Chapter 216

🦊Arc 14 - ဖျော်ဖြေရေးလောကကို တန်ပြန်တိုက်ခိုက်ခြင်း

Chapter 216

14.3 - ဒီလူကို အခုထိရင်းနှီးနေသလို ခံစားနေရတုန်းပဲ။

ဘဝ၏ပြောင်းလဲမှုအချို့ကြောင့် ယုံကြည်ချက်ရှိလာခဲ့သောရွှယ်လင်သည် နောက်ဆုံးတွင် ထျန်းရွှမ်အင်တာတိန်းမန့်မှ အသိပေးစာတစ်စောင်ကို လက်ခံရရှိခဲ့သည်။ 

ထျန်းရွှမ်အင်တာတိန်းမန့်က သူ၏ယခင်အမှိုက်လိုအလုပ်များကြောင့် စာပို့ခြင်းဖြစ်မည်ဟုထင်ခဲ့သော်လည်း နောက်ပိုင်းတွင်မူ ၎င်းတို့အေဂျင်စီသို့ရောက်လာသည့် လူသစ်တိုင်း ပြန်စာရတတ်သည်ဆိုမှ သူစိတ်သက်သာရခဲ့ရလေသည်။

သို့သော်လည်း ယင်းကအသုံးမဝင်ပေ။ ထျန်းရွှမ်အင်တာတိန်းမန့်သည် နှစ်ဝက်တွင်တစ်ခါ လူသစ်များနှင့် စာချုပ်ချုပ်ဆိုတတ်သည့်တိုင် ရုပ်ရှင်မင်းသားများရတတ်သည့်ဝေစုက ဘယ်တော့မှအပြည့်မဟုတ်ပေ။ ၎င်းတို့က ဒုတိယမြောက်စူးလျို့နျန်ကို မွေးထုတ်ပေးရန်မရည်ရွယ်ထားကြဘဲ အခြားကွဲပြားသည့်အရာတစ်ခုကိုသာ ရှာဖွေခဲ့ကြသည်။ သို့ထိတိုင် ရုပ်ရှင်ဧကရာဇ်အဆင့်တွင် ကိုယ်ပိုင်စတူရီယိုတစ်ခုရှိပြီး ပြောင်းရွှေ့ခြင်းနှင့်သိပ်မတူပေ။ လူသစ်များက စူးလျို့နျန်ကဲ့သို့သော သရုပ်ဆောင်အရည်အချင်း မရှိကြလေရာ ထျန်းရွှမ်မှာ နှစ်တိုင်းလူသစ်များနှင့်စာချုပ်ချုပ်နေရပြီး မင်းသားနေရာမှာလည်းအမြဲတစေ လစ်လပ်နေခဲ့ရလေသည်။

လူသစ်များအတွက် ထျန်းရွှမ်အင်တာတိန်းမန့်၏ စည်းမျဥ်းများက ဤနှစ်တွင်လည်းအတူတူပင်။ ၎င်းတို့၏ကုမ္ပဏီအတွင်းပိုင်းကို အရင်းအမြစ်များစွာနှင့် ဖွဲ့စည်းထားပြီး ရုပ်ရှင်ရိုက်ကူးခြင်းအတွက် ရင်းနှီးမြှုပ်နှံကာ လူသစ်များကို ဇာတ်ညွှန်းပေးပို့ကြသည်။ ထျန်းရွှမ်သို့ဝင်ရောက်ချင်သူများက အသံအတွက်လာရောက်စစ်ဆေးခံရမည်ဖြစ်ပြီး အောင်မြင်သူများက ဇာတ်ကောင်နေရာကိုရရှိမည်၊ ဆိုလိုသည်မှာ ဒုတိယအကြိမ်တွင် လက်တွေ့စမ်းသပ်နိုင်သည်။ မအောင်မြင်လျှင် ထုတ်ပယ်ခံရမည်။

ဇာတ်ညွှန်းအတိုင်း သရုပ်ဆောင်နိုင်သူဟူ၍ အနည်းငယ်သာရှိပြီး အသံသွင်းရန်အတွက်လည်း နေရာအနည်းငယ်သာရှိသည်။ ၎င်းမှာ သစ်သားတံတားလေးအပေါ်တွင် မြင်းကောင်ရေထောင်ချီ ဖြတ်သန်းသွားသည်နှင့်မခြားဘဲ သွေးနှင့်ရင်းရမည့် ပြိုင်ပွဲတစ်ပွဲလည်းဖြစ်သည်။ 

သည့်အပြင် အခြားနည်းလမ်းလည်းမရှိတော့ ထျန်းရွှမ်ကပေးသည့်ဇာတ်ညွှန်းဖြစ်သရွေ့ ကောင်းမွန်စွာတည်ဆောက်ထားသော ဇာတ်လမ်းမျိုးသာဖြစ်လိမ့်မည်၊ ခြုံငုံပြောရပါက ဒါရိုက်တာနှင့်ပရိုဂျုဆာများက မင်းသားများတွင်ရှိသင့်သည့် သရုပ်ဆောင်စွမ်းရည်ကို အကဲဖြတ်ပေးလိမ့်မည်။ အနောက်တံခါးမှဝင်လာရန် နည်းလမ်းမရှိပေ။

