MM Story Teller

Chapter 205

Viewers 32k

🌍Chapter 205

ပုံမှန်ထက် ၅ဆပိုမိုပြင်းထန်သော ကြောက်မက်ဖွယ် မြေဆွဲအားမှာ ထန်မော့နှင့် ဖူ၀မ်သော်တို့အား ပုခုံးမှ ဖိချထားသည့်နှယ်။ ၄င်းမှာ အပေါ်မှ တောင်ကြီးတစ်လုံးဖိထားသည့်နှယ် ခံစားရစေသည်။ ထန်မော့ မြေကြီးအား လက်၂ဖက်နှင့်ပါ ထောက်ကန်ထားခဲ့ရသည်။ သူ အံကိုကြိတ်လျက် လှည့်ကြည့်လိုက်မိလေသည်။

၀င်ပေါက်တွင် ဖြူဖျော့ဖျော့အသားအရည်နှင့် ဆယ်ကျော်သက်လေးမှာ သူ့အား အေးစက်စွာကြည့်နေခဲ့သည်။ သူ၏လက်များမှာလည်း ကမ္ဘာမြေကြီးကိုထိကပ်ထားခဲ့သည်။ ထို့နောက် သူ၏လက်ဖ၀ါးအောက်မှ မြေကြီးမှာ ရွေ့လျားနေခဲ့လေသည်။

ရွမ်၀မ်ရှု...

ထန်မော့၏ အာရုံထဲတွင် ထိုနာမည်တစ်ခုရုတ်ချည်းပေါ်လာခဲ့သည်။

ချီဟန်က ထန်မော့နှင့် ဖူ၀မ်သော်၏ အခြေအနေကိုမြင်သော် လှောင်ရယ်လိုက်လေသည်။

"ဒီတစ်ခေါက် ဘယ်လိုပြေးမလဲ ကြည့်ကြသေးတာပေါ့"

သူကပြောပြီးနောက် အိတ်ထဲမှ ဓါးမြှောင်တစ်လက်ကို ဆွဲထုတ်လိုက်သည်။ သူက ထန်မော့နှင့်အခြားသူများထံမလာပဲ ထိုအစား ရွမ်၀မ်ရှုထံလျှောက်သွားခဲ့သည်။ ထို့နောက် ရွမ်၀မ်ရှူအား ဓါးနှင့် ထိုးစိုက်ချလိုက်လေသည်။ သွေးများစီးကျလာပြီး ချီဟန်က ဓါးပေါ်မှ သွေးကိုလျက်လိုက်လေသည်။

ခြံထဲတွင် ထန်မော့၊ ဖူ၀မ်သော် ၊ လျန်ယွီကျန်း အားလုံးမှာမြေဆွဲအားအောက်တွင် ဖိနှိပ်ခံထားရလေသည်။ ချီဟန်တစ်ယောက်သာလျှင် ထိုမြေဆွဲအား၏ သက်ရောက်မှုမရှိသည့်နှယ် လျှပ်စီးတစ်ခုကဲ့သို့ ထန်မော့ရှိရာသို့ နီးကပ်လာခဲ့သည်။

"နောက်ဆုံးတစ်ခေါက်ကို မေ့လိုက် ဒီတစ်ခါတော့ မင်းကို တကယ် သတ်မှာ"

မြေဆွဲအား၏ ဖိနှိပ်မှုအောက်တွင် ထန်မော့ ထိုဓါးကို ရှောင်ရှားရန် ကိုယ်ကိုလှိမ့်လိုက်ရသည်။ ချီဟန်က သူ့ထံနောက်တစ်ကြိမ်တိုက်ခိုက်လာပြန်သည်။

ချီဟန်မှာ မြေဆွဲအားဖိနှိပ်မှုကိုမခံရပဲ သူ၏အလျင်မှာလည်း အလွန်မြန်လှသည်။ သူ၏လှုပ်ရှားမှုများမှာ ပြင်းထန်ကာ အလွန်ပြတ်သားသည်။ ထန်မော့ထံ တိုက်ကွက်များက မိုးပွားများသဖွယ် အဆက်မပြတ်ကျရောက်လာခဲ့သည်။ ထန်မော့ အလွန်ခက်ခက်ခဲခဲရှောင်ကွင်းနေရပြီး ချောင်ပိတ်မိနေတော့သည်။ တဖက်တွင်တော့ လျန်ယွီကျန်းမှာ ထိုအခြေအနေကို အခွင့်ကောင်းယူလျက် ရွမ်၀မ်ရှူထံပြေးသွားလိုခဲ့သော်လည်း ဖူ၀မ်သော်က သူမကို ထိုသို့လုပ်ခွင့်မပေးခဲ့ချေ။

