Chapter : 24 ( ချိန်းတွေ့ခြင်း [1] )

Chapter : 24 ( ချိန်းတွေ့ခြင်း [1] )

ဟိုင်ရိသည် လိမ္မော်သီးများကို သူ၏ပေါင်ပေါ်တွင် တင်ထား၏။ ထိုသို့ပြုလုပ်ခြင်းက နတ်ဆိုးများကို ဖယ်ရှားနိုင်သည်ဟု သဘောထားဟန်တူသည်။

ကားသည် စတင်ထွက်ခွာသွား၏။ ရှန့်ချန့်ယန်သည် ရယ်မောရခြင်းကြောင့် ပင်ပန်းနွမ်းနယ်နေပြီး ကျောကို မှီလျက် မျက်လုံးများကိုမှိတ်ထားသည်။ သူ့မျက်လုံးထောင့်များကတော့ ရယ်မောနေဆဲဖြစ်၏။

ဟိုင်ရိသည် သူ့ကို တစ်ချက်ကြည့်လိုက်သည်။ ရှန့်ချန့်ယန်ကို သူမည်သို့ပင်ကြည့်ကြည့် သူ့ပုံစံတိုင်းက စိတ်ကြည်နူးဖွယ်ကောင်းနေ၏။ သူ့ခန္ဓာကိုယ်၏ မည်သည့်အစိတ်အပိုင်းကိုမှ အလွန်အကျွံကြိုက်သည်ဟူ၍မရှိပေ။

ထိုကလေး၏ လှုပ်ရှားမှုတိုင်းသည် ဟိုင်ရိအနှစ်သက်ဆုံးပုံစံဖြစ်ပြီး၊ သူ့အသွင်အပြင်နှင့် စရိုက်သည်လည်း နှစ်လိုဖွယ်ကောင်းသည်။ သူသည် ဂေးအသိုင်းအဝိုင်းတွင် အကောင်းဆုံးထဲမှ တစ်ဦးဖြစ်သည်ဟု ဆိုနိုင်၏။

ယခင်ကတည်းက သူ့စိတ်ကူးထဲမှ အမျိုးအစားသည် ရှန့်ချန့်ယန်ကဲ့သို့သောသူဖြစ်သော်လည်း ရှန့်ချန့်ယန်ကဲ့သို့သောသူမျိုးသာဖြစ်သည်။ သူတို့သည် အသက်ပိုကြီးသည်ဖြစ်စေ၊ ငယ်သည်ဖြစ်စေ အရေးမကြီးပေ။ သို့သော် ရှန့်ချန့်ယန်ကိုယ်တိုင်ဆိုလျှင်မူ အလွန်ရင်းနှီးနေသည်ဟု ခံစားရ၏။

နာမည်ကြီးများကို လိုက်ခြင်းသည် ခက်ခဲသောကိစ္စဖြစ်သည်။ နေကိုမြင်ပြီးနောက် မည်သူမျှ အရိပ်ကို သည်းခံနိုင်မည်မဟုတ်သော်လည်း ဟိုင်ရိ၏အမြင်တွင် နေမှလွဲ၍ မည်သူမဆို လက်ခံနိုင်၏။

ဟိုင်ရိသည် ရှန့်ချန့်ယန်အပေါ် ရိုသေကိုးကွယ်သည့် ခံစားချက်များရှိသည်။ သူသည် သူ့ထက်အသက်ငယ်သော ၁၉ နှစ်အရွယ် ထိုကလေးနှင့် မကစားနိုင်ဟု ခံစားရ၏။

ဟိုင်ရိသည် သီချင်းပြန်နားထောင်ချင်စိတ် ပြင်းပြနေသည်။ နားကြပ်တပ်ပြီးနောက် သီချင်းရွေးရန် အချိန်အတော်ကြာ စဉ်းစားပြီးမှ နောက်ဆုံးတွင် <Hope Betrayed> သီချင်းကို ဖွင့်လိုက်၏။ အမျိုးသမီးအသံ၏ အသံမြင့်များကို နားထောင်ရင်း လက်ဖြင့်စည်းချက်လိုက်ခတ်နေသည်။ 

