MM Story Teller

Chapter 99

Viewers 19k

🐯Chapter 99

ရောက်ရှိလာသော လေပေါ်ဝဲယာဉ်ပျံများအားလုံးကို လေဆိပ်သို့ လွှဲပြောင်းပေးခဲ့သည်။ ထိုလေဆိပ်တွင် သူတို့ လုံခြုံရေးစစ်ဆေးခြင်း၊ လက်မှတ်စစ်ဆေးခြင်းများကို ဖြတ်ကျော်ပြီး ပထမဦးဆုံးနေရာသို့ ဝင်ရောက်ခဲ့ကြသည်။ လုံခြုံရေးစစ်ဆေးမှုတွင် လူနှင့်စက်ရုပ်နှစ်မျိုးလုံးက ပေါင်းစပ်စစ်ဆေးပေးခြင်းကြောင့် အလွန်ပင်မြန်ဆန်သည်။ ကလေး ၄ ယောက်နှင့် ကုယွီမြန်က အချိန်ခဏမျှသာ တန်းစီခဲ့ရသည်။

ကုယွီမြန်က လက်တွန်းလှည်းလေးကိုတွန်းကာ ယွမ်ယွမ်နှင့်ချိုးချိုးတို့က တွန်းလှည်းထဲတွင် ထိုင်နေကြပြီး အပြင်ကိုကြည့်နေကြသည်။ သူ့လက်မောင်းများထဲတွင် တက်ကြွကာပြုံးရွှင်နေသော ခွေးပေါက်လေးကိုချီထားပြီး သူ့ပခုံးပေါ်တွင် နှင်းကျားသစ်လေးရှိနေသည်။ ထန်ယွမ်လေးက လူသားကလေးပုံစံသို့ ပြန်ပြောင်းလဲထားသော်လည်း မျိုးနွယ်စုမတူညီသည့်ကလေး ၄ ယောက်နှင့် ခပ်ချောချောလူငယ်လေးက တန်းစီသည့်အထဲရှိ ခရီးသွားများ၏အာရုံကို ဆွဲဆောင်ထားနိုင်ဆဲပင်။

သူတို့ထဲမှအများစုက စပ်စုပြီးရည်မွန်ကြသလို အချို့က ကိုယ့်ကိုယ်ကို စပ်မစုမိအောင်ထိန်းထားကြသော်လည်း သိသာနေဆဲပင်။

လူတိုင်း စိတ်ကူးယဉ်မြို့ဝောာ်သို့ ဝင်ရောက်ခါနီးပြီးဖြစ်သောကြောင့် အလွန်စိတ်လှုပ်ရှားနေကြသည်။

"ဒီလူသားက ဘာလို့တခြားလူတွေနဲ့ ကွဲပြားနေရတာလဲ… သူ့ကိုအိမ်ခေါ်သွားပြီး ငါတို့ရဲ့အမွေးတွေကို ဖြီးခိုင်းချင်လိုက်တာ…"

"ခွေးပေါက်လေးတစ်ကောင်၊ မြေခွေးလေးတစ်ကောင်နဲ့ ကလေးတစ်ယောက်ပဲ… အဲဒီ ပခုံးပေါ်ကကောင်လေးက ရောင်ခြယ်ဓါတ်ချို့တဲ့နေတဲ့ အကောင်လေးလား ချစ်ဖို့ကောင်းလိုက်တာ… လူသားမျိုးနွယ်တွေက ကြည့်လို့ကောင်းပြီး အချစ်တွေနဲ့ပြည့်နေတဲ့မိသားစုတစ်ခုလို ခံစားရတယ်..."

"သူရှက်နေတာ နင်တွေ့လား ဟားဟားဟား…"

"နေပါဦး ဘုရားရေ နေပါအုံး... အဲဒီလူက အရင်တုန်းကတည်းက ငါ follow လုပ်ထားတဲ့ တင်ဆက်သူမလား…"

ကုယွီမြန် "..."

