MM Story Teller

Chapter 201

Viewers 32k

🦊Arc 13 [စွမ်းအင်ကျောက် လက်မှုပညာရှင်]

Chapter 201

13.8 - ဒီမြင်ကွင်းက ထိန်းချုပ်မှု လွတ်နေပြီ

မာရှယ်၏ နန်းတော်က သဘာဝကျကျပင် ခရိုင် A ထဲ၌ ဖြစ်သည်။

ခရိုင်အမျိုးမျိုးကြားတွင် နယ်နိမိတ်များနှင့် ခြားနားမှု အများအပြား မရှိသော်လည်း အဆုံးတွင် ခရိုင် A က ဂြိုလ်တစ်ခုလုံး၏ အချက်အချာဖြစ်ပေသည်။ ထိပ်တန်းအရည်အသွေးရှိ အရာတိုင်းကို ခရိုင် A တွင် ရနိုင်သည်။ မုရှီးက ရွှယ်လင်အတွက် အဝတ်အစားအချို့ ဝယ်ပေးရန် သူ့ကို ယင်ကျားသွားနေကျ အထည်ချုပ်ဆိုင်သို့ ခေါ်သွားရန် စိတ်ကူးထားလေသည်။ သူတို့က ရွှယ်လင်၏ ကိုယ်ခန္ဓာနှင့် ကိုက်ညီမည့် အင်္ကျီများကို ချုပ်ရန်နှင့် ရွှယ်လင် ဤနေရာသို့ အဝတ်ချုပ်ရန် ခဏခဏ လာစရာ မလိုစေရေးအတွက် သူ့ကို ကိုယ်တိုင်း တိုင်းကြလေသည်။

ရွှယ်လင်တွင် အကြံပြုစရာ သိပ်များများစားစား မရှိပေ။ ထိုလူက သူ့ကို အရမ်း ယဥ်ကျေးနေစရာ မလိုဘူးဟုပြောထားသောကြောင့် အလွန် ယဥ်ကျေးပုံပြမနေပေ။

အဝတ်အစားအချို့နှင့် ရွှယ်လင်၏ ကိုယ်တိုင်းကို ရယူပြီးနောက် ရွှယ်လင်က မုရှီးနှင့်အတူ မူလကိုယ်၏ မှတ်ဥာဏ်များအတိုင်း ကျောင်းသုံးပစ္စည်းအချို့ကို သွားဝယ်လေသည်။ မူလကိုယ်၏ စိတ်စွမ်းအားမှာ နိမ့်သောကြောင့် သူ အဆက်မပြတ်ကြိုးစားသော်လည်း သူ၏ လက်မှုအတတ်ပညာက အလွန် မကောင်းပေ။ သူ ဤတစ်ကြိမ် ဟောက်မိသားစုမှ ထွက်လာချိန်တွင် ရွှယ်လင်က မူလကိုယ်၏ ပစ္စည်းများကို သူနှင့်အတူ ယူမလာခဲ့ပေ။ ထို့ကြောင့် သူက အသစ်တစ်စုံကိုသာ ထပ်ဝယ်လိုက်လေသည်။ လေ့ကျင့်ရန်အတွက် လေ့ကျင့်ရေး ပစ္စည်းများကိုလည်း ဝယ်ခဲ့သေးသည်။

ရွှယ်လင်က သူ၏ ယခင်မိဘများကြောင့် စိတ်ဓာတ်ကျမနေပဲ အလွန်စိတ်အား ထက်သန်နေသည်ကို တွေ့သောအခါ မုရှီးက အလွန် ထောက်ခံပေးနေလေသည်။ သူမက သူ့ကို ပို၍ ပို၍ နှစ်သက်လာပြီး ပွေ့ဖက်ထားချင်ကာ ဘယ်တော့မှ လွှတ်မပေးချင်တော့ပေ။

