MM Story Teller

Chapter 179

Viewers 14k

🦊Arc 12 -[ နတ်ဘုရား၏ မျက်နှာသာပေးခံရသော ဝံပုလွေပေါက်လေး]

Chapter 179

12.2 - ဇာတ်လိုက်ကိုအနိုင့်ကျင့်စမ်း မဟုတ်ရင် ငါတို့ပိုက်ဆံမပေးနိုင်ဘူး

ရွှယ်လင်မှာ အိုင်ဗန်အတွက် စိတ်မကောင်းဖြစ်နေခြင်းမဟုတ်၊ သို့သော်လည်း ဇာတ်လမ်းအဆုံးသတ်က အိုင်ဗန်၏ကံကြမ္မာပေါ်တွင် မှီတည်နေခဲ့သည်။ ထိုသူ၏ကံကြမ္မာကို ပြောင်းလဲနိုင်ရန် အဆိုပါ gong သုံးယောက်ကို ကန့်လန့်တိုက်ရန်လိုနေသည်။

တစ်ယောက်က ဘုရင့်အနွယ်ဝင်ဖြစ်ပြီး တစ်ယောက်က နတ်ဆိုးဘုရင်...ကျန်တစ်ယောက်က မကောင်းဆိုးဝါးနတ်ဘုရား...ယခုကဲ့သို့အစီအစဥ်ချထားမှုက ရွှယ်လင်၏တိုက်ရည်ခိုက်ရည်လုံးဝမရှိသော ရွှယ်လင်၏အားနည်းသောကိုယ်နှင့် ယှဥ်လိုက်လျှင် အခြေအနေကရယ်စရာပင် ကောင်းနေလေသည်။

ဤကမ္ဘာတွင် ကြေကွဲစရာအကောင်းဆုံးက ဘုန်းတော်ကြီးအိုင်ဗန်ကို ဖယ်လိုက်လျှင် ရွှယ်လင်၏ လတ်တလောကိုယ်ထည်ပင် ဖြစ်လိမ့်မည်။

ဝံပုလွေသည် ကြယ်သုံးပွင့်အဆင့်ရှိ အပြာရောင်မီးတောက်ဝံပုလွေ အမျိုးအနွယ်ဖြစ်သည်။ ၎င်း၏အနက်ရောင်အမွှေးများတွင် မီးတောက်ပုံစံအမွှေးများရှိပြီး ထိလိုက်သည်နှင့် အပူဓာတ်ကိုထုတ်လွှတ်ပေးသည်။ အပြာရောင်မီးတောက်ဝံပုလွေများသည် တိုက်ခိုက်မှုစွမ်းအားမြင့်ပြီး အကောင်ကြီးများဆိုပါက ကြယ်လေးပွင့်အဆင့် မကောင်းဆိုးဝါးသားရဲများကို ပင်ယှဥ်နိုင်သည်။ အိုလီဗာ၏ ငယ်ဘဝကောင်းခဲ့သည်မှာ မိဘများ၏စွမ်းအားကိုပင် ကျေးဇူးတင်ရတော့မည်။ ကြယ်လေးပွင့်အဆင့်ရှိ မကောင်းဆိုးဝါးသားရဲများသည် မကောင်းဆိုးဝါးသားရဲတောအုပ်အလယ်တွင် နေထိုင်ကြသည့် ဒဏ္ဍာရီလာသားရဲများဖြစ်ပြီး ထွက်ပေါ်လာသည်မှာ ရှားပါးတတ်၏။

သို့တစေ သူ့မိဘများက ခန်၏လူများကြောင့် အဝိုင်းခံရပြီး အဆိပ်ခတ်သတ်ခြင်းကို ခံလိုက်ရသည်။ ခန်က အမွေဆက်ခံသူနေရာအတွက် ၎င်းတို့၏ လှပသောအမွှေးများကို

အမေဖြစ်သူထံ လက်ဆောင်ပေးချင်ခဲ့သည်။ အဆိုပါမွေးနေ့ပါတီတွင် သူ၏အဖားကောင်းမှုကြောင့် အနာဂတ်လမ်းကြောင်းသည်လည်း ဖြောင့်ဖြူးခဲ့လေ၏။

ထိုအချိန်တွင် အိုလီဗာကို မိဘများက မြက်တောထဲတွင် ဝှက်ထားခဲ့ကြသည်၊ အိုလီဗာက သူ့မိဘများ အဆိပ်ခတ်သတ်ခံရပြီး အရေခွံခွာရခြင်းကို မျက်မြင်တွေ့ခဲ့သည့် သက်သေဖြစ်လာခဲ့၏။ ထို့နောက် ခန်ကြောင့်ပင် အပြာရောင်မီးတောက်ဝံပုလွေများက တန်ဖိုးကြီးကြောင်းသိလာကြပြီး ၎င်းတို့အမွှေးများဖြင့်အဝတ်အစား ချုပ်ဝတ်ချင်လာကြသည်။ ထိုအချိန်မှစကာ အိုလီဗာမှာ ထွက်ပြေးနေရရုံကလွဲပြီး လုပ်စရာမကျန်တော့ချေ။ ထွက်ပြေးရာမှ မတော်တဆမှုကြုံတွေ့ရပြီး ဒဏ္ဍာရီလာမကောင်းဆိုးဝါးသားရဲ၏ အမွေကို ဆက်ခံကာ လူသားပုံစံပြောင်းခွင့်ရခဲ့၏။ ခန်ထံရောက်သွားရန် အကြောင်းမရှိတော့ပေ။

