MM Story Teller

Chapter 5

Viewers 90

🦋Chapter 5

- မင်္ဂလာပါ ကိုယ့်ချစ်သူလေး

ပိုင်ရှီး အဆောက်အဦထဲမှ ထွက်လာခဲ့သည်။ သူက လှေကားထစ်မှ ဆင်းလိုက်သည်နှင် မလှမ်းမကမ်းတွင် ရပ်ထားသည့် ချီရွှင့်၏ကားနှင့် ဘေးတွင် ရပ်စောင့်နေသည့် ချီရွှင့်ကို တွေ့လိုက်ရသည်။ သူက မီးခိုးရောင် လေကာအင်္ကျီကို ဝတ်ထားလေသည်။ သူ၏ အရပ်ရှည်ရှည်နှင့် ခန့်ညားသည့် အရှိန်အဝါကြောင့် ဖြတ်သားဖြတ်လာများက မကြည့်မိပဲ မနေနိုင်ချေ။

သူရောက်လာသည်ကို မြင်သောအခါ ချီရွှင့်က မောင်းသူဘေးခုံက တံခါးကို ဖွင့်ပေးလာသည်။ သူတို့က ကားစီးနေစဥ်အတွင်း စကားသိပ်မပြောမိပေ။ ကလော်ဒီ ဒီဘူစီ၏ တေးသွားများသာ ကားထဲ ပြည့်နေသည်။

သူတို့က မကြာခဏ သွားစားတတ်သည့် သီးသန့်စားသောက်ဆိုင်တွင် ညစာစားခဲ့သည်။ ပိုင်ရှီး၏ စိတ်က အတိတ်နှင့်လက်ရှိ ကူးလူးနေ၍ နောက်ပြောမည့်အရာအတွက် ကြောက်လန့်နေမိသည်။

ချီရွှင့်က စားပွဲတစ်ဖက်တွင် တည်တည်ငြိမ်ငြိမ်ရှိလှသည်။ သူ၏ လေကာအင်္ကျီထဲတွင် အနက်ရောင် ဆွယ်တာတစ်ထည် ပါ၍ သူ၏ နဂိုသီးသန့်နေတတ်သည့် ပုံစံနှင့် လိုက်ဖက်နေသည်။ ပုစွန်အခွံခွာနေသည့်အချိန်မှာတောင် ကြွကြွရွရွလေး ဖြစ်နေသည်။

ပိုင်ရှီးက သူ့ရှေ့က လူကို ကြည့်ရင်း တူကို လျင်မြန်စွာ လှုပ်ရှားလိုက်ပြီး ရုတ်တရက် မေးလိုက်သည်။

" ချီရွှင့်...လွန်ခဲ့တဲ့ နှစ်ရက်က ပြောခဲ့တာက အတည်ယူလို့ရသေးလား..."

ချီရွှင့်က ခေါင်းမမော့လာခဲ့ပေ " တွဲမယ့်ကိစ္စကို မေးတာဆိုရင်တော့ ဟုတ်တယ်...မပြောင်းလဲသေးဘူး..."

ပြောနေရင်း ချီရွှင့်က ကြွေပန်းကန်ပြားကို ပိုင်ရှီးဆီ တွန်းပို့လာသည်။ အခွံနွာထားပြီးသား ပုစွန်များက သပ်သပ်ရပ်ရပ် စီထားပြီး ဘေးတွင် အချဥ်ရည်နှင့်ပါ ပြင်ဆင်ပေးထားသည်။

သူက ပိုင်ရှီးနှင့် မျက်လုံးချင်းဆုံအောင် ခေါင်းမော့ကြည့်လာပြီး ဆက်ပြောဖို့ လက်ဟန်ပြလာသည်။

သီးသန့်အခန်းလေးက အပူချိန်က အသင့်အတင့်ပင်။ ဆောင်းရာသီ အစပိုင်းရောက်နေသည့်တိုင် အခန်းလေးက နွေးနေသည်။ သို့သော်လည်း ပိုင်ရှီး၏ မျက်နှာက ပူလွန်းနေ၍ ရင်အေးစေဖို့ သံပရာရည်အေးအေးလေးကို သောက်လိုက်ရသည်။

"ကျွန်...ကျွန်တော် စမ်းကြည့်ချင်တယ်..."

