MM Story Teller

Chapter 67

Viewers 21k

🐯Chapter 67

နေ့လယ် ၁၂နာရီခွဲခန့်အချိန် မြို့လယ်ရှိ ကြယ်တာရာကောင်းကင် တိုက်ရိုက်ထုတ်လွှင့်မှု ဌာနချုပ်တွင်ဖြစ်သည်။

ကြယ်တာရာကောင်းကင်မြို့နှင့် သိပ္ပံအကယ်ဒမီတို့၏ ပထမဆုံးအကြိမ် ပူးပေါင်းလုပ်ဆောင်မှုဖြစ်သည့်အလျောက် ဌာနချုပ်ရှိ ဝန်ထမ်းများအပါအဝင် အထက်အရာရှိများအထိ ကုယွီမြန်၏ တိုက်ရိုက်ထုတ်လွှင့်မှုကို ကြည့်ရှုနေကြသည်။

" တိုးလာတဲ့ အရေအတွက်ကြီးက နည်းနည်းများကြောက်ဖို့ကောင်းမနေဘူးလား… ငါတို့တက်သစ်စတုန်းက အဲလောက်ကြီးမလုပ်နိုင်ခဲ့ဘူး ဟုတ်တယ်မလား လူအိုကြီးကေ ..."

လူအိုကြီးကေက ကြယ်တာရာကောင်းကင်မြို့၏ ထိပ်တန်းတင်ဆက်သူများအနက်မှ တစ်ဦးဖြစ်၏။ သူ၏ လုပ်ဖော်ကိုင်ဖက်တစ်ဦးက ဖန်သားပြင် ညာဘက်ထောင့်ပေါ်မှ ကြည့်ရှုသူအရေအတွက်ကို လက်ညှိုးထိုးပြ၍ အနည်းငယ်ထိတ်လန့်စွာ ဆက်ပြောသည်။

" ဒီတစ်ခါ သူ လေးငါးနာရီလွှင့်ရင် စံချိန်တွေပါချိုးသွားလောက်မလား..."

" ဟင့်အင်း..."

ခေါင်းဆောင်လူဟောင်းတစ်ဦးက ပြောလာသည်။

" အာ ဟုတ်လား သူစံချိန်မချိုးနိုင်လောက်ဘူးပေါ့..."

"..."

တစ်ဖက်လူက ပြန်လည်ဖြေကြားလာ၏။

" လေးငါးနာရီမလိုဘူး နှစ်နာရီအတွင်းချိုးနိုင်သွားလိမ့်မယ် စောင့်သာကြည့်နေလိုက်..."

"..."

သောက်ကျိုးနည်း...

မည်သို့ပင်ဆိုစေ ဤတင်ဆက်သူက အရည်အချင်းရှိသည်မှာ ငြင်းဆိုမရချေ။

ကြယ်တာရာကောင်းကင်နှင့် သိပ္ပံအကယ်ဒမီတို့ ပူးပေါင်းလုပ်ဆောင်ရန် စီမံကိန်းရှိခဲ့သည်ကား ကြာပြီကာ အကောင်အထည်ဖော်နိုင်ခြင်း မရှိခဲ့ရုံပင်။ တစ်ဖက်ကကြည့်ပါက သိပ္ပံအကယ်ဒမီက အတော်အတန်ဘဝင်မြင့်ကာ တင်ဆက်သူများနှင့်အဆက်အသွယ်မပြုလိုပေ။ တစ်ဖက်တွင်လည်း သိပ္ပံပညာရပ်နှင့်ဆိုင်သည့်အကြောင်းအရာများက အနည်းနှင့်အများဆိုသလို ငြီးငွေ့ဖွယ်ဖြစ်ကာ ရေပန်းစားရန် မလွယ်ကူလှပေ။

အခြားသောတင်ဆက်သူများ၊ အထူးသဖြင့် ထိပ်တန်းအဆင့်ရှိသူများအတွက်ပင် ပုံမှန်ကျော်ကြားမှုကို ထိန်းသိမ်းနိုင်လျှင်ပင် အတော်ကောင်းသည်ဟု ဆိုနိုင်၏။

သို့ရာတွင် ကုယွီမြန်က ရှိရင်းစွဲကျော်ကြားမှုကို ထိန်းသိမ်းနိုင်ရုံသာမက ဆက်လက်မြင့်တက်လာအောင် စွမ်းဆောင်နိုင်သည်။ သူ၏တိုက်ရိုက်ထုတ်လွှင့်မှုက အချိန်နှင့်တစ်ပြေးညီ တစ်နေ့တာ၏ အကျော်ကြားဆုံးစာရင်းတွင် ထိပ်တန်းရောက်နေလေ့ရှိသည်။

