Ch 8

🐈Chapter 8

နေ့စဉ်အလုပ်ဖြစ်သော ဖောက်ထွင်းမြင်နိုင်သော ချစ်ပ်ပေါ်ရှိ မက်ဆေ့ချ်များကို စစ်ဆေးနေဆဲဖြစ်သည့် ကျီရှို့ကျွင်းက စိတ်ပျက်နေသော ကြောင်လေးဆီသို့ လျှောက်သွားခဲ့သည်။ ယင်း‌နောက် ငုတ်တုတ်ထိုင်ပြီး အမွေးလုံး‌သေးသေးလေးကို ညင်သာစွာ ပွတ်သပ်လိုက်သည်။

"ငါတို့မှာ စားစရာရှိပါသေးတယ်"

မာရှယ်က အာမခံပြောဆိုလိုက်သည်။

ယွဲ့အန်းက ခေါင်းမော့လာပြီး မာရှယ်၏ မျက်လုံးများနှင့် ဆုံကြည့်လိုက်သည်။ အမှန်တကယ်တမ်း၌ ကာကွယ်ရေးယာဉ်တွင် အာဟာရထုပ်များအပြင် အခြားစားစရာများကိုလည်း သို‌လှောင်ထားပေသည်။ အသင့်စား အစားအစာများ ထည့်သွင်းထားသည့် သေတ္တာတစ်ဒါဇင်ခန့်ရှိပြီး ၎င်းတို့က အမှန်တကယ် အရသာရှိလှသည်။ အရသာရှိသော အစားအစာများက ဆိုးရွားသောအခြေအနေများတွင် အနည်းငယ် သက်တောင့်သက်သာ ဖြစ်စေနိုင်သည်။ ထို့‌ကြောင့် ယာဉ်ထဲတွင် ခိုလှုံနေသူများ၏ စိတ်ပိုင်းဆိုင်ရာ ဖိစီးမှုကို လျော့ပါးသက်သာစေရန် ကူညီပေးပေသည်။

"မြောင်"

ယွဲ့အန်း၏ စိတ်ဓာတ်များက ချက်ချင်း တက်ကြွလာသည်။ သူ၏လက်ဖဝါးများကို ကျီရှို့ကျွင်း၏ ဒူးပေါ်တွင် တင်လိုက်ပြီး သူ့မျက်လုံးများက အသစ်တဖန် မျှော်လင့်ချက်များဖြင့် တောက်ပနေ၏။

ကျီရှို့ကျွင်းက အစားအစာကို ထုတ်ယူရန် မတ်တပ်ရပ်လိုက်စဉ် ဖန်သားပြင်ပေါ်မှ မှိတ်တုတ်မှိတ်တုတ် လင်းနေသည့် မက်ဆေ့ချ်တစ်ခုက သူ့အာရုံကို ရုတ်တရက် ဖမ်းစားသွားသည်။ ၎င်းက ကြိမ်နှုန်းကုဒ် နံပါတ်အတန်းလိုက်ဖြစ်သည်။

မာရှယ်၏ အမူအရာက တခဏချင်း ပြောင်းလဲသွားသည်။ သူက ကုဒ်ကို လျင်မြန်စွာ အလွတ်ကျက်ပြီး မက်ဆေ့ချ်ကို ဖျက်ကာ ချစ်ပ်ကို ဖယ်လိုက်သည်။ ထို့နောက် ကျီရှို့ကျွင်းက တုန့်ဆိုင်းမနေဘဲ ယာဉ်၏ ဆက်သွယ်မှုစနစ်ကို အသက်သွင်းကာ ကြိမ်နှုန်းကုဒ်ကို ထည့်သွင်းလိုက်လေသည်။

ယွဲ့အန်းက ဗီရိုရှေ့တွင် ခြေပစ်လက်ပစ် ထိုင်လိုက်သည်။ ထို့နောက် စားစရာပေးမည်ဟု ကတိပြုထားသော မာရှယ်က ပျာယာခတ်နေသည်ကို စပ်စုစွာ ကြည့်နေသည်။ အနည်းငယ် အားစိုက်ထုတ်ပြီး သူ့ကိုယ်သူ ထထိုင်ကာ စုံစမ်းရန် လျှောက်သွားလိုက်သည်။