ခန်အပေါ် မုန်းတီးရွံရှာစိတ်ကြောင့်ပင် ရွှယ်လင်က သည်ကိုယ်ကို လက်ခံလိုက်သည်။ မိုးထိမြင့်နေသော အမုန်းစိတ်များက သည်ခန္ဓာကိုယ်တွင် ရှိနေဆဲဖြစ်ပြီး ထိုအမုန်းတရားများကြောင့် အိုလီဗာက အိုင်ဗန်၏သစ္စာဖောက်မှုကို မဖြစ်မနေလက်ခံရမည်။ ပိုဆိုးသွားစေရန် အိုင်ဗန်က စာချုပ်တွင်ကျိန်စာအပိုထည့်ပြီး သူ့ဒေါသကို အဆုံးစွန်အထိရောက်သွားစေခဲ့သည်။ သူတို့ကြားမှ စာချုပ်ကို ဖိအားပေးဖျက်သိမ်းခဲ့သည်၊ လူသားအသွင်ပင် ပြောင်း၍မရတော့သည်အထိ မကောင်းဆိုးဝါးအမြုတေက ပျက်ဆီးခဲ့ရသည်။

ဇာတ်လမ်း၏နောက်ပိုင်းတွင် နတ်ဆိုးကမ္ဘာကိုဝင်ရောက်ပြီး အစစ်အမှန် 'မကောင်းဆိုးဝါးသားရဲ' ဖြစ်လာလျှင်ပင် အိုလီဗာသည်ကား ဘယ်သောအခါမှ နောက်တကြိမ်လူပြန်မဖြစ်နိုင်တော့ပေ။ ရွှယ်လင်ကပြုံးကာဖြင့် စနစ်ကိုမေးလိုက်၏။

"ဒါကဘာလဲ ငါ့ကိုရှင်းပြပါလား..."

စနစ်က အူကြောင်ကြောင်ပုံနှင့် လေပြည်ထိုးလေသည်။ "လူသားပုံစံမပြောင်းနိုင်တာက သူလေ...မင်းမှမဟုတ်တာ..Host...မင်းပုံစံပြောင်းလာတဲ့ကမ္ဘာတွေ အများကြီးကို ကျော်လာခဲ့ပြီးပြီလေ...ဘာတွေကို ကြောက်နေရတာလဲ..."

ရွှယ်လင် ခြောက်ကပ်ကပ်ရယ်လိုက်ပြီး စနစ်က လုံးဝယုံကြည်မရကြောင်း သိလိုက်ရ၏။ ဒဏ္ဍာရီလာမကောင်းဆိုးဝါးသားရဲ၏ အမွေဆက်ခံမှုနှင့် ပတ်သတ်သမျှတိုင်းကို သူ၏ကိုယ်ပိုင်မှတ်ဉာဏ်များမှ ဆွဲထုတ်လိုက်သည်၊ တစ်ခဏခန့်လိုက်ရှာနေပြီးနောက် အဆုံးတွင် မကောင်းဆိုးဝါးသားရဲတောအုပ်၏ အနက်ရှိုင်းဆုံးအပိုင်းမှ သွေးဆေးကန်နှင့် ပတ်သတ်သော အချက်အလတ်တိုင်းကို သူ၏စိတ် တစ်ထောင့်တစ်နေရာမှ ရှာတွေ့သွားခဲ့သည်။

ပါးစပ်ရာဇဝင်များအရ သွေးဆေးကန်သည် စီရင်စုတစ်ခုလုံးတွင် အသန့်စင်ဆုံး စိမ့်စမ်းဖြစ်သည်ဆို၏။ ၎င်းက လူတစ်ယောက်၏ ဝိညာဥ်ကို အပြည့်အဝသန့်စင်ပေးနိုင်ပြီး ဘဝအသစ်ပေးနိုင်လိမ့်မည်။

သို့သော် သွေးဆေးကန်ကို ရွေးချယ်နိုင်သည်မှာ မြင်နိုင်သူများသာဖြစ်ပြီး ၎င်းနှစ်သက်သည့်လူများသာ ဝင်ခွင့်ရှိပေသည်။

