Ch 1

🔥 Chapter 1

နီဗာနာ ပြန်လည်မွေးဖွားခြင်း

ကျိုးယွီဟယ်က မီးဖိုခန်းရှိ ဂတ်စ်ကို ပိတ်ရန် လက်လှမ်းလိုက်ပြီးနောက် ဧည့်ခန်းဘက်သို့ လှည့်လိုက်သည်။

ခမ်းနားစွာပြင်ဆင်ထားသော ဧည့်ခန်းထဲတွင် ပန်းများ၊ ဆုတ်ဖြဲထားသော ရောင်စုံစက္ကူများ ပြန့်ကျဲနေသည်။ သူက ဧည့်ခန်းထောင့်ရှိ စိုစွတ်နေသော လိုက်ကာများပုံထားသည့် ကုလားထိုင်ဆီသို့ ရောက်လာသည်။ ထိုပုံထားသော အဝတ်စများပေါ်တွင် မီးတောက်နေသော ဖယောင်းတိုင်တစ်တိုင် ရှိနေ၏။ ကျိုးယွီဟယ်က ထိုဖယောင်းတိုင်ကို ယူရန် ငုံ့လိုက်ကာ၊ ၎င်းကို အဝတ်ပုံထဲသို့ ပစ်ထည့်လိုက်သည်။

သူက အချိန်ကိုက် မီးရှို့စက်*ကို ကြိုတင်ဖွင့်ထားခဲ့သည်။

မီးလျှံက ဦးတည်ချက်မရှိလျှောက်သွားနေသော နဂါးတစ်ကောင်ပမာ အရက်ပြန်များ လောင်းထားသော လိုက်ကာများဆီသို့ အလျင်အမြန် ရောက်ရှိသွားပြီး၊ အခန်းတစ်ခန်းလုံး မီးခိုးငွေ့များ ဖုံးလွှမ်းသွားသည်။

ကျိုးယွီဟယ်က မတ်မတ်ရပ်လိုက်ပြီးနောက် ကုလားထိုင်ပေါ်မှ သူ့ကိုယ်သူ မြင်လိုက်ရသည်။ ထိုနေရာတွင် ရှေးဟောင်းပုံစံထွင်းထုထားသော မှန်တစ်ချပ်ရှိရာ၊ ထိုမှန်ထဲမှ သူ့ပုံရိပ်က ခံစားချက်ကင်းမဲ့သော်လည်း ရက်စက်နေဟန် ပေါက်နေသည်။

ထိုရက်စက်မှုက သူဖော်ပြနေသော မျက်နှာအမူအရာမဟုတ်ဘဲ၊ သူ၏ မျက်နှာတွင် ၁၅ နှစ်တိုင် ကပ်ညှိနေခဲ့သည့် အချိုင့်များဖြစ်နေသော၊ မီးလောင်ထားသည့် ဒဏ်ရာများသာ ဖြစ်သည်။

မီးတောက်က ပို၍ပို၍ ကြီးထွားလာပြီး အထက်သို့တက်လာသော အပူရှိန်သည်လည်း မှန်မျက်နှာပြင်တစ်ခုလုံးကို ဖုံးလွှမ်းသွားသည်။ မှုန်ဝါးဝါး အနေအထားအောက်တွင် မှန်ထဲ၌ အပြစ်အနာအဆာကင်းမဲ့သော မျက်နှာတစ်ခုကို သူ မြင်လိုက်ရသယောင် ထင်ရသည်။

ဖျော်ဖြေရေးနယ်ပယ်သို့ ဝင်ရောက်ရန် ကြိုးပမ်းနေသည့် လူငယ်တိုင်းအတွက် လှပသော မျက်နှာက မရှိမဖြစ် လိုအပ်သော လက်နက်တစ်ခုဖြစ်သည်။ ငယ်ရွယ်သော ကျိုးယွီဟယ်က ထိုအချက်တွင် အထူးတလည် ထူးခြားနေခဲ့သည်။ ဘုရားသခင်က သူ့အား ကောင်းချီးပေးခဲ့၍ ပွဲဦးထွက်ပြီး ခြောက်နှစ်အတွင်းမှာပင် ပြည်တွင်း စူပါပထမတန်းစား သရုပ်ဆောင်တစ်ဦး ဖြစ်လာစေခဲ့သည်။ သူ၏ ဝေ့ပေါ် ပရိသတ်များက သန်း ၆၀ ကျော်ရှိခဲ့သည်။ ပြန်လည်မျှဝေမှု (Re-posts) နှင့် မှတ်ချက်ပေးမှုအရေအတွက်ကလည်း ဂင်းနစ်စံချိန်ကို ဖန်တီးခဲ့သည်။ သူက ထိုက်တန်သော လမ်းကြောင်းပြဘုရင် (King of Traffic) တစ်ပါး ဖြစ်ခဲ့သည်။