ကြိမ်နှုန်း၏ အခြားတစ်ဖက်ရှိလူက စိုးရိမ်တကြီးစောင့်ဆိုင်းနေပုံရသည်။ ဆက်သွယ်မှုစတင်လိုက်သည်နှင့် တစ်ပြိုင်နက်တည်း ဖန်သားပြင်က တဖျပ်ဖျပ်ဖျပ် လှုပ်ခတ်ပြီး ကျီရှို့ကျွင်း၏ လက်ထောက်မျက်နှာက ထွက်‌ပေါ်လာသည်။

"မာရှယ်"

ထိုလူက အော်ခေါ်လာသည်။ သူ့မျက်နှာက ဖန်သားပြင်နှင့် အလွန်နီးကပ်လွန်းသဖြင့် ပေါက်ကွဲထွက်လာမည်ဟုပင် ထင်ရသည်။

"မာရှယ် အဆင်ပြေရဲ့လား"

ယွဲ့အန်းက ကျီရှို့ကျွင်း၏ ရာထူးကို ကြားပြီး နားရွက်များက လှုပ်လှုပ်ရှားရှား ဖြစ်လာခဲ့သည်။ သူက ကျီရှို့ကျွင်းကို မော့ကြည့်လိုက်ချိန် ထိုလူ၏ အရှိန်အဝါက သိသိသာသာ ပြောင်းလဲသွားကြောင်း ရုတ်တရက် သတိပြုမိခဲ့သည်။ ပြီးခဲ့သောနေ့ရက်များအတွင်း ယွဲ့အန်းကို သက်တောင့်သက်သာ တစ်ရေးတစ်မော အိပ်ပျော်စေခဲ့သည့် အေးချမ်းပြီး ငိုက်မျဉ်းစေသော လေထုက တခဏချင်း ပျောက်ကွယ်သွားခဲ့သည်။ ထိုအစား ထက်ရှပြီး ဩဇာရှိသော တည်ရှိမှုက ယာဉ်အတွင်း လွှမ်းခြုံသွား၏။

 ယင်းအခြေအနေက ယွဲ့အန်း၏ အမွေးများကို ထောင်မတ်သွားစေလေသည်။

၎င်းက မာရှယ်ရာထူးနှင့် လိုက်ဖက်သော တည်ရှိမှုဟု ယွဲ့အန်းက တွေးလိုက်သည်။ ကျီရှို့ကျွင်းက အသက် ၃၀ စွန်းစွန်းသာ ရှိပုံပေါ်ကြောင်း ယွဲ့အန်း ဂရုပြုမိခဲ့သည်။ ယခင်က သူ မှတ်မိသည့် လူလတ်ပိုင်း မာရှယ်များထက် အဆပေါင်းများစွာ ငယ်ရွယ်‌ပေသည်။ ယွဲ့အန်း မရှိခဲ့သည့် ဆယ်စုနှစ်များအတွင်း ကမ္ဘာကြီးက စာရေးနည်းအသစ်များကို တီထွင်ခဲ့ပြီး အာကာသထဲသို့ အရဲစွန့်ကာ ထွက်ခွါနိုင်ခဲ့ကြသည်။ ထိုမျှသာမက ရာထူးအမြင့်ဆုံး စစ်ဘက်အရာရှိများ၏ အသက်နှင့် ပတ်သက်၍လည်း တင်းကြပ်မှုများကို လျှော့ချလိုက်သည်ဟု ထင်ရသည်။

ထိုအတွေးများက သူ့စိတ်ထဲ၌ ဝေ့ဝဲနေစဉ် ယွဲ့အန်းက သူ၏တောက်ပြောင်သော အမွေးများကို ခါလိုက်သည်။ ထို့နောက် သူ့လက်သည်းများကို အနည်းငယ် ဆန့်ထုတ်လိုက်ပြီး ကျီရှို့ကျွင်း၏ ဘောင်းဘီခြေထောက်ပေါ်သို့ တက်သွားလိုက်သည်။

ဖန်သားပြင်ပေါ်တွင် လက်ထောက်က မေးခွန်းများကို တရစပ်ဆက်လက်မေးမြန်းလာသည်။

"မာရှယ် ဒဏ်ရာရသွား‌သေးလား... ကျွန်တော်တို့ ဆေးဘက်ဆိုင်ရာဝန်ထမ်းတွေကို ခေါ်လာဖို့ လိုသေးလား... ထောက်ပံ့ရေးပစ္စည်းတွေရော ဘယ်လိုနေလဲ... ဂြိုဟ်ရဲ့ပတ်ဝန်းကျင်က လုံခြုံရဲ့လား... ယာဉ်ထဲမှာ အရင်းအမြစ်တွေရော လုံလောက်ရဲ့လား... နောက်ပြီး..."

