Chapter 69

👥️Chapter 69

"ယန်အန်းယု မင်းရဲ့နှလုံးသားထဲမှာရော ကမ္ဘာနှစ်​ခုရှိ​နေလား"

ထိုစကားကို​ပြောပြီး​နောက်​၊ဒါရိုက်တာဖူက ယန်အန်းယု၏ မျက်လုံးများထဲကို  အနက်ရှိူင်းဆုံးနေရာထိ စူးစူးစိုက်စိုက်ကြည့်လာခဲ့ပြီး သူ့အား မှင်တက်သွားစေခဲ့သည်။

ကမ္ဘာနှစ်ခုလား...

တစ်ခါက ရှေးခေတ်မှာ သက်တော်စောင့်ငယ်လေး ဖြစ်ခဲ့ဖူးပြီး အခု ဖျော်ဖြေရေးနယ်ပယ်ထဲကို ဝင်ရောက်ပြီး သရုပ်ဆောင်လမ်းကြောင်းမှာ ကြိုးစားရုန်းကန်နေတဲ့ သရုပ်ဆောင်တစ်ယောက်ဖြစ်နေတဲ့ သူ့အကြောင်းကိုပြောတာလား... ဒါမှမဟုတ် ပို​ပြီးနက်ရှိုင်းတဲ့အဓိပ္ပါယ်ရှိနေလား...

ယန်အန်းယု အလွန်အမင်းအံ့အားသင့်နေသည်ကိုမြင်လျှင် ဖူချန်းယွမ်က သူ့မျက်မှန်ကိုပင့်တင်လိုက်​လေသည်။

"တောင်းပန်ပါတယ်... ဒီမေးခွန်းက နည်းနည်း ရိုင်းရာကျသွားတာဖြစ်နိုင်တယ်...သည်အတိုင်းနားပဲထောင်လိုက်ပါ... အဲဒါကို သိပ်အလေးအနက်မထားပါနဲ့ ..."

"အင်း" 

ယန်အန်းယုက ခပ်ဖျော့ဖျော့ပြုံးလိုက်၏။ရိုးရိုးသားသားပြောရလျှင် ထိုမေးခွန်းက သူ့ကို စိတ်ပျံ့လွင့်သွားစေသည်။ပြီးလျှင် သူ ဘယ်လိုဖြေရမှန်းလည်းမသိပါချေ။

ဖူချန်းယွမ်၏ မျက်လုံးများက လက်ခနဲဖြစ်သွားပြီး သူက ပြုံးကာဆိုပြန်သည်။

"ရှောင်ယု ဒါရိုက်တာကျန်းရဲ့ 'အရိပ်ဝံပု​လွေ​တော'ကလည်း မင်းကို ဖိတ်ခေါ်ထားတာ ငါသိတယ်...ဘယ်လိုပဲဖြစ်ဖြစ် မင်းက အလားအလာကောင်းပြီး အရမ်းလည်းလိုက်​ရောညီ​ထွေနိုင်စွမ်းရှိတယ်...ဒါကြောင့် ငါက အတင်းကြီးမရမကပြောနေမှာမဟုတ်ပါဘူး...'ဝါး'ကိုစိတ်ဝင်စားရင် ငါ့ဆီဆက်သွယ်နိုင်ပါတယ်... ဇာတ်လမ်းကိုပိုနားလည်နိုင်အောင် ဇာတ်ညွှန်းအကျဉ်းကို ငါပို့ပေးလိုက်မယ်"

ယန်အန်းယု:"ကောင်းပါပြီ"

နောက်တစ်နေ့အကြာတွင် ဒါရိုက်တာဖူက 'ဝါး' ၏ ဇာတ်လမ်းအကျဉ်းချုပ်နှင့် သက်ဆိုင်ရာ နိဒါန်းများကို ဖိုင်တွဲတစ်ခုတွင် ပြုစုပြီးနောက် အရာအားလုံးကို ချုံ့ပြီး ယန်အန်းယုထံသို့ ပေးပို့ခဲ့သည်။

