MM Story Teller

Chapter 202

Viewers 32k

🌍Chapter 202

လီစစ်ရွှီ၏ ကိုယ်က ဒုံးပျံတစ်စီးနှယ် ထန်မော့ထံပြေး၀င်လာခဲ့လေသည်။

ထန်မော့သည် သူဂိမ်းကိုအနိုင်ရရှိပြီးနောက်တွင် လီစစ်ရွှီက သူ့အားတိုက်ခိုက်လာဦးမည်ဟု မမျှော်လင့်ထားခဲ့ချေ။ သူကလျှင်မြန်စွာတုန့်ပြန်လျက် ထီးကလေးကို ဆွဲထုတ်ကာ ခုခံလိုက်သည်။ အမှန်တရားနာရီပေါ်မှ သူတို့၂ဦးကို ဖမ်းချုပ်ထားသော လှောင်အိမ်များပျောက်ကွယ်သွားပြီး သတ္တုချင်းထိခတ်မိသံတို့ထွက်ပေါ်လာခဲ့သည်။ ထန်မော့နှင့် လီစစ်ရွှီ၂ဦးစလုံးခေါင်းကို မော့ကြည့်လိုက်ကြသည်။

၂ဦးသားမှာ ဆက်၍မတိုက်ခိုက်ခင် တစ်ဦးကိုတစ်ဦး စိုက်ကြည့်နေခဲ့ကြလေသည်။

ထိုလူမှာ အသက်၃၀အရွယ်မျှရှိသော အရပ်ပုပုနှင့် သာမာန်ရုပ်ရည်ရှိသော သူတစ်ယောက်ပင်။ သူကအရပ်မရှည်လှသဖြင့် ပိန်ပါးကာ အားနည်းပုံပေါ်လေသည်။ သူ၏ခွန်အားမှာ မမြင့်လှသော်လည်း လျင်မြန်သည်။ သူကထန်မော့အား မုန်းတီးစွာကြည့်လျက် သူ၏တိုက်ကွက်တိုင်းမှာ အဓိကနေရာများကိုသာ ချိန်ရွယ်ထားခဲ့သည်။ ထန်မော့ ထီးကလေးဖြင့် ဆက်တိုက်ကာကွယ်နေခဲ့ပြီး အခွင့်အရေးတစ်ခုကို တွေ့လိုက်သည်။

ထီးကလေးမှာ လျှပ်စစ်လက်သည့်အလျင်နှင့် ထိုလူ၏ပုခုံးအောက်သို့ဖြတ်သွားခဲ့သည်။ လီစစ်ရွှီမှာ ထီးကလေးကိုတစ်လှည့် ထန်မော့ကို တစ်လှည့်ကြည့်လာခဲ့သည်။ သူကရှုပ်ထွေးနေပြီး ထန်မော့ဘာလုပ်ချင်သည်ကို နားမလည်ပေ။ စက္ကန့်ပိုင်းအတွင်း ထန်မော့ ထီးကလေးကို ဖွင့်ချလိုက်ပြီး လက်ကိုင်ကို သူ့ဆီသို့ ဆွဲယူလိုက်လေသည်။

လီစစ်ရွှီသည် ဤပြင်းထန်သော အားကြောင့်ဆွဲယူခံလိုက်ရပြီး ထန်မော့နှင့် ၀င်တိုက်လုနီးပါးပင်။ ထိုစဥ်မှာပင် ထန်မော့ခြေကိုမြှောက်လျက် ၄င်း၏ ရင်ဘတ်ကိုကန်ထည့်လိုက်သည်။ လီစစ်ရွှီ၏ မျက်လုံးများမှာ ထိတ်လန့်မှုကြောင့် ပြူးကျယ်သွားလျက် သူ၏ပါးစပ်တစ်၀ိုက်တွင် ပန်းရောင်အလင်းတစ်ခု တောက်ပလာခဲ့သည်။

ထန်မော့၏ ကန်ချက်မှာ ရပ်တန့်သွားပြီး လီစစ်ရွှီမှာထိုအခွင့်အရေးကို ဖမ်းဆုပ်လျက် ထွက်ပြေးတော့သည်။