သူမ၏တိုက်ခိုက်နိုင်စွမ်းမှာ အံ့အားသင့်ဖွယ် ကောင်းမွန်လှသည်။ သူမနှင့်ဖူ၀မ်သော်၂ဦးစလုံးမှာ မြေဆွဲအားအောက်တွင် ဖိနှိပ်ခံထားရေသာ်လည်း လက်ရည်ညီညီတိုက်ခိုက်နေခဲ့ကြသည်။

သို့သော် လျန်ယွီကျန်းမှာ ဖူ၀မ်သော်ထက် အနည်းငယ်တော့ အားနည်းနေဆဲပင်။ ဖူ၀မ်သော်သည် ခြေထောက်ကို ဆန့်ထုတ်လျက် လျန်ယွီကျန်း၏ ကိုယ်အောက်ပိုင်းကို ကန်လိုက်သော်လည်း သူမက လက်ထောက်လျက် ရှောင်ကွင်းလိုက်သည်။ ထို့နောက် ဆက်တိုက်ဆိုသလိုပြေး၀င်လာသော ဖူ၀မ်သော်၏ လက်သီးကိုလည်း ကိုယ်ကိုစောင်း၍ ရှောင်လိုက်ရသည်၊ သူမ မမျှော်လင့်ထားသည်က ဖူ၀မ်သော်မှာ သူမကို လက်သီးဖြင့် အမှန်တကယ်ထိုးလိုစိတ်မရှိပဲ သူ၏ညာဘက်လက်မှ အနက်ရောင်ဒုချွန်လက်နက်တစ်ခုရုတ်ချည်းပေါ်လာခဲ့လေသည်။

လျန်ယွီကျန်း မျက်နှာပျက်လျက် နောက်သို့ကျွမ်းပစ်ရန်ကြိုးစားလိုက်သည်။ ထိုဒုချွန်လက်နက်မှာ သူမ၏ ပါးပြင်ကို လျှပ်ထိသွားလျက် အရိုးဖြူဖြူများကို ပေါ်လာစေခဲ့သည်။ သူမမျက်နှာတစ်ခုလုံး သွေးချင်းချင်းနီသွားတော့သည်။

ရွမ်၀မ်ရှူ၏ မျက်လုံးတို့မှာ ဖူ၀မ်သော်၏ ညာလက်ကို ကြည့်လျက် သူ၏အေးစက်စက်မျက်၀န်းများမှာ ကျဥ်းမြောင်းသွားခဲ့သည်။ သူကနှာမှုတ်လျက် မြေကြီးကို လက်ဖ၀ါးဖြင့် ပိုပြင်းထန်စွာ ဖိနှိပ်လိုက်လေသည်။ မြေဆွဲအားမှာ ရုတ်ချည်းပိုတိုးလာခဲ့သည်။ ၆ဆပိုမိုပြင်းထန်သော မြေဆွဲအားမှာ ဖူ၀မ်သော်၏ ကိုယ်ကို တောင်တစ်လုံးနှယ် ဖိနှိပ်ထားပြီး သူ၏ခြေထောက်မှာလည်း မြေကြီးထဲသို့ ၁စင်တီမီတာခန့် နစ်၀င်သွားစေခဲ့သည်။

ချီဟန်က ထန်မော့ မြေဆွဲအားကြောင့် ထပ်မံဖိနှိပ်ခံလိုက်ရသည်ကို မြင်လျှင် ကျယ်လောင်စွာရယ်လိုက်ပြီး ဓါးနှင့်အတူ နီးကပ်လာခဲ့ပြန်သည်။ သူ၏ဓါးမှာ ထန်မော့၏ လက်ကို ထိုးစိုက်ခါနီးမှာပင် ထန်မော့၏ ကိုယ်မှာ ရုတ်ချည်းဖြောင့်မတ်စွာထရပ်လာပြီး ဘယ်ဘက်ကို ရှောင်ရှားလိုက်သည်အား တွေ့လိုက်ရလေသည်။ သူ၏ဓါးမှာ ထန်မော့၏ အ၀တ်စကိုသာ ခြစ်မိသွားခဲ့သည်။