အားလုံးနှင့်ပေါင်းစပ်ပြောရလျှင် ထျန်းရွှမ်သို့ဝင်နိုင်ရန် မိတ်ဖွဲ့စရာမလိုပေ။ ဇာတ်ညွှန်းများဝေပေးပြီးသည့်တိုင်အောင် လူများကအထုတ်ခံနေရဆဲပင် သို့သော်လည်း ၎င်းတို့၏ဇာတ်ကောင်ကို အစားထိုးသည့်အနေဖြင့် အထွန့်တက်စရာမလိုပေ။ သည့်အပြင် စူးမိသားစုကိုလည်း ဆန့်ကျင်ရန်မလွယ်ဘဲ စူးမိသားစု၏ ရုပ်ရှင်ဧကရာဇ်နှစ်ယောက်အနောက်တွင် ရပ်တည်နေသူများနှင့် ရောနိုင်သူလည်းမရှိ။

ရွှယ်လင် ဇာတ်ညွှန်းကိုဖွင့်ဖတ်ကြည့်သည်။ သည်နှစ်တွင် ထျန်းရွှမ်က ခေတ်သစ်မှုခင်းစုံထောက် ဒရမ်မာ၌ရင်းနှီးထားလေ၏။ ယင်းသည် နာမည်ကြီးဝတ္ထုကို ရိုက်ကူးထားခြင်းဖြစ်ပြီး ကမ္ဘာ့စာပေကွန်ရက်နှင့်လည်းပူးပေါင်းထားသည်။ စာရေးဆရာက ကွန်ရက်တွင်ဝင်ဆန့်သည့် အမည်ကျော်ကြားသူဖြစ်၏။ ရွှယ်လင်သည် ဇာတ်ညွှန်း၏တစ်စိတ်တစ်ပိုင်းကိုသာ ရထားသောကြောင့် အွန်လိုင်းပေါ်တွင် စာအုပ်ကိုရှာဖွေခဲ့ပြီး သရုပ်ဆောင်ရမည့်နေရာအတွက် ပြင်ဆင်ထားလိုက်သည်။

ဇာတ်လမ်း၏ဇာတ်လိုက်က မှုခင်းဆေးဖက်ဆိုင်ရာဆရာဝန်။ ဇာတ်လမ်းကို ရဲဌာနနှင့်သူနေသည့်မြို့တွင် စတင်ထားပြီး ကွင်းဆက်လူသတ်မှုကို အခြေခံထားသည်။ လူအများအပြားကိုသံသယရှိထားပြီး ဇာတ်လမ်းတစ်ခုလုံးက ပေါ့ပေါ့ပါးပါးနှင့်ပုံမှန်ဆန်သည်၊ ၎င်း၏သွက်လက်နေသော အသံ၏အောက်တွင် စိတ်ဓာတ်ကျမှုနှင့် ဖိအားတို့ကိုဖုံးကွယ်ထားလေ၏။ လူတိုင်းခေါင်းပေါ်ကို ကျောက်တုံးတစ်တုံးနှင့် ဖိထားသလိုဖြစ်နေသော်လည်း မကြာခဏဆိုသလို လူများက ဖျစ်ညှစ်ရယ်နေကြဆဲပင်။

လူသတ်မှု၏ကြိမ်နှုန်းက ပိုမိုမြင့်လာလင့်ကစား သဲလွန်စများက ပို၍ပိုကာ ရှုပ်ထွေးလာခဲ့သည်။ လူသတ်သမားက မြူများအကြားတွင် ပုန်းအောင်းနေကာ ပုံသဏ္ဍာန်မှာဝေဝါးနေလေ၏။ အဓိကဇာတ်ကောင်များကို ကစားနေသလိုထင်ရကာ ဝတ္ထုဖတ်နေသူများကို ပိုပြီးအဆောတလျင် ဖြစ်လာစေသည်။

ဝတ္ထုဇာတ်လမ်းများကို ပြန်လည်ရိုက်ကူးသည့် ရုပ်ရှင်နှင့်တီဗွီဇာတ်လမ်းတွဲများက အင်မတန် စိတ်ဝင်စားဖွယ်ကောင်း၏။ စာရေးဆရာ၏ အရေးအသားက ပညာရှင်ဆန်ကာ အရိပ်အမြွက်များမှာလည်း ပုန်းကွယ်နေသည်။ စာဖတ်သူက အဆုံးအထိရောက်အောင်ဖတ်သွားပြီး ပြန်ဖတ်ကြည့်လိုက်လျှင် စာရေးဆရာက လူသတ်သမား၏ မတိုင်ခင်ကလုပ်ရပ်များကို ပြသထားပြီးဖြစ်ကြောင်း သိလိုက်ရပေမည်၊ သို့သော် တစ်ချိန်တည်းမှာပင် စာဖတ်သူများက နောက်ဆုံးတွင်စာရေးဆရာ ဖော်ထုတ်ချင်နေသည့်ပုံစံက ကွဲပြားကြောင်း နားလည်သွားကြပေမည်။