သူတွေးထားသည်ထက် တကယ်တမ်း ပြောဖို့ ပိုခက်နေသည်။ ပိုင်ရှီးက နှုတ်ခမ်းကိုက်မိမလို ဖြစ်သွားသော်လည်း ထိုစကားလုံးများက သူ့ပါးစပ်ထဲက ထွက်လာသည်နှင့် သူ့စိတ်ထဲ သက်သာသွားလေသည်။ သူက ရှက်စိတ်ကြောင့် ပါးများ နီရဲလာသည်ထိ မျက်လုံးချင်းဆုံနေမိသည်

" ကျွန်တော် ခင်ဗျားကို တွန်းအားမပေးပါဘူး...တကယ်လို့ ခင်ဗျား နောင်တရသွားပြီး ကျွန်တော်နဲ့ ဆက်မရှိချင်တော့ဘူးဆိုရင် ဘယ်အချိန်မဆို လမ်းခွဲပေးနိုင်ပါတယ်...အဲ့ဒီလိုဖြစ်လာတဲ့အခါ ကျွန်တော့်ကို စိတ်မကောင်းဖြစ်နေစရာ မလိုပါဘူး..."

ပိုင်ရှီးက ချီရွှင့်ကို စိတ်ပါလက်ပါ စိုက်ကြည့်မိသည်။ သူတို့နှစ်ယောက်ကြားက ကိစ္စများက မစတင်သေးသော်လည်း သူက ချီရွှင့်အတွက် လမ်းခင်းပေးထားပြီဖြစ်မှန်း သိသာနေသည်။

ဤလောကတွင် အတွဲအများစုက လမ်းခွဲသည့်အခါ ညှိမရပဲ ရန်ဖြစ်ကြသည်က များသည်။ သူနှင့်ချီရွှင့်တို့ကြား ထိုသို့ အဆုံးမသတ်စေချင်ပေ။

ချီရွှင့်က အံ့သြသွားပုံပေါ်သည်။

အမှန်တွင်က ပိုင်ရှီးက သူ့ လူမှုပတ်ဝန်းကျင်နှင့် မတူပေ။ သူ့သူငယ်ချင်းအများစုက သူနှင့် ဆင်သည်။ စိတ်ထဲတွင် ပန်းတိုင်ရှိပြီး ပြတ်ပြတ်သားသား လုပ်ဆောင်တတ်သည်။ သို့သော်လည်း ဤကောင်လေးက လုံးဝကို မတူပေ။ သူ့တွင် ပျားတို့ကို ဆွဲဆောင်နေသည့် ပန်းလေးလို ဝိုင်းဝိုင်းလည်ခံနေရသည့် မျက်နှာလှလှလေး ရှိသည်။ ထို့ပြင် မိသားစုနောက်ခံကောင်းကောင်း ရှိသော်လည်း စိတ်ထားကောင်း၍ အချင်းများရသည်ကို မကြိုက်ပဲ သူနှင့်တွေ့သည့်သူတိုင်းကို နှစ်သိမ့်အားပေးနိုင်သည့် သူမျိုးဖြစ်သည်။

သူက ပိုင်ရှီး၏ စကားများကို မကန့်ကွက်မိပေ။

မီးအိမ်ရှည်က လူငယ်လေး၏ ဦးခေါင်းထက် တွဲကျနေသည်။ အဝါရောင် မီးရောင်နွေးနွေးက ပိုင်ရှီးကို လွှမ်းခြုံထား၍ အကြည့်မလွှဲနိုင်လောက်အောင် မျက်စိပသာဒဖြစ်စရာ ကောင်းလှသည်။

" ဒါဆို အတည်ဖြစ်သွားပြီနော်..." သူက ရေခဲနှင့် နှင်းတို့ အရည်ပျော်နိုင်စွမ်းရှိသည့် အပြုံးမျိုးနှင့် ပြုံးပြလာသည်။ သူက မျက်လုံးထောင့်တို့ တွန့်ကွေးသွားပြီး နှုတ်ဆက်လာလေသည်။

" မင်္ဂလာပါ...ကိုယ့်ချစ်သူလေး..."

