Chapter 5

🐯Chapter 5

လတ်တလောတွင် ကြည့်ရှုသူများထဲ၌ “တရုတ်ပြည်တောင်ဘက်က ကျား” သည်သာ ကုယွီမြန်နှင့် စကားပြောဆိုကာ ဆက်သွယ်မှုပြုနေခြင်း ဖြစ်သည်။ အခြားကြည့်ရှုသူများမှာမူ တိတ်ဆိတ်မြဲသာ။ “တရုတ်ပြည်တောင်ဘက်က ကျား” က ကုယွီမြန်၏ ရုပ်ရည်ကိုသာ အာရုံစူးစိုက်နေခြင်း ဖြစ်ပုံရသည်။

သို့သော်လည်း ကုယွီမြန်က စိတ်အနှောင့်အယှက် မဖြစ်ပေ။ ဤထုတ်လွှင့်မှုမှာ စမ်းသပ်ရန်သာဖြစ်သည်။ ဤအချိန်တွင် ဖြစ်ပေါ်လာသမျှသော ပြဿနာများအား အဖိုးတန်အတွေ့အကြုံအဖြစ် မှတ်ယူနိုင်သည်။ ဖန်တံခါးမှတစ်ဆင့် မီးဖိုချောင်အပြင်သို့ ကြည့်လိုက်ရာ နှင်းကျားသစ်ပေါက်လေးမှာ ငြိမ်းချမ်းစွာ အိပ်ပျော်နေဆဲဖြစ်သည်ကို မြင်တွေ့လိုက်ရသည်။ သူက ကွေးကွေးလေး အိပ်စက်နေပြီး ရှည်လျားသောအမြီးမှာ ဝမ်းဗိုက်ပေါ်တွင် ရစ်ခွေနေသည်။

ကုယွီမြန်မှာ တိရစ္ဆာန်ငယ်လေးများနှင့် ရင်ဆိုင်ရာတွင် ခုခံနိုင်စွမ်း ကင်းမဲ့သူဖြစ်သည်။ ချက်ချင်းဆိုသလို နှလုံးသားတစ်ခုလုံး နူးညံ့သိမ်မွေ့သွားပြီး ချက်ပြုတ်မည့် ပါဝင်ပစ္စည်းများအား ကိုင်တွယ်ရာတွင် ပိုမိုအလေးအနက်ရှိလာသည်။

အေးခဲနေသည့်သိုးသားအား အရည်ပျော်စေကာ သန့်ရှင်းပြီးနောက် ပါးလွှာသော အသားလွှာလေးများဖြစ်အောင် လှီးသည်။ မီးဖွင့်ကာ ဒယ်အိုးတင်လိုက်ပြီး ဆီကို ပါရုံ လောင်းထည့်လိုက်သည်။ 

“ကြောင်တစ်ကောင်ကို အသက် ၄ လမှာ နို့ဖြတ်မယ်ဆိုရင် အသားလွှာကို နည်းနည်းထူထူ လှီးပေးရမယ်... ဒါပေမဲ့ ကြိတ်ဖို့ မလိုအပ်ဘူး...”

ကုယွီမြန်က ရှင်းပြသည်။

ဒယ်အိုးပူလာသည့်အခါ သိုးသားလွှာများနှင့် အခွံခွာထားသော မုန်လာဥများ၊ လိမ္မော်သီးများ ထည့်သည်။ ကုယွီမြန်မှာ အတွေ့အကြုံအနည်းငယ်သာရှိပြီး ကျွမ်းကျင်စားဖိုမှူးတစ်ယောက် မဟုတ်သဖြင့် နှစ်ရက်ကြာ လေ့လာစဉ်းစားပြီးနောက်မှ ထိုအရာများအား ပေါင်းစပ်လိုက်ခြင်း ဖြစ်သည်။

အခွံခွာထားသော မုန်လာဥနှင့် လိမ္မော်သီးများမှာ ညှီနံ့ပျောက်စေနိုင်သည်။

ကုယွီမြန်က ပြောသည်။

“ကျား ဒါမှမဟုတ် ကျားသစ်တစ်ကောင် ဆိုရင်တော့ သုံးပုံတစ်ပုံလောက်ပဲ ကျက်အောင်ချက်ဖို့ အဆင်ပြေပါတယ်...”