သွေးဆေးကန်က အိုင်ဗန်ကဲ့သို့သောလူမျိုးကိုသာသဘောကျပြီး ရွှယ်လင်ဆိုလျှင်အောင်မြင်မည်မဟုတ်ပေ။ သို့သော်လည်း လက်ရှိအခြေအနေနှင့်သာဆိုလျှင် ဇာတ်ကြောင်းကိုပြောင်းလဲရန် နည်းလမ်းမရှိပေ။ အားနည်းပြီး အစွမ်းမရှိသော ဝံပုလွေပေါက်လေးက လေကျယ်နေသလိုဖြစ်နေလျှင်...? ဟား...ဟား...။

သည်ကမ္ဘာသို့ ရောက်လာပြီးတည်းက အရာရာတိုင်းမှာ ရွှယ်လင်အတွက် ရယ်စရာဖြစ်နေလေသည်။

စနစ်ကသူ့အတွက် မြေပုံတစ်ခုလုပ်ပေးပြီးနောက် ရွှယ်လင်သည် ယခုပုန်းနေသည့်နေရာက မကောင်းဆိုးဝါးသားရဲတောအုပ်၏ ဝင်ပေါက်ဖြစ်နေကြောင်းသိလိုက်ရ၏။ သို့သော် ဝင်ပေါက်က နှစ်ပေါင်းများစွာကြာအောင် စွန့်ပစ်ခံထားရပြီး သာမန်စွန့်စားခန်းလောက်နှင့်ဖြတ်နိုင်မည်မဟုတ်၊ ထို့ကြောင့်ပင် ယခုအချိန်အထိ သူတို့လုံခြုံဘေးကင်းစွာဖြင့် ပုန်းနိုင်နေရခြင်းဖြစ်သည်။

ရွှယ်လင်သည် ဝင်ပေါက်ကောင်းက ယခုလို စွန့်ပစ်ခံထားရသည့်အပေါ် စိတ်မဝင်စားပေ။ သူ့ခေါင်းကိုဆန့်ကာ မြေကြီးပေါ်ကို ပြန်လှဲချလိုက်မိ၏။

ထားလိုက်တော့၊ အနာကျက်ရင်သွားနိုင်ပြီ။ မနာတော့သည်အထိ စောင့်နေလိုက်ရုံပင်။

စီရင်စုက အနောက်ပိုင်းမှာဖြစ်သော်လည်း မကောင်းဆိုးဝါးသားရဲတောအုပ်က စီရင်စု၏သုံးပုံနှစ်ပုံကို ဖုံးအုပ်ထားပြီး ကျန်သည့်အပိုင်းတွင် လူများနေထိုင်ကြသည်။ ရွှယ်လင်က ယခု အိုင်ဗန်နှင့်ခန်တို့ တက်နေသည့် အကြီးအကဲနတ်ဘုရားအကယ်ဒမီတွင် ရှိနေသည်။ ဒဏ္ဍာရီများအရ အကယ်ဒမီကို အလင်းနတ်ဘုရားက တည်ဆောက်ခဲ့သည်။ ၎င်းက အင်မတန်နာမည်ကြီးသောကျောင်းဖြစ်သည့်တိုင် အလင်းနတ်ဘုရားပျောက်ကွယ်သွားသည့်အခါ သူချန်ရစ်ခဲ့သော အလင်းမှော်စွမ်းအင်သည်လည်း တဖြည်းဖြည်း ကွယ်ပျောက်သွားခဲ့သည်၊ သို့ဖြစ်ရာ အကြီးအကဲ နတ်ဘုရားအကယ်ဒမီက လူတိုင်း၏မျက်စိရှေ့မှ တဖြည်းဖြည်း ပျောက်ကွယ်သွားခဲ့သည်။

ခန်သည် ရှင်ဘုရင်ဖြစ်လာမည့်သူတိုင်း အကြီးအကဲ အကယ်ဒမီကျောင်းတော်တွင် တက်ရောက်ရမည့် တော်ဝင်မိသားစု၏ စည်းမျဥ်းကြောင့် ရောက်လာခဲ့ရ၏။ အိုင်ဗန်ကမူ ရှားပါးသော အလင်းစွမ်းရည်ကြောင့် ရောက်လာရခြင်းဖြစ်သည်။ အလင်းနတ်ဘုရား ကျဆုံးသွားသည့်အခါ စီရင်စုတွင်ယခုကဲ့သို့သော ကောင်းချီးပေးခံရသည့် စွမ်းရည်မျိုး မရှိတော့ပေ၊ သို့သော် ယခု အိုင်ဗန်ပေါ်လာခဲ့ပြီး အကြီးအကဲအကယ်ဒမီ၏ မျှော်လင့်ချက်ဖြစ်လာခဲ့၏။

