Chapter 228 🦊Arc 14 - ဖျော်ဖြေရေးလောကကို တန်ပြန်တိုက်ခိုက်ခြင်း

Chapter 228

🦊Arc 14 - ဖျော်ဖြေရေးလောကကို တန်ပြန်တိုက်ခိုက်ခြင်း

Chapter 228

4.15

ရွှယ်လင်တွင် ကိုယ်ပိုင်အတွေးအခေါ်ရှိသည်။ သူစာချုပ်တွင် လက်မှတ်ထိုးခဲ့စဥ်တည်းက လွတ်လပ်ခွင့်ရပြီးဖြစ်ကာ သူစိတ်အပန်းဖြေချင်လျှင်ပင် ရှန်းယွဲ့ကတားနိုင်မည်မဟုတ်။ သူသည် ရသစုံရှိုးပွဲများထံ သွားရန်စိတ်လည်းမဝင်စားဘဲ ပျင်းရိနေကာ စူးရွှမ့်ယန်ကလည်း သူ့အားအနောက်မှပံ့ပိုးပေးနေ၍ သူ့အတွက် ရုပ်ရှင်အနည်းငယ်ရိုက်ရုံပင်။

ရှန်းယွဲ့က သူနာမည်ကြီးလာစေရန် မည်သည့်ကြေညာချက်မှ မထုတ်ခဲ့လင့်ကစား အင်တာနက်တွင် ကောလဟလများထွက်လာသည့်အခါ ရှန်းယွဲ့သည်လူရှာပြီး ရွှယ်လင်၏လက်ရှိအနေအထားကို ကုမ္ပဏီတွင်အထူးပုံရိပ်အဖြစ်ဖြန့်ခိုင်းလိုက်၏။

ပို့စ်ကအင်မတန်အသုံးဝင်ခဲ့သည်။ ပရိသတ်အများစုက နောက်ကွယ်ကအခြေအနေကိုနားလည်သွားကြပုံရပြီး အိုင်ဒေါများ၏ပန်းတိုင်က သာမန်အိုင်ဒေါများနှင့် စတားများလောက် မရိုးရှင်းဟုနားလည်သွားကြသည်။ 

ဈေးက တစ်ခါတစ်ရံတွင် အင်မတန်ရှင်းလင်းနေတတ်ပြီး 'ကြယ်ပွင့်' နှင့် 'ရုပ်ရှင်မင်းသား' များမှာလည်းမတူညီပေ။

ပရိသတ်များက ပို့စ်အောက်ရှိ မှတ်ချက်ရေးသည့်နေရာတွင် သူတို့၏ထင်မြင်ချက်တို့ကိုထုတ်ပြလာကြ၏။ 

[သုန် သုန် သုန်: ပို့စ်ဖတ်လိုက်မှ ငါတို့ရဲ့နတ်ဘုရားနဲ့ ရုပ်ရှင်ဧကရာဇ်တို့က ကုမ္ပဏီတစ်ခုတည်းကဆိုတာသိရတော့တယ်! မအံ့ဩတော့ပါဘူး..ဒီကုမ္ပဏီကအမြဲတမ်း လွတ်လပ်ခွင့်ပေးနေတာ..ရုပ်ရှင်ဧကရာဇ်လေးအတွက်ဆိုရင် သူတက်ရတဲ့ပွဲလောက်က နည်းနည်းလေးပဲရှိမှာ]

[အမည်းရောင်ဆံပင်: ရုပ်ရှင်ဧကရာဇ်ကတော့ အခွင့်ထူးခံပဲပေါ့ _ သူ့ရဲ့ကိုယ်ပိုင်အလုပ်တွေကို တစ်ဆင့်ပြီးတစ်ဆင့်လုပ်သွားရုံပဲ...အိုး! ပြီးတော့ သူ့ရဲ့နောက်ခံကရော..နောက်ဆုံးထွက်လာတုန်းက မီဒီယာကသတင်းသမားတွေ အတော်လေးပိန်းတယ်လို့ ငါပြောချင်နေခဲ့တာ..အခုတော့ နတ်ဘုရားရွှယ်က ရုပ်ရှင်ဧကရာဇ်ရဲ့ဂျူနီယာလေးဖြစ်နေပြီ...သူကနောက်ထပ်ရုပ်ရှင်ဧကရာဇ်ဖြစ်လာနိုင်လောက်လား...]

