MM Story Teller

Chapter 227 🦊Arc 14 - ဖျော်ဖြေရေးလောကကို တန်ပြန်တိုက်ခိုက်ခြင်း

Viewers 32k

Chapter 227

🦊Arc 14 - ဖျော်ဖြေရေးလောကကို တန်ပြန်တိုက်ခိုက်ခြင်း

Chapter 227

4.14

သူသည် ရွှယ်လင်ကိုအောက်ခြေမှတစ်ဆင့်ပြီးတစ်ဆင့် စမ်းသပ်နေမိပြီး စိတ်ဝင်စားဖွယ်ကောင်းစွာဖြင့် ရွှယ်လင်က သူ့အားအတော်လေးသည်းခံနိုင်နေသည်။ ရွှယ်လင်က သူ၏ပိုင်နက်ကို ကျူးကျော်ခံလိုက်ရသည့်တိုင် သူ့အားခုခံခြင်းမရှိ။ တစ်ညသာရှိသေးသည့်တိုင် အားကြိုးမာန်တက်မစည်းရုံးလျှင်ပင် ရွှယ်လင်ကသူ့အားပေးနေလိမ့်မည်ဟု သူအတပ်ပြောနိုင်သည်။

သို့သော်လည်း ရိုးရိုးသားသားနေပြီးမစည်းရုံးခြင်းက စူးရွှမ့်ယန်း၏နည်းလမ်းမဟုတ်၊ သူသည် သူ၏ဦးတည်ချက်ကိုရှင်းရှင်းလင်းလင်းသိထားပေ၏။

"အဓိပ္ပာယ်မရှိတာ...ဒါအိပ်ခန်းဗျ!" ရွှယ်လင်သည်ကား မျက်လုံးလှိမ့်လိုက်ကာ တစ်ခုခုမှားနေမှန်း သဘောပေါက်လိုက်သည်။ ခေါင်းစဥ်က နောက်တစ်ခါဘေးချော်သွားပြန်ပြီး မကျေမနပ်ဖြင့်ပြောလိုက်မိလေ၏။

"အဲဒါကိုဖယ်လိုက်! ဧည့်ခန်း မဟုတ်ရင် စာဖတ်ခန်းထဲမှာထည့်! ခင်ဗျားဘယ်နေရာမှာအိပ်ပါစေ ကျွန်တော့်ကိစ္စမဟုတ်ဘူး...ကျွန်တော်အိပ်တဲ့နေရာမှာလာရှုပ်မနေနဲ့!"

စူးရွှမ့်ယန်က ညင်ညင်သာသာပြောလာသည်။ "ကိုယ်တို့က အိပ်ရာတစ်ခုတည်းမှာအိပ်တာမှမဟုတ်တာ..ကိုယ်တို့ကအခန်းကိုမျှသုံးရုံပဲလေ...ကိုယ်တိတ်တိတ်လေးနေပါ့မယ်...မင်းအိပ်နေတာကိုမနှောင့်ယှက်ပါဘူး..."

ရွှယ်လင် နှာခေါင်းရှုံ့လိုက်သည်။ "အခုတော့...အိပ်ခန်းတစ်ခန်းကို မျှသုံးရုံပဲဆိုပေမဲ့ နောက်ရက်တွေကျရင် ခင်ဗျားအိပ်ရာပေါ်အထိတက်လာတော့မှာလေ...ကျွန်တော်မသိဘူးများထင်နေတာလား!"

ပြောလိုက်ပြီးမှ သူ့မှာအူတိအူကြောင်နှင့် မျက်တောင်ခတ်မိသွားသည်။ ဘာကြောင့်ထိုစကားက ထွက်လာရမှန်း သူကိုယ်တိုင်လည်း အင်မတန်သိချင်နေပုံရသည်။ စကားအဓိပ္ပာယ်ကို နားလည်သွားပြီးမှ 'သန့်စင်' သည့် လူပျိုနုနုလေးက အသံတိတ်ကျသွားကာ ရှက်သွေးဖြန်းသွားလေ၏။

စူးရွှမ့်ယန်လည်း အံ့ဩသွားပြီးကိုယ်ကိုရှေ့သို့ကိုင်းလိုက်သည်။ "မင်းတစ်ခုခုကိုမှတ်မိသွားပြီလား...ဘာလဲ..."

