MM Story Teller

Chapter 65

Viewers 3k

💫 Chapter 65

သုံးဖက်မြင် စတားကွန်ရက်က လူများ၏ စိတ်ဝိညာဥ်စွမ်းအားစီးဆင်းမှုကို တိတ်တဆိတ်ဖမ်းယူကာ D252ရှိ ဝိညာဥ်သန့်စင်ရေးနယ်မြေနှင့် ဆက်သွယ်ပေးထားသည်။ပြိုင်ပွဲဝင်များ ရုတ်တရက်ပျောက်သွားရခြင်းမှာ ယန်နယ်မြေ၌ ပြဿနာရှိနေခြင်းကြောင့် ဖြစ်နိုင်ပြီး ယင်နယ်မြေကိုပါ မတည်မငြိမ်ဖြစ်သွားစေခြင်းပင်။ ထို ယင်မြေ၌ စိတ်ဝိညာဥ်စွမ်းအင်များထပ်ဖြည့်ရန် လိုအပ်လာသောအခါ ပြိုင်ပွဲဝင်များအားလုံးကို ယင်မြေသို့ ပို့ဆောင်မိသွားခြင်းဖြစ်ချေမည်။

အမှန်တွင် ထိုကိစ္စမတိုင်မီ အိုက်ဇယ်၏ စိတ်ဝိညာဥ်ပင်လယ်က ပြိုကွဲလုနီးပါးဖြစ်နေပြီး သူ၏ စိတ်ဝိဉာဥ်အာရုံများက ယင်နယ်မြေအတွက် အာဟာရဓါတ်အဖြစ်ပြောင်းလဲသွားသင့်သည်။ သို့သော် အံ့သြစရာကောင်းသည်မှာ အမှားတစ်ခုကြောင့် သူက ယန်မြေသို့ ရောက်ရှိသွားပြီး သူ့စိတ်ဝိညာဥ်ပင်လယ်ကို တိုးမြင့်နိုင်ခဲ့သည်။ ၎င်းကို ချန်သာ့ယို ယခုထိတိုင် မသိရှိသေးပေ။

ချန်သာ့ယို အံ့ကိုတင်းတင်းကြိတ်ထားပြီး ဖန်သားပြင်ကို ကြည့်လိုက်သည် ။

" ဆွဲချလိုက်...အဲ့ဒီလူတွေကို တစ်ခါတည်း ဆွဲချလိုက်တော့ ...ဒီလူတွေကို ငါတို့ ပြန်လာခွင့်ပေးလို့ မဖြစ်ဘူး..."

ထိုပြိုင်ပွဲဝင်များမှာ ကံကောင်းထောက်မပြီး အသက်မသေသေးကြောင်း သူသိသည်။ သို့သော် သူတို့သာ သတိရလာပြီး ထိုနေရာအားမြင်သွားလျှင် D252ဂြိုဟ်ကို သူတို့ မမှတ်မိလောက်ဟု သူ အာမ မခံနိုင်ပေ။ ထို့အပြင် သူတို့ထဲမှ တစ်ယောက်ယောက်သာ သံသယအဝင်ခံရပါက ဤနှစ်များတစ်လျှောက်လုံး ချန်မိသားစု အားထုတ်ခဲ့ရသမျှက သဲထဲရေသွန်ဖြစ်သွားလိမ့်မည်။

သူ့မူလရည်ရွယ်ချက်က လူများ၏ အသက်အန္တရာယ်ကို မထိခိုက်စေချင်သော်လည်း ယခုမှ အဆင်ပြေအောင်ကြိုးစားနေဆဲကာလသာဖြစ်သည့်အတွက် ထိုသူများကို သူတို့၏ ကံဆိုးမှုကိုသာ အပြစ်ပုံချခိုင်းရတော့မည်။

