MM Story Teller

Chapter 101

Viewers 5k

🚩Chapter -101

Arc_5 . အရံအမျိုးသမီး ဇာတ်ကောင်၏ တန်ပြန်စနစ် [ 13 ]

____

နင်းစီးစီး၏ တောင်းဆိုမှုဆို စုဝမ်ငြင်းပယ်ခဲ့သော်လည်း သူမ၏ ပုံရိပ်ယောင်အသုံးချနိုင်သည့်သတင်းက ချန်းယအခြေစိုက်စခန်းတစ်ခုလုံးတွင် ပျံ့နှံ့သွားခဲ့သည် ။ ထိုအချိန်မှစကာ သူမ၏ ပုံရိပ်ယောင်ကို တောင်းဆိုရန် စုဝမ်ရဲ့တံခါးအရှေ့၌ ရပ်စောင့်နေသူ နေ့စဥ်နဲ့အမျှ ရှိလာ၏ ။ အများစုမှာ သူတို့၏ ချစ်ခင်ရသူတွေကို စွန့်လွှတ်လိုက်ရသော သာမန်သူများဖြစ်ကြသည် ။ ဤကဲ့သို့ မျှော်လင့်ချက်မဲ့နေသော ကမ္ဘာတွင် ဆန်းကြယ်ကမ္ဘာထဲမှ အရာအားလုံးက ပုံရိပ်ယောင်မျှသာဖြစ်တာကို သိကြသော်လည်း ၎င်းကို သူတို့ အလိုရှိနေဆဲပင် ။

ပုံရိပ်ယောင်များမှာ အမြဲနှလုံးသားထဲအထိ တိုက်ရိုက်ရောက်စေ၏။ ထိုအရာက လူတို့နှလုံးသားထဲရှိ အမှောင်ဘက်ခြမ်းကိုပါ မြင်နိုင်ပြီး အနူးညံ့ဆုံးနှင့် အနွေးထွေးဆုံးအပိုင်းကိုပါ မြင်ရစေသည် ။

စုဝမ် လာသမျှလူအားလုံးကို ငြင်းဆိုခဲ့ခြင်းမဟုတ်ပေ ။ သူမက ကူညီပေးနိုင်လောက်သော လူအနည်းငယ်ကို ရွေးခဲ့ပြီး ပုံရိပ်ယောင်စွမ်းအင်ကို သုံးကာ အိပ်စက်ခြင်းထဲတွင် သူတို့၏ ဝေးကွာနေသော ဆွေမျိုးများနှင့် ပြန်တွေ့ဆုံနိုင်အောင် လုပ်ပေးခဲ့သည် ။

ဤနည်းလမ်းဖြင့် စုဝမ် နှင့် စုရွေ့၏ တည်ရှိမှုက ချန်းယအခြေစိုက်စခန်းတွင်အလွန်ကိုပုံမှန်ဖြစ်လာ၏ ။

အားလုံးက " ဖုတ်ကောင်စုံတွဲ " ဟုနောက်ကွယ်တွင် တိတ်တဆိတ်မခေါ်ဆိုကြတာ့ဘဲ ယန်ယွီပြောပြသောနာမည်အရ " မစ္စဝမ် " နှင့် " မစ္စတာစု" ဟုသာခေါ်ကြတော့သည် ။

၃လကြာ ပြန်လည်ပြင်ဆင်ပြီးနောက်တွင် ချန်းယအခြေစိုက်စခန်း၏ တံတိုင်းက ပြန်လည်ပြင်ဆင်ထားပြီး ဖြစ်သည် ။ နောက်ဆုံးတိုက်ပွဲကြောင့် ချန်းယအခြေစိုက်စခန်းမှာလည်း ပို၍ နာမည်ကြီးလာလေ၏ ။ ယခုတွင် အနီးနားရှိ ဘေးဒုက္ခသည်တို့က ချန်းယအခြေစိုက်စခန်းဆီသို့သာ ဦးတည်လာကြသည် ။

