Ch 3

🐈Chapter 3

ရှို့ကျွင်းက သူ့လက်ထဲရှိ သေးငယ်ပြီး အန္တရာယ်မရှိသော သတ္တဝါငယ်လေး၏ အတွေးများကို နားမလည်ခဲ့ပေ။ သို့သော် သူ၏ ခွန်အားအများစုကို ပြန်လည်ရရှိခဲ့ပြီး နောက်ဆုံးတွင် မတ်တတ်ရပ်နိုင်လာခဲ့သည်။ ထို့နောက် သူက အကောင်ဖြူလေးမှာ သန့်ရှင်းမှုကို ကြိုက်နှစ်သက်ကြောင်းကို သတိရသွား၏။ ထို့ကြောင့် အူကြောင်ကြောင် ဖြစ်ပုံရသော သတ္တဝါလေးကို ကုတင်ပေါ်တွင် လွတ်နေသည့် တစ်ခုတည်းသော သန့်ရှင်းသပ်ရပ်သည့် နေရာတွင် ဂရုတစိုက် ချပေးလိုက်လေသည်။

ကုတင်လို့ ပြောတော့လည်း ကုတင်ပဲပေါ့...

မာရှယ်က ကုတင်ပေါ်ရှိ သွေးကွက်ကြီးများ၊ မွှစာကြဲနေသည့် ကိုယ်တွင်းအင်္ဂါများနှင့် ကြွက်သားတစ်သျှူးများကို အမူအရာပင် မပြောင်းလဲဘဲ ကြည့်လိုက်သည်။ ထို့နောက် သူက လှည့်၍ ဘေးဘက်ရှိ ပိတ်ထားသော ဥပုံသဏ္ဌာန် ယာဉ်ဆီသို့ လျှောက်သွားပြီး ဘေးဘက် ကိုယ်ထည်များထဲမှ တစ်ခုကို ထိလိုက်လေသည်။

ယွဲ့အန်း၏ နားရွက်များက တလှုပ်လှုပ် တရွရွဖြစ်နေပြီး လူသားတစ်ဦး၏ အကြမ်းဖက်ခံရခြင်းကြောင့် တုန်လှုပ်ခြင်းမျိုး မရှိတော့သကဲ့သို့ပင်။ သူ့ဘေးပတ်ပတ်လည်ရှိ အဖြူရောင် အကာအကွယ်အခွံက ဖြည်းညှင်းစွာ ပိတ်သွားနေမှန်းကို သတိထားမိပြီး သူက အမြန်ထကာ ကုတင်ပေါ်မှ ခုန်ဆင်းလိုက်၏။

သူက မတ်တတ်ရပ်ရန် အတော်လေး သန့်ရှင်းသည့် နေရာကို ရှာလိုက်လေသည်။ ထို့နောက် အဖြူရောင်ဥက ကြီးလာပြီး ပုံစံပြောင်းလဲသွားသည်ကို ယွဲ့အန်းက တအံ့တသြ ကြည့်နေခဲ့သည်။ စက်ပိုင်းဆိုင်ရာ အသံများနှင့်အတူ ၎င်းက စက္ကန့်ပိုင်းအတွင်း အိမ်တစ်လုံး— ပို၍တိတိကျကျ ပြောရလျှင် အခန်းတစ်ခန်းအဖြစ်သို့ ပြောင်းလဲသွားခဲ့သည်။

ယွဲ့အန်းက စူးစမ်းချင်စိတ်ဖြင့် ပူလောင်နေသော မြေကြီးအလယ်တွင် ရုတ်တရက် ထွက်ပေါ်လာသော အဆောက်အအုံကို လှည့်ပတ်ကြည့်လိုက်သည်။ ထို့နောက် သူက နူးညံ့ပြီး ပန်းရောင်သန်း‌နေသည့် ခြေသည်းများကို ဆန့်ထုတ်ပြီး နံရံကို မရဲတရဲ လှမ်းထိကြည့်လိုက်၏။ ၎င်းနောက် ထို‌နံရံက အလွန်အမင်း မထူ‌ထဲ‌ကြောင်း သတိပြုမိသွားလေသည်။

