MM Story Teller

Chapter 192

Viewers 32k

🦊Arc 12 -[ နတ်ဘုရား၏ မျက်နှာသာပေးခံရသော ဝံပုလွေပေါက်လေး]

Chapter 192

12.15 - အိုင်ဗန် ငါ့ကိုသေချာကျေးဇူးတင်ဖို့လိုတယ်

လမ်းလွှဲပေါင်းများစွာမှ ကွေ့ပတ်လာခဲ့ရပြီးနောက် အိုင်ဗန်မှာ ဘက်စ်ပိုကာသို့ရောက်လာခဲ့လေပြီ။ တစ်မြို့လုံးကို နှင်းများဖုံးလွှမ်းနေပြီး အဝင်အထွက်ကိုလည်း တင်းကြပ်ထိန်းချုပ်ထားသည်။ အိုင်ဗန်သည် ထိုနေရာတွင်အတားခံရပြီး နန်းတော်ထဲသို့တိုက်ရိုက်ခေါ်သွားခံလိုက်ရ၏။

အဘယ်ကြောင့်ဆိုသော် အိုင်ဗန်သည် ဘက်စ်ပိုကာသို့လာလိမ့်မည်ဟု ယခင်ကရွှယ်လင်ပြောခဲ့ဖူး၍ဖြစ်ပြီး ခန်က မြို့ထဲမှ သံသယရှိဖွယ်လူကိုရှာဖွေရန် မြို့စောင့်စစ်သားများကိုအမိန့်ပေးထားပြီး အိုင်ဗန်ဟု စာရင်းပေးလာသည့်မည်သူကိုမဆို နန်းတော်ထဲသို့ခေါ်လာရန်မှာထားလေ၏။

လဝက်ခန့်ကြာအောင် ခရီးနှင်လာခဲ့ရသည်ဖြစ်ရာ အိုင်ဗန်မှာ စိတ်ရောကိုယ်ပါပင်ပန်းနေပြီဖြစ်သည်။ လမ်းတစ်လျှောက်တွင် ဘေးအန္တရာယ်အမြောက်အမြားနှင့် ကြုံတွေ့ခဲ့ရ၏။ လူများက သူ၏မျက်လုံးနှင့်ဆံပင်အရောင်များ တဖြည်းဖြည်းပြောင်းလဲလာသည်ကို ကြောက်ရွံနေကြသည့်တိုင် သူက ကုသသူတစ်ယောက်ဖြစ်ကြောင်း သိသွားကြသည့်အခါ သူ့ထံပြေးလာပြီး အကူအညီတောင်းခံကြတော့သည်။

အိုင်ဗန်မှာ အခြားသူများကို ကုသပေးခြင်းက သူ့ကိုယ်ထဲမှအဆိပ်များကို ပိုတက်လာစေမည်မှန်းသိပြီးနောက် စကားများရန်ဖြစ်ရခြင်းကို စတင်ထိန်းချုပ်လာတော့သည်။ သူယူကြုံးမရဖြစ်မိ၏။ တစ်ဖက်တွင် သူ၏အမွေဆက်ခံရထားသည့် နတ်ဘုရားစွမ်းရည်က ခိုင်မာနက်ရှိုင်းစွာအမြစ်တွယ်နေပြီး မကူညီရဘဲလည်း မနေနိုင်ပြန်ပေ။ နောက်တစ်ချက်မှာ သူမသေချင်သေး။ အကြိမ်ပေါင်းများစွာ ငြင်းခုန်ခဲ့ရပြီးနောက် သူအသက်ရှင်ခဲ့လျှင် သူလူများကို ပိုကူညီနိုင်မည်ဟု သူ့ကိုယ်သူသတိပေးထားခဲ့သည်။ ယခုမူ သူ့အကူအညီကိုလိုအပ်နေသူများက ခန်ကသူ့ကိုရှာတွေ့ပြီး သူ့အားကုသပေးသည်အထိ စောင့်ဆိုင်းနေကြရလေ၏။ ထိုအခါမှ သူပြန်လာပြီး ၎င်းတို့ကိုကယ်တင်ပေးနိုင်မည်။

