MM Story Teller

Chapter 30

Viewers 5k

👾Chapter 30

တစ်ခဏအကြာ လင်းဟန်မှာ ဟယ့်ယွင်ထင်တစ်ယောက် ဆုံလည်ကုလားထိုင်မြင့်ကြီးကို screenမျက်နှာပြင်ဘေးသို့ ရွှေ့လိုက်ပြီး ဆိုဖာရှေတွင် အမြင့်ဆုံးသို့ ပြောင်း၍ လင်းဟန်အတွက် အလင်းကာပေးရန် ကြိုးစားလိုက်သည်။

သို့သော်လည်း ကုလားထိုင်တစ်ခုက အလုံးစုံ ကာပေးမထားနိုင်ခဲ့ပေ။ ထို့ကြောင့် ထပ်တွေးကြည့်လိုက်ပြီးနောက် ဟယ့်ယွင်ထင်တစ်ယောက် သူ၏ ဝတ်ရုံကို ရှာတွေ့သွားသည်။

သာမန်အားဖြင့် အရေးကြီးသော ပွဲအခမ်းအနားများတွင်သာ အသုံးပြုလေ့ရှိသည့် ဝတ်ရုံမှာ ယခုတွင် သူ့ထံမှ သာမန်ကာလျှံကာ ဖြန့်ထားခံလိုက်ရပြီး ကုလားထိုင်ပေါ်တွင် လွှားလိုက်လေရာ လင်းဟန်အတွက် တိတ်ဆိတ်မှောင်မဲနေသည့် နေရာလေး ဖြစ်သွားခဲ့သည်။

သို့သော်ငြား ကျေနပ်မှု မရနိုင်သေး။ နှစ်စက္ကန့်အကြာ အပေါ်ဝတ်အင်္ကျီကို ကြယ်သီး ဖြုတ်လိုက်ပြီး အင်္ကျီကော်လံကို ဖြေကာ အပြာနုရောင် စစ်တပ်ကုတ်အင်္ကျီအား ချွတ်လိုက်သည်။ သို့သော်ငြား လင်းဟန် မကြိုက်မည်စိုးသဖြင့် တစ်ခဏမျှ တုံ့ဆိုင်းနေပြီးမှ လင်းဟန်ထံ ကမ်းပေးလိုက်သည်။

"ဒါကို သုံးပြီး ဖုံးထားလို့ရတယ်"

Mဂလက်ဆီမှ နွေရာသီက အမြဲတမ်းလိုလို အလာနှောင်းခဲ့ပြီး ယခုတွင်လည်း မတ်လရောက်သည့်တိုင် နွေဦး၏ အေးစိမ့်စိမ့် ခံစားချက်လေးများ ရရှိနေဆဲ ဖြစ်သည်။ ထိုအခိုက် ဟယ့်ယွင်ထင်၌ ကိုယ်ပေါ်တွင် ရှပ်အင်္ကျီတစ်ထည်သာ ကျန်ရှိပြီး လင်းဟန်မှာ အဝတ်အစားများအောက်မှ ဖုံးကွယ်ထားသော ပြီးပြည့်စုံသည့် ကြွက်သားလိုင်းများကို တွေ့မြင်နေရဆဲပင်။

ထို့အပြင် သူ့လက်ထဲတွင်လည်း ဟယ့်ယွင်ထင်၏ အပေါ်ကုတ်အင်္ကျီကို ကိုင်ထားသည်။

လင်းဟန်မှာ ခက်ထန်သော မျက်နှာထားရှိပြီး အမြဲလိုလို ရက်စက်တတ်သည့် ပုံပေါက်နေသော ထိုသူက တတ်နိုင်သမျှ အားထုတ်ကာ ကိုးယိုကားယားအမူအရာနှင့် အသံမထွက်ဘဲ သူ့အား ဂရုစိုက်ပေးရန် ကြိုးစားနေကြောင်း ထင်ယောင်ထင်မှား ခံစားချက်တစ်ခု ရနေသည်။

