Chapter 168

💘Chapter 168 

သူကအဖတ်ဆယ်ဖို့ဆန္ဒရှိတယ်

"ဖုန်းယန်..."

ဝေ့ယန် ထွက်ခွာခါနီးတွင် ဖုန်းစွေ့၏ အော်သံက သူ့အား ရပ်တန့်သွားစေခဲ့သည်။

အသက်ဆယ့်ငါးနှစ်မှ ယခုထိ ဆယ့်နှစ်နှစ်ရှိသွားပြီဖြစ်သည်။ ဖုန်းစွေ့၏ နားလည်မှုအရ ဝေ့ယန်က သူမ၏ တစ်ဥိီးတည်း‌သောသား ဖုန်းယန်သာ ဖြစ်နေဆဲပင်။ သူက ကျန်းဇီ သို့မဟုတ် ဝေ့မိသားစုနှင့် အဆက်အသွယ်မရှိပေ။

"မေမေ..."

ဝေ့ယန်က အားကိုးရာမဲ့ လှည့်ကြည့်လိုက်သည်။ ပင်ပန်းနွမ်းနယ်နေသော မျက်လုံးများက ဖုန်းစွေ့၏ အေးစက်နေသောအကြည့်များနှင့် ဆုံသွားသည်။ 

"မေမေ...ကျွန်တော် အနားယူလိုက်ဦးမယ်..."

သူ့အမေအပေါ် ထားသည့် သူ၏ ချစ်ခြင်းမေတ္တာက သံသယရှိစရာပင်မလိုပေ။

သူ့မှတ်ဥာဏ်များထဲတွင် အသက်ဆယ့်ငါးနှစ်အထိ သူ့ကမ္ဘာကြီးက သူ့အမေနှင့်သာ တည်ရှိခဲ့သည်။

သူတို့က တစ်ယောက်နှင့်တစ်ယောက် မှီခိုပြီး အညစ်ပတ်ဆုံးနေရာများတွင်ပင် နေထိုင်ခဲ့ကြသည်။ အိမ်ထောင်စုစာရင်းမရှိသည့် သူ့အား ကျောင်းတက်နိုင်ရန် သူ့အမေက ကျောင်းအုပ်ကြီး၏ အိမ်အပြင်ဘက်တွင် နေ့ရောညပါ ဒူးထောက်ကာ သူ့ကို ပြုစုပျိုးထောင်ရန် ရုန်းကန်ခဲ့ရသည်။

သူ၏ အသက်ဆယ့်ငါးနှစ်တွင် ဝေ့မိသားစုမှ လူများက ဝေ့မိသားစု၏ သခင်ငယ်လေးဖြစ်၍ စည်းစိမ်နှင့်ဂုဏ်အသရေကို ခံစားရန် ပြန်လာသင့်သည်ဟု ဆိုကြသည်။

သူက သွားရန် ငြင်းဆိုခဲ့ပြီး သူ့အမေကလည်း မသွားစေချင်ခဲ့ပေ။

သူ့အမေက သူ၏ အရာရာဖြစ်ပြီး သူကလည်း သူ့အမေ၏ အရာအားလုံးပင်။

ထိုအချိန်က မည်သူကမှ သူ့အမေနှင့် သူ့ကို မခွဲနိုင်ဟု ပေါ့ပေါ့တန်တန် ယုံကြည်ခဲ့သည်။ သို့သော်လည်း ဝေ့မိသားစု၏ စွမ်းအားကို သူ နားမလည်ခဲ့ပေ။

