Chapter 80

🚩Chapter -80

 Arc_4 . အွန်လိုင်းဂိမ်းနတ်ဘုရားက ငါ့ကိုအလိုလိုက်နေတယ် [ 18 ]

_____

စုချန်းဝမ်ယွဲ့ ဟွေ့မော့ယိရှောင်အား အဆင့်၁၀ထိပြန်ရောက်အောင်သတ်လိုက်ခြင်းသည် အချစ်ကြောင့်လော၊ လက်စားချေခြင်းလော။ 

အဆင့်၆၀နတ်ဆရာမက အဆင့်၇၀နတ်ဆရာမတစ်ယောက်အား ရှစ်မိနစ်တည်းနှင့် အပြတ်အသတ် အနိုင်ယူသွားခဲ့။ 

စုချန်းဝမ်ယွဲ့ အရူးအမူးသတ်ဖြတ်သူ ပြန်လည်ရောက်ရှိလာခြင်း။ 

ယခုတစ်ခေါက်တွင် စုဝမ်သည် ကမ္ဘာတစ်ဝှမ်းကျော်ကြားလျက်ရှိသည်။ ဟွာရှားပြည်နယ်၏ဂိမ်းဖိုရမ်တစ်ခုလုံး၌ သူမအကြောင်းဆွေးနွေးနေသည့်ပို့စ်များအား နေရာအနှံ့တွင်တွေ့နိုင်သည်။ ပို့စ်တိုင်းတွင် ကြည့်ရှုသူများမှ ရိုက်ကူးထားခဲ့သော စုဝမ်ကဟွေ့မော့ယိရှောင်ကို သတ်နေသည့် ဗီဒီယိုအား တင်ထား၏။ သို့သော်၎င်းက ဗီဒီယို အပြည့်အစုံမဟုတ်ပေ။ ၎င်းတွင် စုဝမ်က ဟွေ့မော့ယိရှောင်အား အကြိမ်ကြိမ်အခါခါသတ်နေသည့်အပိုင်းသာပါပြီး အခြားအကြောင်းအရာများမပါဝင်ချေ။

ဤပို့စ်ကိုတင်သောသူမှာ စုဝမ်အပေါ် လူထု၏အမြင်ညစ်ညမ်းစေရန်လုပ်နေကြောင်းအလွန်သိသာလှသည်။ လူတိုင်းက စုဝမ်အား ‘ကြီးနိုင်ငယ်ညှင်း’လုပ်သည်ဟုယုံကြည်လာကြတော့သည်။ 

ဤကိစ္စကလူထုအမြင်ကြား၌ ထိပ်ဆုံးရောက်နေသည့်အချိန်တွင် စုဝမ်ကဝူဖုန်းနှင့်အတူ အုပ်စုစခန်းတွင်ရှိနေ၍ တစ်စုံတစ်ယောက်နှင့်တွေ့ရန်စောင့်ဆိုင်းနေသည်။ 

‘ကောင်းကင်ဘုံကိုးထပ်ရှိဖီးနစ်’သည် အဆင့်၃သို့အောင်မြင်စွာအဆင့်မြှင့်တင်ခဲ့ပြီးဖြစ်သည်။ အုပ်စုအဖွဲ့ဝင်များ၏ ကန့်သတ်အရေအတွက်မှာလည်း အယောက်၅၀၀အထိသို့တိုးသွားသည်။ မူလက တစ်နာရီအတွင်း လူ၅၀၀ပြည့်သွားသော်လည်း ယခုတွင် အယောက်၂၀၀သာကျန်တော့သည်။ 

“အကုန်ရှင်းသွားပြီလား”

‘ကမ္ဘာမြေအဆုံး’က ဝူဖုန်းကိုကြည့်၍မေးလိုက်၏။ 

နေ့လည်က စုဝမ်သည် လူတိုင်းအား ဒရာမာကြည့်ရန်ဖိတ်ခေါ်ခဲ့သည်။ ထို့နောက် သူမက အုပ်စုထဲသို့ ဟွေ့မော့ယိရှောင်၏ တည်နေရာပို့ခဲ့သည်။ ၎င်းသည်လူတိုင်းအား ဒရာမာလာကြည့်စေပြီး ‘ကောင်းကင်ဘုံကိုးထပ်ရှိဖီးနစ်’အုပ်စုထဲသို့ ရောနှောဝင်ရောက်နေသော အခြားအုပ်စုများ၏သူလျှိုများကို လျှို့ဝှက်စွာရှာဖွေစေခဲ့သည်။ 

