လှပတယ်၊ နူးညံ့သိမ်မွေ့ပြီး ငါ့ကို အထူးဂရုစိုက်ပြီးတော့ နေ့တိုင်း ငါ့အတွက် ဟင်းရည်ယူလာပေးတယ်။ လူတစ်ယောက်ကို လိုက်ပိုးတာထက် လူတစ်ယောက်က လိုက်ပိုးခြင်းကို ခံရတာက ပိုကောင်းတယ်ဆိုတာ ငါတွေ့ရှိခဲ့တယ်။ ငါက ငါ့မိန်းမနဲ့ လက်ထပ်ခဲ့တယ်။ ငါတို့ သားတစ်ယောက်ရလို့ ပျော်ရွှင်ခဲ့တယ်။"
ယွီဟန်ကျန်းက မေးသည်။ "မနေ့ညက 3 နာရီမှာ ခင်ဗျားအိမ်သာသွားခဲ့တယ်။ အမှိုက်ပုံးကို ထိလိုက်သေးလား။"
လျှိုယွီမင်က သူ့လက်ကို ဝှေ့ယမ်းလိုက်သည်။ "မထိပါဘူး။"
"ခင်ဗျား အိမ်သာသွားတော့ အမှိုက်ပုံးထဲကနေ ထူးဆန်းတဲ့အသံတစ်ခုထွက်လာတာကို လူတစ်ယောက်က ကြားခဲ့တယ်။"
လျှိုယွီမင်၏ အမူအရာ အနည်းငယ် ပြောင်းလဲသွားသည်။ ခဏအကြာတွင် သူသည် မျက်နှာနီရဲကာ အားနည်းစွာ လိမ်ညာလိုက်သည်။ "မ-မနေ့က ငါထမင်းစားပြီး နာရီကို စားပွဲပေါ်တင်လိုက်တာ။ မတော်တဆ ငါ့လက်သုတ်ပဝါနဲ့ ရောသွားပြီး အမှိုက်ပုံးထဲကို ပစ်ချခဲ့တယ်။ ညဉ့်နက်သန်းခေါင်မှာ အမှိုက်ပုံးကို ငါ တိတ်တဆိတ် ရှာဖွေခဲ့တာ။ ဒီအရာက တော်တော်ရှက်စရာကောင်းပါတယ်။ ညဉ့်နက်သန်းခေါင်မှာ အမှိုက်ပုံးကို လှန်လှောရှာဖွေနေတာက အခြားသူတွေ ငါ့ကို စိတ်ဖောက်နေတဲ့သူလို့ ထင်လိမ့်မယ်။"
ယွီဟန်ကျန်းက မေးသည်။ "ခင်ဗျားက နာရီပျောက်သွားတယ်။ 3 နာရီထိုးနေပြီဆိုတာ ခင်ဗျား ဘယ်လိုသေချာသိတာလဲ။"
"ရထားရဲ့ထိပ်က LCD ဖန်သားပြင်ကို ငါကြည့်လိုက်တော့ 3 နာရီလို့ ပြထားတယ်။"
ယွီဟန်ကျန်းသည် စူးစူးရဲရဲ စိုက်ကြည့်နေပြီး လျှိုယွီမင်မှာ သိသိသာသာ စိတ်မသက်မသာ ဖြစ်နေသည်။ ထို့နောက် သူ့မျက်လုံးများ ရုတ်တရက် တောက်ပလာသည်။ "ဟုတ်သား။ မင်းတို့ လူသတ်မှုလို့ သံသယရှိရင် လောင်ကျန့်က ဖြစ်နိုင်ခြေအရှိဆုံးလို့ ငါထင်တယ်။"
ယွီဟန်ကျန်းက မျက်ခုံးပင့်လိုက်သည်။ "အိုး။ ခင်ဗျား ဘာလို့ဒီလိုပြောနိုင်ရတာလဲ။"
