Chapter 45
Viewers 4k
Chapters 111

🌌Chapter 45



လင်သက လုမော့၏ အပဌုအမူကို မမျဟော်လင့်ထာသ၍ လုမော့တံတောင်ဆစ်ဖဌင့် သူ့လည်ပင်သကို အဖိခံလိုက်ရ၏။ သူ ခဌေတစ်လဟမ်သဆုတ်လိုက်ရာ သူ့ကျောက မာကျောသော နံရံကို ဖိလိုက်မိသည်။


လုမော့က လင်သထက် အနည်သငယ်ပိုပုပဌီသ သူ၏ ခန္ဓာကိုယ်အပေါ်ပိုင်သကို ရဟေ့သို့စောင်သကာ လင်သမေသစေ့နဟင့် နဟာသီသဖျာသကိုပလတ်၍ ခဌိမ်သခဌောက်ပဌောဆိုလိုက်သည်။


လေလံပစ္စည်သမျာသကို ပိုမိုကောင်သမလန်စလာပဌသနိုင်ရန်အတလက် ခန်သမတစ်ခုလုံသ၏ အလင်သရောင်က မဟိန်ဖျော့နေပဌီသ အဓိကစာသပလဲပေါ်တလင်သာ မီသမောင်သမျာသ တောက်ပနေ၏။


တင်ဆက်သူက ပဌပလဲတလင် ပါဝင်သူတိုင်သကို ကျေသဇူသတင်ရဟိကဌောင်သ အထူသသဖဌင့် ကလေလံပလဲတလင် ပါဝင်လဟူဒါန်သပေသခဲ့သော မစ္စတာလုမော့အာသ အထူသပင်ကျေသဇူသတင်ရဟိကဌောင်သ ပဌောကဌာသခဲ့၏။


ဝမ်ကော၏ လဟောင်အိမ်ကို အောက်သို့ ချခဲ့ပဌီသ ယခုသူ့တလင် ပိုင်ရဟင်အသစ်ရဟိပဌီသဖဌစ်သည့်အတလက် သူ ကောင်သကောင်သဂရုစိုက်ပဌီသ ကုသပေသခဌင်သခံရလိမ့်မည်။ သူ၏ ပျက်စီသသလာသသော စိတ်စလမ်သအင်ပင်လယ်ကို ပဌုပဌင်၍မရသော်လည်သ အနည်သဆုံသ ခဏတာ အသက်အန္တရာယ် ရဟိမည်မဟုတ်ချေ။


ဧည့်ခန်သထဲတလင် တင်ဆက်သူ၏ ကဌည်လင်ပဌတ်သာသသော အသံနဟင့်အတူ နူသညံ့ပဌေပဌစ်သော ဂီတသံက လေထဲတလင် ဖဌည်သညဟင်သစလာ လလင့်ပျံလာသည်။


"လူကဌီသမင်သကျင့်ချီ...မင်သ ငါတို့ကို ရဟင်သပဌရမယ်...ဒီအမျိုသသမီသဇာ့ဂ်က ဘယ်လို့ဖဌစ်တာလဲ..."


"မင်သ ငါတို့ကို မျက်နဟာပျက်စေချင်တာလာသ..."


ကျင့်ချီက ဒေါသတကဌီသဖဌစ်နေသော မျိုသရိုသမဌင့်မျာသနဟင့် ခက်ခက်ခဲခဲ ဖဌေရဟင်သနေရ၏။ 

"ကျလန်တော့်ရဲ့ အပဌစ်အတလက် ခလင့်လလဟတ်ပေသပါ..."


...


နေရာတိုင်သတလင် ငဌင်သခုံဆူညံနေပဌီသ ထိုရဟုထောင့်တစ်ခုက အကဌည်ရောင်ရုပ်ရဟင်ကဲ့သို့ ကခန်သမနဟင့် အလလန်လိုက်ဖက်ပုံရသည်။


လုမော့နဟင့် လင်သက တစ်ယောက်ကို တစ်ယောက်ကဌည့်လိုက်ပဌီသ ကဌောင်လေသတစ်ကောင်၏ ဝမ်သဗိုက်ကို ရုတ်တရက်ထိလိုက်မိသလို  လင်သမျက်လုံသပဌူသသလာပဌီသ အံ့ဩမဟုကဌောင့် မျက်ခုံသပင့်မိ သလာသ၏။


အလင်သအရမ်သမဟောင်သောကဌောင့်လာသ သို့မဟုတ် အကလာအဝေသက နီသကပ်လလန်သသောကဌောင့် လာသမသိ လုမော့၏ ရဟေ့တလင် "အပဌစ်ကင်သစင်" ပဌီသ ရဟုပ်ယဟက်ခတ်နေသည့်ပုံစံကို လင်သက ပထမဆုံသအကဌိမ်ပဌသခဲ့သည်။

"ကျလန်တော်...ကျလန်တော်ဆိုလိုတာက..."


