အပိုင်း ၂၁၂ ( Demon Sect Leader 14 )

ကျူးလျန်ယင်းသည် သူ့ထင်ကြေးမှာ အနည်းငယ် မယုံချင်စရာကောင်းသည်ဟု ခံစားရသော်ငြား လက်တွေ့ဟာ သူ့ရှေ့တွင် ရောက်ရှိနေပြီဖြစ်သည်။ 

စဥ်းစားကြည့်ပြီးနောက် ဤညတွင် သူသည် သိုင်းပညာရှင်များကို ခေါ်ဆောင်လာကာ ယန်စံအိမ်ကို တိတ်တဆိတ် ချဥ်းကပ်၍ ဝန်းရံလိုက်သည်။ 

စံအိမ်မှာ ကြီးမားပြီး တိတ်ဆိတ်ပုံရသော်လည်း သူတို့ ချဥ်းကပ်လိုက်သည်နှင့်တပြိုင်နက် သူတို့ ယခင်က တစ်ခါမှ မကြားဖူးခဲ့သည့် အထူးအချက်ပေးအသံဟု ထင်ရသော အသံတစ်သံ ထွက်ပေါ်လာခဲ့သည်။  

တစ်ချိန်တည်းတွင် အနက်ရောင်အဝတ်အစားများနှင့် မျက်နှာဖုံးများ ဝတ်ဆင်ထားသော လူဆယ့်နှစ်ဦးကျော်က ဤအိမ်၏ နံရံပေါ်တွင် ရုတ်တရက် ပေါ်လာကြသည် — ယန်ကျင်းဇီသည် အရိပ်သက်တော်စောင့်များကို အနက်ရောင်အဝတ်အစားများ မဝတ်စေလိုသော်ငြား ဤအရိပ်သက်တော်စောင့်များက ဝတ်ဆင်ရသည်ကို နှစ်သက်သည်။ ညကင်းစောင့်ချိန်တွင် သူတို့သည် ယခင်ကကဲ့သို့ မျက်နှာဖုံးများကို တပ်ဆင်ထားမည်ဖြစ်သည်။

ဤလူဆယ့်နှစ်ဦးကျော်၏ အပြုအမူများက တိတ်ဆိတ်ကာ တူညီပြီး သူတို့၏ အင်အားမှာ မဆိုးရွားမှန်း သိသာ၏။ သူတို့ကို တွေ့ရသော် ကျူးလျန်ယင်း၏ ပထမဆုံး တုံ့ပြန်မှုမှာ ဤလူများဟာ အရိပ်သက်တော်စောင့်များဟုပင်။ 

“ သူတို့က နတ်ဆိုးဂိုဏ်းခေါင်းဆောင်ရဲ့ အရိပ်သက်တော်စောင့်တွေပဲ။ “ လက်ဝဲရံက ပြောသည်။ 

လက်ဝဲရံသည် အစောပိုင်းနှစ်များတွင် ထိခိုက်ဒဏ်ရာ ရခဲ့ပြီး သူ့ရုပ်ရည်မှာ ဖျက်ဆီးခံခဲ့ရကာ သူ့အသံမှာ ကြမ်းတမ်းနေသည်။ ဤအခိုက်အတန့်တွင် သူသည် တစ်ဖက်ခြမ်းသို့ မျက်နှာချင်းဆိုင် ကြည့်ကာ သူ့မျက်လုံးများမှာ အေးစက်စွာ အလင်းဖြတ်သွားသည် : “ နတ်ဆိုးဂိုဏ်းခေါင်းဆောင်တွေရဲ့ နတ်ဆိုးဂိုဏ်းခေါင်းဆောင်ရဲ့ အရိပ်သက်တော်စောင့်တွေက အရင်နတ်ဆိုးဂိုဏ်းခေါင်းဆောင်တွေရဲ့ သီးသန့်အစောင့်တွေပဲ။ ရက်စက်တဲ့ နည်းလမ်းတွေနဲ့ လေ့ကျင့်ပေးခံထားရတယ်။ သူတို့က သူတို့ရဲ့ လူသားဆန်မှုကို ဆုံးရှုံးထားပြီး စကားမပြောကြဘဲ သေမှာကို မကြောက်တဲ့အပြင် ရက်စက်ကြမ်းကြုတ်တဲ့ ခွေးတွေနဲ့ ဘာမှမကွာခြားဘူး… မဟုတ်ဘူး၊ သူတို့က ခွေးလောက်တောင် မကောင်းဘူး။ သူတို့က ရှင်လျက်နဲ့ သေနေတဲ့ လူတစ်စုပဲ။ ”

လက်ဝဲရံ၏ စကားများမှာ သိုင်းပညာရှင်များ အားလုံးအတွက် ရည်ရွယ်ပြီး သူ့အသံမှာ မတိုးဘဲ သဘာဝကျစွာပင် အရိပ်သက်တော်စောင့်များသည်လည်း ကြားသည်။

ထို့ကြောင့် သူ့အသံ ထွက်လာပြီးသည်နှင့်တပြိုင်နက် ခြံစည်းရိုးအပေါ်မှ အရိပ်သက်တော်စောင့်တစ်ဦးက ပြောသည် : “ သောက်ကျိုးနည်း လူအိုကြီး။ မင်းက ခွေးထက် ပိုဆိုးတယ်။ မင်းကမှ ရှင်လျက်နဲ့သေနေတာ! ”

အရိပ်သက်တော်စောင့် အများစုသည် စကားပြောရသည်ကို မနှစ်သက်သော်ငြား တိုက်ဆိုင်စွာပင် ယနေ့ည ကင်းစောင့်သော အရိပ်သက်တော်စောင့်များအနက် စကားပြောရသည်ကို အရမ်းသဘောကျသည့် တစ်ဦး ရှိနေခဲ့သည်။ 

သူ ဤသို့ပြောသောအခါ အခြားအရိပ်သက်တော်စောင့်များကလည်း လက်ဝဲရံကို စိုက်ကြည့်ကြသည် : “ သစ္စာဖောက်! ” 

“ နောက်လိုက်ခွေး! ”

“ ခွေးမသား ”

…

သိုင်းပညာရှင်များ : “ ... ” ဒီလူတွေက ဘယ်နားများမှာ ရှင်လျက်နဲ့သေနေတဲ့ပုံပေါ်လဲ? ပြီးတော့ လူသားဆန်မှုကို ဆုံးရှုံးထားပြီး စကားမပြောနိုင်တာက ဘယ်မှာလဲ? ဒါက အတော်လေး လျှာစောင်းထက်နေပြီမဟုတ်လား? 

လက်ဝဲရံသည်လည်း ဤအရိပ်သက်တော်စောင့်များ၏ စကားများကို ကြားရသောအခါ ထိတ်လန့်အံ့အားသင့်သွားသည်။ 

သူသည် နတ်ဆိုးဂိုဏ်းတွင် နှစ်ပေါင်းများစွာ ပုန်းခိုနေခဲ့ပြီး အရိပ်သက်တော်စောင့်များကို တိတ်တဆိတ် ဆက်သွယ်ခဲ့ဖူးကာ အစောပိုင်းနှစ်များတွင် အရိပ်သက်တော်စောင့်တစ်ဦးကိုပင် ဖမ်းဆီးကာ ပြင်းပြင်းထန်ထန် နှိပ်စက်ခဲ့ဖူးသည်… အရိပ်သက်တော်စောင့်တွေက ဒီလိုမဖြစ်သင့်ဘူး! 

ဒီလူတွေက တကယ်ပဲ အရိပ်သက်တော်စောင့်တွေလား?

