MM Story Teller

Chapter 168
 - အားလုံးကို အတူတကွ စုစည်း​စေခြင်း

သင်္ဘောကြီး တစ်စီးက ဟယ့်ရှီရွာသို့ တဖြည်းဖြည်း ဦးတည်သွား​နေခဲ့​သည်။

ကျန်းကျန့်က သင်္ဘောဆိပ်၌ ကုန်သည်များကို လက်ခံရန်အတွက် လူများကို တမင်သက်သက် ငှားထားခဲ့သဖြင့် တစ်​ယောက်​ယောက်က သင်္ဘောကြီးကို မြင်သောအခါ ချက်ချင်းပင် ဆိုက်ကပ်နိုင်ရန် ကူညီ​ပေးလိုက်သည်။ ဆိုက်ကပ်ပြီးသွား​သောအခါ တစ်​ယောက်​ယောက်က သွား​မေးလိုက်သည်။

 "ဘယ်က​ရောက်လာကြတာများလဲ"

သွား​ရောက်​မေးမြန်းသူက စကားပြန်မရဘဲ အခြားလူများထံမှ တွန်းထုတ်ခံလိုက်ရသည်။ ထိုအခိုက်မှာပင် သင်္ဘော​ပေါ်မှ လူများစွာ ဆင်းလာကြသည်။

"ဘာလုပ်တာလဲ" တွန်းထုတ်ခံရသူက ယိုင်သွားပြီး ​​မြေ​ပေါ်သို့ လဲကျသွား​လေ​တော့သည်။ သူက မျက်​မှောင်ကျုံ့ကာ ​မြေ​ပေါ်မှ ထရပ်လိုက်ပြီး သူ့​ရှေ့မှလူများကို ​ဒေါသတကြီး ကြည့်လိုက်သည်။ 

သူ သွား​မေးမှ ဖြစ်မယ်... ဒီလူ​တွေ သူ့ကို ဘာ​ကြောင့် တွန်းထုတ်လိုက်တာလဲ... ဒါ ဘယ်သူ​တွေလဲ... 

ထိုအဖြစ်အပျက်က သဘာဝကျကျပင် ​ဘေးပတ်လည်မှ လူများကို ဆွဲ​ဆောင်မိသွား​လေသည်။

ကျန်းကျန့်၏ လက်​အောက်မှ ကိုယ်ရံ​တော်များက သင်္ဘောများကို ​စောင့်ကြပ်​ပေးရန် တာဝန်ကျ​နေကြပြီး သင်္ဘောမလိုက်ရသူများက ဆိပ်ကမ်း၏ ဤဘက်ပိုင်းတွင် ကင်းလှည့်​နေကြ​​လေသည်။

သင်္ဘောဆိပ်တွင် အလုပ်လုပ်ပါက အလုပ်ပြီးသွားလျှင် အိမ်ပြန်နိုင်သည်။ တစ်လလျှင် ရက်နှစ်ရက် အလုပ်နားခွင့် ​ပေးသည့်အပြင် ထိုနှစ်ရက်ကိုလည်း သူတို့ စိတ်ကြိုက် ​ရွေးချယ်နိုင်​သော်လည်း အ​ရေးကြီးသည့် တစ်စုံတစ်ရာ ဖြစ်ပွားခဲ့ပါက ခွင့်ပြု​ပေးမည် မဟုတ်​ပေ။

ယ​​နေ့တွင် ဟယ်ချွန်းရှန့်ကလည်း ကင်းလှည့် တာဝန်ကျ​နေခြင်း ဖြစ်သည်။

ဟယ်ချွန်းရှန့်က ကျန်းကျန့်နှင့် အချိန်အ​​တော်ကြာ အတူ ရှိခဲ့သဖြင့် ကိုယ်ရံ​တော်အပိုင်းတွင် ရာထူးအမြင့်ဆုံးသူများထဲမှ တစ်​ယောက် ဖြစ်သည်။ သူ့ဘဝက ပိုပို၍ ​ကောင်းမွန်လာ​လေသည်။ အတိတ်တွင် သူတို့မိသားစုက လျုဟိုင်ထုန်ထံမှ ဖျက်ဆီးခံရလုနီးပါး ဖြစ်ခဲ့ရ​သော်လည်း ယခုတွင်မူ လျူဟိုင်ထုန်နှင့် သူ့လူများက သူ့လက်​အောက်တွင် အလုပ်​လုပ်​နေကြရ​ပေသည်။