မြေခွေးလေးက ထိုသို့ချီးကျူးခံရခြင်းနှင့်ပတ်သက်ပြီး ကျင့်သားမရသေးပေ။ အရှက်အကြောက်ကြီးစွာဖြင့် သူ့အမြီးကြီးကို ရစ်ပတ်ကွေးထားပြီး အစောကြီးကတည်းက ထန်ယွမ်လေး၏နောက်တွင် ကျုံ့နေခဲ့သည်။ နှင်းကျားသစ်လေးက ထုံးစံအတိုင်း ပျင်းရိမနေခဲ့ပေ။ သူ့လူသားလေးကို သူ၏အမြီးအရှည်ကြီးဖြင့် ရစ်ပတ်ထားပြီး လှဲလျောင်းနေရာမှ ထထိုင်လိုက်သည်။

တစ်ဖက်တွင် သူ၏မိသားစုက 'ချစ်ခြင်းမေတ္တာဖြင့် ပြည့်နှက်နေသည်' ဟု ချီးကျူးခံလိုက်ရခြင်းကြောင့် ကုယွီမြန် အလွန်ပျော်ရွှင်သွားပြီး ချောင်းတစ်ချက်ဟန့်ကာ အနည်းငယ်ရှက်ကိုးရှက်ကန်းဖြစ်မိသည်။

လက်မှတ်ထိုးပေးရန် သူ့အားတောင်းဆိုလာချိန်တွင် ထိုရှက်ကိုးရှက်ကန်းဖြစ်မှုက အထွတ်အထိပ်သို့ ရောက်ရှိသွားသည်။

လက်မှတ်ထိုးပေးပြီးနောက် ကောင်မလေးက အဝေးသို့ထွက်သွားခဲ့သည်။ ထိုအချိန်တွင် လုံခြုံရေးစစ်ဆေးမှုက ကုယွီမြန်အလှည့်သို့ ရောက်လာခဲ့သည်။ လုံခြုံရေးစစ်ဆေးခြင်း ပြီးဆုံးသွားပြီးနောက် ကုယွီမြန် အခြားခရီးသွားများထံမှ ခွဲထွက်လာခဲ့သည်။ ထိုသို့ခွဲထွက်သွားခြင်းဖြင့် လူအများနှင့်ထိတွေ့ဆက်ဆံရမည်ကို ကြောက်ရွံ့သော ကုယွီမြန်ကဲ့သို့ တစ်စုံတစ်ယောက်အတွက် နောက်ဆုံးတွင် စိတ်သက်သာရာရစေသည်။

ချက်ချင်းပင် မိသားစုညစာကို ပျော်ရွှင်စွာ စားသောက်ပြီး သူတို့၏အထုပ်အပိုးများကို ထုပ်ပိုးခဲ့ကြသည်။ သူတို့၏ခရီးဆောင်အိတ်များကို ပြင်ဆင်ရင်း အနာဂတ်၏စိတ်ကူးစိတ်သန်းများသည် အမြဲတမ်း ဆက်လက်ပြင်းထန်လျက်ရှိသည်။ ပရိသတ် ၉၀ ရာခိုင်နှုန်းက စိတ်ကူးယဉ်မြို့ဝောာ်သို့ ခရီးစဉ်အတွက် မျှော်လင့်ချက်များနှင့် ပြည့်နှက်နေသည်။ ယခုအချိန်တွင် အွန်လိုင်းကြည့်ရှု့သူပရိတ်သတ်ဦးရေက သန်း ၁၀၀ ကျော်ရှိပြီဖြစ်ကာ ပရိသတ်အသစ်များလည်း ဆက်လက်ဝင်ရောက်လာလျက်ရှိသည်။ ဖန်သားပြင်ပေါ်ရှိ အမျိုးမျိုးသောမှတ်ချက်ပေါင်းစုံသည်လည်း ရပ်တန့်မသွားခဲ့ပေ။