လင်းဟန်က သူ့ကိုယ်သူ "နုနယ်သော အိုမီဂါ"တစ်ယောက်ဟု ဘယ်သောအခါမှ မသတ်မှတ်ခဲ့ဖူးပေ။ အင်ပါယာ စစ်တက္ကသိုလ်သို့ ဝင်ရောက်ခဲ့ကတည်းက တစ်ယောက်တည်းဖြစ်ခဲ့ရပြီး သင်ခန်းစာများကို စောစီးစွာ အပြီးသတ်နိုင်ခဲ့ကာ သူတစ်ယောက်တည်း ဒီဇိုင်းဆွဲ၊ သူတစ်ယောက်တည်း အလုပ်လုပ်ကာဖြင့် တစ်ယောက်တည်းသာလျှင် အမှီအခိုကင်းကင်း ရှင်သန်ခဲ့ရလေသည်။ ထို့အခိုက်၌ ထိုအတွေးရောက်လာသည်ကို သူ့ဘက်က ငြင်းဆန်လိုစိတ် မရှိကြောင်း အံ့သြတကြီး သိရှိလိုက်ရသည်။ ထိုဂရုစိုက်မှုလေးများအား သူ့ဘက်က ရုတ်တရက်ပင် မွေ့လျော်သွားခဲ့သည်ကြောင့် ဖြစ်နိုင်သည်။

သူ အသံမပြုခင် နှစ်စက္ကန့်လောက်ထိ အချိန်ယူလိုက်ရသည်။ "ကျေးဇူးပါ"

ဟယ့်ယွင်ထင်က "အင်း"ဟု ခပ်တိုးတိုး အသံပြုလိုက်ပြီးနောက် ထပ်မပြောတော့ပေ။

သူ အမှန်ပင် ပင်ပန်းနေသည်ကြောင့် ဖြစ်မည် လင်းဟန်မှာ ထိန်းထားသင့်သည်ဟု တွေးနေသော်လည်း အလွန် အိပ်ချင်စိတ် ဖြစ်နေသဖြင့် အာဟာရဖြည့်စာ စားသောက်ပြီးနောက် အိပ်ပျော်သွားလေတော့သည်။

သူ အသိစိတ်ခပ်ရေးရေး ရနေချိန်အတွင်း တစ်စုံတစ်ယောက်က ညွှန်ကြားရေးအခန်းထဲသို့ အချိန်နှင့်အမျှ ဝင်ထွက်နေသော်လည်း ဟယ့်ယွင်ထင်မှ အထူးတလှယ် အမိန့်ပေးထားသည်လား မသိပေ၊ အသံများက အတော်လေး တိုးညှင်းနေသည်။ သူ့ခန္ဓာကိုယ်ထက်တွင် သစ်မွှေးနံ့များ ဖုံးလွှမ်းနေသည့် ကုတ်အင်္ကျီဖြင့် ဖုံးလွှမ်းထားဆဲ ဖြစ်ပြီး မှော်ဆန်လှသော အိပ်ဆေးတစ်မျိုးကဲ့သို့ပင် သူ့အား ပျင်းရိငြီးငွေ့ဖွယ်ကောင်းသော အိမ်မက်များအတွင်း နှစ်နှစ်ခြိုက်ခြိုက် အိပ်ပျော်သွားစေခဲ့သည်။ အဆုံးတွင် အခြားအသံတစ်သံကြောင့် နိုးသွားလေသည်။

ဝမ်ထျန်းယောင်က အခန်းထဲသို့ ဝင်လာသောအခါ တိတ်ဆိတ်နေသော ထောင့်တစ်နေရာကို သတိမပြုမိဘဲ တံခါးကို တွန်းဖွင့်လာသည်နှင့် ဟယ့်ယွင်ထင်အား အသံကျယ်ကျယ်ဖြင့် နှုတ်ဆက်လိုက်သည်။

"မင်္ဂလာနေ့လည်ခင်းလေးပါ... ဗိုလ်ချုပ်..."

