MM Story Teller

Chapter 200

Viewers 32k

🌍Chapter 200

ကလစ်ဟူသော အသံနှင့်အတူ ထန်မော့၏ခြေထောက်အောက်မှ နာရီလက်တံမှာ ဘယ်ဘက်ကို စတင်ရွေ့လျားလာခဲ့လေသည်။ ၄င်းမှာ နာရီလက်တံလားရာအတိုင်း ၄ကွက်တိုးသွားပြီးမှ ၂၄ကွက်တွင် ရပ်တန့်သွားခဲ့သည်။ ထန်မော့ရှေ့သို့လျှောက်ကာ ၂၄ကွက်သို့သွားလိုက်သည်။

နာရီ၏တစ်ဖက်တွင်တော့ ယုန်နက်၏အောက်မှ မိနစ်လက်တံမှာ နောက်သို့ဆုတ်သွားခဲ့သည်။ ၂ကွက်ဆုတ်သွားပြီးနောက် ယုန်နက်က အကွက်၆၀တွင် ရပ်ရပေတော့မည်။ မိနစ်လက်တံမှာ ရပ်တန့်သွားပြီဖြစ်သော်လည်း ယုန်နက်မှာ ထွက်သွားရန်အလွန်နှေးကွေးနေဆဲပင်။

အမှန်တရားနာရီ၏ ခံစားချက်မဲ့သော အသံကထပ်မံထွက်ပေါ်လာခဲ့သည်။

"သုညကစားသမား ကျေးဇူးပြုပြီး မှန်ကန်တဲ့အကွက်မှာ ရပ်နေပေးပါ"

ယုန်နက်ကြီး အကွက်၆၀သို့ ခုန်လိုက်ရတော့သည်။

ကြီးမားသော ရုရှားထပ်တစ်ရာရုပ်ကြီး ခုန်လိုက်သည်တွင် ကြမ်းပြင်ပြင်တုန်ခါသွားခဲ့သည်။ ဤအလှည့်တွင် ယုန်နက်ရော ထန်မော့ပါ အပြစ်ပေးမခံရခဲ့ပေ။

ယုန်နက်က ၂ကွက်ဆုတ်လိုက်ရသည်ဖြစ်၍ အဖြေပေးရန် လက်လျှော့ခဲ့သည်မှာ သိသာလှသည်။ သို့သော် ထန်မော့က ၄ကွက်တိုးသွားခဲ့ရလေသည်။

ဒီဟာကထူးဆန်းမနေဘူးလား...

"ပြီးခဲ့တဲ့တစ်ခေါက်က အဆင့်၅ စကြာ၀ဠာလုံးဆိုင်ရာမဟုတ်တဲ့ အမှန်တရား...ဒီတစ်ခါရောဘာဖြစ်မလဲ..."

ထန်မော့၏ တည်ငြိမ်သော အသံကိုကြားလိုက်ရလေသည်။

ယုန်နက် ထန်မော့အား အေးစက်စွာကြည့်လာခဲ့ပြီး ဘာမျှမဆိုခဲ့ချေ။

ထန်မော့လည်း ပြုံးလိုက်ကာ ဘာမျှဆက်မဆိုခဲ့။

အကယ်၍ တစ်ယောက်ယောက်ကသာစောင့်ကြည့်နေခဲ့ပါက ဤယုန်နက်၏ ပြုမူပုံမှာ လုံး၀ပြောင်းလဲသွားသည်ကို သတိထားမိမည်ပင်။ အရင်နှင့်မတူတော့ချေ။ ယုန်နက်မှာ ပြင်းထန်ကာ ဒေါသကြီးပြီး ဘ၀င်မြင့်သော ပုံစံမျိုးကို ထန်မော့ကို အမြဲပြသထားခဲ့သည်။ အမှန်တရားနာရီသို့လျှောက်လာစဥ်ကတည်းက ၄င်းက ထန်မော့ကိုစားပစ်မည်ဖြစ်ပြီး ထန်မော့၏ မျက်လုံးများကို သကြားနှင့်တို့စားလျှင် ကောင်းမည်ဖြစ်ကြောင်းပြောခဲ့သေးသည်။

၄င်း၏ပြောစကားအရဆိုလျှင် ၄င်းမှာ အမှန်တရားနာရီကို အကြိမ်ကြိမ်အနိုင်ရဖူးပြီး မရေမတွက်နိုင်သော လူများကိုလည်း စားခဲ့ဖူးသည်ဟုပင်။