[သစ်တော်ပန်းပွင့်အဖြူရောင်လေး - ငါ အရမ်းကိုမနာလိုဖြစ်နေပြီ… စိတ်ကူးယဉ်မြို့ဝောာ်ရဲ့ တန်းစီတဲ့နေရာမှာ မြန်မြန်ကို တွေ့ခဲ့တယ်… ဘယ်လိုတောင် ကံကောင်းတဲ့နေ့လေးလဲ… အိပ်တဲ့အခါမှာလည်း နီးနီးကပ်ကပ်နေရာမှာပဲ အိပ်ချင်တယ်…]

[အသုံးပြုသူ 1397 - ငါ အခြားဟာတွေတော့မသိဘူး ဒါပေမဲ့ စိတ်ကူးယဉ်မြို့ဝောာ်မှာတန်းစီဖို့ အရင်ဦးဆုံး မင်းတို့ဆီမှာ ပိုက်ဆံရှိဖို့တော့လိုမယ်...]

[မီဝူမီ - အရမ်းမှန်တယ်…]

လုံခြုံရေးစစ်ဆေးသည့်စက်ရုပ်များက သူတို့၏ခရီးဆောင်အိတ်ကို စစ်ဆေးနေပြီး ဝန်ထမ်းများသည်လည်း သူတို့အား လုံခြုံရေးနှင့် ကိုယ်ကာယစစ်ဆေးခြင်းများကို လုပ်ဆောင်ရန် ပစ္စည်းကိရိယာများကို ကိုင်ဆောင်ထားသည်။

တိုက်ရိုက်ထုတ်လွှင့်မှုကို ပန်းခြံထဲတွင် ဖွင့်ထားခဲ့သည်။ ထိုနေရာက တရားဝင်ဝဘ်ဆိုက်တွင် ကုယွီမြန် ကြိုတင်ရှာဖွေထားခဲ့သော ခွင့်ပြုထားသည့်နေရာဖြစ်သည်။ ရေအောက်ကမ္ဘာနှင့် ယာဉ်ပျံများရှိခြင်းကြောင့် ထုံးစံအတိုင်း ဝန်ထမ်းများက တင်းကြပ်ကြသော်လည်း ထိုအရာများက အလွန်ကြောက်မက်ဖွယ်မကောင်းပေ။ အမြင့်နှင့်ရေကိုကြောက်သော ပရိသတ်များသာ သတိထားသင့်သည်။

"လူကြီးတစ်ယောက်နဲ့ ကလေး ၄ယောက်လား… လူကြီးက တစ်ယောက်တည်းလား...လက်မထပ်ရသေးဘူးလား..."

ဝန်ထမ်းက သူ့ကို မေးလာသည်။

ကုယွီမြန်: "ဟုတ်တယ် ဘာပြဿနာရှိလို့လဲ…"

တစ်ယောက်တည်းဖြစ်တာက ဘာဖြစ်နေလို့လဲ "..."

ဝန်ထမ်းက ပြုံးလိုက်သည်။

"ကောင်းပါပြီ အချိန်ကောင်းလေးကို ပိုင်ဆိုင်နိုင်ပါစေ… လူကြီးနဲ့ကလေးကြား စစ်ဆေးတာက ၅ မိနစ်၊ ၆ မိနစ်တော့ကြာနိုင်တယ် စိတ်မပူပါနဲ့… ကလေးတွေ ဘာအန္တရာယ်မှ မဖြစ်စေရပါဘူး… မင်းရဲ့မျက်စိရှေ့မှာပဲ ရှိနေမှာပါ... မတူညီတဲ့စစ်ဆေးမှုတွေကို သပ်သပ်စီ လုပ်ရုံပါ…"