လူသားများမှာ မကျက်သေးသောအသားများကို မစားသုံးနိုင်သော်လည်း တိရစ္ဆာန်များမှာမူ ထိုသို့သော ကန့်သတ်ချက်မျိုး မရှိချေ။ ကြယ်တာရာခေတ်၌ သူတို့၏ ခန္ဓာကိုယ်ကြံ့ခိုင်မှုမှာ အလွန်မြင့်မားစွာ တိုးတက်လာသည်။ ကျား၊ ကျားသစ်နှင့် အခြားသတ္တဝါများမှာ တောရိုင်းထဲတွင် နှစ်ထောင်ပေါင်းများစွာ ရှင်သန်နေထိုင်ခဲ့သော်လည်း ချက်ပြုတ်ထားသော အစားအစာများမှာ သူတို့၏ အာသီသနှင့် မကိုက်ညီပေ။

ကုယွီမြန်က အသားစိမ်းများကို စားသောက်သော နှင်းကျားသစ်များအား ပြုစုစောင့်ရှောက်ခဲ့ဖူးသည်။ 

အချိန်အနည်းငယ်ကြာအောင် ကြော်ပြီးနောက် သိုးသားလွှာများ၏ မျက်နှာပြင်မှာ ဆီဝေ့ကာ အနည်းငယ် ကြွပ်ရွလာသည်။ သို့သော်လည်း အသားစိမ်းအတိုင်း သွေးရောင်ရှိနေဆဲပင်။ လေထုထဲတွင် လတ်လတ်ဆတ်ဆတ် အသားနံ့ ပြည့်နှက်နေပြီး တံခါးကွဲကြောင်းမှတဆင့် အပြင်ဘက်သို့ ရောက်ရှိသွားသည်။ တံခါးအပြင်ဘက်တွင် အိပ်ပျော်နေသော နှင်းကျားသစ်ပေါက်လေး၏ နှာခေါင်းတရှုံ့ရှုံ့ ဖြစ်လာသည်။

ယခုအချိန်တွင် တိုက်ရိုက်ထုတ်လွှင့်မှုများ အားလုံးမှာ သုံးဖက်မြင်ဖြစ်သည်။ ပရိသတ်များအနေဖြင့် အနံ့ရရုံသာမက ကြားနိုင်၊ ထိတွေ့နိုင်ပြီး တိုက်ရိုက်ထုတ်လွှင့်ခန်းထဲရှိ အရာအားလုံးကိုပင် အရသာခံနိုင်ကြသည်။ သေချာပေါက်ပင် အရာအားလုံးမှာ ဒေတာများသာ ဖြစ်သည်။ ခံစားချက်သက်သက်ကိုသာ ပေးခြင်းပင်။

တစ်ချိန်တည်းမှာပင် တိုက်ရိုက်ထုတ်လွှင့်ခန်း၏ မျက်နှာပြင်၌ မှတ်ချက်များစွာ ပေါ်လာသည်။

【တရုတ်ပြည်တောင်ဘက်က ကျားက ဘယ်တော့မှ ချိန်းမတွေ့ဘူး : ဝှက်သယ်ဖတ် အရသာရှိလိုက်တာ... ဘာလေးများလဲ... ငါက ညလယ်စာစားပြီးရင် ဗိုက်မဆာတတ်ပါဘူးဆို... QAQ】

【ကြောင်လေးရဲ့အော်သံ : အရမ်းအရသာရှိတာပဲ တင်ဆက်သူရေ... အသက် ၂၄ နှစ် ဆိုရင်ကော စားလို့ရမလား...】

သို့သော်လည်း တိုက်ရိုက်ထုတ်လွှင့်မှု၏ ဟန်ချက်ညီမှုအား ပျက်စီးစေသည့်လူများလည်း ရှိနေဆဲပင်။

【ကျားသစ်လေးတွေကို ဖက်ပစ်လိုက်မယ် : တင်ဆက်သူက လူသားလား...】

ထိုမှတ်ချက် တက်လာသည်နှင့် စကားပြောနေသော နှစ်ယောက် တိတ်ဆိတ်သွားသည်။

လူသား သို့မဟုတ် တိရစ္ဆာန်ဖြစ်သည်ကို ခွဲခြားခြင်းမှာ သူတို့၏ မွေးရာပါဗီဇဖြစ်သော်လည်း ဖန်သားပြင်ကိုဖြတ်၍ကြည့်လျှင် ထိုဗီဇမှာ အလွန်အားနည်းတတ်သည်။ ထပ်ပေါင်းဆိုရလျှင် ကြယ်တာရာကောင်းကင် လိုက်ဖ်ပလက်ဖောင်းတွင် လူသားတင်ဆက်သူဟူ၍ မရှိခဲ့ဖူးချေ။ လူတိုင်းက ကုယွီမြန်မှာလည်း တိရစ္ဆာန်တစ်ကောင်သာ ဖြစ်မည်ဟု အလိုအလျောက် ယူဆခဲ့ကြသည်။

ကုယွီမြန် အိုးလက်ကိုင်အား ကိုင်ထားရင် ရပ်လိုက်ပြီးနောက် မေးလေသည်။

“လူသားက ဘာဖြစ်လို့လဲ...”

