MM Story Teller

Chapter 239

Viewers 33k

🌍Chapter 239

မီးရောင်မှိန်မှိန်အခန်းထဲတွင် နာရီသံ တချက်ချက်ကို ကျယ်လောင်စွာကြားနေခဲ့ရသည်။

အပြင်ဘက်တွင် မှောင်မည်းနေခဲ့ပြီဖြစ်သည်။ မြို့ပြ၏အလင်းရောင်များက ပြတင်းပေါက်မှတဆင့် ဧည့်ခန်း၏ကြမ်းပြင်ကို အလင်းပြန်နေစေသည်။ အိမ်တစ်ခုလုံးမှာ ကြောက်မက်ဖွယ် တိတ်ဆိတ်လျက်။ ဖုန်းနှင့် မောက်စ်တို့မှာ ကြမ်းပြင်ပေါ်သို့ ပြုတ်ကျနေခဲ့သည်။

မီးဖိုချောင်ဘေစင်မှ ရေစက်တစ်စက်ပေါက်ခနဲ ကျလာခဲ့သည်။

ဘန်း...

အရပ်မြင့်မြင့်လူရွယ်မှာ အိပ်ခန်း၏ ထောင့်တွင် ကုပ်နေခဲ့ပြီး ထိုအသံကိုကြားသော် တစ်ကိုယ်လုံးတုန်ရီသွားခဲ့သည်။ သူ၏ခေါင်းအား ဒူးခေါင်း၂ဖက်ကြားမြှုပ်နှံလျက် တုန်ရီနေခဲ့လေသည်။

****

အမှတ်၈၀ အထက်တန်းကျောင်းမှ စာသင်ခန်းတစ်ခုတွင် လီမြောင်မြောင်မှာ စားပွဲပေါ်တွင် လဲလျောင်းလျက် ပြောပြနေခဲ့သည်။

"အဲဒီဂိမ်းက ကြုံဖူးသမျှထဲ အထူးဆန်းဆုံးဂိမ်းပဲ ဘာဘော့စ်မှ မရှိသလို ဘာအနက်ရောင်မျှော်စင်မွန်းစတားမှလည်းမရှိဘူး ဂိမ်းထဲကို၀င်ပြီးတာနဲ့ အနက်ရောင်မျှော်စင်က ကျွန်မတို့ကို ဂိမ်းထဲကထွက်သွားဖို့ နည်းကိုပဲရှာဖို့ပြောခဲ့တာ တခြားဘာမစ်ရှင်မှမပေးခဲ့ဘူး"

လီမြောင်မြောင် ဖြည်းညှင်းစွာဆိုနေခဲ့သည်။

"အစကတော့ ချီဟန်နဲ့ကျွန်မ ဂိမ်းထဲမှာပေါ်လာတဲ့ လူတစ်ယောက်ကို သတိထားနေခဲ့တာ..ဒါပေမယ့်နောက်မှ သူကလည်း ကျွန်မတို့ကို မမြင်ရသလို ကျွန်မတို့ကလည်း သူ့ကိုထိမရမှန်း သိလိုက်ရတယ်"

"သူက တရား၀င်ကစားသမား ၀မ်ဇယ်ရှင်းပဲ"

ကိုယ်ပျောက်လူသားများမှာ မည်သည့်အချိန်တွင်မဆိုပေါ်လာနိုင်ပြီး နောက်တစ်ကြိမ်ပေါ်လာသောအခါတွင် ပို၍သန်မာပြီး အဆင့်ပိုမြင့်သော သူလည်းဖြစ်နေနိုင်သည်။ လီမြောင်မြောင်မှာ သူမဂိမ်းထဲတွင် မြင်ခဲ့သည်တို့ကို အကျဥ်းချုပ်ဆိုလေသည်။ ထိုအိမ်ထဲတွင် အချိန်မှာ ရပ်တန့်နေသလိုပင်။ အစပိုင်းတွင် ထိုကစားသမား၀မ်ဇယ်ရှင်းမှာ လွတ်မြောက်ရန်နှင့် ပြင်ပကမ္ဘာကိုဆက်သွယ်ရန်ကြိုးစားနေခဲ့သေးသည်။ သို့သော် သူမလွတ်မြောက်နိုင်ချေ။