ကလေးများအတွက် ကစားကွင်းမှပြင်ဆင်ပေးထားသော လက်ပတ်လေးများကို ကုယွီမြန်ထံ ပြသလာသည်။ ၎င်းက ကလေးများပျောက်ဆုံးသွားသည်နှင့် ချက်ချင်း ပြန်ရှာတွေ့နိုင်စေသည့်အပြင် အကာအကွယ်ပေးနိုင်သည့် တိုင်းတာမှုစနစ်တစ်ခုလည်းဖြစ်သည်။ အန္တရာယ်ကျရောက်လာချိန်တွင် ကလေးများ၏လုံခြုံရေးအတွက် သေချာစေရန် အကျယ်ပြန့်ဆုံးအကွာအဝေးအထိ အကာအကွယ်အတားအဆီးများက အလိုအလျောက် ပေါ်ထွက်လာလိမ့်မည်ဖြစ်သည်။

ကလေးများအား ကစားရန် ခေါ်ဆောင်လာချိန်တွင် လူကြီးများက သူတို့အား တစ်ချိန်လုံးဂရုစိုက်ပေးရန်လိုအပ်ပေသည်။ တစ်ခါတစ်ရံ နှစ်ဖက်စလုံးအတွက် ကံမကောင်းအကြောင်းမလှသော အတွေ့အကြုံမျိုးကို ဖြစ်သွားစေနိုင်ပြီး စိတ်ကူးယဉ်ကမ္ဘာက ထိုသို့သောအဖြစ်အပျက်မျိုး မရှိရလေအောင် ပြောင်းလဲပစ်ချင်သည်။

ထိုအကြောင်းကို ကုယွီမြန် အစောကြီးကတည်းက သိထားပြီးဖြစ်သော်လည်း ခဏမျှ တုံ့ဆိုင်းသွားကာ "ကောင်းပြီ" ဟု ပြောလိုက်သည်။

လုံခြုံရေးစစ်ဆေးမှုက ရေလက်ကြားတစ်ခုကို ဖြတ်သွားရခြင်းဖြစ်သည်။ ၎င်းက စိတ်ကူးယဉ်မြို့ဝောာ် ညခရီးစဉ်၏ ဆွဲဆောင်မှုများဆီသို့ တိုက်ရိုက်ဦးတည်ခေါ်ဆောင်သွားသည်။ ယခုအချိန်တွင် ရေသံများကို ခပ်တိုးတိုးကြားနေရသည်။ 'စိတ်ကူးယဉ်မြို့ဝောာ်၏ညခရီးစဉ်' က လှေတစ်စီး၏ဆွဲဆောင်မှုနှင့်အတူ စတင်လိမ့်မည်ဟု ကုယွီမြန် ခန့်မှန်းမိသည်။

၎င်းသည် စိတ်ကူးယဉ်မြို့ဝောာ်ရှိ အကျော်ကြားဆုံးဆွဲဆောင်မှုများထဲမှ တစ်ခုဖြစ်ပြီး ကုယွီမြန်လည်း မျှော်လင့်နေမိသည်။ ခရီးစဉ်စတင်ခါနီးပြီးဖြစ်သောကြောင့် မရေတွက်နိုင်သောကလေးများက ဤတစ်ကြိမ်၌ သူတို့၏စိတ်လှုပ်ရှားမှုများကို ဖုံးဖိမထားနိုင်တော့ပေ။

ထန်ယွမ်လေးက တွန်းလှည်းထဲမှထွက်လာပြီး မျက်လုံးတောက်တောက်လေးများဖြင့် ဘယ်ပြန်ညာပြန်ကြည့်နေသည်။ ခွေးပေါက်လေးက စိတ်လှုပ်ရှားစွာဖြင့် အကြိမ်ပေါင်းများစွာ သွားများကိုဖြဲထားပြီး သူ့အသံက လှိုဏ်ခေါင်းထဲတွင် ပဲ့တင်ထပ်နေသည်။

မကြာမီမှာပင် လမ်းကြောင်း၏အဆုံးတစ်ဖက်၌ ကျဉ်းမြောင်းသောရေလက်ကြားက သူတို့ရှေ့တွင် လမ်းပွင့်နေသည်။