ကျူးလျန်ယင်းသည် လက်ဝဲရံကို လှမ်းကြည့်ပြီး သူ၏အတွင်းအားကို ထုတ်ကာ ကျယ်လောင်စွာ ပြောလိုက်သည် : “ နတ်ဆိုးဂိုဏ်းက နတ်ဆိုးတွေ၊ ထွက်လာပြီး အသေခံကြစမ်း! ”

နတ်ဆိုးဂိုဏ်းခေါင်းဆောင် ဝယ်ယူထားသော အိမ်မှာ အတော်လေး ချောင်ကျသော နေရာတွင် တည်ရှိပြီး သူ့ဘေးရှိ အိမ်မှာလည်း လွတ်နေသေးသည်... သူသည် ထိုစံအိမ်အလွတ်၏ ခေါင်မိုးပေါ်သို့ ညင်သာစွာ ခုန်တက်ကာ အရိပ်သက်တော်စောင့်များကို လေးနက်စွာ ကြည့်လိုက်သည်။ 

တစ်ချိန်တည်းတွင် လျိုကျိချင်းနှင့် လက်ဝဲရံ၊ သိုင်းပညာရှင်များစွာသည် ကိုယ်ဖော့သိုင်းကို အသုံးပြု၍ ခေါင်မိုးပေါ်သို့ တက်ခဲ့ကြပြီး ဆယ်ဦး သို့မဟုတ် ထိုထက်ပိုသော အရိပ်သက်တော်စောင့်များကို ငုံ့ကြည့်နေလေသည်။ ယခုအခါ ရာချီသော သိုင်းပညာရှင်များသည် စံအိမ်ကို ဝန်းရံပြီးဖြစ်သည်။ 

လက်ဝဲရံသည် စိတ်တည်ငြိမ်သွားပြီးနောက် ပြောလိုက်သည် : “ အရိပ်သက်တော်စောင့်တွေကို လေ့ကျင့်ပေးဖို့ အချိန်နဲ့ အားစိုက်ထုတ်မှုတွေ လိုတယ်။ နတ်ဆိုးဂိုဏ်းခေါင်းဆောင်တိုင်းရဲ့ အနားမှာ အရိပ်သက်တော်စောင့်တွေ နှစ်ဆယ်၊ သုံးဆယ်နီးပါးလောက် ရှိတယ်… ” 

သို့သော်လည်း သူ့စကားပြီးသွားသည်နှင့်တပြိုင်နက် လူခြောက်ဆယ် သို့မဟုတ် လူခုနစ်ဆယ်က သူ့ရှေ့ရှိ စံအိမ်ထဲမှ ရုတ်တရက် ခုန်ထွက်လာကာ အားလုံးက ပင်မအိမ်၏ ခေါင်မိုးပေါ်သို့ ခုန်တက်လာကြသည်။ 

သိုင်းပညာရှင်များ : “ ... ” အရိပ်သက်တော်စောင့်တွေ နှစ်ဆယ်၊ သုံးဆယ်ပဲ ရှိတယ်လို့ မင်း မပြောခဲ့ဘူးလား? သူတို့က အယောက်ရှစ်ဆယ်တောင်!

လက်ဝဲရံ : “...ဒီခေါင်းဆောင်ရဲ့ အင်အားက နိမ့်တော့ သူ့နားက အရိပ်သက်တော်စောင့်အရေအတွက်က အရင်ခေါင်းဆောင်ထက် အများကြီး ကျော်တယ်! ” 

ဤအခိုက်အတန့်တွင် အမျိုးသားတစ်ဦးက ပင်မအိမ်ထဲမှ လမ်းလျှောက်ထွက်လာသည်။ 

ဤလူက ခေါင်မိုးပေါ်သို့ မခုန်ဘဲ လက်ဝဲရံ ရှိရာသို့သာ တိကျစွာ ကြည့်နေသည် : “ လက်ဝဲရံလား? ငါက မင်းအသက်ကို ချမ်းသာပေးတဲ့ထိ ကြင်နာခဲ့ပေမယ့် မင်းက ငါ့ဆီလာရဲမယ်လို့ မထင်ထားဘူး။ ” 

ဤလူ၏ အသံမှာ မကျယ်လောင်သော်ငြား အသံက ရှင်းလင်းပြတ်သားစွာ ပျံ့နှံ့လာပြီး လူတိုင်း၏ နားထဲတွင် ကျယ်လောင်စွာ ကြားလိုက်ရစေသည်။

ဤနေရာရှိ သိုင်းပညာရှင်အများအပြားသည် ဤအသံကြောင့် သူတို့၏ အတွင်းအားဟာ ရှုပ်ထွေးသွားသည်ဟု ခံစားလိုက်ရသည်။ ကျန်လူများမှာ ခွန်အားနည်းသူများ ဖြစ်ကြပြီး သူတို့သည် ဤအသံကို ကြားရသောအခါ တစ်ကိုယ်လုံး တုန်ယင်သွားကြကာ အတွင်းဒဏ်ရာအချို့ကို အမှန်တကယ် ရရှိခံစားခဲ့ကြရသည်။

ဤသိုင်းကွက်မှာ ရှောင်လင်၏ အံ့ဖွယ်သိုင်းကျမ်း၊ ခြင်္သေ့ဟိန်းသံနှင့် ယှဉ်နိုင်သည်။

မဟုတ်ဘူး၊ ဤသည်က ခြင်္သေ့ဟိန်းသံထက် ပိုမိုအစွမ်းထက်သည်။ ခြင်္သေ့ဟိန်းသံဟာ ကြီးမားသော စွမ်းအင်ကို ဦးစွာ ဖွဲ့စည်းပြီးမှ ကျယ်လောင်စွာ ဟစ်အော်ထုတ်ရမည်ဖြစ်သည်။ သူတို့ရှေ့မှ နတ်ဆိုးဂိုဏ်းခေါင်းဆောင်က အေးအေးလူလူ စကားပြောနေသကဲ့သို့ပင် ရိုးရှင်းတည်ငြိမ်နေလေသည်။

ဘာပဲဖြစ်ဖြစ် သူ၏ ဤသို့လုပ်နိုင်သော အရည်အချင်းမှာ သူ့အင်အားကို သက်သေပြရန် လုံလောက်သည်။

သိုင်းပညာရှင်အားလုံးသည် လက်ဝဲရံကို ကြည့်လိုက်ကြသည် — ဤနတ်ဆိုးဂိုဏ်း၏ ကာကွယ်စောင့်ရှောက်သူဟောင်းက နတ်ဆိုးဂိုဏ်းခေါင်းဆောင်ဟာ အားနည်းသည်ဟု အမှန်တကယ် ပြောခဲ့သည်။ ဒီအတွင်းသား... ဒါကို အားနည်းတယ်လို့ ခေါ်တာလား?  

ဒါက အားနည်းရင် သူတို့က ဘာတွေလဲ?

ထိုသိုင်းပညာရှင်များမှာ ဆွံ့အသွားကြသည်။

အကယ်၍ လက်ဝဲရံသာ ရုပ်အဆင်း ပျက်စီးပြီး သူ့မျက်နှာကို မပြောင်းနိုင်သောကြောင့် မဟုတ်လျှင် ဤအချိန်တွင် သူ့မျက်နှာမှာ သေချာပေါက် အရုပ်ဆိုးနေလိမ့်မည်ပင်။

ယခင်နှစ်တွင် သူနှင့် လက်ယာရံတို့သည် သေးငယ်သော လှုပ်ရှားမှုများစွာကို ပြုလုပ်ခဲ့ကြသည်။ သဘာဝကျစွာပင် အရိပ်သက်တော်စောင့်များ ရှိသော ခေါင်းဆောင်ဟာ သိနေနိုင်သော်ငြား ဤလူက ဘာမှမလုပ်ခဲ့ချေ။ သူက အရိပ်သက်တော်စောင့်များ အုပ်စုကြီးနှင့် တနေကုန် နေထိုင်ပြီး အထူးကြောက်တတ်သော အပြုအမူဖြင့် ပြုမူနေခဲ့သည်။

သူသည် ထိုအချိန်တွင် ဤလူ၏ အင်အားမှာ လုံးဝ မသန်မာကြောင်း ခံစားခဲ့ရသည်။

ယခုမူကား... ဤလူ၏ အတွင်းအားမှာ သူနှင့်ပင် အမှန်တကယ် ယှဉ်ပြိုင်နိုင်နေသည်။

ယန်ရှိူ့၏ လက်ရှိအင်အားမှာ လက်ဝဲရံနှင့် ယှဉ်ပြိုင်နိုင်သည်မှာ မှန်ကန်၏။

လွန်ခဲ့သော တစ်နှစ်ကျော်က သူ၏ အင်အားမှာ မဆိုးခဲ့သော်လည်း လက်ဝဲရံနှင့် မယှဉ်နိုင်ချေ။ အကယ်၍ အရိပ်သက်တော်စောင့်များကသာ လက်ဝဲရံကို အနိုင်တိုက်ချင်လျှင် ယန်ရှိူ့အပြင် အနည်းဆုံး လူငါးဦးတော့ လိုအပ်မည်ဖြစ်သည်။

