MM Story Teller

Chapter 98

Viewers 9k

👻Chapter 98

ရှီကျားမှာ ရုတ်ချည်းအဖြေတစ်ခုကိုစဥ်းစားမိလေသည်။ သူသည်မျက်ရည်များနှပ်ရည်များနှင့် ငိုကြွေးနေသောစုန့်စုန့်ကို ငုံ့ကြည့်လျက်ဆိုလိုက်သည်။

"မင်း ဟိုငါးခြောက်ကိုစားမိလို့တော့မဟုတ်ပါဘူးနော်"

တချို့အရာများမှာ အချိန်ဆွဲ၍မရချေ။ စုန့်စုန့်မှာ ညလယ်ကြီးတွင် ဤသို့ဖြစ်လာသည်။ ရှီကျားနှင့်ယဲ့ကျင်းကျီမှာ ထိုကြောင်ကလေးအား အနီးအနားမှ ဆေးခန်းတစ်ခုကိုခေါ်သွားရန်သာတတ်နိုင်လေသည်။

ရှီကျားမှာ ထိုငါးခြောက်ကို စုန့်စုန့်အားမကျွေးခင်၌ သူကိုယ်တိုင်မြည်းကြည့်ခဲ့သေးသည်။ ၄င်းမှာ ထူးထူးခြားခြားအရသာနှင့် ငါးခြောက်လေးဖြစ်သည်။သူဟိုတယ်မှ ၄င်းကိုမှာခဲ့စဥ်က ကြောင်ကိုကျွေးရန်ဟု သေသေချာချာမှာခဲ့သေးသည်။

ကြည့်ရတာCစီရင်စုကကြောင်တွေက သဘာ၀ကိုဖီဆန်ပြီး အစပ်စားနိုင်တာလား..

ဤတောင်များအနီးတွင် ဆေးရုံတစ်ခုသာရှိလေသည်။ အခြားတိရိစ္ဆာန်ဆေးကုခန်းများမရှိချေ။ အခြားရွေးချယ်စရာမရှိလေရာ ရှီကျားမှာ စုန့်စုန့်ကိုခေါ်လျက် ထိုနယ်ဆေးရုံလေးကိုသာခေါ်သွားရတော့သည်။ သူဆေးရုံကိုရောက်စဥ်မှာပင် လက်ထောက်ဒါရိုက်တာချန်နှင့်ဆုံလေသည်။

သူ့ကိုမြင်သည်နှင့်လက်ထောက်ဒါရိုက်တာချန်မှာလည်း အလွန်အံ့အားသင့်သွားခဲ့သည်။ သူကလျှောက်လာပြီး မေးခဲ့သည်။

"မင်းလည်း ဖန်းမော့ထင်ဒဏ်ရာရတာကိုသိတာလား"

ရှီကျားတန့်သွားမိသည်။

"ဒဏ်ရာရတာလား"

လက်ထောက်ဒါရိုက်တာချန်မှာလည်း သူမသိကြောင်းနားလည်သွားခဲ့သည်။ သူကအနားသို့ကပ်လျက် တီးတိုးဆိုလာသည်။

"အင်း..မဟုတ်ရင်တောင် ငါမင်းကို အသိပေးတော့မလို့ပဲ..ဖန်းမော့ထင်ဓါတ်ပုံရိုက်နေတုန်း စတူဒီယိုပြိုကျပြီး သူ့ကိုပိပြီးသွေးတွေအတော်ထွက်သွားတယ်လေ..ကံကောင်းလို့ လူကဘာမှသိပ်မဖြစ်သွားလို့ပေါ့..သူနဲ့မင်းနဲ့ရိုက်ရမယ့်အခန်းကိုပဲနောက်ရွေ့ရမယ်ထင်တယ်..မင်းဒီကိစ္စကိုအခြားဘယ်သူ့ကိုမှပြောလို့မဖြစ်ဘူးနော်..ဖန်းမော့ထင်က ဘာအရိုးမှကျိုးမသွားဘူး..သူ့မန်နေဂျာပြောတာတော့နောက်အပါတ်လောက်ဆိုရင်တောင် ရိုက်ကူးရေးပြန်စလို့ရပြီတဲ့..မီဒီယာတွေသိသွားရင်မကောင်းဘူး"

