Chapter 232 🦊Arc 14 - ဖျော်ဖြေရေးလောကကို တန်ပြန်တိုက်ခိုက်ခြင်း

Chapter 232

🦊Arc 14 - ဖျော်ဖြေရေးလောကကို တန်ပြန်တိုက်ခိုက်ခြင်း

Chapter 232

4.19

အမှန်အတိုင်းပြောရပါမူ နှစ်ယောက်သား၏ဆက်ဆံရေးက အဆင်ပြေခဲ့သည်။ နှစ်ယောက်ကြားမှ အဖြစ်အပျက်အများအပြားကို ရွှယ်လင်မမှတ်မိတော့သော်လည်း မကြာခဏဆိုသလို နှစ်ယောက်ကမည်မျှရင်းနှီးကြကြောင်း သူတို့၏အပြုအမူများကဖော်ပြနေတတ်သည်။ အချိန်များကြာလာသည့်အခါ ရွှယ်လင်မှာ စူးရွှမ်းယန်ကဲ့သို့ နူးညံ့သည့် လူတစ်ယောက်ဖြစ်လာသလို ခံစားလာရပြီး အခြားသူများကိုကတိပေးခြင်းနှင့် ကိုယ်ချင်းစာတတ်ခြင်းတို့ကို တတ်ကျွမ်းလာခဲ့သည်။ ထို့ကြောင့် စူးရွှမ့်ယန်နှင့် အတူရှိနေရခြင်းက ပြဿနာမဟုတ်ပေ။

စူးလျို့နျန် အထင်လွဲသွားသည်အထိ စူးရွှမ့်ယန် ဘာလုပ်ခဲ့မှန်းမသိပေ။ စူးလျို့နျန်က အစ်ကိုဖြစ်သူမှ သူ့အားတစ်ခုခုလုပ်လိမ့်မည်ဟု အဘယ်ကြောင့်ထင်နေရပါသနည်း။

"ကောင်းတယ်..." စူးလျို့နျန်သည် ပွင့်လင်းမြင်သာစွာဖြင့် ပြောစေချင်ပုံရပြီး ရွှယ်လင်အနားကိုမှီလာကာဆိုသည်။ 

"ငါ့ရဲ့အစ်ကိုကြီးက ဆက်ဆံရတကယ်ခက်တယ်..ငါနဲ့အစ်ကိုနှစ်ဆိုရင် သူ့ကြောင့်အမြဲခေါင်းကိုက်ရတယ်...ဒါပေမဲ့ မင်းပေါ်မလာခင်အထိ အေးတိအေးစက်ဖြစ်နေတုန်းပဲ...ငါတကယ်ဝမ်းသာတယ်.."

ရွှယ်လင်: "....." ဟေး...မင်းမသိတဲ့လူတစ်ယောက်ကို မင်းမိသားစုရဲ့အတွင်းရေးတွေ လျှောက်မပြောနဲ့။ ရွှယ်လင်အနေဖြင့် သူနှင့် ၎င်း၏အစ်ကိုနှစ်တို့အကြောင်းကို လုံးဝမသိချင်နေပေ! စူးရွှမ့်ယန်ပင် သူ့အားယခင်ကပြောခဲ့ဖူးသည်! သူအနည်းနှင့်အများခန့်မှန်းမိလျှင်ပင် ယခုလိုပြောဆိုနေစရာမလို!။

"ဒါပေမဲ့...ငါကတော့ သူ့ကိုလက်ခံပေးဖို့ မင်းကိုအတင်းမတောင်းဆိုပါဘူး..သူ့ရဲ့အပေါ်ယံရုပ်ချောတာကြောင့်နဲ့ မင်းအသည်းနှလုံးကိုအပိုင်စီးသွားမယ့် လူဆိုတာသေချာတယ်!"

ရွှယ်လင် လှည့်ကြည့်ပြီး အစ်ကိုဖြစ်သူကိုရောင်းစားရန်ကြိုးစားနေသည့် ရုပ်ရှင်ဧကရာဇ်ငယ်လေးကို အာရုံစိုက်ရန်ပျင်းရိသွားလေသည်။ "ဖြစ်နိုင်တာကတော့...အဲဒီနေ့ကသိပ်မလိုတော့ပါဘူး..."

