Chapter 45

🐯Chapter 45

သဘာဝကျသည့်ထောက်ခံချက်(အစစ်အမှန်ထောက်ခံချက်) နှင့် ထောက်ခံချက်အတုတို့၏ နှစ်ဆပံ့ပိုးမှုကြောင့်သာမက သူ၏ကိုယ်ပိုင်အစွမ်းသတ္တိနှင့်အတူ ကုယွီမြန်၏တိုက်ရိုက်ထုတ်လွှင့်ခန်းက ညနေပိုင်းတွင် လာရောက်ကြည့်ရှုသူဦးရေများလာသဖြင့် ရေပန်းစားမှုလည်း တိုးမြင့်လာခဲ့သည်။ ယခုအချိန်တွင် ပရိသတ် လေးသန်းအထိ ရောက်ရှိသွားပြီဖြစ်သည်။ 

လွန်ခဲ့သည့် နာရီဝက်ကထက် လေးဆပင် ပိုနေသည်။ 

သကြားခဲ သကြားခဲနှင့် သူမ၏နောက်ကွယ်မှအဖွဲ့သားများက ကုယွီမြန်၏ အွန်လိုင်းပရိသတ်အများစုမှာ အလွန်တက်ကြွကာ မှတ်ချက်ရေးသည့် ဖန်သားပြင်ပေါ်သို့ မက်ဆေ့ချ်များ ပေးပို့ခြင်းနှင့် လက်ဆောင်များ ပေးပို့ခြင်းကဲ့သို့သော အပြန်အလှန်တုံ့ပြန်မှုများ ရှိသည်ကို တွေ့လိုက်ရသည်။ လူလေးသန်းသာ ရှိသော်လည်း ထိုနေ့တွင်ရသည့် လက်ဆောင်စုစုပေါင်းပမာဏက ကြည့်ရှုသူသန်းပေါင်းများစွာရှိသော တင်ဆက်သူထက်ပင် ကျော်လွန်သွားခဲ့သည်။ 

လူသစ်ပြိုင်ပွဲက ကမ္ဘာတစ်ဝှမ်းက အကောင်းဆုံးတင်ဆက်သူအသစ်များကို ရှာဖွေရန် ဖြစ်ပြီး ပျမ်းမျှနှုန်းထားကလည်း မဆိုးလှပေ။ အခြားဒေသများတွင် ပရိသတ်သန်းနှင့်ချီရှိသော တင်ဆက်သူများ ရှိသော်လည်း ကုယွီမြန်၏အချက်အလက်များက အလွန်ထင်ရှားဆဲဖြစ်သည်။ 

ပန်ဒါလေးနှင့် နှင်းကျားသစ်လေးတို့နှင့်အတူ အချိုပွဲစားပြီးနောက် ကုယွီမြန်က သက်ပြင်းတစ်ချက်ချလိုက်သည်။

“အာ..."

ကုယွီမြန်က သူ့နံရိုးအောက်ရှိ နှင်းကျားသစ်လေးကို ပွေ့ချီလိုက်ပြီး ထန်ယွမ်လေးကိုလည်း ချီလိုက်သည်။ သူက ကြမ်းပြင်ပေါ် ရှိ အိပ်ရာပေါ်သို့ပြန်လှဲချလိုက်သည်။

"အရင်အနားယူကြရအောင်…"

[ကြယ်မိန်းကလေး: တင်ဆက်သူက ဒီနေ့အလုပ်ကြိုးစားခဲ့ပါတယ်... သူက အရမ်းအရသာရှိတဲ့ အစားအသောက်တွေ ၊ပါဝင်ပစ္စည်းတွေနဲ့ ကြိုးစားခဲ့ရတယ်…မင်း အဲ့ဒါတွေကို စောစောကြိုတင်ပြင်ဆင်ထားတာလား…]

