MM Story Teller

Chapter 37

Viewers 5k

👾Chapter 37

: ဂုဏ်ကျက်သရေနဲ့ အောင်နိုင်မှုဆိုတာ ငါတို့အတွက်ပဲ

လင်းဟန်က အမှတ်တရများကို ပြန်တွေးကြည့်လိုက်မိသည်။

"များများစားစား မရှိဘူး ထင်တာပဲ... ကျွန်တော့်အမေ ရှိတုန်းကတော့ ကိတ်မုန့်တစ်လုံး ဝယ်ပြီး ကျွန်တော့်ကို ဆုတောင်းခိုင်းတယ်"

လင်းဟန်က အနည်းငယ် ရှက်ရွံ့နေဟန်ဖြင့် ပြောလိုက်သည်။

"ဒါပေမယ့် အရင်နှစ်တွေတုန်းက ကိစ္စတွေပါ... အခုဆိုရင် တော်တော်လေး ကလေးဆန်သလို ဖြစ်သွားပြီ... အဲ့အချိန်တုန်းက ဆုတောင်းတွေကလည်း ရိုးရိုးရှင်းရှင်လေးတွေပဲ... ဘာတောင်းမိမှန်းတောင် မမှတ်မိတော့ဘူး"

သူက နှုတ်ခမ်းထောင့်လေးများကို ကွေးလိုက်ပြီး ဟယ့်ယွင်ထင်အား တဖန်ပြန်ကြည့်လိုက်ရာ တစ်ဖက်လူ၏ အမူအရာက မပြောင်းမလဲ ရှိနေသေးသော်ငြား မျက်လုံးများကမူ အတွေးများ ပြည့်နေပုံပါပင်။ သူက ဟယ့်ယွင်ထင်အား အနှောက်အယှက် မပေးချင်သဖြင့် သူကပင် အစပြုကာ ပြောလိုက်သည်။

"ကျွန်တော်တို့ မနက်ဖြန် ထွက်ရတော့မယ်... အခုဆို ဗိုလ်ချုပ်လည်း အလုပ်များနေမှာပဲ... ကျွန်တော့်ကို မွေးနေ့ဆုတောင်းပေးတာကတင် ကောင်းလွန်းနေပါပြီ" လင်းဟန် ပြောလိုက်သည်။ "နောက်ထပ် ဘာမှ ပြင်ပေးစရာ မလိုပါဘူး"

"ဒါပေမယ့်" ဟယ့်ယွင်ထင် စကားပြောလာပြီး အရိုးရှင်းဆုံးသောစကားကို ပြောနေသည့်အလား အသံအနေအထားက တိုးညှင်းကာ နိမ့်ဆင်းနေသည်။

“…မစ္စတာလင်းက အခုထိ ဆုမတောင်းမသေးဘူးလေ... ကြယ်ကြွေတဲ့အခါ ဆုတောင်းရင် ဆုတောင်းပြည့်တယ်လို့ လူတွေ ပြောတာ ကြားဖူးတယ်" ဟယ့်ယွင်ထင် ပြောလေသည်။

လင်းဟန်က ဟယ့်ယွင်ထင်တစ်ယောက် ရေခွက်ကို ကိုင်ထားဆဲ ဖြစ်ကြောင်း တွေ့နေရသည်။ ကြမ်းတမ်းနေသော လက်ချောင်းများက ဖန်ခွက်အနားကို စည်းချက်ကျကျ တတောက်တောက် ခေါက်နေသဖြင့် ရေမျက်နှာပြင်ကို စက်ဝိုင်းပုံစံ လှည့်ပတ်သွားစေ၏။ ယင်းက သူ၏ လက်ရှိ နှလုံးခုန်သံနှင့် တိုက်ဆိုင်နေခဲ့သည်။

"မစ္စတာလင်း လုပ်ကြည့်ပါ" ဟယ့်ယွင်ထင် သူ့အား လှည့်ကြည့်လာသည်။ "ဖြစ်နိုင်မယ်ဆိုရင် ဒီလိုကိစ္စမျိုး ဖြစ်အောင် လုပ်ပေးချင်တယ်... ကိုယ် မစ္စတာလင်းရဲ့ ဆုတောင်းတွေ ပြည့်လာဖို့ မျှော်လင့်တယ်"