စူးလျို့နျန်သည်ကား သူပြောသည့်စကားကိုနားမလည်၊ သူ့ကိုလည်းထပ်မပြောခိုင်းပေ။ စကားဆက်ပြောရန် ရည်ရွယ်ထားပုံမရဘဲ နာနိုကွန်ပျူတာကိုဖွင့်ကာ သူ့အစ်ကိုဖြစ်သူထံ အမြော်အမြင်ရှိစွာဖြင့် သတင်းပို့ခဲ့သည်၊ ရွှယ်လင်က အနှီသူနှင့်ပတ်သတ်သည့် မည့်သည့်အရာကိုမှ စိတ်ဝင်စားပုံမပြပေ။ 

နှစ်ယောက်သား အတူခရီးနှင်ခဲ့ကြပြီး အပြန်အလှန်နားလည်မှု တိုးလာခဲ့သည်။ ရွှယ်လင်သည် စူးလျို့နျန်သည်လည်း နွေဦးလေပြည်လေးနှယ် ပြုံးတတ်ကြောင်း သိထားသော်လည်း တကယ်တမ်းတွင် အနှီသူသည် ဝမ်းတွင်းမည်းလေးပင်။ ရုပ်ရှင်ဧကရာဇ်ဖြစ်နေသည်မှလွဲပြီး လေလှိုင်းပေါ်တွင်နာမည်မကြီးသေးသည့်တိုင် ဆက်ဆံရသည်မှာအဆင်ပြေနေသေး၏၊ သို့သော်လည်း ထိုသူသည် ပုံမှန်ထက်စိတ်အပြောင်းအလဲပိုမြန်တတ်ပြီး အကြောင်းအရာတစ်ခုတည်းအပေါ်တွင် အာရုံမစိုက်ထားတန်ချေ။

သူတို့သည် စူးရွှမ့်ယန်အကြောင်း ဆက်မဆွေးနွေးတော့ဘဲ လေယာဥ်မဆင်းသက်ခင်အထိ အကြောင်းအရာအမျိုးမျိုးကို ပြောဖြစ်ခဲ့ပြသည်။ အပြန်အလှန် အက်ရှင်ခန်းများနှင့်ပတ်သတ်ပြီး အချိန်သီးသန့်ဖယ်ကာဆွေးနွေးရန်ပင်စီစဥ်ခဲ့ကြသေး၏။

စူးလျို့နျန်သည်ကား အတော်လေး အတွေ့အကြုံရင့်သော ရုပ်ရှင်မင်းသားတစ်လက်ပင်။ သူ၏ဇာတ်ကောင်အပေါ် နားလည်ထားမှုက သရုပ်ဆောင်တစ်ယောက်အနေနှင့်ရော စာရေးဆရာတစ်ယောက်အနေနှင့်ပါ ရှုထောင့်နှစ်ခုလုံးမှပါဝင်ပြီး ရွှယ်လင်ကမူ စာဖတ်သူနှင့်ပရိသတ်တစ်ယောက်နေရာမှ ဝင်ဆွေးနွေးဖြစ်သည်။ သူတို့ဆွေးနွေးမှုအပြီး ဇာတ်လိုက်များ၏ စရိုက်သဘာဝများက ပိုမိုပြည့်စုံလာကာ ပူးပေါင်းရိုက်ကူးရမည့်အခန်းများကလည်း ပိုအဆင်ပြေလာခဲ့သည်။