-----

တစ်ဖက်ခြမ်းရှိ အထက်တန်းလွှာနယ်မြေတွင်…

တဟုန်ထိုးမြင့်တက်နေသော ကျော်ကြားမှုနှင့် မှတ်ချက်များက ကုယွီမြန်ကို ဟန်ချက်ပျက်သွားအောင်မပြုလုပ်နိုင်ပေ။ အပြင်ဘက်တွင် နှင်းများစတင်ကျဆင်းလာသည်ကိုလည်း ကုယွီမြန်မသိချေ။

စေးပျစ်သော ချိစ်အနှစ်များက တပွက်ပွက်ဆူပွက်နေကာ ရံဖန်ရံခါတွင် ကြည်လင်သော ပူစီဖောင်းများ ဖြစ်ပေါ်လာသည်ကို မြင်တွေ့နိုင်သည်။ နွေးထွေးမွှေးကြိုင်သောရနံ့က လူတိုင်း၏ လည်ချောင်းကို လှုပ်ရှားသွားစေနိုင်၏။

" ကျွန်တော် အိုးရဲ့အထိုင်ကိုလုပ်ရင်း ရှင်းပြဖို့မေ့သွားတယ်..."

ကုယွီမြန်က လက်ထဲတွင်ချိုးချိုးကိုကိုင်မထားပြီး ပခုံးထက်တွင် မောက်မာသောအမူအရာဖြင့် နှင်းကျားသစ်လေးရှိနေသည်။ ခါးတွင်မူ သိုင်းကြိုးဖြင့် အိပ်ပျော်နေသော ပန်ဒါလေးကို သယ်ပိုးထား၏။

ကုယွီမြန်က ကလေးများတစ်ဖက် ဇွန်းရှည်တစ်ဖက်ဖြင့် အိုးကိုကြည့်လျက် ချိစ်များပျစ်ခဲမသွားစေရန် ဂရုတစိုက်ဖြင့်မွှေနေသည်။

" ချိစ်ဖွန်ဒူးဆိုတာ အရင်လုပ်ဖူးတဲ့ ရှို့ရှီ ဟော့ပေါ့နဲ့ ခပ်ဆင်ဆင်ပါပဲ ဟော့ပေါ့တစ်မျိုးပေါ့… ဟော့ပေါ့ဆိုတာ ပွက်ပွက်ဆူနေတဲ့ ဟင်းရည် ဒါမှမဟုတ် ဟင်းအနှစ်ထဲကို ပါဝင်ပစ္စည်းတွေလတ်လတ်ဆတ်ဆတ်ထည့်ပြုတ်ရင်း စားသောက်နိုင်တဲ့အရာပါ ဒီနေ့အတွက် အထိုင်ကတော့ ချိစ်ပေါ့… အဓိကပါဝင်ပစ္စည်းတွေအဖြစ် ချိစ်နဲ့ ဝိုင်ဖြူကို သုံးထားပါတယ်..."

[ပူတင်းလေး : တင်ဆက်သူရေ တခြားပါဝင်ပစ္စည်းတွေကရော ]

" မင်းတို့ကြိုက်တာ ဘာမဆိုရပါတယ်..."

ကုယွီမြန်က ဆက်ပြောသည်။

" မတူတဲ့အထိုင်တွေအတွက် မတူတဲ့ သင့်လျော်တဲ့ ပါဝင်ပစ္စည်းတွေရှိတာပေါ့ ချိစ်အထိုင်နဲ့ဆိုရင် မီးအေးအေးလေးနဲ့တည်ထားပြီး အသားနဲ့ အသီးအရွက်တွေကို အရင်စထည့်တာကောင်းတယ်..."