ထိုစကားက လင်းဟန်အား heatကာလတွင် ရေနွေးများများ သောက်ရန် ပြောနေသည်နှင့် ထပ်တူညီစွာ ဟယ့်ယွင်ထင်၏ အထူးသီးသန့်ဖြစ်ပြီး ကသိကအောက် ဖြစ်စေနိုင်သော အရေးပေးမှုပုံစံ အနည်းငယ် ပေါ်နေသည်။ သူက တောင်းဆုပြုခြင်း ဟူသည်မှာ ဆုတောင်းသူ ကိုယ်တိုင်က ထိန်းသိမ်းထားရသည့် အရာတစ်ခုဖြစ်ကြောင်း မသိလေရာ ယင်းအား အမှန်တကယ် ဖြစ်လာစေရန် ကူညီပေးချင်နေသည်။

လင်းဟန်က ဟယ့်ယွင်ထင်အား ကြည့်လိုက်ပြီး များစွာသော မေးခွန်းများက တဖြည်းဖြည်း စုပုံလာသည်။

ဥပမာအားဖြင့်... 'အတိအကျ ပြောရရင် ခင်ဗျား ကျွန်တော့်ကို ဘယ်လိုမျိုး တွေးထားလဲ'

'ဘာလို့ ကျွန်တော့်အပေါ် ထပ်ပြီး ကောင်းကောင်း ဆက်ဆံနေရတာလဲ' စသည်ဖြင့်ပင်...

သို့သော်လည်း ဟယ့်ယွင်ထင်၏ Rutကာလတွင် မည်သည့်စကားမှ မကြားခဲ့ရဘဲ စိတ်လိုက်မာန်ပါ မေးမိသော မေးခွန်းများအပြင် တစ်ဖက်လူ၏ 'မသိဘူး'ဟူသော အဖြေစကားများကို အမှတ်ရမိသွားသဖြင့် ထပ်မမေးလိုက်တော့ပေ။

လင်းဟန်က ဟယ့်ယွင်ထင်အား အချိန်အကြာကြီး ကြည့်နေခဲ့ပြီးနောက် တစ်ဖက်လူက မသက်မသာဖြင့် အကြည့်လွှဲသွားသည်ကို တွေ့လိုက်မှသာ မျက်လုံးများကို ပြန်မှိတ်ထားလိုက်သည်။

သုံးစက္ကန့်အကြာ လင်းဟန် မျက်လုံး ပြန်ဖွင့်လိုက်ပြီး ဟယ့်ယွင်ထင်အား ပြုံးပြလိုက်သည်။

"ကောင်းပါပြီ"

တစ်ဖက်လူက လင်းဟန်မှာ အဘယ်ကြောင့် သူပြောချင်နေသည့်စကားအား ပြောဆိုလာခြင်း မရှိသည်ကို နားမလည်ခဲ့ပါပေ။ သို့သော်လည်း အဆုံးတွင် မမေးလိုက်တော့ဘဲ အခန်းထဲတွင် တစ်ခဏ ထပ်နေလိုက်ပြီးနောက် ထွက်သွားရန် ပြင်လိုက်သည်။

ဟယ့်ယွင်ထင် မထွက်သွားခင် နောက်ဆုံးအကြိမ်အဖြစ် အတည်ပြုလိုက်သေးသည်။

"မစ္စတာလင်း စတုတ္ထအဆင့် စစ်ဆေးမှုကို မလိုက်ချင်ရင် နှုတ်ထွက်ဖို့ နောက်မကျသေးဘူး"

"ဗိုလ်ချုပ်... ဒါကျွန်တော့် အလုပ်ပါ"

လင်းဟန်က သူ့အား ကူကယ်ရာမဲ့စွာဖြင့် ကြည့်လိုက်သော်လည်း သိလိုစိတ်အပြည့်ဖြင့် မေးလိုက်သည်။ "ဒါပေမယ့် စစ်ဆေးမှုက ခန့်မှန်းချေ ဘယ်လောက်ကြာနိုင်လဲ... အာဟာရထုပ်တွေ ပိုယူသွားရအောင်လို့"