ဝေ့မိသားစု၏ လွှမ်းမိုးမှုအောက်တွင် သူနှင့် သူ့အမေက ကွဲကွာသွားခဲ့သည်။

ထိုနေ့မှစ၍ သန့်ရှင်းသပ်ရပ်သော အဝတ်အစားများကို စတင်ဝတ်ဆင်လာရသည်။ ဤမျှ သန့်ရှင်းသောအဝတ်ကို ယခင်က မ၀တ်ခဲ့ဖူးပေ။ သူ၏ အရင်အဝတ်အစားများက သူ့အမေ ဖာထေးထားသည့် အဟောင်းများသာ ဖြစ်သည်။ ထိုနေ့မှစပြီး သူ့တွင် အိမ်ထောင်စုစာရင်းရှိလာပြီးနောက် သူ့ကို ဖုန်းယန်အစား ဝေ့ယန်ဟုခေါ်ပြီး ကျောင်းတက်နိုင်ခဲ့သည်။ ကျောင်းအသစ်က သန့်ရှင်းသပ်ရပ်ပြီး အတန်းများပေါများသည်။

သို့သော် ဝေ့ယန်က မနှစ်သက်ခဲ့ပေ။ ဤအရာများထဲက တစ်ခုမျှ သူ့နှင့်မသက်ဆိုင်ဟု သူခံစားမိသည်။ ဝေ့မိသားစုနှင့် သူ့ဘဝက အဆင်မပြေပေ။

ထို့ကြောင့် သူက လွတ်မြောက်လာပြီးနောက် သူ့အမေထံသို့ ပြန်သွားကာ မှောင်၍ နေရာကျဉ်းကျဉ်းလေးထဲတွင် စားသောက်ရင်း အိပ်ရင်း စိတ်သက်သာရာရသွားသည်။

ဝေ့ယန်က ဤနေရာ၌သာ သူ အမှန်တကယ်လွတ်လပ်နေသလိုမျိုး ၊ သူလွတ်လပ်စွာ အသက်ရှုနိုင်သလို ခံစားလိုက်ရသည်။

သို့သော် နှစ်ရက်အကြာတွင် ဝေ့မိသားစုက သူ့ကို ထပ်မံ၍ ဖမ်းမိခဲ့သည်။

ဝေ့မိသားစုတွင် သူက လှောင်ပြောင်ခံရမှုကို တောင့်ခံခဲ့သည်။ သူတို့က သူ့ကို သူတောင်းစား၏သားဟု ခေါ်ဝေါ်ကြပြီး သူ့ထံတွင် မိဘများမရှိဘဲ ရိုင်းစိုင်း‌သော ကလေးဟု ပြောဆိုခဲ့ကြသည်။

သို့သော်လည်း သဘောတရားအရ သူနှင့်တွဲလျက် သခင်ငယ်လေးဟု ခေါ်‌ခံရသော နှစ်ယောက်ကတော့ သူ့ကို ဘယ်သောအခါကမှ မလှောင်ပြောင်ခဲ့ပေ။ တစ်ယောက်က အမူအရာမဲ့နေသော မျက်နှာဖြင့် ဖြစ်ပြီး နောက်တစ်ယောက်က အမြဲပြုံးနေသော မျက်လုံးနှင့်ဖြစ်သည်။

 ဝေ့ယန်သည် ထိုအချိန်က အလွန် ထိလွယ်ရှလွယ်ဖြစ်ခဲ့သည်။ တစ်စုံတစ်ယောက်က သူ့ကို ကြည့်လိုက်တိုင်း သူတို့က သူ့ကို ပြက်ရယ်ပြု၍ ခနဲ့နေသည်ဟု ခံစားရသည်။

နောက်ပိုင်းတွင် အဘိုးဝေ့ ကိုယ်တိုင် ပြုစုပျိုးထောင်ပေးခဲ့သော ဝေ့ချန်နှင့် အမြဲတမ်း ရွှင်ပြနေသော ဝေ့ဟွားက သူ့ကို လှောင်ပြောင်နေမည်မဟုတ်ကြောင်း တဖြည်းဖြည်း နားလည်လာခဲ့သည်။ သူတို့က ထူးချွန်ကြပြီး ချီးမွမ်းခြင်းကို ခံရကာ သူ့ကို လျစ်လျူရှုထားကြသည်။