ရှီကျားလည်း ခေါင်းညိတ်လိုက်လေသည်။

လက်ထောက်ဒါရိုက်တာချန်မှာ သူ့ကိုအနှောင့်အယှက်မပေးတော့ပဲ ရုပ်ရှင်ဧကရာဇ်ဖန်းမော့ထင်ကို လူနာမေးရန်၀င်သွားတော့သည်။

ရှီကျားနှင့်ယဲ့ကျင်းကျီမှာ စုန့်စုန့်ကိုပြရန်ဆရာ၀န်တစ်ယောက်ကိုရှာလိုက်လေသည်။ ထိုဆရာ၀န်မှာ တိရိစ္ဆာန်များမည်သို့ကုသရမည်ကို အမှန်တကယ်သိနေခဲ့သည်။ သူကကြောင်ကလေး၏ပူဖောင်းဖောင်းဗိုက်ကလေးနှင့် မျက်ရည်များပွနေသော မျက်နှာလေးကိုကြည့်ကာ အကြင်နာမဲ့စွာဆိုလာခဲ့သည်။

"သူအစပ်စားမိတာ..ဆေးရေးပေးလိုက်မယ်. အပြန်ကျတိုက်လိုက်ရင်ရတယ်..ဒီကြောင်ကအစပ်မစားနိုင်ဘူး..သတိထားမှရမယ်"

ရှီကျားနားမလည်ချေ။

"ဒေါက်တာ ကျွန်တော်တို့သူ့ကို ငါးခြောက်လေးနည်းနည်းပဲကျွေးလိုက်တာပါ..မကျွေးခင်ကတောင်ကျွန်တော်မြည်းကြည့်လိုက်သေးတယ်..မစပ်ပါဘူး"

ဒေါက်တာမှာ ဆေးစာကိုကျော့ကျော့မော့မော့ရေးနေရင်းဆိုလာခဲ့သည်။

"မင်းစားနိုင်တဲ့အစပ်ပမာဏကို သူမစားနိုင်ဘူး..သူကကြောင်ဖြစ်နေလို့..ဟုတ်ပြီနော် သူ့ကိုကြောင်စာကျွေးပြီး ဆေးနည်းနည်းတိုက်လိုက်..သက်သာသွားလိမ့်မယ်"

ရှီကျားမှာ ဆေးစာကိုယူလျက် ဆေး၀ယ်ရန်ထွက်သွားတော့သည်။

အရာအားလုံးပြီးစီးချိန်တွင် မနက်၅နာရီပင်ထိုးနေခဲ့ချေပြီ။ နောက်တစ်နေ့တွင် သူ့တွင်ရိုက်ရမည့်အခန်းမရှိလေရာ ရှီကျားစိတ်ပူမနေခဲ့ချေ။ စုန့်စုန့်ကိုချီလျက် ဆေးရုံပန်းခြံတွင်ထိုင်ချလိုက်လေသည်။ စုန့်စုန့်အိပ်ပျော်သွားသည်ဟု အတည်ပြုပြီးမှ ထိုအကောင်လေးကိုချီလျက် ပြန်ရန်ပြင်လိုက်သည်။

"မင်းသူ့ကိုသိပ်ဂရုစိုက်တာပဲ .."

အမျိုးသားတစ်ဦး၏ညင်သာသောလေသံကိုကြားလိုက်ရသည်။

ရှီကျားလှည့်ကြည့်လိုက်လေသည်။ ထို့နောက်အပြုံးလေးနှင့်ဆိုလိုက်သည်။

"ဒါပေါ့ ဂရုစိုက်တာပေါ့...ဒီနှစ်တွေထဲ ဒီကောင်လေးပဲကျွန်တော့်ကိုအဖော်လုပ်ပေးနေတာလေ"

ယဲ့ကျင်းကျီမေးလိုက်သည်။

"ချန်းထောင်ကရော"