ကျီရှို့ကျွင်းက ပြန်မဖြေခဲ့ပေ။ ယင်းအစား ယွဲ့အန်း တက်လာသည်ကို သတိပြုမိပြီး သူက အောက်ကိုငုံ့ပြီး ကြောင်လေးကို ကောက်ချီကာ ထိန်ချုပ်‌ရေးစနစ်ခုံပေါ်သို့ တင်လိုက်သည်။

ထို့နောက် လက်ထောက်၏ မေးခွန်းများကို ဖြတ်တောက်ပြီး အေးစက်စက် အသံဖြင့် မေးလိုက်သည်။

"တည်နေရာပြော"

"ဟုတ်ကဲ့ပါ ဆာ... ပထမစစ်တပ်က အခုလောလောဆယ် ၁၃ ခုမြောက် ကြယ်စနစ်ထဲက ပင်မကြယ်ရဲ့မြို့တော်မှာ တပ်စွဲထားပါတယ်"

လက်ထောက်က ပြန်ဖြေရင်း သူ့ခန္ဓာကိုယ်က အလိုလို ဖြောင့်မတ်သွားသည်။ ခဏကြာပြီးနောက် လက်ထောက်၏ မျက်လုံးများက ထိန်းချုပ်ရေးစနစ်ခုံပေါ်တွင် ထိုင်နေသည့် အဖြူရောင် သတ္တဝါလေးအပေါ် ရောက်ရှိသွားသည်။ သူ့မျက်နှာပေါ်တွင်လည်း စူးစမ်းလိုစိတ်နှင့် ရှုပ်ထွေးမှုများက ရောထွေးနေပေသည်။

ကျီရှို့ကျွင်းက ယွဲ့အန်း၏ တည်ရှိမှုကို ရှင်းပြရန် မကြိုးစားခဲ့ပေ။ ယင်းအစား သူက ပြတ်ပြတ်သားသား အမိန့်ပေးလိုက်သည်။

"စခန်းထိုးတာကို ဖျက်ပြီး အင်ပါယာကြယ်ဆီ ပြန်သွား... S13 စနစ်ကို ဖြတ်တဲ့အခါ D-အဆင့် ကင်းထောက်သင်္ဘောတစ်စင်းကို ၂၂ ခုမြောက် ဂြိုဟ်ဆီ စေလွှတ်လိုက်"

[TN: S13 စနစ်ဆိုတာ ၁၃ ခုမြောက်ကြယ်စနစ်ကို ပြောတာပါ။]

"ဟုတ်ကဲ့ ဆာ"

"နောက်တစ်ခုက"

မာရှယ်က ယွဲ့အန်းထံ တစ်ချက်လှမ်းကြည့်လိုက်သည်။ ထို‌ကြောင်လေးက ဖန်သားပြင်ထံ ခေါင်းလေးစောင်းပြီး အမြီး လေးကို လွှဲယမ်းလျှက် ကြည့်နေသည်။ ထို့နောက် ကျီရှို့ကျွင်းက ခံစားချက်ကင်းမဲ့သည့် လေသံနှင့် ထပ်ဖြည့်ပြောလိုက်သည်။

"စစ်သင်္ဘောပေါ်မှာ အဆာပြေစားစရာတွေ ပြင်ဆင်ထားပေးပါ... အဲဒါတွေကို ငါ့နေရာမှာ တိုက်ရိုက်ထည့်ထားလိုက်"

ထိုသို့ပြောပြီး ကျီရှို့ကျွင်းက ဆက်သွယ်မှုကို ရုတ်တရတ် အဆုံးသတ်လိုက်လေသည်။

လက်ထောက်က မည်းမှောင်သွားသည့် ဖန်သားပြင်ကို ကြည့်ရင်း ကျန်ရစ်ခဲ့သည်။ သူ့စိတ်မှာလည်း ချာချာလည်သွားပေသည်။

အဆာပြေမုန့်တဲ့လား... မာရှယ် ဦးခေါင်းဒဏ်ရာတွေများ ရသွားတာလား...