[လေပြည်၊ ပန်းပွင့်၊ နှင်းစက်နဲ့လမင်း: အရင်ပိုစတာမှာတော့ မပြောထားပါဘူး...ရုပ်ရှင်ဧကရာဇ်လေးမှာ ပရိသတ်တွေအများကြီးရှိတာ...ပြီးတော့ မြေခွေးလေးကလည်း အခုချက်ချင်းကြီး အတန်းရှင်းရသွားရတာကို ခံနိုင်ဦးမှာမဟုတ်ဘူး]

[ဒီဘာချယ်ရီရဲ့သီချင်းလေး: ~ မြေခွေးလေးအတွက် လူသိနည်းတာပိုကောင်းနိုင်တယ်..ပြီးတော့ ရုပ်ရှင်ရိုက်တဲ့နေရာမှာ အာရုံစိုက်ထားလိုက်တော့ ငါတို့လည်းပိုကြည့်ရတာပေါ့~]

အဆိုပါပို့စ်ကိုတင်လိုက်ပြီးမကြာမီ စူးလျို့နျန်ကလည်း <ကောင်းကင်ဘုံသို့အမေး> က စတင်ရိုက်ကူးတော့မည့်အကြောင်း ပို့စ်တင်လာလေသည်။ ပို့စ်တွင် ရွှယ်လင်၏အမည်ကိုလည်းထည့်ရေးထားပြီး သူတို့၏ပူးပေါင်းမှုက အဆင်ပြေရန်မျှော်လင့်ကြောင်းလည်း ရေးသားထားပေသည်။

ထို့ကြောင့် လူတိုင်းသည် ရွှယ်လင်က <ကောင်းကင်ဘုံသို့အမေး> အတွက် ပြင်ဆင်နေရ၍ မည်သည့်အလုပ်ကိုမှ လက်မခံခဲ့ခြင်းဖြစ်မည်ဟု ယူဆထားခဲ့ကြသည်။ လူအများက နတ်ဘုရားနှစ်ပါး၏ ပူးပေါင်းမှုကို မျှော်လင့်နေကြလေ၏။ မျှော်လင့်နေသူများလည်းရှိသလို မကောင်းပြောရန်အတွက် အလုပ်များနေသူများလည်း ရှိသည်။ ရွှယ်လင်ကသူတို့ကို ဘယ်သောအခါမှအရေးမလုပ်ခဲ့သည့်အပြင် အခြားလူများ၏ ထင်မြင်ချက်ကိုလည်း ထည့်မတွေးဘဲသူလုပ်ချင်သည့်အရာကိုသာ လုပ်ခဲ့သည်။

ဤကာလအတွင်း အသံဒရမ်မာက ထုတ်လွှင့်မှုမှာနှစ်ခုထက်ပိုခဲ့သည်၊ ၎င်းက နောက်တစ်ကြိမ်အမည်ကျော်ကြားမှုကို ယူဆောင်လာခဲ့ပြန်၏။ ရွှယ်လင်က လူရှေ့ထွက်ပြလိုက်လျှင်လုံလောက်ပြီဟုသာ ယူဆထားလေသည်။

<ကောင်းကင်ဘုံသို့အမေး> သည် ဟွားပြည်တစ်ခုလုံးအနှံ့တွင်ရိုက်ကူးခဲ့ရ၏။ ဒါရိုက်တာဖန်က အချို့အခန်းများကို အစစ်အမှန်နေရာဖြင့်ရိုက်ကူးချင်ပြီး ရိုက်ကူးရေးအဖွဲ့သည်လည်း နေရာများကိုရွေးချယ်ထားခဲ့သည်။ ရိုက်ကူးနေစဥ်အတွင်း ၎င်းတို့မှာ တိုင်းပြည်၏အတွင်းအပြင်ကို နှံ့စပ်နေအောင်သွားလာခဲ့ရသည်။ ရွှယ်လင်က ပစ္စည်းအများအပြားကိုသယ်မလာဘဲ ရောက်သည့်နေရာတွင်လိုအပ်မည့်အရာများကို ဝယ်လိုက်ရန်စီစဥ်ထားလေ၏။