အကြီးအကဲအကယ်ဒမီသည် မကောင်းဆိုးဝါး သားရဲတောအုပ်အဝင်၏ အနောက်တောင်ပိုင်းအနားတွင် ရှိသည်။ နေ့စဥ်နှင့်အမျှ ကျောင်းသားများနှင့် မကောင်းဆိုးဝါးသားရဲတောအုပ်တွင် အမဲလိုက်ရန်လာသည့် မုဆိုးများနှင့် ရှုပ်ယှက်ခတ်နေသည်မှာ ပုံမှန်မဟုတ်ပေ။ သို့သော်ငြား မကောင်းဆိုးဝါးသားရဲများက တောအုပ်ထဲဝင်လာသည့် လူသားများကို ပြန်အမဲလိုက်တတ်သည်။ ထိုသို့သော အထက်တန်းလွှာကစားနည်းများက လူသားမျိုးနွယ်စတင်ပေါ်လာစဥ်တည်းက စီရင်စုတွင်အခြေတည်လာခဲ့၏။

အမှန်တွင် မကောင်းဆိုးဝါးသားရဲတောအုပ်ကြီးကို အလွှာသုံးခုနှင့် ပိုင်နက်သတ်မှတ်ထားသည်။

အပြင်ဘက်ဆုံးနှင့် အကြီးမားဆုံးဧရိယာမှာ မကောင်းဆိုးဝါးသားရဲအလွှာပင် ဖြစ်သည်။ သာမန်မကောင်းဆိုးဝါးသားရဲနှင့် အချို့သောသားရဲများက အသိစိတ်မရှိသေးဘဲ အဆက်အသွယ်လုပ်၍ မရပေ။ ၎င်းတို့ကအများဆုံးပေါက်ဖွားကြသည်၊ အရေအတွက်မှာ သတ်မှတ်၍ပင်မရဘဲ မကောင်းဆိုးဝါးသားရဲအရေအတွက်တွင် အများဆုံးဖြစ်သည်။ အမဲလိုက်ခြင်းကို မှီခိုနေရသည့် မုဆိုးများနှင့် စစ်သည်တော်များရှိပြီး မကောင်းဆိုးဝါးသားရဲတောအုပ်တွင် သတ်ဖြတ်ပြီး ရောင်းဝယ်ကာ အသက်မွေးဝမ်းကြောင်းပြုကြ၏။

အကြီးအကဲအကယ်ဒမီကျောင်းတော်သည်ကား ဝင်ပေါက်များအနက်မှ တစ်ခုကိုစောင့်ကြပ်ရသည်။ ဝင်ရောက်ပြီးသည်နှင့် မုဆိုးများက ပြန်ထွက်ခွာချိန်တွင် အမဲလိုက်ခကိုပေးဆောင်ရသည်။ ကျောင်းသားများတွင် အမဲလိုက်ခပေးစရာမရှိလျှင် လှည့်လည်စစ်ဆေးပြီး မကောင်းဆိုးဝါးသားရဲတောအုပ်တွင် ပေးဆောင်၍ရမည့် ပစ္စည်းတစ်ခုကိုလိုက်ရှာကြရသည်။

အကယ်ဒမီကျောင်းတော်၏ ဂုဏ်သတင်းက တဖြည်းဖြည်း ယုတ်လျော့လာခဲ့ပြီး အလင်းစွမ်းအားလျော့ကျမှုက တိုးလာခဲ့သည့်တိုင် စီးပွားရေးကြောင့် ၎င်းတို့၏အသက်က ဆက်လက်တည်မြဲနေခဲ့သည်။

တောအုပ်၏ဒုတိယအလွှာမှာ ငွေရှိတိုင်းဝင်၍မရပေ။ မကောင်းဆိုးဝါးသားရဲတောအုပ်တွင် သတ်မှတ်ထားသည့် စည်းမျဥ်းများရှိသည်။ ဒုတိယအလွှာအတွက် မှော်စွမ်းရည်ရှိသော ပဥ္စလက်ဆရာ သို့မဟုတ် မြင်းစစ်သည်တော်များသာ ဝင်ရောက်နိုင်သည်။ တစ်ယောက်က မှော်စွမ်းရည်ဖြင့် လက်နက်မလုပ်နိုင်ခဲ့ပါက ပိုင်နက်ထဲမှ အပြင်ထွက်နိုင်မည်မဟုတ်ချေ။ ဒုတိယအလွှာတွင် လူသားများကဲ့သို့ စကားပြောဆိုနိုင်ပြီး တွေးခေါ်နိုင်သည့် မကောင်းဆိုးဝါးသားရဲများရှိသည်။

၎င်းတို့က အပြင်ဘက်အလွှာတွင် အတူစုတတ်သည့် မကောင်းဆိုးဝါးသားရဲများနှင့် မတူဘဲ အားကောင်းသော မကောင်းဆိုးဝါးသားရဲများမှာ ၎င်းတို့အသိစိတ်ရှိလာသည်နှင့် ဖြန့်ထွက်သွားတတ်ကြပြီး ၎င်းတို့၏လမ်းကြောင်းကို ရှာတွေ့ရန်လည်းမလွယ်ကူပေ။ နှစ်အတန်ကြာအတွေ့အကြုံရှိသောမုဆိုးများပင် ဒုတိယအလွှာကိုဝင်ပြီး မကောင်းဆိုးဝါးသားရဲများကို မရှာရဲကြချေ။