အိုင်ဗန်သည်လည်း ရွှယ်လင် မမြင်ချင်လောက်မှန်းသိသည်၊ သို့သော် အချစ်မတ္တောကသာ ဖြေရှင်းနိုင်မည်ဖြစ်ကြောင်း သူ ရွှယ်လင်ကိုပြောပြချင်သည်။ သူသည် သူ့အားအဆိပ်ခတ်သည့်လူများက နိမ့်ကျပြီးအဆင့်အတန်းမတူသောကြောင့် ခွင့်လွှတ်ပေးချင်ခဲ့၏။ ၎င်းတို့မလုပ်လည်း သူ့အားအဆိပ်ခတ်သူကရှိလာဦးမည်ပင်။ သူ ခန်၏အမေကိုလည်းမမုန်းပါချေ။ သူသည် ဘုရင်မကြီး၏ ရည်ရွယ်ချက်ကိုလည်းသိနေ၏၊ သူကခန်နှင့်မသင့်တော်လင့်ကစား သူဘုရင်မကြီးနှင့် တွေ့လျှင် သူမအားနားချမည်။ ခန်နှင့်သူ့အကြားမှ မေတ္တာက နက်ရှိုင်းလွန်းလေရာ တစ်လောကလုံးပင် သူတို့၏ချစ်ခြင်းကို ဖြတ်တောက်နိုင်မည်မဟုတ်ပေ။

ရွှယ်လင်သည် အနှီသူက မည်မျှအကွာအဝေးအထိတွေးထားသည်ကို မသိပေ။

အိုင်ဗန် နန်းတော်ထဲသို့ဝင်သွားကြောင်း သိလိုက်ရသည်တွင် စနစ်ကိုသူ့အတွက် တိုက်ရိုက်ကြည့်စနစ်အားဖွင့်ခိုင်းပြီး အိပ်ရာထဲတွင် ပျင်းတွဲစွာဖြင့်အေးအေးလူလူ ဘောလုံးနှယ်ကွေးပြီးလှဲအိပ်နေသည်။ ရှီးက တံခါးဖွင့်ကာဝင်လာသည်တွင် ရွှယ်လင်က လက်ယမ်းပြလိုက်၏။ "အိုင်ဗန် နန်းတော်ထဲဝင်သွားပြီတဲ့..မင်းငါနဲ့အတူကြည့်ချင်လား..."

ရှီးမှာ စနစ်၏တည်ရှိမှုကိုမမြင်ရချေ၊ ရွှယ်လင်နှင့်ပတ်သတ်၍ ထူးဆန်းသည့်အရာရှိသည်ဟုယူဆပြီး ရွှယ်လင်သည်လည်း အိုင်ဗန်ကိုပြချင်နေသည်ဟု ထင်လိုက်မိသည်။ ရွှယ်လင်မှ အခြားလူများကို အာရုံစိုက်နေခြင်းအပေါ် ကျေနပ်မှုမရှိလှသည့်တိုင် ရှီးကသူ့ဘေးတွင်ထိုင်ကာ စွမ်းအားဖြင့် မျက်နှာပြင်တစ်ခုဖန်တီးပြီး အိုင်ဗန်၏လှုပ်ရှားမှုတိုင်းကိုကြည့်နေလိုက်သည်။

ယခင်က ရှီးနှင့်အတူရှိနေလျှင် စိတ်မသက်မသာဖြစ်သည်ဟု ပြောဖူးသောရွှယ်လင်မှာ သက်သောင့်သက်သာအနေအထားမျိုးပြင်လိုက်ပြီး သူ့စကားကိုပစ်ပယ်ကာ ရှီး၏လက်မောင်းထဲတွင် ဝင်ခွေနေရင်း ကြီးကျယ်သောပြဇာတ်ကို အဆုံးအထိကြည့်နေလေသည်။

အိုင်ဗန်မှာ သူ့ကိုယ်ထဲမှအဆိပ်က မည်မျှပြင်းထန်ကြောင်းမသိသေးပေ။ ခန်ကသူ့အားအမှန်အတိုင်းပြောပြလိုက်လျှင် သို့မဟုတ်ဘဲ ထိုကိစ္စကိုအသုံးချပြီး အိုင်ဗန်ကို သူ(ရွှယ်လင်)လက်စားချေမည့်အရေးအား တားဆီးခိုင်းလျှင် ဖြစ်လာမည့်ပုံစံကို ရွှယ်လင်ခမျာသိချင်လှနေပြီ။