ရွှယ်လင်သည် နှစ်ရက်အချိန်ယူကာ ဇာတ်လမ်းတစ်ခုကိုဖတ်ရှု့ခဲ့ပြီး ဇာတ်ညွှန်းကိုထပ်တလဲလဲဖတ်ခဲ့သည်၊ မှန်ရှေ့တွင် မရေမတွက်နိုင်အောင် လေ့ကျင့်ပြီးနောက် သူ၏သရုပ်ဆောင်စွမ်းရည်က ပိုမိုသဘာဝကျလာခဲ့၏၊ ရုတ်တရက် ရွှေလက်ချောင်းပိုင်ရှင်အဖြစ် ပြောင်းလဲသွားသယောင်ပင်။

သူသည် စနစ်ကအနားတွင်ရှိနေ၍ သူ့အတွက် အကျိုးအမြတ်တစ်စုံတစ်ရာရှိသလားဟု ၎င်းကိုမေးမြန်းခဲ့သော်လည်း စနစ်သည်ကား ယင်းက သူ၏ကိုယ်ပိုင်အရည်အချင်းဖြစ်ပြီး ၎င်းနှင့်မသက်ဆိုင်သည့်အကြောင်း ငြင်းဆိုခဲ့သည်။

ရွှယ်လင်က ထိုစကားများကို ခဏတဖြုတ်ခန့်ယုံကြည်နေပြီးနောက် ဇာတ်ကောင်၏ စိတ်နေသဘောထားကိုသာ လေ့လာနေလိုက်သည်။

ဇာတ်လိုက်တွင် စရိုက်နှစ်ခုရှိနေ၏၊ ပထမတစ်ခုသည်ကား အမှုကိုဖော်ထုတ်တတ်ခြင်းဖြစ်ပြီး ကျန်တစ်ခုကလူသတ်ခြင်းပင်။ စရိုက်နှစ်ခုလုံးက တစ်ဖက်နှင့်တစ်ဖက်၏ တည်ရှိမှုကိုသိထားပြီး ဇာတ်လမ်းတစ်ခုလုံးက စရိုက်နှစ်ခုကို ပြသထားခဲ့သည်။ အဓိကဇာတ်လိုက်အနားတွင် လူတိုင်းဝန်းရံထားပြီး ၎င်းတို့ကသူငယ်ချင်း၊ ဆရာများနှင့် လုပ်ဖော်ကိုင်ဖက်များပင်ဖြစ်နိုင်သည်၊ ၎င်းတို့အားလုံးက ရွဲကစားသည့်နှယ် ဇာတ်လိုက်၏စရိုက်နှစ်ခုကြောင့် ပြုသမျှနုနေရပြီး ခြယ်လှယ်ခံနေရလေသည်။

ဇာတ်လမ်း၏ နောက်ဆုံးအပိုင်းတွင် ၎င်း၏ခန္ဓာကိုယ်က တတိယမြောက်ဇာတ်ကောင်၏ထိန်းချုပ်ခြင်းကို ခံနေရသည့်ပုံစံပင် ပေါ်ထွက်လာခဲ့သေးသည်၊ သို့သော် အဆုံးသတ်တွင် အဆိုပါတတိယမြောက်စရိုက်က ဇာတ်လိုက်၏ မူလ 'အစစ်အမှန်' ဇာတ်ကောင်ပင်ဖြစ်သည်။

စာအုပ်က ကမ္ဘာ့စာပေကွန်ရက်တွင် အခန်းဆက်ထုတ်ဖော်ခံရသည့်အခါ မုန်တိုင်းကြီးတစ်ခုရိုက်ခတ်သွားခဲ့သည်။ နေ့တိုင်း လူများက ဆန်းစစ်ဝေဖန်ရန် စာလုံးအမြောက်အများရေးသားပြီး လူသတ်သမားကို ခန့်မှန်းခဲ့ကြသည်၊ သို့တစေ နောက်ဆုံးရလဒ်မှာ လူတိုင်း အဖြစ်မှန်ကြောင့် မျက်နှာဖြတ်ရိုက်ခံခဲ့ကြရသည်ပင်။ ယင်းက အတော်လေးကောင်းသည့်ဇာတ်လမ်းပင်  အဆုံးအထိမဖတ်မိပါက မည်သူမှအဖြစ်မှန်ကို အတိအကျသိကြရမည်မဟုတ်။ ထျန်းရွှမ်အတွက် ဤစာအုပ်၏ခွင့်ပြုချက်လိုင်စင်ကိုရရန် အတော်အတန်ဈေးကြီးပေးဝယ်ခဲ့ရပြီး ယင်းက ကမ္ဘာ့စာပေကွန်ရက်နှင့်လည်း ဆက်နွယ်နေခဲ့သေးသည်။

ထို့အပြင် ကမ္ဘာ့စာပေကွန်ရက်နှင့် ဟွားရှက ပတ်သက်မှုရှိကြောင်း လူတိုင်းသိကြသည်။ ပုံမှန်အားဖြင့် ဟွားရှအင်တာတိန်းမန့်က ဇာတ်လမ်းကောင်းများအားလုံးကို ဦးစားပေးထားကာ ထျန်းရွှမ်အတွက် ဟွားရှကိုယှဥ်ပြိုင်ရခြင်းမှာ စူးမိသားစုမှ ရုပ်ရှင်ဧကရာဇ်နှစ်ယောက် ပတ်သက်နေခြင်းထက်ပင်ပိုသည်။