ဤယုန်နက်မှာ ထန်မော့တွေ့ခဲ့ဖူးသမျှ အနက်ရောင်မျှော်စင်မွန်းစတားများနှင့် တူညီလေသည်။ ၄င်းမှာ ဒေါသကြီးပြီး အဆင်အခြင်မဲ့ကာ အကြံဆိုးများနှင့်ပြည့်နေတတ်သည်။ လူသားများအပေါ်လည်း အစားအသောက်ဟုသာ သဘောထားတတ်ကြသည်။ ကီးလွဲနေသော သီချင်းများကို ဆိုးရွားသော အသံနှင့် ညည်းနေတတ်ကြသည်။ မတူတာတစ်ခုခုကို ထောက်ပြပါဆိုပါက ထိုယုန်နက်က အလွန်သရုပ်ဆောင် ညံ့လွန်းနေခြင်းသာဖြစ်ပေလိမ့်မည်။

မာရီယိုပင်ဖြစ်စေ ပင်နိုကီယိုပင်ဖြစ်စေ အားလုံးမှာ သရုပ်ဆောင်ရခြင်းကိုနှစ်သက်ကြသည်။ လူသားများမှာ သူတို့ထံမှ လှည့်စားခံရသည်ကို ကြည့်ပြီး စိတ်ကျေနပ်မှုရယူတတ်ကြသည်။

လူတစ်ယောက်နှင့် ယုန်တစ်ကောင်သည် အမှန်တရားနာရီအား တိတ်တဆိတ်ကြည့်နေခဲ့ကြလေသည်။ အတော်ကြာပြီးနောက် အက်ကွဲနေသော အသံတစ်ခုကထွက်ပေါ်လာခဲ့လေသည်။

"ဘယ်တုန်းကသိသွားတာလဲ"

"၀င်လာကတည်းက"

ယုန်နက်၏ မျက်လုံးများ ထိတ်လန့်မှုကြောင့် ပြူးကျယ်သွားခဲ့ပြီး မယုံနိုင်စွာ အော်ဟစ်လာခဲ့သည်။

"၀င်လာကတည်းကဟုတ်လား"

တိတ်ဆိတ်နေသော နေရာတွင် ထန်မော့သည် ဆန့်ကျင်ဘက်မှ ရုရှားထပ်တစ်ရာအရုပ်ကိုကြည့်လျက် ရှင်းပြလိုက်သည်။

"ဂိမ်းမစခင်က ငါဦးဦးယုန်ရဲ့အမြှီးကို ညှစ်ပြီး အမှန်တရားနာရီပေါ် တိုက်ရိုက်ကျလာတာ...မမြင်ရတဲ့လှောင်အိမ်တစ်ခုကလည်း ငါ့ကိုပိတ်ထားတဲ့အတွက် ငါ့မှာ ဒီပေါ်ရပ်နေရုံအပြင် ရွေးချယ်စရာမရှိခဲ့ဘူး။

ဒါပေမယ့်..."

ထန်မော့ရပ်တန့်လျက် ယုန်နက်အားကြည့်လိုက်သည်။

"မင်းကကျ မင်းဘာသာ၀င်လာတာလေ"

ယုန်နက်၏မျက်နှာက ပျက်ယွင်းလျက် ဖြစ်နိုင်ချေမှန်သမျှကို စဥ်းစားနေခဲ့သည်။ ၁မိနစ်ကျော်လွန်သွားပြီးနောက် မည်သည့်နေရာတွင် မှားယွင်းနေသည်ကို နားလည်သွားပုံဖြင့် ဖြစ်ညှစ်ကာ ပြုံးလိုက်ရလေသည်။

မှန်၏။ ထန်မော့သည် အစကတည်းက ယုန်နက်၏ ရည်ရွယ်ချက်ကို စူးစမ်းနေခဲ့ခြင်းပင်။

ယုန်နက်က သူ့သဘောနှင့်သူ နာရီပေါ်သို့လျှောက်လာခဲ့သည်။ နာရီပေါ်မရောက်ခင်အထိ ၄င်း၏ကိုယ်အား မည်သည့်အရာကမှ ကန့်သတ်မထားပဲ အလိုရှိသလို သွားလာနိုင်လေသည်။ အမှန်တရားနာရီပေါ်ရောက်သည်နှင့် ၄င်းမှာလည်း ထန်မော့နည်းတူ သေးငယ်သော နေရာတစ်ခုတွင် ပိတ်လှောင်ခံလိုက်ရလေသည်။