ရှီး၏လက်က သူ့ခေါင်းကို ညင်သာစွာနှိပ်နယ်နေပေးနေပြီး နှစ်ယောက်ကြားမှကိစ္စကို လုံးဝစိတ်မဝင်စားသလိုပင်။ "ကိုယ်တို့ဒီအခြေအနေတောင်ရောက်လာပြီ..နောက်တစ်ဆင့်ကဘာလဲ..."

ရွှယ်လင်က ရှီး၏လက်ကို အေးဆေးကိုင်ကစားနေရင်း ခပ်ပေါ့ပေါ့ပင်ပြောလိုက်၏။ "အိုင်ဗန်က ခန်ကို သူ့လက်နဲ့သူသတ်လိမ့်မယ်.."

"ဟင်?" ရှီး၏လက်များကရပ်သွားကာ မျက်မှောင်ကြုပ်လျက်မေးလာ၏။ "မင်းအဲဒီလိုလုပ်ဖို့ ဘယ်လိုမျိုးအစီအစဥ်ဆွဲလိုက်တာလဲ..."

"အများကြီးလုပ်စရာမလိုပါဘူး...သူ့အဆိပ်ကိုဖြေပေးနိုင်ဖို့ မင်းရဲ့အစွမ်းနဲ့ရတယ်လို့ အိုင်ဗန်ကိုပြောလိုက်ရုံပဲ..သူသာအသက်ရှင်ချင်တယ်ဆိုရင် ငါတို့စာချုပ်ရဲ့နဂိုရည်ရွယ်ချက်ကိုသည်းခံဖို့လိုပြီး ခန်ကို ငါ့အတွက် ကူသတ်ပေးလိမ့်မယ်.." ရွှယ်လင်က မျက်လုံးမှေးလိုက်သည်။ အနှီသူကိုကြည့်ရသည်မှာ စိတ်လက်ပေါ့ပါးပြီး ပျင်းရိနေပုံရသည့်တိုင် သူ့မျက်လုံးများက သတ်ဖြတ်လိုစိတ်များဖြင့် ပြင်းပြနေလေသည်။

ရှီးကမျက်လွှာချလိုက်သည်။ "ကိုယ့်နာမည်ကိုသုံးပြီးလုပ်တာဆိုတော့ ကိုယ့်ကိုပြန်ဆပ်ရမှာနော်.."

ရွှယ်လင် သက်ပြင်းချကာ သူ့အားခေါင်းမော့ကြည့်လာ၏။ သူ့ခေါင်းက ရှီး၏ဒူးခေါင်းထက်တွင်တင်ထားသည်။ သူသည်လက်ကိုမြှောက်ကာ ရှီး၏လည်တိုင်တစ်လျှောက်ကို လက်ညိုးဖြင့် ပွတ်သပ်သွားပြီး မေးစေ့ကိုဖျစ်ညှစ်ကာ ခေါင်းငုံ့ချလိုက်သည်။ "ဟုတ်တယ်...မင်းငါ့ကိုအကြွေးထပ်တင်သွားပြန်ပြီ..ဘုရားသခင်မတာပဲ...ငါမင်းအတွက်ဘာပြန်လုပ်ပေးရမလဲ..ငါ့ခန္ဓာကိုယ်နဲ့ ပြန်ဆပ်ရမလား..."