ပြတင်းပေါက်များမှာ အသေပိတ်နေပြီး ရိုက်ခွဲပစ်၍လည်းမရချေ။

တံခါးသည်လည်း ဖွင့်၍မရခဲ့။

ဖုန်းခေါ်ပြန်သော်အခါတွင်လည်း ဧရိယာပြင်ပရောက်နေသည်ဟုသာ တုန့်ပြန်ခံရလေသည်။ အင်တာနက်လည်းမမိဘဲ ပြင်ပကမ္ဘာနှင့် ဆက်သွယ်ရန် နည်းလမ်းမရှိခဲ့ချေ။

လီမြောင်မြောင်ကဆိုသည်။

"အချိန်က ည၇နာရီ.. ၁၇ရက်နေ့ကနေ နောက်တစ်နေ့မနက် ၇နာရီမထိုးခင် တခြားနည်းနဲ့ပြောရရင် ၁၈ရက်နေ့ မနက်၇နာရီအထိ.. ပထမညမှာ ချီဟန်နဲ့ကျွန်မ ဘာမှမလုပ်သေးပဲ ဂိမ်းကို စူးစမ်းခဲ့တယ်..နောက်တစ်နေ့မနက်ကျ ၀မ်ဇယ်ရှင်းက လုံခြုံရေးတံခါးကို ဆက်တိုက် ထုနေပေမယ့် ဘယ်သူမှမကြားခဲ့ကြဘူး"

ရွမ်၀မ်ရှုကထပ်ပေါင်းဆိုလာခဲ့သည်။

"ဒီဂိမ်းက အိမ်အတွင်းပိုင်းကို အပြင်ကမ္ဘာနဲ့ ခွဲခြားထားတာနဲ့ တူတယ်...ဂိမ်းကိုမရှင်းဘဲနဲ့ အပြင်ကိုထွက်ဖို့မဖြစ်နိုင်ဘူး.."

ရွမ်၀မ်ရှုက ထန်မော့ကိုကြည့်လာခဲ့သည်။

ထန်မော့က စာသင်ခန်း၏ အလယ်တွင် တည်ငြိမ်သော အမူအရာဖြင့်ရပ်နေခဲ့သည်။ ရွမ်၀မ်ရှု ချီဟန်ထံမှ ကြားခဲ့သည်မှာ ထန်မော့နှင့် ဖူ၀မ်သော်သည် ထိုအိမ်ထဲသို့ ၀င်လိုခဲ့သည်ဟုပင်။ သူတို့၀မ်ဇယ်ရှင်းကို သိလောက်ကာ သူငယ်ချင်းပင်ဖြစ်နေနိုင်လေသည်။ သူကကောင်းစွာဖုံးကွယ်ထားခြင်းဖြစ်နိုင်သလို သာမာန်သူငယ်ချင်းများလည်းဖြစ်နိုင်သည်။

ထန်မော့ကမေးလိုက်သည်။

"သူက ၁၈ရက်နေ့ ၈နာရီမှာပျောက်သွားတာလား.. သူကကိုယ်ပျောက်လူသားတွေရဲ့ ကမ္ဘာထဲကို ၀င်သွားတာလား"

လီမြောင်မြောင် ခေါင်းကိုခါလိုက်သည်။

"မဟုတ်ဘူး. သူကကိုယ်ပျောက်လူသားလည်းမဟုတ်ဘူး တရား၀င်ကစားသမားလည်းမဟုတ်ဘူး သူကအနက်ရောင်မျှော်စင်ဂိမ်းကို တ၀က်ပဲဖြေရှင်းနိုင်ခဲ့ပြီး တကယ်သေသွားတာ"

လီမြောင်မြောင်မှာ ထိုလူသည်ထန်မော့၏ သူငယ်ချင်းမှန်းသိသော်လည်း ထိုသူငယ်ချင်းဟူသော ခံစားချက်များကို ဂရုစိုက်မနေခဲ့ချေ။ သူမက တိုက်ရိုက်သာဆိုလာခဲ့သည်။