ထိုကဲ့သို့သောဗျုဟာကစုဝမ်အတွက် ပထမဆုံးအကြိမ်မဟုတ်ပေ။ ထို့အပြင်သူမက သူမ၏အစီအစဥ်များအား ဝူဖုန်းနှင့် အခြားသူများအား ဟိုးအရင်ကပင်ပြောပြထားခဲ့သည့်အတွက် ယခုတစ်ကြိမ် လူရှင်းလင်းထုတ်သည့် အစီအစဥ်က အောင်မြင်နေကြောင်းသတ်မှတ်နိုင်သည်။ 

“မပြီးသေးဘူး ကျန်သေးတဲ့လူတွေက တစ်ရာရာခိုင်နှုန်းယုံလို့မရပေမယ့် သူလျှိုတွေတော့မရှိတော့တဲ့ပုံပဲ” 

ဝူဖုန်းအသံက ယခင်ကလိုပင်တည်ငြိမ်နေ၏။ 

သူ့စကားများကိုကြားပြီးနောက် စုဝမ်ကခေါင်းညိမ့်လိုက်သည်။ “ငါတို့ ဖီးနစ်က အခုလောလောဆယ် လူအများကြီးမလိုသေးဘူး။ သစ္စာစောင့်သိတဲ့သူတွေကအဖိုးတန်တယ် ဒါပေမယ့်အများကြီးမရှိဘူး။ အခု ဒီလူအယောက်၂၀၀က အနာဂတ်မှာ အုပ်စုတိုးတက်လာရေးအတွက် အခြေခံအုတ်မြစ်တွေပဲ။ အုပ်စုအင်အားတောင့်လာတာနဲ့ သူတို့အားလုံးက တပ်သားတွေဖြစ်လာလိမ့်မယ်။ ဝူဖုန်း ခဏနေရင် ငါတို့ဖီးနစ် အ‌ပေါ်မှာ သစ္စာစောင့်သိပြီးပေးဆပ်နေသရွေ့ ဖီးနစ်ရဲ့လက်ရွေးစင်အဖွဲ့ထဲကိုပါခွင့်ရမယ်လို့ အုပ်စုကြေညာချက် ထုတ်လိုက်။ ဘယ်အဆင့်၊ ဘယ်ဇာတ်ကောင်ပဲဖြစ်ဖြစ် ပြီးတော့ စွမ်းဆောင်ရည်တွေနဲ့ အာရုံံခံနိုင်စွမ်းတွေလည်း ထည့်မစဥ်းစားဘူးလို့”

လက်ရှိတွင် ‘ကောင်းကင်ဘုံကိုးထပ်ရှိဖီးနစ်’၌ လက်ရွေးစင်အဖွဲ့များနှင့် တပ်သားများသိပ်မရှိသေးပေ။ ဤကဲ့သို့သော ကမ်းလှမ်းမှုမျိုးသည် အုပ်စုကြီးများထဲတွင်တောင်မှ သေချာအလုပ်ဖြစ်၏။ သို့သော် ‘ကောင်းကင်ဘုံကိုးထပ်ရှိ ဖီးနစ်’ကဲ့သို့ အုပ်စုငယ်လေးက ထုတ်ပြန်လာသည့်အခါ ထိရောက်မှုမပြင်းနိုင်သော်လည်း မနက်ဖြန်၌ ပူးပေါင်းမည့်မဟာမိတ်အုပ်စုက မည်မျှယုံကြည်စိတ်ချဖွယ်ကောင်းပြီး ကြောက်မက်ဖွယ်ကောင်းကြောင်း သူတို့အားလုံးမျက်မြင်ကြုံတွေ့လျှင် ဤလူအယောက်၂၀၀သည် သေချာပေါက် အုပ်စုထဲတွင် ကျန်ရစ်နေလိမ့်မည်ဟု စုဝမ်ယုံသည်။ အုပ်စုထဲတွင် သူလျှိုများကျန်ရှိနေလျှင်တောင်မှ ချက်ချင်းလက်နက်ချကြလိမ့်မည်။ 

ဂိမ်းလောကတွင် အင်အားသည် အရာအားလုံးဖြစ်သည်။ လက်ရှိသူမသာ စုရွေ့ကဲ့သို့ အခွင့်အရေးကိုအရယူနိုင် ခဲ့လျှင်....။

စုဝမ်ပြောသည်ကိုကြားသောအခါ ‘ကမ္ဘာမြေအဆုံး’ကခေါင်းညိမ့်လိုက်သည်။ သူက စုဝမ်၏နည်းလမ်းများကို ယုံသည်။ သူမက ရှစ်ထျန်းတွင် ဒုခေါင်းဆောင်အဖြစ် ငါးနှစ်ထမ်းဆောင်ခဲ့သည်ပင်။ ဘေးတွင်ရပ်နေသော ဝူဖုန်းက ဘာမှမပြောပေမယ့် သူ့ရဲ့မျက်နှာအမူအရာက အနည်းငယ် ထူးဆန်းနေ၏။ 

