MM Story Teller

Chapter 182

Viewers 33k

🌍Chapter 182

ထန်မော့သည် ထိုကလေးက အလောင်းတွေအများကြီးကို ရုတ်တရက်မြင်လိုက်ရ၍ လန့်သွားသည်ဟု ထင်လိုက်မိလေသည်။

သို့သော် ဖူ၀မ်ရှန်းယခင်ကလည်း လူသေများ မကြာခဏမြင်ဖူးသည်မဟုတ်ပါလော။ နန်ကျင်း အမှိုက်ရှင်းလင်းရေးဂိမ်းတွင် လူများအစုလိုက်အပြုံလိုက်သေကြေကြတုန်းကတောင် ထိုကလေးမှာ ဤမျှတုန့်ပြန်မှုမကြီးမားခဲ့သလိုပင်။

ထန်မော့ကမေးလိုက်သည်။

"သူတို့ကို အခြားတစ်နေရာကိုပဲ ဆွဲသွားလိုက်ရမလား"

သူကထိုကလေး ဤအလောင်း၄လောင်းကို ကြောက်ရွံ့နေသည်ဟု ထင်မိ၍ပင်။

ဖူ၀မ်ရှန်း တံတွေးကိုမြိုချလျက် သူ၏အစ်ကိုနှင့် ထန်မော့ကို အံ့အားသင့်စွာကြည့်လိုက်မိသည်။ သူ၏လေသံမှာ အလွန်စိတ်လှုပ်ရှားနေပြီးဆိုလာခဲ့သည်။

"ဘာတွေဖြစ်သွားတာလဲ အစ်ကိုထန်၊ ဘာတွေသောက်ကျိုးနဲဖြစ်သွားတာလဲဟင်။ ကျွန်တော့်အစ်ကိုကဒီအတိုင်းပြေးထွက်သွားတယ်။ အပြင်ဘက်မှာ ကျွန်တော်တို့ကို သတ်ဖို့စောင့်နေတဲ့လူတွေပုန်းနေတာကို ဘယ်လိုသိသွားတာလဲ။ ဟိုလူကိုဘာလို့အရင်သတ်လိုက်တာလဲ။ သူကဘာတွေထူးခြားနေလို့လဲ၊ အစ်ကိုထန်ဘာတွေဖြစ်နေတာလဲ၊ ဘာတွေသောက်ကျိုးနဲဖြစ်သွားတာလဲလို့"

ဖူ၀မ်သော်က သတ်လတ်ပိုင်းလူကြီး၏ ကိုယ်ကို ဓါတ်ဆီဆိုင်ထဲသို့ ဆွဲယူလာခြင်းဖြစ်ပြီး ၄င်းကိုကြားလျှင် မျက်မှောင်ကျုံ့လိုက်မိလေသည်။

ဖူ၀မ်ရှန်းမှာလည်း သူအလွန်စိတ်လှုပ်ရှားနေမိသည်ကို သတိထားမိလိုက်သည်။ သူကချောင်းအသာဟန့်လိုက်ကာ

"ကျွန်တော်အခုလေးတင် ဘာတွေဖြစ်သွားတာလဲ သိချင်လို့ပါ။ အဲဒါ...ကျွန်တော်ဘာမှတောင်မသိလိုက်ဘူး။ အစ်ကိုတို့ကပြေးထွက်သွားပြီး ဒီလူ၄ယောက်ကို သတ်လိုက်ပြီလေ။ သူတို့ကိုကြည့်ရတာ ကျွန်တော့်တို့ကို ဒီနေရာမှာ အကြာကြီး စောင့်နေခဲ့သလိုပဲ"

ဖူ၀မ်သော် သတ်လတ်ပိုင်းလူကြီး၏ အလောင်းကို မြေကြီးပေါ်ပစ်ချလိုက်ပြီးနောက် အသာအယာဆိုလာသည်။

"မင်းအစ်ကိုထန်ကိုမေး"

ထိုကလေးက သူ့အား အစ်ကိုထန်ဟုခေါ်သည်မှာ ကိစ္စမရှိသော်လည်း ဖူ၀မ်သော်ကပါ အဘယ်ကြောင့် ထိုသို့ခေါ်ချင်နေရပါသနည်း။