ဤနည်းပညာက ကမ္ဘာပေါ်တွင် သူ မြင်ဖူးခဲ့သမျှ နည်းပညာတိုင်းထက် ဆယ်စုနှစ်များစွာ ကျော်လွန်နေပြီဖြစ်မှန်း သိသာလှသည်။ ယွဲ့အန်းက ထောင့်များတစ်ဝိုက် ခပ်ဖွဖွ နင်းလျှောက်သွားသည်။ ထို့နောက် တံခါးဖြစ်ဟန်တူသော နေရာတစ်နေရာ၌ သူ ရပ်လိုက်သည်။

"ကမ္ဘာမြေကြီးရဲ့ နည်းပညာက တကယ်ကြီး ဒီလောက်ထိ တိုးတက်နေပြီလား"

ယွဲ့အန်းက မျိုးနွယ်စုထဲမှ ထိုကြောင်များကို သတိရသွားမိသည်။ သူတို့က လူသားအမှုတော်ထမ်းကို ရှာရမည့်အစား လူသားပုံစံအတိုင်းနေပြီး ဗီဒီယိုဂိမ်းများ၌သာ သူတို့ကိုယ်သူတို့ မြှုပ်နှံထားကြသည်။ သူသာ ယခုအချိန် ပြန်သွားပါက သစ်လွင်ပြီး စိတ်လှုပ်ရှားဖွယ် ဂိမ်းအမျိုးအစား အားလုံးနှင့် ပတ်သက်သည့် အကြံပြုချက်များဖြင့်  သေချာပေါက် လွှမ်းမိုးခံရလိမ့်မည်ဟု တွေးနေမိသည်။

ဆယ်စုနှစ်များစွာ ကြာပြီးနောက် ယွဲ့အန်းက သူကိုယ်တိုင်လည်း မျိုးနွယ်စုထဲရှိ စုဝေးပွဲများကို သတိရမိသည်။ စုဝေးပွဲဆိုသည်မှာ ကြောင်များက ၎င်းတို့၏ အမှုထမ်းများနှင့် သူတို့ ဖြည့်ဆည်းပေးရမည့် လူသားများ၏ ဆန္ဒပေါင်းအ‌သင်္ချေတို့ကို စုပေါင်းငြီးတွားကြခြင်းဖြစ်၏။

အသစ်ခန့်အပ်ထားသော သူ၏ "စည်သွပ်ဘူးဖွင့် အမှုတော်ထမ်း" က ဤနေရာသို့ ရောက်လာခဲ့သည်— ဒုက္ခကြုံနေသော်လည်း ကိစ္စမရှိ‌ပေ— ယွဲ့အန်းက သေချာပေါက် ပြန်လမ်း ရှိလိမ့်မည်ဟု ယုံကြည်မိသည်။ လူသားများက အမြဲတမ်း အံ့သြစရာကောင်းလောက်အောင် ထက်မြက်ကြသည်။

သူ့ကြောင်မျိုးနွယ်များနှင့် သွားတွေ့ပြီး သူ အဆင်ပြေနေကြောင်း သူတို့ကို အသိပေးခွင့်ရခြင်းကလည်း အဆင်ပြေလှပေသည်။

ထိုအတွေးများဖြင့် ယွဲ့အန်း၏ စိတ်ခံစားချက်များက ပေါ့ပါးသွားပြီး ကျေနပ်စွာ သူ့အမြီးဖျားကို ဝှေ့ယမ်းလိုက်သည်။

အကာအကွယ်စနစ်ကို အသက်သွင်းပြီးနောက် ရှို့ကျွင်းက ကုတင်ပေါ်တွင် ရှိနေသင့်သည့် အဖြူရောင် အမွေးလုံးလေး(ကြောင်)ကို ရှာရန် အခန်းထဲသို့ ဝင်သွားခဲ့သည်။ သို့သော် ၎င်းကို မည့်သည့်နေရာတွင်မျှ မတွေ့ရပေ။