သူတို့၂ဦးကြားမှ ထိတ်တိုက်ရင်ဆိုင်မှုမှာ အလွန်တိုတောင်းခဲ့သည်။ လီစစ်ရွှီမှ သူ့ထံတရှိန်ထိုးပြေး၀င်လာသည်မှစ၍ ထန်မော့သူ့အားကန်ထည့်ရန်ပြင်လိုက်ချိန်အထိ ၁မိိနစ်မျှသာ ကြာသေးသည်။ လီစစ်ရွှီ၏ သတိကြီးမှုက ဤအချိန်တွင်ပေါ်ထွက်လာခဲ့သည်။

သူသည် ထန်မော့က သူ့ထက်သန်မာလှသည်ကို မြင်သည်နှင့် ချက်ချင်းလှည့်ကာထွက်ပြေးတော့သည်။ သို့သော် သူကထွက်ပြေးရင်းနှင့်လည်း အခွင့်အရေးများကို ရှာဖွေနေသေးသည်။

အမှန်တရားနာရီပေါ်တွင် ထန်မော့နှင့် ဤအရပ်ပုပုလူက တစ်ဦးကိုတစ်ဦး ပြေးလိုက်နေခဲ့ကြသည်။

တဖက်လူမှာ အားနည်းလှသော်လည်း အလျင်ကတော့မြန်လှသည်။ ထန်မော့ သူ့ကို အမီလိုက်နိုင်ပါသော်လည်း သူ့ကိုဖမ်းဆီးရန်မှာမူ သိပ်မရိုးရှင်းလှချေ။ လီစစ်ရွှီမှာပြေးလွှားရင်း အခွင့်အရေးများကို ဆက်တိုက်ရှာဖွေနေကာ တစက်လေးမှ မနားခဲ့ချေ။

ထိုလူက ဆပ်ပြာတုံးလိုပင်...

ထို့အပြင်...ဤလူ၏စွမ်းရည်မှာ...

ထန်မော့၏ နှုတ်ခမ်းတို့တွန့်သွားမိရသည်။ သူဤလူ၏ စွမ်းရည်ကို အမှန်တကယ်မလိုချင်မိချေ။

ဂိမ်းမှာပြီးဆုံးသွားခဲ့ပြီဖြစ်ကာ အမှန်တရားနာရီကြီးမှာလည်း အပြာရောင်အလင်းများတောက်ပမနေတော့ပဲ ရိုးရိုးနာရီကြီးတစ်လုံးအဖြစ်သာ ပြောင်းလဲသွားတော့သည်။ ထန်မော့ ထိုနာရီကြီး၏ ဗဟိုတွင် တည်ငြိမ်စွာရပ်နေခဲ့လေသည်။ အကယ်၍ အရပ်ပုပုနှင့်လူက ထပ်စလာပါက သူပြန်တိုက်ခိုက်ရန်အသင့်ပင်။

အချိန်များကုန်လွန်သွားပြီး တိုးညှင်းသော အသံက တဖြည်းဖြည်းရှင်းလင်းပြတ်သားလာခဲ့သည်။ အမှောင်ထုထဲမှ ယုန်တစ်ကောင်ထွက်လာသည်နှင့် လီစစ်ရွှီ ၄င်းအား ထိတ်လန့်စွာကြည့်လိုက်လေသည်။

ထန်မော့ ထိုအခွင့်အရေးကိုသုံးလျက် မီးခြစ်ဆံကြီးကို ထုတ်ယူကာ တဖက်လူကို ကြမ်းပြင်တွင်ဖိထားလိုက်လေသည်။

ဘန်းခနဲ အသံနှင့်အတူ လီစစ်ရွှီမှာ မှောက်သွားခဲ့သည်။

ယခုမှရောက်ရှိလာသော ယုန်က ထိုမြင်ကွင်းကြောင့် ထိတ်လန့်စွာအော်ဟစ်လိုက်လေသည်။ လီစစ်ရွှီ၏ ခွန်အားမှာ အမှန်တကယ် အကန့်အသတ်ရှိလေသည်။ ကြီးမားသော မီးခြစ်ဆံက သူ၏ကျောကို ဖိထားပြီး သူမလှုပ်ရှားနိုင်တော့ချေ။

