Chapter 181

🦊Arc 12 -[ နတ်ဘုရား၏ မျက်နှာသာပေးခံရသော ဝံပုလွေပေါက်လေး]

Chapter 181

12.4 – ရွှယ်လင် သူ့ကျောရိုးတစ်လျှောက် တုန်လှုပ်သွားသည်ကို နားမလည်နိုင်စွာ ခံစားလိုက်ရသည်

ရွှယ်လင် နာကျင်စွာ နိုးလာခဲ့သည်။ သူ့တွင် မည်ကဲ့သို့ ပြုပြင်ထားသော ခန္ဓာကိုယ်လုံးဖွဲ့စည်းမှု ရှိစေကာမူ အထူးသဖြင့် သူ၏နတ်ဆိုးအမြုတေ ပျက်စီးသွားပြီး စွမ်းအား လုံးဝ မရှိတော့ကြောင်း ယူဆကြည့်လျှင် ဤမျှ မြင့်မားသော အမြင့်မှ ပစ်ချခံရပြီးနောက် ထိခိုက်ဒဏ်ရာမရနိုင်သည့် နည်းလမ်းမရှိပေ။

နောက်ဆုံး သူ ခေါင်းကိုမော့ပြီး လှည့်ပတ်ကြည့်ရှုခြင်းမပြုမီ မြေကြီးပေါ်တွင် ခဏလှဲနေလိုက်ရသည်။

မှောင်နေပေပြီ။ သို့သော် သူ့မျက်လုံးများနှင့်တွေ့လိုက်ရသည့် မြင်ကွင်းသည် နတ်ဆိုးသားရဲတောအုပ်၏ အခြားအလွှာများတွင် သူမြင်ခဲ့ရသည့် မြင်ကွင်းများနှင့် အလွန်ကွာခြားပေသည်။

နတ်ဆိုးအပင်များသည် ဤဧရိယာတွင် ပြောင်ပြောင်တင်းတင်း မပြုမူ မလှုပ်ရှားဝံ့ကြပေ။ သူတို့သည် အထိန်းအချုပ်မရှိဘဲ ကောင်းမွန်စွာ ကြီးထွားလာသော်လည်း အပြင်ဘက်အလွှာများရှိ နတ်ဆိုးအပင်များ၏ ရန်လိုမှုနှင့်တူသော အရိပ်အယောင်တစ်ခုမျှမရှိပေ။ 

နတ်ဆိုးသားရဲတို့သည်လည်း ညအချိန်၌ ထွက်ခွာသွားခြင်းမရှိပေ။ ရွှယ်လင် ကောင်းကင်ကို မော့ကြည့်သောအခါတွင် ရင်သပ်ရှုမောဖွယ်ကောင်းသော ငှက်တစ်ကောင်သည် သူ့ခေါင်းပေါ်တွင် ပျံဝဲနေသည်။ အတောင်ပံခတ်လိုက်သောအခါ သူ၏အမွေးအတောင်များမှ တလက်လက်တောက်ပနေသော မီးပွားများ ကျဆင်းလာပြီး ၎င်း၏အမြီးသည် ယိမ်းနွဲ့တောက်ပနေကာ ကောင်းကင်တစ်ခုလုံးအား အလင်းရောင်ဆင်မြန်းထားပေးသည်မှာ ခန့်ငြားလှပသည့် မီးတောက်များကဲ့သို့ပင်။

အလင်းရောင်ရရှိရန် ထိုငှက်သည် ဤနေရာတွင် ရှိနေခြင်းဖြစ်နိုင်သည်။ အမှောင်ထုကြောင့် ရွှယ်လင်၏ အမြင်အာရုံသည် ဝေဝါးသွားခြင်းမရှိပေ။ တောက်ပသော အပင်များနှင့် တိရစ္ဆာန် အမျိုးပေါင်းများစွာ ရှိပေသည်။ ၎င်းတို့သည် အလင်းရောင်ဖျော့ဖျော့ကို ထုတ်လွှတ်ပေးကြသော်လည်း ရွှယ်လင်နှင့် ခပ်ဝေးဝေးတွင် ရှိနေပေသည်။ အကြောင်းတစ်ခုခုကြောင့် တစ်သီးတစ်ခြားစီ ဖြစ်နေသလိုခံစားရသည်။