လူတိုင်း၏ နှလုံးသားထဲမှာ ကိုယ်မဟုတ်သည့် 'ကိုယ်'ကိုယ်စီရှိကြသည်။ 'ဝါး' က ဤအကြောင်းအရာကို အဓိကထား၍ စရိုက်ခွဲနှစ်မျိုးရှိသော အမျိုးသားဇာတ်လိုက်ကို ဝင်ပေါက်အဖြစ်သုံးကာ ဇာတ်လမ်းကို ပရိတ်သတ်ဆီ ဖြည်းဖြည်းချင်းချပြထားသည်။

ဇာတ်​လမ်းက ​အမျိုးသားဇာတ်လိုက်၏ မိထွေး ​အဆောက်အဦး​ပေါ်က ခုန်​ချရာကနေ စခဲ့ခြင်းဖြစ်လေသည်။

ယင်းမတိုင်မီက အဆောက်အဦးများပေါ်မှ ခုန်ချ၍ မိမိကိုယ်ကို သတ်သေမှု အများအပြားရှိခဲ့ပြီးဖြစ်သည်။ ထို့အပြင် သေဆုံးသွားသူအားလုံးသည် အမျိုးသားဇာတ်လိုက်မော့မီ၏ ဆွေမျိုးများ၊ ကျောင်းနေဖက်များ၊ ဆရာများနှင့် အခြားသူများဖြစ်သည်။

မွေးမိခင် ဆုံးပါးသွားပြီးနောက် အမျိုးသားဇာတ်လိုက်မော့မီက ဖခင်နှင့်မိထွေး တို့နှင့်အတူ နေထိုင်ခဲ့သည်။ မိထွေးမှာ မိသားစု၏ မင်းသမီးလေးဖြစ်သော သမီးငယ်လေးတစ်ယောက်ရှိ​လေသည်။ သူမသည် သဲသဲလှုပ်အချစ်ခံရခြင်း အမျိုးမျိုးကို လက်ခံရရှိခဲ့ပြီး သူ့ကိုမူ လူတိုင်းမေ့လျော့နေလုနီးပါး​ဖြစ်ခဲ့သည်။

တကယ်တော့ မော့မီကအတန်းစာမှာ အတော်လေး ကောင်းမွန်သည့် ရလဒ်များ ရရှိခဲ့သည့်အပြင် လူကြီးများအပေါ် အလွန်နာခံပြီး လေးစားမှုရှိသော ထိပ်တန်းကျောင်းသားတစ်ဦးဖြစ်ပေမဲ့ တစ်ချိန်တည်းမှာပဲ သူရဲဘောကြောင်ပြီး ​ပျော့ညံ့လွန်းလေသည်။ သူ့အတန်းဖော်များနှင့် တခြားသူများက သူ့ကို အကြိမ်ပေါင်း မရေမတွက်နိုင်အောင် လှောင်ပြောင် အနိုင်ကျင့်ခဲ့ကြပေမဲ့ တခါမှ ပြန်မတိုက်ခိုက်ဖူးပေ။သူ့ဘဝ၏ အနှစ်နှစ်ဆယ်အတွင်းမှာ သူက နှိပ်စက်ညှဉ်းပန်းမှုအပေါ် သည်းညည်းခံပြီး အညံ့ခံအရှုံးပေးတတ်သည့် စိတ်ထားမွေးအောင် ပျိူးထောင်ခြင်းခံခဲ့ရသည်။