ထန်မော့ နာရီနောက်တွင် ကြောက်လန့်စွာပုန်းပြီး ချောင်းကြည့်နေသော ယုန်အားကြည့်လိုက်သည်။

ထန်မော့မျက်လုံးများကို မှေးကျဥ်းလျက် အနက်ရောင်မျှော်စင်ဘော့စ်အစစ်ကို သတိထား၍ ကြည့်လိုက်သည်။ တချိန်တည်းမှာပင် စူးရှသောအသံတစ်ခုက သူ၏နားထဲတွင် ပြည့်နှက်သွားခဲ့သည်။ ထန်မော့ချက်ချင်းဘေးကိုစောင်းလျက် အနက်ရောင် လက်နက်ပုန်းကိုရှောင်ရှားလိုက်လေသည်။

လီစစ်ရွှီသည် သူ၏ အလစ်တိုက်ခိုက်မှု ကျဆုံးသွားသည်ကိုမြင်လျှင် သူ၏မျက်နှာ၌ ခံစားချက်ပေါင်းစုံဖြတ်ပြေးသွားခဲ့လေသည်။ သူ၏မျက်နှာမှာ နီရဲလျက် တိုက်ခိုက်မှု ကျရှုံးခြင်းကြောင့် အရှက်ရမှုနှင့် အမုန်းတရား နာကျင်မှုများ ထင်ဟပ်နေခဲ့သည်။

ဦးဦးယုန်က လီစစ်ရွှီကိုတွေ့ပြီး အံ့အားသင့်သွားခဲ့သည်။

"ဟေ့...မင်းတို့လူသား၂ယောက် နာရီပေါ်ဘယ်လိုရောက်နေတာလဲ"

ထန်မော့ တစ်ခုခုမှားယွင်းနေသည်ကို သတိထားမိပြီး ပေါ့ပါးစွာဆိုလိုက်သည်။

"နာရီပေါ်မှာ ၁ယောက်ပဲရှိလို့ရတာလား"

အမှန်တရားနာရီပေါ်တွင် အနိုင်ရရှိသူတစ်ယောက်သာရှိရမည်ဟုဆိုသည်။ ၄င်းမှာ အနက်ရောင်မျှော်စင်၏စည်းမျဥ်းပင်။ သို့သော် သူကဘာကိုမှ မသိချင်ယောင်ဆောင်လျက် မေးမြန်းလိုက်သည်။

ဦးဦးယုန်က ခေါင်းညိတ်လိုက်ကာ

"ဒါပေါ့ ဘယ်သူပဲနိုင်နိုင် အနိုင်ရတဲ့သူပဲ...ဘယ်သူနိုင်တာလဲ..."

သူ့စကားအဆုံးမှာပင် ထန်မော့ကိုယ်ပေါ်မှ အပြာရောင် တောက်ပလာခဲ့လေသည်။ ဦးဦးယုန်က သဘာ၀ကျကျပင်ဆိုလာလေသည်။

"သြော် မင်းနိုင်သွားတာကို မင်းနိုင်တယ်ဆိုတော့ သူက..."

ယုန်က တန့်သွားလျက် ကြမ်းပြင်ပေါ်မှ လူကိုကြည့်လိုက်သည်။

ထို့နောက် ပျော်ရွှင်စွာ လက်ခုပ်တီးလိုက်လေသည်။

"အမှန်တရားရဲ့ထာ၀ရတွင်းနက်ကြီးထဲ ကျသွားလိမ့်မယ်"

မှောင်မည်းသောနေရာလွတ်ထဲတွင် ယုန်၏ မျက်နှာမှာ ပျော်ရွှင်သော အမူအယာနှင့် လေသံမှာလည်း ပေါ့ပါးနေခဲ့သည်။ ၄င်းကိုကြားလျှင် လီစစ်ရွှီ၏ အမူအရာက ပြောင်းလဲသွားခဲ့လေသည်။ သူကအော်ဟစ်လျက်

"မသွားဘူး...ငါမသွားချင်ဘူး...ထာ၀ရတွင်းနက်ထဲ မသွားချင်ဘူး မဟုတ်ဘူး...."