နှစ်ဦးစလုံးက သရုပ်ဆောင်ဖြစ်ရန်မွေးဖွားလာကြသည်ထင်၏။ ရိုက်ကူးရမည့်အခန်းများကို ကောင်းကောင်းကိုင်တွယ်နိုင်ကြပြီး သူတို့၏လုပ်နိုင်စွမ်းကိုလည်း အပြန်အလှန်ဖိအားမပေးခဲ့ကြ။ နှစ်ဦးနှစ်ဖက်အပေးအယူမျှတပြီး လက်ထောက်ဒါရိုက်တာက စူးလျို့နျန်နှင့်သရုပ်ဆောင်ရချိန်တွင် အဆင်မပြေဖြစ်မည်ကိုစိုးရိမ်ခဲ့သော်လည်း နောက်ပိုင်းတွင်မူ အခြားသရုပ်ဆောင်များက သူတို့ နှစ်ယောက်လုံးအနောက်သို့ မလိုက်နိုင်မည်ကိုပင် စိုးရိမ်လာခဲ့ကြသည်။

သရုပ်ဆောင်နှစ်ယောက်၏ အံ့ချီးဖွယ်ရာ သရုပ်ဆောင်ချက်များကြောင့် ဖန်းယွဲ့ကျီက စိတ်အခြေအနေကောင်းနေ၏။ အရံသရုပ်ဆောင်များ ပိုကြိုးစားရန်လိုအပ်နေပြီး အကြိမ်ရေမနည်း ပြန်ရိုက်နေရသည့်တိုင် ထိုသူကစိတ်ရှည်နေခဲ့သည်။ သူ၏ပုံမှန်အတိုင်း အလောတကြီးလုပ်တတ်သည့် အကျင့်ထက် နှစ်ယောက်သားပူးပေါင်းလုပ်ကိုင်ခြင်းက ဖန်းယွဲ့ကျီကို စိတ်အေးလက်အေးဖြစ်နေစေခဲ့သည်။

စူးလျို့နျန်လည်းအတူရှိနေ၍ ရွှယ်လင်သည်ဒါရိုက်တာဖန်းနှင့် ပိုရင်းနှီးလာခဲ့သည်။ ဖန်းယွဲ့ကျီ၏စရိုက်က အတော်လေး ဂွကျသော်ငြား သူတစ်လုံးမှမပြောရဲချေ။ ထိုသူသည် စူးလျို့နျန်ကိုပင် ပရောပရည်လုပ်တတ်ပြီး ပြန်ပက်ခြင်းနှင့် အဆုံးသတ်လိုက်လျှင်ပင် ထိုသူကစိတ်ဆိုးမည်မဟုတ်။ သို့ထိတိုင် သူအလုပ်စလုပ်သည်နှင့် စိတ်အနေအထားက ပြောင်းလဲသွားတော့သည်။

ဖန်းယွဲ့ကျီက သူ့ဘဝကို ရုပ်ရှင်ရိုက်ရာတွင်မြှုပ်နှံထားကြောင်း ယခင်က စူးလျို့နျန်ပြောခဲ့ဖူးပြီး ရွှယ်လင်ဘက်မှလည်း လက်ခံခဲ့သည်။

ဒါရိုက်တာဖန်းသည် ကြားထားသည့်သတင်းအတိုင်းပင်။

ယခုသူတို့ ရင်းနှီးသွားကြပြီဖြစ်သောကြောင့် ရွှယ်လင်သည် ထောက်ခံမှုရလာခဲ့၏။ ရုပ်ရှင်ရိုက်ကူးနေစဥ်ကာလအတွင်း ဒါရိုက်တာဖန်းက သူနှင့်သင့်တော်မည့်ဇာတ်ကားများကို ရွှယ်လင်ထံအကြံပေးတတ်၍ ရွှယ်လင်ပင်အံ့အားသင့်သွားခဲ့ရသေးသည်။"ဒါရိုက်တာက ငါ့သူငယ်ချင်းလေ...သူကဒီလောကထဲရောက်တာမကြာသေးဘဲ ရုပ်ရှင်အများကြီးမရိုက်ရသေးလို့သာပေါ့...မင်းတကယ်စမ်းကြည့်သင့်တယ်...ငါသူ့ရုပ်ရှင်ရဲ့ဇာတ်ညွှန်းတွေဖတ်ကြည့်ဖူးတယ်..သူ့စွမ်းရည်အရ ထိုက်တန်တဲ့ဆုတော့ရသင့်တယ်..."