'စိတ်ကူးယဉ်မြို့ဝောာ် ညခရီးစဉ်' တစ်ခုလုံးတွင် ဆွဲဆောင်မှုအားလုံးနီးပါးက ကြီးမားသောအတိုင်းအတာတစ်ခုအထိ ပါဝင်နေသည်။ သူတို့ ကမ်းခြေသို့ရောက်သောအခါ အသံတစ်သံ ဖြည်းညှင်းစွာ ပေါ်ထွက်လာသည်။

"၁၉၇ ခုနှစ်က စိတ်ကူးယဉ်မြို့ဝောာ် အပြင်ဘက် မြေအောက်မြစ်ထဲမှာ အမှောင်ယံနတ်ဆိုးတွေ၊ စိတ်ကူးယဉ်ကမ္ဘာက ပြည်နှင်ဒဏ်ပေးလိုက်တဲ့ရေသူမတွေနဲ့ နဂါးတစ်ကောင်နေထိုင်ခဲ့တယ်… အဲဒီနဂါးက ပင်ကိုယ်ဗီဇကိုယ်၌က ကိုယ့်ကိုယ်ကိုအထင်ကြီးတတ်တယ်… သူဘာကိုသဘောကျလဲဆိုတာကို ဘယ်သူမှမသိကြဘူး…"

"နောက်ပြီး ဘယ်သူကရော အဲဒီကြီးမားလှတဲ့နဂါးကို ယဉ်ပါးလာအောင်လုပ်ပေးနိုင်မှာလဲ…"

ကုယွီမြန်က ယူတိုးပီးယားရုပ်ရှင်အချို့ကို ကြည့်ဖူးသောကြောင့် ၎င်းက{ရေသူမလေးနှင့်နဂါးကြီး} ရုပ်ရှင်ဇာတ်ကား၏ ဇာတ်ကြောင်းဖြစ်ကြောင်း သိပေသည်။ မကြာမီ မှတ်ချက်ရေးသားသည့်ဖန်သားပြင်ပေါ်ရှိ ပရိသတ်များ စတင်ငိုကြွေးတော့မည်မှာ သေချာသလောက်ရှိသည်။

[ကောင်းကင်ပြာ - အား ငါ့အကြိုက်ဆုံးရုပ်ရှင်ပဲ… ရေသူမလေးနဲ့နဂါးကြီး…]

[အိပ်မက်တွေရဲ့ဇာတ်သိမ်းတစ်ခု - အဲဒါက {ရေသူမလေးနှင့်နဂါးကြီး} ဖြစ်လိမ့်မယ်လို့ မျှော်လင့်မထားမိဘူး။ ငါ မှတ်မိတာ မှန်မယ်ဆိုရင် အဲဒီမှာ မြှုပ်ထားတဲ့ဇာတ်ကွက်တစ်ခုရှိတယ်… တင်ဆက်သူရေ ကြိုးစားထား…]

ကမူလပုံပြင် 'အလှပဂေးနှင့်သားရဲကောင်ကြီး'( Beauty and the Beast )ပုံပြင်နှင့် အတော်လေး ဆင်ဆင်တူသည်။ ပြည်နှင်ဒဏ်ပေးခံရသောရေသူမလေးက မြေအောက်မြစ်ထဲတွင် ကျိန်စာမိနေသောနဂါးကြီးတစ်ကောင်နှင့် တွေ့ဆုံခဲ့ပြီး အတူတကွနေထိုင်ခဲ့ကြရင်း တစ်ယောက်နှင့်တစ်ယောက် နောက်ဆုံးတွင် တဖြည်းဖြည်းချင်း ချစ်ကျွမ်းဝင်သွားခဲ့ကြသည်။