[မိုင်းတွင်းထဲမှာ မိသားစုတစ်စုရှိတယ်- မြန်မြန်က တကယ်ကို ဆွဲဆောင်မှုရှိတယ်… သူပျော်နေရင် တိုက်ရိုက် ထုတ်လွှင့်မှုကို ကြည့်ရတဲ့ ငါလည်း ပျော်တယ်… တိုက်ရိုက်ထုတ်လွှင့်မှုနှုန်းက နှေးလေလေ၊ တင်ဆက်သူအတွက် ကြိုတင်ပြင်ဆင်မှုနဲ့ သင်ခန်းစာအမျိုးမျိုးအတွက်ပိုပြီးစမ်းသပ်ချက်များလေလေပဲ…မင်းအတွက် မီးပန်းတွေပို့လိုက်မယ်…]

[1551- မြန်မြန် စောစောအနားယူဖို့ လိုအပ်တယ်ဆိုတာကို ငါ လက်ခံဖို့ ခက်ခဲနေတယ် ငါ တကယ်ဆက်ကြည့်ချင်သေးတယ်QAQ - ကျေးဇူးပြုပြီး ဘာမှမလုပ်ပြဘဲ ဒီအတိုင်းလေးပဲ တိုက်ရိုက်ထုတ်လွှင့်ပေးနေလဲ အဆင်ပြေပါတယ်… ဒီစတူဒီယိုရဲ့ အငွေအသက်နဲ့ မြန်မြန်ရဲ့ ခံစားချက်က အရမ်းကို သက်တောင့်သက်သာဖြစ်စေတယ်…တိုက်ရိုက်ထုတ်လွှင့်တာကို မပိတ်လိုက်ပါနဲ့…] 

နေပူစာလှုံခန်းကို ကုယွီမြန်မှ အလှဆင်ထား၍ မူလ ရိုးရိုးပုံစံနှင့် မတူတော့ပေ။ အချောကိုင်ထားသည့် သစ်သားကြမ်းပြင်ပေါ်တွင် နွေးထွေးသော အိပ်ယာခင်းများစွာကို ခင်းထားပြီး ကာတွန်းကူရှင်များနှင့် ခေါင်းအုံးအမျိုးမျိုးတို့ကလည်း စည်းစနစ်တကျ သူ့နေရာနှင့်သူ ရှိနေကြသည်။ ညမီးလုံးငယ်များစွာကို ကြမ်းပြင်ပေါ်တွင် တိုက်ရိုက်ချထားသည်။ နေပူစာလှုံခန်း၏ ထောင့်သုံးဘက်တွင် ဖောက်ထွင်းမြင်ရပြီး လရောင်နှင့် ရောနှောနေသော မီးရောင်များက ကြမ်းပြင်ပေါ်တွင် ဖြာဆင်းနေကြသည်။ 

တစ်နေကုန် အိပ်ယာကို နေပူလှန်းထားပြီးနောက် ထိုအိပ်ယာများမှာ နေရောင်မှ နွေးထွေးသော ခံစားချက်ကို ပေးစွမ်းနိုင်သည်။ သူ လှဲအိပ်လိုက်သည်နှင့် ပျော့ပျောင်းသော စောင်ထဲသို့ ရောက်သွားသည် ။ ဤရင်းနှီးနေသောရနံ့က ကုယွီမြန်ကို သက်တောင့်သက်သာဖြစ်စေသည်။ 

အထူးသဖြင့် သူက သူ့ရင်ခွင်ထဲတွင် ပျော့ပျောင်းပြီး နူးညံ့သည့် ချစ်စဖွယ်ကလေးများကို ပွေ့ဖက်ထားသည်။ နှင်းကျားသစ်လေးက သူ့လက်ဖဝါးလေးကို ကုယွီမြန်၏ ပခုံးပေါ်တွင် ဖိထားကာ မျက်စိကိုတစ်ဝက်ခန့်မှိတ်ထားပြီး သူ့ပခုံးကိုမှီကာ မှိန်းနေသည်။ သူ၏ ရှည်လျားသော အမြီးက ကုယွီမြန်၏ နားရွက်များကို တရင်းတနှီး ပွတ်တိုက်သွားသည်။ ပန်ဒါလေးက ကုယွီမြန်၏ လက်နှစ်ဖက်ကို မှီကာ သူ့လက်ဖဝါးလေးက ကုယွီမြန်၏ ညာလက်ကို ဖြည်းညှင်းစွာ ကိုင်ထားသည်။