လျှိုယွီမင်က ထူးထူးခြားခြား ချဉ်းကပ်လာသည်။ "ကျန့်ဝေ့ကော်က လောင်းကစား ဝါသနာပါတယ်။ သူ့အိမ်ကို ရောင်းထားပြီး သူ့မိန်းမက ကွာရှင်းသလို သူ့သားကလည်း သူ့ကို အသိအမှတ်မပြုဘူး။ လီကျယ်မင်ရဲ့ အိတ်ကပ်ထဲမှာ IOU စာရွက်ကို မတော်တဆ ငါတွေ့လိုက်တယ်။ ကျန့်ဝေ့ကော်က သူ့လောင်းကစားအကြွေးကို ဆပ်ဖို့အတွက် လီကျယ်မင်ဆီကနေ ရွှေဒင်္ဂါး 8 သန်းကို ချေးယူခဲ့တယ်။ အဲဒီအကြောင်းကို သိတဲ့လူ တော်တော်နည်းတယ်။ ကျန့်ဝေ့ကော်က မပေးနိုင်တာကြောင့် လီကျယ်မင်ကို သတ်ပစ်တာဖြစ်မယ်။"
လောင်းကစားအကြွေးလား။ ဒါက နောက်ထပ်သော့ချက်တစ်ခုပါပဲ။
ကျန့်ဝေ့ကော်က အခြားအရာများကို ပြောနိုင်သည်။ ယွီဟန်ကျန်းသည် ကျန့်ဝေ့ကော်ကို ခေါ်ခိုင်းရန် သူ့ကို ချက်ချင်း ပြန်သွားခိုင်းလိုက်သည်။
ထိပ်ပြောင်သော အဘိုးအိုသည် အနည်းငယ် စိတ်ဓာတ်ကျနေပုံရသည်။ သူ့မျက်လုံးများက ပင်ပန်းနွမ်းနယ်နေပြီး သံသယဖြစ်စွာ မေးလာသည်။ "မင်းတို့ ငါ့ကိုဘာလို့ရှာတာလဲ။ လောင်လီနဲ့ ငါ့မှာ ရန်ငြိုးတွေ၊ မကျေမချမ်းဖြစ်စရာတွေ မရှိပါဘူး။ မင်းတို့ ငါ့ကို သံသယဝင်တာတော့ မဟုတ်ဘူးမလား။"
ယွီဟန်ကျန်းက ပေါ့ပေါ့ပါးပါး ပြောလိုက်သည်။ "ခင်ဗျားက လီကျယ်မင်ဆီကနေ ငွေ 8 သန်းချေးပြီး ပြန်မဆပ်နိုင်ဘူးမလား။"
ကျန့်ဝေ့ကော်: "…"
တစ်ဖန် ယွီဟန်ကျန်း၏ တိုက်ရိုက်မေးခွန်းကြောင့် ထိတ်လန့်သွားပြန်သည်။ ကျန့်ဝေ့ကော်က အံ့အားသင့်သွား၏။ တစ်ဖက်လူက ဒီကိစ္စကို သိတယ်ဆိုတာ သူမယုံနိုင်လောက်အောင်ပါပဲ။
ယွီဟန်ကျန်းက ဆက်လက်၍ မေးသည်။ "လီကျယ်မင်ရဲ့အိတ်ကပ်ထဲမှာ ခင်ဗျား ငွေ 8 သန်းချေးခဲ့တယ်လို့ ရေးထားတဲ့ စာရွက်တစ်ခုရှိတယ်။ ဒါပေမဲ့ ကျွန်တော်တို့ ရှာကြည့်တော့ အဲဒါက ပျောက်နေတယ်။ ခင်ဗျားယူခဲ့တာလား။"
ကျန့်ဝေ့ကော်သည် သူ့မျက်လုံးများ ကျွတ်ကျတော့မလို အလွန်ထိတ်လန့်နေသည်။ "ဘာ-ဘာအကြွေးလဲ။ ဒီအကြောင်း ငါမသိဘူး။"
"တစ်ယောက်ယောက် မြင်ခဲ့တယ်။ ခင်ဗျား ငြင်းလို့မရဘူး။"
ကျန့်ဝေ့ကော်: "…"
ဒီကိစ္စက လျှို့ဝှက်ချက်လို့ သူထင်ခဲ့သည်။ ရလဒ်အနေနဲ့ ယွီဟန်ကျန်းက သူ့ကို တိုက်ရိုက်ထိုးဖောက်ပြီး အဘိုးအို၏ မျက်နှာအမူအရာကို ဖော်ပြလို့မရတော့ဘူး။