ဤပုံမှန်မဟုတ်သော တောင်းဆိုမှု၏ ဆိုလိုရင်းကို တွေးတောနေစဉ်တွင် ထိုသူ၏အမူအရာက ရှုပ်ထွေးခြင်းမှသည် ထိတ်လန့်ခြင်းအဖြစ်သို့ ပြောင်းလဲသွားလေသည်။

****

ကြယ်ခေတ် ၂၀၁၇၊ နိုဝင်ဘာလ ၂ ရက်။

လူသားများသိရှိထားသော အရင်းအမြစ်အကြွယ်ဝဆုံး ဂလက်ဆီစနစ် ၁၈ ခုနှင့် နေထိုင်နိုင်သော ဂြိုလ်ပေါင်း သောင်းချီကို ထိန်းချုပ်ထားသည့် စင်းသစ်စ်အင်ပါယာက အံ့အားသင့်ဖွယ် သတင်းကြောင့် တုန်လှုပ်သွားခဲ့သည်။

အင်ပါယာ၏ စစ်ဦးစီးချုပ် သုံးဦးအနက် အသက်အငယ်ဆုံးဖြစ်သော မာရှယ်ကျီရှို့ကျွင်းက ပုံမှန်စစ်ဆေးရေးခရီးစဉ်အတွင်း ခြုံခိုတိုက်ခိုက်ခံခဲ့ရသည်။ သူ၏တည်‌နေရာကို ယခုလောလောဆယ် မည်သူကမျှ မသိရသေးပေ။

ထိုသတင်း ပေါက်ကြားသွားသည်နှင့် တစ်ပြိုင်နက် အင်ပါယာတစ်လွှားရှိ လူအများက အာရုံစိုက်လာခဲ့ကြသည်။

ကျီရှို့ကျွင်းက စင်းသစ်စ်အင်ပါယာတစ်ခုလုံးတွင် ချစ်ခင်လေးစားခံရသော စစ်ခေါင်းဆောင်တစ်ဦးဖြစ်သည်။ ထိုသူက ထူးခြားသော စစ်ရေးစွမ်းရည်နှင့်အတူ ငယ်ရွယ်ပြီး စွမ်းရည်ပြည့်ဝသည်။ သူက နယ်မြေချဲ့ထွင်ရာတွင် အင်ပါယာ၏ ထက်မြက်သော ဓားတစ်လက်ဖြစ်ခဲ့သည်။ ကျီရှို့ကျွင်းက အင်ပါယာအတွက် ဂလက်ဆီစနစ်တစ်ခုလုံးကို သိမ်းပိုက်နိုင်ခဲ့ပြီး စင်းသစ်စ်အင်ပါယာ၏ စစ်နတ်ဘုရား၊ သို့တည်းမဟုတ် "ငွေဓားသွား" ဟူသည့် နာမည်ပြောင်ကို ရရှိခဲ့သည်။

အရေးအကြီးဆုံးမှာ ပျမ်းမျှသက်တမ်း အနှစ်သုံးရာကျော် ရှည်လျားသည့် ဤမဟာအာကာသခေတ်တွင် ထိုမာရှယ်ဖြစ်သူက အသက်ကိုးဆယ်သာရှိသေးပြီး အရွယ်ကောင်းဆဲပင်။ ထို့အပြင် သူ့ရှေ့တွင် မယုံနိုင်လောက်အောင် တောက်ပသော အနာဂတ်ကလည်း စောင့်ကြိုနေသည်။

စစ်တပ်ဌာနက နှစ်ရက်ခန့် မသိချင်ယောင်ဆောင်ပြီး‌နောက် လူထု၏ ဖိအားပေးမှုအောက်၌ တောင့်မခံနိုင်ကြတော့ပေ။ သူတို့က သတင်းအတည်ပြုရန်အတွက် ပြန်ကြားရေးအရာရှိတစ်ဦးကို စေလွှတ်ခဲ့သည်။ ထိုသူက မာရှယ်ကျီ၏ သေဆုံးမှုနှင့် ပတ်သက်ပြီး တိကျသေချာသော အထောက်အထား မရှိကြောင်း၊ သူ ပျောက်သွားသော နေရာသို့ ရှာဖွေကယ်ဆယ်ရေးအဖွဲ့များ ဖြန့်ကျက်ချထားကြောင်းကို အတိအလင်း ပြောဆိုခဲ့သည်။