ရွှယ်လင်သည် ကမ္ဘာ့စာပေကွန်ရက်နှင့် ထျန်းရွှမ်တို့ သဘောတူညီထားချက်များအပေါ် စိတ်ဝင်စားမှုမရှိပေ။ သူသရုပ်ဆောင်ရမည့် စိတ်နှစ်ခုကွဲနေသော စိတ္တဇဝေဒနာရှင် ဇာတ်ကောင်အပေါ်တွင်သာ အာရုံစိုက်ထားလိုက်သည်။ ပင်မဇာတ်ကောင်၏ စိတ်ဝိညာဥ်နှစ်ခုခွဲသွားပြီးနောက် သူ၏ပရိသတ်အရေအတွက်က ရုတ်တရက်တိုးလာခဲ့သည်။ အလှည့်အပြောင်းဖြစ်သွားမှုကြောင့် လူအမြောက်အများက အံ့အားသင့်ကုန်ကြသည်၊ 

(သူက ရိုးသားကြိုးစားတဲ့ ဖိုးသခွားလေးပါဆို? ဘယ်လိုလုပ်ပြီး ကိုယ်တစ်ခုနဲ့ စိတ်နှစ်ခုကွဲနေတဲ့ မွန်းစတားဘော့စ်ဖြစ်သွားရတာလဲ?

 ယင်းယင်းယင်း...ငါဒီလိုဇာတ်ကောင်ပုံစံမျိုးကို တကယ်ကြိုက်တယ်!။)

အနှီဝတ္ထုကို အခြားသောဆင်တူဇာတ်လမ်းများမှ မှီငြမ်းထားသေး၏၊ သို့ထိတိုင် အတွဲအစပ်မရှိဘဲ သီးခြားဖြစ်နေသည်၊၎င်းတို့က မူရင်းဇာတ်လမ်းထဲမှ ဇာတ်လိုက်ထက်ပင် ပိုမိုသန်မာနေ၏။

ဤဇာတ်ကောင်ကိုယူပြီး ထပ်တူကျအောင်သရုပ်ဆောင်၍ရနိုင်သည်။ ဇာတ်ကောင်၏ ပင်မခံစားချက်ကို မသွင်းနိုင်ခဲ့လျှင် ပရိသတ်များ၏ အထင်အမြင်သေးမှုကိုခံရပြီး အတုံးတကာ့ အတုံးဆုံးလူအဖြစ် ဖယ်ကျဥ်ခံရလိမ့်မည်။ ထိုအတိုင်းဖြစ်ခဲ့လျှင် အနုပညာလောကကို လျှပ်တပြက်တိုက်ခိုက်နိုင်တော့မည် မဟုတ်ဘဲ အသိုင်းအဝန်းထဲကပါ ကန်ထုတ်ခံရလိမ့်မည်။

အသံစစ်ဆေးပြီး တစ်ပတ်အကြာတွင် ရွှယ်လင်သည် ဇာတ်လမ်းတစ်ခုလုံးကို ခြုံငုံဖတ်ကြည့်ပြီး နောက်ဆုံးတွင် အပြည့်အဝသရုပ်ဆောင်နိုင်ပြီဟု ယူဆလိုက်သည်။ Weibo ကိုခဏသုံးကာ ယခင်အေဂျင်စီနှင့် စာချုပ်ဖျက်သိမ်းလိုက်ပြီဖြစ်ကြောင်း ပရိသတ်များကို အသိပေးလိုက်၏။

ပရိသတ်များက သူအလုပ်ကိုရပ်နားလိုက်ပြီး ဤလောကမှ ထွက်သွားတော့မည်ဟု ထင်သွားခဲ့ကြသည်။ ရွှယ်လင်မှာ နောက်ထပ်အေဂျင်စီတစ်ခုကို ရှာဖွေခဲ့ကြောင်းနှင့်  သရုပ်ဆောင်အလုပ်ကို လက်လျှော့လိုက်ခြင်းမဟုတ်ကြောင်း ရှင်းပြလိုက်ရသည်၊ သည့်နောက် ၎င်းတို့စိတ်သက်သာသွားစေရန် သီချင်းသွင်းထားသည့် ဗွီဒီယိုကို ဖွင့်ပြလိုက်မှ သူ့အား အားပေးကြသည့် ချစ်စရာပရိသတ်ပုံစံ ပြန်ဖြစ်သွားကြသည်။

သီချင်းဆိုသည့်ဗွီဒီယိုကြောင့် ရွှယ်လင်မှာ နောက်တဖန်အနေဖြင့် မယုံနိုင်ဖွယ်ရာနာမည်ကြီးလာပြန်သည်။ သူသည် ပရိသတ်များကို ချော့ချင်ရုံလောက်ဖြင့် အိမ်တွင်အသံသွင်းခဲ့ပြီး သူဆိုခဲ့သည်မှာ အချစ်သီချင်းပင်။ သူဆိုခဲ့သည့်သီချင်းနှင့်ပတ်သတ်၍ သူ့ဘက်မှ တိုးတက်မှုကို မခံစားရသော်လည်း လူတိုင်းက သူ၏သီချင်းအဆိုကောင်းမှုကြောင့်ချီးမွမ်းလာကြသည်၊ နားထောင်နေသူများမှာ ရုတ်တရက်ကြီး အချစ်မှာပျော်ဝင်ချင်စိတ်ဖြစ်လာလေ၏။