ချန်သာ့ယိုက ပင်မထိန်းချုပ်ရေးစနစ်ကို သူ့လက်ထဲ၌ ဆုပ်ကိုင်ထားသည်။ အခုချိန်ထိ ယင်နယ်မြေမှ ယန်နယ်မြေသို့ စိတ်ဝိညာဥ်စွမ်းအားစီးဆင်းမှုကို သူထိန်းချုပ်နိုင်သေးသည်။ ထိုသူများ၏ စိတ်ဝိညာဥ်အာရုံသာ ကုန်ခမ်းသွားပါက သူတို့၏ ပြင်ပခန္ဓာကိုယ်ကလည်း သစ်ပင်လူသားအဖြစ် ကိုမာဝင်သွားပြီး မည်သည့်အခါမှ နိုးထလာနိုင်တော့မည် မဟုတ်ချေ။

သို့သော် ထိုအချိန်မှာပင် သူ့အနောက်၌ အေးစက်သော အသံတစ်သံက ထွက်ပေါ်လာ၏ ။

" ခင်ဗျားဘာလုပ်နေတာလဲ..."

" ကျုပ်..."

ချန်သာ့ယိုမှာ ပြန်ပြောရန်ပြင်နေစဥ် တစ်ခုခုမှားနေသည်ကို သတိထားမိသွားပြီး နောက်သို့လှည့်ကြည့်လိုက်သောအခါ ထိုသူစိမ်းယောက်ျားက ရုတ်တရက် သူ့ဘေး၌ ပေါ်လာ၏။ တစ်ဖက်လူမှာ ချောမောကြည်လင်ပြီး မသိလျှင် ယုံကြည်အားကိုးထိုက်ခံရမှူများနှင့်အတူ ရောက်ရှိလာသည့်အတိုင်းပင်။

" မင်းက ဘယ်သူလဲ...ဒီထဲကို ဘယ်လိုလုပ် ဝင်လာတာလဲ..."

ချန်သာ့ယိုက အထိတ်တလန့်ဖြင့် မေးလိုက်သည်။

ဤလျှို့ဝှက်အခန်းက လုံခြုံရေးတင်းကြပ်ထားပြီး သတိပေးချက်အသံမမြည်ဘဲ တစ်စုံတစ်ယောက်ဝင်လာနိုင်ရန် မဖြစ်နိုင်ချေ။ အကယ်၍ ချန်မိသားစု၏ လျှို့ဝှက်ချက်များသာ အလွယ်တကူဖော်ထုတ်ခံလိုက်ရလျှင် သူတို့မိသားစုတစ်စုလုံး ယခင်ကတည်းကပင် ပျက်စီးကိန်းစိုက်နေချေပြီ။

စုန့်နင်ဖုန်းက အသာပြုံးလာ၏။

" ဒီနေရာကို မဖိတ်ခေါ်ဘဲ ရောက်လာမိပြီ ထင်တယ်...ဒါပေမဲ့လည်း ရွေးချယ်စရာမရှိဘူးလေ...ခင်ဗျားနောင်တရမယ့်အရာကို မလုပ်ခင် တားဖို့အတွက် ခင်ဗျားကို စောင့်ကြည့်နေရမှဖြစ်မှာကိုး..."

သူ့ဆရာက ဆာ့ဆာ့ နှင့် အခြားသူများကိုရှာရန် ထွက်သွားသောကြောင့် သူအတော်လေး စိတ်သက်သာရာရသွားမိသည်။ သို့သော် အကြီးဆုံးစီနီယာအစ်ကိုတစ်ယောက်အနေဖြင့် အဆွယ်အပွားကိစ္စများကိုလည်း သူစောင့်ကြည့်ထားဖို့လိုသေး၏။ ချန်သာ့ယို၏ အကြံကို သူ မသိသော်လည်း သူတို့က ဘာလဲဆိုသည်က အရေးမကြီးချေ။ သူက စတားကွန်ရက်အတွက် တာဝန်ရှိသူဖြစ်သောကြောင့် တစ်ခုခုသာမှားသွားလျှင် ထိုသူ့ကို ဦးစွာချဥ်းကပ်သင့်ပေ၏။