စူးရွှမ့်ယန်သည်လည်း သူနှင့်အတူ တစ်လကြာအောင်နေထိုင်ခဲ့ပြီး နှစ်ယောက်သားကြားမှဆက်ဆံရေးက ပေါင်းသင်းလာသည်မှာ ကြာမြင့်ခဲ့ပြီဖြစ်သော ဇနီးမောင်နှံများကဲ့သို့ အဆင့်အထိပင် ရောက်လာခဲ့လေသည်။ နှစ်ယောက်လုံးက အပေါ်ယံတွင် ဘာမှမပြောခဲ့ကြသော်လည်း ရွှယ်လင်က စနစ်မှ သူတို့အားပေးထားသော 'ချစ်သူ' ဟူသောသတ်မှတ်ချက်ကို လက်ခံထားပြီးသားပင်။ အပြင်တွင် စူးရွှမ့်ယန်ကို မနှစ်သက်သလိုလုပ်နေပြီး ပြောလိုက်သည့်စကားတိုင်းက စူးရွှမ့်ယန်ကိုအိမ်ပြန်ရန် မသိမသာပြောနေတတ်သည်။

စူးရွှမ့်ယန်တွင် ပြန်ရောက်သည်နှင့် ဖြေရှင်းရမည့်ကိစ္စများ ရှိနေပုံရသည်၊ ရွှယ်လင် တစ်ကမ္ဘာလုံးအနှံ့ ရုပ်ရှင်ရိုက်နေရသည့်အနောက်သို့ လိုက်နေခြင်းက အဆင်မပြေနိုင်ပေ။ ရွှယ်လင်သည်လည်း စူးရွှမ့်ယန်နှင့်တစ်ခန်းတည်းအတူအိပ်လျှင် အနှီသူတည်ရှိနေမှုက အားပြင်းလွန်းသောကြောင့် တစ်ခန်းတည်းအတူမျှမသုံးချင်ပေ၊

 ရွှယ်လင်သည်ကား အမြဲထိုညကို အိပ်မက်မက်နေတတ်သည်။ အိပ်မက်၏အကြောင်းအရာများက သူ၏အတိတ်မှ မှတ်ဉာဏ်များဖြစ်ပြီး ၎င်းတို့ကိုမြင်ရသည့်အခါတိုင်း ရွှယ်လင်ကိုစိတ်ဖိစီးစေခဲ့သည်၊ သို့ထိတိုင် နိုးလာလျှင်လည်း တစ်ခုမှမမှတ်မိတော့ချေ။ မကြာသေးခင်ကအထိ မကောင်းသည့်အငွေ့အသက်များက သူ၏အိပ်စက်မှုကို နှောင့်ယှက်နေခဲ့၏။

သူတကယ်စိတ်တိုလာသည့်အချိန်တွင် စူးရွှမ့်ယန်ကို တစ်ခါတစ်ရံရိုက်နှက်တတ်သည် တဖက်လူမှတ်မိနေသည်က မည်သည့်အရာဖြစ်မှန်းမသိသော်လည်း သူ့အားကြည့်လာသည့်မျက်ဝန်းတိုင်းက နူးညံ့ညင်သာနေတတ်၏။ ရံဖန်ရံခါတွင် နူးညံ့လွန်း၍ ရွှယ်လင်ပင်မငြင်းပယ်နိုင်ဘဲ အကြိမ်ရေအနည်းငယ်ခန့် သူခေါင်းထဲတွင်စွဲနေကာ နေ့အချိန်တွင်ပင် သူ့အားအလုပ်ပျက်စေသည်။

နေ့ဘက်အိပ်စက်ချိန်တွင်မူ သူအိပ်မက်မက်ခြင်းမရှိပေ၊ တစ်နေ့လည်ခင်းလုံး အလွယ်တကူ အိပ်ပျော်သွားနိုင်သည်။ ရွှယ်လင်သည် ဤသို့သောနေထိုင်မှုပုံစံက အင်မတန်ဇိမ်ကျသည်ဟု သဘောပေါက်သွားခဲ့ရ၏။

