Ch 6

🐈Chapter 6

ယွဲ့အန်းက နောက်ဆုံးငါးကို စားပြီးနောက် အကင်ပစ္စည်းများကို ဆေးကြောပြီး ထုပ်ပိုးနေသည့် ရှို့ကျွင်းကို ကြည့်လိုက်သည်။ 

ကြောင်လေးက မာရှယ်၏ ခြေထောက်ဆီသို့ ခုန်ပေါက်ပြေးသွားပြီး ထိုသူ၏ရှည်လျားသော ခြေတံများနှင့် ပွတ်သပ်လိုက်သည်။ ယခင် ပြုမူခဲ့သော ဟာသလုပ်ရပ်များကို တစ်ဖန်ပြန်ပြီး ပြုလုပ်မည့်အစား ဤတစ်ကြိမ်တွင် ယွဲ့အန်းက ၎င်း၏ခြေဖဝါးလေးများကို ဆန့်ထုတ်လိုက်သည်။ ထို့နောက် သူ၏ခွန်အားကို ဂရုတစိုက်ထိန်းချုပ်ပြီး မာရှယ်၏ ဘောင်းဘီရှည်ပေါ်သို့ တက်သွားခဲ့သည်။

ကြောင်ပေါက်လေးက သူ့အား သစ်ပင်တစ်ပင်ကဲ့သို့ သဘောထားနေမှန်းကို ရုတ်တရက် တွေ့လိုက်ရ၏။ မာရှယ်က ခေတ္တမျှ ရပ်တန့်သွားပြီးနောက် ပစ္စည်းကိရိယာများစွာကို သိုလှောင်အိတ်ထဲသို့ ထိုးထည့်လိုက်သည်။ ထို့နောက် လက်ဆန့်ထုတ်ပြီး ခါးနားသို့ ရောက်နေပြီးဖြစ်သော အမွေးလုံးလေးကို ပင့်တင်ပေးလိုက်သည်။

"မြောင်"

ယွဲ့အန်းက ကျီရှို့ကျွင်း၏လက်ကို အခွင့်ကောင်းယူပြီး ခြေလှမ်း အနည်းငယ်လှမ်းကာ သူ့ပခုံးပေါ်သို့ တက်သွားလိုက်သည်။

၎င်း၏အရွယ်အစားက သေးငယ်သော်လည်း ယွဲ့အန်းက မာရှယ်၏ ကျယ်ပြန့်သောပခုံးနှင့် သေးသွယ်သောခါးပေါ်တွင် တည်ငြိမ်စွာ ဟန်ချက်ညီအောင် ထိန်းနိုင်ခဲ့သည်။

သူ့ပါးပြင်ကို ထိခတ်လာသည့် နူးညံ့ပြီး အမွေးပွပွ ခံစားမှုက ကျီရှို့ကျွင်း၏စိတ်ကို ခဏမျှ တောင်တင်းသွားစေခဲ့သည်။ ၎င်းနောက် ထိုအထိအတွေ့အပေါ် သက်သောင့်သက်သာ ဖြစ်လာခဲ့သည်။

ယွဲ့အန်းက သူ့ဘာသာသူ လမ်းလျှောက်ရသည်ထက် ကုန်းပိုးစီးချင်နေပုံရ၏။

သူက အစာကျွေးရုံဖြင့် အမွေးလုံးလေးကို အောင်အောင်မြင်မြင် ယဉ်ပါးစေရန် ထိန်းနိုင်ခဲ့သည်ဟု မာရှယ်က ယူဆနေခဲ့သည်။

တိရိစ္ဆာန်လေးတွေရဲ့ ကမ္ဘာက ဘယ်လောက်တောင်ရိုးရှင်းပြီး လှပလိုက်လဲ...

ရှို့ကျွင်းက လမ်းလျှောက်ပြန်ရင်း တွေးတောနေခဲ့သည်။ ထို့နောက် သူ့ခြေလှမ်းများက တုံ့ဆိုင်းသွားသည်။

ဤအမွေးလုံးလေးက တိရစ္ဆာန်တစ်ကောင်မျှသာ မဟုတ်မှန်း ရှို့ကျွင်း ရုတ်တရက် သဘောပေါက်သွားသည်။

ဘာလိုမျိုးကို တိရစ္ဆာန်လို့ သတ်မှတ်တာလဲ...