သူက လက်ထဲက ဖန်ခွက်ကို ပိုင်ရှီး၏ခွက်နှင့် တိုက်လိုက်ရာ ရေခဲတုံးသံများ ထွက်လာသည်။

ထိုရိုးရှင်းသည့် စာလုံးလေးတစ်လုံးက ပိုင်ရှီးခေါင်းထဲ မီးရှူးမီးပန်းများ ပေါက်သွားစေသည်။ ထိုနာမည်က ထိုမျှလောက် ဖျက်ဆီးနိုင်လိမ့်မည်ဟု မသိခဲ့ပေ။

သူ လက်ထဲကဖန်ခွက် မလွတ်ထွက်သွားအောင် တတ်နိုင်သလောက် ထိန်းထားရသည်။

လွန်ခဲ့သော သုံးရက်က သူ တကယ်ကြီး ချီရွှင့်နှင့်အတူ ရှိနိုင်လိမ့်မည်ဟု မထင်ထားခဲ့ပေ။

သူက နှုတ်ခမ်းကိုက်လိုက်ရင်း ချီရွှင့်ကို နှင်းဆီရောင်သန်းနေသော ပါးမို့မို့လေးများနှင့်ပြုံးပြလာသည်။

"မင်္ဂလာပါ...ကျွန်တော့် ချစ်သူ..."

သူက ချီရွှင့်စကားအတိုင်း လိုက်ပြောလိုက်သော်လည်း တွေ့သွားမှာစိုးသည့် လျှို့ဝှက်ချက်လေးလို တိုးတိုးလေး ပြောလိုက်သည်။

သူ သီးသန့်စားသောက်ဆိုင်ထဲမှ ထွက်လာသည်အထိ ပိုင်ရှီးမှာ ခြေလှမ်းတို့ ပေါ့ပါးသွက်လက်နေ၍ တိမ်ပေါ် လမ်းလျှောက်ရသလို ခံစားမိသည်။

ပိုက်ဆံရှင်းပြီးနောက် ချီရွှင့်က ရောက်လာပြီး သူ့လက်ကို ဆုပ်ကိုင်လာသည်။ သူတို့နှစ်ယောက်က သာမန်စုံတွဲလို လက်ချောင်းချင်း ထပ်ထားကြသည်။

ချီရွှင့်က ယခုအပြုအမူက ပြောဖို့လိုလောက်သည့် ကိစ္စမျိုး မဟုတ်သည့်အလား ဘာမှဖြစ်သွားပုံမရပေ။ တစ်ဖက်တွင်ဖြင့် ပိုင်ရှီးက အောက်စီဂျင် အလုံအလောက်မရ၍ ၁၂၀ကို ဖုန်းဆက်ပြီး အကူအညီတောင်းရတော့မည်ဟု တွေးနေမိသည်။

သေချာပေါက် လက်ကိုင်သည်က ချစ်သူများကြား ထူးဆန်းသည့် ကိစ္စ မဟုတ်မှန်း သူသိသည်။ သူနှင့် ချီရွှင့်က ထိုညက အရက်မူးပြီး sexလုပ်ပြီးကြပြီဖြစ်၍ လက်ကိုင်သည်က စာမဖွဲ့လောက်သော်လည်း သူက အတွေ့အကြုံမရှိသေး၍ ကြောင်တောင်တောင်နိုင်နေ၏။

သူက ရေရွတ်လိုက်သည် " ကျွန်တော် နည်းနည်း တစ်ခုခု ခံစားမိနေတယ်..."

ထိုစကား ကြားသောအခါ ချီရွှင့်က ခေါင်းငုံ့လိုက်ပြီး မေးလိုက်သည် " ဘာလို့လဲ..."

