MM Story Teller

Chapter 195

Viewers 21k

🚩Chapter -195

Arc_9. ဘီလီယံနာ၏ဇနီး [ 9.3 ]

_____

စုကျန်းကျွင့် နှင့် လီမေ့ကျွမ်းတို့က လောင်းကစားဂိမ်းတွင် ထျန်းထျန်၏အကွက်ဆင်ခံလိုက်ရသောကြောင့် ထိုစုံတွဲမှာ လောင်ကစားကြွေးအမြောက်အများကျန်ရှိနေ၏ ။ ထို့ကြောင့် မိသားစုသုံးယောက်မှာ ငှားရမ်းထားသော အိမ်ငယ်လေးဆီသို့ ပြန်မသွားနိုင်တော့ဘဲ အနည်းငယ်ညစ်ပတ်ရှုပ်ပွနေသော ဟိုတယ်တစ်ခုတွင်သာ ပုန်းနေနိုင်တော့သည် ။

ယခုခေတ်တွင် နည်းပညာတို့က အလွန်တိုးတက်နေပြီး သူတို့၏ ခန္ဓာကိုယ်ပေါ်တွင် စက်ပစ္စည်းကိရိယာတစ်ခုခုရှိနေသ၍ အကြွေးရှင်နှင့် ရန်သူများထံမှ အလွယ်တကူရှာဖွေခံလိုက်ရနိုင်ချေရှိ၏ ။ ဤသို့ဖြစ်လာနိုင်ချေကို တားဆီးရန် စုမိသားစုသုံးယောက်က အီလက်ထရွန်းနစ်ချပ်စ် အပြားပါဝင်သော မိုဘိုင်းဖုန်းများကိုပင် မယူသွားတော့ချေ ။

ပြတင်းတံခါးပင်မရှိသော ဟိုတယ်အခန်းတွင် လေထုက မနှစ်မြို့စရာအနံ့များ ပျံ့လွင်နေလျက် ။

ကမ္ဘာပေါင်းများစွာကို ဖြတ်ကျော်လာပြီးနောက်တွင် ဤကဲ့သို့လောဘကြီးသော မိဘများနှင့် တွေ့ဆုံရခြင်းက စုဝမ်အတွက် ပထမဆုံးပင် ။

စုဝမ်ထံတွင် တုအိမ်တော်သို့ ပြန်သွားဖို့နည်းလမ်းရှိကြောင်း ကြားလိုက်ရသောအခါ မကြာသေးခင်က ရန်ဖြစ်နေသေးသော သူနှစ်ယောက်က ယခုတွင် ထောင့်တစ်နေရာ၌ ဆောင့်ဆောင့်ထိုင်ကာ သူတို့၏ " ချမ်းသာပြီး ဂုဏ်သရေရှိသောဘဝ" အနာဂတ်အကြောင်းကို စတင်ဆွေးနွေးနေကြလေ၏ ။ဤကဲ့သို့မိဘများက လူများသင်ခန်းစာယူသင့်သော မကောင်းသည့်မိဘများပင် ။နှစ်ယောက်သားက အနာဂတ် ကြီးကျယ်ခမ်းနာသော ဘဝအတွက် စိတ်ကူးယဥ်မှုများ၌ နစ်မြုပ်နေချိန် စုဝမ် တိတ်တဆိတ်အခန်းပြင်ကို ထွက်သွားသည် ။

ဟိုတယ်မှ ထွက်လာကာ ကျယ်ပြန့်သောလမ်းပေါ်တွင် လျှောက်လှမ်းရင်း စုဝမ် အသက်ဝဝရှူလိုက်၏ ။ ကံကောင်းစွာဖြင့် အပြင်ဘက်ရှိလေထု လတ်ဆတ်နေ၏ ။

မရင်းနှီးသောလမ်းက မြင့်မားသောနည်းပညာသုံးလျှပ်စစ်ကားများ အပြည့်ဖြင့် ။ ဤခေတ်က အလွန်ပတ်ဝန်းကျင်ကို ထိန်းသိမ်းကာကွယ်မှုရှိပြီး စွမ်းအင်အားလုံး၏ အရင်းအမြစ်ကလည်း ပြန်လည်အသုံးပြုနိုင်သော စွမ်းအင်များပင် ။