ဤအချိန်တွင် ချန်းယအခြေစိုက်စခန်း၏ အပြင်ဘက်၌ အထူးဧည့်သည်နှစ်ယောက်ကို ကြိုဆိုနေလျက်ရှိပြီး သူတို့မှာ သိပ္ပံပညာရှင်များဖြစ်ပုံရကာ ယန်ယွီ၏ စိတ်ဝိညာဥ်စွမ်းအားကို စိတ်ဝင်စားကြသောကြောင့် လုပ်အားပေးဖို့ ချန်းယအခြေစိုက်စခန်းကို ဝင်လာကြခြင်းပင် ။ သူတို့က ချန်းယအခြေစိုက်စခန်းတွင် ဓါတ်ခွဲခန်းပါ ဖွင့်လှစ်ချင်ပြီး လူသားမျိုးနွယ် ပြန်လည်နိုးထလာနိုင်သည့် အကြီးမားဆုံး အကြောင်းအရာကို ဖြန့်ဝေပေးချင်သည် ။

ဟုတ်ပေ၏ ၊ တကယ်တမ်းတွင် ထိုသိပ္ပံပညာရှင်နှစ်ယောက်မှာ ချီယိ နှင့် မော့ရင် ပင် ။

ပညာရှင်နှစ်ယောက်၏ လေးနက်သော သွင်ပြင်ကြောင့် လုချင်းက သူတို့ကို ချန်းယအခြေစိုက်စခန်းတွင် အခမ်းအနားဖြင့် ကြိုဆိုခဲ့သည် ။ အကယ်၍ သူကြိုဆိုခဲ့သော ထိုသိပ္ပံပညာရှင် နှစ်ယောက်က ချန်းယအခြေစိုက်စခန်းကို မြောက်များစွာသောဖုတ်ကောင်များတိုက်ခိုက်စေခဲ့ခြင်း၏ အဓိကတရားခံဖြစ်နေတာကိုသာ သိသွားလျှင် သူဘာလုပ်ဖို့ တွေးမိမလဲဆိုတာ မသေချာတော့ပေ ။

ဤသို့ဖြင့် ချန်းယအခြေစိုက်စခန်း၌ တင်းတင်းကြပ်ကြပ် ကာကွယ်ထားသော ဓါတ်ခွဲခန်းတစ်ခုရှိလာတော့သည် ။ ထိုဓါတ်ခွဲခန်းမှာ ' မေပယ်ရွက်ဓါတ်ခွဲခန်း' ဟု အမည်ရ၏ ။ ကနဦးပိုင်းတွင် အခြေစိုက်စခန်းရှိလူများမှာ မေပယ်ဓါတ်ခွဲခန်း၌ ဘာကို သုတေသနလုပ်နေကြမှန်း မသိကြပေ ။ စွမ်းရည်အသုံးချနိုင်သူများအဖွဲ့က ရံဖန်ရံခါ ဓါတ်ခွဲခန်းသို့ ဖုတ်ကောင်များ ဖမ်းဆီးလာတာကိုသာ တွေ့ရတတ်၏ ။

မစ္စ ဝမ် နှင့် မစ္စတာစုက ဓါတ်ခွဲခန်းသို့ မကြာခဏဝင်ထွက်နေတာကိုလည်း တွေ့ရပြီး သူတို့ ဓါတ်ခွဲခန်းကို ဝင်သွားလျှင် ပြန်ထွက်လာဖို့ အနည်းဆုံး သုံးရက်လောက်ကြာတတ်သည် ။သူတို့ထွက်သွားတိုင်း နှစ်ယောက်စလုံး၏ စိတ်ဝိညာဥ် နှင့် အခြေအနေမှာ အရမ်းမကောင်းတော့ပေ ။