" အရာအားလုံးက အစစ်အမှန်မဟုတ်သလိုပဲ..." ပိုင်ရှီးက ရိုးရိုးသားသား ပြန်ဖြေလာသည် " ရုတ်တရက်ကြီး ခင်ဗျားနဲ့ အတူရှိရမယ်လို့ မထင်ထားခဲ့ဘူး...အိပ်မက်မက်နေသလိုပဲ..."

သူ့မျက်နှာထက် ရှက်ရိပ်သန်းလာကာ မျက်လုံးချင်းဆုံလိုက်ရင်း ပွင့်ပွင့်လင်းလင်း ပြောလိုက်သည်

" ကျွန်တော် ဘာလုပ်ရမှန်း မသိတော့တဲ့အထိ ခင်ဗျားကို အရမ်း သဘောကျတယ်..."

သူက ချီရွှင့်ရှေ့တွင် အရူးလို ဖြစ်ခဲ့ပြီးပြီဖြစ်၍ ယခု ချီရွှင့်ရှေ့တွင် ဝန်ခံဖို့ မကြောက်တော့ပေ။

သူက ချီရွှင့်ကို တောက်တောက်ပပ မျက်လုံးများနှင့် ကြည့်နေမိသည်။ သူ၏ ဖြူစင်သည့် မျက်လုံးလေးများက ကြည်လင်နူးညံ့နေသည်။ သူက အသက်နှစ်ဆယ်ကျော် ရှိနေသော်လည်း ကောင်းကောင်း ကာကွယ်ပေးခံခဲ့ရ၍ထင် အတွေ့အကြုံမရှိသည့်ပုံပင်။

ချီရွှင့်က သူ့ရင်ကို တစ်ခုခု လာကုတ်သလို မနူးမညံ့ ခံစားချက်တစ်ခု ရုတ်တရက် ခံစားမိသည်။

သူက ပိုင်ရှီးနှင့် ဆက်ဆံရေးတစ်ခု တည်ဆောက်ဖို့ ဆုံးဖြတ်လိုက်သည်က သူပြောခဲ့သလို သင့်တော်နေ၍ပင်။ သူက ပိုင်ရှီးနှင့်အတူရှိလျှင် သက်တောင့်သက်တာ ဖြစ်မိသော်လည်း ချစ်သည်တော့ မဟုတ်ပေ။

သူက အချစ်ကို အရေးကြီးသည်ဟု သတ်မှတ်ထားသည့်သူ မဟုတ်ပေ။

ယနေ့တွင် လရောင်က တောက်ပနေပြီး သူ့ကို ကြည့်နေသည့် မျက်လုံးလေးများထက် ရောင်ပြန်ဟပ်နေ၍ သူ့ဆုံးဖြတ်ချက် မှန်သွားသလို ခံစားမိသည်။

သူက ပိုင်ရှီး၏ နူးနူးညံ့ညံ့ ဆံပင်လေးကို အသာပုတ်ပေးလိုက်ရင်း လေသံတိုးတိုးလေးနှင့် ပြောလိုက်သည်

" မင်း အရမ်း စိတ်လှုပ်ရှားနေဖို့ မလိုပါဘူး...မင်း လိုချင်တာမှန်သမျှ လုပ်နိုင်တယ်...အရမ်းကြီး စဥ်းစားမနေနဲ့.."

ပိုင်ရှီးက သူ့ကို မော့ကြည့်လိုက်သည်။ ထိုအခိုက် သူက လွန်ခဲ့သည့် ခြောက်နှစ်က ဆောင်းညတစ်ညဆီ ပြန်ရောက်သွားသလို ခံစားမိသည်။ သူ့ဥယျာဥ်၏ အပေါက်ဝတွင် ဇီးပန်းပွင့်များ ပွင့်နေကြပြီး ပန်းဖူးလေးများမှ လွင့်ပျယ်လာသော အနံ့သင်းသင်းလေးများက လေထဲ ရောပါနေ၏။ အသက်နှစ်ဆယ်အရွယ် ချီရွှင့်က သူ့ကို ကြည့်ပြီး ယခုလို ပြုံးပြနေခဲ့သည်။

သူက မိန်းမောသွားပြီး စကားတစ်ခွန်း ပြောမိသွားသည် " ဒါဆို ခင်ဗျားကို နမ်းချင်တယ်..."