ထန်မော့မှာ ဖူ၀မ်သော်၏ အစ်ကိုထန်ဟူသော စကားကြောင့် တန့်သွားမိပြီးမှ ဒူးထောက်လျက် ပထမဆုံးသေသွားသော သူအားတစ်စုံတစ်ခုကိုစစ်ဆေးရန်ကြိုးစားလိုက်သည်။ အဆုံးတွင် သူကမော့ကြည့်လျက်ဆိုလာသည်။

"ကျွန်တော်ထင်တာမှန်တယ်၊ ဒီလူမှာ...အချိန်နောက်ပြန်လှည့်တဲ့ စွမ်းရည်ရှိတယ်"

လွန်ခဲ့သော နာရီ၀က်ခန့်က ထန်မော့တို့၃ယောက်သား ဓါတ်ဆီဆိုင်ကို ရောက်လာခဲ့သည်။ ဖူ၀မ်သော်မှာဓါတ်ဆီရှာရန်ထွက်သွားချိန် ထန်မော့မှာလည်း လမ်းတစ်ဖက်မှ နားနေဆောင်တွင် စားစရာတချို့ရှာဖွေရန်သွားခဲ့သည်။ ပေကျင်းကိုရောက်လာသည်နှင့် ရှာဖွေနိုင်သော ရိက္ခာအကန့်အသတ်မှာ နည်းသထက်နည်းလာခဲ့သည်။ သူတို့၃ယောက်အတွက် လိုအပ်သော အစာနှင့်ရေပမာဏမှာ သိပ်မများသော်လည်း လုံး၀မလိုအပ်ဟု ဆိုလိုသည်လည်းမဟုတ်ချေ။ ထန်မော့မှာ အကုန်လုံးကိုကြိုတက်ပြင်ဆင်ထားလိုခဲ့သည်။

"အချိန်နောက်ပြန်ဆုတ်နိုင်တာသေချာတယ်။ သူတို့အချိန်ကိုနောက်ပြန်ဆုတ်ခဲ့တာနေမှာ။ အဲဒီကမည်းတူးနေတဲ့ စာအုပ်စင်ကြောင့်ပဲ၊ စာအုပ်စင်ကမည်းတူးနေအောင် မီးလောင်ထားပေမယ့် သူ့အပေါ်မှာ..."

ထန်မော့ခတ္တမျှတန့်သွားပြီးမှ

"မဂ္ဂဇင်းတစ်အုပ်ကအကောင်းအတိုင်းရှိနေတယ်"

၃ယောက်သားအတူလျှောက်လာခဲ့ပြီး မီးကျွမ်းထားသော စာအုပ်စင်ကို တွေ့လိုက်ရသည်။

ဤစာအုပ်စင်မှာ ထိုခိုး၀င်သူများပုန်းနေခဲ့သော နားနေဆောင်နောက်မှ အမှန်တကယ် လှမ်းမမြင်နိုင်ပေ။ ၄င်းမှာ မည်းချိတ်နေသော စတီးစင်တစ်ခုဖြစ်သည်။ သို့သော် ၄င်းအပေါ်တွင် လုံး၀မီးလောင်မထားသော အ၀ါရောင် မဂ္ဂဇင်းစာအုပ်တစ်အုပ်ရှိနေခဲ့သည်။

ဒီအခြေအနေကဘာများထူးဆန်းလို့လဲ...

တစ်ယောက်ယောက်က လက်ဆော့ပြီး မီးလောင်ထားသော စင်ပေါ် စာအုပ်တစ်အုပ်ကိုတင်သွားနိုင်သော ဖြစ်နိုင်ချေလည်း အလွန်များလေသည်။

သို့တိုင်အောင် ထိုမျှနှင့်ပင် လုံလောက်ခဲ့သည်။

လူသူကင်းမဲ့သောနေရာတစ်ခုတွင် မီးကျွမ်းထားသော စာအုပ်စင်တစ်ခုနှင့် စာအုပ်တစ်အုပ်ကိုတွေ့ပါက ထန်မော့ဘာကိုအရင်ဆုံးတွေးမိလိမ့်မည်နည်း။