ထို့ကြောင့် သိပ္ပံပညာရှင်များ၏ ဓါတ်ခွဲမှုကို သူတို့၏ ဖုတ်ကောင်ခန္ဓာကိုယ်ကို သုံးပြီး အထောက်အကူပေးနေခြင်းဟု အားလုံးကတွေးခဲ့၏ ။ သူတို့၏ စိတ်ကူးများက အလွန်မြင့်မားပြီး ကိုယ်တိုင် စွန့်လွှတ်အနစ်နာခံခြင်းဟုပင် ထင်နေကြသည် ။

ထိုသူနှစ်ယောက်မှာ တကယ်တမ်းတွင် လူသားများမဟုတ်ဘဲ ဖုတ်ကောင်များသာဖြစ်နေကြောင်းကို အားလုံးက မေ့နေပုံပင်...

ဤသို့ဖြင့် ချန်းယအခြေစိုက်စခန်းမှာ ကျယ်ပြန့်တိုးတက်လာပြီး အခြေစိုက်စခန်းထဲရှိ ပြည်သူတို့၏ ဘဝမှာ တိတ်ဆိတ် ငြိမ်းချမ်းနေ၏။၎င်းမှာ နောက်သုံးနှစ်ကြာပြီးနောက် ပြင်ပစွမ်းရည်အသုံးချသူများက ငြိမ်းချမ်းသော ချန်းယအခြေစိုက်စခန်းအပြင်ဘက်ကို များပြားသောလူများမခေါ်လာခင်အထိပင် ။

အပြင်ဘက်ရှိ ဤလူများမှာ ဖုတ်ကောင်များတိုက်ခိုက်ခံလိုက်ရသော အခြေစိုက်စခန်းငယ်တစ်ခုမှ ထွက်ပြေးလွတ်မြောက်လာသူများပင် ။ သူတို့ထဲမှ လူအနည်းစုမှာ စွမ်းရည်အသုံးချနိုင်သူများဖြစ်ပြီး အများစုမှာ စွမ်းရည်မရှိသော သာမန်သူများသာဖြစ်၏။ ဤသာမန်သူများထဲတွင် လူနည်းစုမှာ သူတို့၏ ခန္ဓာကိုယ်ပေါ်၌ ထင်ရှားသော ထိခိုက်ဒဏ်ရာများရှိကြပြီး ထိုဒဏ်ရာတို့က အသေအချာကိုပင် ဖုတ်ကောင်ကူးစက်ရောဂါကို ကူးစက်ခံထားရသူများပင် ။

ထိုသူတို့မှာ အထူးချန်းယအခြေစိုက်စခန်းကို မရောက်မချင်း မရပ်မနားပြေးလွှားလာခဲ့ကြ၏ ။

" ကျွန်တော့်နာမည်က ယွဲ့ခိုင် "

ထိုအုပ်စု၏ ခေါင်းဆောင်မှာ မိုးကြိုးသွားစွမ်းရည်အသုံးချနိုင်သူ အဆင့်လေးရှိ ယွဲ့ခိုင်အမည်ရသူပင် ။ကမ္ဘာ၏ အဆုံးသတ်တွင် အဆင့်လေးစွမ်းရည်အသုံးချသူတို့ကို တွေ့ရများလာသော်လည်း မိုးကြိုးသွားစွမ်းရည်အသုံးချသူတို့၏ တိုက်ခိုက်နိုင်သော စွမ်းရည်မှာ မြင့်မားသောကြောင့် ဌာနချုပ်တိုင်းတွင် အမြဲနာမည်ကြီးကြ၏ ။