“ဘာဖြစ်လို့လဲ” စုဝမ်က ဝူဖုန်း၏မူမမှန်မှုကို ချက်ချင်းတွေ့ရှိသွားသည်။ 

“ဘာမှမဟုတ်ပါဘူး” 

သတိပြန်ကပ်လာသော ဝူဖုန်းကခေါင်းခါ၍ ပြောသည်။ ထိုအချိန်တွင် စုဝမ်သည် အုပ်စုအသိပေးချက်တွင် မီးလင်းနေလျက်ရှိကြောင်း သတိထားမိသည်။ သူမနှိပ်လိုက်သောအခါ သွေးနီရောင်စာတန်းများထွက်ပေါ်လာ၏။ 

ရှစ်ထျန်းအုပ်စုသည် သင့်အုပ်စုအား ရန်သူအဖြစ်သတ်မှတ်လိုက်ပါသည်။ ထိုအုပ်စုအား ရန်သူအဖြစ် ပြန်လည်သတ်မှတ်ပြီး သေသည်အထိတိုက်ခိုက်သွားမည်လား။ 

ဝူဖုန်းက သတ်မှတ်မည်ကိုရွေးလိုက်သည်။

သူရွေးချယ်လိုက်ပြီးနောက် အုပ်စုထဲမှလူများသည် ထိုမက်ဆေ့ချ်အား တွေ့လိုက်ရသည်။ အုပ်စုချန်နယ်တွင် လူများကစိတ်ရှုပ်ထွေးနေကြပြီး ဝူဖုန်း၏မျက်နှာကတော့ ယခင်ကဲ့သို့ အမူအရာမဲ့နေဆဲပင်။ သူက အုပ်စုအထူးအခွင့်အ‌ရေးကိုသုံးကာ ‘ဝံပုလွေအစွယ်’အားရန်သူအဖြစ်သတ်မှတ်လိုက်သည်။

အုပ်စုချန်နယ်တွင် ဒုတိယသတင်းတစ်ခုတက်လာသောအခါ သူရဲ‌ဘောကြောင်သည့်လူအချို့ သို့မဟုတ် စိတ်ဓာတ်ပိုင်းအားနည်းသည့်သူများက အုပ်စုမှထွက်သွားရန်ဆုံးဖြတ်လိုက်ကြသည်။ ဆယ်မိနစ်ကြာပြီးနောက် ‘ကောင်းကင်ဘုံကိုးထပ်ရှိဖီးနစ်’အုပ်စု၌ လူအယောက်၁၈၀သာကျန်တော့သည်။ 

“အခုအုပ်စုကြေညာချက်ထုတ်လို့ရပြီ” 

စုဝမ်က ယခုတစ်ကြိမ်တွင် တိရှစ်ထျန်းသည် သူမအုပ်စုအား အချိန်ကိုက် ရန်သူအဖြစ်သတ်မှတ်လာလိမ့်မည်ဟု ထင်မထားခဲ့ပေ။ ဤအခိုက်အတန့်က သဲများကိုစစ်ထုတ်ရန် အကူအညီပေးခဲ့လေသည်။ 

“အင်း” 

ဝူဖုန်းကချက်ချင်းပင် စုဝမ်ယခုလေးတင်ပြောလိုက်သည့်အရာများအား အုပ်စုကြေညာချက်အဖြစ် ထုတ်ပြန်လိုက်ပြီးနောက် စုဝမ်ကိုကြည့်၍အသံနိမ့်နိမ့်နှင့်ပြောလာ၏။ 

“အခုလေးတင် တိရှစ်ထျန်းက ငါ့ကို သီးသန့်စကားပြောခန်းကနေစာပို့လာတယ်။ သူက မင်းကို အုပ်စုထဲကနေ ထုတ်ပစ်စေချင်နေတယ်။ အဲ့လိုမှမဟုတ်ရင် ငါတို့ဖီးနစ်အုပ်စုကို မြေပုံတစ်လျှောက်လုံး လိုက်သတ်မယ်တဲ့” 

ထိုစာကိုဝူဖုန်းကလျစ်လျူရှုကာ ချက်ချင်းငြင်းလိုက်သည်။ သို့သော် အုပ်စုအတွက် တာဝန်သိစွာနှင့် ထိုစကားတို့ကိုပြောလိုက်၏။ 