ရွှယ်လင်သည် ဖန်းယွဲ့ကျီကမ်းပေးလာသည့် မှတ်စုအသေးလေးကိုစုပြီး အွန်လိုင်းပေါ်တွင်ရှာကြည့်လိုက်သည်။

ဖန်းယွဲ့ကျီက သူ့အား ကျူးရော့ချင်ဟူသော ဒါရိုက်တာနှင့် မိတ်ဆက်ပေးထားခြင်းပင်။ သူကအခုလက်ရှိတွင် အနုပညာလောက၌ နာမည်မကြီးသေးဘဲ ရုပ်ရှင်အနည်းငယ်သာရိုက်ကူးထားရသေးသည်။ အများဆုံးရိုက်ထားသည်က MV နှစ်ခုသာ။ ရွှယ်လင်ကကြည့်လိုက်ပြီး ဒါရိုက်တာ၏အိုင်ဒီယာနှင့်ရိုက်ချက်က အင်မတန်ကောင်းမှန်း ပြောနိုင်သည်။ သို့တစေ MV များဖြစ်နေ၍ တည်းဖြတ်ထားရာတွင် စုတ်ပြတ်နေပြီး ဒါရိုက်တာ၏ဉာဏ်ကောင်းမှုများအားလုံး မြေကြီးထဲမြုပ်သွားတော့သည်။

ဖန်းယွဲ့ကျီသည် ဇာတ်ညွှန်းကိုဒါရိုက်တာကိုယ်တိုင်ရေးသားကြောင်းပြောခဲ့ပြီး လတ်တလောတွင် ရန်ပုံငွေရှာရန်အတွက်သာဖြစ်နေ၏။ ရွှယ်လင်က ဇာတ်လိုက်နေရာနှင့်အလွန်အမင်းသင့်လျော်သောကြောင့် ဖန်းယွဲ့ကျီက သူ့ကိုထိုနေရာအတွက် အကြံပေးထောက်ခံခဲ့ခြင်းဖြစ်သည်။ စူးလျို့နျန်က သူတို့ပြောနေသည်ကို နားစွန်နားဖျားကြားသွားပြီး ရွှယ်လင်ကြည့်နေသည်ကို လာကြည့်ခဲ့သည်။

"ရှောင်လင်က စမ်းကြည့်ချင်လို့လား...ဖန်းယွဲ့ကျီက မင်းဆုရနိုင်တယ်လို့ပြောတယ်..တကယ်သာဆိုရင်တော့ မင်းကြိုးစားကြည့်သင့်တယ်...ငါလူလွှတ်ပြီး ဇာတ်ညွှန်းကို ကော်ပီယူခိုင်းလိုက်မယ်...ကောင်းတယ်ဆိုရင် အရင်းအနှီးထည့်လိုက်မယ်..."

ရွှယ်လင်ကခေါင်းယမ်းပြသည်၊ သူ့ကိုယ်သူသေချာမပြောပြတတ်တော့၍ ခေါင်းညိတ်ပြလိုက်ရ၏။ "မလိုတော့ပါဘူး...ကျွန်တော် ဒါရိုက်တာကျူးကိုဆက်သွယ်ကြည့်မယ်..တကယ်ကောင်းရင်တော့ ရွှမ့်ယန်ကိုပါ ရင်းနှီးကြည့်ဖို့ပြောလိုက်မယ်..."

စူးလျို့နျန်သည် ထိုသူက သူ့အစ်ကိုဖြစ်သူကိုရှာချင်နေကြောင်း သတိပြုမိပြီး စိတ်အေးသွားလေ၏။ ယင်းက သူ့မိသားစုကိစ္စတွင်ပါနေပြီး ငွေအတွက်ဖြစ်နေလျှင်ပင် ဂရုမစိုက်ပေ။

