Chapter 213

Volume 10 : အနုပညာဌာန

Chapter 213 (ပန်းချီထဲကပုံရိပ်ယောင် ၁၆)

ယွဲ့ရှင်းဝမ်၏ မှန်းဆချက်သည် လူတိုင်းအတွက် တွေးခေါ်မှုအသစ်တစ်ရပ်ကို ဖွင့်ပေးလိုက်သည်။ ဤကိစ္စသည် ကွဲသွားပါက ရိုလန်ဇနီးမောင်နှံကို သတ်သောလူသတ်သမားနှင့် လီယာကိုသတ်သောလူသတ်သမားတို့သည် လက်ရှိသံသယများကို ရှင်းပြနိုင်သည့် ရည်ရွယ်ချက်နှင့် လုံးဝကွဲပြားပါသည်။

ခယ်ရှောင်ပင်းက ပြောလိုက်သည်။ "ရှင်းဝမ်ဆိုလိုတာက ရိုလန်ဇနီးမောင်နှံကို သတ်တဲ့လူသတ်သမားက ဒေစီနဲ့အဲလစ်တို့ သမီးနှစ်ယောက်ထဲက တစ်ယောက်ကို ရွေးရမယ်၊ လီယာကို သတ်တဲ့လူသတ်သမားက ရုတ်စ်နဲ့ဂျက်တို့ကြားက တစ်ယောက်ကို ရွေးရမှာလား။"

ယွဲ့ရှင်းဝမ်က ခေါင်းငြိမ့်လိုက်သည်။ "ဒါက ငါ့ရဲ့မှန်းဆချက်ပါ။ နောက်ဆုံးအဖြေကို အတည်ပြုပြီး ဒီသင်တန်းကို အောင်ချင်ရင်တော့ မှန်းဆချက်အပေါ်မှာပဲ အားကိုးလို့မရဘူး။ ပိုပြီးခိုင်မာတဲ့ အထောက်အထားတွေ ရှာရမယ်။"

ကျိုဖုန်းက ဆိုသည်။ "လက်ရှိမှာ ပထမထပ်နဲ့ ဒုတိယထပ်က စိတ်ကူးယဉ်ပန်းချီတွေနဲ့ ဆီဆေးပန်းချီတွေအားလုံးကို ငါတို့ဖွင့်ထားပြီ။ တတိယထပ်မှာရှိတဲ့ ညီအစ်မနှစ်ယောက်ရဲ့ အိပ်ခန်းတွေအကြောင်း သဲလွန်စတွေကို စုဆောင်းထားပြီး စတုတ္ထထပ်က အခန်းတွေကို မရှာရသေးဘူး။"

ရွှီယိရှန်းက အပြုံးဖြင့် ပြောလိုက်သည်။ "‌ဒီဗီလာရဲ့ ပထမထပ်က ဧည့်ခန်းနဲ့ နာနီအခန်း၊ ဒုတိယထပ်က ပန်းချီဆွဲခန်းနဲ့ စာကြည့်ခန်း၊ တတိယထပ်က သမီးနှစ်ယောက်ရဲ့ အိပ်ခန်းဖြစ်ပြီး စတုတ္ထပ်က ရိုလန်ဇနီးမောင်နှံရဲ့ အိပ်ခန်းနဲ့ စာကြည့်ခန်းဖြစ်လိမ့်မယ်။ အရေးကြီးဆုံး သဲလွန်စတွေက စတုတ္ထထပ်မှာ ရှိသင့်တယ်လို့ ငါထင်တယ်။"

ခယ်ရှောင်ပင်းက ချက်ချင်းပြောလိုက်သည်။ "ဒါဆို စတုတ္ထထပ်ကို အမြန်သွားကြရအောင်။ ငါ ဒီပျက်စီးနေတဲ့ အိမ်ကြီးထဲမှာနေရတာ ကြာလှပြီ။ အပေါ်အောက်ထပ် နေရာအနှံ့ကိုပြေးပြီး ငါဗိုက်ဆာနေပြီ။"

ယွဲ့ရှင်းဝမ်သည် သူ့ဗိုက်ထဲကနေမြည်သံကို ကြားပြီး သူက ပြောလိုက်သည်။ "ငါလိမ္မော်သီး သွားဝယ်ဦးမယ်… မင်းဒီမှာနေပြီး လှည့်မကြည့်နဲ့…" ခယ်ရှောင်ပင်းသည် တုန်လှုပ်ချောက်ချား‌၍ မလှုပ်ရှားနိုင်ဘဲ ထိုနေရာတွင် ရပ်နေသည်။ ယွဲ့ရှင်းဝမ်သည် လိမ္မော်သီးကြီးတစ်လုံးကို ထုတ်ယူပြီး သူ့အား ပေးလိုက်သည်။ ခယ်ရှောင်ပင်းက အမှန်တကယ် လှုပ်ရှားနိုင်ခဲ့သည်။ သူက ချက်ချင်းပဲ လိမ္မော်သီးကို ယူလိုက်ပြီး တုံ့ဆိုင်းခြင်းမရှိဘဲ ပြောလိုက်သည်။ "ကျေးဇူးတင်ပါတယ် အဖေ။"