နှစ်ဘက်ယှဉ်ကြည့်လျှင် ဝေ့ယန်၏ ပြိုင်ဆိုင်မှုမှာ တောက်လောင်နေသည်။ သူ ဝေ့ယန်က ဝေ့မိသားစုရှိ မည်သူ့ထက်မျှ မညံ့ကြောင်း လူတိုင်းအားပြသရန် ဆုံးဖြတ်လိုက်ပြီး စိတ်အားထက်သန်စွာ လေ့လာသင်ယူခဲ့သည်။

ထိုအချိန်က ဝေ့ယန်၏ဘဝတွင် အခက်ခဲဆုံးအချိန်ဖြစ်သည်။ ဝေ့မိသားစုက သူ့ကို ဖုန်းစွေ့နှင့် တွေ့ရန် မပိတ်ပင်ထားသော်လည်း ကျောင်းတက်ရန်အတွက် ဝေ့ယန်က ဖုန်းစွေ့ကို တစ်ပတ်တွင် တစ်ကြိမ်၊ သို့မဟုတ် တစ်လကို တစ်ကြိမ်သာ သွားကြည့်ခဲ့သည်။

ဝေ့ယန်၏ ရည်မှန်းချက်များကို လေ့လာပြီးနောက် ဖုန်းစွေ့သည် သူ၏ ရည်ရွယ်ချက်များကို တန်ဖိုးမထားပေ။ ထိုအစား သူမက သူ့ကို ရိုက်နှက်ဆုံးမလေသည်။ ဝေ့ယန်သည် ယနေ့အထိ သူ့မိခင်၏ မျက်လုံးများမှ ရက်စက်ကာ မုန်းတီးသော အကြည့်ကို မှတ်မိနေသေးသည်။

သို့သော် ဝေ့ယန်က အရှုံးပေးလိုစိတ်မရှိပေ။ ထို့ကြောင့် သူ့တွင် ဖုန်းစွေ့ထံသို့ သွားလည်ရန် အချိန်ပိုနည်းလာခဲ့သည်။ သို့သော်လည်း သူသွားလည်လိုက်တိုင်း ရင်းနှီးမှုမရှိသော အခြေအနေဖြင့်သာ အဆုံးသတ်သွားရသည်။

ဝေ့ယန်က ဝေ့ချန်နှင့် ဝေ့ဟွားတို့ကို ပြုမူသည့်ပုံစံအတိုင်း အဘိုးဝေ့က သူ့ကို သတိပြုမိကာ ဆက်ဆံမည်ဟု မျှော်လင့်ခဲ့ပြီး ဆက်လက်ကြိုးစားခဲ့သည်။

သို့သော် လက်တွေ့တွင်မူ သူ့မျှော်လင့်ချက်နှင့် မတူပေ။ အဘိုးဝေ့က သူ့ကို အိမ်ပြန်ခေါ်လာခဲ့သော်လည်း လက်တွေ့တွင်တော့ သူ့ကို ဂရုမစိုက်ပေ။ သူက သူ၏ ကိုယ်ပိုင်စက်ပစ္စည်းများတွင် ကျန်ရစ်ခဲ့သော ကလေးတစ်ယောက်လိုပင်။

ဝေ့ယန်က မကျေနပ်ပေ။ ၎င်းကသူ ဆယ့်ကိုးနှစ်မပြည့်မီတွင် လျှို့ဝှက်ချက်တစ်ခုကို အမှတ်မထင် မတွေ့ရှိမီအထိဖြစ်သည်။

ဤလျှို့ဝှက်ချက်ကို သိပြီးနောက် ဝေ့ယန်က ဝေ့မိသားစုထံမှ အာရုံစိုက်မှုနှင့် အသိအမှတ်ပြုမှုကို ရရှိရန် မမျှော်လင့်တော့ပေ။ ဤအသစ်တွေ့ရှိသော အသိဖြင့် သူက "မူလအပြစ်"နှင့် မွေးဖွားလာသည်ကို သူနားလည်ခဲ့သည်။