သူတို့နှစ်ယောက်လုံး အပြင်၌သာ နေ့လည်စာ စားပြီး တစ်နေ့လုံး စျေးဝယ်ထွက်ကြလေသည်။

နောက်ဆုံးတွင် မုရှီးက ရွှယ်လင်အတွက် ပစ္စည်း တစ်ပုံတစ်ခေါင်းကြီး ဝယ်ပေးခဲ့သည်။ သူမက ယခင်က ကလေးတစ်ယောက်ကို မပျိုးထောင်ခဲ့ဖူးသောကြောင့် ရွှယ်လင်အတွက် ထိုသို့ အရာများ ဝယ်ပေးနေရခြင်းက သူမအတွက် အိမ်မက်တစ်ခုကဲ့သို့ပင် ဖြစ်နေတော့သည်။ သူမက ရွှယ်လင်ကို သူမ၏ ကိုယ်ပိုင်ကလေးကဲ့သို့ ဆက်ဆံပြီး သူ့ကို အလိုလိုက် သူမ တွေ့သမျှကို သူ့အတွက် ဝယ်ပေးလေသည်။ ရွှယ်လင်သာ သူမကို မတားပါက ခရိုင်တစ်ခုလုံး၏ စျေးဝယ်ပစ္စည်းစာရင်းများနှင့်အတူ ပြန်သွားရပေလိမ့်မည်။

သူတို့ အိမ်ပြန်ရောက်သောအခါ မထင်မှတ်ထားစွာ ယင်ကျားက ပြန်ရောက်နှင့်နေပြီဖြစ်ကြောင်း တွေ့လိုက်ရသည်။ ထူးထူးဆန်းဆန်းပင် သူတို့နောက်တွင် စက်ရုပ်များ သယ်လာသည့် ပစ္စည်းအများအပြားကို တွေ့သောအခါ သူ စိတ်သက်သာရာရသွားလေသည်။

"အကုန်လုံးကို အရင် ချထားလိုက်ဦး အရင်ဆုံး ငါတို့ ညစာအရင်စားမယ်"

"ဟုတ်ကဲ့ပါ ဒယ်ဒီ"

နှစ်ရက်သာ ရှိသေးသော်လည်း မာရှယ်၏ အိမ်တော်နှင့် ကျင့်သားရသွားပြီဖြစ်သည်။ ညစာက မနေ့ကထက်ပို၍ သက်တောင့်သက်သာ ရှိလှသည်။

ရွှယ်လင်က သူနှင့် နည်းနည်း ပို၍ ရင်းနီးလာသည်ကို တွေ့သောအခါ ယင်ကျား အတော်လေး ပျော်သွား၏။ သူက ရွှယ်လင်အတွက် ဟင်းများပင် ထည့်ပေးလိုက်သေးသည်။ မသိစိတ်အရ ပြုလုပ်မိခြင်းလား တခြားအကြောင်းကြောင့်လား မသိသော်လည်း သူ ထည့်ပေးခဲ့သော ဟင်းများမှာ ရွှယ်လင်၏ အကြိုက်များပင် ဖြစ်သည်။

တတိယနေ့တွင် ယင်ကျားပြောသော တော်ဝင်မိိသားစု၏ သီးသန့်ဆရာဝန်က ရွှယ်လင်ကို တွေ့ရန် ရောက်လာလေသည်။ သူ ဤကမ္ဘာသို့ရောက်ပြီးနောက် သူ့ခန္ဓာကိုယ်ထဲမှ အဆိပ်အများစုကို အကူစနစ်လေး၏ အကူဖြင့် ရှင်းထုတ်ပြီးပြီဖြစ်သည်။ ထို့ကြောင့် လက်ကျန်များကို ရှင်းထုတ်ရန်မှာ ဆရာဝန်အတွက် မခက်ခဲပေ။ သူ၏ အခြေအနေကို ကြည့်ပြီးနောက် ဆရာဝန် သူ့ကို ဖြည်းဖြည်းချင်း အားပြန်ဖြည့်ရန် အကြံပြုလေသည်။ ထို့ပြင် သူ့ကိုယ်ထဲမှ အဆိပ်က တစ်လလောက်အတောအတွင်း ပျောက်သွားလိမ့်မည်ဟု ပြောလေသည်။ ၎င်းကို ကြားသောအခါ ယင်ကျားရော မုရှီးရော စိတ်သက်သာရာ ရသွား၏။ ထို့ကြောင့် သူတို့က စတုတ္ထနေ့တွင် ကျောင်းပြန်တက်မည့် ရွှယ်လင်၏ တောင်းဆိုမှုကို လက်ခံလိုက်ကြသည်။