ကျယ်ပြန့်သော သဘောအားဖြင့်ဆိုရသော် ၎င်းတို့က ဆဲလ်များဖြင့်ဖွဲ့စည်းထားသော ကိုယ်တိုင် အစာမချက်နိုင်သည့် သက်ရှိများ ဖြစ်ကြသည်။

လူသားတစ်ဦး၏ ကျဉ်းမြောင်းလှသော ရှုထောင့်မှကြည့်လျှင် ၎င်းက ရှုပ်ထွေးသည့် စိတ်ခံစားမှုများနှင့် အသိဉာဏ်ကင်းမဲ့သော သတ္တဝါဖြစ်သည်။

မာရှယ်က ရုတ်တရက် သဘောပေါက်သွားသည်။ သူ့ကို ကယ်တင်ခဲ့သည့် အဖြူရောင် အမွေးလုံးလေးက စိတ်ခံစားမှုဆိုင်ရာအသိနှင့် မိမိကိုယ်ကို ဆင်ခြင်သုံးသပ်နိုင်စွမ်းလည်း ရှိသည်။

အဲဒါက... မဟုတ်သေးဘူး... သူက... မာရှယ်တစ်ယောက်နဲ့တောင် ရှင်းရှင်းလင်းလင်း လိုက်လျောညီထွေဖြစ်အောင် ပြောဆိုဆက်ဆံနိုင်တယ်...

ရှို့ကျွင်းက ရုတ်တရက် နားလည်သွားခဲ့သည်။ သူ့ပခုံးပေါ်တွင် ထိုင်နေသော သတ္တဝါလေးက ရိုးရိုးသာမန် တိရစ္ဆာန်လေးတစ်ကောင် မဟုတ်ပေ။ ၎င်းက အစာကွင်းဆက်၏ ထိပ်ဆုံးရှိ လူသားများနှင့် တန်းတူ ဉာဏ်ရည်ထက်မြက်သော သက်ရှိပုံစံဖြစ်ပေသည်။

၎င်းကို စဉ်းစားရင်း မာရှယ်က ယနေ့တွင် အကောင်ငယ်လေးအပေါ် ပြုလုပ်ခဲ့သည့် သူ၏လုပ်ရပ်များကို အလေးအနက် ပြန်စဉ်းစားမိသည်။ ရှို့ကျွင်းက အမှန်တရားကို နက်နက်ရှိုင်းရှိုင်းနှင့် တိတ်တိတ်ဆိတ်ဆိတ် သဘောပေါက်လာခဲ့သည်။

၎င်းက သူ၏ အသက်သခင်ဖြစ်ကြောင်း သိထားပုံပေါ်သည်။ သူက သူ့(ယွဲ့အန်း)ကို စနောက်ပြီး အမွေးများကို ပွတ်သပ်ကာ အိမ်မွေးတိရစ္ဆာန်ကဲ့သို့ ငါးကင်များစွာကို ကျွေးမွေးခဲ့သည်။

အရေးအကြီးဆုံးအချက်မှာ သူက အကောင်ပေါက်လေး၏... အဓိက လိင်အင်္ဂါကို ပြောင်ပြောင်တင်းတင်းပင် ညှစ်ခဲ့မိသည်။

ထိုအချိန်က အကောင်ငယ်လေးမှာ အလွန်ထိတ်လန့်ပြီး ကြက်သေသေသွားသည်မှာ အံ့သြစရာမဟုတ်ပေ။

မာရှယ်က သူ့တွင် နှာဘူးအတွေးများ လုံးဝ မရှိမှန်း ကျိန်ဆိုဝံ့ပေသည်။

ထိုအချိန်က သူသည် ရှောင်ပိုင်လေး၏ လိင်ကိုဆုံးဖြတ်ရန် သိပ္ပံနည်းကျကျ လုပ်ဆောင်ခဲ့ရုံသာဖြစ်သည်။

မည်သို့ပင်ဆိုစေကာမူ တိရစ္ဆာန်အများစုတွင် နို့တိုက်ကျွေးချိန်နှင့် ကြီးထွားမှုအဆင့်အချို့မှလွဲ၍ အထီးများက အမများထက် ပြင်းပြင်းထန်ထန် ရန်လိုပြီး ပိုင်နက်စိုးမိုးချင်သည့် ဗီဇရှိကြသည်။

အဲဒီအချိန်တုန်းက ဒီကလေးက တော်တော်ဖော်ရွေပေမယ့် အတည်ပြုဖို့တော့ လိုအပ်နေသေးတာလေ... ဟုတ်တယ်မလား...