ထန်မော့မှာ ဖူ၀မ်သော်နှင့် ဖူ၀မ်ရှန်းမည်သို့ထင်လိမ့်မည်ကိုမသိ။ သို့သော် သူ့အတွက်မူ တစ်စုံတစ်ယောက်က တမင်ချန်ခဲ့သော သဲလွန်စဟုခံစားရသည်။

၄င်းမှာ စုံထောက်၀တ္တုထဲမှ အဓိကဇာတ်ဆောင်မှာ ပုံမှန်မဟုတ်သောတစ်စုံတစ်ခုကို သတိထားမိသလိုပင်။ ထိုပုံမှန်မဟုတ်မှုအတွက် အကြောင်းပြချက်တစ်ခုရှိရလိမ့်မည်။ သူ့တွင် ထိုသဲလွန်စက မည်သည်ကိုရည်ညွှန်းမှန်း တွေးတောရန် အချိန်မရှိခဲ့ခြင်းသာ။ သူကဖြစ်နိုင်ချေတစ်ခုကိုသာတွေးမိခဲ့သည်။

"စာအုပ်စင်မီးလောင်သွားတုန်းက စာအုပ်ကအဲဒီပေါ်မှာ မရှိခဲ့လောက်ဘူး"

ဖူ၀မ်ရှန်းကအံ့အားသင့်သွားခဲ့သည်။

"ဘာလို့လဲ"

စာအုပ်စင်မှာ အပြင်အထန်လောင်ကျွမ်းထားသည်မို့ တစ်ချက်မျှထိလိုက်ရုံဖြင့် ပြိုကျလုနီးပါးပင်။ မဂ္ဂဇင်းမှာ လောင်ကျွမ်းရာအနည်းငယ်မျှမရှိ၍နောက်မှပြန်တင်ထားခြင်းဖြစ်လိမ့်မည်။

ဖူ၀မ်သော် ထန်မော့စကားကိုကြားလျှင် မျက်ခုံးပင့်လျက် လှည့်ကြည့်လိုက်မိသည်။ အစောပိုင်းတွင် ထန်မော့မှာ ထိုခိုး၀င်သူ၄ယောက်နှင့် ရင်ဆိုင်နေခဲ့ရ၍ စာအုပ်စင်အား သတိထားကြည့်ရန်အချိန်မရှိခဲ့ချေ။ သူကရှေ့သို့လှမ်းလျက် စင်ပေါ်မှ မဂ္ဂဇင်းကို ယူလိုက်သည်။ သူ၏လှုပ်ရှားမှုကြောင့် စင်မှာ တမဟုတ်ချင်းပြိုကျသွားတော့သည်။

ထန်မော့သည် ထိုမဂ္ဂဇင်း၏ခေါင်းစဥ်နှင့် ရက်စွဲကိုကြည့်လိုက်ကာ

"ဒီဟာက အတော်နာမည်ကြီးတဲ့မဂ္ဂဇင်းလေ။ ရက်စွဲက နို၀င်ဘာ၁၈ရက်နေ့"

ဖူ၀မ်ရှန်းချက်ချင်းသတိရသွားခဲ့သည်။

"အနက်ရောင်မျှော်စင်ဂိမ်းတွေ စဖွင့်တဲ့နေ့လား"

ထန်မော့ကခေါင်းညိတ်လိုက်ကာ

"အင်း ဒီလိုစာအုပ်စင်မျိုးတွေက နာမည်ကြီး စာအုပ်တွေအမြဲတင်ထားတတ်တယ်။ ဆိုင်ရှင်က ဖြတ်သွားတဲ့သူတွေတွေ့အောင် ရောင်းကောင်းတဲ့ စာအုပ်တွေကို တင်ပြထားမှာပဲ။ ဒီမဂ္ဂဇင်းကလည်း ဒီစာအုပ်မှာရှိနေတာကြာလောက်ပြီ အနည်းဆုံး ၅လလောက်ပေါ့"