ထို့နောက် ညာဘက်နားရှိ နားကြပ်ကို ရုတ်တရက် ဆွဲထုတ်ခံလိုက်ရ၏။ ရှန့်ချန့်ယန်သည် သူ၏နားကြပ်တစ်ဖက်ကို ပေါ့ပေါ့ဆဆထုတ်ကာ သူပြန်မလှဲမီ ယူထားသည့် နားကြပ်တစ်ဖက်ကို သူ့နားထဲသို့ ထည့်လိုက်သည်။ သီချင်းသံကို ကြားသောအခါ ဟိုင်ရိကို မေးခွန်းထုတ်သကဲ့သို့ မေးခုံးပင့်ကာ ကြည့်လိုက်၏။

သူ့ကို လျစ်လျူရှုပြီး ဟိုင်ရိသည် ဖုန်းကို ငေးကြည့်ရင်း Weibo ကို လှိမ့်ကြည့်နေခဲ့သည်။

ရှန့်ချန့်ယန်သည် ဟိုင်ရိ၏ မျက်နှာပြင်ကို တစ်ချက်ကြည့်လိုက်၏။

ရှန့်ချန့်ယန် : "အောင်မြင်သွားပြီလား"

"မအောင်သေးဘူး"

ဟိုင်ရိက ပြန်ဖြေသည်။

"အရမ်းခက်တယ်"

ဟိုင်ရိ : "အဆင့် ၂၀၀၀ ကျော်ရင်တော့ အဆင့်တွေအောင်တာက ကံပေါ်ပဲ လုံးဝမူတည်တယ်"

ရှန့်ချန့်ယန် : "ကြည့်ရတာ ခင်ဗျားဒီရက်ပိုင်း ကံမကောင်းဘူးထင်တယ်"

"မင်းနားလည်မှုလွဲနေပြီ... ငါတစ်ခါမှ ကံကောင်းခဲ့တာ မဟုတ်ဘူး"

ဟိုင်ရိက ကျော့ရှင်းစွာ ပြန်ဖြေသည်။

"ဒါတွေအားလုံးက ငါပိုက်ဆံဖြုန်းခဲ့လို့"

ဟိုင်ရိသည် ဂိမ်းကစားရင်း ခေါင်းကို ငုံ့ထားသည်။ သူနှုတ်ကျက်ရနေသော သီချင်းစာသားများက သူ့နားထဲတွင် ပဲ့တင်ထပ်နေ၏။ သူ ပေါ့ပေါ့ပါးပါး ပြောလိုက်သည်။

"Jewel of Atlantis အတွက်ဆိုရင် အနည်းဆုံး ရှစ်ထောင်.. တစ်သောင်းလောက် သုံးခဲ့ပြီးပြီ"

( TN : ဟိုင်ရိဆော့နေကြဂိမ်းပါ ၊ အစပိုင်းတွေမှာလည်း ပါပါတယ်နော် )

ရှန့်ချန့်ယန် : ...

ဟိုင်ရိသည် သူ့ကော်လံကို ဆွဲပြီး ရိုက်နှက်ခံချင်စဖွယ် ပုံစံဖြင့် ပြောလိုက်သည်။

"ငါ့မှာ ပိုက်ဆံရှိတယ်"

ရှန့်ချန့်ယန် : "ခင်ဗျားရဲ့ အမှတ်တွေနဲ့ ဘယ်နှစ်ရက်လောက်နေလို့ရဦးမလဲ"

ဟိုင်ရိသည် လေပေါက်သွားသည့် မီးပုံးလို ချက်ချင်းလေလျော့သွားသည်။ သူ၏မျက်လုံးများသည် ရှန့်ချန့်ယန်ကို စိုက်ကြည့်လိုက်ပြီးနောက် သူ့ဖုန်းကို ပြန်ကြည့်ကာ အလျင်အမြန်ရိုက်နေခဲ့၏။

ရှန့်ချန့်ယန်သည် သူ အင်တာနက်ပေါ်တွင် တခြားသူများကို ကျိန်ဆဲနေသည်ဟု မတင်မကျ ခံစားရသဖြင့် သူ့ကိုယ်ကို ဖုန်းမျက်နှာပြင်ဘက်သို့ စောင်းကြည့်လိုက်သည်။

ဟိုင်ရိက သူ၏ဖုန်းမျက်နှာပြင်ကို မသိစိတ်ကနေ ဖွက်ထားရင်း ပြောလိုက်၏။

"ငါ့ကို ကိုယ်ပိုင်လွတ်လပ်ခွင့်ပေးပါဦး"

ရှန့်ချန့်ယန် : "ခင်ဗျားအခုထိ လွတ်လပ်ခွင့်လိုသေးလို့လား"

ရှုပ်ထွေးနေသော ဟိုင်ရိ : ?

