Chapter 16

🥘Chapter 16

လပေါင်းများစွာ အလျင်အမြန်ကုန်ဆုံးသွားပြီးနောက် ရာသီဥတုမှာ ပို၍အေးလာခဲ့သည်။ ပိုင်ရှန်းကျစ် ဆိုင်အဝင်ပေါက်စီသို့ ခုံဆွဲလာကာ ထိုင်နေရင်းဖြင့် လမ်းကြားထဲတွင် ရွာသွန်းနေသည့် မိုးရေစက်များကို စောင့်ကြည့်နေမိသည်။ 

သုံးထောင်စားတော်ဆက်ကို လွှဲပြောင်းယူခဲ့သည်မှာ သုံးလ‌ လေးလခန့်ရှိပြီဖြစ်သောကြောင့် သူအနေနှင့် နေ့စဉ်ပုံမှန်လာရောက်ကြသည့် ထူးဆန်းသောဖောက်သည်များ၏ စကားဝိုင်းမှတဆင့် အချက်အလက်အချို့ကို စုဆောင်းမိခဲ့ပြီးဖြစ်သည်။

ဥပမာအားဖြင့် ဖောက်သည်အများစုမှာ သားရဲကမ္ဘာမှ ရောက်လာသူကြများ ဖြစ်ပြီး တိရစ္ဆာန်များမှ လူ့အသွင်ယူထားခြင်းမျိုးနှင့် ကွဲပြားခြားနားသည်။ သို့သော် တရုတ်ဒဏ္ဍာရီထဲတွင် ဖော်ပြထားသည့် မကောင်းဆိုးဝါးမျိုးလည်း မဟုတ်ကြပေ။ ၎င်းတို့မှာ သားရဲများမှ လူအဖြစ်ပြောင်းလဲထားသည့် သားရဲလူသားများသာဖြစ်ကြသည်။

တစ်ချိန်တည်းမှာပင် အချို့သောဖောက်သည်များတွင် သားရဲအသွင်မရှိကြသည်ကို ပိုင်ရှန်းကျစ် သတိပြုမိခဲ့သည်။ အချို့သောသူများတွင် သားရဲလက္ခဏာ လုံးလုံးပျောက်ကွယ်နေတတ်ပြီး အချို့မှာမူ မတူညီသော လောကများမှ လာရောက်ကြခြင်းဖြစ်သည်။ သို့သော်လည်း ထိုကဲ့သို့သော စားသုံးသူများမှာ လာခဲလှပြီး ယနေ့အထိ ပိုင်ရှန်းကျစ်သည် သုံးထောင်စားတော်ဆက်၏အနောက်တွင် လောကပေါင်းမည်မျှရှိသည်ကို သေသေချာချာ မသိနိုင်သေးပေ။

ဖောက်သည်များ၏အဆိုအရ သုံး‌ထောင်စားတော်ဆက်၏တည်နေရာမှာ အလွန်ဆန်းကြယ်ပြီး လော‌ကပေါင်းစုံ ဆုံစည်းရာတွင် ရှ်ိနေသည်ကို သူသိလိုက်ရသည်။

ထိုသူတို့၏နှလုံးသားထဲမှ သုံးထောင်စားတော်ဆက်၏ ပုံရိပ်သည်လည်း ထူးခြားမည့်ပုံပင်။ ၎င်းတို့မှာ လောကများအကြား ခရီးသွားလာနိုင်စွမ်းရှိကြပြီး သူတို့၏အဆိုအရ ဤသို့သောခရီးစဉ်များတွင် စွမ်းအင်ပြန်လည်ဖြည့်တင်းရန် လိုအပ်ပြီး လမ်းတလျောက်တွင် သုံးထောင်စားတော်ဆက်တစ်ခုတည်းသာ ပြန်ဖြည့်ပေးနိုင်မည့်နေရာဖြစ်နေခဲ့သည်။(ခရီးတထောက်နားနိုင်)

ယခင်အချိန်များတွင် သုံးထောင်စားတော်ဆက်၌ စွမ်းအင်ပြန်လည်ဖြည့်တည်းရသည်မှာ မြိုချရန်ပင်ခက်ခဲခဲ့သည်။ မဖြစ်မနေမဟုတ်ပါက မည်သူကမှဤနေရာသို့ လာမစားချင်ခဲ့ကြပေ။ ယခုအချိန်မှာမူ သုံးထောင်စားတော်ဆက်၏ဟင်းပွဲများမှာ အရသာရှိလာပြီဖြစ်သောကြောင့် သဘာဝကျစွာပင် လူအများမှာ လာရောက်ရန် ဆန္ဒရှိလာကြသည်။

စားသောက်ဆိုင်၏ထူးခြားမှုအကြောင်းကို သိရှိလိုက်ရပြီးနောက် အားလပ်ရက်ယူခြင်းအပေါ် ပိုင်ရှန်းကျစ် အပြည့်အဝစိတ်အေးသွားခဲ့သည်။ ၎င်း၏အနေအထားမှာ အထူးတလည်ဖြစ်ကာ အစားမထိုးနိုင်လုနီးပါးဖြစ်နေသောကြောင့် သူအနေ့နှင့် စိုးထိတ်နေရမည့်အရာမရှိတော့ချေ။

လမ်းကြားထဲတွင် ကျဆင်းနေသည့် မိုးပြေးလေးအား ပိုင်ရှန်းကျစ် လက်ဖက်ရည်ခွက်နှင့်အတူ ထိုင်လျက် တိတ်တဆိတ်စောင့်ကြည့်နေမိသည်။ မတူညီသည့်လောကပေါင်းစုံမှ ဧည့်သည်များမှာ အဝင်ပေါက်တွင် ရပ်နေသည့်အချိန်၌ မည်သည့်သော ပုံသဏ္ဍာန်ရှိနိုင်မည်နည်း။ ပိုင်ရှန်းကျစ် တွေးနေမိသည်။

ဤကမ္ဘာကြီးမှာ အမှန်တကယ် ထူးခြားဆန်းကြယ်လှ၏။ သားရဲကမ္ဘာတည်ရှိမှုသည်ပင် သူ့အား သိချင်စိတ်များ ပေါ်လာစေသောကြောင့် အခွင့်အရေးရမည်ဆိုပါက ပိုင်ရှန်းကျစ် လူကိုယ်တိုင်သွားရောက် ကြည့်ရှုချင်မိသည်။

ရက်အနည်းငယ်ကြာပြီးနောက် ပိုင်ရှန်းကျစ် အလိုရှိနေသော အခွင့်အရေးကိုရရှိခဲ့သည်။ သေချာပေါက်ပင် ထိုနေရာသို့ လူကိုယ်တိုင်သွားရခြင်းမျိုးမဟုတ်ဘဲ တုလင်းလင်းထံမှ သူ့အတွက်ဝယ်ပေးရန် တောင်းဆိုခဲ့သော ထွန်ထွန်ဆက်သွယ်ရေးစက်ကို ရခဲ့ခြင်းဖြစ်သည်။ သုံးထောင်စားသောက်ဆိုင်တွင် လိုင်းရှိကြောင်း ရှာတွေ့‌သွားစဉ်ကတည်းက ထွန်ထွန်စက်လိုချင်နေခဲ့ခြင်းဖြစ်သည်။ ပိုင်ရှန်းကျစ် တုလင်းလင်းထံ လွန်ခဲ့သောအချိန်များထဲက ဝယ်ပေးရန်ပြောခဲ့သော်လည်း သားရဲကမ္ဘာတွင် ထွန်ထွန်စက်တစ်လုံးဝယ်ရန် ဤမျှရှုပ်ထွေးသည့် အဆင့်ပေါင်းများစွာ လိုအပ်မည်ဟု သူမထင်မိခဲ့ပေ။ ၎င်းအတွက် နှစ်လခန့်ကြာမြင့်ခဲ့ပြီး အဆုံးတွင် ယ‌မန်နေ့ကမှ ထွန်ထွန်စက်မှာ ပိုင်ရှန်းကျစ်၏လက်ထဲသို့ ရောက်ရှိလာခဲ့သည်။