ရှီကျားပြုံးလိုက်သည်။

"ထောင်ကျစ်မှာက သူ့အလုပ်နဲ့ အခြားသူငယ်ချင်းတွေရှိသေးတယ်လေ..သူကကျွန်တော်နဲ့ပဲအမြဲနေလို့မရဘူး..ဘွဲ့အခမ်းအနားပြီးတဲ့အဲဒီညက ကျွန်တော်ညဘက်အိမ်ပြန်လာတုန်း ဒီကောင်လေးက ကျွန်တော့်ခြေထောက်ကို လာဖက်တာလေ..ဘယ်လိုလုပ်လုပ်မလွှတ်ဘူးပဲ...ကျွန်တော်လည်း ကံကြမ္မာပဲလို့တွေးလိုက်မိပါတယ်..ဘွဲ့ယူပြီးတော့ ထောင်ကျစ်က ဟိုဟိုဒီဒီပြေးလွှားနေရတော့ မတွေ့နိုင်တဲ့အချိန်မှာပဲ သူကရောက်လာတာ"

မနက်ခင်းရောင်နီပျိုးချိန်နောက်ခံနှင့် ရှီကျားမှာ အနက်ရောင်ကြောင်ကလေးကိုကိုင်လျက် ပြုံးနေသည်မှာ အလွန်အေးချမ်းကာလှပလွန်းလှသည်။

ယဲ့ကျင်းကျီ တိတ်တဆိတ်ကြည့်နေခဲ့မိသည်။ ရှီကျားနောက်ထပ်စကားဆိုလာသည်နှင့် ယဲ့ကျင်းကျီမှာ ချက်ချင်းအကြည့်လွှဲလိုက်ပြီး သူ၏နားရွက်ဖျားများမှာနီရဲနေတော့သည်။

ပန်းခြံမှာဆေးရုံ၏ကျောဘက်တွင်တည်ရှိလေသည်။ အရှေ့၀င်ပေါက်သို့ရောက်ရှိရန် ဆေးရုံထဲပြန်၀င်ရန်လိုအပ်သည်။ ရှီကျားမှာ စုန့်စုန့်ကိုချီလျက်ယဲ့ကျင်းကျီနှင့်စကားပြောရင်းပင် ဆေးရုံထဲပြန်၀င်လာခဲ့လေသည်။ မနက်ဖြန်တွင်သူ့တွင်ရိုက်ကူးစရာမရှိသဖြင့် အနီးအနားသို့သွားကာလည်ပတ်နိုင်ကြောင်းပြောနေစဥ်မှာပင် သူ၏လေသံမှာရုတ်ချည်းရပ်တန့်သွားခဲ့လေသည်။ သူသည်အဝေးတနေရာထံသို့လေးနက်စွာကြည့်လိုက်လေသည်။

ယဲ့ကျင်းကျီမှာ ရှီကျားကိုမျက်နှာချင်းဆိုင်လျက်ရှိလေရာ သူ၏ကျောနောက်ဘက်ကိုကျော်လျက် ရှီကျားမှစိုက်ကြည့်နေခြင်းဖြစ်လေသည်။

မနက်ခင်းနေမင်းမှာထွက်လာလုဆဲဆဲပင်။ သို့သော်ဆေးရုံထဲတွင်အေးစိမ့်စိမ့်ခံစားချက်များရှိနေဆဲဖြစ်သည်။ ဟောလမ်းတစ်လျှောက်လုံးပိုးသတ်ဆေးရနံ့များလှိုင်နေခဲ့သည်။

မနက်၅နာရီအချိန် ဆေးရုံထဲတွင် ဂျူတီကျနေသောသူနာပြုတစ်ဦးမှာ ဆေးမှတ်တမ်းများကိုလှန်လှောစစ်ဆေးနေခဲ့လေသည်။ မှိန်ဖျော့ဖျော့အလင်းရောင်အောက်တွင် ထိုဟောအလွတ်ကြီးထဲတွင် ရှီကျား ယဲ့ကျင်းကျီနှင့် အနက်ရောင်အရိပ်တစ်ခုမျှလွဲလျှင် မည်သူမျှရှိမနေခဲ့ချေ။