ဟယ့်ယွင်ထင် တစ်ခဏမျှ တွေးတောလိုက်သည်။ "အားလုံး အဆင်ပြေပြေ ဖြစ်မယ်ဆိုရင် လဝက်လောက်ပေါ့"

လင်းဟန် ခေါင်းငြိမ့်ပြလိုက်ပြီး ဟယ့်ယွင်ထင် ထွက်သွားသောအခါ စတင်ပြင်ဆင်လေတော့သည်။

သူက ရောက်ဖူးသည့်နေရာ သိပ်မများလှပေ။ သူ ငယ်စဥ်က Qခရိုင်တွင် အမေဖြစ်သူနှင့် နေထိုင်ခဲ့ပြီး ကြီးပြင်းလာသောအခါ ဗဟိုကြယ်သို့ ရောက်လာသဖြင့် အခြားသော နေရာများကို ဗီဒီယိုများ သတင်းများတွင်သာ မြင်ဖူးခဲ့ရသည်။

နယ်စပ်ဒေသက အနည်းငယ် ကြောက်စရာကောင်းပုံပေါ်သော်လည်း သူကမူ မတူညီသော ညကောင်းကင်ယံကို ကြည့်ရန်အတွက် ဝိုးတဝါး စိတ်လှုပ်ရှားနေခဲ့သည်။

နောက်တစ်နေ့ မနက်စောစောတွင် အခြေစိုက်စခန်းက သက်ဝင်လှုပ်ရှားနေ၏။

ရွေးချယ်မှု၌ ပါဝင်သည် ဖြစ်စေ မပါဝင်သူ ဖြစ်စေ အားလုံးသော တပ်သားများက သမားရိုးကျ ယူနီဖောင်းများကို ဝတ်ဆင်ထားပြီး သင်္ဘောပေါ် မတက်ခင် အဆုံးသတ် ပြင်ဆင်မှုများအတွက် ခါးမတ်မတ် ရပ်နေကြလေသည်။

လင်းဟန်က မည်သည့် အုပ်စုမှ မပါဝင်သဖြင့် လေ့ကျင့်ကွင်း၏ အပြင်မှာသာ ရပ်နေခဲ့သည်။

ဝမ်ထျန်းယောင်သည်လည်း သူပြောခဲ့သည့်အတိုင်း ရောက်လာခဲ့သည်။ သို့သော်လည်း အခြေစိုက်စခန်း၏ စစ်သင်္ဘောအား အသက်သွင်းရမည်ဖြစ်၍ လူတိုင်းနှင့်အတူတူ သင်္ဘောတက်ရမည် ဖြစ်သည်။ သူက ဂုဏ်ကျက်သရေတို့ဖြင့် တင့်တယ်နေသော တော်ဝင်ဝတ်စုံကို ဝတ်ဆင်ထားသည်။ အင်္ကျီအနားစနှင့် ကော်လံများ၌ တော်ဝင်မိသားစုတံဆိပ်ကို ထိုးထားကာ စကားတစ်ခွန်းမှ မပြောဘဲ လူအုပ်ကြီးနှင့် မနီးမဝေးတွင် ရပ်နေသည်။

၎င်းက စစ်ဆေးမှုတစ်ခုသာ ဖြစ်သော်လည်း စစ်သင်္ဘော၏ အသက်သွင်းမှုက ချီတက်မှုတစ်ခုလိုပင် ဖြစ်ကာ စစ်သားများက မထွက်ခွာခင်တွင် အင်ပါယာအပေါ် သစ္စာရှိပါမည် အင်ပါယာကြီး အဓွန့်ရှည်ပါစေဟု ကျမ်းကျိန်ရသည်။

ပတ်ပတ်လည်နေရာအားလုံး တိတ်ဆိတ်နေပြီး မည်သူကမှ ပေါ့ပေါ့ပါးပါး မမှတ်ယူထားကြပေ။

အချိန်တိုလေးတစ်ခုအပြီးတွင် ညီညာသော စစ်ဘွတ်ဖိနပ်သံများ ပေါ်ထွက်လာကာ လူအုပ်ကြီး၏ မျက်လုံးများက ထိုနေရာသို့ ရောက်ရှိသွားကြသည်။