သူ့ပတ်ဝန်းကျင်က ကျောင်းသားတွေက သူ့ကို မှင်တက်စွာ ကြည့်နေကြသည်။ ခယ်ရှောင်ပင်းက ပြုံးပြီး လိမ္မော်သီးကိုစားလိုက်သည်။ "မင်းတို့စားချင်ရင် ရှင်းဝမ်ကိုရှာလိုက်ပါ။"

ယွဲ့ရှင်းဝမ်က ပြောလိုက်သည်။ "ရှောင်ခယ်ရဲ့ အစာချေဖျက်မှုလုပ်ဆောင်ချက်က အခြားသူတွေထက် နည်းနည်းပိုကောင်းတယ်၊ ဒါကြောင့် သူ့ကို ဗိုက်အရင်ဖြည့်ခိုင်းလိုက်ရအောင်။ အခြားသူတွေကတော့ သဲလွန်စရှာပြီး သင်တန်းကို ရှင်းလင်းပြီးနောက် စာကြည့်တိုက်ကို ပြန်ရောက်မှ စားကြတာပေါ့။"

အားလုံးမှာ ထင်မြင်ချက်မရှိပါဘူး။ သူတို့က ဒီဗီလာကို ရောက်တာ နာရီပိုင်းပဲရှိသေးတာမို့ သိပ်ဗိုက်မဆာဘူး။

ယွဲ့ရှင်းဝမ်နှင့် ကျန်းဖျင်စစ်တို့သည် ဘေးချင်းကပ်လျက် လမ်းလျှောက်လာရင်း အားလုံးက စတုတ္ထထပ်သို့ ရောက်လာကြပြီး ဧည့်ခန်းပါအိပ်ခန်းအဖြစ် ဒီဇိုင်းထုတ်ထားသည့် အလွန်ကြီးမားသော အိပ်ခန်းကို မြင်လိုက်ရပြီး အိပ်ခန်း၊ အဝတ်လဲခန်း၊ စာကြည့်ခန်းနှင့် ဆွဲဆောင်မှုရှိသော ကောင်းကင်ဥယျာဉ်ရှိသည်။

အိမ်ကြီးသည် အလွန်မှောင်နေပြီး ရှင်းယန်၏ အရက်မီးခွက်များဖြင့်သာ လင်းထိန်နေနိုင်သည်။ ရှင်းယန်သည် အားလုံးကို စုံစမ်းသိရှိနိုင်စေရန် တစ်အိမ်လုံးကို နွေးထွေးသော မီးလုံးများ လင်းထိန်စေရန် အရက်မီးခွက် အများအပြားကို ရိုးရိုးရှင်းရှင်း ဆင့်ခေါ်လိုက်သည်။

ယွဲ့ရှင်းဝမ်က ပြောလိုက်သည်။ "စာကြည့်ခန်းကို အရင်ရှာမယ်။ အားလုံး ငါ့အနောက်လိုက်ခဲ့ကြ၊ နောက်မကျန်စေနဲ့။"

စာကြည့်ခန်း၏ နံရံတစ်ဖက်တွင် စာအုပ်များပြည့်နေပြီး ကျန်တစ်ဖက်မှာ စားပွဲပေါ်တွင် အံဆွဲများစွာပါသော စားပွဲတစ်ခုဖြစ်သည်။

သော့ခတ်ထားသော အံဆွဲတစ်ခုရှိသော်လည်း ယခုအချိန်တွင် အံဆွဲသော့မရှိတော့ပါ။ ကျန်းဖျင်စစ်သည် အံဆွဲကိုဖွင့်ကြည့်လိုက်တော့ ငွေစက္ကူတချို့သာရှိနေတာကို တွေ့လိုက်ရသည်။ သူက မျက်မှောင်ကြုတ်ကာ ယွဲ့ရှင်းဝမ်ကို ကြည့်လိုက်သည်။ "ဒီအံဆွဲကို တစ်ယောက်ယောက် ထိထားလောက်တယ်။"

ယွဲ့ရှင်းဝမ်က ထိုင်ချကာ ဂရုတစိုက် စစ်ဆေးကြည့်ပြီး တူညီသောကောက်ချက်မျိုးချခဲ့သည်။ "သော့ကို အပြင်းအထန် တွန်းဖွင့်ပြီး အံဆွဲမှာ ခြစ်ရာတွေရှိတယ်။ အရေးကြီးတဲ့ စာရွက်စာတမ်းတွေ ခိုးယူခံရတာ ဖြစ်မယ်။"