ရွှယ်လင်က အနောက်ကိုနှစ်လှမ်းခန့်ဆုတ်သွားသည်၊ တုံဏှိဘာဝေမျက်နှာဖြင့် ဘူးခံငြင်းလေ၏။ "ဘာမှမမှတ်မိဘူး...တစ်ခုမှကိုမမှတ်မိတာ..ခင်ဗျားရဲ့စကားက လွဲနေတယ်ထင်လို့ အမှားပြင်ပေးရုံပဲ..."

စူးရွှမ့်ယန်သည်ကား ကယ်ရာမဲ့စွာပြောလိုက်ပါ၏။ "ကိုယ်ကတော့ အများကြီးမှတ်မိတယ်..."

ရွှယ်လင်က တောင့်ခနဲဖြစ်သွားကာ ခြေနှစ်လှမ်းခန့် ရှေ့တိုးလာလေသည်။ "တကယ်လား...ခင်ဗျားဘယ်လောက်အထိ မှတ်မိထားလဲ..."

စူးရွှမ့်ယန်က သူစိတ်ဝင်စားလာမှန်းသိလိုက်သည့်အခါ သူ၏ခေါင်းလေးကို ပွတ်သပ်ပေးပြီးပြောလာသည်။ "ကိုယ်တို့ ကမ္ဘာတွေအများကြီးအတူနေခဲ့ကြတာကိုမှတ်မိတယ်..အဲဒီတုန်းက မင်းကသာကိုယ်တို့အတိတ်ကိုမှတ်မိပြီး ကိုယ့်ရဲ့မှတ်ဉာဏ်တွေငအကုန်လုံး ပျောက်နေခဲ့တာလေ..."

ရွှယ်လင်က 'တကယ်ကိုခွေးသွေးဇာတ်လမ်းပဲ' ဟုရေရွတ်လိုက်မိသည်၊ သို့ထိတိုင် အသေးစိတ်မမေးတော့ပေ။ တိတ်တိတ်လေးတစခဖက်လှည့်သွားသည်။ စူးရွှမ့်ယန်၏ ရိုးရိုးရှင်းရှင်းစကားကို ကြားလိုက်ရသည့်အခါ ပြောမပြတတ်လောက်အောင် ရှက်ရွံ့သွားရပြီး စူးရွှမ့်ယန်၏ပါးစပ်မှ ထိုစကားကိုထပ်ကြားရလျှင် ရှက်လွန်းအားကြီး၍ စောင်ပုံထဲတွင်သာ အသက်ရှူကျပ်အောင်လုပ်ပြီး သေပစ်လိုက်ချင်သည်။

စူးရွှမ့်ယန် သူလှည့်ထွက်သွားသည်ကိုမြင်လိုက်ပြီး အိပ်ခန်းထဲတွင် နောက်ထပ်ကုတင်တစ်လုံးရှိလာသည့်အကြောင်းကို ထပ်မပြောဖြစ်တော့ပေ။ သည့်အပြင် သူမှတ်မိသမျှအရာများက တစ်ပိုင်းတစ်စစီဖြစ်နေခဲ့သည်။ အနည်းဆုံးတော့ သူတို့နှစ်ယောက်ကြားမှရင်းနှီးမှုကြောင့် ရွှယ်လင် မည်သည့်အရာမှမမှတ်မိလျှင်ပင် အဆင်ပြေသေးသည်။ ၎င်းက ကောင်းမွန်သည့်တာထွက်ဖြစ်ပြီး အဆိုပါအုတ်မြစ်ကြောင့် စူးရွှမ့်ယန်သည်လည်း ဂြိုလ်တစ်ခုလုံးကို မွှေနှောက်ရသည့်တိုင်အောင် ရွှယ်လင်တစ်ယောက်တည်းနှင့်ပင် ပတ်သက်လိမ့်မည်။