ထိုအနက်ရောင်အရိပ်မှာ အလွန်ပုကာရှီကျား၏ဒူးသာသာရှိလေသည်။ ထိုအနက်ရောင်အရိပ်မှာ အလင်းရောင်အောက်တွင် အနက်ရောင်အခိုးအငွေ့များစုစည်းထားခြင်းဖြစ်သည်။ ယင်ယန်မျက်လုံးအကူအညီမပါပဲနှင့်တောင် ထိုဟောလမ်းတစ်လျှောက် မီးခိုးရောင်အရိပ်အယောင်တစ်ခုကိုမြင်နိုင်လေသည်။ ဘယ်ဘယ်ညာညာယမ်းရင်းထိုအရိပ်မှာ ရွေ့လျားလာနေခဲ့သည်။

ရေခဲတမျှအေးစက်သော အမူအရာနှင့် ရှီကျားမှာ ထိုအရိပ်ကိုစိုက်ကြည့်နေခဲ့လေသည်။ ထိုအနက်ရောင်အရိပ်မှာ ဆေးရုံကော်ရစ်တာမှတဆင့် ရုတ်ချည်းထောင့်ချိုးတစ်ခုကိုကွေ့လျက်ပျောက်ကွယ်သွားတော့သည်။

အတော်ကြာပြီးချိန်တွင်ရှီကျားမှာ ယဲ့ကျင်းကျီကိုကြည့်လိုက်သည်။ ယဲ့ကျင်းကျီမှာလည်း သူ့ကိုစိုက်ကြည့်နေခဲ့လေသည်

သူတို့၂ယောက်သားစကားတစ်ခွန်းမျှမဆိုခဲ့ကြချေ။ ရှီကျားမှာ အတော်ကြာတွေးပြီးနောက် မနေနိုင်ပဲမေးလိုက်မိသည်။

"ဆရာယဲ့ကျွန်တော်ငယ်ငယ်တည်းက သရဲတွေမြင်ရပါတတယ်...ဒါပေမယ့်ကျွန်တော်၂၃နှစ်ထိနေလာတာ ဒီလိုသရဲမျိုးတစ်ခါမှမမြင်ဖူးဘူး..ဒါကဘယ်လိုသရဲမျိုးလဲ"

ဆေးရုံများမှာ သေမျိုးလောကတွင် ယင်စွမ်းပင်အပြင်းထန်ဆုံးနေရာများဖြစ်သည်။ ရှီကျားမှာ ဆေးရုံတွင်သရဲများမြင်နိုင်မမြင်နိုင် ဘယ်တုန်းကမှသံသယမ၀င်ခဲ့ဖူးချေ။ သို့သော်သူယခုမြင်လိုက်ရသည်မှာ တမူထူးခြားလေသည်။

အနက်ရောင်ယင်စွမ်းအင်အလုံးကြီးပဲကို...

မှော်စွမ်းအင်နိမ့်သော လေလွင့်၀ိဥာဥ်များပင်ဖြစ်စေ လီကျားရွာမှကြောက်စရာသောမကောင်းဆိုး၀ါးပင်ဖြစ်စေ သာမာန်သရဲများတွင် သူ၏ကိုယ်ပိုင်အသွင်အပြင်ရှိကာ ဤသို့ အနက်ရောင်စွမ်းအင်အစုအဝေးကြီးဖြစ်မလာနိုင်ချေ။

ရှီကျားမှာ ဖေးယွီတစ်ခါပြောဖူးသည်ကို အမှတ်ရသွားခဲ့သည်။ ဖေးယွီမှာ သူ့ကိုကြည့်ရန် ယင်ယန်မျက်လုံးကိုဖွင့်ခဲ့ပြီး သူမြင်ခဲ့ရသည်မှာ ယင်စွမ်းအင်အစုအဝေးကြီးဖြစ်ကာ အတွင်းမှလူကိုမူမမြင်နိုင်ခဲ့ချေ။

သရဲကအရမ်းပါ၀ါမြင့်လွန်းလို့ သူ့ယင်စွမ်းအင်ကလည်း သန်မာလွန်းလို့ သူ့ပုံစံအစစ်ကိုမမြင်နိုင်တာများလား..