ချီဟန် အံ့အားသင့်သွားမိသော်လည်း ၄င်းမှာ မတော်တဆတိုက်ဆိုင်မှုဟုသာတွေးလျက် နောက်တစ်ကြိမ်ပြေး၀င်သွားပြန်သည်။ သို့သော် စက္ကန့်ပိုင်းအတွင်း တစ်ခုခုမှားယွင်းနေသည်ကို သူနားလည်သွားခဲ့သည်။

"ခေါင်းဆောင် သူခေါင်းဆောင်ရဲ့ စွမ်းရည်နဲ့ ဖိနှိပ်မခံရတော့ဘူး"

ရွမ်၀မ်ရှူ ထန်မော့အား လျင်မြန်စွာကြည့်လိုက်သည်။ သူသေချာမကြည့်ရသေးခင်မှာပင် လျန်ယွီကျန်း၏စကားကိုကြားလိုက်ရလေသည်။

"ဖူ၀မ်သော်ရောပဲ"

မြေဆွဲအား၏ ဖိနှိပ်မှုအောက်တွင် သူမမှာ ဖူ၀မ်သော်၏ တိုက်ခိုက်မှုများကို ရုန်းကန်ရှောင်ရှားနေရပြီး မြေကြီးပေါ်လဲကျသွားခဲ့သည်။

ဖြူဖျော့ဖျော့ ဆယ်ကျော်သက်လေး၏ မျက်နှာမှာ တုန်လှုပ်သွားခဲ့သည်။ ရွမ်၀မ်ရှု မြေကြီးပေါ်မှ သူ၏လက်ကို ခွာလိုက်လိုက်ပြီး ရှေ့သို့ပြေးသွားရန် တွန့်ဆုတ်မနေခဲ့ချေ။

ပြင်းထန်သော မြေဆွဲအားမှာ ပျောက်ကွယ်သွားချေပြီ။

ရွမ်၀မ်ရှုနှင့် လျန်ယွီကျန်းက ဖူ၀မ်သော်အား အတူတကွ တိုက်ခိုက်လိုက်ကြသည်။ ချီဟန်ကမူ ထန်မော့အား တစ်ဦးတည်းရင်ဆိုင်နေခဲ့လေသည်။ လူ၅ယောက်မှာ ခြံ၀န်းထဲတွင်တိုက်ခိုက်နေကြပြီး သတ္တုချင်းထိခတ်မိသံတို့ကလည်း အဆက်မပြတ် ထွက်ပေါ်လာနေခဲ့သည်။

ဖူ၀မ်ရှန်းသည် အစောကတည်းက ပုန်းစရာနေရာတစ်ခုရှာဖွေကာ အခြေအနေကို စောင့်ကြည့်နေခဲ့ပြီးဖြစ်သည်။

ဖူ၀မ်သော် တဖြည်းဖြည်း အသာစီးရလာခဲ့သည်။

လျန်ယွီကျန်း၏ တိုက်ရည်ခိုက်ရည်မှာ အံအားသင့်လောက်ဖွယ်ကောင်းမွန်ပါသော်လည်း သူမတွင်အမှန်တကယ် တိုက်ပွဲအတွေ့အကြုံမျိုးမရှိခဲ့ချေ။ ဖူ၀မ်သော်နှင့်ယှဥ်လျှင် အားနည်းသည်မှာ မထူးဆန်းလှ။ ရွမ်၀မ်ရှူသည်လည်း ဒဏ်ရာရထားပုံပေါ်ကာ သူ၏အလျင်မှာ ခါတိုင်းထက် နှေးကွေးနေခဲ့သည်။ သူတို့၏ မူလအကြံအစည်အရ ရွမ်၀မ်ရှုမှာ ထန်မော့နှင့် ဖူ၀မ်သော်အား မြေဆွဲအားနှင့် ဖိနှိပ်ထားမည်ဖြစ်ပြီး လျန်ယွီကျန်းနှင့် ချီဟန်က ထို၂ဦးကို ရှင်းပစ်ရမည်ဟုပင်။ သို့သော် ဤ၂ဦးမှာ မြေဆွဲအားမှ လွတ်မြောက်နိုင်စွမ်းရှိလိမ့်မည်ဟု မမျှော်လင့်ထားချေ။