မြို့တော်ဂြိုလ်တွင် ကျောင်းပေါင်းများစွာ ရှိလေသည်။ မည်သည့်အသက်တွင် မည်သည့်ကျောင်းကို တက်ရမည်ဟုသော စည်းကမ်းများလည်း ရှိ၏။

သို့သော် အမှန်တွင် ဤနေရာရှိ နာမည်ကြီးကျောင်းများနှင့် သာမန်ကျောင်းများကြားတွင် ကွာခြားချက် ကြီးကြီးမားမား မရှိပေ။ အဆုံးတွင် မြို့တော်ဂြိုလ်ထဲတွင် ဖွင့်နိုင်သော ကျောင်းတိုင်းက တစ်ချို့သော စွမ်းရည်အဆင့်များကို ရှိရန်လိုအပ်ပေသည်။

ဤခန္ဓာကိုယ်၏ မူလပိုင်ရှင်က လုံယွဲ့ကောလိပ်တွင် တက်ရောက်သည် ထိုကျောင်းက ပထမဦးဆုံးသော လက်မှုဆရာကို လေ့ကျင့်ပေးနိုင်ခဲ့သောကြောင့် နာမည်ကြီးပေသည်။

လုံယွဲ့ ကောလိပ်မှာ မြို့တော်ဂြိုလ်၏ ပထမအဆင့် အကယ်ဒမီ၏ လက်အောက်မှ အခွဲကောလိပ်ဖြစ်သည်။ လုံယွဲ့ကောလိပ်တွင် တက်ရောက်ကြသူ အများစုမှာ အခြေခံအားဖြင့်တော့ လက်မှုပညာရှင် ဆရာသခင်များဖြစ်ကြပြီး သူတို့ အဓိက လေ့လာရသည့် အပိုင်းမှာ စွမ်းရည်ကျောက်တုံးများကို ပုံသွင်းခြင်း ဖြစ်၏။

အခြား ကောလိပ်များ ရှိသော်လည်း သူတို့က လျော့ရဲကြပြီး အဖွဲ့အစည်းများ ဖွဲ့ထားကြလေသည်။ အဆုံးတွင် စွမ်းရည်ကျောက်တုံးများကို ပုံသွင်းခြင်းက စကြာဝဋာတစ်ခုလုံး၏ ဗဟိုချက်ဖြစ်ပြီး စွမ်းရည် ကျောက်တုံးက ပုံသွင်းတိကျလေ ပိုကောင်းလေပင်။

ယခုနှစ်များတွင် အစားထိုး စွမ်းရည် အရင်းအမြစ်များ ပေါ်ထွက်လာသော်လည်း စက်ရုပ်များကို စွမ်းရည် ထောက်ပံ့ရန်နှင့် သားရဲများကို ထောက်ပံ့ရာတွင် စွမ်းရည် ကျောက်တုံးများကို လိုအပ်နေတုန်းပင်။ ထို့ကြောင့် ၎င်းက ကောလိပ်များ၏ အာရုံစိုက်စရာ အဓိက ဘာသာရပ် အဖြစ် ရှိနေတုန်းပင်။

လုံယွဲ့ကောလိပ်၏ လက်မှုပညာဌာနက မြို့တော်ဂြိုလ်တစ်ခုလုံးတွင် အကောင်းဆုံး ဖြစ်သည်။ မူလကိုယ်၏ မိခင်ကလည်း ထိုကျောင်းမှ ကျောင်းသားတစ်ယောက် ဖြစ်ခဲ့သည်။

