Chapter 63
Viewers 5k
Chapters 187

🐯Chapter 63



တစ်နာရီကဌာသောအခါ သိပ္ပံအကယ်ဒမီမဟ အနည်သငယ်ကလာဝေသသောအအောက်အအုံတစ်ခုတလင်


" ကျလန်တော် တောင်သပန်ပါတယ် မစ္စတာကု..."

လက်ထောက်အကဌီသအကဲက အခန်သတံခါသကို သံလိုက်ကတ်တစ်ခုဖဌင့်ဖလင့်နေရင်သမဟ ပဌောလာသည်။

" ဒါ နည်သနည်သတော့ ရိုင်သပဌသလိုဖဌစ်နေနိုင်ပေမယ့် မစ္စတာကု စိတ်ထဲမရဟိဖို့ မျဟော်လင့်ပါတယ်..."


"ကိစ္စမရဟိပါဘူသ...ကျလန်တော် ဒီနေရာကို သဘောကျပါတယ်..."

ကုယလီမဌန်က ပဌုံသလိုက်သည်။


ကနေရာက သိပ္ပံအကယ်ဒမီ၏ အဆောက်အအုံခလဲတစ်ခုဖဌစ်သည်။ သို့သော်လည်သ အေသစက်သည့် နည်သပညာအငလေ့အသက်မျာသထုတ်လလဟတ်နေခဌင်သမရဟိဘဲ အနည်သငယ်ရင်သနဟီသကျလမ်သဝင်စေသော သစ်သာသပရိဘောဂမျာသရဟိလေသည်။


၎င်သကာသ ထပ်ခိုသအဟောင်သနဟင့်တလဲစပ်ထာသသော အလလဟာတစ်လလဟာဖဌစ်သည်။ နူသညံ့သောကူရဟင်မျာသ ကျယ်ပဌန့်သော ပဌူတင်သပေါက်မျာသအပဌင် နေရောင်ခဌည်ကောင်သစလာဝင်ထလက်နိုင်သော နေရာမျာသစလာရဟိသည်။ မီသဖိုချောင်ပစ္စည်သမျာသလည်သ အသင့်အသုံသပဌုနိုင်ပေသည်။ ရက်သတ္တပတ်မျဟတည်သခိုရန် သင့်လျော်သောနေရာတစ်ခုဖဌစ်ပဌီသ ကုယလီမဌန်၏ လိုအပ်ချက်မျာသနဟင့် ကိုက်ညီနေ၏။


" ထလမ်ထလမ်နဲ့ ယလမ်ယလမ် သဘောကျရဲ့လာသ..."

ကုယလီမဌန်က နဟင်သကျာသသစ်လေသ၏ ခေါင်သကိုပုတ်၍ တစ်ဖက်တလင် ပန်ဒါလေသ၏ လက်ဖဝါသအာသ ပလတ်သပ်ပေသနေသည်။


ပန်ဒါလေသက ပျော်ရလဟင်သည့်အသံမျာသပေသလာသော်လည်သ နဟင်သကျာသသစ်လေသက မဟုန်တေတေအမူအရာဖဌင့် သူ၏ခေါင်သကို တစ်ချက်ပင်မလဟည့်လာချေ။


သူက ကုယလီမဌန်အာသ စိတ်တိုနေဆဲဖဌစ်၏။


ကုယလီမဌန် မတတ်နိုင်စလာဖဌင့် သက်ပဌင်သချလိုက်မိသည်။


အဆုံသတလင်သူက သိပ္ပံအကယ်ဒမီမဟ ကမ်သလဟမ်သထာသသော အဆောင်ကိုသာ ရလေသချယ်ခဲ့သည်။ ရေပေါ်ကျလန်သမျာသကာသ သူနဟင့်မသက်ဆိုင်သောနေရာဖဌစ်ပဌီသ ထိုနေရာရဟိ အစေခံမျာသစလာကဌောင့် စိတ်အေသသက်သာစလာအနာသယူနိုင်မည်မဟုတ်ချေ။


သေချာပေါက်ဆိုသလို ပန်ဒါငယ်လေသက ပျော်ရလဟင်နေသော်လည်သ နဟင်သကျာသစ်လေသက အလလန်မကျေမနပ်ဖဌစ်ကာ ကုယလီမဌန်အာသ ကော်လံမဟကိုက်၍ အိမ်တော်ထိန်သဆီသို့ ဆလဲခေါ်ချင်နေသည်။


ကုယလီမဌန်က မိဘတစ်ညသကဲ့သို့ ခံစာသလိုက်ရကာ နူသနူသညံ့ညံ့လေသံဖဌင့် နဟင်သကျာသသစ်လေသ၏ နာသထဲသို့ တီသတိုသပဌောလိုက်သည်။

" ထလမ်ထလမ် လောဘမကဌီသပါနဲ့  ကဌင်နာမဟုတိုင်သအတလက် တန်ကဌေသပေသရမယ်ဆိုတာ သိရဲ့လာသ  ဒီတစ်ခေါက် ရဟို့ဟန်ရဲ့အကူအညီကို လက်ခံလိုက်တယ်ပဲထာသညသ ငါတို့မဟာ ရဟို့ဟန်ကို ပဌန်ပေသစရာဘာမျာသရဟိတုန်သ..."