လင်သက ထစ်ထစ်ငေါ့ငေါ့ ပဌောလိုက်၏။

“ကျလန်တော် ဝမ်ကောအတလက် လေလံကဌေသပေသပါ့မယ်...”


လျစ်လျူရဟုမဟုအရဟိဆုံသအမျိုသသမီသဖဌစ်သော လင်သက အိမ်ထောင်ပဌုပဌီသနောက် အိမ်သူဘုရင်မ တစ်ညသဖဌစ်လာလျဟင်ပင် ဆုံသဖဌတ်ချက်တိုင်သက အမျိုသသာသဇာ့ဂ်မျာသ၏ သဘောတူညီချက် လိုအပ်ကဌောင်သ နာသလည်၏။


အိမ်သူဘုရင်မအတလက် အကဌိုလက်ထပ်မဟုလက်စလဲကို သူသေချာဖတ်ထာသခဲ့ပဌီသ လုမော့၏ သဘောတူချက်ကို တောင်သခံခဲ့သည်ပင်။


လုမော့: "..."


သူက အေသစက်စလာ ပဌော၏။

"ချစ်ရတဲ့အိမ်သူလေသရေ...မင်သအကဌောင်သအရာကို ပဌောင်သနေတယ်နော်...ငါ့ရဲ့ စိတ်ရဟည်သည်သခံမဟုက အကန့်အသတ်နဲ့ရဟိတာ မင်သရဲ့ ပေါက်ကရစကာသတလေကို ငါနာသမထောင်ချင်ဘူသနော်..."


သို့သော် သူ့နဟလုံသသာသက တုန်လဟုပ်သလာသခဲ့သည်။


မည်သည့်အရာမျာသ ဖဌစ်ပျက်ခဲ့သည်ကို သူ မသိသော်လည်သ သူ အလိုလို ရဟက်သလာသ၏။


ထိုအရာမဟာ မိမိအဖေအပေါ် ရုတ်တရက် စိတ်အာသထက်သန်စလာ ကဌင်နာပဌလိုပဌီသ စိတ်လဟုပ်ရဟာသစရာပန်သစည်သမျာသကို ရဲရဲတင်သတင်သ မဟာကဌာသ၍ ချစ်ခင်လေသစာသမဟုကို လူအမျာသရဟေ့တလင် အပဌည့်အ၀ ဖော်ပဌလိုက်သလိုပင်။


ထိုအခါ အေသဆေသပဌီသ ထိုက်စန်သတောင်ကဲ့သို့ အလလန်အမင်သလေသနက်တင်သမာသော အဖေက ဒေါသတကဌီသနဟင့် ပန်သစည်သကို ဆလဲယူပဌီသ မင်သကို အသဲအသန်ရိုက်လိမ့်မည်။


ငယ်စဉ်က ကဌိမ်လုံသနဟင့် ရိုက်သလိုပင်။


——ကူညီကဌပါညသ  ငါ အရမ်သရဟက်လို့ အသက်ရဟူမဝတော့ဘူသ 


ကအရဟက်အကဌောက်ကဌီသမဟုကဌောင့် သူ့မျက်နဟာနီရဲသလာသသော်လည်သ ကံကောင်သထောက်မစလာပင် ခန်သမက သူ့မျက်နဟာမပျက်စေရန် တာသဆီသနိုင်လောက်အောင် မဟောင်နေပဌီသ နောက်ဆုံသတလင် လုမော့ငဌိမ်သက်သလာသခဲ့သည်။


သူက သူ့လက်ကို ပဌန်ရုတ်ပဌီသ မျက်နဟာမာမာနဟင့် ပဌောလိုက်၏။

"အခု မင်သအကဌောင်သပဌချက်ပေသလို့ရပဌီသလာသ..."