ရွှယ်လင်သည်ကား အပြစ်ကင်းစင်သည့်ပုံစံဖြင့် ကိစ္စများအားလုံးကို အနောက်ပို့ထားလိုက်သည်။ ပုံမှန်အတိုင်း သူဖန်တီးထားသည့်ဗွီဒီယိုကြောင့် လူများ၏အာရုံစိုက်ခြင်း ခံနေရကြောင်းကို မသိသေးပေ။

[စိုးရွံ့နေသောအရုဏ်ဦးလေး: လျို့နျန်..မင်းအရင်ကရှာနေခဲ့တဲ့ အသံသရုပ်ဆောင်နေရာအတွက် ငါတွေ့ထားတာရှိတယ်]

[နှစ်ပေါင်းတာရှည်: ? အရင်က? ဒရမ်မာအဆုံးပိုင်းမှာ သီချင်းဆိုဖို့အတွက်လား]

[စိုးရွံ့နေသောအရုဏ်ဦးလေး: အေးလေ..မင်းပဲ မင်းရဲ့အစ်ကိုနှစ်က သီချင်းဆိုပေးလည်းအဆင်ပြေတယ်လို့ ပြောခဲ့တယ်မလား...မင်းက ချစ်မိသွားလောက်အောင်ကောင်းတဲ့ အသံမျိုးကို လိုက်ရှာနေခဲ့တာမလား...ငါမင်းကိုဗွီဒီယိုပို့ပေးလိုက်မယ်..မင်းကြည့်ကြည့်လိုက်~]

[နှစ်ပေါင်းတာရှည်: အင်း.. ပို့လိုက်..]

[စိုးရွံ့နေသောအရုဏ်ဦးလေး: တကယ်မှဟုတ်ရဲ့လားတော့ ငါလည်းမသိဘူး..ဒါပေမဲ့ အဲဒီလူက ရင်းနှီးနေတယ်]

[နှစ်ပေါင်းတာရှည်: မင်းတစ်နှစ်လုံးအချိန်ပြည့်အလုပ်လုပ်နေတာ... ရင်းနှီးနေတဲ့လူဘယ်လောက်ရှိမှာလဲ... အရင်ကရုပ်ရှင်ရိုက်ဖူးလို့ မျက်မှန်းတန်းမိနေတာဖြစ်မှာပေါ့]

[စိုးရွံ့နေသောအရုဏ်ဦးလေး: ဖြစ်နိုင်ပါတယ်..ဒီလိုဆို..ငါလည်းပရောဂျက်တွေလုပ်စရာရှိသေးတယ်..ကောင်းကင်ယံရဲ့ဇာတ်ညွှန်းအသစ်အတွက် လူရွေးပွဲကဒီနေ့စမှာ..ကောင်းကင်ယံမှာသွားဖို့အချိန်မရှိဘူး..ဒီတော့ ငါပဲသွားကြည့်ပေးရမှာ]

[နှစ်ပေါင်းတာရှည်: သွားလေ]

စူးလျို့နျန်သည် ကမ္ဘာ့စာပေကွန်ရက်မှ စာရေးဆရာတစ်ယောက်ဖြစ်၏။ ကောင်းကင်ယံနှင့် အယ်ဒီတာတူပြီး စိုးရွံ့နေသောအရုဏ်ဦးလေးက ယခုလက်ထောက်အယ်ဒီတာအဖြစ် တာဝန်ယူထားသည်။ သူ့ထံတွင်စီစဥ်ရမည့်ကိစ္စများရှိနေပြီး အားလုံးက ရှုပ်ထွေးသည်။ သူ့အတွက်ခက်ခဲနေကာ ဖင်လှည့်ခေါင်းလှည့်နှင့် အလုပ်များသည်အထိ၊ သို့သော်လည်း အသံဒရမ်မာအတွက် သူလိုအပ်သည့် အသံနေရာအတွက်ကိုသာ အာရုံစိုက်ထားလိုက်၏။

*****

ထျန်းရွှမ်သည် အဆိုပါပရောဂျက်တွင် ရင်းနှီးမြုပ်နှံထားသော်ငြား သရုပ်ဆောင်မင်းသားရွေးချယ်ရာတွင် တာဝန်ယူရသည်၊ လူရွေးပွဲကိုမူ ဟွားရှအင်တာတိန်းမန့် အဆောက်အဦးတွင်ကျင်းပ၏။ ဟွားရှအင်တာတိန်းမန့်က ဤနေရာတွင် ရင်းနှီးမြှုပ်နှံထားပြီး ဒါရိုက်တာအများစုကမူ ဟွားရှမှထွက်ပေါ်ကြသည်။ 