ယွီဟန်ကျန်းက ပေါ့ပေါ့တန်တန်ပြောလိုက်သည်။ "ခင်ဗျားက လောင်းကစားကို စွဲလမ်းပြီး ခင်ဗျားရဲ့မိသားစုစည်းစိမ်ဥစ္စာကို ဆုံးရှုံးတယ်။ ခင်ဗျားဇနီးနဲ့သားက ခင်ဗျားကို မလိုချင်တော့ဘူး။ လောင်းကစားအကြွေးကိုဆပ်ဖို့အတွက် ခင်ဗျားရဲ့သူငယ်ချင်းကောင်း လီကျယ်မင်ကိုရှာတွေ့ပြီး သူ့ဆီကနေ ပိုက်ဆံအများကြီးချေးလိုက်တယ်။ ဒီလောက်များပြားတဲ့ ပိုက်ဆံတွေကို ခင်ဗျား သေချာပေါက် ပြန်မဆပ်နိုင်ဘူးမလား။ ဒီတော့ လီကျယ်မင် သေသွားပြီး ချေးငွေစာရွက်မရှိတော့သရွေ့ ခင်ဗျား ငွေပြန်ဆပ်စရာမလိုတော့ဘူး။"
ကျန့်ဝေ့ကော်: "…"
အဘိုးအိုသည် ယွီဟန်ကျန်း၏ ဖြတ်ထိုးဉာဏ်ကြောင့် ကြောက်လန့်နေပုံရသည်။
ယွီဟန်ကျန်းက သူ့ကို စိုက်ကြည့်နေသည်။ "ပြောပါ၊ လီကျယ်မင်ကို ခင်ဗျား သတ်လိုက်တာလား။ ခင်ဗျားမှာ ဆီးချိုရှိပြီး အင်ဆူလင် အလွန်အကျွံထိုးမိရင် အသက်အန္တရာယ်ရှိတယ်ဆိုတာ ခင်ဗျားသိထားမှာပေါ့။ ခင်ဗျားက ဆေးထိုးအပ်နဲ့ အင်ဆူလင်ကို ကြိုဝယ်ထားတယ်။ မနေ့ညက လျှိုယွီမင် အိမ်သာသွားတဲ့အခါ ခင်ဗျားက အခြားသူတွေ အိပ်ပျော်နေတာကို အခွင့်ကောင်းယူပြီး လီကျယ်မင်ကို တိတ်တဆိတ် အင်ဆူလင် 300U ထိုးပေးခဲ့တယ်။ ပြီးတော့ ခင်ဗျားက အိပ်ရာပေါ်တက်ပြီး အိပ်ချင်ယောင်ဆောင်နေလိုက်တယ် ဟုတ်တယ်မလား။"
ကျန့်ဝေ့ကော်သည် နောက်ဆုံးတွင် တုံ့ပြန်လိုက်ပြီး ဆတ်ဆတ်ခါအောင် ခေါင်းကို ခါယမ်းကာ ဆောလျင်စွာ ငြင်းလိုက်သည်။ "မဟုတ်ဘူး၊ ငါသူ့ကိုမသတ်ဘူး။ လီကျယ်မင်ရဲ့ ချေးငွေစာရွက်ကို ငါခိုးယူခဲ့ပေမဲ့ ဒီနေ့ မနက်က ဖြစ်ခဲ့တာ။ 6:30 မှာ အခြားသူတွေ အိပ်နေတုန်း ငါနိုးလာခဲ့တာ။ ငါ အိမ်သာတက်ဖို့ အိပ်ရာကထပြီး သူ့ခန္ဓာကိုယါက ရေခဲလိုဖြစ်နေတာကို မတော်တဆတွေ့လိုက်ရတယ်။"
သူက အသက်ပြင်းပြင်းရှူပြီး ထိတ်လန့်တကြားပြောလိုက်သည်။ "အသက်ရှူတာကို စစ်ဆေးကြည့်တော့ သူသေသွားပြီးတာ ငါတွေ့ခဲ့တယ်။ ငါ ကြောက်လန့်ပြီး လူတွေကို ခေါ်ချင်ခဲ့တယ်။ လီကျယ်မင်က သေဆုံးသွားပြီး အခြားနှစ်ယောက်က တိတ်တိတ်ဆိတ်ဆိတ် အိပ်ပျော်နေတဲ့အတွက် ချေးငွေစာရွက်ကို ငါခိုးယူနိုင်ရင် သူ့ဆီကနေ ပိုက်ဆံချေးခဲ့တာကို ဘယ်သူမှသိမှာမဟုတ်ဘူးလို့ ငါထင်ခဲ့တာ။"