ယနေ့သည် သူ၏ပိတ်ရက်ဖြစ်သောကြောင့် ပိုင်ရှန်းကျစ် အိပ်ရာပေါ်တွင်လဲလျက် အခြားကမ္ဘာမှ ဆဲလ်ဖုန်းဟုခေါ်ဆိုနိုင်မည့် ထွန်ထွန်ဆက်သွယ်ရေးစက်ကို စမ်းသုံးကြည့်နေခဲ့သည်။ ထွန်ထွန်စက်အား ဤသို့ခေါ်ဆိုရခြင်းမှာ ပြဿနာမဟုတ်ပေ။ သူ၏အမြင်အရ ထွန်ထွန်စက်မှာ ပုံပန်းသဏ္ဍာန်ကွာခြားသည်မှလွဲ၍ လုပ်ငန်းဆောင်တာများတွင် ဆဲလ်ဖုန်းတစ်လုံးနှင့် အတူတူဘဲဖြစ်သည်။ အခြေခံ ဖုန်းခေါ်ဆိုနိုင်မည့် လုပ်ငန်းစဉ်များပါဝင်ပြီး အင်တာနက်ပါရှိသေးသည်။ အချိန်အာကာသဖိုရမ်ပေါ်တွင်မူ လောကများအကြားမှ ဆွေးနွေးခန်းများစွာကို မြင်တွေ့နိုင်ပြီး တုလင်းလင်း၏ မိတ်ဆက်ပေးပုံအရ ဖိုရမ်ပေါ်တွင် လောကပေါင်းစုံမှ အသုံးပြုသူများစွာရှိကာ စိတ်ဝင်စားဖွယ်အချက်အလက်များမှာ မရေမတွက်နိုင်သည်အထိ အသစ်အသစ်သာပေါ်နေသောကြောင့် လောကများ‌အကြောင်း လေ့လာရာတွင် အကောင်းဆုံးနေရာတစ်ခုပင်ဖြစ်သည်။

ဤသို့ဖြင့် ထွန်ထွန်စက်အကြောင်း အချိန်ခဏမျှစူးစမ်းကြည့်ပြီးနောက် အချိန်အာကာသ‌ဖိုရမ်ဟုခေါ်သည့် အဖြူနှင့်အနက်ရောင်ရောထားသော အကွက်ကိုနှိပ်လိုက်သည်။

အာကာသဖိုရမ်၏ အဓိကစာမျက်နှာပေါ်တွင် ရေပန်းအစားဆုံးပို့စ်မှာ #သတင်းထူး…နဂါးမင်းသမီးလေးရဲ့ အထိခိုက်မခံတဲ့အချိန်ကိုရောက်နေပြီ၊ နတ်ဘုရားဘုံက နတ်မင်းသားဖုန့်ယန်က လိုက်နေရတယ်

ပိုင်ရှန်းကျစ် ထိုသတင်းပေါ်သို့ နှိပ်ကြည့်လိုက်သည်။ တုံ့ပြန်မှုအများစုမှာ ဤသို့ဖြစ်နေသည်ဆိုကတည်းက ပို့စ်အောက်ရှိဝင်ရေးသူများမှာ အမျိုးသမီးများဖြစ်ကြမည်ဟု ပိုင်ရှန်းကျစ် ခန့်မှန်းမိလိုက်သည်။

[ အရမ်းချိုတာပဲ…မင်းသားဖုန့်ယန်နဲ့ မင်းသမီးလေးအကြားက ဆက်ဆံရေးတာ တကယ်ပဲကောင်းတာ…မင်းသားဖုန့်ယန်ကလည်း အရမ်းနူးညံ့တာပဲ…]

[ အာ မင်းသားဖုန့်ယဲ့ရဲ့ ပိုလှတဲ့ပုံတွေရှိနေတာပဲ….ငါအမြန်သိမ်းဖို့လိုတယ်… မင်းသားဖုန့်ယန်ကသာ လောကသုံးထောင်မှာ အချောမောဆုံးဖြစ်တယ်ဆိုတာ သံသယဝင်နေဖို့တောင် မလိုဘူး…]

[ အဟင့် ဟင့် ဟင့် … မင်းသမီးလေးက အရမ်းကံကောင်းတာပဲ… ဒါက နတ်ဘုရားဘုံက နတ်မင်းသားတစ်ပါးလေ… ပြီးတော့ သူကတကယ်ကြီး အဝေးကြီးကနေ သူမကိုလိုက်နေတာ… အဟင့် ငါတော့ မကျေနပ်မှုတွေကြား နစ်သေတော့မယ်…]

[ ‌ငါတော့ မင်းသားဖုန့်ယန်ဆီမှာ အစ်ကိုတွေ ညီတွေများ ရှိနေမလားဆိုတာ သိချင်မိသား…ငါလည်း နတ်ဘုရားဘုံကခင်ပွန်းတစ်ယောက်လောက် လိုချင်လိုက်တာနော်…]

[ အားးးးး နတ်ဘုရားဘုံက လူကြီးလူကောင်းတစ်ယောက်… ဘယ်သူကများ မလိုချင်ဘဲရှိမှာလဲ…]

ပိုင်ရှန်းကျစ် တစ်ချက်အမြန်ကြည့်လိုက်ပြီးနောက် ပြန်ထွက်လာခဲ့သည်။ ထိုပိုစ့်အောက်မှ မန့်အများစုမှာ အဓိကဇာတ်လိုက်ဖြစ်သည့် ဖုန့်ယန်ဆိုသူအကြောင်းကို အလွန်အမင်းချဲ့ကားရေးနေကြခြင်းကြောင့် သူခေါင်းပင်ကိုက်လာရသည်။ 

ပိုင်ရှန်းကျစ် အောက်သို့ဆက်လက်ဆွဲချလိုက်ချိန်၌ လောကသုံးထောင်၏ အလှပဂေးဆယ်ယောက်နှင့် အခန့်ညားဆုံး အမျိုးသားဆယ်ယောက်အကြောင်းများ၊ နဂါးကလန်အကြောင်း ဖော်ပြထားသည့် လျှို့ဝှက်ချက်ငါးချက်အပြင် ဝိညာဉ်ကလန်မှ ကိစ္စများအား အတိအကျကိုင်တွယ်ပုံအကြောင်းများ စသည်ဖြင့် စိတ်ဝင်စားဖွယ်ရာ သတင်းများကို တွေ့လိုက်ရသည်။

 ပိုင်ရှန်းကျစ် ၎င်းတို့ထဲမှ ပိုစ့်တစ်ခုကို နှိပ်ကြည့်လိုက်ချိန်တွင် ဝေဖန်သံများပျံ့ကြဲသွားပြီး သိသိသာသာပင် အများစုမှာ ဖုန့်ယဲ့ကိုအပြင်းအထန် ကန့်ကွက်နေကြသည့် ဝိညာဉ်ကလန်၏ တက်ကြွသောပရိသတ်များဖြစ်ကြသည်။

သေချာပေါက်ပင် အချိန်အာကာသစစ်မြေပြင်ရှိ စစ်ပွဲအခြေအနေများကို အချိန်နှင့်အမျှ ထုတ်ပြန်ပေးနေသော အရေးကြီးသတင်းများလည်း ရှိပါသေးသည်။ ပိုင်ရှန်းကျစ် ပထမဦးဆုံးအနေဖြင့် ထိုမှော်လောကများမှာ လုံခြုံမှုမရှိသည်ကို သိလိုက်ရပြီး ၎င်းတို့၏ဘုံရန်သူမှာ ကျောက်တုံးကလန်ပင်ဖြစ်သည်။

ဟိုတစ သည်တစ ပြန့်ကြဲနေသော ပြန်စာများမှတဆင့် သူသိလိုက်ရသည်မှာ ကျောက်တုံးကလန်မှာ ကြမ်းတမ်းပြီး အခြားလောကများ၏ ကြွယ်ဝသောအရင်းအမြစ်များအတွက် စစ်ပွဲစတင်လေ့ရှိကြောင်းကိုပင်။ အဆုံး၌ ကျောက်တုံးဘုံမှာ ကျက်တီးမြေတစ်ခုဖြစ်ပြီး သူတို့၏တိုက်ခိုက်ရေးစွမ်းရည်နှင့် မရည်‌တွက်နိုင်သော လူဦးရေ(ကျောက်တုံးဖြစ်တည်မှု)များကြောင့် နာကျင်မှုကို မခံစားကြရချေ။ ထိုသူများကို သူတို့၏ခန္ဓာကိုယ်များအား အလုံးစုံဖျက်ဆီးခြင်းဖြင့်သာ သတ်နိုင်မည်ဖြစ်သောကြောင့် အလွန်ကြောက်မယ်ဖွယ်ကောင်းသည့် ပြိုင်ဘက်ဖြစ်နေစေသည်။

ကလန်ပေါင်းစုံမှ သူတို့၏စစ်တပ်များကို ကျောက်တုံးကလန်နှင့် ဆယ်စုနှစ်ပေါင်းများစွာ မတိုးသာမဆုတ်သာဖြစ်နေသော အချိန်အာကာသစစ်မြေပြင်သို့ ပို့ဆောင်ပေးနေရကြရသည်။

ပိုင်ရှန်းကျစ် ထိုသတင်းမှပြန်ထွက်လာပြီးနောက် အောက်သို့ ဆက်လက်ဆွဲချနေမိသည်။ ပို့စ်ဒါဇင်အချို့ခန့် ကျော်လွန်ပြီးနောက် သူအလွန်ရင်းနှီးနေသောအရာတစ်ခုကို မြင်တွေ့လိုက်ရလေသည်။