မာရှယ်က ခေတ္တ ရပ်တန့်သွားပြီး သူ့မျက်ခုံးအနည်းငယ် တွန့်သွား၏။

သို့သော် သူက များများစားစား တွေးမနေခဲ့ပေ။ ထိုအစား သူက အခန်းထဲရှိ ဗီရိုငယ်လေးထဲမှ အဝတ်အစားအသစ်များကို လဲလှယ်ဝတ်ဆင်လိုက်သည်။ ထို့နောက် ပုလင်းငယ်ကို ထုတ်ယူပြီး အဖုံးအတွင်းရှိ လက်သည်းခွံ အရွယ်အစားမျှပင် မရှိသော ကပ်ခွာအကြည်ကို ဖယ်ရှားလိုက်၏။ ပြီးလျှင် ထိုကပ်ခွာကို စိုရွှဲသွားသည်အထိ ပုလင်းထဲမှ အရည်ဖြင့် ဖျန်းလိုက်လေသည်။ ၎င်းနောက် ထိုစိုရွှဲသွားသည့် ကပ်ခွာကို သူ့နှာခေါင်းအောက်၌ ထားပြီး အသက်ပြင်းပြင်းတစ်ချက်မျှ ရှူလိုက်သည်။

၎င်းသည် ကြယ်တာရာ မဟာမိတ်အဖွဲ့တွင် နေထိုင်သူများ အသုံးပြုလေ့ရှိသော ကိရိယာတစ်ခုဖြစ်သည်— ခရီးဆောင် အောက်ဆီဂျင် ကပ်ခွာတစ်ခုပင်။ ၎င်းက နူးညံ့ကာ အရောင်အဆင်းမရှိဘဲ လေဝင်လေထွက်ကောင်းပြီး အရေပြားနှင့်လည်း ဓာတ်မတည့်မှုများမရှိပေ။ အထူးပြုလုပ်ထား‌သော အောက်ဆီဂျင်အရည်ဖြင့် ဖျန်းပြီး နှာခေါင်းအောက် ထားလိုက်ချိန်၌လည်း မမြင်ရလုနီးပါးပင်။ အောက်ဆီဂျင်မရှိသော ပတ်ဝန်းကျင်တွင် ကပ်ခွာတစ်ခုစီက လူတစ်ဦးအား အောင်စီဂျင်ကို သုံးနာရီကြာ ထောက်ပံ့ပေးနိုင်သည်။

သဘာဝအခြေအနေ၌ ဤဂြိုဟ်က လူသားများအတွက် နေထိုင်စရာ မဟုတ်သည်မှာ ရှင်းလင်းလှ၏။

အောက်ဆီဂျင် ပါဝင်မှုနှုန်းက နည်းပါးပြီး လေထုက ခြောက်သွေ့နေသည်။ ထို့အပြင် မြေဆွဲအားကလည်း နေထိုင်၍ရသော သာမန်ဂြိုဟ်များထက် ပိုမိုမြင့်မားသည်။ လမ်းလျှောက်နေခြင်းကပင် မြေဆွဲအား နိမ့်သည့်အခန်းထဲ၌ လေ့ကျင့်ခန်းလုပ်နေရသကဲ့သို့ ခံစားနေရသည်။

ရုပ်ပိုင်းဆိုင်ရာ အခြေအနေ ကောင်းမွန်သော်လည်း ခန္ဓာကိုယ် ပြန်လည်ကောင်းမွန်လာချိန်အထိ အသက်ကို ထိန်းရှူနေရသည့် ရှို့ကျွင်းပင်လျှင် ယခုအခါ အောက်ဆီဂျင် ဖြည့်တင်းရန် လိုအပ်နေပေပြီ။