လင်းဟန် မျက်မှောင်ကြုတ်လိုက်သော်လည်း မျက်လုံးမဖွင့်လာပေ။

ဟယ့်ယွင်ထင် ဘာပြောလိုက်သည်လဲ မသိလိုက်ရဘဲ ဝမ်ထျန်းယောင်၏ အသံ တိုးသွားလေသည်။

"ကောင်းပါပြီ... ကျွန်တော် နားလည်ပါပြီ"

လင်းဟန်က သူ၏ ကိုယ်ရေးကိုယ်တာကိစ္စကြောင့် ဟယ့်ယွင်ထင်၏ အလုပ်အား မနှောင့်နှေးစေလိုသဖြင့် မျက်လုံးများကို ပွတ်ကာ ထတော့မည်အပြုတွင် ဝမ်ထျန်းယောင်က ဟယ့်ယွင်ထင်နှင့် စကားပြောဆိုနေသည်ကို ကြားလိုက်ရပြီး စကားအကြောင်းအရာမှာလည်း သူ့အကြောင်းသာ ဖြစ်နေသည်။

“မစ္စတာလင်းက အိုမီဂါတစ်ယောက်ဆိုတော့ သူ့ရဲ့ ကိုယ်ခံအားက နည်နည်း အားနည်းနေမယ်ဆိုတာ နားလည်ပေးလို့ရပါတယ်" ဝမ်ထျန်းယောင် ပြောလိုက်သည်။

သူက ဟယ့်ယွင်ထင်၏ ပြန်ဖြေသံကို မကြားရဘဲ စက္ကန့်အနည်းငယ်ကြာမှ ဝမ်ထျန်းယောင်က တစ်စုံတစ်ခုကို သေချာနေသည့်အလား အလောတကြီးလေသံဖြင့် ပြောလာခဲ့သည်ကို ကြားလိုက်ရပြန်သည်။ ဝမ်ထျန်းယောင်၏ လေသံက လင်းဟန်အား စိတ်မသက်မသာ ဖြစ်စေပြီး ထိုသူက ပြောလာခဲ့သည်။

"ဗိုလ်ချုပ်က မစ္စတာလင်းကို အရမ်းအလေးထားတာပဲ... ကျွန်တော် ကူညီပေးမယ်ဆိုရင်ရော... ကျွန်တော်က မစ္စတာလင်းနဲ့ စကားပြောနိုင်တယ်လေ"

ဤတစ်ကြိမ်၍ ဟယ့်ယွင်ထင်၏ စကားသံကို ကြားလိုက်ရသည်။ "မလိုအပ်ပါဘူး" ဟယ့်ယွင်ထင်၏ အသံက အေးစက်နေပြီး မည်သည့်ခံစားချက်ကိုမှ ရှာမတွေ့နိုင်ပေ။

"မစ္စတာလင်းနဲ့ ကျွန်တော်လည်း အတော်လေး စကားပြောဖြစ်ပါတယ်"

ဝမ်ထျန်းယောင်က ဟယ့်ယွင်ထင် ထိုသို့ပြောလာမည်ဟု ထင်မှတ်ထားပုံမရပေ။ ထို "အတော်လေး စကားပြောဖြစ်ပါတယ်"ဟူသော စကားများက ကို့ရို့ကားယားနိုင်လေရာ ဗိုလ်ချုပ်နှင့် မည်သို့မှ ဆက်စပ်ကြည့်၍မရပေ။

"ကျွန်တော်က အဲ့ဒီလိုမျိုး ပြောချင်တာ မဟုတ်ဘူးလေဗျာ"

သူက ရှက်ရွံ့မှုကို ဖုံးကွယ်ရန် နှစ်ကြိမ်မျှ ချောင်းဟန့်လိုက်ပြီးနောက် ပြောလိုက်သည်၊

"ကျွန်တော်က ကျွန်တော် ကူညီပေးနိုင်လောက်တယ်လို့ တွေးမိလို့ပါ... မစ္စတာလင်းလိုမျိုး အရမ်းကောင်းတဲ့ အိုမီဂါတစ်ယောက်ဆိုတာက အင်ပါယာတစ်ခုလုံးမှာတောင် အရမ်း ရှားပါးတယ်လေ.... ဗိုလ်ချုပ်ကို မလွဲချော်သွားစေချင်ဘူး"