“သူ့ရဲ့ အဆင့်နဲ့ ပစ္စည်းကိရိယာအကောင်းတွေကိုအသုံးချပြီး မြေပုံတစ်လျှောက်လူတွေကို လိုက်သတ်တာက တိရှစ်ထျန်းလုပ်နေကျအရာပဲ။ သူ့လိုလူမျိုးကို သူ့ထက်အင်အားပိုကြီးပြီး ကျိုးကြောင်းဆီလျော်တဲ့လူနဲ့ သင်ခန်းစာပေးခိုင်းသင့်တယ်။” 

ပြောနေစဥ် စုဝမ်မျက်နှာတွင် ရက်စက်သည့်အပြုံးတစ်ခုချိတ်ဆွဲထား၏။ 

“ဝူဖုန်း သီးသန့်စကားပြောခန်းကနေ တိရှစ်ထျန်းကို မနက်ဖြန်ညကိုးနာရီ ကြားနေမြေပုံမှာ သူ့တပ်ဖွဲ့တွေနဲ့လာခဲ့ဖို့ပြောလိုက်။ ငါသူ့ကိုအဲ့မှာစောင့်နေမယ်။”

“ဝမ်ယွဲ့... မဆင်မခြင်မလုပ်နဲ့။ အခုလောလောဆယ်မှာ မင်းကတိရှစ်ထျန်းရဲ့ပြိုင်ဘက်မဖြစ်နိုင်သေးဘူး” 

စုဝမ်ပြောတာကိုကြားသည့်အခါ ဝူဖုန်းကမျက်ခုံးတို့တွန့်ကျိုးသွားသည်။ တိရှစ်ထျန်းကဟွေ့မော့ယိရှောင်နှင့် မတူချေ။ သူကအဆင့်မြင့်ပြီး ပစ္စည်းကိရိယာကောင်းများရှိရုံသာမက ပိုအရေးကြီးသည်မှာ သူ၏သတ်ဖြတ်မှု အတွေ့အကြုံမှတ်များကအတော်လေးများသည်။ သူ၏ဇာတ်ကောင်နှင့် အာရုံခံနိုင်စွမ်းကလည်း ယှဥ်ပြိုင်နိုင်စရာမရှိချေ။ လက်ရှိအဆင့်၆၀တွင်ရှိနေသော စုဝမ်သည် သူ့ကိုသေချာပေါက်အနိုင်မယူနိုင်ပေ။ 

“ငါသူ့ကိုမနိုင်နိုင်ဘူး ဒါပေမယ့် သူ့ကိုသေ‌အောင်သတ်နိုင်တဲ့သူတစ်ယောက်ရှိတယ်”

စုဝမ်၏အသံသည် ယုံကြည်ချက်အပြည့်ရှိနေပြီး ဝူဖုန်း၏မျက်နှာကတော့ ဖော်ပြမရနိုင်သည့်ခံစားချက်တို့ ရှုပ်ထွေးနေသည်။

 “ဘယ်သူလဲ” ဘေးတွင်ရှိနေသော ‘ကမ္ဘာမြေအဆုံး’သည် စုဝမ်အားထူးဆန်းစွာကြည့်လာ၏။ 

အဲ့ဒါက ဒဏ္ဍာရီလာသားရဲကြီးလို့တော့ငါ့ကိုမပြောနဲ့နော်....။ 

အဆုံးမရှိညအုပ်စုခေါင်းဆောင်နှင့် စုချန်းဝမ်ယွဲ့တို့၏ ဆက်ဆံရေးနှင့်ပတ်သက်၍ ‘ကမ္ဘာမြေအဆုံး’က အဆောင်တွင် ‘ရေခဲတမျှအေးစက်သောခြေထောက်များ’ပြောပြတာကိုနားထောင်ခဲ့ဖူးသည်။ 

ထို့ကြောင့် ယခုလက်ရှိတွင် ‘ကမ္ဘာမြေအဆုံး’သည် ယဲ့ယွီကိုသာတွေးမိသွားသည်။ 

“ယဲ့ယွီပဲ” 

စုဝမ်၏အဖြေက သူမျှော်လင့်ထားသလိုပင်။ 

“ဝူဖုန်း တိရှစ်ထျန်းကိုငါပြောတဲ့အတိုင်းပို့လိုက်။ ပြီးတော့ ကမ္ဘာ့ချန်နယ်ထဲမှာ မနက်ဖြန်ကို ငါတို့ဖီးနစ်အုပ်စုက ရှစ်ထျန်းအုပ်စုနဲ့ ကြားနေမြေပုံမှာ မကျေနပ်ချက်တွေဖြေရှင်းကြမှာမို့လို့ လာကြည့်နိုင်တဲ့အကြောင်း လူတိုင်းကို အသိပေးလိုက်။” 