ရှန့်ချန့်ယန် : "ခင်ဗျားဖုန်းကို ကျွန်တော်ခဏသုံးပါရစေ''

"ဘာအတွက်လဲ"

ဟိုင်ရိက မေးလိုက်သော်လည်း သူသည် ဖုန်းမျက်နှာပြင်တွင်သုံးနေသော app ၏စာမျက်နှာမှ ထွက်ပြီး ဖုန်းကို သူ့လက်ထဲသို့ ပေးလိုက်သည်။

"မင်းဖုန်းက ဘာဖြစ်လို့လဲ"

ရှန့်ချန့်ယန်သည် ဟိုင်ရိ၏ဘဏ်အကောင့်ကို ဖွင့်ကြည့်ပြီးနောက် သူ၏ ကိုယ်ပိုင်ဖုန်းကိုထုတ်လိုက်ကာ နှစ်ချက်နှိပ်ပြီး ဟိုင်ရိ၏ဖုန်းကို သူ့(ဟိုင်ရိ)ထံပြန်ပစ်ပေးလိုက်သည်။

ဖုန်းသည် ဟိုင်ရိ၏လက်ထဲသို့ ရောက်သည်နှင့် တစ်ပြိုင်နက် ငွေလွှဲခြင်းအကြောင်း အသိပေးသည့် မက်ဆေ့ချ်တစ်ခုကို လက်ခံရရှိ၏။

သူ၏အကောင့်တွင် ပွိုင့်နှစ်ထောင် ထပ်တိုးလာသည်။

ရှန့်ချန့်ယန် : "ကျွန်တော့်ကို ပြန်ဆပ်ဖို့ မမေ့နဲ့"

ဟိုင်ရိ : "ပြန်ဆပ်ရဦးမှာလား"

ရှန့်ချန့်ယန် : "ခင်ဗျားခုနက ဘာတွေတင်ထားလဲဆိုတာ ကျွန်တော်ကြည့်ခွင့်ပေးရင် ပြန်ဆပ်စရာမလိုတော့ဘူး"

"ငါပြန်ဆပ်မှာ" 

ဟိုင်ရိက ပြောသည်။

"အတိုးနဲ့ပေါ့၊ မပူပါနဲ့"

ရှန့်ချန့်ယန်သည် သူ့ပြန်ဆပ်ခြင်းအား မလိုအပ်ခဲ့ပေ။

ခဏအကြာတွင် သူက အမိန့်ပေးသကဲ့သို့ လေသံဖြင့် ပြောလိုက်သည်။

"သီချင်းပြောင်း"

'မင်းသဘောအတိုင်းပေါ့ အဘေးတော်ရာ'

ရှန့်ချန့်ယန်နှင့်ရှိနေသည့်အခါ ဟိုင်ရိသည် အမြဲတမ်း သူ၏ အလိုအတိုင်း လိုက်လုပ်ပေးရ၏။

သူလုပ်နိုင်သည်မှာ ဘာမှမရှိသောကြောင့် မေးရုံသာ တတ်နိုင်သည်။

"ဘာနားထောင်ချင်လဲ"

ရှန့်ချန့်ယန် : "ဘာပဲဖြစ်ဖြစ်"

ဟိုင်ရိသည် <Love for Sale> ကို ဖွင့်လိုက်သည်။

( TN : https://www.youtube.com/watch?v=F-qLR2bFe3Y / အဆိုတော်က မုရုံရှောင်ရှောင် ဖြစ်ပြီး 2009 ခုနှစ်မှာ ထုတ်ခဲ့တဲ့ သီချင်းပါ )

ရှန့်ချန့်ယန် : ...