သို့သော် သူ၏အမွှာညီဖြစ်သူ မော့လီက ကွဲပြားသည်။ သူက သတ္တိရှိပြီး ပုန်ကန်တတ်သော ကလေးဆိုးတစ်​ယောက်ဖြစ်​လေသည်။သို့သော်လည်း သူက အထူးသဖြင့် သူ၏စာတော်သော အစ်ကိုကြီးအား အလွန်သဘောကျသောကြောင့် သူ့ကို မကြာခဏ ကာကွယ်ပေးခဲ့သည်။ သို့သော် သူ ဆယ့်သုံးနှစ်အရွယ်တွင် ကားတိုက်မှုတစ်ခုအတွင်းမှာ ကံမကောင်းစွာဖြင့် သေဆုံးသွားခဲ့သည်။

နောက်ပိုင်း ခုနစ်နှစ်တာကာလအတွင်း မော့မီက ပို၍ပင် တိတ်ဆိတ်လာပြီး အိမ်တွင်းပုန်း ဖြစ်လာခဲ့သည်။ထို့အပြင် နေ့ခင်းဘက်တွင် သူက အရှက်အကြောက်ကြီးပြီး ကြောက်တတ်သော မော့မီဖြစ်ပေမဲ့ ညဘက်တွင် မသိလိုက်ပါဘဲ သူ့အမွှာညီလေး မော့လီလို ပြုမူတတ်လာသည်။

သူ့စိတ်ခံစားချက်များကို အချိန်အတော်ကြာအောင် ဖိနှိပ်ထားခဲ့သော မော့မီက '​မော့လီ' ဖြစ်လာပြီးနောက် နောက်ဆုံးမှာ သူ့ကိုယ်သူ လွတ်မြောက်​စေနိုင်ခဲ့ပြီး ဆေးလိပ်သောက်​ခြင်း၊ အရက်သောက်​ခြင်း၊ ရန်​ဖြစ်​​ခြင်း၊ အားနည်းသူများကို အနိုင်ကျင့်ခြင်း၊ မိန်းကလေးများနှင့် အပျော်အပါးလိုက်စားခြင်းများ ပြုလုပ်ခဲ့သည်။ သူ့ကိုယ်သူ လွှတ်​​ပေးလိုက်ပြီး 'ဆိုးသွမ်းသော ကလေး' ဖြစ်လာချင်​လေသည်။

မည်သို့ပင်ဆိုစေကာမူ ဘယ်တစ်ဘက်ခြမ်းမှာပဲဖြစ်ဖြစ် အမျိုးသားဇာတ်လိုက်၏ စိတ်ဓာတ်က မှုန်မှိုင်းကာ မူမမှန်ဖြစ်နေခဲ့သည်။

မော့မီက မှန်ကြည့်ရမှာ အလွန်ကြောက်သည်။ ညမအိပ်ခင်အချိန်တိုင်း သူ့စိတ်ခံစားချက်များ မတည်မငြိမ်ဖြစ်လာပြီး ကိုယ့်ကိုကိုယ် မထိန်းနိုင်ဖြစ်ကာ လက်ကောက်ဝတ်ကို ကိုက်သည်မျိုး သို့မဟုတ် ဓားနှင့် လက်မောင်း၊ခြေထောက် စသည်များကို လှီးသည်မျိုးလုပ်ကာ မိမိကိုယ်ကို ထိခိုက်အောင်လုပ်တတ်သည်။

တဖြည်းဖြည်းနှင့် သူ့ကိုယ်သူ ထိခိုက်အောင်လုပ်ခြင်းသက်သက်ပဲ မဟုတ်တော့ဘဲ တစ်ချိန်က သူ့ကို အနိုင်ကျင့်ခဲ့ဖူးသူများကိုပါ ထိခိုက်အောင်လုပ်လာခဲ့သည်။သူ၏ ထက်မြက်သော ဦးနှောက်နှင့် မော့မီက ရာဇ၀တ်မှုများကို သက်သေမကျန်စေဘဲ ကောင်းကောင်းကြီး ကျူးလွန်ခဲ့ပေမဲ့ နောက်ဆုံးမှာတော့ ရဲတပ်ကြပ်ကြီးတစ်ဦး၏ ရှာဖွေတွေ့ရှိမှုနှင့် ဖမ်းဆီးခံခဲ့ရဆဲဖြစ်လေသည်။