နောက်လုပ်ရမည့် လုပ်ငန်းစဉ်ကိုစဉ်းစားရန် ကုယွီမြန် အချိန်အတော်ကြာအောင် ယူလိုက်ရသည်။- 

"စကားမစပ် ငါတို့ခြေ၊လက်တွေ အရင် ဆေးကြောကြရအောင်… ထွမ်ထွမ်၊ယွမ်ယွမ် ဘယ်သူအရင်ဆေးချင်လဲ…"

နှင်းကျားသစ်ငယ်လေးက ပျင်းရိစွာ မှိန်းနေဆဲဖြစ်ပြီး ကုယွီမြန်၏လက်တွင် တွယ်ကပ်နေခဲ့သည်။ ပန်ဒါလေးက ဝမ်းသာအားရနှင့် ပြန်ဖြေလာသည်။ ကုယွီမြန်က အိမ်ရှိ စက်ရုပ်ငယ်လေးအား ရေနွေးပူပူနှင့် သစ်သားပုံးငယ်တစ်ခု ယူလာကာ ပျော့ပျောင်းခြောက်သွေ့သော မျက်နှာသုတ်ပုဝါကို ဘေးဘက်တွင်ထားပေးရန် တောင်းဆိုခဲ့သည်။ 

သူက ပုဝါကိုခေါက်ပြီး ရေထဲသို့ထည့်လိုက်ပြီးမှ ထုတ်၍ ညင်သာစွာ ရေညှစ်လိုက်သည်။ သူ့ခြေထောက်များကို တင်ပလ္လင်ခွေထိုင်လိုက်ပြီး ပန်ဒါလေးအား သူ့ရင်ခွင်ထဲတွင် ဒူးထောင်ကာထိုင်ခိုင်းလိုက်သည်။ ထို့နောက် လက်တစ်ဖက်က ပန်ဒါလေး၏ လက်ဖဝါးလေးကို ကိုင်ကာ အခြားတစ်ဖက်နှင့် နွေးထွေးစိုစွတ်သော မျက်နှာသုတ်ပုဝါလေးကိုကိုင်ပြီး ဆေးကြောသုတ်သင်ပေးလိုက်သည်။ 

ပန်ဒါလေး၏ လက်ဖဝါးလေးများက နူးညံ့ပြီး ပျော့ပြောင်းနေသည်။ ပဝါကို ပြန်ယူလိုက်သောအခါ ဖုန်မှုန့်အနည်းငယ် စွန်းထင်းနေသည်။ ကုယွီမြန်က ပုဝါကို ကိုင်လိုက်ပြီး သူ့လက်ဖဝါးများကို ညင်သာစွာသုတ်ရင်း ခြေသည်းလေးများပေါ်ရှိ အမွေးလေးများနှင့် ဖုန်မှုန့်များကို သုတ်လိုက်သည်။ သူက စိတ်ရှည်၊ပေါ့ပါးကာ ဖြေးညှင်းပြီး လုံးဝ စိတ်မရှည် မဖြစ်ပေ။ 

သုံးဖက်မြင်ကိရိယာမှတစ်ဆင့် ကြည့်ရှုသူ ဆယ်သန်းနီးပါးက ယခုအခါတွင် ပန်ဒါလေးနှင့်အတူ အာရုံခံစားမှုအားလုံးကို မျှဝေခဲ့သည်။ 