မာရှယ်၏ လှုပ်ရှားမှုများက နည်းစနစ်ကျနပြီး တည်ငြိမ်နေပုံပေါ်သည်။

သူက ကြမ်းပြင်ပေါ်တွင် ထိုင်ချပြီး သူ့ဘေးရှိ နံရံကို ပုတ်လိုက်၏။ နံရံပေါ်တွင် ဟိုလိုဂရပ်ဖစ် နံပါတ်များစွာ ပေါ်လာပြီး သူက ဂဏန်းအတန်းလိုက်ကို အမြန်ရိုက်ထည့်လိုက်လေသည်။ ထို့နောက် ပုံရိပ်တစ်ခုက သူ့ရှေ့ရှိ လေထုထဲ၌ ပေါ်ထွက်လာခဲ့သည်။

၎င်းက ရှို့ကျွင်း ဤအခန်းထဲသို့ ဝင်လာပြီးနောက်ပိုင်း လွတ်မြောက်လာသည့်ယာဉ်၏ ကာကွယ်ရေးစနစ်က ရိုက်ကူးထားသည့် ဗီဒီယိုဖြစ်သည်။ မှတ်တမ်းတင်ရခြင်း၏ ရည်ရွယ်ချက်က မျက်နှာများနှင့် သက်သေအထောက်အထားများကို မှတ်တမ်းတင်ရန်အတွက် ဖြစ်သည်။ သို့မှသာ ထွက်ပြေးပြီး သို့မဟုတ် အဖမ်းခံရပြီးနောက် ရန်သူများက ယာဉ်၏တံခါးကို အတင်းအဓမ္မဖွင့်ကာ လူမသိသူမသိ အသတ်ခံရခြင်းမှ ကာကွယ်ရန်ဖြစ်သည်။ အကယ်၍ အသုံးပြုသူက ကြယ်တာရာတရားရုံးသို့ အောင်မြင်စွာပြန်ရောက်လာလျှင်လည်း ၎င်းကို တရားခွင်သက်သေအဖြစ်လည်း တင်ပြနိုင်သည်။

ရှို့ကျွင်းက မဟာမိတ်နယ်မြေအတွင်း ပုံမှန်ကင်းလှည့်နေစဉ် ခြုံခိုတိုက်ခိုက်ခံခဲ့ရသည်။

မဟာမိတ်အဖွဲ့က ယင်းကင်းလှည့်မှုများကို ငါးနှစ်လျှင် တစ်ကြိမ်ပြုလုပ်ပြီး တစ်ကြိမ်လျှင် တစ်နှစ်ခန့် ကြာမြင့်သည်။ 

ယခုအချိန်တွင် စင်းသစ်စ်အင်ပါယာ၏ မာရှယ်နှစ်ယောက်က အတူတကွ တပ်ဖြန့်ခဲ့ကြသည်။ တစ်ဦးက အရှေ့တောင်ဘက်ကို တာဝန်ယူရပြီး ကျန်တစ်ဦးက အနောက်မြောက်ဘက်ကို တာဝန်ယူရသည်။

ရှို့ကျွင်းက အရှေ့တောင်ဘက်တွင် တာဝန်ကျခဲ့သည်။

သူ့ကို တိုက်ခိုက်လာသူများက ထိုကြယ်စနစ်တွင် နာမည်ဆိုးဖြင့်ကျော်ကြားသော ကြယ်ဓားပြအုပ်စုဖြစ်သည်။ သို့သော် သူ့အာကာသယာဉ်နှင့် မက်ခါများကို ဖျက်ဆီးခံရသည့် ဗီဒီယိုဖိုင်အား ကြည့်ရှုနေစဉ် မာရှယ်၏ အကြည့်များက တုန်လှုပ်သွားခြင်းမရှိပေ။

သူတစ်ယောက်တည်းရှိနေစဉ် ခြုံခိုတိုက်ခိုက်ခံခဲ့ရသည်။

အင်ပါယာ၏ မာရှယ်တစ်ဦးအနေဖြင့် ရှို့ကျွင်းက များသောအားဖြင့် အစောင့်များနှင့်အတူ သွားလာလေ့ရှိသည်။ သူတစ်ဦးတည်း သွားတတ်သည့်ဖြစ်ရပ်က အနည်းငယ်သာ ရှိသည်။