ထိုအရာအားလုံးသည် လွန်ခဲ့သော ဆယ့်ငါးနှစ်က မီးလောင်မှုတစ်ခုကြောင့် အဆုံးသတ်သွားခဲ့သည်။

ထိုနောက်ပိုင်းတွင် ကျိုးယွီဟယ်က ကြီးစွာသော အတက်အကျဟု ခေါ်သောအရာကို တကယ်ပင် သဘောပေါက်ခဲ့သည်။ သူ့ကြော်ငြာထောက်ခံမှုများ ရုပ်သိမ်းခံရသည်။ ရုပ်သံဇာတ်လမ်းတွဲများက သူ့နေရာကို အစားထိုးခဲ့သည်။ ကုမ္ပဏီသည် အရှုပ်တော်ပုံတွင် ပါဝင်ပတ်သက်နေသော်လည်း မည်သို့မျှ မဆောင်ရွက်ပေးခဲ့ပေ။ ဖျော်ဖြေရေးလောကတွင် မျက်နှာတစ်ခုတည်းက လူတစ်ယောက်ကို အောင်မြင်အောင် ဘယ်တော့မှ မလုပ်ပေးနိုင်သော်လည်း၊ လူတစ်ယောက်ကို ကျရှုံးအောင် သေချာပေါက် လုပ်နိုင်ခဲ့သည်။

ဝေခွဲမရမှု၊ စိတ်ပျက်အားငယ်မှု၊ အကြမ်းဖက်မှုနှင့် စွန့်ပစ်ခံရမှုများကြားမှ ကျိုးယွီဟယ်က ပြန်လည်နာလန်ထူလာရန် နှစ်နှစ် အချိန်ယူခဲ့ရပြီး၊ ကျန်ရှိသော ၁၃ နှစ်တာကာလပတ်လုံး သူ၏ အာရုံစူးစိုက်မှုအားလုံးကို သရုပ်ဆောင်ခြင်းအတွက် အသုံးပြုခဲ့သည်။

သို့သော် ဤလောကသို့ပြန်လာရန်က မလွယ်ကူခဲ့ပေ။ အရေပြားလဲရာမှ ခံစားရသော နှလုံးသားကွဲလုနီးပါး ဆွဲဆန့်မှုနှင့် မခံမရပ်နိုင်အောင် ယားယံမှုတို့ကို သူ သည်းခံခဲ့ရပြီး၊ သူ့ကို ပျက်စီးလုနီးပါးဖြစ်စေခဲ့သော ရုပ်ရှင်ကို လက်စသတ်ရုံသာမက၊ သူ၏ သရုပ်ဆောင်စွမ်းရည်ကို ပြသနိုင်သည့် ဆိုးဝါးသော ဗီလိန်ဇာတ်ရုပ်များစွာကိုလည်း လက်ခံရိုက်ကူးခဲ့သည်။ တစ်ချိန်က သူ မင်းသားအဖြစ် သရုပ်ဆောင်ခဲ့ဖူးသည့်ဇာတ်ကားကို ပြန်လည်ရိုက်ကူးသောအခါတွင် တက်သစ်စလူငယ်များဖြင့်ပင် တွဲဖက် သရုပ်ဆောင်ခဲ့ရသည်။

ဆယ့်သုံးနှစ်အကြာ၊ နောက်ဆုံးတွင် အခြေအနေတိုးတက်ရန် အချိန်အနည်းငယ် ယူခဲ့ရသည်။ ပြီးခဲ့သည့်လတွင် သူက ရုပ်ရှင်ဧကရာဇ်ဆုအတွက် အမည်စာရင်းတင်သွင်းခံခဲ့ရသည်။

အရာအားလုံးသည် ယနေ့တွင် ရပ်တန့်သွားတော့မည်ဖြစ်သည်။

ရုတ်တရက်ဆိုသလို ခပ်တိုးတိုးညည်းသံတစ်ခုက တဖျောက်ဖျောက်မြည်နေသော မီးလျှံများကို ဖြတ်ကျော်၍ ဧည့်ခန်း၏ တစ်ဖက်ခြမ်းမှ ပေါ်ထွက်လာသည်။

ကျိုးယွီဟယ်က ပြန်လှည့်ကြည့်လိုက်ပြီး လက်နှစ်ဖက်ကို နောက်ပြန်ချည်နှောင်ခံထားရကာ ကြမ်းပြင်ပေါ် လဲကျနေသည့် အရပ်ရှည်ရှည် အမျိုးသားကို လှည့်ကြည့်လိုက်သည်။