"ချီဟန်နဲ့ ကျွန်မစုစုပေါင်း ၅ညတောင် ပိတ်မိနေခဲ့တယ်..နာရီ၆၀ပေါ့..နောက်ဆုံးနေ့မတိုင်ခင်အထိ ၀မ်ဇယ်ရှန်းကထပ်ခါထပ်ခါသေနေခဲ့တာ..အဆုံးမှာ ကျွန်မတို့ ထူးဆန်းနေတာတစ်ခုကိုသတိထားမိခဲ့တယ်..အဲဒါက နံရံပေါ်ကနာရီပဲ"

ထန်မော့ ရေရွတ်လိုက်သည်။

"နာရီဟုတ်လား"

လီမြောင်မြောင်၏ ဒဏ်ရာများက ပိုကောင်းလာပုံရကာ သူမက စားပွဲပေါ်မှ ထထိုင်လိုက်သည်။ သူမ၏မျက်နှာတွင် သွေးများပေကျံနေဆဲဖြစ်ကာ ဒဏ်ရာများက တကိုယ်လုံးအနှံ့ဖုံးလွှမ်းနေခဲ့သည်။

သူမသည် ထန်မော့ကို အားရကျေနပ်မှုတချို့ရောစွက်နေသော သွေးနီရောင်မျက်လုံးများနှင့် ကြည့်လာခဲ့သည်။

"ပေကျင်းစံတော်ချိန် မနက်၈နာရီ နို၀င်ဘာ ၁၈ရက်နေ့မှာ ကမ္ဘာကြီးအွန်လိုင်းပေါ်တက်လာတယ်..မိနစ်ပိုင်းလောက်ပိုမမြန်သလို နောက်လည်းမကျဘူး..ကမ္ဘာကြီးအွန်လိုင်းပေါ်တက်လာတာနဲ့ အနက်ရောင်မျှော်စင်က ကမ္ဘာလုံးဆိုင်ရာကြေညာမှုလုပ်ခဲ့တယ် ဂိမ်းကိုကျရှုံးတဲ့ ကစားသမားတိုင်း ပျောက်ကွယ်သွားပြီးတော့ ကိုယ်ပျောက်လူသားတွေရဲ့ကမ္ဘာကိုရောက်သွားကြတယ်..ဒါတွေက ကျွန်မတို့သိပြီးသားအကြောင်းတွေပါ"

ဖူ၀မ်သော်ကမေးလိုက်သည်။

"ဒီတော့ဂိမ်းကအချိန်နဲ့ ပတ်သက်နေတာလား"

လီမြောင်မြောင်မှာ ဆက်ထိုင်နေဆဲပင်။

"ဒီဟာကိုခန့်မှန်းမိဖို့ ချီဟန်နဲ့ကျွန်မ နာရီ၆၀လောက်စောင့်ကြည့်ခဲ့ရတယ်..၀မ်ဇယ်ရှင်းက ဂိမ်းထဲမှာ ထပ်ခါထပ်ခါသေလိုက် အခန်းထဲကို ပြန်၀င်လာလိုက်နဲ့ဖြစ်နေခဲ့တာပေါ့..အဓိကက အချိန်ပဲ ၀မ်ဇယ်ရှင်းကအိမ်ကိုပြန်မလာခင် အနက်ရောင်မျှော်စင်ဂိမ်းတစ်ခုကိုကစားခဲ့တယ် .အဲဒါကသူရယ်အခြားကစားသမားတစ်ယောက်ရယ် တစ်ယောက်အချိန်ကို တစ်ယောက်လုယူရတဲ့ ဂိမ်းပဲ..အဲဒါကိုတော့ကျွန်မတို့ကို အနက်ရောင်မျှော်စင်ကပြောပြတာ..အဲဒီဂိမ်းထဲမှာ ၀မ်ဇယ်ရှင်းက သူ့ပြိုင်ဖက်ဆီက ၅စက္ကန့်နိုင်လာတယ်..တစ်ဖက်လူက သူ့ဆီက ထုတ်ပယ်ခံလိုက်ရပြီးတော့ သူကတော့ ကမ္ဘာကိုပြန်လာခဲ့တယ်"

ထန်မော့ ရှော့ရသွားခဲ့သည်။ သူခေါင်းကိုဖြည်းညှင်းစွာမော့လျက် လီမြောင်မြောင်ကို ကြည့်လိုက်သည်။