ကြည့်ရှုသူမှ ဆက်ပြောသည်။

【ကျားသစ်လေးတွေကို ဖက်ပစ်လိုက်မယ် : မင်းက လူသားနဲ့တူတယ်... အရမ်းရွံစရာကောင်းတယ်...】

【ကျားသစ်လေးတွေကို ဖက်ပစ်လိုက်မယ် : သုံးမိနစ်တောင် ရှိသွားပြီလား... ဟားဟားဟား ရယ်ရလွန်းလို့ သေတော့မယ်... တင်ဆက်သူက ကြည့်ရှုသူတွေကို မလှည့်စားနိုင်တော့ဘူးလား အရူးလုပ်မခံကြနဲ့... တင်ဆက်သူက လူသားပဲ... ဘယ်လိုလုပ်ပြီး ကြောင်တွေအတွက် ချက်ပြုတ်နည်းကို သိမှာတဲ့တုန်း... သူပြောတဲ့အတိုင်းလုပ်ကြလေ... မင်းတို့ အဲဒါတွေကိုစားရင် သေချာပေါက် ဖျားနာလိမ့်မယ်... အဲလိုဆို သူကတော့ ပျော်နေမှာပဲ...】

ထိုသို့ပြောဆိုနေခြင်းအား မြင်တွေ့ရသည့်အခါ အခြားကြည့်ရှုသူများမှာ ငြိမ်မနေနိုင်တော့ချေ။

【တရုတ်ပြည်တောင်ဘက်က ကျားက ဘယ်တော့မှ ချိန်းမတွေ့ဘူး : အဲလောက်ထိ လူမျိုးရေးခွဲခြားဖို့ မလိုဘူးထင်တယ်... ငါ့နာနီက လူသားလေ... ငါတို့အတွက် အနှစ် ၂၀ တောင် အလုပ်လုပ်ပေးခဲ့တာ.. လူသားပဲဖြစ်ဖြစ် တိရစ္ဆာန်ပဲဖြစ်ဖြစ် အကောင်း အဆိုးကတော့ ရှိတာပဲ... ဘယ်လိုလုပ်ပြီး အားလုံးကို ရောထွေးပစ်လို့ ရမှာလဲ...】

【ယွဲ့အာနဲ့ လျှောက်လည်မယ် : တင်ဆက်သူက တကယ်ပဲ လူသားလား ဟင်...】

ကုယွီမြန်က သိုးသားမြှောင်းကြော်များအား ဆယ်လိုက်ရင်း ပြောသည်။

“ဟုတ်ပါတယ်..”

ကြည့်ရှုသူ အရေအတွက်မှာ ‘၆’ မှ ‘၅’ သို့ လျော့ကျသွားခဲ့သည်။ ‘ယွဲ့အာနဲ့ လျှောက်လည်မယ်’ ထွက်သွားခြင်းပင်။ လေထုထဲရှိ ရနံ့မှာ ပိုမိုပြင်းထန်လာသော်လည်း တိုက်ရိုက်ထုတ်လွှင့်မှု၏ ဦးတည်ချက်မှာ လုံးလုံးလျားလျား သွေဖယ်သွားလေသည်။ 

【ကျားသစ်လေးတွေကို ဖက်ပစ်လိုက်မယ် : ချက်ပြုတ်နည်းတွေကို သွားကြည့်စမ်းပါ... အားလုံးပြောထားတာ သိုးသားက လုံးဝကျက်တဲ့အထိ ချက်ရမယ်တဲ့... မနေ့ညက တင်ဆက်သူ စီးကရက် (Cigarette) ရဲ့ အစားအသောက် တိုက်ရိုက်ထုတ်လွှင့်မှုကို ကြည့်ခဲ့တယ်... သူက စတားအသိအမှတ်ပြု အစားအသောက်တင်ဆက်သူပဲ... သူလည်းပဲ လုံးဝကျက်တဲ့အထိ ချက်ရမယ်လို့ ပြောသွားတယ်... လူသားတစ်ယောက်ဖြစ်ပြီး သိုးသားကို သုံးပုံတစ်ပုံပဲ ချက်ပြုတ်ဖို့လိုတယ်လို့ ဘယ်လိုသတ္တိနဲ့ ပြောရဲရတာလဲ...】

ကြယ်တာရာခေတ်တွင် တိရစ္ဆာန်များ အသုံးပြုသော ချက်ပြုတ်နည်းများမှာ လူသားများထံမှ ရရှိထားခြင်း ဖြစ်သည်။

အတိတ်ကာလတွင် သိုးသားကို ကျက်သည့်အထိ ချက်ရပေမည်။ သို့တည်းမဟုတ်ပါက ဘတ်တီးရီးယားများစွာ ပါဝင်နိုင်သောကြောင့်ပင်။ သို့သော်လည်း သိုးသားအတုတွင်မူ ဘတ်တီးရီးယားပြဿနာ မရှိချေ။ ဒုတိယအနေဖြင့် တောရိုင်းတိရစ္ဆာန်များနှင့် လူသားများ၏ အခြေအနေမှာ မတူညီကြပေ။

ကံကောင်းစွာဖြင့် ကုယွီမြန်က ထိုအရေးပေါ်အခြေအနေနှင့် ပတ်သက်၍ ယမန်နေ့က စဉ်းစားခဲ့ပြီး ဖြစ်သည်။

“ငါ့နာမည်က ကုယွီမြန်ပါ... မင်း ငါ့ကိုယ်ရေးအချက်အလက်တွေကို စတားလိုက်ဖ်မှာ စစ်ဆေးကြည့်နိုင်တယ်... ပြဿနာတစ်ခုခု ရှိတယ်ဆိုရင် မင်းတို့ ချက်ချင်း ရဲခေါ်လိုက်လို့ရတယ်... ပြီးတော့ အစားအသောက် ဘေးကင်းရေးစစ်ဆေးစက်နဲ့လည်း စစ်ကြည့်လို့ရတယ်...”