ချိစ်ဖွန်ဒူးက အသီးနှင့် ပေါင်မုန့်များအတွက်သင့်လျော်သည်။ ချက်ပြုတ်ထားသောအသားနှင့်ဆိုလျှင်လည်း ပြဿနာမရှိချေ။ သို့ရာတွင် အသားကို ပုံမှန်ဟော့ပေါ့များကဲ့သို့ တိုက်ရိုက်ချက်ပြုတ်၍ မရချေ။

ပုစွန်တစ်ဝက်ကို အခွံနွှာ၍ ဝိုင်ဖြူတွင်စိမ်ထားကာ ကျန်တစ်ဝက်ကို ပါးပါးလွှာထားသည်။ အမဲသားနှင့် ဝက်ဗိုက်သားများကိုမူ အတုံးတုံးများပိုင်းဖြတ်ကာ ရေနွေးပူပူဖြင့်ပြုတ်ထားသည်။ ကြက်ရင်အုံကိုလည်း ထိုနည်းတူပြုတ်လိုက်၏။ အာလူးနှင့် ကျန်ဟင်းသီးဟင်းရွက်များကို ဆူအောင်တည်ပြီးဖြစ်သော ရေနွေးတွင် စိမ်ထားသည်။

ချိစ်အနှစ်များ ဆူပွက်လာသောအခါ ဖန်သားပြင်က မှတ်ချက်အတန်းများဖြင့် ပြည့်နှက်သွား၏။

' မြန်မြန်လုပ်ပါတော့...'

'စားပါတော့...'

စသည်ဖြင့်ပင်။ သူတို့က အချိန်အတော်ကြာစောင့်ဆိုင်းနေရသဖြင့် နှိပ်စက်ခံထားရသည့်အလားဖြစ်နေကြ၏။

" ဟုတ်ပါပြီ..."

ကုယွီမြန်က မှတ်ချက်အတန်းလိုက်ကြီးကိုကြည့်၍ မရယ်ဘဲ မနေနိုင်ချေ။

" မပူပါနဲ့ စားရတော့မှာပါ ချိုးချိုး ယွမ်ယွမ်နဲ့ ထွမ်ထွမ်တို့ရော ဗိုက်ဆာနေကြပြီလား..."

ကုယွီမြန်က ကလေးများဗိုက်ဆာပြီး မစောင့်နိုင်တော့မည်ကို စိုးရိမ်သွားသည်။ သူက ကြက်ရင်အုံကိုပါးပါးလှီး၍ သံလွင်ဆီဖြင့် ရဲသွားအောင်ကြော်လိုက်သည်။ ထို့နောက်ကြော်ထားသည့် အသားလွှာကို ချိစ်နွေးနွေးထဲသို့နှစ်၍ အအေးခံပြီးနောက် နှင်းကျားသစ်လေးနှင့် မြေခွေးလေးတို့ကို ခွံ့လိုက်၏။

ထန်ယွမ်ကလည်းနိုးလာပြီး စားချင်ကြောင်းဖော်ပြလာသည်။ သို့ရာတွင် ကုယွီမြန်က ပန်ဒါလေးအစာမချေနိုင်မည်ကိုစိတ်ပူသည့်အတွက် နွားနို့အချို့သာတိုက်လိုက်၏။

ခေတ္တမျှကြာသောအခါ ပရိသတ်ကား လုံးဝအံ့အားသင့်သွားကြရသည်။

ချိစ်၏ အရသာက အလွန်နူးညံ့သည်။ သစ်သီးဝိုင်ဖြင့်ရောချက်လိုက်သောအခါ ၎င်း၏ မွှေးပျံ့ ချိုမြသောအရသာက ဆင့်ကဲပေါ်လွင်သွားသည်။ ကြော်ထားသော ကြက်သားက တင်းရင်းနေပြီး အပေါ်ယံရှိ ချိစ်အနှစ်နှင့်တွဲဖက်ထားသည်။ ကြက်ဥအစိမ်းက ကြက်သား၏ ချောမွေ့သောအရသာကို ကောင်းစွာထိန်းသိမ်းပေးထားလေသည်။

အရည်ပျော်နေသောချိစ်၏ မွှေးပျစ်ပျစ်နို့ရနံ့နှင့် နူးအိသော ကြက်သားတို့က လိုက်ဖက်ညီနေသည်။ တစ်ကိုက်ကိုက်လိုက်လျှင် ဘရန်ဒီနှင့် သစ်ကြံပိုးခေါက်အရသာကိုလည်း ရနိုင်၏။

[ ဂျူနီယာ ဘီ : အား အားး ဘာလဲ နူးညံတင်းရင်းနေတဲ့အရသာက… ထပ်စားပါဦး… ]

[ဆိုဒါနဲ့ သံပုရာရည်တွေ : အရသာရှိတယ် အရသာရှိတယ် အရသာရှိတယ်… အကြိမ်တစ်ထောင်လောက်သာအော်ပြောနေလိုက်ချင်တယ်… ]

