MM Story Teller

Chapter 7

Viewers 19k

👻Chapter 7

ဝိဥာဥ်လက်ထပ်ပွဲ(6)

ချူဟွိုက်က အခြားသူမမြင်ခင် အင်္ကျီလက်ကို ချက်ချင်း ချလိုက်ပြီး လက်ကို နောက်ပို့ထားလိုက်သည်။

စောစောက မာမိသားစုတွင် မကောင်းဆိုးဝါးစွမ်းအင်နှင့် ထိတွေ့ခဲ့၍ ဖြစ်နိုင်သည်။ ထို့ကြောင့်လည်း သူ့ကိုယ်ထဲရှိ ဖိနှိပ်ထားသည့် ယင်စွမ်းအင်က နိုးထလာခြင်းဖြစ်သည်။

“ချူကျောင်း...မင်း အဆင်ပြေရဲ့လား"

လော့ဇီယန်က အနည်းငယ် ထိတ်လန့်သွားသည်။ မူလက သူက ပြတင်းပေါက်ဘေးတွင် ဆေးလိပ်သောက်နေခြင်း ဖြစ်ပြီး ဖြစ်သွားသည့်အရာကို လှမ်းမြင်သွားသည်။ သူက ချက်ချင်းပင် ခွေးခြေခုံတစ်ခု ရွှေ့ပေးလာသည်။

“ဆောရီး။ကျွန်မမှာ မွေးရာပါရောဂါ တစ်ခု ရှိလို့" ချူဟွိုက်က လိမ်လိုက်သည်။

သူက လော့ဇီယန်ကို သူထိုင်ဖို့မလိုကြောင်း လက်ယမ်းပြလိုက်သည်။

မိနစ်အနည်းငယ်အတွင်း ချူဟွိုက်က နာကျင်လွန်း၍ ချွေးတို့နစ်နေပြီး အင်္ကျီလက်အောက်က လက်များကလည်း ထိန်းမရအောင် တုန်ယင်နေသည်။

သေစမ်း ငါတော့....။

တစ်ဖက်တွင်လည်း ကျောက်ရှင်းက သူ၏ ကံဆိုးမှုကို စိုက်ကြည့်နေသည်။

“အစ်ကိုကျင်းကရော..." ချူဟွိုက်က နာကျင်မှုကို တောင့်ခံထားရင်း တိုးတိုးတိတ်တိတ် မေးလိုက်သည်။

“မာကျစ်ချိန်ရဲ့ သေဆုံးမှုကို စစ်ဆေးဖို့ လီပင်းက ချောင်အိမ်တော်ကို သွားမယ့် သူ့နောက်လိုက်သွားခဲ့တယ်။ ငါလည်း လိုက်ဖို့ စီစဥ်ထားပေမယ့် ဘော့စ်က မလွယ်လောက်ဘူးထင်လို့ ငါ့ကို နေခဲ့ပြီး ကျောက်ရှင်းကို စောင့်ရှောက်ဖို့ ပြောခဲ့တာ"

လော့ဇီယန်က ရှင်းပြနေရင်း ချူဟွိုက်ကို စိုးရိမ်တကြီး ကြည့်လာသည်။

“အရမ်း နာနေလား။ ဆေးယူပေးရမလား" သူက ဂရုစိုက်ပြီး မေးလာသည်။

အမှန်တွင်ဖြင့် ဤသည်က ချူကျောင်း၏ ကိုယ်ရေးကိုယ်တာ ကိစ္စဖြစ်သွားသည်။ ချူကျောင်း၏ ခွင့်ပြုချက်မရပဲ သူမ၏ ပစ္စည်းများကို သူကြည့်၍မရချေ။

“မလိုပါဘူး။ ကျွန်မ အဆင်ပြေပါတယ်။ ခဏလောက်နေရင် သက်သာသွားမှာပါ"

ချူဟွိုက်က အားတင်းပြုံးလိုက်ရင်း လက်သီးတင်းတင်းဆုပ်ကာ ခက်ခက်ခဲခဲနှင့် အပြင်လျှောက်သွားပြီး နံရံကို မှီထားလိုက်သည်။ဆိုရလျှင် အခြားသူများက သူ၏ လက်ရှိအခြေအနေကို သတိထားမိသွားမှာမျိုး မဖြစ်ချင်ပေ။

သူ့ကိုယ်ထဲ ဝိဥာဥ်တစ်ခု ရှိနေသည်ဟုလည်း ရှင်းပြ၍လည်း မရနိုင်။ ဤလူစုက အသက်ရှင်ရန် ပြေးလွှားနေကြရ၍ သူတို့ အမုန်းဆုံးအရာက သရဲဖြစ်သည်။ သူက သူ့ကိုယ်ထဲရှိ ဝိဥာဥ်က သူတို့ကို အန္တရာယ်မပေးမှန်း သိနေသော်လည်း သူတို့ သူ့ကို ယုံကြည်စရာ ဘာအကြောင်းပြချက်မှ မရှိချေ။