“ အချိန်လဟိုတယ်ရဲ့ မီနူးအသစ် : ဂေါ်ဖီအစာသွပ်လိပ်၊ အသားကြွပ်ကြော်၊ ဝက်သားနှပ်၊ ကြက်သားတုံးကြော်အစပ်… ဟင်းပွဲအသစ်တွေကို လာရောက်မြည်းစမ်းကြည့်ပါ…”

ဂေါ်ဖီအစာသွပ်လိပ်၊ အသားကြွပ်ကြော်၊ ဝက်သားနှပ်၊ ကြက်သားတုံးကြော်အစပ်… အစရှိသည်ဖြင့် ရင်းနှီးနေသောအမည်များမှ ပိုင်ရှန်းကျစ်၏အာရုံကို ဖမ်းစားသွားခဲ့သည်။ အကယ်၍ သူမှတ်မိထားသည်သာ မှန်မည်ဆိုပါက ဤနေရာတွင် ငရုတ်သီးအား ငရုတ်သီးဟု မခေါ်ကြဘဲ အဆိပ်သီးဟု ခေါ်ဆိုကြမည်ဖြစ်သည်။

ပိုင်ရှန်းကျစ် ပို့စ်ကိုထောက်ကြည့်လိုက်သည်နှင့် အဓိကစာမျက်နှာပေါ်တွင် အသားနှင့်အစာသွပ်ထားသည့် ဂေါ်ဖီလိပ်၊ ရွှေရောင်အသားကြွပ်ကြော်၊ ဆော့ဖုံးနေသည့် ဝက်သားနှပ်နှင့် မီးတောက်အနီရောင်ရှိသည့် ကြက်သားတုံးကြော်များ စသည်ဖြင့် ဟင်းပွဲအချို့၏ပုံများကို ပြသထားသည်ကို တွေ့လိုက်ရသည်။ ပိုင်ရှန်းကျစ် မဲ့ပြုံးပြုံးလိုက်မိသည်။ အကယ်၍သာ ထိုဟင်းပွဲများမှာ သူ၏ဆိုင်မှ ပေါက်ကြားသွားခြင်းမျိုး မဟုတ်ခဲ့ပါက သိသိသာသာပင် အချိန်လဟိုတယ်မှာ သူ့ဆိုင်ကိုပစ်မှတ်ထားနေခြင်းဖြစ်သည်။ အဆုံး၌ ၎င်းတို့သည် သူ့ဆိုင်မှာ ရောင်းအားအကောင်းဆုံးဟင်းလျာများ ဖြစ်နေခဲ့သည်လေ။

အောက်သို့ ဆက်ဆွဲချလိုက်သည်နှင့် လူအများမှာ သူ၏သုံးထောင်စားတော်ဆက်နှင့် အချိန်လဟိုတယ်တို့ကို နှိုင်းယှဉ်နေကြသည်အား သတိပြုလိုက်မိသည်။

[ ပွင့်ပွင့်လင်းလင်းပြောရမယ်ဆိုရင် သုံးထောင်စားတော်ဆက်အတွက် အာကာသအက်ကွဲကြောင်းထဲ သွားရတုန်းကဆို ငါနည်းနည်းအန္တရာယ်များတယ်လို့ ခံစားခဲ့ရတယ်… အခု အချိန်လဟိုတယ်မှာလည်း အဲ့သည့်ဟင်းပွဲတွေရနေပြီဆိုတော့ ပိုပြီးစိတ်ချသွားရတာပေါ့…]

[ ငါတော့ အချိန်လဟိုတယ်ကို သွားခဲ့ပြီးပြီ… အရသာက သုံးထောင်စားတော်ဆက်နဲ့ အများကြီးမကွာပါဘူး…ပိုပြီးအရေးကြီးတာက အချိန်လဟိုတယ်ရဲ့အနေအထားက ပိုကောင်းတယ်ဆိုတာပဲ… စားနေတုန်း မတ်တပ်ရပ်နေဖို့ မလိုတော့ဘူး…]

[ နောက်တစ်ချက်ထပ်ထည့်မယ်: အချိန်လဟိုတယ်မှာက စားဖိုမှူးတွေအများကြီးရှိတာဆိုတော့ အရသာရှိတဲ့ဟင်းလျာတွေစားဖို့ စောင့်နေစရာမလိုတော့ဘူး…]

[ တကယ်ကောင်းတယ်ဆိုရင် ငါ သည်နေ့လည်ခင်းကြ သွားမြည်းကြည့်ဦးမယ်…]

[ ပုံတွေက တကယ်ပဲတူတာပဲ…သူတို့လည်း အရသာရှိလောက်မယ်…အခုချိန်ကစပြီး အချိန်လဟိုတယ်ကနေ စားလိုက်လို့ရပြီပေါ့.. သုံးထောင်စားတော်ဆက်က အရမ်းဝေးလွန်းတယ်လေ…]

[ အာ သုံးထောင်စားတော်ဆက်က ဆိုင်ပိတ်ရက်တောင်ရှိသေးတယ်…ခြောက်ရက်တစ်ခါအမြဲတမ်းပိတ်တာ… တစ်ခါတလေ ငါသွားစားရင် ပိတ်ရက်နဲ့တိုးလာကော… ကျွတ် ကျွတ်…]

[ ဘယ်လိုပဲဖြစ်ဖြစ် အချိန်လဟိုတယ်ကဟာတွေက ဈေးတော့မသေးဘူးမလား…ပြီးတော့ အချိန်အာကာသစွမ်းအင်လည်း မပါလောက်ဘူးနော်.. ဟုတ်လား…]

[ ငါစမ်းစားကြည့်ပြီးပြီ..  တကယ်ပဲမပါဘူးဟ…ပြီးတော့ သုံးထောင်စားတော်ဆက်ကထက် သုံးပုံတစ်ပုံလောက် ပိုဈေးကြီးတယ်… ဒါပေမယ့်လည်း နေရာအနေအထားနဲ့ ဝန်ဆောင်မှုကို ပြန်စဉ်းစားကြည့်ရင်တော့ တန်ပါတယ်လေ…]

ပိုစ့်အောက်နားသို့ရောက်လေလေ သုံးထောင်စားတော်ဆက်အကြောင်း ပြောကြသည်မှာ ပို၍နည်းလာလေလေပင်ဖြစ်သည်။  ပိုင်ရှန်းကျစ် ဆက်သွယ်ရေးစက်ကို ပိတ်လိုက်ပြီးနောက် တရုတ်ပြည်မှလူများမှာ အခြားကမ္ဘာများသို့သွား၍ ထိုဟင်းများချက်နေကြသည်လားဟု တွေးနေမိသည်။ သို့သော်လည်း သူ များစွာဂရုစိုက်မနေမိချေ။ ၎င်းဟင်းလျာများမှာ ရှေ့အဆက်ဆက်ရှိလူများထံမှ ဆင်းသက်လာခြင်းဖြစ်ပြီး တရုတ်ပြည်ရှိ မည်သူကမှ ပိုင်ဆိုင်ခြင်းမရှိချေ။ လူတိုင်းတွင် ချက်ပိုင်ခွင့်ရှိလေသည်။

သို့သော်လည်း အကယ်၍သာ တရုတ်ပြည်မှလူမဟုတ်ခဲ့ဘူးဆိုပါက အကြောင်းအရာမှာ ကွဲပြားသွားပေလိမ့်မည်။

နောက်တစ်နေ့တွင် သုံးထောင်စားတော်ဆက်မှာ ပြန်ဖွင့်ပြီဖြစ်သော်လည်း တစ်ဦးတည်းသောဝန်ထမ်းဖြစ်သည့် ရှဲပေါ်ပေါ်မှာမူ မရှိနေခဲ့ပေ။ ထို့အပြင် လွန်ခဲ့သောရက်အနည်းငယ်ကတည်းက ရှဲပေါ်ပေါ် မပေါ်လာခဲ့သောကြောင့် သူချန်ပေးခဲ့သည့် ဆက်သွယ်ရေးနံပါတ်ကို ပိုင်ရှန်းကျစ်ခေါ်လိုက်သော်လည်း ဖုန်းမဖြေပါဟူ၍သာ ပေါ်လာခဲ့သည်။

ရက်အနည်းငယ်မျှ ထပ်မံကုန်လွန်ပြီးနောက် သုံးထောင်စားတော်ဆက်၏ စားသုံးသူဦးရေမှာ သိသိသာသာပင် ကျဆင်းလာသည်။ အချိန်အာကာသ‌ဖိုရမ်ပေါ်တွင်မူ အချိန်လဟိုတယ်၏ ဟင်းလျာအသစ်များ‌အကြောင်း ဆွေးနွေးသည့်ပိုစ့်များမှာ ပို၍ပို၍ထွက်ပေါ်လာသည်။ ထိုလူများမှာ သားရဲကမ္ဘာသားများမဟုတ်ဘဲ အခြားလောကမှလူများဖြစ်သည်ကို ပိုင်ရှန်းကျစ် သတိပြုမိသွားခဲ့သည်။ အခြားလောကသားအများစုမှာ အချိန်လဟိုတယ်၏ဟင်းလျာသစ်များအပေါ် တအံ့တဩဖြစ်နေရကြောင်း ဖော်ပြထားကြပြီး မယုံနိုင်စရာကောင်းအောင် အရသာရှိသည်ဟု ပြောဆိုနေကြသည်။