ဖူ၀မ်ရှန်းမှာ နားမလည်သေးသော်လည်း ထန်မော့စကားကိုနားထောင်နေဆဲပင်။

သူသည်မူလကတော့ ထိုထူးဆန်းသော စာအုပ်စင်ကြောင့်တစ်ယောက်ယောက်က ပုန်းနေခဲ့သည်ဟု ထင်ခဲ့သည်။ အစမှအဆုံးအထိ ပတ်၀န်းကျင်ရှိမည်သည့်နေရာတွင် ပုန်းနေသည်ဆိုသည်ကိုရော သူ့အားခြုံခိုတိုက်ခိုက်မည်ကိုပါ သေချာမသိခဲ့ချေ။ သူကသံသယ၀င်နေခဲ့ရုံသာဖြစ်သည်။ ထို့ကြောင့် သူကထိုစာအုပ်စင်ကိုမြင်ပြီးသည်နှင့် ဖူ၀မ်သော်ထံ ကြက်ဆင်ဥကတဆင့် ဆက်သွယ်ခဲ့ခြင်းပင်။ လူ၂ဦးမှာ လျင်မြန်စွာ ဆုံးဖြတ်ချက်တစ်ခုကိုချခဲ့သည်။ တစ်ဦးမှာ နားနေဆောင်ဘက်ကို စစ်ဆေးရန်ဖြစ်ပြီး ကျန်တစ်ဦးမှာ စားသောက်ဘက်ဆက်ကိုစစ်ရန်ပင်။ အဘယ်ကြောင့်မူ ထို၂နေရာမှာ ပုန်းခိုရန်အကောင်းဆုံးနေရာများဖြစ်၍လည်းဖြစ်လေသည်။

မည်သူမျှခြုံခိုတိုက်ခိုက်ရန်စောင့်နေခြင်းမဟုတ်ပဲ ထိုစာအုပ်စင်အား တစ်ယောက်ယောက်က သည်အတိုင်း လက်ဆော့ထားခြင်းလည်းဖြစ်နိုင်ပေသည်။ သို့တိုင်အောင် ထန်မော့နှင့် ဖူ၀မ်သော်မှာ မည်သည့်သံသယမျိုးကိုမျှ သည်အတိုင်းလွှတ်မပေးချင်ခဲ့ချေ။

ထို့အပြင် ဖူ၀မ်သော်မသိသော်လည်း ဖူ၀မ်ရှန်းသိသောတစ်စုံတစ်ခုရှိသေးသည်။ ထန်မော့ကဆိုလိုက်သည်။

"ရှောင်ရှန်း မင်းဒီစာအုပ်ကို ဘာကလောင်သွားလဲဆိုတာ မသိဘူးလား"

ဖူ၀မ်ရှန်းတန့်သွားမိသည်။

"ကျွန်တော်သိတာလား"

"အင်း မင်းသိတာပေါ့"

ထိုကောင်လေးမှာခေါင်းငုံ့လျက် စဥ်းစားနေပြီးမှ ရုတ်ချည်း အလင်းပွင့်သွားပုံဖြင့်

"အဲဒီမီးခြစ်ဆံကြီးလား"

အမှန်ပင်။ ၄င်းမှာ မျက်နှာပြောင်လေး၏ မီးခြစ်ဆံကြီးပင်။

လွန်ခဲ့သော၂လခန့်က ရတနာကော်ရစ်တာတွင် ထန်မော့မှာ ပိုင်ရို့ယောင်၏ လက်မောင်းတစ်ဖက်ကို မီးခြစ်ဆံကြီးဖြင့်ရှို့ခဲ့ပြီး အညှာအတာမဲ့စွာဆိုခဲ့သည်။

"မင်းလက်ကို အခုဖြတ်မပစ်ရင် မင်းတစ်ကိုယ်လုံးအရှင်လတ်လတ်မီးလောင်ပြီး သေမှာနော်"

[ပစ္စည်း: မျက်နှာပြောင်လေး၏ မီးခြစ်ဆံ]

[ပိုင်ရှင်: ထန်မော့]

……

[အသုံးပြုပုံ: ညှိမ်းသတ်၍မရသောမီးတောက်၊ မီးခြစ်ဆံအား ဆန္ဒရှိသလိုမီးညှိနိုင်၊ မီးခြစ်ဆံကြီးဖြင့် တစ်စုံတစ်ခုကိုရှို့လိုက်သည်နှင့် ကျိုးကြောင်းပြသက်ရောက်မှုကြောင့် လောင်းကျွမ်းခံရသည့်အရာမှာ အဆုံးအထိ လောင်ကျွမ်းသွားမည်။ မီးကိုညှိမ်းသတ်ရန်မှာ စိတ်ပင်မကူးနိုင်အောင် ခက်ခဲ]