ထိုနေ့ညက သူသည် မာစတာအိပ်ခန်းထဲတွင် သူ့နည်းသူ့ဟန်ဖြင့် စတင်နိုင်ခဲ့၏။

အခန်းထဲမှ အသစ်ကျပ်ချွတ်အိပ်ရာကို လှည့်ပတ်ကြည့်ပြီးသည့်အခါ စူးရွှမ့်ယန်ကပြုံး၍ ပျော်ရွှင်စွာပင် အခန်းထဲမှထွက်သွားခဲ့သည်။

ညနေ ငါးနာရီခွဲအချိန်ရောက်ခဲ့ပြီ။ ရွှယ်လင်သည်ကား စူးရွှမ့်ယန်ကိုရှောင်ချင်၍ ဝယ်လာသည့်ပစ္စည်းများနှင့် ချက်ပြုတ်ရန်ပြင်ဆင်နေလေ၏၊ သို့သော်လည်း စူးရွှမ့်ယန်က သရဲတစ်ကောင်လိုခြောက်လှန့်ကာ သူ့အနောက်မှလျှောက်လိုက်နေလေသည်။

"မင်းဘာချက်မှာလဲ...ကိုယ်ကူပေးမယ်..."

ရွှယ်လင်သည်ကား စူးရွှမ့်ယန်မှချက်ပြုတ်တတ်သည်ဟုပြောလာ၍ အတန်ငယ်အံ့ဩသွားခဲ့သော်ငြား စူးရွှမ့်ယန်းက ထပ်ပြောလာ၏။ "ကိုယ်ကမင်းကိုကူလုပ်ပေးရုံပါ...မင်းအရသာကိုသိပြီးသားဆိုတော့ ပြန်အောက်မေ့နိုင်တာပေါ့..."

ရွှယ်လင်သည်ကား နောက်တကြိမ်အစခံလိုက်ရပြန်ပြီ၊ သူနှာရှုံ့လိုက်ပြီး တစ်ခုထက်ပိုကာ မှတ်မိနေသောကြောင့် သူ့အားတစ်နေကုန်လိုက်စနေသော စူးရွှမ့်ယန်ကို ပြန်ပြောရန်ပျင်းရိသွားခဲ့သည်။

သူတို့တွင် အချိန်အများအပြားကျန်နေပါသေး၏။ သူအနုပညာလောကတွင် ထိပ်ဆုံးအထိရောက်ပြီး အားလုံးကိုပြန်မှတ်မိလာပါက အနှီသူကို အတိုးချဆပ်ခိုင်းရုံပင်!။

******

ရွှယ်လင်သည် အိမ်တွင် ရက်အနည်းငယ်ခန့်နေပြီး စူးလျို့နျန်ပေးထားသော <ကောင်းကင်ဘုံသို့အမေး> ဇာတ်ညွှန်းနှင့် ဝတ္ထုကိုဖတ်နေခဲ့သည်၊ ပင်မဇာတ်လမ်းနှင့် ထပ်ဖြည့်ထားသော ဇာတ်ကွက်အချို့အပြင် အချို့သောဖန်တီးမှုများက တူညီသောဇာတ်ကွက်အပေါ် အခြေခံထားသည့်တိုင် ဖုန်းချင်းယွင်၏ ဇာတ်ကောင်သဘာဝကို နားလည်ရန်ခက်ခဲနေသေးသည်။