'ဝါး' ဇာတ်လမ်းကို အကြမ်းဖျင်းနားလည်လာသောအခါတွင် ညဉ့်နက်နေပြီဖြစ်သည်။သို့တိုင် ယန်အန်းယု ကောင်းကောင်း အိပ်မပျော်နိုင်ဖြစ်နေသည်။

သူ့အနေဖြင့် ဇာတ်ကားတွင် အမျိုးသားဇာတ်လိုက်အဖြစ် သရုပ်ဆောင်ခွင့်ရနိုင်သော်လည်း စရိုက်နှစ်မျိုးရှိသောအနှီဇာတ်ကောင် 'မော့မီ' အဖြစ် ကောင်းစွာသရုပ်ဆောင်ရန် လွယ်ကူမည်မဟုတ်ကြောင်းနှင့် ၎င်းသည် သူ့အတွက် စိန်ခေါ်မှုတစ်ခုဖြစ်လာမည်မှာ သေချာ​ပေသည်။

သရုပ်ဆောင်စွမ်းရည်ဖြင့်သာမက၊ ဇာတ်ကောင်၏ စရိုက်နှစ်မျိုးသဘာဝကို နားလည်အောင်ကြိုးစားနိုင်ရန်၊ သူလည်း ၎င်းကို တွေ့ကြုံခံစားကြည့်ရမည်ဖြစ်သည်။

လူတိုင်းရဲ့ နှလုံးသားထဲမှာ ကိုယ်ကိုယ်တိုင်မဟုတ်တဲ့ ကိုယ်တစ်ယောက် ရှိတယ်မဟုတ်ဘူးလား...ယန်အန်းယု မျက်လုံးများကို မှိတ်ထားပြီး ထိုမှတ်ဉာဏ်အပိုင်းအစများကို ရှာဖွေခဲ့ကာ ဖြည်းညင်းစွာ စုစည်းခဲ့သည်...

နောက်တစ်နေ့တွင် ယန်အန်းယု မနက်စောစောထပြီးသူ၏ထင်မြင်ချက်ကို ရှင်းလင်းရန် ချီစန်းကို သူ့ဘက်ကနေစပြီး ဆက်သွယ်ခဲ့သည်။

ထို့ကြောင့် ယန်အန်းယု ဒါရိုက်တာကျန်းကို လိမ္မာပါးနပ်စွာ ငြင်းဆိုခဲ့ပြီး ဖူချန်းယွမ် နှင့် ပူးပေါင်းကာ 'ဝါး' တွင် ပါဝင်ရန် ဆုံးဖြတ်ခဲ့သည်။

ရိုက်ကူးရေးအကြိုတွေ့ဆုံနှုတ်ဆက်စဉ်တွင် ယန်အန်းယု အခြားအဓိကသရုပ်ဆောင်များအကြောင်းကို အတိုင်းအတာတစ်ခုအထိကြားသိခဲ့ရသော်လည်း ဤသည်က သူ့အတွက် သူတို့နှင့် ပထမဆုံးအကြိမ် ပူးပေါင်းလုပ်ဆောင်ခြင်းဖြစ်ပြီး ရုပ်ရှင်ရိုက်ကူးခြင်းလည်းဖြစ်သောကြောင့် ယန်အန်းယု အနည်းငယ်စိတ်မလှုပ်ရှားဘဲမနေနိုင်ပေ။

ဒါရိုက်တာဖူက သူ၏ တသမတ်တည်း လက်ရာစတိုင်ကို ထိန်းသိမ်းထားသောကြောင့် ပို၍အမှောင်ဘက်သွားသော ပုံစံရှိကာ စရိုက်ခွဲများကြား ကွဲပြားမှုကို စူးစမ်းလေ့လာသည့် ဤဇာတ်ကားက ဘတ်ဂျက်နည်းဆဲဖြစ်၏။သရုပ်ဆောင်များထဲတွင်လည်း လူကြိုက်မများသော တက်သစ်စအချို့ရှိသေးသည်။