လူစားထိုးခြင်ဟူသည့် ခံစားချက်က အလွန်ထိရှလွယ်လွန်းလှသည်။

လရောင်က နေပူစာလှုံခန်းအတွင်းတွင် ဖောက်ထွင်းမြင်ရသော ဖန်သားပြင်မှ တောက်ပနေပြီး နူးညံ့နွေးထွေးသောမွေ့ရာက အနံ့မွှေးမွှေးလေးထွက်နေသည်။ ရေနွေးနွေးလေးက နူးညံ့ပျော့ပျောင်းပြီး အငွေ့ဖြူဖြူလေးများပင် ထွက်နေသည်။ လူငယ်လေး၏ လက်နွေးနွေးလေးက သူ့လက်သည်းကို မြဲမြံစွာ ဆုပ်ကိုင်ထားသည်။ ကျန်လက်တစ်ဖက်က ပုဝါကို ကိုင်ထားပြီး သူ့လက်ချောင်းလေးများနှင့်လက်ဖဝါးလေးကို ညင်သာစွာ သုတ်ပေးနေသည်။ သန့်ရှင်းသိမ်မွေ့သည့် အသက်ရှုသံလေးက သူ့လက်မောင်းများကို ရစ်ပတ်နေသည်။

"အိပ်ချင်နေတာလား…" 

ကုယွီမြန်က ပန်ဒါလေး၏ နားရွက်ကို ထိလိုက်ပြီး တိုးတိုးလေးပြောလိုက်သောကြောင့် သူ့အသံက နူးညံ့လှသည်။ သူ့လက်ထဲတွင် နှင်းကျားသစ်ငယ်ကိုလည်း ပွေ့ဖက်ထားပြီး သူ့ဆံပင်များက ရှေ့သို့ကျလာသည်။ နှင်းကျားသစ်လေးက သူ့ခေါင်းကိုလှိမ့်လိုက်ပြီး သူ့နားကို ကုယွီမြန်၏လက်ဖဝါးအနီးသို့ တိုးလိုက်သည်။ ကုယွီမြန်လည်း ကလေးနှစ်ယောက်ကို ပွေ့ဖက်ထားရင်း မနေနိုင်တော့ဘဲ သူ့မျက်လုံးများ မှေးစင်းလာသည်။

"မင်းအိပ်ငိုက်နေရင် အိပ်လိုက်တော့လေ… ခဏနေ ငါမင်းရဲ့ခြေသည်းတွေကို သုတ်ပေးမယ်… မင်းကို အနွေးစောင်လေး ယူပေးမယ်… ဒါမှမဟုတ် အိပ်မပျော်ရင် ငါ့မိသားစုရဲ့ယွမ်ယွမ်လေးနဲ့ ထွမ်ထွမ်လေးကို ပုံပြင်နည်းနည်းပြောပြမယ်… ပဲနို့က ပူနေသေးတယ်… သောက်ချင်ရင် ဒါမှမဟုတ် တခြားတစ်ခုခုစားချင်ရင်  ပြောနော်…" 

လရောင်က နူးညံ့ပြီး လေပြေလေးကလည်း နူးညံ့နေသည်။ 

လူကိုးသန်းကျော် ထိတ်လန့်တုန်လှုပ်သွားကြသည်။ ဤအငွေ့အသက်၊ ဤမြင်ကွင်း၊ ဤစကားစုတို့က နောက်ဆုံးသော ကာကွယ်မှုတို့ကို ဖွင့်လိုက်သလိုပင်။ ပင်ပန်းနွမ်းနယ်မှု အားလုံးကို ညင်ညင်သာသာ ဖယ်ထုတ်ပြီး ပြီးပြည့်စုံသည့် အတည်ပြုချက်တစ်ခုကို သူ့တို့ နှလုံးသားထဲသို့ ထည့်ပေးလိုက်နိုင်သကဲ့သို့ပင်။ တစ်ယောက်ယောက်သာ အိပ်ချင်နေပါက ခဏလောက် အိပ်ယာပေါ်မှာ လှဲနေနိုင်သည်။ တစ်ယောက်ယောက်က သာ လှိမ့်နေချင်ပါက၊တစ်ယောက်ယောက်ကသာ အချိုပွဲအဖြစ် ပဲနို့သောက်ချင်နေပါက၊ တစ်ယောက်ယောက်ကသာ သူ့အပေါ် ချစ်စရာကောင်းစွာပြုမှုချင်နေပါက ……သူက အရာအားလုံးကို သည်းခံပြီး ခြွင်းချက်မရှိ ပံ့ပိုးပေးသွားမည်ပင်။