လူတိုင်း၏ နှလုံးသားက ဆိုးယုတ်ပြီး တစ်ယောက်ယောက်က 'ပြဿနာဖြစ်စေသည့် တည်ရှိမှု'ကို ရှောင်ရှားရန် လျှို့ဝှက်မလှုပ်ရှားလာနိုင်ဟုလည်း အာမခံထား၍ မရချေ။

ယခင်ကလည်း မော်ဖင်းကဲ့သို့ အကိုက်အခဲပျောက်ဆေးမျိုး သုံးရန် မစဥ်းစားမိသည်မျိုး မဟုတ်ချေ။ သူ့တွင် ထိုနာကျင်မှု ပေါ်လာသည့်အချိန် အဖိုးကြီးယွဲ့က ဘေးကနေ သူနာနေသည်ကို ရပ်မကြည့်နိုင်ခဲ့။ ထို့ကြောင့် သူက သူ့ကို ဆေးထိုးပေးလိုက်သည်နှင့် သူက ချက်ချင်း လဲကျပြီး သတိလစ်သွားခဲ့သည်။

ချူဟွိုက်က ပိုက်ဆံပြတ်လပ်မနေသော်လည်း ဆေးမယဥ်ချင်ရုံသာ ဖြစ်သည်။ သူ သုံးလိုက်လျှင် ဆေးဝါး၏ အသုံးတော်ခံ တစ်ယောက် ဖြစ်လာပြီး လူမဟုတ် သရဲမဟုတ်ဘဝနှင့် ရှင်သန်သွားရလိမ့်မည်။

လှေကားခုံ၏ ထိပ်ဆုံးမှ အားကုန်သုံးပြီး ခြေလှမ်းလိုက်သည်နှင့် တံခါးဖြတ်ပြီး ဝင်လာသည့် ကျင်းထျန်းယိကို တွေ့လိုက်ရသည်။

ကျင်းထျန်းယိက ခေါင်းမော့လိုက်ရာ သူနှင့် အကြည့်ချင်းဆုံသွားပြီး နောက်တစ်စက္ကန့်အကြာတွင် ပုံလဲမတတ်ဖြစ်နေသည့် သူ့မျက်နှာအခြေအနေ မူမမှန်သည်ကို တွေ့သွားသည်။ ကျင်းထျန်းယိက ချက်ချင်း ခြေလှမ်းကျယ်လှမ်းလာပြီး လူတိုင်းရှေ့တွင် သူ့ကို ပွေ့ ချီလာသည်။

ကျင်းထျန်းယိက ချူဟွိုက်၏ နှင်းဖြူရောင် ဒူးအောက်ကို လက်လျှိုဝင်လိုက်ပြီး တစ်ဖက်လက်နှင့် ချူဟွိုက်ကျောပြင်ကို ဖက်လာသည်။ သူ့မျက်နှာက ရှက်သွားခြင်းမရှိသလို အမောဆို့နေခြင်းလည်း မရှိချေ။ သူ့နောက်ကျောက သံမဏိတစ်ချောင်းလို ဖြောင့်တန်းနေသည်။

ဤပုံရိပ်က အရမ်း လှပလွန်းသည်။ ကိုယ်လူချောက အဖြူရောင် အလှလေးကို ပွေ့ချီထားလေသည်။ အမျိုးသမီးလေး၏ ခြေတံများက ရှည်လျားပြီး ဖြူစွတ်နေကာ အလွန် ကြည့်ကောင်းလှသည်။

“မင်း အဆင်ပြေရဲ့လား" ကျင်းထျန်းယိက မျက်ခုံး တင်းတင်းစေ့ထားရင်း စိုးရိမ်သလို မေးလာသည်။

သူ့ခန္ဓာကိုယ်ရှိ နာကျင်မှု အားလျော့သွားပြီး ချူဟွိုက်က ကျင်းထျန်းယိလည်တိုင်ကို ပုံမှန်ဖက်နေကျလိုမျိုး ဖက်ထားလိုက်ကာ တစ်ဖက်လူပေါ် မှီခိုလိုက်၍ထင် သူ့ခန္ဓာကိုယ်က ချက်ချင်း သက်သာသွားသည်။

ချူဟွိုက်က ရှက်ကိုးရှက်ကန်း ခေါင်းခါပြပြီးနောက် မျက်နှာလေးက အနီရောင် ပြေးသွားလေသည်။