ယုန်နက်မှာ ဤအမှန်တရားနာရီဂိမ်းကို အကြိမ်များစွာဆော့ဖူးပြီး လူများစွာကိုလည်း စားဖူးသည်ဟု ဆိုသည်။ ဂိမ်းကိုဖွင့်သည့်နည်းကိုလည်း သိကာ ဂိမ်းအကြောင်းကိုလည်း ကောင်းကောင်းနားလည်လေသည်။

သို့သော် အမှန်တရားနာရီပေါ်ရောက်ရှိလာပြီးနောက် ၄င်းတို့မှာ အမှန်တရားနာရီ၏ ထိန်းချုပ်မှုအောက်သို့ အပြည့်အ၀ကျရောက်သွားပြီး မိမိကျိန်းသေအသက်ရှင်ပါမည်ဟု အာမမခံနိုင်တော့ချေ။ ထန်မော့အားအနိုင်ယူနိုင်သည်ဟူသော ယုံကြည်မှုမျိုး ၄င်းကိုယ်တိုင် အမှန်တရား၏တွင်းနက်ကြီးထဲ ပြုတ်ကျမသွားနိုင်ဟူသော ယုံကြည်မှုမျိုး ထိုယုန်နက်တွင် ဘယ်ကရလာသည်လည်း မပြောတတ်ချေ။

ဖြစ်နိုင်ချေ၂ခုရှိသည်။ ပထမတစ်ခုမှာ ၄င်းမှာ ကိုယ့်ကိုယ်ကို အထင်ကြီးလွန်း၍ထန်မော့ကဲ့သို့ ကစားသမားများကို ပေါ့သေးသေးသာ သဘောထားခြင်းပင်။ သို့သော် ပို၍ ဖြစ်နိုင်သည်က ၄င်းမှာ တစ်ခုခုအပေါ် မှီခိုနေခြင်းပင်။

ယုန်နက်က နာရီပေါ်သို့ ယုံကြည်မှုရှိရှိ၀င်လာပြီး ထန်မော့နှင့် သေခြင်းရှင်ခြင်းဂိမ်းကိုဆော့ရန် မည်သည့်အရာကိုများမှီခိုနေသည်ကို သိချင်မိသည်။

ပထမမိနစ်၃၀အတွင်း သူ ထိုပြဿနာကို တွေးတောနေခဲ့လေသည်။ သူသည် ၄င်းမှာ အကူပစ္စည်းတစ်ခုခုဟူ၍လည်းကောင်း သို့မဟုတ် ယုန်နက်က ဥာဏ်ကောင်းကာ ဂိမ်းဆော့ရာတွင် အမှန်တကယ်တော်ခြင်းဟူ၍လည်းကောင်း စဥ်းစားနေခဲ့သည်။ ပစ္စည်း၄၈မျိုးပေါ်လာချိန်တွင် ထန်မော့ရော ယုန်နက်ပါ တတ်နိုင်သမျှ ပစ္စည်းများကို ဖယ်ထုတ်ရန် ကြိုးစားရတော့သည်။ ထန်မော့မှာ ၇ကွက်တိုးသွားစဥ်တွင် ယုန်နက်မှာမူ ၁၀ကွက်တောင် ဆုတ်သွားခဲ့ရလေသည်။

"ပစ္စည်းအရေအတွက်နည်းပြီဆို မင်းကငါ့ထက်ပိုသာပြီး အကွက်တွေတိုးတယ်... ပစ္စည်းတွေက ၄၈ခု ၂၈ခုလိုမျိုးလာပြီဆိုရင်တော့ ငါ့ထက် မင်းကအများကြီးဆုတ်ရတယ်"

ထန်မော့၏ အသံမှာ အလွန်တည်ငြိမ်နေခဲ့သည်။

"ပစ္စည်းနည်းရင် မင်းကအသာစီးရပြီး ပစ္စည်းများရင်တော့မရတော့ဘူး... ဒီဂိမ်းက ကစားသမားတွေရဲ့ မှတ်ဥာဏ်နဲ့ မြင်နိုင်စွမ်းကို စစ်ဆေးတာ...ပစ္စည်းတွေပိုများလေ ပိုခက်လေပဲ... ဒီ၂ကြိမ်စလုံးက မင်းကငါ့ထက် ပိုသာမနေဘူးဆိုတာ အရမ်းသိသာတယ်