လမ်းတစ်လျှောက်လုံး စုဝမ် တစ်ယောက်ထဲ လျှောက်လာခဲ့ပြီး ညစာအတွက် စျေးပေါသောအစားအစာသုံးထုပ်ကို ပါဆယ်ဆွဲလာသော်လည်း သူမ ဟိုတယ်သို့ပြန်ရောက်သောအခါတွင် စုကျန်းကျွင့် နှင့် လီမေ့ကျွမ်းတို့ ပျောက်သွားပြီး အခန်းကျဥ်းက လုံးဝရှုပ်ပွနေ၏ ။ လဲကျနေသော ကုလားထိုင်တွင် ဖြစ်ကတက်ဆန်းကပ်ထားသော မှတ်စုစာရွက်ရှိနေသည် ။စုဝမ် မှတ်စုစာရွက်ကို ယူပြီး ကြည့်ကြည့်လိုက်၏ ။ထိုစာရွက်က အကြွေးရှင်များသူတို့မထွက်သွားခင် ချန်ထားခဲ့ခြင်း ဖြစ်သည် ။ထိုအရာ၏ ဆိုလိုခြင်းမှာ စုကျန်းကျွင့် နှင့် လီမေ့ကျွမ်းကို သူတို့အဝေးသို့ ခေါ်သွားပြီး ထိုသူနှစ်ယောက်ကို ပြန်ရွေးချင်ပါက အနည်းဆုံး သူတို့ဒီလပေးရမည့် အတိုး ယွမ်တစ်သိန်းကို ပေးချေရမည် ။

အခုခေတ်မှာ ပိုက်ဆံကိုပိုက်ဆံလို့ မမြင်ကြတော့ဘူးလား ။တစ်လစာအတိုးက ယွမ်တစ်သိန်းတဲ့လား ။

မှတ်စုစာရွက်ကို စုဝမ်ဘေးသို့ပစ်လိုက်ပြီး သူမဝယ်လာခဲ့သော သုံးယောက်စာညစာကို ဝမ်းနည်းစွာ ကြည့်နေလေ၏ ။

ဘယ်လိုတောင် ဖြုန်းတီးရာကျတာလဲ ။သူမ နှစ်ယောက်စာပိုဝယ်လာမိတာပဲ ။ နှစ်ယောက်စာတောင်။

စုကျန်းကျွင့် နှင့် လီမေ့ကျွမ်း၏ လုံခြုံရေးအတွက်လား ။ စုဝမ်စိတ်မပူပေ ။ ထိုအကြွေးရှင်တို့က ပိုက်ဆံကိုသာလိုချင်ပြီး သူတို့၏ အသက်ကို လိုချင်မည်မဟုတ်ပေ ။ ထိုသူနှစ်ယောက်အဖမ်းခံရတုန်း အနည်းငယ်ဒုက္ခခံလိုက်ရလည်း ကောင်းပေ၏ ။ဤအခြေအနေက သူတို့ကို အမှားကနေ သင်ခန်းစာယူဖို့လည်း ဖြစ်နိုင်၏ ။

ပုံမှန်အတိုင်း အခန်းကိုပြန်သန့်ရှင်းလိုက်ပြီးနောက် တစ်လစာနေဖို့ငှားရမ်းထားတာကိုတွေးမိပြီး နေထိုင်ရန် အခြားနေရာရှာဖို့ အကြံဉာဏ်ကို စုဝမ်လက်လျှော့လိုက်တော့သည် ။ သူမ အခန်းထဲမှ အနံ့ဆိုးများ အပြင်ထွက်သွားအောင် တံခါးကိုဖွင့်လိုက်ပြီးနောက် ညစာစစားတော့၏ ။အဆုံးတွင် စုဝမ် နှစ်ယောက်စာစားလိုက်ပြီး သူမ၏ အေးစက်နေသောအမူအရာက ဖြည်းဖြည်းချင်း ပြုံးလာ၏ ။

ဤသို့ဖြင့် စုဝမ် ဤဟိုတယ်တွင် တည်းခိုခဲ့သည် ။ဤဟိုတယ်၏ ပိုင်ရှင်အမျိုးသမီးက စတော့မြှုပ်နှံသူလည်း ဖြစ်၏ ။ သူမကို ပိုက်ဆံရှာနိုင်ဖို့အတွက် စုဝမ်အမှန်တကယ် ကူညီနိုင်တာကို မြင်သောအခါ စုဝမ်အပေါ် ထိုပိုင်ရှင်အမျိုးသမီး၏ ဆက်ဆံပုံက ပိုကောင်းလာပြီး နောက်ဆုံးတွင် စုဝမ်ကို ပြတင်းပေါက်ပါပြီး ပိုကျယ်ဝန်းသောအခန်းကို ပြောင်းပေးခဲ့သည် ။