ဟောက်ယွမ်လျန်က ဟောက်စုန့်လဲ့ကို ထိုကျောင်းသို့ ပို့ရန်အတွက် အလွန်အားထုတ်ခဲ့ရသည်။ သူ အောင်မြင်စွာ ဝင်ခွင့်ရပြီးနောက် မူလကိုယ်ကလည်း တစ်ချိန်တည်း ထိုကျောင်းသို့ ဝင်ခွင့်ရခဲ့သည်။ ဟောက်ယွမ်လျန်က သူ့အကြီးဆုံးသားကို ဂရုမစိုက်သော်လည်း သူ့သားများက ထိုကျောင်းတွင် တက်ရောက်နေသည်ဟု ပြောရာတွင်တော့ ဂုဏ်ရှိစေသည်။ သူက ပိုက်ဆံ အများကြီးကို သုံးခဲ့ရပြီးပြီ ဖြစ်သောကြောင့် တစ်ယောက်ကို ထိုကျောင်းသို့ ထပ်၍ ပို့ဆောင်ခြင်းက ထူးခြားမနေပေ။

စိတ်ဝိညာဥ် နိုးထလာသည့် အတောအတွင်း ဟောက်စုန့်လဲ့၏ လုပ်ဆောင်မှုများက သာမန်လက်ထောက် အသွင်ပြောင်းသားရဲများထက် သာလွန် ကောင်းမွန်နေလေသည်။ ထို့ကြောင့် သူက တန်းခွဲ B တွင် နေရာပေးခံရသည်။ ကျောင်းရှိ သာမန်လက်ထောက် အသွင်ပြောင်းသားရဲများ ကြားတွင် ဟောက်စုန့်လဲ့က ထိပ်တန်းအဆင့် ဖြစ်နေချေပြီ။

မူလကိုယ်ကမူ လက်မှုဆရာသခင်ဖြစ်သော်လည်း သူ၏ ဝိညာဥ်စွမ်းအားများကို ပိတ်ဆို့ ခံခဲ့ရသောကြောင့် ကျန်ရစ်သူများနှင့် နောက်ပေါက်မှ ဝင်လာသူများရှိသော တန်းခွဲ C တွင်သာ နေရာချခံရသည်။ ထို့ပြင် ၎င်းတို့ထဲမှ အနည်းငယ်ကသာ သင်ယူလိုစိတ်ရှိကြသည်။ မူလကိုယ်က မည်သို့ ပုံသွင်းရမည်ကို အစစ်အမှန် သင်ယူလိုစိတ်ရှိသောကြောင့် သူက ကျောင်းတွင် သူငယ်ချင်း တစ်ယောက်မျှ ရှာမရဖြစ်ခဲ့ရသည်။

သူ့က တစ်ယောက်တည်း နေတတ်သောကြောင့် သူ ခွင့်ရက်အနည်းငယ် ယူသောအခါ မည်သူကမျှ သတိမထားမိပေ။ ရွှယ်လင်ကလည်း လူသိရှင်ကြား ဖြစ်စေရန် မရည်ရွယ်ပေ။ ထို့ကြောင့် သူ၏ ပြန်လည် တက်ရောက်မှုအတွက် မည်သည့် ခမ်းနားသော မြင်ကွင်းကိုမျှ မပြင်ဆင်ခဲ့ပေ။

သို့သော် သိသိသာသာပင် တချို့လူများတွင် အကြံအစည်များ ရှိပုံပင်။

ရွှယ်လင်က ယနေ့ နံနက်တွင် စောစောထပြီး ယင်ကျားနှင့် မနက်စာ တူတူစားလေသည်။ သူ မူလက ယင်ကျားကို လိုက်ပို့ပြီး ထို့နောက်မှ ပစ္စည်းများ သိမ်းဆည်းကာ ကျောင်းသို့ သွားမည်ဟု စီစဥ်ခဲ့သော်လည်း မမျှော်လင့်ထားဘဲ ယင်ကျားက အပေါက်ဝတွင် ရပ်ကာ သူ့ကို ကြည့်နေလေသည်။ ရွှယ်လင်က သူ့အကြည့်ကြောင့် အနည်းငယ် အံ့အားသင့်သွားရသည်။ ထို့နောက် ယင်ကျားက လက်ဆန့်ထုတ်ကာ ရွှယ်လင်၏ ခေါင်းကို ကူကယ်ရာမဲ့စွာ ပွတ်ပေးလိုက်ပြီး " မင်းရဲ့ ပစ္စည်းတွေ သွားယူချည် ငါ မင်းကို အရင် ကျောင်း လိုက်ပို့မယ်"