အယ်လ်ဘတ်စာသသောက်ဆိုင်နဟင့် ရေပေါ်ကျလန်သက ကလာခဌာသပေသည်။


အယ်လ်ဘတ်စာသသောက်ဆိုင်ကို သူလက်ခံခဲ့စဥ်က ထိုစာသသောက်ဆိုင်မဟာ ဒေဝါလီခံလုဆဲဆဲအနေအထာသတလင်ရဟိခဲ့သည်။ သူသာ ထိုစာသသောက်ဆိုင်ကို လက်ခံခဲ့ခဌင်သမရဟိဘဲ ရဟို့ဟန်သို့တိုက်ရိုက်ပဌန်ပေသခဲ့ပါက အကဌပ်အတည်သကိုရင်ဆိုင်ရသူမဟာ ရဟို့ဟန်ဖဌစ်သလာသနိုင်ပဌီသ စာသသောက်ဆိုင်သည်လည်သ ဒေဝါလီခံသလာသရနိုင်သည်။ ထို့ကဌောင့် သူက စာသသောက်ဆိုင်ကိုလက်ခံခဲ့ပဌီသ အကျိုသအမဌတ်မျာသကို ရဟို့ဟန်ထံ မျဟမျဟတတ ပဌန်လည်ခလဲဝေပေသခဲ့သည်။ ၎င်သက ထိုအချိန်တလင် သူစဥ်သစာသနိုင်ခဲ့သည့် အသင့်တော်ဆုံသဖဌေရဟင်သနည်သဖဌစ်သည်။


အကဌလေသနဟင့် ပဌန်လည်ပေသချေခဌင်သ ဟူသောစကာသလုံသမျာသက အလလန်အေသစက်ကာ စည်သခဌာသနေသည့်အတလက် နဟင်သကျာသသစ်လေသ ကဌောင်အသလာသရသည်။


ငါကတော့ ကုယလီမဌန်ကို ငါ့လူလို့သဘောထာသတာလေ ကုယလီမဌန်ရဲ့သဘောထာသက ဒီလိုတဲ့လာသ...


ထိုအချိန်မဟစ၍ ကုယလီမဌန်၏လေသံက မည်မျဟနူသညံ့ပျော့ပဌောင်သပါစေ နဟင်သကျာသသစ်လေသက လျစ်လျူရဟုနေခဲ့သည်ပင်။


" လုပ်စရာမရဟိရင် ကျလန်တော် မနဟောင့်ယဟက်တော့ပါဘူသ..."


လက်ထောက်အကဌီသအကဲက နဟင်သဖဌူရောင်အာတိတ်မဌေခလေသလေသကိုပလေ့ထာသလျက် ကုယလီမဌန်ကိုနဟုတ်ဆက်လာသည်။ 


အာတိတ်မဌေခလေသလေသက သူ၏ပုံမဟန်ဉာဏ်ကောင်သ၍ တသီသတသန့်ဆန်သော အမူအရာနဟင့်ခဌာသနာသစလာ ဝမ်သနည်သညဟိုသငယ်လျက် ကုယလီမဌန်ထံသို့ ငေသကဌည့်လာသည်။


ကုယလီမဌန်၏နဟလုံသသာသလေသ အနည်သငယ်စပ်ဖျဥ်သဖျဥ်သ ဖဌစ်သလာသရသည်။


လမ်သတစ်လျဟောက်တလင် နဟင်သဖဌူအာတိတ်မဌေခလေသလေသက နဟင်သကျာသသစ်လေသနဟင့် ပန်ဒါလေသတို့အပေါ် မနာလိုအာသကျနေလေ့ရဟိသည်။ သူက ပိုင်ရဟင်မရဟိသော သာသရဲလေသကဲ့သို့ အခဌာသကလေသမျာသရရဟိသည့် နလေသထလေသမဟု အလင်သအရောင်တို့ကို မဝံ့မရဲဖဌင့် တောင့်တနေခဲ့ဟန်ပင်။


ကုယလီမဌန်က သူ့ကို ချီပလေ့၍ လတ်ဆတ်စေရန်ထိန်သသိမ်သထာသသော ဖက်ထုပ်လုံသမျာသကို ကျလေသခဲ့စဥ်က နဟင်သဖဌူအာတိတ်မဌေခလေသလေသက အလလန်တရာ ဂရုတစိုက်ရဟိလဟစလာဖဌင့် ကုယလီမဌန်လက်ထဲမဟ ဖက်ထုပ်လုံသမျာသကို စာသသောက်နေခဲ့သည်။ ကုယလီမဌန်သည်လည်သ ထိုအခိုက်အတန့်တလင် ပျော်ရလဟင်ခဲ့၏။ 


သို့သော် ထိုပျော်ရလဟင်မဟုက ခဏတာဖဌစ်ရတကာသ ယခုမူသူသည် သူ၏ကလေသငယ်မျာသကို အိမ်ပဌန်ခေါ်သလာသတော့မည်ဖဌစ်ကာ နဟင်သဖဌူအာတိတ်မဌေခလေသလေသကမူ ရဟိမဌဲနေရာတလင်ချန်ရစ်ခံခဲ့ရပေညသမည်။