စုန့်နင်ဖုန်းက ချန်သာ့ယိုကို သေချာစောင့်ကြည့်ထားသည်။ ယနေ့ခေတ် နည်းပညာများက အလွန်တိုးတက်နေပြီး အလွယ်တကူစမ်းကြည့်၍ မရသည်ကိုလည်း သူသိသည်။ သူက အသံလုံအစီအရင်ကို အသုံးချကာ ချန်သာ့ယိုနှင့်အတူ လျှို့ဝှက်အခန်းထဲကို လိုက်ဝင်လာခဲ့သည်။ ၎င်းက အတင်းအကြပ်ချဥ်းနင်းဝင်ရောက်ခြင်းမျိုးမဟုတ်ဘဲ ချန်သာ့ယိုကိုယ်တိုင်က သူ့ကိုဖိတ်ကြားလိုက်သည့်ပုံစံဖြစ်သွားသောကြောင့် အပြင်ဘက်ရှိ သတိပေးချက်ကို မရောက်ရှိသွားပေ။

ချန်သာ့ယိုက တစ်ခုခုမဟုတ်သည် လုပ်တော့မည်ကို တွေ့ရသောအခါ စုန့်နင်ဖုန်းဝင်ပြီး တားဆီးလိုက်ရသည်။

ချန်သာ့ယိုက ထိတ်လန့်သွား၏။ သို့သော် စုန့်နင်ဖုန်း၏ စကားကို ကြားပြီး သူ့စိတ်ထဲ၌ မဆဲရေးဘဲ မနေနိုင်တော့ချေ။

' ဒီလိုအချိန်မျိုးမှာတောင် သူတော်ကောင်းယောင်ဆောင်ပြီး ယဥ်ကျေးပြနေသေးတယ်...ဒီအတုအယောင်ကောင်ကတော့...'

" ညီအစ်ကိုရေ ငါတော့ မင်းကို သိတယ်လို့ မထင်ပါဘူး...ငါတို့ အခုထိ စည်းမကျော်ရသေးဘူး...မင်းငါ့အကြောင်းကို ကြားဖူးမှာပါ... ဒီဖက်ဒရေးရှင်းမှာ ငါ့ကိုလာပြီး ဆန့်ကျင်တယ်ဆိုတာက ဉာဏ်ရှိတဲ့လုပ်ရပ်တော့ မဟုတ်ဘူးနော်..."

ချန်သာ့ယိုက သူ့အကွက်များနှင့် စမ်းသပ်လာ၏။

" ကျုပ်လည်း ခင်ဗျားကို မဆန့်ကျင်ချင်ပါဘူး...ဒါပေမဲ့ အဲ့လို လုပ်လိုက်မယ်ဆိုရင်လည်း အဲ့ဒါက ကျုပ်အတွက် ဘာမှမပြောပလောက်ဘူး...ကျုပ်လိုချင်တာက ဆရာနဲ့ကျန်တဲ့သူတွေ ဘေးကင်းကင်းပြန်လာဖို့ပဲ..."

စုန့်နင်ဖုန်းက တည်ငြိမ်စွာ သတိပေးလိုက်သည်။

စုန့်နင်ဖုန်း၏ အကြည့်က ချန်သာ့ယိုကို တုန်လှုပ်ချောက်ချားသွားစေ၏။ သူတို့၏ အကြောင်းပြချက်ကို ထိန်းသိမ်းထားပြီး တည်ငြိမ်သေသပ်သောသူများက ဆင်ခြင်ဉာဏ်ကင်းမဲ့သောသူများထက်ပင် ပိုကြောက်စရာကောင်းသေးသည်။

ထိုကဲ့သို့ စိတ်အခြေအနေမျိုးထားနိုင်သည့်သူများက အခြေအနေကို အလုံးစုံထိန်းချုပ်နိုင်သူများသာ ဖြစ်ကြသည်။

ဤလူက သူ မည်သူဆိုသည်ကို ဂရုမစိုက်ခြင်းမဟုတ်ဘဲ သူမည်သည့်အရာများတွေးသည်ကို ဂရုမစိုက်ခြင်းသာ ဖြစ်ချေ၏။ မည်သည့်ညှိနှိုင်းမှုမျိုးနှင့်မဆို ဤလူက အခန်းထဲမှ ထွက်သွားနိုင်စရာမရှိချေ။

