Chapter 61

🐯Chapter 61

ကြယ်တာရာမြို့တော်၏ အထက်တန်းလွှာနယ်မြေက လူလတ်တန်းစားနှင့် သာမန်လူတန်းစားနယ်မြေများကဲ့သို့ လူဦးရေ သိပ်သည်းမှုမရှိသော်လည်း ၎င်း၏နည်းပညာနှင့် စီးပွားရေးက နယ်မြေနှစ်ခုတို့ထက် အဆပေါင်းများစွာ ပိုမို တိုးတက်နေသည်။ တံခါးနောက်မှ စောင့်ဆိုင်းရသည့် အခန်းက ပြင်ပကမ္ဘာနှင့် သီးခြားခွဲထားသည့် သီးသန့် နေရာဖြစ်သည်။ စောင့်ဆိုင်းခန်းမှလူများ ထွက်ခွာ သွားပြီးနောက် နေရာလွတ်က အလိုအလျောက် ပုံစံပြန်ပြောင်းသည်။

ထိုနေရာက ကျယ်ဝန်းလှပေ။ ပြတင်းပေါက်အပြင် ဘက်တွင် အထက်တန်းလွှာနယ်မြေ၏ နှင်းထူထပ်သော မြင်ကွင်းကို လှမ်းမြင်နေရသည်။ အခန်းထဲတွင် မှန်ကန်သောအပူချိန်ဖြင့် သန့်ရှင်းပြီး ပျော့ပျောင်းသော အိပ်ရာလေးတစ်ခုရှိသည်။ ရိုးရှင်းသည့် မီးဖိုချောင်လေးတစ်ခုပင် ရှိနေသည်။ ကုယွီမြန်က ကလေးများ အနားယူရန် စီစဉ်ပြီး တိုက်ရိုက်ထုတ်လွှင့်ရန်အတွက် ပြင်ဆင်လိုက်သည်။

ယခင်က လူကြိုက်များမှုများ စုဆောင်းမိခြင်း နှင့် သိပ္ပံအကယ်ဒမီ၏ လူသိရှင်ကြားထွက်ပေါ်လာခြင်း တို့ကြောင့် သူ၏ကျော်ကြားမှုမှာ အမြင့်ဆုံးသို့ရောက်ရှိခဲ့သည်။

မိနစ်အနည်းငယ်အတွင်း ကြည့်ရှုသူဦးရေ တစ်သန်း ကျော်သွားခဲ့သည်။

[အဖြူရောင် သစ်တော်ပန်းပွင့် လီ လီ : ဝှက်သယ်ဖတ်… အထက်တန်းလွှာနယ်မြေတဲ့… ငါ နှစ်ပေါင်းများစွာ အသက်ရှင်ခဲ့တာတောင် အထက်တန်းလွှာနယ်မြေကို တစ်ကြိမ်မှ မရောက်ဖူးဘူး ငါစိတ်ကူးတောင် မယဉ်နိုင်ဘူး… အဲ့မှာ သူဌေးတွေ ချမ်းသာတဲ့သူတွေ အများကြီးရှိလား… တော်ဝင်မိသားစုကော နန်းတော်ရော ရှိလား…]

[ဗီဗီယန် : အားးး မြန်မြန် နောက်ဆုံးတော့ တိုက်ရိုက် ထုတ်လွှင့်နေပြီပဲ… စာကြွင်း : ငါ အရင်က အထက်တန်းလွှာနယ်မြေကို အလုပ်ကိစ္စနဲ့ သွားဖူးတယ် အဲဒီက အငွေ့အသက်က တကယ်ကို လေးနက်ပြီး သိက္ခာရှိတယ်… ဧကရာဇ်က ဒေါသထွက်တတ်လို့လည်း ဖြစ်နိုင်တယ်… ဧကရာဇ်ရဲ့ မွေးနေ့တောင် နီးပြီမလား…]