သုံဖက်မြင် အခြေအနေတွင်၊ သူတို့အားလုံးက သူတို့အား ပွေ့ဖက်ခံရခြင်း၊ ဂရုစိုက်ခံရခြင်း၊ ကျေကျေနပ်နပ်နှင့် ချစ်ခြင်းတို့ကိုပင် ခံစားနိုင်သည်။ ဤသည်မှာ တစ်ယောက်တည်း အလုပ်လုပ်၍ ဖိအားကြီးစွာခံနေရသော အလုပ်သမားတိရစ္ဆာန်အများစု၏ ကျဆုံးခန်းပင်ဖြစ်သည်။ 

သောကြာနေ့ ည ၈နာရီတွင်…

တိုက်ရိုက်ထုတ်လွှင့်မှုကို ကြည့်ရှုသည့် အဓိကအုပ်စုမှာ တစ်ပတ်လုံး အလုပ်ရှုပ်နေသည့် ကျောင်းသားများနှင့် ရုံးဝန်ထမ်းများသာဖြစ်သည်။ 

တစ်စုံတစ်ယောက်၏ ဖိနှိပ်ခံရခြင်း၊ မိသားစုနှင့် ဘဝ၏ ဖိအားများကြောင့် နှိပ်စက်ခံရခြင်း၊ ခရက်ဒစ်ကတ်ဘေလ်များနှင့် ငှားရမ်းခများ မတတ်နိုင်ခြင်း…

ဘယ်သူကရော ကလေးတစ်ယောက်အဖြစ် ပြုစုပျိုးထောင်ပေးတာ မခံချင်မှာလဲ…

မဖြစ်နိုင်လျှင်ပင် သူတို့ ခိုကိုးရာမဲ့ ဖြစ်နေချိန်တွင် ခိုနားရန် ဆိပ်ကမ်းနေရာကို လိုချင်ကြသည်။ သူတို့၏ မကျေနပ်ချက်များကို နားထောင်ပေးမည့်၊ ရိုးရှင်းသော်လည်း အရသာရှိသည့် အစားအစာများကို ပြုလုပ်ပေးမည့်၊ ပဲနို့ပူပူတစ်ခွက် ကမ်းပေးမည့်၊ အချိုပွဲလေးများ ကျွေးပြီး ပင်ပန်းနွမ်းနယ်နေသည့် သူတို့လက်များကို ပဝါပူလေးဖြင့်သုတ်ကာ သန့်ရှင်းပေးမည့် တစ်စုံတစ်ယောက်ကို လိုချင်မိသည်။

မြင်ကွင်းတစ်ခုလုံး တိတ်ဆိတ်နေသည်။ 

စက္ကန့်အနည်းငယ် ကြာသည်အထိ။ 

အတိုင်းအတာတစ်ခုအထိ စုစည်းထားသော စိတ်ခံစားမှုများကြောင့် မှတ်ချက်ရေးသည့် ဖန်သားပြင်ပေါ်ရှိ ကွန်မန့် အရေအတွက်များနှင့် တုံ့ဆိုင်းနေသည့် ကြည့်သူအရေအတွက်များပါ ဆတိုးနှုန်းဖြင့် တိုးမြင့်လာသည်။

[မဒမ် : ဘယ်သူလဲ ခဏလေး… မရပ်နဲ့ ငါ… ငါ ဒီလူကို ခိုးယူဖို့ ရွှယ်ထွမ်လေးနဲ့ ထန်ယွမ်လေး တို့ရဲ့အိမ်ကို သွားလိုက်မယ်… အားးး အားး အားးး ငါ ဒီ ယောက်ျားကိုလည်း ယူလိုက်မယ်…]

 [ဗီဗီယန်: အာား… နောက်ထပ် အရူးတစ်ယောက်ပဲ…အရူးဆိုတာ ငါ့ဟာငါ ပြောတာပါ ၊ ဒီလိုလူသားမျိုး ဘယ်လိုလုပ် ရှိနိုင်ရတာလဲ… လူသားတွေကို မျိုးသုဉ်းလုနီးပါးမျိုးစိတ်အဖြစ် မကြာသေးခင်က သတ်မှတ်ခဲ့တယ်လို့ ပြောကြတယ်… ငါတို့ သူကို မွေးစားလို့ရလား… ငါ့ကို ကုယွီမြန်ကို ပေးပါ… ငါသူ့ကိုမွေးစားချင်တယ်…] 