ထိန်းချုပ်ခလုတ်နှင့်တူသော ရှည်လျားသေးငယ်သည့် ကိရိယာတစ်ခုအား ထုတ်ယူလိုက်ပြီး သိုးသားကြော်ထည့်ထားသည့် ပန်းကန်ပြားပေါ်တွင် ထားလိုက်သည်။ နှစ်စက္ကန့်ကြာပြီးနောက် ရလဒ်ထွက်ပေါ်လာပြီး ကင်မရာသို့ ပြလိုက်သည်။ 

【ဘေးကင်းသည်။】

“ကျားသစ်လေးတွေကို ဖက်ပစ်လိုက်မယ်”က စကားမပြောတော့ချေ။

【တရုတ်ပြည်တောင်ဘက်က ကျားက ဘယ်တော့မှ ချိန်းမတွေ့ဘူး : တင်ဆက်သူကို ယုံတယ်နော်... ပြောရမယ်ဆိုရင် ငါလည်း မနေ့က စီးကရက်ရဲ့ တိုက်ရိုက်ထုတ်လွှင့်မှုကို ကြည့်ခဲ့တယ်... ဒီကိစ္စထဲ ဝင်မပါချင်ပေမဲ့ စီးကရက်ချက်ပြတဲ့ သိုးသားတုံးတွေက ဒီကလောက် အရသာမရှိဘူး..】

【ကြောင်လေးရဲ့အော်သံ : ငါလည်းပဲ တင်ဆက်သူကို ယုံတယ်နော်... အဲဒါကြောင့် အခု မြည်းကြည့်လို့ ရပြီလားဟင်... ကြည့်ရတာ တကယ်ကြီး အရသာရှိမှာလို့... အူးဟူးဟူး T_T】

“ခဏလေးစောင့်ပါဦး... အဆင့်တွေအများကြီး ကျန်နေသေးတယ်...ပြီး‌တော့ အရမ်းပူနေသေးတယ်လေ.. လျှာကျက်သွားလိမ့်မယ်...”

ကုယွီမြန် ပြုံးလိုက်သည်။ 

【ကျားသစ်လေးတွေကို ဖက်ပစ်လိုက်မယ် : ဘေးကင်းတယ်ဆိုရင်တောင် အရသာရှိမှာ လုံးဝမဟုတ်ဘူး..】

【ကြောင်လေးရဲ့အော်သံ : ကျားသစ်မမက ကြောက်နေတယ်ဆိုတာ သိတယ်နော်... အဲဒါကြောင့် ပြဿနာရှာနေတာမလား...】

ထို့နောက်။

ပွင့်နေသော မီးဖိုချောင်းတံခါးမှာ နှင်းကျားသစ်ပေါက်လေး၏ ဦးခေါင်းဖြင့် တွန်းဖွင့်ခံလိုက်ရသည်။ ကောင်ငယ်လေးက ယခုလေးတင်မှ နိုးထလာပြီး သမ်းဝေရင်း ဖြည်းညင်းစွာ လျှောက်လာသည်။ သူ့အမြီးလေးဖြင့် ကုယွီမြန်၏ ခြေကျင်းဝတ်အား ပွတ်လိုက်ပြီးနောက် ရုတ်တရက်ဆိုသလို ချက်ပြုတ်နေသည့် စားပွဲပေါ်သို့ ခုန်တက်လိုက်သည်။

ကုယွီမြန် ကြောင်အသွားပြီး ကလေးလေးအား တွန်းဖယ်ချင်သော်လည်း နှင်းကျားသစ်ပေါက်လေးမှာ သိုးသားမြှောင်းများထည့်ထားသည့် ပန်းကန်အနီးသို့သွားကာ နှာတရှုံ့ရှုံ့ လုပ်နေသည်ကို တွေ့လိုက်ရသည်။ ထို့နောက် စိတ်ကျေနပ်ဟန်ဖြင့် မျက်လုံးများ မှေးကျဉ်းလိုက်သည်။

“ဟမ်... စားလို့မရသေးဘူးနော် ...”