အမည်းရောင်အစက်လေးတစ်ခုက သူ၏ကိုယ်အောက်တွင်ပေါ်လာခဲ့လေသည်။ ထန်မော့ချက်ချင်း နောက်သို့ခုန်ဆုတ်လိုက်သည်။ သူသည် ထိုအစက်လေးမှာ တဖြည်းဖြည်းကြီးမားသော တွင်းပေါက်ကြီးဖြစ်လာပြီး လီစစ်ရွှီအား စုပ်ယူသွားသည်ကိုကြည့်နေခဲ့လေသည်။

လီစစ်ရွှီ၏ ကိုယ်က တွင်းနက်နှင့်အတူ ပျောက်ကွယ်သွားခဲ့လေသည်။

ထန်မော့ အမှန်တရားနာရီကို တိတ်တဆိတ်ကြည့်နေခဲ့သည်။ ယခုလေးတင် ကစားသမားတစ်ယောက်အား တွင်းနက်ကြီးထဲ စုပ်ယူလိုက်ခြင်းမဟုတ်သည့်နှယ် နာရီမှာ ပြောင်းလဲမှုမရှိ ပကတိငြိမ်သက်လျက်ပင်။ ထန်မော့ ထိုလူပျောက်ကွယ်သွားသော နေရာကို ဂရုတစိုက်စူးစမ်းလိုက်ပြီးနောက် ယုန်ကို ကြည့်လိုက်လေသည်။

ဦးဦး ယုန်မှာ ထန်မော့ သူ့ကိုကြည့်နေသည်အားမြင်သော် တစ်ခုခုကိုရုတ်တရက်သတိရသွားခဲ့လေသည်။

"မင်း...မင်း...ငါ့အမြှီးကိုဆွဲတဲ့လူ"

ထန်မော့၏ နှုတ်ခမ်းတို့တွန့်ကွေးသွားခဲ့လေသည်။

မျှော်စင်တိုက်ခိုက်ဂိမ်းများမှာ ရိုးရိုးအနက်ရောင်မျှော်စင်ဂိမ်းများနှင့်မတူချေ။ အရံမစ်ရှင်နှင့် အဓိကမစ်ရှင်တို့ သက်သက်စီပါရှိကြသည်။ ထို့အပြင် အဓိကမစ်ရှင်ပြီးပြီးခြင်းတွင်လည်း ကစားသမားမှာ ချက်ချင်းထွက်သွားနိုင်သည်ဟုမဆိုလိုချေ။ ဥပမာ ကြွက်ဖမ်းဂိမ်းတွင် ထန်မော့ ရွှေကြွက်ကိုဖမ်းမိခဲ့သော်လည်း ဘွားဘွား၀ံပုလွေကြီးက အိမ်ကိုပြန်လာပြီး ဂိမ်းကို အဆုံးသတ်ပေးသည်ကို စောင့်နေခဲ့ရလေသည်။

အကယ်၍ ဘွားဘွား၀ံပုလွေကြီးက ကြွက်ဖမ်းဂိမ်း၏ ဘော့စ်ဖြစ်မည်ဆိုလျှင် ဤယုန်မှာလည်း အမှန်တရားနာရီဂိမ်း၏ ဘော့စ်ဖြစ်မည်မှာ ဧကန်ပင်။

ထန်မော့၏ မျက်လုံးများမှာ ထိုယုန်ဖြူထံ စွဲကပ်နေခဲ့သည်။

လူကြီးလူကောင်းနှယ်၀တ်စားထားသော ယုန်က ထန်မော့အား အသေအချာကြည့်နေစဥ် ထန်မော့၄င်းထံသို့ ရုတ်ချည်းပြေး၀င်သွားခဲ့လေသည်။