အဲဒီလိုလုပ်တာက မှားလို့လား...

သေချာပေါက် မမှားဘူးပေါ့...

မာရှယ်က သူ လုပ်ခဲ့သည့်ကိစ္စများက မှန်ကန်သည်ဟု ကိုယ့်စိတ်ကိုယ်ကို လှည့်စားနေခဲ့သည်။ သူက ဘာကိုမျှ မသိထားဘဲ ဘာမှလည်း မဖြစ်ခဲ့သကဲ့သို့ သူ့အမူအရာက ပြောင်းလဲမသွားခဲ့ပေ။ သူက မြက်ပင်ရှည်ရှည်များကို ဖြတ်လျှောက်ပြီး လုံခြုံရေးယာဉ်ဆီသို့ ပြန်လာခဲ့သည်။

ယွဲ့အန်းက မာရှယ်၏ပခုံးပေါ်မှ ခုန်ဆင်းလိုက်သည်။ ထို့နောက် သူ ပထမဆုံး ပြုလုပ်သည့်အလုပ်မှာ ထောင့်တစ်ခုနားတွင် ချန်ထားခဲ့သော စိတ်ဝိညာဉ်ကျောက်တုံး တစ်ဝက်ကို ပွေ့ဖက်လိုက်ခြင်းပင်။ ထို့နောက် သူက ၎င်းကို သယ်သွားပြီး ဝှက်ထားသော ဗီရို၏အရှေ့တွင် ဆောင့်ကြောင့်ထိုင်ချလိုက်သည်။

မာရှယ်က တုံ့ဆိုင်းမနေဘဲ ဗီရိုကို တစ်ဖန်ဖွင့်လိုက်သည်။ ထို့နောက် စွမ်းအင်သလင်းကျောက်ကို ထုတ်ယူပြီး အမွေးလုံးလေး၏ လက်များထဲသို့ ထည့်ပေးလိုက်လေသည်။

ယွဲ့အန်းက ပျော်ရွှင်စွာဖြင့် စိတ်ဝိညာဉ်ကျောက်တုံးကို ကိုက်ဝါးလိုက်သည်။

သူက တစ်နေ့လုံး ကျောက်တုံးနှစ်တုံးကို ကိုက်စားနေခဲ့သည်။

နောက်တနေ့မနက် မာရှယ် အိပ်ရာမှ နိုးချိန်တွင် ခေါင်းအုံးဘေး၌ ခွေနေသည့် အဖြူရောင် အမွေးလုံးလေးကို တွေ့လိုက်ရသည်။

တစ်စုံတစ်ခုကို လုပ်ဖို့ကြိုးစားသည့်အချိန်တိုင်း အဖြူရောင် အမွေးလုံးလေး၏ ကြားဖြတ်တားမြစ်ကို ခံရကြောင်း မာရှယ်က သတိထားမိခဲ့သည်။ ထိုအကောင်ပေါက်လေးက လိုချင်တောင့်တသည့် မျက်လုံးများနှင့် သူ့ကို စိုက်ကြည့်နေတတ်သည်။

ယွဲ့အန်းက တစ်စုံတစ်ခုကို လုပ်ပေးပြီး အပြန်အလှန်အနေဖြင့် စွမ်းအင်သလင်းကျောက်များကို လိုချင်နေပေသည်။ ရှို့ကျွင်းက ထိုအကြောင်းကို သူ့ခြေချောင်းများဖြင့်ပင် ခန့်မှန်းနိုင်ခဲ့သည်။(ခေါင်းသုံးစရာတောင်မလို)

"တစ်ခုလုပ်ပေးရင် ကျောက်တစ်တုံး ပေးရမယ်"

အဲလိုမျိုးပေါ့...

ဒါပေမယ့် သူ... ကျီရှို့ကျွင်းက ဒီလောက် မိုက်မဲပြီး ဖြုန်းတီးတတ်တဲ့ သူလား...

သေချာတာပေါ့... မာရှယ်က အဲဒီလိုလူမျိုး မဟုတ်ဘူး...