အပြည်ပြည်ဆိုင်ရာ စံနှုန်းများအဖွဲ့၏ ဖျော်ဖြေရေးလုပ်ငန်းကဏ္ဍကို ဦးဆောင်နေသူ ကျီချန်က ဖျော်ဖြေရေးနယ်ပယ်တစ်ဝက်ကိုပင် လွှမ်းမိုးထားနိုင်သည့် ဖျော်ဖြေရေး ဧကရာဇ်တစ်ဦးဖြစ်သည်။ အသက်လေးဆယ်ကျော်နေသော်လည်း သက်လတ်ပိုင်းအရွယ်များတွင် ရှိသင့်သည့် ဘဝအတွေ့အကြုံများနှင့် ခံစားချက်ပြောင်းလဲမှုမျိုး သူ့တွင် မရှိပေ။ သူ မော့ကြည့်လိုက်သောအခါ နတ်ဘုရားကဲ့သို့ ချောမောလှပသည့် အလှတရားက လွန်ခဲ့သော ဆယ်စုနှစ်တစ်ခုက သူနှင့် စတင်တွေ့ဆုံချိန်အတိုင်းကပင် ရှိနေသည်။

ထိုအချိန်က သူတို့သည် ချစ်သူများဖြစ်ခဲ့ကြသည်။ အဆင့်အတန်းပိုင်းတွင် ကွာခြားမှုများရှိသော်ငြားလည်း အမွေဆက်ခံသူနှင့် ကြယ်ပွင့်လေးတို့၏ ပြင်းပြသောအချစ်ကို မည်သည့်အရာကမှ မတားဆီးနိုင်ခဲ့ပေ။ သူတို့နှစ်ဦးက ခက်ခဲကြမ်းတမ်းမှုများစွာကို ဖြတ်သန်းခဲ့ရသော်လည်း ရှင်သန်နိုင်ခဲ့ကြသည်။ ကံမကောင်းစွာဖြင့် မီးလောင်မှုတစ်ခုက ကျိုးယွီဟယ်နှင့် ထိုအမွေဆက်ခံသူတို့၏ ထာဝရတည်မြဲမည်ဟု ထင်မှတ်ထားသည့် အရာအားလုံးနှင့် အချစ်အပါအဝင် အရာရာကို ဖျက်ဆီးပစ်ခဲ့သည်။

ကျိုးယွီဟယ်က ရှေ့တိုးလာပြီး ကျီချန်၏ မျက်လုံးများကို အပေါ်စီးမှ ငုံ့ကြည့်လိုက်သည်။

ယနေ့ည မွေးနေ့ပွဲ၏ မွေးနေ့ရှင်ဖြစ်သူက ရုတ်တရက် မေ့လဲသွားပြီး ဧည့်ခန်းထဲတွင် ချည်နှောင်ခံထားရသည်မှာ လုံးဝကို ထူးဆန်းနေသင့်သည့် ကိစ္စပင်။ မထင်မှတ်ထားသည့် အခြေအနေဖြစ်နေသော်လည်း ကျီချန်၏မျက်နှာတွင် ထိုကဲ့သို့သော ထိတ်လန့်နေသည့်အရိပ်အယောင် မရှိပေ။ သူက ယခင်ကဲ့သို့ မဟုတ်တော့သည့် ထိုလူကို အေးစက်စက် စိုက်ကြည့်နေရုံသာ။

ကျီချန်က ထိတ်လန့်စရာ အကြောင်းမရှိသည်မှာ သေချာပေသည်။ အဘယ့်ကြောင့်ဆိုသော် သူ၏ မူလအကြံအစည်အရဆိုလျှင် ဧည့်ခန်းထဲတွင် နိုးလာပြီး မီးလောင်နေသည်ကို တွေ့ရသော်လည်း ထွက်မပြေးနိုင်မည့်သူက ကျိုးယွီဟယ်ဖြစ်ရမည်ပင်။ သို့မဟုတ် ဂတ်စ်က သူ မနိုးမီမှာပင် မီးနှင့်ထိပြီး တိုက်ရိုက် ပေါက်ကွဲသွားရပေမည်။

"ဘာတွေဖြစ်နေတာလဲ… မင်း ဘယ်လိုလုပ်ပြီး..." 