"မင်းက ဘာပဲဖြစ်ဖြစ် ကောင်းတယ်လို့ပြောတာပဲ၊ ဂီတမှာ 'ကောင်းတာဆိုးတာ' ဆိုတာမရှိဘူး"

ဟိုင်ရိက ချက်ချင်းပြောလိုက်သည်။

"ဒီသီချင်းကို မင်းငယ်ငယ်က တစ်ခါမှ မကြားဖူးဘူးလို့ မပြောနဲ့"

ရှန့်ချန့်ယန် : "ပိုက်ဆံပြန်ပေးရင်ရော ဘယ်လိုလဲ"

ဟိုင်ရိတွင် သီချင်းပြောင်းရန်မှတစ်ပါး အခြားရွေးချယ်စရာမရှိပေ။

စဉ်းစားပြီးနောက် သူ၏နှစ်စဉ်သီချင်းစာရင်း၏ အောက်ဆုံးမှ <Illusion of Love> သီချင်းကို တူးဆွထုတ်လိုက်သည်။

( TN : https://www.youtube.com/watch?v=nnRCSLF9mTM / အဆိုတော် ဝမ်ယာ့ ဆိုထားပြီး 2009ခုနှစ်က ထွက်တဲ့ သီချင်းပါပဲ )

ဝမ်ယာ့က ရင်းနှီးသော သီချင်းစာသားများကို သီဆိုလိုက်သည်။

~ ပြတင်းပေါက်အပြင်ဘက်က ကမ္ဘာကြီးကိုကြည့်ရင်း~

~ ဆူညံပွက်လောရိုက်နေတဲ့ လမ်းမတွေ ~

~ လေနဲ့အတူ လှုပ်ယိမ်းနေတဲ့ တစ်ယောက်တည်းသော အရိပ် ~

ရှန့်ချန့်ယန်တွင် ရှုပ်ထွေးသော အမူအရာတစ်ခုရှိ၏။

ဟိုင်ရိ : "ဘယ်လိုလဲ၊ ကိုယ့်ကောင်ကြီး"

"ခင်ဗျား ကျွန်တော့်ကို ကြိုက်တာလား"

ရှန့်ချန့်ယန်က သူ့ကိုယ်သူ လက်ညှိုးထိုးပြသည်။ သူ့အတွေးများသည် ပြိုလဲလုနီးပါးဖြစ်နေ၏။

"ခင်ဗျား.... ကျွန်တော့်ကို ကြိုက်တာလား"

ဟိုင်ရိ : "မင်းက ငါ့အနုပညာခံစားမှုမှာ ပြဿနာရှိတယ်လို့ ထင်နေတာလား"

ရှန့်ချန့်ယန်သည် အလွန်ယဉ်ကျေးသည်။

"တောင်းပန်ပါတယ်၊ ဒါကို ဆွေးနွေးဖို့တောင် လိုအပ်သေးလို့လား"

ဟိုင်ရိ : "ပေါင်ပေ့၊ မင်း ကောင်းတာဆိုးတာကို အပြည့်အဝ နားမလည်သေးဘူး"

ရှန့်ချန့်ယန်သည် ပြန်လှဲချလိုက်ပြီး chorus အပိုင်း၏ တက်ကြွသောသံစဉ်နှင့် ရိုးရှင်းသောစာသားများကို နားထောင်နေသည်။

~ ငါ့အချစ်က နားမလည်ဘူး ~

~ မင်းဘယ်ကမ္ဘာမှာလဲ ~ 

~ ငြင်းပယ်တာမဟုတ်ရင် ဘာလို့ နှုတ်ဆက်စကားမပြောဘဲ ထွက်သွားရတာလဲ ~

~ ငါသာ ပိုသန်မာခဲ့ရင် ~

~ မင်းကိုဘယ်တော့မှ မလျစ်လျူရှုဘဲ ပိုပြီး သဘောထားကြီးခဲ့ရင် ~

~ ငါတို့အချစ်က ဆုံးခန်းတိုင်မှာလား ~

ရှန့်ချန့်ယန်သည် ဒီလိုလမ်းမပေါ် သီဆိုလေ့ရှိသော သီချင်းမျိုးကို တစ်ခါမှ ကြားဖူးနားထောင်ဖူးခြင်း မရှိခဲ့သော်လည်း သူသည် စည်းချက်အတိုင်း လက်ခုပ်တီးချင်စိတ် ထူးဆန်းစွာ ဖြစ်ပေါ်လာသည်။