ကျန့်ဝေ့ကော်သည် ဤနေရာအထိ ပြောလိုက်ကာ ရုတ်တရက် ငိုချလိုက်သည်။ မျက်ရည်များနှင့် နှပ်ချေးများ ကျဆင်းလာကာ သူ့အသံမှာ ဆို့နင်သွားသည်။ "ငါ မလုပ်ချင်ပေမဲ့ ဒီလောင်းကစားကို ငါတကယ်စွဲလမ်းသွားတာ။ ပထမတော့ ငါ တစ်သိန်းပဲ ဆုံးရှုံးခဲ့ပြီး နောက်တော့ ပိုများလာတယ်။ ငါ့အိမ်ကိုရောင်းပြီး ပိုက်ဆံတွေကို လောင်းကစားလုပ်တယ်… အကြွေးတွေ တိုးလာပြီး ငါပြန်မဆပ်နိုင်တော့ဘူး။ သူတို့က ငါ့လက်ချောင်းတွေကို ဖြတ်ပစ်မယ်လို့ပြောတယ်…"
ယွီဟန်ကျန်းက မျက်မှောင်ကြုတ်လိုက်သည်။ "ခင်ဗျားက ငွေရှစ်သန်းချေးဖို့ လီကျယ်မင်ကို ရှာခဲ့တယ်။ ခင်ဗျား ဘာအကြောင်းပြချက်ပေးခဲ့တာလဲ။"
ကျန့်ဝေ့ကော်က ခေါင်းငုံ့ပြီး ပြောလိုက်သည်။ "ငါ့သားအိမ်ထောင်ပြုပြီး သူ့အတွက် လက်ဖွဲ့အိမ်ပြင်ဆင်ပေးရမယ်လို့ ငါသူ့ကိုပြောခဲ့တယ်။ လီကျယ်မင်က ငွေရေးကြေးရေးမှာ အထူးရက်ရောပြီး တစ်ယောက်ကိုတစ်ယောက် နှစ်ပေါင်းများစွာ သိလာခဲ့တယ်။ သူက သံသယမရှိသလို ငါ့ကို တိုက်ရိုက်ချေးပေးခဲ့တယ်…"
ယွီဟန်ကျန်းက မေးသည်။ "ခင်ဗျား ဘယ်တုန်းကချေးခဲ့တာလဲ။"
အဘိုးအိုက သူ့မျက်ရည်တွေကို လှမ်းသုတ်လိုက်သည်။ "လီကျယ်မင်က ငါလောင်ကစားလုပ်တာ၊ ကွာရှင်းခဲ့တာကို မသိခဲ့ဘဲ လွန်ခဲ့ငါးနှစ်လောက်ကတည်း ချေးခဲ့တာ…" ယွီဟန်ကျန်း၏စူးရှသော မျက်လုံးများကြောင့် သူက ခေါင်းငုံ့ကာ နောင်တရခဲ့သည်။ "ငါမှားပါတယ်၊ ငါမှားမှန်းသိပါတယ်။ ငါ လောင်းကစားမလုပ်ခဲ့သင့်သလို ပိုက်ဆံချေးဖို့ လီကျယ်မင်ကို မလှည့်စားခဲ့သင့်ဘူး။ ဒါပေမဲ့… ငါသူ့ကို မသတ်ဘူး။ ငါကျိန်ပြောရဲတယ်။ ငါ တိတ်တိတ်လေး စာရွက်ကိုပဲဆုတ်ဖြခဲ့တာ၊ သူ့ကိုမသတ်ခဲ့ဘူး။"
သူ ခေတ္တရပ်လိုက်ပြီး ဆက်ပြောခဲ့သည်။ "အဲဒါက နျိုတဖန်ဖြစ်ရမယ်။ သူက လီကျယ်မင်နဲ့ ရန်ဖြစ်ခဲ့တာ။ လီကျယ်မင်က သူ့ရာထူးကို ခိုးယူသွားပြီး သူ့သားကြောင့် နျိုတဖန်ရဲ့သားဖြစ်သူ မျက်လုံးက ဒဏ်ရာရခဲ့တယ်။ လောင်လီကို အမုန်ဆုံးသူက နျိုတဖန်ပဲ။"