ကုယွီမြန်က နှင်းကျားသစ်လေးအား ကောက်ပွေ့လိုက်သည်။

ဤတစ်ကြိမ်တွင်မူ ကျားသစ်လေးက ခုခံခြင်း မရှိချေ။ သူက ကုယွီမြန်၏ ပခုံးပေါ်တွင် လှိမ့်ကာဖြင့် ဘုရင်တစ်ပါးက သူ့ပိုင်နက်အား ကြည့်ရှုနေဟန်ရှိသော မျက်လုံးများဖြင့် မီးဖိုချောင်တစ်ခုလုံးအား ကြည့်နေလေသည်။

တိုက်ရိုက်ထုတ်လွှင့်မှု မစမီတွင် ကုယွီမြန်က စနစ်များ၊ သတ်မှတ်ချက်များအား အထူးတလည် ပြုပြင်ထားခြင်း မရှိချေ။ 

တိုက်ရိုက်ထုတ်လွှင့်မှုအတွက် ချိန်ညှိရာတွင် ကျပန်းအား ရွေးထားမည်ဆိုပါက ကင်မရာ မြင်ကွင်းအတွင်းသို့ တိရစ္ဆာန်တစ်ကောင် ဝင်လာမည်ဆိုလျှင် ကင်မရာက အလိုအလျောက် တိရစ္ဆာန်၏မြင်ကွင်းသို့ ပြောင်းလဲသွားမည် ဖြစ်သည်။

ပြောရမည်ဆိုလျှင် ယခုအခါတွင် တိုက်ရိုက်ထုတ်လွှင့်ခန်းမှာ ကြည့်ရှုသူများ၏ရှုထောင့်မှ နှင်းကျားသစ်ပေါက်လေး၏ ရှုထောင့်သို့ ပြောင်းလဲသွားခြင်းပင်။ မြင်ကွင်း၊ ရနံ့၊ အရသာ စသဖြင့် အရာအားလုံးမှာ နှင်းကျားသစ်ပေါက်လေးအား တုပထားခြင်းပင်။

ယခုအခါတွင် ကြည့်ရှုသူများမှာ ကုယွီမြန်၏ ပခုံးပေါ်တွင် လဲလျောင်းနေသကဲ့သို့ ခံစားနေရသည်။ လူငယ်လေး၏ အပူချိန်မှာ သူ့ရှပ်အင်္ကျီမှတစ်ဆင့် ရောက်ရှိလာသည်။ ဝါးရွက်ရနံ့သင်းသင်းနှင့် ပင်လယ်ဆားရနံ့ရောနှောနေပြီး ကျားသစ်လေး၏ ဦးခေါင်းတစ်ဖက်ခြမ်းမှာ လူငယ်လေး၏ နူးညံ့သော ဆံနွယ်များ၊ နားရွက်များနှင့် ထိနေလေသည်။ နှလုံးသားထဲမှ စိတ်လက်ပေါ့ပါးမှုနှင့် ရင်းနှီးကျွမ်းဝင်မှုတို့ မြင့်တက်လာပြီး နှလုံးသားများ ထုံထိုင်းသွားကြသည်။

【ကြောင်လေးရဲ့အော်သံ : အာ ဘာဖြစ်တာလဲ... ငါတို့ လေထဲလွင့်နေကြတာလား... တင်ဆက်သူဆီက မွှေးရနံ့သင်းသင်းလေး ရနေတယ်ရော်...】

【တရုတ်ပြည်တောင်ဘက်က ကျားက ဘယ်တော့မှ ချိန်းမတွေ့ဘူး : အရမ်းသက်သောင့်သက်သာ ရှိတာပဲ... တင်ဆက်သူက ဘယ်လိုလူသားမျိုးလဲ... ဘယ်လိုလုပ်ပြီး ဒီလိုမျိုး ဖြစ်နိုင်တာလဲ... ငါက အသက် ၂၀ ကျော်နေတဲ့ ယောကျ်ားတစ်ယောက်ပါနော်... တင်ဆက်သူက ငါ့အမွေးလေးတွေကို ပွတ်သပ်ပြီး ဖက်ပေးတာ မြင့်မြင့်မြှောက်ပေးတာကို လိုချင်နေတယ်လို့...】

【ကြောင်လေးရဲ့အော်သံ : အစ်ကိုကြီးရေ... ရှင့်ရဲ့ လိင်စိတ်တိမ်းညွှတ်မှုက ဘာများလဲနော်...】

ပိုမိုအံ့အားသင့်ဖွယ်ကောင်းသော အရာမှာ လူသားတင်ဆက်သူ၏ ချက်ပြုတ်ခြင်းပင်။

ကုယွီမြန် ကြော်ထားသော သိုးသားမြှောင်းများအား ကြက်ဥနှစ်ထဲ နှစ်လိုက်ပြီး နှစ်စက္ကန့်မျှကြာအောင် ကြော်လိုက်သည်။ ချက်ပြုတ်ပြီးနောက် မုန်လာဥနီအား အရည်ညှစ်လိုက်သည်။ မုန်လာဥနီဖျော်ရည်၏ အရသာမှာ ချိုချဉ်ဖြစ်ပြီး အန်ချင်ဖွယ်မကောင်းချေ။ ထုံထိုင်းနေသော လျှာများအား နှိုးဆွပေးနိုင်သည်။

“ဥနီဖျော်ရည်ထဲ ကလေးငယ်ရဲ့ အာဟာရအတွက် ဖြည့်စွက်အစာဖြစ်တဲ့ ဗီတာမင် အေ၊ ဗီတာမင် ဒီ နဲ့ ကယ်လ်စီယမ်မှုန့်တို့ကို သင့်တင့်တဲ့ အချိုးအစားနဲ့ ထည့်ရမယ်... ဟုတ်ပြီ... ကြည့်ကြတာပေါ့...”