ထိုစဥ်က အိုလီဗာနှင့်သူ့မိသားစုများမှာ ၎င်းတို့လက်ထဲတွင် မသေခင် လပေါင်းများစွာကြာအောင် ခြေရာရှာခံခဲ့ရဖူးသည်။ အကောင်ပေါက်လေးအိုလီဗာသာ မလွတ်မြောက်ခဲ့ပါလျှင် အသတ်ခံရပြီး အိုင်ဗန်နှင့်မတွေ့ခင်ပင် အရိုးတခြားအသားတခြား ဖြစ်သွားပေမည်။

အတွင်းပိုင်းအကျဆုံးအလွှာက မကောင်းဆိုးဝါးသားရဲတောအုပ်တွင် ထူးခြားဆန်းကြယ်မှုအရှိဆုံး နေရာပင်။ ဆိုကြသည်မှာ အထူးခြားဆုံး ဒဏ္ဍာရီလာသားရဲများက တောအုပ်ထဲတွင် နေထိုင်ကြသည် သီအိုရီပိုင်းအရ ကြယ်ငါးပွင့်နှင့်အထက် မကောင်းဆိုးဝါးသားရဲများနှင့် သားရဲနတ်ဘုရားများက လူသားအသွင်ပြောင်းနိုင်သည်ဟုဆိုကြ၏။

သို့တစေ မည်သူကမှထိုနေရာကိုမဝင်ရဲကြပေ၊ မတော်တဆ ဝင်သွားမိသူများလည်း ချက်ချင်းပင် အပြင်သို့ ပြန်ပို့ခံရလိမ့်မည်။ ယခင်က စီရင်စုထဲတွင် ကြယ်ငါးပွင့်အဆင့် မကောင်းဆိုးဝါးသားရဲများကို လူအချို့ပင် မမြင်ဖူးကြသော်လည်း မကောင်းဆိုးဝါးသားရဲတောအုပ်၏ အလယ်တွင် ဒဏ္ဍာရီလာသားရဲများ ကျန်ရစ်နေသေး၏။

ယခုမူ ရွှယ်လင်သည် အတွင်းဘက်အကျဆုံးအလွှာသို့ ဝင်ရောက်ရန်လိုသည်။ သည့်အပြင် သူ့ထံတွင် နတ်ဆိုးကမ္ဘာကို ဝင်ရောက်ရန်မှလွဲ၍ အခြားနည်းလမ်းလည်း မရှိသောကြောင့် အတွင်းဘက်အကျဆုံးအလွှာကသာ သူ့အတွက်တစ်ခုတည်းသော မျှော်လင့်ချက်ဖြစ်ပေ၏။ ယခု သူ ဤနေရာတွင်ရှိနေလျှင်ပင် အိုလီဗာ၏ကံကြမ္မာကို မပြောင်းလဲနိုင်လျှင် သူ့အစီအစဥ်တွင် ပေါက်ရောက်မှုရှိမည်မဟုတ်ချေ။ စည်းကမ်းမဖောက်ပါက စွမ်းအားကိုအခြေတည်သောဤကမ္ဘာတွင် ဇာတ်လိုက်များ၏ ကို့ရို့ကားယားနိုင်သော ကံကြမ္မာကိုပြောင်းရန်နည်းလမ်းမရှိပေ။

"ဘာလို့ဒီကမ္ဘာကြီးက ဒီလောက်ငါ့ကိုငြင်းနေရတာလဲ.."

ရွှယ်လင်နားမလည်နိုင်သည့်အရာရှိသည်။ ဤတကြိမ်တွင် ရွှယ်လင်သည် သူ့အားမနှစ်သက်သည့်ကမ္ဘာနှင့် ပထမအကြိမ် တွေ့ကြုံရခြင်းပင်ဖြစ်သည်၊ ဒုတိယအကြိမ်မှာ ကမ္ဘာကိုဝင်ရောက်ချိန်တွင် ဓားတစ်ချောင်းဖြင့် ထိုးခွဲလိုက်သလိုနာကျင်ခဲ့ရသည်။ ဤကမ္ဘာ၏ ဆန္ဒအတွက်ကြောင့်သာမဟုတ်ပါက အကြောသေနေသလို သည်နေရာတွင်လှဲလျောင်းနေရင်း စွန့်ပစ်ခံ မကောင်းဆိုးဝါးသားရဲတောအုပ်၏ အဝင်ဝကိုစိုက်ကြည့်နေပြီး တောင်တောင်အီအီများ လျှောက်စဥ်းစားနေမည်မဟုတ်ပေ။

"အိုင်ဗန်ရဲ့ကံကြမ္မာကို မပြောင်းစေချင်လို့လည်းဖြစ်နိုင်တယ်.."