တစ်ပတ်အကြာတွင် ဝေ့ယန်က နိုင်ငံကို စွန့်ခွာ၍ နိုင်ငံအသီးသီးကို လှည့်လည်သွားလာကာ မိမိကိုယ်တိုင် ပြည်နှင်ဒဏ်ပေးခြင်းကို စတင်ခဲ့သည်။

၎င်းမှာ ဝေ့ချန်က  A ဇုန်ပရောဂျက်ကို သူ့ဆီ လွှဲပြောင်းပေးကာ သူ့ကို ယုံကြည်ကြောင်း ပြောပြသည့်နေ့အထိဖြစ်သည်။

ဝေ့မိသားစုမှ အခြားတစ်ယောက်ယောက်ကသာ ထိုစကားကို ပြောခဲ့လျှင် ဝေ့ယန်က သူတို့ကို လှောင်ပြောင်နေပေလိမ့်မည်။ သို့သော်လည်း ၎င်းက ဝေ့ချန်ဖြစ်သည်။ ဝေ့ချန်က 'မင်းကို ငါယုံကြည်တယ်' ဟူသော စကားကို အတိအကျ ပြောပြီးနောက် ဝေ့ယန်က သူ နှစ်ပေါင်းများစွာ ချမှတ်ထားသည့် အခြေခံမူများကို မေ့သွားစေနိုင်သည်။ ဝေ့မိသားစုက တန်ဖိုးထားသည့် အရာမှန်သမျှကို သူလုပ်နိုင်သည်။

သူ့ကိုယ်သူ အဖတ်ဆယ်လိုသောကြောင့် ဖြစ်သည်။

သူ မွေးဖွားလာခဲ့သည့် မူလအပြစ်မှ သူ့ကိုယ်သူ အဖတ်ဆယ်ရန်ဖြစ်သည်။

ဝေ့ယန်၏ ရုပ်သွင်ပြင်က အမှောင်ထုထဲ ပျောက်ကွယ်သွားသည်ကို ကြည့်ရင်း ဖုန်းစွေ့၏ ပြည့်ကြပ်နေသော အသက်ရှုသံများက ကွယ်ပျောက်သွားသည်။ သူမက ဆိုဖာပေါ်သို့ လဲကျသွားပြီး မျက်နှာကို လက်နှစ်ဖက်ဖြင့်အုပ်ကာ မျက်ရည်များ ချက်ချင်းစီးကျလာသည်။

အားယန်...ဒါက မင်းရဲ့အမှားမဟုတ်ဘူး...ဘာလို့ ဒီလောက် လေးလံတဲ့ဝန်နဲ့ မင်းကိုယ်မင်း ဝန်‌ထုတ်ဝန်ပိုးဖြစ်စေရတာလဲ...

ဝေ့မိသားစုရဲ့ ညစ်ပတ်တဲ့ လျှို့ဝှက်ချက်က မင်းနဲ့လုံးဝမဆိုင်ပါဘူး...အားယန်...ကိုယ့်ကိုကိုယ် ဘာလို့ ဒီလို နှိပ်စက်နေတာလဲ...

သူမ၏ ငိုကြွေးမှုကို တွန်းလှန်ရင်း ဖုန်းစွေ့၏ မျက်ရည်များက သူမ၏ မျက်နှာကို ဖြည်းညှင်းစွာ ဖုံးလွှမ်းသွားကာ အသက်အရွယ်ကြီးရင့်မှုနှင့် စိတ်ပျက်အားငယ်မှုများက ရောနှောကာ အရိပ်များကဲ့သို့ သူမနှင့်အတူ လိုက်ပါနေခဲ့သည်။

သူ၏ အခန်းထဲသို့ ပြန်ရောက်ပြီးနောက် ဝေ့ယန်က မီးမဖွင့်တော့ပေ။ သူက ကုတင်ပေါ်သို့ လှဲချလိုက်ပြီး မျက်လုံးကို အုပ်ရန် လက်ကို မြှောက်လိုက်ကာ ပင်ပန်းနွမ်းနယ်မှုများကို သူ့ခန္ဓာကိုယ်ထဲတွင် လှည့်ပတ် ခွင့်ပြုလိုက်သည်။