ထျန်းရွှမ်မှ အဖွဲ့၀င်တိုင်းမှာ ထိုဂိမ်း၏အမှန်တရားကို သိရှိကြပြီးဖြစ်သည်။ ထန်မော့တို့အုပ်စုထဲတွင်လည်း ချန်ရှန်းရှန်းမှာ အဖြေကိုတဖြည်းဖြည်းနားလည်လာခဲ့လေသည်။

လီမြောင်မြောင်မှာ သူတို့၏အမူအယာများကို မြင်လျှင် ပြုံးလျက် ခေါင်းကို ခါလိုက်သည်။

"အင်း ရှင်တို့မှန်းတာမှန်တယ်.. ထန်မော့ ရှင့်သူငယ်ချင်းက သူရခဲ့တဲ့ ၅စက္ကန့်အတွင်းမှာသေသွားတာ...သူ၅စက္ကန့်နိုင်လာတယ်..သူ ဂိမ်းကိုရှင်းပြီး ကမ္ဘာပေါ်ပြန်လာတော့လည်း သူနိုင်လာတဲ့ ၅စက္ကန့်ကရှိနေတုန်းပဲ..အဲဒီနာရီ၆၀မှာ အနက်ရောင်မျှော်စင်က အွန်လိုင်းပေါ် ၄ကြိမ်တက်လာခဲ့တယ်.. ချီဟန်နဲ့ကျွန်မက အနက်ရောင်မျှော်စင်က ဘာလုပ်စေချင်တယ်ဆိုတာကို တကယ်နားမလည်ခဲ့ဘူး..တတိယအကြိမ်ကမ္ဘာကြီးလိုင်းပေါ်တက်လာပြီး ၀မ်ဇယ်ရှင်းသေတော့မလိုဖြစ်နေတဲ့အခါမှာမှ ကျွန်မက သူ အတင်းခေါင်းကိုလှည့်ပြီး ဧည့်ခန်းကို ကြည့်နေတာကို သတိထားမိတာ..ကျွန်မအထင် သူနောက်ဆုံးမှာတော့ သူ ၅စက္ကန့်ပိုနေခဲ့တာကို သိသွားပုံရတယ် ဘာလို့ဆို.. ဧည့်ခန်းကနာရီက ၈: ၀၀: ၀၅လို့ပြနေတာလေ"

သူ့ဘ၀၏နောက်ဆုံးအချိန်တွင် ၀မ်ဇယ်ရှင်းမှာ အနက်ရောင်မျှော်စင်၏ ကြေညာသံကိုကြားခဲ့ပြီး သူဘာကိုမေ့လျော့နေခဲ့သည်အား နားလည်သွားတော့သည်။

သူသည် ထက်မြက်သောသူဖြစ်သည်။ သို့မဟုတ်ပါက သူသည်အနက်ရောင်မျှော်စင်ဂိမ်းကိုနိုင်ခဲ့ပြီး တရား၀င်ကစားသမားတစ်၀က် ဖြစ်လာမည်မဟုတ်ချေ။ သို့သော်သူတွင် အချက်အလက်နည်းပါးလွန်းခဲ့သည်။ ဤအိမ်ထဲကို၀င်လာစဥ်တွင် သူ၏ဘ၀မှာ ပြင်ပလောကထက် ၅စက္ကန့်ပိုစောနေခဲ့သည်ကို သတိမမူမိခဲ့ချေ။ သူကဤကဲ့သို့ ထူးဆန်းသောနေရာမျိုးသို့အဘယ်ကြောင့်ရောက်လာခဲ့သည်ကိုသာ နားမလည်နိုင်ဖြစ်နေခဲ့သည်။

လွန်ခဲ့သော၃ရက် မနက်၈နာရီတွင်ကမ္ဘာကြီးအွန်လိုင်းပေါ်တက်လာကြောင်းကြေညာသည်ကို သူသိခဲ့သည်။