ဤအချိန်တွင် စုဝမ်၏ ပိုက်ဆံအိတ်ထဲ၌ ပိုက်ဆံအပိုလည်းမရှိတော့ပေ ။ စျေးကွက်ထဲသို့ သူမကိုယ်တိုင်ဝင်ရောက်ဖို့ စုဝမ် မစဥ်းစားခဲ့တာမဟုတ်ပေ ။ သို့သော် သူမ၏ ငွေရင်းက လက်ရှိတွင် ရန်ပုံငွေအတွက် လုံလောက်မှုမရှိချေ ။

တကယ်ကို စွမ်းဆောင်နိုင်တဲ့သူတွေလည်း ပြဿနာသေးသေးလေးကို ရင်မဆိုင်နိုင်တာမျိုးရှိသေးတာပဲ ။

စုဝမ်သည် ပိုင်ရှင်အမျိုးသမီး၏ အရှေ့တွင် သူမ၏ တည်ရှိမှုကို နှိမ့်ချထားပြီး မျက်နှာပေးခံရမည့်အဆင့်ကို တိုးမြှင့်အောင်လုပ်ရန်မှလွဲ၍ နည်းလမ်းမရှိတော့ချေ ။သူဌေးမက သူမကို ကောင်းမွန်သောအခန်းတွင် နေခိုင်းရုံသာမက သူမနှင့်စားသောက်ဖို့လည်း စုဝမ်ကို နေ့တိုင်းဖိတ်ခေါ်လေ့ရှိသည် ။

လဝက်ကျော်သွားပြီးသောအခါ စုကျန်းကျွင့် နှင့် လီမေ့ကျွမ်းတို့ ပြန်ရောက်လာခဲ့သည် ။ဤအချိန်တွင် ထိုနှစ်ယောက်၏ ပုံစံ သနားစရာကောင်းနေပုံပေါ်၏ ။ထိုနှစ်ယောက်က အကြွေးရှင်များထံမှ နှိပ်စက်ခံလာရပုံပင် ။

" ရှောင်ဝမ် ဘာဖြစ်လို့ သမီးအမေကို လာမကယ်ရတာလဲ "

သူမ အခန်းထဲသို့ဝင်ဝင်ချင်း ဖရိုဖရဲဖြစ်နေသော လီမေ့ကျွမ်းက စတင်ငိုယိုတော့သည် ။

ကွဲအက်သောအသံဖြင့်ငိုနေတာကို ကြားရသောအခါ စုဝမ် မျက်မှောင်ကြုတ်သွား၏ ။

" ရှင့်ကိုကယ်ဖို့ ကျွန်မဘာလုပ်နိုင်ဦးမှာလဲ "

စုဝမ် သူမ၏ အိတ်ကပ်ထဲသို့ အနည်းငယ်နှိုက်ကြည့်ရင်း ယွမ်ရာတန်အနည်းငယ်ကိုသာထုတ်လိုက်၏ ။

" ဒါက ကျွန်မရဲ့ပိုင်ဆိုင်မှု အားလုံးပဲ ။ အခု ဒီမိသားစုက ဘယ်လိုအခြေအနေလဲဆိုတာ မသိကြဘူးလား ။ "

" သမီးမှာ ပိုက်ဆံမရှိပေမဲ့ သခင်လေးတု ရှိတယ်မလား ။သူ့ဆီသွားပြီး ငိုယိုတောင်းပန်လိုက်လေ "

စုကျန်းကျွင့်က မွေ့ယာပေါ်တွင် ဖင်ထိုင်ချလိုက်ပြီး သံမှ သံမဏိဖြစ်မလာသည့်အတွက် မုန်းတီးနေမိသည် ။

[ Note; သံမှ သံမဏိဖြစ်မလာတဲ့အတွက် မုန်းတီးမိတယ်ဆိုတာ အောင်မြင်မှုရဖို့ စိတ်မရှည်တာမျိုး ၊ တစ်စုံတစ်ယောက်အပေါ် မကျေနပ်တာမျိုးကို ဆိုလိုတာပါ ]