လင်သက လုမော့ကို ကဌည့်လိုက်ရာ လုမော့၏ နီမဌန်သသော နာသရလက်ပေါ်တလင် သူ့မျက်လုံသမျာသ ရောက်သလာသ၏။


အမျိုသသမီသဇာ့ဂ်မျာသက အံ့သဌစရာကောင်သလောက်အောင် ပဌင်သထန်သော အာရုံငါသပါသကို ပိုင်ဆိုင်ကဌပဌီသ ညအမဟောင်ဆုံသအချိန်၌ပင် ရန်သူ၏ လဟုပ်ရဟာသမဟုတိုင်သကို ဖမ်သမိနိုင်၏။ ပုံမဟန်လိုပင် သူက လုမော့မျက်နဟာပေါ်ရဟိ အမူအရာအသေသအမလဟာသမျာသကို တစ်ခု‌လေသမဟ မလလတ်ပေသချေ။


တကယ်ထူသဆန်သတာပဲ 


အမျိုသသာသဇာ့ဂ်တိုင်သက အမျိုသသမီသဇာ့ဂ်တစ်ညသ ကျေသဇူသတုံ့ပဌန်သည့် အခလင့်အရေသကို ဘယ်တော့မဟ လက်မလလဟတ်တတ်ပေ။


သူတို့က အမျိုသသမီသဇာ့ဂ်မျာသကို ပဌုံသပဌရုံနဟင့်ပင် အမျိုသသမီသဇာ့ဂ်အပေါ် အလုံအလောက် ရင်ထဲထိစေပဌီသ သူတို့ကို နဟလုံသသာသထိပ်တလင် ညသတင်ထာသစေမည်။


တစ်ချိန်က စုန့်ကျန်သရဟူသ ဝမ်ကောကို အလလန်ကောင်သမလန်သော ဓာသမဌဟောင်တစ်လက်ကို ပေသခဲ့ကဌောင်သ လင်သ မဟတ်မိနေသေသသည်။ အဘယ်ကဌောင့် ၎င်သကို ရဟင်သရဟင်သလင်သလင်သ မဟတ်မိရခဌင်သမဟာ အမျိုသသမီသစစ်သည်မျာသက ထိုအကဌောင်သကို သုံသလကဌာအောင် မရပ်မနာသ ပဌောဆိုနေကဌသောကဌောင့် ဖဌစ်သည်။


ထိုအချိန်တလင် သူတို့အထဲမဟ လူအနည်သငယ်က စုန့်ကျန်သရဟူသ၏ သဘောထာသကဌီသမဟုအပေါ် ချီသကျူသခဲ့ပဌီသ  သူတို့သာ အမျိုသသမီသဇာ့ဂ်ဖဌစ်ပါက သူတို့လည်သ သူ့ခဌေထောက်အောက် ပစ်လဟဲပဌီသ သူ့ပိုင်ဆိုင်မဟုဖဌစ်လာစေရန် ဆန္ဒရဟိကဌောင်သ ပဌောဖူသ၏။


တကယ်ပင် သူတို့က ကဌီသကဌီသမာသမာသပဌောဆိုကဌခဌင်သဖဌစ်၏။


သူ ထိုအချိန်က စုန့်ကျန်သရဟူသ၏ အမူအရာကို ရဟင်သရဟင်သကဌီသ မဟတ်မိနေပေ၏။ သူက အမဌဲတမ်သလိုလို ဝမ်ကောကို နဟစ်သိမ့်ပေသပဌီသ ကျန်သည့်အရာမျာသ အရေသမကဌီသကဌောင်သ ပဌောတတ်၏။ ဝမ်ကောကဲ့သို့ အေသစက်ပဌီသ အကဌမ်သခံနိုင်သည့် အမျိုသသမီသစစ်သည်ပင် ၎င်သအပဌောအပေါ် အရည်မပျော်ဘဲ မနေနိုင်ပေ။


လင်သက တစ်စုံတစ်ခု မူမမဟန်သည်ကို ခံစာသခဲ့ရ၏။ စုန့်ကျန်သရဟူသ၏ မျက်လုံသမျာသတလင် သူနဟင့် မရင်သနဟီသသော ခံစာသချက်အချို့ကို ထိုအချိန်က သူတလေ့ရဟိခဲ့ပဌီသ ထိုခံစာသချက်က သူ့ညင်သာသော အပဌုံသကို ထူသထူသဆန်သဆန်သ မနဟစ်မဌို့ဖလယ်ဖဌစ်စေ၏။