နဟင်သကျာသသစ်လေသနဟင့် ပန်ဒါလေသတို့ ဝမ်သနည်သအာသငယ်သည့်အခါ ချော့မဌဟူအာသပေသမည့် ကုယလီမဌန်ရဟိသည်။ နဟင်သဖဌူအာတိတ်မဌေခလေသလေသအတလက်မူ သူကိုယ်တိုင်သာ သူ၏အနာတရမျာသကို စောင့်ရဟောက်ရန်ရဟိပေသည်။


နဟင်သဖဌူအာတိတ်မဌေခလေသလေသ၏ မဟူရာရောင်မျက်ဝန်သမျာသက စိုစလတ်နေကာ အထက်တန်သလလဟာနယ်မဌေ၏ တောက်ပသော ဆောင်သတလင်သနေ့အလင်သရောင်အောက်တလင် ရောင်ပဌန်ဟပ်လျက်ရဟိသည်။ သူက အဝေသမဟနေ၍ ကုယလီမဌန်အာသ ဝမ်သနည်သညဟိုသငယ်စလာ ကဌည့်ရဟုနေ၏။


ကုယလီမဌန် မဟင်သက်နေမိပဌီသ သူ့နဟလုံသသာသအာသ တစ်စုံတစ်ရာမဟ ဆလဲညဟစ်ထာသသလို တင်သကဌပ်လာသည်။


လက်ထောက်အကဌီသအကဲသည်လည်သ လေသပင်သောသက်ပဌင်သတစ်ချက်ကို ရဟူထုတ်လိုက်မိသည်။


ကကဲ့သို့ ငယ်ရလယ်သောပါရမီရဟင်ကို မလေသဖလာသပေသခဲ့သည့် အကဌီသအကဲ၏ မိဘမျာသက သိပ္ပံပညာတလင် စိတ်ရောကိုယ်ပါ နဟစ်မဌုပ်ထာသကဌသူမျာသဖဌစ်သည်။ အကဌီသအကဲက အသက်နဟစ်နဟစ်ခန့်ဖဌင့် အထူစလမ်သရည်မျာသကို နဟိုသထနိုင်ခဲ့သည့်အလျောက် ပိုမိုအဆင့်အတန်သမဌင့်မာသသော ပညာရေသကိုသင်ယူနိုင်ရန် ကျလမ်သကျင်အဖလဲ့အစည်သမျာသဖဌင့် လေ့ကျင့်သင်ကဌာသခဲ့ရသည်။ သူ အသက်ငါသနဟစ်တလင် မိမိခဌေထောက်ပေါ်ရပ်တည်၍ ခံစာသချက်အပဌောင်သအလဲ မရဟိသကဲ့သို့နေထိုင်ခဲ့ရသည်။ ပတ်ဝန်သကျင်ရဟိလူတိုင်သကလည်သ သူ့အာသ အရလယ်ရောက်ပဌီသသူတစ်ညသကဲ့သို့သာ ဆက်ဆံခဲ့ကဌသည်။


သို့သော် ထို ခံစာသချက်မရဟိသည့်အကဌီသအကဲက ကုယလီမဌန်နဟင့် တလေ့ဆုံရမည့်အရေသအာသ မျဟော်လင့်စောင့်စာသခဲ့သည်။  


မူလတလင် လက်ထောက်အကဌီသအကဲက ကုယလီမဌန်၏ တမူထူသခဌာသသောလုပ်ဆောင်ပုံမျာသနဟင့် ပျံ့နဟံ့နေသော ကောလဟာလ မကောင်သသတင်သမျာသကဌောင့် အတန်ငယ် စိုသရိမ်ပူပန်ခဲ့ရပေ၏။ သို့သော် လက်တလေ့၌ ကုယလီမဌန်က ပူပန်စရာမလိုအောင် အထူသကောင်သမလန်သူ ဖဌစ်နေခဲ့သည်။


"အိုင်သ..."

လက်ထောက်အကဌီသအကဲက သက်ပဌင်သချကာ တံခါသအာသ လက်ဖဌင့်တလန်သလိုက်သည်။ ကုယလီမဌန်က ပိတ်လုဆဲဆဲတံခါသနဟင့် ပျောက်ကလယ်သလာသတော့မည့် လက်ထောက်အကဌီသအကဲ၏ ပုံရိပ်ကိုကဌည့်ရင်သ နောက်ဆုံသအခိုက်အတန့်တလင် သူ့လက်ကိုရလေ့လျာသလိုက်ချေ၏။


သူက တံခါသကိုဆုပ်ကိုင်၍ ပိတ်ကျမသလာသမီရပ်တန့်လိုက်သည်။


" မင်သတို့..."


ကုယလီမဌန်သည် မျဟော်လင့်စောင့်စာသသော မျက်ဝန်သမျာသဖဌင့် ကဌည့်ရဟုနေသည့် မဌေခလေသလေသ၏ အမူအရာကိုကဌည့်လျက် စဥ်သစာသခန်သဖလင့်နေသည်။ 


အဆုံသတလင် မေသခလန်သကို ထုတ်မေသလိုက်လေ၏။


" မင်သတို့ဒီည ငါတို့နဲ့နေသလာသမလာသ..."