အကယ်၍ ချန်သာ့ယိုသာ အော်လိုက်လျှင် အပြင်ဘက်ရှိ အစောင့်များကို ခေါ်ပြီးသားဖြစ်သွားပြီး ဖက်ဒရေးရှင်း၏ တပ်သားများကိုပါ ခေါ်နိုင်သေးသည်။ သို့သော် ထိုသို့လုပ်လိုက်ပါက မကြာမီလေး၌ပင် သူသေသွားရလိမ့်မည်။ ချန်သာ့ယို၏ အတွေးများမှာ တောင်စဥ်ရေမရဖြစ်ကုန်၏။

" မင်းရဲ့ ဆရာက မြေပုံထဲမှာ ပိတ်မိနေတာလား...ငါမင်းရဲ့ဆရာကို ကယ်တင်ပေးနိုင်ပါတယ်...ဒါပေမဲ့ မင်းဘက်ကလည်း ခုဏကတွေ့လိုက်တာအကုန်လုံးကို မေ့ပေးရမယ်..."

' ငါသိတယ်...ဆူညံပွက်လောရိုက်ကုန်တာက ပြဿနာပိုလာတာပဲ အဖတ်တင်တယ်...မဟုတ်သေးဘူး...ငါက ဘာပြဿနာကိုမှ အဖြစ်မခံရသေးပေမဲ့ သူကတော့ လုပ်နိုင်တယ်...'

စုန့်နင်ဖုန်းက သူ့ကို အံ့အားသင့်သလို ကြည့်လာ၏။

" ကျုပ်ရဲ့ ဆရာကို ကယ်ပေးမယ်တဲ့မလား...မလိုပါဘူး..."

' ဒီကောင်က တော်တော်ယုံကြည်ချက်ရှိနေတာပဲ...'

ချန်သာ့ယိုကလည်း ပြောလာ၏။

" ညီအစ်ကိုရေ...ယုံကြည်မှုလွန်ကဲမနေစမ်းပါနဲ့ကွာ...ငါ့ခွင့်ပြုချက်မရှိဘဲ အဲ့ဒီနေရာကနေ ဘယ်သူမှ ထွက်မလာနိုင်ဘူး...အဲ့ဒီလိုဖြစ်လာတဲ့အခါကျ ငါ့ကို အပြစ်မတင်နဲ့ပေါ့..."

ချန်သာ့ယိုက ထိုသို့ပြောပြီးပြီးချင်းပင် သတိပေးချက်အသံထွက်ပေါ်လာပြီး ဖန်သားပြင်၌ အနီရောင်အသိပေးချက်ပေါ်လာ၏။

' စနစ်ချို့ယွင်းနေပါပြီ...စနစ်ချို့ယွင်းနေပါပြီ…'

ချန်သာ့ယို နားမလည်နိုင်ဖြစ်သွားပြီး စုန့်နင်ဖုန်းကို အာရုံစိုက်မနေနိုင်တော့ချေ။ သူ ချက်ချင်းပင် စက္ခုကွန်ရက်ကို ကောက်နှိပ်လိုက်၏။

" ဘာတွေဖြစ်နေတာလဲ..ဒါက ဘယ်လိုလုပ် ဖြစ်လာရတာလဲ..."

စုန့်နင်ဖုန်းက ပုခုံးသာလှုပ်လိုက်သည်။

" ကျုပ်ပြောသားပဲ...ခင်ဗျားရဲ့ အကူအညီတွေ မလိုအပ်ပါဘူးလို့..."

ရွှီယီက ဒေတာစီးဆင်းမှုလားရာ၏ အနှောင့်အယှက်ကို အာရုံခံလိုက်သည်။ ၎င်းက တစ်ခဏမျှသာ ကြာ၏။ ထို့နောက် နောက်တစ်ခဏအတွင်းမှာပင် ချို့ယွင်းမှုများအားလုံးကို ပြန်ပြင်ဆင်ပြီးသွားသည့်အလား ဒေတာများအားလုံး စီးဆင်းမှုရပ်သွား၏။