သို့သော်၄င်းမှာလည်း မဖြစ်နိုင်ချေ။ ၄င်းမှာသရဲဖြစ်ခဲ့လျှင်တောင် အဘယ်ကြောင့် သူ၏ဒူးမျှသာရှိကာ အရပ်ပုနေရပါသနည်း။

ယဲ့ကျင်းကျီမှာ တင်းကြပ်စွာစေ့ပိတ်ထားသော လူနာခန်းကိုလေးနက်စွာစိုက်ကြည့်နေခဲ့လေသည်။ သူအတော်ကြာအလေးအနက်တွေးနေပြီးနောက် ဆိုလာခဲ့သည်။

"အဲဒါကသရဲမဟုတ်လောက်ဘူး"

ရှီကျားရှော့ခ်ရသွားခဲ့သည်။

"သရဲမဟုတ်ဘူးလား"

ယဲ့ကျင်းကျီခေါင်းညိတ်လာသည်။

"ကိုယ့်အထင် ကုမန်ထုန်ဖြစ်လောက််တယ်"

ရှီကျားမှာ ကုမန်ထုန်ဟူသောအသုံးအနှုန်းကိုတစ်ခါမျှမကြားခဲ့ဖူးချေ။ ယဲ့ကျင်းကျီမှ သူ့အားရှင်းပြလာခဲ့သည်။

"ပြောရရင်မွေးခံထားရတဲ့ ကလေးသရဲပေါ့"

ရှီကျားမှာ ယခင်တစ်ခါ နိုင်ငံခြားသို့ခရီးထွက်ခဲ့စဥ်က သူ၏တိုးဂိုက်မှ ထိုင်းနိုင်ငံတွင်'ယင်ရှောင်ကွေ့'ဟုခေါ်သည့်ထူးဆန်းသော စုန်းအတတ်တစ်မျိုးရှိသည်ဟုပြောခဲ့ဖူးသည်။

ထိုတိုးဂိုက်မှာ ခရီးသွားအဖွဲ့တချို့ကိုလက်ခံခဲ့ဖူးပြီး ဂျပန် တောင်ကိုးရီးယား ထိုင်းနှင့် ဗီယက်နမ်အစသဖြင့်နိုင်ငံများကိုသွားဖူးခဲ့လေသည်။ သို့သော် ထိုလေးနိုင်ငံထဲတွင် တိုးဂိုက်မသွားချင်ဆုံးမှာ ထိုင်းနှင့်ဗီယက်နမ်၂နိုင်ငံဖြစ်သည်။ အဘယ်ကြောင့်မူ ထိုင်းတွင် တက္ကစီသမားများပင် ကလေးတစ္ဆေများကိုမွေးမြူထားကြ၍ဖြစ်သည်။

ထိုင်းမှ ဘတ်စ်ကားသမားများမှာ သူတို့၏ရှေ့တွင်ပန်းအိုးတစ်အိုးတင်ထားလေ့ရှိသည်။ လူအများစုမှာ ၄င်းသည်ကားတွင်းလေထုကိုသန့်စင်စေရန်သို့မဟု အလှသက်သက်ဟုသာထင်တတ်ကြသည်။ သို့သော်ထိုဘတ်စ်ဒရိုင်ဘာများမှာ ထိုပန်းအိုးရှေ့တွင်စားစရာများဆက်သတတ်ပြီး ထိုပန်းအိုးအားမိမိ၏ကလေးအလားစကားပြောကြလေ့ရှိသည်ကိုမသိကြချေ။

အဘယ်ကြောင့် ကလေးတစ္ဆေများကိုမွေးမြူကြပါသနည်း..