[ ရေသင်္ဘော : ငါ ပိတ်မိနေတာ ဆယ်နှစ်လောက်ရှိပြီ… တကယ့်ကို အံ့ဩစရာပဲ အံ့ဩစရာကောင်းတယ်… ငါ မီးသဂြိုလ်စက်ထဲရောက်နေတယ်လို့ ထပ်ခါထပ်ခါ ခံစားခဲ့ရတယ်… တင်ဆက်သူရဲ့မိသားစုက သားပေါက်ကလေးတွေ နည်းနေသေးတယ်နော်… ငါက အသက် 57 နှစ်အရွယ် Golden retriever (ရွှေရောင်အမွေးနှင့်ခွေးမျိုးစိတ်)လေးပါ…အလုပ်လုပ်ဖို့ အဆင်သင့်ဖြစ်နေပါပြီ…]

[အိမ်မက်တွေရဲ့ဇာတ်သိမ်းတစ်ခု:  ကျေးဇူးတင်ပါတယ် တင်ဆက်သူကု… သိပ်မကြာသေးခင်က မင်းရဲ့ တိုက်ရိုက်ထုတ်လွှင့်မှုကို ကြည့်ခဲ့တယ်… အရက်ကြောင့် ငါ့မှာ အိပ်မပျော်တာ၊ အိပ်မက်ဆိုးမက်တာနဲ့ စိတ်ပိုင်းဆိုင်ရာပြဿနာတွေ အဖြစ်များခဲ့တယ်… ဒါက ငါ့ခင်ပွန်းက သူ့ပိုက်ဆံနဲ့ ဝယ်ပေးတဲ့လက်ဆောင်ပါ…မင်းအတွက် မီးရှူးမီးပန်းငါးပွင့်ပေးမယ်…]

[ကြောင်လေးရဲ့အော်သံ : ဘယ်လောက်တောင် သနားစရာကောင်းတဲ့ အန်တီလဲ…ငါ မီးရှူးမီးပန်းငါးပွင့် ထပ်ထည့်ပေးမယ်… မြန်မြန်ရဲ့ တိုက်ရိုက်ထုတ်လွှင့်မှုကို ငါအရမ်းကြိုက်တယ်…] 

မရေမတွက်နိုင်သော လက်ဆောင်ပုံရိပ်များ တစ်ခုပြီးတစ်ခု ပေါက်ကွဲသွားသည်။ 

မျက်စိတစ်မှိတ်အတွင်းမှာပင် ကြည့်ရှုသူဦးရေ ဆယ်သန်းကျော်နီးပါးရှိလာပြီး ကုယွီမြန်၏ တိုက်ရိုက်ထုတ်လွှင့်မှု တင်သည့် နှင်းဆီဆာဗာတွင် သူ၏တိုက်ရိုက်စတူဒီယိုက အချိန်နှင့်တစ်ပြေးညီ ရေပန်းစားမှုစာရင်းတွင် ဒုတိယနေရာသို့ တက်လာခဲ့သည်။ ယခုတစ်ကြိမ်တွင် ၎င်းကပင်မစာမျက်နှာရှိ အချိန်နှင့်တစ်ပြေးညီ လူကြိုက်များမှု အကြံပြုချက် အနေအထားသို့ တိုက်ရိုက်ရောက်သွားပြီး ကြည့်ရှုသူအသစ် အများအပြားလည်း ဝင်ရောက်လာကြသည်။ 