ရှီးက အကူအညီမဲ့စွာဆိုလေသည်။ "ကိုယ်မင်းနဲ့ ဒီလိုမျိုးတော့ ဆက်မသွားချင်ဘူး..." သူသည်ကား သာမန်ထိတွေ့မှုမျိုးကို လိုချင်သည်မဟုတ်။ ၎င်းမတော်တဆမှုဖြစ်ပြီးတည်းက သူသည် 'ခံစားချက်' နှင့် 'အချစ်' ကိုပိုမိုနားလည်လာပြီး သူ၏အချစ်များက ရင်ခွင်ထဲမှလူအတွက်သာ စီးဆင်းနေလေ၏။ တစ်ဖက်လူသည်လည်း သူ၏ခံစားချက်များနှင့်ရည်ရွယ်ချက်ကို အတိအကျသိထားသည့်တိုင် သူ့အားကသိကအောက်ဖြစ်စေပြီး ဘေးတွင် ပစ်စလက်ခတ်ဖယ်ထားကာ သူ၏စိတ်လှုပ်ရှားပြီး ကယ်ရာမဲ့နေသောပုံစံအား ကြည့်နေလေသည်။ "မင်းလည်းသိပါတယ်.."

ရွှယ်လင်၏လက်က ကစားနေရာမှ တစ်ခဏမျှရပ်သွား၏။ ထို့နောက်နှာခေါင်းရှုံ့ကာ ပြန်မဖြေတော့ပေ။

အချိန်အတန်ကြာမှ နောက်ဆုံးတွင်သူစကားပြောလိုက်သည်။ "ငါမင်းကိုလက်စားချေမယ်.."

"လက်စားချေမယ်?" ရှီးက ခါးသက်သက်ပြုံးလိုက်၏။ "ကိုယ်ကမင်းကိုဘာလုပ်မိလို့..." ပြောနေရင်းတန်းလန်း သည်ကာလအတွင်း အသိပညာတိုးနေသော မကောင်းဆိုးဝါးနတ်ဘုရားမှာ မြေခွေးသားပေါက်လေးနှင့် တွေ့စဥ်ကအကြောင်းကို ရုတ်တရက်သတိရသွားပြီး သူနှင့်ပတ်သတ်ပြီး ဖြစ်လာသည့်မရေရာသောခံစားချက်များကြောင့် လဝက်ကြာအောင်ပိတ်လှောင်ထားခဲ့မိသည်ကို မှတ်မိသွားခဲ့သည်..."ကိုယ်မင်းတင်ပါးကိုရိုက်မိလို့လား..."

ရွှယ်လင်က သူ့ကိုသာမော့ကြည့်နေသည်၊ မျက်နှာပေါ်တွင် 'မင်းမေးရဲသေးတယ်' ဆိုသော စကားလုံးများကအပြည့်၊ ထိုအချိန်က သူ၏မြေခွေးသက်တမ်းတွင် သိက္ခာအကျရဆုံးအချိန်ပင်။ အနှီသူက အင်မတန်စိတ်ဆိုးနေခဲ့ပြီး ပါးပြင်ကနီရဲသောကြောင့် ရှီးက သူ့မျက်လုံးထောင့်ကိုနမ်းကာ ခပ်ပျော်ပျော်ပင်ပြောလိုက်သည်။ "အဲဒီတုန်းက ဘယ်သူ့ကိုမလိမ္မာဘူးလို့ပြောခဲ့တာလဲ..."

ထိုသူက တောင်းပန်ရန် စိတ်ကူးရှိပုံမရဘဲ ထိုအမှတ်တရကို ပြန်သတိရ၍ ပျော်ပင်နေသေးသည်။ သူသည် ရွှယ်လင်၏ပါးကို ညှစ်ကိုင်ပြီး ရွှယ်လင်ကသူ့လက်ကို ရိုက်ထုတ်လိုက်သည်။ ရှီးကသူ့ခေါင်းကိုပွတ်သပ်ပေးလိုက်၏။ "မင်းပဲပြောတာလေ...ကိုယ်တို့ကြားက အငြိုးအတေးနဲ့ အကြွေးတွေက ရှင်းပြီးသားဆို..ကိုယ်မင်းကိုလုပ်ခဲ့တာတွေ ဒါမှမဟုတ် ကိုယ့်ကိုအသုံးချခဲ့တာတွေကရော ရှင်းလိုက်ပြီလား..."

ရွှယ်လင်: "....." သူပဲပြောပြီး သူပဲစိတ်ဆိုးပြနေတယ်!