"အား...ကယ်ကြပါ..မင်း..မင်း...ငါ့ကိုစားတော့မလို့လား"

ယုန် ကြောက်လန့်တကြားထွက်ပြေးတော့သည်။

ယုန်သည်ကား ထန်မော့ထက်မြန်သော်လည်း ဤနေရာမှာ အကန့်အသတ်ရှိလေသည်။ ယုန်မှာ မည်သို့လွတ်အောင်ပြေးရမည်ထက် ရှေ့ကိုသာ သွေးရူးသွေးတန်းပြေးနေခြင်းပင်။ ထန်မော့ အလျင်အမြန်ပင် သူ့ကို ဖမ်းမိသွားခဲ့သည်။ သူ ထူးဆန်းသော ယုန်ကို လက်နှစ်ဖက်နှင့် ဖမ်းလျက် လေထဲသို့မြောက်တင်လိုက်သည်။ ယုန်မှာရုန်းကန်ရင်း သူ၏နားရွက်ရှည်ရှည်၂ဖက်မှာ လေထဲတွင် လှုပ်ခါနေခဲ့သည်။

"အိုး...လွှတ်ပေး ငါ့ကိုလွှတ်...မင်းမကောင်းဆိုးရွား လူသား ငါ ငါမင်းကို ရတနာပေးမယ်...ဟုတ်ပြီလား ရတနာပေးပါ့မယ်လို့"

ထန်မော့စိတ်လှုပ်ရှားသွားမိသော်လည်း သူ၏အမူအရာမှာမူပြောင်းလဲမသွားခဲ့ချေ။

"ဘာရတနာလဲ"

ယုန်က သူ၏အိတ်ကပ်ထဲမှ အိတ်ဆောင်နာရီလေးတစ်ခုကို ထုတ်ယူလိုက်လေသည်။ ၄င်းမှာ အလွန်လှပပြီးဖောက်ထွင်းမြင်ရသော နာရီကလေးပင်။ ဖောက်မြင်ရသော အပေါ်ယံ အခွံအောက်တွင် လက်တံလေး၃ခုက ရွေ့လျားနေခဲ့သည်။ ယုန်ကထိုနာရီကလေးကို သူ၏အ၀တ်တွင် ၂ကြိမ်မျှ ကြမ်းကြမ်းပွတ်လိုက်ပြီးမှ ထန့်မော့လက်ထဲ မပေးချင်ပေးချင်ဖြင့် ထည့်ပေးလာခဲ့သည်။ ထန်မော့၄င်းကို ဖမ်းဆုပ်ရန်ပြင်လိုင်လျှင် တဖန်ဆွဲယူသွားပြန်သည်။

"မင်း...မင်း ဒီဟာကို အမှန်တရားနာရီနဲ့ လဲရမယ်"

ထန်မော့တည်ငြိမ်စွာမေးလိုက်သည်။

"အမှန်တရားနာရီနဲ့ ဟုတ်လား"

ယုန်ကခေါင်းညိတ်လိုက်ကာ

"ဟုတ်တယ် မင်းဒါကို အမှန်တရားနာရီနဲ့လဲရမှာ...မင်းက အမှန်တရားနာရီဂိမ်းကိုနိုင်သွားတော့ ဒီနာရီက မင်းဟာဖြစ်သွားပြီ...ဟေး...မင်းငါ့ရဲ့ အမှန်တရားနာရီကို အဲလိုအကြည့်တွေနဲ့ မကြည့်နဲ့...ဒီဟာက ငါ့ရဲ့အမှန်တရားနာရီ ပြီးတော့ ငါကအနီရောင်နှလုံးသားဘုရင်မကိုပေးမှာ ဒီကမ္ဘာမှာ အနီရောင်နှလုံးသားဘုရင်မတစ်ယောက်ကပဲ အမှန်တရားနာရီကို သုံးနိုင်တာ ...မင်းလက်ထဲမှာဆို ဘက်ထရီကုန်နေတဲ့ နာရီအပျက်ပဲ ဖြစ်နေမှာပဲ"