ပြောရရင် ပိုတောင် အားနည်းသေးတယ်"

ယုန်နက်မှာ ခုခံလာခဲ့သည်။

"ငါတစ်ခါမှမမြင်ဖူးတဲ့ ပစ္စည်းတွေပါတယ်"

ထန်မော့လျစ်လျူရှုလိုက်လေသည်။

"အထူးသဖြင့် ပစ္စည်း၄၈ခုအလှည့်တုန်းက မင်းအများကြီးဆုတ်လိုက်ရတယ်...ရှေ့၂လှည့်တုန်းက မင်းအသာစီးရထားတာကိုလည်း အခုထိပြန်လိုက်မမီတော့ဘူး...ဒါကြောင့်ပဲ ဒီဂိမ်းကိုဆော့နေတဲ့အချိန်မှာ မင်းနဲ့ငါနဲ့က အခြေအနေအတူတူပဲဆိုတာ သိသာနေတာ...မင်းမှာငါ့ထက်သာအောင်လုပ်နိုင်မယ့် အကူပစ္စည်းရော ရတနာရောမရှိဘူး...အဲဒါကပြဿနာပဲ

သောက်ကျိုးနဲ မင်းဘာစိတ်နဲ့များ အမှန်တရားနာရီပေါ် ကိုယ့်ခြေထောက်နဲ့ကို ၀င်လာရတာလဲ"

ဤသည်မှာ သူတို့၏ ဘ၀နှင့်လောင်းကြေးထပ်ထားရသော ဂိမ်းဖြစ်ကာ အနိုင်ရရှိရန်လည်း မသေချာချေ။ ယုန်နက်မှာ အဘယ်ကြောင့်များ ယုံကြည််မှုရှိရှိလျှောက်၀င်လာရပါသနည်း။

ဖြစ်နိုင်ချေတစ်ခုသာရှိသည်။

"ဒီတော့ မင်း၀င်ချင်လို့၀င်လာတာမဟုတ်ဘူး တွန်းအားပေးခံရလို့ ၀င်လာတာ"

ထန်မော့ကဆိုလိုက်လေသည်။

ယုန်နက်သည် ထန်မော့အား ရှုပ်ထွေးပြီး နားလည်ရခက်သော အကြည့်များနှင့်ကြည့်လာခဲ့ပြီး သူ၏ကိုယ်မှာလည်း အနည်းငယ်တုန်ရီသွားခဲ့သည်။ ခတ္တမျှကြာပြီးနောက် ၄င်းမှာ စတင်ရယ်မောလာခဲ့သည်။ အက်ကွဲပြီး နား၀င်ဆိုးသောရယ်သံမှာ ထိုသစ်သားကိုယ်ထည်ထဲမှ ထွက်လာခဲ့လေည်။ ၄င်းမှာ ရယ်နေပါသော်လည်း ရယ်သံမှာ လွန်စွာခြောက်ကပ်နေခဲ့သည်။ ယခင်ကကဲ့သို့ မည်သည့်အကြံအစည်မျိုးမှ မပါ၀င်တော့ချေ။

ယုန်နက် အများကြီးတွေးခဲ့သည်။ အမှန်တရားနာရီပေါ်လျှောက်လာစဥ်ကပင် ဤလူသားကစားသမားကို မည်သို့လှည့်စားရမည်ကိုတွေးတောနေခဲ့ခြင်းပင်။ သူသည်ဒေါသကြီးသော ခပ်တုံးတုံးယုန်တစ်ကောင်အဖြစ်ကြိုးစားသရုပ်ဆောင်ပြီး ထန်မော့ထံမှ သူ့ကိုယ်သူဖုံးကွယ်ရန် ကြိုးစားခဲ့သည်။ ထန်မော့သည် သူ့ထံမှ လှည့်စားခံရသော်လည်း သူ ရှုံးနိမ့်နေဆဲပင်။

"ငါကကံမကောင်းလို့ရှုံးသွားတာပဲ"