နှစ်ယောက်သား တစ်ယောက်ကို တစ်ယောက်ကြည့်ကာ ကျန်းဖျင်စစ်က ပြောလိုက်သည်။ "ပိုင်ဆိုင်မှုခွဲဝေရေးဆိုင်ရာ စာရွက်စာတမ်းတွေလား။"

ယွဲ့ရှင်းဝမ်က ခေါင်းငြိမ့်သဘောတူပြီး အခြားအံဆွဲများကို ဆက်လက်ရှာဖွေခဲ့သည်။

အောက်ခြေအံဆွဲတွင် ဒေစီနှင့် အဲလစ်တို့၏ နို့စို့ကလေးအရွယ်မှ အိမ်ထောင်ပြုချိန်အထိ မိသားစုလေးယောက်၏ ဓာတ်ပုံများပါရှိသော ဓာတ်ပုံအယ်လ်ဘမ်တစ်ခုကို တွေ့ရှိခဲ့ပြီး ညီအစ်မများ၏ ကြီးထွားမှုကို မှတ်တမ်းတင်ကာ တချို့ဓာတ်ပုံများကိုလည်း ရက်စွဲဖြင့် မှတ်သားထားသည်။

ကျန်းဖျင်စစ်: "အယ်လ်ဘမ်မှာ အမှတ်အသားပြုထားတဲ့ နေ့ကစပြီး ဒေစီက ဒီဇင်ဘာ 12 ရက် 1990 ခုနှစ်မှာ မွေးဖွားခဲ့ပြီး အဲလစ်ကို နိုဝင်ဘာလ 15 ရက် 1992 ခုနှစ်မှာ မွေးဖွားခဲ့တယ်။ ညီအစ်မနှစ်ယောက်က နှစ်နှစ်လောက်ကွာတယ်။"

ခယ်ရှောင်ပင်း၏ မျက်လုံးများ တောက်ပလာသည်။ "လီယာရဲ့မွေးသက္ကရာဇ်ကို ငါတို့သိသရွေ့ သူမနဲ့ ဘယ်သူက အထောက်အထားလဲလှယ်ခဲ့ပြီး သမီးနေရာကို ဘယ်သူအစားထိုးခဲ့သလဲဆိုတာ ငါတို့ခန့်မှန်းနိုင်တယ်။ အဲဒီလူက လူသတ်သမား ဖြစ်နိုင်ခြေများတယ်။"

လီယာသည် နိုင်ငံရပ်ခြားမှာနေထိုင်ပြီး သူမကိုမွေးတုန်းက အခြားသူနှင့် လဲလှယ်ခဲ့တာကြောင့် မွေးစားခံခဲ့ရသည်။ ထို့ကြောင့် သူမနှင့် မွေးသက္ကရာဇ် ကိုက်ညီသူမှာ သူမနှင့် အထောက်အထားလဲလှယ်ထားသူဖြစ်ပြီး ပိုင်ဆိုင်မှုအမွေကြောင့် သူမ၏မိဘများကို သတ်ပစ်ရန် ဖြစ်နိုင်ခြေများသည်။

ဒါကိုတွေးပြီး အားလုံးက ရင်ခုန်နေကြသည်။

ကျိုဖုန်းက မေးလိုက်သည်။ "လီယာရဲ့ မွေးသက္ကရာဇ်နဲ့ ပတ်သက်တဲ့ သဲလွန်စတွေ ရှိသေးလား။"

လင်းမန့်လော်က ပြောလိုက်သည်။ "လီယာနဲ့ ရုတ်စ်တို့က အတန်းတူတူဖြစ်ပြီး အဲလစ်နဲ့ ဂျက်တို့နဲ့အတူ နွေရာသီစခန်းမှာ တက်ရောက်ခဲ့တာကို ငါမှတ်မိသေးတယ်။ နွေရာသီစခန်းသွင်းဖို့ဆိုတာ အသက်အရွယ်မရွေး ကျောင်းသားတွေအနေနဲ့ စာရင်းပေးသွင်းနိုင်တာကြောင့် မသေချာပေမဲ့ အတန်းအတူတူတက်မယ်ဆိုရင် သူတို့က အများအားဖြင့် သက်တူရွယ်တူပဲမလား။ သူမက ရုတ်စ်နဲ့ အသက်တူလောက်တယ်။"

ယွဲ့ရှင်းဝမ်သည် ကျန်းဖျင်စစ်ကိုကြည့်ပြီး သတိပေးလိုက်သည်။ "အခုလေးတင် ဒေစီက သူမခင်ပွန်းရဲ့ ဖောက်ပြန်မှုအထောက်အထားတွေကို စုံစမ်းဖို့ သီးသန့်‌စုံထောက်တစ်ဦးကို တောင်းဆိုခဲ့တယ်။ ချုပ်ဆိုထားတဲ့စာအုပ်မှာ သူမခင်ပွန်းရုတ်စ်နဲ့ ပတ်သက်တဲ့ အချက်အလက်တွေ ပါနေသလား။"