သူသည် ရှီးကိုကြည့်နေရာမှ ခေါင်းလှည့်သွားကာ အနှီသူကို လျစ်လျူရှုထားလိုက်တော့သည်။ မျက်နှာပြင်ပေါ်တွင် အိုင်ဗန်မှာ ခန်၏ရင်ခွင်ထဲတွင် ငိုကြွေးနေလေပြီ။

၎င်းတို့မှာ နှစ်ပတ်ခန့်ကြာအောင်ခွဲရသည်ကရှားသည့်တိုင် ခန်၏ချစ်သူမျက်နှာက ပိုမိုပိန်ကျသွားသယောင်ပင်။ ခက်ခဲကြမ်းတမ်းသည့်ခရီးစဥ်က အိုင်ဗန်၏ကလေးကဲ့သို့ ဝိုင်းစက်နေသည့်မျက်နှာလေးကို ချောင်ကျသွားစေခဲ့ပြီး သိသာစွာပိန်သွားစေခဲ့၏။ မျက်နှာရှည်ရှည်ဖြင့် မျက်လုံးဝိုင်းကြီးများက သည်းကြီးမည်းကြီးငိုကြွေးနေသည့်အခါ ခန်မှာ သံသယများကိုဖျောက်ပစ်လိုက်သည်၊ လက်မောင်းကြားတွင်ပွေ့ဖက်ထားရင်း ထိုသူ၏ငိုကြီးချက်မနှင့် ရှင်းပြချက်များကိုနားထောင်နေရရှာသည်။

"ငါ့ဆံပင်နဲ့ငါ့မျက်လုံးတွေ...မဟုတ်မှ...မဟုတ်မှ..ငါမင်းကိုတွေ့ဖို့အတွက်သာမဟုတ်ရင် ဒီနေရာအထိလိုက်ခဲ့မှာမဟုတ်ဘူး..." အိုင်ဗန်မှာ သူ့ကိုယ်ထဲရှိအဆိပ်များကြောင့် ထိတ်လန့်နေလေပြီ။ အလင်းစွမ်းအားကိုလည်း မစုပ်ယူနိုင်တော့ဘဲ အမှောင်ထု၏ ဖြည်းဖြည်းခြင်း ဝါးမြိုဖျက်စီးမှုကြောင့် ကြောက်ရွံနေရလေပြီ။ သူနေ့တိုင်းခံစားခဲ့ရပြီး ခန်ကြောင့်သာ ဘက်စ်ပိုကာသို့လာသည့် လမ်းတစ်လျှောက် တောင့်ခံနိုင်ခဲ့ခြင်းဖြစ်သည်။

"ခန်...သူတို့ကပြောတယ်...မင်းကမင်းသားဆို...အိမ်ရှေ့စံမင်းသားဆို...မင်းရဲ့နောက်ခံကဘာလဲငါမသိဘူး..ငါသိတာတစ်ခုပဲရှိတယ်...မင်းကငါ့ချစ်သူ...ငါတစ်ရက်ပြီးတစ်ရက် စိတ်ဒုက္ခရောက်နေတာကို မကြည့်ရက်ဘူးမလား...ဟုတ်တယ်မလား..." သူသည် ခန်၏လက်မောင်းကို မှီလိုက်ပြီး လက်ကိုဆွဲကာ သူ့လက်မောင်းထဲသို့ ဆွဲသွင်းလိုက်သည်။ "ဒီနှလုံးသားက မင်းကိုချစ်လို့ အခုထိခုန်နေသေးတာ...ဒါရပ်သွားတာကို မင်းကြည့်နေမှာလား...ငါသေသွားတာကိုရော ကြည့်နေမှာလား..."