[ တိမ်လေးတစ်ခုရှိတယ် : ချိစ်နဲ့ သစ်သီးဝိုင်ရဲ့အရသာက တင်းတင်းရင်းရင်းကြက်သားနဲ့တွဲလိုက်တော့ အရမ်းအရသာရှိတယ်… အရသာရှိတဲ့အစားအသောက်အတွက်ကျေးဇူးတင်ပါတယ် တင်ဆက်သူရေ ...မီးရှူးမီးပန်းများလွှတ်လိုက်သည် ]

[သစ်တော်ပန်းဖြူလေး လီလီ : ငါအခုအရမ်းတွေရှုပ်ထွေးနေပြီ… ချိစ်ဖွန်ဒူးကအရမ်းအရသာရှိတာပဲ… မြန်မြန့်ကြောင့်သာမဟုတ်ရင် ဒီတစ်သက်စားဖူးပါ့မလား အရမ်းနောင်တရစရာကြီးဖြစ်နေမှာပဲ…]

၎င်းက ကြက်သားလေးတစ်ပိုင်းမျှသာ ရှိသေးသည်။ ကုယွီမြန်နောက်ဘက်ရှိ ပါဝင်ပစ္စည်းများကို ကြည့်လိုက်ပါက ပုစွန်၊ အသား၊ ငါးအသားလွှာ၊ ပြင်သစ်ပေါင်မုန့်ရှည်၊ မုန်လာဥနီနှင့် အာလူးများ ရှိနေသေးသည်။ သူတို့က ၎င်းပါဝင်ပစ္စည်းများနှင့် ချိစ်ဟော့ပေါ့တို့တွဲစပ်လိုက်သောအခါ ရရှိလာမည့်အရသာကို စိတ်ကူးယဥ်နေမိကြသည်။

မိနစ်အနည်းငယ်အတွင်း ကြည့်ရှုသူအရေအတွက်ဆယ်သန်းခန့်ထိုးတက်သွားပြီး အချိန်နှင့်တပြေးညီ ရှာဖွေမှုအများဆုံးစာရင်း၏ တတိယနေရာသို့ရောက်ရှိလာသည်။ ဒုတိယနေရာနှင့် ကြည့်ရှုသူအရေအတွက်က မတိမ်းမယိမ်းဖြစ်ကာ မကြာမီ ဒုတိယနေရာကိုပင် ကျော်တက်နိုင်မည့် အနေအထားတွင်ရှိသည်။

မြေခွေးလေးက ကုယွီမြန်၏လက်ထဲတွင် ခွေခွေလေးနေကာ အသံပြုလာသည်။ သူက သူ၏မူပိုင် ရှက်တတ်သော ဟန်ပန်လေးဖြင့် အစားအသောက်ကို ချီးကျူးနေခြင်းဖြစ်၏။

ထန်ယွမ်ကမူ အလွန်သနားချင့်စဖွယ် မျက်လုံးဝိုင်းလေးများဖြင့် ကုယွီမြန်နှင့် မြေခွေးလေးတို့ကိုကြည့်နေသည်။ ကုယွီမြန်က မနေနိုင်သဖြင့် ပန်ဒါလေး၏နဖူးပေါ်သို့ အနမ်းပေးလိုက်သည်။

ထိုအခြင်းအရာများကို နှင်းကျားသစ်လေးက အလွန်မပျော်မရွှင်စိုက်ကြည့်နေသည်။ သူက ကုယွီမြန်၏ လည်ပင်းကို အမြီးရှည်ကြီးဖြင့်ရစ်ပတ်ကာ ပခုံးကိုဖိလိုက်ပြီး ကုယွီမြန်အား သူ့အပေါ်အာရုံစိုက်ရန် ပြောနေ၏။

ကုယွီမြန်၏ နှလုံးသားလေးအရည်ပျော်သွားသည်။

" ဟုတ်ပါပြီ စားရအောင်နော် အရင်ဆုံးပေါင်းခံထားတဲ့ ပါဝင်ပစ္စည်းတွေထုတ်လိုက်ဦးမယ် အာဟုတ်သား... သိပ္ပံအကယ်ဒမီအတွက် မေ့တော့မလို့ပဲ..."