ထိုသို့ကြေငြာထားသော်လည်း လူထုက မျှော်လင့်ချက် သေးသေးလေးကို ဆုပ်ကိုင်ထားဆဲပင်။ မည်သို့ပင်ဆို‌စေကာမူ တရားဝင်သတင်းများက အဆိုပါတိုက်ခိုက်မှုသည် ၁၃ ခုမြောက် ကြယ်စနစ်၏ အဓိကကြယ်တွင် ဖြစ်ပွားခဲ့ကြောင်း ဖော်ပြခဲ့သည်။ ထိုနေရာက ဂြိုဟ်၏နယ်ပယ်ထဲသို့ မဝင်မီနယ်စပ်ဒေသဖြစ်သည်။

တစ်နည်းဆိုရသော် မာရှယ်ကျီက နေထိုင်ရန် သင့်တော်သော လူ့ကမ္ဘာသို့ မရောက်ရှိမီ ကျယ်ပြောလှသော အာကာသအတွင်း ပျောက်ကွယ်သွားခဲ့သည်။

အာကာသထဲတွင် ပျောက်ကွယ်သွားခြင်းက အကာအကွယ်ဝတ်စုံမပါလျှင် အမျိုးမျိုးသော ဓာတ်ရောင်ခြည်ဆိုင်ရာ ပြဿနာများကို ရင်ဆိုင်ရလိမ့်မည်။ ထိုမျှသာမက လေဟာနယ် ပတ်ဝန်းကျင်ကလည်း မိနစ်ပိုင်းအတွင်း လူတစ်ဦးကို သေစေနိုင်သည်။

အမြင့်ဆုံး မျိုးရိုးဗီဇအဆင့်ရှိသည့် "စစ်နတ်ဘုရားစစ်တပ်" ၏ မာရှယ်တစ်ဦးဖြစ်နေလျှင်တောင် လူသားများက စကြာဝဠာပတ်ဝန်းကျင်တွင် အလွန်အမင်း ထိခိုက်လွယ်သည်ဟူသော အချက်ကို ထိမ်ချန်ထား၍မရ‌ပေ။

စင်းသစ်စ်အင်ပါယာတစ်ခွင်လုံးရှိ သူရဲကောင်းကို လေးစားအားကျကြည်ညိုပြီး သူ့အပေါ် အိုင်ဒေါ (Idol) တစ်ဦးကဲ့သို့ စွဲလမ်းနေကြသော မိန်းမငယ်များအားလုံးက ဝမ်းနည်းပူဆွေးသွားခဲ့ကြသည်။

ဂလက်ဆီကွန်ရက်၏ လူမှုပလက်ဖောင်းများတွင် လူအများက ကြီးမားကျယ်ပြန့်သော စကြဝဠာအတွင်း သေဆုံးနိုင်ဖွယ်ရှိသော ဤထူးချွန်လှသော မာရှယ်အတွက် ဝမ်းနည်းကြောင်း ဖော်ပြသည့် ဖယောင်းတိုင်များကို ထွန်းညှိနေကြပြီဖြစ်သည်။

စစ်ဌာနက ဤအဆိုးမြင်သော အရပ်သားများကြောင့် ဒေါသထွက်ခဲ့ကြသည်။

မာရှယ်၏သေဆုံးမှုကို တရားဝင် အတည်ပြုနိုင်ခြင်း မရှိသေးပေ။

သူတို့က အလောင်းကိုပင် ရှာမတွေ့‌သေးပေ။

လူတွေ လူတွေ ပိုပြီး အကောင်းဘက်က‌နေ တွေးပေးလို့မရလား...

သို့သော် စစ်တပ်၏ အကောင်းမြင်မှုက တစ်ရက်အကြာတွင်  ပျက်ပြားသွားခဲ့သည်။ မီဒီယာများက လည်း အစီရင်ခံစာများကို တစ်ခုပြီးတစ်ခု ထုတ်ပြန်ပြီး သွေးရူးသွေးတန်း ပြောနေကြသည်။

ပဉ္စမမြောက် ရှာဖွေကယ်ဆယ်ရေးအဖွဲ့က ၁၃ ခုမြောက် ကြယ်စနစ်၏ နယ်နိမိတ်တွင် မူမမှန်သောဆွဲငင်အားတစ်ခုကို ရှာဖွေတွေ့ရှိခဲ့သည်။