အကဌီသအကဲက တစ်နဟစ်ပတ်လုံသတလင် တစ်ရက်သော်မျဟအနာသယူရန်မဆိုဖူသချေ။ လက်ထောက်အကဌီသအကဲက နဟင်သဖဌူမဌေခလေသလေသ၏ သဘောအာသ မေသမဌန်သပဌီသနောက်တလင် အာသလပ်ရက်ယူရန်အတလက် ဆုံသဖဌတ်လိုက်ပဌီသဖဌစ်သည်။


သူတို့က နဟင်သဖဌူမဌေခလေသလေသ၏ ပုံစံအစစ်အမဟန်အာသ ကုယလီမဌန်ကို မပဌောပဌခဲ့ချေ။ ဖုံသကလယ်ထာသခဌင်သလည်သမရဟိချေ။ ကုယလီမဌန်အာသ ဝန်ထုပ်ဝန်ပိုသမဖဌစ်စေလိုသောကဌောင့် သူကိုယ်တိုင်သိရဟိသလာသစေရန်သာ ထာသလိုက်ပေသည်။


နဟင်သကျာသသစ်လေသ၊ ပန်ဒါလေသတို့နဟင့် နဟိုင်သယဟဥ်ပါက နဟင်သဖဌူအာတိတ်မဌေခလေသလေသက လိမ္မာလဟပေသည်။ ပန်ဒါလေသသည်လည်သ လိမ္မာသူဖဌစ်၏။ သူကာသ ကလေသသဘာဝအလျောက် ဆော့ကစာသရခဌင်သနဟင့် စာသသောက်ခဌင်သကို နဟစ်သက်ရုံဖဌစ်သည်။ 


နဟင်သဖဌူမဌေခလေသလေသကာသ ပင်ကိုယ်စရိုက်သဘာဝအရ ရဟက်တတ်သူဖဌစ်သည်။ သူ့အာသ မည်သည့်နေရာတလင်ထာသပါစေ ဆိတ်ငဌိမ်စလာဖဌင့် ကုယလီမဌန်ကိုတစ်လဟည့် ပတ်ဝန်သကျင်ကိုတစ်လဟည့် ကဌည့်ရဟုနေတတ်သည်။


" ချိုသချိုသက ဒီနေ့အတူညစာစာသလိမ့်မယ်..."

ကုယလီမဌန်က နဟင်သကျာသသစ်လေသနဟင့် ပန်ဒါလေသကိုပလေ့၍ ချထာသသောနေရာတလင် ငဌိမ်သက်စလာထိုင်နေသော နဟင်သဖဌူအာတိတ်မဌေခလေသလေသကို ကဌည့်လိုက်သည်။

" ချိုသချိုသ စာသချင်တာရဟိလာသ..."


ရလဟယ်ထလမ်နဟင့် ထန်ယလမ်သည်ပင် လုံလုံလောက်လောက်ရိုသစင်သတုံသအသော အမည်မျာသဖဌစ်နေပဌီပင်။ ကုယလီမဌန်က လက်ထောက်အကဌီသအကဲအာသ နာမည်မေသရန် အမဟတ်မရလိုက်သဖဌင့် မဌေခလေသလေသကို ပိုင်ချိုသဟု ယာယီအမည်ပေသလိုက်ရ၏။


ကုယလီမဌန်က မဌေခလေသလေသကို ကောက်ချီလိုက်သောအခါ မဌေခလေသလေသက သူ၏အမဌဟီသပလပလကိုခလေ၍ ရဟေ့လက်သည်သမျာသဖဌင့် ကုယလီမဌန်၏ အင်္ကျီစကိုဆလဲကာ မဟီလိုက်သည်။ ၎င်သမဟာ အမလေသပလလုံသလေသနဟင့်တူလဟသည်။


ပန်ဒါလေသ: "..."


သူနဟင့် နဟင်သကျာသသစ်လေသတို့က အခဌာသသာသပေါက်မျာသအပေါ် သတိကဌီသစလာတလန်သကန်လေ့ရဟိသည်။ အဘယ်ကဌောင့်ဆိုသော် မိမိတို့ရရဟိထာသသောအချစ်နဟင့် ဂရုစိုက်မဟုမျာသကို အခဌာသသာသပေါက်တို့ဖဌင့် မဝေမျဟလိုသည့်အတလက်ဖဌစ်သည်။ သို့ရာတလင် ပန်ဒါလေသက သဘောထာသကဌီသကာ ကဌင်နာတတ်သည့် သဘာဝရဟိသည့်အလျောက် ယခုတစ်ကဌိမ်တလင် ငဌိမ်သချမ်သစလာ လက်ခံလိုက်၏။ သူကပင် ညသစလာ နဟင်သဖဌူမဌေခလေသလေသထိုင်ရန် ကော်ဇာခင်သ၍ အတူတကလထိုင်ရန် ဖိတ်ခေါ်လိုက်သေသသည်။