ရွှယ်လင် ထကာ ခြေထောက်များကို လှုပ်ယမ်းလိုက်ပြီး လှုပ်ရှားနိုင်ဆဲဖြစ်ကြောင်း အတည်ပြုစစ်ဆေးပြီးနောက် တုံ့ပြန်မှုမရှိသော အကူစနစ်ကို ခေါ်ဆိုလိုက်သည်။

သစ္စာဖောက်ခဲ့သည့်ကိစ္စနှင့် ပတ်သက်ပြီး ရွှယ်လင် သူ့အား ရိုးရိုးရှင်းရှင်း လျစ်လျူရှုထားမည်မဟုတ်ကြောင်း သိထားသောကြောင့် ယခုအခါ အကူစနစ်သည် သေချင်ဟန်ဆောင်နေသည်  ကျည်ဆံကို တစ်ကြိမ်တစ်ခါရှောင်လိုက်ခြင်းသည် ဘာမှမလုပ်တာထက် ပိုကောင်းသေးသည်။ ရွှယ်လင် ၎င်းအား အချိန်အတော်ကြာအောင် ခြိမ်းခြောက်ခဲ့သော်လည်း မအောင်မြင်ခဲ့သောကြောင့် ယခု သူရောက်ရှိနေသောနေရာကို သိရှိနိုင်ရန် ပိုမိုမြင့်မားသောနေရာတစ်ခုသို့ တက်ရောက်ရန် ကြိုးစားရုံသာတတ်နိုင်သည်။

အကူစနစ်က ထိုကဲ့သို့ နယ်နိမိတ်ကို အလွယ်တကူ ဖြတ်ကျော်နိုင်လိမ့်မည်ဟု သူ မမျှော်လင့်ထားခဲ့သောကြောင့် အနည်းငယ် စိတ်ရှုပ်သွားခဲ့သည်။ သူ့ပတ်ဝန်းကျင်နေရာကို စူးစမ်းလေ့လာပြီး ထူးဆန်းသောအရာတစ်ခုကို ရှာဖွေတွေ့ရှိခဲ့သည်။ အပင်များနှင့် တိရစ္ဆာန်များသည် သူ့ကို အလွန်သတိထားကာ ရှောင်ရှားသွားကြသည်။ သူတို့အားလုံးသည် သူတို့ကိုယ်သူတို့နှင့် ရွှယ်လင်၏အကြား အကွာအဝေးတစ်ခုကို ထိန်းသိမ်းထားပြီး သူ့ကို ပလိပ်ရောဂါတစ်ခုကဲ့သို့ ပြုမူဆက်ဆံနေကြသည်။

သူက အပြင်ဘက်ကနေ ဝင်လာတာကြောင့် ဒီအပင်တွေနဲ့ တိရိစ္ဆာန်တွေက အလွန်သတိထားနေကြတာလား...။

ရွှယ်လင် ခက်ခက်ခဲခဲ စဥ်းစားခဲ့သော်လည်း သူတို့၏ လုပ်ရပ်အတွက် အကြောင်းပြချက် တစ်စုံတစ်ရာကို မစဉ်းစားနိုင်ခဲ့ပေ။ လက်ရှိတွင် သူ့တွင် မေးမြန်းရန်မည်သူမျှ မရှိတော့ဘဲ သူ့ကိုယ်တိုင် စူးစမ်းလေ့လာမှုများကို ဖြည်းဖြည်းချင်း ဆက်လက်လုပ်ဆောင်နိုင်ခဲ့သည်။