ယုန်နက်ကဆိုလိုက်သည်။

"ငါက အခုအလှည့်မှာ ခက်ခဲတဲ့ ပစ္စည်း၄မျိုးလုံးကို သိခဲ့ရင် ငါမင်းကို အဲဒါတွေကိုပြောပြပြီး ဖြေခိုင်းလိုက်မှာ...ဒါပေမယ့် မင်းက၂ခုကိုပဲဖြေပြီး ၂ခုကိုလက်လျှော့လိုက်တယ်လေ...ပြီးတော့ အပြစ်ဒဏ်ကိုရှောင်သွားတယ်...တစ်ခုခိုး၀င်သူပေါက်ဆီနဲ့ နောက်တစ်ခုက လူသွေးမှန်းအသိသာကြီးကို အဲဒီ၂ခုကိုဘယ်လိုလုပ်ရမလဲဆိုတာ တစ်ချက်ကြည့်ရုံနဲ့ သိမှာပဲ...ဘီစကစ်နဲ့ ပန်းရောက်အမွှေးအိတ်ကိုတော့ ငါမသိလို့ မင်းကိုမပြောပြနိုင်လိုက်ဘူး အဲဒါကြောင့် မင်းက အဲဒါတွေကို မဖြေဘဲထားခဲ့တာ"

'စည်းမျဥ်း ၁၀အရ တစ်နာရီပြည့်တိုင်းတွင် အမှန်တရားနာရီပေါ်၌ ပစ္စည်း၄မျိုးရှိမည်ဖြစ်ကာ ထိုပစ္စည်းလေးခု၏ အမှန်တရားများမှာ အခက်ခဲဆုံးပင်'

ခက်ခဲသောအမှန်တရားနှင့် ပစ္စည်းတစ်ခု ပထမအကြိမ်ပေါ်ထွက်လာစဥ်က ယုန်နက်က ခိုး၀င်သူပေါက်ဆီအကြောင်းကို ရည်ရွယ်ချက်ရှိရှိ သူ့ကို ပေးသိခဲ့လေသည်။ ထိုအလှည့်တွင် ထန်မော့၃ကွက်ဆုတ်ပြီး ယုန်နက်က ၁ကွက်ဆုတ်ခဲ့ရသည်။ ထိုအကွက်အရေအတွက်မျှကို ထန်မော့စိတ်မရှိချေ။

သူသည် ထို၄ခုထဲမှ ၂ခုကိုမှားဖြေပြီး ကျန်တစ်ခုကို လက်လျှော့ခဲ့ခြင်းကြောင့် ၃ကွက်ဆုတ်ရခြင်းပင်။

ပြဿနာမှာ သူအပြစ်ပေးမခံရခြင်းဖြစ်သည်။ ယုန်နက်၏ ဦးနှောက်မှာလျင်မြန်စွာလှုပ်ရှားသွားပြီး ၄င်းကအဆင့်၅ စကြာ၀ဠာလုံးဆိုင်ရာ မဟုတ်သော အမှန်တရားဖြစ်၍ ထန်မော့မှ အပြစ်ဒဏ်ကိုရှောင်နိုင်ခဲ့သည်ဟု ယူဆခဲ့သည်။ တချို့လူများမှာ ၄င်းကို ယုံကောင်းယုံနိုင်သော်လည်း ထန်မော့ကတော့ မယုံပေ။

"တစ်၀က်စားထားတဲ့ ဘီစကစ်က ဘွားဘွား၀ံပုလွေကြီး အကြိုက်ဆုံး ဘီစကစ်တံဆိပ်ပဲ...ပန်းရောင်အမွှေးအိတ်ကလည်း ဘွားဘွား၀ံပုလွေရဲ့ အိပ်ယာခေါင်းရင်းမှာထားတာ...အဲဒါကသူတို့၂ခုကြားက အမှန်တရားပဲ"

ယုန်နက်က ၄င်းကိုကြားလျှင် အထိတ်တလန့်ဖြင့် မျက်လုံးများ ပြူးကျယ်လျက် ထန်မော့ကို ကြည့်လာခဲ့လေသည်။ ထန်မော့မှာ ပြုံးလျက် ဆက်ပြောလိုက်သည်။

"အဲဒါက ငါဖယ်ထုတ်ခဲ့တဲ့ ပစ္စည်း၂ခုပဲ...ပေါက်ဆီနဲ့သွေးကို လက်လျှော့ခဲ့တာ"

ယုန်နက်ကအော်ဟစ်လာခဲ့သည်။

"မင်းက ပေါက်ဆီနဲ့ သွေးကို သိရဲ့သားနဲ့ မထုတ်ခဲ့ဘူးပေါ့"

"မင်းက ငါ့ရန်သူလေ...ရန်သူဆီကရလာတဲ့သတင်းကို ၉၀ရာခိုင်နှုန်း ၁၀၀ရာခိုင်နှုန်းသေချာနေရင်တောင် မင်းရောယုံမှာလား"

ယုန်နက်"..."