တစ်လခွဲအကြာတွင် ပြည်ပထွက်ရိုက်ကူးခြင်းက ပြီးစီးသွားပြီး ဆက်လက်ရိုက်ကူးရန် ဟွားပြည်ကိုပြန်လာခဲ့သည်။ ရွှယ်လင်တွင် အားလပ်ရက်နှစ်ရက်ရှိနေပြီး ပထမဆုံး ကျူးရော့ချင်ကိုဆက်သွယ်ခဲ့သည်။ တွေ့မည့်အချိန်ကိုစီစဥ်ပြီးသည့်နောက်မှ စူးရွှမ့်ယန်ထံသွားခဲ့သည်။

ရွှယ်လင်သည် ဖန်းယွဲ့ကျီ၏အမြင်အပေါ် ယုံကြည်ထားလေ၏၊ ရုပ်ရှင်အတွက် သူ၏စိတ်အားထက်သန်မှုက သိသာထင်ရှားနေသည်။ ရွှယ်လင်အတွက် ဇာတ်ကောင်နေရာကိုအကြံပေးခဲ့လေရာ အင်မတန်ကောင်းသည့် ဇာတ်ညွှန်းတစ်ပုဒ်ဖြစ်နေနိုင်သည်။

ကျူးရော့ချင်မှာ လွန်ခဲ့သောတစ်နှစ်က ဘွဲ့ရခဲ့ပြီး အနုပညာအသိုင်းအဝိုင်းတွင် ခြောက်လခန့် လက်ထောက်ဒါရိုက်တာအဖြစ် လုပ်ကိုင်ခဲ့သည်။ ထို့နောက် ဖန်းယွဲ့ကျီနှင့်ဆုံခဲ့ရ၏။ ဖန်းယွဲ့ကျီက သူ့အားအတော်လေးသဘောကျပြီး ရွှယ်လင်မှသူ့အား သွားတွေ့ရန်စီစဥ်နေကြောင်း သိလိုက်သည့်အခါ ကျူးရော့ချင်လက်ထဲမှ မူရင်းဇာတ်လမ်းအကြောင်းကို ရွှယ်လင်ထံပြောပြလာခဲ့သည်။

ယင်းသည် သာမန်ထက်ထူးခြားသည့် ဘဝတွင်နေထိုင်သော ရှေးခေတ်စာပေပညာရှင်တစ်ယောက်အကြောင်းကို ရေးဖွဲ့ထားသည့် အတ္ထုပတ္တိ ဇာတ်လမ်းတစ်ပုဒ်ပင် ဖြစ်သည်။ အနှီ၏ဘဝအတွေ့အကြုံက ပြဇာတ်ဆန်သည်၊ ဘဝ၏ပထမတစ်ဝက်သည် စာပေပညာတွင် ထူးချွန်ပြောင်မြောက်မည့်လမ်းကြောင်းကို ရွေးချယ်သော စာသင်သားတစ်ယောက်ဖြစ်လာပြီး စီးပွားရေးလောကအတွင်းသို့ ဝင်ရောက်ခဲ့သည်။ ဘဝ၏ဒုတိယတစ်ဝက်တွင် တိုင်းပြည်ပျက်စီးပြီး သူ၏ကလောင်တံကိုချကာ စစ်မြေပြင်တွင်တိုက်ခိုက်ခဲ့ရ၏။ ဧကရာဇ်အသစ်ကို နန်းတင်ရာတွင် အထောက်အပံ့ပြုပေးကာ တိုင်းပြည်အသစ်ထူထောင်ရာတွင် အကူအညီပေးခဲ့သည်။ သို့သော်လည်း ဧကရာဇ်အသစ်ထီးနန်းရလာသည့်အခါ သူရေးသားထားခဲ့သော ကဗျာစာပေများကို မျိုးဆက်များထံလက်ဆင့်ကမ်းပေးခဲ့ပြီး သဲလွန်စမကျန်အောင် ပျောက်ကွယ်သွားခဲ့သည်။ သမိုင်းစာအုပ်ထဲတွင် သူနှင့်ပတ်သတ်သောအချက်အလက်များမရှိတော့ဘဲ မသေမျိုးအဖြစ် ကောင်းကင်ဘုံတွင် စံမြန်းနေပြီဟူသော မဟုတ်မမှန်သတင်းများပင် ထွက်ပေါ်လာခဲ့သေး၏။