သူက မမိုက်မဲရုံသာမက အတော်လေးလည်း ပါးနပ်လှ၏။

ထို့ကြောင့် ရှို့ကျွင်းက ယွဲ့အန်းကို ငြင်းလိုက်သည်။

"လုံခြုံရေးယာဉ်ကို ထောက်ပံ့ဖို့အတွက် စွမ်းအင်သလင်းကျောက်တွေကို သိမ်းထားဖို့ လိုသေးတယ်"

ယွဲ့အန်း၏ နားရွက်လေးများက ကုပ်ကျသွားပြီး စိတ်ပျက်လက်ပျက်ဖြင့် "မြောင်" ဟု အသံပြုလိုက်သည်။

"ကယ်ဆယ်ရေး ရောက်လာတဲ့အခါကျရင် ကျန်နေတဲ့သလင်း‌ကျောက်တွေကို ငါ မင်းကို ပေးခဲ့လို့ရတယ်"

ရှို့ကျွင်းက ဆက်လက်ပြောလိုက်သည်။

ယွဲ့အန်း၏ နားရွက်များက ထောင်မတ်လာပြီး ထိန်းချုပ်ရေးစနစ် ခုံပေါ်တွင် ထိုင်ကာ ကျီရှို့ကျွင်းကို မော့ကြည့်လိုက်သည်။

"ရှောင်ပိုင်... မင်း..."

မာရှယ်က ခေတ္တမျှ ရပ်လိုက်ပြီး ဆက်ပြောလာသည်။

"မင်း ငါနဲ့လိုက်ခဲ့ချင်လား"

ယွဲ့အန်းက သဘောတူရန် ချက်ချင်းပင် ခေါင်းငြိမ့်ချင်မိသည်။ သို့သော် မာရှယ်၏ စကားက မဆုံးသေးကြောင်း ခံစားလိုက်ရသည်။

သူက ထိန်းချုပ်ရေးစနစ်ခုံပေါ်တွင်ထိုင်နေပြီး သူ၏ဒေါင်လိုက်ပုံစံ မျက်ဆံများက အဝိုင်းသဏ္ဍာန်သို့ ပြောင်းလဲသွားသည်။ လှပသော အပြာရောင်ဖြင့် ဝန်းရံထားသည့် အနက်ရောင် မျက်ဆံ‌လေးများက သူ့ကို အပြစ်ကင်းစင်ပြီး ဖြူစင်သည့်ပုံပေါက်စေသည်။

"မင်းက ငါ့အသက်ကို ကယ်ခဲ့တယ်... အဲဒါကြောင့် ငါ အဲဒီအကြွေးကို ပြန်ဆပ်သင့်တယ်... ဒါပေမယ့် ငါ ဒီမှာနေလို့မရဘူး"

စကားလှလှလေးများ သို့မဟုတ် ဖုံးကွယ်ထားသည့် စကားများ မပါဘဲ ရှို့ကျွင်းက ရှင်းလင်းပြတ်သားစွာ ပြောဆိုခဲ့သည်။

"မင်းရဲ့ စွမ်းအားက သန်မာတယ်... အတတ်ပညာပိုင်းမှာရော အကျင့်စာရိတ္တအရရောပဲ... မင်း ငါနဲ့ လိုက်လာနိုင်မယ်လို့ မျှော်လင့်တယ်... ငါ မင်းကို ဂရုစိုက်ပြီး စွမ်းအင်သလင်းကျောက်တွေကို ပုံမှန်ပေးမယ်လေ"

မာရှယ်က ခေတ္တရပ်လိုက်ပြီး သူ့လေသံက တည်ငြိမ်ပြီး မယိမ်းယိုင် ရှိနေဆဲပင်။

"မင်း ဒီနေရာ ထွက်မသွားချင်ရင်လည်း ငါ မင်းဆီကို စွမ်းအင်ကျောက်တုံးတွေ ပုံမှန်ပို့ပေးနိုင်အောင် လူတချို့ကို စီစဉ်ပေးလို့ရတယ်"

ဤရက်ရောသောကမ်းလှမ်းချက်ကြောင့် ယွဲ့အန်းက အံ့အားသင့် ဆွံ့အသွားခဲ့သည်။

ကျီရှို့ကျွင်းထံတွင် စိတ်ဝိညာဉ်ကျောက်တုံးများစွာ ရှိသော်လည်း ၎င်းတို့က အလွန်အရေးကြီးသောအရင်းအမြစ်ဖြစ်ကြောင်း ယွဲ့အန်း မြင်နိုင်ပေသည်။

တစ်နည်းဆိုရသော် ၎င်းတို့က စျေးပေါလှမည် မဟုတ်ပေ။

ယွဲ့အန်းက ကျီရှို့ကျွင်း၏ အသက်ကို ကယ်တင်ခဲ့သည့် အချက်အား အမှန်တကယ် စိတ်ထဲမထားခဲ့ပေ။