ထူထပ်သည့် မီးခိုးများကြောင့် ချောင်းနှစ်ကြိမ်ဆိုးပြီးနောက် ကျီချန်က မျက်ခုံးများ တွန့်ချိုးလျက် ပြောလိုက်သည်။ သူက မည်သည့်အရာမှားယွင်းသွားကြောင်း တွေးနေပုံရပြီး ရုတ်ချည်းမှတ်မိသွားပုံပေါ်သည်။

" မင်း… ဝိုင်ကို လဲခဲ့တာလား…"

အံ့အားသင့်မှု၊ မယုံနိုင်စရာဖြစ်မှုနှင့် သစ္စာဖောက်ခံရခြင်း အရိပ်အယောင် အနည်းငယ်တို့က ထိတ်လန့်ဒေါသဖြစ်မှုများကို လွှမ်းမိုးသွားသည်။ လွန်ခဲ့သော ဆယ်စုနှစ်တစ်ခုခန့်ကသာဆိုလျှင် ကျိုးယွီဟယ်က ဤမျက်နှာအမူအရာကို မြင်၍ နှလုံးသား ကွဲကြေနေလောက်ပြီဖြစ်သည်။ သို့သော် အခုအချိန်တွင်မူ သူက ကောင်းကင်ကို မော့ကြည့်၍ ရယ်မောချင်စိတ်သာ ရှိနေသည်။

" ဟုတ်တယ်… ငါ သူတို့ကို KTV အရင်သွားခိုင်းလိုက်တာ… မင်းကို ဂရုစိုက်ဖို့က ငါတစ်ယောက်တည်းကျန်ခဲ့တယ်…"

ကျိုးယွီဟယ်၏အသံက အေးစက်အက်ရှနေသည်။ မီးလောင်ပြီးသည့်နောက်ပိုင်းမှစ၍ ဤမနှစ်မြို့ဖွယ် အသံက ဤအတိုင်းပင် ဖြစ်နေခဲ့သည်။

" ဘာလဲ… ငါက မင်းပေးတဲ့သောက်စရာကို သောက်ရဲဦးမယ်လို့များ ထင်နေတာလား…"

ကျိုးယွီဟယ်က ထိုင်ချလိုက်ပြီး ရုတ်တရက် အနားသို့ တိုးကပ်သွားသည်။ သူ၏ မျက်နှာပေါ်ရှိ အမာရွတ်များက ကျီချန်ကို မသိစိတ်အရ နောက်ဆုတ်သွားစေသည်။ ကျီချန်၏ လှပသော မျက်လုံးများတွင် ကြောက်ရွံ့မှု အနည်းငယ်ရှိနေသော်လည်း မကြာမီတွင်ပင် သတိရှိပြီး အေးစက်သောပုံစံသို့ ပြန်ရောက်သွားသည်။

တစ်ချိန်က ကျီချန်သည် နူးညံ့မှုဖြင့်သာ သူ့ကို ကြည့်ခဲ့သည်။ ပတ်တီးကို စတင်ဖြည်သည့်အခါ သူ၏မျက်နှာက ကြောက်စရာအကောင်းဆုံး အခြေအနေဖြစ်နေသည့်တိုင် ထိုကဲ့သို့ ကြောက်ရွံ့သောမျက်လုံးများဖြင့် သူ့ကို တစ်ခါမျှ မကြည့်ခဲ့ဖူးပေ။

ထိုလူ၏ပုံစံက နွမ်းလျနေသော်လည်း သူ့ကို ချစ်ခင်မှုအပြည့်ဖြင့် ကြည့်ကာ၊ သူ့ကို ရိုက်ကူးထားသည့် ဇာတ်ကားကြောင့် မတော်တဆမှုဖြစ်ခဲ့ကြောင်း၊ အနက်ရောင်ဧကရာဇ်၏သမီးနှင့် စေ့စပ်ထားခြင်းကို ဖျက်သိမ်းပြီးနောက် သူတို့၏ ဆက်ဆံရေးကို တစ်လောကလုံးသိအောင် ကြေညာမည်ဖြစ်ကြောင်း ပြောခဲ့သည်။ ထို့အပြင် သူ၏ လက်ကျန်ဘဝတစ်လျှောက်လုံးကို ကောင်းကောင်းထားမည်ဟုလည်း ပြောခဲ့ဖူးသည်။

တစ်လတာ ကာလပတ်လုံး၊ အပြင်လောကက မည်မျှပင် ဝေဖန်ပုတ်ခတ်မှုများ ရှိနေပါစေ သူက ကျိုးယွီဟယ် အား နေ့စဉ်မပြတ် လာရောက်ပြုစုစောင့်ရှောက်ခဲ့သည်။  ဆေးကုသဆောင်အပြင်ဘက်တွင် ဖခင်ဖြစ်သူ၏ သုံးကြိမ်တိုင်တိုင် ရိုက်နှက်ခြင်း ခံခဲ့ရသော်လည်း သူက တစ်ခွန်းတစ်ပါဒမျှ ပြန်လည်မပြောခဲ့ပေ။