ရွှယ်လင် အံ့အားသင့်စွာ မျက်တောင်ခတ်လိုက်မိသည်။ ယင်ကျား အပြင်ထွက်လေ့ရှိသည့်ပုံကို သူသိ၏။ ထိုနေ့က မုရှီး၏ ခေါ်ဆောင်မှုကဲ့သို့ သူက အသုံးအဖြုန်းမကြီးသော်လည်း သူ၏ ကိုယ်ပိုင်လေယာဥ်မှာ နိမ့်ကျမနေဘဲ အနားတွင် အစောင့်အကြပ်အဖွဲ့နှစ်ဖွဲ့ အမြဲတမ်း ရှိလေသည်။ ယင်ကျား၏ တိုက်ခိုက်စွမ်းရည်ကို မည်သည့်အရာကမျှ ဖော်ပြမထားပေ။ ထို့ပြင် မည်သူကမျှလည်း သူ့ကို တိုက်ခိုက်ရဲလောက်သည်အထိ မရူးမိုက်ပေ။ သူကတော့ ရှိသင့်သည့် အစောင့်အကြပ်၊ အကာအကွယ်များကို ထိန်းသိမ်းထားတုန်းပင်။

ထိုပုံစံဖြင့် ကျောင်းဂိတ်တွင် ရပ်ပါက သူ ကျော်ကြားမလာဘဲမနေဟု ရွှယ်လင် ခံစားလိုက်ရသည်။

သူ တစ်ယောက်တည်းသွားမည်ဟု ယင်ကျားနှင့် ညှိနှိုင်းရန် မဖြစ်နိုင်ပေ။ ယခု နှစ်ရက်အတောအတွင်းတွင် ရွှယ်လင် သူ့အကြောင်းအချို့ကို နားလည်လိုက်ပြီ ဖြစ်သည်။ ဥပမာ အနေဖြင့် သူ အကြောင်းပြချက် လုံလုံလောက်လောက် မပေးနိုင်လျှင် ထိုယောက်ျားနှင့် ညှိနှိုင်းရန် အဆင်ပြေမည် မဟုတ်ပေ။ ထိုကြောင့် သူ ကျောင်းရှေ့တွင် မိမိုက်သော ပုံစံဖြင့် ပေါ်လာမည်ကို ရွှယ်လင် လက်ခံရန်သာ တတ်နိုင်တော့သည်။

သူ ဘာကိုတွေးနေသည်အား ယင်ကျား သိပုံပေါ်သည်။ သူတို့လေယာဥ်ထဲသို့ ဝင်ထိုင်လိုက်ပြီးနောက် ယင်ကျား ပြောလိုက်သည်။

" ငါ့မှာ လူသိရှင်ကြား အခမ်းအနားတွေနဲ့ ပွဲထုတ်တတ်တဲ့ အကျင့်မျိုး မရှိပေမယ့် လုပ်သင့်တဲ့ အရာတွေတော့ လုပ်ဦးမှာပဲ မင်း ဘယ်သူဆိုတာက ဖုန်းကွယ်ထားဖို့ မလိုဘူး အဲဒါမှ တစ်ချို့လူတွေက ဘယ်သူတွေကို သူတို့ မနှောက်ယှက်သင့်ဘူးဆိုတာ သူတို့ သိမှာ"

ဤအချင်းအရာက သူ၏ အထောက်အပံ့ပေးသည့် နည်းလမ်းဖြစ်သည်ကို ရွှယ်လင်သိ၏။ ထို့ကြောင့် ရွှယ်လင် ထပ်ပြောမနေတော့ပေ။ သူက ထိုပေါင်လုံးကြီးကြီးအား ဖက်ထားပြီး နာခံစွာဖြင့် ဒယ်ဒီ ဟု ခေါ်လိုက်ရန်သာ တတ်နိုင်တော့သည်။