ထိုနွေဦးညတွင် လေက အနည်းငယ်သာ အေးနေသော်လည်း သူက အရိုးထဲထိ အေးသွားသကဲ့သို့ အေးစက်မှုကို ခံစားလိုက်ရသည်။

*(ဘာလျှို့ဝှက်ချက်လဲ မသိဘူး )

မြို့တော်တွင် ဖြစ်ပျက်နေသည်များနှင့် ပတ်သက်၍ ဝေ့ချန်က ဘာမှမသိ‌ပေ။ သူက မကြာသေးမီက အစည်းအဝေးများ၊ အမေရိကန်ပြည်ထောင်စုမှ လာရောက်လည်ပတ်သော VIP များကို ဖျော်ဖြေမှုများဖြင့် အလုပ်များနေခဲ့သည်။ Max ကသန်းပေါင်းများစွာတန်သော စူပါကားများကို ထုတ်လုပ်ကာ နိုင်ငံတကာတွင် ကျော်ကြားသော ကားအမှတ်တံဆိပ်တစ်ခုဖြစ်သည်။ ဤကုန်အမှတ်တံဆိပ်က တရုတ်နိုင်ငံတွင် လုပ်ငန်းခွဲတစ်ခုမျှ မရှိသေးသောကြောင့် တရုတ်နိုင်ငံရှိ တစ်စုံတစ်ဦးက Max စူပါကားတစ်စီးကို ပိုင်ဆိုင်လိုပါက ၎င်းတို့၏ကိုယ်ပိုင်နည်းလမ်းနှင့် ချိတ်ဆက်မှုမှတစ်ဆင့် နိုင်ငံခြားမှ ဝယ်ယူရမည်ဖြစ်သည်။

ယခုလည်း တရုတ်နိုင်ငံ၏ စီးပွားရေးက လျင်မြန်စွာ ကြီးထွားလာနေပြီး ချမ်းသာသော ပုဂ္ဂိုလ်များက မိုးရွာပြီးနောက် ပေါက်သော မှိုများကဲ့သို့ ပေါများလာကြသည်။ သို့သော်လည်း ဤလူများ၏ ထင်ရှားသော အစိတ်အပိုင်းများက ၎င်းတို့၏ အသစ်တွေ့ရှိထားသော ကြွယ်ဝမှုနှင့် ကိုက်ညီရန် အရည်အသွေးများ ချို့တဲ့နေသဖြင့် ၎င်းတို့ကြားတွင် နှိုင်းယှဥ်မှု လမ်းကြောင်းကို ဖြစ်ပေါ်စေသည်။

Max ၏ စူပါကားများက ဤနှိုင်းယှဉ်မှု၏ တစ်စိတ်တစ်ပိုင်း ဖြစ်လာခဲ့သည်။ တရုတ်နိုင်ငံတွင် Max စူပါကားကို ဝယ်ယူနိုင်သူများအတွက် ဂုဏ်ယူစရာကိစ္စတစ်ခု ဖြစ်လာခဲ့သည်။

ဟုတ်ပါသည်။ ချမ်းသာသည့်လူအများစုက ကားများ သို့မဟုတ် စူပါကားတွေကို အမှန်တကယ် နှစ်သက်ကြသည်။ Max ၏ ဒီဇိုင်းနှင့် စွမ်းဆောင်ရည်က မော်တော်ကားကို ရိုးရိုးရှင်းရှင်း နှစ်သက်သူများအတွက် ဦးစားပေး ရွေးချယ်မှု ဖြစ်စေခဲ့သည်။ ဤပုဂ္ဂိုလ်များက နိုင်ငံခြားမှ Max အမှတ်တံဆိပ် စူပါကားများအား တင်သွင်းရန် ၎င်းတို့၏ချိတ်ဆက်မှုများကို အသုံးပြုမည်ဖြစ်သည်။