လင်းဟန်မှာ လမ်းလျှောက်လာနေသည့် ဟယ့်ယွင်ထင်၏ အစိမ်းနုရောင် စစ်တပ်ယူနီဖောင်းကို တွေ့မြင်လိုက်ရသည်။ မျက်နှာကလည်း အေးစက်နေကာ ပေါ့ပလာပင်ကဲ့သို့ ခပ်မတ်မတ် ရပ်နေပြီး လက်ထဲတွင်လည်း အင်ပါယာအဆောင်အယောင်များ၏ အမြင့်မားဆုံး ဂုဏ်ကျက်သရေဆောင် တံဆိပ်ကို ကိုင်စွဲထားသည်။ ခြေလှမ်းတိုင်းကို သြဇာအာဏာအပြည့်ဖြင့် လျှောက်လာပြီးနောက် လူအုပ်ကြီး၏ ရှေ့တွင် ရပ်လိုက်သည်။

သူသည် တစ်ဖက်လူ၏ ယူနီဖောင်းထက်မှ တံဆိပ်များ ဖဲပြားများအပြင် ပုခုံးပေါ်မှ ငွေရောင်တလက်လက် တောက်ပနေသည့် ဗိုလ်ချုပ်ဝတ်စုံဘားတန်းကိုပါတွေ့လိုက်ရသည်။ ဟယ့်ယွင်ထင်၏ ဘယ်လက်က ခြေထောက်နှင့် ကပ်၍ ချထားပြီး ညာဘက်လက်ကို မာန်ပါလွန်းသော ကိုယ်ဟန်နှင့်အတူ နှလုံးသားထက်သို့ တဖြည်းဖြည်း ပြတ်ပြတ်သားသား တင်ကာ စူးရှနေသော မျက်လုံးများဖြင့် နှုတ်ခမ်းများက အနည်းငယ် လှုပ်ရှားလာခဲ့သည်။

"ကျွန်တော်တို့သည် အသက်ကိုရင်း၍ ကျိန်ဆိုပါသည်...."

ထောင်ပေါင်းများစွာသော တပ်သားများက တူညီသော ပုံစံအနေအထားအတိုင်းပင် နှလုံးသားပေါ် လက်တင်လိုက်ကြသည်။ထိုအခိုက် လူတိုင်း၏နှလုံးသားက တစ်နေရာတည်းမှာပင် ခုန်ပေါက်နေကြမည်ပြီး ရင်တစ်ခုလုံး ဗြောင်းဆန်နေကာ သစ္စာအဓိဌာန်အား အတူတကွ ကျိန်ဆိုလိုက်ကြလေသည်။

"ကျွန်တော်တို့ရဲ့ အသက်နဲ့ ရင်းပြီး ကျိန်ဆိုပါတယ်"

ဓါးသွားအတွက် အလင်းတန်း လှံတံအဖြစ် ကြယ်တာရာများနဲ့ သင်တုံးဓါးများအဖြစ် သွေးစက်များနဲ့အတူ အင်ပါယာကို သစ္စာရှိပါမယ်... ဖရိုဖရဲ ဖြစ်နေတဲ့ ဂလက်ဆီကို ဖြတ်သွားပြီး... အသူရာချောက်နက်ထဲက မီးလျှံများကို နင်းဖြတ်သွားပါမမယ်... တုံးအမှုတွေ မကောင်းမှုတွေက ပြာအဖြစ် တဖြည်းဖြည်း ပြောင်းလဲသွားပြီး ဂုဏ်ကျက်သရေနဲ့ အောင်နိုင်ခြင်းဆိုတာ ငါတို့ အတွက်ပဲ ဖြစ်ရမယ်...

“ဂုဏ်ကျက်သရေနဲ့ အောင်နိုင်ခြင်းက ငါတို့အတွက်ပဲ ဖြစ်ရမယ်..."