ဖြစ်ကောင်းဖြစ်နိုင်သည်မှာ ပတ်ဝန်းကျင်ကြောင့် ဖြစ်နိုင်သည်၊ သို့မဟုတ် ဟိုင်ရိ၏ ပေါ့ပျက်ပျက်နိုင်‌သော သဲပန်းပု ကြောင့် ကူးစက်ခံရခြင်း ဖြစ်နိုင်၏။

( TN : သဲပန်းပု ဆိုတာ ရူးကြောင်ကြောင်နိုင်ပြီး ထူးဆန်းတဲ့ အပြုအမူနဲ့ ဟာသတွေကို ဘန်းစကားအနေနဲ့ သုံးတာပါ )

ရှန့်ချန့်ယန် : ...

ဟိုင်ရိ : "မဆိုးပါဘူးနော်.. နားထောင်ရတာ တော်တော်ကောင်းတယ်"

ရှန့်ချန့်ယန် စကားမပြောနိုင်ဖြစ်သွားသည်။

ဟိုင်ရိကလည်း နှစ်ကြောင်းဆိုလိုက်၏။ ရှန့်ချန့်ယန်သည် သူညည်းလိုက်သော ထိုနှစ်ကြောင်းကြောင့် အံ့အားသင့်သွားသည်။

"ခင်ဗျား ကီးမကြောင်သွားဘူးပဲ"

ဟိုင်ရိ : "လုပ်စမ်းပါ ကောင်းကောင်းဆိုးဆိုးလေ၊ ကောကောက မွန်ဂိုလူမျိုးပဲ"

"ဒါက ကျွန်တော့်စိတ်ထဲကနေ အမြဲတမ်း မေ့သွားတယ်"

ရှန့်ချန့်ယန်က ပြောသည်။

"ခင်ဗျားရဲ့အနုပညာခံစားမှုကို ကြည့်ရတာ ခင်ဗျားသီချင်းဆိုနိုင်တယ်လို့ တကယ်မပြောနိုင်ဘူး"

ဟိုင်ရိ : "ငါက ခံစားမှုမကောင်းတာမဟုတ်ဘူး၊ ငါက ဘယ်အပိုင်းကိုမဆို ကိုင်တွယ်နိုင်တယ်၊ ငါက ခံနိုင်ရည်အားကောင်းတယ်လေ"

ရှန့်ချန့်ယန် : "ဒါဆို ကျွန်တော်က ဘယ်အပိုင်းမှာရှိလဲ"

...

ဟိုင်ရိ : "ဒီလမ်းအတိုင်း တကယ် ဆက်သွားရမှာလား"

ရှန့်ချန့်ယန် ရယ်မောလိုက်ပြီး သူ့ကို အလွယ်တကူ လွှတ်ပေးလိုက်သည်။

ဟိုင်ရိ ဘာပြောနိုင်မှာလဲ။

သူဘာလို့ ရှန့်ချန့်ယန်ကို အဲဒီလောက်ကြိုက်လဲဆိုတာ သူကိုယ်တိုင်မသိဘူး။ သူနာမည်ကြီးတွေကို ဘယ်တုန်းကမှ မလိုက်ဖူးသလို သူစိမ်းတစ်ယောက်ကို ဘယ်လိုများ ဒီလောက် အသိဉာဏ်မဲ့စွာ နှစ်သက်နိုင်လဲဆိုတာ နားမလည်ခဲ့ဘူး။

ဒါပေမယ့် ဖြစ်ပျက်ခဲ့တာကို ကြည့်ပါဦး၊ ခံစားချက်တွေ ဝင်လာပြီး ဘာပဲဖြစ်ဖြစ် ထိန်းချုပ်လို့မရခဲ့ဘူး။

မိုးရွာမလို မိုးအုံ့လာခြင်းဖြစ်စေ ဟိုင်ရိက မိခင်တစ်ယောက်ဖြစ်လာခြင်းဖြစ်စေ ဘယ်အရာကိုမှ ထိန်းချုပ်ထားနိုင်ခဲ့ခြင်း မရှိပေ။