တစ်​ယောက်​ယောက် ပြဿနာ လာရှာ​နေသည်ကို ​တွေ့လိုက်ရ​သောအခါ ဟယ်ချွန်းရှန့်က ချက်ချင်းပင် လူများ ဦး​ဆောင်၍ ​ရောက်လာခဲ့သည်။

 "ခင်ဗျားတို့က ဘယ်သူလဲ... ဒီကို ဘာလာလုပ်ကြတာလဲ" 

ကိုယ်ရံ​တော် လုပ်ငန်း ပိုမိုကြီးထွားလာပြီး​နောက် ပြဿနာ လာရှာကြသူများစွာ ရှိသဖြင့် ဟယ်ချွန်းရှန့်က ထိုအခိုက်တွင် သတိအပြည့် ရှိ​နေခြင်း ဖြစ်သည်။

ဟယ်ချွန်းရှန့်နှင့် အခြားသူများမှာ ​ကျန်းကျန့်​နောက်သို့ တစ်နှစ်​ကျော်မျှ လိုက်ခဲ့ကြသည်။ ကျန်းကျန့်က သူတို့ကို ​ငွေများ ရက်ရက်​ရော​ရော ​ပေး​လေ့ရှိပြီး အစားအ​သောက်များကလည်း ​ကောင်းလှသည်။ သူတို့က အရပ်ရှည်လာခြင်း မရှိလျှင်​တောင် သူတို့ အားလုံးမှာ အသားညိုကာ သန်မာလာကြသည်။ သူတို့က တူညီဝတ်စုံများ လည်း ဝတ်ထားကြသဖြင့် အရှိန်အဝါများ ​ပေါ်ထွက်​နေ​ပေသည်။ 

မတိုင်ခင်က လူကို ​ဒေါသတကြီး တွန်းထုတ်လိုက်သူမှာ ရုတ်တရက် ​အေးခဲသွား​လေသည်။

ကျိုး​မောင်ဟယ်က သင်္ဘောဦးထိပ်တွင် ရပ်​နေပြီး ထ်ုမြင်ကွင်းကို မျက်မြင်ဒိဌိ ​တွေ့ကြုံလိုက်ရ​လေသည်။ သူက မျက်​မှောင်ကျုံ့ကာ ​သင်္ဘောတစ်ဖက်ကို ဆင်းလာ​နေခဲ့ပြီး အံ့အားသင့်ဟန် ​ပြောလိုက်သည်။

 "ငါက ကျိုး​​မောင်ဟယ်... ​တော်ဝင်သံတမန်ပဲ... ငါဒီကို အမှုတစ်ခု လာ​ဖြေရှင်းတာ... မြန်မြန် လမ်းဖယ်ကြစမ်း" 

​တော်ဝင်သံတမန်လား... ဟယ်ချွန်းရှန့်က ​သင်္ဘော​ပေါ်ကို လှမ်းကြည့်လိုက်ရာ ​သင်္ဘောပေါ်တွင် မတ်တပ်ရပ်​နေ​ပြီး ​တော်ဝင်သံတမန် ဝတ်စုံ ဝတ်ထားသည့် သက်လတ်ပိုင်းအရွယ် လူတစ်​ယောက်ကို ​တွေ့လိုက်ရသည်။ သူ့​ဘေးတွင် အရာရှိ ဝတ်စုံ ဝတ်ဆင်ထားသူများစွာ ရှိ​နေကြသည်။ 

ပြဇာတ်​တွေထဲမှာပဲ ​တွေ့ဖူးတဲ့ အင်ပါယာအမတ်တစ်​ယောက်က သူ့​ရှေ့မှာ အရှင်လတ်လတ်ကြီး ရပ်​နေပါ​ရောလား...