'စိတ်ကူးယဉ်မြို့ဝောာ် ညခရီးစဉ်' ၏အကြောင်းအရာခေါင်းစဉ်က ပြောင်းလဲသွားလိမ့်မည်ဖြစ်သည်။ အချို့ဇာတ်ကွက်များတွင် မြှုပ်ထားသောဇာတ်ကွက်နှင့် အစပ်အဆက်များရှိလိမ့်မည်။ ခရီးသွားတော်တော်များများက မြှုပ်ကွက်ကိုလိုချင်ကြသော်လည်း အဖွင့်က အတော်လေးသာမန်မျှသာဖြစ်နေသည်။

သစ်သားလှေငယ်လေးက ကမ်းခြေတွင်ကမ်းကပ်သွားသည်။ မြေအောက်မြစ်က မကျဉ်းလွန်းမကျယ်လွန်းသော်လည်း မြေအောက်လှိုဏ်ဂူနှင့် ခပ်ဆင်ဆင်တူသည်။ ကြမ်းတမ်းသောနံရံပေါ်တွင် အဝါရောင်ခပ်မှိန်မှိန်နှင့် ထင်ရှားသော မိုင်းတွင်းအလုပ်သမားများ၏မီးအိမ်ကို ချိတ်ဆွဲထားပြီး ရှေးခေတ်မျိုးနွယ်စု အမှတ်အသားကျောက်တိုင်မျိုးစုံလည်း ရှိသည်။ သစ်သားလှေငယ်လေးက ရေထဲသို့ တဖြည်းဖြည်း မျှောလွင့်သွားသလို စိုစွတ်အေးစက်သောခံစားချက်ကို ခံစားရသည်။ အဝေးမှသာယာနာပျော်ဖွယ်ကောင်းသော စောင်းသံလေးက အကွာအဝေးတစ်ခုရှိ အလင်းရောင်နှင့်အတူ ယှဉ်တွဲလိုက်ပါလာသည်။

လေထုတစ်ခုလုံးက မှုန်ဝါးကာရိုးရှင်းနေ၍ အလင်းရောင်က အလွန်မှောင်လွန်းသော်လည်း မှော်အစွမ်းရှိသည်ဟု ယူဆရသောအရောင်တစ်ခုကို ပေါင်းထည့်ထားသည်။

"အီ"

ထန်ယွမ်လေးက ဤပတ်ဝန်းကျင်နှင့်လေထုကို အလွန်သဘောကျပေသည်။ သူ၏လူသားဆန်သောပုံစံအတိုင်း နိုးလာခဲ့ပြီး ယခုအခါ ပျော်ရွှင်စွာဖြင့် သူ့လက်များကိုစုပ်ပြီး ဘယ်ပြန်ညာပြန်ကြည့်ကာ ကြီးမားဝိုင်းစက်သော မျက်လုံးများကို တဖျပ်ဖျပ်ခတ်နေသည်။

သူတို့ လှေပေါ်သို့ခြေချလိုက်သည်နှင့် လိပ်တစ်ကောင်က ရေအောက်မှ ပေါ်ထွက်လာပြီး လှေကိုအရှေ့သို့ ဖြည်းညင်းစွာ သယ်ဆောင်သွားသည်။ ထို့အပြင် လက်မအရွယ်အစားခန့်သာရှိသော ပိုးစုန်းကြူးငယ်လေးများသည်လည်း သေးငယ်သောအလင်းရောင်လေးအဖြစ် ပေါင်းစည်းသွားရန် လေထဲသို့တိုးဝင်သွားကြသည်။ ခဏအကြာတွင် ထိုအလင်းရောင်က နတ်သူငယ်လေးယောက်အဖြစ်ပြောင်းလဲသွားပြီး လှေအစွန်းတွင်မတ်တပ်ရပ်ကာ လှော်တက်များဖြင့် လှော်ခတ်နေကြသည်။

"ဘုရားရေ…"