ဗဟိုအလွှာသည် ချိုင့်ဝှမ်းပုံသဏ္ဍာန်ရှိပေသည်။ မည်သည့်နေရာတွင် ရောက်နေသည်ကို ရွှယ်လင် မသိသော်လည်း အလယ်ဗဟိုသို့ ဦးတည်သွားလျှင် ကောင်းပေလိမ့်မည်။ ဒဏ္ဍာရီများနှင့် မူရင်းပုံပြင်အရ မြင့်မြတ်သောရေကန်သည် ဗဟိုအလွှာ၏ အလယ်ဗဟိုတွင် ရှိသင့်သည်။ ရွှယ်လင် အသင့်အတင့် စောင်းနေသောမြေကြီးတစ်လျှောက် အချိန်ခဏမျှ လျှောက်သွားနေစဥ် လေပေါ်တွင်ပေါ်နေသော မီးရောင်အနည်းငယ်သည် သူ့အာရုံကို ဖမ်းစားသွားသည်။

ညအချိန်၌ပင် အလယ်ဗဟိုအလွှာသည် လုံးဝခြောက်ခြားစရာမရှိပေ။ ဆန့်ကျင်ဘက်အနေဖြင့် ဒဏ္ဍာရီဆန်ဆန် ဆွဲဆောင်မှုတစ်ခု ရှိနေပုံရသည်။ ဇာတ်ဆောင် Shou ဤနေရာတွင် အချိန်အတိုင်းအတာတစ်ခုအထိ လွတ်လပ်ကာ အပူအပင်ကင်းသောဘဝဖြင့် နေထိုင်နိုင်စေရန် ထိုကဲ့သို့ သတ်မှတ်ထားခဲ့ခြင်းဖြစ်နိုင်သည်။ ဤနေရာတွင်နေထိုင်သော နတ်ဆိုးများသည် အကြောင်းပြချက်မရှိဘဲ ကြုံသလိုမတိုက်ခိုက်သည့် ကြယ်ငါးပွင့်အဆင့်ရှိ အသိညဏ်မြင့်သော ဒဏ္ဍာရီလာသတ္တဝါများဖြစ်သောကြောင့် ဤပတ်ဝန်းကျင်သည် အလွန်ငြိမ်းချမ်းပြီး ဘေးကင်းလုံခြုံပေသည်။ သူတို့၏အဆင့်တွင် လူသားပုံစံကို သူတို့စိတ်ကြိုက် လွတ်လွတ်လပ်လပ် အသွင်ယူနိုင်ပြီး ကမ္ဘာမြေကြီး၏စွမ်းအင်ဖြင့် သူတို့ကိုယ်တိုင် ရပ်တည်နိုင်သောကြောင့် အသက်ရှင်ကျန်ရစ်ရန်အတွက် အမဲလိုက်ခြင်းအပေါ်  မှီခိုရန်မလိုအပ်ပေ။ ပျံသန်းနေသည်ဖြစ်စေ၊ လမ်းလျှောက်နေသည်ဖြစ်စေ ရွှယ်လင် မြင်တွေ့ရသော နတ်ဆိုးအကောင်တိုင်းသည်

မယုံနိုင်လောက်အောင် လှပပြီး 'ဒဏ္ဍာရီလာ' ဟူသော စကားလုံးမျိုးနှင့် လုံးဝထိုက်တန်ပေသည်။

နတ်ဆိုးသားရဲထံမှ အလင်းရောင်အစက်အပြောက်လေးများသည် နဂို အပင်များမှလာသော အလင်းရောင်များနှင့် ကွာခြားသည်။ ၎င်းတို့သည် ရွှယ်လင်ကို မရှောင်သွားဘဲ ထိုအစား သူ့အနီးအနားတွင် လှည့်ပတ်နေခဲ့သည်။ သူတို့ထဲမှအချို့သည် သူ့အမွေးများပေါ် ရောက်လာကြပြီး အလိုလိုက်ပေးရန် တောင်းဆိုနေသလို ချစ်စဖွယ်ကောင်းစွာ လှည့်ပတ်နေကြသည်။ ၎င်းတို့သည် မျက်လုံးများ၊ နားများ၊ နှာခေါင်းများစသည်ဖြင့် ကင်းမဲ့နေသော အလင်းတန်းများသာ မဟုတ်ပါလျှင် ထိုအလင်းတန်းများသည် အသက်ရှိနေသည်ဟု ရွှယ်လင် ထင်မိပေလိမ့်မည်။