စနစ်မှာ လောကကြီး၏ဆန္ဒနှင့် ဆက်သွယ်နိုင်သော်လည်း လောကကြီး၏ဆန္ဒကမူ ခပ်ပြတ်ပြတ်ပင်ငြင်းပယ်ခဲ့ပြီး စနစ်မှာ ဆွံ့အရင်းဖြင့်သာကျန်ရစ်ခဲ့ရသည်။

"ငါ့အထင်တော့ စာရေးဆရာက ဘုန်းတော်ကြီးအပေါ်မှာရန်ငြိုးရှိတယ်ထင်တယ်..ပြီးတော့ အိုင်ဗန်ကိုဒုက္ခရောက်စေမယ့်ဇာတ်ကွက်တွေကိုပဲ ထိုးသိပ်ထည့်ပြီးရေးထားတာ..ဇာတ်လမ်းရဲ့ပထမအပိုင်းမှာတုန်းက သူ့ကိုကောင်းကောင်းမြှောက်ထားတယ်..ကောင်းကင်ဘုံပေါ်က နတ်ဘုရားလို ထင်ရအောင်လုပ်ထားတယ်..ဒုတိယအပိုင်းလည်းရောက်ရော...အရင်က သန့်စင်နေခဲ့တဲ့သူ့ဘဝကြီးက သူခံစားခဲ့ရတဲ့အတိုင်း လက်စားပြန်ချေဖို့ ဖြစ်လာရော...မင်းလည်းအိုင်ဗန်ရဲ့ နောက်ပိုင်းကံကြမ္မာကိုမြင်ခဲ့ပြီးပြီပဲ..ဒါကသာ np မဟုတ်ရင် လူသား...သားရဲနဲ့အခြား သက်ရှိတွေနားမှာ ပတ်ချာလည်နေမှာ...စာရေးဆရာရဲ့ ရည်ရွယ်ချက်က သိသာလွန်းနေလို့ပေါ့..ဒါကြောင့် လောကကြီးရဲ့ဆန္ဒက အိုင်ဗန်နဲ့ပတ်သတ်လာရင် ဆတ်ဆတ်ထိမခံဖြစ်နေတာ..သူကဇာတ်လိုက်ဆိုပေမဲ့ ဇာတ်နာရဦးမယ်လေ..."

ရွှယ်လင်: "...." ဤကမ္ဘာတွင် ဇာတ်လိုက်ကိုအနိုင်ကျင့်ရမည့် ဇာတ်လမ်းတည်ဆောက်ပုံမျိုးရှိသေးသည်ကို သူမေ့နေခဲ့သည်။ ၎င်းကိုနှစ်သက်သောစာဖတ်သူများက ဇာတ်လိုက်ကိုကောင်းကောင်းအနိုင်မကျင့်လျှင် ပိုက်ဆံပေးကြတော့မည်မဟုတ်။

ကောင်းပြီ။ သူ အိုင်ဗန်အပေါ်တွင် ကိုယ်ချင်းစာစိတ်မရှိသလို ခံစားနေရပြီး သူ့ကံကြမ္မာကို ပြောင်းလဲနေသည့်အတွင်း အနိုင်မကျင့်နိုင်သလိုတွေး၍မရချေ။

ရွှယ်လင်သည်ကား တစ်နေကုန်ထိုနေရာတွင်သာ မလှုပ်မယှက်လှဲနေခဲ့၏။ ညရောက်မှ လမ်းမလျှောက်နိုင်လောက်သည်အထိ နာကျင်နေခဲ့သောဒဏ်ရာများမှာ သက်သာသွားလေသည်။ သူ၏မှတ်ဉာဏ်များထဲမှ အမြှီးကိုးချောင်းမြေခွေးသွားသည့်အတိုင်း လျှောက်သွားသောကြောင့် ခြေလေးချောင်းနှင့်လမ်းလျှောက်ရာတွင် မခက်ခဲပေ။ ညဘက်တွင် တောအုပ်ထဲ၌ သွားလာခွင့်တားမြစ်ထားသည့်တိုင် စနစ်ပေးထားသည့်မြေပုံအတိုင်း မကောင်းဆိုးဝါး သားရဲတောအုပ်အတွင်းသို့ တိုက်ရိုက်ဝင်သွားလိုက်သည်။