ပြင်ဆင်ထားမှုက အလွန်လက်တွေ့ဆန်လွန်းလှပြီး စိတ်ကူးယဉ်ပုံရိပ်များ သို့မဟုတ် အခြားသောအရာများနှင့် လုံးဝမတူညီပေ။ ကုယွီမြန်နှင့် အကောင်ပေါက်လေးများ၊ ပရိသတ်များနှင့် နှင်းကျားသစ်လေးသည်ပင် အံ့ဩသွားရသည်။ ပန်ဒါလေးက လှေအစွန်းတွင် လှဲလျောင်းနေပြီး နတ်သူငယ်များကို 'ဟဲလို' ဟု နှုတ်ဆက်ရန် ကြိုးစားနေလေသည်။ ထိုနတ်သူငယ်များသည်လည်း နှုတ်ဆက်သည့်အမူအရာဖြင့် သူတို့၏စကတ်စများကို ချစ်စရာကောင်းစွာဆွဲကိုင်ထားသည်။

ပန်ဒါလေးက အလွန်ပျော်ရွှင်နေပြီး မြေခွေးလေးကို ဆွဲခေါ်လိုက်သည်။ မြေခွေးလေးက အရှက်အကြောက်ကြီးစွာဖြင့် နတ်သူငယ်များကို ကြည့်နေသည်။

"ဟဲလို…"

ကုယွီမြန်က မြေခွေးလေး အမှန်တကယ် ရှက်နေသည်ကို တွေ့လိုက်သောကြောင့် မြေခွေးလေး၏လက်များကိုကိုင်ကာ နတ်သူငယ်များကို 'ဟဲလို' ဟု ပြောလိုက်သည်။ ထို့နောက် နှင်းကျားသစ်လေးနှင့် ခွေးပေါက်လေးအတွက်လည်း အလားတူ ပြုလုပ်ပေးလိုက်သည်။

နတ်သူငယ်လေးများက တစ်ယောက်ပြီးတစ်ယောက် နှုတ်ဆက်ပြီးနောက် ခဏအကြာတွင် သူတို့အားလုံး ကုယွီမြန်၏ဆွဲဆောင်မှုကိုခံလိုက်ရပြီး တောင်ပံများဖြင့် ကုယွီမြန်ထံ ပျံလာခဲ့သည်။

"..."

ထိုတစ်စက္ကန့်အတွင်း လေက ငြိမ်ကျသွားသည်။

မှောင်မည်းနေသောမြေအောက်မြစ်အတွင်း အဖြူရောင်ဝတ်စုံဝတ်ထားသော နတ်သူငယ်လေးက သူတို့၏ဖောက်ထွင်းမြင်နိုင်သောတောင်ပံများကိုခတ်ကာ မျက်လုံးများကိုမှိတ်ပြီး ကုယွီမြန်၏နဖူးကို နမ်းလိုက်သည်။

အလင်းရောင်ခပ်မှိန်မှိန်က လူငယ်လေး၏မျက်တောင်များပေါ်တွင် တွဲခိုနေပြီး မျက်လုံးထဲတွင် ရောင်ပြန်ဟပ်နေသည်။ လူငယ်လေး၏အပြုံးက အနည်းငယ်အံ့အားသင့်မှုကို ဖော်ပြနေပြီး သူ့နှုတ်ခမ်းဘေးတွင် ပါးချိုင့်လေးများပေါ်လာသည်။

သူက ချစ်စရာကောင်းပြီး အမွေးထူသည့် ထွမ်ထွမ်လေးကို သူ့ရင်ခွင်ထဲတွင်ထွေးပိုက်ထားသည်။ နောက်ခံမြင်ကွင်းက ပုံပြင်အတွက်မှုန်ဝါးဝါးမြင်ကွင်းဖြစ်ပြီး ပုံရိပ်တစ်ခုလုံးသည် လှပနေ၏။

ပရိသတ်များ အံ့ဩမှင်သက်သွားသည်။

[ဘယ်နေရာမှာ မီးရှူးမီပန်းတွေဖောက်နေတာလဲ: အား...ငါ့လက်တွေအကြောသေတဲ့အထိ screenshot ခလုတ်ကို နှိပ်ထားမိတယ်… ဘာလို့ပုံရိပ်တိုင်းက ရုပ်ရှင်ပိုစတာနဲ့တူနေရတာလဲ…]