သူ ပြောပြီးသည်နှင့် သူ့ခေါင်းထဲ ဗလာဖြစ်သွားပြီး လျှာကိုက်ဖြတ်လိုက်ဖို့ ဆုတောင်းမိသည်။

သူက နှစ်ပေါင်းများစွာ တိတ်တခိုး ချစ်ခဲ့ရ၍ ပုံမှန်မဟုတ်တော့ပေ။ စောစောက လက်ကိုင်မိတုန်းကလည်း အပျိုဖြန်းလေးလို ရှက်သွေးဖြာနေခဲ့ပြီးမှ အခု ဘယ်လိုလုပ်ပြီး စိတ်ထဲက ဆန္ဒတွေကို ပြောနိုင်သွားရတာလဲ။

ဤသည်က သူ့ကို နည်းနည်းရရုံနှင့် မကျေနပ်ဘဲလောဘကြီးသွားသည့်ပုံပေါက်စေသည်။

သူက ပြန်ပြင်ပြောဖို့ နည်းလမ်းတစ်ခု ရှာလိုက်သည်

" အာ...ကျွန်တော် စကားပြောမှားသွားတာ...ကျွန်တော် မပြောလိုက်ဘူးလို့ပဲ သတ်မှတ်လိုက်ပါ...ကျွန်တော် တွေးခဲ့တာက..."

သူ့စကားမဆုံးခင် ချီရွှင့်က ခေါင်းငုံ့လာပြီးပေပြီ။

သူ့ကို ဖမ်းပြီး နမ်းရှိုက်လာသည်။

ယနေ့က အောက်တိုဘာ ၂၃ရက်ဖြစ်ပြီး နှင်းကျနေ၍ ရာသီဥတုက အအေးပိုင်းကို ရောက်နေသည်။

ချီရွှင့်၏ နှုတ်ခမ်းများက နွေးထွေးပြီး နူးညံ့နေသည်။

ပိုင်ရှီး၏ မျက်လုံးအစုံ ပြူးကျယ်သွားပြီး အသက်ရှူသံပင် ရပ်နေမိသည်။

သူက ချီရွှင့်၏ မျက်တောင်ထူစိပ်စိပ်များနှင့် နီးကပ်နေ၍ တစ်လောကလုံး တိတ်ဆိတ်သွားသလိုပင်။

ယနေ့ည၏ လမင်းကြီးက လှပနေသည်။ ချီရွှင့်က ပနံသင့်စွာ နူးညံ့ပြီး နှစ်လိုဖွယ်ကောင်းနေသည်။

သူ၏ ခြောက်နှစ်တာ တိတ်တခိုးအချစ်က နောက်ဆုံးတွင် အချစ်ဦးနှင့် အတူရှိနိုင်ပြီဖြစ်သည်။

***

ထိုအနမ်းကြောင့် ပိုင်ရှီးမှာ ထိုညက ကောင်းကောင်း အိပ်မပျော်နိုင်ခဲ့ပါချေ။ သူက ချီရွှင့်အကြောင်း တွေးပြီး ဟိုလှည့်သည်လှည့်နှင့် ပြုံးစိစိဖြစ်နေခဲ့သည်။

သူက ချီရွှင့် သူ့ကို နမ်းပြီးနောက် စိုက်ကြည့်လာသည့်အခိုက် သူ့မျက်တောင်ဖျားလေးများပေါ်က ခပ်ဖွဖွ အထိအတွေ့ကို စဥ်းစားနေမိသည်။ သူတို့က မြေအောက်ကားပါကင်တွင် လမ်းခွဲကြသည့်အချိန် ချီရွှင့်က သူ့ကို ဖက်ထားခဲ့သည်။ သူ့နှလုံးသားက ခုန်ပေါက်ပြေးလွှားနေသည့် ဒရယ်လေးလို မနားတမ်း ခုန်ပေါက်နေခဲ့သည်။ သူက ညတွင်းချင်း ဖြူဖြူစင်စင် လူငယ်လေးတစ်ယောက် ပြန်ဖြစ်သွားသည့်အတိုင်းပင်။