ဟယ်ချွန်းရှန့်က တုံ့သွား​သော်လည်း ထိုသူကို ဂရုတစိုက် ကြည့်မိ​သောအခါ ထိုအင်ပါယာအမတ်ကြီးက ရင်းနှီး​နေပုံ​ပေါ်​နေသည်ကို ​တွေ့လိုက်ရသည်။

လွန်ခဲ့​သော ရက်အနည်းငယ်က ​ကျောက်လျူ၏ ​မွေး​နေ့ပွဲတွင် တစ်စုံတစ်​ယောက်က ပြဿနာ လာရှာဖူးပြီး သူတို့ကို နှင်ထုတ်ခဲ့သူမှာလည်း ဟယ်ချွန်းရှန့်သာ ဖြစ်သည်။ သူ့​ရှေ့မှလူမှာ ထိုအချိန်က ပြဿနာ လာရှာသူများထဲမှ တစ်​ယောက် ဖြစ်သည်

ဟယ်ချွန်းရှန်းက ဆတ်ခနဲ ဖြစ်သွားပြီး​နောက် ​အေးခဲသွား​လေသည်။ ထိုအချိန်မှာပင် လူများစွာက သင်္ဘော​ပေါ်မှ ဆင်းလာကြသည်။

ပထမဆင်းလာသူများက အဆင်​ပြေ​သေးသည်။ ထိုသူများအားလုံးက သာမန်လူများ ဖြစ်ပုံ​ပေါ်​မေသည်။ သို့​သော်လည်း ​နောက်ပိုင်း ဆက်ဆင်းလာသူများမှာကား... သူတို့အားလုံး ရမန် အရာရှိ ဝတ်စုံများ ဝတ်ဆင်ထားကြသည်။

ဟယ်ချွန်းရှန့်က ဟယ်​ချောင်စီရင်စုမှ ရမန်အရာရှိများအားလုံးကို သိ​သော်လည်း ထိုသူများကို မသိပါ​ပေ။ သိသာထင်ရှားစွာပင် သူတို့က ဟယ်​​ချောင်စီရင်စုမှ အရာရှိများ မဟုတ်ကြပုံပါပင်။

ဟယ်ချွန်းရှန့်က မလွယ်ကူနိုင်ဟု ခံစား​နေရသည်။ သူက မည်သည်ကိုမှ မစဥ်းစား​တော့ဘဲ ကျန်းကျန့်ရှိရာသို့ တန်း​ပြေး​လေ​တော့သည်။

သိပ်မကြာမီမှာပင် ဟယ်ချွန်းရှန့်က ​ကျောက်မိသားစု အိမ်အသစ်၏ တံခါးဝသို့ ​ရောက်လာပြီး ​​မြေး​လေးကို ​​အပြင်​ခေါ်ထုတ်ကာ နေပူစာလှုံ​ပေးနေသည့် ​ကျောက်လျူနှင့် ​တွေ့လိုက်သည်။

 "အ​ဒေါ်​ကျောက်... တစ်ခုခု ဖြစ်​နေပြီ" ဟယ်ချွန်းရှန့်က ​ပြောလိုက်ပြီး​နောက် အထဲသို့ အ​ပြေးဝင်သွား​လေ​တော့သည်။

ကျန်းကျန့်က အ​ပြေးဝင်လာ​သော ​ဟယ်ချွန်းရှန့်နှင့် သူ့​နောက်ပါးမှ ​ကျောက်မင်ကျုးကို ​ပွေ့ကာ လိုက်လာ​နေသည့် ​ကျောက်လျူတို့ကို ​တွေ့ရချိန်၌ ​ငွေစာရင်း စာအုပ် ဖတ်​နေခဲ့ခြင်း ဖြစ်သည်။ သူက ပ​​ဟေဠိ ဖြစ်ဟန်ဖြင့် ​မေးလိုက်သည်။ "ဘာဖြစ်​​လို့လဲ"

"​ဘောစ့် အပြင်ဘက်မှာ ​တော်ဝင်သံတမန် ​ရောက်​နေတယ်" ဟယ်ချွန်းရှန့်က ​ပြောလိုက်သည်။

 "အရင်တစ်​ခေါက် အ​ဒေါ်​ကျောက်ရဲ့ ​မွေး​နေ့ပွဲလုပ်တုန်းက ကျွန်​တော်တို့ နှင်ထုတ်လိုက်တဲ့သူက သူပဲ" 

"​တော်ဝင်သံတမန်လား" ကျန်းကျန့်က မျက်​မှောင်ကျုံ့လိုက်သည်။ ကျန်းမိသားစုကိုယ်စား ​သူ့ကို ​မေးခွန်းလာထုတ်ခဲ့သည့် သက်လတ်ပိုင်းလူတစ်​ယောက်ကို သူမှတ်မိသွားသည်။ သူက တကယ်​တော့ ​တော်ဝင် သံတမန်တဲ့လား...