ကာကွယ်ရန် အသည်းအသန် ကြိုးစားခဲ့သည့် သူ၏အမြီး‌လေး ဆုံးရှုံးသွားခြင်းကိုလည်း လုံးဝ မမျှော်လင့်ထားခဲ့‌ပေ။ မည်သို့ပင်ဆိုစေကာမူ လွန်ခဲ့သောနှစ်ပေါင်းများစွာခန့်က သူက လူသားများနှင့် မထိတွေ့ မဆက်ဆံဘဲ တောင်များထဲတွင် ပုန်းအောင်းနေထိုင်ပြီး မသေမျိုးဖြစ်လာစေရန် ရည်ရွယ်ထားခဲ့သည်။ သူ့ရည်ရွယ်ချက်ကို အတိအလင်း ကြေငြာခဲ့စဉ်က သူ့မျိုးနွယ်စုထဲမှ အကြီးအကဲများမှာ သူ့ကို အရူးတစ်ယောက်ကဲ့သို့ ကြည့်ခဲ့ကြသည်။

အမြီးဆုံးရှုံးခြင်းက ယွဲ့အန်းအဖို့ "အံတု၍မရသော ကံကြမ္မာ" ဖြစ်သည်။

ထို့အပြင် ကြောင်၏ ကိုးချောင်းမြောက်အမြီးက ကျင့်ကြံမှု သို့မဟုတ် အထူးခက်ခဲကြမ်းတမ်းသော အတွေ့အကြုံများ မလိုအပ်ဘဲ အနှစ်နှစ်ဆယ်လျှင် တစ်ကြိမ် ကြီးထွားလာမည်ဖြစ်သည်။ စိတ်ပျက်သွားခြင်းမှလွဲ၍ ထိုအမြီးကို ဆုံးရှုံးပြီးနောက် အထူးတလည် နောင်တမျိုး မရှိခဲ့ပေ။

ကိုးချောင်းမြောက် ကြောင်အမြီးအတွက် စစ်မှန်သော ကျင့်ကြံမှုက အမြီးများ ဆုံးရှုံးသွားသည့် ထပ်ခါတလဲလဲ ဖြစ်စဉ်တစ်လျှောက် ဖြစ်ပေါ်လာသည့် ဒေါသတရားကို ချုပ်တည်းခြင်းပင်ဖြစ်သည်။

အနည်းဆုံးအနေဖြင့် ၎င်းက သူ့မျိုးနွယ်၏ အကြီးအကဲများထံတွင် ယွဲ့အန်း  သတိပြုမိခဲ့သော အချက်ဖြစ်သည်။ သူတို့အားလုံးက လောကီရေးရာစိုးရိမ်ပူပန်မှုများကို ကျော်ဖြတ်ပြီးသကဲ့သို့ ထင်ရပြီး မသေမျိုးအရှိန်အဝါကို ထုတ်လွှတ်ထားပေသည်။ သူတို့(အကြီးအကဲ)က လူသားများကို မြင်လိုက်ချိန်တွင် သေမျိုးဘဝ၏ အရသာကို ခံစားနိုင်ရန် သူတို့(လူသား)အပေါ် တက်အုပ်ပြီး တိုက်ခိုက်ချင်ကြသည်။

ယွဲ့အန်းက အတော်လေး ကံကောင်းသကဲ့သို့ ခံစားမိသည်။

သူ့ကို ကျေးဇူးဆပ်လိုပြီး သူ့ဆန္ဒကို လေးစားသည့် ကျီရှို့ကျွင်း၏ စိတ်က သူ့စရိုက်ကို ကောင်းကောင်း ဖော်ပြနေပေသည်။

ကတိများပေးပြီး ထွက်ပြေးမည့် လူသားများ အများကြီးရှိပေသည်။ သို့တည်းမဟုတ် ဆုတောင်းပြည့် စက်ကြီးတစ်ခုကဲ့သို့ အမြီးကိုး‌ချောင်းရှိသည့် ကြောင်တစ်ကောင်ကို ဖမ်းရန် ကြိုးစားမည့်သူများလည်း အများကြီးရှိလှ‌ပေသည်။