"သြော်" ဟယ့်ယွင်ထင် ထိုသို့ ပြန်ဖြေလိုက်သည်ကို လင်းဟန်ကြားလိုက်ရသည်။

အကြောင်းအရင်းတစ်ချို့ကြောင့် အင်မတန်မှ အထင်အမြင်သေးမှုများ ပြည့်နေသည့် ထိုအဖြေက အခြားသော စိတ်ခံစားချက်အချို့နှင့် ရောနှောနေလေရာ သူ့ကိုပင် ရယ်ချင်ပက်ကျိ ဖြစ်သွားစေရသည်။

ထိုအချိန်တွင် ဖြစ်နေမည့် ဟယ့်ယွင်ထင်၏ မျက်နှာအမူအရာကိုလည်း သူတွေးကြည့်မိသေးသည်။

မဟုတ်သေးဘူး... အမြဲတမ်းလိုပင် အေးစက်ပြီး စိတ်မရှည်ဖြစ်နေတာမျိုးပဲနေမှာ...

ထို့ကြောင့် ဟယ့်ယွင်ထင်၏ အတွေးများက မည်သို့ ရှိနေမည်ကိုပင် လင်းဟန်တစ်ယောက် စတင်တွေးတောမိနေလေသည်။

သို့သော်လည်း မသင့်တော်သော နေရာမျိုး၌ မသင့်တော်သော အတွေးများ ရှိနေသကဲ့သို့ပင် ဟယ့်ယွင်ထင်၏ အတွေးများမှာ အမှန်ပင် လျှို့ဝှက်နက်နဲလှပေသည်။

ထိုအချင်းအရာက လင်းဟန်ထံ ဖြစ်ပေါ်လာပြီး အလှမ်းဝေးနေသည့် ဟယ့်ယွင်ထင်နှင့် စကားပြောခြင်းအစား သူတို့ ရုပ်ပိုင်းဆိုင်ရာ အထိအတွေ့များ ရှိနေချိန်တွင် ချောချောမွေ့မွေ့ "ပြောဆို"နိုင်သည်ဟု ပြောသည်က ပိုကောင်းပေမည်။

ဝမ်ထျန်းယောင်က ထိုကိစ္စအပေါ် အလွန်အရေးထားနေပုံပင်။ သို့သော်လည်း လင်းဟန်ဘက်မှ ကြည့်ပါက ထိုသူက သူ့ကိုယ်သူ ဟယ့်ယွင်ထင်နှင့် ပို၍ရင်းနှီးလာစေရန် တမင်တကာ ပြုမူနေခြင်းသာဖြစ်ပြီး ထို့နောက်တွင် လောချီဘက်၌ အတူတကွ အလုပ်လုပ်ရန်ပင် ဖြစ်ပေသည်။

သို့သော်လည်း လင်းဟန် နားမလည်နိုင်သည်မှာ လက်ရှိတွင် ပြည်သူများအကြား ဝမ်ထျန်းယောင်၏ ဂုဏ်သတင်းက ကောင်းမွန်နေပြီး မင်းသားတစ်ယောက်လည်း ဖြစ်နေသေးသည်။ လူတိုင်းက သူ၏ အနာဂတ်လမ်းကြောင်းကို ကြိုတင်သိမြင်နေကြပြီး အင်ပါယာအတွင်း မဆိုထားနှင့် ပါလီမန်သည်ပင် ထောက်ခံထားကြပုံရကာ အဆုံးတွင် အာဏာအရှိဆုံးသူမှာ ဧကရာဇ်ဖြစ်နေဆဲပင်။

အခြားစကားဖြင့်ဆိုရသော် ဝမ်ထျန်းယောင်သာ ထီးနန်းမဆက်ခံချိန်အထိ အားလုံးနှင့် ပြေလည်သူအဖြစ် ဆက်နေနေသရွေ့ ငြိမ်ချမ်းရေးသမားများ ဖြစ်စေ စစ်တပ်အုပ်စုမှ ဖြစ်စေ မည်သူကမှ သူ၏ ရွေးချယ်မှုကို ဝင်ရောက်စွက်ဖက်ကြမည် မဟုတ်ပေ။