ယနေ့ သူ့တိုက်ခန်းတွင် နေသည့်အတွက် ကျေးဇူးတင်ရမည်။ မဟုတ်လျှင် သူ၏ ကယောင်ချောက်ချား ရယ်သံကြီးကို လူတိုင်း ကြားသွားနိုင်ပေသည်။

လွန်ခဲ့သော နှစ်ရက်က နာကျင်ခံစားရမျှက ဘာမှမဟုတ်တော့သလို ခံစားရသည်။ သူနှင့် ချီရွှင့်၏ ယခုဆက်ဆံရေးက အသားပေါင်မုန့်ကြီးကြီးလို ဖြစ်နေ၍ ရူးနေသည့်သူကသာ ပစ်ချလိမ့်မည်။

နောက်တစ်နေ့တွင် သူက မျက်ကွင်းညိုကြီးများနှင့် ထလာ၍ မိတ်ကပ်နှင့် ဖုံးထားလိုက်ရ၏။ သူက အိပ်ရေးမဝခဲ့သော်လည်း ထိုပျော်စရာ အဖြစ်အပျက်ကြောင့် စိတ်ကောင်းဝင်နေပြီး တက်ကြွနေလေသည်။

ချီရွှင့်ကောင်လေး ဖြစ်လာရသည်က ပိုင်ရှီးတွေးထားသည်ထက် အဆတစ်သောင်းမက ပိုကောင်းနေသည်။

အစပိုင်းတွင် သူက ယခုဆက်ဆံရေးကို မရရှိခင်က သူငယ်ချင်းဆိုသည့် စည်းကို ထိန်းသိမ်းထားပြီး အလျင်စလို မလုပ်ရဲပေ။ သို့သော်လည်း နောက်ပိုင်းရက်များတွင် ချီရွှင့်က သူ့ကို အလုပ်ဆင်းလျှင် လာကြိုတတ်သည်။ ချိန်းတွေ့နေသည့်အချိန်တွင်လည်း သာမန်စုံတွဲများလို လက်ကိုင်ပြီး ထိုလူကြီးက သူ့ကို ဖက်လိုက်နမ်းလိုက် လုပ်တတ်ပြီး ညတိုင်းလည်း ဆုတောင်းပေးတတ်သည်။ ထို့ကြောင့် ပိုင်ရှီး၏ ဦးနှောက်လေးမှာ လိုက်မမှီနိုင်ဖြစ်ခဲ့သော်လည်း ဖြေးဖြေးချင်း လက်ခံနေရသည်။

နေ့လည်စာ စားသည့်အချိန် သူလည်း ချီရွှင့်ဆီ မက်ဆေ့ချ် ပို့သည်။ သူတို့က အကြောင်းအရာ ထွေထူးမရှိလည်း ခဏခဏ စကားပြောဖြစ်ကြသည်။ သူ့ယခင်ပုံစံအတိုင်းဆို ချီရွှင့်ကို နှောင့်ယှက်မိမှာ မဟုတ်ပေ။ မိတ်ဆွေဆိုသည်က ထိုအဆင့်အထိ မသွားသင့်ဟု သူ့ဘက်က ယူဆထားသောကြောင့် ဖြစ်သည်။

သို့သော်လည်း ယခုတွင် ချီရွှင့်က သူ့မက်ဆေ့ချ်များကို စိတ်ရှည်လက်ရှည် စာပြန်ပေးပြီး ပိုင်ရှီးတောင်းဆို၍ သူ့စားပွဲပေါ်က အိုးစိုက်ပန်းပင်များသစ်များကိုလည်း ဓါတ်ပုံရိုက်ပို့ပေးလေသည်။