အခုချိန် ချူဟွိုက်စိတ်ထဲတွင် စကားလုံး တစ်လုံးသာ ရှိသည်။ လောင်ဇီရဲ့ သေခြင်းတရားက သူ့အပေါ် မူတည်နေတယ်။ [လောင်ဇီက ကိုယ့်ကိုယ်ကိုယ် အထင်ကြီးတဲ့ ပုံစံလိုမျိုး ခေါ်တာပါ]

ထပ်ပြီး မနာတော့၍ ပျော်လွန်းလို့ ငိုချင်မိသည်။

ကျင်းထျန်းယိက ချူဟွိုက်၏ စကပ်ကို သပ်သပ်ရပ်ရပ် ပြင်ပေးလိုက်ပြီး သူ့ကို အခန်းထဲ ချီသွားလေသည်။ ချူဟွိုက်က ပေါ်သွားမည်စိုး၍ ခြေထောက်ကို အမြန် စေ့လိုက်မိသည်။

ညအမှောင်ကျလာ၍ ဒုတိယမြောက်ည ဖြစ်လာလေပြီ။

ချူဟွိုက်က သူ့ရင်ထဲ မတည်မငြိမ် ခံစားနေရသည်။

သူနှင့်ကျင်းထျန်းယိတို့က ကုတင်တစ်ခုတည်းပေါ် အိပ်နေကြသည်။

ဖြစ်နိုင်ခြေအများဆုံးက မတော်တဆက ညတွင် ဖြစ်ပွားလာနိုင်သည် သူတို့ကလည်း အဝတ်ဝတ်ပြီး အိပ်နေ၍ အန္တရာယ်ရှိလာသည်နှင့် ပြေးရလွယ်သွားပေမည်။

ယင်းမိသားစုက သေးငယ်၍ အခန်းတစ်ခုထဲ လူငါးယောက်ခြောက်ယောက် မဆံ့ချေ။ လီပင်းနှင့် ဝမ်ရွှယ်က စစ်အေးတိုက်ပွဲ တိုက်နေ၍ လော့ဇီယန်နှင့် လီပင်းတို့က တစ်ခန်းထဲ အတူတူ နေပြီး ဝမ်ရွှယ်က ကျောက်ရှင်းနှင့် တစ်ခန်းတည်း အတူနေသည်။

ထို့ကြောင့် ကျင်းထျန်းယိနှင့် ချူဟွိုက်တို့က အလိုလို တစ်ခန်းတည်း ဖြစ်သွားလေသည်။

ချူဟွိုက်၏ အသက်ရှူသံက တဖြေးဖြေး တည်ငြိမ်လာသည်။ သူက ကျင်းထျန်းယိ၏ လက်မောင်းထဲ အိပ်ပျော်နေသည်။ သို့သော်လည်း ကျင်းထျန်းယိက ယင်းက ချူဟွိုက်၏ အကျင့်လား မသိစိတ်အရ ငြင်းပယ်ခြင်းကြောင့်လား မသိခဲ့။ ချူဟွိုက်က အိပ်မောကျသွားချိန် သူ့ရင်ခွင်ထဲမှ ထွက်သွားပြီး ဘောလုံးလေးတစ်လုံးကို ကွေးနေသည်။

အမှောင်ထဲတွင် ကျင်းထျန်းယိက မျက်လုံးဖွင့်ကြည့်လိုက်ချိန် သူ့မျက်နှာထက် အိပ်ပျော်နေသည့် အရိပ်အရောင်တို့ မရှိချေ။

သူက ခေါင်းစောင်းလိုက်ရင်း ဘေးကလူကို ကြည့်လိုက်ရာ ချူဟွိုက်က ကုတင်စွန်းတွင် ကွေးကွေးလေးဖြစ်နေ၍ အံ့သြသွားရသည်။ သူ့ပုံစံက ဗိုက်နာ၍ ကွေးနေသည့် လူတစ်ယောက်နှင့် တူသည်။

ချူဟွိုက်က အေးအေးသက်သာ မအိပ်ရ၍ မျက်ခုံးကြောတို့ တွန့်ချိုးနေပြီး မျက်လွှာများကလည်း ဟိုသည် အနည်းငယ် ရွေ့နေသည်။

ကျင်းထျန်းယိက တစ်ခဏမျှ စဥ်းစားလိုက်ပြီးနောက် တိတ်တိတ်လေး ထထိုင်လိုက်သည်။ သူက ချူဟွိုက်၏ လက်ကို ညင်ညင်သာသာ ဆုပ်ကိုင်လိုက်ပြီး လက်ချောင်းတစ်ချောင်းစီကို သက်သာအောင် လုပ်ပေးလာသည်။

ချူဟွိုက်၏ လက်များက အေးစက်နေသည်။

နောက်ဆုံးတစ်ခေါက်တွင် ကျင်းထျန်းယိက ချူဟွိုက်၏ ခန္ဓာကိုယ် အပူချိန်က သာမန်လူများထက် ပိုနိမ့်နေမှန်း သိလိုက်ရသည်။