တကယ်တော့ ယန်အန်းယု လုံးဝမရင်းနှီးသော ဒါရိုက်တာဖူ မိတ်ဆက်ပေးရန်လိုအပ်သည့် မျက်နှာသစ်နှစ်ယောက် ရှိ၏။ထို့နောက်တွင် အခြားအလုပ်များကြောင့် နောက်ကျနေသည့် ဒုတိယအမျိုးသားဇာတ်လိုက်ကို သူတွေ့ခဲ့သည်။

အံ့အားသင့်မှုက ယန်အန်းယု၏ မျက်လုံးများထဲမှာ ဖြတ်ပြေးသွားသည်။ တရားဝင်အဖွဲ့က ဒုတိယအမျိုးသားဇာတ်လိုက်နှင့် ပတ်သက်သည့်သတင်ကို လုံးဝ မထုတ်ပြန်​သောကြောင့် ဤကိစ္စကို သူကြိုမသိခဲ့​ပေ။ သူတို့သည် လျှို့ဝှက်ဆန်းကြယ်သောလေထုကို ထိန်းသိမ်းထားရန်ဟု အပြင်လူများအား ပြောကြားခဲ့သော်လည်း အတွင်းတွင် တစ်စုံတစ်ရာ ဖြစ်ပျက်ခဲ့ပြီး သရုပ်ဆောင်တစ်ဦးကို ချက်ချင်းမဆုံးဖြတ်ခဲ့ကြခြင်းဖြစ်နိုင်ဖို့များသည်။

"အံ့သြ​ပြီးပျော်သွားလား ရှောင်ယု" 

ထန်းရှောင်က ပြုံးလိုက်သည့်အခါ လုံးဝအန္တရာယ်မရှိသည့်ပုံပေါက်လေသည်။

"အာ ဒီလိုပါပဲ" 

ယန်အန်းယု၏ နှုတ်ခမ်းများ ကွေးသွားသော်လည်း သူ့နှလုံးသားက မကျိန်ဆဲဘဲ မ​နေနိုင်ပေ။ဒါက လုံးဝကို ပျော်စရာမကောင်းတဲ့စပရိုက်​လေ...

ထန်းရှောင်က အမြဲတစေအဆိုတော်တစ်ယောက်အဖြစ်နှင့်လိမ်လိမ်မာမာနေပြီး ဂီတလောကထဲမှာပဲ စျာန်ဝင်နေဖို့ရာ မဖြစ်နိုင်ကြောင်း သူသိသော်လည်း ထန်းရှောင်က ဤမျှမြန်မြန် ရုပ်ရှင်လောကထဲသို့ တိုးဝင်လာလိမ့်မည်ဟု မည်သူက မျှော်လင့်ထားမည်နည်း။ ဒါ့ထက် သူ့ရဲ့ပထမဆုံးရုပ်ရှင်ဇာတ်ကားမှာ ဒုတိယအမျိုးသားဇာတ်လိုက်အဖြစ် ပါဝင်သရုပ်ဆောင်ခွင့်ရခဲ့တာပဲ...

ထန်းရှောင်၏ကျောထောက်နောက်ခံနှင့် ဤလူ၏အ​ကြံအစည်များကိုတွေးတောရင်း ယန်အန်းယု အဘယ်ကြောင့် ဒုတိယမြောက်အမျိုးသားဇာတ်လိုက်ဖြစ်သည့် 'လော့ယွီ' အတွက် သရုပ်ဆောင်ကိူ ဤမျှကြာကြာရွေးချယ်ခဲ့ရသည်ကို နားလည်သဘောပေါက်သွားခဲ့သည်။

၎င်းကိုမြင်သောအခါ ဒါရိုက်တာဖူကလည်း လျှောက်လာကာ ထန်း​ရှောင်ကိူပုတ်လိုက်ပြီး ယန်အန်းယုကို ပြုံးပြရင်းဆို၏။