ပိုင်ရှီး၏ နှုတ်ခမ်းတို့ တွန့်ကွေးပြီး ပြုံးနေမိသည်။ သူက ကော်ဖီသောက်ချင်၍ နားနေခန်းထဲ ဝင်သွားလိုက်ချိန်ထိ အပြုံးမရပ်နိုင်သေးပေ။ သူ့နားက လုပ်ဖော်ကိုင်ဖက်များကလည်း သူ ဒိတ်နေသလား သံသယဝင်လာကြတော့သည်။ ယခု သူ၏ ကျေနပ်နေသော ပုံစံကို ကြည့်ရင်း ထိုကိစ္စ ဖြစ်ဖို့များမှန်း သိနေကြ၍ အပြုံးလေးနှင့် စနောက်လာကြသည်

" မစ္စတာပိုင်...ဘာလို့ ဒီလောက်တောင် ပျော်နေတာလဲ...တစ်ယောက်ယောက်နဲ့ တွေ့နေတာလား..."

ပိုင်ရှီးက ထိုမေးခွန်းကို စိတ်မခုသွားပေ။ သူ့မျက်နှာကို စမ်းကြည့်လိုက်ရင်း ပြန်ဖြေလိုက်သည်

" ကျွန်တော်က အဲ့ဒီလောက်တောင် သိသာနေတာလား..."

လုပ်ဖော်ကိုင်ဖက် အမျိုးသမီးက ကော်ဖီတစ်ငုံ သောက်လိုက်ရင်း စနောက်လာသည်

" မစ္စတာပိုင်ရဲ့ မျက်နှာမှာ အကုန်ပေါ်နေလို့လေ..."

ပိုင်ရှီးက ပြန်လည် ချေပမလာပေ။ သူက စားပွဲစွန်းတွင် မှီရင်း ဖြေလာသည် " သိပ်မကြာသေးပါဘူး...အချိန်အကြာကြီး သဘောကျခဲ့ရတဲ့သူနဲ့လေ..."

သူမက ပြုံးသာပြုံးနေပြီး ဆက်မမေးလာပေ။ သူမက ဤသည်ကို ကောင်းကောင်းသိသည်။ အချစ်ဦးနှင့် တွဲနိုင်ခြင်းက လူတိုင်းကို သာယာရစ်မူးစေတတ်သည်။

“ဂုဏ်ယူပါတယ်နော်..." သူမက ခွက်မြောက်လိုက်ရင်း သူ့ကို ဂုဏ်ပြုပေးလာသည်။

ကော်ဖီပြန်ဖြည့်လိုက်ရင်း ပိုင်ရှီးက သူ့ရုံးခန်းဆီ ပြန်သွားလိုက်သည်။ သူက စာမူကို ဖတ်နေစဥ်အတွင်း ဖုန်းမြည်လာလေသည်။

သူ၏ ငယ်သူငယ်ချင်းနာမည်က ခေါ်ဆိုသူနေရာတွင် ပေါ်နေ၏။ လျန်စုန့်...

ပိုင်ရှီးက ဖုန်းမျက်နှာပြင်တွင် ပေါ်လာသည့် နာမည်နှစ်လုံးကို ကြည့်နေရင်း ဤရက်ပိုင်း ချီရွှင့်နှင့်ပျော်နေ၍ အရင်းနှီးဆုံးသူငယ်ချင်းကို လုံးလုံးမေ့သွားခဲ့မှန်း အမှတ်ရသွားသည်။

ဘယ်လောက်တောင် ကြီးလေးတဲ့ ပြစ်မှုကို ကျူးလွန်မိခဲ့တာလဲ။

ကောလိပ်မှ မိတ်ဆွေဖြစ်ခဲ့သည့် ချီရွှင့်နှင့်မတူပဲ သူနှင့်လျန်စုန့်က စစ်မှန်သည့် ကစားဖော်များ ဖြစ်ကြသည်။ သူတို့က မိဘများအတိုင်း သူငယ်ချင်းဖြစ်ဖို့ ကံပါလာပြီး ကြီးလာသည်ထိ အဆက်အသွယ်မပြတ်ခဲ့ပေ။ သူတို့က မူလတန်းမှ ကောလိပ်အထိ အတူတူပညာသင်ခဲ့ကြ၍ သူတို့ဆက်ဆံရေးက စိန်အဆင့်အဖြစ် သတ်မှတ်လို့ရသည်။