ပထမဆုံး ရှာဖွေကယ်ဆယ်ရေးအဖွဲ့က ၁၃ ခုမြောက် ကြယ်စနစ်၏ နယ်စပ်တွင် အာကာသယာဉ် အပျက်အစီးများကို ရှာဖွေတွေ့ရှိခဲ့သည်။ ထိုနေရာ၌ပင် ပစ္စည်းများကို ခွဲခြမ်းစိတ်ဖြာကြည့်ခဲ့သည်။ ၎င်းက မာရှယ်၏ စစ်သင်္ဘောဖြစ်သော "စစ်နတ်ဘုရား" ထံမှ တွန်းကန်အားစနစ်၏ အကြွင်းအကျန်များ ဖြစ်ကြောင်း အတည်ပြုခဲ့လေသည်။

အဋ္ဌမမြောက် ရှာဖွေကယ်ဆယ်ရေးအဖွဲ့က ၁၃ ခုမြောက် ကြယ်စနစ်၏အစွန်းတွင် မက်ခါအပိုင်းအစများကို ရှာဖွေတွေ့ရှိခဲ့သည်။ ၎င်းတို့က မာရှယ်၏ "ငွေဓားသွား" အစိတ်အပိုင်းတစ်ခုဖြစ်သည့် အဓိကပါဝါအရင်းအမြစ်မှ ဖြစ်ကြောင်း အတည်ပြုခဲ့သည်။

ဆဌမမြောက် ရှာဖွေကယ်ဆယ်ရေးအဖွဲ့က ၉၃% အထိ ပျက်စီးနေသော "ငွေဓားသွား" မက်ခါ၏ အဓိကကိုယ်ထည်ကို ခြေရာခံနိုင်ခဲ့သည်။

တတိယမြောက် ရှာဖွေကယ်ဆယ်ရေးအဖွဲ့က "စစ်နတ်ဘုရား" စစ်သင်္ဘော၏ ပင်မကိုယ်ထည်ကို အောင်မြင်စွာ ရှာဖွေတွေ့ရှိခဲ့သည်။ ၎င်းက ၇၀% ပျက်စီးနေခဲ့ပြီး အထဲတွင် မာရှယ်၏ ကိုယ်ပိုင်သက်တော်စောင့်နှစ်ဦး၏ ရုပ်အလောင်းများကို တွေ့ရှိခဲ့သည်။

ဆက်တိုက်စီးဝင်လာနေသော ထိုသတင်းစကားများကြောင့် အင်ပါယာနိုင်ငံသားများအပေါ် ဖုံးလွှမ်းနေသည့် အရိပ်မည်းကြီးက တစ်စထက်တစ်စ ပိုမိုနက်ရှိုင်းလာခဲ့သည်။ စစ်ဘက်ဆိုင်ရာဌာနတွင် ကျန်ရှိနေသည့် နောက်ဆုံးမျှော်လင့်ချက် အစအနလေးများကလည်း တစ်ခုပြီးတစ်ခု ရိုက်ချိုးဖျက်ဆီးခံနေရသည်။

ငါးရက်မြောက်နေ့သို့ ရောက်ရှိလာချိန်တွင် စစ်တပ်က ဌာနချုပ်၏ အတွင်းပိုင်းဆက်သွယ်ရေးလမ်းကြောင်းမှတစ်ဆင့် စတုတ္ထမြောက် ရှာဖွေကယ်ဆယ်ရေးအဖွဲ့ဆီမှ သတင်းစကားတစ်ခုကို လက်ခံရရှိခဲ့သည်။ ထိုသတင်းကြောင့် အံ့ဖွယ်ဖြစ်ရပ်ဟူသည့် မျှော်လင့်ချက်‌ ရောင်ခြည်လေးက ခပ်မှိန်မှိန် တောက်ပလာခဲ့သည်။

စတုတ္ထအဖွဲ့က "စစ်နတ်ဘုရား" ၏ အရေးပေါ်ယာဉ်အခန်း အပိုင်းအစများကို ရှာဖွေတွေ့ရှိခဲ့ကြောင်း အစီရင်ခံခဲ့သည်။ ဒေတာများကို ပြန်လည်ရယူပြီးနောက် အရေးပေါ်ယာဉ် ခြောက်ခုလုံးက ဘေးကင်းစွာ ထွက်ခွာနိုင်ခဲ့ကြောင်း တွေ့ရှိရသည်။

မာရှယ်၏ ရုပ်အလောင်းကို အရိပ်အယောင် မမြင်ရသေးသောကြောင့် မျှော်လင့်ချက် ရှိနေသေးသည်။

