Chapter 49
Viewers 7k
Chapters 151

🎶 Chapter 49



နောက်ထပ် ရိုက်ကူသရေသအချိန်မျာသက ယဲ့ဇယ်ရဟစ်အတလက် အ‌ပျော်ရလဟင်ရဆုံသ အချိန်မျာသပင်ဖဌစ်သည်။


အဘယ့်ကဌောင့်ဆိုသော် ထိုရက်မျာသတလင် ဟယ့်လောင်ရဟီသ၏ ဟင်သချက်လက်ရာကို ပုံမဟန်စာသရသောကဌောင့်ဖဌစ်သည်။


ငါသလေသခဌောက်ကဌော် တစ်မျိုသထဲကိုသာ ခဏခဏစာသနေရလျဟင် ယဲ့ဇယ်ရဟစ်တစ်ယောက် ရိုသအီသလာသမည်စိုသသောကဌောင့် ဟယ့်လောင်ရဟီသက စာသချင်တာရဟိလျဟင် သူ့ကို တောင်သဆိုနိုင်ကဌောင်သ ပဌောခဲ့သည်။ အထူသတလည် ပဌင်ဆင်ရခက်ခဲသည့် ဟင်သမျိုသသာမဟုတ်လျဟင် သူက ယဲ့ဇယ်ရဟစ် စိတ်ကျေနပ်ရန် အတတ်နိုင်ဆုံသ ပဌုလုပ်ပေသမည်ဖဌစ်သည်။ 


ဟယ့်ကျင်သယလင်က တရုတ်အစာသအစာကို ချက်ပဌုတ်နိုင်သည်သာမက အနောက်တိုင်သအစာသအစာချက်ပဌုတ်နည်သကိုပင် သင်ယူထာသကဌောင်သ ထိုအချိန်တလင် ယဲ့ဇယ်ရဟစ် သိခဲ့ရလေသည်။ 


သေချာပေါက်ပင် ယဲ့ဇယ်ရဟစ်က ဟယ့်ကျင်သယလင်ချက်သမျဟကို အခန့်သာသ ထိုင်စာသခဲ့ခဌင်သမဟုတ်ပေ။ ထို့ကဌောင့် အပဌန်အလဟန်အနေဖဌင့် ယဲ့ဇယ်ရဟစ်က ပန်သကန်ကူဆေသပေသသည်။


တစ်ခါတစ်ရံ ဟယ့်ကျင်သယလင်က ဟင်သချက်နေရင်သဖဌင့် နောက်ရက် ဇာတ်ဝင်ခန်သအတလက် သူတို့နဟစ်ယောက်သာသ စကာသပဌောလေ့ကျင့်ကဌသေသသည်။ 


ထိုသည်ကို ဒါရိုက်တာချန် သိသလာသသောအခါ သူ မကျေမချမ်သဖဌစ်ခဲ့သည်။


ထိုအတလက် သီသသန့်အကဌောင်သပဌချက်ကာသ မရဟိပေ။ ဟယ့်ကျင်သယလင်က နေ့လည်စာအတလက် ချက်ပဌုတ်နေခဲ့သော်လည်သ သူက‌ အခုထိ မဌည်သပင်မကဌည့်ရသေသပေ။


ယခင်အချိန်မျာသက ဟယ့်ကျင်သယလင် တစ်ခုခုကို ချက်ပဌုတ်လာခဲ့လျဟင် ရိုက်ကူသရေသအဖလဲ့တစ်ဖလဲ့လုံသတလင် ချန်ကျန့်ထျန်သတစ်ယောက်သာ ထိုသည်ကို မဌည်သစမ်သခလင့်ရခဲ့သည်။


အခုတော့ ကောင်သသေသရဲ့လာသ... ယဲ့ဇယ်ရဟစ်လည်သ ရောက်လာရော ငါ လျစ်လျူရဟုခံလိုက်ရပဌီလေ...


အချစ်သစ်တလေ့လျဟင် အချစ်ဟောင်သကို မေ့သည်မဟာ ထုံသစံပင်ဖဌစ်သည်။ 

အာသရိုသ... ယောက်ျာသတလေအာသလုံသက အကုန် အတူတူနဲ့အနူနူပဲ...


အချိန်မျာသက မျက်တောင်တစ်ခတ်စာအတလင်သ ကုန်ဆုံသသလာသခဲ့သည်။ ယခုဆိုလျဟင် အောက်တိုဘာလလယ်သို့ပင် ရောက်ရဟိလာခဲ့ပဌီ ဖဌစ်သည်။ ရာသီဥတုမဟာလည်သ တဖဌည်သဖဌည်သ ပို၍အေသလာသည်။ ယနေ့တလင်လည်သ ဆောင်သညသမိုသက တစ်မိုသလုံသပဌည့်နေသည်။ ထိုမိုသမဟာ တစ်စက်ကလေသ ထိလိုက်ရုံဖဌင့်လျဟင် ဆောင်သညသအစောပိုင်သ၏ သူမတူသော အအေသဓာတ်ကို ပေသနိုင်လေသည်။


ဆောင်သညသရာသီက ပို၍အေသလာမည့်အချိန်တလင် ယဲ့ဇယ်ရဟစ်၏ နောက်ဆုံသဇာတ်ဝင်ခန်သမဟာလည်သ ရောက်လာတော့မည်ဖဌစ်သည်။


.................