အတ္တစိတ်ကြီးသူတစ်ဦးပင်လျှင် ထိုမျှ ခိုင်မာပြင်းပြသော ချစ်ခြင်းမေတ္တာမျိုးနှင့် ရင်ဆိုင်ရပါက စိတ်လှုပ်ရှား တုန်လှုပ်မိမည်ဖြစ်ရာ၊ ကျိုးယွီဟယ် ဆိုလျှင် အထူးတလည် ပြောနေရန်ပင် လိုမည်မထင်ပေ။

သို့သော်လည်း ကျိုးယွီဟယ်က လက်ထဲရှိ ပစ္စည်းများကို ကျီချန် အပေါ် အကြိမ်ကြိမ် ပစ်ပေါက်ကာ၊ ဆေးကုသဆောင်မှ မောင်းထုတ်ခဲ့သည်။

ထို့ပြင် သူက ကြီးမားလှသည့် ကြေကွဲဝမ်းနည်းမှုကို အံတုလျက် မိမိဘဝအတွက် ဘေးဆိုးကြီးသဖွယ် ဖြစ်လာသည့် ကျီချန်အား စိတ်ခံစားမှု ကင်းမဲ့စွာဖြင့် လမ်းခွဲရန် ကမ်းလှမ်းခဲ့သောအခါ... 

ရင်ဘတ်ထဲမှ နာကျင်မှုကား အတိုင်းထက်အလွန်ပင်။

ထိုခံစားချက်က သူ၏ နှလုံးသားကို ရှေ့တိုးနောက်ငင် ဆွဲဆုတ်ဖြဲနေသကဲ့သို့၊ အထက်အောက် ပြောင်းပြန်ဖြစ်အောင် အချွန်ဆုံးနှင့် အထက်ဆုံး သံမဏိအပ်ဖြင့် ထိုးဖောက်နေသကဲ့သို့ပင်။

နာကျင်လွန်းသည့်အတွက် ဖြစ်ကောင်းဖြစ်နိုင်သည်။ သူက ကျီချန်၏မျက်နှာထက်တွင် သက်သာရာရသွားသည့်အရိပ်အယောင် တစ်ခု လျှပ်တစ်ပြက် လင်းလက်သွားသည်ကို မမြင်ခဲ့ရချေ။

ထိုအချိန်မှစ၍ ကျိုးယွီဟယ်၏ အနုပညာလမ်းကြောင်းက ထိုးကျသွားခဲ့သည်။ သူ့ပတ်ဝန်းကျင်မှ လူများသည်လည်း တစ်ယောက်ပြီးတစ်ယောက် ပျောက်ကွယ်သွားကြသည်။

ဝေ့ပေါ် ပေါ်တွင် တစ်လခွဲကြာမျှ အတင်းအဖျင်းခေါင်းစဉ်အဖြစ် ရေပန်းစားခဲ့ပြီးနောက်၊ သုံးနှစ်ကြာသော်၊ လူဒါဇင်အနည်းငယ်မျှသာ သူ့အား စိုးရိမ်ပူပန်မှုရှိတော့သည်။ ကျီချန်သည်လည်း နေ့စဉ် နှုတ်ဆက်စကားပြောနေရာမှ ကျိုးယွီဟယ်၏ လတ်တလောအခြေအနေကို ဝေ့ပေါ်မှတစ်ဆင့်သာ သိရှိနိုင်တော့သည်အထိ ဝေးကွာသွားခဲ့သည်။

သို့သော်လည်း ကျိုးယွီဟယ်က မကျေနပ်ခြင်းမျိုး လုံးဝမရှိပေ။ နှစ်ပေါင်းများစွာ ကြာလာသောအခါ လူ့သဘောလူ့သဘာဝကို သူပို၍ မြင်လာခဲ့ရသည်။ တန်ဖိုးမရှိတော့သည့် ကျိုးယွီဟယ်အား ကျီချန်က ထိုသို့ ဆက်ဆံပေးနိုင်ခြင်းမှာပင် ကျေးဇူးကြီးလှပြီဟု သူခံယူထားသည်။

လွန်ခဲ့သော သုံးလခန့်တွင် ထိုနှစ်က*စတူဒီယိုပစ္စည်းအဖွဲ့မှ မိန်းကလေးတစ်ယောက်နှင့် မတွေ့ခဲ့ရပါက သူသည် ထိုအမှန်တရားကို မည်သည့်အခါမျှ သိရှိနိုင်မည်မဟုတ်ပေ။

[T/N - ထိုနှစ်ကဆိုတာ သူ့မီးလောင်မှုဖြစ်ခဲ့တဲ့နှစ်ကို ပြောချင်တာပါ]