ကျန်းဖျင်စစ်သည် စာရွက်ကို ထုတ်ယူပြီး တစ်ချက်ကြည့်လိုက်ပြီး ပြောခဲ့သည်။ "1992 မှာ မွေးတယ်။"

ယွဲ့ရှင်းဝမ်က စာရွက်ကိုကြည့်ဖို့ ငုံ့လိုက်သည်။ "ဒါဆို လီယာက 1992 မှာ မွေးတာပေါ့၊ သူမက အဲလစ်နဲ့ အသက်တူတူပဲလို့ ဆိုလိုတာလား။"

ကျန်းဖျင်စစ်: "ဒီမိန်းကလေးနှစ်‌ယောက်က ဆေးရုံရဲ့ သားဖွားမီးယပ်ဌာနတစ်ခုတည်းမှာ မွေးဖွားခဲ့တာဖြစ်မယ်။ ကလေးနှစ်ယောက်က မှားသွားပြီး ရိုလန်ဇနီးမောင်နှံက သူတို့ရဲ့သမီးလေး အလဲခံလိုက်ရတာကိုမသိခဲ့လဲ အဲလစ်ကို သူတို့သမီးအဖြစ် အမြဲချစ်ခဲ့တယ်။"

ခယ်ရှောင်ပင်းက သိချင်စွာ မေးလိုက်သည်။ "ဒါဆို နောက်ကျတော့ သူတို့ ဘယ်လိုသိသွားတာလဲ။"

ထိုအချိန်တွင် လျှိုကျောက်ချင်းသည် သူ့ဘေးရှိ စာအုပ်ပုံးမှ ဖိုင်တွဲဖိုင်ကို ထုတ်ကာ ယွဲ့ရှင်းဝမ်အား ပေးအပ်လိုက်သည်။ "မစ္စတာရိုလန်က ဆေးရုံတွင် သွေးကင်ဆာရှိကြောင်း စစ်ဆေးတွေ့ရှိရပြီး ရိုးတွင်းခြင်ဆီ အစားထိုးကုသမှု လိုအပ်နေတယ်။ ဆေးရုံမှာ ဒီလိုအခြေအနေမျိုး တွေ့ကြုံတဲ့အခါ သူက အရင်ဆုံး မိသားစုဝင်ထဲမှာ ကိုက်ညီမဲ့ရိုးတွင်းခြင်ဆီကို ရှာလိမ့်မယ်၊ ကိုက်ညီမှုရှာတွေ့အခါ အဲလစ်က သူတို့သမီးအရင်းမဟုတ်ဘူးဆိုတာကို ရှာတွေ့သွားတာဖြစ်မယ်။"

ရွှီယိရှန်းက သူ့နဖူးကို ပုတ်ပြီး ပြောခဲ့သည်။ "လီယာက လင်မယားနှစ်ယောက်ကို တွေ့တဲ့နေ့မှာ သူမအမေဆီ စာတစ်စောင်ပို့ပြီး ဒိုင်ယာရီရေးဖို့ အိမ်ပြန်ခဲ့တယ်။ ဒိုင်ယာရီမှာပါတဲ့ ရက်စွဲက ဘယ်လနဲ့ ဘယ်နေ့လဲ၊ မှတ်မိတဲ့သူရှိသေးလား။"

အချက်အလက်ကို အလွန်သတိထားဆုံးသူ ကျန်းဖျင်စစ်က ချက်ချင်းပြောခဲ့သည်။ "ဇွန် 7 ရက် 2009"

လျှိုကျောက်ချင်းက ခွဲခြမ်းစိတ်ဖြာခဲ့သည်။ "ဒီအဘိုးကြီးက သွေးကင်ဆာကို စစ်ဆေးတွေ့ရှိတဲ့ အချိန်က မေလ 1 ရက်နေ့ပဲ။ ကိုက်ညီမှုပြုပြီးနောက် သူ့သမီးဟာ သူ့သမီးအရင်းမဟုတ်ကြောင်း တွေ့ရှိတဲ့အတွက် သူ့သမီးကို ရှာခဲ့ပြီး လီယာက ဘယ်မှာလဲဆိုတာကိုသဖို့ တစ်လလောက်အချိန်ယူခဲ့တယ်။ ဒီတွေးခေါ်မှုက မှန်တယ်။"