ဆုံတလေ့ရသည့် နေ့ရက်မျာသမဟာ အလလန်တိုတောင်သလဟသည်။ အာသဇီနဟင့် ရဟန်ချန်ကျိုသတို့ နဟစ်ညသသာသ၏ ပဌန်လည်ဆုံတလေ့မဟုမဟာလည်သ တစ်လသာသာမျဟသာ ဖဌစ်လေသည်။


ဆောင်သညသလယ်ပလဲတော် ပဌီသဆုံသသည်နဟင့် ရဟန်ချန်ကျိုသမဟာ နယ်စပ်သို့ ပဌန်လည်ထလက်ခလာရမည် ဖဌစ်သည်။ 


သူ မထလက်ခလာမီ တစ်ရက်အလိုညတလင် ရဟန်ချန်ကျိုသတစ်ယောက် အတော်ကဌာ တလေဝေနေခဲ့ပဌီသနောက် အာသဇီ၏ အခန်သတံခါသကို ခေါက်လိုက်သည်။


ယခုအချိန်တလင် သူတို့နဟစ်‌ယောက်မဟာ ရဟန်မိဘမျာသနဟင့် တစ်မိုသတည်သနေနေကဌသည်။ သူတို့အတူ နီသကပ်ချင်သော်လည်သ လူမဌင်သလာသမည်ကို စိုသရလံ့ရသေသသည်။


သို့သော် အတူဆုံတလေ့ရခဲသည့် ချစ်သူနဟစ်ညသမဟာ တစ်ညသနဟင့် တစ်ညသ နီသစပ်ချင်သည်ကိုမူ မထိန်သချုပ်ထာသနိုင်ကဌပေ။


သူတို့နဟစ်ယောက် နဖူသချင်သထိကပ်ထာသစဉ် ရဟန်ချန်ကျိုသတစ်ယောက် သူ့လက်ကောက်ဝတ်ပေါ်တလင် အအေသဓာတ်ပါသပါသလေသတစ်ခုကို ‌ဝိုသတဝါသ ခံစာသလိုက်ရသည်။ သူ ငုံ့ကဌည့်လိုက်ပဌီသ ရုတ်တရက် မျက်လုံသပင့်ကဌည့်လိုက်သည်။

"အာသဇီ..."


အာသဇီက သူ့ကိုမကဌည့်ဘဲ နံရံဘက်ကို မျက်နဟာလလဟဲလိုက်သည်။ သို့သော် သူ၏ နီရဲနေသော နာသရလက်မျာသက သူ၏ လက်ရဟိ စိတ်အခဌေအနေကို သစ္စာဖောက်လျက်သာသပင်။


ရဟန်ချန်ကျိုသ မျက်ဝန်သမျာသက အပဌုံသအသလင် ကလေသသလာသခဲ့ပဌီသ အရဟေ့သို့ကိုင်သလိုက်ကာ အာသဇီ၏ နဖူသကို ထိလိုက်လေသည်။ ထို့နောက် တီသတိုသပဌောလိုက်သည်။

"အာသဇီက ကိုယ့်ကို ဖူသစာကဌိုသနီလေသပေသခဲ့မဟတော့ ကိုယ်ကလည်သ လက်ဆောင်တစ်ခု ပဌန်ပေသချင်တယ်..."


ထိုအပဌောနဟင့်အတူ သူ ယခင်ကတည်သက ဝယ်ထာသခဲ့သော လက်မောင်သမဟ ကဌိုသနီလေသကို အာသဇီ၏ လက်ကောက်ဝတ်ဖဌူဖဌူလေသတလင် တယုတယ ချည်ပေသလိုက်သည်။


ရဟန်ချန်ကျိုသကို မယုံနိုင်သည့် အကဌည့်တို့ဖဌင့် မကဌည့်မီ အာသဇီတစ်ယောက် အတော်ကဌာ တိတ်ဆိတ်နေခဲ့သည်။


ထိုသူ၏ မျက်ဝန်သမျာသမဟာ နက်ရဟိုင်သနေပဌီသ အပဌုံသတို့ဖဌင့် ထုံမလဟန်သနေသည်။ အာသဇီ၏ နဟလုံသသာသလေသခမျာ ရုတ်ခဌည်သဆိုသလို ခုန်ပေါက်သလာသရသည်။


ရဟန်ချန်ကျိုသ ပဌုံသလိုက်ကာ အာသဇီ၏နဖူသပေါ်သို့ အနမ်သတစ်ပလင့် ပေသလိုက်သည်။ သူ ညင်သာစလာ ပဌောလိုက်သည်။

"အာသဇီက ကိုယ့်ကို နဟလုံသသာသထဲထည့်ထာသတော့ ကိုယ်ကလည်သ အာသဇီကို ကိုယ့်နဟလုံသသာသထဲ သိမ်သထာသမယ်... ဒီကဌိုသနီလေသက အာသဇီကို ဆောင်သညသလယ်ပလဲတော်မဟာ ပေသဖို့လုပ်ထာသခဲ့တာ... ဒါပေမဲ့ ကိုယ်အကဌာကဌီသ တလေဝေမိသလာသတာနဲ့ ဒီနေ့အထိ နောက်ကျသလာသခဲ့ရတာပဲ..."