"ထန်းရှောင်က အဆိုတော်ဖြစ်ချင်ဖြစ်မယ်... ဒါပေမဲ့ ပြီးခဲ့တဲ့ audition အပြီးမှာ သူလည်း သရုပ်ဆောင်ဖြစ်ဖို့ အလားအလာရှိတယ်လို့ ငါထင်တယ်"

"ဪ ဆိုတော့ ဒီလိုကိုး"

ယန်အန်းယုက ခေါင်းအသာညိတ်လိုက်သည်။ အချို့သော ကဏ္ဍများတွင် ထန်းရှောင်က အမှန်တကယ် သရုပ်ဆောင်နိုင်​ပေသည်။

"မင်းနဲ့ ထန်းရှောင်က သူငယ်ချင်းကောင်းတွေ မဟုတ်လား...မနှစ်တုန်းက မင်းတို့နှစ်ယောက် 'Challenge First Time' မှာ အတူတူပါဝင်ခဲ့ကြတယ်... မင်းတို့အချင်းချင်း ကောင်းမွန်တဲ့ ပူး​ပေါင်းမှုတွေရှိမှာပဲ...မင်းတို့နှစ်ယောက်လုံးကို ငါယုံကြည်တယ်"

ယန်အန်းယုက ကူကယ်ရာမဲ့ ပြုံးပြလိုက်သော်လည်း ထန်းရှောင်က အလွန်ယုံကြည်မှုရှိနေဟန် ပြလေသည်။

"အင်း... ဒါရိုက်တာဖူ ကျွန်​တော်တို့ ခင်ဗျားကိုစိတ်မပျက်စေရပါဘူး"

နောက်ပိုင်း ဘယ်သူမှ မရှိတော့သည့်အခါ ယန်အန်းယုက  ထန်း​ရှောင်ဆီကို လျှောက်သွားပြီး သူ့မျက်လုံးများက အေးစက်နေသည်။

"မင်းတကယ် ရုပ်ရှင်ကောင်းကောင်းရိုက်ဖို့ ငါမျှော်လင့်တယ်...လှည့်ကွက်တွေ မသုံးတာ ပိုကောင်းမယ် မဟုတ်ရင်..."

နောက်က စကားများက မပြောဘဲနားလည်နိုင်လေသည်။ယန်အန်းယုက သတိပေးပြီးနောက် အမြန်ထွက်သွားသည်။

ယန်အန်းယု၏ ထွက်ခွာသွားသော ရုပ်ပုံလွှာကို ကြည့်ပြီး ထန်းရှောင်က မည်သည့်ပြောင်းလဲမှုမှ မပြဆဲဖြစ်၏။သူက သူ၏ လက်သီးများကိုသာ တင်းတင်းကျပ်ကျပ် ဆုပ်ထား​လေသည်။

သူငယ်ချင်းဖြစ်ဖို့လေးကို ဒီလောက် ခက်တယ်လား... ယန်အန်းယု၏ သူ့အပေါ် ထာသည့် အကာအကွယ်နှင့်သတိက အမြဲတမ်း မြင့်မားနေခဲ့သည်။ထန်းရှောင်က သူ့ကို အမှန်တကယ် ဒုက္ခပေးရန် တစ်ခါမှ မတွေးဖူးဘဲ ဟိုအရူး ယွီစစ်ယွမ်ကသာ သူ့ကို အမြဲတမ်း ပစ်မှတ်ထားခဲ့နေသည်မှန်း သိသာနေသည်ကို။

ထိုအချိန်တွင်  ထန်းရှောင် အသစ်ခန့်အပ်ထားသော မန်နေဂျာ ဝူရှောက်က ဖြည်းညှင်းစွာ လျှောက်လာပြီး သူ့ကို အကြည့် တစ်ချက်တည်းဖြင့် ထွင်းဖောက်မြင်သွားလေသည်။

"အချိန်က မတန်သေးတာ သိသာတယ်... ပြင်ဆင်ဖို့ အချိန်တစ်ခုလိုသေးတာကို မင်းက 'ဝါး' လာရိုက်ဖို့ အတင်းခေါင်းမာနေတယ်...မင်းသူ့ကို ကြိုက်​နေတာလား ထန်းရှောင်"

"..." 