သို့သော်ငြား ပြီးခဲ့သော နှစ်အတွင်းတွင် သူတို့၏သခင်က သူကိုယ်တိုင်၌ အတွင်းအား မရှိတော့သည့်အခါတွင်ပင် သူတို့ကို သိုင်းပညာများ မရမက ညွှန်ကြားသင်ပြပေးခဲ့သည်။ မည်သို့ပင်ဖြစ်စေ သူတို့အားလုံး၏ အင်အားမှာ တိုးတက်လာခဲ့၏။

အမြန်ဆုံး အင်အားတိုးလာသူမှာ ယန်ရှိူ့ဖြစ်မှန်း သံသယဖြစ်စရာမလိုချေ — ယန်ကျင်းဇီက သူနှင့် တနေကုန် အတူရှိနေပြီး သူ့ကို အများဆုံး လမ်းညွှန်မှုပေးခဲ့သည်။ ယန်ရှိူ့ကလည်း လုံလုံလောက်လောက် အလုပ်ကြိုးစားခဲ့ပေသည်။

“ နတ်ဆိုးဂိုဏ်းက နတ်ဆိုး၊ မင်းက ကြီးကြီးကျယ်ကျယ် ‌စကားပြောရဲနေသေးတယ်! ဒီနေ့ ငါ ကောင်းကင်ဘုံရဲ့ဆန္ဒအတိုင်း မင်းကို သတ်ပစ်မယ်! ” ကျူးလျန်ယင်းက ကျယ်လောင်စွာ ပြောခဲ့သည်။

ယန်ရှိူ့၏အကြည့်မှာ လက်ဝဲရံထံမှ ဖယ်ကာ ကျူးလျန်ယင်းပေါ်သို့ ကျရောက်သွားပြီး သူသည် ကျူးလျန်ယင်းဘေးရှိ လျိုကျိချင်းကိုလည်း တွေ့သွားသည်။

သူ၏ မျက်လုံးများမှာ အနည်းငယ် ကျဉ်းမြောင်းသွားပြီး သူ့နှလုံးသားထဲတွင် ဟုန်းခနဲ ဒေါသထွက်လာသည်။

တစ်ခါတရံတွင် သူသည် ဤလူနှစ်ဦးကို သူ ကျေးဇူးတင်သင့်သည်ဟု ခံစားရသည်။ ဤလူနှစ်ဦးကြောင့်သာ မဟုတ်လျှင် သူ့သခင်က ရုတ်တရက်ကြီး အလွန်ကောင်းလာလိမ့်မည်မဟုတ်ချေ။

သို့ရာတွင် သူ လျိုကျိချင်းကို မုန်းလည်း မုန်းတီးသည်။

ဘာလို့ ဒီလူကို သူ့သခင်က ချစ်နိုင်ပြီး သူကျတော့ ဘာမှမရနိုင်တာလဲ?

သူ့ကို သူ့သခင်က အခြားသူများနှင့် ကွဲပြားစွာ ဆက်ဆံပေးသည်မှာလည်း... သူက လျိုကျိချင်းနှင့် ရုပ်ဆင်သောကြောင့် ဖြစ်သည်။

လျိုကျိချင်း သေသွားရင် သခင်က သူတစ်ယောက်တည်းရဲ့ အပိုင် ဖြစ်လာမှာလား?

သေချာတာပေါ့၊ ယခု အရေးကြီးဆုံးကိစ္စမှာ လျိုကျိချင်းကို မုန်းတီးရန် သို့မဟုတ် လျိုကျိချင်းကို သတ်ရန်တို့ မဟုတ်ပေ... သခင် ထွက်ပြေးလွတ်မြောက်နိုင်ရန် သူ အချိန်ဆွဲထားပေးချင်သည်။

ယန်ရှိူ့ လှောင်ရယ်လိုက်သည် : “ ငါ့ကို သတ်ချင်တာလား? အဲ့လောက်မလွယ်ဘူး! ”

ကျူးလျန်ယင်းကို စကားပြောနေစဉ် ယန်ရှိူ့သည် သူ့အနားရှိ လူများကို စောင့်ကြည့်နေခဲ့သည်။

စံအိမ်ကို လူဝိုင်းထားကြောင်း သူ ပထမဆုံး ကြားသိရချိန်တွင် သူသည် ထွက်မပြေးချင်ခဲ့ဘဲ တံခါးဝသို့ လာပြီး သူနှင့် သူ့သခင်၏ အေးချမ်းသော ဘဝကို နှောင့်ယှက်သူအားလုံးကို သတ်ပစ်ချင်ခဲ့၏။

သို့သော် မကြာမီပင် သူသည် သူ ဤလူအားလုံးကို မသတ်နိုင်ကြောင်း သဘောပေါက်သွားရသည်။

ဤနေရာတွင် လူအရမ်းများနေပြီး သူတို့က အလွန်သန်မာကြသည်။ သူတို့ဟာ သူတို့၏ ပြိုင်ဘက်များ မဟုတ်ပေ။

ကံကောင်းစွာဖြင့် ဤနေရာတွင် ငရဲတောင်တန်းကဲ့သို့ လျှို့ဝှက်လမ်းကြောင်း ရှိသည်။ 

သူသည် သူ့လက်အောက်ရှိ အရိပ်သက်တော်စောင့်များနှင့် ဆွေးနွေးပြီးဖြစ်သည်။ သူသည် ဤလူများကို အချိန်ဆွဲရန် တာဝန်ရှိပြီး အရိပ်နှစ်၊ အရိပ်သုံး၊ သခင်နှင့် အတူရှိနေသော အခြားအရိပ်သက်တော်စောင့်ရှစ်ဦးတို့က လျှိူ့ဝှက်လမ်းကြောင်းမှတဆင့် သခင့်ကို ခေါ်၍ ထွက်ပြေးကြမည်ပင်။

သခင် ထွက်သွားရင် သူတို့လည်း ထွက်ပြေးလို့ရပြီ!

ယန်ရှိူ့က ကျူးလျန်ယင်းနှင့် တခြားသူများကို ကြည့်နေစဉ် ကျူးလျန်ယင်းနှင့် တခြားသူများကလည်း သူ့ကို ကြည့်နေကြသည်။

ယနေ့ည၏ လရောင်မှာ ကောင်းမွန်ပြီး သိုင်းပညာရှင်များသည် အလွန်အမြင်စူးရှကာ ယန်ရှိူ့၏ ရုပ်ရည်ကို ရှင်းလင်းစွာ မြင်တွေ့နိုင်သည်။

ရှင်းရှင်းလင်းလင်း ဤသို့မြင်ရပြီးနောက် လူတိုင်းဟာ အံ့အားသင့်သွားကြသည်။

ဤနတ်ဆိုးဂိုဏ်းခေါင်းဆောင်၏ ရုပ်ရည်မှာ လျိုကျိချင်းနှင့် ငါးဆယ်ရာခိုင်နှုန်းခန့် အမှန်တကယ် ဆင်တူနေသည်။

“ သူက တကယ်ပဲ နတ်ဆိုးဂိုဏ်းခေါင်းဆောင်လား? ” လူတစ်ဦးက မေးသည်။

လက်ဝဲရံက ဖြေသည် : “ သူက မျက်နှာဖုံးမတပ်ထားပေမယ့်လည်း ဒီအသံ... သူက တကယ်ပဲ နတ်ဆိုးဂိုဏ်းခေါင်းဆောင် ဟုတ်တယ်။ ”

ကျူးလျန်ယင်းကလည်း ‌ဆိုသည် : “ သူက နတ်ဆိုးဂိုဏ်းခေါင်းဆောင်။ ဒီလူစုက သူ့ကို အမြဲလေးစားတယ်။ ပြီးတော့ သခင်ကျင်းကလည်း သူနဲ့ အရမ်းရင်းနှီးတယ်။ ”

ကျူးလျန်ယင်းသည် သတင်းတချို့ကို စုံစမ်းနေစဉ် အုပ်စုခေါင်းဆောင်က လျိုကျိချင်းနှင့် တော်တော်ကလေး ရုပ်ဆင်ကြောင်းကို သိရှိပြီးဖြစ်သည်။

ထိုသို့သော နတ်ဆိုးဂိုဏ်းခေါင်းဆောင်က လျိုကျိချင်းနှင့် အမှန်တကယ် ရုပ်ဆင်သော အချက်မှာ သူ့အထင်ထက် အနည်းငယ် ကျော်လွန်နေသည် — အစပိုင်းတွင် နတ်ဆိုးဂိုဏ်းခေါင်းဆောင်က လျိုကျိချင်းကို ကြိုးချည်ပြီး သူ့ကို ဖိအားပေးရန် ကြိုးစားခဲ့သည်။

သူက လျိုကျိချင်းနှင့် အလွန်ရုပ်ဆင်သည်။ ဘာကြောင့်များ သူက လျိုကျိချင်းကို ပြန်ပေးဆွဲချင်ရတာလဲ? သူက... သူ့ရုပ်ရည်ကို ကြိုက်တာလား? *အတ္တပေမဝါဒလား?