ထိုသူသည် ဟွားတိုင်းပြည်တွင် အမည်ကျော်ကြားသော ပုဂ္ဂိုလ်တစ်ယောက်ဖြစ်ပြီး မည်သူကမှသူ့အား မထိရဲကြပေ။ လူအများက သူ့အကြောင်းကို ရှာဖွေရေးသားကြသော်လည်း သူ့ဘဝနှင့်ပတ်သတ်၍ မည်သူကမှ ရုပ်ရှင်ကိုမဖန်တီးရဲကြ။ ယင်းကြောင့် ကျူးရော့ချင်းထံတွင် ဇာတ်ညွှန်းကောင်းတစ်ပုဒ်ရှိနေသော်လည်း ရင်းနှီးမြှုပ်နှံသူကို ရှာဖွေရခက်ခဲနေခဲ့ရခြင်းပင်။

ဤပုဂ္ဂိုလ်အကြောင်း ရုပ်ရှင်ရိုက်ကူးခြင်းက အပြစ်တင်ဝေဖန်မှုတို့ကို ဆွဲခေါ်နေခြင်းနှင့်တူသည်။ တစ်ယောက်က ဂရုမစိုက်လျှင်ပင် အဆူအဆဲခံရမည်မှာ သေချာပြီး အလုပ်တစ်ခုလုံး ဖျက်ဆီးခံရတော့မည့်အစလည်းဖြစ်သည်။

ဖန်းယွဲ့ကျီသည် လူပုဂ္ဂိုလ်တစ်ယောက်၏ ဘဝအကြောင်းရိုက်ကူးရာတွင် ပြင်ပမှဇာတ်ကြောင်းများထောက်ကူရန် လိုအပ်နိုင်ကြောင်း အရိပ်အမြွက်ပေးပြောခဲ့ဖူးကာ ရင်းနှီးမြှုပ်နှံသူများကလည်း မလှုပ်ရဲကြပေ။

စူးရွှမ့်ယန်က ရွှယ်လင်အနေဖြင့် ဇာတ်ညွှန်းဖတ်ပေးရန် တောင်းဆိုလာရသည့်အကြောင်းအရင်းကို နားမလည်နိုင်သည့်တိုင် ရွှယ်လင်ကသူ့ကို အကူအညီတောင်းခဲသောကြောင့် ငြင်းဆိုရန်အကြောင်းမရှိပါချေ။ နှစ်ယောက်လုံးက ကျူးရော့ချင်ပေးထားခဲ့သောလိပ်စာအတိုင်း အိမ်သို့ရောက်လာကြသည်။

ကျူးရော့ချင်အိမ်က မိသားစုအတွက်သီးသန့်စီစဥ်ထားခြင်းမျိုးပင်။ သူ၏ခွင့်ပြုချက်မရဘဲ ဂိတ်မှအစောင့်များက ဝင်ခွင့်ပေးမည်မဟုတ်။ ဗီလာတစ်လုံးစီကို မိသားစုတစ်စုက ပိုင်ဆိုင်ပြီး ကျူးရော့ချင်အိမ်က ရေကန်ဘေးတွင်ရှိနေသည်။ ပတ်ဝန်းကျင်ကောင်းပြီး သူတို့ရောက်လာသည့်သတင်းရသည်နှင့် အပြင်ထွက်ပြီး ရွှယ်လင်အလာကို ရပ်စောင့်နေခဲ့သည်။ သူသည် အိမ်နေရင်းဝတ်စုံကိုသာ ဝတ်ထားပြီး သူ၏အပြုအမူများက အောင်မြင်နေသောလူတစ်ယောက်ဖြစ်ကြောင်း ဖော်ပြနေသည်။ ဖန်းယွဲ့ကျီ ယခင်ကပြောခဲ့ဖူးသလို အောင်မြင်မှုမရသေးသည့် လက်ထောက်ဒါရိုက်တာပုံစံနှင့် ကွာခြားသွားလေ၏။