သူ ရရှိထားသည့် အချက်အလက်က အနည်းအကျဥ်းသာ ဖြစ်၍ ချူဟွိုက်၏ လျှို့ဝှက်ချက်ကို ရှာတွေ့ရန် မလုံလောက်ပေ။

ချူဟွိုက် အရင်က ပြောဖူးသည့် နေမကောင်းသည်ဆိုသည်က အမှန်လားအမှားလား ဆွေးနွေးကြည့်ချင်သေးသည်။

ကျင်းထျန်းယိက နူးနူးညံ့ညံ့ ပြုံးလိုက်ပြီး တစ်ဖက်လူ၏ လက်ကို ကိုင်လိုက်ရင်း သူ့လက်မောင်းထဲ ချူဟွိုက်ကို ဆွဲယူလိုက်သည်။

သူက မျက်လုံးပိတ်ရန် ပြင်လိုက်စဥ် သော့သံကို ခပ်မျဥ်းမျဥ်း ကြားလိုက်ရသည်။

ကျင်းထျန်းယိက မျက်လုံးတို့ ကျဥ်းမြောင်းသွားရင်း မျက်ဆံနက်နက်တစ်စုံက တဖြေးဖြေး မီးခိုးရောင်သန်းလာပြီး ပြာလာသည်။

လူလက်တစ်ချောင်းက စက္ကူပြတင်းပေါက်ကို ဖောက်လာပြီး အပေါက်လေးတစ်ခု ပေါ်လာလေ၏။ ထိုလက်ချောင်းက ရွှံ့တို့ ကပ်နေ၍ မီးခိုးရောင်သန်းနေသည်။

ထို့နောက် ပုလင်းလေးတစ်လုံးက အပေါင်ကလေးမှ ဝင်လာသည်။ ထိုပုလင်းဆီမှ မီးခိုးရောင်နှင့် အပြာရောင် အငွေ့များ အလုံးအရင်း ထွက်လာလေသည်။

ကျင်းထျန်းယိက ချက်ချင်းပင် ချူဟွိုက်၏ ပါးစပ်နှင့် နှာခေါင်းကို အုပ်ထားလိုက်သည်။

ချူဟွိုက် ချက်ချင်း နိုးလာပြီး ရုန်းကန်ရန် ပြင်လိုက်စဥ် သူ့နောက်က ကျင်းထျန်းယိက သူ့ကို ချက်ချင်း ဖိထားလိုက်ရင်း သူ့နားသန်သီးလေးကို ဖွဖွကိုက်လာသည်။

ချူဟွိုက်က တုန်ယင်သွားရင်း သူ့မျက်လုံးပတ်လည်တွင် ဗလာကျင်းသွားရသည်။

ပုလင်းလေးက စက္ကူပြတင်းပေါက်၏ အပေါက်မှ လျှောကျသွားပြီး ညစ်ထေးနေသည့် မျက်လုံးတစ်ခုက အစားထိုးပေါ်လာသည်။

ကျင်းထျန်းယိက ချက်ချင်း မျက်လုံးပိတ်ထားလိုက်၏။

ထိုခဏ ချူဟွိုက်ကလည်း အခြေအနေကို သဘောပေါက်သွားသည့် ပုံပင်။ ထို့ကြောင့် သူက နာနာခံခံနှင့် မျက်လုံးပိတ်လိုက်ပြီး မလှုပ်မယှက်နေလိုက်သည်။ ချူဟွိုက်က ကျင်းထျန်းယိ၏ ထူးဆန်းသည့် မျက်လုံးတစ်စုံကိုဖြင့် သတိမထားမိပါချေ။

မျက်လုံးတစ်စုံက သူတို့ကို အချိန်အတော်ကြာ တိတ်တဆိတ် ကြည့်နေပြီးမှ အကြည့်ခွာသွားသည်။ ထိုခဏ 'ကျွီ''ဆိုသည့် အသံနှင့် တံခါးပွင့်သွားရင်း မည်းမည်း အရိပ်တစ်ခု ပေါ်လာသည်။

ကျင်းထျန်းယိက မျက်လုံးဖွင့်လိုက်ပြီး အဖေယင်းကို တိတ်တဆိတ် ကြည့်နေလိုက်သည်။

အဖေယင်းက စားပွဲဆီ ခြေဖော့သွားလိုက်ရင်း ကျင်းထျန်းယိခိုးထားသော ငွေထည်များကို ရှာတွေ့သွားသည်။ သူက ဝမ်းသာလုံးဆို့ပြီး ငွေထည်များကို သူ့အင်္ကျီလက်ထဲ ထည့်လိုက်သည်။ သူက ထွက်သွားရန် ပြင်လိုက်စဥ် ဤအခန်းထဲ မိန်းမလှလေးတစ်ယောက် ရှိသေးမှန်း အမှတ်ရသွားသည့်ပုံပေါ်သည်။ ထိုအခိုက် သူက ရမက်ကြွလာပြီး ကုတင်ဘက် လျှောက်လာလေသည်။