ရွမ်၀မ်ရှူမှာ တိုက်ခိုက်နေရင်း ဖူ၀မ်သော်နှင့် ထန်မော့အား အေးစက်စွာကြည့်လိုက်သည်။

လွန်ခဲ့သည်၅လတုန်းက ဖူ၀မ်သော်က သူ၏ စွမ်းရည်သက်ရောက်မှုကို မပယ်ဖျက်နိုင်ခဲ့၍ ယခုလည်း ထိုသို့ဖြစ်နိုင်စရာအကြောင်းမရှိချေ။ ထန်မော့၏ စွမ်းရည်မှာလည်း ရာဘာကြိုးသာဖြစ်ကာ မြေဆွဲအားမှ လွတ်မြောက်ခြင်းနှင့် သက်ဆိုင်မှုမရှိ။ ဤ၂ယောက်အား မြေဆွဲအားမှ လွတ်မြောက်စေနိုင်သော ပစ္စည်းမှာ...

"အကူပစ္စည်းပဲ...အတူတူပဲဖြစ်မယ်...သူတို့၂ယောက်လုံးမှာရှိတဲ့ အကူပစ္စည်းကို ရှာကြ"

ရွမ်၀မ်ရှူ လျင်မြန်စွာ အမိန့်ပေးလိုက်သည်။

ချီဟန်နှင့် လျန်ယွီကျန်းမှာလည်း ထန်မော့နှင့် ဖူ၀မ်သော်အား လျင်မြန်စွာ အကဲခတ်လိုက်ကြသည်။ လျန်ယွီကျန်း ချက်ချင်းဆိုသလို ရှာတွေ့သွားခဲ့သည်။

"ဖူ၀မ်သော်ရဲ့ ဖိနပ်အောက်ခံတွေက လင်းနေတယ်"

ချီဟန်လည်း ငုံ့ကြည့်လိုက်သည်။

"ဒီကောင်လည်းအတူတူပဲ"

၄င်းမှာ သူတို့၏ ဖိနပ်များဖြစ်သည်...

ရွမ်၀မ်ရှုသည် ထန်မော့နှင့် ဖူ၀မ်သော်တို့၏ ဖိနပ်များက မြေဆွဲအားဖိနှိပ်မှုမှ ကင်းလွတ်စေသော အရာဖြစ်ကြောင်း ချက်ချင်းနားလည်သွားခဲ့သည်။ ဤပစ္စည်း၏အစွမ်းမှာ ကောင်းကင်ကိုပင် ဆန်တက်တော့မည့်နှယ်။ အနက်ရောင်မျှော်စင်၏ အကူပစ္စည်းတစ်ခုအနေနှင့် ၄င်းတွင် ကန့်သတ်ချက်တော့ရှိမှာပင်။ ဥပမာ တစ်နေ့တွင် တစ်ကြိမ်သာ အသုံးပြုနိုင်သည်မျိုးဖြစ်သည်။ ဤဖိနပ်၏ အသုံးပြုချိန်ပြည့်သွားပါက ရွမ်၀မ်ရှူ၏ စွမ်းရည်ကိုအသုံးပြု၍ ဤ၂ယောက်ကို တဖန်ဖိနှိပ်နိုင်လိမ့်မည်။ သို့သော် သူတို့ထိုကဲ့သို့ စွန့်စားမှုမျိုးကို မပြုလုပ်နိုင်ချေ။

ဖူ၀မ်သော်က အလွန်ကြောက်မက်ဖွယ်ကောင်းလွန်းသည်။ ထို့အပြင် အနက်ရောင်မျှော်စင်အား bugတစ်ခုဖြစ်အောင်လုပ်နိုင်သော ခန့်မှန်းမရသော ထန်မော့လည်း ရှိသေးသည်။

ရွမ်၀မ်ရှူ၏ ဦးနှောက်က လျင်မြန်စွာလှုပ်ရှားလျက် တွက်ဆမှုများကို ပြုလုပ်နေခဲ့သည်။ သူကအသင်းဖော်များကို ပြန်ဆုတ်ရန် မဆိုနိုင်ခင်မှာပင် ထန်မော့က ထီးကလေးကို ပိတ်လိုက်သည်အား တွေ့လိုက်ရလေသည်။ ထို့နောက် ခုန်လျက် ချီဟန်ထံ ထိုးစိုက်ချလိုက်သည်။ ရွမ်၀မ်ရှု၏ ရင်ထဲတင်းကြပ်သွားလျက် မြေကြီးကို လက်၂ဖက်ဖြင့် လျှင်မြန်စွာ ကပ်ချလိုက်သည်။

ဘန်း...