ထန်းရှောင်က ခေတ္တတန့်သွားပြီး နှုတ်ခမ်းကို တွန့်ကွေးကာ ရယ်မောလိုက်သည်။ 

"ဒါက အရမ်းအရေးကြီးလို့လား...ဒီလိုကိစ္စမျိုးတွေကို ကျွန်တော့်ဘာသာ ရှင်းထုတ်လိုက်မယ် ...မစ္စတာဝူ စိတ်ပူနေစရာ မလိုပါဘူး...အခု ယီချန်းယန်က သူ့ကို တကယ်ကြိုက်တယ်ဆိုတာ ရှင်းနေသရွေ့ မလုံလောက်ဘူးလား"

ထန်းရှောင်၏ မျက်လုံးများ ချက်ချင်းပင် မှိန်သွားသည်။ သူက ယန်အန်းယုကို မထိခိုက်စေချင်ပေမယ့် ကံမကောင်းစွာပဲ ယန်အန်းယုနဲ့ ယီချန်းယန််တို့ရဲ့ ဆက်ဆံရေးက...

တစ်ဖက်တွင်၊ ထန်းရှောင် 'ဝါး' ၏ ဒုတိယအမျိုးသားဇာတ်ဆောင်အဖြစ် ပေါ်လာပြီး ယန်အန်းယု နှင့်လည်း အလုပ်တွဲလုပ်ရသည့် သတင်းသည် အွန်လိုင်းတွင် အပြင်းအထန် ဆွေးနွေးမှုတစ်ခုဖြစ်လာသည်။ထန်းရှောင် 'ဝန်ထုပ်ထန်ပိုး'​ဖြစ်​စေသည့်ကိစ္စနှင့် ပတ်သက်ပြီး တစ်ချိန်က fanbase နှစ်ခု ပဋိပက္ခဖြစ်ခဲ့ဖူးပြီး အခုချိန်မှာ သူတို့၏ဆက်ဆံရေးက အနည်းငယ် ဆိုးရွားနေပေမဲ့ သူတို့က ခင်ခင်မင်မင်ရှိနေဆဲဖြစ်လေသည်။

၎င်းကို ရုပ်ရှင်ဧကရာဇ်ယီ သိသွားသောအခါ သူ သိပ်မပျော်တော့ပေ။

"လီယဲ့...ဒီဇာတ်ကားထဲက'လော့ယွီ' ရဲ့အထောက်အထားကို ငါ့ကိုပြန်ပြောစမ်းပါ"

လီယဲ့ အနည်းငယ် ပြောစရာစကားမဲ့နေ၏။တစ်ယောက်သော ဧကရာဇ်ကြီးက ထပ်၍သဝန်တိုနေ​ပြန်သည်မှာ ထင်ရှားလေသည်။သို့သော်လည်း လီယဲ့မှာ နောက်တစ်ခေါက်ပြောပြီး သူနှင့်လိုက် ကစားပေးရဆဲဖြစ်၏။

"အမျိုးသာဇာတ်လိုက် မော့မီရဲ့ အတန်းဖော်တစ်ယောက်... သူတို့ အထက်တန်းကျောင်းမှာ သုံးနှစ်ကြာအောင် အတန်းတစ်တန်းတည်းမှာ အတူတူတက်ခဲ့တာ... သူက ရဲမှူး​လော့ရဲ့သားဖြစ်ပြီး အမျိုးသားဇာတ်လိုက်ကို ဂရုစိုက်တယ်... သူ့ကို နည်းနည်းလေး သဘောကျနေတာဖြစ်နိုင်တယ် အဟမ်း"

လီယဲ့ လည်ချောင်း ရှင်းလိုက်သည်။ ရိုးရိုးသားသားပြောရလျှင် စာပေရုပ်ရှင်ထဲမှာ လိင်တူဆက်ဆံ​ရေးကိစ္စတချို့ကို ဝေ့ဝေ့ ဝါးဝါးထည့်ထားသည်က သာမန်ပါပင်။

"..." 