ယခုအနက်ရောင်မျှော်စင်မှ ထပ်မံကြေညာလာသည်။ သူသည် သူ၏ပျောက်ကွယ်စပြုလာသော ကိုယ်ကိုကြည့်လျက် အတွေးပေါင်းများစွာ ခေါင်းထဲမှ ဖြတ်သန်းသွားခဲ့သည်။ သူ တမဟုတ်ချင်း အမှန်တရားကို နားလည်သွားခဲ့သည်။ သူသည်ခေါင်းကိုလှည့်လျက် ပြင်ပကမ္ဘာထက် ၅စက္ကန့်ပိုမြန်နေသော နာရီကို ကြည့်လိုက်မိလေသည်။ သို့သော် အလွန်နောက်ကျသွားခဲ့ချေပြီ။ သူတွင်ခေါင်းတစ်လုံးနှင့် မျက်လုံးတစ်စုံသာကျန်ရစ်ပေတော့သည်။ အချိန်ကိုလှည့်ရန်မဖြစ်နိုင်တော့ချေ။

ထို့ကြောင့် သူကနာရီကို ကြည့်လျက်သေဆုံးသွားခြင်းပင်။

ထန်မော့ လီမြောင်မြောင်အား တိတ်တဆိတ်ကြည့်နေခဲ့သည်။

"မင်းတို့အဲဒီအချိန်ကလေးပဲ ညှိလိုက်ရင်နိုင်ပြီပေါ့"

"ဟုတ်တယ် ချီဟန်နဲ့ကျွန်မ နံရံကနေ နာရီကိုဖြုတ်ပြီး စက္ကန့်လက်တံကို ၅စက္ကန့်ဆုတ်လိုက်တယ် ပြီးတော့ ဂိမ်းကိုရှင်းလိုက်တာပဲ..အစကတော့ကျွန်မလည်း ဒီလိုမျိုးထူးဆန်းတဲ့ဟာကို ဘာလို့ဂိမ်းသပ်သပ်ခွဲပေးထားတာလဲ နားမလည်ခဲ့ဘူး ကျွန်မထင်ခဲ့တာက ၀မ်ဇယ်ရှင်းက အရမ်းထူးဆန်းတဲ့ ဂိမ်းတစ်ခုကို ကြုံခဲ့ရတာလို့ပေါ့ အဲဒီနောက်အနက်ရောင်မျှော်စင်အဆင့်မြှင့်တာလည်း ရပ်သွားတော့ ကျွန်မလည်းအနက်ရောင်မျှော်စင်က ရှင်ကျန်ရစ်တဲ့ကစားသမားတွေကို ဂိမ်းထဲမှာ ဒီလိုဖြစ်ရပ်မျိုးလည်း ကြုံနိုင်တယ်လို့ပြောပြခဲ့တယ်ဆိုတာ နားလည်သွားတယ်"

လီမြောင်မြောင် အချုပ်ဆိုလိုက်သည်။

"ဒီအစစ်အမှန်ဂိမ်းက ဘာအဓိပ္ပါယ်မှမရှိဘူး..အဓိကရည်ရွယ်ချက်က ကစားသမားတွေကို ဂိမ်းကိုအမှန်တကယ်ရှင်းခဲ့လားမရှင်းခဲ့ဘူးလား ဂရုစိုက်စေချင်တာပဲ"

သူမမှာ ထန်မော့၏ တည်ငြိမ်သော အသွင်ကိုမြင်လျှင် တမင်တကာပြုံးလိုက်သည်။

"ရှင်၀မ်းမနည်းဘူးလား..သူကရှင့်သူငယ်ချင်းလို့ကျွန်မထင်ထားတာ"

"ငါ၀မ်းနည်းပါတယ်"

သူတို့မှာ ထန်မော့အား အံ့အားသင့်စွာကြည့်လိုက်ကြသည်။ သူသည်အလွန်တည်ငြိမ်စွာပြုမူနေချိန်မှာပင် သူ၏ခံစားချက်အကြောင်း ရုတ်တရက်ထုတ်ပြောလာခဲ့သည်။

ဖူ၀မ်သော်ပင်လျှင် ထန်မော့ထိုမေးခွန်းကို ဖြေလိမ့်မည်ဟုမထင်ထားခဲ့ချေ။ သူသည် ထန်မော့က လီမြောင်မြောင်ကို လျစ်လျူရှူလိုက်မည်ဟုသာ ထင်ထား၍ အံ့အားသင့်စွာကြည့်လိုက်မိလေသည်။

အမျိုးသမီးဆရာ၀န်၏ အမူအယာမှာ တောင့်တင်းသွားလျက် အတော်ကြာမှ ဆိုလာခဲ့သည်။

"ကျွန်မတောင်းပန်ပါတယ်"

ထန်မော့ရွမ်၀မ်ရှုအား တည်ငြိမ်စွာကြည့်လိုက်သည်။

"မင်းဆိုလိုချင်တာကို နားလည်ပြီ..အနက်ရောင်မျှော်စင်ဂိမ်းရဲ့အဆုံးသတ်က ကစားသမားတွေရဲ့ အစစ်အမှန်ဘ၀ကို သက်ရောက်နိုင်တယ်."