ထို့ကြောင့် အဝတ်အစားအိတ်ကိုဆွဲပြီး အလုပ်ပြီးသည်နှင့် ပြန်ရောက်လာခဲ့၏။

<ကောင်းကင်ဘုံသို့အမေး> မှာ ကျင့်ကြံရေးလောကရုပ်ရှင်မျိုးဖြစ်လင့်ကစား ထောင်နှင့်ချီသောကမ္ဘာငယ်လေးတွင် ကိုယ်ပိုင်ကွဲပြားချက်များအသီးသီးရှိသည်။ ရိုက်ကူးရေးအဖွဲ့က အဖွဲ့ငယ်လေးများအဖြစ် အသီးသီးခွဲကာ နေရာအစုံတွင် တစ်နေရာစီရိုက်ကူးကြသည်။ ၎င်းတို့မှာ ဖန်ချင်းယွဲ့နှင့်ကျူးရိဖန်တို့ကို အချင်းချင်းမတွေ့ခင် ကာကွယ်ပေးရန်လည်းလိုအပ်နေသေးသည်။

ဒါရိုက်တာဖန်မှာ တစ်ယောက်တည်းဖြစ်နေပြီး အလုပ်အများဆုံးလည်းဖြစ်သည်။ ရိုက်ကွင်းပေါ်တွင် ဟိုပြေးသည်ပြေးနှင့် တစ်ခါမှနားသည်ဟူ၍မရှိဘဲ တစ်ဖက်တွင်ပစ္စည်းများကိုနေရာချနေစဥ် ကျန်တစ်ဖက်၌ ရိုက်ကူးနေစဥ်အချိန်တွင် ကြီးကြပ်ပေးရသေး၏။

အစက ရွှယ်လင်မှာ ဖန်ယွဲ့ကျီက ဤမျှထွားကြိုင်းနေပြီး ရိုက်ကွင်းပေါ်ရောက်တည်းက အစားကျုူးနေရသည့်အကြောင်းအရင်းကို သိချင်ခဲ့သည်၊ နောက်ပိုင်းမှ ဖန်ယွဲ့ကျီ၏အလုပ်ပိုလုပ်ခြင်းကြောင့် သူ၏ကယ်လိုရီများလောင်ကျွမ်းသွားခြင်းဖြစ်ကြောင်း သဘောပေါက်လိုက်၏။ အစတွင် အနှီသူကဝလွန်းနေ၍ မျက်နှာကဖောင်းကားနေခဲ့သော်ငြား သူ့ကိုယ်သူပေးသည့်ဖိအားကြောင့် မျက်နှာမှာ ဖရဲသီးအစေ့မျှအထိပိန်ကျသွားရလေသည်။

ဖန်ယွဲ့ကျီသည် အလုပ်လုပ်ရာတွင်စည်းကမ်းကြီး၏။ ရွှယ်လင်၏သာလွန်နေသော သရုပ်ဆောင်စွမ်းရည်ကိုပင် အခါခါပြန်ရိုက်ခိုင်းနေတတ်သည်။

သို့ထိတိုင် ဒါရိုက်တာဖန်က အော်ဟစ်ဆဲဆိုပြီး ကိစ္စကိုကြီးထွားလာအောင် မလုပ်တတ်ပေ။ အနှီသူသည် တတ်နိုင်သမျှမြန်မြန် အကုန်လုံးကို အပြီးသတ်ချင်ရုံသာ။ ရွှယ်လင်က ထင်သလောက်အလုပ်မဖြစ်သည့်တိုင် သူ၏ Weibo အကောင့်တွင် နေ့စဥ်ဖြတ်သန်းမှုကို အမြဲ update တင်ပေးလေ့ရှိသည်။ မတိုင်ခင်က တည်းက သူ၏ချောင်ကျနေသော မျက်နှာလေးမှာ အမြန်ဆုံးနည်းဖြင့် မျက်တွင်းဟောက်ပက်ဖြစ်သွားရချေ၏။

 ရွှယ်လင်က ပါးစပ်မှတိုက်ရိုက်ထုတ်မပြောသော်လည်း စူးလျို့နျန်ကို Weibo ပေါ်မှ နှုတ်ဆက်လိုက်ပါသေးသည်၊ စူးလျို့နျန်ကသူ့အား ဒါရိုက်တာဖန်နှင့်အလုပ်တွဲမလုပ်ခင် အစားပိုစားသွားရန်ပြောရသည့်အကြောင်းအရင်းကို နောက်ဆုံး၌နားလည်သွားပြီဖြစ်ကြောင်း ပြောလိုက်သေးသည်။