ဟိုင်ရိက ဒါဟာ သူ့အနုပညာခံစားမှုနှင့် ဘာမှမဆိုင်ဟု စိတ်ထဲကနေ တွေးလိုက်သည်။ 

'တိတိ၊ ဒါက ဗီဇပဲ၊ သန့်ရှင်းပြီး ရိုးရှင်းတယ်'

ဟိုင်ရိဖုန်းထဲတွင် တကယ်တမ်း သီချင်းများစွာရှိသည်။ သူသည် ရှန့်ချန့်ယန်ကို ဖျော်ဖြေရန်အတွက် ပိုစိတ်ဝင်စားစရာကောင်းသည့် သီချင်းများကို ရည်ရွယ်ချက်ရှိရှိ ဖွင့်ထားခြင်းသာဖြစ်၏။

ခဏအကြာ ရှန့်ချန့်ယန် အိပ်ပျော်လုနီးပါးဖြစ်ချိန်တွင် သူသည် သီချင်းကို ပေါ့ပေါ့ပါးပါးတစ်ခုသို့ ပြောင်းလိုက်ပြီး သူ့ကိုယ်သူ အိပ်ရန်ပြင်ဆင်ရင်း မျက်လုံးများကိုမှိတ်လိုက်သည်။

ကားထဲရှိလေသည် မှိုင်းတိုက်ကာ စိုစွတ်နေ၏။ နေရောင်ခြည်သည် ပြတင်းပေါက်များကို ထိုးဖောက်ဝင်ရောက်လာပြီး အရေပြားကို လောင်ကျွမ်းစေသည်။ ခဏတာမျှ လေအေးပေးစက်သံနှင့် နောက်ဘက်မှ ပေါက်ပေါက်ထုပ်များ ဆွဲဖြဲစားနေသူတို့၏ အသံသာ ကြားရ၏။ ဟိုင်ရိ အိပ်ပျော်သွားသည်။

သူ့စိတ်ထဲတွင် တီးတိုးသံတစ်ခုရှိနေသည်။ သူအိပ်မက်မက်နေသည်ဟု ထင်ရ၏။ ရှန့်ချန့်ယန် Variety Show ပြီးဆုံးသည့်ညတွင် သူသည် မြင့်မားသောအဆောက်အအုံ၏ မှန်တံခါးများမှ ထွက်လာသည်။ သူ့ဆံပင်က အနီရောင်ဖျော့ဖျော့နှင့် သူ့လက်ထောက်က သူ့နောက်မှ ကပ်လိုက်ပါလာသည်။

သူ့ကိုမြင်သည်နှင့် ပရိသတ်များသည် အော်ဟစ်ကြွေးကြော်ကြပြီး အခြားအနုပညာရှင်များ၏ ပရိသတ်များလည်း ထိုနည်းတူပင်။

သူပြုံးပြီး ပရိသတ်များကို လက်ပြနှုတ်ဆက်၏။

ဟိုင်ရိသည် သူ၏ Variety Show ကို ကြည့်ပြီးနောက် နေရာမှ ထွက်ခွာလာခဲ့သည်။ ရှန့်ချန့်ယန်၏ စိတ်အခြေအနေသည် သိပ်မကောင်းဘူးဟု သူခံစားရ၏။

သူသည် အဝေးမှနေ၍ သူ့ကိုကြည့်ပြီး ဆေးပြင်းလိပ်တစ်လိပ် မီးညှိကာ လက်ချောင်းများဖြင့် ညှပ်ထားရင်း ပြာများကို သစ်ပင်ပေါ်သို့ ခါချလိုက်သည်။ သူသည် သူ့ဖုန်းကို မြှောက်ပြီး မိန်းကလေးငယ်လေးများလို ပုံတစ်ပုံ ရိုက်လိုက်၏။

ရှန့်ချန့်ယန်သည် သူပရိုဂရမ်ရိုက်ကူးခဲ့သည့် အနုပညာရှင်များကို နှုတ်ဆက်လက်ပြလိုက်သည်။ သူ့ကျောပေါ်တွင် 88 key electronic keyboard နှင့်အတူ နောက်လှည့်မကြည့်ဘဲ လက်ကို ဝှေ့ယမ်းရင်း ရှေ့သို့တည့်တည့်သွားနေသည်။ လမ်းမီးတိုင်များအောက်တွင် သူ၏ဆံပင်နီနီသည် မီးတောက်နေသည့် မီးတောက်များကဲ့သို့ ထင်ရ၏။