သိပ္ပံအကယ်ဒမီက အမည်နှင့်လိုက်ဖက်လှစွာ ခေတ်ရှေ့ပြေး၍ တိုးတက်ကောင်းမွန်လှသည်။ ကုယွီမြန်က ချိစ်ဖွန်ဒူးကို တစ်ခေါက်သာ ကိုယ်တိုင်ချက်ပြုတ်ရန်လိုအပ်လိုက်၏။ ဒုတိယအကြိမ်ချက်ပြုတ်သည့်အခါ ကုယွီမြန်က အဓိကအချက်များကိုသာ ကူညီစစ်ဆေးပေးရန်လိုအပ်ပြီး ကျန်ရှိသည်များကို စက်ရုပ်များက အလိုအလျောက် လုပ်ဆောင်ပေးသွားကြ၏။ မကြာမီတွင် ချိစ်ဖွန်ဒူးသုံးအိုးက ပွက်ပွက်ဆူနေပြီဖြစ်သည်။

သိပ္ပံအကယ်ဒမီရှိလူများက လက်ခံပါ့မည်လား ကုယွီမြန်မသိသည့်အတွက် သုံးအိုးသာ ထပ်မံပြုလုပ်ခဲ့သည်။ ထို့အတွက် သူ့အိုးကို ဦးစွာချ၍ ပါဝင်ပစ္စည်းများကိုယူကာ စားမစားမေးမြန်းရန် ပြုလိုက်သည်။

ထိုအခါ အလိုက်သိသော မြေခွေးလေးက ပန်ဒါလေး၏ တွန်းလှည်းကို အပြင်သို့ ကူညီတွန်းပေးသွားလိုက်သည်။ ကုယွီမြန်က ဤမျှလိမ္မာအလိုက်သိသော ကလေးလေးကြောင့် စိတ်ထဲထိရှသွားရသည်။

နှင်းကျားသစ်လေး: "..."

နှင်းကျားသစ်လေးက စိတ်ဆိုးမာန်ဆိုးဖြင့် သူ့အမြှီးကိုခါယမ်းလိုက်သည်။ ယခုအချိန်မှ သူ၏သိတတ်လိမ္မာမှုကိုဖော်ပြရန်မှာ နောက်ကျသွားပြီဖြစ်ရာ နှင်းကျားသစ်လေးက စိတ်ပျက် မှုန်မှိုင်းစွာပစ်လှဲနေလိုက်တော့၏။

[မိုင်းတွင်းထဲမှာ မိသားစုတစ်စု ရှိတယ် : လေထုကချဥ်စုတ်နေပြီမထင်ဘူးလား ဝူးဝူးဝူး… သိပ္ပံအကယ်ဒမီကြီးကို ငါ့ရဲ့လီမွန်လို သွားရည်တွေနဲ့ဖုံးပစ်လိုက်ချင်တယ်…]

[ကီးဘုတ်ပေါ်ကိုမျက်နှာနဲ့လှိမ့် : သိပ္ပံအကယ်ဒမီကလူတွေ အရမ်းသွေးအေးတယ်လို့ကြားဖူးတယ် သူတို့ကကြိုက်ပါ့မလား… (မြန်မြန်ချက်တာတွေကိုဘယ်သက်ရှိသတ္တဝါကမှ မငြင်းချင်လောက်ဘူးဆိုပေမယ့်) သူတို့က နေ့လယ်စာစားချိန်တောင်မနားဘဲ အသင့်စားတွေစားပြီး အလုပ်ပြန်လုပ်ကြတာဆိုပဲ… ]

ပရိသတ်က ကုယွီမြန် ရေခဲလူသားတစ်အုပ်ထံမှ ငြင်းပယ်ခံရမည်ကို စိတ်ပူနေကြသည်။

တင်ဆက်သူကို မချေမငံဆက်ဆံပြီး လျစ်လျူရှုကြရင်ဘယ်လိုလုပ်မလဲ...

မည်သို့ပင်ဆိုစေ ၎င်းတို့က မြို့တော်တစ်ခုလုံးရှိ ထိပ်တန်းအလုပ်သရဲများဖြစ်ကြပေသည်။

ကုယွီမြန်က တံခါးရှေ့သို့ရောက်ရှိလာသည်။

တံခါး၏ အာရုံခံကိရိယာက တီကနဲမြည်သွားပြီးနောက် တံခါးနှစ်ဖက်က ပွင့်ဟသွားသည်။

တစ်ချိန်တည်းတွင် ကုယွီမြန်ပေါ်ထွက်လာသည့်နေရာသို့ မျက်လုံးများစွာ အာရုံစိုက်လာသည်။ မကျယ်ဝန်းလှသော တတိယထပ်ရှိ ထမင်းစားနားနေဆောင်တွင် စိတ်အားထက်သန်နေသည့် လူအုပ်ကြီးဖြင့်ပြည့်နှက်နေ၏။

အများစုက ကုယွီမြန်မနက်ခင်းကတွေ့ခဲ့သော ဝန်ထမ်းများဖြစ်ကာ မမြင်ဖူးသောမျက်နှာများလည်း ပါရှိသည်။

ကုယွီမြန်နှင့် ပရိသတ် : "..."