အချိန်ကြာလာသည်နှင့်အမျှ သူ ရှေ့ဆက်သွားလေလေ အလင်းအစက်လေးများ များလာလေလေပင်။ ရွှယ်လင် ထိုအလင်းစက်လေးများဖြင့် အဝိုင်းခံထားရသောကြောင့် အံ့အားသင့်စွာ လှမ်းကြည့်လိုက်သည်။ သူမြင်နိုင်သည့် အကွာအဝေးသည် အကန့်အသတ်ရှိသော်လည်း ဥတ္တရအလင်းတန်းကဲ့သို့ ဖဲကြိုးပုံစံ အလင်းတန်းများသည် ကောင်းကင်ယံတွင် ပေါ်ထွက်လာပြီး သူ့ရှေ့ရှိလေထုထဲ၌ လွင့်မျောနေသည်။ ဤအလင်းတန်းများသည် ထိုနေရာမှ ထွက်လာပုံရသည်။

အံ့သြစရာကောင်းသည်မှာ ရွှယ်လင်၏ခန္ဓာကိုယ်ပေါ် ကျရောက်လာသော အလင်းရောင် အစက်အပြောက်များသည် နောက်ဆုံး၌ သူ စုပ်ယူလို့ရနိုင်သည့် စွမ်းအင်အဖြစ်သို့ ပြောင်းလဲသွားသည်။ သူ၏နတ်ဆိုးအမြုတေသည် ပျက်စီးသွားသဖြင့် မည်သည့်စွမ်းအင်ကိုမျှ မစုပ်ယူနိုင်ခဲ့ပေ။ သူ စုပ်ယူနိုင်ခဲ့လျှင်တောင် ၎င်းကိုသိမ်းဆည်းရန် နည်းလမ်းမရှိသောကြောင့် ထိုစွမ်းအင်သည် သူ့ခန္ဓာကိုယ်မှ တဖြည်းဖြည်း လွင့်ပါးပျောက်ကွယ်သွားပေလိမ့်မည်။ 

သို့သော် ထိုအလင်းရောင်များသည် မတူညီကြပေ။ ထိုအလင်းရောင်များ သူ့ခန္ဓာကိုယ်ထဲသို့ ဝင်ရောက်သွားပြီးနောက် သူ့နတ်ဆိုးအမြုတေသည် စတင်တုံ့ပြန်လာကြောင်း ရွှယ်လင် ရှင်းရှင်းလင်းလင်း ခံစားလိုက်ရသည်။ သူ့တွင် စွမ်းအင်ကို သိုလှောင်ရန် နည်းလမ်းမရှိသေးသော်လည်း အလင်းအစက်အပြောက်များ ဆက်လက်စုပုံလာပြီး သူ့ခန္ဓာကိုယ်သည် ခွန်အားနည်းပါးမှု လျော့နည်းလာသည်ကို စတင်ခံစားလာရသည်။ မူလက ရွှယ်လင် အနည်းငယ်နှေးကွေးစွာ ရွေ့လျားနေခဲ့သော်လည်း အဆုံးသတ်တွင် ထိုအလင်းတန်းများဆီသို့ ခြေလှမ်းမှန်မှန်ဖြင့် ပြေးသွားမိသည်။

၎င်းနေရာသည် မြင့်မြတ်သောရေကန် တည်ရှိသည့်နေရာဖြစ်သည်မှာ သိသာထင်ရှားပေသည်။ ကိစ္စများသည် ဤမျှရိုးရှင်းလွယ်ကူလိမ့်မည်ဟု ရွှယ်လင် မမျှော်လင့်ထားပေ။ ဤအဖြစ်အပျက်များသည် အမှန်တကယ်ကို လှည့်စားမှုများထဲမှ ကောင်းချီးတစ်ခုပင်။