(*အတ္တပေမ ဝါဒ - မိမိ၏ ရုပ်ရည်သွင်ပြင်နှင့် စွမ်းဆောင်ရည် စသည်များကို အလွန်အကျူး နှစ်လိုအားရ ဖြစ်ခြင်း။)

ကျူးလျန်ယင်းသည် ဤသို့တွေးမိမိချင်း ကျောချမ်းသွားသည်။

လက်ဝဲရံနှင့် ကျူးလျန်ယင်းတို့သည် အနက်ရောင်အဝတ်များကို ဝတ်ဆင်ထားသော အရိပ်သက်တော်စောင့်တစ်စုကို ကြည့်လိုက်ကြသည်။ ယန်ရှိူ့၏ ပိုးထည်အဝတ်အစားများကြောင့် ယန်ရှိူ့၏ နာမည်အထောက်အထားကို သံသယဖြစ်သူ မရှိချေ။

သူတို့ရှေ့က ဒီလူက အရမ်းသန်မာတယ်၊ သူက နတ်ဆိုးဂိုဏ်းခေါင်းဆောင် မဟုတ်ဘူးဆိုရင် သူက ဘယ်သူဖြစ်နိုင်မှာလဲ? သူတို့သည် သဘာဝကျကျ ဤသို့တွေးသည်။

ဤအခိုက်အတန့်တွင် သိုင်းပညာရှင်များအနက် အသက်နှစ်ဆယ်ကျော် လူငယ်တစ်ဦးက ရုတ်တရက် အမြန်ပြေးထွက်လာပြီး ဓားရှည်ကြီးတစ်ချောင်းကို ကိုင်လျက် ယန်ရှိူ့ထံသို့ ဦးတည်သွားသည် : “ နတ်ဆိုးဂိုဏ်းက နတ်ဆိုး၊ ငါ့အဖေရဲ့အသက်ကို ပြန်ပေး! ” 

သူက သူ့ဓားကို လွှဲရမ်းသောအခါ လေပြင်းတဝှေ့ကို ဖြစ်ပေါ်စေခဲ့သည်။ သူဟာ အသက်ငယ်ရွယ်သော်ငြား သူ့အင်အားမှာ မဆိုးမှန်း ၎င်းက ပြသ၏။

သို့ရာတွင် သူ ယန်ရှိူ့အနားသို့ မကပ်နိုင်မီ အရိပ်သက်တော်စောင့်တစ်ဦးက တိတ်တဆိတ် ရှေ့တက်လာပြီး သူနှင့် တိုက်ခိုက်ခဲ့ကာ ခဏကြာပြီးနောက် သူ နောက်သို့ဆုတ်သွားရသည်။

ယန်ကျင်းဇီရဲ့ အသက်ပိုကြီးတဲ့ အရိပ်သက်တော်စောင့်ဟောင်းတွေ အကုန်လုံးက သိုင်းလောကရဲ့ ပထမတန်းစား သိုင်းကျွမ်းကျင်သူတွေနဲ့ ယှဉ်နိုင်တယ်!

လူငယ်က အရိပ်သက်တော်စောင့်၏ ဓားအောက်တွင် သေတော့မည်ကို တွေ့ရသော် လူငယ်၏ စီနီယာများသည် နောက်မှလိုက်ကာ လူငယ်ကို ကယ်တင်ခဲ့ကြသည်။ တစ်ချိန်တည်းမှာပဲ နှစ်ဘက်ကြားမှ တိုက်ပွဲဟာ ဖြစ်ပွားတော့မည်ပင်။

“ ဒီနတ်ဆိုးတွေကို သတ်ပစ်ကြ! ”

“ သိုင်းလောကရဲ့ အယုတ်အညံ့တွေကို ဖယ်ရှားပစ်! ”

“ နတ်ဆိုးဂိုဏ်းက နတ်ဆိုးတွေ၊ ငါ့ကို မင်းတို့အသက် ပေးကြစမ်း! ”

……

သိုင်းပညာရှင်များသည် အော်ဟစ်ကာ အတူတကွ တိုက်ခိုက်ကြသည်။ ကျူးလျန်ယင်းသည် အချိန်မဆွဲဘဲ ယန်ရှိူ့ထံသို့ တိုက်ရိုက်ဦးတည်သွားခဲ့သည်။

ကျူးလျန်ယင်းသည် အသက်နှစ်ဆယ်ကျော်သာ ရှိသေးပြီး သူဟာ သိုင်းပညာ ဉာဏ်ကြီးရှင်တစ်ဦး ဖြစ်ရုံသာမက စွန့်စားခန်း အများအပြားလည်း ရှိခဲ့၏။ သူ၏ သိုင်းပညာမှာ သိုင်းသမားများစွာ၏အထက်တွင် ရှိပြီး သူသည် ဖြောင့်မတ်မှန်ကန်သော သိုင်းလောက၏ အသန်မာဆုံး ဖြစ်သင့်ဖြစ်ထိုက်ပေသည်။

သဘာဝကျစွာပင် သူသည် ယန်ရှိူ့ထက်လည်း ပိုမိုသန်မာသည်။

သို့သော် သူသည် ယန်ရှိူ့နှင့် တိုက်ခိုက်ပြီးနောက် ခဏကြာသည့်အထိ မနိုင်သေးပေ။

ဤလူများကို အနည်းငယ် အချိန်ကြာကြာ ဟန့်တားထားနိုင်လေလေ၊ သူ့သခင်မှာ ပိုမိုလုံခြုံလေလေ ဖြစ်မည်ကို ယန်ရှိူ့ အလွန်ကောင်းစွာ သိရှိသည်။ သခင်က သူ့နောက်တွင် ရှိနေသည်ကို တွေးလျက်... သူသည် သူ၏ အင်အားကို ၁၂၀ ရာခိုင်နှုန်း ထုတ်ပြနိုင်ခဲ့သည်။

ထို့အပြင် သူ့တွင် ကျူးလျန်ယင်းအတွက် ဖော်မပြနိုင်သော စိတ်ထား အမြဲရှိနေခဲ့သည်... သူ တိုက်ခိုက်သောအခါ အားလုံးမှာ လူသတ်အကွက်များသာ ဖြစ်၏။

သူ၏ တိုက်ခိုက်မှုမှာ အလွန်ထူးဆန်းပြီး သူ့နောက်တွင် ကူညီမည့် အရိပ်သက်တော်စောင့်များ ရှိနေသည်။ အချိန်ခဏကြာသည့်အထိ သူသည် ကျူးလျန်ယင်းနှင့် အမှန်တကယ် လက်ရည်တူနေခဲ့သည်။

မလှမ်းမကမ်းရှိ ခေါင်မိုးပေါ်တွင် လက်ဝဲရံနှင့် အချို့သော ဝါရင့်သိုင်းသမားများသည် တိုက်ပွဲကို ကြည့်နေကြသည်။

ရှောင်လင်ဘုန်းကြီးက ဆိုသည် : “ အမိတာဘ ဗုဒ္ဓ။ နတ်ဆိုးဂိုဏ်းခေါင်းဆောင်က အရမ်းသန်မာတယ်။ ဒီနေ့ သူ့ကို လွှတ်ပေးလို့မဖြစ်ဘူး။ မဟုတ်ရင် အနှေးနဲ့အမြန် ကြီးမားတဲ့ ဘေးအန္တရာယ် ဖြစ်လာလိမ့်မယ်။ ”

“ အမှန်ပဲ။ ” နောက်တစ်ဦးက ဆက်ပြောသည် : “ ဒီနတ်ဆိုးဂိုဏ်းခေါင်းဆောင်ရဲ့ အနားက အရိပ်သက်တော်စောင့်တွေကို အထင်မသေးသင့်ဘူး။ ဒီနေ့ ငါတို့ သူတို့အကုန်လုံးကို တစ်ခါတည်း အမိဖမ်းရမယ်! ”