ယွီဟန်ကျန်းက ရှောက်လုံကို တစ်ချက်ကြည့်လိုက်သည်။ ဂရုတစိုက် စာမှတ်ထားသည့် ရှောက်လုံလည်း ခေါင်းကို မော့လိုက်သည်။
မျက်ဝန်းနှစ်စုံက ဆုံမိပြီး အံ့အားသင့်မှု အရိပ်အယောင်ကို ပြနေသည်။
သံသယရှိသူများသည် အပြန်အလှန် လှည့်ပတ်အပြစ်တင်ကြပြီး လီကျယ်မင်အကြောင်း သဲလွန်စများစွာ ဖော်ထုတ်ခဲ့ကြသည်။
ရှူဖျင်သည် သူမသမီးကို လီကျယ်မင်အား မိတ်ဆက်ပေးခဲ့ပြီး တစ်ဖက်က ငြင်းဆိုခဲ့သည်။ သူမသမီးကို ပညာမတတ်ဘူးပြောလို့ သူ့ကို သူမရင်ထဲမှာ မုန်းတီးနေခဲ့တယ်လို့ ပြောခဲ့သည်။ သူမသည် သင်ခန်းစာတစ်ခုပေးရန် လီကျယ်မင်၏အင်ဆူလင်ကိုခိုးယူခဲ့သည်။
နျိုတဖန်သည် အရည်အချင်းရှိသော မန်နေဂျာတစ်ယောက်ဖြစ်နိုင်ပေမဲ့ လီကျယ်မင်က သူဌေးသမီးနဲ့ လက်ထပ်လိုက်သောကြောင့် သူ့ရာထူးက လုယူခံလိုက်ရသည်။ လီကျယ်မင်၏သားကလည်း နျိုတဖန်၏သားကို ဒဏ်ရာရစေပြီး နျိုတဖန်၏မုန်းတီးမှုက လျှို့ဝှက်ချက်မဟုတ်ပေ။
လျှိုယွီမင်သည် လီမင်ကျယ်ကြောင့် သူ့အချစ်ဦး ခိုးယူတာကို ခံခဲ့ရသည်။
ကျန့်ဝေ့ကော်သည် လောင်းကစားလုပ်ပြီး လီကျယ်မင်ကို ရွှေဒင်္ဂါးရှစ်သန်း အကြွေးတင်ခဲ့သည်။ သူက ပြန်ဆပ်ဖို့ မတတ်နိုင်ဘူး။
ရှူဖျင်က နျိုတဖန်ကို ဖော်ထုတ်ခဲ့သည်၊ နျိုတဖန်က လျှိုယွီမင်ကို ဖော်ထုတ်ခဲ့သည်၊ လျှိုယွီမင်က ကျန့်ဝေ့ကော်ကို ဖော်ထုတ်ခဲ့ပြီး ကျန့်ဝေ့ကော်က နျိုတဖန်ကို ဖော်ထုတ်ခဲ့သည်။
လက်ရှိတွင် ရှူဖျင်၏ လူသတ်ရန် ရည်ရွယ်ချက်မှာ မလုံလောက်သေးပေ။ သူမသတ်ရင် အင်ဆူလင်ခိုးဖို့ မလိုဘူး။ ကျန်သုံးယောက်ကတော့ လုံလောက်သော ရည်ရွယ်ချက်များရှိသည်။ လီကျယ်မင်က ခရီးသွားအဖွဲ့တွင် ပါဝင်နေတာကို မသိသောကြောင့် နျိုတဖန်၏ သံသယများ လျော့ပါးသွားခဲ့သည်။ အပေါ်ယံတွင် လျှိုယွီမင်သည် လီကျယ်မင်နှင့် သူငယ်ချင်းကောင်းဖြစ်ပြီး လောင်လီက ဒီခရီးစဉ်တွင် ပါဝင်နေကြောင်း အလွယ်တကူကြိုသိနိုင်သည်။
လူသတ်သမားက ဘယ်သူလဲ။
စကားလုံးများတွင် ဟာကွက်များ ရှိပါသလား။
ယွီဟန်ကျန်းသည် ရှောက်လုံ၏ သပ်ရပ်သော လက်ရေးစာကို ဖတ်ပြပြီး အတွေးထဲနှစ်မြောကာ မျက်မှောင်ကြုတ်လိုက်သည်။
#TK