ထိုနောက် ထန်မော့၏ ခေါင်းထဲတွင် ကလေးသံ၏ ကြေညာမှုကို ကြားလိုက်ရလေသည်။

"တင်းတောင်~ ကစားသမားထန်မော့ဟာ အဓိကမစ်ရှင်' ဦးဦးယုန်ရဲ့ အမှန်တရားနာရီဂိမ်း'ကို ရှင်းလင်းလိုက်ပြီး ဆုအဖြစ် အမှန်တရားနာရီကို ရရှိသွားပါပြီ။ ခင်မင်မှု သဲလွန်စ: ကစားသမားတွေကအမှန်တရားနာရီကို မထိန်းချုပ်နိုင်တဲ့အတွက် ဒီနာရီကို ဦးဦးယုန်ရဲ့ ဖြစ်နိုင်ချေအိတ်ဆောင်နာရီနဲ့လဲလှယ်လို့ရပါမယ်"

ထန်မော့ထို အိတ်ဆောင်နာရီကိုယူရန် တွန့်ဆုတ်မနေခဲ့ချေ။

ယုန် စိတ်အေးစွာ သက်ပြင်းကို မချနိုင်ခင်မှာပင် ထန်မော့ကထပ်၍ဆိုလာခဲ့သည်။

"မရသေးဘူး"

ယုန်"...?...!!!"

ယုန်ဖြူသည် သူ၏ရှေ့မှ လူအား မယုံနိုင်စွာကြည့်လိုက်မိလေသည်။ ထိုလူသားမှာ သူ၏လက်ထဲမှ အိတ်ဆောင်နာရီလေးကို စူးစမ်းနေရာမှ အောက်မှ နာရီကြီးကို ထိုးပြလိုက်ကာဆိုလာခဲ့သည်။

"ဒီနာရီကသေးသေးလေး...အမှန်တရားနာရီကအကြီးကြီး...လဲလိုက်တာက ငါ့အတွက် ဆုံးရှုံးမှုအကြီးကြီးပဲ "

ယုန်"..."

ယုန်မှာ စိတ်တိုလွန်၏ ဤအရှက်မရှိ လောဘကြီးလွန်းသော ကစားသမား၏ခေါင်းကို ရိုက်ပစ်ချင်ခဲ့သည်။

ကံကောင်းစွာဖြင့် သူ သည်းခံနိုင်ခဲ့သည်။

ဤသည်မှာ ထန်မော့ပထမဦးဆုံး အနက်ရောင်မျှော်စင်မွန်းစတားတစ်ကောင်အား အကြပ်ကိုင်ဖူးခြင်းပင်။ သူအရင်က အလွန်ကြင်နာတတ်လွန်း၍မဟုတ်။ ဤယုန်ကဲ့သို့ အလွန်အနိုင်ကျင့်ချင်စရာကောင်းသော မွန်းစတားမျိုး အရင်က မမြင်ခဲ့ဖူးခြင်းသာ။ ဦးဦးယုန်တွင် ခွန်အားမရှိသလောက်ပင်။ ထန်မော့နှင့် စတွေ့စဥ်က သူ၏တုန့်ပြန်မှုမှာ အခြားမွန်းစတားများလိုမဟုတ်ပဲ ထွက်ပြေးရန်သာဦးတည်နေခဲ့သည်။

ထိုကဲ့သို့ ယုန်ကို အနိုင်မကျင့်ခဲ့ရပါက အလွန်နှမြောတသဖြစ်ကျန်နေရတော့မည်။

ထန်မော့မှာ သည်အတိုင်းပြောလိုက်ခြင်းသာဖြစ်ပြီး ယုန်ထံမှ မည်သည်ကိုမှ အမှန်တကယ်မမျှော်လင့်ထားခဲ့ချေ။ သို့သော် ထိုယုန်မှာ အမှန်တကယ် အိတ်ကပ်ထဲ လက်နှိုက်ရှာနေတော့သည်။ သူအတော်လေးကြာကြာရှာပြီးတော့မှ အိတ်ကပ်ထဲမှ ရွှေရောင်သကြားလုံးတစ်ခုကို ဆွဲထုတ်လာခဲ့သည်။ သူသည် ထိုသကြားလုံးကို ၀မ်းနည်းစွာကြည့်လျက် အတော်ကြာတွန့်ဆုတ်နေပြီးမှ ထန်မော့လက်ထဲ ထည့်ပေးလိုက်သည်။