ဘဝတစ်လျှောက်လုံး သူ့ကို ကောင်းကောင်းမွန်မွန် ထားမည်ဟု ကတိပေးခဲ့သူမှာ—

အမှန်စင်စစ် သူ့အား ချောက်နက်ငရဲထဲသို့ ကိုယ်တိုင်တွန်းချခဲ့သည့် မကောင်းဆိုးဝါး ဖြစ်နေခဲ့ခြင်းပင်။

ကျိုးယွီဟယ်က ပြိုလဲကျသွားပြီး အော်ဟစ်လိုက်ကာ မရေမတွက်နိုင်သော လက်များက သူ့လည်ပင်းကို ညှစ်နေသည်ဟု ခံစားရသည်။ ဆယ့်ငါးနှစ်ကြာ ငြိမ်သက်နေပြီးနောက်၊ အရာအားလုံး အဆင်ပြေသွားပြီဟု ထင်မှတ်ခဲ့ပြီးမှပင် ကံကြမ္မာက သူ့အား ကြောက်မက်ဖွယ်ရာ ပြက်လုံးတစ်ခု ပေးခဲ့ပြန်သည်။ ထိုအရာက သူ့အား အဆုံးစွန်ဆုံးသော၊ အအေးစက်ဆုံးသော သစ္စာဖောက်မှုကို ခံစားစေခဲ့သည်။ ထိုနာကျင်မှု၏ ဖန်တီးခဲ့သူက လူတစ်ဦးအား ဂရုစိုက်လျက် ပင်လယ်ရပ်ခြားကျွန်းပေါ်တွင် ငွေအမြောက်အများဖြုန်းတီး ပျော်ပါးလျက်ရှိသည်။

ကျိုးယွီဟယ်က ခွန်အားများ ကုန်ခမ်းသွားပြီး လမ်းပင် မလျှောက်နိုင်တော့ချေ။ သို့သော်လည်း သူ့ရင်ထဲတွင် တောက်လောင်နေသော အမုန်းတရားမီးတောက်က အမှန်တရားကို စုံစမ်းစစ်ဆေးရန် အားပေးထောက်ပံ့ပေးခဲ့သည်။ သူက ရွံရှာစက်ဆုပ်နေသည့်ကြားမှပင် ခံနိုင်ရည်ရှိရှိဖြင့် အတွင်းလူတစ်ယောက်ထံမှ အအေးစက်ဆုံးနှင့် အကျိုးသင့်အကြောင်းသင့်ဆုံး ရှင်းပြချက်ကို နားထောင်ခဲ့ရလေသည်။

"မင်း သိလား… အဲဒီတုန်းက ကျီချန်က အနက်ရောင်ဧကရာဇ်ရဲ့ သမီးနဲ့ လက်ထပ်တော့မလို့ကို… မင်းက လက်မခံနိုင်ဘဲ လူသိရှင်ကြား come outဖို့အတွက်လည်း ပြောခဲ့တယ်လေ… အရင်တုန်းက ကျီချန် လုပ်ခဲ့တဲ့ ရှက်စရာကောင်းတဲ့ ကိစ္စတွေကိုပါ ဖွလိုက်ဦးမယ်လို့ ခြိမ်းခြောက်ခဲ့သေးတယ်… မင်း ငြိမ်သွားအောင်လို့ ကျီချန်က အဲဒါတွေအားလုံးကို လုပ်ခဲ့တာပဲ… ကံကောင်းချင်တော့ နောက်ဆုံးမှာ မင်းက အတော်လေး အသိတရားရှိသွားခဲ့တယ်… ဒါက ပျော်စရာကောင်းတဲ့ ဇာတ်သိမ်းတစ်မျိုးပဲ မဟုတ်ဘူးလား..."

ပျော်ရွှင်စရာ ဇာတ်သိမ်းတစ်ခုလား… ဒါက ဘယ်လို ပျော်ရွှင်စရာ ဇာတ်သိမ်းမျိုးလဲ…ရိုက်ကွင်းပေါ်က ပေါက်ကွဲမှုမှာ မီးလောင်မှုရဲ့ ဗဟိုချက်မှာရှိတဲ့ ငါက မီးလောင်ဒဏ်ရာပြင်းပြင်းထန်ထန်ရတာလောက်ပဲ ရှိမယ်… နေရာမှာတင် သေမသွားဘူးလို့ ဘယ်သူက အာမခံနိုင်မလဲ… ကျီချန်၊ မင်း ရက်စက်လိုက်တာ… မင်း တော်တော် ရက်စက်တာပဲ…