ရက်သတ္တပတ်ကြာသည်အထိ ပြင်းပြင်းထန်ထန် ရှာဖွေပြီးနောက် အင်ပါယာဂြိုဟ်ပေါ်ရှိ စစ်ဌာနချုပ်က ပထမတပ်ရင်းထံမှ သတင်းစကားကို လက်ခံရရှိခဲ့သည်။ ထိုတပ်ရင်းက မာရှယ်ကျီရှို့ကျွင်းနှင့်အတူ ကင်းလှည့်စစ်ဆေးရေး ခရီးစဉ်တွင် လိုက်ပါခဲ့သည်။

သူတို့က မာရှယ်၏ ခြေရာလက်ရာများကို ရှာဖွေတွေ့ရှိခဲ့ပြီး ဘေးကင်းလုံခြုံကြောင်း အတည်ပြုနိုင်ခဲ့ကြသည်။ ယခုအခါ စစ်တပ်တစ်ခုလုံးက စခန်းရုပ်သိမ်းနေပြီဖြစ်ပြီး နောက်သုံးရက်အတွင်း မာရှယ်နှင့်အတူ အင်ပါယာဂြိုဟ်သို့ ပြန်လည်ရောက်လာကြမည် ဖြစ်သည်။

နောက်ဆုံး၌ စစ်ဘက်ဆိုင်ရာ ဌာနတစ်ခုလုံး သက်ပြင်းချနိုင်ခဲ့ကြသည်။ နောက်တစ်နေ့တွင်မူ တစ်ပတ်ကြာ ပျောက်ဆုံးနေခဲ့သော မာရှယ်နှင့် ပြန်လည်ဆက်သွယ်နိုင်ခဲ့ကြသည်။

မာရှယ်ကျီရှို့ကျွင်း၏ အရည်အချင်းရှိသော ဗိုလ်ချုပ်များက စိုးရိမ်တကြီး စောင့်ဆိုင်းနေခဲ့ကြသည်။ ထိုသူများအနက်တစ်ဦးက မာရှယ် ပျောက်ဆုံးသွားပြီးနောက်ပိုင်း တပ်တွင်းသူလျှိုရှင်းလင်းရေးကို လုပ်ဆောင်ခဲ့ပြီး အခြေအနေများကို အသေးစိတ် အစီရင်ခံတင်ပြခဲ့သည်။

"အဆင်ပြေမယ်ဆိုရင်တော့ ကျွန်တော်တို့ အင်ပါယာဂြိုဟ်ကို ရောက်တဲ့အခါ မာရှယ်အနေနဲ့ မီဒီယာတွေရှေ့မှာ ခဏလောက် ထွက်ပေးနိုင်မယ်လို့ မျှော်လင့်မိပါတယ်ခင်ဗျာ..."

စစ်တပ်ပြန်ကြားရေးအရာရှိက သူ့ရှေ့ရှိ ဟိုလိုဂရမ်ပုံရိပ်ကို ကြည့်ရင်း ကြောက်ရွံ့စွာဖြင့် ပြောလိုက်သည်။

"နားလည်ပြီ..."

ဖန်သားပြင်ပေါ်မှ မာရှယ်က ခေါင်းညိတ်ပြလိုက်သည်။ သူ့အသံက နှစ်ပေါင်းထောင်ချီကြာအောင် အေးခဲနေသည့် ရေခဲပြင်ကြီးကဲ့သို့ အေးစက်ပြီး ခိုင်မာပြတ်သားလွန်းလှသည်။

ယွဲ့အန်းနှင့် ရှိစဉ်က ဖော်ပြခဲ့သော ပေါ့ပေါ့ပါးပါး အမူအရာနှင့် မတူပေ။ ကျီရှို့ကျွင်းက သူ၏နို့နှစ်ရောင် အဖော်မွန်လေးနှင့် နှစ်ယောက်တည်း ရှိနေသည့်အချိန်မျိုးတွင် ခံစားချက်ကင်းမဲ့ပြ တင်းမာခက်ထန်သော မျက်နှာထားကို အမြဲတစေ ထိန်းထားလေ့ရှိသည်။

သို့သော် လုပ်ဖော်ကိုင်ဖက်များနှင့် အများပြည်သူရှေ့တွင်မူ သူက အမြဲတစေ စိတ်ဖိစီးကာ တောင့်တင်းတတ်လေ့ရှိသည်။