တစ်စုံတစ်ယောက်က လမ်းကြောင်းကို တမင်ပိတ်ထားခြင်းဖြစ်မည်ဟု ရွှီယီတွေးမိသည်။

၎င်းက ပြဿနာမရှိချေ။ လမ်းကြောင်းတစ်ခုကို ပိတ်ထားလျှင် နောက်ထပ်လမ်းကြောင်းတစ်ခုကို သူဖွင့်လိုက်မည်။ ထိုအတွေးနှင့်အတူ ရွှီယီ၏လက်ထဲ၌ ဓားတစ်လက် ရုတ်တရက် ထွက်ပေါ်လာ၏။ ဓားအန္တိမလေ့ကျင့်သူအနေဖြင့် သူ့ဓားကလည်း သူ့စိတ်အသိအာရုံနှင့်အတူ တစ်သားတည်းဖြစ်လာ၏။ သူ့အသိစိတ်အာရုံသာ စွဲကပ်နေသရွေ့ သူနှင့်အတူ ဓားကလည်း အမြဲရှိနေလိမ့်မည်။

သူက လမ်းကြောင်းဖွင့်ရန်ကို ချက်ချင်းမလုပ်သေးပေ။ ထိုအစား သူ့ဓားကို မမြှောက်လိုက်မီ စတားကွန်ရက်၌ သာမန်လူများ ကျန်ရှိမနေသေးကြောင်း သေချာစစ်ဆေးလိုက်၏။ ထို့နောက် ကွန်ရက်တစ်ခုလုံးကို ပရမ်းပတာဖြစ်သွားစေပြီး လမ်းကြောင်းခွဲတစ်ခုပေါ်ထွက်လာသည်။

ဒေတာစီးဆင်းမှုများက ပြိုကွဲနေသည်ကို ကြားလိုက်ရမှသာ ရှေးရိုးစွဲရွှီယီတစ်ယောက် သက်ပြင်းချနိုင်သွား၏ ။

' စတားကွန်ရက်ကို ဖျက်ဆီးပစ်လိုက်ရတာလည်း တစ်ခုတော့ ကောင်းသားပဲ...ရှဲ့ရုန်လို လူငယ်လေးတွေလည်း ဒါကို စွဲလမ်းမနေတော့ဘူးပေါ့...'

အကယ်၍ သူတွေးနေသည်ကိုသာ အခြားသူများသိလျှင် အင်တာနက်စွဲလမ်းသူများအားလုံး အရည်ပျော်သွားလိမ့်မည်။

' ဖယ်ရှားတဲ့နည်းလမ်းကြီးကလည်း ဘယ်လိုတောင် ကြောက်ဖို့ကောင်းလိုက်သလဲ...ဒီလူအိုကြီးကို မြန်မြန်ဝေးဝေးခေါ်သွားပေးကြပါ...'

ဒေတာစီးဆင်းမှု ပြိုကွဲသွားပြီးနောက် ၎င်းက လူသူကင်းမဲ့သည့်ဂြိုဟ်သို့ သွားရာလမ်းကြောင်းတစ်ခု ပေါ်လာ၏။

အကယ်၍ စတားကွန်ရက်သာဖျက်ဆီးမခံရလျှင် ၎င်းကို တည်ဆောက်ထားသည့်လမ်းကြောင်းအရ တိုက်ရိုက်သွားလာ၍ရသည်။ သို့သော် စတားကွန်ရက်က ဖျက်ဆီးခံလိုက်ရပြီဖြစ်သောကြောင့် မြို့တော်ဂြိုဟ်မှ D252ဂြိုဟ်သို့သွားရာ ပုံမှန်အကွာအဝေးအတိုင်း ပြန်ဖြစ်သွား၏။

သို့သော်လည်း ၎င်းက ရွှီယီအတွက် ခက်ခက်ခဲခဲကြီး မဟုတ်ပေ။ မဆိုသလောက်လေး အနည်းငယ် အားပိုထုတ်လိုက်ရရုံသာရှိ၏။

သူ၏ စိတ်ဝိညာဥ်အာရုံများက အလင်းရောင်လှိုင်းများဖြစ်သွားပြီး မျက်စိတစ်မှိတ်စာအတွင်း D252ဂြိုဟ်သို့ ဦးတည်သွားတော့သည်။