ရွှယ်လင်သည် စာချုပ်သက်တမ်းကုန်ပြီးနောက် လက်ထောက်ဟောင်းကို နှုတ်ဆက်ခဲ့ရသည်။ သူသည် ပရောဂျက်များတွင်မထူးချွန်ဘဲ အချိန်တစ်ခုအထိ လက်ထောက်လုပ်ရန်လည်း မလိုအပ်ခဲ့ပေ၊ ထို့ကြောင့် စနစ်နှင့်အတူ ဟွားရှအင်တာတိန်းမန့်ကို ထွက်လာခဲ့သည်။ နာနိုကွန်ပျူတာတွင် ရှေ့ပိုင်းတာဝန်အကြောင်း ရေးမှတ်ပြီးသည့်အခါ ခုနစ်လွှာမြောက်သို့ ဖိတ်ခေါ်ခံရလေသည်။

ဟွားရှအင်တာတိန်းမန့်သည် ယွမ်အုပ်စုတွင်ပါဝင်၏။ ၎င်းတို့သည် ရုပ်ရှင်နှင့်တီဗွီစီးရီးများကို အဓိကထားကြသည်။ ဟွားရှအင်တာတိန်းမန့်ထက် ယွမ်အုပ်စုတွင် ကမ္ဘာ့စာပေကွန်ရက်အပါအဝင် စာပေနှင့်ပတ်သတ်သော လက်သစ်စာရေးဆရာများနှင့် အနုပညာရှင်များရှိသည်။ 

ထို့ကြောင့် ရွှယ်လင်အေဂျင်စီပြောင်းရန်ကြိုးစားစဥ်က ဟွားရှအင်တာတိန်းမန့်ကို ဦးစားပေးရွေးချယ်ခဲ့ရခြင်းဖြစ်၏။ အိမ်တွင်နေသည်ဖြစ်စေ၊ နိုင်ငံခြားထွက်သည်ဖြစ်စေ ယွမ်အုပ်စုသည်် အနုပညာလောက၏ မိုးကောင်းကင်ပင်။ ၎င်းတို့သည် ကမ္ဘာပေါ်မှ အနုပညာလောကထက်ဝက်ကျော်ခန့်ကို လွှမ်းမိုးထားခဲ့သည်။ စိတ်ကူးယဥ်ဇာတ်လမ်း၊ ရုပ်ရှင်၊ တီဗွီ သို့မဟုတ် ဂိမ်း၊ ဂီတအပြင် လူများ၏အနုပညာအပေါ် စိတ်အားထက်သန်မှုများနှင့်ဆက်သွယ်နေသည့်အရာများ၊ ယွမ်အုပ်စုက နည်းမျိုးစုံနှင့်ပါဝင်ပတ်သတ်နေခဲ့သည်။ ၎င်းတို့သည် အနုပညာလောကတွင်နံပါတ်တစ် ဟူသောဂုဏ်ပုဒ်နှင့်ထိုက်တန်ပါပေ၏။

သို့သော်လည်း စနစ်က သူယွမ်အုပ်စုနှင့်ပူးပေါင်းခြင်းကို ကောင်းသည်ဟုမခံစားရ၍ ထျန်းရွှမ်ကိုအစားသွားခိုင်းခဲ့သည်။ ဟွားရှအင်တာတိန်းမန့်နှင့်ယှဥ်လျှင် မိသားစုကြီးခုနစ်စု၏အရိပ်ကို ထျန်းရွှမ်အင်တာတိန်းမန့်တွင်မြင်တွေ့နိုင်သည်။ ရှုထောင့်ပေါင်းစုံမှ သုံးသပ်ကြည့်လျှင် ဟွားရှကကောင်းပုံရသော်လည်း ထျန်းရွှမ်ကုမ္ပဏီ၏ထုတ်လုပ်မှုအရည်အသွေးကလည်း အမြဲကောင်းခဲ့သည်။

လူရွေးပွဲသို့လာကြည့်ကြသူက များပြားလှ၏။ ကံကောင်းစွာဖြင့်ရွှယ်လင်ကစောရောက်နေခဲ့သည်။ ထိုသို့မဟုတ်လျှင် နောက်နှစ်အထိတန်းစီနေရနိုင်သည်။ အချို့မှာ လက်ရှိ group တွင်မဝင်လိုက်ရ၍ သည်တစ်ကြိမ်အခွင့်အရေးကို လက်လျှော့လိုက်ကြသည်။

 ဒါရိုက်တာ၏အချိန်က အကန့်အသတ်ရှိပြီး လုပ်ငန်းခွင်တွင် သရုပ်ဆောင်မင်းသားအရေအတွက်က မလောက်ငချေ။ လူအများအပြားကြားမှ မင်းသားတစ်လက်ကို မှန်မှန်ကန်ကန်မရွေးနိုင်ခဲ့လျှင်ပင် ထျန်းရွှမ်တွင်မပါသည့်လူများကို ရွေးချယ်နိုင်ချေရှိသေး၏။ ဤအခြေအနေအရောက်တွင် ထျန်းရွှမ်က မည်သည့်ကိစ္စကိုမှ ဝင်ပါတော့မည်မဟုတ်ပေ။ အခွင့်အလမ်းကို ထောက်ပံ့ပေးပြီး အခွင့်အရေးကိုအရယူမှုက မင်းသားများအပေါ်တွင်မူတည်သည်။