ပြင်းထန်သော မြေဆွဲအားမှ ရုတ်ချည်းဆွဲချခံလိုက်မှုကြောင့် ထန်မော့ သတိလက်လွတ် ပြုတ်ကျသွားခဲ့သည်။

ရုတ်ချည်းဖြစ်ပျက်သွားမှုကြောင့် ချီဟန်မှာလည်း မတုန့်ပြန်နိုင်လိုက်ချေ။ ရွမ်၀မ်ရှူ၏ မျက်လုံးများ ချက်ချင်းတောက်ပလာခဲ့လေသည်။ သူ၏နှုတ်ခမ်းထောင့်တို့မှာ မြင့်တက်သွားလျက် လေသံကလေးဖြင့် ရေရွတ်လိုက်သည်။

"ဆိုတော့...ဒီလိုပေါ့လေ"

ထန်မော့၏ ခြေထောက်တို့ မြေကြီးနှင့်ထိကပ်သွားချိန်တွင် ပြင်းထန်သော မြေဆွဲအားမှာ တဖန်ပျောက်ကွယ်သွားပြန်သည်။

ထန်မော့နှုတ်ခမ်းကို အသာသပ်လျက် ခေါင်းကိုမော့ကာ ထျန်းရွှမ်အဖွဲ့အစည်း၏ ခေါင်းဆောင်ဖြစ်သူကို ကြည့်လိုက်မိသည်။

ယခင်က ဖူ၀မ်သော်ပြောခဲ့ဖူးသည်မှာ ထျန်းရွှမ်းအဖွဲ့အစည်း၏ ခေါင်းဆောင်ဖြစ်သူမှာ အသက်၁၄နှစ်အရွယ် အလယ်တန်းကျောင်းသားလေးတစ်ဦးဟုပင်။ ဤ၁.၆မီတာမျှသာမြင့်သော အလယ်တန်းကျောင်းသားလေးမှာ ထန်မော့အား ဤအခိုက်အတန့်တွင် ပြင်းစွာသော စိတ်ပိုင်းဆိုင်ရာဖိအားကို ပေးနေခဲ့သည်။ အေးစက်ပြီး ရင့်ကျက်သော မျက်လုံးများက ထန်မော့၏ ရင်ကိုတင်းကြပ်သွားစေသည်။ သူသည် တဖက်လူက မိမိဖိနပ်များ၏ ကန့်သတ်ချက်ကို ရှာတွေ့သွားပြီဖြစ်ကြောင်း သိလိုက်လေသည်။

[ပစ္စည်း: မှော်ဖိနပ်]

[ပိုင်ရှင်: ထန်မော့ ဖူ၀မ်သော်]

[အသုံးပြုပုံ: ဤမှော်ဖိနပ်များကို စီးထားလျှင် မြေဆွဲအားကိုဆန့်ကျင်လျက် မျက်နှာကျက်ပေါ် ရေပြင်ပေါ် အစသဖြင့် မည်သည့် မျက်နှာပြင်တွင်မဆို လျှောက်သွားနိုင်သည်]

သံဖိနပ်ချုပ်သမားကြီး၏ ဖိနပ်များက ထန်မော့နှင့် ဖူ၀မ်သော်အား မြေဆွဲအားကို လျစ်လျူရှူခွင့်ကို ပေးလေသည်။ သူတို့သည် မည်သည့် ဆွဲအားမျိုးမှ သက်ရောက်မခံရသော်လည်း မျက်နှာပြင်တစ်ခုပေါ်တွင် ရပ်နေရန်တော့လိုအပ်လေသည်။ ကမ္ဘာမြေကြီးမှာ အပြားလိုက်ပြီးဖြစ်ပြီး ရေမျက်နှာပြင်မှာလည်း အပြားလိုက်ဖြစ်သည့်တိုင် လေထုထဲတွင်တော့ မည်သည့် မျက်နှာပြင်မှမရှိချေ။ သူတို့ခြေထောက်များ မြေပြင်နှင့် ထိမနေချိန်တွင် ရွမ်၀မ်ရှုသည် သူ၏စွမ်းရည်ကို အသုံးပြုမည်ဆိုပါက အခြေအနေမှာ ပြောင်းပြန်လှန်သွားပေတော့မည်။