အင်ပါယာအတွက် ထက်မြက်သော ဓားတစ်လက် လိုအပ်သကဲ့သို့ စစ်တပ်အတွက်လည်း ခိုင်မာသော မဏ္ဍိုင်တစ်ခု လိုအပ်သည်။ ထို့အပြင် ပြည်သူလူထုအတွက်လည်း မီးပြတိုက်တစ်ခု လိုအပ်ပေသည်။

[TN: ဓား၊ မဏ္ဍိုင်နဲ့ မီးပြတိုက်ဆိုတာက လူတစ်ဦးကို တင်စားပြီး‌ပြောချင်တာပါ။]

တစ်စုံတစ်ယောက်က လူအားလုံးကို ဦးဆောင်ရန်၊ ကာကွယ်ရန်နှင့် လုံခြုံမှုသည့် ခံစားချက်ကို ပေးစွမ်းနိုင်ရန်အတွက် ထွတ်ဆုံး သို့မဟုတ် အရှေ့ဆုံးတွင် မားမားမတ်မတ် ရပ်တည်ပေးရန် လိုအပ်ပေသည်။

ကျီရှို့ကျွင်းက ထိုသို့သော ပုဂ္ဂိုလ်မျိုးပင်။

မာရှယ်ကယ်ဗင်၏ ရွှေရောင်နေ့ရက်များက ကုန်လွန်သွားခဲ့ပြီဖြစ်၏။ ထို့အပြင် သူ၏ ကျန်းမာရေး အခြေအနေမှာလည်း ကျဆင်းလာခဲ့သည်။ ထို့ကြောင့် လူတိုင်းက ကျီရှို့ကျွင်းကို အနာဂတ်အတွက် အလားအလာအရှိဆုံး ဆက်ခံသူအဖြစ် တညီတညွတ်တည်း ရှုမြင်လာခဲ့ကြသည်။

ထို့ကြောင့် သူက ထက်မြက်ကြံ့ခိုင်ပြီး ရက်စက်ဖို့ လိုအပ်သည်။

ထိုမာရှယ်ဖြစ်သူကို အချိန်ကွာခြားပြီး ကျယ်‌ပြောလှသော စကြာဝဠာကို ဖြတ်ကျော်ကာ ဟိုလိုဂရမ်ပုံရိပ်ယောင်မှတစ်ဆင့် မြင်တွေ့ရခြင်းဖြစ်သည်။ ထိုသို့ဆိုလျှင်တောင်မှ အကြင်သူ၏ အရှိန်အဝါက စစ်မြေပြင်ကို တစ်ခါမျှ မရောက်ဖူးဘဲ ရုံးခန်းထဲတွင်သာ အလုပ်လုပ်ရသည့် စစ်ဘက်ဆိုင်ရာ အရာရှိအား တုန်လှုပ်သွားစေရန် လုံလောက်ပေသည်။

အသေးစိတ် ရှင်းလင်းပြောဆိုပြီးနောက် မာရှယ်က အရင်ဦးစွာ ဆက်သွယ်ရေးကို အဆုံးသတ်လိုက်သည်။

ပြန်ကြားရေးအရာရှိမှာ သက်ပြင်းအရှည်ကြီးကို ချပြီး သူ့ကိုယ်သူ စိတ်ထိန်းရန် ခေတ္တမျှ အချိန်ယူခဲ့ရသည်။ ထို့နောက် သတင်းစာရှင်းလင်းပွဲကို ပြင်ဆင်ရန် အပြေးအလွှား ထွက်ခွာသွားတော့သည်။

ပျောက်ဆုံးနေသော အင်ပါယာ၏ မာရှယ်မှာ မသေဆုံးခဲ့ပေ။ သူက သူ၏ တပ်ဖွဲ့များနှင့်အတူ ဘေးကင်းလုံခြုံစွာ ပြန်လည်ရောက်ရှိလာပြီဖြစ်၏။

ဤသတင်းကြောင့် တစ်နိုင်ငံလုံး အုတ်အော်သောင်းနင်း ဖြစ်သွားခဲ့သည်။ မီဒီယာဌာနပေါင်းစုံကလည်း အင်တိုက်အားတိုက် လှုပ်ရှားလာကြသည်။ စစ်တပ်က စီစဉ်ပေးထားသည့် နေရာသို့ တစ်ရက်စော၍ ကြိုတင်လာရောက်ပြီး နေရာယူ စောင့်ဆိုင်းနေခဲ့ကြလေသည်။

🐈🐈🐈