လက်တစ်ဖက်ဖြင့် ပန်းကန်ပြားအားကိုင်ကာ ကျန်တစ်ဖက်ဖြင့် ကလေးလေးအား ပြုတ်မကျစေရန် ထိန်းလိုက်ပြီးနောက် ဧည့်ခန်းသို့ သွားလေသည်။

ကြည့်ရှုသူများ မစောင့်နိုင်တော့သော်လည်း ယခုအခါတွင် တိုက်ရိုက်ထုတ်လွှင့်မှုမှာ နှင်းကျားသစ်လေး၏ ရှုထောင့်သို့ ပြောင်းလဲနေလေသည်။ နှင်းကျားသစ်လေး စတင်စားသောက်မှသာလျှင် ကြည့်ရှုသူများလည်း မြည်းကြည့်၍ရပေမည်။ ကြည့်ရှုသူများမှာ မကြုံစဖူး ထူးကဲလှသော မွှေးရနံ့ကြောင့် မြည်းကြည့်ရန် မစောင့်နိုင်တော့ချေ။

တိရစ္ဆာန်များက လူသားများအား ခွဲခြားဆက်ဆံမှုများ ပြုလုပ်ကြသော်လည်း ချက်ပြုတ်နည်းများနှင့် အမျိုးမျိုးသော နေထိုင်ခြင်း အလေ့အထများမှာ လူသားများထံမှ လက်ဆင့်ကမ်းလာခြင်း ဖြစ်သည်။ ထိုအရာများမှ ခွဲထွက်ရန် ကြိုးစားခဲ့ဖူးသော တိရစ္ဆာန်ဟူ၍ မရှိချေ။

ကုယွီမြန်က နှင်းကျားသစ်ပေါက်လေးအား ကူရှင်တစ်ခု ပေးလိုက်သော်လည်း ကလေးလေးမှာ သူ့ပခုံးပေါ်မှ ဆင်းလိုစိတ်မရှိချေ။ ထို့အစား ကုယွီမြန်၏ ပခုံးပေါ်၌ ဣန္ဒြေကြီးသော ဘုရင်တစ်ပါးသဖွယ် ထိုင်နေလေသည်။

ကုယွီမြန် : “...”

နှင်းကျားသစ်ပေါက်လေးက ခဲပြာရောင်မျက်လုံးများဖြင့် ကုယွီမြန်အား ကြည့်လိုက်သည်။

ကုယွီမြန်သက အစမ်းသဘောဖြင့် သိုးသားတုံးအား ဖြတ်တောက်ကာ ဂရုတစိုက်ဖြင့် ကလေးလေး၏ ပါးစပ်ထဲသို့ ခွံ့လိုက်သည်။ နှင်းကျားသစ်လေးက ကုယွီမြန်၏ ဝန်ဆောင်မှုအား အလွန်ကျေနပ်သဘောကျစွာဖြင့် ရှိနေသည်။ နှာတရှုံ့ရှုံ့လုပ်ပြီးနောက် ခေါင်းငုံ့ကာ ပါးစပ်အတွင်းရှိ သိုးသားအား ဝါးလေသည်။

နောက်တစ်စက္ကန့်မှာပင် တိုက်ရိုက်ထုတ်လွှင့်ခန်းရှိ ကြည့်ရှုသူများ၏ လျှာဖျားတွင် ကောင်းမွန်သော အရသာတစ်ခုအား ခံစားမိပြီး ရသာခံဖုလေးများ ပေါက်ကွဲကုန်တော့သည်။

သုံးပုံတစ်ပုံကျက်အောင် ချက်ထားသော သိုးသားမှာ အရသာရှိလွန်းလှသည်။ သိုးသားထဲမှ ထွက်လာသော ဆီများမှာ မျက်နှာပြင်တွင် ဝေ့နေပြီး တောထဲ၌ ကျင်လည်ခဲ့သော သဘာဝတိရစ္ဆာန်များသဖွယ် အသားတွင်သွေးများ ရှိနေသည်။

တိရစ္ဆာန်များအနေဖြင့် ဆားအလွန်အကျွံ စားသုံး၍ မရချေ။ ထို့ကြောင့် ကုယွီမြန် ဆားပါလေရုံ ထည့်ထားပြီး အသားသပ်သပ်သည်သာ အရသာအရှိဆုံးဖြစ်သည်။ ထို့အပြင် လတ်လတ်ဆတ်ဆတ် ဥနီဖျော်ရည်နှင့် ပေါင်းစပ်လိုက်သည့်အခါ အရသာမှာ ပြောမပြတတ်လောက်အောင်ပင်။ တစ်လုတ်စားပြီးနောက် ချက်ချင်းပင် နောက်တစ်လုတ် စားချင်လာမိသည်။