ဟိုင်ရိသည် ရည်ရွယ်ချက်ရှိရှိ လာခဲ့ခြင်းမဟုတ်ပေ။ သူသည် ခရီးထွက်ချင်သည့် စိတ်ကူးရှိနေချိန်ဖြစ်ပြီး ရှန့်ချန့်ယန်ကလည်း ပရိုဂရမ်တစ်ခုအတွက် ပေကျင်းသို့ ရောက်နေသဖြင့် သူလည်း ပျော်ရွှင်ဖို့အတွက် လိုက်လာခြင်းဖြစ်သည်။ ထို့အပြင် မလာလို့မဖြစ်ဘူးဟု အမြဲခံစားနေခဲ့ရ၏။

သူ့နောက်တွင် ပရိသတ်အချို့က လိုက်ပါနေဆဲဖြစ်သည်။ ရှန့်ချန့်ယန် လှည့်ကြည့်လိုက်ပြီး ရပ်တန့်လိုက်၏။ သူ့နာရီကို ကြည့်ရင်း

"တော်တော်နောက်ကျနေပြီ၊ ပြန်ကြတော့"

မိန်းကလေးအချို့က အော်လိုက်ကြသည်။

"မင်းကို ငါတို့အားပေးနေတယ်နော် ယန်ယန်"

ယန်ယန် ဟူသည်မှာ ရှန့်ချန့်ယန်ကို ဂရုစိုက်ရတာကြိုက်သည့် ပရိသတ်များက ခေါ်ဆိုသော အမည်ဖြစ်၏။ သူ့လို ခန့်ညားသော လူချောကြီးသည် မားမားပရိတ်သတ်များအဖွဲ့ကို ဆွဲဆောင်ခဲ့သည်။

သူ ပိုမိုဆိုးရွားလေလေ၊ သူတို့က မိခင်များ ပိုဖြစ်လာလေလေဖြစ်သည်။ သူတို့ မိခင်များ ပိုဖြစ်လာလေလေ၊ သူတို့၏သားက ပိုမိုဆိုးရွားသည်ဟု သူတို့ခံစားရလေလေဖြစ်ပြီး ဆိုးဝါးခြင်း သံသရာလည်နေ၏။

ရှန့်ချန့်ယန်၏ အဖြေကို ပေါ့ပေါ့ပါးပါး ပြောလိုက်သည်။

"ရပြီ၊ ပြန်ကြတော့"

သို့သော် ပရိသတ်များက ထွက်ခွာရန် ငြင်းဆန်နေဆဲဖြစ်သည်။ ဟိုင်ရိသည် ဆေးလိပ်ငွေ့ကို ရှူသွင်းလိုက်ပြီး အဆုတ်ထဲသို့ ဆေးငွေ့ကို ဆွဲသွင်းကာ နောက်မှ ထွေးထုတ်လိုက်၏။

လမ်းဘေးတွင် ရပ်ထားသော ကားတစ်စီးကို မှီရင်း သူ၏ဖုန်းကို လှိမ့်ကြည့်နေသည်။ ကံကောင်းထောက်မစွာပင် တစ်စုံတစ်ဦးက သူ၏အွန်လိုင်းမှတ်ချက်ကို ပြန်ဖြေထားသည်ကို သတိပြုမိလိုက်သည်။

ဖြစ်နိုင်သည်မှာ ရှန့်ချန့်ယန်နှင့် သူ၏ပရိသတ်များကို ဆဲဆိုသည့် စာသားများ ဖြစ်နိုင်၏။

ဟိုင်ရိသည် ထိုစဉ်က အမှန်တကယ် စိတ်ဆိုးဒေါသထွက်ခဲ့သည်။ သူသည် ဤကလေးစုတ်တစ်ယောက်အတွက်နှင့် ဘာကြောင့် ထိုမျှလောက် စိတ်ဆိုးဒေါသထွက်ပြီး အချိန်နှင့် စွမ်းအင်များစွာ သုံးစွဲနေရသလဲ။