လုပ်ငန်းအခွင့်အလမ်းတစ်ခုကို အသိအမှတ်ပြုခြင်းဖြင့် Max ၏ ဦးဆောင်မှုမှ အလားအလာရှိသော စျေးကွက်တစ်ခုကို မြင်တွေ့ခဲ့သည်။ လွန်ခဲ့သည့် ရက်သတ္တပတ် တစ်ပတ်ခန့်က Max ကတရုတ်နိုင်ငံတွင် ကုန်အမှတ်တံဆိပ် အေးဂျင့်များ စုဆောင်းကာ နိုင်ငံအတွင်း ၎င်း၏ စူပါကားများကို ရောင်းချရန် စီစဉ်နေကြောင်း သတင်းများ ထွက်ပေါ်ခဲ့သည်။

ပြည်တွင်း ကားကုမ္ပဏီများအတွက်တော့ ဤလှုပ်ရှားမှုက ကြီးမားသည့် ကျောက်တုံးကြီးကို ပင်လယ်ထဲသို့ ပစ်ချလိုက်သကဲ့သို့ပင်။

ကားကုမ္ပဏီတစ်ခုအနေဖြင့် ချန်ဖုန်းအုပ်စုက တရုတ်နိုင်ငံဈေးကွက်ရှိ Max ၏စူပါကားများကို သတိပြုမိသည်က သဘာဝကျလှသည်။ ထို့ကြောင့် Max ၏ သီးသန့် ကိုယ်စားလှယ်ဖြစ်လာခြင်းက Max ၏ အမြတ်အစွန်းများကို ကုမ္ပဏီတစ်ခုက လက်ဝါးကြီးအုပ်ထားနိုင်သည်ဟု ဆိုလိုခြင်းဖြစ်သည်။ နိုင်ငံပိုင်စီးပွားရေးလုပ်ငန်းတစ်ခုအနေဖြင့် ချန်ဖုန်းအုပ်စုပင်လျှင် ၎င်းအလားအလာကို ကာကွယ်ရန် စိတ်ပိုင်းဖြတ်ထားသည့်တိုင် ဤအလားအလာမှ သွေးဆောင်ခံခဲ့ရသည်။

ဝေ့ချန်က ကုမ္ပဏီထဲသို့ ဝင်ရောက်လာချိန်တွင် Max ၏ကိစ္စကို ဆွေးနွေးရန် ထိပ်တန်းအဆင့်အစည်းအဝေးတစ်ခုခေါ်ယူခဲ့သည်။ ဝေ့ချန်က ၎င်းအတွက် အပြည့်အဝပြင်ဆင်ထားပြီး ရှန့်ကျားချီက ဝေ့ချန်က Max နှင့် စာချုပ်ချုပ်ဆိုနိုင်မည်ဟု မျှော်လင့်ကြောင်း ထုတ်ဖော်ပြောဆိုခဲ့သည်။

အမှန်ပင် ပြင်ပပြိုင်ဆိုင်မှုနှင့် အတွင်းပိုင်းပြိုင်ဆိုင်မှုက ဘက်ညီနေဆဲပင်။ ဤမျှကြီးမားသော ပိုင်မုန့်အပိုင်းကို ဆုပ်ကိုင်လိုက်ခြင်းဖြင့် အရည်အချင်းပြည့်မီသူတိုင်းက အလိုလိုပင် မငြိမ်မသက်ဖြစ်သွားကြသည်။

ဝေ့ချန်က အစည်းအဝေးခန်းမသို့ ရောက်ပြီး သုံးမိနစ်အတွင်းမှာပင် အားလုံးက စုဝေးပြီးကြပြီဖြစ်သည်။ သူတို့အားလုံးက မတ်မတ်ထိုင်ခဲ့ကြပြီး အာရုံစိုက်ကာ ချန်ဖုန်းအုပ်စုအတွက် Max နှင့် ပူးပေါင်းခြင်း၏ အရေးပါမှုကို ရှင်းရှင်းလင်းလင်း လက်ခံထားကြသည်။

"အကုန်လုံး ဒီမှာရှိကြလား..."