ချူဟွိုက်က အပြင်ဘက်နေရာတွင် အိပ်နေခြင်းဖြစ်သည်။

အဖေယင်းက သူ့ခါးကို ထိရန်ပြင်လိုက်ချိန် ကျင်းထျန်းယိက ရုတ်တရက် သူ့ဘေးကလူကို ဆွဲယူလိုက်ပြီး နေရာပြောင်းလိုက်သည်။

အဖေယင်းက ဤသို့ ရုတ်တရက် ပြောင်းသွားမှုကြောင့် အံ့အားသင့်သွားရသည်။ သူက ကုတင်ခြေရင်းတွင် ထိုင်လျက်သား ဖြစ်သွားပြီး အင်္ကျီလက်ထဲ ဖွက်ထားသည့် ဓါးက ထွက်ကျလာကာနီးဖြစ်သွားသည်။

“အပျက်မလေး"

ကျင်းထျန်းယိက ချူဟွိုက်ကို ပြောလိုက်သည်။ သူ့မျက်လုံးများက ပုံမှန်အရောင် ပြောင်းသွားပြီဖြစ်၏။

ချူဟွိုက်:"......"

“မင်းက အရမ်း စျေးပေါလွန်းတယ်...ဘယ်လိုပဲဖြစ်ဖြစ် ငါ...မင်းကို...အင်း....ကြိုက်နေတုန်းပဲ"

“ဘာလဲ...။ ဘာလို့ ထပ်မအော်တော့တာလဲ...။ ရှက်နေတာလား" ကျင်းထျန်းယိက တိုးတိုးဖွဖွ ရယ်လိုက်သည်။

ချူဟွိုက်:"......." ကံကောင်း၍ သူက ယောကျ်ားလေး ဖြစ်နေ၍ပင်။ မဟုတ်ပဲ အမျိုးသမီးဆိုပါက အရမ်း ရှက်စရာကောင်းသည့် ကိစ္စဖြစ်နေလိမ့်မည်။

ကျင်းထျန်းယိက ထိုသို့ သရုပ်ဆောင်လာမည်ဟု ထင်မထားခဲ့၍ သူ့နားရွက်များ ပူထူလာရသည်။

ထိုသူ၏ ရိုးရှင်းသည့် စိတ်ထားကြောင့် မဟုတ်လျှင် ချူဟွိုက်က သူ့ကို နောက်ပိုင်း စကားပြောချင်စိတ်ပင် ရှိတော့မည် မဟုတ်။

အဖေယင်းက သူတို့ 'အလုပ်လုပ်' နေမှန်း သိသွား၍ စိတ်အေးသွားသလို သက်ပြင်းချလာသည်။

အဖေယင်းက ကုတင်အောက်တွင် လှဲနေလိုက်သည်။ တစ်ဖက်တွင်လည်း သူ၏စိတ်ကြွစေသည့် မီးခိုးငွေ့က အာနိသင်မပြလာ၍ မသေချာမရေရာဖြစ်လာသည်။ သူ့အထက်က လှုပ်ခါနေသည့် အသံများကို နားစွန့်နေရင်း သူ့ကို တွေ့သွားမှာလည်း ကြောက်နေသည်။

အခုက သူ့ဘက်တွင် သူတစ်ယောက်တည်းသာ ရှိလေသည်။ သို့သော်လည်း သူ့အထက်တွင် ကျိုးပဲ့လွယ်သည့် အမျိုးသမီးတစ်ယောက် ရှိနေသည်။ ထို့ပြင် ထိုအမျိုးသား၏ ခွန်အားကိုလည်း လျော့တွက်၍မရချေ။ သူက အသက်ကြီးပြီး အားအင်ကုန်ဆုံးနေပြီ ဖြစ်၍ ထိုအမျိုးသားနှင့် လုံးဝယှဥ်နိုင်မည်မဟုတ်ပေ။

သူတို့က စားပွဲပေါ်က ပျောက်ဆုံးနေသော ငွေထည်များကို တွေ့သွားဖို့ပဲ လိုသည်။ သို့မှသာ သူ့ရည်ရွယ်ချက်ကို သိသွားကြပေလိမ့်မည်။

ဘယ်လိုလုပ်ပြီး ဒါက ပိုကောင်းနိုင်မှာလဲ။ အသေးအဖွဲကိစ္စလေးဆိုလျှင် သူ့ကို ရိုက်ပဲရိုက်လာနိုင်သော်လည်း ထိုအမျိုးသား စိတ်ဆိုးပြီး သူ့ကို သတ်လာရင်ဖြင့်....။