***

မြို့တော်ဂြိုလ်၏ နေရာအများတွင် လေကြောင်းလမ်း ထိန်းချုပ်မှုများကို အကောင်အထည်ဖော်ပြီးပြီ ဖြစ်သော်လည်း လူအချို့၏ ယာဥ်ပျံများကသာ သူတို့အလိုရှိသောနေရာများကို သွားလာနိုင်သည်။ ရွှယ်လင် ယင်ကျား၏ ယာဥ်ပျံဖြင့် ကျောင်းသို့ ရောက်ချိန်တွင် အနည်းငယ် ရှက်ရွံ့သလို ခံစားနေရသည်။ အဆုံးတွင် ကျောင်းသို့ ယာဥ်ပျံဖြင့် ရောက်လာခြင်းက အနည်းငယ် ထူးခြားနေသေးပေသည်။ ထိုကျောင်းတွင် တက်ရောက်နေသူများမှာ အာဏာကြီးသူများလည်း ရှိသလို ယာဥ်ပျံဖြင့် ကျောင်းလာတက်သူများလည်း မရှားပေ။

သို့သော် သူတို့က သက်တော်စောင့်များဖြင့် ယာဥ်ပျံဆင်းသက်လာချိန်တွင် ထိုယာဥ်၏ အပြင်ဘက်မှာ တော်ဝင်မိသားစု၊ မာရှယ်၏ နန်းတော်၊ တပ်၏ ပထမအဆင့် အပြင်အဆင်တို့ဖြင့် လူထု၏ အာရုံကို တခြားလေယာဥ်များထက် ပို၍ ဖမ်းစားသွားနိုင်လေသည်။

ယင်ကျားက ရွှယ်လင်အတွက် ရွှယ်လင့်ကိုယ်တိုင်းဖြင့် သူ့စိတ်တိုင်းကျ ပြင်ဆင်ပေးခဲ့သည့် ယူနီဖောင်းကို သေသပ်အောင် လုပ်ပေးလိုက်သည်။ ထိုဝတ်စုံကို သူမိသားစု၏ ဆရာသခင်လေး ဝတ်ဆင်လိုက်ချိန်တွင် အလွန်ကြည့်ကောင်းနေ၏။ သူ ရွှယ်လင်၏ ဆံပင်ကို ဖွလိုက်ချိန်တွင် ရွှယ်လင်၏ မကျေမနပ် ခပ်တိုးတိုးသံကို ကြားလိုက်ရလေသည်။ ထို့နောက် ရွှယ်လင်ကို ယာဥ်ပေါ်မှ ဆင်းခွင့်ပြုလိုက်လေသည်။

ရွှယ်လင် ယာဥ်ထဲမှ ထွက်သွားလိုက်သည်။ ယင်ကျားက သူ့မျက်နှာကို ထွက်ပြရန် စိတ်ကူးမရှိပေ။ သူက ရွှယ်လင်ကို ကျောင်းဆင်းချိန် လာကြိုမည်ဟုသာ ပြောလိုက်ပြီး ရွှယ်လင် အဆောင်တွင် နေရန် စိတ်ကူးထားသည်များကို လုံးဝချေဖျက်ပစ်လိုက်သည်။

"သူ အဲ့ဒါကို ဒုက္ခများတယ်လို့ မထင်ဘူးလား..." ရွှယ်လင်က လေယာဥ်ပြန်ထွက်သွားသည်ကို ကြည့်လိုက်ပြီး တီးတိုးရေရွတ်လိုက်ပြီး ကောလိပ်ထဲသို့ ဝင်ရန် လှည့်လိုက်တော့သည်။

အကူစနစ်လေးက သူ၏ စကားများကို ကြားသောအခါ မျက်လုံးလှိမ့်လိုက်လေသည်။

" host ကြွားနေတာမလား... သူ host ကို မကြိုက်သေးတာတောင် host ကို ဒီလောက် အလိုလိုက်နေတာ သူသာ host ကို ချစ်မိသွားရင် host ကို ကောင်းကင်ပေါ်အထိရောက်အောင် အလိုလိုက်လိမ့်မယ်"