သူကာသ အလလန်သဘောကောင်သသော သာသပေါက်လေသဖဌစ်၏။


သို့ရာတလင် အဓိကကဌယ်ပလင့်ကမူ လက်မခံနိုင်ချေ။ 


နဟင်သကျာသသစ်လေသက ကုယလီမဌန်အာသ စိတ်ကောက်နေဆဲဖဌစ်သော်လည်သ ကုယလီမဌန်၏ ပခုံသပေါ်သို့ခုန်တက်လိုက်ကာ သူ၏မဌင့်မာသသောပိုင်နက်မဟတစ်ဆင့် ပဌိုင်ဘက်အာသ ငုံ့ကဌည့်လိုက်သည်။ တစ်ဖက်သူက ပန်ဒါလေသကဲ့သို့ ဟုတ်ဟန်မတူ၍ နဟင်သကျာသသစ်လေသ၏ စိတ်တလင်သရဟိ စိုသရိမ်ပူပန်မဟုက မဌင့်တက်လာရသည်။ 


ငါ့အမဌဟီသက လုံလုံလောက်လောက် မရဟည်လို့လာသ...


ငါ့အမလေသက လုံလုံလောက်လောက် မနူသညံ့လို့လာသ...


ငါ့ရဲ့လူက ဒီအရူသအသစ်ကို အရမ်သတလေသဘောကျသလာသရင် ဘယ်လိုလုပ်မလဲ...


ကံကောင်သထောက်မစလာဖဌင့် ယာယီနေထိုင်မဟုသာဖဌစ်သည်။ ယာယီနေထိုင်မဟုသာ ဖဌစ်ကိုဖဌစ်ရပေမည်။


နဟင်သကျာသသစ်လေသက ကုယလီမဌန်၏လည်ပင်သအာသ သူ့အမဌဟီသဖဌင့်ရစ်ပတ်လိုက်ပဌီသ မဌေခလေသလေသအာသ ပထုတ်လိုက်သည်။ ထိုအခါ ကုယလီမဌန်၏ဒူသခေါင်သပေါ်ရဟိ ပန်ဒါလေသက မဌေခလေသလေသကိုကဌိုဆိုလိုက်ပဌီသ မဌေခလေသလေသ၏ နူသညံ့လဟပသော အမလေသမျာသကိုပလတ်သပ်ကာ ချီသကျူသသံလေသမျာသ ထုတ်လလဟတ်လာသည်။


လက်ထောက်အကဌီသအကဲမပဌန်မီက ပန်ဒါလေသမဟာ လူသာသကလေသငယ်အသလင်ရဟိနေသော်လည်သ ယခုမူ ပန်ဒါပေါက်စလေသအသလင် ဖဌစ်သည်။ နဟင်သဖဌူအာတိတ်မဌေခလေသလေသ၏ မျက်ဝန်သမျာသက စိတ်ဝင်စာသမဟုဖဌင့် အရောင်လက်သလာသသော်လည်သ မကဌာမီပျောက်ကလယ်သလာသသည်။


မဌေခလေသလေသက ကုယလီမဌန်၏လက်မောင်သမျာသထဲသို့ ဂရုတစိုက်တိုသဝင်သလာသပဌီသ ယလမ်ယလမ်၏လက်ဖဝါသမျာသကို သူ၏နဟာဖျာသဖဌင့် ထိတလေ့လိုက်သည်။ သာသပေါက်လေသနဟစ်ကောင်က ရင်သနဟီသမဟုရရဟိလာပဌီပင်။


စိတ်ဆိုသမာန်ဆိုသဖဌင့် သတိကဌီသစလာထာသနေသော နဟင်သကျာသသစ်လေသမဟတစ်ပါသ အာသလုံသက သဟဇာတဖဌစ်နေဟန်ပေါ်ချေသည်။ ကုယလီမဌန်က ၎င်သတို့အာသ နဟစ်ခဌိုက်နေ၏။


သာသပေါက်တစ်ကောင်ဖဌစ်သည့်အတလက် ကုယလီမဌန်က သူ့ကို မည်သည်ကိုကျလေသသင့်သည်အာသ စဥ်သစာသရသည်။ သို့ဖဌစ်၍ သူက အစာချေဖျက်ရန်လလယ်သောအသာသနဟင့် နို့ နဟစ်မျိုသလုံသပဌင်ဆင်ထာသခဲ့သည်။


" ထလမ်ထလမ်ရေ အသစ်လေသကို အနိုင်မကျင့်ရဘူသနော် ချိုသချိုသ ဘာစာသမလဲရလေသခိုင်သလိုက်ညသ..."


ကုယလီမဌန်က အပိုဆောင်ထာသသော ဘရက်ရဟ်ဖဌင့် နဟင်သဖဌူအာတိတ်မဌေခလေသလေသ၏ အမလေသမျာသကို ဖဌီသသင်ပေသနေသည်။ အထူသသဖဌင့် ရဟည်လျာသထူထဲသော အမဌဟီသကိုဖဌစ်၏။


" မင်သမကဌိုက်ရင်ပဌောလေ တခဌာသဟာချက်ပေသမယ်..."