တင်း တောင်…

များမကြာမီတွင်၊ ကုယွီမြန်၏တိုက်ရိုက်ထုတ်လွှင့်စတူဒီယိုက ကြယ်တာရာကောင်းကင် ပလပ်ဖောင်းပေါ်တွင် တစ်ဖန်ပြန်လည်ရောက်ရှိခဲ့ပြီး ထိုနေ့တွင် လူကြိုက်များမှုစာရင်း၏ ထိပ်တန်းဆယ်နေရာထဲတွင် အဆင့်သတ်မှတ်ခံခဲ့ရသည်။ ပထမအကြိမ်ကို ကံကောင်းခြင်းဟု သတ်မှတ်ကာ ကွယ်ပျောက်သွားနိုင်သော်လည်း အချိန်တိုလေးအတွင်းမှာပင် သူ၏ တိုက်ရိုက်ထုတ်လွှင့်မှုစတူဒီယိုက လက်ရှိ ထိပ်တန်းတင်ဆက်သူ အများအပြား၏ ရေပန်းစားမှုကို ဒုတိယအကြိမ်အဖြစ် ချိုးဖျက်သွားခဲ့သည်။ 

ထိုအရာက ပလက်ဖောင်းကို ကြီးမားသည့် အာရုံစိုက်မှုကို ဖြစ်ပေါ်စေသည်။

-----

ဤအတောအတွင်း ကြယ်တာရာကောင်းကင် ပလပ်ဖောင်းဌာနချုပ်တွင်။ 

သကြားခဲ သကြားခဲ က နောက်ကွယ်မှ ဒေတာများကို ပြန်လည် refreshလုပ်နေခဲ့သည်။ ထပ်ခါထပ်ခါ ကြည့်လေလေ၊ သူမ အိပ်မက်မက်နေသလို ခံစားရလာလေလေဖြစ်သည်။ 

"အခု ဘာလို့များ ပြိုင်ပွဲလုပ်နေကြသေးတာလဲ…မြန်မြန်ကိုပဲ ဆုပေးလိုက်ရုံနဲ့ လူတိုင်း အိမ်ပြန်ပြီး အလုပ်သွားလုပ်လို့ရပြီလေ… မလိုတာတွေပဲ။ တကယ်ကို မလိုအပ်တော့ဘူး…" 

လူသစ်ပြိုင်ဆိုင်မှုတွင် တင်ဆက်သူ တစ်ဦးစီတိုင်းက ခွန်အားနှင့်ကံကောင်းမှုအချို့ရှိကြပြီး ပျမ်းမျှအဆင့်မှာ လည်း မနိမ့်ကျပေ။ သို့သော်လည်း သူတို့ ကုယွီမြန်နှင့် တွေ့သောအခါ၊ သူ၏ စွမ်းရည်များအားလုံးက ပစ်မှတ်ဖြစ်သည့် အမျိုးအစားသစ်၊ အပြင်အဆင်အသစ်များနှင့် တိုက်ရိုက်ထုတ်လွှင့်သည့် အကြောင်းအရာအသစ်များကိုပင် ကျော်လွန်သွားပြီး သူတို့အား ဝင်ရောက်ကြည့်ရှူသူအားလုံးနှင့် ပရိသတ်ကို လုံးဝတည်ငြိမ်အောင်ထိန်းထားနိုင်သည်ကပင် ကံကောင်းသည်ဟု ပြောရမည်ဖြစ်သည်။ 

ဘုရင်တစ်ပါးကသာ လူသစ်တန်းကို မှားဝင်ပြီး ယှဉ်ပြိုင်မိမှတော့ တခြားသူတွေ ဘယ်လိုများ ယှဉ်နိုင်ပါတော့မလဲ…

-----

အခြားတစ်ဖက်ရှိ တာ့ခ်မှ ကြယ်တာရာကောင်းကင် ပလက်ဖောင်းဌာနခွဲတွင် ။ 

ခီရီက အင်တာနက်မှ မီးရှူးမီးပန်းတစ်ခုကို မှာယူခဲ့ပြီး ရုံးခေါင်းဆောင်က ရှန်ပိန်ကို ဗီရိုထဲမှ ထုတ်ယူခဲ့သည်။ လူတိုင်းက ဖန်ခွက်ထဲသို့ ရှန်ပိန်များထည့်ကာ အားလုံး ခွက်ချင်း တိုက်လိုက်ကြသည်။ 

"အဲ့ဒါက တည်ငြိမ်နေတယ်…”