စုဝမ်တွင် ဝှက်ဖဲတစ်ချပ်ရှိနေကြောင်း သိသွားသောအခါ ဝူဖုန်းကလေးနက်စွာခေါင်းညိမ့်လိုက်သည်။ ယဲ့ယွီမည်မျှ အင်အားကြီးမားကြောင်းမသိသော်လည်း စုချန်းဝမ်ယွဲ့သည် ကောင်းကင်ဘုံကိုးထပ်ရှိဖီးနစ်၏လူ ဖြစ်နေသည့်အတွက် ယဲ့ယွီက တိရှစ်ထျန်းအား ချေမှုန်းနိုင်ခြင်း၊မနိုင်ခြင်းကိုစိတ်ပူမနေဘဲ သူတို့ ဖီးနစ်အုပ်စု တပ်သားများသည် စုချန်းဝမ်ယွဲ့၏နောက်တွင် ခြေတစ်လှမ်းပြန်မဆုတ်ဘဲ အတူရပ်တည်နေမည်ဖြစ်၏။

ဝူဖုန်းက အသိပေးချက်များကိုပို့နေကြောင်းသေချာသောအခါ စုဝမ်က ချက်ချင်းပင် စုရွေ့အား သီးသန့်စကားပြောခန်းမှတစ်ဆင့် ဆက်သွယ်လိုက်သည်။ 

ထို့နောက် သူမက ‘ကမ္ဘာမြေအဆုံး’ကိုလှည့်ကြည့်လိုက်၏။ 

“ငါလိုင်းဆင်းတော့မယ်။ လူတိုင်း ဒီနေ့ စောစောလိုင်းဆင်းပြီး အနားယူသင့်တယ်။ ‘ကမ္ဘာမြေအဆုံး’ နင်လိုင်းဆင်းပြီးသွားရင် အေးစက်သောခြေထောက်များကို ဒီည၁၁နာရီ ဖိုရမ်မှာ လူတွေအတက်ကြွဆုံးအချိန်ကျရင် သူရိုက်ထားတဲ့ဗီဒီယိုအပြည့်အစုံကိုတင်ဖို့ပြောလိုက်။” 

“နားလည်ပါပြီ” 

ကမ္ဘာမြေအဆုံးက စုချန်းဝမ်ယွဲ့အား ခေါင်းညိတ်ပြလိုက်သည်။ 

ယခုတွင် ကမ္ဘာ့ချန်နယ်တစ်ခုလုံးရှိလူများသည် ‘ကောင်းကင်ဘုံကိုးထပ်ရှိဖီးနစ်’အုပ်စုခေါင်းဆောင်က စပီကာအကြီးစားကိုသုံး၍ “တိုက်ပွဲကြေညာချက်” ကို သုံးကြိမ်သုံးခါကြေညာသွားကြောင်းတွေ့လိုက်ရ၏။ 

ခဏအကြာတွင် လူများသည် သွားကြည့်သင့်ကြောင်းစတင်ဆွေးနွေးလာကြသည်။

ကောင်းကင်ဘုံကိုးထပ်ရှိဖီးနစ်ကလူတွေက အရမ်းထောင်လွှားကြပြီး ကိုယ့်နေရာကိုယ်မသိကြဘူး။ ရှစ်ထျန်းအုပ်စုကိုစိတ်ခေါ်တာပေါ့လေ။ မနက်ဖြန်ကျရင် စိတ်နဲ့ကိုယ်နဲ့ပြန်ကပ်သွားအောင် အရိုက်ခံလိုက်ကြဦး။

ကမ္ဘာ့ချန်နယ်တွင် အုန်းအုန်းကျက်ကျက်ဖြစ်နေသည့်အချိန်၌ ‘အဆုံးမရှိည’၏အုပ်စုချန်နယ်တွင်လည်း တက်ကြွလျက်ရှိသည်။ 

မိန်းမလှလေး : အေးစက်သောလက်များ မနက်ဖြန်ပွဲကိုသွားကြည့်ရအောင်လေ။

ရေခဲတမျှအေးစက်သောလက်များ : ……..

ဝမ်းနည်းနေသောသိုးလေး : စုချန်းဝမ်ယွဲ့ကိုသွားကြည့်ချင်တယ်။ 

ရေခဲတမျှအေးစက်သောလက်များ : …….

သိုးပေါက်လေးရေ ဒါကသေချာပေါက် တမင်သက်သက်လုပ်နေတာမလား။ “စုချန်းဝမ်ယွဲ့”ဆိုတဲ့ စကားလုံးလေးလုံးက ခေါင်းဆောင်ကိုခေါ်ထုတ်နေတယ်ဆိုတာမသိဘူးလား။

သေချာပေါက်ပင် နောက်တစ်စက္ကန့်၌…..