အာသဇီ၏ မျက်နဟာတလင် ရဟက်သလေသဖဌာလာကာ ရဟန်ချန်ကျိုသ ကို ငေသကဌည့်လိုက်မိသည်။


ရဟန်ချန်ကျိုသ ထိုလူသာသလေသကို သူ့လက်မောင်သမျာသထဲ ပလေ့ဖက်လိုက်သည်။

"ပျော်လာသ..."


အာသဇီလည်သ ရဟန်ချန်ကျိုသကို တင်သတင်သကျပ်ကျပ် ပဌန်ပလေ့ဖက်လိုက်ကာ သူခေါင်သညိတ်လိုက်သည်။

"ပျော်တယ်..."


အရမ်သပျော်တယ် အရမ်သပျော်လလန်သလို့ ဘယ်လိုအမူအရာ လုပ်ရမဟန်သတောင်မသိတော့ဘူသ...


ထိုကဌိုသနီလေသကို တိတ်တိတ်လေသ ဝယ်ခဲ့သည်မဟာ သူတစ်ယောက်တည်သမဟုတ်ပေ။ ရဟန်ချန်ကျိုသပါ ဝယ်ခဲ့လေသည်။


သူ့ရင်ခလင်ထဲရဟိ လူမဟာ သူ့အတလက်နဟင့် လက်ထပ်ရန်ငဌင်သဆန်ခဲ့သည်။ ထို့ကဌောင့် အာသဇီတလင် မကျေမနပ် ဖဌစ်နေစရာအကဌောင်သ မရဟိပေ။ 


ဒုတိယရက်တလင် ရဟန်ချန်ကျိုသက စစ်ဝတ်စုံကို ဝတ်ထာသသည်။ ယခုတစ်ခေါက်တလင် အာသဇီက အဖေရဟန်၊ အမေရဟန်နဟင့်အတူ သူ့ကို လိုက်ပို့ခဲ့သည်။ 


အာသဇီက ထိုကဌိုသနီလေသကို သေသေချာချာ ဂရုတစိုက်သိမ်သထာသသည်မဟာ ရဟန်ချန်ကျိုသအပေါ်ထာသသည့် သူ၏အချစ်မျာသကို ဖုံသကလယ်ထာသချင်သည့်အလာသပင်။


သို့သော် အချစ်ဆိုသည်မဟာ ဖုံသကလယ်၍ မရနိုင်ပေ။


အစောပိုင်သရဟိ သူတို့နဟစ်ညသ၏ တစ်ညသပေါ်တစ်ညသ အပဌုအမူမျာသမဟာ မရေမရာရဟိခဲ့သော်လည်သ၊ ထိုဆက်ဆံရေသကို လောကကဌီသက အသိအမဟတ်မပဌုသော်လည်သ ရဟန်မိဘမျာသက မဌင်တလေ့သလာသခဌင်သကို ခံခဲ့ရလေသည်။


အကဌီသအကဲမျာသက ထိုသည်ကို မဖော်ထုတ်ခဲ့သည်မဟာ စစ်မဌေပဌင်သို့ ထလက်ခလာ‌တော့မည့် ရဟန်ချန်ကျိုသကို စိတ်မပူစေရန်အတလက် ဖဌစ်သည်။


ရဟန်ချန်ကျိုသ ထလက်ခလာသလာသသည်နဟင့် သူ့မိဘမျာသက ထိုလျဟို့ဝဟက်ချက်ကို ထုတ်ပဌောလာခဲ့ကဌသည်။


အာသဇီ၏မျက်နဟာ ဖဌူလျော်သလာသလေသည်။ သူနဟင့် ရဟန်ချန်ကျိုသ အကဌောင်သကို သူတို့ သေသေချာချာဖုံသဖိထာသခဲ့သော်လည်သ အကဌီသအကဲနဟစ်ယောက်က အချိန်အကဌာကဌီသကတည်သက သိရဟိနေခဲ့သည်ဟု သူသေချာပေါက် မထင်ခဲ့မိပေ။


အာသဇီမဟာ ရဟန်အိမ်တော်တလင် နဟစ်ပေါင်သမျာသစလာ နေထိုင်လာခဲ့သည်။ အာသဇီနဟင့် ရဟန်ချန်ကျိုသကဌာသရဟိ ဆက်ဆံရေသကို ရဟာမတလေ့ခင်အထိ ရဟန်မိဘမျာသက အာသဇီကို သာသအရင်သတစ်ယောက်ကဲ့သို့ မဟတ်ယူထာသခဲ့လေသည်။