အချိန်ကား ဆောင်းတွင်းသို့ ဝင်ရောက်လာပြီဖြစ်သည့်အတွက် ထမင်းစားဆောင်အနှံ့တွင် အပူပေးကိရိယာများကို တပ်ဆင်ထားပြီဖြစ်သည်။

မူရင်းစာပွဲနှင့်ထိုင်ခုံများနေရာတွင် အခြားသောအပူပေးကိရိယာများနှင့် ပြောင်းလဲတပ်ဆင်ထားပြီးဖြစ်ကာ ကြမ်းခင်းများကိုလည်း ဂျပန်ရိုးရာစတိုင် တာထာမီကြမ်းခင်းများနှင့် အစားထိုးထားသည်။ စားပွဲ၏ပန်ပတ်လည်တွင် ကူရှင်များခင်းထားကာ ခြေချိတ်ထိုင်၍ အတူတကွစားသောက်နိုင်ရန် ပြုလုပ်ပေးထားသည်။

ထမင်းစားပွဲနှင့် ဟောခန်းကို အိုးဖြင့်အလှစိုက်ပျိုးထားသောအပင်များဖြင့် ခြားနားထားပြီး အလွန်လူသားဆန်သောအပြင်အဆင်ဟု ဆ်ိုနိုင်၏။ ကုယွီမြန်က အ်ိုးနှင့်မီးဖိုကိုချလိုက်သည်။ ထို့နောက် ပါဝင်ပစ္စည်းများပါသော ပန်းကန်ပြားကိုလည်း စားပွဲပေါ်တင်လိုက်သည်။

ကလေးသုံးဦးထိုင်နိုင်ရန်အတွက် ဖျာတစ်ချပ်ကို ခင်းပေးပြီးနောက် တစ်ဖက်သို့လှည့်လိုက်သည်။ စကြဝဠာ၏ အထက်မြက်ဆုံး သိပ္ပံပညာရှင်များက ကုယွီမြန်၏ လှုပ်ရှားမှုများကို စောင့်ကြည့်နေသည် ဖြစ်သည်။

ကုယွီမြန်က ပထမတွင် အနည်းငယ်စိတ်ရှုပ်ထွေးသွားသော်လည်း ရုတ်ချည်းဆိုသလို သဘောပေါက်နားလည်သွား၏။ အချိန်ကား နေ့လည်စာစားချိန်ဖြစ်ကာ လူတိုင်းက ဘာအလုပ်မျှမလုပ်ဘဲ တိတ်တဆိတ်ထိုင်နေကြသည်။

သူတို့က ငါ ချက်ပေးတာကို စောင့်နေကြတာလား...

သူက လူအုပ်ထဲမှ ရင်းနှီးနေသော မျက်နှာတစ်ခုကိုရှာလိုက်နိုင်သည်။ ထိုလူက ရှေးဟောင်းစာပေပြန်လည်သိုမှီရေးအုပ်စု၏ ခေါင်းဆောင် မစ္စတာလင်း ဖြစ်သည်။ ကုယွီမြန် မနက်ခင်းကနေရာအချို့ကို လည်ပတ်ခဲ့စဥ်က ထိုလူနှင့် လက်ဆွဲနှုတ်ဆက်ခဲ့သည်။

သူက လူအိုကြီးလင်းထံသို့ လျှောက်သွားကာ တီးတိုးပြောလိုက်သည်။

"ဦးလေးလင်း ဘာကိုစောင့်နေတာလဲဟင်… စိတ်မရှိရင် ကျွန်တော် ချိစ်ဖွန်ဒူးနည်းနည်းနဲ့ ပါဝင်ပစ္စည်းတွေလုပ်ထားတာရှိသေးတယ်... နေ့လည်စာ မစားရသေးတဲ့လူများရှိရင်..."