နတ်ဆိုးဂိုဏ်းခေါင်းဆောင်က ကျူးလျန်ယင်းလောက် မသန်မာသော်လည်း သူက သူတို့လို လူအိုကြီးများထက် မညံ့ဘဲ အလွန်လည်း အသက်ငယ်နေသေးသည်။

သူတို့သာ သူ့ကို လွှတ်ပေးလိုက်လျှင် နှစ်အနည်းငယ်အတွင်း သူ့အင်အားမှာ သူတို့ကို ကျော်သွားလိမ့်မည်ဖြစ်သည်။ ထိုအချိန်တွင် ကျူးလျန်ယင်းမှလွဲ၍ မည်သူကမှ သူ့ကို သတ်နိုင်တော့မည်မဟုတ်ဘဲ ကျူးလျန်ယင်းတွင် ခေါင်းသုံးလုံးနှင့် လက်ခြောက်ဖက် မရှိချေ။ ဤနတ်ဆိုးဂိုဏ်းမှ နတ်ဆိုးသာ ပုန်းနေလျှင် ကျူးလျန်ယင်းက သူ့ကို မရှာနိုင်တော့လောက်ဘဲ ထိုအခါ... သိုင်းလောကကြီး အန္တရာယ်ရှိပြီ!

“ သူက အားနည်းတယ်လို့ လက်ဝဲရံက တကယ်ကြီး ပြောခဲ့တာပဲ... ဟာ့! ” အခြားတစ်ဦးက လှောင်ရယ်သည်။ ဤလူသည် နတ်ဆိုးဂိုဏ်းကို မုန်းတီးပြီး သူ့တွင် အမှောင်ခြမ်းကို စွန့်ပစ်ခဲ့သော လက်ဝဲရံအတွက် နှစ်သက်မှုမရှိဘဲ မကြာခဏ လက်ဝဲရံကို ဆန့်ကျင်တတ်သည်။ ဤအချိန်တွင် သူ့၌ လှောင်ပြောင်မှုများ ပြည့်နှက်နေသည်။

လက်ဝဲရံ၏ မျက်လုံးများမှာ အေးစက်သွားသော်ငြား နောက်ဆုံးတွင် သူသည် ဘာမှမပြောဘဲ တိုက်ပွဲကိုသာ ဆက်ကြည့်သည်။

ဤအချိန်တွင် သိုင်းလောကသားများနှင့် အရိပ်သက်တော်စောင့်များကြားမှ တိုက်ပွဲမှာ ပိုပိုပြီး ပြင်းထန်လာသည်။

အရိပ်သက်တော်စောင့်များဖြစ်စေ၊ သိုင်းသမားများဖြစ်စေ၊ လူအများအပြား ရှိကြပြီး သူတို့က အချင်းချင်း ကူညီနိုင်ကြသည်။ ထို့ကြောင့် အချိန်တိုအတွင်း သေဆုံးမှုမရှိချေ။ သို့သော် ဤသို့ဆက်ဖြစ်နေလျှင် ၎င်းက ဖြစ်နိုင်လောက်သည်။

သူတို့သည် ထိုအရိပ်သက်တော်စောင့်များထက် ပိုများပြီး ဆရာကြီးများ ဖြစ်သော သူတို့က မလှုပ်ရှားရသေးပေ။ သူတို့သည် အဆုံးတွင် ထိုအရိပ်သက်တော်စောင့်များ အားလုံးကို သေချာပေါက် သတ်နိုင်လိမ့်မည်ပင်။

သို့ရာတွင် ထိုအရိပ်သက်တော်စောင့်များက သေသည့်အထိ ပြန်လည်တိုက်ခိုက်လျှင် သူတို့လည်း သေဆုံးမှုများကို ကြုံတွေ့ရလောက်သည်။

“ အမိတာဘ ဗုဒ္ဓ။ ဆရာများစွာတို့၊ ကိုယ်တော်တို့ လှုပ်ရှားဖို့ အချိန်ကျရောက်လာပြီ။ ” ရှောင်လင်ဘုန်းကြီးက ပြောခဲ့သည်။

ဘုန်းကြီးသည် စကားပြောပြီးနောက် လှုပ်ရှားတော့မည်ဖြစ်သော်ငြား ထိုအခိုက်အတန့်တွင် ထိုပင်မအိမ်မှ နောက်လူတစ်ဦးက မမျှော်လင့်ထားစွာ ထွက်လာသည်။

၎င်းမှာ အကောင်းစား ပိုးထည်အဝတ်များကို ဝတ်ဆင်ထားပြီး အလွန်ချောမောသည့် လူငယ်တစ်ဦး ဖြစ်သည်။

ဤဆယ်ကျော်သက်၏ ရုတ်တရက် ထွက်ပေါ်လာမှုက ရှောင်လင်ဘုန်းကြီးကို ရပ်တန့်သွားစေသည် : “ အဲ့လူက ဘယ်သူလဲ? ”

“ နတ်ဆိုးဂိုဏ်းရဲ့ အမျိုးသားအချစ်တော်၊ နာမည်ကျော် သခင်‌ကျင်း။ ” လက်ဝဲရံက ဖြေသည်။

သူသည် ခေါင်းဆောင်၏ ရုပ်ရည်ကို ယနေ့မှသာ မြင်ဖူးသော်လည်း သခင်ကျင်းကိုတော့ ဟိုးယခင်ကတည်းက သိရှိခဲ့သည်။

သူတို့ မထင်ထားပေ၊ အပြင်တွင် အားလုံးသော တိုက်ခိုက်သတ်ဖြတ်ခြင်းများ ဖြစ်နေစဉ် ဤသခင်ကျင်းက ထွက်လာရဲမည်ဟု...

“ မင်း ဘာလို့ ထွက်လာတာလဲ? ဒီကနေ မြန်မြန်ထွက်သွား! ” ယန်ရှိူ့က ကြောက်လန့်စွာ အော်ပြောခဲ့သည်။

သိုင်းပညာရှင်များ အလွန်များပြားစွာ ရောက်လာပြီး သူတို့က မယှဉ်နိုင်လောက်မှန်းကို ရှာဖွေတွေ့ရှိပြီးနောက် သူသည် အရိပ်သက်တော်စောင့် အနည်းငယ်ကို ရှင်းပြပြီး သခင့်အား ခေါ်၍ လျှို့ဝှက်လမ်းကြောင်းမှတဆင့် ထွက်သွားရန် သူတို့ကို စေခိုင်းထားသည်။

ဒါပေမယ့် သခင်က ထွက်မသွားဘဲ အပြင်တောင် ထွက်လာသေးတယ်!

တကယ်ပဲ ဘာတွေဖြစ်နေတာလဲ?

အဲ့အရိပ်သက်တော်စောင့်တွေက သခင့်ကို သစ္စာဖောက်ခဲ့တာလား?

ယန်ရှိူ့သည် ဤအချိန်တွင် ရန်သူနှင့် တိုက်ခိုက်သည့်အပေါ် အာရုံမစူးစိုက်နိုင်တော့ဘဲ သူ့မျက်နှာပေါ်ရှိ စိုးရိမ်ပူပန်စိတ်မှာ သိသာထင်ရှားသည်။ အဝေးမှ ဤမြင်ကွင်းကို စောင့်ကြည့်နေသော လူများသည် ထိုလူငယ်က သူ့အတွက် အလွန်အရေးပါမှန်း ချက်ချင်း သဘောပေါက်သွားကြသည်။

“ ဂိုဏ်းခေါင်းဆောင်က ကျင်းသခင်လေးကို အရမ်းချစ်တယ်။ “ လက်ဝဲရံက ထပ်ပြောပြန်သည်။ 

ယခင်က လက်ဝဲရံ တစ်ခုခုပြောသည့်အချိန်တိုင်း သူသည် သူ မှားနေသည်ဟု သက်သေပြခံရကာ မျက်နှာဖြတ်ရိုက်ခံခဲ့ရသည်။ သို့သော် ဤအခိုက်အတန့်တွင်မူ ကွဲပြားသွားပြီဖြစ်သည် — “နတ်ဆိုးဂိုဏ်းခေါင်းဆောင်” ဆက်လုပ်သော နောက်ကိစ္စမှာ သူက အမှန်တကယ်ပင် ကျင်းသခင်လေးကို ချစ်ကြောင်း မြင်တွေ့နိုင်သည်။