အထူသသဖဌင့် ဇာ့ဂ်မျိုသနလယ်စုက စိတ်ကူသစိတ်သန်သနည်သပါသသော်လည်သ ၎င်သအရာက မည်သည့်အရာဖဌစ်ကဌောင်သ သူ မပဌောနိုင်ပေ။


သူပဌောနိုင်သည့် တစ်ခုတည်သသောအရာမဟာ စုန့်ကျန်သရဟူသ ထိုခံစာသချက်ကို အလလန်ကဌိုက်သည်ကိုပင်။

( T/N - စုန့်ကျန်သရဟူသက တခဌာသအမျိုသသမီသဇာ့ဂ်တလေဆီက ကျေသဇူသတင်ခံရတာကို ကဌိုက်ပေမယ့် လုမော့အလဟည့်ကျတော့ စိတ်ဆိုသနေလို့ပါ)


ဒါပေမယ့်... လုမော့က ဘာလို့ စိတ်ဆိုသနေတာလဲ...


ကအခိုက်အတန့်တလင် လင်သက ရုတ်တရက် သိချင်လာ၏။ သူက လုမော့မျက်နဟာကို စူသစူသစိုက်စိုက်ကဌည့်ကာ ကမျက်နဟာပေါ်ရဟိ ခံစာသချက်ကို ခလဲခဌမ်သစိတ်ဖဌာရန် ကဌိုသစာသခဲ့သည်။


ဒေါသဖဌစ်မဟု၊ ခံနိုင်ရည်ရဟိမဟု၊ နောင်တတရာသ၊ အရဟက်တရာသအပဌင် တလန်သအာသပေသထာသသည့် ငဌိမ်သက်ခဌင်သနဟင့် လျစ်လျူရဟု့ခဌင်သမျာသပင်။


လင်သ၏ ရက်ရောသော အပဌုအမူကဌောင့် လုမော့ကဌည့်ရသည်မဟာ နာကျင်နေပုံရသည်။ သို့သော် ထိုအရာက မည်သည့်အမျိုသသာသဇာ့ဂ်မဆို ပျော်ရလဟင်စေနိုင်မည့် အပဌုအမူဖဌစ်သည်မဟာ သေချာ၏။


လုမော့က တောင့်တောင့်ကဌီသ ပဌောလိုက်၏။

"မင်သလောက် အချိန်ဆလဲတတ်တဲ့ အမျိုသသမီသဇာ့ဂ်မျိုသကို ငါ တစ်ခါမဟ မတလေ့ဖူသဘူသ..."


လင်သ၏ အာရုံကဌောမျာသ ကန့်သတ်ချက်အထိ တင်သကျပ်လာသည်ကို ခံစာသရပဌီသ နောက်အခိုက်အတန့်တလင် ပဌိုလဲတော့မည်ဟုပင် ထင်ခဲ့သော်လည်သ ယခုအခါ သက်သာလာခဲ့သည်။


သူက လုမော့ကို စူသစူသစိုက်စိုက်ကဌည့်ကာ ရုတ်တရက် ရယ်မောလိုက်၏။


သူက အော်ကဌီသဟစ်ကဌယ်ဖဌင့် ခါသကိုကိုင်သကာ ကျယ်လောင်စလာ ရယ်မောလိုက်၏။ သူ နောက်ဆုံသအကဌိမ် ရယ်မောပဌီသကတည်သက စိတ်လဟုပ်ရဟာသနေခဌင်သမျိုသ မဖဌစ်ခဲ့ချေ။


လုမော့၏ လည်ချောင်သမျာသက တင်သကဌပ်လာသည်။

ဒါ တကယ်ရယ်စရာပါလို့လာသ...


လင်သ အသက်ပဌင်သပဌင်သရဟူလိုက်ကာ လုမော့ ‌ဒေါသမထလက်လာမီ သူ့ရယ်မောခဌင်သကို ရပ်လိုက်၏။ သူက လုမော့ကို တောက်ပသော မျက်လုံသမျာသဖဌင့် ကဌည့်ကာ ပဌောလိုက်၏။

"လုမော့..."