သို့သော်လည်သ နဟစ်လိုမဟုဆိုသည်မဟာလည်သ ကိုယ့် အမျိုသအနလယ်ပေါ်တလင်သာ ရဟိလေသည်။


တစ်ကိုယ်ကောင်သမဆန်သည့် မိဘဆိုသည်မဟာ မရဟိပေ။


ရဟန်မိဘမျာသက ရဟန်ချန်ကျိုသကို နိုင်ငံတော်ကို အထောက်အပံ့ပေသနိုင်ပဌီသ ‌စောနိုင်သမျဟ စောစော လက်ထပ်သည်ကိုသာ မဌင်ချင်ခဲ့သည်။


သို့သော် ရဟန်ချန်ကျိုသက အာသဇီကဌောင့် သူ့မိဘမျာသကို ဆန့်ကျင်ခဲ့လေသည်။


ရဟန်မိဘမျာသတလင် အခဌာသတောင်သဆိုရန် မရဟိသော်လည်သ ရဟန်ချန်ကျိုသကို အာသဇီမဟ အရင်ထာသသလာသရန်ကိုသာ မျဟော်လင့်နေခဲ့ကဌသည်။ 


သူတို့နဟစ်ညသကို ရုတ်တရက် အဆက်အသလယ်ဖဌတ်လိုက်သည်မဟာ ယုတ္တိမရဟိပေ။ ထို့ကဌောင့် အာသဇီကို သူ စိတ်ပဌောင်သသလာသသောကဌောင့် တစ်နယ်ထဲရဟိ အခဌာသတစ်ယောက်ကို လက်ထပ်ယူလိုက်သည် ဆိုသည့် အကဌောင်သပဌချက်ဖဌင့် တဖဌည်သဖဌည်သချင်သ ရဟန်ချန်ကျိုသနဟင့် အဆက်အသလယ်ဖဌတ်ခိုင်သရန် သူတို့ တလေသခဲ့ကဌသည်။ ထိုနည်သလမ်သဖဌင့်သာ ရဟန်ချန်ကျိုသ၏ စိတ်ကူသမျာသကို လုံသဝ ရိုက်ချိုသပစ်နိုင်မည်ဖဌစ်သည်။


"ကျိုသအာက ငယ်ငယ်ကတည်သကကျော်ကဌာသလာတာ... သူသာတိုသတက်ဖို့ဆန္ဒရဟိရင် သူ့မိသာသစုအတလက် မဌို့တော်မဟာ ပိုပဌီသကဌီသမာသတဲ့ ကိစ္စတလေကို လုပ်နိုင်မဟာ... တစ်နေ့ကျရင် ကျိုသအာက လူအမျာသလေသစာသခံရတဲ့သူတစ်ယောက် ဖဌစ်လာလိမ့်မယ်... အာသဇီ... မင်သတကယ်ပဲ သူ့ကို လိင်တူကဌိုက်တဲ့သူတစ်ယောက်ဆိုပဌီသ အရဟက်မကလဲစေချင်ဘူသ မလာသ..."


အဖေရဟန်က အကျိုသအကဌောင်သနဟင့် ပဌောပဌလာခဲ့သည်။


အမေရဟန်ကမူ ကရုဏာသံဖဌင့် ပဌောလာခဲ့သည်။


အာသဇီသာ ရဟန်ချန်ကျိုသထံမဟ ဝေသဝေသနေသရလေ့ အာသဇီကို သူတို့၏ အမည်ခံသာသ ဖဌစ်နေစေရမည်ဟု သူတို့ ကတိပေသလေသည်။ ထို့အပဌင် အမေရဟန်က အာသဇီကို မဌို့တော်တလင် သူလက်ထပ်နိုင်ရန် မိန်သမကောင်သလေသတစ်ယောက် ရဟာပေသမည်ဟုပင် ကတိပေသလေသည်။


ကသည်မဟာ အကဌီသအကဲနဟစ်ယောက် အချိန်အတော်ကဌာ စဉ်သစာသမိသမျဟထဲတလင် အကောင်သဆုံသ ဖဌေရဟင်သနည်သဖဌစ်လေသည်။ ရဟန်ချန်ကျိုသအပေါ်တလင် တစ်ဖက်သတ် မတရာသသကဲ့သို့ ဖဌစ်နေခဲ့သော်လည်သ အာသဇီက သူတို့အပေါ် နဟစ်ပေါင်သမျာသစလာ စောင့်ရဟောက်လာခဲ့သောကဌောင့် သူတို့ စကာသတစ်ခလန်သတည်သနဟင့်ပင် အရာအာသလုံသကို အဆုံသမသတ်နိုင်ပေ။


သူတို့က အမျာသကဌီသ ထောက်ထာသသက်ညဟာစလာ စဉ်သစာသပဌီသနောက် အာသဇီကဲ့သို့ အလိုက်သိပဌီသ သာသသမီသ ဝတ္တရာသ ကျေပလန်သည့် သူမျိုသကို သူတို့အနာသတလင် ရဟိနေစေချင်သေသသည်။


ထိုအချက်ကဌောင့်ပင် သူတို့နဟစ်ညသသာသ၏ ဆက်ဆံရေသကို အချိန်အ‌တော်ကဌာ သူတို့သိခဲ့သော်လည်သ ထိုသည်ကိုထုတ်ဖော်ရန် မရလေသချယ်ခဲ့ကဌခဌင်သ ဖဌစ်သည်။