"ငါ..ငါ..မင်းကိုဒါပဲပေးနိုင်မယ်...ထပ်မတောင်းနဲ့တော့နော် ငါဘာတစ်ခုမှ ထပ်မပေးနိုင်တော့ဘူး...အခုငါ့ကို အမှန်တရားနာရီပြန်ပေးတော့..."

ထန်မော့ သူ၏မျက်လုံးထဲမှ အံ့အားသင့်မှုများကို အလျင်အမြန်ဖုံးကွယ်လိုက်သည်။ သူကထိုသကြားလုံးကို အမူအရာမဲ့စွာ လက်ခံလိုက်လေသည်။ 'သူ့ကိုနောက်တစ်ကြိမ်အကြပ်ကိုင်ကြည့်ရင်ရော' နှင့် 'သူလည်း မျှော်စင်မွန်းစတားပဲလေ အရမ်းရန်စလွန်းတာလည်း မကြောင်းဘူး' ၏ ကြားတွင် ထန်မော့နောက်တစ်ခုကိုသာ ရွေးချယ်လိုက်သည်။ သူသည် အိတ်ဆောင်နာရီနှင့် သကြားလုံးကို အိတ်ကပ်ထဲ ထိုးထည့်လိုက်သည်။

သူထိုပစ္စည်း၂ခုကိုသိမ်းပြီးသည်နှင့် အမှန်တရားနာရီမှာ အပြာရောင်အလင်းတစ်ခုတောက်ပလာခဲ့သည်။

ယုန်ကစိတ်လှုပ်ရှားစွာအော်ဟစ်လာသည်။

"ငါ့အမှန်တရားနာရီ"

ကျယ်လောင်သော ကြေညာသံတစ်ခုကို ထန်မော့ခေါင်းထဲတွင်ကြားလိုက်ရလေသည်။

"တင်းတောင်~ တရုတ်ပြည်ခရိုင်၁ တရား၀င်ကစားသမား ထန်မော့ဟာ အနက်ရောင်မျှော်စင်တတိယထပ်(ရိုးရိုးအဆင့်)ကို အောင်မြင်စွာရှင်းလင်းလိုက်ပါပြီ"

ထိုစဥ် ကမ္ဘာတစ်၀ှမ်းတွင် လူတိုင်းအနက်ရောင်မျှော်စင်၏ ကြေညာသံကို ကြားလိုက်ကြရသည်။

"တင်းတောင်~ ရုရှား ခရိုင်၁ တရား၀င်ကစားသမား အန်ဒရီ အီဗန် ပျိုတာ ဟာ အနက်ရောင်မျှော်စင် တတိယထပ်ကို အောင်မြင်စွာရှင်းလင်းလိုက်ပါပြီ"

"တင်းတောင်~ရုရှား ခရိုင် ၁..."

အနက်ရောင်မျှော်စင်၏ကြေညာသံမှာ တစ်စက္ကန့်ခန့်ရပ်တန့်သွားပြီးနောက် ဟန်မပျက်ဆက်လက်ကြေညာလာသည်။ ၄င်းကို ၃ကြိမ်တိတိကြေညာပေးခဲ့သည်။ လူတိုင်း ရပ်တန့်သွားလျက် အနီးဆုံးတွင်ရှိသော အနက်ရောင်မျှော်စင်ကို အံ့အားသင့်စွာမော့ကြည့်လိုက်ကြလေသည်။

ကမ္ဘာပထမဆုံး မျှော်စင်၏အထပ်အသစ်ကို စတင်ရှင်းလင်းသူတိုင်းအား အနက်ရောင်မျှော်စင်မှာ တစ်ကမ္ဘာလုံးကို ၃ကြိမ်တိတိကြေညာပေးလေသည်။

******

ရှန်ဟိုင်း တိုက်အဖွဲ့အစည်းတွင်...