ကျန်းကျန့်၏ နှလုံးသား ခုန်​ပေါက်သွားပြီး ချက်ချင်းဆိုသလိုပင် ကျန်းမိသားစု သူ့ကို တရားစွဲခြင်း မပြုခင်က ထိုသူတို့ ​အော်ဟစ်ခဲ့​သော စကားများကို အမှတ်ရသွား​လေသည်။

ကျန်းကျန့်က ရမန်သို့သွားကာ လူများ သတ်ပစ်မည်ဟု ကျန်းမိသားစုကို ချိန်း​ခြောက်ခဲ့သည်။ သို့​​သော်လည်း ထိုစဥ်က ​ရှေး​ခေတ်တရားဥပ​​ဒေများကို သိပ်မသိ​သေးဘဲ အချို့ကဏ္ဍများနှင့် ပတ်သက်ပြီး ဘာကိုမှ မသိရ​သေးချိန် ဖြစ်သည်။

သို့​သော်ငြား ​နောက်ပိုင်းတွင် "တချီ ဥပ​​ဒေ"ကို ​သေချာ ရှာ​ဖွေလိုက်ပြီး​နောက် အခြား​သော အချက်အလက်များကို ရှာ​ဖွေခဲ့သည်။ ထို့​နောက်တွင် ထို​ရှေး​ခေတ် ဥပ​ဒေများထဲမှ အချို့က သူ့ကို ​ဝေခွဲမရ​ဖြစ်​စေ​ကြောင်း ​တွေ့လိုက်ရသည်။

ဥပမာအားဖြင့် သားသမီးဝတ်မ​ကျေပွန်သည့် ပြစ်မှုပါပင်။

​ရှေး​ခေတ်တွင် သားသမီးဝတ်မ​ကျေပွန်သည့် ပြစ်မှုက အလွန် ပြင်းထန်သည်။ ​ယခင်​မင်းဆက်ခေတ်တွင် "မိဘများ အဘိုးအဘွားများကို ကျိန်ဆဲမှု" ဟူသည့် ဥပ​​ဒေ တစ်ခု ရှိခဲ့ဖူးသည်။ ရှင်းပြရမည် ဆိုပါက သူတို့၏ မိဘများနှင့် အဘိုးအဘွားများအား နှိပ်စက်သူကို ကြိုး​ပေးကွပ်မျက်ရမည်။ 

မိဘများကို ကျိန်း​မောင်းရုံဖြင့် ကြိုး​ပေးကွပ်မျက်ခံရမည်ဆိုလျှင် သူတို့ကို ရိုက်နှက်သူ အတွက်ကား ဆိုဖွယ်ရာပင် မရှိ။ အကယ်၍ မိဘများက ပြစ်မှု ကျုးလွန်ပြီး သူတို့၏ က​လေးများက ​ဖော်ထုတ်ခဲ့လျှင် က​လေးများသည်လည်း ကြိုး​ပေးခံရ​ပေမည်။ ဥပ​ဒေက ​ရေးသားထားသည်မှာ... "သူတို့၏ မိဘနှင့် ဘိုးဘွားများကို တိုင်တန်းသူသည် ကြိုး​ပေးကွပ်မျက်ခံရမည်"

သူတို့၏ မိဘများ၊ ဘိုးဘွားများထံမှ ခွဲခွာပြီး ကိုယ်ပိုင်​ငွေများကို စု​ဆောင်းခဲ့လျှင်ပင် သားသမီးဝတ်မ​​ကျေပွန်သည့် ပြစ်မှုကို ကျုးလွန်ခြင်း ဖြစ်ကာ ​ထောင်ထဲသို့ သွားရမည် ဖြစ်သည်။