စာအုပ်စင်မှာ ဤမီးခြစ်ဆံကြောင့် လောင်ကျွမ်းသွားခြင်းပင်။

ကျိုးကြောင်းပြသက်ရောက်မှုကြောင့် ဤမီးခြစ်ဆံကြောင့်လောင်ကျွမ်းသွားသော အရာများမှာ အဆုံးအထိလောင်ကျွမ်းသွားလိမ့်မည်။

"ရှေ့တစ်ခေါက် အချိန်ပြန်လှည့်တုန်းက ကျွန်တော်လည်း ဒီဟာကို သတိထားမိလိမ့်မယ်၊ ဒါပေမယ့် ကိုယ့်ကိုယ်ကို ဘယ်လိုသတိပေးရမလဲဆိုတာမသိခဲ့ဘူး။ ဒါကြောင့် စာအုပ်စင်ကိုမီးရှို့ပြီး အဲဒီပေါ်က မဂ္ဂဇင်းတစ်အုပ်ကို ဖယ်ထားလိုက်တာဖြစ်မယ်"

ဖူ၀မ်ရှန်းသည် ထိုစာအုပ်စင်နှင့် ၄င်းပေါ်မှ မဂ္ဂဇင်းကို ကြည့်လိုက်သည်။

"အဲဒါကြောင့် ဒီမီးလောင်ထားတဲ့စင်ပေါ်မှာ မဂ္ဂဇင်းတစ်အုပ်ရှိနေတာ"

ဤပြဿနာမှာဖြေရှင်းပြီးသွားချေပြီ။ ဓါတ်ဆီဆိုင်တွင် ၃ယောက်သားမှာ ထိုအလောင်း၄လောင်းကို ရှင်းပစ်လိုက်ကြသည်။

ထန်မော့ လေထဲမှ သူ၏စွမ်းရည်စာအုပ်ကို ဆွဲထုတ်လိုက်သည်။ သူသည်နောက်ဆုံးစာမျက်နှာကိုလှန်လိုက်လေသည်။

[စွမ်းရည်: ဒီရေကအတက်က မြန်တယ်]

[ပိုင်ရှင်: ကျောက်ခဲ့ဝေ ( ခိုး၀င်သူ)]

[အမျိုးအစား: Atomicအမျိုးအစား]

[အသုံးပြုပုံ: သတ်မှတ်နေရာတစ်ခု၏ ရုပ်ပိုင်းဆိုင်ရာအခြေအနေကို မူလအခြေအနေသို့ပြန်သိမ်းနိုင်ခြင်း၊ ၁မိနစ်အတွင်းတည်ရှိသော အရာအားလုံး၏ ရုပ်ပိုင်းဆိုင်ရာအခြေအနေကို ပြန်လည်ထိန်းသိမ်းပေးသည်]

[အဆင့်: ၃]

[ကန့်သတ်ချက်: ရုပ်ပိုင်းဆိုင်ရာခွန်အားတိုးတက်မှုနှုန်း သုည၊ ဤစွမ်းရည်အားအသုံးမပြုမီ စက္ကန့်၆၀စာ ရုပ်ပိုင်းဆိုင်ရာပြောင်းလဲမှုကို ကိုယ်တိုင်အရင်ကြုံတွေ့ရမယ်။ ဤစွမ်းရည်ကို အသုံးပြုနေစဥ်အတောအတွင်း နယ်နိမိတ်အတွင်းရှိ သက်ရှိများအားလုံး ပြင်းထန်သောရုပ်ပိုင်းဆိုင်ရာလိုအပ်မှုကို ခံစားရမည်။ ၁ရက်တွင် ၇ကြိမ်အသုံးပြုနိုင်သည်။ ရုပ်ပိုင်းဆိုင်ရာအခြေအနေကို ထိန်းသိမ်းခြင်းအတွက် အသုံးပြုသူ၏

ဆဲလ်အသက်ကိုကုန်ဆုံးစေပြီး နယ်နိမိတ်အတွင်းရှိ အရာများ၏ ရုပ်၀တ္တုကိုပြန်လည်ထိန်းသိမ်းခြင်းမှာ ဆဲလ်များအသက်ပိုမိုကုန်ဆုံးစေလိမ့်မည်။]