ရွှယ်လင် နှုတ်ခမ်းကိုတွန့်လိုက်မိ၏။ အော်ပရာပြဇာတ်ပင် ဤမျှဒရမ်မာဆန်မည်မဟုတ်။ အိုင်ဗန်က သည်လိုလူမျိုးမဟုတ်မှန်း သူမပြောနိုင်ချေ။ နှစ်ယောက်သားက ဘေးလူများမရှိသလိုပင် သရုပ်ဆောင်နေကြလေသည်.....။

"အိုင်ဗန်..." ခန်၏မျက်နှာက ပူဆွေးဝမ်းနည်းမှုများဖြင့် ပြည့်နေလေ၏။ သူသည်အိုင်ဗန်၏ခေါင်းအနောက်ကို ခပ်ဖွဖွပုတ်ကာနှုတ်ဆိတ်နေပြီး အတန်ကြာမှ စကားပြောလာခဲ့သည်။

"မင်းကိုကူညီပေးတာအိုလီဗာမလား.." အိုင်ဗန်က ထိုအမည်ပိုင်ရှင်ကို ချန်လှပ်ခဲ့သော်လည်း ခန်မှာဖြစ်ပျက်နေသမျှကို ရှင်းရှင်းလင်းလင်းသိနေလေ၏။ "သူကမင်းကို မကောင်းဆိုးဝါးသားရဲတောအုပ်ကနေ ခေါ်ထုတ်ခဲ့ပေးတာမလား.."

"သူက ကောင်းတဲ့သဘောနဲ့မဟုတ်ဘူး..." အိုင်ဗန်က ငိုနေသည့်အခါ နွဲ့နှောင်းသောအလှလေးနှင့်ပင်တူနေလေ၏။ "ငါ့ကိုယုံပါ..ခန်..သူငါ့ကိုခွင့်လွှတ်မှာမဟုတ်ဘူး...မင်းကို..."

"အိုင်ဗန်...ချစ်ရတဲ့အိုင်ဗန်ရယ်...မင်းကိုယ့်ကိုဒီတစ်ခါသာ ကူညီမယ်ဆိုရင် ကိုယ်မင်းကိုအဆိပ်ထုတ်ပေးမယ်...ပြီးတော့ မင်းကိုကြင်ယာတော်အနေနဲ့ လက်ထပ်ဖို့ အမေ့ကိုခွင့်တောင်းမယ်...နောင်ကျရင် မင်းကဒီတိုင်းပြည်ရဲ့ မိဖုရားဖြစ်လာလိမ့်မယ်.." သူအိုင်ဗန်၏နောက်ကျောကို သာသာလေးပုတ်ပေးပြီးပြောလိုက်၏။ "အိုင်ဗန်...တော်ဝင်မိသားစုကို မနှောင့်ယှက်ဖို့ အိုလီဗာကိုပြောပေးပါ.."

အိုင်ဗန်က တောင့်ကနဲဖြစ်သွားသည်။ ဖြစ်ပျက်နေသည့်ကိစ္စများကို သူမသိသော်လည်း ခန်၏စကားကို ကြားလိုက်ရသည့်အခါ အံ့အားသင့်သွားကာ မျက်ရည်များကို သုတ်ပစ်ပြီး ထူးထူးဆန်းဆန်းပြောလာ၏။ "ငါနားမလည်ဘူး...မင်းဘာပြောချင်တာလဲ..."

ခန်က ပါးစပ်အဟောင်းသားနှင့် သူနန်းတော်ထဲသို့ဝင်လာပြီး ဓားပြတိုက်ခဲ့သည့်အကြောင်းနှင့် ကောင်းကင်အဆင့်မှော်ဆရာကိုထိခိုက်အောင်လုပ်ခဲ့သည့် အကြောင်းများကိုပြောပြလိုက်သည်။ အဓိကအချက်မှာ အိုလီဗာကပိုသန်မာလာပြီး ယခုသူ့အားတိုက်ခိုက်ရန်မဖြစ်နိုင်တော့၍ အားနည်းချက်ကိုသာတိုက်ခိုက်မှရတော့မည်။ ခန်သည် အိုင်ဗန်က ရွှယ်လင်နှင့် မျက်နှာချင်းမဆိုင်ချင်မည်ကို စိုးရိမ်နေပုံရပြီး ဖြစ်ပျက်ခဲ့သမျှများကိုပြောပြခဲ့သည်။