ကြည့်ရှုသူများမှာ စက္ကန့်အနည်းငယ်မျှ တိတ်ဆိတ်သွားကြပြီးနောက် မှတ်ချက်များ တရစပ် ထွက်ပေါ်လာတော့သည်။ တစ်ခါမျှပင် မှတ်ချက်မပေးဖူးသော ကြည့်ရှုသူအသစ်များပင် ပေါ်ထွက်လာသည်။

【တရုတ်ပြည်တောင်ဘက်က ကျားက ဘယ်တော့မှ ချိန်းမတွေ့ဘူး : ထပ်ကျွေးပါ.......】

【ကြောင်လေးရဲ့အော်သံ : အာ... အာ...】

【မင်းအတွက် ပန်းတစ်ပွင့် : ဝှက်သယ်ဖတ်... ငါဘာဖြစ်သွားတာလဲ… ငါက သိုးသားစားရတာကို မုန်းတာလေ...】

【အဖြူရောင်ပိုးထည်ခြုံထားတဲ့လ : တင်ဆက်သူရေ... သူ့ကို မြန်မြန်လေး ခွံ့လိုက်ပါဦး... လုံးဝ မဝသေးဘူးလို့...】

ထို့နောက် ဖန်သားပြင်တွင် အမျိုးမျိုးသော အထူးပြုလုပ်ချက်များ ပေါ်ထွက်လာသည်။

“တရုတ်ပြည်တောင်ဘက်ကကျားက ဘယ်တော့မှ ချိန်းမတွေ့ဘူး မှ ရေနက်တော်ပီဒိုတစ်ခု”၊ “ကြောင်လေးရဲ့အော်သံမှ လက်ပစ်ဗုံးသုံးလုံး”၊ “အဖြူရောင်ပိုးထည်ခြုံထားတဲ့လမှ မိုင်း ၁၀ ခု”။

ထိုအရာများမှာ တိုက်ရိုက်ထုတ်လွှင့်မှုမှ ရရှိသော ဆုလက်ဆောင်များဖြစ်သည်။ ထိုဆုလက်ဆောင်များအား ကုယွီမြန်နှင့် ပလက်ဖောင်းမှ အချိုးကျခွဲဝေယူကြမည်ဖြစ်သောကြောင့် ကုယွီမြန်၏ အကောင့်ထဲတွင် ချက်ချင်းဆိုသလို ကြယ်ဒင်္ဂါး ၆၀၀ ရောက်ရှိလာသည်။ ကြည့်ရှုသူများ၏ တုံ့ပြန်ပုံမှာ ဤမျှ ကောင်းမွန်လိမ့်မည်ဟု မျှော်လင့်မထားချေ။  သူ ခေတ္တမျှ တွေဝေပြီးနောက် ပြောလိုက်သည်။

“တရုတ်ပြည်တောင်ဘက်ကကျားက ဘယ်တော့မှ ချိန်းမတွေ့ဘူး၊  ကြောင်လေးရဲ့အော်သံ နဲ့ အဖြူရောင်ပိုးထည်ခြုံထားတဲ့လ ကို လက်ဆောင်တွေအတွက် ကျေးဇူးတင်ပါတယ်...”

ထို့အပြင် တင်ဆက်သူအား အပုပ်ချစကားများ အဆက်မပြတ် ပြောဆိုခဲ့သော ‘ကျားသစ်လေးတွေကို ဖက်ပစ်လိုက်မယ်’ မှာလည်း လုံးလုံးလျားလျား တိတ်ဆိတ်သွားလေသည်။ သူ  တိုက်ရိုက်ထုတ်လွှင့်ခန်းမှ ထွက်သွားခြင်း သို့မဟုတ် ဆွံ့အသွားခြင်း ဖြစ်မည်ကိုမူ မည်သူမျှ မသိနိုင်ပေ။

ကုယွီမြန်၏ ကျွေးမွေးပုံအား စိတ်ကျေနပ်မှုမရှိသောကြောင့် ကလေးလေးက ကုယွီမြန်၏ ဦးခေါင်းအား လက်ဖဝါးဖြင့် တွန်းလိုက်သည်။

ကုယွီမြန်က နှင်းကျားသစ်တစ်ကောင်၏ စားသောက်မှုပမာဏအား ခန့်မှန်းတွက်ချက်ကာ ကျန်ရှိနေသေးသည့် သိုးသားမြှောင်းများအား ကျွေးလိုက်ပြီးနောက် ပန်းကန်သိမ်းလိုက်သည်။ နှင်းကျားသစ်လေးမှာ ဗိုက်ပြည့်တင်းနေပြီ ဖြစ်သောကြောင့် ကုယွီမြန် မီးဖိုချောင်တွင် ပန်းကန်ဆေးနေစဉ်၌ ဆိုဖာပေါ်တွင် မှိန်းနေလေသည်။