သို့သော် ဤရှားပါးသော အခိုက်အတန့်များထဲမှ တစ်ခုအတွင်း သူက တိုက်ခိုက်ခံခဲ့ရသည်။

မာရှယ်၏ သက်တော်စောင့်များထဲတွင် သူလျှိုတစ်ယောက် ရှိနေသည်မှာ သိသာလှပေသည်။

သို့သော်လည်း ရှို့ကျွင်းက သူ့သက်‌တော်စောင့်များထဲတွင် သစ္စာဖောက်တစ်ဦး ရှိနေခြင်းကိုဖြစ်စေ၊ သို့မဟုတ် ကြယ်ဓားပြများ၏ ခြုံခိုတိုက်ခိုက်ခံရခြင်းကိုဖြစ်စေ လုံးဝ စိတ်မပူသည့်ပုံနှယ်။ ယင်းအစား အာကာသယာဉ်က ရန်သူ၏ ခံစစ်ပတ်၀န်းကျင်မှ တိတ်တဆိတ် လွတ်မြောက်ပြီးနောက် မှတ်တမ်းတင်ထားသည့် ဗီဒီယိုဖိုင်ကိုသာ သူက စိတ်ဝင်စားခဲ့သည်။

ရှို့ကျွင်းက သူ၏လက်ရှိ တည်နေရာကို ဆုံးဖြတ်ရန် လိုပေသည်။

မာရှယ်ကြီးက သူလျှိုနှင့် ပတ်သက်ပြီး စိတ်မပူခဲ့‌ပေ။ သူ့လူယုံများက သစ္စာဖောက်ကို အမြန်ဆုံး သုတ်သင်ရှင်းလင်းပစ်မည်မှန်း ယုံကြည်ထားသည်။

ကံတရားက သူ့ဘက်၌ ရှိနေပေသည်။ အာကာသထဲရှိ ဆွဲငင်အားနှင့် တွန်းကန်အားတို့ကြောင့် သူ၏အာကာသယာဉ်က အဝေးကြီးသို့ လွင့်စင်မသွားခဲ့ပေ။ သူက မဟာမိတ်အဖွဲ့၏ နယ်မြေအစွန်းရှိ ဂြိုလ်တစ်ခုပေါ်သို့ ဆင်းသက်လာခဲ့သည်။ ဗီဒီယိုဖိုင်တွင် မှတ်တမ်းတင်ထားသော အထင်ကရ နေရာများစွာကို ကြည့်ရှုခြင်းဖြင့် မာရှယ်က သူ၏တည်‌နေရာကို အကြမ်းဖျင်း ဆုံးဖြတ်နိုင်ခဲ့သည်။

ဗွီဒီယိုဖိုင်ကို ကြည့်ရှုပြီးနောက် ရှို့ကျွင်းက ကြမ်းပြင်ပေါ်တွင် ငြိမ်သက်စွာထိုင်ရင်း အောက်ဆီဂျင်ကို ပိုမိုရှူသွင်းလိုက်သည်။ အခုန်မြန်နေသည့် သူ့နှလုံးခုန်သံများ တည်ငြိမ်သွားမှသာ မတ်တတ်ထရပ်လိုက်၏။

ရှို့ကျွင်းက သွေးစွန်းနေသည့် အိပ်ရာကို အလျင်အမြန် ရုတ်သိမ်းပြီး အဝတ်စများကို ဆုတ်ဖြဲလိုက်သည်။ သွေးနံ့များလှိုင်နေသည့် နေရာအတွင်းမှ မာကျောသော ကဒ်လေးတစ်ကဒ်ကို ထုတ်ယူလိုက်သည်။ ထိုကဒ်လေးက လက်ဖဝါးတစ်ဝက်ခန့် အရွယ်အစားရှိပြီး သွေးစွန်းနေကာ ဖောက်ထွင်းမြင်ရပေသည်။