အခြားစကားဖြင့် ဆိုရ​သော် မိဘများ သက်ရှိထင်ရှားရှိ​နေစဥ် သီးသန့်​ငွေမရှိ​စေရ။ ထိုသို့ မဟုတ်လျှင် ပြစ်မှူ​မြောက်​ပေသည်။

သို့​သော်လည်း တချီတွင် အပြစ်​ပေးနည်းများစွာက ကွဲပြားသွား​လေပြီ။ ဥပမာအားဖြင့် က​လေးတစ်​ယောက် မိသားစုမှ ခွဲ​နေရန် သ​ဘောတူပါက ထိုက​လေးက မိသားစုမှ ခွဲ​နေနိူင်သည်။ ယခင်က ထိုဥပ​ဒေသာ မရှိပါက ကျန်းကျန့်အတွက် ခွဲထွက်နိုင်ရန် ခက်ခဲမည် ဖြစ်သည်။ သို့​သော်လည်း မ​ပြောင်းလဲ​သေး​သော အရာများစွာ ရှိ​နေ​သေးသည်။

အမှန်ပင် ထိုဥပ​ဒေများ ရှိ​သော်လည်း အမှန်တကယ် အ​ရေးယူ​ဆောင်ရွက်ချက်များက ​ပြောင်းလဲသွားခဲ့သည်။

လူတစ်​ယောက်က တရားရုံသို့ သွား​ရောက် တရားစွဲဆိုမှသာ တရားရုံးက ဖမ်းဆီး အ​ရေးယူ​ပေးမည် ဖြစ်သည်။ သာမန်လူအများစုက ​နောက်ဆုံး​သော အခွင့်အ​ရေး သို့မဟုတ် ​သူ​သေကိုယ်​သေ ရန်ငြှိုးများ မရှိကြပါက တရားရုံးသို့ သွားကာ လူများကို တရားသွားမစွဲရဲကြ​ပေ​။

သို့​သော်ငြား ကျန်းမိသားစုက သာမန်လူများ မဟုတ်​​ပေ​။

"​ဘောစ့်... ကျွန်​တော်တို့ ဘာလုပ်ကြမလဲ... သူက ရမန်အရာရှိ​တွေ အများကြီး ​ခေါ်လာတာ... အဲ့အရာရှိ​တွေကလည်း ကျွန်​တော်တို့ ဟယ်​ချောင်က မဟုတ်ဘူး" ဟယ်ချွန်းရှန့်က ​ပြောလိုက်သည်။

"မပူနဲ့... ငါ အဆင်​​ပြေတယ်" ကျန်းကျန့်က ​ပြောလိုက်သည်။

ထို ရက်စက်လှ​​သော တရားစီရင်ချက်များကို ​တွေ့ရပြီး​နောက် မည်သည့် စီစဥ်မှုများကိုမှ မလုပ်ရ​သေးသလို ပြည့်ပြည့်ဝဝ စိတ်​အေးလက်​အေး မ​နေနိုင်ခဲ့။

သူက ယခင်က အငြင်းအခုံများအတွင်း ကျန်းအ​ဖေနှင့် အ​မေတို့ကို ရိုက်ခဲ့သော်ငြား အချိန်တစ်ခုအတွင်း ဟယ့်ရှီရွာက ကျန်းမိသားစုအတွက် ​ထောက်ခံ​ပေးမည့် နည်းလမ်း မရှိ​စေရန် လုပ်​ဆောင်ထားခဲ့ပြီးသား ဖြစ်ပြီး သူ့မိဘများကို မ​ထောက်ပံ့​ပေးသည့်အတွက်ကား...

ကျန်းမိသားစုက သူ့ကို တရားစွဲခဲ့လျှင်​တောင် သူက အဆင်​ပြေ​နေဆဲ ဖြစ်သည်။ သူက ​ကျောက်မိသားစုအတွင်းသို့ ​ရောက်သွားခဲ့​လေပြီ။ 

ထိုဥပ​ဒေများအားလုံးက အိမ်မှာ​နေ​သော သားများကိုသာ ရည်ရွယ်ထားကြသည်။ သို့​​သော်လည်း သူက အခြားအိမ်သို့ ​ပြောင်းထားပြီးသား ဖြစ်​နေသည်။ သူ့ကို ဘာများ လုပ်လို့ ရဦးမှာလဲ...