မကောင်းဆိုးဝါးသားရဲတောအုပ်၏ အပြင်ဘက်ဆုံးအလွှာမှာ ညို့ယူဖမ်းစားနိုင်လောက်သော နယ်နိမိတ်ကြီးတည်ရှိသည်။ ၎င်းအတွင်းသို့မဝင်ရောက်ခင် ဝင်ရောက်မည့်သူက အသက်စွမ်းအင်အပြည့် ရှိနေရန်လိုအပ်၏။ အကြီးအကဲနတ်ဘုရား အကယ်ဒမီသည် နှစ်များစွာတည်ရှိနေဆဲ ပြည်တွင်းမင်းဆိုးများကို စီမံနိုင်ရန် အသက်စွမ်းအင်နည်းလမ်းနှင့် ထိန်းချုပ်ထားခဲ့သည်။ ရွှယ်လင်သည် မကောင်းဆိုးဝါးသားရဲတောအုပ်မှ မကောင်းဆိုးဝါးသားရဲတစ်ကောင် ဖြစ်ခဲ့ဖူးသည်။ သူ့စွမ်းအားများ ကုန်ခမ်းသွားပြီး စကားမပြောနိုင်တော့သော်လည်း ကြယ်သုံးပွင့်အဆင့်သားရဲသာဖြစ်ပြီး တောအုပ်ထဲသို့ဝင်ရောက်ရန် အရည်အချင်းပြည့်မှီသည်။

ရွှယ်လင် မကောင်းဆိုးဝါးသားရဲတောအုပ်သို့ ခြေချလိုက်သည်နှင့် ညအချိန်တွင် လူသားများကို တောအုပ်ထဲသို့ပေးမဝင်ရသည့်အကြောင်းအရင်းအား နားလည်သွားခဲ့သည်။

တောအုပ်ထဲသို့ဝင်လာသည့်သူများသည် မှော်ဆရာများချထားသော အကာအကွယ်ဧရိယာ သို့မဟုတ် ကြိုတင်ဝယ်ယူထားသည့် ရွက်ဖျင်တဲများအတွင်းတွင်သာ နေထိုင်ကြရသည်။

မကောင်းဆိုးဝါးသားရဲတောအုပ်သည် ညအချိန်ဆိုလျှင် နတ်ဆိုးအပင်များနှင့် ပြည့်နှက်နေတတ်သော ကမ္ဘာပင်ဖြစ်သည်။ အမှောင်ထဲတွင် ထူးခြားသောအပင်များနှင့် ပြည့်နေတတ်ပြီး အင်မတန်လှပသောရှုခင်းများလည်း အန္တရာယ်များနှင့် ပြည့်နေတတ်သည်။

စံထားရလောက်သောရနံ့များက တောအုပ်ကိုလွှမ်းမိုးထားပြီး မြူလွှာပါးပါးလေးက ကမ္ဘာတစ်ခွင်ဖုံးအုပ်ထားခဲ့သည်။ သည်အချိန်တွင်နိုးထလာသည့် မည်သည့်လူသားမဆို ရနံ့ကြောင့် ၎င်းတို့က နှောင့်ယှက်ခံရပြီး နတ်ဆိုးအပင်များ၏ ထောင်ချောက်အတွင်းသို့ ကျသွားလိမ့်မည်။ ထို့နောက် ပျောက်ကွယ်သွားပြီး တောအုပ်အတွက် အာဟာရအင်အားဖြစ်လာလိမ့်မည်၊ နေ့အချိန်တွင်ပုံမှန်သာထင်ရသောအပင်များက ညအချိန်တွင် လန်းဆန်းအသက်ဝင်လာပြီး မူလအရွယ်ထက် အဆပေါင်းများစွာ ကြီးထွားလာကြပေလိမ့်မည်။

မကောင်းဆိုးဝါးသားရဲအနေဖြင့် ရွှယ်လင်သည် တောအုပ်ကို ဖြတ်သန်းနေစဥ်မှာပင် အတော်လေး လွှမ်းမိုးခံနေရသည်ကို သတိပြုမိလိုက်၏။

သူ၏အမြုတေပျက်စီးသွားသောကြောင့် ရွှယ်လင်သည် အပြာရောင်မီးတောက်ဝံပုလွေ၏ အစွမ်းကို ဆက်သုံး၍မရတော့ပေ။ ဒဏ္ဍာရီလာ မကောင်းဆိုးဝါးသားရဲထံမှ အမွေရထားသောအစွမ်းကို သုံးရန်လည်းမဖြစ်နိုင်သေး။ သူ၏ကွေးလွယ်ဆန့်လွယ်သောကိုယ်ဖြင့်သာ ထိတ်လန့်ဖွယ်ကောင်းသောအပင်ကို တိုက်ခိုက်ရတော့မည်။

မရေမတွက်နိုင်သော နွယ်ပင်များနှင့် ချုံများကိုဖြတ်သန်းလာခဲ့ပြီး လူသားစားအပင်များရှိနေသည့်ရေကန်ကို ခုန်ကျော်လာခဲ့ကာ နောက်ဆုံးတွင်မူ ရွှယ်လင်သည် ကြီးမားသော ကြာရွက်ကြီးအပေါ်တွင် မောမောနှင့်လဲလျောင်းလိုက်နိုင်သည်။ ကြာရွက်ကြီးက သူ၏မြေခွေးပေါက်ကိုယ်ထည်ကို လွှမ်းခြုံပေးထားပြီး ဝါးမြိုပစ်ချင်နေပုံရသော်လည်း ရွှယ်လင်က လျစ်လျုရှုထားလိုက်သည်။