သူ ယုန်နက်၏ စိတ်ဖိစီးနေသော အမူအယာကိုမြင်လျှင် နှုတ်ခမ်းကို အသာသပ်လိုက်လေသည်။

အမှန်တော့ သူမပြောပဲ ချန်ထားရစ်သော အရာများကျန်သေးသော်လည်း သူ့အနေနှင့် အကုန်လုံးကို ပြောပြနေစရာလည်းမလိုအပ်ချေ။ ဤဂိမ်းတွင် ယုန်နက်သည် သူ၏အကြီးဆုံး ၀ှက်ဖဲကို ဆုံးရှုံးသွားခဲ့ချေပြီ။

ယုန်နက်နှင့် ထန်မော့တို့မှာ အမှန်တရားနာရီပေါ်မှ ထုတ်ပယ်၍ရသော ပစ္စည်း၂ခုဖြစ်သည်။

အစကတည်းက ထန်မော့သည် ယုန်နက်က အနက်ရောင်မျှော်စင်ဘော့စ်ဟုဆိုခဲ့ပြီး အမှန်တရားနာရီက ၄င်းကို ငြင်းဆန်ခဲ့သည်။ ထို့ကြောင့်ပင် ၄င်းမှာ မျှော်စင်၏ ဘော့စ်လည်းမဟုတ်သလို မွန်းစတားလည်း မဟုတ်မှန်းသေချာသွားစေသည်။ ၄င်းမှာလည်းလူသားစင်စစ်သာဖြစ်လေသည်။

ယုန်နက်မှာ ပစ္စည်းအရေအတွက်နည်းသည့်အခါတိုင်း အမြဲအသာစီးရနေတတ်သည်။ ပစ္စည်းများသော အခါတွင်မူ ထန်မော့ကအသာစီးရသည်။ ၄င်းမှာ ယုန်နက်သည် ပစ္စည်းနည်းနည်းကိုသာ အာရုံပိုစိုက်နိုင်ခြင်းကြောင့်တော့မဟုတ်ချေ။ အနက်ရောင်မျှော်စင်မှ ၄င်းကိုပေးထားသော '၂ကွက်အသာစီး အခွင့်အရေးကြောင့်သာဖြစ်သည်။ သို့သော် ပစ္စည်းများများလာသည်နှင့် ထိုအသာစီးရမှုမှာလည်းပျောက်ကွယ်သွားလေသည်။

ယုန်နက်တွင် ၂ကွက်အသာစီးရမှုရှိလေသည်။ အဘယ်ကြောင့်မူ ထန်မော့သည် သူ့ကိုယ်သူနှင့် ယုန်နက်ကို ထုတ်ပယ်မိမှာမဟုတ်ပဲ အလှည့်တိုင်းတွင် အနည်းဆုံး ၂ကွက်စီဆုတ်နေခဲ့ရ၍ဖြစ်သည်။

၄င်းကို သတိထားမိရန် ထန်မော့အတွက်လည်း ခက်ခဲခဲ့သည်။ ဥပမာ ဂိမ်းပထမအလှည့်တွင် ပစ္စည်း၆မျိုးရှိပြီး သူတစ်ကွက်ဆုတ်သွားခဲ့ရသည်။ ထန်မော့မှာ မိမိသည် ပစ္စည်း၂ခုကိုမှန်အောင်ဖြေပြီး ၄ခုကိုမှားယွင်းခဲ့သည်ဟုသာ ထင်နေခဲ့သည်။

ထို့ကြောင့် သူသည်တစ်ကွက်တိုးခဲ့သော်လည်း ၂ကွက်အလိုလိုနောက်ကျနေခြင်းပင်။ အဆုံးတွင်တော့ သူ့မှာ ၁ကွက်ဆုတ်လိုက်ရရုံသာတတ်နိုင်လေသည်။ (၀+၁-၂ = -၁)