အချိန်လဟိုတယ်နှင့် သုံးထောင်စားတော်ဆက်တို့အကြား ကွာဟမှုကြီးကြီးမားမားရှိသည်ဟူသော ပိုစ့်အချို့ကို သူမြင်တွေ့ရခဲ့သော်လည်း အာရုံစိုက်မှုကို အပြိုင်အဆိုင်ရယူနိုင်ရန် မအောင်မြင်ခဲ့ကြပေ။ ထိုပိုစ့်များ၏အောက်တွင် ဝေဖန်မှုများစွာ ရှိနေခဲ့ကြသည်။ အဆုံး၌ အချိန်လဟိုတယ်မှာ လောကတိုင်းတွင် ဆိုင်ခွဲများစွာရှိသည့် အကြီးစားဟိုတယ်ကြီးတစ်ခုဖြစ်ပြီး သုံးထောင်စားတော်ဆက်မှာမူ တနိုင်တပိုင်ဆိုင်လေးတစ်ဆိုင်သာ ဖြစ်နေခဲ့လေရာ ကိုယ်တိုင်ကိုယ်ကျ လာရောက်ဖူးသူများမှလွဲ၍ အခြားသူများမှာ ရိုးရှင်းစွာပင် မယုံခဲ့ကြပေ။

ချင်းရှု အချိန်လဟိုတယ်၏ ဟင်းလျာအသစ်များကို မြင်တွေ့လိုက်ရချိန်၌ ကိစ္စများမှာ အခြေအနေမကောင်းကြောင်း သူမသိနေခဲ့သည်။ နောက်ပိုင်း လက်တွေ့သွားရောက်မြည်းစမ်းကြည့်လိုက်ချိန်တွင် ၎င်းတို့မှာ သုံးထောင်စားတော်ဆက်၏ မူရင်းလက်ရာနှင့် မယှဉ်နိုင်ကြောင်းကိုပါ သိလိုက်ရသည်။ မည်သို့ပင်ဆိုစေကာမူ သုံးထောင်စားတော်ဆက်တွင် မစားကြည့်ရသေးသူများအတွက် ထိုဟင်းပွဲအသစ်များမှာ အတော်အတန် အံ့ဩဖွယ်ရာကောင်းနေလိမ့်မည်ပင်။

ချင်းရှုအကြောင်းဆိုရမည်ဆိုလျှင် သူမသည် သားရဲလူသားတစ်ယောက်ဖြစ်သော်လည်း အွန်လိုင်းတိုက်ရိုက်ထုတ်လွှင့်သူအဖြစ် လုပ်ကိုင်နေသည်မှာ အချိန်အတော်ကြာပြီဖြစ်သောကြောင့် အချိန်လဟိုတယ်၏ ဤတစ်ကြိမ်ကိစ္စကဲ့သို့ မရိုးသားသည့်အရာများနှင့် ရင်းနှီးနေခဲ့သည်။ သုံးထောင်စားတော်ဆက်တွင် လအနည်းငယ်ခန့် အမြဲလိုသွားစားခဲ့သူ မည်သူမဆို အချိန်လဟိုတယ်၏ဟင်းပွဲများမှာ အရသာသာမက ပုံပန်းသဏ္ဍာန်ကိုပါ တုပထားသည်ကို ပြောနိုင်မည်ဖြစ်သည်။ သို့သော်လည်း ထိုကဲ့သို့ကိစ္စမျိုးမှာ သက်သေမရှိခြင်းကြောင့် ထောက်ပြနိုင်ရန် မလွယ်ကူပေ။ အထူးသဖြင့် အချိန်လဟိုတယ်ကဲ့သို့ အကောင်ကြီးတစ်ကောင်နှင့် ရင်ဆိုင်ရချိန်၌ ကိုယ်ပိုင်အခွင့်အရေးကို ကာကွယ်နိုင်ရန်မှာ မဖြစ်နိုင်သည့် အိပ်မက်တစ်ခုလိုပင် ဖြစ်နေပေမည်။

အင်တာနက်ပေါ်တွင် သုံးထောင်စားတော်ဆက်၏နောက်ကွယ်၌ နတ်ဘုရားကလန်ရှိကြောင်း ကောလဟာလများရှိကြသော်လည်း ၎င်းတို့မှာ ဒဏ္ဍာရီသာ ဖြစ်ကြသည်။

 သို့သော်လည်း အခြားတစ်ဖက်တွင်မူ အချိန်လဟိုတယ်တွင် နတ်ဘုရားကလန်၏ နောက်ခံရှိခြင်းမှာ အမှန်ဖြစ်သောကြောင့် အတော်လေးကံဆိုးလှသည်။ တစ်ချိန်တည်းမှာပင် သုံးထောင်စားတော်ဆက်တွင် နတ်ဘုရားကလန်၏ အထောက်အပံ့မရှိနိုင်ကြောင်း ချင်းရှု သဘောပေါက်သွားခဲ့သည်။ မဟုတ်ပါက အချိန်လဟိုတယ်မှ ဤသို့သောလုပ်ရပ်မျိုးကို မည်သို့လုပ်ရဲပါမည်နည်း။

နတ်ဘုရားကလန်မှာ ထိုကဲ့သို့အသေးအဖွဲ့ကိစ္စလေးများတွင် ကိုယ်တိုင်ဝင်ပါခြင်းမရှိချေ။ အချိန်လဟိုတယ်၏ အစစ်အမှန် ဆုံးဖြတ်ချက်ချနိုင်သူမှာ နဂါးကလန်သားတစ်ယောက်ဖြစ်သည်။ နဂါးကလန်မှာ နတ်ဘုရားကလန်နှင့် အရင်းနှီးဆုံးမျိုးနွယ်စုဖြစ်နေခြင်းကြောင့် သူတို့နတ်ဘုရားကလန်အား လုံးဝစော်ကားရဲမည်မဟုတ်ပေ။

ယခုအချိန်၌ သုံးထောင်စားတော်ဆက်၏ပိုင်ရှင်မှာ ဤဆုံးရှုံးမှုကို တိတ်တဆိတ်သည်းခံနေရန်သာ တတ်နိုင်ပေလိမ့်မည်။

တကယ်ကိုပင် ၎င်းမှာ အမှန်တရားဖြစ်နေခဲ့သည်။ ပိုင်ရှန်းကျစ်တွင် အချိန်လဟိုတယ်နှင့်သူကိုယ်တိုင်၏ ပတ်သက်မှုအကြား မည်သည့်သက်သေမှပြရန် မရှိနေချေ။ ထို့ထက်ပိုသည်မှာ အချိန်လဟိုတယ်ဟုခေါ်သည့်နေရာသို့ သူကိုယ်တိုင်သွားရောက်ရန်မှာလည်း မဖြစ်နိုင်သောကြောင့် သူ့အနေဖြင့် သည်းခံနေရန်သာ တတ်နိုင်ခဲ့သည်။

တော်သေးသည်မှာ စားသုံးသူဦးရေလျော့ပါးသွားသော်လည်း လုံးလုံးကျဆင်းသွားခြင်းမျိုး မဟုတ်ပေ။ ပိုင်ရှန်းကျစ်သည် တစ်ဦးတည်းသောဝန်ထမ်းဖြစ်နေခြင်းကြောင့် ၎င်းကိုသူကိုင်တွယ်နိုင်သေးသည်။ မည်သို့ပင်ဆိုစေကာမူ နောင်အနာဂတ်တွင် သူ့ဆိုင်အား အမြစ်မှကိုင်မလှုပ်ခံရရေးအတွက် ပိုင်ရှန်းကျစ် ဟင်းပွဲအသစ်များကိုချပြရန် ဆုံးဖြတ်လိုက်သည်။

🥘🥘Chapter 18

“ပလပ် ပလပ် …”

ထူးဆန်းသောအသံများမှ ဘေးဘက်မှထွက်ပေါ်လာသည်။

 သွေးစုပ်ဖုတ်ကောင်မင်းသားတစ်ဦးအနေဖြင့် လန့်စ်၏စားသောက်ပုံမှာ အပြီးပြည့်စုံဆုံးဖြစ်သည်။ သွေးကိုသာသောက်သည်ဟူသည့် အချက်နှင့်အတူ သူသည် အစဉ်အမြဲ အသံတစ်ချက်ပင်မထွက်စေဘဲ ကြော့ရှင်းစွာစားလေ့ရှိသူဖြစ်လေသည်။ ထို့ထက်ပိုသည်မှာ လန့်စ်အဖို့ စားသောက်ခြင်းကျင့်ဝတ်မသိသူ သာမန်ပြည်သူများနှင့် မည်သည့်အခါကမှ ထမင်းတစ်ဝိုင်းတည်း အတူတွဲမစားခဲ့ဖူးသောကြောင့် အဆိုပါ ပလပ် ပလပ် မြည်နေသံများမှာ သူ့အတွက် မရင်းနှီးနေခဲ့ပေ။