[ဆိုဒါ နံပါတ်၁ စက်ရုပ်: အပေါ်က ညီမတွေက အရူးတွေပဲ ဒါက ဂြိုဟ်သစ်တစ်ခုလည်း မဟုတ်ဘူးလေ အဲဒါကို ဧကရာဇ်အကြောင်း တိုက်ရိုက်ပြောတာကောင်းပါ့မလား… ]

[afhvuix- အထက်တန်းလွှာနယ်မြေမှာ ချောမွေ့တဲ့ ခရီး ဖြစ်ပါစေလို့ တင်ဆက်သူကို ဆုတောင်းပေးတယ်…] 

[မိုင်းတွင်းထဲမှာ မိသားစုတစ်ခုရှိတယ်: ဒီနေ့ ငါ တို့ ဘာစားကြမလဲ… အမွေးဖြီးပေးတာကို ငါ ပိုကြိုက်တယ် တစ် ချိန်လုံး အဲ့ဒါပဲ လုပ်ချင်တယ်… မကြာသေးခင်က မြန်မြန်ရဲ့ အမွေးဖြီးပေးတာကို ခံခဲ့ရတဲ့ ခံစားချက်ကို မေ့ထားလို့ ကို မရဘူး…]

ကုယွီမြန်က များပြားလှသော မှတ်ချက်များထဲမှ စကားလုံးအနည်းငယ်ကိုသာ ဖမ်းဆုပ်နိုင်ခဲ့သည်။

သူက ဤတစ်ကြိမ်တွင် အထက်တန်းလွှာနယ်မြေသို့ဝင်ရောက်နိုင်ခဲ့ပြီး သိပ္ပံ အကယ်ဒမီမှ အထူးခွင့်ပြုထားသောကြောင့် ဧည့်သည်ဝင်ခွင့်လက်မှတ်ကို ရရှိခဲ့သည်။ သူ တစ်ပတ်သာ နေနိုင်ပြီး ထိုသို့ ခွင့်ပြုမိန့်ရသည်မှာ အလွန်ရှားသည်။ သူက မလာမီအိမ်စာများလုပ်ခဲ့၍( ဒီနေရာအကြောင်း လေ့လာထားလို့) ဧကရာဇ်က သာမန်လူတန်းစားနယ်မြေတွင် ရှိနေဆဲဖြစ်ကြောင်း သူသိထားသည်။ ထိုသူ မကြာမီ ပြန်လာမည်ဟု သူ မထင်ထားမိပေ။

ထို့အတူ ထိုသူ၏ မွေးနေ့အကြောင်းကိုလည်း သူ မကြားမိပေ။

တစ်ဖက်တွင် နှင်းကျားသစ်လေးက ဖန်သားပြင်ကို စိုက်ကြည့်နေတယ်။

ကောလဟာလတွေ လွှင့်နေတဲ့ လူမိုက်ကောင်က ဘယ်သူလဲ…

ဘယ်သူက ဒေါသကြီးလို့လဲ…

"ထွမ်ထွမ် ဘာလို့ ဒေါသထွက်ရနေပြန်တာလဲ…" 

ကုယွီမြန်သည် ကလေးဆိုးလေးကို တစ်ချက်ကြည့်လိုက်ပြီး အမွေးဖြီးပေးရန် နှင်းကျားသစ်လေးကို ပုခုံးပေါ်မှ အမြန် ချလိုက်သည်။ နှင်းကျားသစ်လေးက အစပိုင်းတွင် မ ပျော်ရွှင်သော်လည်း မကြာမီတွင် သူ့အမြီးလေးက ပျော့သွားကာ ကုယွီမြန်၏ ရင်ခွင်ထဲတွင် ပျင်းရိစွာ အိပ်နေပြီး သူ့မေးစေ့လေးကို မြှောက်ထားလိုက်သည်။

စက္ကန့်အနည်းငယ်အတွင်း သူက ဒေါသကြီးသည်ဟု ပြောခံရသော 'တစ်စုံတစ်ယောက်' ကို ချော့နိုင် ခဲ့သည်။