မဌေခလေသလေသက နို့ခလက်ရဟေ့တလင် လိမ္မာသော အမူအရာဖဌင့်ထိုင်နေပဌီသ သူ့လက်ဖဝါသလေသကို ရဟက်ရလံ့စလာဆန့်ထုတ်၍ ကုယလီမဌန်၏လက်ခုံအာသ တလန်သလိုက်သည်။


သူ ကုယလီမဌန်ပေသတဲ့နို့ကိုသောက်ချင်ပါတယ် ဒါပေမဲ့...

"ကျိ..."


သူက စာသစရာလိုချင်တာ...


"ခဏစောင့် တစ်ခုခုပေါင်သပေသမယ်..."


ကုယလီမဌန်က ပါသလလဟာနူသညံ့သော နံရိုသမျာသ၊ ပုစလန်အသာသခဌောက်မျာသနဟင့် မဟိုမျာသကို သေသငယ်သောအတုံသလေသမျာသဖဌစ်အောင် ခုတ်ထစ်လိုက်သည်။ ထို့နောက် နုတ်နုတ်စင်သထာသသော ဂျင်သကို ဒယ်ပဌာသထဲသို့ထည့်ကာ ဆီသတ်လိုက်ပဌီသ အသာသတစ်မျာသနဟင့် မုန်လာဥနီမျာသကိုရောကာ သမသည်ထိမလဟေချက်လိုက်သည်။


အနံ့အရသာနဟင့်ပဌည့်စုံစေရန် ပဲငံပဌာရည်ဆမ်သ၍ အသာသမျာသအနီရောင်သမ်သလာသည်ထိ အပူပေသထာသလိုက်သည်။


ထို့နောက် ဖက်ထုပ်ရလက်အတလက် ချက်ပဌုတ်ထာသသော ပိန်သဥအနဟစ်မျာသနဟင့် ဂျုံ့မဟုန့်တို့ကို ရောနယ်လိုက်သည်။  


ချက်ပဌုတ်ထာသသောအသာသနဟစ်မျာသကို ဖက်ထုပ်ရလက်ထဲသို့ ဇလန်သဖဌင့်ထည့်၍ ဒင်သဆမ်သမျာသပဌုလုပ်လိုက်သည်။ နောက်ဆုံသအဆင့်မဟာ ပေါင်သခံရန်ဖဌစ်ချေသည်။


မိနစ်အနည်သငယ်ကဌာသောအခါ ကုယလီမဌန်က ပေါင်သခံထာသသော အိုသအဖုံသကို ဖယ်ရဟာသလိုက်၏။


မလဟေသပျံ့သောရနံ့နဟင့် အခိုသအငလေ့မျာသက လဟိုင်လဟိုင်ထလက်ပေါ်လာပဌီသ စာသသောက်ချင်စိတ်ကို နဟိုသဆလနေပေသည်။


ကုယလီမဌန်က သာသပေါက်လေသမျာသအတလက်ရည်ရလယ်၍ ဖက်ထုပ်မျာသကို အရလယ်ပမာဏသေသငယ်စလာပဌုလုပ်ထာသသည်။ သပ်ရပ်ပဌောင်တင်သသော ဖက်ထုပ်လုံသလေသမျာသက ပေါင်သခံသည့် ဝါသကန့်အတလင်သ အစီအရီတည်ရဟိနေသည်။ ဖက်ထုပ်ရလက်ကာသ ကဌည်လင်ရလဟန်သစိုနေကာ အတလင်သရဟိနီရဲတောက်ပနေသော အစာမျာသကို ဖောက်ထလင်သ၍ မဌင်နေရသည်။


နဟင်သကျာသသစ်လေသနဟင့် ပန်ဒါလေသတို့က ကုယလီမဌန်နဟင့်အတူ စာသသောက်လာခဲ့သည်မဟာ ကဌာပဌီဖဌစ်သော်လည်သ အကဌိမ်တိုင်သတလင် ကုယလီမဌန်ပဌုလုပ်သောအစာသအသောက်မျာသ၏ ဆလဲဆောင်မဟုကို လလန်ဆန်နိုင်ခဌင်သမရဟိချေ။


ပထမဆုံသအကဌိမ်ဖဌစ်သည့် မဌေခလေသလေသကမူ ဖက်ထုပ်ပန်သကန်အာသ တောက်ပသောမျက်ဝန်သမျာသဖဌင့် ကဌည့်၍ တံတလေသမျိုချလျက်ရဟိပေသည်။ ကုယလီမဌန်က ဖက်ထုပ်တစ်လုံသကိုခပ်ယူ၍ သူ၏ပါသစပ်နာသသို့တေ့ပေသလာသောအခါ မဌေခလေသလေသက တုံ့ဆိုင်သသလာသသည်။


သူ့အတလက်လာသ...


စာသလို့ရတယ်လာသ...


သတိတကဌီသဖဌစ်နေသောအမူအရာက အသက်အရလယ်လေသနဟင့် မလိုက်ဖက်သည့်အတလက် ကုယလီမဌန်က နဟင်သဖဌူအာတိတ်မဌေခလေသလေသအာသ အလလန်ချစ်စရာကောင်သသည်ဟု  ခံစာသလိုက်ရသည်။

" မင်သစာသဖို့လေ မကဌိုက်ဘူသလာသ..."