" ကျွန်မက တုအိမ်တော်ကနေ မောင်းထုတ်ခံရပြီးပြီ ။ သူက လက်ရှိမှာ သူ့ဇနီး နဲ့ ကလေးတွေကို ချစ်မြတ်နိုးနေပြီ ။ သူက အခုပျော်ရွှင်ပြီး ကျေနပ်မှုလည်းရှိနေပြီ ။ ဒါကြောင့် ကျွန်မသေလား ရှင်လား သူက ဘယ်လိုလုပ်စိတ်ထဲထားနေတော့မှာလဲ ။ရှင်တို့မှာ ဦးနှောက်ရောရှိကြသေးရဲ့လား ။ "

စုဝမ်၏ မျက်နှာကလည်း ဤတစ်ကြိမ်တွင်စိတ်ပျက်မှုတို့ဖြင့်ဖုံးလွှမ်းနေလေ၏ ။

" ပြီးတော့ ရှင်တို့နှစ်ယောက်လုံးရဲ့ ခန္ဓာကိုယ်က အကောင်းကြီးပဲ မဟုတ်ဘူးလား ။ ခြေတွေလက်တွေ မဆုံးရှုံးလိုက်ရဘူးမလား ။ ရှင်တို့ စစချင်း ဒီလောက်များတဲ့ ပိုက်ဆံတွေကို ချေးခဲ့တုန်းက ရှင်တို့ဘာတွေတွေးနေကြတာလဲ ။ အဲ့ဒါကို ပြန်မဆပ်နိုင်ရင် ဖြစ်မယ့် အကျိုးဆက်ကိုရော မတွေးမိဘူးလား ။"

" ဒီအချိန်မှာတော့...."

လီမေ့ကျွမ်း အငိုရပ်သွားပြီး စုဝမ်ကို ရှုပ်ထွေးသော အမူအရာဖြင့် ကြည့်လိုက်သည် ။

" အဲ့ဒီအချိန်တုန်းက ငါတို့တုမိသားစုမှာ နေခဲ့ရတာပဲမဟုတ်ဘူးလား ။ သခင်လေးတု ရုတ်တရက်ကြီး ရက်စက်လာလိမ့်မယ်လို့ ဘယ်သူက ထင်မှာလဲ ။ သူက တကယ်ယောကျ်ားကောင်းမဟုတ်ဘူးဘဲ "

လီမေ့ကျွမ်းက တုချန်ကို အဆုံးမရှိ စတင်ဆဲဆိုနေပြီး သူမ၏ လည်ချောင်းက အက်ကွဲပြီး ဆဲဆိုရတာ မောလာမှသာ ရပ်သွားခဲ့သည် ။

စုကျန်းကျွင်းကတော့ စီးကရက်ကို ထုတ်ပြီး သုန်သုန်မှုန်မှုန်ဖြင့် အိပ်ယာပေါ်တွင် စီးကရက်သောက်နေတော့သည် ။

" နင်ဘာစောက်လုပ်လုပ်နေတာလဲ "

စီးကရက်ကို အဝေးသို့ယူသွားခံလိုက်ရသောအခါ စုဝမ်ကို စုကျန်းကျွင့် ချက်ချင်းဒေါသထွက်လာသလို ကြည့်လာခဲ့သည် ။

" ကျွန်မ ဘာစောက်လုပ်လုပ်တာလဲ ရှင်ကမေးနေသေးတာလား ။ ရှင်တို့နှစ်ယောက် ကျွန်မပြောတာကို နားထောင်ပြီး ကျွန်မက ချမ်းကြွယ်ဝအောင်လုပ်ပေးရမလား ဒါမှမဟုတ် ရှင်တို့ ကျွန်မမျက်စိအောက်က ထွက်သွားမလား ။ "

မူလဇာတ်ကွက်တွင် စုဝမ်အဆုံးစီရင်ပြီးသွားပြီးနောက် သူမ၏ ပိုက်ဆံလောဘတက်နေသော မိဘများကဇာချဲ့ကြသည် ။သူတို့၎င်းကို အခွင့်ကောင်းယူကာ တုချန်ထံမှ ပိုက်ဆံအမြောက်များတောင်းပြီး အဝေးသို့လွင့်သွားကြတော့၏ ။ သူတို့၏ နှလုံးသားထဲတွင် မိသားစုချစ်ခင်ရင်းနှီးမှုဆိုတာမျိုးမရှိပေ ။

ထိုကဲ့သို့သော မိဘမျိုးကို စုဝမ် သဘာဝကျကျပဲ ယဥ်ကျေးနေလိမ့်မည် မဟုတ်ပေ ။

" နင်မနာခံတတ်တဲ့ ကလေးမ"