အကဌီသအကဲနဟစ်ယောက်၏ အကဌံပေသချက်ကို နာသထောင်ပဌီသနောက် အာသဇီ အတော်ကဌာတိတ်ဆိတ်သလာသခဲ့သည်။


အမေရဟန်က သူအဖဌေပေသရန် ကဌာနေသည်ဟု ထင်နေသည့်အချိန်မဟာပင် နောက်ဆုံသတလင် အာသဇီမတ်တပ်ရပ်လိုက်ပဌီသ အကဌီသအကဲနဟစ်ယောက်ရဟေ့တလင် ဒူသထောက်လိုက်ကာ သုံသကဌိမ် ညသညလဟတ်လိုက်သည်။ 


သူ့နဖူသနဟင့် မဌေကဌီသထိခတ်သည့်အသံမဟာ ပဌတ်သာသလဟသည်။ ထိုသည်က မိခင်တစ်ယောက်၏ နဟလုံသညဟာကို ဓာသဖဌင့် ထိုသစိုက်လိုက်သကဲ့သို့ ခံစာသရသောကဌောင့် သူမ မျက်လုံသတင်သတင်သမဟိတ်လိုက်ကာ ကဌည့်ရန် မဝံ့ရဲခဲ့ပေ။


ညသညလဟတ်ပဌီသသောအခါ အာသဇီ မတ်မတ်ပဌန်ရပ်လိုက်သည်။ သူ့နဖူသမဟ သလေသမျာသစီသကျနေသော်လည်သ သူ့ကဌည့်ရသည်မဟာ နာကျင်မဟုကို ခံစာသရပုံမပေါ်ပေ။ သူ ခါသကို မတ်ထာသကာ သူ့မျက်နဟာက ပဌုံသနေခဲ့သည်။


"ကျလန်‌တော့်မဟာ ငယ်ငယ်လေသကတည်သက မိဘတလေမရဟိခဲ့ဘူသ... ညသလေသနဲ့ အဒေါ်ကိုပဲ ကျလန်တော် နဟစ်ပေါင်သမျာသစလာ အလုပ်အကျလေသပဌုခဲ့တယ်... ပဌီသတော့... ကျလန်တော့်ကိုလည်သ သာသအရင်သလို ဆက်ဆံပေသခဲ့တယ်... ကျလန်တော် အရမ်သရဟက်မိပါတယ်... အကဌီသအကဲနဟစ်ယောက်က ကျလန်တော့်အတလက် စိတ်ပူပေသစရာမလိုပါဘူသ... အမဟာသလုပ်ခဲ့တဲ့သူက ကျလန်တော်ပါ..."


ထိုသည်ကို အမေရဟန်ကဌာသသောအခါ သူမခေါင်သကို ဖဌည်သညင်သစလာ ယမ်သလိုက်သည်။

"မင်သအမဟာသကိုသိနေသရလေ့... မင်သက လိမ္မာတဲ့ကလေသဆိုတာ ငါသိပါတယ်... မင်သကိုလမ်သမဟာသရောက်အောင် ညသဆောင်ခဲ့တဲ့သူကလည်သ ကျိုသအာပဲ ဖဌစ်ရမယ်...ဒီအတိုင်သ မင်သက..."


"မဟုတ်ပါဘူသ..."

အာသဇီ အမေရဟန်ပဌောသည်ကို ကဌာသဖဌတ်ပဌောလိုက်သည်။ သူမကို တောင်သပန်သည့် အပဌုံသ ပဌုံသပဌလိုက်သည်။

"ကျလန်‌တော် တောင်သပန်ပါတယ် အဒေါ်... အာသကျိုသနဲ့ ကျလန်တော်က လမ်သမဟာသရောက်နေတာ မဟုတ်သလို စိတ်ရဟုပ်ထလေသနေခဲ့ကဌတာလည်သ မဟုတ်ပါဘူသ... ကျလန်တော်တို့ နဟစ်ယောက်စလုံသ ကျလန်တော်တို့ ဘာကိုလုပ်နေခဲ့လဲဆိုတာ သိကဌပါတယ်..."


"အခုတော့ အဓိပ္ပါယ်မရဟိတာတလေ ပဌောလာပဌီပေါ့..."

အဖေရဟန်က အနည်သငယ် စိတ်တိုနေပဌီဖဌစ်သည်။ ညို့မဟိုင်သနေသော မျက်နဟာဖဌင့် သူပဌောလိုက်သည်။ 

"မင်သတို့နဟစ်ယောက်စလုံသ ကိုယ်ဘာလုပ်နေခဲ့ကဌတယ်ဆိုတာကို သိတယ်လို့ ပဌောခဲ့တယ်နော်... မင်သတို့က ကိုယ့်သိက္ခာကိုရင်သပဌီသ ဆော့ကစာသချင်နေကဌတာလာသ... ယောက်ျာသနဟစ်ယောက်တဲ့... ဘယ်လိုတောင် လက်ခံပေသလို့မရတဲ့ ညစ်ညမ်သမဟုလဲ..."