သုံးယောက်သည် အပြန်အလှန်နှုတ်ဆက်ကြပြီး အိမ်ထဲဝင်ခဲ့ကြသည်။ ကျူးရော့ချင်သည် လက်ဖက်ရည်နှပ်ထားပြီးဖြစ်၍ အပြုံးဖျော့ဖျော့ဖြင့်ဆိုပါ၏။ 

"ဒါရိုက်တာဖန်းက ကျွန်တော် ဒီသရုပ်ဆောင်နေရာအတွက် လူရှာနေတာကိုသိတယ်လေ.. ဒါကြောင့်ပဲ သူကဒီရုပ်ရှင်အတွက် ခင်ဗျားကိုအကြံပေးခဲ့တာ..ခင်ဗျားမလာခင် ခင်ဗျားအရင်ကရိုက်ထားတာတွေရော ဒါရိုက်တာဖန်းကြည့်ဖို့အကြံပေးထားတာတွေရောကို ကြည့်ပြီးပါပြီ..ကျွန်တော် ခင်ဗျားရဲ့သရုပ်ဆောင်စွမ်းရည်ကိုသဘောကျတယ်.. ဒါပေမဲ့ ဒီလိုနေရာမှာသရုပ်ဆောင်ဖို့က သရုပ်ဆောင်တော်ရုံနဲ့တင်မရဘူး..."

ရွှယ်လင်က ခေါင်းညိတ်ပြီးနားလည်ကြောင်းပြလိုက်သည်။ သူ၏လက်ရှိအနေအထားက မည်သူပင်ကြည့်ပါစေ၊ အရည်အချင်းနည်းနေသေးပုံပေါ်ပြီး ကျူးရော့ချင်၏ကိုယ်ပိုင်သတ်မှတ်စံနှုန်းအထိ မရောက်နိုင်ပေ၊ သူ၏ဇာတ်ကောင်နေရာများအတွက် သူကိုယ်တိုင်လူရှာရလိမ့်မည်။ တစ်ယောက်ယောက်က အရင်းအနှီးထုတ်ပေးလျှင် သူကပရိုဂျုဆာဖြစ်လာပြီး ဇာတ်ညွှန်းအတွက် မင်းသားများက သူ့ထံလာဆက်သွယ်ကာ လူတွေ့စစ်ဆေးရာတွင် တာဝန်ယူရန်သာလိုအပ်၏။

"ကျွန်တော်ဒီနေ့ ဒီကိုလာတာ အစစ်ဆေးခံဖို့တင်မဟုတ်ပါဘူး..ကျွန်တော် လူတစ်ယောက်ခေါ်လာတယ်...ဒါရိုက်တာဖန်းပြောသလို ဇာတ်ညွှန်းကောင်းတယ်ဆိုရင် ဆုလည်းရနိုင်ပြီး ခင်ဗျားကိုယ်တိုင်လည်း အရင်းအနှီးထုတ်စရာမလိုတော့ဘူးပေါ့.."

ATM စက်ကြီး စူးရွှမ့်ယန်ကား ဘေးတွင်သာရပ်နေပြီး ဝင်မပြောချေ။ ရွှယ်လင်က သူ့ကိုဤနေရာအထိဆွဲခေါ်လာပြီး သူတို့စကားပြောနေသည်ကို ရပ်နားထောင်ပေးရန်သက်သက်ရောက်လာသလိုပင်။ 

ကျူးရော့ချင်မှာ ရွှယ်လင်ကိုကြည့်လိုက်ပြီး ၎င်းက အင်မတန်စိတ်နှစ်ထားနေကြောင်း သိလိုက်သည်။ ဖန်းယွဲ့ကျီက အနှီသူတစ်ယောက်တည်းကိုသာ အကြံပေးထားသည်ကိုတွေးကြည့်ပြီး ကော်ပီကူးထားသည့်ဇာတ်ညွှန်းစာရွက်ကို ရွှယ်လင်ထံပေးလိုက်သည်။