ရှန့်ကျားချီက ပြုံး‌နေသေးသော်လည်း သူက ဥက္ကဌ၏ ထိုင်ခုံတွင် ထိုင်နေသမျှ ဖိအားတစ်ခုက ညီလာခံခန်းတစ်ခုလုံး ပျံ့နှံ့သွားပုံရသည်။ လူအများက တည့်တည့်မတ်မတ်ထိုင်နေကြပြီး ရှန့်ကျားချီ၏ ရှေ့တွင် မဆင်မခြင် မပြုမူမိစေရန် သတိထားနေကြသည်။ 

"ဒီအစည်းအဝေးရဲ့ ရည်ရွယ်ချက်ကို အားလုံးသိကြမယ်လို့ ယုံကြည်ပါတယ်...Max က နိုင်ငံတကာမှာ နာမည်ကြီးတဲ့ အမှတ်တံဆိပ်တစ်ခုဖြစ်ပြီး သူ့ရဲ့ စွမ်းဆောင်ရည် ဒါမှမဟုတ် ဒီဇိုင်းပိုင်းအရရော သူ့ရဲ့ စူပါကားတွေကို ကမ္ဘာတစ်ဝှမ်းမှာ တော်တော်လေး ရောင်းရတယ်...ဒီတစ်ခါမှာတော့ Max ကကျွန်တော်တို့နိုင်ငံမှာ သီးသန့် ကိုယ်စားလှယ်တစ်ဦးကို ရှာဖွေနေပါတယ်...ဒါက သူတို့က ပြည်တွင်းဈေးကွက်ကို ဝင်ရောက်လိုတဲ့ ဆန္ဒကို ညွှန်ပြနေတယ်...

မော်တော်ကားလုပ်ငန်းရဲ့ အဖွဲ့ဝင်တွေအနေနဲ့ အထူးသဖြင့် မကြာသေးခင်နှစ်တွေအတွင်းမှာ သိသာထင်ရှားစွာနဲ့ ကြီးထွားလာခဲ့တဲ့ ကျုပ်တို့နိုင်ငံရဲ့ မော်တော်ကားစျေးကွက်ရဲ့ ခေတ်ရေစီးကြောင်းတွေကို အားလုံးသတိပြုသင့်တယ်... Max လိုမျိုး အဆင့်မြင့်စူပါကားတွေက ဝယ်လိုအား မြင့်တယ်...Max နဲ့ စာချုပ်ချုပ်ပြီးတာနဲ့ ကျွန်တော်တို့က တန်ဖိုးကြီးကားစျေးကွက်ရဲ့ အတိုင်းအတာတစ်ခုအထိကို ရယူနိုင်မှာပါ..."

အံ့သြစရာကောင်းသည်က အစည်းအဝေးများတွင် အနည်းငယ်သာ ပြောလေ့ရှိသည့် ရှန့်ကျားချီက ယနေ့ အတော်‌ ရှင်းရှင်းလင်းလင်းပင် ထုတ်‌ဖော်ပြောဆိုနေသည်။ သူက Max အမှတ်တံဆိပ်ကို အလွန်အလေးထားကြောင်း ထင်ရှားသည်။

"ယုံကြည်စိတ်ချရတဲ့ သတင်းအရင်းအမြစ်တွေအရ Max ရဲ့ မားကတ်တင်းဒါရိုက်တာက နောက်ထပ်စျေးကွက်သုတေသနပြုလုပ်ဖို့ ကျုပ်တို့ရဲ့ နိုင်ငံကို တနင်္ဂနွေနေ့ကျရင် လာလိမ့်မယ်...ကျုပ် ဆန္ဒရှိတဲ့ ရလဒ်က ဒီခရီးစဉ်အပြီးမှာ ကျုပ်တို့ရဲ့ ချန်ဖုန်းအုပ်စုက Max အတွက် အ‌ရေးပါတဲ့ အေးဂျင့်အဖြစ် ချုပ်ကိုင်ပြီးသားဖြစ်ရမယ်..."