သူသည် စာရေးသူနှင့်စာဖတ်သူများ၏မျက်လုံးထဲတွင် ဖြစ်နေမည့်သူ့ပုံစံကိုသိချင်နေ၏၊ အပျော်တမ်းစိတ်ကူးယဥ်ဖန်တီးထားသော ဇာတ်လမ်းကိုဖတ်ရှုနေသူ၏မျက်လုံးထဲတွင်ပင် လူအများက သူ၏ဇာတ်ကောင်ပုံစံကို အတွင်းတကျသိနားလည်ထားပြီးဖြစ်၏။ ဤမျှအမြောက်အမြား ဖတ်ရှုခဲ့ပြီးနောက်တွင် ဖုန်းချင်းယွင်၏ပုံရိပ်က ရွှယ်လင်၏အရှေ့တွင်ပေါ်လာခဲ့လေသည်။

ယင်းက သူ၏ဇာတ်ကောင်အပေါ် ကိုယ်ပိုင်နားလည်ထားသည့် ဖုန်းချင်းယွင်၏ပုံစံပင်၊ လူအများရှေ့တွင် မောက်မာသည့်ပုံစံဖြင့်ရှိနေသည့်အခါတိုင်း အနှီသူသည် ရန်လိုသည့်တိုင် ဩဇာညောင်းမှုမရှိ။ နှိမ့်ချနေသည့်အချိန်မျိုးတွင် သီးသန့်ဆန်သော်လည်း မိမိကိုယ်ကိုဖျက်ဆီးနေခြင်းမျိုးလည်းမဟုတ်။ ၎င်းသည် ပြီးပြည့်စုံလုနီးပါး ဇာတ်ကောင်တစ်ခုဖြစ်ပြီး ကျူးရိဖန်နှင့်ဆိုလျှင် ယင်း၏ထက်မြက်သော ပင်ကိုယ်စရိုက်က ပေါ်လာတတ်သည်။ သို့ထိတိုင် ထိုသို့ချီးကျူးဖွယ်ရာ လူတစ်ယောက်က အဆုံးတွင် သေခြင်းတရားကိုသာ ရွေးချယ်သွားခဲ့သည်။ လူအများစုက သူသေဆုံးသွားရ၍ မကျေနပ်ကြဘဲ ပရိသတ်များကလည်း ဖုန်းချင်းယွင်၊ ကျူးရိဖန်နှင့် ချင်းရှီတို့က လူတစ်ယောက်တည်းမဟုတ်ဟု ထင်နေကြသည်။ ၎င်းတို့က တစ်ဦးချင်းဖြစ်တည်မှုအရ ကွဲပြားပုံရပြီး နောက်ဆုံး၌ ထိုနှစ်ယောက်ပျောက်ဆုံးသွားပြီး ချင်းရှီ၏အစိတ်အပိုင်းများဖြစ်လာကြသည့်အခါ လူများအတွက်ဝမ်းနည်းစရာဖြစ်လာလေသည်။

လူနှစ်ယောက်အဖြစ်ကွဲနေသော ချင်းရှီသည် နတ်ဘုရားဖြစ်လာပြီးလျှင် ဘယ်သောအခါမှပြန်ပေါ်လာတော့မည်မဟုတ်ကြောင်း အချို့သူများကမှန်းဆကြသည်။ အချို့သော အပျော်တမ်းစာရေးဆရာများက ထိုပုံစံကိုအသုံးပြုပြီး ဇာတ်လမ်းအသစ်ကို ဖန်တီးကြပြန်သည်။

သို့သော်လည်း စူးလျို့နျန်ရေးထားသည့် ဖုန်းချင်းယွင်က တကယ်သေဆုံးသွားပြီဖြစ်သည်။ ၎င်းတို့သုံးယောက်အနက် ဖုန်းချင်းယွင်ကအမြန်ဆုံးဖြစ်ကာ သေဆုံးပုံကရိုးစင်းပြီး အခမ်းနားဆုံးလည်းဖြစ်သည်။