ထိုအချိန်တွင် လင်းမန့်လော်သည် စာအုပ်ပုံးထောင့်မှ နောက်ထပ်စာရွက်တစ်ခုကို ဆွဲထုတ်လိုက်ပြီး ပြောလိုက်သည်။ "ရိုလန်ဇနီးမောင်နှံနဲ့ လီယာရဲ့မွေးစားမိဘတွေ ကုမ္ပဏီက အမြဲပူးပေါင်းဆောင်ရွက်တဲ့ဆက်ဆံရေးရှိပြီး လီယာရဲ့မွေးစားမိဘတွေ ကောင်းကောင်းသိမှန်း သိသာတယ်။ သူတို့က သူတို့သမီးကို ရှာတွေ့ခဲ့ပြီး သူတို့သမီးက ဒီနှစ်တွေမှာ ကောင်းကောင်းမနေရကြောင်း သိလာရတော့ ဒီလင်မယားနှစ်ယောက်က သူတို့သမီးနဲ့ ပေါင်းပြီး ခရီးထွက်ရင်း မိသားစုကို သတ်လိုက်ပြီးတော့ သူတို့သမီးကို ပိုင်ဆိုင်မှုရဲ့ တစ်ဦးတည်းသော အမွေဆက်ခံသူဖြစ်အောင် လုပ်ပြီး လီယာကို သူတို့အနားမှာ ပွင့်ပွင့်လင်းလင်း မွေးစားလိုက်တာလား။"

ယွဲ့ရှင်းဝမ်က ထောက်ခံသည်။ "အဲဒီတုန်းက ပန်းချီကားထဲက ပုံရိပ်ယောင်မှာ လီယာက သူမမိဘအရင်းတွေနဲ့ တွေ့ဆုံတဲ့ ဗီဒီယိုဖိုင်ကို ပြသခဲ့ပြီး ဘာအသံမှ ထွက်မလာဘူး။ သူတို့ ဘာတွေ ဆွေးနွေးနေကြလဲ ငါတို့မသိဘူး။ အဲဒီနောက်မှာတော့ လီယာရဲ့ မွေးစားမိဘတွေနဲ့ သူမမောင်လေးက ကားမတော်တဆမှုတစ်ခုမှာ သေဆုံးသွားခဲ့တယ်။ ဒါက သေချာပေါက် တိုက်ဆိုင်မှုမဟုတ်ဘူး။ စီနီယာအစ်မမန့်လော်ရဲ့ ခွဲခြမ်းစိတ်ဖြာမှုက အရမ်းကျိုးကြောင်းဆီလျော်တယ်၊ ဒီလိုနည်းနဲ့ လီယာက အကြီးမားဆုံး အကျိုးခံစားခွင့်ရှိသူ ဖြစ်လာတယ်။"

ကျန်းဖျင်စစ်သည် မျက်မှောင်ကြုတ်ကာ ပြောခဲ့သည်။ "သူတို့ရဲ့မူလအစီအစဉ်က လီယာကို ဆိုးဆိုးရွားရွား ဆက်ဆံခဲ့တဲ့ မိသားစုကို အရင်သတ်ပစ်ပြီး လီယာကို အမွေဆက်ခံခွင့်ပေးမယ်၊ ပြီးရင် လီယာကို မိသားစုထဲကို ခေါ်သွားမယ်။ သမီးနှစ်ယောက်ဖြစ်တဲ့ ဒေစီနဲ့ အဲလစ်တို့ လက်ထပ်ပြီးတဲ့အခါ ‌နှစ်ပေါင်းများစွာ ပျောက်ဆုံးသွားတဲ့ သမီးလီယာကို သူတို့ရဲ့ရှိသသမျှ ချစ်ခြင်းမေတ္တာတွေပေးပြီး အမွေတွေကို လီယာကိုပဲ အမွေဆက်ခံခိုင်းဖို့ စိတ်ဆန္ဒရှိလိမ့်မယ်။"

ယွဲ့ရှင်းဝမ်က သက်ပြင်းတစ်ချက်ချလိုက်သည်။ "ဒီကိစ္စကို လူသိရှင်ကြားပြောဖို့က မလွယ်ဘူး၊ ဒါကြောင့် လီယာ အိမ်ကို ရောက်ပြီးတဲ့ နောက်မှာတော့ သူမက ပထမထပ်က နာနီအခန်းမှာ ခေတ္တနေထိုင်ခဲ့တယ်။ မမျှော်လင့်ဘဲ ဒီလျှို့ဝှက်ချက်ကို ရှာဖွေတွေ့ရှိခဲ့ပြီး လင်မယားနှစ်ယောက်က ကြေကွဲစရာကောင်းလောက်အောင် နှုတ်ပိတ်ခံလိုက်ရတယ်။"

အားလုံးက တစ်ယောက်ကို တစ်ယောက်ကြည့်လိုက်ကြပြီး ခယ်ရှောင်ပင်းက ကောက်ချက်ချခဲ့သည်။ "ရိုလန်ဇနီးမောင်နှံကို သတ်ခဲ့တာက အဲလစ်ပဲ။ ဒေစီကတော့ သူတို့ရဲ့သမီးအရင်းမလား။ ရိုလန်ဇနီးမောင်နှံက ပိုင်ဆိုင်မှုအမွေကို ခွဲဝေပေးတဲ့အခါ ဒေစီအတွက်တော့ ပါမှာပေါ့။ ဒါပေမဲ့ အဲလစ်က သူတို့သမီးအရင်းမဟုတ်တာကြောင့် ပိုင်ဆိုင်မှုအမွေ မခွဲပေးဘူး။ သူမက အဲဒါကို သိရှိသွားတဲ့အခါ ပိုင်ဆိုင်မှုအမွေကို ခိုးယူပြီး သူမကို အနှစ်သုံးဆယ်နီးပါး ပြုစုပျိုးထောင်ခဲ့တဲ့ ရိုလန်ဇနီးမောင်နှံကို သတ်ပစ်ခဲ့တယ်။"