ထန်မော့ တန့်သွားပြီးမှ ဆက်ပြောလိုက်သည်။

"၀မ်ဇယ်ရှင်းအဖြစ်က သူ့ကိုယ်သူဂိမ်းကိုရှင်းပြီးခဲ့ပြီထင်နဲ့ ကမ္ဘပေါ်ကို ပြန်လာခဲ့တယ်...တကယ်တော့ဂိမ်းကမပြီးသေးဘူး သူ့အချိန်ကရှုပ်ထွေးနေပြီးတော့ သူကလည်း ပိတ်မိနေခဲ့တယ်..ဂိမ်းမပြီးခင်မှာ သူကအဲဒီအချိန်ကရုန်းထွက်ဖို့လိုတာ..ဒီတော့ မူဟွေ့ရွှယ်လည်းဒီလိုမျိုးကြုံခဲ့ရတာလား"

ရွမ်၀မ်ရှုက ဆိုသည်။

"အင်း..မူဟွေ့ရွှယ်ကြုံခဲ့ရတာလည်း အတူတူပဲနေမှာ.

ဒီဟာကပဲ အနက်ရောင်မျှော်စင် အဆင့်မြှင့်တာက ဘာကြောင့်ရပ်သွားလဲဆိုတာကို ရှင်းပြနိုင်လိမ့်မယ်..သူကဂိမ်းကိုအဆုံးသတ်တဲ့အချိန်မှာ နောက်ဂိမ်းတစ်ခုကိုဖွင့်မိခဲ့တာပဲ..သူကအနက်ရောင်မျှော်စင်၄ထပ်မြောက်ကို လုံး၀ကြီး မရှင်းနိုင်ခဲ့ဘူး..သူအခုထိဖြေရှင်းနည်းကိုရှာသေးတာလည်းဖြစ်နိုင်တယ် ..သူ၄ထပ်မြောက်ကို အပြည့်အ၀ရှင်းပြီးတာနဲ့ မျှော်စင် ၄.၀ဗားရှင်းလည်း ပွင့်လာလိမ့်မယ်"

ထန်မော့တို့အုပ်စုမှ လူ၄ယောက်မှာ ခုံကိုယ်စီဆွဲလျက် ရွမ်၀မ်ရှုနှင့် ဆန့်ကျင်ဘက်တွင် ထိုင်ချလိုက်ကြသည်။

ချန်ရှန်းရှန်းက ဒုတိယအကြိမ်နှုတ်ခမ်းကိုဖွင့်ဟလာခဲ့သည်။

"ဒီိလိုဆို ကျွန်မတို့တွေ အာရုံစိုက်ရမယ့်အချက် ၂ချက်ရှိလိမ့်မယ်..ပထမအချက်..အချိန်အဆင့်ဇယားပေါ်က ကိုယ်ပျောက်လူသားတွေကို ဖမ်းရမယ်..သူတို့ကမ္ဘာ၂ခုပေါင်းစပ်နေတဲ့အကြောင်းကို မသိခင် သတ်နိုင်သမျှ များများသတ်မှရမယ်..ဒုတိယအချက်ကတော့..မျှော်စင်လေးထပ်မြောက်ကို တိုက်ခိုက်ဖို့ပဲ"

ကလေးမလေး၏ အကြည့်က စာသင်ခန်းထဲသို့ဖြတ်ပြေးသွားခဲ့သည်။

"ဒီအခန်းထဲကလူတွေက ထျန်းရွှမ်အဖွဲ့ရဲ့ အဓိကအဖွဲ့၀င်တွေဖြစ်မှာပေါ့.."