ပန်ဒါဝက်ဝံလေး၏ လက်ဖဝါးတစ်ဖက်က သူ့ပုလင်းကို ဖိထားပြီး၊ အခြားလက်ဖဝါးတစ်ဖက်ကို ကုယွီမြန်၏ လက်ဖဝါးထဲသို့ ထည့်ပြီး နှစ်ကြိမ် ညည်းတွားလိုက်သည်။

" အီ အီ…"

"တောင်းပန်ပါတယ်… ဒီနေ့ရဲ့ တိုက်ရိုက်ထုတ်လွှင့်မှုက တိုနိုင်ပါတယ်…" 

ကုယွီမြန် ထန်ယွမ်လေး၏ ပျော့ပျောင်းသော လက်ဖဝါးလေးကို ဆွဲကိုင်လိုက်ပြီး လျင်မြန်စွာများပြားလာနေသော ပရိသတ်ကိုကြည့်ကာ မနေနိုင်တော့ဘဲ မျက်လုံးများကို အောက်ငုံ့လိုက်သည်။

"ခရီးက အလျင်စလိုဖြစ်သွားတယ် ကျွန်တော် အခုမှ လိုက်နာရမဲ့ စည်းကမ်းချက်တွေ ပို့ပေးတာကို စောင့်နေတာပါ… ထွမ်ထွမ်နဲ့ ယွမ်ယွမ် အတွက်လား… သူတို့ကို စားစရာ လုပ်ပေးပြီး အနားယူခိုင်ရဦးမယ် စကားအများကြီး မပြောတော့ဘူးနော် စလိုက်ကြရအောင်…"

ကုယွီမြန်က ကဲပ်ရေညှိ နှင့် ဝက်နံရိုးများကို ဟင်းချိုချက်ရန် ဆုံးဖြတ်ခဲ့သည်။ တစ်ဝက်ကို သောက်ရန်နှင့် တစ်ဝက်ကို ဖက်ထုပ်လေးများလုပ်ရန်အတွက်သုံးရန် ဆုံးဖြတ်ခဲ့သည်။ 

ကြယ်တာရာခေတ်တွင် ဟင်းချက်ကျွမ်းကျင်သူ အများအပြား မရှိသော်လည်း အထက်တန်းလွှာနယ်မြေတွင် ချမ်းသာပြီး သြဇာကြီးမားသော ကုန်သည်များနှင့် ပြည့်နေသည်။ ခရီးသွားသောအခါ အစေခံများနှင့် စားဖိုမှူးအနည်းငယ် ခေါ်ဆောင်လာတတ်သည်က ပုံမှန်ပင်။

ထို့ကြောင့် အဓိကအားဖြင့် ထိုလူများအတွက် ယာယီ စောင့်ဆိုင်းခန်းများတွင် မီးဖိုချောင်နှင့် အကန့်အသတ်နှင့် ပါဝင်ပစ္စည်းများရှိနေသည်။ ယနေ့ခေတ်တွင် ကဲပ် ရေညှိ နှင့် နံရိုးတုတို့ကို ရရှိနိုင်သည်။

သူက ထွေထွေထူးထူး မလုပ်တတ်သောကြောင့် သာမာန် အိမ်ချက်နည်းကသာ အဆင်ပြေလိမ့်မည်။ 

“ကဲပ်ရေညှိနဲ့ ဝက်နံရိုး ဟင်းချိုလုပ်ရတာ လွယ်တယ်… အရသာက ဆောင်းရာသီမှာ သောက်ဖို့ ပိုသင့်တော်တယ်… ဟိုဘက်မှာတော့ နွေရာသီရောက်နေပြီမလား…"

ပရိသတ်က 'အရေးမကြီးဘူး'ဟု ချက်ချင်း ပြောလာသည်။

[ ဘာရာသီလဲ မြန်မြန်က ဘယ်ရောက်နေတာလဲ… ]

[လေအေးပေးစက်ကို အနိမ့်ဆုံးအဆင့်အထိ ဖွင့်ထား ပြီးပြီ…မင်းနဲ့ အတူရှိနေလို့ရတယ်…]

[အဆင်ပြေပါတယ် ငါ သုံးဖက်မြင်ရုပ်ကြွ အနေအထားတွေကို အမြင့်ဆုံးအဆင့် သတ်မှတ်ပြီးပြီ… အခုလည်း ဆောင်းရာသီ ရောက်နေပြီ…]

ကုယွီမြန် - "..." 