လူအိုကြီးလင်းက ဦးလေးလင်းဟူသော ခေါ်သံကိုကြားသောအခါ အနည်းငယ်သတိလက်လွတ်ဖြစ်၍ ပြန်ဖြေချိန်မရှိလိုက်ချေ။ မူလက ဆယ်မီတာပတ်ဝန်းကျင်အတွင်းရှိလူတိုင်းက သူတို့၏ နားများကိုစွင့်ကာ ကုယွီမြန်၏စကားလုံးတိုင်းကို ဂရုတစိုက်နားထောင်နေကြသည်။ ယခုအခါတွင်မူ ချောင်ဟန့်သံများနှင့် ဟိိုဟိုသည်သည်အသံများက ခန်းမတစ်ခွင်ပျံ့နှံ့ သွားသည်။

"ငါ ဒီနေ့နေ့လည်စာယူဖို့ မေ့ခဲ့တယ်..."

"အေးကွာ ငါရောပဲ..."

"ဒီလောက်အေးနေတဲ့ ရာသီဥတုမှာ နောက်ဘက်က မီးဖိုချောင်ထဲ ဘာတွေချက်နေတယ်ထင်တုန်း တော်တော်မွှေးတာပဲ..."

ကုယွီမြန် ဆွံ့အသွားပြီး မနေနိုင်ဘဲ ရယ်လိုက်မိသည်။

"ကျွန်တော် စက်ရုပ်တွေကိုနောက်ထပ်အိုးနည်းနည်းထပ်လုပ်ခိုင်းဖို့ ပြောလိုက်ပါ့မယ်..."

ကုယွီမြန်က ခန်းမထဲရှိလူအရေအတွက်ကို ရေတွက်လိုက်သည်။

"တစ်ယောက်ယောက်ကူညီနိုင်မလား..."

အခန်းက ခေတ္တမျှတိတ်ဆိတ်သွားပြီးနောက် ရုတ်ချည်းဆိုသလို ပြန်လည်ဆူညံလာသည်။

"ငါလုပ်လိုက်မယ်..."

လူအိုကြီးလင်းက အလျင်လိုနေခဲ့သည်။ အခြားအုပ်စု၏ ခေါင်းဆောင်က လူအိုကြီးလင်းကို ဘေးသို့တွန်းလိုက်သည်။

"အဘိုးကြီးလင်း ခင်ဗျားက အဲ့လောက်အားမရှိတော့ဘူး… ကျွန်တော်ကူညီမယ် တင်ဆက်သူလေး… ဆက်သွယ်ဖို့အချက်အလက်လေးပေးလို့ရမလား ကျွန်တော့် သူငယ်ချင်းတွေက ခင်ဗျားကိုသိချင်နေတာ..."

"ကျွန်တော်အားရှိပါတယ် တင်ဆက်သူ... အဲ့ဒါ ကျွန်တော်... လက်တွဲနှုတ်ဆက်လို့ရမလား..."

"..."

မိနစ်နှစ်ဆယ်ကြာပြီးနောက်တွင်ဖြစ်သည်။

အခန်းက ပြန်လည်တိတ်ဆိတ်သွားသည်။ ဇွန်းနှင့်ပန်းကန်ထိခတ်သံများ၊ ချိစ်အိိုး၏ တပွက်ပွက်ဆူသံ၊ အစားအသောက်မြိုချသံများနှင့် တီးတိုးစကားပြောသံများသာ ကြားနိုင်လေ၏။

ဤအခြေအနေက ခန်းမ၏အပူချိန်ကို လျော့ကျမသွားစေသည့်အပြင် လေထုအား ပိုမိုနွေးထွေးစေသည်။

[အမာခံလေး: ဟားဟားဟား…]

[အေအက်ဖ်ယူအိတ်ချ်ယူဗွီ: သုတေသီတွေက တော်တော်ချစ်ဖို့ကောင်းတာပဲ… သူတို့ကိုလူအေးကြီးတွေလို့ထင်ထားတာ မြန်မြန်နဲ့တွေ့တော့ ကြောင်ကြီးတွေလိုပဲ...အီမိုဂျီ]

[အလှကုန်တွေကို လွှင့်ပစ်မယ်: အခုကတည်းက စာကြိုးစားပြီးတော့ သိပ္ပံအကယ်ဒမီကို သွားဖို့ကြိုးစားတော့မယ်… သူတို့ မြန်မြန် လုပ်တဲ့ ချိစ်ဖွန်ဒူးကိုစားနေရတာ မနာလိုဖြစ်မိတယ်… ဒါပေမဲ့လည်း တိုက်ရိုက်ထုတ်လွှင့်မှုကို ကြည့်နေရလို့ပျော်ပါတယ်…]

မြေခွေးလေးက သူ့မျက်လုံးများကို လက်သည်းများဖြင့် ဖုံးအုပ်ထားပြီး လုပ်ဖော်ကိုင်ဖက်များ၏ အပြုအမူများကြောင့် အရှက်ရနေခဲ့သည်။

"ချိုးချိုး ဘာလိုချင်လို့လဲ..."