ချစ်ပ်ပြားပေါ်ရှိ သွေးများကို မြင်လိုက်ရချိန် မာရှယ်က ခေတ္တမျှ ရပ်တန့်သွားသည်။

ဤဖောက်ထွင်းမြင်ရသော ချစ်ပ်ပြားက ရေစိုခံနိုင်သည်။ သို့သော် စေးကပ်နေသော သွေးများကြောင့် ၎င်း၏မျက်နှာပြင်ပေါ်တွင် မညီမညာသော အမှတ်အသားများ ကျန်ရစ်ခဲ့သည်။

သူ ၎င်းကို အသုံးပြုရန်အတွက် အရင်ဆုံး သန့်ရှင်းရေး လုပ်ရပေမည်။

အာကာသယာဉ်အတွင်း ရေအရင်းအမြစ်က အကန့်အသတ်ရှိနေမှန်းကို ရှို့ကျွင်း ပြန်သတိရသွားသည်။ ထိုအချိန်မှသာ ရေအရင်းအမြစ်ကို သွားရောက်ရှာဖွေရန် လိုအပ်မှန်း နားလည်သွား၏။

သူက နံရံတွင် ချိတ်ထားသည့် အိတ်ငယ်လေးထဲမှ ရေဘူးကို ဆွဲယူလိုက်သည်။ ဖယ်ရှားထားသော အိပ်ရာခင်းစနှင့် စုတ်ပြဲနေသည့် အဝတ်စများကို စုစည်းပြီး တံခါးဘက်သို့ လှည့်လိုက်သည်။

***

ယွဲ့အန်းက တံခါးခေါက်ရန် သူ့လက်ကို မြှောက်လိုက်သည်။ သို့သော် သူ မခေါက်မီ တံခါးက ပွင့်လာလေသည်။

လွှင့်ပစ်တော့မည်ဟု ထင်ရသော အိပ်ရာခင်းစနှင့် ညစ်ပစ်သော အဝတ်အစားများအား သယ်ဆောင်လာသည့် လူသားကို ယွဲ့အန်း မော့ကြည့်လိုက်သည်။ 

ထို့နောက် "မြောင်" ဟူပြီး နူးညံ့သော အသံလေးအား ထုတ်လွှတ်လိုက်လေသည်။

သတ္တဝါငယ်လေး ထွက်ပြေးသွားပြီဟု ယူဆထားသော မာရှယ်က သူ့ခြေလှမ်းများကို ရပ်တန့်လိုက်သည်။

"မြောင်"

ယွဲ့အန်းက နောက်တစ်ကြိမ် အသံပြုလိုက်သည်။

ယွဲ့အန်းက ဤလူသားကို ဂရုတစိုက် လေ့လာကြည့်မိသည်။ ယခုအခါ ထိုလူက ရှပ်အင်္ကျီလက်တိုကို ၀တ်ဆင်ထားပြီး ထိုအဝတ်အစားများအောက်ရှိ ကြွက်သားများ၏ ကောက်ကြောင်းကိုလည်း ရှင်းရှင်းလင်းလင်း မြင်နိုင်ပေသည်။ ထို့အပြင် ဤဝတ်စားဆင်ယင်ပုံက ပို၍နှစ်သက်ဖွယ်ကောင်းကြောင်း သူ တွေ့ရှိခဲ့သည်။

ယွဲ့အန်းက အနက်ရောင်ဘောင်းဘီရှည်ကို ဝတ်ဆင်ထားသည့် မာရှယ်၏ ခြေထောက်ရှည်များကို ရှောင်ကွင်းသွားလိုက်သည်။ ထို့နောက် သူ့ကိုယ်သူ အပြင်လူတစ်ဦးဟု နည်းနည်းလေးမျှပင် မသတ်မှတ်ဘဲ နည်းပညာမြင့်မားသော အဆောက်အဦထဲသို့ ကိုယ့်အိမ်ကိုယ့်ယာကဲ့သို့ ၀င်သွားလိုက်လေသည်။

ဘာပဲဖြစ်ဖြစ် ချစ်စရာကောင်းတဲ့ ကြောင်လေးတစ်ကောင်ကို ဘယ်သူက ခုခံနိုင်စွမ်းရှိမှာလဲ...