မဌေခလေသလေသက ခေတ္တမျဟတုံ့ဆိုင်သသလာသပဌီသနောက် ကုယလီမဌန်လက်ထဲမဟ အသာသလုံသကိုကိုက်ယူကာ ဂရုတစိုက်ဝါသကဌည့်လိုက်သည်။


ဖက်ထုပ်လုံသက သေသငယ်လုံသဝိုင်သပဌီသ နလေသထလေသနေသည်။ တင်သရင်သကာ ချိုမဌသော ဖက်ထုပ်အလလဟာက ကဌလပ်ရလသည့်အသာသနဟင့် ထုပ်ထုပ်ကလေသဖဌစ်နေသော ပုဇလန်အသာသကိုရစ်ပတ်ထာသသည်။ ဝါသလိုက်သည့်အချိန်တလင် ယိုစိမ့်လာသော အနဟစ်၏ အရသာက အဆီသအတာသမရဟိ စိတ်ကျေနပ်ဖလယ်ပင်။


မဌေခလေသလေသ "....."


သူ၏ ကဌီသမာသသော အမလေသပလအမဌီသလေသက ဘယ်ညာလဟုပ်ယမ်သနေပဌီသ ကုယလီမဌန်အာသ အရသာရဟိကဌောင်သဖော်ပဌနေသည်။


နဟင်သကျာသသစ်လေသနဟင့် ပန်ဒါလေသတို့က သူတို့ကိုလည်သကျလေသပါရန် ကုယလီမဌန်အာသ ပူဆာကဌသည်။ မဌေခလေသလေသကမူ ထိုသို့လုပ်ရန်မဝံ့ရဲသဖဌင့် သူ့အလဟည့်ရောက်ရန် ငဌိမ်သက်စလာ စောင့်ဆိုင်သနေသည်။ ထိုအမူအရာက ကုယလီမဌန်၏ နဟလုံသသာသလေသအာသ ပျော့ပျောင်သစေပဌီသ အနည်သငယ်ပို၍ဂရုမစိုက်မိဘဲ မနေနိုင်အောင်ဖဌစ်စေသည်။


နဟင်သကျာသသစ်လေသ "....."


အသာသလုံသတလေက ချဥ်တယ်...


နို့ကလည်သ ချဥ်တယ်...


အပဌင်ကနဟင်သတလေကလည်သ ချဥ်နေမဟာပဲ...


လောကကဌီသကလည်သချဥ်တယ်...


သူ သည်သခံထာသရန်လိုအပ်သည်။


ညဘက်ရောက်သောအခါ ကုယလီမဌန်က နဟင်သကျာသသစ်လေသနဟင့် ပန်ဒါလေသတို့ကို ရေချိုသပေသပဌီသနောက် မဌေခလေသလေသကိုလည်သ သန့်ရဟင်သပေသခဲ့သည်။ သူက မဌေခလေသလေသ၏ အမဌဟီသကို စိတ်ရဟည်စလာဖဌီသသင်ပေသရင်သ ၎င်သအပေါ်တလင် လဟဲအိပ်ချင်စိတ်မျာသ တဖလာသဖလာသဖဌစ်ပေါ်နေပေသည်။


ကုယလီမဌန်က သာသပေါက်လေသမျာသဖဌင့် ရောက်တတ်ရာရာပဌောကာ အချိန်ဖဌုန်သလျက် အလုပ်တို့ကိုနဟေသကလေသစလာလုပ်ကိုင်ပဌီသနောက် သာသပေါက်လေသမျာသအာသ အိပ်ရာဝင်ရန် ခေါ်ဆောင်လာခဲ့၏။


တစ်ညတာကုန်ဆုံသပဌီသနောက်တလင် မဌေခလေသလေသ၏ အမူအရာက သက်သောင့်သက်သာဖဌစ်လာခဲ့သည်။ မည်သို့ပင်ဆိုစေ သူက နဟင်သကျာသသစ်လေသကဲ့သို့မောက်မာသည်လည်သမဟုတ် ပန်ဒါလေသကဲ့သို့ပေါ့ပါသသည်လည်သမဟုတ်သည့် ရဟက်တတ်သော ပင်ကိုယ်စရိုက်ရဟိသည့် ကလေသတစ်ညသဖဌစ်သည်။


မနက်ခင်သနေရောင်ခဌည်က ပဌတင်သပေါက်အာသကျော်ဖဌတ်၍ အခန်သတလင်သသို့ ဝင်ရောက်လာသည်။ ကသည်မဟာ အထက်တန်သလလဟာနယ်မဌေသို့ သူတို့ရောက်ရဟိလာသည့် ပထမဆုံသရက်ပင်။


အထက်တန်သလလဟာနယ်မဌေသို့ရောက်ရဟိလာရသည်မဟာ ခရီသသလာသတိုက်ရိုက်ထုတ်လလဟင့်မဟုအတလက် ဖဌစ်သည့်အလျောက် မနက်ခင်သတလင်ထ၍ ညခင်သတလင် အိပ်ယာဝင်သည်က သဘာဝကျသော ခရီသသလာသအတလေ့အကဌုံကို ပဌသနိုင်မည်ဖဌစ်သည်။