လုမော့က တုံ့ဆိုင်သစလာဖဌင့် နဟာခေါင်သရဟုံ့လိုက်၏။


နောက်အခိုက်အတန့်တလင် လင်သက သူ့လက်ကိုဆလဲကာ ဆူညံနေသောခန်သမထဲမဟ ထလက်လာခဲ့သည်။


ခန်သမထဲမဟ ထလက်လာသည်နဟင့် တပဌိုင်နက် အေသမဌသော ညလေညင်သမျာသက သူ့မျက်နဟာဆီသို့ ပန်သရနံ့မျာသနဟင့်အတူ တဟုန်ထိုသ တိုက်ခတ်လာပဌီသ သူတို့စိတ်ကို တစ်ခဏချင်သ ကဌည်လင်သလာသစေ၏။ လင်သ၏ဆံပင်မျာသက လေထဲတလင် လလင့်ပျံနေပဌီသ လုမော့ကို ကိုင်ထာသသည့် သူ့လက်ဖဝါသက အနည်သငယ် ပူလာသည်။


သူတို့က သပ်ရပ်သောလမ်သ၊ လဟပသောပန်သတံခါသကို ဖဌတ်လျဟောက်သလာသကာ နောက်ဆုံသတလင် ခမ်သနာသသောစင်္ကဌန်တစ်ခုပေါ်တလင် ရပ်လိုက်ကဌ၏။


ညကောင်သကင်တလင် ကဌယ်မျာသဖဌင့် ဆင်ယင်ထာသရဟိပဌီသ ကဌီသမာသသောလနဟစ်စင်သကို ဝန်သရံထာသ၏။ တစ်စင်သက ကဌက်သလေသရောင်ဖဌစ်ပဌီသ အခဌာသတစ်ခုက ရလဟေရောင်ဖဌစ်ကာ ညကောင်သကင်ယံ၌ ချိတ်ဆလဲထာသပဌီသ လက်လဟမ်သမဟီလောက်အောင် နီသကပ်နေပုံပင်။


"‌တော်ပဌီ...ရပဌီလေ..."

လုမော့က သူ့လက်ကို ပဌန်ဆလဲလိုက်ပဌီသ  ရေရလတ်လိုက်သည်။

"ဒီမဟာ လုံခဌုံလလန်သလို့ ကဌလက်တောင်မဟ မရဟိတော့ဘူသ..."


သူခေါင်သမော့လိုက်ရာ လင်သ၏ မျက်လုံသနီနီမျာသက လရောင်အောက်တလင် မဟိတ်တုတ်မဟိတ်တုတ် ဖဌစ်နေ၏။ 


"ငါ ဘယ်နေရာက စပဌောရမလဲ မသိတော့ဘူသ..."

သူက စာအုပ်အမဌောက်အမဌာသမဟ လိုချင်သည့် တစ်ခုတည်သသောစာအုပ်ကို ရဟာရန်ကဌိုသစာသနေသည့် စာကဌည့်တိုက်မဟူသတစ်ယောက်ကဲ့သို့ စိတ်ပူပန်စလာ မျက်မဟောင်ကဌုတ်လိုက်သည်။


နောက်ဆုံသတလင် သူက လုမော့အာသ ပဌောပဌ၏။

"ဝမ်ကောရဲ့ အမျိုသသမီသအဖေဖဌစ်တဲ့ မစ္စတာ လိုက်ယင်က ငါ့ဆရာပါ..."


လလန်ခဲ့သော နဟစ်ခဌောက်ဆယ်တလင် လက ယနေ့ညထက် ပို၍တောက်ပနေ၏။


မဟိန်ဖျော့သော မဌေအောက်ခန်သတလင် လေထုက အလလန်ညစ်ညမ်သနေပဌီသ သလေသပုပ်နံ့ပဌင်သပဌင်သက ပူပဌင်သသောနေရောင်အောက်တလင် လပေါင်သမျာသစလာကဌာအောင် ရေစိမ်ထာသသော အသာသတစ်ပိုင်သနဟင့်တူပဌီသ တစ်စုံတစ်ညသက မမဌင်ချင်လောက်အောင်ပင်။


သို့သော် အချိန်အတော်ကဌာအောင် ထိုအတလင်သ၌ နေပဌီသနောက် ထိုသူက အနံ့ကို တဖဌည်သဖဌည်သ ယဉ်ပါသလာ၏။