ထန်မော့သည် ရန်သူ၏အမှားအပေါ် ဘယ်သောအခါမှ မျှော်လင့်ချက်မထားချေ။ သူသည် ရွမ်၀မ်ရှူက ကန့်သတ်ချက်ကို ရှာတွေ့သွားပြီဖြစ်ကြောင်း သိလိုက်သည်နှင့် ဖူ၀မ်သော်ကို ချက်ချင်းလှည့်ကြည့်လိုက်သည်။

"သွားတော့"

ရွမ်၀မ်ရှူ၏ သွေးကိုသောက်ခြင်းက ထိုလူအား မြေဆွဲအားမှ အချိန်တစ်ခုအထိ လွတ်မြောက်ခွင့်ပေးနိုင်လေသည်။ လွန်ခဲ့သော ၅လခန့်က ဖူ၀မ်သော်က ဤနည်းကို သုံး၍ ရွမ်၀မ်ရှုနှင့် ချီဟန်ကို ရင်ဆိုင်ခဲ့သည်။ ဤတစ်ကြိမ်တွင် တဖက်လူက ပြင်ဆင်ထားကာ သူတို့အား အလစ်တိုက်ခိုက်လာခဲ့သည်။ ထန်မော့မှာ စွန့်စားလိုစိတ်မရှိပဲ အရင်ဆုံးထွက်သွားရန် ဆုံးဖြတ်လိုက်သည်။ ရွမ်၀မ်ရှူကမူ ထိုသို့ဖြစ်ခွင့်မပေးနိုင်ချေ။

"သူတို့ကို လေထဲရောက်အောင်လုပ်"

ထိုအမိန့်ကိုကြားသည်နှင့် လျန်ယွီကျန်းနှင့် ချီဟန်တို့ ထန်မော့နှင့် ဖူ၀မ်သော်အားတိုက်ခိုက်ပုံ ပြောင်းလဲသွားခဲ့တော့သည်။ သူတို့က ထိုလူ၂ဦး၏ ခြေထောက်ကိုသာ ဦးတည်တိုက်ခိုက်နေပြီး လေထဲသို့ ခုန်တက်စေသည်။ ရွမ်၀မ်ရှု၏ တုန့်ပြန်မှုမှာလည်းလျင်မြန်လှသည်။ ထန်မော့၏ခြေထောက်တို့ စက္ကန့်၀က်မျှ လေပေါ်သို့ မြောက်သွားရုံဖြင့် သူ၏စွမ်းရည်သက်ရောက်မှုက ချက်ချင်းအသက်၀င်လာတတ်သည်။

ထန်မော့မြေကြီးပေါ်တဖန်လဲကျသွားပြီးနောက် ဆယ်ကျော်သက်ကောင်လေးအား အေးစက်စွာကြည့်လိုက်မိလေသည်။

၀ှစ်...

ထန်မော့ ချီဟန်ကို ချန်ရစ်လျက် ရွမ်၀မ်ရှုထံ ရုတ်ချည်းဦးတည်လိုက်လေသည်။

ရွမ်၀မ်ရှု ဘေးသို့လှည့်လျက် ထန်မော့၏ တိုက်ကွက်ကို ရှောင်ရှားလိုက်သည်။ သို့သော် ပူပြင်းသောမီးတောက်များက တဆက်တည်း သူ၏ခေါင်းကို ဦးတည်လာလိမ့်မည်ဟု မမျှော်လင့်ထားခဲ့ချေ။ ရွမ်၀မ်ရှူ၏ မျက်လုံးတို့ ပြူးကျယ်သွားလျက် အလျင်အမြန်ရှောင်ရန် ကြိုးစားလိုက်ရသည်။ သူ၏ဆံပင်တချို့မှာ မီးတောက်ကြောင့် လောင်ကျွမ်းသွားခဲ့သည်။ သူကအံ့အားသင့်စွာ ဆိုလာခဲ့သည်။

"မင်းရဲ့ စွမ်းရည်က ရာဘာကြိုးမဟုတ်ဘူး"

ချီဟန်မှာ ဒေါသတကြီးအော်ဟစ်လာခဲ့သည်။

"မင်းနဲ့ယှဥ်ရမှာ ငါကွ"