ဒါဆိုရင် ဘာလို့ သူက မင်းသားတစ်ယောက် ဖြစ်နေရဲ့နဲ့ အုပ်စုတစ်ဖက်ကို ထက်ထက်သန်သန် ရွေးချယ်နေရသေးတာလဲ... ပြီးတော့ ဇာဂ့်တွေကို ချေမှုန်းဖို့ ရည်ရွယ်ချက်ထားနေတဲ့ စစ်တပ်အုပ်စုလေ...

ထိုအချင်းအရာကို လင်းဟန် မတွေးနိုင်ခဲ့...

ဝမ်ထျန်းယောင်က လင်းဟန်အကြောင်း ဆက်ပြောချင်နေသေးပုံရသော်လည်း ဤတစ်ကြိမ်၌ ဟယ့်ယွင်ထင်က အင်းအဲပင် မလိုက်တော့ဘဲ အသံကို အနည်းငယ်တိုးကာ စကားလမ်းကြောင်း လွှဲလိုက်သည်။

ဝမ်ထျန်းယောင်က ဟယ့်ယွင်ထင် သူ့အား ကမ်းပေးလာသည့် တစ်စုံတစ်ခုကို ကြည့်နေပုံရသည်။

တစ်ခဏအကြာ နာမည်တစ်ခုကို ဖတ်လိုက်သည်။ "ဗိုလ်ချုပ် ရွေးထားတဲ့ လူတွေထဲမှာ ဒီလူကို အမြင်ကောင်း ရှိနေတယ်"လင်းဟန်သည်လည်း လွန်ခဲ့သော နှစ်ရက်အတွင်း ထိုအမည်ကို ကြားခဲ့ဖူးသည်။ ဤအသုတ် မောင်းနှင်သူ ရွေးချယ်မှု၌ အတော်ဆုံး အယ်လ်ဖာဟု ဆိုရပေမည်။ မည်သည့် စစ်ဆေးမှုတွင်မဆို အကောင်းဆုံး လုပ်ဆောင်ခဲ့ပြီး အမှတ်နှုတ်ခံရသည့်အဖြစ်မျိုး မရှိသလောက်ပင်ဖြစ်ကာ အားလုံးက သာလွန်နေပေသည်။

စစ်ဆေးမှု ဒုတိယအကျော့က မောင်းနှင်သူ၏ ကိုယ်ခန္ဓာကြံ့ခိုင်မှုနှင့် ဟန်ချက်ထိန်းနိုင်မှုတို့ကို စစ်ဆေးရန် ဖြစ်သည်။ ယခုအချိန်တွင် လူနေထိုင်သော ဂြိုလ်များစွာက မြေဆွဲအားရှိကြသည် သို့သော်လည်း စကြဝဠာအတွင်း အချိန်အတော်ကြာ ဖြစ်ခဲ့သော စစ်ပွဲများကို ထပ်ပေါင်းလိုက်ပါက မသေချာနိုင်သော တိုက်စစ်များအကြား မြေဆွဲအား မရှိသည့် အခြေအနေကို ကျော်လွှားနိုင်ပြီး ဆွဲအားမရှိသည့် ပတ်ဝန်းကျင်များ၌ သေသပ်တည်ငြိမ်စွာ စီမံခန့်ခွဲနိုင်ရန်မှာလည်း မောင်းနှင်သူတိုင်းအတွက် မရှိမဖြစ် လိုအပ်ချက်ပါပင်။

ယနေ့ လေ့ကျင့်မှုက ရက်စက်လွန်းလှသော အခြေအနေ မပေးသည့် ပတ်ဝန်းကျင်နှင့် နေအဖွဲ့အစည်းမှ ရောက်ရှိလာသည့် မြင့်မားလှသော ရောင်ခြည်များ၊ မြေဆွဲအားမရှိသည့် အခြေအနေတို့ကို လှုံ့ဆော်ပေးခဲ့သည်။