ဤအပင်က သူ့အားစားရန်ကြံသည့် ပထမဆုံးအပင်မဟုတ်ချေ။ မတိုင်ခင်က ကျော်လာခဲ့ရသည့်အရာများနှင့်ယှဥ်လျှင် အနှီကြာရွက်ကြီးက သူ့အားလွှမ်းခြုံပေးထားပြီး လှုပ်လီလှုပ်လဲ့မျက်နှာပြင်က သူ့အားပုခက်နှင့်လွှဲနေသလို ငြိမ့်ငြိမ့်လေးအိပ်စက်စေသည်။ သူသည်ကား အနှိပ်ခံနေရသလိုပင် သတ်မှတ်လိုက်၏။ သစ်ရွက်အတွင်းထဲတွင် ဆယ်ရက်ထက်မနည်း ပိုနေလိုက်လျှင် အနှီသစ်ရွက်သည်လည်း သူ့အားဒုက္ခပေးတော့မည်မဟုတ်။ သည့်အပြင် သူ့အားလွှမ်းထားရန်အားအများအပြား သုံးရလိမ့်မည်။

နေ့တဝက်ခန့် အနားယူပြီးသည့်နောက် အပင်များ၏ ညအချိန်တွင်အမဲလိုက်မှုပြီးဆုံးသွားခဲ့ပြီး တိတ်ဆိတ်ငြိမ်သက် သွားခဲ့ကြသည်။ ရွှယ်လင်မှာ သူ့ကိုယ်အလေးချိန်ကို ကြာကြာမထိန်းထားနိုင်တော့သော ကြာရွက်အကြားမှလျှောကျသွားခဲ့ပြီး ၎င်းကနဂိုအတိုင်းပြန်လည်ကျုံ့ဝင်သွားခဲ့သည်။ သူသည် မြေပေါ်သို့ တိုက်ရိုက်ကျသွားကာ လန့်နိုးသွားခဲ့လေ၏။

ရွှယ်လင်၏အနောက်ခြေထောက်မှာ အိပ်ရာမှရုတ်တရက်နိုးလာ၍ တွဲလောင်းဖြစ်နေပြီး ရုတ်တရယ် ကျိတ်ရယ်လိုက်သည့်အသံကို နားထဲကြားလိုက်ရသည်။

သူသည် တစ်စုံတစ်ယောက်ကို တွေ့ရနိုးဖြင့် လှည့်ပတ်ကြည့်လိုက်သည့်တိုင် သူ့အနားတွင် မည်သည့်အရာမှမရှိနေ။ စနစ်က သူ့ဘေးတွင်ပေါ်လာပြီး ပြောလိုက်သည်။

"Host..ငါတို့ဆက်သွားသင့်ပြီ..."

ရွှယ်လင်ခေါင်းညိတ်ပြလိုက်သော်ငြား မပူးပေါင်းလာပေ။ သူအဆင့်ကျော်မိသလိုခံစားနေရသည်။ ကမ္ဘာပေါင်းများစွာကို ဖြတ်သွားခဲ့သော်လည်း သူ့အတွက်အစောင့်အရှောက်မပါဘဲ ကိုယ့်အားကိုးကိုးနိုင်သည်မှာ ဤသည်က ပထမဆုံးအကြိမ်ပင်။ သူ့ကိုယ်သူအိပ်ချင်မူးတူးဖြစ်နေရာမှ ပျောက်စေရန် ရွှယ်လင်သည် ကန်တစ်ကန်အနားသို့သွားကာ မျက်နှာသစ်လိုက်သည်။

ယင်းက သူအမြင်မှားသွားခြင်းလည်း ဖြစ်နိုင်သည်။ သို့သော် ရေကန်ထဲမှရေက နွေးနေသလိုပင်၊ တစ်ယောက်ယောက်က ကန်တစ်ကန်လုံးကို နွှေးပေးထားသည့်အတိုင်း။

မကောင်းဆိုးဝါးသားရဲတောအုပ်က အင်မတန်ထူးဆန်းလှသည်။ ရွှယ်လင်သည် အနှီရှင်းပြရခက်ပြီး အကျိုးအကြောင်းမသင့်သော အရာများကို ဥပေက္ခာပြုကာ ရှေ့ဆက်သွားလိုက်၏။

ယခုအချိန်တွင် သူသည်ကား တကယ်ကိုသေးကွေးလွန်းနေပြီး ခြေလေးချောင်းကလည်းတိုလွန်းသည်။ သူ့ရှေ့တွင်လမ်းအရှည်ကြီးဆက်ရှိနေပြီး လမ်းတွင်အချိန်မဖြုန်းလျှင်ပိုကောင်းလိမ့်မည်ပင်။

သူဝင်ဝင်ချင်းမှာပင် သွေးဆေးကန်ထဲမှ Shou ထံသို့ ပြေးမသွားချင်ပါချေ။

Prev Next