" ခင်ဗျားတို့ဌာနမှာ ကိုယ်ပိုင်ဓါတ်ခွဲခန်းနှင့် ဖုတ်ကောင်တွေကို ထိန်းချုပ်နိုင်တဲ့သူရှိတယ်ဆိုတာ ကျွန်တော်သိတယ် ။ ဒီကို အကူအညီတောင်းဖို့ ကျွန်တော်သီးသန့်လာခဲ့တာ ။ကူးစက်ခံလိုက်ရတဲ့ ဒီလူတွေက ကျွန်တော်တို့ အဖွဲ့ရဲ့ မိသားစုဝင်တွေပဲ ။ သူတို့ဖုတ်ကောင်ဖြစ်လာမှာကို ကျွန်တော်ဒီတိုင်း လက်ပိုက်ကြည့်မနေနိုင်ဘူး ။ ကျွန်တော်တို့ကို ကူညီပေးဖို့ ခင်ဗျားတို့ကို တောင်းဆိုပါတယ် ။ ခင်ဗျားတို့သာ ကျွန်တော်တို့ကို ကူညီပေးဖို့ ဆန္ဒရှိနေသ၍ ရလဒ်က ဘယ်လိုပဲဖြစ်နေပါစေ ကျွန်တော် ယွဲ့ခိုင်နဲ့ ညီအစ်ကိုတွေက အခုချိန်ကစပြီး ချန်းယအခြေစိုက်စခန်းအတွက် မီးတောင်ကိုကျော်ပြီး ပင်လယ်ကိုဖြတ်ပေးဖို့ ဆန္ဒရှိတယ်"

ယွဲ့ခိုင်၏ တောင်းဆိုမှုက ဂိတ်စောင့်ကို အလွန်ကသိကအောက်ဖြစ်စေ၏ ။ အဘယ်ကြောင့်ဆိုသော် သူတို့၏ ခေါင်းဆောင်လုချင်းက အပြင်ဘက်တွင် တာဝန်လုပ်ဆောင်ဖို့ လူတစ်ချို့ကို ခေါ်ပြီးထွက်သွားကာ ယခုထိ ပြန်မရောက်သေးသောကြောင့်ပင် ။ ထို့နောက် လုချင်းနှင့် ရာထူးတူသော ယန်ယွီကလည်း လက်ရှိတွင် ဓါတ်ခွဲခန်းထဲ သိပ္ပံပညာရှင်နှစ်ယောက်နဲ့အတူ ဓါတ်ခွဲနေရ၏ ။

ဂိတ်ဝတွင် စုဝေးနေသော လူများ တဖြည်းဖြည်းပိုများလာသည် ။ လုချင်း နှင့် သူ၏လူများ တာဝန်မှ ပြန်မရောက်သေးခင် သူတို့အခြေစိုက်စခန်းတစ်ခုလုံး၏ ဝင်ပေါက်ကို ပိတ်ထားရ၏ ။

ယွဲ့ခိုင် နှင့် အခြားသူများက ထွက်သွားဖို့ကို ငြင်းဆိုနေပြီး မှီခိုဖို့နေရာလာရှာသောအခြားသူများကလည်း ယွဲ့ခိုင်၏ အင်အားနှင့် သူ့ဘေးတွင်ရှိနေသော ကူးစက်ခံထားရသူများကို ကြောက်ရွံ့နေကြသည် ။ နှစ်ဦးနှစ်ဖက်မှာ ဂိတ်ဝတွင် ထိုအတိုင်းရှိနေကြဆဲဖြစ်၏ ။

ကိစ္စရပ်ကို နားလည်သွားသောအခါ လီထောင်ကတွန့်ဆုတ်နေပြီးမှ နောက်ဆုံးတွင် လူများကို မြို့ထဲသို့ဝင်ကာ စုဝမ် နှင့် စုရွေ့ကို ထွက်လာဖို့ မေးခိုင်းလိုက်သည် ။ စုရွေ့အကြောင်းကို အခြားသူများက သိပ်မသိကြသော်လည်း လီထောင်ကိုတော့ အနည်းနဲ့အများက သိကြ၏။