လျှိုကျောက်ချင်းက ထပ်ပေါင်းဆိုသည်။ "အဘိုးကြီးမှာ သွေးကင်ဆာရှိလို့ သူ့ခန္ဓာကိုယ်က အရမ်းအားနည်းနေပြီး အဘွားကြီးက ကျောကုန်းကုန်းနဲ့ လမ်းသိပ်မလျှောက်နိုင်ဘူး။ အဲလစ်လို အမျိုးသမီးငယ်က သူတို့လင်မယားနှစ်ယောက်ကို လွယ်လွယ်နဲ့ လည်ပင်းညှစ်သတ်နိုင်တယ်။ သူတို့သေသွားပြီးနောက် အခြားသူတွေရှာမတွေ့အောင် တံခါးရှေ့က ဥယျာဉ်ထဲမှာ ရိုလန်ဇနီးမောင်နှံကို သူမမြုပ်ခဲ့တယ်။"

ရိုလန်ဇနီးမောင်နှံ သေဆုံးသောအမှုကို ရှင်းရှင်းလင်းလင်း သိသွားပြီ။

နှစ်ပေါင်းများစွာကြာသော မိသားစုဓာတ်ပုံများနှင့် ပန်းချီကားများမှ ဇာတ်ကွက်များကို အကဲဖြတ်ကြည့်ရာ သူတို့ဇနီးမောင်နှံသည် သူတို့၏သမီးနှစ်ဦးအတွက် မျှတသည်။ ဒေစီနှင့် အဲလစ်က သူတို့၏သမီးအရင်းများဖြစ်သည်ဟု တွေးထားလောက်သည်။ အစ်မဖြစ်သူ ဒေစီကို 1990 ခုနစ်မှာ မွေးဖွားခဲ့ပြီး ညီမဖြစ်သူ အဲလစ်သည် 1992 ခုနှစ်တွင် မွေးဖွားခဲ့ပြီး လီယာကိုလည်း 1992 ခုနှစ်တွင် မွေးဖွားခဲ့သည်။ အကြီးမားဆုံးဖြစ်နိုင်ခြေမှာ ညီမဖြစ်သူနှင့် လီယာတို့သည် ကလေးလဲလှယ်ခံရခြင်းပင်ဖြစ်သည်။ လီယာနှင့် ပိုင်ဆိုင်မှုအမွေကိစ္စ အငြင်းပွားနိုင်သူမှာလည်း ညီမဖြစ်ပြီး သူမ၏မိဘအရင်းမဟုတ်သော မိဘများကို သတ်ပစ်ရန် ရည်ရွယ်ချက်ရှိသည်။

လီယာကို ဘယ်သူသတ်တာလဲ။

ယွဲ့ရှင်းဝမ်သည် သူ့စိတ်ထဲက သဲလွန်စတွေကို ကျိုးကြောင်းဆီလျော်စွာ သုံးသပ်ပြီး ပြောလိုက်သည်။ "အလောင်းသုံးလောင်းရဲ့ သေဆုံးချိန်ကို ငါတို့မဆုံးဖြတ်နိုင်ပေမဲ့ ဥယျာဉ်ထဲက နှင်းဆီနက်တွေကို ကြည့်ပြီး လီယာက နောက်ပိုင်းမှ သေသွားတယ်ဆိုတာကို ငါပိုအလေးသာတယ်။ အဲလစ်က ရိုလန်ဇနီးမောင်နှံကို သတ်လိုက်ပြီး ဥယျာဉ်ထဲမှာ မြုပ်ထားတဲ့အခါ ဥယျာဉ်ထဲမှာ နေကြာပန်းတွေ ရှိလောက်သေးတယ်မလား။"

ကျန်းဖျင်စစ်ကလည်း ဤသုံးသပ်ချက်ကို သဘောတူသည်။ "လူသတ်သမားကို လီယာကို မြုပ်ပြီး နှင်းဆီနက်အမြောက်အမြား စိုက်ခဲ့မယ်ဆိုရင် မိသားစုထဲမှာ သံသယနဲ့ သတိထားစရာတွေ ဖြစ်လာမှာ သေချာတယ်။ ဒီအိမ်ကြီးမှာ တစ်ခုခုဖြစ်သွားတာကြောင့် ဗလာကျင်းပြီး မပစ်ထားဘူးဆိုရင်ပေါ့။ သူက နှင်းဆီနက်နဲ့ ပန်းပင်ကို ပြန်ပြောင်းစိုက်လိုက်ရင် ဘယ်သူမှ သတိထားမိမှာမဟုတ်တော့ဘူး။