ဖုန်းချင်းယွင်က သူ့ကိုယ်သူစတေးခဲ့သည်။ ကျူးရိဖန်က သူ့ကိုယ်သူနတ်ဆိုးအသွင်ပြောင်းကာ သူနှင့်အတူလိုက်သေခဲ့သည် ချင်းရှီက နောက်စံတင်းစရာမရှိသော နတ်ဘုရားတစ်ပါးဖြစ်လာသည်။ <ကောင်းကင်ဘုံသို့အမေး> ၏ဇာတ်သိမ်းတွင် မည်သူက ကောင်းကင်ဘုံကို မေးခွန်းထုတ်ခဲ့မှန်း မည်သူကမှမသိပေ။

စူးရွှမ့်ယန်က သူဇာတ်ညွှန်းဖတ်နေသည်ကိုမြင်ပြီး သိလိုစိတ်ဖြင့်မေးလာလေသည်။ "မင်းက ဖုန်းချင်းယွင်နေရာက သရုပ်ဆောင်မှာလား..."

ရွှယ်လင်က မျက်ခုံးပင့်ပြပြီးပြန်မေးသည်။ "မရဘူးလား..."

"ကိုယ်က အဲဒီလိုဆိုလိုချင်တာမဟုတ်ပါဘူး..." စူးရွှမ့်ယန်က သူ့အနောက်တွင်ထိုင်ချပြီး ပြောလိုက်၏။ "ကျူးရိဖန်က ရှောင်နျန်..ချင်းရှီကရွှမ်းချင်...ပြီးတော့အခု မင်း...ကိုယ်မပါပေမဲ့ သရုပ်ဆောင်တွေက ကိုယ်တို့မိသားစုကလူတွေပဲလေ..."

ရွှယ်လင်က တိတ်တိတ်လေးမျက်လုံးလှိမ့်လိုက်ပြီး သူ့ကိုယ်သူတွေးလိုက်သည်၊ ဘယ်သူကခင်ဗျားနဲ့ တစ်မျိုးတည်းဖြစ်ချင်နေလဲ! ပြီးသည့်နောက် ထိုသူကိုအာရုံစိုက်ရန်ပျင်းရိသွားပြီး ပုံရိပ်ယောင်ကွန်ရက်တွင် သီချင်းသွင်းလိုက်သည်။

အသံဒရမ်မာ <စစ်မြေပြင်မှဓားတစ်လက်> သည် ရုတ်တရက်သရုပ်ဆောင်အပြောင်းအလဲကြောင့် ထုတ်လွှင့်မည့်အပိုင်းတွင် ပြဿနာအနည်းငယ်ရှိခဲ့၏။ ဘေးတွင်ဖရဲစေ့ထိုင်စားနေပြီး ဘာမှမသိကြသူများက သူတစ်ပါးနေရာကို လုရမည်လားဟူ၍ ရွှယ်လင်ကိုအပြစ်တင်ကြသည် - သရုပ်ဆောင်များအတွက် စီစဥ်ထားပြီးဖြစ်ကာ ထုတ်လွှင့်မှုမတိုင်ခင် မေ့လျော့နေသောကမ်းပါးက အသံဒရမ်မာတွင် ဆက်လက်ပါတော့မည်မဟုတ်ကြောင်း သတင်းထွက်သွားခဲ့သည်။ ဖြစ်ပျက်နေသမျှကိုသိပြီးသူများနှင့် မုန်းတီးရေးသမားများက ဝါဒဖြန့်ကြ၏ ရွှယ်လင်မှာ ထိုလူများကိုအာရုံစိုက်ရန် အလွန်တရာမှပျင်းရိနေလေ၏။