စူးလျို့နျန်ကရယ်မောကာ သူ၏ Weibo တွင် မှတ်ချက်ရေးသွားခဲ့၏: 'ဟုတ်တယ်နော်? ဖန်ယွဲ့ကျီက အလုပ်နဲ့ပတ်သတ်လာရင် သူ့ဘဝနဲ့ရင်းထားတာလို့ ငါအရင်ကပြောခဲ့ပါတယ်' 

နှစ်ယောက်လုံးက အတူဒုက္ခခံနေရသောညီအစ်ကိုများနှယ် စကားပြောဖြစ်ကြပြီး မိသားစုကြီးတစ်ခုတည်းမှ ပေါက်ဖွားလာကြသလိုပင်။ ပရိသတ်များက သူတို့နှစ်ယောက်လုံးတွင် တကယ်ကိုကောင်းမွန်သည့်ဆက်ဆံရေးရှိသည်ဟု ပြောနေကြလေ၏။

ရွှယ်လင်သည် စူးလျို့နျန်ကို တိုင်တော၍ရသည့် သူငယ်ချင်းကောင်းတစ်ယောက်အဖြစ် သဘောထားလေ၏၊ သို့ထိတိုင် စူးလျို့နျန်နှင့်ပတ်သတ်လာလျှင် အနည်းငယ်ထူးဆန်းနေဆဲ။ ထိုသူသည် ကနဦးကသူ့အားအသုံးချ၍ရမည့် အရည်အချင်းရှိသည့်လူတစ်ယောက်အဖြစ်သဘောထားခဲ့သည်။ နောက်ပိုင်းတွင်မူ သိကျွမ်းသည်မှာကြာလာ၍ လူကောင်းတစ်ယောက်ဟု သဘောပေါက်သွားကာ သူငယ်ချင်းများဖြစ်လာခဲ့သည်။ ထို့နောက်တွင်မူ.... ထိုသူကရွှယ်လင်ကို အနာဂတ်၏ခယ်မလေးဟု ပြောခဲ့ဖူးသည်၊ ထို့နောက် သူနှင့်ဆက်ဆံရေးကောင်းတစ်ခုတည်ဆောက်ချင်ခဲ့၏။

သို့ဖြစ်၍ ရွှယ်လင်မှာ အနှီဆက်ဆံရေးတည်ဆောက်မှုကို သတိထားနေရသည်။ သူ့အစ်ကို၏အဆိပ်ပြင်းပုံနှင့် နှစ်ဦးသဘောတူဓာတ်ပုံရောင်းစားကာ အိမ်တိုင်ရာရောက်ပို့လိုက်ခြင်းကြောင့် စူးလျို့နျန်သည် အချစ်ငှက်လေးနှစ်ကောင် တစ်အိမ်တည်းတွင်အတူရှိနေပြီဟု ယုံကြည်နေလေသည်။ သူ့အနေဖြင့် ဤသနားစရာဂျုနီယာလေးကို ဂရုစိုက်ပေးရမည်ပင်။

***

ရွှယ်လင် ရိုက်ကူးရေးအဖွဲ့နှင့် ပူးပေါင်းပြီး ဒုတိယမြောက်အပတ်တွင် စူးရွှမ့်ယန်က ရိုက်ကွင်းကို အထူးအခြေအနေဖြင့်ရောက်လာခဲ့သည်။ ထိုသူသည် တိုးတိုးတိတ်တိတ်လာခဲ့ပြီး သူလာမည့်အကြောင်းကို ရွှယ်လင်တစ်ယောက်တည်းကိုသာပြောထားခဲ့သည်။ ရွှယ်လင်မှာ ရိုက်ကူးရေးအတွက် အလုပ်များနေရလေရာ ထိုသူအားခေါ်လာရန် ရှန်းယွဲ့ကိုသာအကူအညီတောင်းရတော့သည်။