(ပစ္စည်းခိုးတယ်လို့ပဲထင်စေချင်တာ သူ့ဇနီးကို မဖွယ်မရာလာလုပ်တယ်ဆိုရင် သတ်မှာစိုးလို့)

ဤလူအုပ်စုနှင့် ချောင်သခင်မကြီးက ကောင်းမွန်သော ဆက်ဆံရေးရှိ၍ သူတို့က မျိုးရိုးမြင့်မိသားစုမှ လာသည် ဆိုသည့်အချက်က သံသယဝင်စရာ မရှိပေ။ စကားပုံတစ်ခု ရှိသည်။ လူများက အခြားသူကို ငွေကြောင့် သတ်ကြလေသည်။ သို့သော်လည်း သူတို့က အေးအေးသက်သာသည့် ဘဝနှင့် ဘေးကင်းလုံခြုံစွာ တစ်ချိန်လုံး နေနိုင်မည်လား။

ဖြစ်နိုင်သည့် အရာများအားလုံးကို စဥ်းစားကြည့်ရင်း အဖေယင်း၏ မျက်နှာက ရက်စက်မှုအရိပ်အရောင်တို့ ပေါ်လာသည်။ သူ့ဘက်က အသာစီးရရန် အရင်ဆုံး ရိုက်သင့်သည်။

ချူဟွိုက်က ကျင်းထျန်းယိကို မျက်ရိပ်မျက်ခြေပြပြီး နောက်ဆက်လုပ်မည့်အရာကို မေးလိုက်သည်။ ကျင်းထျန်းယိ၏ နှုတ်ခမ်းပါးများက အနည်းငယ် လှုပ်ရှားသွားပြီး စကားဆိုမည့်အချိန် မျက်လုံးအကြည့်တို့ နက်မှောင်သွားလေသည်။

ချူဟွိုက်၏ ခါးအနီးရှိ ကုတင်အောက်ဘက်မှ ငွေရောင်အလင်းတန်းလေးတစ်ခု လျှပ်ခနဲ ပေါ်လာသည်။

ဓါးကြီး...။

ချူဟွိုက်က ယခုလေးတင် ဘာဖြစ်ပျက်သွားမှန်း မသိလိုက်ရချေ။

သေခြင်းတရားနှင့် လက်တစ်ကမ်း အကွာတွင် ကျင်းထျန်းယိက ဓါးကိုရှောင်ရန် သူ့ကိုဖမ်းဆွဲလိုက်သည်။

ချူဟွိုက်က ကျင်းထျန်းယိပေါ် လှဲနေရပြီး သူ့နားကို ချဥ်းကပ်လာသည့် ဓါးသွားကို ခေါင်းစောင်းကြည့်လိုက်သည်။ ထို့နောက် သူ့နှလုံးက ကြောက်ရွံ့မှုကြောင့် တဖြတ်ဖြတ် တုန်နေမှန်း သတိထားမိသွားသည်။

ကုတင်က သစ်သားနှင့် လုပ်ထားခြင်းဖြစ်သည်။ သစ်သားတစ်ပြားနှင့်တစ်ပြားကလည်း အကြီးကြီးဟနေသည်။ ကုတင်ပေါ်က လှုပ်ရှားမှုများလည်း ပြင်းထန်လာသည်။နှစ်ဦးသား နေရာပြောင်းပြီး အဖေယင်း၏ တိုက်ခိုက်မှုကို ရှောင်သလိုဖြစ်သွား၍ အဖေယင်းကလည်း သူတို့ကို ထိုး၍မရဖြစ်နေသည်။ သူက ဓါးကို သိမ်းသွားပြီး ကုတင်အောက်မှနေ၍ ပြန်ပြီး ထိုးရန်ပြင်လာသည်။

ကျင်းထျန်းယိက တိတ်တဆိတ် ပြုံးလိုက်မိသည်။

“ကိုယ့်ကိုတင်းတင်းဖက်ထား" သူက ချူဟွိုက်ကို တင်းတင်းပွေ့ထားလိုက်ရင်း လေသံတိုးဖွဖွ ပြောလာသည်။

ချူဟွိုက်က တစ်ဖက်လူ၏ လည်တိုင်ကို တင်းတင်းကျပ်ကျပ် ဖက်ထားလိုက်ရင်း ကျင်းထျန်းယိက ဓါးထိပ်ကို ရှောင်ရန် အိပ်ယာခင်းကို လိပ်လိုက်သည်။