အသံဒရမ်မာက သူ့ကိုပရိသတ်အရေအတွက်ပိုများလာစေခဲ့ပြီး လူတိုင်းက သူ့နေရာတွင်သရုပ်ဆောင်နိုင်၍ချီးကျူးခဲ့ကြသည်။ မေ့လျော့နေသောကမ်းပါးနှင့် နှိုင်းယှဥ်ကြည့်လိုက်လျှင် သူရှုံးမည်မှာသေချာသော်လည်း မထင်မှတ်ဘဲ သူအသံသွင်းရာတွင် ကွာခြားသောသက်ရောက်မှုရှိခဲ့သည်။

ရွှယ်လင်သည် ချစ်စရာကောင်းသည့်ပုံစံဖြင့်ရူးချင်ယောင်ဆောင်နေသူ၊ အားပေးနေသူများနှင့် လှောင်ပြောင်နေသူအားလုံးကို လွှတ်ထားပေးလိုက်သည်။ သူသည် Weibo ပေါ်တွင်မွှေနှောက်ကြည့်ပြီး <ပဟေဠိလမ်းမများ> ကိုအားပေးသည့်ပို့စ်များကို မှတ်သားကာ ပြန်ပိတ်လိုက်သည်။

<ပဟေဠိလမ်းမများ> ရုပ်ရှင်အတွက် ရိုက်ကူးရေးမှာပြီးစီးသွားခဲ့ပြီ။ ရွှယ်လင်အနေဖြင့် စားသောက်ပွဲအခမ်းအနားကို တက်ရောက်ပေးရန်လိုပြီး Weibo မှလည်း ထုတ်လုပ်မှုအတွက် ခွင့်ပြုချက်ရထားပြီးဖြစ်၍ မကြာခင်ပရိသတ်များရှေ့ အရောက်ချပြနိုင်တော့မည်ဟု တရားဝင်ကြေညာထားပြီးဖြစ်၏။

ရွှယ်လင်မှာ စနစ်ကိုရလာသည်က တစ်လထက်မနည်းကြာခဲ့ပြီး ဘဝကိုပြောင်းလဲစေခဲ့သော အဖြစ်အပျက်ကြီးများ ဖြစ်ပျက်ခဲ့သည်ကိုနားလည်ထားခဲ့သည်။ ပထမဆုံး သူ၏ပုံရိပ်ယောင်ကွန်ရက်နှင့်အလုပ်ကို မပြောသေးဘဲ သူ၏နေ့စဥ်ဘဝမှာပင် အိမ်၌လူပိုတစ်ယောက်ရောက်လာခဲ့သည်! ထပ်လောင်းပြောရလျှင် သူကလူတစ်ယောက်မဟုတ်တော့သည့်အကြောင်း ရုတ်တရက်သိလိုက်ရသေး၏။ ရွှယ်လင်မှာ ယခုအထိ နားဝေတိမ်တောင်ဖြစ်နေဆဲ။

သူအိမ်တွင်တစ်လခွဲခန့်နေခဲ့ပြီး အလုပ်လည်းမည်မည်ရရမလုပ်ခဲ့ပေ။ မနက်တိုင်း အိပ်ရာနိုးလာလျှင်လမ်းလျှောက်သည်၊ အိပ်သည်၊ စားသည်၊ ပြီးလျှင် အိပ်သည်၊ စားသည်။ စာအုပ်များဖတ်ပြီး ဝိုင်းကောင်းကောင်းသောက်သည်၊ ပုံမှန်အတိုင်း စူးရွှမ့်ယန်နှင့်စကားပြောပြီး စူးရွှမ့်ယန် အားနေသည့်အချိန်မျိုးတွင် အပြင်ထွက်လမ်းလျှောက်ကြသည်၊ မြို့တော်၏အရှေ့ခြမ်းနှင့် အနောက်ခြမ်းကို စုံနေအောင်ပတ်သွားကြသည်။ ယခင်က ရွှယ်လင်တစ်ခါမှ မစမ်းခဲ့ဖူးသည့်အရာများဖြစ်နေလျှင် သူစမ်းကြည့်ရန် စိတ်လှုပ်ရှားနေတတ်၏။