ကြိုးစားအားထုတ်မှု သို့မဟုတ် အကျိုးဆက်များကို ဂရုမစိုက်ဘဲ စိတ်ရင်းမှန်ဖြင့် ကြင်နာမှုကို ပြန်ပေးဆပ်လိုသည့် လူသားများက အကျင့်စာရိတ္တ ကောင်းမွန်ကြမည့်ပုံပင်။

အတွေ့အကြုံများ၍ လိမ္မာပါးနပ်သော အမြီးကိုး‌ချောင်းရှိသည့် အကြီးအကဲများပင်လျှင် ဤအပြုအမူကို မွန်မြတ်သည်ဟု ချီးကျူးကြပေလိမ့်မည်။

ထိုသို့သော လူသားတစ်‌ယောက်နှင့် အတူနေခြင်းက ပြီးပြည့်စုံရန် အာမခံချက်မရှိသော်လည်း  ဆိုးရွားမည့်ပုံမပေါ်ပေ။

ကျီရှို့ကျွင်းနှင့် အတူနေရန် စိတ်ကူးက ဖြစ်နိုင်ခြေ မြင့်မားသည်ဟု ယွဲ့အန်းက ထင်‌ပေသည်။ နောက်ပိုင်းတွင် သူက ထူးခြားကောင်းမွန်သော သူ၏ အမှုတော်ထမ်းအသစ်အကြောင်းကို အကြီးအကဲများထံ၌ပင် ကြွားဝါ‌နိုင်ပေလိမ့်မည်။

ယွဲ့အန်းက ကျီရှို့ကျွင်း၏ ပင်ကိုယ်စရိုက်အမှန်ကို မသိသလို ပျင်းရိဖွယ် အခြေအနေ၌ ဘယ်နှစ်နှစ်မျှ ပိတ်မိနေမည်ကိုလည်း မသိခဲ့ပေ။ ယွဲ့အန်းက ကျီရှို့ကျွင်းကို မော့ကြည့်ပြီး သူ့အမြီးထိပ်လေးကို ညင်သာစွာ လွှဲယမ်းလိုက်သည်။ ထို့နောက် သူက မတ်တပ်ထရပ်ပြီး ရှေ့ခြေနှစ်ချောင်းကို ဖြန့်ကားပေးလိုက်သည်။

ထို့နောက် ယွဲ့အန်းက "ငါ့ကို ချီပါ" ဟူသည့် ဟန်ပန်ဖြင့် ပို့စ်‌ပေးလိုက်၏။

မာရှယ်က အနည်းငယ် ထိတ်လန့်သွားသည်။

"ဒါက မင်း ငါနဲ့လိုက်ဖို့ သဘောတူလိုက်တာလား"

"မြောင်~"

ယွဲ့အန်းက တုံ့ပြန်ပြီး သူ့လက်များကို အနည်းငယ် မြှောက်ပေးလိုက်သည်။

မာရှယ်က အမွေးလုံးလေး၏ ဖြန့်ကားထားသော လက်ဖဝါးများကို ကြည့်ပြီး ခဏမျှ စဉ်းစားလိုက်သည်။ ထို့နောက် သူ့လက်ကို ဆန့်ထုတ်ပြီး လက်ဖဝါးငယ်လေးများဖြင့် high-five လုပ်လိုက်လေသည်။

ယွဲ့အန်း: ???

မင်းက ပိန်းတာလား... အ,တာလား... ဒါမှမဟုတ် တစ်ခုခုပဲလား

ဘယ်သူက မင်းကို high-five လုပ်ခိုင်းလို့လဲ...

မင်း ဒီအတိုင်း ငုံ့ပြီး ဒီချစ်စရာကောင်းတဲ့ ကြောင်လေးကို ချီလိုက်လို့ မရဘူးလား...

****

လုံခြုံရေးယာဉ်တွင် လွှမ်းခြုံထားသော ငြိမ်သက်မှုက မာရှယ်ရှို့အတွက် ကြိုဆိုသော အပြောင်းအလဲတစ်ခု ဖြစ်လာသည်။ ယွဲ့အန်းက ပြဿနာမရှာတော့သည့်အတွက် အရာအားလုံးက ပိုမိုချောမွေ့သွားပုံရ၏။ အလုံအလောက် အိပ်စက်ပြီးနောက် လန်ဆန်းသွားသည့် ကျီရှို့ကျွင်းက လုံခြုံရေးယာဉ်တွင် ကျန်ရှိသော ထောက်ပံ့ရေးပစ္စည်းများအား စာရင်းပြုစုခြင်း လုပ်ငန်းကို စတင်ခဲ့သည်။