သို့သော် မည်သည့်အရာမှ ပြောင်းလဲနိုင်ခြင်းမရှိသည်ကို နားမလည်နိုင်ခဲ့ပေ။ သူ၏မိသားစုတွင် ပိုက်ဆံရှိ၏။ သူ၏ဘဝသည် ချမ်းသာကြွယ်ဝပြီး သူ၏မိခင်၏ မွန်ဂိုသွေးကို အမွေဆက်ခံထားကာ ကပြားလူသားတစ်ဦးနှင့် အလွန်တူသည်။

သူ၏ဘဝတွင် ကပြားတစ်ဦးအနေဖြင့် ရှုံးနိမ့်ခြင်းကို မကြုံဖူးဟု ဆိုနိုင်၏။ သို့သော် သူ၏ Idol ကို စိတ်အားထက်သန်စွာ လိုက်သောအခါ သူ၏စိတ်ဓာတ်သည် လုံးဝယိမ်းယိုင်သွားသည်။

ဟိုင်ရိသည် ဤ နေအလင်းရောင် များကို လက်တွေ့ဘဝတွင် တွေ့ဆုံပြီး မွန်ဂိုလူမျိုးတစ်ယောက်က ဘယ်လိုလဲဆိုတာကို သူတို့အား ခံစားစေချင်၏။

( TN : နေအလင်းရောင်ဆိုတာ အင်တာနက်ပေါ်က ဆယ်လီတွေကို ခေါ်တဲ့ ဘန်းစကားပါ )

ရှန့်ချန့်ယန်၏ ပရိသတ်များက ထွက်ခွာရန် ငြင်းဆန်ခဲ့ကြသဖြင့် သူ၏လက်ထောက်က သူ့ကို လမ်းလျှောက်ခြင်းကို ရပ်ပြီး ဟိုတယ်သို့ ကားဖြင့်ပြန်ရန် တိုက်တွန်းခဲ့သည်။ ရှန့်ချန့်ယန် တစ်ဖန်ရပ်တန့်လိုက်ပြီး သူ၏ပရိသတ်များကို အလေးအနက်ထား ပြောလိုက်၏။ 

"အိမ်ပြန်ကြတော့၊ နောက်ကျနေပြီ... ဒီလောက်နောက်ကျတဲ့အချိန်မှာ မိန်းကလေးတွေအပြင်မှာ ရှိနေတာက မလုံခြုံဘူး"

ပရိသတ်များ မျက်ရည်ကျကာ ပို၍ပင် ဆက်နေရန် ဆုံးဖြတ်ခဲ့ကြသည်။

ရှန့်ချန့်ယန်သည် အနည်းငယ် အကူအညီမဲ့နေပုံရ၏။ လမ်းမီးတိုင်များအောက်တွင် ရပ်နေရင်း သူသည် သူ၏ဆံပင်ကို ပွတ်သပ်လိုက်သည်။ ပရိသတ်များသည် ဖုန်းများကို မြှောက်ကိုင်ထားပြီး သူ့ကို စောစောပြန်အိပ်ရန် တောင်းပန်နေကြ၏။

ဟိုင်ရိ ခဏမျှကြည့်နေပြီးမှ သူ၏ဆေးပြင်းလိပ်ကို ပစ်ချကာ ထွက်ခွာသွားသည်။

ဟိုင်ရိ ရှိုးပွဲတက်ရောက်ခဲ့သည့်နေ့တွင် ရှန့်ချန့်ယန်သည် သူ၏ erhu ဖြင့် <Iridescent Clouds Chasing the Moon> ကို တီးခတ်ခဲ့သည်။ ဟိုင်ရိသည် ပြန်ရောက်ပြီးနောက် ဤ erhu သံစဉ်ကို ရှာဖွေခဲ့၏။ နားထောင်ပြီးနောက် ရှန့်ချန့်ယန်သည် အလွန်ကောင်းမွန်စွာ တီးခတ်ခဲ့သည်ဟု သူခံစားရသည်။ သူသည် ပေါ့ပေါ့တန်တန် သဘောမထားခဲ့ပေ။

( TN : https://www.youtube.com/watch?v=lnS2SSUsdS8 )

🌟🌟🌟