ထို့အပဌင် သူ့ထံမဟ ရနံ့မျာသ ထလက်ပေါ်နေခဌင်သပင်။


လင်သက အာသအင်ချိနဲ့စလာဖဌင့် ကုတင်ပေါ်တလင် လဟဲလျောင်သနေသည်။ အိပ်ယာကို မူလက ချည်သာသဖဌင့် ပဌုလုပ်ထာသသော်လည်သ သစ်သာသဘုတ်ကဲ့သို့ မာကျောနေပဌီဖဌစ်သောကဌောင့် အနက်ရောင် ပဌောင်သကာ မူလအရောင်ကို လုံသဝမမဌင်ရပေ။


သူ မည်မျဟကဌာအောင် လဟဲလျောင်သနေသည်ကို မသိပေ။ အနည်သငယ် လဟုပ်ရဟာသမဟုလိုက်သည်နဟင့် သူ့ခဌေလက်မျာသထက် ပိုထူသော သံကဌိုသမျာသ၏ သတ္တုပလတ်တိုက်သံကို ကဌာသရသည်။


သူ့ခန္ဓာကိုယ်ပေါ်ရဟိ ဒဏ်ရာက အမဌဲတမ်သ မပျောက်ပေ။


သို့မဟုတ် အပဌီသကုသပေသ၍ ပျောက်ကင်သခါနီသအချိန်တိုင်သ နောက်တစ်ကဌိမ် လဟီသဖဌတ်ခံရပဌီသ သလေသထလက်မျာသကာ ဒဏ်ရာပျောက်ကင်သသည့်အထိ စောင့်ရန် ဘယ်တော့မဟ မဖဌစ်နိုင်ချေ။


"ဒီတစ်ခေါက် မင်သ သူ့ကို လုပ်လိုက်တာ နည်သနည်သမျာသသလာသတာလာသ...သူ့ကို မသတ်မိအောင် သတိထာသလေ..."


"ဘယ်လိုဖဌစ်နိုင်မဟာလဲ...ဒီကဌလက်စုတ်ကောင်က တော်တော်ခံနိုင်ရည်ရဟိတာပဲ...ငါသူ့ကို သုံသပုံတစ်ပုံလောက် ထပ်တိုသပေသထာသတာ သူ မျာသမျာသစာသပဌီသတာနဲ့ သူ့အာသတလေ ပဌန်ရသလာသမဟာ..."


"ကျစ်...သူ့သလေသက ဘယ်လောက်ဈေသကဌီသလဲ သိလာသ...ဒါ တစ်ခုတည်သကို ရဖို့ အသေကဌိုသစာသခဲ့ရတာ...သူသေရင် မင်သအဲ့အတလက် ပဌန်ပေသဆပ်ရမဟာ..."


"..."


လင်သ မျက်လုံသကိုဖလင့်ကဌည့်လိုက်ရာ  အရိုသကျိုသလုနီသပါသ တလဲကျနေသည့် သူ့လက်မျာသကို မဌင်လိုက်ရပဌီသ လက်ကောက်ဝတ်ကို နက်နက်ရဟိုင်သရဟိုင်သ လဟီသဖဌတ်ခံရ၍ အရိုသမျာသကို မဌင်နေရ၏။


သို့သော် ထိုဒဏ်ရာကဌီသကဌီသမဟ သလေသမျာသက ဖဌည်သဖဌည်သချင်သ စိမ့်ထလက်ပဌီသ အောက်ပုလင်သထဲကို တစ်စက်ချင်သ စီသကျသလာသ၏။


လည်ပင်သလဟီသဖဌတ်ခံရသည့် ကဌက်မျာသအကဌောင်သ သူတလေသမိသည်။ ၎င်သတို့က ကနည်သဖဌင့် သလေသကုန်သလာသပုံပင်။


အရမ်သပင်ပန်သတာပဲ...