မေ့လိုက်တော့... အရာရာ မသေချာသေးသော အခြေအနေတွင် အလံများကို သတိမရှိဘဲ မလွှင့်ထူမိလျှင် သူ့အတွက် ပိုကောင်းပေလိမ့်မည်။

လက်ရှိတွင် သူသည် ပြင်းထန်စွာ ဒဏ်ရာရရှိထားသော ကြယ်သုံးပွင့်နတ်ဆိုးသားရဲတစ်ဦးမျှသာဖြစ်သည်။ ဤတောအုပ်ထဲတွင်နေထိုင်သော ဘယ်အရာမဆို သူ့ကို တစ်စက္ကန့်အတွင်း အလွယ်တကူ သတ်ပစ်နိုင်သည်။ သူ အရမ်းပျော်ရွှင်နေပြီး တကယ်သာ တစ်ခုခုဖြစ်ခဲ့လျှင် ရယ်စရာကောင်းနေပေလိမ့်မည်။

နောက်ထပ် တိုတောင်းလှသည့် အကွာအဝေးတစ်ခုသို့ ပြေးသွားပြီးနောက် ဤအလင်းရောင်အစုလေးများသည် နတ်သမီးပုံပြင်ထဲမှ မြင်ကွင်းတစ်ခုကဲ့သို့ ရွှယ်လင်၏ခြေဖဝါးအောက်သို့ ပွတ်တိုက်စီးဆင်းသွားပြီး မှုန်ဝါးသော အလင်းရောင်အလွှာတစ်ခုအဖြစ်သို့ ပြောင်းလဲသွားခဲ့သည်။

မြင့်မြတ်သောရေကန်သည် နတ်ဘုရားများ မွေးဖွားရာနေရာဟု ဒဏ္ဍာရီလာရှိပေ၏။ သူတို့သည် မြင့်မြတ်သောရေကန်မှ ထွက်ခွာခဲ့ကြပြီးနောက် နတ်ဘုရားများအဖြစ်သို့ အသွင်ပြောင်းလဲသွားခဲ့ကြပြီး ကမ္ဘာပေါ်တွင် စွမ်းအားအကြီးဆုံး တည်ရှိမှုမျိုး ဖြစ်လာခဲ့ကြသည်။ ရေကန်ထဲတွင် စိမ်နေသရွေ့ မည်သူမဆို နတ်ဘုရားဖြစ်ရန် အလားအလာ ရှိလာပေလိမ့်မည်။ ဇာတ်ဆောင် shou ဤနေရာတွင် စိမ်နေသောအခါ သူ၏စိတ်ဝိညာဉ်ကို ညစ်ညမ်းစေသော အမှောင်ထုကို ဖယ်ရှားပစ်စေရုံမျှမက သူ၏စိတ်ဝိညာဉ်ကိုလည်း သန့်စင်သွားစေခဲ့သည်။

နောက်ပိုင်းတွင် ဤသန့်စင်မှုသည် နတ်ဆိုးကမ္ဘာ၌ လုံးဝပျက်စီးသွားသော်လည်း မြင့်မြတ်သောရေကန်၏ သန့်စင်နိုင်စွမ်းမှာ  ထူးခြားနေဆဲပင်။

ယခုအခါ ရွှယ်လင် ပို၍လျှင်မြန်စွာ ပြေးသွားပြီး မြင့်မြတ်သောရေကန်သို့ ရောက်သောအခါ မြူအလွှာသည် ပို၍ ထူထပ်သိပ်သည်းလာသည်။