ထိုင်းနိုင်ငံမှလူများမှာ ကလေးတစ္ဆေများကိုမွေးမြူခြင်းက ကြောက်စရာမကောင်းဟုထင်ကြသည်။ ထိုကလေးတစ္ဆေအားကောင်းစွာမွေးမြူ၍ အရိုအသေပေးနေသ၍ ထိုကလေးတစ္ဆေမှ သူတို့အား ကျန်းမာခြင်းချမ်းသာခြင်းကိုပေးလိမ့်မည်။ အဆင်မပြေသည့်သူများက ထိုပန်းအိုးနှင့် ကလေးတစ္ဆေကိုကိုယ်စားပြုသော ရုပ်ထုကိုအသုံးပြုကြတတ်သည်။ သို့သော် ပို၍တတ်နိုင်သူများမှာ သေဆုံးသွားသော သန္ဓေသားကိုရှာလျက် ၄င်း၏အလောင်းကိုယူကာ သူတို့အိမ်တွင် နတ်စင်တစ်ခုဆောက်ထားပေးတတ်သည်။

ထိုလူများမှာ ကလေးတစ္ဆေအားနေ့စဥ်နေ့တိုင်း သွေးကျွေးလျက် သူတို့နှင့် သူငယ်ချင်းဖြစ်လာစေသည်။ ထိုလူများမှာ ဗုဒ္ဓနှင့် နတ်ဘုရားများထက် ကလေးတစ္ဆေကိုကိုးကွယ်ရန်ပိုလိုလားကာ အလေးအမြတ်ထားလျက် တစ်နေ့၃ကြိမ်ဦးချတတ်လေသည်။ ထိုလူများမှာ ကလေးတစ္ဆေကိုပျိုးထောင်ခြင်းက ကောင်းသောတစ်စုံတရာကိုပျိုးထောင်ခြင်းဟုယုံကြည်ကြလေသည်။ သို့သော်ဟွာရှားပြည်သားများ၏မျက်လုံးထဲတွင်မူ ထိုကဲ့သို့ကလေးတစ္ဆေပျိုးထောင်ခြင်းမှာ ကြောက်စရာကောင်းလွန်းလှသည်။

ယဲ့ကျင်းကျီကဆိုသည်။

"ဟွာရှားမှာ ယင်ရှောင်ကွေ့ဆိုတာ အောက်လမ်းအတတ်တစ်မျိုးပဲ...လွန်ခဲ့တဲ့နှစ်၃၀လောက်က ရှီရှန်းဂိုဏ်းကနေလမ်းလွဲသွားတဲ့ စီနီယာတစ်ယောက်ရှိခဲ့ဖူးတယ် သူကအောက်လမ်းနည်းနဲ့ ကလေးတစ္ဆေတွေမွေးပြီး ဆရာသခင်အတော်များများကိုသတ်ခဲ့တယ်..အဲဒီစီနီယာငယ်ငယ်တုန်းက ကိုယ့်ဆရာနဲ့က သူငယ်ချင်းကောင်းတွေလေ..အဲဒီအကြောင်းကို ကိုယ့်ဆရာသိတော့ ခင်မင်မှုထက် မျှတမှုကိုရှေ့တန်းတင်ပြီး စန်းရှို့ကျန်းကျွင်းနဲ့အတူ သူ့ကိုအပြစ်ပေးခဲ့တယ်"

ရှီကျားအဓိကအချက်ကိုဖမ်းဆုပ်လိုက်လေသည်။

"ယင်ရှောင်ကွေ့က အောက်လမ်းအတတ်လား..ဒီမှာကလေးတစ္ဆေကပေါ်လာတယ်ဆိုတော့ တစ်ယောက်ယောက်ကအောက်လမ်းအတတ်သုံးနေတာလား"

ယဲ့ကျင်းကျီခေါင်းခါလိုက်လေသည်။

"ခုနကတွေ့လိုက်တဲ့ ကလေးတစ္ဆေက ဟွာရှား ယင်ရှောင်ကွေ့မဟုတ်ဘူး ထိုင်းနိုင်ငံက ကုမန်ထုန်ပဲ.. ဟွာရှားမှာဆို ရွှမ်းရွှယ်လောကကသူတွေပဲ အောက်လမ်းအတတ်ကိုသိတာ..ထိန်းချုပ်လို့ရတယ်..ဒါပေမယ့်ထိုင်းမှာက ကုမန်ထုန်ဆို အောက်လမ်းနည်းသက်သက်ပဲမဟုတ်ဘူး..သာမာန်လူတွေလည်း အဲဒီနည်းလမ်းကိုသုံးတတ်တယ်..ပြောရရင်မသေမျိုးမြေခွေးကိုပျိုးထောင်နေသလိုပဲ ပြဿနာမရှိဘူးပေါ့"