"နတ်သက်ကြွေခြင်းအဆိပ်က ဖြေဆေးမရှိဘူး..မင်းသောက်လိုက်တဲ့အဆိပ်က မင်းရဲ့စိတ်ကိုလုံးဝအမှောင်ဖုံးသွားစေပြီး သုံးရက်အတွင်းသေသွားလိမ့်မယ်...ဒါပေမဲ့ အခုမင်းအသက်ရှင်နေသေးတယ်လေ..ဘာလို့လဲဆိုတော့ အိုလီဗာကြောင့်မလို့..စာချုပ်ကိုဖျက်ပြီး သူ့ရဲ့မိစ္ဆာအမြုတေကိုပြန်ပြင်ခဲ့လို့...ပြီးတော့ သူ့ရဲ့အစွမ်းကို လက်ရှိအနေအထားအထိ ပြန်တက်လာအောင်လုပ်ခဲ့တယ်...သူ့မှာမင်းကိုကယ်ပေးဖို့နည်းလမ်းရှိတယ်..." ခန်ကအိုင်ဗန်၏လက်ကိုကိုင်ပြီး သေချာသလိုပြောနေခဲ့သည်။

အိုင်ဗန်မှာ နတ်သက်ကြွေခြင်းအဆိပ်၏ ပြင်းထန်သောသက်ရောက်မှုမှ ပြန်ကောင်းမလာသေးဘဲ အနည်းငယ်ခန့်အားနည်းနေသေးသည်။ သူ့ကို ယနေ့အထိ အသက်ရှင်ခွင့်ပေးထားခဲ့သည်မှာ အိုလီဗာသာဆိုလျှင် သူ့ကိုသေစေချင်ပါက ဘာများဖြစ်သွားမည်နည်း.....။

အိုင်ဗန်သည်ကား အကြောက်တရားများဝိုင်းအုံနေသလိုခံစားနေရ၏။ ခန်၏စိတ်ချယုံကြည်မှုများက သူ့အားအနည်းငယ်ပင်ချမ်းသာမပေးပါချေ။

"ခန်...ငါတို့ဘာလုပ်ကြမလဲ...သူကငါ့ကိုကယ်ချင်ပါ့မလား..သူသာငါ့ကိုအဲဒီအချိန်က ကယ်ချင်ခဲ့တာဆိုရင်..ငါအဆိပ်သောက်တည်းကထိုင်ကြည့်နေခဲ့မှာမဟုတ်ဘူး..."

"ဒါပေမဲ့သူက မင်းအတွက်နဲ့ နန်းတော်အထိလာခဲ့ရတယ်..." ခန်ကသက်ပြင်းချလိုက်သည်။ "သူသာ မင်းကိုတကယ်ဂရုမစိုက်ဘူးဆိုရင် မင်းဘက်စ်ပိုကာကို မလာခင်တည်းက ဘာကိစ္စနဲ့ကိုယ့်ကိုတိုက်ခိုက်မှာလဲ..."

"....." အိုင်ဗန်မှာ ထိုစကားကြောင့် အယူမှားသွားပုံရပြီး ငြိမ်ကျသွားလေသည်။ သူကမျက်မှောင်ကြုပ်ရင်း ပြောလိုက်လေ၏။ "အဲဒီလိုဆိုရင်တောင်...ငါသူ့ကိုဘယ်နေရာသွားရှာရမလဲမသိဘူး...သူကပုန်းတတ်တယ်..."

"သူသာမင်းကိုတကယ်ဂရုစိုက်ရင်...မင်းဘက်စ်ပိုကာကိုရောက်နေပြီဆိုတာ သူသိလိမ့်မယ်...သူမင်းကိုနောက်တစ်ခါလာရှာပြီး ကိုယ်တို့နဲ့ဆွေးနွေးဖို့ အခွင့်အရေးပေးလိမ့်မယ်..."

"......."

"စိတ်ချစမ်းပါ...ကိုယ်ဒီမှာရှိနေပါတယ်..." ခန်သည် အိုင်ဗန်နဖူးကို နမ်းလိုက်ပြီး အစေခံများကိုခေါ်လိုက်၏။ "မင်းသူတို့နဲ့လိုက်သွားပြီး ကိုယ်လက်ဆေးကြော အနားယူလိုက်နော်...ကိုယ်မင်းကိုပြီးမှလာတွေ့မယ်...စိတ်အေးအေးထားပါ..ကိုယ်မင်းကိုအားလုံးကူညီပေးမယ်...ကိုယ့်တာဝန်သာထားလိုက်.."