ကုတင်က ခိုင်နေသောကြောင့် အဖေယင်းက ဓါးထိုးမည်ပြင်တိုင်း အပိတ်ခံနေရသည်။ ထို့ကြောင့် ကျင်းထျန်းယိက ချူဟွိုက်ကို ကိုင်ထားရင်း သူ၏ ထိုးနှက်ချက်များကို အလွယ်တကူရှောင်ရှားနိုင်ခြင်း ဖြစ်သည်။

အဖေယင်းက ဘယ်လောက်ပဲ မိုက်ရူးရဲဆန်နေပါစေ အခြေအနေကိုဖြင့် နားလည်သေးသည်။ ထို့ကြောင့် သူက ကုတင်အောက်မှ ခုန်ထွက်လိုက်ပြီး လှည့်ပြေးသွားသော်လည်း တံခါးနားရောက်ခါနီးအချိန်တွင် နောက်ကလိုက်လာသည့် ကျင်းထျန်းယိထံ မိသွားလေသည်။

ကျင်းထျန်းယိ၏ လက်က သန်မာလွန်း၍ အဖေယင်းက ဒေါသထွက်လာပြီး သေခြင်းတရားက နီးကပ်လာပြီဟု ထင်မိသည်။ သူက ကျင်းထျန်းယိ၏ လက်ကို ဆုပ်ကိုင်လိုက်ရင်း တောင်းပန်သံ ထွက်လာသည်

"သ...သခင်ကြီး။ ကျေးဇူးပြုပြီး ညှာတာပေးပါ။ ဘဝဆိုတာ အမြဲတမ်း ဒီလိုပါပဲ...."

အဖေယင်း၏ မျက်နှာအရောင်က ညိုမည်းသွားပြီး မျက်လုံးများကလည်း သောကရိပ်တို့ ပြည့်နေသည်။

“သတိထား...." ချူဟွိုက်၏ မျက်လုံးများ ပြူးကျယ်သွားရသည်။

အဖေယင်းက ဓါးမြောက်ပြီး သူ့ရှေ့ကလူကို ထိုးလိုက်ချင်သော်လည်း ကျင်းထျန်းယိက အရင်ဆုံး သတိထားမိသွား၍ သူ့လက်ထဲက ဓါးကို ကန်လိုက်သည်။

ချူဟွိုက်က 'ချလွမ်'ဆိုသည့် အသံနှင့် ဓါးအောက်ကျသွားမှသာ စိတ်အေးသွားဟန် သက်ပြင်းချလာသည်။

ကျင်းထျန်းယိ၏ မျက်လုံးထဲ လူသတ်ချင်သည့် အရိပ်ရောင်တို့ ဖြတ်ပြေးသွားသည်။

ယင်းက သူ၏ ပေါ့ဆမှု ဖြစ်သော်လည်း သူမထင်ထားခဲ့သည့်အရာက အဖေယင်းက ငွေနောက်လိုက်ပြီး လိင်ပိုင်းဆိုင်ရာ နှောင့်ယှက်ချင်ရုံမက လူသတ်ချင်သည့် စိတ်ပါ ရှိနေသည်။

ချူဟွိုက်ကလည်း ဤမတော်တဆကြောင့် ဒဏ်ရာရသွားလုနီးနီး ဖြစ်သွားရသည်။

“သူ့ကို မသတ်ပါနဲ့" ချူဟွိုက်၏ မျက်နှာက တင်းမာလာသည်။

ကျင်းထျန်းယိက ခေါင်းလှည့်ပြီး သူ၏ မဟူရာမျက်လုံး တောက်တောက်လေးများကို ကြည့်လာသည်။ အေးစက်ပြီး ချွန်ထက်သည့် ချူဟွိုက်က ပျောက်ကွယ်သွားပြီး ယုန်ပေါက်လေး ချူကျောင်းက အစားထိုးဝင်လာသည်။

ကျင်းထျန်းယိ၏ ဆုပ်ကိုင်ထားသည့် လက်က ပြေလျော့လာသည်။

အဖေယင်း၏ မျက်လုံးထက် မျှော်လင့်ချက်အရိပ်အရောင် သန်းလာပြီး ချူဟွိုက်ကို သနားညှာတာပေးရန် တောင်းဆိုလာသည်

" သခင်မလေး။ ပိုက်ဆံအတွက် လောဘတက်မိတာပါ။ သောက်ကျိုးနည်း...မဟုတ်ဘူး မဟုတ်ဘူး ငါသေလို့မရဘူး...အာ..."