ဆေးကြောပြီးနောက် ကလေးလေး၏ မေးစေ့အား လက်ဖြင့်အသာကုတ်ခြစ်ပေးလိုက်ရင်း ကောက်ပွေ့ကာ အစာခြေမြန်စေရန် ဝမ်းဗိုက်လေးအား ညင်သာစွာ ပွတ်သပ်ပေးနေလေသည်။ စားသောက်ပြီးနောက်တွင် နှင်းကျားသစ်လေးက ကုယွီမြန်အပေါ်၌ ခုခံလိုမှုတို့ မရှိတော့ဘဲ လူစိမ်းအဖြစ်မှ အစေခံအဖြစ်သို့ တိုးမြှင့်သတ်မှတ်လိုက်သည်။

ကလေးလေး၏ ခဲပြာရောင်မျက်ဆံမှာ မျဉ်းကြောင်းတစ်ခုသဖွယ် ကျဉ်းမြောင်းသွားပြီး ပျင်းရိစွာဖြင့် သူ့ခေါင်းအား ကုယွီမြန်၏ လက်ဖဝါးနှင့် ပွတ်သပ်နေလေသည်။ တိုက်ရိုက်ထုတ်လွှင့်မှုမှာ နှင်းကျားသစ်ပေါက်လေး၏ ရှုထောင့်တွင်သာ ရှိနေသေးသောကြောင့် ကြည့်ရှုသူများအနေဖြင့် နှင်းကျားသစ်ပေါက်လေး၏ ခံစားချက်အတိုင်း လိုက်လံခံစားကြရသည်။

ရှည်သွယ်သောလက်ချောင်းများက ဝမ်းဗိုက်အား ကြင်နာစွာ ပွတ်သပ်ပေးနေသောကြောင့် လျှပ်စီးကြောင်းလေးများ ဖြတ်စီးသွားသလိုပင် အလွန်သက်သောင့်သက်သာ ရှိလှသည်။ ခန္ဓာကိုယ်တစ်ခုလုံး သကြားတုံးလေးသဖွယ် အရည်ပျော်သွားသည့်အတိုင်းပင်။

【တရုတ်ပြည်တောင်ဘက်က ကျားက ဘယ်တော့မှ ချိန်းမတွေ့ဘူး : ဇိမ်ကိုကျနေရောပဲ...】

【ကြောင်လေးရဲ့အော်သံ : အရမ်းခံစားလို့ကောင်းတယ်...】

【အဖြူရောင်ပိုးထည်ခြုံထားတဲ့လ : တကယ်ကြီး သက်သောင့်သက်သာ ရှိနေတာနော်...】

သို့သော်လည်း ကုယွီမြန်သည် အချိန်ကိုကြည့်ပြီးနောက် ပြောလိုက်သည်။

“ဒီနေ့ တိုက်ရိုက်ထုတ်လွှင့်မှုကို အဆုံးသတ်လိုက်တော့မယ်နော်... နောက်တစ်ခါမှ တွေ့ကြတာပေါ့... တာ့တာ...”

ကြည့်ရှုသူများ : 【ဘာ... နေပါဦးးးးးးးး】

သူတို့အားလုံး မည်သည့်စကားမျှ မဆိုနိုင်သေးခင် နောက်တစ်စက္ကန့်မှာပင် ဖန်သားပြင်မှာ မီးခိုးရောင်သို့ ပြောင်းသွားလေသည်။

ကြည့်ရှုသူလေးဦးမှာ လုံးဝ လုံလောက်မှုမရှိဟု ခံစားရသည်။ ယခုအခါ အလွန်များပြားသည့် တိုက်ရိုက်ထုတ်လွှင့်မှုများစွာ ရှိနေသော်လည်း ကောင်းမွန်သော တင်ဆက်သူတစ်ဦးအား ရှာဖွေတွေ့ရှိရန်မှာ မလွယ်ကူလှပေ။ နောင်တအရဆုံးမှာ တိုက်ရိုက်ထုတ်လွှင့်မှု စတင်ချိန်မှ ကြည့်ရှုမိခြင်း မရှိခဲ့ဘဲ မိနစ်ပိုင်းသာ မီလိုက်သောကြောင့်ပင်။

ကြည့်ရှုသူအချို့က မှတ်တမ်းတင်ထားသော ဗီဒီယို တစ်ပိုင်းတစ်စအား တင်လိုက်သည်။ များမကြာမီတွင် တာ့ခ်၏ ကြည့်ရှုသူများအကြားတွင် စတားလိုက်ဖ်ပလက်ဖောင်း၌ အလွန်အစွမ်းထက်သော လူသားတင်ဆက်သူတစ်ဦး ပေါ်လာသည်ဟူသော သတင်းတစ်ခု ပျံ့နှံ့သွားလေတော့သည်။

🐯🐯🐯