လော့ဖုန်းချန်းနှင့် ချန်ရှန်းရှန်းတို့ ရုံးခန်းထဲတွင် အခြားသူများနှင့် ဆွေးနွေးနေခဲ့သည်။ အနက်ရောင်မျှော်စင်၏ကြေညာမှုကို ကြားသည်နှင့် ဂျက်က သူ့ခေါင်းကို ထိလိုက်မိလေသည်။

" ဟေး ဒီအကြိမ် တတိယထပ်ကို ပထမဆုံးရှင်းတာက ဖူ၀မ်သော်မဟုတ်ဘူးလား"

ချန်ရှန်းရှန်ယကမေးလိုက်သည်။

" သူချည်းအမြဲဘယ်ဖြစ်နေမလဲ"

လော့ဖုန်းချန်းဘောပင်ကိုကောက်ယူလျက် ထိုနာမည်ကို ချရေးလိုက်လေသည်။

"အန်ဒရီ အီဗန် ပျိုတာ...သူကရုရှားမှာ အနက်ရောင်မျှော်စင် ပထမထပ်ကိုရော ဒုတိယထပ်ကိုရော ပထမဆုံးရှင်းတဲ့ သူမဟုတ်ခဲ့ဘူး...အခုတော့တတိယထပ်ကို ပထမဆုံး..."

"တင်းတောင်~ တရုတ်ပြည် ခရိုင် ၁ တရား၀င်ကစားသမား ထန်မော့ဟာ အနက်ရောင်မျှော်စင်တတိယထပ်ကို အောင်မြင်စွာရှင်းလင်းလိုက်ပါပြီ"

ထိုကြေညာမှုကို တစ်ကြိမ်သာကြားလိုက်ရသော်လည်း 'အန်ဒရီကမည်သူဖြစ်ကြောင်း' ဆွေးနွေးနေကြသူများ အားလုံးတန့်သွားခဲ့ကြသည်။ စက္ကန့်အနည်းငယ်ကုန်လွန်ပြီးနောက် လူတိုင်းကြောင်အလျက် ရေရွတ်လိုက်ကြလေသည်။

"ထန်မော့က ဘယ်သူကြီးလဲ"

ဤလူ၂ဦး၏အမည်ကို တခါမျှမကြားဖူးခဲ့ကြချေ။

"ကစားသမားအသစ်တွေလား"

ကျန်လူများမှာတော့ မေးခွန်းများထုတ်မနေတော့ဘဲ အနက်ရောင်မျှော်စင်ကိုလျှောက်သွားကာ သူတို့၏ သက်ဆိုင်ရာ တတိယထပ်တိုက်ခိုက်ရေးဂိမ်းကို ဖွင့်လိုက်ကြတော့သည်။

လော့ဖုန်းချန်း၏ ပါးစပ်က ပွင့်ဟနေဆဲဖြစ်ပြီး သူစကားတောင်မဆုံးသေးချေ။ အနက်ရောင်မျှော်စင်၏ ကမ္ဘာလုံးဆိုင်ရာကြေညာမှုကို ကြားပြီးနောက် လော့ဖုန်းချန်း ခေါင်းကိုခါယမ်းလျက် ပြုံးလိုက်လေသည်။

ချန်ရှန်းရှန်းမှာလည်းအပေါ်ယံတည်ငြိမ်နေသည့်တိုင် သူ၏ရင်ထဲမှ ပျော်ရွှင်နေမှုကို မဖုံးဖိနိုင်ခဲ့ချေ။ သူမက ထန်မော့အတွက် ၀မ်းသာနေခဲ့သည်။

ဂျက်က တည့်သာဆိုလာသည်။

"ထန်မော့လား...ထန်မော့ကသန်မာချက်ပဲ...ငါကအခုမှ ဒုတိယထပ်ကိုရှင်းပြီးတာ သူကတကယ်ကြီးတတိယထပ်ကိုတောင် ရှင်းလိုက်ပြီပေါ့လေ"

🌍

Prev Next