၄င်းမှာမကောင်းဆိုး၀ါးမဟုတ်သကဲ့သို့ ဟွာရှားအောက်လမ်းအတတ်မှ ကလေးတစ္ဆေလည်းမဟုတ်လေရာ ရှီကျားလည်း ဂရုစိုက်မနေတော့ချေ။

ထိုအရာကိုဖမ်းခြင်းက သူ့ကိုpointရစေမည်မဟုတ်ပေ။ ၄င်းတွင်သခင်ပင်ရှိကာ တစ်စုံတစ်ယောက်ကမွေးမြူထားခြင်းလည်းဖြစ်သည်။ တပါးသူအရေးများတွင် သူ၀င်မပါလိုချေ။

ဆေးရုံမှာထွက်လာနေစဥ် ရှီကျားမှာ တစ်စုံတစ်ခုကိုစဥ်းစားမိလေသည်။

"အဲလိုဆိုမှာ ဟွာရှားမှားလည်း ကလေးတစ္ဆေတွေမွေးတဲ့သူတွေအများကြီးရှိတယ်လို့ကြားဖူးတယ်..အထူးသဖြင့် အနုပညာလောကထဲမှာလေ..တချို့နာမည်ကြီးတွေက ကလေးတစ္ဆေတွေမွေးထားကြတယ်တဲ့ အဲလိုမွေးပြီးရင် သူတို့နာမည်အရမ်းကြီးလာရောတဲ့..ဆရာယဲ့ကြားဖူးလား"

ယဲ့ကျင်းကျီခေါင်းညိတ်လိုက်သည်။

"အဲဒါကကောလဟာလသက်သက်မဟုတ်ဘူး..ကလေးတစ္ဆေမွေးတဲ့ တချို့နာမည်ကြီးတွေတကယ်ရှိတယ်..ဒါပေမယ့်သူတို့မွေးထားတာက ကုမန်ထုန်ပဲ"

ရှီကျား၏မျက်လုံးတို့လှုပ်ခတ်သွားခဲ့သည်။ သူကပြုံးလျက်ပင်ခေါင်းခါလိုက်လေသည်။

"ကုမန်ထုန်ကိုဘယ်သူမွေးနေလဲဆိုတာ ကျွန်တော်ခန့်မှန်းလို့ရပြီထင်တယ်...ဖန်းမော့ထင်ဖြစ်နိုင်တယ်...ဖန်းမော့ထင်ကဆေးရုံမှာ ကလေးတစ္ဆေကလည်းဆေးရုံမှာဆိုတော့ သိပ်ဖြစ်နိုင်တယ်"

ထိုသို့ပြောပြီးမှ ရှီကျားမှာ မနေ့ညမှ ဖန်းမော့ထင်ဒဏ်ရာရသော မတော်တဆမှုနှင့် လွန်ခဲ့သောလမှ ဖန်းမော့ထင်လှေကားပေါ်မှပြုတ်ကျသောအကြောင်းများကိုပြန်လည်သတိရလာခဲ့လေသည်။ သူထူးဆန်းသလိုခံစားလိုက်ရသည်။

ကုမန်ထုန်က သူ့သခင်ကို ကံကောင်းအောင်ချမ်းသာအောင်လုပ်ပေးတာမဟုတ်ဘူးလား..ဖန်းမော့ထင်ကျမှာ ဘာလို့အခုတလော အဆိုးတွေချည်းကြုံနေရတာလဲ..

သို့သော်သူသည်ဆရာယဲ့စကားကိုအမှတ်ရလိုက်မိပြန်သည်။ ကုမန်ထုန်အားကောင်းစွာပျိုးထောင်တတ်လျှင် အကျိုးရှိသည်။ ကောင်းစွာမပျိုးထောင်နိုင်ပါက ၄င်းမှာ ကပ်ဆိုးကြီးဖြစ်သည်ဟုပင်။

ရှီကျားမှာ ဤကဲ့သို့ကလေးတစ္ဆေမွေးသောကိစ္စမျိုးကို အမှန်တကယ်မနှစ်မြို့လှချေ။ သို့သော်သူများတကာ၏ဆန္ဒကို သူ၀င်ရောက်စွက်ဖက်လိမ့်မည်မဟုတ်။