လူအတော်များများက သူတို့၏ ဝဲလာသည့် မျက်ရည်များကို သုတ်ပစ်လုနီးပါးပင်။ 

"ဒီတစ်​ခါ ​တော်​​တော်​ ငြိမ်​နေတယ်​…" 

အနိမ့်ဆုံးစျေးနှုန်းဖြင့် ဝယ်ယူနိုင်သည့် အလားအလာရှိသော စတော့ရှယ်ယာများက ဒုံးပျံကဲ့သို့ တက်သွားရုံသာမက ကန့်သတ်နံပါတ် သုံးလေးခုကိုပါ တွေ့နိုင်ပြီဖြစ်သည်။

အခုတွင်မူ အေးအေးဆေးဆေးနှင့် သူနှင့်အတူ ပျံသန်းရန်စောင့်နေကြရုံပင်။

တစ်နာရီအကြာ။

ကုယွီမြန်၏ အိမ်တွင်။ 

တိုက်ရိုက်ထုတ်လွှင့်မှု ပြီးဆုံးသွားသောအခါ အားလုံး အိပ်ငိုက်နေကြပြီဖြစ်သည်။ ကုယွီမြန်က ပရိသတ်ကို ကျေးဇူးတင်ကြောင်းပြောပြီး ကောင်းသောညပါဟုပြောကာ တိုက်ရိုက်ထုတ်လွှင့်မှုကို ပိတ်လိုက်သည်။ 

"ငါ ဒီနေ့ အရမ်းပင်ပန်းနေပြီ..." 

သူ သက်ပြင်းတစ်ချက်ချလိုက်ပြီး အိပ်ရာပေါ်တွင် လှဲချလိုက်ကာ ပန်ဒါလေးနှင့် နှင်းကျားသစ်လေးကို ပွေ့ဖက်ရင်း မကြာမီမှာပင် အိပ်ပျော်သွားသည်။ ပန်ဒါလေးကလည်း ကုယွီမြန်၏ လက်မောင်းကို သူ့ခေါင်းဝိုင်းလေးနှင့် ထိကာ ပွတ်သပ်ပြီး အိပ်ပျော်သွားသည်။

တစ်ဦးတည်းသော အိပ်မပျော်သူက နှင်းကျားသစ်လေးသာ ဖြစ်သည်။ 

သူ၏ ခဲပြာရောင်မျက်လုံးများက ပွင့်လာပြီး သူ့လက်ဖဝါးလေးကို ကုယွီမြန်၏ပါးပြင်ပေါ်တွင် ဖိထားကာ ပျင်းရိသလို ပုံစံနှင့် သူ့လူသားကို ငုံ့ကြည့်နေသည်။ တိုက်ရိုက်ထုတ်လွှင့်မှုမှ မှတ်ချက်တစ်ခုကို သူ့ တစ်ချက်သတိရသွားသည်။ 

နာရီဝက်အကြာတွင် ယူနီဖောင်းဝတ်ထားသည့် အမျိုးသားတစ်ဦးက လက်ပတ်ကွန်ပြူတာကိုကိုင်ကာ နေပူစာလှုံခန်းထဲမှ ထွက်လာပြီး စာရင်းထဲရှိ နံပါတ်တစ်ခုကို ခေါ်ဆိုလိုက်သည်။

"ဟဲလို... အရှင့်အတွက် ကျွန်တော်ဘာများလုပ်ပေးရမလဲ…"

ကီလိုမီတာ ရာနှင့်ချီဝေးသော အိမ်ကြီးတွင် ဖန်းနစ်ခ်က အသင့်အနေအထားဖြင့် ထိုင်နေသည်။ 

ကြာမြင့်စွာ ငြိမ်သက်သွားပြီးနောက် မကြာမီမှာပင် ပျင်းရိနေသည့်အသံက ခပ်နိမ့်နိမ့်ဖြင့် ပေါ်ထွက်လာသည်။

"လူသားတွေကို မွေးစားလို့ရလားဆိုတာ ရှာကြည့်လိုက်…"

🐯🐯🐯