တပ်သားသစ်များက ဤလှုံ့ဆော်ပေးသော အလုံပိတ်အခန်းငယ်များအတွင်း သူတို့၏ လေ့ကျင့်ရေးကို ဆက်လက်လုပ်ဆောင်ရန် လိုအပ်ကာ လေ့ကျင့်ရေး လိုအပ်ချက်များအရ များစွာသော စစ်ဆင်ရေးအဆင့်များစွာကို ပြီးမြောက်အောင်မြင်ရမည်ပင်။

ဝမ်ထျန်းယောင်က ခွဲထွက်နေသော မျက်နှာပြင်ထက်မှ ပုံရိပ်များကို ကြည့်ရှုနေပြီး လူများစွာက ဤပုံရိပ်ယောင် ပတ်ဝန်းကျင်တွင် ကြံ့ကြံ့ခံရန် အစွမ်းကုန် ကြိုးစားနေကြသည်။ အချို့က ဒူးထောက်နေကာ အချို့က ယိမ်းထိုးနေကြပြီး အချို့ကမူ အခန်း၏ လက်ရန်းနေရာများပေါ်၌ လဲလျောင်း၍ စတင်အော့အန်နေကြလေသည်။ အချို့ကမူ အသက်ရှုရခက်ခဲ၍ နှုတ်ခမ်းများ ပြာနှမ်းနေသည်။

အဆင်သင့်ဖြစ်နေသော အရေးပေါ်ဆေးအဖွဲ့က အခန်းများကို ဖွင့်၍ သူတို့အား သယ်ထုတ်သွားရန် တာဝန်ယူလိုက်ကြသည်။

ပုံရိပ်ယောင် အခန်းငယ်လေးထဲ၌ လူအချို့ကသာ အခြေခံအဆင့် တည်ငြိမ်မှုကို ထိန်းသိမ်းနေကြဆဲ ဖြစ်ပြီး စစ်ဆေးမှုအောင်ရန် မသက်မသာ ဖြစ်မှုများအားလုံးကို တောင့်ခံနေကြလေ၏။

ဝမ်ထျန်းယောင်က အကြီးအကျယ် စိတ်ဝင်စားနေဟန်ဖြင့် အလင်းမျက်နှာပြင်ထဲမှ တစ်ခုကို တိုးကြည့်လိုက်သည်။ "သူက တော်တော်လေး တော်တာပဲ"

သူကြည့်နေသော အလင်းမျက်နှာပြင်မှာ အတိအကျပင် ယခင်က သူ ပြောခဲ့ဖူးသည့် ချီကျားမူ ဖြစ်နေသည်။

ထိုသူက အယ်ဖာငယ်လေး တစ်ယောက်ဖြစ်ပြီး ခန္ဓာကိုယ်အချိုးအစားနှင့် မျက်နှာအသွင်အပြင် နှစ်ခုလုံးက မျက်စိဖမ်းစားဖွယ် ဖြစ်ကာ ယခုလက်ရှိ ပုံရိပ်ယောင်အခန်းငယ်လေး၌ ရှိနေသည့်တိုင် ထိုသူ၏ မျက်နှာအမူအရာက အလွန် တည်ငြိမ်နေဆဲ ဖြစ်သည်။

ထိုသူက ဆွဲအား မရှိသော အခြေအနေနှင့် ဟန်ချက်မညီသော ဖိအားများအောက်တွင် ရံဖန်ရံခါ လက်သီးဆုပ်တတ်ရုံမှလွဲ၍ အခြားသော တုံ့ပြန်မှုများ မရှိပေ။

ချီကျားမူ၏ မျက်လုံးများက ခိုင်မာနေပြီး ခန္ဓာကိုယ်၏ လှုပ်ရှားမှုများက တည်ငြိမ်နေကာ နှဖူးထက်၌ ချွေးအေးများ တွဲလွဲခိုနေသော်ငြား ပုံရိပ်ယောင်အခန်း၏ အမျိုးမျိုးသော ညွှန်ကြားချက်များအား တစ်ခုပြီးတစ်ခု ကျော်လွှားသွားနိုင်ခဲ့သည်။