[မှတ်ချက်: ဒီရေကအမြဲအမြန်တက်လာပြီး ကမ်းစပ်ကို အမြဲဖုံးလွှမ်းသွားတယ်]

[ထန်မော့ဗားရှင်း အသုံးပြုရန်အညွှန်း: တစ်နေ့တွင် ၁ကြိမ်အသုံးပြုနိုင်၊ ဆဲလ်အသက်ကုန်ဆုံးခြင်း ၂ဆပိုများမည်။ သက်ရှိခန္ဓာကိုယ်၏ ရုပ်ပိုင်းဆိုင်ရာ အခြေအနေကို ပြန်လည်မထိန်းသိမ်းပေးနိုင်ချေ ၅ရာခိုင်နှုန်းရှိသည်။ ထန်မော့အတွက်တော့ ၁မိနစ်ကြာတဲ့ ဒီရေပေါ့လေ၊ ဟ နေဦး... ထန်မော့ဒီရေက ၁မိနစ်ပဲကြာတာလား]

သူလမ်းဖြတ်ကူးစဥ်က ခံစားခဲ့ရသော ထူးဆန်းသော မသက်မသာခံစားချက်မှာ ဤစွမ်းရည်ကြောင့်ဖြစ်လိမ့်မည်။

ထန်မော့မှာ ဤစွမ်းရည်စာအုပ်၏ အပေါစားဆန်မှုကို အသားကျနေပြီးဖြစ်သည်။ သူ၏မျက်တောင်များက တုန်လှုပ်သွားသော်လည်း အဓိကအကြောင်းအရာများကိုသာ အာရုံစိုက်ထားလိုက်သည်။

ဤသည်မှာ အချိန်ကို တိုက်ရိုက်ပြန်ဆုတ်နိုင်ခြင်းမဟုတ်သော်လည်း သတ်မှတ်ထားသော နယ်နိမိတ်အတွင်းရှိအရာများ၏ ရုပ်၀တ္တုအခြေအနေကို လွန်ခဲ့သော ၁မိနစ်ခန့်ကအချိန်ဆီပြန်လှည့်ပေးခြင်းပင်။

ထန်မော့တွေးလိုက်သည်။

"သြော် ဒါကြောင့် စာအုပ်စင်ကမီးကျွမ်းနေပေမယ့် မဂ္ဂဇင်းနဲ့ ကျန်တဲ့ဟာတွေက နဂိုအခြေအနေကို ပြန်ရောက်သွားတာကိုး"

ဤသည်မှာ အချိန်ကိုပြန်ဆုတ်ခြင်းမဟုတ်ပဲ ရုပ်၀တ္တုပိုင်းဆိုင်ရာကိုပြန်ထိန်းသိမ်းခြင်းဖြစ်သည်။

"အဲဒီလူရဲ့ စွမ်းရည်ကို ရလိုက်လား"

ထန်မော့ခေါင်းညိတ်လိုက်သည်။ သူသည်စွမ်းရည်စာအုပ်ကို ကမ်းပေးလိုက်ရန်ပြင်လိုက်သော်လည်း ရုတ်ချည်းပြန်ရုတ်လိုက်မိပြန်သည်။ ထန်မော့ချောင်းဟန့်လျက် ထိုစာအုပ်ကို လေထဲသို့ပြန်လည်ပစ်ထည့်လိုက်သည်။

"သူ့စွမ်းရည်က အချိန်ကိုပြန်လှည့်တာမျိုးမဟုတ်ဘူး၊ သူ့စွမ်းရည်က..."