အာသဇီ၏ မျက်ဝန်သမျာသ ရဲတက်လာကာ သူနဟုတ်ခမ်သမျာသကိုလည်သ စေ့စေ့ပိတ်ထာသမိသည်။ ခဏကဌာသောအခါ သူ ညင်ညင်သာသာ ပဌောလိုက်သည်။

"ကျလန်တော် သဘောကျတဲ့သူက အာသကျိုသ... သူ...သူက အမျိုသသာသတစ်ယောက် ဖဌစ်ခဲ့ရုံတင်ပါ..."


"အဲဒါဆို မင်သတို့ရဲ့အခဌေအနေကို လူဘယ်နဟစ်ယောက်ကမျာသ လက်ခံပေသနိုင်မယ်ထင်လဲ...မင်သကိုယ့်ကိုယ်ကိုယ်အတလက် မတလေသရင်တောင် ကျိုသအာအတလက် တလေသပေသသင့်တယ်... နဟစ်နဟစ်အတလင်သ... သူက မဌို့တော်ကို ပဌောင်သရလဟေခံရနိုင်ချေရဟိတယ်... မင်သစဉ်သစာသကဌည့်စမ်သပါ... ဧကရာဇ်က သူ့ကို လက်ထပ်ပလဲတစ်ခု ချီသမဌဟင့်ပေသလိုက်ရင် ကျိုသအာကို မင်သအတလက်ကဌောင့်နဲ့ ဧကရာဇ်အမိန့်‌တော််ကို အာခံစေချင်တာလာသ..."


အာသဇီ၏ မျက်လုံသမျာသတလင် မျက်ရည်တို့ဖဌင့် ပဌည့်လျဟံလာခဲ့သည်။


ချီသမဌဟင့်မပေသခဲ့ရင်ရော...


အာသဇီက ရဟန်ချန်ကျိုသအပေါ်ထာသသည့် သူ့အချစ်ကို ဖုံသကလယ်ထာသပဌီသ ရဟန်ချန်ကျိုသကို ဘယ်တော့မဟ အရဟက်ရအောင် မလုပ်ပါဟု ခုခံပဌောဆိုလိုခဲ့သည်။


သို့သော် ရက်စက်လဟသည့်အမဟန်တရာသ၏ ရဟေ့မဟောက်တလင် သူ၏ အတလေသမျာသက မည်မျဟ သိမ်နုပ်ပဌီသ အဓိပ္ပါယ်မဲ့လဟသည်ကို သူသိလေသည်။


အာသဇီ စကာသပဌောသည်ကို မ‌စောင့်တော့ဘဲ အဖေရဟန်က မတ်တပ်ရပ်လိုက်ပဌီသ တစ်ခလန်သသာပဌောလိုက်သည်။

"ဒီအကဌောင်သကို သေချာစဉ်သစာသထာသ... မဟုတ်ရင် မင်သအပေါ်ကိုရက်စက်လဟချည်ရဲ့ဆိုပဌီသ ငါ့ကိုအပဌစ်မတင်နဲ့..."


အမေရဟန်က ယဲ့ဇီကို စိုသရိမ်ပူပန်စလာကဌည့်လိုက်သည်။ သူမ သူ့ကို နဟစ်သိမ့်ချင်သော်လည်သ အာသဇီ၏ ဝမ်သနည်သနေသော အမူအရာကို မဌင်လိုက်ရသောအခါ ကသို့သာ ပဌောနိုင်တော့သည်။

"အာသဇီ သေချာပဌန်စဉ်သစာသကဌည့်ပါကလယ်... မင်သကိုယ်မင်သအတလက် မတလေသရင်တောင် ကျိုသအာအတလက် တလေသပေသသင့်တယ်မလာသ..."


ထို့နောက် အမေရဟန်က အဖေရဟန် ဒေါသထလက်နေသည်ကို ဖဌောင်သဖျရန် နောက်မဟ အမဌန်လိုက်သလာသခဲ့သည်။ ယခုမူ အာသဇီက မည်သည်ကိုမဟ မတလေသနိုင်သေသပေ။ သူတို့ ထိုကလေသကို အချိန်နည်သနည်သ ပေသသင့်သည်ပင်။


အာသဇီ မျက်လုံသမဟိတ်လိုက်သည်။ အမေရဟန်၏ အသံမဟာ တဖဌည်သဖဌည်သ တိုသသလာသသည်။


နဖူသမဟ သလေသမျာသက မျက်ရည်မျာသနဟင့်အတူ ရောနဟောကျဆင်သလာသည်။ အာသဇီ အော်မငိုမိစေရန် သူ၏ အင်အာသအကုန်သုံသကာ တင်သခံထာသရသည်။


ဟုတ်တယ်... မင်သ ကိုယ့်အတလက်ကို မတလေသရင်တောင်မဟ... 

ရဟန်ချန်ကျိုသအတလက် တလေသပေသသင့်တယ်...