စုရွေ့ နှင့် စုဝမ်တို့ ဂိတ်ပေါက်တွင်ပေါ်လာသောအခါ ၎င်းက ချက်ချင်း ရုတ်ရုတ်သဲသဲဖြစ်လာစေ၏ ။ ချန်းယအခြေစိုက်စခန်းတွင် စကားပြောနိုင်သော ဖုတ်ကောင်နှစ်ကောင်ရှိကြောင်း အားလုံးက ကြားဖူးနေတာ ကြာပြီဖြစ်သော်လည်း ၎င်းက အမှန်ဖြစ်နေလိမ့်မည်ဟုတော့ သူတို့မထင်ခဲ့ပေ ။

ဤပုံစံကို မြင်ပြီးသောအခါ ယွဲ့ခိုင်ချက်ချင်း စိတ်လှုပ်ရှားလာခဲ့သည်။

သေချာပေါက်ပင် တစ်လမ်းလုံး မရပ်မနားဘဲ ချန်းယအခြေစိုက်စခန်းကို ပြေးလာခြင်းက မှန်ကန်သောရွေးချယ်မှု ဖြစ်သွား၏ ။

လက်ရှိတွင် ချန်းယအခြေစိုက်စခန်းမှလွဲ၍ ဖုတ်ကောင်များကို လက်အောက်တွင်ထားကာ အတူတကွငြိမ်းငြိမ်းချမ်းချမ်းနေနိုင်သော အခြေစိုက်စခန်းမျိုးမရှိသေးပေ ။

" ဘာကိစ္စရှိလို့လဲ "

ရှားပါးသတ္တဝါတစ်ကောင်လို အကြည့်ခံရခြင်းက စုရွေ့ကို အလွန်နေမထိထိုင်မသာဖြစ်စေ၏ ။ သူဖိအားကို အနည်းငယ်တိုးကာ အေးစက်စက်ပင် မေးလိုက်သည် ။

အေးသက်သော လေသံနှင့် ဖိအားတို့က ထိုလူများ၏ နှလုံးသားကို တုန်ရီစေပြီး ပတ်ဝန်းကျင်တစ်ခုလုံး တိတ်ဆိတ်သွားစေသည်။

အဆင့် လေးရှိ စွမ်းရည်အသုံးချသူ ယွဲ့ခိုင်ပင် ဖျော့တော့စွာဖြင့် စုရွေ့ကို ကြည့်လိုက်ပြီးနောက် ကြောက်စိတ်ဝင်လာမိ၏။

သူက အရမ်းအင်အားကြီးတာပဲ ။

ပတ်ဝန်းကျင်ရှိ အခြားသူများနှင့်ယှဥ်လျှင် စုရွေ့၏ ဖိအားနှင့် မစိမ်းသက်သော လီထောင်မှာ သူ့ တည်ငြိမ်မှုကို ထိန်းထားနိုင်ဆဲပင် ။

" မစ္စတာစု ၊ ကိစ္စကဒီလိုပါ..."

ယွဲ့ခိုင်၏ ပြဿနာကို လီထောင်က စုရွေ့အားထပ်မံရှင်းပြလိုက်သည် ။ နားထောင်ပြီးသွားသည့်နောက်တွင် စုရွေ့က ခဏလောက် တိတ်ဆိတ်သွားလေ၏ ။ ထို့နောက် အားလုံးက သူ့ အဖြေကို စောင့်နေသောအချိန်တွင် စုရွေ့က ရုတ်တရက် တစ်ဖက်သို့လှည့်ကာ စုဝမ်ကို နူးညံ့စွာကြည့်၍မေးလိုက်သည် ။

" မိန်းမ ၊ မင်းရောဘယ်လိုထင်လဲ "

မြို့အပြင်ဘက်ရှိ လူအားလုံး : ' ဒါကြီးက မဟုတ်သေးဘူးနော် '

မြို့အထဲရှိ လူအားလုံး : ' ဒါကဟုတ်တယ်လေ လုံးဝကို ဒီခံစားချက်ပဲ ငါတို့မိသားစုရဲ့ မစ္စတာစုက တကယ်တမ်းကျ မိန်းမရဲ့ အလိုကျလုပ်ပေးတဲ့သူပဲ ငါတို့ မဟုတ်တာတွေပြောနေတာမဟုတ်ဘူးနော် ဟုတ်ပြီလား '