တစ်လခွဲခန့်ကြာပြီးသည့်နောက် သူအလုပ်ကိုပြန်သွားရပြီး <ပဟေဠိလမ်းမများ> အတွက် အကြိုမိတ်ဆက်ပွဲကို တက်ရတော့မည်။

ညစာစားနေကြရင်း နှစ်ယောက်လုံးက တီဗွီမှပထမဆုံးကြေညာချက်ကို ကြည့်နေကြသည်။ ကြည့်နေချိန်တွင် မျက်လုံးများက တီဗွီပေါ်မှမခွာကြသော်လည်း တီဗွီမှကြော်ငြာများက အရေးမကြီး၊ ၎င်းတို့က အွန်လိုင်းမှလွှင့်မည့် အဓိကထွေလာကိုကြည့်ရန် အားခဲထားကြ၏။ ညစာစားပြီးသည့်နောက် ရွှယ်လင်သည် Weibo ကို အပြေးအလွှားသွားဖွင့်ပြီး ထွေလာအောက်မှ ချီးမွမ်းခန်းဖွင့်ထားသည့်လှိုင်းလုံးကြီးကိုတွေ့လိုက်ရ၏။

မူရင်းစာရေးသူသည်လည်း ထွေလာကိုပြန်လည်မျှဝေထားပြီး အပိုစာသားများရေးထားသေးသည် သူအရမ်းစိတ်လှုပ်ရှားနေခဲ့သည်၊ ထို့ကြောင့် ပရိသတ်များကလည်း လာကြည့်ခဲ့ကြ၏။ ရုတ်တရက် ရွှယ်လင် ဇာတ်လိုက်နေရာတွင် သရုပ်ဆောင်ခွင့်ရလိုက်ခြင်းက မှတ်တိုင်တစ်ခုဖြစ်လာခဲ့၏။

ထွေလာထဲတွင် သူ့အခန်းကအများအပြားပါခဲ့သည်၊ မိစ္ဆာကျင့်ကြံသူဖြစ်သည့်တိုင် သမာသမတ်ကျသည့်စရိုက်နှင့် ထွေလာအဆုံးသတ်က ဟာသတစ်ခုနှင့် ပြီးစီးသွားလေ၏။ ဝတ္ထုမဖတ်ရသေးသူများက ထိုဇာတ်လမ်းအကြောင်းကို မှတ်ချက်ပေးပြီးမေးမြန်းသွားကြသေး၏။

ရွှယ်လင်က ပို့စ်ကိုထပ်မံမျှဝေခြင်းဖြင့်အကူအညီပေးခဲ့ပြီး သူပြန်တင်လိုက်သည့် တစ်မိနစ်လေးမှာတင် Wieibo ၌ မှတ်ချက်များနှင့်ပြည့်သွားခဲ့သည်။ အချို့လူများမှာမူ အတော်လေးစိတ်လှုပ်ရှားနေကြကာ ရွှယ်လင်၏ဖုန်းမျက်နှာပြင်မှာ တရစပ်တုန်ခါနေလေတော့၏။ အသိပေးချက်အသံများကြောင့် စူးရွှမ့်ယန်ပင် ပန်းကန်ဆေးနေရင်းလှည့်ကြည့်လာ၏။

ထိုနောက်ပိုင်း သူသည်လူကြားထဲတွင် လဝက်ခန့်မျက်နှာပြခဲ့ရသည်။ ယခုမူ ရွှယ်လင်သည် အမည်ကျော်ကြားရန် ညသန်းခေါင်အချိန်မှာပင် ဤအလုပ်ကို မှီခိုနေရသလိုဖြစ်လာခဲ့၏။ သူ၏ Weibo အကောင့်ရှိပရိသတ်များက အော်ဟစ်နေကြပြီး trendဖြစ်နေသော ခေါင်းစဥ်ကိုပင် ဝင်သွားခဲ့သည်။ ရုတ်တရက်ပင် သူ့အားကမ်းလှမ်းလာသည့် ကြော်ငြာများနှင့် ဇာတ်ညွှန်းများက အစဥ်မပြတ်ဝင်လာသည့်တိုင် <ကောင်းကင်ဘုံသို့အမေး> အတွက် အရင်အာရုံစိုက်ချင်သေး၍ ၎င်းတို့အားလုံးကိုဘေးဖယ်ခိုင်းထားလိုက်သည်။