နှစ်ယောက်သား တစ်ယောက်ကို တစ်ယောက် ကြည့်လိုက်ပြီး ယွဲ့ရှင်းဝမ်က ပြောလိုက်သည်။ "လီယာ သေဆုံးတဲ့ ပထမဆုံးနေရာက ဒီအိမ်ကြီးမှာ မဟုတ်ဘူး။ လူသတ်သမားက သူမကို သတ်ပြီး အခြားနေရာမှာ မြုပ်နှံဖို့ အလောင်းကို ဗီလာဆီ သယ်သွားတာလား။"

ခယ်ရှောင်ပင်းက ဆိုလာသည်။ "ရလဒ်အနေနဲ့ လူသတ်သမားက တူးလိုက်ပြီး မြေအောက်မှာ မြုပ်ထားတဲ့ အလောင်းနှစ်လောင်းကို တွေ့ခဲ့တာလား။"

လူတိုင်း: "…"

ထိုအချိန်က လူသတ်သမား၏အမူအရာမှာ အံ့သြဖွယ်ကောင်းလှသည်။

လျှိုကျောက်ချင်းက ရယ်ရမလား ငိုရမလား မသိတော့ပေ။ "ရုတ်စ်နဲ့ ဂျက်၊ နှစ်ယောက်ထဲကတစ်ယောက်ပဲ၊ လူသတ်သမားက ဘယ်သူဖြစ်မယ်လို့ထင်ကြလဲ။"

လူတိုင်း အသံတိုးတိုးလေးဖြင့် ဆွေးနွေးနေကြစဉ် ကျန်းဖျင်စစ်က ရုတ်တရက် ပြောလိုက်သည်။ "အဲဒါရုတ်စ်ပဲ။"

ယွဲ့ရှင်းဝမ်က သူ့ကို သံသယနဲ့ ကြည့်ပြီး ပြောသည်။"ကလေးမွေးနေ့မြင်ကွင်းမှာ ရုတ်စ်နဲ့ လီယာတို့က မီးဖိုချောင်တံခါးမှာ တွေ့ကြတုန်းက တစ်ယောက်နဲ့တစ်ယောက် မသိခဲ့ကြဘူး။ သူတို့မှာ ဆက်ဆံရေးရှိပုံမပေါ်ဘူးလို့ ငါတို့လည်း ဆွေးနွေးခဲ့ကြတာပဲ။"

ခယ်ရှောင်ပင်းကလည်း စကားဝိုင်းတွင် ပါဝင်လာသည်။ "ဟုတ်တယ်၊ ရုတ်စ်က အပြင်မှာ အငယ်အနှောင်းတစ်ယောက် ရှိထားတာမဟုတ်ဘူးလား။ သူက မျက်နှာချင်းဆိုင်ပြီး ဖော်ထုတ်ခံရပြီးနောက် ပွင့်ပွင့်လင်းလင်း ဝန်ခံခဲ့တာပဲ၊ သူက လီယာကို ရုတ်တရက် ဘယ်လိုလုပ်သတ်မှာလဲ။"

ကျန်းဖျင်စစ်က ပြောလိုက်သည်။ "ဒီဓာတ်ပုံတွေကို ကြည့်လိုက်ပါ။"

သူသည် လျှို့ဝှက်စုံထောက် စုံစမ်းမှုတစ်ခုမှ ရိုက်ကူးထားသော ရုတ်စ်နှင့် သူ့အပျော်မယားတို့၏ တရင်းတနှီး ပြုမူနေကြပုံကို ထုတ်ခဲ့သည်။ ထိုအမျိုးသမီးတွင် ကြည်လင်လှပသော အပြာရောင်မျက်လုံးတစ်စုံရှိသည်။ သူမသည် လီယာမဟုတ်သော်လည်း သူမ၏ မျက်နှာနှင့် စိတ်နေသဘောထားသည် လီယာနှင့် ခုနစ်မှတ်နီးပါးဆင်တူသည်။

ရွှီဖေးရွှယ်က ချက်ချင်း ပြောခဲ့သည်။ "စကားမစပ် "မြွေပါနှင့်အတူအမျိုးသမီး" ပန်းချီကားမှာ ဇာတ်ကောင်အဖြစ် လီယာကို သွယ်ဝိုက်ရည်ညွှန်းထားတာဆိုပြီး ငါတို့ အစက သတ်မှတ်ခဲ့တယ်၊ ပန်းချီကားထဲက မူလဇာတ်ကောင်ဟာ သူမကိုယ်တိုင် မီလန်မြို့စားရဲ့ အငယ်အနှောင်းပဲ။ ပန်းချီကားထဲက အမျိုးသမီးဟာ မြွေပါကိုကိုင်ထားပြီး လီယာက ကြောင်ကို ကိုင်ထားတယ်၊ လီယာဟာ အငယ်အနှောင်းမဟုတ်ပေမဲ့ အငယ်အနှောင်းတစ်ယောက်လိုပဲလို့ အရိပ်အမြွတ်ပေးထားတာမလား။"