ယန်ရှိူ့သည် ကျူးလျန်ယင်းကို ရိုက်ပြီးနောက် နောက်သို့ ခြေလှမ်းအနည်းငယ် ပြန်ဆုတ်ကာ အော်လိုက်သည် : “ ဆယ့်နှစ်၊ ကျင်းဇီကို မြန်မြန် အဝေးခေါ်သွား! ” 

သူ့စကားများ ထွက်လာသည်နှင့်တပြိုင်နက် အရိပ်သက်တော်စောင့်တစ်ဦးသည် တိုက်ပွဲအုပ်စုထဲမှ ထွက်ကာ ယန်ကျင်းဇီကို ခေါ်သွားရန် ရောက်လာသည်။ စိတ်အာရုံများနေသော ယန်ရှိူ့မှာ ကျူးလျန်ယင်းထံမှ အရိုက်ခံရတော့မည်ဖြစ်သည်။  

“ နတ်ဆိုးဂိုဏ်းခေါင်းဆောင်က အချစ်ရူးနေတဲ့ လူတစ်ယောက် ဖြစ်နေမယ်လို့ ကိုယ်တော် မထင်ထားမိဘူး။ ” ဘုန်းကြီးက ပြောသည်။ 

ခေါင်မိုးပေါ်တွင် မတ်တပ်ရပ်နေသည့် လျိုကျိချင်းသည် ဤမြင်ကွင်းကို တွေ့ရသော် အနည်းငယ် အံ့အားသင့်သွားသည်။ 

သူ့ကို နတ်ဆိုးဂိုဏ်းခေါင်းဆောင် ဖမ်းဆီးထားသည့် အချိန်တွင် ထိုဂိုဏ်းခေါင်းဆောင်သည် သူ့ကို အလွန်နက်နက်ရှိုင်းရှိုင်း ချစ်နေသည့်ပုံပေါ်ခဲ့သည်။ သို့သော် မျက်စိတမှိတ်အတွင်း ကျင်းသခင်လေးတစ်ဦး ထွက်လာသည်။ 

နတ်ဆိုးဂိုဏ်းမှ လူများမှာ အမှန်တကယ်ပင် မယုံကြည်ရချေ။

လျိုကျိချင်း ဤသို့တွေးမိချိန်တွင် တိုက်ပွဲထဲက အခြေအနေမှာ ရုတ်တရက် ပြောင်းလဲသွားသည်။ 

ကျူးလျန်ယင်းသည် ယန်ရှိူ့၏ အာရုံပျက်ပြားမှုကို အခွင့်ကောင်းယူပြီး ယန်ရှိူ့ကို ရိုက်တော့မည်ဖြစ်သည်။ ဤအခိုက်အတန့်တွင် သခင်ကျင်းက ရုတ်တရက် လက်တစ်ဖက်ကို ဆန့်ထုတ်ကာ ကျူးလျန်ယင်းထံသို့ ရိုက်လိုက်သည်…

ကျူးလျန်ယင်းသည် ဤလက်၏ ထိခြင်းကို မခံခဲ့ရပေ။ သို့ရာတွင် ကျူးလျန်ယင်းသည် မထင်မှတ်ထားစွာဖြင့် ခြေလှမ်းအနည်းငယ် ပြန်ဆုတ်လိုက်ရသည်။ 

ဒါ… အတွင်းအားထုတ်လွှတ်မှုက ကျူးလျန်ယင်းကို နောက်ဆုတ်စေခဲ့တာလား?

ဒီမှာ တကယ်ပဲ ဘာတွေဖြစ်နေတာလဲ? 

ခေါင်မိုးပေါ်ရှိ သိုင်းပညာရှင်များသည် ဤမြင်ကွင်းကို အံ့ဩတကြီး ကြည့်ရှုကြပြီး သူတို့အားလုံး ဆွံ့အသွားကြသည် — ကျင်းသခင်လေးက နတ်ဆိုးဂိုဏ်းခေါင်းဆောင်ရဲ့ အမျိုးသားအချစ်တော်တစ်ယောက်ပဲလို့ မင်း မပြောခဲ့ဘူးလား? ဘာလို့ သူ့ကြည့်ရတာ နတ်ဆိုးဂိုဏ်းခေါင်းဆောင်ထက်တောင် ပိုသန်မာနေတဲ့ပုံပေါ်နေတာလဲ? 

ဤအခိုက်အတန့်တွင် ကျူးလျန်ယင်းသည် ပို၍ပင် မယုံကြည်နိုင်ပေ။ 

လွန်ခဲ့သော တစ်နှစ်ကျော်ခန့်၌ သိုင်းလောကမဟာမိတ်ခေါင်းဆောင် နေရာကို သူ ပထမဆုံးရသည့် အချိန်တွင် သူ့ခွန်အားမှာ ယခုထက်များစွာ ပိုမိုအားနည်းခဲ့ပြီး သူက အလွန်သန်မာသည်ဟု သူ မထင်ခဲ့ပေ။ သို့သော် ဤတစ်နှစ်ကျော်အတွင်း သူသည် ကိစ္စများစွာကို ကြုံတွေ့ခဲ့ပြီး သူ့ခွန်အားမှာ ယခင်ကထက် ပိုမိုကောင်းမွန်လာကာ နှစ်ဆထက်ပင် များစွာပိုတိုးခဲ့သည်။ 

ရှောင်လင်ဘုန်းကြီးကဲ့သို့ ဆယ်စုနှစ်များစွာ နာမည်ကျော်ခဲ့သော လူတစ်ဦးပင် သူနှင့် မယှဥ်နိုင်ချေ။ ယခု သူသည် သူ့ကိုယ်သူ ယုံကြည်မှုအပြည့် ရှိပြီး သူဟာ လောကနံပါတ်တစ် ဖြစ်နေပြီဟု အမြဲခံစားခဲ့ရသည်။ 

ဒါပေမယ့် အခု သူ ဘာဖြစ်သွားတာလဲ?

လူငယ်တစ်ယောက်က အေးအေးလူလူ သူ့ကိုရိုက်လိုက်တယ်၊ သူက ခြေလှမ်းအနည်းငယ် နောက်ပြန်ဆုတ်လိုက်ရတယ်လား? 

သောက်ကျိုးနည်း ဒီလူက ဘယ်သူလဲ?

ကျူးလျန်ယင်းကဲ့သို့ ပဟေဠိဖြစ်နေသူများမှာ လက်ရှိတွင် အများအပြား ရှိနေသည်။ ဤအချိန်တွင် လူငယ်က ထပ်မံရိုက်နှက်ပြန်သည်။ 

သူဟာ သရဲတစ်ကောင်နှင့် တူပြီး သူ့ပုံရိပ်မှာ ဖျတ်ခနဲ ဖြတ်သန်းသွားသည်။ သူသည် ကျူးလျန်ယင်းဘေးတွင် ပေါ်လာပြီး သူ့ကို ထပ်ရိုက်လိုက်ပြန်သည်။ ကျူးလျန်ယင်းသည် နောက်ဆုတ်လိုက်ရပြီး သွေးတစ်လုတ် ထွေးထုတ်လိုက်ရသည်။ 

ဤအခိုက်အတန့်တွင် ဤလူသည် လက်ချောင်းတစ်ချောင်း ဆန့်ထုတ်ကာ ကျူးလျန်ယင်း၏ စွမ်းအင်အကြောမှတ်ကို တိုက်ရိုက်ထိနှိပ်ခဲ့သည်။ 

ကျူးလျန်ယင်း၏ ခန္ဓာကိုယ်တစ်ခုလုံးမှာ ထိုနေရာတွင် အသေရပ်သွားသည်။ သူသည် မလှုပ်ရှားနိုင်တော့သည့်အပြင် ဘာကိုမှမလုပ်နိုင်တော့ပေ။

ဤအရာအကုန်လုံးမှာ လျှပ်တပြက်အတွင်း ဖြစ်ပျက်ခဲ့ပြီး ထို့နောက် တစ်စုံတစ်ဦးက အံ့ဩစွာ အော်ခဲ့သည် : “ ခေါင်းဆောင်! ”

ရလဒ်ကမူ စကားများ သူတို့ပါးစပ်မှ မထွက်မီ ထိုလူက ထပ်မံလှုပ်ရှားခဲ့ပြန်သည်။ 

သူသည် သိုင်းပညာရှင်များကြားတွင် လျင်မြန်စွာ လျှောက်သွားပြီး သူ ဖြတ်သွားသည့် နေရာတိုင်းတွင် လူတိုင်းသည် စွမ်းအင်အကြောမှတ်များ နှိပ်ခံခဲ့ရသည်။

အရိပ်သက်တော်စောင့်များသည် ဟစ်ကြွေးအားပေးကြကာ အကြောနှိပ်ခံရသည့် လူများကို တိုက်ခိုက်မည့်အစား သူတို့သည် အကြောမနှိပ်ခံရသူများကို စတင်တိုက်ခိုက်သည် - လှုပ်ရှားမှုစွမ်းရည် ဆုံးရှုံးသွားသော လူများကို မသတ်ရန် သခင်က ရှင်းပြဖူးသည်။ 

ဒါပေမယ့် အခု ဒီအခြေအနေမှာ… သခင့်ရဲ့အင်အား ပြန်ကောင်းသွားပြီလား?