ရွမ်၀မ်ရှု ခေါင်းညိတ်လိုက်သည်။

"ထျန်းရွှမ်မှာ လူ၆ယောက်ရှိတယ် လျန်ယွီကျန်းကတော့နောက်မှ ၀င်လာတာ..အခုချီဟန်လည်းသေပြီဆိုတော့ ၆ယောက်ပဲရှိတော့တယ်"

ချန်ရှန်းရှန်းကမေးလိုက်သည်။

"သူတို့အကုန် အနက်ရောင်မျှော်စင် ၃ထပ်မြောက်ကို ရှင်းပြီးကြပြီလား"

ရွမ်၀မ်ရှုတုန့်ပြန်လိုက်သည်။

"လီမြောင်မြောင် ကဒုတိယထပ်မှာ"

ချန်ရှန်းရှန်းသည် ထန်မော့နှင့် ဖူ၀မ်သော်ကို စိုက်ကြည့်လိုက်သည်။ သူတို့၏ လက်ခံမှုကိုရရှိပြီးနောက် သူမ ရွမ်၀မ်ရှုကို တဖန်ကြည့်လိုက်သည်။

"ကျွန်မတို့ မပြောရသေးတာတစ်ခုရှိတယ်..ဗိုလ်ချုပ်ဖူက မျှော်စင်တတိယထပ်ကိုရှင်းတော့ ဘောနပ်စ်တစ်ခုကိုရခဲ့တယ်...အနက်ရောင်မျှော်စင်က ရှင်ကျန်တဲ့ကစားသမားအားလုံးကို လေးထပ်မြောက်ကို တိုက်ခိုက်ကြဖို့အကြံပေးထားတယ်...အနက်ရောင်မျှော်စင်က အပိုတွေပြောတာရှားတယ်..ဒီတစ်ကြိမ်အဲဒီအကြံပေးတာက ကိုယ်ပျောက်လူသားတွေနဲ့ဆိုင်လိမ့်မယ်"

ရွမ်၀မ်ရှုသည် ချန်ရှန်းရှန်း၏ စကားကိုကြားသည်နှင့် ထူးဆန်းစွာတိတ်ဆိတ်သွားခဲ့လေသည်။

ထန်မော့လည်း သူ၏မျက်နှာမှ ထူးဆန်းသောအမူအရာကို ချက်ချင်းသတိထားမိသွားခဲ့သည်။ ထိုစဥ် သူ လျန်ယွီကျန်း ပြောလာသည်အား ကြားလိုက်ရလေသည်။

"ကျွန်မတို့လည်း မပြောရသေးတာတစ်ခုရှိတယ်..ခေါင်းဆောင် ၃ထပ်မြောက်ကိုရှင်းပြီးတော့ အနက်ရောင်မျှော်စင်က လေးထပ်မြောက်ကို အမြန်ဆုံးရှင်းတာအကောင်းဆုံးပဲလို့ပြောခဲ့တယ်..သူပြောခဲ့တဲ့ပုံက 'မင်းတို့အကုန်သေသွားလို့ ဘယ်သူမှလေးထပ်မြောက်ကိုမရှင်းနိုင်လိုက်ရင် ငါကလည်းလူသေတပုံကြီးအတွက် စိတ်ပူနေစရာမလိုတော့ဘူးပေါ့' တဲ့"

ထန်မော့ ဖူ၀မ်သော်ကို အမြန်လှည့်ကြည့်လိုက်ပြီး လူ၂ဦးမှာ အကြည့်ချင်းဆုံသွားခဲ့သည်။

စက္ကန့်အနည်းငယ်ကုန်လွန်သွားပြီးနောက် ထန်မော့ဆုံးဖြတ်ချက်တစ်ခုကို ချလိုက်လေသည်။

"ကိုယ်ပျောက်လူသားတွေကို ရှင်းဖို့ပူးပေါင်းတဲ့ကိစ္စကစဥ်းစားလို့ရပါတယ်..ဒါပေမယ့် ၃ထပ်မြောက်ကို တိုက်ခိုက်ဖို့ကတော့ငါတို့ကိုယ်ပိုင်ကိစ္စပဲ..ကိုယ်ပျောက်လူသားတွေက ပေါ်ချင်သလိုပေါ်လာတာ..ငါတို့စုရှောင်းကိုမရှာနိုင်ဘူး..လောလောဆယ်က ကိုယ်ပျောက်လူသားတွေကို သတ်နိုင်သမျှများများသတ်ဖို့နဲ့ လေးထပ်မြောက်ကိုရှင်းဖို့ကအရေးအကြီးဆုံးပဲ"