စုကျန်းကျွင့် ချက်ချင်းပဲ ဒေါသဖြင့်ထရပ်လိုက်သော်လည်း စုဝမ်၏ အေးစက်စူးရှပြီး ခံစားချက်ကင်းမဲ့သော မျက်ဝန်းများဖြင့် ဆုံလိုက်ရသောအခါ စုကျန်းကျွင့်၏ နှလုံးက ချက်ချင်းလွင့်ပါးသွားသည်။

ပိုက်ဆံလောဘတတ်နေသော လူအများစုက ကြောက်ရွံ့တတ်ပြီး စုကျန်းကျွင့်သည်လည်း ကြွက်တစ်ကောင်ထက်ပင် ဆိုးနေ၏ ။သူက အသံကျယ်ကျယ်ဖြင့်အော်လာသော်လည်း တကယ်တမ်းတော့ သူကြောက်ရွံ့နေခဲ့သည် ။

" ရပြီ ရပြီ "

ဤအချိန်တွင် လီမေ့ကျွမ်းက ရှေ့တိုးပြီး ဖျန်ဖြေပေးလာ၏ ။

" ရှောင်ဝမ် ၊ အမေ့ရဲ့ချစ်သမီးလေး ၊ အမေတို့နှစ်ယောက်စလုံးသမီးပြောတာနားထောင်ပါ့မယ် ဟုတ်ပြီလား ။ဘာလုပ်ရမလဲဆိုတာကိုပဲအမေတို့ကိုပြော "

"ရှင်တို့လုပ်ရမှာက အရမ်းရိုးရှင်းပါတယ် ။ ဒီကာလမှာ တုမိသားစုရဲ့ ခြံဝင်းအပြင်ဘက်မှာ ရှင်တို့နေပေးရုံပဲ ။ အကြီးဆုံးသခင်လေးတုပြန်လာတာနဲ့ ချက်ချင်း ပြန်ကြောင်းကြားရမယ် ။ "

" ပြန်အကြောင်းကြားရမယ်"

စုဝမ်ပြောတာကို ကြားသောအခါ စုကျန်းကျွင့်နှင့် လီမေ့ကျွမ်းနှစ်ယောက်စလုံး အချင်းချင်းကြည့်ကာ ခေါင်းရှုပ်သွားကြသည် ။

ထို့နောက် စုဝမ်က ယုံကြည်မှုရှိစွာ ပြုံးနေခဲ့သည် ။

ယန်ကျင်းရှိ အထက်တန်းလွှာအသိုင်းအဝိုင်းအားလုံး အကြီးဆုံးသခင်လေးတုက ဉာဏ်ကောင်းပြီး လူမှုဆက်ဆံရေးမကောင်းတဲ့ တင်းကြပ်သည့်သူမှန်းသိကြသည် ။သူက စီးပွားရေးကို လက်လျှော့သွားပြီး သုတေသနလုပ်သောအခါ သခင်တု နှင့် သခင်မတု နှစ်ယောက်စလုံး တစ်ခုတည်းကိုသာ တောင်းဆိုခဲ့ကြ၏ ။၎င်းက ချက်ချင်းလက်ထပ်ပြီး သူတို့ကို မြေး သို့မဟုတ် မြေးမလေးမွေးပေးဖို့ပင် ။ထို့နောက်တွင် သူတို့နှစ်ယောက်စလုံး သူ့ဘဝကို ဝင်ရှုပ်တော့မည် မဟုတ်ပေ ။

မကြာသေးခင်တွင် တုဟန်က ကလေးမလေးတစ်ယောက်ကို ခေါ်လာပြီး သူ၏သွေးသားရင်းသမီးဖြစ်ကြောင်းစစ်ဆေးမှုကိုလည်း ချပြပေးခဲ့သည် ။

ထိုကောင်မလေးက တုဟန်၏ သမီးဖြစ်ပြီး သူမ၏အမေဘယ်သူလဲဆိုတာ မည်သူမှ မသိပေ ။

အားလုံးက ဤကလေးကို အစားထိုးဖြင့် ရခဲ့တယ်ထင်သော်လည်း တကယ်တမ်းတွင် ဤကလေးက ဖန်ပြွန်သန္ဓေဖြင့် ရခဲ့သောကလေးဖြစ်နေ၏ ။သူမ၏ အဖေက တကယ်ပဲ တုဟန်ဖြစ်ပြီး သူမ၏ မိခင်ဖြစ်သူကိုတော့ မည်သူမှန်း မသိကြပေ ။