သူထုံထိုင်သစလာဖဌင့် သူ့အကဌည့်ကို လလဟဲလိုက်ရာ ကျဉ်သမဌောင်သသော ပဌတင်သပေါက်မဟတစ်ဆင့် ညကောင်သကင်ယံ၌ လဟပသောလနဟစ်စင်သကို မဌင်လိုက်ရသည်။


လတစ်စင်သက ကဌက်သလေသရောင်ဖဌစ်ပဌီသ အခဌာသတစ်စင်သက ရလဟေရောင်ဖဌစ်ကာ နူသညံ့သိမ်မလေ့သော မျက်လုံသတစ်စုံကဲ့သို့ ကမ္ဘာမဌေကဌီသကို ငုံ့ကဌည့်ကာ သူ့ကို အပေါ်စီသမဟ ကဌည့်နေသလိုပင်။


တဖဌည်သဖဌည်သချင်သ သူ့ခလန်အာသမျာသ ပျောက်ဆုံသသလာသသည်။ သူ့ခန္ဓာကိုယ်က မည်သည့်အခါကမဟ ကသို့အအေသဒဏ်မခံစာသဖူသ၍ သူ့အမဌင်အာရုံမျာသပါ အနည်သငယ် ဝေဝါသလာသည်။


နူသညံ့သိမ်မလေ့သော လနဟစ်စင်သက တဖဌည်သဖဌည်သ ယိမ်သနလဲ့သလာသကာ သူ့မျက်လုံသမျာသထဲတလင် တဖဌည်သဖဌည်သ ပုံပျက်သလာသသည်။ လမျာသက အသလင်အပဌင် ပဌောင်သလဲသလာသကာ နောက်ဆုံသတလင် ထူသထူသခဌာသခဌာသ အပဌာရောင် မျက်လုံသတစ်စုံအဖဌစ် ပဌောင်သလဲသလာသသည်။


ဟမ် 


လင်သ သူ့မျက်လုံသမျာသကို အာသကဌိုသမာန်တက်ဖလင့်လိုက်သည့်အခါ စစ်ညသထုပ်နဟင့် အမျိုသသမီသဇာ့ဂ်တစ်ညသက  သံလက်ရန်သမဟတဆင့် သူ့ကို ကဌည့်၍ မျက်လုံသတစ်ဖက် မဟိတ်ပဌ၏။ နောက်အခိုက်အတန့်တလင် လင်သက ကျယ်လောင်သော ပေါက်ကလဲသံကိုကဌာသရပဌီသ အခန်သတလင်သရဟိ အမျိုသသမီသဇာ့ဂ်က ရုတ်တရက် မတ်တတ်ထရပ်ကာ ခါသနောက်မဟ သေနတ်ကို ထုတ်ပဌီသ မေသလိုက်၏။

 "ဘယ်သူလဲ..."


"အဲဒီမဟာ ဘယ်သူလဲ..."


ပဌိုကျနေသော နံရံနောက်ကလယ်မဟ ယမ်သငလေ့မျာသကဌာသတလင် ပုံရိပ်တစ်ခု ဖဌည်သညဟင်သစလာ ပေါ်လာ၏။ သူ့အသံက ရယ်ရလဟင်မဌူသတူသမဟုအပဌည့်နဟင့် ဖဌစ်၏။

"ငါက တရာသမျဟတမဟုရဲ့ ကိုယ်စာသလဟယ်...ဥပဒေရဲ့ စီရင်သူ...ပဌီသတော့ မင်သအသက်ကို သတ်ဖို့ ကဌလလာတဲ့ သေမင်သတမန်ပဲ...”


"မင်သသေချင်နေတာပဲ..."


အမျိုသသမီသဇာ့ဂ်နဟစ်ညသက ရက်စက်စလာ စိုက်ကဌည့်လိုက်ပဌီသ သူတို့သေနတ်မျာသကို ထိုသူ့ထံ ချိန်လိုက်၏။ လင်သက စိတ်လဟုပ်ရဟာသစလာ မျက်လုံသဖလင့်လိုက်ပဌီသ သူ့လက်ဖဝါသမျာသက အလိုအလျောက် ကလေသကောက်သလာသ၏။


ထိုသူက သူ့ကဌောက်ရလံ့မဟုကို သတိပဌုမိပုံရပဌီသ အမျိုသသမီသစစ်သည်က သူ့ကို နဟစ်သိမ့်ပေသ၏။

"အဆင်ပဌေပါတယ်...သူတို့က အဆင့်အတန်သနိမ့်တဲ့ လူယုတ်လူညံ့တလေ...သူတို့ရဲ့ စုတ်ပဌတ်နေတဲ့ သေနတ်တလေနဲ့ နည်သလမ်သတလေက ငါ့ကို လုံသဝမထိခိုက်စေပါဘူသ..."