တစ်ချက်တည်းနှင့် စတားကွန်ရက်ကို ဖြိုခွဲလိုက်ပြီးနောက် ယင်နယ်မြေ၏ အကာအရံကိုလည်း သူထပ်မံ ဖြိုခွဲလိုက်ပြန်သည်။ ၎င်းက သူ့ဓားကို ဘယ်နှစ်ချက် ညာနှစ်ချက်လွှဲယမ်းလိုက်ရုံထက် မပိုပေ။

သို့သော် ပြိုင်ပွဲဝင်များ၏ မျက်လုံးထဲတွင် ရုတ်တရက်ပေါ်လာပြီး အကာအရံကို ဖြိုခွင်းလိုက်သည့် ရွှီယီက သူတို့အတွက် ကောင်းကင်ဘုံ၏ နတ်ဘုရားတစ်ပါးလိုပင်။

ဆာ့ဆာ့က ရွှီယီကို တွေ့တွေ့ချင်း အပြေးသွားတော့သည်။

" ဆရာရောက်လာမယ်ဆိုတာ ဆာ့ဆာ့သိနေတယ်..."

ရွှီယီက အသာညည်းလိုက်သည်။

" အပြောင်းအလဲတွေက အရမ်းမြန်လွန်းလို့ မင်းကို အချိန်မီ မဖမ်းထားလိုက်နိုင်ဘူး...အားလုံးအဆင်ပြေရဲ့လား..."

ဆာ့ဆာ့က တက်တက်ကြွကြွပင် ခေါင်းယမ်းလိုက်သည်။

" ဘာမှမဖြစ်ဘူး...အားလုံးအဆင်ပြေပါတယ်...ဒါကဝိညာဥ်သန့်စင်ရေးမြေပြင်ရဲ့ ယင်နယ်မြေဆိုမှတော့ အားလုံးကိုကာကွယ်နိုင်ဖို့အတွက် စိတ်ဝိညာဥ်ကျင့်ကြံတဲ့နည်းလမ်းကိုပဲ သင်ပေးလိုက်တယ်..."

သူမက အနည်းငယ်ပျင်းရိနေသော်လည်း သင်ပြပေးရန်တောင်းဆိုလာသည့် တပည့်များက ရုတ်တရက် ရာနှင့်ချီတိုးလာသောအခါ သူမ၏ ဆရာဖြစ်ချင်သောစိတ်ကို အားတက်သွားစေ၏။ ၎င်းကလည်း သူမ ဆရာရောက်မလာမီ အချိန်ခဏသာဟု သူမ ခံစားမိသည်။

ရွှီယီ၏ မျက်နှာထက်၌ နူးညံ့ညင်သာသော အပြုံးက ပေါ်လာ၏။

" မင်းကောင်းကောင်းလုပ်ခဲ့ပါတယ်...ဘာပဲဖြစ်ဖြစ်လေ မင်းရဲ့ သူငယ်ချင်းတွေထဲက တချို့က အားနည်းတော့ သူတို့ရဲ့ စိတ်ဝိညာဥ်ကို အမြန်ဖြည့်တင်းမှ ဖြစ်မှာပေါ့...ဒါပေမဲ့ စတားကွန်ရက်ရဲ့လမ်းကြောင်းကနေ ငါတို့ပြန်ထွက်လို့မရတော့ဘူး...အရင်ဆုံး ယန်နယ်မြေကို သွားပြီး သူတို့ဘာသာ ဝိညာဥ်ကိုပြန်ဖြည့်တင်းနိုင်မယ့် လွင့်မြောနေတဲ့စိတ်အသိအာရုံတချို့ကို သွားရှာကြတာပေါ့..."

ရွှီယီပေါ်လာကတည်းကပင် လူအုပ်ကြီးက အံ့အားသင့်နေခဲ့သည်။ ဆာ့ဆာ့က ဤချောမောပြီးဆန်းကြယ်သော လူကြီးနှင့် စကားပြောနေသည်ကို တွေ့လိုက်ရသောအခါ သူတို့အားလုံး အငေးသားဖြစ်ကုန်၏။

' ဒီ big shotကြီးက သူ့ကို သိနေတာလား...သူ့ရဲ့ နောက်ခံက တကယ်ပဲဘာများလဲ...'