ထိုအချိန်တွင် ရွှယ်လင်မှာလေပေါ်ပျံသည့်အခန်းကိုရိုက်နေရပြီး စက်ကသူ့အား လေထဲတွင် တွဲလောင်းချိတ်ပေးထားသည်။ သူကောင်းကောင်းထိန်းထားနိုင်လျှင်ပင် ဤသို့သောအခန်းမျိုးကို သတိထားရိုက်သင့်သည်။ ချော်ကျပါက မသေလျှင်ပင် အရေပြားကို ပြဲစုတ်သွားစေလိမ့်မည်။

အသုံးပြုသည့်စက်ကအိုဟောင်းနေပြီ၊ အသစ်ကိုမူ လူ၏ကျောဘက်တွင်တပ်ဆင်ပေးထား၏။ ၎င်းတို့ကိုထိန်းချုပ်ရခက်သော်လည်း လူကရှေ့တိုးနောက်ဆုတ်လုပ်သည့်အခါ အဆင်ပြေစေရန် နည်းပညာကဖန်တီးပေးထားသည်။

စူးရွှမ့်ယန်ရောက်လာချိန်တွင် ရွှယ်လင်က သစ်ပင်ပေါ်မှ ဆင်းလာသည့်အခန်းကို ရိုက်နေလေသည်။ အနီရောင်ဝတ်စုံက လေတွင်လူးလွန့်နေပြီး အနက်ရောင်ဆံနွယ်ရှည်များဝဲလွင့်နေပုံမှာ မောက်မာကြမ်းတမ်းသော မိစ္ဆာဂိုဏ်းဝင်သခင်လေးတစ်ယောက်၏ပုံစံကို ပေါ်လွင်စေ၏။ သစ်ပင်ထက်မှ မြေပြင်သို့ဆင်းသက်လာပုံမှာ အင်မတန်လှပပေသည်။

စူးရွှမ့်ယန်သည် အနီရောင်ဝတ်ရုံနှင့်လူဆင်းသက်လာပုံကို ကြိမ်ဖန်များစွာမြင်ခဲ့ရပြီး သတိရအောက်မေ့မိလေရာ ခြေလှမ်းတို့ကရပ်တန့်သွားခဲ့လေ၏။ အချိန်တိုင်း ထိုမြင်ကွင်းက ယခုလိုပင် အကြည့်မလွှဲနိုင်အောင် လှပနေခဲ့ပါ၏။

****

ဖုန်းချင်းယွင်သည် ခန့်မှန်းရခက်သည့်တိုင် နားလည်ရလွယ်သော လူစားမျိုးပင်။ တစ်ခါတစ်ရံ အလွန်အမင်းရိုးသားလွန်း၍ အခြားသူများကို စိတ်ဖိစီးစေပြီး တစ်ခါတစ်ရံတွင်မူ အခြားသူများကို ကြောက်ရွံ့စေသည်အထိရက်စက်တတ်သည်။

စူးလျို့နျန်၏ဇာတ်ကောင်အရ တဇွတ်ထိုးနိုင်သော လူတစ်ယောက်ဟု ဆိုရမည်။ မိစ္ဆာဂိုဏ်းမှ သခင်ငယ်လေးတစ်ယောက်အနေဖြင့် မွေးဖွားလာတည်းက ဆုံးရှုံးစရာဟူ၍မရှိ၊ ကြောက်ရွံ့စရာလည်းမရှိဘဲ ထို့ကြောင့်ပင် ဖုန်းချင်းယွင်က ထိုသို့မောက်မာရက်စက်သော ဇာတ်ကောင်အဖြစ်သို့ ရောက်လာရခြင်းဖြစ်လေသည်။ သူအရာအားလုံးကို ဆုံးရှုံးလိုက်ရပြီးလျှင်ပင် ဇာတ်ကောင်ကိုမပြောင်းလဲနိုင်သည့်တိုင် ယင်းစိတ်ဓာတ်ကို ပိုမိုနက်ရှိုင်းသည်အထိ ဖုံးကွယ်ထားနိုင်လိမ့်မည်။