သည်ဟာက ဘယ်သံပါလိမ့်…

စိတ်ထဲတွင် သိလိုစိတ်များ ပြည့်လာသောကြောင့် လန့်စ် သူ၏သွေးနီရောင်မျက်လုံးများကို ဖွင့်ကြည့်လိုက်သည်။ မျက်ဆန်များမှာမူ အသာအယာရွေ့လျားသွားပြီ အသံထွက်နေသည့် မူလအရင်းအမြစ်ဖြစ်သော လက်ထောက်စီသို့ ရောက်သွားခဲ့သည်။

ထိုအချိန်၌ သူ့လက်ထောက်၏နှုတ်ခမ်းများမှာ နီမြန်းနေပြီး တူများကို ပန်းကန်လုံးကြီးစီသို့ဆန့်ကာ အငွေ့တထောင်းထောင်းထနေသည်ကိုပင် သတိမမူနေတော့ဘဲ ဝက်သွေးခဲတုံးကြီးတစ်တုံးကို ကောက်ယူ၍ ပါးစပ်ထဲသို့ထည့်နေခဲ့သည်။

“ ရှလွတ် ရှလွတ် ရှူး….”

လန့်စ်၏မျက်ခုံးများ အနည်းငယ်တွန့်ချိုးသွားရသည်

 “ အယ်လ်…”

အရှင်မှသူ့ကိုခေါ်လာသောကြောင့် အယ်လ်တစ်ယောက် ဝက်သွေးခဲတစ်တုံးလုံးကို ပါးစပ်ထဲအမြန်သွပ်ထည့်ပြီး အနည်းငယ်ဝါးကာ မြိုချလိုက်ရသည်။ ပူနွေးနေသော ဝက်သွေးခဲမှာ သူ၏အူများအထိ ကျဆင်းသွားပြီး ပါးစပ်ပြန်ဖွင့်လိုက်ချိန်၌ အငွေ့များပင်ထွက်လာသယောင် ရှိနေခဲ့သည်။

“ အဟွတ် အရှင်…. အဟွတ်…”

လန့်စ်မှာ ပဟေဠိဖြစ်နေရဆဲပင်

 “ ဘာဖြစ်နေတာလဲ မင်း…”

အယ်လ်မှ အထစ်ထစ်အငေါ့ငေါ့ဖြင့် ပြောလာခဲ့သည် 

“ အရှင့်ကိုလျှောက်တင်ပါတယ်… အစပ်ဟော့ပေါ့ကိုစားပြီးတာနဲ့ ကျွန်တော့်ပါးစပ်ထဲမှာ ထူးဆန်းသလို ခံစားလိုက်ရတာပါ….စပ်တော့စပ်ပေမယ့် အများကြီးလည်း ဟုတ်မနေပြန်ဘူး…ဆိုင်ရှင်က ဝက်သွေးခဲထဲကို သည်လိုအကျိုးသက်ရောက်မှုရအောင်  ဘာထည့်ခဲ့လဲဆိုတာတော့ မသိရသေးပါဘူး…”

“ အဲ့ဒါက ငရုတ်သီးလေ…” ဘေးဝိုင်းမှ ဖောက်သည်တစ်ဦးက ကြားဖြတ်ပြောလာသည်။

လန့်စ်ရော အယ်လ်ပါ ထိုနေရာသို့ကြည့်၍ တပြိုင်တည်းမေးလိုက်မိကြသည် “ ငရုတ်သီးလား…”

ထိုသူမှာ သုံးထောင်စားတော်ဆက်သို့ အမြဲလာလေ့ရှိသော ဖောက်သည်တစ်ယောက်ဖြစ်ပြီး နေ့စဉ်နေ့တိုင်း လာစားတတ်သည်။ သိသိသာသာပင် စားသုံးသူအသစ်ဖြစ်ဟန်ရှိသူနှစ်ဦးကို တွေ့လိုက်ရသောကြောင့် သူ ဖောက်သည်ချရန် မအောင့်နိုင်တော့ချေ

 “ ဟုတ်တယ် အဲ့သည့်ဟာက ငရုတ်သီးလေ… သားရဲကမ္ဘာမှာတော့ အဆိပ်သီးလို့ခေါ်ကြတယ်… အဆိပ်သီးဆိုပေမယ့် တကယ်ကြီးအဆိပ်ရှိနေတာတော့ မဟုတ်ဘူးရယ်…ငရုတ်သီးက သုံးထောင်စားတော်ဆက်မှာတော့ အဓိကထုတ်ကုန်ပဲ…စပ်တယ်ဆိုပေမယ့် မင်းတို့စားလေလေ ပိုပြီးလန်းဆန်းလာလေလေဖြစ်ကြလိမ့်မယ်… တကယ်လို့ စပ်တာမခံနိုင်ဘူးဆိုရင်တော့ ဆိုင်ရှင်ဆီကနေ နို့ဝယ်သောက်လိုက်ကြပေါ့…အဲ့သည့်အရာက အစပ်ကိုအတော်ကြီးသက်သာစေတယ်လေ…”

ထိုအချက်ကိုကြားလိုက်ရသည်နှင့် အယ်လ်တစ်ယောက် ဆိုင်ရှင်ထံအပြေးသွားကာ ‌နို့တစ်သေတ္တာယူလာခဲ့သည်။ တစ်ငုံနှစ်ငုံခန့်သောက်ပြီးချိန်၌ သူ၏ပါးစပ်ထဲတွင် အမှန်တကယ်အစပ်ပြေသွားသောကြောင့် စိတ်သက်သာရာရစွာ လေပူတစ်ချက်မှုတ်ထုတ်လိုက်ပြီး သူ၏အရှင်ထံမျက်နှာချင်းဆိုင်ပြောလိုက်သည်။

“ ကျွန်တော့်ရဲ့အရှင့်…”

လန့်စ်မှ “ သည်ဟာကအရသာရှိလား…” ဟုမေးလာချိန်တွင် အယ်လ်၏မျက်တောင်များ အနည်းငယ်တုန်ယင်သွားရသည်။

အယ်လ် ကမန်းကတန်းဖြေလိုက်မိသည်။

 “ အဆင်ပြေပါတယ် အရှင်…သည်ဟာက သာမန်နို့တွေလိုအရသာရှိပြီး ကျွန်တော်တို့တွေအတွက် စွမ်းအင်မပေးနိုင်ပေမယ့် အစပ်ပြေစေတဲ့နေရာမှာတော့ အကူအညီပေးပါတယ်…”

လန့်စ် လက်ထောက်ဖြစ်သူထံ စိုက်ကြည့်လိုက်သည်

 “ ငါမေးနေတာ အစပ်ဟော့ပေါ့က အရသာရှိလား…”

“ အိုး အိုး..” အယ်လ်၏အကြည့်မှာ အစပ်ဟော့ပေါ့အိုးထံ ကျဆင်းသွားပြီးနောက် ခက်ခက်ခဲခဲအကြည့်လွှဲလိုက်ရသည်။ ဝက်သွေးခဲ၏အရသာမှာ ယခုအထိ သူ၏ပါးစပ်ထဲတွင် အရသာခံနေမိသေးသည် 

“ ဂလု… အရသာရှိပါတယ် အရှင်…ဝက်သွေးခဲမှာ အဝင်ဆိုးတဲ့ညှီနံ့မျိုးမရှိပါဘူး… ပြီးတော့ သူ့ရဲ့အသွင်အပြင်ကလည်း သွေးပူတင်းနဲ့ကွာခြားပါတယ်…တစ်ကိုက်ကိုက်ကြည့်လိုက်ပြီးတော့ ဝက်သွေးခဲကိုစားတာမဟုတ်ဘူးလို့ တွေးမိလုနီးပါးဖြစ်သွားရပေမယ့် ဝါးပြီးတာနဲ့ သွေးစွမ်းအင်ကိုခံစားမိခဲ့ပါတယ်…”

အယ်လ် တစ်နည်းတစ်ဖုံတက်ကြွနေမိသည်။ နှစ်ပေါင်းမြောက်များစွာ အရှင်၏နံဘေးတွင် နေလာခဲ့သောကြောင့် သူ၏စိတ်ထဲရှိ ပူပင်မှုများကို သိနေခဲ့ပြီးပြီဖြစ်သည်။ ဤအစပ်ဟော့ပေါ့မှာ သူ့အရှင်၏ပူပန်‌မှုများအား လျော့ချပေးနိုင်မည်ဟု အယ်လ် ယုံကြည်နေသည်။။