ယခုထိုကလေးတစ္ဆေမွေးမြူရာမှ ဒုက္ခကြုံတွေ့လာရသော အခါတွင်လည်း ရှီကျားမှာ ၀င်ကူညီပေးလိုစိတ်မရှိချေ။ ဤကမ္ဘာကြီးတွင် တစ်ခုလိုချင်လျှင် တစ်ခုပေးဆပ်ရသည်။ သူကဖန်းမော့ထင်နှင့်လည်းမရင်းနှီးချေ။

ရှီကျားနှင့်ယဲ့ကျင်းကျီမှာ ဆေးရုံမှထွက်လျက် ဟိုတယ်သို့ပြန်လာခဲ့ကြသည်။

ထိုအခိုက်အတန့်တွင် ကုမန်ထုန်ဝင်သွားသည့် ဆေးရုံခန်းတစ်ခုထဲမှ ဖြူလျော်လျော်အသားအရည်နှင့် လူတစ်ဦးမှာနိုးလာခဲ့လေသည်။ သူနိုးလာသည်နှင့် သူ၏ဘေးတွင်ထိုင်စောင့်နေသော လူရွယ်လေးမှာ အလျင်စလိုဆိုလာသည်။

"ဘယ်လိုနေသေးလဲ မော့ထင် မင်းအဆင်ပြေရဲ့လား..ခေါင်းကနာနေသေးလား..ဆရာ၀န်ပြောတာတော့ မင်းပွန်းပဲ့ဒဏ်နာနည်းနည်းဖြစ်သွားတယ်တဲ့..ခေါင်းနောက်ကနည်းနည်းကွဲသွားပေမယ့်ချုပ်ပြီးသွားပြီ..ကံကောင်းလို့ သိပ်ကြီးကြီးမားမားမဖြစ်တာ..မင်းငါ့ကိုလန့်သေအောင်လုပ်နေတာပဲ"

ဖန်းမော့ထင်မျက်မှောင်ကျုံ့လိုက်မိသည်။ သူကစကားပြောလိုသော်လည်း မည်သည်မျှထွက်ကျမလာချေ။ သူကအက်ကွဲကွဲအသံနှင့်ဆိုလိုက်သည်။

"ရိုက်ကူးရေးအဖွဲ့ရော"

မန်နေဂျာမှာ သူ၏ပေါင်ကိုသူရိုက်ချလိုက်လေသည်။

"ရိုက်ကူးရေးအဖွဲ့အကြောင်းကိုစဥ်းစားနိုင်သေးတယ်လား..မင်းကိုယ်မင်းလည်းကြည့်ဦး..မင်းအခုတလောမတော်တဆဘယ်နှခုတောင် ဖြစ်နေရတာလဲ..လှေကားပေါ်ကပြုတ်ကျတယ်..လမ်းလျှောက်နေတုန်းပန်းအိုးပြုတ်ကျလာတယ်..ကားမောင်းနေတုန်း ဘရိတ်ပျက်တယ်..အရင်ကတော့ ဘာမှကြီးကြီးမားမားမဖြစ်ခဲ့ဘူးပေါ့..ထားလိုက်လို့ရသေးတယ်...မနေ့ညကဒီလိုကိစ္စကြီးဖြစ်သွားတာ..အဲဒီဘုတ်ပြားကြီးသာအကျမတော်ရင် ငါဒီနေ့မင်းနဲ့တောင်စကားပြောနေရတော့မှာမဟုတ်ဘူး...မဟုတ်သေးဘူး..ထူးဆန်းလွန်းတယ်..ငါတို့အခုCစီရင်စုမှာရောက်နေလက်စနဲ့ဗုဒ္ဓဆင်းတုတော်ကြီးကိုသွားကန်တော့ရအောင်ကွာ"

ဖန်းမော့ထင်အနည်းငယ်တွေးလိုက်ပြီးနောက် အဆုံးတွင် မငြင်းပယ်လိုက်ချေ။

👻

Prev Next