“ဒုတိယအကျော့စစ်ဆေးမှုမှာလည်း သူ့အမှတ်တွေက အမြင့်ဆုံးပဲ" ဝမ်ထျန်းယောင် ပြောလိုက်သည်။

"သူ အဆုံးထိ သည်းခံနိုင်ခဲ့ရင် ဗိုလ်ချုပ်ရဲ့ လက်ရွေးစင်အဖွဲ့ထဲ ရောက်သွားမှာ"

လင်းဟန်မှာ ဝမ်ထျန်းယောင်တစ်ယောက် ဟယ့်ယွင်ထင်အား သူနားမထောင်နိုင်သည့် တစ်စုံတစ်ခု ပြောလာမည်ဟု ထင်မှတ်ထားခဲ့သော်လည်း ဤနေရာသို့ ကြည့်ရှုရန်သာ လာခြင်း ဖြစ်နေပုံပင်။ တစ်ခုခုအား ရည်ညွှန်းသည့် စကားလုံးများမပါဘဲ အသံအနေအထားကလည်း တည်ငြိမ် ရည်မွန်နေကာ အင်ပါယာမှ လူများ ပြောကြသည့်အတိုင်း ဘက်လိုက်နေခြင်းမရှိဘဲ နားဝင်ပီယံချိုနေဆဲပင်။

လင်းဟန်ကသာ ဒီနေ့ တစ်ဖက်လူရဲ့ အတွေးတွေကို မကြားခဲ့ရရင်ပေါ့...

ဟယ့်ယွင်ထင်ကလည်း အလင်းမျက်နှာပြင်ထက်မှ ချီကျားမူ၏ လှုပ်ရှားမှုတိုင်းကို သေသေချာချာ ကြည့်ရှုနေပြီး ဝမ်ထျန်းယောင်အား ပြန်မဖြေပေ။

ဝမ်ထျန်းယောင်ကလည်း သူ၏ မတုန်မလှုပ်ပုံစံအား ကျင့်သားရနေပုံပေါ်ပြီး ဂရုစိုက်နေခြင်း မရှိပေ။ "ဒါပေမယ့် ကျွန်တော် ကြားတာတော့ ဗိုလ်ချုပ်က ဒါ့ထက်တောင် ပိုတော်ခဲ့သေးတယ်တဲ့"

ဟယ့်ယွင်ထင် အနည်းငယ် မျက်မှောင်ကြုတ်လိုက်သော်ငြား မျက်လုံးကမူ တည်ငြိမ်နေဆဲပင်။

ဝမ်ထျန်းယောင်က ခပ်နှေးနှေး ထပ်ပြောလာပြန်သေးသည်။ "ဒါကြောင့် မစ္စတာလင်း ဗိုလ်ချုပ်အပေါ် သဘောကျမိသွားတာ ပုံမှန်ပါပဲ"

လင်းဟန်မှာ ဝမ်ထျန်းယောင်၏ လျင်မြန်စွာ စကားလမ်းကြောင်း လွှဲနိုင်မှုကြီးကြောင့် ရုတ်တရက်ဆိုသလို စိတ်ရှုပ်ထွေးသွားရလေသည်။

ဝမ်ထျန်းယောင်ကို လစ်လျူရှုထားသည့် ဟယ့်ယွင်ထင်က ဤတစ်ကြိမ်တွင်မူ စကားပြောလာသည်။

"မဟုတ်ဘူး" ဟယ့်ယွင်ထင်၏ အသံအနေအထားက ခပ်နိမ့်နိမ့်ဖြစ်ကာ စိတ်ခံစားမှုကင်းမဲ့သည့် အရိပ်အယောင်လည်း ပါနေသည်။ သူက တစ်ခုခုအပေါ် ထိုင်ချမိထားသည့်အလား ဝမ်ထျန်းယောင်၏ စကားလုံးများကို ချေပလိုက်သည်။