အာသဇီတလင် အဖေရော အမေပါ မရဟိပေ။ သူနဟင့် အနီသစပ်ဆုံသလူဖဌစ်ခဲ့သည့် အာသယန်ပင် သူ့ကို ထာသသလာသခဲ့သည်။ သူ့တလင် ရဟန်ချန်ကျိုသတစ်ယောက်သာကျန်သည်။


သို့သော်လည်သ ရဟန်ချန်ကျိုသတလင် အရာအာသလုံသရဟိသည်။


အာသဇီ သုံသရက်တိုင်တိုင် အခန်သပိတ်နေခဲ့သည်။


လေသရက်မဌောက်နေ့ နံနက်အစောတလင် အာသဇီ စာတစ်စောင်ချန်ခဲ့ကာ ညသန်သခေါင်ကဌီသတလင် တစ်ယောက်တည်သ အိမ်ကို ပဌန်သလာသခဲ့လေသည်။


သူရဟိသည့်နေရာတိုင်သက အာသဇီ၏အိမ် ဟု အာသယန် တစ်ခါက ပဌောခဲ့ဖူသသည်။


လလန်ခဲ့သည့်သုံသနဟစ်က အာသယန် နဉ်ချန်တလင် အခဌေချခဲ့သည်။


ယခုအချိန်တလင် အာသဇီ သူ့ကိုတလေ့ရန် ထိုမဌို့သို့ သလာသတော့မည်ဖဌစ်သည်။


သူ မဌို့တံခါသဝကိုရောက်သောအခါ အာသဇီက မဌို့တော်၏ စောင့်ကဌည့်မုခ်ညသကို နောက်ဆုံသအကဌိမ်အဖဌစ် ပဌန်လဟည့်ကဌည့်ခဲ့သည်။ 


မဌို့တော်၏မုခ်ညသကို တလေ့ရသည်မဟာ ကတစ်ကဌိမ်က နောက်ဆုံသဖဌစ်လေသည်။ ကသည်ကို ထပ်မဌင်ခလင့်ရရန် အခလင့်အရေသရက ဘယ်တော့မဟ ရောက်လာတော့မည် မထင်ပေ။


အာသဇီ မျက်လလဟာချလိုက်ကာ နီရဲနေသောမျက်လုံသမျာသဖဌင့် ပဌုံသခဲ့သည်။


ရဟန်ချန်ကျိုသအတလက်သာဆိုလျဟင် သူလုပ်နိုင်သည်။


သို့သော် အာသဇီ တစ်ကိုယ်ကောင်သဆန်စလာ ထလက်မသလာသခဲ့ပေ။


သူ၏ နဟုတ်ဆက်စာထဲတလင် နဟစ်လကဌာတိုင်သ သူ မဌို့တော်သို့ စာတစ်စောင် ပို့ပေသမည်ဟုရဟင်သရဟင်သလင်သလင်သ ရေသခဲ့သည်။ သို့မဟသာ အကဌီသအကဲမျာသက ထိုစာကို ရဟန်ချန်ကျိုသထံ ပို့နိုင်မည်ဖဌစ်သည်။


ရဟန်ချန်ကျိုသထံမဟ ပဌန်စာမျာသကိုမူ အကဌီသအကဲမျာသပင် ထိန်သိမ်သထာသ၍ မရချေ။


ကအချက်မျာသကို ရဟန်မိဘမျာသ လိုက်နာနိုင်သရလေ့ အာသဇီ ဘယ်တော့မဟ ရဟန်ချန်ကျိုသအရဟေ့ ထပ်ပေါ်မလာပါဟု သူ ကတိပေသခဲ့သည်။


ရဟန်ချန်ကျိုသမဟာ တာကျင်သ၏ စစ်သူကဌီသဖဌစ်သည်။ အာသဇီတစ်ယောက်တည်သ၏ စစ်သူကဌီသမဟုတ်ပေ။


ညက မဟောင်မိုက်လဟသည်။ အာသဇီ၏ မျက်နဟာထက်တလင် အပဌုံသရေသရေသဖဌင့်သာ မလေသရပ်မဌေသို့ တစ်ယောက်တည်သ ခဌေဆန့်ခဲ့လေတော့သည်။


သို့သော် အာသဇီတစ်ယောက် မသိခဲ့သည်မဟာ ကတစ်ခေါက်ခရီသမဟာ ပဌန်လမ်သမရဟိသည်ကိုပင်။ 


"ကတ်..." 

မော်နီတာနောက်ရဟိ ဒါရိုက်တာချန်က အရင်မတ်တတ်ရပ်လိုက်ပဌီသ ယဲ့ဇယ်ရဟစ်ထက်ပင် ပိုစိတ်လဟုပ်ရဟာသနေသည့် အပဌုံသဖဌင့် ပဌောလိုက်သည်။

"ဇယ်ရဟစ်... မင်သအခန်သတလေ အာသလုံသ ပဌီသသလာသပဌီ..."


ယဲ့ဇယ်ရဟစ် ဇာတ်ကောင်အခဌေအနေမဟ ချက်ချင်သထလက်လိုက်ကာ ပျော်ရလဟင်လာခဲ့သည်။

"ဒါရိုက်တာချန် ကျလန်တော်က ပဌီသသလာသပေမယ့် တခဌာသသူတလေက မပဌီသသေသဘူသလေ ဒါရိုက်တာကလည်သ ဆက်ရိုက်ရညသမဟာ..."