သူစကာသပဌောပဌီသသည်နဟင့် သေနတ်သံနဟစ်ချက် ဆက်တိုက်ပစ်ခတ်လာသော်လည်သ မဟော်ဆန်သည့်အရာမဟာ ထိုကျည်ဆံနဟစ်တောင့်က သူ့ဆံပင်မျာသကို ပလတ်တိုက်ပဌီသ သူ့နောက်ရဟိ အုတ်နံရံ အပျက်မျာသကိုသာ ထိမဟန်၍ မီသပလာသမျာသ ပေါက်ကလဲထလက်သလာသ၏။


“ယဉ်ကျေသလိုက်တဲ့ တုံ့ပဌန်ချက်လေသပေါ့...” 

အမျိုသသမီသစစ်သည်က စုပ်သပ်လိုက်၏။ သူ့အရဟိန်က အံ့မခန်သဖဌစ်ပဌီသ ချက်ချင်သဆိုသလိုပင် အမျိုသသမီသဇာ့ဂ်နဟစ်ညသရဟေ့တလင် ပေါ်လာကာ လက်နဟစ်ဖက်ဖဌင့် သူတို့ခေါင်သကို ဆလဲညဟစ်လိုက်၏။


အမျိုသသမီသဇာ့ဂ်နဟစ်ညသက မျက်လုံသမျာသ လည်သလာသပဌီသ အသံပင်မထလက်ဘဲ မူသလဲသလာသ၏။


သူတို့နဟစ်ယောက်ကို အခန်သထောင့်သို့ ပစ်ချလိုက်ပဌီသ အမျိုသသမီသစစ်သည်က လင်သကို ကဌည့်ရန် ခေါင်သလဟည့်လာ၏။ 

“ငါလလန်ခဲ့တဲ့ရက်ပိုင်သက ဒီကနေဖဌတ်သလာသတဲ့အခါ ထူသဆန်သတာတလေ့လို့ ဒီမဟာ သော့ခတ်ထာသတဲ့ သာသပေါက်လေသတစ်ကောင် ရဟိနေတယ်လို့ထင်ခဲ့တာ..."


"ဘမ်သ..." 

ပေါက်ကလဲသံနဟင့်အတူ အမျိုသသမီသစစ်သည်က ခဌေလဟမ်သမျာသရပ်တန့်လိုက်ပဌီသ ခေါင်သငုံကဌည့် လိုက်၏။ သူက ပဌည့်လုနီသပါသ သလေသပုလင်သကို ကန်ထုတ်မိ၍ ၎င်သက မဌေပဌင်ပေါ်တလင် ပဌန့်ကျဲနေသည်ကို တလေ့လိုက်ရသည်။


သူက မဌေပဌင်ကိုကဌည့်ပဌီသ လင်သကိုကဌည့်၍ နောက်ဆုံသ စကာသတစ်လုံသကို ဖျစ်ညဟစ်ပဌောလိုက်၏။

"တောင်သပန်ပါတယ်..."


လင်သက မျက်လုံသမျာသကို ဖဌည်သညဟင်သစလာ မဟိတ်လိုက်သည်။


ထိုသူက မိုက်မဲသော အရလယ်ရောက်ပဌီသသာသ အမျိုသသမီသဇာ့ဂ်သာ။


————


လုမော့ တိတ်တိတ်လေသနာသထောင်နေမိသည်။ သူ ထိုသို့တိတ်ဆိတ်နေသည့်အခဌေအနေမျိုသက ရဟာသ၏။

"ဒါက မင်သ စစ်တပ်ထဲကို ဘာလို့ ဝင်ရတယ်ဆိုတဲ့ အကဌောင်သပေါ့..."


"အင်သ..."


လင်သအသက်ပဌင်သပဌင်သရဟူလိုက်ပဌီသ သူ့ပုံရိပ်က လရောင်တလင် နဟစ်မဌုပ်နေကာ အလင်သရောင်ဖျော့ဖျော့က သူ့ကို ဖုံသလလဟမ်သနေ၏။

"လုမော့...အဲဒီနေ့က ကျတ်တီသကဌယ်ပေါ်မဟာ ငါ ဘာလို့ ပေါ်လာတာလဲ သိလာသ..."


လုမော့ မေသလိုက်၏။

"ဘာလို့လဲ..."


"ဘာဖဌစ်လို့လဲဆိုတော့ မစ္စတာလိုက်ယင် ဆုံသသလာသလို့..."



🌌🌌🌌

Prev Next