၎င်းကို ရေအိုင်ငယ်လေးဟု အမှန်တကယ် ခေါ်လို့မရပေ။ တကယ်တမ်း၌ ၎င်းသည် လှပသောအလင်းတန်းများ ချိတ်ဆွဲထားသည့် ကျယ်ပြန့်လှသော ရေကန်ကြီးတစ်ခုပင်။ သက်တံရောင် မြူနှင်းအလွှာတစ်ခုသည် ၎င်း၏မျက်နှာပြင်ပေါ်တွင် လွင့်ပျံနေပြီး ထိုမြူမှုန်များမှ အဖြူရောင်ရေနွေးငွေ့များသည် ရစ်သိုင်းကာ ထွက်ပေါ်နေသည်။ မြင့်မြတ်သောရေကန် တစ်ခုလုံးသည် အရှေ့တိုင်းဒဏ္ဍာရီများမှ အမတပုဂ္ဂိုလ်များ၏ နေထိုင်ရာနေရာနှင့် တူလှပေသည်။ မြင်ကွင်းသည် အဆမတန်လှပလွန်းလှ၏။

သူ့ခြေထောက်အောက်တွင် လှည့်ပတ်သွားလာနေသော မြူခိုးများသည် ရွှယ်လင်၏ ခန္ဓာကိုယ်သေးသေးလေးကို ဖုံးအုပ်လုနီးပါး ဖြစ်နေပေပြီ။ မည်သည့်အရာများဖြစ်ပျက်နေကြောင်း အကူစနစ် သိသွားသောအခါ ရွှယ်လင်ကို တိုက်တွန်းရန် ခုန်ထွက်လာခဲ့သည်။ "host မြန်မြန်သွားပြီးအထဲမှာစိမ်နေလိုက်! နောက်ထပ် ဘာဆက်ဖြစ်မယ်ဆိုတာကို ပြောနေစရာတောင်မလိုဘူး"

ရွှယ်လင် မည်သည့်စကားမျှမပြောပေ။ ယင်းအစား တိတ်တိတ်ကလေး ခြေထောက်ကို မ,ကာ အကူစနစ်ကို လှမ်းကန်လိုက်သည်။

အကူစနစ်သည် မြင့်မြတ်သောရေကန်ထဲသို့ ပက်လက်လန်ကျသွားလေသည်။ 'အုချ်' ဟု ရေရွတ်ကာ လှုပ်ပင်မလှုပ်ရှားရဲပေ။ မြင်ကွင်းမှ ပျောက်မသွားမီအချိန်အထိ တိတ်တိတ်လေးသာနေခဲ့သည်။ သူ့ host သည် ဒေါသမပြေသေးပေ သူ့ကို ရန်သွားစရန် ထွက်မလာသင့်ပေ။

ရွှယ်လင်သည် သေးငယ်ပြီး အမွေးထူကာ အထူးသဖြင့် ချစ်ဖို့ကောင်းသော ခြေဖဝါးလေးကို မြှောက်လိုက်ပြီး ရေကန်အတွင်းရှိရေကို ထိကြည့်လိုက်သည်။ သူ့အမွေးများ အနည်းငယ် စိုစွတ်လာသည်မှလွဲလို့ အခြားတုံ့ပြန်မှုမျိုးမရှိပေ။ ၎င်းသည် ရွှယ်လင်အား အနည်းငယ် စိတ်ချသွားစေသည်။ ဤအရာသည် မြင့်မြတ်သောရေကန်ဖြစ်သလား၊ သို့မဟုတ် သူ့မျက်လုံးများနှင့် မြင်တွေ့ခဲ့သည့်အရာအားလုံးသည် အစစ်အမှန်ဖြစ်သလား ဆိုတာကိုတောင် ရွှယ်လင် မသိသော်လည်း သူရွေးချယ်နိုင်သည့် ရွေးချယ်မှုများမှာ အမှန်တကယ် အကန့်အသတ်ရှိကာ ကိစ္စများကို တစ်ဆင့်ပြီးတစ်ဆင့်သာ လုပ်ဆောင်နိုင်ပြီး သူ့ရှေ့ရှိ အခွင့်အရေးများကို မဖြုန်းတီးမိစေရန် ကြိုးစားရပေမည်။