ယွဲ့အန်းက ကုတင်ပေါ်တွင် လှဲနေရင်း အိပ်ချင်မူးတူး မျက်လုံးများဖြင့် ကျီရှို့ကျွင်း၏ နည်းစနစ်ကျသော လှုပ်ရှားမှုများကို စူးစမ်းနေခဲ့သည်။ မာရှယ်၏လက်‌ချောင်းများက ဖန်သားပြင်ပေါ်တွင် ပြေးလွှားနေပြီး စားရင်းထဲ၌ ရေးမှတ်နေသည်။ ရံဖန်ရံခါ ၎င်းတို့၏ ပမာဏများကို အတည်ပြုရန် အခန်းများထဲသို့ သွားရောက်လေ့ရှိသည်။

ယွဲ့အန်းက အနည်းငယ် သန်းဝေလိုက်ပြီး ကုတင်ပေါ်မှ တင့်တယ်စွာ ခုန်ဆင်းလိုက်သည်။ သူ့လက်ဖဝါးလေးကို အောက်သို့ချလိုက်ချိန်တွင်  တိုးညင်းသော အသံလေးက ထွက်ပေါ်လာသည်။ သူက သူ့နောက်မှ အမြီးလေးကို ညင်သာစွာ လှုပ်ယမ်းရင်း တံခါးဆီသို့ ခပ်ဖွဖွလျှောက်လှမ်းသွားသည်။ ထို့နောက် စိတ်ပိုင်းဖြတ်ထားသကဲ့သို့ လက်သည်းဖြင့် တံခါးကို စတင်ကုတ်ခြစ်တော့သည်။

"မြောင်"

ယွဲ့အန်းက အသံပြုပြီး ကျီရှို့ကျွင်းကို ပြူးကျယ်ပြီး မျှော်လင့်တောင့်တနေသည့် မျက်လုံးများနှင့် ကြည့်လိုက်သည်။

မာရှယ်က သူ့အလုပ်များကို ခေတ္တမျှ ရပ်လိုက်ပြီး အဖြူရောင် အမွေးလုံးလေးကို မော့ကြည့်လိုက်သည်။

"အပြင်ထွက်ချင်လို့လား"

ရှို့ကျွင်းက မေးလိုက်သည်။ သူ့အသံက ပုံမှန်ဖြစ်သော်လည်း စူးစမ်းချင်သည့် အရိပ်အယောင် သန်းနေသည်။

ယွဲ့အန်းက ခေါင်းလေးကို စောင်းပြီးသာ တုံ့ပြန်ခဲ့သည်။ အနားသို့‌ လျှောက်လာသည့် ကျီရှို့ကျွင်း၏ လှုပ်ရှားမှုများကို လိုက်ကြည့်နေခဲ့သည်။

"မြောင်"

ယွဲ့အန်းက တစ်ဖန်အော်လိုက်ပြန်သည်။ ဤတစ်ကြိမ်၌ သူ့အသံက ပိုပြီးကျယ်လောင်နေပေသည်။

ကျီရှို့ကျွင်း၏လက်က တံခါးဘောင်ပေါ်တွင် ခဏမျှ တုံ့ဆိုင်းသွားသည်။ သူ့မျက်လုံးများက ယွဲ့အန်း၏ အလွန်သေးငယ်သော ပုံစံကို ကြည့်လိုက်သည်။ ဖြူဖြူဖွေးဖွေး အမွေးအမှင်များနှင့် အရည်လဲ့နေပြီး ကြီးမားသော မျက်လုံးများကို ရှုစားလိုက်သည်။ ၎င်းတို့က သာမန်ကြောင်တစ်ကောင်ထက် ဉာဏ်ရည်ဥာဏ်သွေး မြင့်မားသည့်ပုံပေါ်နေ၏။

မာရှယ်က ဤသတ္တဝါငယ်လေးကို အန္တရာယ်ဖြစ်နိုင်ချေရှိသည့် ပတ်ဝန်းကျင်သို့ လွှတ်ပေးရန် စိုးရိမ်မိသည်။ သူ၏စိုးရိမ်မှုများကို ပြောပြရန် ခဏမျှ စဉ်းစားလိုက်သည်။ သို့သော် ဝိုင်းစက်ပြီး တောင်းပန်တိုးလျှိုးသော ထိုမျက်လုံးများအောက်တွင် မာရှယ်၏ သန္နိဋ္ဌာန်က ယိမ်းယိုင်သွားခဲ့သည်။ ထို့နောက် စကားတစ်ခွန်းမျှမဆိုဘဲ သူ့လက်ဖဝါးဖြင့် တံခါးဘောင်ကို ဖိပြီး ဖွင့်ပေးလိုက်သည်။