အဆင်ပြေကြရဲ့လား … 

ဟင်းချိုချက်ရန် အတွက် ကဲပ်ရေညှိကို အပိုင်းပိုင်းမဖြတ်မီ စိမ်ထားရန် လိုသည်။ ကုယွီမြန်က ကဲပ်ရေညှိများကို ဦးစွာစိမ်ကာ ပေါင်းခံထားစဉ် စောင့်ဆိုင်းနေသည့်အချိန်၌ နံရိုးများကို ပြင်ဆင်လိုက်သည်။

"နံရိုးတွေကိုခုတ်ဖို့ လမ်းညွှန်ချက်တွေ ကို လိုက်နာရမယ် အရင်ဆုံး တစ်ပိုင်းဖြတ်ပြီးရင် အပိုင်း သေးသေးလေးတွေ ဖြတ်လိုက်ပါ…"

ကုယွီမြန်က နံရိုးများကို ဓားနှင့် အမြန်ခုတ်လိုက်သည်။ ဝက်နံရိုးတစ်ခုလုံးက မျက်စိတစ်မှိတ်အတွင်း စင်တီမီတာခန့်ရှည်သောအပိုင်းများ ဖြစ်သွားသည်။

 "ရေဆေးပြီးရင် အိုးထဲမှာပြုတ်ပါ… ဒါပေမယ့် ပွက်ပွက်ဆူနေတဲ့ရေထဲမှာ မပြုတ်ပါနဲ့…"

ကုယွီမြန်က သွေးစီးဆင်းမှုကို ပိုကောင်းစေပြီး ပိုနူးညံ့စေမည့်အိုးထဲသို့ နံရိုးများကို ထည့်ပြုတ်လိုက်သည်။ ပြုတ်ပြီးနောက် အသားမှ အစွန်းအထင်း(အညှီ)များကို ဖယ်ရှား ကာ နံရိုးကိုရေအေးဖြင့် ဆေးကြောလိုက်သည်။

အထူးကိရိယာဖြင့် ပေါင်းခံပြီး ရေစိမ်ထားသော ကဲပ်ရေညှိက ယခုအချိန်တွင် စတင်ကာ အမြှုပ်များထလာသည်။ ကုယွီမြန်က ကဲပ်ရေညှိကို ထုတ်ယူကာသန့်စင်ပြီး ရေနွေးအိုး တည်ကာ အသင့်အနေအထားတွင် မထားရှိမီ ကဲပ်ရေညှိများကို အရှည်လိုက် တစ်ခုပြီးတစ်ခု ဖြတ်တောက် လိုက်သည်။

"ကဲ အခု ဟင်းချက်လို့ရပြီ…"

ကုယွီမြန်၏ သွက်လက်ပြီး ကျွမ်းကျင်သော လှုပ်ရှားမှု များက ဆက်တိုက် လျှပ်တပြက် ဖြစ်နေသည်။ ပရိသတ်များက ရှင်းရှင်းလင်းလင်း နားမလည်လိုက်ကြသော်လည်း ထိုခံစားချက်ကို အလွန်နှစ်သက်ကြသည်။ ကုယွီမြန်က အခြား အစားအသောက်တင်ဆက်သူများကဲ့သို့ သူ၏လှုပ်ရှားမှု များကို ဖုံးကွယ်ထားခြင်းမရှိကြောင်း ပရိသတ်အချို့က တွေ့ရှိခဲ့သည်။ သူ၏ တိုက်ရိုက်ထုတ်လွှင့်မှုကိုကြည့်ရင်း သူတို့ တစ်ခုခုကို အမှန်တကယ် သင်ယူနိုင်သည်။