“ကျေးဇူးပြုပြီး ငါ့ကို ကယ်ပါဦး။ ငါ တကယ် အဲ့လို ရည်ရွယ်တာ မဟုတ်ဘူး။ ထပ်မလုပ်တော့ပါဘူး"

“ငါ့မိသားစုက အရမ်း ဆင်းရဲတာ မင်းတို့လည်း မြင်တယ် မဟုတ်လား။ ငါ့သမီးက သေသွားပြီ။ ငါ့်မိန်းမနဲ့ ဘယ်လိုမျိုး အသက်ရှင်နိုင်မှာလဲ....တကယ် ရွေးစရာမရှိလို့ပါ" သူက ချူဟွိုက်၏ မျက်နှာက အနည်းငယ် လှုပ်ရှားသွားသည်ကို တွေ့လိုက်၍ သူ့ကိုယ်သူ သနားစရာကောင်းအောင် ပြောလာသည်။

“ငါ...ငါ ငွေထည်တွေ ပြန်ပေးပါ့မယ်။ ငါ့ကို လွှတ်ပေးပါ" အဖေယင်းက စိတ်မြန်လက်မြန်နှင့် ငွေထည်များကို ထုတ်ပေးလာသည်။ ငွေထယ်အားလုံးက ချက်ချင်းပင် မြေကြီးပေါ် လှိမ့်ကျသွားသည်။

“ရှင်...သူ့ကို မသတ်ပါနဲ့။ ဒီလိုဘဝမျိုးမှာ ရှင်သန်ရတာ လွယ်ကူမှာ မဟုတ်ဘူး။ ပြီးတော့ ကျွန်မတို့ကလည်း အခု အဆင်ပြေနေတာပဲလေ..."

ချူဟွိုက်က နောက်ဆုံး စကားဟလာပြီး ယုံကြည်ချက် ပျောက်ဆုံးနေသလို ကျင်းထျန်းယိ၏ မျက်လုံးထဲ တည့်တည့် မကြည့်ရဲဖြစ်နေသည်။

ကျင်းထျန်းယိက ပြန်လှည့်သွားပြီး တိတ်တဆိတ် ပြုံးကာ အဖေယင်းကို လွှတ်ပေးလိုက်သည်။

“သွားတော့”

"ကျေးဇူးပါ။ ငါ့ကို မသတ်တဲ့အတွက် ကျေးဇူးပါ" အဖေယင်းက ချက်ချင်း ပြေးထွက်သွားသည်။

ချူဟွိုက်က ကျင်းထျန်းယိ စိတ်ဆိုးသွားလိမ့်မည်ဟု တွေးမိသော်လည်း ကျင်းထျန်းယိက လှည့်လာပြီး သူ့ကို ပွေ့ဖက်လာသည်။

ချူဟွိုက်က တစ်ခဏမျှ တောင့်ခဲသွားရင်း တစ်ဖက်လူပေါ် ရှက်ကိုးရှက်ကန်း လက်တင်လိုက်ရင်း ဖြေးဖြေးချင်း ပြောလာသည် " ကျွန်မ တောင်းပန်ပါတယ်"

“သူ သေသင့်မှန်း သိပေမယ့် ကျွန်မ ကျွန်မက သူသေတာကို ကြည့်ဖို့ အားမရှိဘူး...ကျွန်မက အရမ်း အသုံးမကျသလို ဖြစ်သွားသလား"

ချူဟွိုက်က ဝမ်းနည်းပြီး သူ့ကိုယ်သူ အပြစ်တင်နေသည်။ သူ့အသံက နူးညံ့နေ၍ ယောကျ်ားတိုင်း၏ အာရုံကြောကို အလွယ်တကူ ထောင်မတ်သွားစေသည်။

“ရပါတယ်" ကျင်းထျန်းယိက ချူဟွိုက်၏ နက်မှောင်ချောမွေ့သော ဆံနွယ်များကို သပ်တင်ပေးလိုက်ရင်း သူ့လက်ထဲကလူ မမြင်နိုင်ချိန် မျက်နှာထက် အလိုလိုက်ချစ်ခင်သည့် အပြုံးတစ်ခု ပြလာသည်။

ချူဟွိုက်က အမှန်တကယ် နတ်ဆိုးတစ်ယောက် ဖြစ်ပြီး လိမ္မာပါးနပ်လွန်းသည်။

မည်သို့ဆိုစေ ထိုအရာကြောင့်လည်း ဤလူသားကို ချစ်ခင်ရခြင်း ဖြစ်သည်။

ကျင်းထျန်းယိက တံခါး သွားပိတ်လိုက်ပြီးနောက် နှစ်ယောက်သား အိပ်မောကျသွားလေသည်။

****

အာရုံတက်ချိန်မတိုင်သေးရာ ကောင်းကင်ကြီးက မှောင်မည်းနေသေးသည်။

ထိုအချိန်တွင် ဝမ်ရွှယ်၏ စူးစူးဝါးဝါးအော်သံက ညယံထက် ပျံ့လွင့်လာ၏။

ယင်းမိသားစုတစ်ခုလုံးက ယခုချိန်တွင် အမှောင်ထုထဲ ပိတ်ဆို့ခံထားရလေသည်။

Prev Next