အခုအချိန်တွင် ဆာ့ဆာ့က ဝန်ကြီးချုပ်နှင့်ပါသိသည်ဟု တစ်ယောက်ယောက်ကလာပြောလျှင်ပင် သူတို့ယုံမိလောက်သည်။ အဆုံးတွင် ဝန်ကြီးချုပ်ပင်လျှင် ယခုလိုအချိန်မျိုး၌ သူတို့ကို လာကယ်နိုင်မည်မဟုတ်ချေ။ သို့သော် ထူးခြားဆန်းကြယ်သူကြီးက သူတို့ကို အလွယ်တကူရှာတွေ့သွားပြီး သူတို့၏ စိတ်ဝိညာဥ်စွမ်းအားကို စုပ်ယူနေသော အကာအရံကိုပါ ဖျက်ဆီးခဲ့သည်။

ဆာ့ဆာ့က သူတို့ကို စိတ်ဝိညာဥ်ကျင့်ကြံသည့်နည်းလမ်းအား သင်ပေးနေစဥ်တည်းက သူတို့သတိထားမိသင့်သည်။ ကြွယ်ဝမှုနှင့်ပက်သက်လာလျှင် ဆာ့ဆာ့ကတော့ နံပါတ်တစ်ပင်။ ကျန်း ၊ ဟယ့် နှင့် ချန်မိသားစုများပင် ဘေးထွက်နေရလိမ့်မည်။

အမြင်မရှိသော ကျန်းချန်မှာ နောက်ထပ်တစ်ကြိမ် လက်မြှောက်ရချေပြီ ။

' အဲ့ဒီတုန်းက သူ့ရှေ့မှာ ကြွားလုံးထုတ်ဖို့ ဘယ်ကသတ္တိတွေများ ငါရခဲ့တာပါလိမ့်...'

ဆာ့ဆာ့က ဆရာနှင့်အတူ စီစဥ်ထားသည့်ကိစ္စအား အားလုံးကို သေချာရှင်းပြလိုက်သည်။

" စိတ်မပူကြပါနဲ့...ဒါက ငါ့ရဲ့ဆရာပါ...ငါတို့သူ့ကိုသာယုံကြည်ထားလိုက်ရင် အကုန်လုံး အန္တရာယ်ကင်းကင်းနဲ့ ပြန်သွားနိုင်မှာပါ..."

အားလုံးက လက်ခါယမ်းပြလာ၏။

" နင် ငါတို့ကို ရှင်းပြနေစရာတောင် မလိုတော့ပါဘူး...ငါတို့ယုံပြီးသားပါ...တကယ်ပါဆို...မြန်မြန်သွားကြရအောင်..."

" အတန်းဖော်ဆာ့ဆာ့...နင်က ငါတို့အားလုံးကို ကယ်တင်ပေးလိုက်တာပဲ...ဒါတောင် ငါတို့က နင့်ကို သံသယဝင်နေသေးရင် ဘယ်လိုလူတွေဖြစ်သွားမလဲ..."

မည်သူ့ကိုမျှ ရှင်းပြနေစရာပင်မလိုတော့ဘဲ အားလုံးက သူမပြောသည့်အတိုင်း လိုက်လုပ်မည်ဟုသာ ဆိုလာ၏။

ဆာ့ဆာ့ : ' လုံလောက်ပြီ...ဘယ်သူကမှ ဆရာ့ရဲ့ ဩဇာတိက္ကမကို သံသယမဝင်ရဲဘူး...'