ရွှယ်လင်၏အမည်က အရှေ့ဆုံးတွင်ရှိနေသည်။ သူသည် နံဘေးမှလူများကိုလိုက်နှုတ်ဆက်နေသည်ထက် နားကြပ်တပ်ကာ ဇာတ်ညွှန်းကိုသာ ထပ်တလဲလဲဖတ်နေလိုက်သည်။ နာနိုကွန်ပျူတာတွင် သူ၏အမည်ပေါ်လာမှ မတ်တပ်ရပ်ကာ အဝတ်အစားကိုသေသပ်အောင်ပြုပြင်ပြီးနောက် လူရွေးမည့်ခန်းမထဲသို့ဝင်လာခဲ့၏။

ခေတ်သစ်ဒရမ်မာဖြစ်သောကြောင့် အဝတ်အစားမသတ်မှတ်ထားပေ။ ရွှယ်လင်သည် ယနေ့အဝတ်အစားရွေးချယ်ရာတွင် အနည်းငယ်မျှကြိုးစားထားခဲ့၏။ သူ အဖြူရောင်ကုတ်အရှည်ကိုရွေးခဲ့ပြီး အဓိကဇာတ်ကောင်နှင့်၎င်း၏ ဆန့်ကျင်ဘက်ဘော့စ်တို့ကို ရည်ညွှန်းနိုင်မည့်ပုံစံအတိုင်း ဝတ်စားလာခဲ့သည်။ ၎င်းတို့က ကုတ်မျိုးစုံဝတ်စားရခြင်းကိုနှစ်သက်ပြီး အဝတ်အစားဝတ်လိုက်သည်နှင့် ရောင့်ရဲတတ်ပြီး တည်ငြိမ်အေးဆေးကာ အကွာအဝေးတစ်ခုခြားထားသလိုခံစားရစေသည်။

လူရွေးပွဲခန်းမထဲတွင် ဒါရိုက်တာများကတန်းစီထိုင်နေကြသည်။ ရွှယ်လင်က ၎င်းတို့အားလုံးကိုဝေ့ကြည့်ကာ မည်သည်ကိုမှသတိမထားမိသော ရိုးသားဖြူစင်သည့်ချစ်စရာကောင်လေးသဖွယ် ခြုံငုံကြည့်လိုက်ကာ ခေါင်းငုံ့ကာ နှုတ်ဆက်လိုက်လေသည်။ 

"ဒါရိုက်တာနဲ့ ရှိနေသူများအားလုံး...မင်္ဂလာပါဗျ...ကျွန်တော်က ဝေ့ချီစူးနေရာကနေ ဝင်ပြိုင်မယ့် ရွှယ်လင်ပါ..."

ဒါရိုက်တာက ခေါင်းညိတ်ပြပြီး ရွှယ်လင်ကိုကြည့်လာသည်။

 "မင်းကအရင်ကလည်းမင်းသားလုပ်ဖူးတယ်..ပြီးတော့ မင်းသရုပ်ဆောင်ခဲ့တဲ့ ဇာတ်ကောင်တွေလည်းငါကြားဖူးပါတယ်..မင်းရဲ့သရုပ်ဆောင်စွမ်းရည်နဲ့သာဆို ဝေ့ချီစူးနေရာမှာသရုပ်ဆောင်လို့ရမှာမဟုတ်ဘူး.."

 ထိုသူသည်ကား တည့်တိုးပြောပြီး တစ်ခွန်းတည်းသာ ဖော်ပြလိုက်သည် မင်းလုံးဝလုပ်နိုင်မှာမဟုတ်ဘူး...။

ရွှယ်လင်ကပြုံးပြလိုက်သည်။

 "အရင်ကသရုပ်ဆောင်ခဲ့တာကိုပဲကြည့်ပြီး ဖြစ်နိုင်မဖြစ်နိုင်ကိုဆုံးဖြတ်နိုင်တယ်ဆိုရင်...လူရွေးပွဲကို လုပ်နေစရာမလိုတော့ပါဘူး..."

ဒါရိုက်တာက သူပြောသည်ကိုမငြင်းဘဲ လက်မြှောက်ကာပြောလိုက်၏။

 "ငါ့ကိုသရုပ်ဆောင်ပြချေ..ဘယ်အခန်းလဲ..."

"အခန်းတစ်ဆယ်.." ဇာတ်ညွှန်းကလုံးဝမပြည့်စုံသေးချေ၊ ထုတ်လုပ်ရန်အတွက် ဖယ်ထားသည့်ဇာတ်ညွှန်းများက ယခု ဇာတ်လမ်း၏အစပိုင်းဖြစ်နေသည်။ ရနိုင်သည့်အခန်းများအနက် အခန်းတစ်ဆယ်သည် ဇာတ်လိုက်နှင့်အသင့်တော်ဆုံးဖြစ်ချေသည်၊ အနှီဇာတ်ကောင်အတွင်းမှာပင် ရောစပ်နေမှုဝိရောဓိသဘာဝကိုပြထား၏။

၎င်းမှာ ဇာတ်ဝင်ခန်းနောက်ကွယ်မှ လူတစ်ယောက်ပေါ်လာသည့် ပထမဆုံးအကြိမ်ဖြစ်ပြီး ဇာတ်လိုက်နှင့်သူ့ပြိုင်ဖက်တို့ ပထမဆုံးတွေ့ဆုံကြခြင်းလည်းဖြစ်သည်။