ယဲ့ယွီ : မနက်ဖြန်ကျရင် ရှစ်နာရီခွဲအရောက် လိုင်းစောစောတက်လာခဲ့ကြ။ ကြားနေမြေပုံမှာစုဝေးမယ်။ မလိုက်တဲ့သူအားလုံး အုပ်စုကနေကန်ထုတ်ခံရမယ်။

မိန်းမလှလေး : ခေါင်းဆောင် အဖွဲ့လိုက်ကြီးသွားကြည့်မလို့လား။ 

ရေခဲတမျှအေးစက်သောလက်များ : ……

အုပ်စုအသိပေးချက် : ခေါင်းဆောင်ယဲ့ယွီ လိုင်းဆင်းသွားပါပြီ။ 

အင်း အဲ့လိုလိုင်းဆင်းသွားလိမ့်မယ်ဆိုတာသိသားပဲ။ 

‘ရေခဲတမျှအေးစက်သောလက်များ’လည်း လိုင်းဆင်းလိုက်သည်။ အခြားသူများ၏ခန့်မှန်းချက်များ၊ သံသယများနှင့်ယှဥ်လျှင် ‘ရေခဲတမျှအေးစက်သောလက်များ’က မနက်ဖြန်ခေါင်းဆောင်ဘာလုပ်မည်ကို သိသည်……။ 

ထိုည ၁၁နာရီ ၁၂မိနစ်တွင် လူအများစုက လိုင်းဆင်းသွားကြပြီဖြစ်သည်။ ယခုတွင် လင်ရှန်း၏ ဂိမ်းဖိုရမ်တွင် လူများပြည့်ကြပ်နေလေသည်။ ထိုအချိန်ကိုက်တွင် ဗီဒီယိုနှင့်ပို့စ်တစ်ခုသည် ရုတ်တရက် ထွက်ပေါ်လာခဲ့၏။

[ငါကအမှန်တရားနတ်ဘုရားပဲ] ဟွေ့မော့ယိရှောင်အပေါ် စုချန်းဝမ်ယွဲ့မကျေနပ်ချက်များ၏ အဖြစ်မှန်။ 

ဤပို့စ်သည် အကြောင်းအရာတစ်စုံတစ်ခုရေးမထားဘဲ ဗီဒီယိုဖိုင်အတိုင်းလိုက်သာဖြစ်သည်။ ဗီဒီယိုကိုဖွင့်လိုက်သောအခါ လူတိုင်း၏အမြင်ထဲသို့တိုးဝင်လာသည်မှာ ငွေလရောင်ရေကန်ပင်။ ထိုနေရာတွင် စုချန်းဝမ်ယွဲ့နှင့် ဟွေ့မော့ယိရှောင်တို့က တိတ်ဆိတ်စွာနှင့် မျက်နှာချင်းဆိုင်ရပ်နေကြ၏။

ထိုအချိန်တွင် နောက်ခံစကားပြောသံထွက်လာသည်။ ၎င်းက စူးရှနေပြီး တမင်သက်သက်ကိုပင် အသံဖျက်ထားသော ယောက်ျားသံဖြစ်သည်။ 

“အို ဟေး အဲ့ဒါ စုချန်းဝမ်ယွဲ့နဲ့ ဟွေ့မော့ယိရှောင်မလား။ ဒီရာဇဝင်တွင်မယ့် အချစ်ပြိုင်ဘက်နှစ်ယောက် ဘာလုပ်နေကြတာလဲ။ ချစ်ရပါသော ပရိသတ်ကြီး ကျုပ်နဲ့အတူ ကြည့်ရှုပေးကြပါဦး….” 

ထိုနောက်ခံစကားပြောသည် သိသိသာသာကိုပင် ဗီဒီယိုရိုက်ကူးထားသည့်သူမှထည့်ထားခြင်းဖြစ်သည်။ ထို့နောက်တွင် ရိုက်ချက်က မြင်ကွင်းချဲ့သွားပြီး ဟွေ့မော့ယိရှောင်နှင့် စုချန်းဝမ်ယွဲ့၏စကားများ၊ သူတို့နှစ်ယောက်၏ မျက်နှာအမူအရာများနှင့် လှုပ်ရှားမှုများကို ရှင်းရှင်းလင်းလင်းရိုက်ကူးထားလေသည်။ 