ဤကမ္ဘာတွင် လက်ထပ်ထား​​သော အမျိုးသမီးများက ​သူမ၏ မိဘများကို ​ထောက်ပံ့ရန်အတွက် ယောကျ်ား၏ မိသားစုမှ ​ငွေကို ယူနိုင်ရန် အ​ကြောင်း မရှိ​ပေ။

"ကျန်းကျန့်... အဆင်​ပြေမှာ ​သေချာပါတယ်​နော်" ​​ကျောက်လျူက သူ့​မြေးကို ချီ​ပွေ့ထားလျက်က ကျန်းကျန့်ကို စိုးရိမ်ပူပန်စွာ ကြည့်​နေခဲ့သည်။

"အဆင်​ပြေပါတယ်" ကျန်းကျန့်က စိတ်​အေးလက်​အေး ​ပြော​နေသည့်အတွက် ​ကျောက်လျူက ကျန်းကျန့်ကို 100% ယုံကြည်သွားပြီး စိတ်ငြိမ်သွားသည်။ ကျန်းကျန့်က အဆင်​ပြေတယ်လို့ ​ပြောမှ​တော့ ​ပြေမှာပဲ​ပေါ့... ထိုစဥ်မှာပင် အပြင်ဘက်မှ ရမန် အရာရှိများ ဝင်လာခဲ့လေသည်။

"ဘယ်သူက ကျန်းကျန့်လဲ" တာဝန်ရှိသူက ​မေးလိုက်သည်။

"ကျွန်​တော်က ကျန်းကျန့်ပဲ" ကျန်းကျန့်က တည့်တည့်ပင် အတည်ပြုလိုက်သည်။

"မင်းက ကျန်းကျန့်လား" တာဝန်ရှိသူက ကျန်းကျန့်ကို အံ့အားသင့်ဟန်ဖြင့် ကြည့်လိုက်သည်။ သူက ဤ​နေရာသို့ ကျန်းကျန့်ကို လာဖမ်းခြင်း ဖြစ်၍ ကျန်းကျန့်၏ ပြစ်မှုများကိုလည်း ကြားထားပြီးသား ဖြစ်သည်။ 

ထိုသူက သူ့မိဘရင်းများနှင့် ညီအစ်ကိုများကို ရိုက်နှက်ခဲ့ပြီး မိသားစုခွဲ​နေရန် သူ့မိဘများကို တွန်းအား​ပေးခဲ့သဖြင့် ထိုသူမှာ အလွန် ရက်စက်တတ်သူ ဖြစ်​နေမည်ဟု ​တွေးထားခဲ့​​သော်လည်း လူကိုယ်တိုင်က သူ​တွေးထားသည်နှင့် လုံးဝ ခြားနား​နေမည်ဟု မထင်ထားခဲ့ပါ​​ပေ။ 

"သူက ကျန်းကျန့်ပဲ... သူ့ကို မြန်မြန် ဖမ်းလိုက်" ထိုအခိုက်မှာပင် ကျိူး​မောင်ဟယ်သည်လည်း အပြင်ဘက်မှ ဝင်လာခဲ့သည်။

"ခင်ဗျားက မြို့​တော်ကလာတဲ့ ​တော်ဝင်သံတမန် အရှင်ကျိုးပဲ ဖြစ်ရမယ်" ကျန်းကျန့်က ကျိုး​မောင်ဟယ်ကို ကြည့်လိုက်သည်။ "​အရှင်ကျိုးက ကျွန်​တော့်ကို ဘာအမှူနဲ့ ဖမ်းချင်​နေတာများလဲ"

"မင်းရဲ့ မိဘ​တွေကို ရိုက်နှက်ပြီး သူတို့အသက်ရှင်​နေတာ​တောင် မင်းရဲ့​ချမ်းသာ​မှု​တွေနဲ့ မ​ထောက်ပံ့​ပေးတဲ့ အမှုပဲ" ကျိုး​မောင်ဟယ်က ​ပြောလိုက်သည်။ 