သူက ပထမနှစ်တွင် လျန်စုန့်ကို ပြောပြခဲ့သော်လည်း သူတို့နှစ်ယောက်ကြားက ဆက်ဆံရေးက ပြိုလဲမသွားခဲ့ပေ။ လျန်စုန့်က အချိန်ခဏလောက် ရုန်းကန်ခဲ့ပြီးနောက် သူ့ကို လက်ခံပေးခဲ့ကာ ပြန်ပြီး ထောက်ပံ့ပေးခဲ့သည်။

ဤအတွက်ကြောင့် လျန်စုန့်က သူ ချီရွှင့်ကို ချစ်နေမှန်း သိသည့်သူ ဖြစ်လာပြီး လွန်ခဲ့သည့် ခြောက်နှစ်အတွင်း သူ့ဘေးတွင် နေပေးခဲ့သည်။

သူတို့က အမြဲလိုလို သုံးလေးငါးရက်လောက် အတူတူရှိပြီး ဂိမ်းကစားလေ့ရှိသည်။ ယခု သူက လျန်စုန့်ကို ရှစ်ရက်ကိုးရက်လောက် မဆက်သွယ်ပဲ နေမိသည်။

သူ ဖုန်းကိုင်လိုက်ချိန် လျန်စုန့်၏ မေးသံကို ကြားလိုက်ရသည်

" ဟယ်လို ...ရှီးရှီး...မင်း နောက်ပိုင်း ဘာတွေလုပ်နေတာလဲ...မင်းဆီက ဘာမှလည်း မကြားရလို့လေ....ဒီည အသားကင်သွားစားကြမလား..."

လျန်စုန့်၏ အသံက အနည်းငယ် အက်ကွဲနေသည်။ ယခုမှ အိပ်ယာထလာသည့်အသံနှင့် တူသည်။ ပန်းချီဆရာတစ်ယောက် ဖြစ်သည့်အတွက် သူ၏ အလုပ်လုပ်ချိန်နှင့် ပြင်ပချိန်က တစ်သတ်မတ်တည်းမရှိပေ။

ပိုင်ရှီးက ဖုန်းကိုင်ထားရင်း အမှန်အတိုင်း ပြောလိုက်ရမလား မသိပေ။

သူက ချီရွှင့်နှင့် ချစ်သူဖြစ်နေကြောင်းကို အမြွှာညီမနှင့် သူငယ်ချင်းများအပါအဝင် မည်သူ့ကိုမှ ပြောမပြထားပေ။ သူက ဤကိစ္စကို တမင်သက်သက်ကြီး မကြေညာချင်ပေ။ ချစ်သူဖြစ်ပြီး ရက်နည်းနည်း ကြာနေသည့်တိုင် သူက မတည်ငြိမ်နိုင်သေးပဲ မသင့်တော်ဘူးဆိုသည့် စာတန်းကြီးက သူ့ခေါင်းပေါ် ပိနေ၍ ပြောပြရမှာ ကြောက်နေမိသည်။ သူ နောက်ပိုင်း ချီရွှင့်နှင့် လမ်းခွဲလိုက်ရင် ပြဿနာပဲ ဖြစ်သွားပေလိမ့်မည်။

သို့သော်လည်း လျန်စုန့်က မတူပေ။ သူ၏ အချိန်အတော်ကြာ တိတ်တခိုးအချစ်ကို မျက်မြင်တွေ့ခဲ့သူဖြစ်ပြီး သူနှင့် အရင်းနှီးဆုံး သူငယ်ချင်းဖြစ်သည်။ သူတို့နှစ်ယောက်ကြားတွင် လျို့ဝှက်ချက် မရှိပေ။

ပြဿနာလေးတစ်ခုသာ ရှိသည်။

လျန်စုန့်က ချီရွှင့်ကို သိပ်သဘောမကျပေ။

🦋🦋

Prev Next