ဒါဆို ကိစ္စတွေကအဲ့လိုတွေဖြစ်ပျက်ခဲ့တာပေါ့။ 

အစီအစဥ်ကြေညာသည့်သူတွေကဲ့သို့ပင် ‘‌ရေခဲတမျှအေးစက်သောခြေထောက်များ’သည် အလွန်ထက်မြက်ကာ သူ၏နောက်ခံစကားပြောအား တိကျသည့်အချိန်တွင် ပြင်းထန်လှသောခံစားချက်တို့နှင့် ထည့်သွင်းထား၏။ ဥပမာအနေနှင့် ဟွေ့မော့ယိရှောင်သည် မတော်တဆ သူမနှင့်တိရှစ်ထျန်း၏ အိပ်ရာပေါ်မှဆက်ဆံရေးအား ဖော်ထုတ်လိုက်သည့်အချိန်တွင် ‘ရေခဲတမျှအေးစက်သောခြေထောက်များ’သည် တိကျစွာ နောက်ခံစကားပြောလာ၏။

“အို ‌ဟေး ဒါကစစ်မှန်တဲ့နတ်ဘုရားမနဲ့ လက်ဖက်စိမ်းမရဲ့ကြားက ကွာခြားချက်ပဲ။ တချို့လူတွေက ငါးနှစ်သိခဲ့တာတောင်မှ လက်မကိုင်ခဲ့ကြဖူးဘူး။ တချို့က သိတာဖြင့် ရက်ငါးဆယ်တောင်မရှိသေးဘူး အိပ်ရာပေါ်မှာ လူးလိမ့်နေကြပြီ။” 

ထို့နောက် စုဝမ်၏အဆက်မပြတ်လျင်မြန်သည့်တိုက်ခိုက်မှုများကြောင့် ဟွေ့မော့ယိရှောင်က ဒေါသတကြီးဆဲဆိုလာသည့် အချိန်တွင်လည်း ‘ရေခဲတမျှအေးစက်သောခြေထောက်များ’က နောက်ခံစကားပြောထည့်လာသည်။

“သေမှာကြောက်နေပြီး အွန်လိုင်းဂိမ်းကစားနေသေးတယ်။ အသတ်ခံရရင် ကိုယ်တိုင်ပြန်လက်စားချေကြပါ။ စုချန်းဝမ်ယွဲ့ကို အတုယူကြပါ။” 

ဗီဒီယိုတစ်ခုလုံးသည် ဆယ်မိနစ်ကျော်ကြာမြင့်သည်။ အဆုံးတွင် စုဝမ်က ဟွေ့မော့ယိရှောင်နှင့် တုလန်၏ဆက်ဆံ‌ရေးကိုဖော်ထုတ်လိုက်ပြီးနောက် ဟွေ့မော့ယိရှောင်၏မျက်လုံးများတွင် အမုန်းတရားများနှင့် ပြည့်နှက်သွားပြီး စုဝမ်က စာလိပ်ကိုသုံးကာ မြို့တော်သို့ကူးပြောင်းသွားသည်အထိ ‘ရေခဲတမျှအေးစက်သောခြေထောက်များ’သည် အရာအားလုံးအား သေချာရိုက်ကူးထားခဲ့၏။ 

ဗီဒီယိုပြီးသွားသည့်အခါ အနက်ရောက်မျက်နှာပြင်ပေါ်တွင် သွေးနီရောင်စာတန်းများပေါ်လာတော့သည်။ 

အမှားနဲ့အမှန်၊ ကျေးဇူးတရားနဲ့ အာဃာတ အရာအားလုံးဟာ လူတိုင်းရဲ့စိတ်မှာ ကိန်းအောင်းနေကြတယ်။

ဘာဆက်ဖြစ်မလဲဆိုတာသိချင်ရင် မနက်ဖြန် ညကိုးနာရီ ကြားနေမြေပုံမှာ စုဝေးကြပါ။ 

ကောင်းကင်ဘုံကိုးထပ်ရှိဖီးနစ် VS ရှစ်ထျန်း

ရာစုနှစ်တစ်ခုရဲ့တိုက်ပွဲကြီး ပြင်းထန်စွာစတင်ပါတော့မယ်။ 

ထိုပို့စ်သည်တက်လာလာချင်းတွင်ပင် ဂိမ်းဖိုရမ်၌ ရှာဖွေမှုနံပါတ်တစ်နှင့်ရေပန်းအစားဆုံးဖြစ်နေတော့သည်။

လင်ရှန်းတွင် အမျိုးသမီးကစားသူအများအပြားရှိပြီး အမျိုးသမီးများကစိတ်ဓာတ်နုနယ်သည်။ နေ့လည်ကထွက်ခဲ့သည့် စုချန်းဝမ်ယွဲ့က ဟွေ့မော့ယိရှောင်အား အနိုင်ကျင့်နေသည့် ဗီဒီယိုတက်လာသည့်အခါ ထိုအမျိုးသမီးကစာသူများက ဒေါသထွက်၍ စုချန်းဝမ်ယွဲ့အားဝိုင်းဝန်းဆဲဆိုခဲ့ကြသည်။ ယခုအမှန်တရားပေါ်ပေါက်လာသည့်အခါ စုချန်းဝမ်ယွဲ့အား ဆဲဆိုခဲ့ကြသော ထိုအမျိုးသမီးကစားသူများမှာ အလှည့်စားခံလိုက်ရသကဲ့သို့ ခံစားလိုက်ရသည်။ ရည်မှန်းချက်မြင့်မားသူ၏ အသုံးချခြင်းကိုခံခဲ့ကြရ၏။