“ အရှင် အစပ်ဟော့ပေါ့က တကယ်ပဲအရသာရှိပါတယ်… သည်ဟာကိုသာ မျိုးနွယ်ထဲမှာ ချပြနိုင်မယ်ဆိုရင်…”

“ ရပြီ…” လန့်စ် အယ်လ်ကိုကြားဖြတ်ပြောလိုက်သည်။

 “ ငါ့ကိုအရင်ပေးမြည်းပါဦး…”

အယ်လ်မှ ချက်ချင်းဆိုသလို အရှင်၏ပန်းကန်လုံးနှင့် တူများကိုယူလိုက်ပြီး အထူးပိုးသတ်ဆေးဖြင့် ဆေးကြောလိုက်ကာ လန့်စ်၏အရှေ့တွင် ချပေးလိုက်သည်။

လန့်စ်၏သွယ်လျသောလက်များမှ တူတစ်စုံကိုယူလိုက်ပြီး ပန်းကန်လုံးထဲမှ ဝက်သွေးခဲတစ်ဖတ်ကို‌လှမ်းယူကာ သူ့ပန်းကန်ထဲထည့်လိုက်သည်။ အငွေ့များကုန်သွားပြီးနောက် ၎င်းကိုအသာအယာကောက်ယူလိုက်ချိန်တွင် လက်သည်းခွံအရွယ် ဝက်သွေးခဲတစ်ဖက်မှာ သူ့ပါးစပ်ထဲသို့မထည့်ခင် တူများကြားတွင် တုန်ခါနေခဲ့သည်။

လန့်စ်၏လှုပ်ရှားမှုများမှာ ကြော့ရှင်းနေပြီး ဝက်သွေးခဲအပိုင်းလေးမှ ရှားပါးသောအရသာကို ဖော်ထုတ်ပေးမည့်ပုံပေါ်နေသောကြောင့် အယ်လ် တံတွေးသာမျိုချထားလိုက်ရသည်။ အစပ်ဟော့ပေါ့၏အရသာမှာ ပို၍ကောင်းလာသယောင်ပင်။

သူ၏အစာအိမ်ထဲတွင် အစပ်ဟော့ပေါ့ကို ပိုပိုတောင့်တနေခဲ့သော်လည်း အယ်လ် သူ့ကိုယ်သူဖြေသိမ့်လိုက်သည်။ အဆင်ပြေပါတယ် သူ့အရှင်က သန့်ရှင်းမှုကိုအစွဲအလမ်းကြီးသူတစ်ယောက်ပဲဟာ။ သည်လိုပတ်ဝန်းကျင်မျိုးမှာ အရသာမြည်းကြည့်နေတာနဲ့တင် သူ့အတွက်ကြီးမားတဲ့ဂုဏ်ဖြစ်နေရပြီ။ အရှင်မြည်းလို့ပြီးတာနဲ့ အစပ်ဟော့ပေါ့တစ်အိုးလုံးက သူ့ဟာဖြစ်လာမှာ။ သူကြိုက်သလောက်စားလို့ရတယ်။

ဤသို့သောအတွေးများနှင့်အတူ သူ့အရှင်၏လှုပ်ရှားမှုများကိုကြည့်ကာ အယ်လ်၏မျက်နှာပေါ်တွင် အပြုံးတစ်ပွင့်ပေါ်လာခဲ့သည်။ သို့သော်လည်း ခဏအကြာ၌ သူ၏အပြုံးမှာ တဖြည်းဖြည်းတောင့်ခဲသွားခဲ့လေသည်။

သည်လို တစ်လုတ်ပြီးတစ်လုတ်စားနေတဲ့လူက ဘယ်သူလဲ…

သည်ဟာက တကယ်ကြီး အရမ်းအစားရွေးပြီး အသန့်ကြိုက်တဲ့ မင်းသားလန့်စ်လား…

သူ့မျက်လုံးများမှ လှည့်စားနေသည်ဟုပင် အယ်လ်ထင်သွားရသည်။ သို့သော်လည်း ၎င်းမှာ ပုံရိပ်‌ယောင်ဖြစ်မနေခဲ့ချေ။

မျက်လုံးများကို မှိတ်ချည်ဖွင့်ချည်လုပ်လိုက်သော်လည်း သူ၏အရှေ့မှမြင်ကွင်းမှာမူ မပြောင်းလဲသွားခဲ့ပေ။ သန့်ရှင်းမှုအား အစွဲအလမ်းကြီးသူမင်းသားလန့်စ်မှာ အစပ်ဟော့ပေါ့ကို ကြော့ရှင်းစွာနှင့် အရှိန်ဟုန်မြင့်စွာ စားနေခဲ့ပြီး သူ၏အရှေ့ရှိ အစပ်ဟော့ပေါ့ပန်းကန်မှာ အမြန်နှုန်းဖြင့် လျော့ပါးလာခဲ့သည်။

မင်းသားလန့်စ်စီသို့ ထပ်ခါထပ်ခါကြည့်လိုက်ရင်းဖြင့် အချိန်မှာ ည ဆယ်နာရီလေးဆယ်ဖြစ်သွားခဲ့လေပြီ။ သွေးစုပ်ဖုတ်ကောင်နှစ်ယောက်မှလွဲ၍ စားသုံးသူများအားလုံးနီးပါး ပြန်သွားခဲ့ပြီဖြစ်သောကြောင့် ပိုင်ရှန်းကျစ် အခြားစားပွဲများကို သန့်ရှင်းရေးလုပ်ပြီးချိန်တွင် ထိုသူများအနားသို့ကပ်သွားကာ စားပွဲပေါ်ရှိ အစပ်ဟော့ပေါ့ပန်းကန်သုံးလုံးကိုကြည့်ပြီး မေးလိုက်မိသည် 

“ လူကြီးမင်းတို့ အဆင်‌မပြေတာများ ရှိခဲ့လားဗျ…”

လန့်စ် ဆိုင်ရှင်ထံကြည့်ကာ သူ၏ပါးလျသောနှုတ်ခမ်းများ ပွင့်ဟလာသည် “ စားဖိုမှုးရဲ့ကျွမ်းကျင်မှုက အံ့မခန်းပါပဲ… ပြီးတော့ သွေးကလည်း သည်လိုဆန်းကြယ်တဲ့အရသာမျိုးကို ထုတ်ပေးနိုင်တယ်…”

ပိုင်ရှန်းကျစ် ကြောင်အသွားရသည် “ သည်လိုဆိုရင် လူကြီးမင်းတို့နှစ်ယောက်က…”

အပြုံးဖျော့ဖျော့လေးမှာ လန့်စ်၏နှုတ်ခမ်းပေါ်တွင် ကော့တက်သွားခဲ့သည် “ ငါဆိုင်ရှင်နဲ့ စီးပွားရေးကိစ္စ ဆွေးနွေးချင်တယ်…”

*****

သွေးကလန်၏ အနောက်ဘက်နယ်မြေ၊ 

ဤသည်မှာ မျိုးရိုးနိမ့်သွေးစုပ်ဖုတ်ကောင်များ စုဝေးနေထိုင်ရာအရပ်ဖြစ်သည်။ အိမ်များမှာ ကြပ်ပိတ်ညပ်နေပြီး ဖောက်ထွင်းမြင်ရသော သွေးအိတ်များနှင့် ညစ်ပတ်နေသည့်ရေအိုင်များကို လမ်းတိုင်းလိုလိုတွေ မြင်တွေ့နေရသည်။

လမ်း၏အဆုံး၌ ပြိုကျလုနီးနီးအိမ်အိုလေးမှာ ပွင့်ဟနေပြီး အကြိမ်ပေါင်းမြောက်များစွာ လျှော်ဖွတ်ထားသော အဝတ်အစားနှင့် မိန်းကလေးတစ်ဦး လမ်းလျှောက်နေသည်။ သူမထံတွင် အနက်ရောင်ဆံပင်ရှည်များရှိပြီး လက်ဖဝါးအရွယ်ခန့် မျက်နှာလေးမှာမူ ဖျော့တော့ကာ သွေးရောင်ကင်းမဲ့နေသည်။ သွေးစုပ်‌ဖုတ်ကောင်များအကြားတွင် အသားအရည်ဖျော့တော့ကြသည်မှာ ပုံမှန်ဖြစ်ကြသော်လည်း သူမ၏ပုံပန်းသွင်ပြင်မှာမူ သာမန်မဖြစ်နေခဲ့ပေ။

သွေးစုပ်ဖုတ်ကောင်များအကြားတွင် အနီရောင်ဆံပင်နှင့်မျက်လုံးရှိသူများမှာ အဆင့်မြင့်တော်ဝင်သွေးမျိုးဆက်ဖြစ်ပြီး အနက်ရောင်ဆံပင်နှင့်အ‌နက်ရောင်မျက်လုံးပိုင်ရှင်များမှာမူ အဆင့်အနိမ့်ဆုံးတည်ရှိမှုဖြစ်သည်။