[အော့အန်ရတာကိုကြိုက်တဲ့ရှောင်မင်: အရမ်းမှန်တယ်။ ငါနှာခေါင်းသွေးလျှံသွားတဲ့အကြောင်း တိုင်ချင်တယ်… ငါအခု အော်ဟစ်ပြီး အိပ်ယာပေါ်ကစောင်နဲ့ လူးလိမ့်နေရတယ်…]

[ဂျူနီယာဘီ - ငါက အဖြောင့်ယောက်ျားလေးတစ်ဆိုတာသေချာတယ်… ဒါပေမဲ့ screenshot တွေကို လိုချင်နေတုန်းပဲ…]

[အသုံးပြုသူအန်းနု - သေစမ်း သေစမ်း သေစမ်း၊ အမြင့်ဆုံးစွမ်းအင်တွေနဲ့အတူ စဖွင့်လိုက်တာပဲ… ငါ စိတ်ကူးယဉ်ကမ္ဘာကို အကြိမ်အများကြီးရောက်ဖူးပါတယ်… ဒါပေမဲ့ နတ်သူငယ်လေးတွေက ခရီးသွားတွေကို နမ်းတယ်ဆိုတာကို တစ်ခါမှမသိခဲ့ဖူးဘူး…]

ကုယွီမြန်က cover ဓါတ်ပုံကို တပ်ဆင်ထားခြင်းမရှိသောကြောင့် စတူဒီယို၏ cover ဓါတ်ပုံက အချိန်နှင့်တပြေးညီ အကြောင်းအရာနှင့်ပတ်သက်ပြီး ပြောင်းလဲသွားသည်။ ထိုပုံရိပ်ကို cover နေရာတွင် ဖော်ပြခြင်းခံထားရပြီး ပင်မစာမျက်နှာတွင်လည်း ဖော်ပြခံခဲ့ရသည်။ စက္ကန့်အနည်းငယ်အတွင်း လုံလောက်သောပရိတ်သတ်ပမာဏက နောက်တစ်ကြိမ် ဝင်ရောက်လာခဲ့ပြန်သည်။

အမှောင်ထုထဲတွင် ခရီးသွားများအတွက် အမှတ်တရဖြစ်စေရန် ကင်မရာများကို အသုံးပြုပြီး ရုပ်ပုံများကို တိတ်တဆိတ်မှတ်တမ်းတင်ထားသည်။ ထိုအချိန်တွင် မဝေးလှသောအနာဂါတ်၌ ဤဓါတ်ပုံက စိတ်ကူးယဉ်မြို့ဝောာ်၏ကြော်ငြာမှုအားလုံးအတွက် အဓိကပိုစတာအဖြစ် ရွေးချယ်ခံရလိမ့်မည်ဟု မည်သူမျှ မှန်းဆနိုင်ခဲ့လိမ့်မည်မဟုတ်ပေ။

ထိုအချိန်တွင် နှင်းကျားသစ်လေးမှလွဲ၍ ထန်ယွမ်လေး၊ မြေခွေးလေး၊ ခွေးပေါက်လေးနှင့် ပရိသတ်များအားလုံးသည်ပင် စိတ်ဓါတ်တက်ကြွနေကြသည်။

နှင်းကျားသစ်လေးက နတ်သူငယ်လေးကို အေးစက်စွာကြည့်ပြီး သူ၏ချွန်ထက်သောလက်သည်းများကို လက်များထဲမှထုတ်လိုက်သည်။

ဘယ်သူက ငါ့လူသားကို လက်ထပ်ချင်တာလဲ...

ဒီ AI ကို ဘယ်သူဒီဇိုင်းထုတ်ထားတာလဲ...

ဘယ်လိုတောင် သတ္တိရှိရတာလဲ...

🐯🐯🐯

Prev Next