ယခု ရွှယ်လင်သည် ဖုန်းချင်းယွင် မိစ္ဆာဂိုဏ်းတွင်ရှိနေခဲ့စဥ်က အပိုင်းများကို ရိုက်ကူးနေရလေ၏။ သူပေါ်လာသည့်ပုံစံဖြင့် စတင်ပြီး မိစ္ဆာဂိုဏ်း၏လုပ်ရပ်များက သူ့အနေဖြင့် ဂိုဏ်းပေါ်နားမလည်နိုင်သည့် အခြေအနေများ ကြုံတွေ့ရပုံကို ဆက်လက်ရိုက်ကူးသွားခဲ့သည်။ ထို့နောက် မိစ္ဆာဂိုဏ်းမှာ အတွင်းပိုင်း၌မတော်တဆ အသီးသီးအဖွဲ့ကွဲမှုကြောင့် ပျက်စီးသွားခဲ့လေ၏။

ယင်းတို့ကအားလုံးက လက်ရှိသူတို့ရိုက်ကူးနေသည့်အခန်းများဖြစ်သည်။

ဖန်းယွဲ့ကျီက ရိုက်ကူးနေစဥ် အတောအတွင်း အဆိုပါအခန်းများတွင် မပါဝင်ပေ။ ထိုသူသည်နှစ်အတန်ကြာ စူးရွှမ့်ယန်နှင့် စူးလျို့နျန်တို့ဖြင့်ပူးပေါင်းကာ ရွှယ်လင်ကို အကြိမ်ပေါင်းများစွာ စမ်းသပ်ခဲ့ကြပြီးနောက် အနှီသူက ရိုက်ကူးရေးကိုထိန်းထားနိုင်မည့်အစွမ်းအစရှိကြောင်း အတည်ပြုလိုက်ပြီး သရုပ်ဆောင်ရာတွင် အရူးအမူးမြှုပ်နှံပစ်လိုက်သည်။ ရိုက်ကွင်းပေါ်တွင် ရှိနေသည့်ဝန်ထမ်းတိုင်း ဖန်းယွဲ့ကျီကို ကြာပွတ်တစ်ချောင်းနှင့် ပတ်ယမ်းနေသည့် မကောင်းဆိုးဝါးလေးနှယ် ခံစားကြရကာ တတ်နိုင်သမျှ အမြန်ပြီးရန်အတွက် အားစိုက်ထားလိုက်ကြပေ၏။

သို့သော် ယခုမူ ရွှယ်လင်မှာ လက်ရှိအခန်းကို ရိုက်ကူးပြီးသည်နှင့် နောက်တစ်ခန်းအတွက် ပြင်ဆင်နေဆဲမှာပင် ဖန်းယွဲ့ကျီကသူ့အား ခဏမျှအနားယူခိုင်းခဲ့၍ ထိတ်လန့်သွားရလေသည်။

ဒါရိုက်တာ ရူးများရူးသွားပြီလား?။

လူတစ်ယောက်က လေထဲတွင် အချိန်အတန်ကြာအောင် တွဲလောင်းချိတ်ခံထားရလျှင် ကြိုးအတင်းအလျှော့ကြောင့် ကြွက်သားများကို နာကျင်စေလိမ့်မည်။ ဒါရိုက်တာက သူ့အားအနားယူခိုင်းလာသည့်အခါ ရွှယ်လင်ကပုခုံးကိုပွတ်ကာ အနားယူသည့်အခန်းထဲသို့ ပြန်ပြီးလှဲရန်ပြင်လိုက်၏။ မထင်မှတ်ထားဘဲ သူလှည့်လိုက်သည်နှင့် စူးရွှမ့်ယန်ကို သတိထားမိသွားသည်။

စူးရွှမ့်ယန်၏လက်ထဲတွင် ပစ္စည်းတစ်ခုရှိနေပြီး သူ့မျက်နှာကမူ နှစ်တစ်ထောင်ကြာသည့်တိုင် အရည်မပျော်နိုင်လောက်မည့် ရေခဲစိုင်ပမာအေးစက်နေဆဲ။ သို့သော်လည်း ရွှယ်လင်လှမ်းကြည့်လာသည်နှင့် နွေဦးတွင်နှင်းများအရည်ပျော်ကျပြီး ရေထဲသို့ပျော်ဝင်သွားသည့်နှယ် နူးညံ့သွားလေ၏။ ထိုသူမျက်လုံးထဲမှ နွေးထွေးသည့်အကြည့်က ရွှယ်လင်ကိုတစ်ခဏမျှဆွံ့အသွားစေပြီး မတုံ့ပြန်တတ်တော့ချေ။