တပ်သားများ၏ သစ္စာစကားများက အခြေစိုက်စခန်းအတွင်း ပဲ့တင်ထပ်နေပြီး ဝမ်ထျန်းယောင်သည်ပင် ဦးထုပ်ကို ချွတ်ပြီး နှုတ်ခမ်းတင်းတင်းစေ့ကာဖြင့် စစ်သားများအားလုံးအပေါ် တော်ဝင်ဓလေ့ထုံးတမ်းများ ပြသလာသည်။

အခမ်းအနား၏ အဆုံးတွင် လင်းဟန်သည်လည်း စစ်သားများနှင့်အတူ အခြေစိုက်စခန်း၏ မြောက်ဘက်ဆုံးအပိုင်းသို့ လိုက်ကာ စစ်သင်္ဘောပေါ် တက်လှမ်းလိုက်သည်။

'ဘယ်လ်ဖတ်စ်' မှာ အင်ပါယာ၏ ဂုဏ်ကျက်သရေ အကြီးဆုံး စစ်သင်္ဘောဖြစ်ပြီး မရေတွက်နိုင်သော သင်္ဘောငယ်များ၊ မက်ခါများမှအစ လေယာဥ်ရပ်နားရာနေရာများအထိ ပါဝင်ပြီး ယင်းအပေါ်မှ လက်နက်ကြီးများ တပ်စုများကိုလည်း အထင်သေး၍ မရပေ။ ယနေ့မတိုင်မီမှာပင် သင်္ဘော၏ မက်ခါအား ပြင်ဆင်ထားပြီး ဖြစ်သည်။ လိုရမယ်ရအားဖြင့် M2742၏ သာလွန်ကြီးမြတ်လှသော တိုက်ခိုက်ရေးစွမ်းအား စစ်ပွဲအောင်နိုင်မှုများ၊ ဇုစ်နတ်ဘုရားဒိုင်းကာ၏ ခုခံရေးစွမ်းအားတို့ကိုပါ သင်္ဘောပေါ်၌ သယ်ဆောင်လာသည်။ ပါဝင်သူများအားလုံးက သင်္ဘောပေါ် တက်ခွင့်မပြုခင် ပြင်းထန်သော စစ်ဆေးမှုများ ကြုံတွေ့ရမည် ဖြစ်ပြီး တစ်ယောက်ချင်းစီက ရာထူးနေရာအလိုက် ကွဲပြားသော နေရာများထံ ဝင်ရောက်သွားမည်ပင်။

လင်းဟန်က ဟယ့်ယွင်ထင်နှင့် လုအန်းဟယ်နောက်မှလိုက်ကာ ဘယ်လ်ဖတ်စ်၏ ကပ္ပတိန်အခန်းငယ်လေးသို့ တန်း၍ ဝင်ရောက်သွားချိန်တွင် ဝမ်ထျန်းယောင်ကမူ သူတို့နှင့်အတူ ပါမလာခဲ့ဘဲ ပို၍ နိမ့်သော ညွှန်ကြားရေးအခန်းထဲသို့ ဝင်ရောက်သွားသည်။

အခြေခိုက်စခန်းမှ နယ်စပ်ဒေသသို့ ရောက်ရန် သုံးရက်မျှ ကြာမြင့်လေသည်။ ရွေးချယ်ပွဲတွင် ပါဝင်ကြသော တပ်သားသစ်များမှာ စိတ်လှုပ်ရှားမှုများကို မဖုံးကွယ်ထားနိုင်ကြဘဲ သွားလာနိုင်သော နေရာများတွင် နီးမြန်းနေသော မျက်နှာများဖြင့် သွားလာနေကြသည်။

ချီကျားမူ၏ မျက်နှာတစ်ခုတည်းကသာ တင်းမာ၍ နေပြီး မည်သည့် စိတ်လှုပ်ရှားမှုမှ ပြမလာဘဲ သာမန်ထက် ပို၍ အလေးအနက် ဖြစ်နေပုံပေါ်သည်။

လင်းဟန်က ကပ္ပတိန်အခန်း၏ မော်နီတာကို ဖြတ်၍ ထိုသူအား ကြည့်နေမိသည်။

ယခုတစ်ခေါက်က ဤအဆင့်ရှိ စစ်သင်္ဘောမျိုးအပေါ် ပထမဆုံးလိုက်ပါရခြင်း ဖြစ်ပြီး ဟယ့်ယွင်ထင်က ထိုသို့ လုပ်ရန် ပြောထားသဖြင့် အထူးကိစ္စတစ်ရပ်အနေဖြင့် ချီကျားမူအား လိုက်ကြည့်နေခဲ့ခြင်း ဖြစ်သည်။