အနည်းဆုံးအနေဖြင့် မာရှယ်က သူ၏ဝင်ရောက်မှုကို ငြင်းဆန်သည့်ပုံမပေါ်ပေ။

ရှို့ကျွင်းက သတိကင်းမဲ့နေခြင်းမျိုး မဟုတ်ပေ။ အနှီသတ္တဝါလေးက လူသားများအပေါ် သိသိသာသာ ဖော်ရွေနေခြင်းကြောင့်ပင်။ သူ့အနားသို့ ချဉ်းကပ်လာချိန်တွင် ၎င်းက သူ၏ချွန်ထက်သော သွားများနှင့် ခြေသည်းများကို တမင်တကာ ပြန်ရုတ်သိမ်းသွားပြီး နူးညံ့သည့် ဖဝါးများကိုသာ ဖော်ပြထားသည်။

တိရစ္ဆာန်များတွင်လည်း ဉာဏ်ရည်ထက်မြက်သော မျိုးစိတ်များရှိသည်။ ထို့အပြင် အခြားသတ္တဝါများကဲ့သို့ လူသားများတွင် အပြင်ပန်း ကရုဏာနှင့် မနာလိုမှုများကို စီရင်ဆုံးဖြတ်နိုင်သည့် မွေးရာပါစွမ်းရည်ရှိသည်။ သို့ရာတွင် သူတို့၏ လိုအင်ဆန္ဒများကို ကိုယ်ကျင့်တရားများဖြင့် ထိန်းချုပ်ရမည့်အစား သူတို့၏ ဆင်ခြင်တုံတရားက  မွေးရာပါ အလျိုအလျောက် တုံ့ပြန်မှုများကို မကြာခဏဆိုသလို တားဆီးတတ်သည်။

စစ်မြေပြင်တွင် နှစ်အတန်ကြာ နေထိုင်ခဲ့သော မာရှယ်ရှို့ကျွင်း၏ဗီဇမှာ သာမန်လူများထက် သာလွန်ကောင်းမွန်ခဲ့သည်။ တိရစ္ဆာန်များနှင့် ဆက်ဆံရာတွင် ပင်ကိုယ်ဗီဇအတိုင်း လိုက်နာရုံဖြင့် လုံလောက်ပေသည်။ အဘယ်ကြောင့်ဆိုသော် ၎င်းတို့၏ အတွေးအခေါ်က ပိုမိုရိုးရှင်းပြီး အကောင်းနှင့်အဆိုးကို ပိုမိုရှင်းလင်းပြတ်သားစွာ ခွဲခြားနိုင်သောကြောင့်ပင်။

၎င်းအပြင် သတ္တဝါလေးက ဖော်ရွေပုံရပြီး သူ့အသက်ကိုပင် ကယ်တင်ထားခဲ့သည်။

ရှို့ကျွင်းက အာကာသယာဉ်တစ်ဝိုက် စပ်စပ်စုစု လျှောက်ကြည့်နေသည့် အကောင်ပေါက်လေးကို ကြည့်နေခဲ့သည်။ ထိုအကောင်လေးက အရာဝတ္ထုအမျိုးမျိုးကို ရံဖန်ရံခါ လက်ဖြင့်ပုတ်ပြီး ထိကြည့်တတ်သည်။ ရှို့ကျွင်းက မွေ့ယာကို ပစ်ချပြီး စုတ်ပြတ်သတ်နေသည့် ယူနီဖောင်းကို တံခါးအပြင်ဘက်၌ ထားလိုက်သည်။ ထို့နောက် သူ ကိုင်ထားသည့် ရေဘူးကိုဖွင့်ပြီး ပါဝင်သည့် ရေအားလုံးကို ၎င်းတို့အပေါ်သို့ လောင်းချလိုက်သည်။