ထို့နောက် သူကပြေး၀င်လာခဲ့ပြန်သည်။

၃ဦးသားမှာ တဖန်ညိထွေးသွားကြပြန်သည်။

ထန်မော့က ရွမ်၀မ်ရှုကို ပိတ်ပင်တားဆီးနေခဲ့ပြီး သူ၏ မြေဆွဲအားဖိနှိပ်ခြင်းကို အသုံးမပြုနိုင်အောင် နှောင့်ယှက်နေခဲ့သည်။ အခြေအနေမှာ တဖန်ပြောင်းလဲသွားပြန်သည်။ ထန်မော့၏ အဆုံးမဲ့သော စွမ်းရည်များက ချီဟန်နှင့် ရွမ်၀မ်ရှူအား မျှော်လင့်မထားမိအောင်ဖြစ်စေသည်။ ၂ဦးသားအတူတကွတိုက်ခိုက်နေကြသော်လည်း ထန်မော့၏တိုက်ကွက်များကို မပိတ်ပင်နိုင်ခဲ့ချေ။ သူ၏စွမ်းရည်များမှာ အလွန်ပြင်းထန်လွန်းနေခဲ့သည်။ သူတို့သည် မီးတောက်ကို ခုခံပြီးစမှာပင် ပြင်းထန်သောလေပွေက ရုတ်ချည်းတိုက်ခတ်လာခဲ့ပြန်သည်။ ရွမ်၀မ်ရှူ၏ နှေးကွေးသော လှုပ်ရှားမှူများကြောင့် ထန်မော့မှာ အသာစီးရနေခဲ့လေသည်။

တဖက်တွင်လည်း ဖူ၀မ်သော်က လျန်ယွီကျန်းကို တဖြည်းဖြည်း ဖိနှိပ်ထားခဲ့လေသည်။ လျန်ယွီကျန်း၏ ကိုယ်ပေါ်တွင်မရေတွက်နိုင်သော ဒဏ်ရာများတဖြည်းဖြည်းတိုးလာချိန်တွင် ဖူ၀မ်သော်၏ ကိုယ်ပေါ်၌ အပေါ်ယံဒဏ်ရာလေးများသာရှိနေခဲ့လေသည်။

ဆယ်မိနစ်အတွင်း ထန်မော့နှင့် ဖူ၀မ်သော်က မှော်ဖိနပ်များကို အသုံးပြုနိုင်တော့မည်မဟုတ်ချေ။ သို့သော် ထျန်းရွှမ်အဖွဲ့အစည်းမှ ၃ယောက်အတွက် ထို၁၀မိနစ်ကို ရှင်သန်နိုင်ရန် အလွန်ခက်ခဲမည်ပင်။ လူ ၃ယောက်မှာ ဆုံးဖြတ်ချက်ကို ချလျက်ထွက်သွားရန် ဆုံးဖြတ်လိုက်ကြသည်။

ထန်မော့နှင့် ဖူ၀မ်သော်မှာလည်းတစ်ဦးကိုတစ်ဦးကြည့်လျက် တူညီသော အကြံများရှိကြလေသည်။ သူတို့သည် ထျန်းရွှမ်မှ ၃ယောက်ကို တိတ်တဆိတ်တိုက်ခိုက်နေပြီး ၂ဖက်စလုံးမှာ အန္တရာယ်များသော တိုက်ပွဲမှ ဆုတ်ခွာရန် အခွင့်အရေးကို ရှာဖွေနေခဲ့ကြသည်။

၁မိနစ်ကုန်လွန်သွားပြီးနောက် ထန်မော့က ချီဟန်၏ ရင်ဘတ်ကိုကန်လိုက်ပြီး ၀င်ပေါက်ထံပြေးထွက်သွားလိုက်သည်။ ဖူ၀မ်သော်သည်လည်း လျန်ယွီကျန်းကို ဖိနှိပ်ပြီးနောက် ပုန်းကွယ်နေသော ဖူ၀မ်ရှန်းကို ကော်လံမှ ဆွဲလျက် လျင်မြန်စွာပြေးတော့သည်။