သို့သော်သူသည် ပစ္စည်း၄ခုကိုမှန်အောင် ဖြေနိုင်ခဲ့လေသည်။ သို့နှင့် ၂ကွက်တိုးသွားခဲ့သော်လည်း သူ့ကိုယ်သူနှင့် ယုန်နက်ကို မထုတ်ပယ်မိသဖြင့် ၂ကွက်ပြန်ဆုတ်ရပြန်သည်။ အမှားတစ်ခုကိုပါ ထည့်ပေါင်းလိုက်ပါက တစ်ကွက်ဆုတ်လိုက်ရခြင်းဖြင့် အဆုံးသတ်သွားသည်။

အခြားဥပမာအနေဖြင့် ပြီးခဲ့သောအခေါက်တွင် ပစ္စည်း၂ခုသာပေါ်လာခဲ့ပြီး ထန်မော့အတွက် ပစ္စည်းများကို လျှင်မြန်စွာ ထုတ်ပယ်ပြီး ဂိမ်းကိုအနိုင်ယူချင်စရာကောင်းနေခဲ့သည်။ သို့သော် ထန်မော့ အရှုံးပေးရန်ဆုံးဖြတ်လိုက်သည်။ သူသည်ထိုပစ္စည်း၂ခုကို မထုတ်ပယ်ခဲ့ချေ။ ၄င်းကိုဖြေခဲ့ရင် သူတစ်ကွက်တိုးသွားနိုင်သော်လည်း ယုန်နက်နှင့် သူ့ကိုယ်သူမထုတ်ပယ်ထားမိသဖြင့် ၂ကွက်ထပ်ဆုတ်ရပါက ထန်မော့၏ အဖြေမှားယွင်းသည်ဟုသာ ထွက်လာမည်ဖြစ်သည်။

၄င်းကိုလက်လျှော့လိုက်ပြီး ၄ကွက်ဆုတ်လိုက်ရသောအခါမှ သူသေချာသွားခဲ့သည်။ ထိုအလှည့်တွင် နာရီပေါ်၌ သူလက်လျှော့လိုက်သော ပစ္စည်းမှာ ၂ခုတည်းမဟုတ်ပဲ ယုန်နက်နှင့် သူကိုယ်တိုင်လည်း ပါ၀င်နေသည်ဟုပင်။

ဂိမ်း၏စည်းမျဥ်းတွင် ချို့ယွင်းချက်ကြီးတစ်ခုရှိနေခဲ့သည်။ အကယ်၍ထန်မော့နှင့် ယုန်နက်သာ အမှန်တရားများကို ဆက်တိုက်ရှာဖွေထုတ်ဖော်နေခဲ့ပါက မည်သူသည် အနိုင်ရရှိသူ ဖြစ်လာလိမ့်မည်လဲ။

အမှန်တရားနာရီတွင် အနိုင်ရရှိသူတစ်ယောက်သာ ရှိရပေမည်။ အကယ်၍ ကစားသမား၂ဦးစလုံး ပစ္စည်းများကို အတူတကွထုတ်ပယ်လိုက်ပါက အနိုင်ရရှိသူမှာ မည်သူဖြစ်မည်လဲ။ ၄င်းကိုရှင်းပြပေးနိုင်သော အဖြေတစ်ခုသာရှိသည်။ ၄င်းမှာ ယုန်နက်အတွက် ဂိမ်းစည်းမျဥ်းများက ကွာခြားနေခြင်းပင်။

ထန်မော့က ပစ္စည်းများအားလုံးကိုထုတ်ပယ်၍ ဂိမ်းကိုရှင်းလိုက်နိုင်သော်လည်း ယုန်နက်မှာမူ မတူချေ။

ထန်မော့မှာ ယုန်နက်၏ ရည်ရွယ်ချက်အမှန်ကို စစ်ဆေးရန် ထိုပစ္စည်း၂ခုကို လက်လျှော့ခဲ့ခြင်းဖြစ်သည်။

၁၀မိနစ်ကျော်လွန်သွားပြီးနောက် ရရှိလာသောအဖြေက ယုန်နက်၏ရည်ရွယ်ချက်ကို သိသာစေခဲ့သည်။

အချိန်၁၀မိနစ်မှာ လျှင်မြန်စွာကုန်လွန်သွားပြီး အမှန်တရားနာရီ၏အလယ်တွင် ပစ္စည်း၁၄ခုပေါ်လာခဲ့သည်။ ယုန်နက် ထိုပစ္စည်း၁၄ခုကိုကြည့်ရင်း တစ်ခုခုကို နားလည်သွားခဲ့သည်။