တကယ်တမ်းတွင် ဤအကြောင်းအရာကို တုဟန်သာသိသည် ။ တကယ်တမ်းတွင် သူဖန်ပြွန်သန္ဓေလုပ်သောအခါ မတော်တဆမှုကြောင့်သေဆုံးသွားပြီဖြစ်သော အမျိုးသမီး၏ အေးခဲထားသည့် မျိုးဥကို အထူးတလည် ရွေးချယ်ထားခြင်းဖြစ်သည် ။ ဤအရာက ကလေး၏ အမေနှင့်တစ်နေ့တွင် တွေ့ဆုံသောအခါ ဖြစ်လာမည့်အခက်အခဲနှင့် ရှုပ်ထွေးသောအခြေအနေတို့ကို ရှောင်ရှားဖို့ပင် ။

ဤအချိန်တွင် တုယွီက သူ့ကိုတစ်နေ့တွင် ထားသွားလိမ့်မည်ဟု တုဟန်မမျှော်လင့်ထားခဲ့ပေ ။ တုဟန်က အလွန်စည်းကမ်းတင်းကြပ်ပြီး အနေအေးသောလူပင် ။ သူ၏ အချစ်တို့က သူ၏သမီးဖြစ်သူပေါ်တွင်သာ အကုန်ပုံအပ်ထားသော်လည်း သူမ လေးနှစ်အရွယ်တွင် မတော်တဆမှုဖြင့် သေဆုံးသွားခဲ့သည် ။

ထိုအချိန်မှစကာ တုဟန်က ပို၍ ပိတ်လှောင်ထားခဲ့သည် ။တုဟန်ကို ပြန်လည်အသက်သွင်းဖို့ သူအကောင်းဆုံးကြိုးစားခဲ့ပြီး သာလွန်သော မှတ်ဉာဏ်တု အဆင့်မြင့်နည်းပညာသုံး စက်ရုပ် တုယွီကိုပါ ဖန်တီးခဲ့၏ ။ ဤစက်ရုပ်က တုယွီနှင့် အလွန်ဆင်တူသည် ။ အသက်ကိုပင် တုယွီ အသက်အတိုင်းတွက်ချက်ထား၏ ။

ထိုကဲ့သို့ ရူးသွပ်နေသော အစ်ကိုဖြစ်သူအပေါ်တွင် အရာအားလုံးက ယာယီအဖြစ်သာ တုချန်မြင်ခဲ့သော်လည်း စက်ရုပ်တုယွီကိုတော့ တုချန် လက်မခံခဲ့ပေ ။

တုမိသားစုထဲတွင် အစေခံအဖြစ်လုပ်နေသော စက်ရုပ်များစွာရှိသည် ။ တုချန်၏ အမြင်တွင် စက်ဟူသည်ကား အမြဲတမ်း စက်ပစ္စည်းပင်ဖြစ်လိမ့်မည် ။သူမက ဘယ်လောက်ပဲ ဉာဏ်ရည်မြင့်နေပါစေ လူသားအစစ်အမှန်တော့ ဘယ်တော့မှ ဖြစ်လာလိမ့်မည်မဟုတ်ပေ ။

အားလုံးက တုယွီကို ငြင်းပယ်လာကြချိန်တွင် လင်းချီယွဲ့က သူမကို အလွန်သဘောကျနေခဲ့သည် ။ သူမက တစ်ကိုယ်တည်းရပ်တည်နေရသောမိခင်ဖြစ်နေတာကြောင့် ဖြစ်နိုင်ပြီး တုဟန်၏ ခံစားချက်များကို ကောင်းစွာနားလည်နေသည် ။ ပြောဆိုဆက်ဆံမှုရှိလာပြီးနောက်တွင် နှစ်ယောက်သားက အလွန်ရင်းနှီးလာကြ၏ ။ အသက်သုံးဆယ်အစောပိုင်းတွင်သာရှိသော တုဟန်က အချစ်သို့မဟုတ် နှလုံးသားထဲ၌ ဂယက်ထတာမျိုးကို တစ်ခါမှ မကြုံတွေ့ခဲ့ဘူးပေ ။

ထို့နောက်တွင်တော့ သူ၏နှလုံးသားက လင်းချီယွဲ့အတွက် စတင်ခုန်လာခဲ့သည် ။

ကံမကောင်းစွာဖြင့် သူက တိတ်တဆိတ်ကာကွယ်ပေးရသောလူဖြစ်ဖို့သာ ကြမ္မာဖန်လာခဲ့သည်...။

_____

Translated By IQ-Team.🚩

Prev Next