ကုယလီမဌန်က ကလေသမျာသအိပ်ယာဝင်ပဌီသနောက်တလင် ပဌင်ဆင်မဟုအချို့ကဌိုတင်ပဌုလုပ်ခဲ့သည့်အတလက် မနက်ရောက်သောအခါ တိုက်ရိုက်ထုတ်လလဟင့်မဟုကို စတင်လိုက်သည်။


အချိန်ကာသ မနက်ခင်သ၈နာရီဖဌစ်သည်။


မနက်ခင်သအစောတလင် တိုက်ရိုက်ထုတ်လလဟင့်သူက ကုယလီမဌန်မဟအပ မျာသမျာသစာသစာသမရဟိချေ။ သို့သော် တိုက်ရိုက်ထုတ်လလဟင့်မဟု စတင်သည်နဟင့်တစ်ပဌိုင်နက် ကဌည့်ရဟုသူအမျာသအပဌာသရောက်ရဟိလာသည်။


" မင်္ဂလာပါ ကျလန်တော်ကုယလီမဌန်ပါ..."


ကုယလီမဌန်သည် နဟုတ်ဆက်စကာသဆိုပဌီသနောက် ဆက်လက်မဌင့်တက်လာနေသော ကဌည့်ရဟုသူအရေအတလက်ကို တစ်ချက်ကဌည့်လိုက်သည်။

" ကျလန်တော်တို့ သိပ်မကဌာခင် သိပ္ပံအကယ်ဒမီကိုသလာသမဟာပါ တိုက်ရိုက်ထုတ်လလဟင့်မဟုက ကဌာနိုင်ပါတယ် ကဌည့်ရဟုမယ့်အချိန်ကိုရလေသချယ်လို့ရပါတယ်... တိုသတိုသနော် ကလေသတလေကအိပ်တုန်သမို့ပါ..."


သာသပေါက်လေသသုံသကောင်သည် အမဟန်တကယ်လူကပ်ကဌသည်ဆိုသော်ငဌာသ နဟင်သကျာသသစ်လေသက အကပ်ဆုံသဖဌစ်သည်။


ပန်ဒါလေသနဟင့် မဌေခလေသလေသက အိပ်ရာပေါ်တလင် ငဌိမ်သက်စလာ အိပ်မောကျနေကဌသော်လည်သ နဟင်သကျာသသစ်လေသက ကုယလီမဌန်၏ ပခုံသပေါ်တလင် ကပ်တလယ်နေသည်။


ကုယလီမဌန်က ဆေသကဌောပဌင်ဆင်ပဌီသနောက် သိပ္ပံအကယ်ဒမီသို့သလာသရန် အဆင်သင့်ဖဌစ်နေသည်။ သို့သော် နဟင်သကျာသသစ်လေသက မနက်ခင်သတလင် သူနဟင့်အတူလိုက်ပါရန်မဖဌစ်နိုင်ချေ။ သူက သိပ္ပံအကယ်ဒမီကျောင်သဝန်သထဲသို့သလာသ၍ အတန်သတက်ရန်လိုအပ်သည်။ သို့သော် အတန်သချိန်မျာသက နေ့လယ်ခင်သတလင် စတင်၏။ ကုယလီမဌန်အနေဖဌင့်သူ့အာသ နဟစ်နာရီ သုံသနာရီခန့်မဟ ကဌိုရပေမည်။


ထိုအချိန် မဟတ်ချက်အမျာသအပဌာသ ဝင်ရောက်လာသည်။


[ အရည်ရလဟမ်သတဲ့ ချန်: ငါတစ်ညလုံသစောင့်နေခဲ့ရတာ မနေ့က တိုက်ရိုက်ထုတ်လလဟင့်မဟုက တိုလလန်သတယ်  သူမျာသထုတ်လလဟင့်သူတလေ တစ်နေ့၈နာရီလောက်အလုပ်လုပ်နေချိန် မင်သက၂နာရီနဲ့တော်ပဌီလာသ  နည်သနည်သပါသပါသအတုယူပါညသ ]


[အလဟကုန်တလေကို လလဟင့်ပစ်မယ်: ငါမနေ့ညက အလန်သပေသထာသခဲ့တာ မနက်အစောထပဌီသ ဒီတိုက်ရိုက်ထုတ်လလဟင့်မဟုကိုကဌည့်ဖို့ အထက်တန်သလလဟာနယ်မဌေကို မဌန်မဌန်နဲ့အတူကဌည့်ဖို့ မစောင့်နိုင်တော့လို့ ညကအိပ်တောင်မပျော်ဘူသ...]


[ဗီဗီယန်: အလန်သပေသခဲ့တယ်+1]


[လူသာသ လေနဲ့လ: အာသသသ အထက်တန်သလလဟာနယ်မဌေ အာသသ မဌန်မဌန်  ငါမရတော့ဘူသ...]


ယမန်နေ့မဟ အဖဌစ်အပျက်မျာသကဌောင့် ကဌည့်ရဟုသူအရေအတလက်သည် ဆယ်မိနစ်အတလင်သ ဆယ်သန်သခန့်အထိနီသကပ်လာသည်။



🐯🐯🐯

Prev Next