ထန်မော့ စကားလုံးတချို့ကို ရှာဖွေနေပြီးမှ ဆက်ပြောလာခဲ့သည်။

"သတ်မှတ်ထားတဲ့ နယ်မြေထဲက အရာတိုင်းရဲ့ ရုပ်၀တ္တုအခြေအနေကို လွန်ခဲ့တဲ့ ၁မိနစ်ကအတိုင်း ပြန်ထိန်းသိမ်းပေးတာ"

ကောင်းကင်ပေါ်ကမိုးလိုပင်။ လွန်ခဲ့သော ၁မိနစိခန့်က မိုးစက်များမှာ ရေငွေ့နှင့် ခဲနေသည့် နျူကလိယများပေါင်းစပ်ထားခြင်းပင်။ ၄င်းတို့မှာ တိမ်ထုများပေါ်မှ မြေပြင်ထံသို့ ဖြည်းညှင်းစွာ ကျဆင်းလာကြပြီးရေအိုင်နှင့်အတူရောနှောသွားခဲ့သည်။ သို့သော် အရာရာတိုင်းမှာ ဤစွမ်းရည်နှင့်အတူ နောက်ကိုပြန်လှည့်သွားခဲ့သည်။ မိုးစက်များမှာ အေးခဲနေသောနျူကလိယနှင့် ရေငွေ့များ၏အခြေအနေသို့ပြန်လှည့်သွားခဲ့သည်။ ထို့နောက် တိမ်တိုက်မည်းများအပေါ် ပြန်တက်သွားခဲ့သည်။

ထန်မော့၏သိပ္ပံနှင့်ပတ်သတ်သော အသိမှာ သိပ်မကောင်းလှချေ။ သူသည်စွမ်းရည်စာအုပ်ထဲမှ ရှင်းပြထားသည်တို့ကို အကြမ်းဖျင်းပြန်လည်တွေးတောလိုက်ကာ

"ခြုံပြောရမယ်ဆို နောက်ပြန်လှည့်တဲ့စွမ်းရည်လို့ပြောလို့ရပါတယ်၊ ဒါပေမယ့် ကျိုးကြောင်းပြသက်ရောက်မှုကိုတော့ ပြန်လှည့်လို့မရဘူး။ ဥပမာ မီးခြစ်ဆံကြီးကြောင့်လောင်သွားတဲ့ စာအုပ်စင်လိုပေါ့"

ဖူ၀မ်သော်ကမေးလိုက်သည်။

"ကန့်သတ်ချက်ရောရှိသေးတာလား"

ထန်မော့ကဆိုလိုက်သည်။

"ကန့်သတ်ချက်တွေတော့အများကြီးပဲ၊ တစ်နေ့မှာတစ်ကြိမ်ပဲ သုံးလို့ရတယ်၊ ပြီးတော့ အသုံးပြုတိုင်း အသက်ကုန်ဆုံးမှာ"

ဖူ၀မ်သော်မျက်မှောင်ကျုံ့လိုက်ကာ

"အသက်ကုန်ဆုံးတယ်"

ထန်မော့အကျဥ်းချုပ်ရှင်းပြလိုက်သည်။ အသုံးပြုသူ၏အသက်ကိုကုန်ဆုံးစေနိုင်သော တခြားစွမ်းရည်များလည်းရှိသည်။ ဥပမာ အလျင်လူသားကဲ့သို့ပင်။

ထန်မော့မှာ ထိုစွမ်းရည်ကို အတတ်နိုင်ဆုံးအသုံးမပြုရန် ဆုံးဖြတ်ထားသည်။ အဘယ်ကြောင့်မူ ဤစွမ်းရည်မှာ အလွန်စွမ်းအားကြီးလွန်း၍ပင်။ ၄င်းကိုအလွန်အကျွံအသုံးပြုမိပါက သူ၏သိစိတ်ရော မသိစိတ်ကပါ ၄င်းအပေါ်မှီခိုမိနေပြီး ၄င်းကိုသာဆက်တိုက်အသုံးပြုချင်မိလိမ့်မည်။

🌍

မရှင်းမှာစိုးလို့ နားလည်ထားသလို ထပ်ပြောပြမယ်နော်

ပထမဆုံး ထန်မော့ လျိုကြီးကို သတ်လိုက်တဲ့နေရာကနေစပြီး နောက်ပြန်လှည့်စွမ်းရည် ပြန်သုံးလိုက်တာပါ

ထန်မော့က ဒါကို ရိပ်မိပြီး စာအုပ်စင်ကို မီးခြစ်ဆံသုံးပြီး မီးရှို့ထားခဲ့လိုက်တာ

အခေါက်ခေါက် နောက်လှည့်အပြီးမှာ သူ နောက်ပြန်လှည့်စွမ်းရည်ရှိတဲ့သူကို သတ်နိုင်ခဲ့တယ်

Prev Next