ရှန့်ကျားချီက ဤတာဝန်အတွက် မည်သူတာဝန်ယူရမည်ကို အတိအလင်း မပြောသော်လည်း သူ၏ အကြည့်က ဝေ့ချန်ကို စူးစူးစိုက်စိုက်ကြည့်နေသည်ကို ဉာဏ်ရှိသည့်သူတိုင်းက သတိပြုမိကြသည်။ ရှင်းရှင်းလင်းလင်းပင် ဝေ့ချန်က သူ နှစ်သက်သော ကိုယ်စားလှယ်လောင်းဖြစ်သည်မှာ ထင်ရှားသည်။

"ဥက္ကဌ ရှန့်..."

ကျိုးထုံဖမ်းက ဤအောင်မြင်မှုအတွက် ဝေ့ချန်ကို လွယ်လွယ်ကူကူ ဂုဏ်ပြုခွင့်မပြုလိုသည်မှာ သဘာဝကျသည်။

"ကျုပ် အမေရိကန်ကို အလုပ်ကိစ္စနဲ့ ခရီးထွက်နေတုန်းက Max ရဲ့ ဒါရိုက်တာနဲ့ ဆုံဖူးပါတယ်...Max ရဲ့ မားကတ်တင်းဒါရိုက်တာက တရုတ်နိုင်ငံကို လာတဲ့အခါ သူနဲ့တွေ့ဖို့ မျှော်လင့်ပါတယ်...ကျွန်တော်တို့ အကုန် စီစဉ်ပြီးသွားပါပြီ..."

ကျိုးထုံဖမ်းက လုပ်ငန်းတာဝန်ကို ထမ်းဆောင်ရန် စတင်လုပ်ဆောင်ခဲ့ပြီး နောက်ပိုင်းတွင် အစီရင်ခံတင်ပြရန် နောက်ထပ် လေလှိုင်းတစ်ခုပင် ရှိသေးသည်။ သို့သော်လည်း ရှန့်ကျားချီက ဆက်၍ ပြောခဲ့သည်။

"ဒုဥက္ကဌကျိုးက Max ရဲ့စျေးကွက်ရှာဖွေရေးဒါရိုက်တာနဲ့ ရင်းနှီးတာကြောင့်မလို့ အဲ့ဒါဆိုရင် ခင်ဗျား အကောင်းဆုံးလုပ်ပါ...ဒုဥက္ကဌကျိုး..."

ကျိုးထုံဖမ်းက ပြုံး၍ ခေါင်းယမ်းကာ ပြန်ပြောခဲ့သည်။

"ဒါက ကုမ္ပဏီရဲ့ အကျိုးအတွက်ပဲ...ဒါအတွက် ဒုက္ခမဖြစ်ပါဘူး.."

"ဒါဆို ကျေးဇူးပြုပြီး အကုန်လုပ်ခဲ့ပါ...ဒုဥက္ကဌကျိုး..."

"ကျွန်တော် အကုန်သေချာ လုပ်မှာပါ..."

ကျိုးထုံဖမ်းက သူ့မျက်လုံးများတွင် ဂုဏ်ယူနေသည့် အရိပ်အယောင်များဖြင့် ပြောလိုက်သည်။

သူ၏ အဆက်အသွယ်များကြောင့် ရှန့်ကျားချီက ၎င်းတို့အား ရိုးရှင်းစွာ လျစ်လျူမရှုနိုင်ဘဲ ထိုကဲ့သို့ အဆက်အသွယ်မရှိသော ဝေ့ချန်ကို ကိုင်တွယ်ခွင့်ပေးမည်မဟုတ်ပေ။ ရှန့်ကျားချီက မိုက်မဲသော ဆုံးဖြတ်ချက်များ ချမည့်သူမဟုတ်ပေ။ ထို့ကြောင့် ကျိုးထုံဖမ်းက ကြိုတင်ပြင်ဆင်မှုများ ပြုလုပ်ထားပြီးဖြစ်ပေသည်။

<< >>

💘