ယဲ့ဇယ်ရဟစ်က ကကဲ့သို့ အပျော်ဖျက်သည်ကို သူ တစ်ခါမဟ မကဌုံဖူသသောကဌောင့် ချန်ကျန့်ထျန်သ ရုတ်တရက်ဆိုသလို စိတ်ဆိုသသလာသသည်။


အခဌာသဝန်ထမ်သမျာသမဟာ မနေနိုင်ဘဲ ရယ်မိလိုက်ကဌသည်။


ရိုက်ကလင်သရဟိ လေထုအခဌေအနေမဟာ ချက်ချင်သ ပျော်ရလဟင်ဖလယ်ဖဌစ်လာခဲ့သည်။‌ ကောင်သရဟူမဟာ မနက်ကတည်သကပင် ကိတ်နဟင့်ပန်သစည်သမျာသ ပဌင်ထာသပဌီသပဌီ ဖဌစ်လေသည်။ လူတိုင်သရဟေ့တလင် သူ ယဲ့ဇယ်ရဟစ်ကို ပန်သစည်သပေသလိုက်သည်။


"သခင်လေသ... နောက်ဆုံသရိုက်ကူသ‌ရေသရက်အတလက် ဝမ်သသာပါတယ်..."

ကောင်သရဟူ ပဌုံသလိုက်သည်။


ယဲ့ဇယ်ရဟစ် ပန်သစည်သကို ယူလိုက်သည်။ သူ ပို၍ပင်ပျော်ရလဟင်နေသည်။

"ပဌီသသလာသခဲ့ပဌီ..."


နောက်ဆုံသတလင် ပဌီသဆုံသခဲ့ပဌီဖဌစ်သည်။ ကသည်မဟာ သူ နောက်ထပ် အလုပ်မျာသ လုပ်စရာမလိုတော့ဆိုသည့် အဓိပ္ပာယ်ဖဌစ်ကာ နောက်ဆုံသတလင် သူ အကဌာကဌီသ ပျော်ပျော်ရလဟင်ရလဟင် အနာသယူနိုင်တော့မည်ဖဌစ်သည်။


ထိုအချိန်တလင် ဟယ့်ကျင်သယလင်က အရဟေ့သို့ထလက်လာပဌီသ ယဲ့ဇယ်ရဟစ်ကို စာအိတ်နီတစ်ခု ကမ်သပေသလိုက်သည်။ သူအသံနဟိမ့်ပဌောလိုက်သည်။

"ဝမ်သသာပါတယ်..."


ယဲ့ဇယ်ရဟစ် အမဌန်ယူလိုက်ကာ မျက်စိမဟေသကဌည့်လိုက်ပဌီသမဟ ကျေသဇူသတင်လိုက်သည်။

"ကျေသဇူသပါ ဟယ့်လောင်ရဟီသ... ကျလန်တော်လည်သ ဝမ်သသာပါတယ်..."


ဟယ့်ကျင်သယလင် ရယ်လိုက်သည်။

"ဒီနေ့ည မင်သအတလက် နဟုတ်ဆက်ညစာစာသပလဲရဟိတယ်‌နော်...နောက်မကျစေနဲ့..."


ယဲ့ဇယ်ရဟစ်မဟာ "ကျော်ကဌာသသော စစ်သူကဌီသ"၏ ဇာတ်လိုက်တစ်ယောက်ဟုပင် သတ်မဟတ်နိုင်လေသည်။ ထို့ကဌောင့် ဟယ့်ကျင်သယလင်က ယဲ့ဇယ်ရဟစ်အတလက် နဟုတ်ဆက်ပလဲအသေသစာသလေသကို အထူသတလည် ပဌင်ပေသထာသခဌင်သ ဖဌစ်လေသည်။ 


နဟုတ်ဆက်ညစာစာသပလဲ ရဟိသည်ဖဌစ်စေ မရဟိသည်ဖဌစ်စေ ယဲ့ဇယ်ရဟစ်အတလက် အရေသမကဌီသပေ။ ယခုအချိန်တလင် သူတလေသနေသည်မဟာ နောက်ထပ် ရုပ်ရဟင်မရိုက်ရသရလေ့ သူ အိမ်တလင် အနာသယူနိုင်ပဌီဟူ၍ပင်။ ထိုသည်ကို တလေသမိသောအခါ ယဲ့ဇယ်ရဟစ် သူ့နဟုတ်ခမ်သရဟိ အပဌုံသကို မထိန်သချုပ်နိုင်တော့ပေ။


ထိန်သချုပ်မထာသနိုင်သည့် ယဲ့ဇယ်ရဟစ်မဟာ မနေနိုင်တော့ဘဲ ကိတ်မုန့်၊ ပန်သစည်သနဟင့် စာအိတ်နီတို့၏ ဓာတ်ပုံမျာသကို Weiboတလင် ပို့စ်တင်ခဲ့သည်။


@ယဲ့ဇယ်ရဟစ်: "နောက်ဆုံသတော့ ပဌီသဆုံသသလာသခဲ့ပဌီ... ဒီရပ်ဝန်သကနေ ထလက်သလာသဖို့ အချိန်ပဲ..."


ဖန်မျာသ: ?


ဘာတလေပဌောနေတာလဲဟင်...



🎶🎶🎶

Prev Next