အိုင်ဗန်ကခေါင်းညိတ်လိုက်သည်။ လှည့်ထွက်လာစဥ်တွင် သူ့မျက်လုံးထဲ၌ အခြားအစီအစဥ်တစ်ခုရှိနေ၏။

သူကတုံးအလင့်ကစား အိုင်ဗန်သည် ခန်ပြောသမျှကို ဆက်ယုံတော့မည်မဟုတ်...သူအိုလီဗာနှင့် တွေ့ခဲ့ပြီးပြီ၊ ထိုသူ၏မျက်လုံးထဲတွင် သူကလမ်းလျှောက်နေသည့်အသေကောင်သာသာပင်။ ဘယ်လိုလုပ် အိုလီဗာကသူ့အတွက် ခန်ကိုသွားရှာပေးပါမည်နည်း။

ရုတ်တရက် အိုင်ဗန် တစ်ခုကိုမှတ်မိသွားသည်...သူအိုလီဗာကို ကျိန်စာတိုက်လိုက်မိဖူးသည်....။

ထိုစဥ်က သူခန်ကိုမပြောပြရသေးပေ၊ ထို့ကြောင့် ခန်က သူအိုလီဗာအပေါ်တွင် ကျိန်စာထားခဲ့သောကြောင့် အနှီသူကိုဘာမျှမလုပ်နိုင်ခြင်းဖြစ်ကြောင်းမသိထားသေး...သူခန်ကိုမသတ်နိုင်သော်ငြား ထိုသူကိုလာခြိမ်းခြောက်နိုင်သည်။ ဘာအတွက်များပါနည်း....။

အိုင်ဗန်သည် အစေခံများအနောက်မှ လိုက်လာပြီး အတွေးထဲတွင်နစ်မောစွာဖြင့် ထွက်ခွာလာခဲ့ရ၏။

ရွှယ်လင်က လူနှစ်ယောက်ထံမှ မျက်လုံးခွာလိုက်ပြီး အကြောဆန့်ကာ မတ်တပ်ထရပ်သည်။ "ထပ်ကြည့်စရာမရှိတော့ဘူး...အသင့်ပြင်ထားတော့...ဒီည ငါတို့တွေကိစ္စအကုန်ဖြတ်မယ်..."

"မင်းကျိန်စာကိုဖြည်ဖို့ တကယ်ပဲကိုယ့်ကိုမလိုဘူးလား..."

"မလိုဘူး..." ရွှယ်လင်က ပေါ့တိပေါ့ပြက်ပင်ပြောလာလေသည်။ "သူသေဖို့လောက်နဲ့ ငါတစ်ချက်တောင်လှုပ်စရာမလိုဘူး..ကျိန်စာဖြည်တော့ရော ဘာဖြစ်သွားမှာလဲ..."

ရွှယ်လင်ကလှည့်ကာ လှလှလေးပြုံးပြလိုက်သည်။ "ခန်သေရင် အိုင်ဗန်ကဘယ်လိုမျိုးပြောင်းလဲသွားမှာလဲ...ငါအရမ်းသိချင်နေပြီ..."

ယခု အဓိကနေရာသို့ရောက်လာခဲ့ပြီ၊ သူ ဤကမ္ဘာ၏ဇာတ်လမ်းကို ပြောင်းလဲနိုင်ခဲ့ပြီ။ ခိုင်ကျီ ဟုခေါ်သော နတ်ဆိုးဘုရင်နှင့် ၎င်း၏ရှုပ်ထွေးလှသည့် သည်းထိတ်ရင်ဖိုဇာတ်ကြောင်းမှာ မူလဇာတ်လမ်းမှဝေးကွာသွားပြီ၊ ရွှယ်လင်ဒုက္ခရောက်မည့်ဘေးမှ ဝေးသွားခဲ့ပြီ။

"အိုင်ဗန်ကတော့ ငါဇာတ်သိမ်းကောင်းအောင်လုပ်ပေးလိုက်လို့ ငါ့ကိုကောင်းကောင်းကျေးဇူးတင်သင့်တယ်.."

Prev Next