အိုးထဲသို့ ဦးစွာရေထည့်၍ ပြင်ဆင်ထားသောနံရိုးများကို အိုးထဲသို့ တစ်ခုပြီးတစ်ခုထည့်သည်။ ကုယွီမြန်က မီးဖိုချောင်ထဲတွင် ဟင်းချက်ဝိုင်ကို ရှာမတွေ့သော်လည်း ဝိုင်ပုံးထဲတွင် အဝါရောင်ဆန်ဝိုင်တစ်ပုလင်းကို တွေ့ခဲ့သည်။ ထိုဝိုင်၏ အရသာက နူးညံ့၊ ချိုမြိန်ပြီး လန်းဆန်းစေသည်။

ဝိုင်ကို သောက်သုံးရန်သာမက ဟင်းချက်ရာတွင်လည်း အသုံးပြုသည်။

"ကလေးတွေအတွက် ဟင်းရည်ဆိုရင်တောင် အပူကို ကောင်းကောင်းထိန်းပြီး မပြုတ်ရင် အငွေ့ပျံသွားလိမ့်မယ်…ဒါပေမယ့် တခြားပြဿနာတော့ များများစားစား မရှိပါဘူး…"

ကုယွီမြန်က အိပ်ပျော်နေသော နှင်းကျားသစ်လေးကို ကိုင်ထားပြီး သူ့အမွေးများကို ပွတ်ပေးနေစဉ် ပန်ဒါပေါက်ကလေးက တစ်ဖက်တွင် ရိုးရိုးရှင်းရှင်းနှင့် အပြစ်ကင်းစင်သော အသံနှစ်ခုကို ပြုလုပ်လိုက်သည်။

ပရိသတ်များက ပန်ဒါလေး၏ အမြင်နှင့် လိုက်ကြည့်နေကြသည်။ ကုယွီမြန်က ရှေးကမ္ဘာမြေတောင်ဘက်ရှိ ကောက်ညှင်းဆန်ဖြင့်ပြုလုပ်ထားသည့် အဝါရောင်ဆန်ဝိုင်ကို ရှူရှိုက်လိုက်သည် ။ သူ မနေနိုင်တော့ဘဲ ဖန်ခွက်သေးသေးလေးထဲသို့ ဝိုင်ကိုလောင်းချပြီး မြည်းစမ်းကြည့်သည်ကို ပန်ဒါလေး မမြင်စေရန် သူ့မျက်လုံးအား ဖုံးအုပ်ထားလိုက်သည်။

[မိုင်းတွင်းထဲမှာ မိသားစုတစ်စု ရှိတယ်: ဟာဟား၊ မြန်မြန်သောက်လိုက်တယ်လို့ ငါ သတင်းပို့ပါတယ်… သူက ထန်ယွမ်ရဲ့ မျက်လုံးလေးကိုဖုံးပြီး တိတ်တိတ်လေး သောက်လိုက်တာ ဟုတ်တယ်မလား…]

"..." 

ကုယွီမြန်က အားကိုးရာမဲ့စွာပြုံးလိုက်သည်။

 "တောင်းပန်ပါတယ် ကျွန်တော့်ဆီကနေ မလေ့လာပါနဲ့… ကျွန်တော်က လောဘကြီးတယ်…"

ဖန်သားပြင်ပေါ်ရှိ မှတ်ချက်များက ကြီးမားသော ဧရိယာကို ဖြတ်ကျော်သွားသည်။ 

[အားးး ငါတော့သေပါပြီ…]

[အဲဒီ ပါးချိုင့်နဲ့ သူ့မျက်လုံးက… အရမ်း ညစ်ညမ်းတာပဲ အားးးး…]

[မသေပါနဲ့… မင်းမသေခင် သွေးသွင်းတဲ့အိတ်ကို ငါရှာပေးလိုက်မယ်…]