ထို့ကြောင့် သူတို့က ခံပြင်းလာတော့သည်။ 

ထိုကဲ့သို့မကျေမနပ်ဖြစ်နေသည့်သူတွေ၏ခံစားချက်အောက်တွင် ဗီဒီယိုကိုတင်ခဲ့သောသူအား နေ့လည်ဘက်၌ လျင်မြန်စွာ ထုတ်ဖော်နိုင်လိုက်သည်။ ထိုလူများသည် ရှစ်ထျန်းအုပ်စုမှလူများပင်ဖြစ်၏။ ၎င်းက ရည်ရွယ်ချက်ရှိရှိ လုပ်ကြံခြင်းပင်။ 

ရလဒ်အနေနှင့် လူထုအမြင်တိုက်ခတ်ရာလမ်းကြောင်းသည် ပြောင်းလဲသွားတော့သည်။ ဟွေ့မော့ယိရှောင်သည် ရှစ်ချန်းအုပ်စုတစ်စုလုံးအား ပါဝင်ပတ်သက်စေရုံသာမက တိရှစ်ထျန်းသည်လည်း လူတိုင်း၏ ပြောစရာပစ်မှတ်ဖြစ်လာခဲ့တော့၏။

.............

ယဲ့ထျန်းကဂိမ်းဖိုရမ်သို့သွားခဲပြီး ထိုနေရာသည် နေ့တိုင်း ကိစ္စများစွာဖြစ်ပျက်နေလေသည်။ ၎င်းကယဲ့ထျန်းအား စိတ်အနှောင့်အယှက်ဖြစ်စေ၏။ သူကဝူဖုန်းနှင့် မနက်ဖြန် ကြားနေမြေပုံတွင်တွေ့မည့်တည်နေရာအား သတ်မှတ်ပြီးသည့်နောက်တွင် စောစောလိုင်းဆင်းကာ အနားယူခဲ့သည်။

‘နံနက်လေပြေညင်း’ဖုန်းဆက်လာသောအခါ သူအိပ်နေတုန်းဖြစ်သည်။ 

“ဘာဖြစ်လို့လဲ” 

ဖုန်းထဲတွင် ယဲ့ထျန်း၏အသံက အနည်းငယ်လေးပင်နေ၏။ 

သူ့အသံကိုကြားသောအခါ ‘နံနက်လေပြေညင်း’ကတွန့်ဆုတ်သွားသည်။ 

“အစ်ကိုထျန်း တကယ်လို့အချိန်ရရင် ဂိမ်းဖိုရမ်ကိုတစ်ချက်သွားကြည့်သင့်တယ်။ ဟွေ့မော့ယိရှောင်နဲ့ပတ်သက်တဲ့သတင်းတွေတက်နေတယ်။”

ဟွေ့မော့ယိရှောင်....။ 

ထိုနာမည်ကိုကြားသောအခါ ယဲ့ထျန်းကချက်ချင်းပင် လှုပ်လှုပ်ရှားရှားဖြစ်သွားသည်။ သူကဖုန်းချလိုက်ကာ အိပ်ရာထဲမှ အလူးအလဲထလာပြီး စာကြည့်ခန်းသို့လျင်မြန်စွာသွား၍ ကွန်ပျူတာကိုဖွင့်လိုက်သည်။ ပြီးနောက် လင်ရှန်းဂိမ်းဖိုရမ်ထဲသို့ သူ့အကောင့်ဖြင့်ဝင်လိုက်သည်။ 

အသည်းအသန်ရှာစရာပင်မလိုဘဲ ထိုပို့စ်အား ကြီးကြပ်သူမှထိပ်ဆုံးတွင် အထူးဖော်ပြထားသည်။

[ငါကအမှန်တရားနတ်ဘုရားပဲ] ဟွေ့မော့ယိရှောင်အပေါ် စုချန်းဝမ်ယွဲ့မကျေနပ်ချက်များ၏ အဖြစ်မှန်။ 

ယဲ့ထျန်းသည် ထိုပို့စ်အားဖွင့်၍ စိတ်နှစ်ကာအသေးစိတ်ကြည့်လိုက်သည်။ ကြည့်လေလေ သူ့မျက်နှာက မည်းမှောင်လေလေဖြစ်လာတော့၏.....။

___

🚩