ဟယ့်ယွင်ထင်သည်လည်း ဘယ်လ်ဖတ်စ်၏ ကပ္ပတိန်ဖြစ်ပြီး ဒုတိယဗိုလ်မှုးမှာ လုအန်းဟယ်တစ်ယောက်တည်း မဟုတ်တော့ဘဲ စစ်သင်္ဘော၏ ဒုတိယကပ္ပတိန် ရဲ့လင်လည်း ပါဝင်သည်။

စက်ခန်းမှ လူများကို ဆက်သွယ်မှုအချို့ ပြုလုပ်ပြီးနောက် ကြီးမားသော စက်ကြီး မြည်ဟီးလာခဲ့သည်။ စစ်သင်္ဘောကြီးက မြေပေါ်မှ ကြွလာပြီးနောက် နယ်စပ်ဒေသသို့ သွားရာ အထူးကြယ်လမ်းကြောင်းကြီးသို့ ဦးတည်လာခဲ့သည်။

ယင်းက အင်ပါယာမှလူများ၏ တစ်နှစ်တာအတွင်း စိတ်လှုပ်ရှားရဆုံးအချိန် ဖြစ်သည်။ သူတို့က စစ်ပွဲကို မလိုလားသော်လည်း ဘယ်လ်ဖတ်စ်အတွက် ဂုဏ်ယူဝမ်းမြောက်ကြပြီး ဤစစ်သင်္ဘောကြီး ထွက်လာခြင်းမှာ နှစ်စဥ်နှစ်တိုင်း မောင်းနှင်သူအသစ်များအတွက် စစ်ဆေးမှုစတုတ္ထအဆင့် ပြုလုပ်သည့်အတွက်ကြောင့်ပင်။

သူတို့က စစ်သင်္ဘောကြီးအနားသို့ ကပ်၍ မရသော်လည်း များစွာသော လူများက ကြယ်လမ်းကြောင်း၏ အနီးဆုံးနေရာသို့ အလိုအလျောက် တိုးလာကြကာ စစ်သင်္ဘောကြီး မောင်းနှင်သွားသည်ကို ကြည့်လေ့ရှိကြသည်။ အချို့က လက်ခုပ်လက်ဝါး တီးကြသည်။ အချို့က လက်ဖျားခါနေကြသည်။ အချို့ကမူ စိတ်လှုပ်ရှားလွန်း၍ မျက်ရည်များ ကျလာကြပေသည်။

မြေဆွဲအား မရှိတော့သောအခါ ဘယ်လ်ဖတ်စ် စစ်သင်္ဘောကြီးက ကိုယ်ပိုင်ကြယ်လမ်းကြောင်းတွင် စတင်ရွက်လွှင့်လာပြီး အရှိန်တင်ကာ အင်ပါယာ၏ လက်ရှိနှင့် အနာဂါတ်တွင် အတော်ဆုံးဖြစ်သည့် ပြန်တမ်းဝင်အရာရှိမဟုတ်သူ စစ်အရာရှိများနှင့် လူအများကိုတင်ဆောင်၍ စကြဝဠာကြီး၏ အမည်မသိတစ်နေရာသို့ ပျံသန်းမောင်းနှင်လာသည်။

ယင်းက ကြီးကျယ်ခမ်းနားလှသော လှည့်လည်သွားလာမှုမျိုး ဖြစ်သည့် အံ့လောက်ဖွယ်ရာ ခရီးစဥ်တစ်ခုပင်။ အရာအားလုံးက စီစဥ်ထားသည့်အတိုင်း ဆက်သွားနေပြီး အရှိန်တင်ပြီးသွားသောအခါ ဘယ်လ်ဖတ်စ် က အဆုံးတွင် တည်ငြိမ်သွားသည်။ အလိုအလျောက်မောင်းနှင်စနစ် ဖွင့်ပြီးနောက် လူအုပ်ကြီးက စိတ်သက်သာရာရစွာဖြင့် သက်ပြင်းချနိုင်သွားကြလေသည်။