"ငါမရှုံးသေးဘူး"

ထန်မော့ သူ့အား ကြည့်လိုက်လေသည်။

ယုန်နက်၏ မျက်နှာမှာ ပြန်လည်၀င့်သွားပြီး ကျေနပ်မှုများနှင့်ဆိုလာခဲ့သည်။

"ဟုတ်တယ်...ဂိမ်းကအခုမှစတာ ငါလည်းမရှုံးသေးသလို မင်းလည်းမနိုင်သေးဘူး...ငါမင်းကို မိအောင်လိုက်နိုင်သ၍ မင်းရှုံးမှာပဲ...အဲတော့ မင်းသိသွားတော့ရော ဘာဖြစ်လဲ...အခုမှတရားမျှတတဲ့ဂိမ်းက စတာ...ငါကျိန်းသေပေါက်နိုင်မှာ"

ထန်မော့ ယုန်နက်ကိုကြည့်လျက် ပြုံးလိုက်သည်။

သူကတိတ်တဆိတ်ဆိုလိုက်လေသည်။

"ငါက ယေဘုယျအမှန်တရားကို ခန့်မှန်းမိပြီးပြီ...မသေချာသေးတာတစ်ခုပဲရှိတယ်...အနက်ရောင်မျှော်စင်က လူတွေကို မျှော်စင်ဂိမ်းထဲဆွဲသွင်းနိုင်တယ်ဆိုတော့ မြေအောက်လူသားတွေကိုရော မွန်းစတားတွေကိုပါ ဆွဲသွင်းနိုင်မှာပဲ...ငါဂိမ်းထဲကို၀င်တာတော့ကြေညာခဲ့တာက ဒါက ငါ့ရဲ့တစ်ဦးတည်းဂိမ်းတဲ့ ဒီလိုဆိုတော့..."

စက္ကန့်လက်တံမှာ ရွေ့လျားနေပြီး နာရီမှ စက်သံများတချက်ချက်မြည်နေခဲ့သည်။ ထို့နောက် ကစားသမား၂ဦး အမှန်တရားကို ထုတ်ပယ်ရန် သတိပေးလာခဲ့လေသည်။

ထိုအမှန်တရားနာရီ၏နောက်ခံအသံနှင့်အတူ ထန်မော့၏ မျက်လုံးတို့ အေးစက်သွားခဲ့သည်။

"ငါမသေချာတာတစ်ခုက ..."

သူ၏စကားလုံးများမှာ တစ်လုံးချင်းစီရှင်းလင်းပြတ်သားနေခဲ့သည်။

"မင်းက လူ ကစားသမားလား"

ယုန်နက်၏ အမူအယာမှာပြောင်းလဲသွားခဲ့ပြီး ရုတ်တရက် ရယ်ချလာခဲ့သည်။

"ငတုံး ငါ့ကို လူလို့ထင်တယ်ပေါ့...ငါကြားဖူးသမျှထဲမှ အရယ်ရဆုံးဟာသပဲ...ငါမင်းကို သေချာပေါက်စားပစ်မှာ...ဟားဟားဟား တစစီဆွဲဖြဲပြီးစားပစ်မှာ"

ထန်မော့၏နှုတ်ခမ်းတို့တွန့်ကွေးသွားခဲ့သည်။

"အိုး...မင်းကတကယ်လူပဲ"

ယုန်နက်၏ရယ်သံမှာ ရပ်တန့်သွားခဲ့ပြီး ထန်မော့ကို မယုံနိုင်စွာ ကြည့်လာခဲ့လေသည်။ ထန်မော့မှာမူ သူ့ကိုကြည့်မနေတော့ပဲ နာရီပေါ်မှ ပစ္စည်း၁၄ခုကိုသာကြည့်နေခဲ့လေသည်။

ယုန်နက် အော်ဟစ်လာခဲ့သည်။

"ထန်မော့"

ထန်မော့မှာ တန့်သွားပြီးနောက် သူ၏မျက်ခုံးကိုပင့်လိုက်သည်။

"ငါ့နာမည်ကိုတောင်သိတယ်လား... နည်းနည်းတော့ မတရားဘူးနော်"

ဆယ်ကြိမ်မြောက် အမှန်တရားထုတ်ပယ်သည့်ဂိမ်း စတင်ခဲ့ချေပြီ။

🌍

Prev Next