ဤသို့ဖြင့် သူတို့တစ်အုပ်စုလုံး ရွှီယီနှင့်အတူ ယန်နယ်မြေသို့ လိုက်ပါလာ၏။

လုချန်းမင်က အနည်းငယ်စိတ်ဆိုးစွာဖြင့် ဆာ့ဆာ့ကို ပြောလိုက်သည်။

" ဆာ့ဆာ့..ငါတို့မကြာခင် အမှန်တရားကို မြင်ရတော့မှာလား...နင်ရောဘယ်လိုထင်လဲ...ဒီစိတ်ဝိညာဥ်စွမ်းအင်တွေအားလုံးကို တစ်ခုခုကို ကျွေးဖို့အတွက် အသုံးချနေတာလား..."

' ဒီအကွက်က တကယ်ကို စက်ဆုပ်ဖို့ကောင်းပြီး ယုတ်မာချက်ပဲ...'

ဆာ့ဆာ့က သူမကိုစိတ်ချအောင်ပြောပေးလိုက်သည်။

" စိတ်မပူပါနဲ့ သူတို့က ဘယ်လိုထောင်ချောက်မျိုးပဲ လုပ်ထားပါစေ ၊ အဲ့ဒီမှာ လူသား ဒါမှမဟုတ် ဂြိုဟ်သားရဲတစ်မျိုးမျိုးရှိနေမယ်ဆိုရင်တောင် ငါ့ဆရာက သေချာပေါက် ဖြေရှင်းနိုင်ပါတယ်...ဆရာက အဲ့ဒီလို မသမာတဲ့နည်းလမ်းကို သုံးတဲ့သူတွေဆိုရင် ဘယ်တုန်းကမှ သဘောမတွေ့ဖူးဘူး..."

သူမက ဆရာ့အပေါ် သူမ၏ယုံကြည်မှုအား ဖော်ပြရန် တွန့်ဆုတ်မနေချေ။

ရွှီယီက ဆာ့ဆာ့ကိုလည်း အာရုံစိုက်ထားသောကြောင့် သူမပြောလိုက်သောစကားများကို ကြားလိုက်ရသည်။ သူ့စိတ်အခြေအနေ အလွန်ကောင်းသွားပြီး ဆာ့ဆာ့ကို မျက်နှာပျက်ရအောင်မလုပ်သင့်ဟု သူခံစားလိုက်ရသည်။ ထို့နောက်တွင် လူများနှင့် နီးကပ်လာသည်ကို သူခံစားမိလိုက်ပြီး ထိုသူများထဲမှ တစ်ယောက်၏ အငွေ့အသက်ကို သူအလွန်ရင်းနှီးနေ၏။

ရွှီယီ၏ မျက်ခုံးပင် အသာမြင့်တက်သွားသည်။

' ကြည့်ရတာ တစ်ယောက်ယောက်ကတော့ သေချာလေး လိုက်လျောညီထွေနေနေတဲ့ပုံပဲ...'

ထို့နောက် နောက်တစ်စက္ကန့်၌ ဆာ့ဆာ့က ရှဲ့ရုန် နှင့် သူပုန်ဝတ်စုံကိုဝတ်ထားသောအခြားသူများ ယန်နယ်မြေမှ ထွက်ခွာရန် လုပ်နေသည်ကို တွေ့လိုက်ရသည်။

သူတို့က ဝိညာဥ်သန့်စင်ရေးမြေပြင်သို့ ပို့ဆောင်ခံလိုက်ရပြီး ထိုနေရာတွင် ရှဲ့ရုန်နှင့် ဆက်သွယ်မိလိမ့်မည်ဟု ဆာ့ဆာ့လုံးဝ မထင်ထားမိပေ။

ဆာ့ဆာ့ : ' အိုး...အိုး...ဒါကတော့ လုံးဝကို တတိယစီနီယာအစ်ကိုရဲ့ အဆုံးသတ်ဖြစ်တော့မှာပဲ...'

ရှဲ့ရုန်လည်း ရွှီယီနှင့် အခြားသူများကို တွေ့သွား၏။ သူ့မျက်လုံးများပင် မျက်လုံးအိမ်ထဲမှ ကျွတ်ထွက်မလိုဖြစ်နေပြီး သူ့တစ်ကိုယ်လုံး အကြောသေကာ ကိုယ်တွင်းဆဲလ်များကပင် ဟစ်အော်လာ၏။

' ကယ်ကြပါဦး...'

💫💫💫

Prev Next