ယွဲ့ရှင်းဝမ်က၏မျက်လုံးများ တောက်ပလာသည်။ "ဟုတ်တယ်။ ရုတ်စ်က သူ့အငယ်အနှောင်းဖြစ်ဖို့ အစားထိုးရှာခဲ့တာလား။"

ကျန်းဖျင်စစ်: "ဒါက ကြောက်စရာကောင်းတဲ့စရိုက်တစ်ခုပဲ။ သူက လီယာကို ငယ်ငယ်လေးကတည်းက သဘောကျခဲ့ပေမဲ့ သူမကို မရနိုင်ခဲ့တဲ့အတွက် သူ့အငယ်အနှောင်းလီယာနဲ့ဆင်တူတဲ့ အမျိုးသမီးတစ်ဦးကို တွေ့ရှိခဲ့တယ်။ ဒါပေမဲ့ အငယ်အနှောင်းက လီယာနဲ့မတူလို့ သူ့ကိုယ်သူ ပိုတွေးလေလေ တစ်ဖက်လူကို ပိုင်ဆိုင်လိုစိတ် ပြင်းထန်လေလေဖြစ်ပြီး အချိန်ပိုကြာလာတော့ သူ့စိတ်ကပျက်စီးလာတယ်။ ဂျက်က သူ့အစ်ကိုနဲ့မတူဘူး၊ သူ့လို လူရှုပ်လူပွေက လီယာကို အလွယ်တကူ လိုက်နိုင်ပြီး လွယ်လွယ်ရတဲ့မိန်းမတစ်ယောက်ကို သူချစ်မြတ်နိုးမှာမဟုတ်ဘူး။"

ယွဲ့ရှင်းဝမ်သည် ပြဿနာကို ဖြေရှင်းရန် စိတ်ကူးကို ဖွင့်ဟပြီး ဆက်လက် ခွဲခြမ်းစိတ်ဖြာခဲ့သည်။ " "နောက်ဆုံးညစာစားပွဲ" ပန်းချီကားနဲ့ သက်ဆိုင်တဲ့ မင်္ဂလာညစာစားပွဲမှာ ရုတ်စ်က မူရင်းပန်းချီကားရဲ့ ဂျီးဆက်နေရာမှာ ထိုင်နေတာကို ငါမှတ်မိသေးတယ်။ မူရင်းပန်းချီကားက သစ္စာဖောက်ဂျူးဒက်ရဲ့ နေရာမှာ လီယာထိုင်နေတယ်။ အဲဒီအချိန်တုန်းက တိုက်ဆိုင်တာဟုတ်၊မဟုတ်ကို ငါတို့တွေးခဲ့ကြတယ်။ အခုတော့ ရုတ်စ်က လီယာဟာ သူ့ခံစားချက်တွေကို သစ္စာဖောက်ခဲ့တယ်လို့ တွေးခဲ့ပုံရတယ်။"

အစားထိုးခြင်း၊ အပျော်မယား၊ သစ္စာဖောက်ခြင်း…

ပန်းချီကားမှာပါသော အဓိကစကားလုံးတွေက အားလုံးမှန်ပါသည်။

ရုတ်စ်သည် လီယာကို နှစ်အတော်ကြာ တစ်ဖက်သတ်ချစ်ကြိုက်ခဲ့ပြီး လီယာကို သူ၏ပိုင်ဆိုင်မှုအဖြစ် သတ်မှတ်ခဲ့သော်လည်း ရလဒ်အနေဖြင့် လီယာက သူ့ကို သစ္စာဖောက်ခဲ့ခြင်း ဖြစ်သည်။ ထို့ကြောင့် သူသည်းမခံနိုင်တော့ဘဲ လီယာကိုသတ်ပစ်ကာ တစ်ဖက်လူကို မြေ၌မြုပ်နှံပြီး "မင်းက ငါ့အပိုင်" သင်္ကေတဖြစ်သော နှင်းဆီနက်တွေကို ဥယျာဉ်ထဲမှာ စိုက်ထားခဲ့သည်။

နှင်းဆီနက်များသည် လရောင်တွင် ပွင့်ခဲ့သော်လည်း လီယာ၏ ဝိညာဉ်သည် အနားယူရန် နေရာမရှိပေ။

ဤအိမ်ကြီးရှိ ပန်းချီကားအများအပြားသည် အမှန်တရားအားလုံးကို ပြန်လည်ရယူရန် အမှန်တကယ်ပင် ညအချိန်၌ ပုံရိပ်ယောင်များဖြစ်လာခဲ့သည်။

#TK