စစ်သင်္ဘောကြီးကို အခြေစိုက်စခန်း၏ ထိန်းသိမ်းမှုအတိုင်း အသေးစိတ်ပြင်ဆင်ထားပြီး လုံလောက်သော အထောက်အပံ့နှင့် နေရာအကျယ်အဝန်းတို့ ပေးထားသည်။ ဤသုံးရက်အတွင်း မောင်းနှင်သူတို့ ကြာရှည်စွာ စောင့်မျှော်နေခဲ့ရသည့် အပန်းဖြေမှုရရှိရန် ခွင့်ပြုပေးထားသည်။

လင်းဟန်က သိလိုစိတ် ပြင်းပြနေဆဲပင်။

လင်းဟန်အတွက် ယခုတစ်ခေါက်က သင်္ဘောစီးဖူးသည့် ပထမဆုံးအကြိမ်ဖြစ်သလို အာကာသထဲသို့ ထွက်ရသည့် ပထမဆုံးသောအကြိမ်လည်းဖြစ်သည်။

ထို့အပြင် ကပ္ပတိန်အခန်းထဲတွင် နေရသဖြင့် အပေါ်စီးမှ အားလုံးကြည့်ရှုနိုင်သည်။

သူထင်ထားသည်နှင့် တူလည်းတူနေသလို ကွဲလည်း ကွဲပြားနေသည်။

တူညီနေခြင်းမှာ သူထင်ထားသည့်အတိုင်း စကြဝဠာကြီးက ကျယ်ပြောကာ ရိုမန့်တစ်ဆန်လှပြီး ကြယ်လမ်းကြောင်းတွင် ရှိနေသည်ကြောင့် ခပ်ဝေးဝေးနေရာများကို မမြင်နိုင်သော်လည်း စိတ်ဝင်စားစရာ ကောင်းလှပေသည်။

ကွဲပြားနေသည်မှာ သူ၏ စိတ်အခြေအနေပင်။

ခရီးစဥ်ပထမနေ့က တည်ငြိမ်ကာ အလှည့်အပြောင်းများ မရှိပေ။ အကြောင်းမှာ အင်ပါယာMဂြိုလ်၏ ပိုက်နက်အတွင်း မောင်းနှင်နေရဆဲ ဖြစ်သည့် ကြယ်လမ်းကြောင်း၏ အကွာအဝေးကြောင့်ပင်။

ထိုညတွင် လင်းဟန်က နားနေခန်းထဲသို့ ပြန်သွားမည်ပြုစဥ် တစ်နေ့လုံး အလုပ်များနေသည့် ဟယ့်ယွင်ထင်ထံမှ အခေါ်ခံရသည်။

"လင်းဟန်"ဟယ့်ယွင်ထင်၏ အသံက သူ့နာမည်ကို ခေါ်လိုက်ချိန်တွင် နက်ရှိုင်းနေသည်။

"ကြယ်တွေပြည့်နေတဲ့ကောင်းကင်ကြီးကို အနီးကပ် ကြည့်ချင်လား”

👾

စာရေးသူမှာ ပြောစရာ ရှိပါတယ်:

အလုံးစုံ စိတ်ကူးယဥ်ထားတာပါ... အပြင်မှာ တကယ်မရှိပါဘူးနော်... အလေးအနက် မမှတ်ယူကြပါနဲ့...

ဒီလိုဘေးကျပ်နံကျပ် ဖြစ်စရာ ပုံစံမျိုး ပထမဆုံး ရေးဖူးတာပါ... ဒါကြောင့် ငါလည်း စိတ်လှုပ်ရှားပြီး စိုးရိမ်နေရတယ်... တစ်ချိန်တည်းမှာပဲ ပျော်လည်းပျော်နေတယ်...

(ဘယ်လ်ဖတ်စ်) The Belfastက 1930ခုနှစ်တွေမှာ တော်ဝင်ရေတပ်က တည်ဆောက်ခဲ့တဲ့ Edinburgh-class light cruiser ဖြစ်ပြီးNo.2 သင်္ဘောပါ... နာမည်လေးငှားထားရုံဖြစ်လို့ မဝေဖန်ကြပါနဲ့နော်...

Prev Next