မဟုတ်ဘူး၊ သခင့်ရဲ့ဒီပုံစံက အင်အားပြန်ရရုံတင်သာမကဘဲ သခင်က အများကြီး ပိုသန်မာလာတယ်!

အရိပ်သက်တော်စောင့်များသည် အလွန်အမင်း စိတ်ကျေနပ်ကာ အံ့သြသွားကြသည်။ 

ဤအခိုက်အတန့်တွင် ယန်ရှိူ့ကသာ ကွဲပြားနေသည်။ လူတစ်ကိုယ်လုံးမှာ ရေခဲဂူထဲသို့ ပြုတ်ကျသွားသကဲ့သို့ပင်။

သူသည် သေသည်အထိ တိုက်ခိုက်ပြီး သူ့သခင်ကို အဝေးသို့ ပို့ရန် အဆင်သင့်ဖြစ်နေပြီဖြစ်သည်။ သို့သော် ဤအချိန်တွင် သခင်က ရုတ်တရက် လှုပ်ရှားလာခဲ့သည်။

သူ လုံးဝ အနိုင်မယူနိုင်သော ကျူးလျန်ယင်းကို သူ့သခင်က အလွယ်တကူ အနိုင်ယူခဲ့သည်။

သခင်က ယခင်ကထက် များစွာ သန်မာလာခဲ့ပြီး ၎င်းမှာ အံ့သြစရာမကောင်းချေ။ သခင်က အရာရာကို စွမ်းဆောင်နိုင်ပြီးသားပင်။

ယခု သူသည် ကိစ္စတစ်ခုကို စိုးရွံ့နေသည်။ 

သခင့်ရဲ့အင်အားက ပြန်ရလာပြီဆိုတော့ သူ့ရဲ့ မှတ်ဉာဏ်ကလည်း ပြန်ကောင်းသွားပြီလား?

သခင်က ဒီရက်တွေမှာ သူ လုပ်ခဲ့တာတွေကို မှတ်မိလား?

သူသည် သခင့်အပေါ်တွင် ထိုကဲ့သို့ကိစ္စမျိုးကို လုပ်ဆောင်ခဲ့ပြီး အခြားအရိပ်သက်တော်စောင့်များကိုလည်း သခင့်အား သခင့်၏ အထောက်အထား ပြောပြရန် ခွင့်မပြုပေးခဲ့ပေ... သူ့ကို သခင်က အပြစ်ပေးမှာလား?

ထို့အပြင်…

သခင်က သူ့ကို ဂိုဏ်းခေါင်းဆောင်အဖြစ် ရွေးချယ်ထားသည်မှာ သူ၏ အတွင်းအားပြဿနာကြောင့် ထို့သို့လုပ်ရန် လိုအပ်၍ဖြစ်သည်။

သခင့်အတွက်မူ နိမ့်ကျသော အရိပ်သက်တော်စောင့်တစ်ဦးကို သူ့အစား ဟန်ဆောင်ခိုင်းပြီး သူကမူ “သခင်ကျင်း”အဖြစ်သာ ပြုမူရသည်မှာ စိတ်ကျေနပ်စရာကောင်းသော ကိစ္စ မဟုတ်မှန်း သေချာသည်။ ယခု သခင့်၏ ခွန်အားကို ပြန်လည်ရရှိပြီးနောက် သူသည် အသက်မရှင်နိုင်တော့လောက်ပေ။ 

တကယ်တော့ အသက်မရှင်ရသည်မှာ ကောင်းမွန်သည်။

သခင့်၏လက်ထဲတွင် သေရသည်မှာလည်း ကောင်းမွန်သော ကိစ္စပင်။

ယန်ရှိူ့သည် ထိုနေရာတွင် ရပ်ပြီး မလှုပ်ရှားပေ။

ဤအချိန်တွင် အရိပ်နှစ်၊ အရိပ်သုံးနှင့် ယန်ကျင်းဇီကို အဖော်ပြုခဲ့သော အခြားအရိပ်သက်တော်စောင့်များလည်း ထွက်လာကာ ယန်ရှိူ့ကို မြင်ကြသည် : “ ယန်ရှိူ့၊ သခင် နေပြန်ကောင်းသွားပြီ! ”

အစပိုင်းတွင် အရိပ်နှစ်နှင့် အရိပ်သုံးသည် ယန်ရှိူ့၏ အမိန့်ကို နာခံ၍ အိမ်ထဲတွင် ယန်ကျင်းဇီကို ကာကွယ်သည်။ သို့သော် မကြာမီပင် အချို့အရိပ်သက်တော်စောင့်များ ထပ်ဝင်လာကြပြီး ယန်ကျင်းဇီကို လျှို့ဝှက်လမ်းကြောင်းမှတဆင့် ခေါ်ထုတ်သွားရန် ဟူသော ယန်ရှိူ့၏ ဒုတိယအမိန့်ကို ယူဆောင်လာခဲ့သည်။

ဤအမိန့်ကို ကြားရသော် သူတို့သည် အပြင်ဘက်ရှိ အခြေအနေမှာ အရေးကြီးသည်ကို သိလိုက်ကြပြီး ထွက်ပြေးလွတ်မြောက်ရန် သူတို့သခင်ကို ချက်ချင်း ခေါ်သည်။ သို့သော် သခင်က ထွက်ပြေးလွတ်မြောက်ရန် ဆန္ဒမရှိဘဲ သူတို့၏ လှုပ်ရှားမှုကို ရပ်တန့်ကာ သူ အပြင်ထွက်ပြီး ကြည့်ချင်သည်ဟု ပြောခဲ့သည်။ 

သူတို့သည် သခင့်ကို စွန့်စားခွင့်မပြုနိုင်ဘဲ အားလုံးသည် သခင့်ကို အတင်းအကြပ် ထွက်သွားခိုင်းရန် စီစဥ်လိုက်သည်။ ရလဒ်ကမူ… 

သူတို့ သခင့်၏ အပ်စိုက်အမှတ်များကို နှိပ်တော့မည်အပြု၊ သခင်က သူတို့၏ အပ်စိုက်အမှတ်များကို နှိပ်ခဲ့သည်။ 

သခင်က သူတို့၏ အပ်စိုက်အမှတ်များကို နှိပ်ချိန်တွင် သူတို့အားလုံး အကာအကွယ်မဲ့နေခဲ့သည်။ သူတို့အားလုံး အကြောနှိပ်ခံထားရသောအခါ သခင် စကားပြောသည်ကို သူတို့ ကြားလိုက်ရသည် : “ ငါ့မှတ်ဉာဏ်နဲ့ ခွန်အား ပြန်ကောင်းသွားပြီ။ ” 

သခင်က စကားပြောပြီးနောက် ထွက်သွားသည်။ သူတို့သည် အံ့သြပျော်ရွှင်သွားပြီး စိတ်ပူသွားသည်။ ထို့နောက် သူတို့သည် သူတို့၏ စွမ်းအင်အကြောမှတ်များမှာ ရုတ်တရက် ပြန်ပွင့်သွားသည်ကို ရှာတွေ့လိုက်ရပြီး သူတို့ ထွက်လာချိန်တွင်…. ပြင်ပရှိ သိုင်းပညာရှင်အများစုကို သခင်က ရှင်းလင်းပြီးဖြစ်သည်။ 