"ငါ ကောင်းကင်ပေါ်တက်သွားတော့ရော မင်းနဲ့ ဘာဆိုင်လို့လဲ..." ရွှယ်လင်က ပြန်ပြောလိုက်ပြီး အထဲသို့ ခြေလှမ်းကာ စပ်စုနေသော မျက်လုံးများကို လျစ်လျူရှုလိုက်သည်။

သူ တက်နေသောအတန်းမှာ ရှာရန်လွယ်၏။

C-3 အတန်းတွင် လူပျင်းလူဖျင်းများ ဆိုးသွမ်းသော ကျောင်းသားများဖြင့် ပြည့်နေ၏။ ရွှယ်လင် လမ်းလျှောက်ဝင်လိုက်သောအခါ နှစ်ယောက်တစ်စု သုံးယောက်တစ်စု စုနေကြလေသည်။ အတန်းမှာ အဓိကအားဖြင့် လက်မှုတရာသခင် များနှင့် သာမန်အသွင်ပြောင်းသားရဲများအဖြစ် အုပ်စုနှစ်စု ခွဲထားသည်။ အတန်းထဲတွင် တစ်ဆင့်ခွဲထားသည့်အုပ်စုများ ရှိသေးသော်လည်း ရွှယ်လင်က စိတ်မဝင်စားပေ။ သူ့နေရာကို ရှာကာ ဝင်ထိုင်လိုက်ပြီး သူ သင်နေသော စာအုပ်များကို ထုတ်လိုက်ကာ စာဖတ်နေလေသည်။

သူ ဝင်လာချိန်တွင် အတန်းက ရှုပ်ထွေးသွားရသည်။ တစ်ခဏအကြာတွင် ဆရာသခင် တစ်ယောက်က သူ့ဆီသို့ ရောက်လာပြီး သူ့စားပွဲကို ခေါက်လိုက်သည်။ " အတန်းဖော် မင်း အတန်းမှားလာတာလား? မင်းနဲ့ တူတဲ့လူ ဒီအတန်းထဲမှာ မရှိပါဘူး "

ရွှယ်လင်၏ သူ၏ ပုံစံကို ပြောင်းလဲပြီးပြီ ဖြစ်သောကြောင့် သူတို့ သူ့ကို မမှတ်မိခြင်းမှာ မထူးဆန်းပေ။ သူက ခေါင်းကို တည်ငြိမ်စွာ မော့လိုက်ပြီး တစ်ဖက်လူကို ကြည့်လိုက်သည်။ တစ်စက္ကန့်မျှ ကြာပြီးနောက် သူ့ခေါင်းကို ခါလိုက်သည်။

" ငါက ဒီအတန်းကပါပဲ မင်း ငါ့ကို မမှတ်မိတာပါ"

တစ်ဖက်လူက သူ့ကို အကြာကြီး စိုက်ကြည့်နေပြီး တွေဝေနေကာ မည်သူမှန်း မသိဖြစ်နေသည်။ နောက်ဆုံးတွင် ပိန်ပါးလွန်းသည့် ခန္ဓာကိုယ်ကို ကြည့်ကာ ခန့်မှန်းလိုက်သည်။ "ဟယ်လန် ကျို့ယွင် ..."

ရွှယ်လင် ခေါင်းညိတ်ရင်း ပြောလိုက်သည်။ " ဟုတ်တယ် အဲဒါ ငါပဲ"

တစ်ဖက်လူက သူ့ကို ထူးဆန်းသလို ကြည့်နေပြီး သူ့အဖွဲ့ဘက်သို့ လှည့်သွားလေသည်။ သူတို့က နောက်တစ်ချိန် မတိုင်ခင်အထိ သူ့အကြောင်းကို ဆက်လက်ဆွေးနွေးလေသည်။ ရွှယ်လင်ပင် သူတို့၏ စကားသံများကို မသဲမကွဲ ကြားနိုင်လေသည်။ သူတို့က ရွှယ်လင် လက်ဖွာသူ တစ်ယောက်ကို တွေ့ထားသလားဟု ထင်နေမိသည်။ မဟုတ်ရင် သူ မနက်ပိုင်း ကျောင်းကို ဝင်လာတာက အဲ့လောက် မိုက်နေမှာလဲ...။