"မစ္စတာလင်းက ကျွန်တော့်အပေါ် ဒီလိုခံစားချက်တွေ မရှိဘူး"

လင်းဟန် ထိုစကားကို ကြားလိုက်ရချိန်တွင် တစ်ခဏမျှ အေးခဲသွားသည်။

ဟယ့်ယွင်ထင်က ခိုင်ခိုင်မာမာဖြင့် အလျင်အမြန် ငြင်းဆိုလာသဖြင့် လင်းဟန်မှာလည်း လက်ရှိတွင် မည်သည့် စိတ်အခြေအနေ ရောက်နေရမည်ကိုပင် မတွေးမိတော့ပေ။ သူ့တစ်ကိုယ်လုံး တောင့်တင်းသွားပြီး ကွေးထားသော လက်များအား လှုပ်လိုက်မိသည်။ သူက ခပ်ဖွဖွ လှုပ်ခဲ့ခြင်းသာ ဖြစ်သော်လည်း ဟယ့်ယွင်ထင်၏ ကုတ်အင်္ကျီထက်မှ ပန်းဖွားများကို မတော်တဆ ထိလိုက်မိသဖြင့် အသံသေးသေးလေး ထွက်သွားရသည်။

ဝမ်ထျန်းယောင်က ယင်းကို ကြားမိပုံမရဘဲ ဟယ့်ယွင်ထင်အား စကားပြောရန်သာ ကြိုးစားနေသည်။

"မက်ခါထိန်းသိမ်းခန်းထဲမှာ မစ္စတာလင်းနဲ့ စကားပြောဖြစ်သေးတယ်... သူ ပြောတာက..."

"ခဏ" ဟယ့်ယွင်ထင်မှာ လင်းဟန်၏ လှုပ်ရှားမှုများကို ကြားလိုက်မိသည့်အလား စကားပြောနေဆဲဖြစ်သည့် ဝမ်ထျန်းယောင်အား နှောက်ယှက်လိုက်သည်။

သူ မသေချာပါသော်လည်း မည်သည့်နည်းနှင့်မဆို ရပ်ရပေမည်။

ထို့နောက်တွင် လင်းဟန်တစ်ယောက် သူ့ဘက်သို့ လျှောက်လာနေသည့် ဟယ့်ယွင်ထင်၏ ခြေသံများကို ကြားလိုက်ရသည်။ လင်းဟန်မှာ အတန်ငယ် တွေဝေနေမိပြီး ထရပ်ရမည်လား မျက်လုံးမှိတ်ကာ အိပ်ချင်ယောင်ဆောင်နေရမည်လားပင် မသိတော့ပါပေ။

သူထလိုက်လျှင်လည်း ဟယ့်ယွင်ထင်အား အရှက်ရသွားစေမည် ဖြစ်ကာ ဝမ်ထျန်းယောင်သည်လည်း မည်သို့သော စကားများ ပြောလာမည်နည်း...

လင်းဟန်မှာ ရှင်းရှင်းလင်းလင်း တွေးတောနိုင်စွမ်း မရှိတော့ပါသော်လည်း ဟယ့်ယွင်ထင်၏ ခြေလှမ်းများက နီးကပ်လာချေပြီ။ သူ့ထံတွင် များများစားစား တွေးတောချိန်မရသော်ငြား မျက်လုံးများကို မှိတ်ကာ အသက်ရှုသံများကို တည်ငြိမ်သွားစေလိုက်သည်။

သို့သော်ငြား ယခုလေးတင် သတိလက်လွတ် ပြုလုပ်ခဲ့သည့် လှုပ်ရှားမှုများကြောင့် လင်းဟန်မှာ စိတ်လှုပ်ရှားမိနေပြီး ဆိုဖာကလည်း နေရာသိပ်မကျယ်သဖြင့် လက်မထိန်းနိုင်တော့ဘဲ ဟယ့်ယွင်ထင်၏ အပေါ်ဝတ်အင်္ကျီအား အောက်ပြုတ်ကျသွားစေခဲ့မိသည်။

👾

Prev Next