ကုယွီမြန်က မြေခွေးလေး၏ မေးကိုကုတ်လိုက်ကာ ခရင်းတစ်ချောင်းဖြင့် ချိစ်နှစ်ထားသောပုစွန်ကိုယူ၍ ကြွေးလိုက်သည်။

"ပါးစပ်ဟပါဦး အာ..."

ကုယွီမြန်က လူတိုင်းကိုမခွဲခြားဘဲ ညီညီမျှမျှဆက်ဆံပေးရန်ကြိုးစားလိုက်သည်။ သူက မြေခွေးလေးကိုကျွေးပြီးနောက် မပျော်မရွှင်ဖြစ်နေသေးသော နှင်းကျားသစ်လေးကိုလည်း ကျွေးလိုက်သည်။ ထို့နောက် ပန်ဒါလေးကိုလည်းကျွေးလိုက်သည်။

ပုစွန်အသားက ချက်ပြုတ်ရလွယ်ကူကာ ချိစ်အနှစ်ထဲတွင် နှစ်လိုက်ရုံဖြင့်ကျက်သွားသည်။ ပုစွန်အသား၏ မျက်နှာပြင်ပေါ်တွင် ချိစ်အလွှာတစ်ထပ်ဖုံးအုပ်နေသည်။ ပုစွန်၏ ကြွပ်ဆတ်မှုနှင့် ချိစ်အနှစ်မှ လတ်ဆတ်သောသစ်သီးဝိုင်ရနံ့တို့ တွဲဖက်လိုက်သောအခါ လတ်ဆတ်၍ မွှေးပျံ့နေသည်။

ပုစွန်အသားနှင့် ကိစ္စပြီးသောအခါ ကုယွီမြန်က ငါးအသားဘက်သို့ ဦးလှည့်လိုက်သည်။ ကုယွီမြန်က ငါးအသားပေါ်တွင် သံပုရာရည်အနည်းငယ်ဆမ်းကာ ဒယ်ပြားပေါ်တွင် ကြော်လိုက်သည်။ နူးညံ့သောအရည်ပြားက အဝါရောင်သို့ ပြောင်းလဲသွား၏။

ထို့နောက် ကုယွီမြန်က ထိုငါးအသားလွှာကို ချိစ်အိုးထဲသို့ နှစ်လိုက်သည်။ ကြွပ်ရွအောင်ကြော်ထားသောငါးအသားလွှာက ထူထဲနူးညံ့သော ချိစ်အနှစ်များထဲတွင် နစ်မြုပ်နေပြီး အရသာရှိမည့်ခံစားချက်မျိုး ပေးစွမ်းနေသည်။

အသားအပြင် သစ်သီးများဟင်းရွက်များနှင့် ပေါင်မုန့်များလည်း ကျန်ရှိနေသေးသည်။

"တကယ်တော့ ဒါတွေက ချိစ်ဖွန်ဒူးနဲ့ အလိုက်ဖက်ဆုံးပဲ..."

ကုယွီမြန်က ပေါင်မုန့်ချောင်းတစ်ချောင်းလုံးကို ချိစ်အ်ိုးထဲသို့နှစ်လိုက်ပြီးနောက် ပြန်လည်ဆွဲထုတ်လိုက်သောအခါ ပေါင်မုန့်ချောင်းတစ်လျှောက်တွင် ချိစ်အနှစ်များက ရစ်ထွေး၍ပါလာသည်။

ထို့နောက် ဆက်လက်၍ ကြွပ်ရွသောမုန်လာဥများ စေးထန်းထန်းအားလူးများ စသည်ဖြင့် ချိစ်ဖွန်ဒူးနှင့် ဆက်လက်တွဲဖက် စားသောက်ပြသည်။

[နူးညံ့တဲ့ယုန်လေး: အားးးး ဘာလို့အရမ်းအရသာရှိနေတာလဲ…]

[တီဂျီအက်စ်771: +1]

[ရှောင်ရှုန်းရဲ့အလင်းချောင်းလေး: အရသာရှိလွန်းတယ် မှတ်ချက်ရေးဖို့တောင်အချိန်မရှိဘူး လွတ်သွားမှာစိုးလို့…]

🐯🐯🐯

Prev Next