စူးရွှမ့်ယန်က သူတုံ့ပြန်သည် မပြန်သည်ကိုအမှုမထား။ ဖန်းယွဲ့ကျီသည် ရွှယ်လင်ကို ခဏတဖြုတ် အနားယူခွင့်ပေးလိုက်၍ သူလည်း ပုံမှန်အတိုင်း ရွှယ်လင်၏အနောက်မှနားနေခန်းထဲသို့ လိုက်လာခဲ့သည်။

သူတို့မှာလေထန်ပြီး အနိမ့်အမြင့်မညီသည့်တောင်ကုန်းများကြားတွင် ရှိနေကြခြင်းဖြစ်၏။ ရိုက်ကူးရေးအဖွဲ့မှာ ရုပ်ရှင်ရိုက်ရာတွင် လွယ်ကူစေရန် ရွက်ဖျင်တဲလေးအချို့တည်ဆောက်ထားသည်။ သူကအဓိကသရုပ်ဆောင်ဖြစ်၍ ဖန်းယွဲ့ကျီက လက်ဝှေ့ယမ်းပြီး သူ့အတွက် အထူးနားနေခန်းတစ်ခုပေးခဲ့သည်။ ရိုက်ကူးရေးအဖွဲ့ရှိ မည်သူကမှ သူ့အားအခက်တွေ့အောင်မလုပ်ကြဘဲ ရွှယ်လင်၏ သရုပ်ဆောင်စွမ်းရည်မှာလည်း သိသာထင်ရှားနေလေရာ မည်သူကများပြောနိုင်ဦးမည်နည်း။

ရွက်ဖျင်တဲအတွင်းဝင်လိုက်ပြီးနောက် စူးရွှမ့်ယန်း မျက်ခုံးပင့်မိချေသည်။ အထူးအခွင့်အရေးဟု ဆိုရလင့်ကစား အတွင်းပိုင်းကမကောင်းလှပေ။ အလယ်တွင် ပစ္စည်းများနှင့်ပြည့်ကျပ်နေသော စားပွဲတစ်လုံးချထားသည် အများစုက ရွှယ်လင်ရုပ်ရှင်ရိုက်ရာတွင် သုံးသည့်ပစ္စည်းများသာ။ အဝတ်အစားများတင်ထားသောကြောင့် ပြင်ဆင်ပေးရသည့်အဖွဲ့က ၎င်းတို့ကိုခွဲခြားနိုင်ရန် သူ၏ပစ္စည်းများကိုပါထိုနေရာတွင်တင်ထားခဲ့သည်။ သည့်အပြင် ရွှယ်လင်၏လက်ထောက်က အွန်လိုင်းပေါ်မှမှာထားသည့် အနှိပ်ခုံတစ်လုံးလည်းရှိသည်။ သူထိုင်လိုက်သည်နှင့် ပယ်ပယ်နယ်နယ်နှိပ်ပေးမည်ဖြစ်ပြီး ရွှယ်လင်ပင်ပန်းလာချိန်တွင်လည်း ထိုခုံတွင်အနားယူလေ့ရှိသည်။ သူ့ကိုယ်သူကျုံ့ကျုံ့လေးကွေးကာ မျက်မှန်အနက်ကိုတပ်ထားရင်း လောကကြီးနှင့်အဆက်ဖြတ်ထားလေ့ရှိ၏။

"ကိုယ်မင်းအတွက် ရိုက်ကူးရေးအဖွဲ့ကိုရွက်ဖျင်တဲထိုးခိုင်းလိုက်မယ်.." အဆင့်မြင့်ရွက်ဖျင်တဲများတွင် နေထိုင်ရေးအဆင်ပြေရန်ပစ္စည်းအစုံရှိသော်လည်း ၎င်းတို့က ဈေးကြီးပေးဝယ်ရပြီး ရိုက်ကူးရေးအဖွဲ့ကထိုပစ္စည်းမျိုးမတတ်နိုင်ပေ၊ ထို့ကြောင့် ဘတ်ဂျက်နှင့်ကိုက်အောင်စီစဥ်ရရှာသည်။