သို့သော်လည်း အဝါရောင်ဆန်ဝိုင်က သူ့ပါးစပ်ထဲတွင် အရသာတစ်ခုကျန်စေခဲ့သည်။ ထိုဝိုင်ကို သောက်ပြီးနောက် နွေးထွေးသော ခံစားချက်ကို ချန်ထားခဲ့ကာ ဆောင်းတွင်း ခရီးရှည်ကြီး အပြီးတွင် ချိုမြိန်သွားစေသည်။ နှင်းကျားသစ်လေးက သူ့ကို ပျင်းရိစွာ စိုက်ကြည့်ရင်း ရုတ်တရက်ဆိုသလိုပင် ကုယွီမြန်၏နှုတ်ခမ်းရှိ ဝိုင်စက် အပိုင်းအစလေးကိုလျက်ကာ မြည်းကြည့်လိုက် သည်။ ကုယွီမြန်က သူ့ကို ဆူပူကြိမ်းမောင်းပြီး အကူအညီမဲ့စွာဖြင့် သူ့နားရွက်များကို ပွတ်နေသည်။

ဝိုင်က အမှန်တကယ် ချိုမြိန်သည်။ နှင်းကျားသစ်လေးက ကျေနပ်စွာ ခေါင်းညိတ်လိုက်ပြီး သူ့နားရွက်ဖျားလေးများ အနည်းငယ် ပူလာသည်။

ယခုအချိန်တွင် ကြည့်ရှုသူဦးရေ ၁၀ သန်းကျော်သွား ပြီဖြစ်သည်။ နာရီဝက်ကြာပြီးသည်နှင့် သူ၏ထုတ်လွှင့်မှုက လူနေဧရိယာရှိ အချိန်နှင့်တစ်ပြေးညီ လူကြိုက်များသည့် ထိပ်တန်းနေရာ (၃) ခုသို့ ချက်ချင်းရောက်သွားသည်။

မှတ်ချက်ရေးသည့် စခရင်အတွင်းနှင့် အပြင်ဘက်လေထုက အလွန်အေးချမ်းပြီး နွေးထွေးကာ စည်းချက်ကို ကုယွီမြန်က ခိုင်မြဲစွာ ဆုပ်ကိုင်ထားသည်။ သူ့ လက်ဖဝါးများကို ညင်သာစွာ ပိတ်ကာ ပရိသတ်၏အာရုံကို ဆွဲခေါ်လိုက်သည်။

"ကဲ ဟင်းချိုချက်ပြီး အနားယူကြမယ်… မြန်မြန်လေး လုပ်ကြရအောင်…"

ကုယွီမြန်က ဝက်နံရိုးစွပ်ပြုတ်ကို တိုက်ရိုက် မချက်ဘဲ တစ်ဝက်ကျက်သည်အထိ ဆီသတ်ထားသည့်ဂျင်းကို ဝိုင် ထဲတွင် ရောမွှေကာ တစ်ဝက်ခန့် ချက်လိုက်သောကြောင့် နောက်ဆက်တွဲအနေနှင့် ဟင်းချိုမှာ နို့နံ့မွှေးကာ ဖြူနေ ပသည်။

ထို့နောက် အိုးထဲသို့ ရေနှင့် နံရိုးများထည့်ပြီးနောက်၊ ကုယွီမြန်က ဆန်ဝိုင်ကို သင့်တော်သော ပမာဏထည့်ပြီး အိုးထဲသို့ရေထည့်ကာ လှီးထားသော ကြက်သွန်မြိတ်များနှင့် ဂျင်းများကိုထည့်ပြီး မီးပြင်းပြင်း ချက်လိုက်သည်။ သူက မျက်နှာပြင်ပေါ်ရှိ အညစ်အကြေးများကို ဖယ်ထုတ်ရန် ဇွန်းကို ကိုင်ထားသည်။

"ဒီဟင်းက ခဏနေရင် ဆူလာလိမ့်မယ်… ဖက်ထုပ်တွေကို အ ရင်ထုပ်ရအောင်…"