ဆိုဖီမှာ အနက်ရောင်ဆံပင်နှင့်မျက်လုံးရှိသူ အဆင့်အနိမ့်ဆုံးသွေးစုပ်ဖုတ်ကောင်ဖြစ်ပြီး မျိုးနွယ်ဝင်များအကြား မမြင်ရသောတည်ရှိမှုတစ်ခုကဲ့သို့ပင်။ သူမကဲ့သို့ အဆင့်နိမ့်တည်ရှိမှုမျိုးကို လူတိုင်းမှလျစ်လျူရှုထားကြသည့်အတွက် ပုံမှန်သွေးထောက်ပံ့မှုမျိုးကို ဆိုဖီမရနိုင်ပေ။ အကယ်၍သာ မင်းသားမှ ဆင်းရဲသားများထံ သွေး‌အလေအလွင့်များပေးကမ်းစွန့်ကြဲခြင်းသာ မရှိခဲ့ပါက ဆိုဖီအဖို့ အသက်ရှင်ရန်ပင် ခက်ခဲရပေလိမ့်မည်။

ယနေ့တွင် ဆိုဖီ မြို့ပြင်မှာ တောကောင်ငယ်လေးများကို အမဲလိုက်ရန် ပြင်ဆင်နေသည်။ ထိုကဲ့သို့ အာရုံခံစားနိုင်စွမ်းမရှိသည့် အကောင်ငယ်များ၏သွေးမှာ သွေးစုပ်ဖုတ်ကောင်များ၏ အခြေခံလိုအပ်ချက်ကို ဖြည့်ဆည်းပေးနိုင်သည် ဆိုသော်ငြားလည်း ၎င်းမှာ အလွန်ပင်ညစ်ထေးကာ မည်သည့်စွမ်းအင်ကိုမှ မပေးစွမ်းနိုင်ချေ။ သွေးစုပ်ဖုတ်ကောင်များအတွက် အသက်ဆက်ရှင်နေနိုင်သည့် အကျိုးအမြတ်တစ်ခုကိုသာ ပေးနိုင်သောအရာဖြစ်သည်။ သည့်အတွက်ကြောင့် အလုပ်ရှိသည့် မည်သည့်သွေးစုပ်ဖုတ်ကောင်ကမှ ဤကဲ့သို့သော တိရစ္ဆာန်သွေးကို ရွေးချယ်ကြမည်မဟုတ်ပေ။

ခေါင်းငိုက်စိုက်ဖြင့် ဆိုဖီ အနောက်ဘက်နယ်မြေမှ ထွက်လာလိုက်သည်။ သူမ အရှေ့ဘက်နယ်မြေသို့ ဝင်မည်အပြုတွင် လမ်းမပေါ်ရှိ စားသောက်ဆိုင်တစ်ဆိုင်မှ သူမ၏အာရုံကိုဖမ်းစားသွားခဲ့သည်။

“ အစပ်သွေးဟော့ပေါ့လား…”

အနီရောင်စာလုံးကြီးများဖြင့် ရေးထားသည့်ဆိုင်းဘုတ်အောက်တွင် ဝက်သွေးဖြင့်ပြုလုပ်ထားပြီး မည်သည့်အဆင့်ရှိသူမဆိုသုံးဆောင်နိုင်မည် တစ်ပွဲလျှင် အချိန်အာကာသဒင်္ဂါးသုံးပြား ဟူသောစာကြောင်းသေးသေးလေးများရှိသည်။

အချိန်အာကာသဒင်္ဂါးသုံးပြားလား…

အချိန်အာကာသဒင်္ဂါးသုံးပြား….

သွေးအိတ်များလိုက်လံကောက်ယူခြင်းဖြင့် ဆိုဖီ တစ်နေ့လျှင် အချိန်အာကာသဒင်္ဂါးဆယ်ပြားခန့်ရရှိနိုင်သည်။ ထို့အတူ အခြားဆိုင်များမှသွေးမှာ ပုံမှန်အားဖြင့် အချိန်အာကာသဒင်္ဂါးသုံးဆယ်မှ စတင်သောကြောင့် နှိုင်းယှဉ်ရမည်ဆိုလျှင် ဤနေရာမှာ အလွန်ပင်ဈေးချိုလှသည်။

အကယ်၍ သူမသာ မြို့ထဲတွင်စားနိုင်ပါလျှင် မည်သူကမြို့ပြင်သို့ သွားချင်ပါတော့မည်နည်း။ ထိုမျှသာမက ပိုနေသည့်အချိန်များတွင်လည်း သူမ သွေးအိတ်များကို လိုက်ကောက်နိုင်သေးသည်။

ဤသို့ဖြင့် ဆိုဖီ သတ္တိမွေးကာ ဘဝတစ်လျောက်လုံးတွင် ပထမဆုံးအကြိမ်အဖြစ် စားသောက်ဆိုင်တစ်ဆိုင်ထဲသို့ ခြေချလိုက်သည်။ ပြင်ဆင်ထားပုံမှာ သာမန်မျှသာဖြစ်သော်လည်း သူမလျောက်ကြည့်မနေရဲပေ။ အိတ်ကပ်ထဲမှ အချိန်အာကာသဒင်္ဂါးသုံးပြားထုတ်ကာ ကောင်တာပေါ်တင်လိုက်ပြီး အသံတိုးတိုးဖြင့် ပြောလိုက်မိသည်

 “ အ အစပ်သွေးဟော့ပေါ့ တစ် တစ်ပွဲပေး ပေးပါ…”

မိနစ်အနည်းငယ်ကြာပြီးနောက် အစပ်သွေးဟော့ပေါ့တစ်ပန်းကန်မှာ သူမ၏အရှေ့တွင်ရောက်လာခဲ့သည်။ ဟင်းရည်မှာ အနီရောင်ဖျော့ဖျော့ရှိပြီး အနီရင့်ရောင်ဝက်သွေးခဲအတုံးကြီးများလည်း ပါဝင်နေခဲ့သည်။ ဆိုဖီအနည်းငယ် ဆုံးရှုံးသွားသကဲ့သို့ ခံစားလိုက်ရသည်။ ထိုဝက်သွေးခဲမှာ သူမ လိုင်းပေါ်တွင်ကြားဖူးခဲ့သည့် သွေးပူတင်းထက် ထူးဆန်းသည့်ပုံပင်။ သွေးခဲမှာရေထဲတွင် ပေါလောပေါ်နေသော်လည်း အံ့ဩစရာကောင်းစွာဖြင့် မနစ်မြုပ်သွားခဲ့ချေ။ သူမ ယခင်ကထိုကဲ့သို့အရာမျိုးကို တစ်ခါမှမစားခဲ့ဖူးသည်ဖြစ်ရာ မည်သို့စားရပါမည်နည်း။

အနီးနားရှိစားပွဲထိုးလေးမှ သူမ ပဟေဠိဖြစ်နေသည်ကို သတိပြုမိသွားသောကြောင့် အနားသို့ကပ်လာကာ တီးတိုးပြောပြလာသည် “ စားသုံးသူ တူနဲ့အထဲက ဝက်သွေးခဲတွေကိုကောက်ယူပြီး စားလို့ရပါတယ်…”

တူတွေလား…

ဆိုဖီ သေးငယ်သော ဝါးချောင်းလေးနှစ်ချောင်းကို ကြည့်လိုက်မိသည်။ သူမ ထိုအရာကို အွန်လိုင်းပေါ်တွင် မြင်ဖူးခဲ့သော်လည်း ၎င်းတို့မှာ အခြားသောလောကများမှဖြစ်ပုံရကာ တစ်ခါမှအသုံးပြုဖူးခြင်းမရှိသေးပေ။

ကိုးရိုးကားယားနိုင်စွာဖြင့် ဆိုဖီ တူများကိုယူကာ ဝက်သွေးခဲတစ်ဖဲ့ကို ခက်ခက်ခဲခဲကောက်ယူလိုက်ရသည်။ သူမ ပါးစပ်ထဲသို့စမ်းထည့်ကြည့်လိုက်ပြီး အနည်းငယ်ဝါးကာ မြိုချလိုက်သည်။ ယခင်က မကြုံဖူးခဲ့သည့် မွှေးရနံ့နှင့်အရသာမှာ သူမ၏ပါးစပ်ထဲတွင် ပေါက်ကွဲထွက်သွားပြီး ဆိုဖီ မသိစိတ်မှပါးစပ်ကိုအုပ်ကိုင်ကာ မျက်ရည်များဝဲလာရသည်။