အရိပ်နှစ်နှင့် အရိပ်သုံးတို့သည် အပျော်လွန်ပြီး သခင်ဟု ခေါ်လိုက်ကြသည်။ 

သူတို့၏ စကားကို ကြားသောအခါ ယန်ရှိူ့၏ နှလုံးသားမှာ ထပ်မံနစ်မြှုပ်သွားရပြန်သည်။ 

ဤရက်များတွင် သူသည် ညစဥ်ညတိုင်း လက်ဦးမှု ရယူကာ သခင့်တွင် အခြားသူများကို ရှာရန် အချိန်မရှိနိုင်အောင် သခင့်ကို ပြောင်ရှင်းအောင် “ညှစ်ထုတ်”ချင်ခဲ့သည်။ ယခု သခင်က နေပြန်ကောင်းလာသောအခါ သူ၏ အပြုအမူများကို စဥ်းစားပြီးနောက် သူ့ကို အလွန်ရွံရှာသွားမည်မှာ သေချာသည်။ 

သူသည် သူ့သခင်က သူ့ကို ရွံရှာသွားမည်အား လုံးဝ မလိုချင်ပေ။ 

သို့သော် ကိစ္စများဟာ ဤအထိ ဖြစ်လာခဲ့သည်…

ယန်ရှိူ့သည် စကားတစ်လုံးမှ မပြောဘဲ မလှမ်းမကမ်းရှိ ယန်ကျင်းဇီကို လှမ်းကြည့်သည်။ 

ယန်ကျင်းဇီသည် ယန်ရှိူ့၏ အာရုံစူးစိုက်သော အကြည့်ကို ခံစားရပြီး ခဏတာ စိတ်ကောင်းဝင်သွားသည်။ 

ယန်ရှိူ့က သူ့ကို မျက်တောင်မခတ်ဘဲ ကြည့်နေတယ်၊ သူက အရမ်းချောတယ်လို့ တွေးနေတာလား? ဒီလိုဆို သူ ပိုပြီးချောမောသင့်လား? 

ယန်ကျင်းဇီသည် သူတို့၏ အပ်စိုက်အမှတ်များကို ပိုမိုမြန်ဆန်စွာ နှိပ်လိုက်သည်။ 

ဤအချိန်တွင် ယခင်က ဘာမှမလုပ်ရသေးသော သိုင်းပညာရှင်များသည် ယန်ကျင်းဇီ၏ ရှေ့တွင် အမြန်ပြေးလွှားသွားကြသည် — ယန်ကျင်းဇီက ကျူးလျန်ယင်းကို နောက်ပြန်ဆုတ်စေသည်အား တွေ့ရသော် ခေါင်မိုးပေါ်ရှိ ရှောင်လင်ဘုန်းကြီးနှင့် အခြားသူများ အားလုံးသည် ထိတ်လန့်သွားကြပြီးနောက် တုန့်ဆိုင်းမှု မရှိဘဲ ခေါင်မိုးပေါ်မှ ခုန်ဆင်းကြသည်။ 

သို့သော်… သူတို့တစ်ဦးချင်းစီ၏ အင်အားဟာ ကျူးလျန်ယင်းလောက် မကောင်းချေ။

ယခင်နတ်ဆိုးဂိုဏ်းခေါင်းဆောင်များသည် အခြေခံအားဖြင့် “ငရဲဘုံအံ့ဖွယ်သိုင်းကျမ်း”ကို အဆင့်ခုနစ်အထိသာ လေ့ကျင့်ရန် လိုအပ်ပြီး သူတို့အားလုံးတို့သည် ကောင်းမွန်စွာ ထိုက်တန်သော သိုင်းပညာရှင်များ ဖြစ်နေကြပြီးဖြစ်သည်။ ကျူးလျန်ယင်း၏ လက်ရှိအင်အားမှာ “ငရဲဘုံအံ့ဖွယ်သိုင်းကျမ်း” အဆင့်ခုနစ်အထိ လေ့ကျင့်ခဲ့သူများနှင့် တူညီလုနီးပါးရှိသည်။

လက်ဝဲရံ၊ ယန်ရှိူ့၊ ရှောင်လင်ဘုန်းကြီးနှင့် အခြားသူများမှာ အဆင့်ခြောက်တွင် ရောက်လုနီးပါးဖြစ်သည်။ 

ယန်ကျင်းဇီ၏ ဖခင်ဖြစ်သူ၊ ယခင်နတ်ဆိုးဂိုဏ်းခေါင်းဆောင်နှင့် အခြားသော နတ်ဆိုးဂိုဏ်းခေါင်းဆောင်ဟောင်းများသည်လည်း “ငရဲဘုံအံ့ဖွယ်သိုင်းကျမ်း”ကို အဆင့်ခြောက်အထိသာ လေ့ကျင့်ခဲ့ကြပြီး အင်အားမှာ ယန်ရှိူ့၏အင်အားနှင့် အတူတူမျှပင် ဖြစ်သည်။ 

သို့သော် ယန်ကျင်းဇီသည် “ငရဲဘုံအံ့ဖွယ်သိုင်းကျမ်း”ကို အဆင့်ရှစ်အထိ လေ့ကျင့်ထားပြီးဖြစ်သည်။ ၎င်းက အဆင့်ရှစ်အထိ ရောက်ရှိပြီးရုံသာမက သူသည် အဆင့်ကိုးကိုလည်း လေ့လာနေသည်။

ထို့အပြင် သူ၏ အတွင်းအားထိန်းချုပ်မှုမှာ အလွန်သန်မာပြီး သာမန်လူမှာ ရိုးရှင်းစွာပင် မပြိုင်နိုင်ပေ။ 

ရှောင်လင်ဘုန်းကြီး၊ လျိုကျိချင်းနှင့် အခြားသူများမှာ သဘာဝကျစွာ သူ့ပြိုင်ဘက်များ မဟုတ်ကြချေ။

“ သူတို့က မင်းကို သခင်လို့ ခေါ်တယ်။ မင်း… ” လက်ဝဲရံသည် အကြောနှိပ်ခံထားရသော်ငြား စကားပြောနိုင်သေးသည်။ ဤအချိန်တွင် သူသည် ယန်ကျင်းဇီကို ထိတ်လန့်စွာ ကြည့်နေသည်။

ယန်ကျင်းဇီက ပြုံးကာ ပြောသည် : “ ဟုတ်တယ်၊ ငါက နတ်ဆိုးဂိုဏ်းခေါင်းဆောင်ပဲ။ ” 

စကားပြောပြီးနောက် ယန်ကျင်းဇီသည် လက်ဝဲရံကို ပြုံးပြကာ လက်ဝဲရံ၏ မယုံကြည်နိုင်သော မျက်လုံးများထဲတွင် သူသည် လက်ဝဲရံ၏ ဦးခေါင်းကို လက်ဝါးဖြင့် ရိုက်နှက်လိုက်ပြီး လက်ဝဲရံကို သေသည့်အထိ တိုက်ရိုက်ရိုက်နှက်ခဲ့သည်။ 

လက်ဝဲရံသည်လည်း နတ်ဆိုးဂိုဏ်းတွင် ဆိုးရွားသော ကိစ္စများစွာကို ပြုလုပ်ခဲ့သည်။ 

ယခင်က ယန်ကျင်းဇီသည် နတ်ဆိုးဂိုဏ်းထဲတွင် ရက်စက်ယုတ်မာသူ အလွန်များသောကြောင့် သူ မသတ်နိုင်ဟု ခံစားခဲ့ရသည်။ သူက သူတို့၏ ခေါင်းဆောင် ဖြစ်ပြီး သူ သူတို့ကို သတ်သည်မှာ မကောင်းမွန်ဟုလည်း သူ ထင်ခဲ့သည်။ ထို့ကြောင့် သူသည် ဘာမှမလုပ်ဘဲ ဖြောင့်မတ်မှန်ကန်သော သိုင်းဂိုဏ်းများကို နတ်ဆိုးဂိုဏ်းအား အဆုံးသတ်ခွင့်ပေးခဲ့သည်။

သို့သော် ယခုမူ လက်ဝဲရံက သူ့ကိုယ်သူ သူ့လက်ထဲသို့ ပို့လာသည်… သေချာတာပေါ့၊ သူ သူ့ကို သတ်ရမည်ဖြစ်သည်။ 

သတ်ပြီးနောက် ယန်ကျင်းဇီသည် ပြုံးကာ ခေါင်းလှည့်ပြီး ယန်ရှိူ့ကို ကြည့်လိုက်သည် : “ အားရှိူ့၊ ငါ ချောလား? ”

____