သူ မုန်းတီးခဲ့သည်။ သူ အမုန်းကြီးမုန်းခဲ့သည်။ သို့သော်လည်း တရားမျှတမှု ရရှိရန် အခွင့်အရေးကို သူ စောင့်ဆိုင်းခဲ့ရသည်။

မထင်မှတ်ထားဘဲ ဤအခွင့်အရေးကို ကျီချန် ကိုယ်တိုင်က လက်ဆောင်ပေးခဲ့သည်။

နှစ်ပေါင်းများစွာ အဆက်အသွယ်ပြတ်နေသော ချစ်သူဟောင်းတစ်ဦးက ဤအချိန်တွင် သူ့အား မွေးနေ့ပါတီသို့ ဖိတ်ကြားလာခြင်းဖြစ်သည်။ ကျိုးယွီဟယ်က ပြောင်းလဲသွားသောကျီချန်အကြောင်းကို သိမြင်သွားပြီးဖြစ်ရာ၊ လွန်ခဲ့သော ဆယ့်ငါးနှစ်ကကဲ့သို့ပင် နောက်ထပ် မတော်တဆမှုတစ်ခုဖြင့် ကျီချန်က သူ့အား ဖယ်ရှားရှင်းလင်းလိုသည်မှာ သံသယဖြစ်ဖွယ်မရှိပေ။ မည်သည့်နည်းဖြင့် ပြုလုပ်မည်ကို ဘုရားသခင်သာ သိပေလိမ့်မည်။

သို့သော် ကျီချန်မထင်ထားခဲ့သည်မှာ သူ နိုးထလာသောအခါ သူက ဓားကိုင်သူ ဘဝမှ ပစ်မှတ်ထားခံရသည့် ငါးဘဝသို့ ပြောင်းလဲသွားခဲ့မည်ကိုပင်။

"မင်း အသက်ရှင်ချင်သေးရင် ငါ့ကို လွှတ်လိုက်စမ်း… "

ကျီချန်က အေးစက်စွာ အမိန့်ပေးလိုက်သည်။ သူ့မျက်လုံးများက ထက်ရှသည့် ဓားသွားကဲ့သို့ပင် ကျိုးယွီဟယ်၏ သွေးထွက်သံယိုဖြစ်နေသော နှလုံးသားကို ထိုးဖောက်လိုက်လေသည်။

ကျိုးယွီဟယ်က အေးစက်စက်ရယ်မောလိုက်သည်။

" အသက်ရှင်ချင်သေးရင် တဲ့လား… ငါ သေသွားခဲ့တာ ကြာလှပြီ… ကျိုးယွီဟယ်ဆိုတဲ့လူကို မင်းပဲ လွန်ခဲ့တဲ့ ဆယ့်ငါးနှစ်က သတ်ပစ်ခဲ့တာ… အဲ့ဒီတုန်းက ငါ ဒဏ်ရာရခဲ့တာကို မင်းမှတ်မိသေးလား… ငါ မင်းကို လက်မခံချင်ခဲ့ဘူး… တိုက်ခန်းရဲ့ အောက်ထပ်မှာ ဒူးထောက်ပြီး၊ တခြားသူတွေလို ငါ့ကို ဘယ်တော့မှ စိတ်မပျက်အောင် မလုပ်ဘူး၊ ငါ့အပေါ် တစ်သက်လုံး ကောင်းကောင်းဆက်ဆံမယ်လို့ ပြောခဲ့တာ မင်းပဲ…ငါ့ကို မီးရှို့ပစ်တာက မင်းရဲ့ ကောင်းကောင်း ဆက်ဆံမယ်ဆိုတာကြီးလား…"

ကျီချန်၏ မျက်လုံးများက အေးစက်နေပြီး သူက ကျိုးယွီဟယ်အား တည်ငြိမ်စွာ ကြည့်နေသည်။ ၎င်းအကြည့်က ဈေးပေါသော ကုန်ပစ္စည်းတစ်ခုကို ကြည့်နေသကဲ့သို့ ဂရုမစိုက်သည့် အသွင်ဖြစ်သည်။