ကုယွီမြန်က အရှိန်မြှင့်ကာ ကြာချိန်ကို လျှော့ချရန် ရည်ရွယ်ထားသည်။

သူက မုန့်ညက်ကို ဆုပ်နယ်ပြီး ပထမအဆင့်အနေနှင့် ပါးလွှာသော အပိုင်းလေးများဖြစ်အောင် လှိမ့်ထားလိုက်သည်။ သူက နံရိုးကိုလှီးကာ ချက်ထားသောဝိုင်နှင့် ဆားတို့ဖြင့် အညီအမျှ ရောနယ်လိုက်ပြီး ကြက်သွန်နီနှင့် ဂျင်းအရည်ကို ညှစ်ထုတ်ကာ အရသာပို၍ ရှိလာစေသည်။ ထို့နောက် ဖက်ထုပ်သေးသေးလေးများ ဖြစ်လာစေရန် သူ့လက်ဖဝါးဖြင့် ညင်သာစွာထုတ်ကာ ပန်းကန်လုံးထဲတွင် စနစ်တကျ သိမ်သိမ်မွေ့မွေ့ စီထားလိုက်သည်။

သူက တစ်မိနစ်တွင် ဖက်ထုပ် အခု နှစ်ဆယ်လုပ်လိုက်၍ ပရိသတ်များအံ့အားသင့်သွားသည်။ 

[လော်လီပေါ့လိုပဲ - ဘုရားရေ… ငါ ဖျော်ဖြေပွဲ ကို ကြည့်နေတာလား…ဘယ်လောက်တောင် မြန်တဲ့ အရှိန်ကြီးလဲ…]

ပန်ဒါလေးက သူ့လက်ချောင်းများကိုစုပ်၍ ဂရုတစိုက်ကြည့်နေပြီး ပုလင်းကို ဂရုတစိုက်ကိုင်လျက် တစ်ကြိမ်ပြီးတစ်ကြိမ် လက်ခုပ်တီးနေသည်။ ကုယွီမြန် အလုပ်လုပ်နေသည့် မြင်ကွင်းက နှင်းကျားသစ်လေး၏ အာရုံကို ဆွဲဆောင်သွားသည်။ 

ထို့နောက် နံရိုးစွပ်ပြုတ် ကျက်ခါနီးပြီ ဖြစ်သည်။

ထိုအချိန်တွင် ကုယွီမြန်က မီးကိုလျှော့ကာ ဖြည်းညှင်းစွာ ချက်လိုက်သည်။ ထောင့်မှန်စတုဂံ ဖြစ်အောင် လှီးဖြတ်ထားသော ကဲပ်ရေညှိကိုလည်း ထည့်လိုက်သည်။ ဟင်းချို အနည်းငယ် ပျစ်လာသောအခါ မီးကိုမြှင့်ကာ ဆူအောင်တည်လိုက်သည်။ သူက ဇွန်းဖြင့် ဂျင်းအတုံးများ နှင့် ကြက်သွန်မြိတ်များကိုလည်း ကောက်ယူလိုက်သည်။

ထိုအချိန်တွင် အိုးထဲမှ ဟင်းရည်က ဆူသံထွက်လာသည်။ ကျက်သွားသည်နှင့် ဟင်းချိုက သာမန်စွပ်ပြုတ်ထက် အနည်းငယ်ပို၍ပျစ်ကာ နို့ဖြူရောင်သန်းနေသည်။ ကဲပ်ရေညှိနှင့် အရိုးစွပ်ပြုတ်၏ အရသာရှိပြီး မွှေးပျံ့သောရနံ့က အိုးအဖုံးအနားမှ လွင့်ပျံတက်လာသည်။

ကုယွီမြန် ဒုတိယအကြိမ် အိုးကိုဖွင့်လိုက်သောအခါ မွှေး ရနံ့များ ပြည့်နှက်သွားသည်။ 

ပရိသတ်- "...."

နှင်းကျားသစ်လေးက နှာခေါင်းကို လှုပ်လိုက်ပြီး ပန်ဒါလေး၏ မျက်လုံးဝိုင်းဝိုင်းများက လှည့်လာပကာ ကုယွီမြန်၏ လက်ကိုကိုင်ထားလျက် အော်ဟစ်ညည်းတွားလိုက်သည်။

ပရိသတ်နှင့် ကလေးများ၏ အတွေးများက ထပ်တူထပ်မျှပင်။

အနံ့က အရမ်းကောင်းတယ် မြည်းကြည့်ချင်တယ်…

🐯🐯🐯