ထို့နောက်တွင် တော်ဝင်မိသားစု၊ မာရှယ်၏ နန်းတော်၊ တပ်၏ ပထမအဆင့် အပြင်အဆင်တို့ပုံစံကဲ့သို့ ပိုက်ဆံအိတ်ကြီးမရှိဟု ပြောကာ သူတို့၏ ကိုယ်ပိုင် ထင်မြင်ချက်များကို ငြင်းဆိုလိုက်လေသည်။ ဒါက သိသိသာသာကြီးကို မာရှယ်အိမ်တော်ရဲ့ ယာဥ်ပျံပဲလေ အိုကေ...။

အတန်းထဲတွင် ရုန်းကန်နေရသူများ ပြသနာရှာသူများဖြင့် ပြည့်နှက်နေသော်လည်း အရေးပါသော နောက်ခံမိသားစုများ ပြတ်လပ်မနေပေ။ ထို့ကြောင့် တစ်တန်းလုံးက ရွှယ်လင်၏ အတိတ်အကြောင်းကို အတင်းပြောရင်း ကုန်ဆုံးခဲ့လေသည်။ မာရှယ်၏ အိမ်တော်တွင် ရွှယ်လင်၏ အထောက်အထား အသစ်ကို မိတ်ဆက်ပေးသော အခမ်းအနား မကျင်းပသော်လည်း သိသင့်သော လူတစ်ချို့ကိုတော့ သတင်းပို့ပြီးဖြစ်သည်။ ရွှယ်လင်၏ ပုံသဏ္ဌာန်မှာ အထက်တန်းလွှာ အဖွဲ့အစည်းတွင် ဖြန့်ပြီးသားဖြစ်သည်။ ထို့ကြောင့် လူတိုင်းက မာရှယ်နှင့် ဆက်ဆံရေးကောင်းကောင်း ရှိစေရန် သူတို့ ချဥ်းကပ်ကာ ကပ်တွယ်၍ ရသော လူသစ်တစ်ယောက် တိုးလာသည်ကို သိသွားကြလေသည်။

ရွှယ်လင်က အတန်း တစ်တန်း၏ အတင်းပြောစရာ အကြောင်းအရာ ဖြစ်သွားပြီး သူ့အတွက် အသက်ရှူရန်ပင် ခဲယင်းလှသည်။ နောက်အတန်းချိန်ကို သူ့ဟာသူ တစ်ယောက်တည်း စာလုပ်ရင်းဖြင့် အချိန် ကုန်စေခဲ့သည်။

သူ ဆရာပြောသမျှကို မကြားနိုင်ပေ။ သို့သော် သူ ဆရာ့ထံမှ သင်ယူလိုပါက နောက်တစ်ဘဝ ရောက်သည်အထိပင် စွမ်းအင်ကျောက်ထွင်းထုနိုင်မည် မဟုတ်ပေ။

ကံဆိုးစွာဖြင့် သူ့ကိုယ်သူ ပြင်ပကမ္ဘာကြီးမှ ကာကွယ်ထားသော်လည်း တစ်ချို့လူများက သူတို့ကို သူ သတိထားမိစေရန် နည်းလမ်းများ ရှာတွေ့နေကြတုန်းပင်။ ဟောက်စုန့်လဲ့က သူ့နာမည်ကို စင်္ကြံလမ်းမှ လှမ်းခေါ်လိုက်ပြီး အတော်ကြာသည်အထိ တုန့်ပြန်သံကို မကြားရသောအခါ အထဲသို့ ဝင်လာပြီး ရွှယ်လင့်ခုံကို လက်ဖြင့် ရိုက်လိုက်လေသည်။

Prev Next