ချီဟန်က ဒေါသတကြီးပြေးလိုက်ချင်ခဲ့သော်လည်း ရွမ်၀မ်ရှူက သူ့ကိုတားထားခဲ့သည်။

လူ၅ယောက်မှာ ချက်ချင်း ကွဲကွာသွားခဲ့သည်။

နေလုံးမှာ တဖြည်းဖြည်း အနောက်အရပ်သို့၀င်သွားပြီး မိုးကုပ်စက်၀ိုင်းကို မေးတင်ထားခဲ့သည်။ ရွှေရောင်နေခြည်မှာ ပေကျင်းမြို့လယ်ခေါင်မှ အနက်ရောင်မျှော်စင်ပေါ်ဖြာကျလျက် ရွှေရောင်ခပ်ဖျော့ဖျော့တောက်ပနေစေသည်၊ ထိုမျှော်စင်ကြီးမှာ လူ၅ယောက်နှင့် မီတာတချို့သာ ဝေးကွာနေခဲ့သည်။ ဖူ၀မ်ရှန်းက မူမမှန်မှုကို ပထမဆုံး သတိထားမိသူဖြစ်သည်။

ယ

"အဲဒါဘာကြီးလဲ"

ထန်မော့ချက်ချင်း အနက်ရောင်မျှော်စင်ကို မော့ကြည့်လိုက်သည်။ လူတိုင်းလည်း သူနှင့်အတူ ကြည့်လိုက်မိကြလေသည်။

သူသည် အနက်ရောင်မျှော်စင်၏ ထိပ်တွင် အဖြူရောင် အလင်းစက်လေးတစ်ခုကိုတွေ့လိုက်ရလေသည်။ ၄င်းမှာ အလွန်လျင်မြန်စွာ တဖြတ်ဖြတ်လက်နေပြီး စက္ကန့်အနည်းငယ်အတွင်းမှာပင် အကြိမ်ပေါင်းထောင်ချီလက်သွားခဲ့သည်။ သူ၏ အထူးအမြင်အာရုံနှင့်တောင် ထန်မော့မှာလိုက်ရေတွက်၍မရနိုင်ချေ။ ထိုရင်းနှီးနေသော မြင်ကွင်းမှာ ထန်မော့ကို ထိတ်လန့်သွားစေပြီး ကျန်လူများမှာလည်း အံ့အားသင့်သွားခဲ့ကြသည်။

ပထမအလင်းစက် ပြီးဆုံးပြီးနောက် ဒုတိယအလင်းစက်ပေါ်လာခဲ့လေသည်။ ဤတစ်ကြိမ်တွင် ဒုတိယအလင်းစက် ၏ အလျင်က သိပ်မမြန်၍ ထန်မော့လိုက်လံရေတွက်ကြည့်ရာ ၈၃၁၄ကြိမ် လင်းလာခဲ့ခြင်းဖြစ်သည်။

ထို့နောက် တတိယအလင်းစက်ပေါ်ထွက်လာခဲ့သည်။

လွန်ခဲ့သော ၁၀ရက်က အလင်းစက်၃စက်နှင့်အတူ အနက်ရောင်မျှော်စင် အဆင့်မြင့်တင်ခဲ့သည်။ ပထမအလင်းစက်မှာ အကြိမ်၁၀၀၀၀လင်းလာပြီး ဒုတိယအလင်းစက်မှာ အကြိမ်၃၀၀ဖြစ်သည်။ တတိယအလင်းစက်မှာ ၂ကြိမ်သာလင်းသည်ဆိုရုံလေးလင်းလာပြီး ပြန်လည်မှိန်ဖျော့သွားခဲ့လေသည်။

ယခုမူ ထန်မော့မှာ အနက်ရောင်မျှော်စင်ကိုမော့ကြည့်လျက် တတိယအလင်းစက် လင်းလာမည်ကို စောင့်မျှော်နေခဲ့လေသည်။ ဤတစ်ကြိမ်တွင် တတိယအလင်းစက်မှာ ၂ကြိမ်ခန့် အပြည့်အ၀လင်းလာခဲ့လေသည်။ မှုန်မှိုင််းနေခြင်း မှိန်ဖျော့သွားခြင်းလည်းမရှိပဲ ၂ကြိမ်သာ လင်းသွားခြင်းပင်။

ထန်မော့ ချက်ချင်းဆိုသလို နားလည်သွားခဲ့သည်။ တတိယအလင်းစက်မှာ မျှော်စင်တတိယထပ်ကို ကိုယ်စားပြုလေသည်။

🌍

Prev Next