ရွမ်၀မ်ရှုကဆိုသည်။

"ထျန်းရွှမ်က ပေကျင်းမှာ သတင်းကွန်ရက်ရှိတယ်"

"အိုကေ ဒါဆို ငါတို့သတင်းဖလှယ်လို့ရတယ်"

၂ဖက်စလုံး ကိုယ်စီသတင်းများဖလှယ်လိုက်ကြသည်။ ထို့နောက်ထန်မော့နှင့် ဖူ၀မ်သော်တို့ ပြန်သွားပြီး ဖူ၀မ်ရှန်းနှင့်တွေ့ရန်ဆုံးဖြတ်လိုက်ကြသည်။ သူတို့သည် လျန်ယွီကျန်း၏ ဖိတ်ခေါ်ချက်ကို ထောင်ချောက်ဟု မထင်သော်လည်း အကယ်၍ဟူသော စိတ်နှင့် ဖူ၀မ်ရှန်းကို လုံခြုံသောနေရာတွင် ပုန်းလျက်ကျန်ရစ်စေခဲ့လေသည်။ ချန်ရှန်းရှန်းတစ်ယောက်တည်းသာဆိုလျှင် သူတို့သည်ထိုကလေးမလေးကို ထျန်းရွှမ်းအဖွဲ့တည်နေရာမှ လွတ်လွတ်ကင်းကင်းပြန်ခေါ်ထုတ်နိုင်သည်။ ဖူ၀မ်ရှန်းပါပိုပါနေခဲ့လျှင်တော့ ထိုမျှမလွယ်ကူချေ။

ပူးပေါင်းခြင်းအစီအစဥ်ကို ယေဘုယျဆွေးနွေးပြီးနောက် ထန်မော့ပြန်သွားရန်ပြင်လိုက်တော့သည်။

ထိုစဥ် သူ၏နောက်မှ အသံကိုကြားလိုက်ရလေသည်။

"ထန်မော့ ဖူ၀မ်သော် ခင်များတို့ လေးထပ်မြောက်ကို တန်းပြီး စိန်ခေါ်ကြတော့မှာလား"

ထန်မော့ခြေလှမ်းတို့ရပ်သွားပြီး ဖြူရော်ရော်ကောင်လေးကို လှည့်ကြည့်လိုက်သည်။

ထန်မော့မငြင်းခဲ့ချေ။

ရွမ်၀မ်ရှုကဆိုလာသည်။

"ခင်များနဲ့ ဗိုလ်ချုပ်ဖူ ၂ယောက်ကတော့ လေးထပ်မြောက်ကို စိန်ခေါ်သင့်တယ်..ခင်များတို့ရဲ့ ရှင်းလင်းနည်းနဲ့ သန်မာမှုနဲ့ဆို လေးထပ်မြောက်က ပြဿနာမဟုတ်လောက်ဘူး..ခင်များတို့အဖွဲ့မှာ ကျွန်တော့်ထက်ငယ်တဲ့ကောင်လေးတစ်ယောက်ရှိတယ်မလား..သူ့မှာကုသမှုစွမ်းရည်ရှိမယ်ထင်တယ်..ဒါပေမယ့် အဲလောက်မသန်မာလို့ ခင်များတို့ ဒီနေ့သူ့ကို ခေါ်မလာတာမလား"

ဖူ၀မ်သော်၏ မျက်လုံးတို့ကျဥ်းမြောင်းသွားခဲ့သည်။

"မင်းဘာပြောဖို့ကြိုးစားနေတာလဲ"

"လူတစ်ယောက်ကိုပေါင်းထည့်ရင် ဘယ်လိုလဲ"

ထန်မော့ပြုံးလိုက်သည်။

"မင်းကိုလား"

ရွမ်၀မ်ရှုခေါင်းခါလိုက်သည်။

"သူ့ကို"

လက်ညှိုးထိုးခံရသော လီမြောင်မြောင်မှာ ရှော့ရသွားခဲ့လေသည်။

"ခေါင်းဆောင်.."

🌍

Prev Next