သည်ဟာက ဘယ်လိုအရသာမျိုးပါလိမ့်… သည်ဟာက ဘယ်‌လိုအထိအတွေ့မျိုးပါလိမ့်…

အနံ့ဆိုးတဲ့တိရစ္ဆာန်ရဲ့သွေးဆိုတာ ဖြစ်နိုင်ပါ့မလား…

သည်လောကမှာ တကယ်ကြီးကို သည်လိုအရသာမျိုးရှိတဲ့ တိရစ္ဆာန်သွေးရှိသေးတယ်လား…

အနည်းငယ်ဝါးလိုက်ပြီးနောက် သူမ ဝက်သွေးခဲကိုမြိုချလိုက်သည်။ ဆိုဖီ၏မျက်လုံးများ နီရဲသွားရကာ အစပ်ကြောင့် သက်ရောက်ခံလိုက်ရသော်လည်း ၎င်း၏အရသာကြောင့် သူမအလွန်ပင် နက်နက်ရှိုင်းရှိုင်းခံစားသွားရသည်။

‌နှင်းသွေးခဲနှင့် အဆင့်မြင့်သွေးများကို အမြဲသောက်နေကြသော အဆင့်မြင့်သွေးစုပ်ဖုတ်ကောင်များအနေဖြင့် ဤအစပ်သွေးဟော့ပေါ့လေးတစ်ပွဲမှာ အံ့ဩစ‌ရာကောင်းမည်ဖြစ်သော်လည်း ၎င်းမှာ သည်အတိုင်း အရသာရှိကာ ထူးခြားသောဟင်းပွဲတစ်ပွဲသာ ဖြစ်ပေလိမ့်မည်။

သို့သော် ဆိုဖီကဲ့သို့ သွေးအလေအလွင့်များကိုပင် မတတ်နိုင်သည့် အဆင့်နိမ့်သွေးစုပ်ဖုတ်ကောင်များအတွက်မှာမူ ဤသည်မှာ ကောင်းကင်မှကျလာသော လက်ဆောင်မွန်ပင်။ ၎င်းကိုစားလိုက်ရသည့်အချိန်တွင် ဆိုဖီ မွေးဖွားလာစဉ်အခါက ပထမဆုံးသွေးကိုမြည်းစမ်းဖူးသကဲ့သို့ ခံစားသွားရကာ ထိုအရာမှာ အလွန်အရသာရှိပြီး မျှော်လင့်ချက်များဖြင့် ပြည့်နှက်နေသည်။

အရသာရှိသော ဤဟင်းပွဲ၏ခွန်အားအောက်တွင် အစပ်သွေးဟော့ပေါ့ တစ်ပန်းကန်ကုန်သွားသည်နှင့် ဆိုဖီ ဝက်‌သွေးခဲတုံးကောက်ယူရန် တူများကို ကျွမ်းကျွမ်းကျင်ကျင်ကိုင်တတ်သွားပြီဖြစ်သည်။ တူများကိုပြန်ချလိုက်ပြီးနောက် ထူးထူးခြားခြားကျေနပ်မှုရသွားသော သူမ၏ဝမ်းဗိုက်ကို အသာအယာပွတ်ကာ ဆိုင်ထဲမှပြန်ထွက်လာခဲ့သည်။ ယနေ့တွင် သူမ သွေးအိတ်များကို ဝီရိယရှိရှိလိုက်လံကောက်ယူပေတော့မည်။ သို့မှသာ ဤဆိုင်သို့နေ့စဉ်နေ့တိုင်း အစပ်သွေးဟော့ပေါ့လာစားနိုင်မည်ဖြစ်သည်။

မနက်တစ်ခင်းကုန်ဆုံးသွားသည်နှင့် အနောက်ဘက်နယ်မြေအပြင်ဘက်တွင် အရသာရှိသော အစပ်သွေးဟော့ပေါ့ဆိုင်တစ်ဆိုင်ဖွင့်လာသည့်သတင်းများမှာ တဖြည်းဖြည်းပျံ့နှံ့သွားပြီး မြောက်များစွာသော အဆင့်နိမ့်သွေးစုပ်ဖုတ်ကောင်များမှာ အချိန်အာကာသဒင်္ဂါးသုံးပြားစီ ယူလာကြကာ အရသာရှိသော အစပ်သွေးဟော့ပေါ့ကို လာရောက်မြည်းစမ်းကြည့်ကြသည်။ သို့သော်လည်း အစပ်သွေးဟော့ပေါ့ဆိုင်မှာ အရှေ့ဘက်နယ်မြေနှင့် အနောက်ဘက်နယ်မြေအကြားတွင် ရှိနေသည့်တိုင် ထိုသတင်းမှာတော့

အရှေ့ဘက်အခြမ်းတွင်ရှိသည့် အဆင့်မြင့်သွေးစုပ်ဖုတ်ကောင်များထံ မရောက်သေးပေ။

ထိုနေ့ညနေခင်းအချိန်တွင် အစပ်သွေးဟော့ပေါ့အကြောင်းမှာ အဆင့်မြင့်သွေးစုပ်ဖုတ်ကောင်များအကြား ပေါက်ကွဲလာခဲ့သည်။ သူတို့အားလုံး‌မှာ အသစ်ဖွင့်လှစ်လာသည့် စားသောက်ဆိုင်အကြောင်းကို ဆွေးနွေးနေကြပြီး အကြောင်းရင်းမှာမူ လေးစားစဖွယ်တည်ရှိမှုဖြစ်သည့် အဆင့်အမြင့်ဆုံးသွေးစုပ်ဖုတ်ကောင်မင်းသားလန့်စ်မှ သူ၏ဆိုရှယ်မီဒီယာပလက်ဖောင်းတွင် ရေးတင်ထားခဲ့သည့်စာကြောင့်မှတပါး အခြားမရှိပေ။

လန့်စ် : [ ပုံ ] [ အစပ်သွေးဟော့ပေါ့ဆိုတဲ့ဟာက စားလို့ကောင်းတယ်… မြည်းကြည့်ရတာ တန်သားပဲ ]

စာမှာတိုတောင်းသော်လည်း လွှမ်းမိုးနိုင်စွမ်းမှာတော့ ကြောက်ခမန်းလိလိပင်။ အဆုံး၌ အနှီလူမှာ မင်းသားလန့်စ်ဖြစ်ပြီး သွေးစုပ်ဖုတ်ကောင်များအကြားတွင် ချစ်ကြောက်အရိုသေရဆုံးသူတစ်ဦးဖြစ်သည်။ သူတို့ထင်သည်သာ မမှားဘူးဆိုပါက သွေးနှင့်ပတ်သက်လာလျှင် ဂျေးများမှုအမြင့်ဆုံးသူတစ်ဦးဖြစ်လေရာ မင်းသားလန့်စ်မှပင် အရသာရှိသည်ဟု ပြောလာခဲ့ရာ ထိုအရာမှမည်မျှပင် ကောင်းမွန်သောကြောင့် ဖြစ်နိုင်မည်နည်း။

အချိန်တစ်ခုခန့် အဆင့်မြင့်နှင့်အဆင့်နိမ့်သွေးစုပ်ဖုတ်ကောင် လူတန်းစားနှစ်ခုစလုံးတွင် စိတ်လှုပ်ရှားမှုများဖြင့် တတွတ်တွတ်ပြောနေကြသည်။ အဆင့်မြင့်သွေးစုပ်ဖုတ်ကောင်များမှာ အဆိုပါ အစပ်သွေးဟော့ပေါ့ကို မြည်းစမ်းကြည့်ချင်စိတ်ဖြင့် ယားယံနေကြရသော်လည်း ဆိုင်မှာပိတ်သွားပြီဖြစ်သည်။ ထိုအချိန်အတွင်း အဆင့်နိမ့်သွေးစုပ်ဖုတ်ကောင်များမှာမူ မင်းသားလန့်စ်ကိုယ်တိုင်သည်ပင် ချီးကျူးခဲ့သော အစပ်သွေးဟော့ပေါ့ကိုစားခဲ့ကြရခြင်းကြောင့် အပျော်လွန်နေကြသည်။

အချိန်တိုအတွင်းမှာပင် အစပ်သွေးဟော့ပေါ့မှာ သွေးစုပ်ဖုတ်ကောင်များအကြား ရေပန်းစားလာခဲ့သည်။

နောက်တစ်နေ့မနက်တွင် အစပ်သွေးဟော့ပေါ့ဆိုင်၌ လူအပြည့်ဖြစ်နေခဲ့လေသည်။ အဆင့်မြင့်နှင့်အဆင့်နိမ့်သွေးစုပ်ဖုတ်ကောင်နှစ်မျိုးစလုံးမှာ ဆိုင်ထဲတွင် တိုးဝှေ့ပြုံစုံနေကြကာ မင်းသားလန့်စ်ချီးကျူးခဲ့သည့် အစပ်သွေးဟော့ပေါ့တစ်ပွဲရနိုင်ရန်အတွက် စိတ်အားထက်သန်စွာ စောင့်ဆိုင်းနေကြလေသည်။

🥘