ဤအခြေအနေတွင် အားလုံး၏ အာရုံစိုက်မှုက စုဝမ်ဘက်သို့ လှည့်လာခဲ့သည် ။ စုဝမ်က တစ်လှမ်းရှေ့တိုးလိုက်ပြီး ယွဲ့ခိုင်၏ မျက်လုံးတို့ကို စိုက်ကြည့်လိုက်သည် ။ ယွဲ့ခိုင်မှာ သူ့အရှေ့မှ မြင်ကွင်းတို့က ချာချာလည်လာသလိုသာ ခံစားလိုက်ရ၏။

ခဏကြာပြီးနောက်တွင် ထိုနေရာ၌ ယွဲ့ခိုင် လေးကန်စွာရပ်နေဆဲပင် ။စုဝမ်က ဖြည်းဖြည်းချင်း ခေါင်းညိတ်လိုက်သည် ။

" သူတို့ကို လက်ခံလို့ရတယ် စွမ်းရည်အသုံးချသူတွေ အားလုံးက စနစ်တကျစီစဥ်တာကို စောင့်ပေးရမယ် ။ သူတို့ခေါ်လာတဲ့ ကူးစက်ခံရသူတွေကို ကျွန်မကို လွှဲပေးလိုက် ။ သူတို့ကို ကျွန်မ ဓါတ်ခွဲခန်းပို့ပေးလိုက်မယ် ။ "

စုဝမ်၏ အသံက လေးကန်နေသော ယွဲ့ခိုင်ကို အသိပြန်ဝင်သွားစေသည် ။ ယခုတွင် သူ့မျက်နှာမှာ ဖျော့တော့နေပြီး အေးစက်သောချွေးများ ကျလာ၏ ။

အခုလေးတင် သူ....

" ငါတို့နဲ့ အထဲကို လိုက်ခဲ့ "

ယွဲ့ခိုင်ကို တုံ့ပြန်ဖို့ အခွင့်အရေးမပေးဘဲ စုရွေ့နှင့် စုဝမ်မှာ တစ်ဖက်သို့လှည့်ကာ မြို့ထဲသို့ ဝင်သွားကြပြီ ဖြစ်၏ ။ ချန်းယအခြေစိုက်စခန်း၏ တိုးတက်မှုတစ်လျှောက်တွင် ဤလူများအပါဝင် လူများစွာက ခိုလှုံဖို့ လာရောက်ကြပြီး ထိုလူများထဲတွင် လျှို့ဝှက်သောအကြံအစည်များကို ဖုံးကွယ်ထားတာမျိုးမရှိပေ ။

ထို့ကြောင့် သူတို့ စွမ်းရည်အသုံးချသူများကို ခေါ်လာသောအခါတွင် ၊ အထူးသဖြင့် အဆင့်မြင့်စွမ်းရည်အသုံးချသူများ ကို စုဝမ်က မျက်တောင်ပင်မခတ်ဘဲ သူမ၏ ပုံရိပ်ယောင်စွမ်းရည်ဖြင့် ကြည့်ရှူစစ်ဆေးခဲ့သည်။ တစ်စုံတစ်ယောက်က သူမရဲ့ ပုံရိပ်ယောင်စမ်းသပ်မှုကို အောင်မြင်သွားတာနှင့် တစ်ပြိုင်နက် သူတို့တစ်ခါတည်း ချန်းယအခြေစိုက်စခန်း၏ အဖွဲ့ဝင် ဖြစ်လာလိမ့်မည်။