ယွဲ့အန်းက အသံဗလံများကို ကြားပြီး တံခါးဆီသို့ ခေါင်းလှည့်ကြည့်လိုက်သည်။

သူ့အကြည့်များအောက်တွင် သွေးစွန်းနေသည့် အိပ်ရာစနှင့် အဝတ်အစားများက တဖြည်းဖြည်း အငွေ့ပျံသွားပြီး အစအနပင်မကျန်ဘဲ ပျောက်ကွယ်သွားခဲ့သည်။

ပိုပြီးနည်းပညာမြင့်တဲ့ မှော်ပညာပဲ...

၎င်းနောက် ရှို့ကျွင်းက အထဲသို့ ပြန်လာပြီး ရေဘူးကို ဖုံးကာ နံရံပေါ်ရှိ အိတ်အသေးလေးထဲသို့ ပြန်ထည့်လိုက်သည်။ ယွဲ့အန်းက မျက်လုံးအဝိုင်းသားဖြင့် ရှို့ကျွင်း၏ လှုပ်ရှားမှုများကို ကြည့်‌နေခဲ့သည်။

ထို့နောက် ရှို့ကျွင်းက နောက်ထပ်ဗီရိုတစ်လုံးကို ဖွင့်လိုက်ပြန်သည်။ ထိုဗီရိုထဲတွင် အပြာနုရောင်အရည်များဖြင့် ပြည့်နေသည့် စမ်းသပ်ဖန်ပြွန်ကဲ့သို့ ထည့်စရာခွက်များကို အတန်းစီထည့်ထားသည်။ ၎င်းနောက် ရှို့ကျွင်းက တစ်ခုကို ထုတ်ယူပြီး အဖုံးကိုဖွင့်ကာ တစ်ငုံသောက်လိုက်သည်။

စူးစမ်းလိုစိတ်နှင့် အစာကို နှစ်သက်ခြင်း အထူးသဖြင့် လူသားတို့စားသောက်နေသည်ကို ကြည့်ခြင်းက ကြောင်မျိုးနွယ်၏ ပင်ကိုယ်ဗီဇဖြစ်သည်။

ယွဲ့အန်းက မနေနိုင်ဘဲ လူသားထံသို့ ချဉ်းကပ်သွားပြီး သူ၏ ရှေ့ခြေထောက်ကို ရှို့ကျွင်း၏ ခြေထောက်ပေါ်သို့ တင်လိုက်လေသည်။ ထို့နောက် လည်ပင်းလေးကို ဆန့်ထုတ်ရင်း မာရှယ်၏ အာရုံစိုက်မှုကို အရယူရန် "မြောင်" ဟု အသံပေးလိုက်၏။

ရှို့ကျွင်းက သတ္တဝါငယ်လေးကို ငုံကြည့်လိုက်ရာ ၎င်း၏အကြည့်များက သူ့လက်ထဲရှိ အာဟာရရည်ကို ကြည့်နေကြောင်း တွေ့လိုက်ရသည်။

"မင်း စားချင်လို့လား"

ရှို့ကျွင်း မေးလိုက်သည်။

"မြောင်"

ယွဲ့အန်းက ပြန်ဖြေလိုက်သည်။

သကြားကဲ့သို့ ချို‌သာသည့် ထိုအော်သံက စားချင်နေသည်ဟု မာရှယ်က အဓိပ္ပာယ်ကောက်လိုက်သည်။

သို့သော် အာဟာရရည်၏ အရသာက နှစ်လိုဖွယ်မရှိပေ။

ရှို့ကျွင်းက အရည်အနည်းငယ်ကို သူ့လက်ပေါ်တွင် တို့လိုက်ပြီး ယွဲ့အန်းထံ ကမ်းပေးလိုက်လေသည်။

🐈🐈🐈