ရွှယ်လင်သည် အမည်ကျော်ကြားသော ကြယ်ပွင့်များအကြားတွင် ထူးဆန်းသည့်ပုံစံဖြစ်နေခဲ့၏။ ပုံမှန်အရ ပြောရပါက ညသန်းခေါင်တွင် အမည်ရလာသည့်မည်သူမဆို သူတို့ကိုယ်သူတို့ မီဒီယာတွင်ချက်ချင်းဖော်ထုတ်လာကြလိမ့်မည်။ သူတို့အားစိုက်မလုပ်လျှင်ပင် အမည်ရနေမည်ဖြစ်ပြီး အရူးတပိုင်းဖြစ်နေသော ပရိသတ်များကို ကြိုးစားစုဆောင်းကာ ဆက်လက်ပြီး follow လုပ်ခိုင်းထားမည်ဖြစ်သည်။ ရသစုံရှိုးများအတွက်ကမ်းလှမ်းချက်များပင်ဖြစ်ပါစေ၊ သူတို့မျက်နှာကိုပြသရန်လိုပြီး သို့မှသာ လူတိုင်းကသူတို့ကိုသဘောကျလာပြီး နောက်ထပ်ပရိသတ်များ ထပ်ရလာမည်ဖြစ်သည်။

သို့ထိတိုင် ရွှယ်လင်သည်ကား ဆန့်ကျင်ဘက်များသာလုပ်နေခဲ့သည်။ သတင်းသမားများစုဝေးလာမည့် <ပဟေဠိလမ်းမများ> ၏အမျိုးမျိုးသောပွဲများကို တက်နေခြင်းထက် အိမ်တွင်သာနေပြီး မြင်ကွင်းထဲမှပျောက်နေလေ၏။ သူ၏သတင်းအချက်အလက်မှန်သမျှကို ဖုံးထားပြီး သတင်းသမားများမှာလည်း သူ့အားရှာမတွေ့ကြ၍ ဓာတ်ပုံခိုးရိုက်၍လည်းမရပေ။ သူကထိပ်တန်းကြယ်ပွင့်မဟုတ်သေးသည့်တိုင် သတင်းသမားအများစုကသူ့အား ဓာတ်ပုံခိုးရိုက်ရာတွင် လက်လျှော့လိုက်ကြသည်။ ရွှယ်လင်သည် ရသစုံရှိုးနှင့်ကမ်းလှမ်းချက်များကို လက်မခံခဲ့ဘဲ လူသိနည်းပြီးသတင်းသိပ်မထွက်သော အနုပညာလောကမှ လူမဟုတ်သလိုပြုမူနေခဲ့သည်။

အတင်းအဖျင်းမရှိ၊ သတင်းကြီးကြီးမားမားလည်းမရှိ၊ အမည်ရရန် အခြားနည်းလမ်းလည်းမသုံးပေ။ လူအများက သူသည်ကုမ္ပဏီအပေါ်အမှားလုပ်မိသွားပြီဟု ထင်ကြေးပေးလာကြသည်၊

မဟုတ်လျှင် ကုမ္ပဏီကသူ့အားယခုလိုဆက်ဆံမည်မဟုတ်၊ ယခုကဲ့သို့ အသုံးဝင်မည့် ကျော်ကြားမှုအဆင့်အတန်းကို အပျောက်ခံမည်မဟုတ်။

Prev Next