"မင်းက တကယ် ​​သားသမီးဝတ်မသိတဲ့​ကောင်ပဲ"

"ပထမဆုံးအမှုက အရှင်ကျိုးမှာ သက်​သေရှိရဲ့လား... ဒုတိယတစ်မှုအတွက်က အရှင်ကျိုးအ​နေနဲ့ ကျွန်​တော် ​ကျောက်မိသားစုထဲ ဝင်သွားတာ ဘယ်​လောက်ရှိပြီလဲ ဆိုတာကို​ရော သိရဲ့လား"

 ကျန်းကျန့်က တည့်တည့်ပင် ​ပြောလိုက်သည်။

ကျန်းကျန့်က လုံးဝ အပြစ်ရှိသည်ဟု မခံစားရသည့်အပြင် သူအမှားလုပ်ထားသည်ဟုလည်း မ​​တွေးထား​ပေ။

သို့​သော်လည်း ကျိုးမောင်ဟယ်က ကျန်းကျန့်၏ ထိုပုံစံကို ​တွေ့​သောအခါ ​အမျက်​ခြောင်း​ခြောင်း ထွက်လာပြီး ထိုလူက ​ခေါင်းမာလွန်းလှသည်ဟုသာ ခံစားလိုက်ရသည်။

"လက်ထပ်ပွဲဆိုတာ မင်းရဲမိဘ​တွေနဲ့ ​အောင်သွယ်​တော်နဲ့ပဲ စီစဥ်သင့်တယ်... ခွင့်ပြုချက် မရှိဘဲ ​ကျောက်မိသားစုထဲ ဝင်သွားတာကို ထည့်မတွက်ဘူး... ဒီနည်းနဲ့ ထွက်သွားလို့ မရဘူးကွ"

 ကျိုး​မောင်ဟယ်က ​လှောင်ရယ်လိုက်သည်။

ဒါ​ပေါ့ သူကလည်း ကျန်းကျန့် ​ကျောက်မိသားစုထဲ ဝင်သွားတာကို သိ​နေခဲ့တယ်​​လေ... ပြီး​တော့ ဒီလူက ​​မျှော်လင့်ချက် မရှိ​တော့ဘူးလို့ ပိုပိုပြီး ခံစားလာရ​​လေပဲ...​ ယောကျ်ားစစ်စစ်တစ်​ယောက်ဆိုတာ ဒီလိုမျိုး ဇနီးသည်ရဲ့ မိသားစုထဲ ဝင်သွားပြီး​တော့ ကိုယ့်ကိုယ်ကိုယ် လူရယ်ခံရ​အောင် မလုပ်သင့်ဘူးကွ... ​​​သေချာ​ပေါက် ကျန်းကျန့်က​တော့ ၎င်းကို ​လှောင်စရာ ကိစ္စဟု မမြင်​ပေ။ သူက မိဘများအ​ပေါ် တာဝန်မ​ကျေပွန်ဘဲ မထင်မှတ်ထားစွာပင် သူ့မိဘများ ​ပေးခဲ့သော မျိုးရိုးနာမည်ကိုပင် စဥ်း​တောင် မစဥ်းစားဘဲ အဆုံးရှုံးခံလိုက်သည်။

"သူ့ကို ချည်လိုက်" ​ကျိုး​မောင်ဟယ်က ​ကျယ်ကျယ်​လောင်​လောင် ​ပြောလိုက်သည်။

အားလုံး​သော ရမန်အရာရှိများက ​ကျိုး​မောင်ဟယ်၏ စကားကို နား​ထောင်ကြပြီး သူ့စကားများကို ကြား​သောအခါ ကျန်းကျန့်အနားသို့ ကပ်လာ၍ ဖမ်းဆီးရန် ကြိုးစားလာကြ​လေ​တော့သည်။

ကျန်းကျန့်၏ မျက်နှာ ​တွေ​ဝေသွားသည်။ 

ဒီလူက သူ့ကို တမင်သက်သက် ပြဿနာ လာရှာ​နေတာကို သူသိလိုက်ပြီ... ဒီကိစ္စ ​တော်​တော်နဲ့ ပြီးမသွားမှာကိုပဲ စိုးရိမ်ရတယ်...
အပိုင်း၁၆၈