ရွှယ်လင် ရေကန်ထဲသို့ တစ်လှမ်းချင်း လျှောက်သွားကာ သူ့ဝံပုလွေတစ်ကိုယ်လုံးကို ရေထဲတွင် ဖြည်းညှင်းစွာ စိမ်လိုက်သည်။ သူ့အမွေးများ စိုစွတ်သွားကြသော်လည်း မြင့်မြတ်သောရေကန်ရှိ ရေသည် အတော်အသင့် ပူနွေးနေသောကြောင့် ထူးထူးခြားခြား လုံးဝပင်မအေးပေ။ ရေများ ရွှယ်လင်၏ပတ်ပတ်လည်တွင် လှည့်ပတ်စီးဆင်းနေပြီး သူ့တစ်ကိုယ်လုံးအား သက်တောင့်သက်သာဖြစ်စေသည်။ မကြာခင်မှာပင် သူ၏အကာအကွယ်များအား လျှော့ချလိုက်ပြီး ရေစီးကြောင်းများကို သူ့ပတ်ပတ်လည်တွင် စိတ်ကြိုက်ရွေ့လျားခွင့်ပေးလိုက်သည်။

သူ့ခန္ဓာကိုယ်သည် ပြေလျော့သွားသော်လည်း ရွှယ်လင်၏ စိတ်ဝိညာဉ်သည် တောင့်တင်းနေဆဲပင်။ သူသည် သူ့ပတ်ဝန်းကျင်ကို သတိထားနေဆဲဖြစ်ပြီး မကြာမီ မြင့်မြတ်သောရေကန်မှ ရေသည် အသက်ရှိနေကြောင်း တွေ့ရှိသွားခဲ့သည်။ သူသည် ရေစီးကြောင်းနှင့်အတူ ရွေ့လျားနေသော်လည်း ၎င်းသည် ပုံမှန်ရေစီးကြောင်းမဟုတ်ပေ။ သူသည် တိကျသော ဦးတည်ရာတစ်ခုဆီသို့ တွန်းပို့ခံနေရပြီး သက်တံရောင်မြူမှုန်များပင် သူနှင့်အတူ ရွေ့လျားနေပုံရသည်။

ရေစီးကြောင်းသည် ရွှယ်လင်ကို ရေကန်အလယ်သို့ သယ်ဆောင်သွားသည်။ ရေကန်၏အလယ်ဗဟိုနှင့် ပိုနီးကပ်လေလေ သူ့ခန္ဓာကိုယ်ထဲသို့ စွမ်းအင်များ ပိုဝင်ရောက်လာသလို ခံစားရလာသည်။ ရွှယ်လင် မျက်လုံးများကို မှိတ်လိုက်ပြီးနောက် သူ၏နတ်ဆိုးအမြုတေသည် တဖြည်းဖြည်းနှင့် ပြန်လည်ကောင်းမွန်လာကြောင်း တွေ့လိုက်ရသည်။ ၎င်းသည် တစ်ဖန်ပြန်လည်တောက်ပလာပြီး မှုန်မှိုင်းကာ ဆက်လက်အသက်မဝင်သလို ဖြစ်မနေတော့ပေ။

သူ၏ခန္ဓာကိုယ်သည်လည်း အလင်းရောင်ဖြင့် တောက်ပနေ၏။ ရွှယ်လင် မျက်လုံးများကိုမှိတ်ထားပြီး တရားထိုင်နေစဉ် မြင့်မြတ်သောရေကန်၏ နတ်ဘုရားအဆင့်စွမ်းအင်များသည် သူ့ခန္ဓာကိုယ်ကို ဖြတ်သန်းစီးဆင်းသွားသည်။ သူ နိုးလာသောအခါ သူ့ခန္ဓာကိုယ်သည် ယခင်ကနှင့် မတူတော့ပေ။

သူလက်ကို မြှောက်လိုက်ပြီး နေ့အချိန်သို့ ရောက်နေပြီဆိုတာကို သိလိုက်ရသည်။ သူ့လက်ကို ပြန်ချလိုက်ပြီးနောက် သူ နားလည်သွားသည် လက်က သူ့အလိုလို မြှောက်သွားတာပဲ...။