ယွဲ့အန်းက လျှပ်စီးကဲ့သို့ အမြန်နှုန်းဖြင့် တံခါးအဟကို ကျော်ဖြတ်ပြီး မျက်စိတစ်မှိတ်အတွင်းမှာပင် ပျောက်ကွယ်သွားခဲ့သည်။ ကျီရှို့ကျွင်းက တံခါးဝတွင် ခေတ္တမျှရပ်ပြီး အတွေးစစဖြင့် မျက်မှောင်ကြုတ်လိုက်သည်။

 သူ၏ဆင်ခြင်တုံတရားက ကောင်းမွန်သော်လည်း မာရှယ်က တံခါးကို အနည်းငယ် ဟကာထားရစ်ခဲ့သည်။ စင်္ကြံမှ အလင်းရောင်မှိန်မှိန်လေးကလည်း အခန်းထဲသို့ စိမ့်ဝင်လာခဲ့သည်။

သူ့အလုပ်တာဝန်ကို ပြန်လုပ်ချိန်၌ ကျီရှို့ကျွင်းက သူ၏စိတ်များ ပျံ့လွင့်နေကြောင်း တွေ့လိုက်ရသည်။ သူက ယွဲ့အန်းကို ဘာသွားလုပ်မည်လဲဟု မေးချင်မိသည်။ သို့သော် သူက ကြောင်၏ "မြောင်" အော်သံများကို နားမလည်နိုင်ကြောင်း သိလိုက်ရသည်။ ဤဆက်သွယ်ရေးအတားအဆီးက ပို၍ပို၍ စိုးရိမ်စရာဖြစ်လာခဲ့သည်။

အထောက်အပံ့ပစ္စည်းများကို စုစည်းနေစဉ် အနာဂတ်အကြောင်း အတွေးများနှင့် ပတ်သက်ပြီး မာရှယ်၏စိတ်က ဂယက်ရိုက်‌နေခဲ့သည်။ ယခုအခါ ယွဲ့အန်းက သူနှင့်လိုက်ခဲ့ရန် သဘောတူခဲ့သည်။ ထို့ကြောင့် ကျီရှို့ကျွင်းက သူတို့၏ သဘောတူညီမှုနှင့် ပတ်သက်ပြီး လက်တွေ့ကျကျ အခြေအနေများကို တွေးတောနေခဲ့သည်။

"အိမ်မွေးတိရစ္ဆာန်" ဟူသော စကားလုံးက ယွဲ့အန်း၏ ထင်ရှားသော ဉာဏ်ရည်ဥာဏ်သွေးနှင့် မကိုက်ညီဘဲ အနည်းငယ် မလေးစားရာရောက်သကဲ့သို့ ခံစားရသည်။ သို့သော်လည်း ကျီရှို့ကျွင်းမှာ ပိုမိုသင့်လျော်သော အသုံးအနှုန်းကို ရှာဖွေရန် ရုန်းကန်နေရသည်။ ကြောင်၏ သေးငယ်သော အရွယ်အစားနှင့် အချို့သော တိရိစ္ဆာန်အပြုအမူများက သူတို့၏ဆက်ဆံရေးကို အမျိုးအစားသတ်မှတ်ရန် ခက်ခဲသွားစေသည်။

ဆက်သွယ်ရေး ပြဿနာကို ဖြေရှင်းရန်က ထိပ်တန်းဦးစားပေး ဖြစ်လာခဲ့သည်။ ကျီရှို့ကျွင်းက ၎င်းကို စိတ်ထဲ၌ မှတ်သားထားလိုက်သည်။ ထို့နောက် လက်လှမ်းပြီး အနီးအနားရှိ နံရံတွင် တပ်ဆင်ထားသော အလင်းမျက်နှာပြင်ပေါ်တွင် ပြသထားသည့် စာရင်းထဲသို့ ထည့်လိုက်လေသည်။

အခြားအကြောင်းအရာများကိုလည်း လျင်မြန်စွာ ထပ်ဖြည့်ခဲ့သည် 

🐈🐈🐈