"အဲလိုဆိုရင်ရော ဘာဖြစ်ချင်လဲ… မင်း ဘာလုပ်ချင်လဲ… မင်းရှေ့မှာ အကောင်းဆုံး အရင်းအမြစ်တွေကို ငါချပေးခဲ့တာပဲ… မင်းက ကိုယ့်ဆန္ဒအတိုင်း လုပ်ချင်တိုင်း လုပ်ပြီး ဒါရိုက်တာနဲ့တောင် ပြဿနာတက်ခဲ့သေးတာကိုတောင် ငါ ခွင့်လွှတ်ခဲ့တယ်… ငါသာမရှိရင် မင်းရဲ့မျက်နှာနဲ့ ညံ့ဖျင်းတဲ့သရုပ်ဆောင်စွမ်းရည်တွေနဲ့ အဲဒီလို ထိပ်တန်းနေရာကို ရောက်နိုင်မယ်လို့ ထင်ခဲ့တာလား… ဒါပေမဲ့ မင်းက ငါ့ကို ဘယ်လိုပြန်ပေးဆပ်ခဲ့လဲ… ငါ လက်ထပ်ချင်တယ်ဆိုတာ သိလျက်နဲ့ မင်းက ငါ့ကို မျက်နှာပျက်အောင် လုပ်ပြီး ခြိမ်းခြောက်ခဲ့တယ်ပေါ့… မင်းက ငါ့ကို အရာအားလုံး ဆုံးရှုံးစေချင်ခဲ့တယ်… မင်းအတွက် အားလုံးကို ထိန်းချုပ်ပေးထားတဲ့သူက ဘယ်သူလဲဆိုတာကိုရော မင်းကြည့်ခဲ့ရဲ့လား…"

ပတ်ဝန်းကျင်မှ အပူချိန်က အလွန်တရာ ပူပြင်းလွန်းသော်လည်း ကျိုးယွီဟယ်မှာ အလွန်အမင်း အေးစက်နေသည်ဟု ခံစားရသည်။ သူ့သွေးကြောတိုင်းပေါ်တွင် ဆီးနှင်းများ ခဲနေသကဲ့သို့ ဖြစ်နေပြီး ကျီချန် အကြောင်း တွေးမိသည်နှင့် မတုန်ယင်ဘဲ မနေနိုင်အောင် ဖြစ်နေလေသည်။

"သရုပ်ဆောင်ညံ့တယ်ပေါ့... ငါ ဘာလို့ အဲဒီလို သရုပ်ဆောင်ညံ့နေတယ်ဆိုတာ မင်းမသိဘူးလား… မင်းရဲ့ ဦးလေးကို အနိုင်ယူနိုင်ဖို့၊ မင်းရဲ့ ဖျော်ဖြေရေးလုပ်ငန်းအင်ပါယာကို မြှင့်တင်နိုင်ဖို့အတွက် အသက် ၂၂ နှစ်ကတည်းက ငါ မင်းနောက်ကို လိုက်လာခဲ့ရတာလေ… ရင်းနှီးမြှုပ်နှံသူတွေနဲ့ ဘယ်နှခါလောက် အရက်အတူတူ သောက်ပေးခဲ့ရလဲ… ဆိုးရွားလွန်းတဲ့ရုပ်ရှင် ဘယ်နှစ်ကားကို ငါ ရိုက်ခဲ့ရလဲ… လုပ်ငန်းအတွင်းက ရှက်စရာကောင်းတဲ့ ကောလာဟလတွေ ပေါ်လာတဲ့အခါတိုင်း မင်းရဲ့သိက္ခာကို ကာကွယ်ပေးဖို့ ငါ့ရဲ့ ပုဂ္ဂိုလ်ရေးပုံရိပ်ကိုသုံးပြီး ပိတ်ဆို့ပေးခဲ့ရတာ… မင်းရဲ့ အသက်မွေးဝမ်းကြောင်းလုပ်ငန်းအတွက် ငါဘယ်လောက် ပေးဆပ်ခဲ့ရလဲ… နောက်ဆုံးတော့ သရုပ်ဆောင်ပညာကို လေ့ကျင့်ဖို့ အချိန်မပေးနိုင်ဘူးဆိုပြီး မင်းက ငါ့ကို လှောင်ပြောင်နေတယ်ပေါ့… မင်းက တကယ်ကို အသိတရားမရှိတဲ့ကောင်ပဲ…"

ကျိုးယွီဟယ်က ခြေထောက်ကိုဆန့်ပြီး ကျီချန်၏ ရင်ဘတ်ကို တိုက်ရိုက်ကန်လိုက်သည်။ ကျီချန်မှာ နာကျင်စွာဖြင့် ခန္ဓာကိုယ်ကို ကျုံ့သွားသည်။

"ငါ မင်းကို မျက်နှာပျက်အောင် လုပ်ခဲ့တယ်… ငါ မင်းကို ခြိမ်းခြောက်ချင်ခဲ့တာ မှန်တယ်… ဒါပေမဲ့ မင်း စဉ်းစားခဲ့ဖူးလား မင်းကိုယ်တိုင်က အဲဒိီလွန်ခဲ့တဲ့တစ်လမှာ 'နယ်သာလန်မှာ လက်ထပ်စာရင်းသွင်းရအောင်' လို့ ငါ့ကို ပြောခဲ့တာလေ…"

🔥🔥🔥