စမ်းသပ်မှုမအောင်သောသူများကတော့ စိတ်မကောင်းစွာဖြင့် ထိုစွမ်းရည်အသုံးချသူ၏ သလင်းကျောက်အမြုတေကို စုဝမ်စုပ်ယူလိုက်ဖို့သာရှိတော့သည် ။ ဖုတ်ကောင်များအတွက် ထိုအရာတို့က ကြီးမားသောအားဆေးဖြစ်၏ ။ လူ့အသက်ကို လုံးဝဂရုမစိုက်သလို သရုပ်ဆောင်ခြင်းက စုဝမ် ဖုတ်ကောင်ဖြစ်ကြောင်းကို ဖော်ပြရန် အတွက်ပင် ။ လူတွေကတော့ ယခုလိုကိစ္စမျိုးကို ဘယ်တော့မှလုပ်မှာမဟုတ်ပေ ။ အမှန်ကိုပင်၊ ဤကဲ့သို့ စိတ်ဆန္ဒရှိကြသူများဟာ ဖုတ်ကောင်များသာ ဖြစ်လေ၏ ။

ယွဲ့ခိုင်နှင့် အခြားသူများ ထွက်ခွာသွားသောအခါ မြို့ပြင်၌ နောက်တစ်ခါ ငြိမ်သက်သွားပြန်သည် ။ သုံးရက်ကြာပြီးနောက် ယွဲ့ခိုင်နှင့် သူ့လူများက အဖွဲ့သစ်တစ်ခုကို ဖွဲ့စည်းခဲ့ပြီး သူတို့၏ ကူးစက်ခံထားရသော ဆွေမျိုးများကလည်း ဓါတ်ခွဲခန်းထဲမှ ပထမဆုံးအကြိမ်ပြန်ထွက်လာကြသည် ။

ဤကူးစက်ခံထားရသူများ ထွက်လာသည့် သွင်ပြင်က အသားရောင်မှာ စိမ်းပုပ်ရောင်ပြောင်းသွားပြီး လက်သည်းနှင့် သွားများ ချွန်ထက်လာခြင်းမှ လွဲ၍ သာမန်လူများနှင့် သိပ်ကွာခြားမှုမရှိပေ ။ ထို့ထက်ပို၍ သူတို့မှာ လူတို့၏ မူလ အသိဉာဏ်နှင့် အတွေးတို့ကို ထိန်းသိမ်းနိုင်ဆဲပင်။

ချန်းယအခြေစိုက်စခန်းရှိ ' မေပယ်ရွက်ဓါတ်ခွဲခန်း ' မှာ ဖုတ်ကောင်ကူးစက်ရောဂါကို ဖိနှိပ်နိုင်မယ့် ဆေးဝါးကို ထုတ်လုပ်လိုက်နိုင်သည်။

ထိုဆေးက ကူးစက်ခံလိုက်ရသောသူများကို ထိုးပေးနိုင်ပြီး သူတို့၏ လူသားအသိကို ဆက်လက်ထိန်းထားစေနိုင်သည် ။၎င်းက ဖုတ်ကောင်ကူးစက်ရောဂါကို အပြည့်အဝမဟန့်တားနိုင်သေးသော်လည်း ဤဆေးဝါးတိုးတက်မှုက ကမ္ဘာပျက်ကပ်တွင် အောင်မြင်သောအဓိက မှတ်ကျောက်တစ်ခုပင်။

သုံးရက်ခန့်အတွင်း ဤသတင်းက တောင်ရောမြောက်ပါ အကုန်ပျံ့နှံ့သွားပုံရ၏။

နောက်ဆုံးပေါ်ဆေးဝါး ။

ဤအရာက အရသာရှိဆုံးနှင့် အဆွဲဆောင်နိုင်ဆုံး ကိတ်မုန့်တစ်လုံးလိုပင် ။ ၎င်းက အနီးနားရှိ အခြေစိုက်စခန်းတို့ကို ဂနာမငြိမ်ဖြစ်စေရုံသာမက မိုင်ထောင်ပေါင်းများစွာက အခြေစိုက်စခန်းများအထိပါ အချိန်တိုအတွင်း သတင်းပျံ့သွားစေသည် ။

_____

🚩

Prev Next