တကယ့်အစစ်အမှန်လူသတ်သမားက သူ့ဘေးတွင်ရပ်နေခဲ့သည်၊ သို့ထိတိုင် ဝေ့ချီစူးထံတွင် သူ၏နံဘေးမှအရာများကို ထိန်းချုပ်နိုင်သည့် အစွမ်းရှိနေသေးသည် ထိုအခါမှ သူ၏အဖော်ဖြစ်သူက သူ့အားသံသယရှိသူစာရင်းမှ ဖယ်ထုတ်နိုင်မည်ဖြစ်သည်။ သူက လူတိုင်းအရှေ့တွင် ပေါ်ပေါ်ထင်ထင်လှုပ်ရှားလျှင်ပင် တစ်ယောက်မှသူ့အား သံသယဝင်ကြမည်မဟုတ်ချေ။

လူတွေ့စစ်ဆေးသည့်အခန်းက ပကတိရှင်းလင်းနေသည်။ လူရွေးပွဲအတွက် သရုပ်ဆောင်ရာတွင် ကူညီပေးမည့် အချို့လူများသာ ထောင့်နေရာများမှပေါ်လာကြ၏။ ရွှယ်လင်က ၎င်းတို့ကိုကြည့်လိုက်ပြီး အဆုံးတွင် သူ့လက်ထဲကိုင်ထားသည့် ဓာတ်မီးကိုကိုင်လိုက်သည်။

ထို့နောက် အခန်းအလယ်သို့ပြန်လှည့်လာပြီး နောက်တကြိမ် ခေါင်းငုံ့လိုက်သည်။ သူခေါင်းပြန်မော့လာသည့်အခါ လူတိုင်း၏ရှေ့မှောက်တွင် သူသည် ဝေ့ချီစူးဖြစ်နေခဲ့လေပြီ။

သူ့ကိုယ်ပေါ်မှအဝတ်အစားများ သို့မဟုတ် မြေခွေးမျက်ဝန်းတစ်စုံပင်ဖြစ်စေ၊ သူမျက်ဝန်းတို့ကိုပင့် မ လိုက်သည့်အခါ အရာအားလုံးကခြားနားသွားလေ၏။

ဖြူဝင်းပြီး သန်မာသောလက်တစ်စုံက လက်ထဲမှဓာတ်မီးကို ခပ်ဖြည်းဖြည်းပုတ်လိုက်သည်။ ထိုနေရာတွင် သူမတ်တပ်ရပ်နေပြီး သူတစ်ယောက်တည်းရှိနေသည်မှာလည်းသေချာသည်၊ သို့သော် အားလုံးက သူ့အနောက်တွင် ဇာတ်ကောင်အများအပြားလိုက်ပါနေသလို ခံစားလိုက်ကြရ၏။ ယင်းမှာ ရွှယ်လင် သူ့ဘေးတွင်အဖော်တစ်ယောက်ရှိနေသလို လှုပ်ရှားနေသောကြောင့်ပင်။

သူ၏ခန္ဓာကိုယ်ကို ဖြည်းဖြည်းချင်းဘေးဘက်သို့လှည့်လိုက်သည်၊ ၎င်းတို့ နေရာပေါင်းစုံကိုထိတွေ့လိုက်တိုင်း မျက်လုံးထဲတွင် ပျော်မြူးနေသည့်အလင်းရောင်လေး ဖျတ်ကနဲလက်သွားတတ်၏။ သူ၏မရွှင်ပျသော်ငြား စိတ်ကူးကြည့်၍ပင်မရအောင် သာယာငြိမ့်ညောင်းလှသည့်အသံက စကားပြောရန် နှုတ်ခမ်းတို့ကို ဖွင့်ဟလိုက်ချိန်တိုင်း ဖြည်းညှင်းစွာထွက်ပေါ်လာပြီး ဝေ့ချီစူး၏စကားများကို ရွတ်ဆိုနေလေသည်။

သူသည် ထိုနေရာတွင်ရပ်နေရင်းဖြင့် စရိုက်ကွဲပြားနေသော လူနှစ်ယောက်ကိုဖော်ပြခဲ့သည်။ သူ၏ပြုမူလှုပ်ရှားပုံများနှင့်အသွင်သဏ္ဍာန်တို့က လေးနက်နေသည့်တိုင် လက်တစ်စုံက ဓာတ်မီးကိုလှည့်ကစားလိုက်သည်နှင့် သူ၏ထိန်းချုပ်ထား၍မရသည့်စရိုက်က ပိုသိသာလာသည်။ သူ၏မျက်နှာအမူအရာကတည်ငြိမ်နေပြီး စွမ်းအားကြီးမားသောလူနှင့် ရင်ဆိုင်ရသည့်အခါ ထိတ်လန့်နေမှု အရိပ်ယောင်အနည်းငယ်ကို ဖော်ပြထားခဲ့သည်။

တကယ်တမ်း သူစကားပြောနေသူက သူ့အတွက် အစေခံတစ်ယောက်အပြင်မပိုပေ။ အစေခံ၏ ညွှန်ကြားချက်က သူ့ထံမှလာပြီး ဤဂိမ်းတွင် အရာအားလုံးကိုသိရှိပြီး ထိန်းချုပ်ထားနိုင်သူမှာ သူတစ်ယောက်တည်းသာဖြစ်သည်။