ရွှယ်လင် တုန်ခါသွားပြီး မြင့်မြတ်သောရေကန်မှရေသည် သူ့ခန္ဓာကိုယ်ကို အပေါ်သို့ မ,ထားသည်။ ရေပြင်တစ်ခုသည် မှန်တစ်ချပ်ကဲ့သို့ မြင့်တက်လာပြီး သူ့အသွင်အပြင်ကို ရှင်းရှင်းလင်းလင်း မြင်ရစေသည်။

ဤပုံစံသည် ရွှယ်လင်၏ထိန်းချုပ်မှုအောက်တွင် မရှိပေ။ သူ့မျက်လုံးများမှလွဲပြီး ကျန်ရှိသည့်မျက်နှာအစိတ်အပိုင်းများသည် သူ့မူလပုံပန်းသဏ္ဍာန်နှင့် လုံးဝမတူညီပေ။ ၎င်းသည် တောင့်တင်းအေးစက်သော မျက်နှာထားတစ်ခုဖြစ်ပြီး သွေးအေးသည့် အရောင်အဝါတစ်ခု ထွက်ပေါ်နေသည်။ အမုန်းတရားသည် သူ့နှလုံးသားကို ရစ်ပတ်ချုပ်နှောင်ထားပြီး အိုင်ဗန်မှလွဲ၍ အခြားလူများနှင့် အဆက်အဆံမရှိအောင် ပြုလုပ်နေသည်။ သူ၏နက်မှောင်သော မျက်ခုံးထူထူများသည် ဓားရှည်များနှင့်တူပြီး အလွန်ချောမောခန့်ညားသော အနောက်တိုင်းသားတစ်ယောက်နှင့် တူပေသည်။ သူသည် မဟူရာမီးလျှံဝံပုလွေဖြစ်သောကြောင့် သူ၏ဆံပင်နှင့် မျက်လုံးအရောင်သည် အနီရောင်အမှတ်အသားများပါရှိသည့် အနက်ရောင်ဖြစ်ပြီး မြေခွေးပုံသဏ္ဍာန်မျက်လုံးများနှင့် တွဲလိုက်သောအခါ ပေးစွမ်းလာသည့် ခံစားချက်သည် များစွာပြောင်းလဲသွားသည်။ သူရဲကောင်းဆန်နေသေးသော်လည်း ယခုအခါ နားမလည်နိုင်သောဆိုးသွမ်းသည့် ခံစားမှုတစ်ခုလည်း ရှိနေသေးသည်။ ရွှယ်လင် သူ့နှုတ်ခမ်းများကို အတူတကွဖိထားရင်း သူ၏ပုံရိပ်ကို စက္ကန့်ဝက်ကြာအောင် စိုက်ကြည့်ပြီးနောက် သူ့တွင် အဝတ်မဝတ်ထားသည်ကို တွေ့လိုက်သည်။

သူ ကမ်းပေါ်သို့ ဘယ်လိုတက်ရမလဲ စဉ်းစားရင်း မြင့်မြတ်သောရေကန်ထဲသို့ တိတ်တဆိတ် ပြန်ဆင်းသွားလိုက်သည်။

သူ၏နတ်ဆိုးအမြုတေသည် လုံး၀ ပြန်လည်ကောင်းမွန်သွားသော်လည်း ရေကန်ထဲရှိရေများသည် သူ့ခန္ဓာကိုယ်ကို ပြုပြင်နေဆဲပင်။ သူ့ကြွက်သားများကို ပိုမိုကောင်းမွန်လာစေပြီး ခန္ဓာကိုယ်ကို ပိုမိုပျော့ပျောင်းလာစေသည်။ သူ့ပုံပန်းသွင်ပြင်သည် ပို၍သွယ်လျလာပြီး တစ်နှစ်ပတ်လုံး ကစားနိုင်သည့် လှပသော ခြေထောက်တစ်စုံရှိပေသည်။