ယီချန်းယန်က စကားမပြောဘဲ သူ့စိတ်ထဲမှာ တစ်ခုခုကို စဉ်းစားနေပုံရသည်။

ရုပ်ရှင်ထဲက 'လော့ယွီ' က သူ့ကို သဘောကျနေနိုင်တယ်... ဒါဆို ထန်းရှောင်ကရော လက်တွေ့မှာ ဘယ်လိုလဲ...ထန်းရှောင်၏ နောက်ခံသမိုင်းကြောင်းကို စုံစမ်းပြီးနောက် ဤမေးခွန်းအတွက် အဖြေကို သူသိခဲ့သည်မှာ ကြာ​လေပြီ။

ထန်းရှောင်မှာ ရှန်းဟွမ်က တစ်ယောက်ယောက်ရှိ​နေ​ပြီး ယန်မိသားစုက ဦးလေးတစ်ယောက်က သူ့ကိုထောက်ပံ့ပေးနေရုံတင်မကဘဲ ကျန့်ယန်လုပ်ငန်းစုကိုလည်း အားကိုးနိုင်သေးသည်။သို့သော်လည်း သူသာ ယီချန်းယန်ကို အမှန်တကယ် ရန်စခဲ့မည်ဆိုလျှင်၊ ဤအရာအားလုံးက အပိုတွေဖြစ်သွားမှာဖြစ်သည်။

သူစွန့်လွှတ်နိုင်သည့် အရာ အများကြီးရှိပေမဲ့ လုံးဝမစွန့်လွှတ်နိုင်သည့် အရာများလည်းရှိ၏။

ယီချန်းယန်ကတစ်ခုခုကို အာရုံစိုက်တွေးတောနေသည်ကို မြင်လိုက်ရသောအခါ လီယဲ့က ခံစားချက်မကောင်းသလိုလိုဖြစ်လာရပြီး ပြောလိုက်သည်။

"ချန်းယန်...ငါ ဒီကိစ္စကိုပြောလို့ မပြီးသေးဘူး"

"ပြော" 

ယီချန်းယန်က ဘာသိဘာသာဘဲ ပြောသည် ။

"ဒီတစ်ပတ်မှာ ထန်းရှောင်က မန်နေဂျာအသစ်ပြောင်းလိုက်တယ်...အဲဒါက–"  

လီယဲ့က အနည်းငယ် ချီတုံချတုံဖြစ်နေပုံပေါ်ပြီး ခဏရပ်လိုက်သော်လည်း အဆုံးတွင် သူက ဆက်ပြောလိုက်ဆဲ​ဖြစ်သည်။

"ဝူရှောက်"

ယီချန်းယန်၏အမူအရာသည် ချက်ချင်းပင် အေးခဲသွားကာ ပြင်းထန်သော အေးစက်မှုတစ်ခု သူ့မျက်လုံးထဲတွင် ပေါ်လာသည်။

"ချန်းယန် မင်း စိတ်အေးအေးထားရမယ်"

"သိတယ်"

ယီချန်းယန် မျက်လုံးများကို မှိတ်ထားလိုက်မိသည်။အကယ်၍ ဤတစ်ကြိမ်မှာ တစ်ခုခုဖြစ်ခဲ့လျှင် သူ ထိုလူလိုမျိုး ဝူရှောက်ကို ဤလောကထဲကို ထပ်၀င်ခွင့်ပြုတော့မှာမဟုတ်သည်က သေချာ၏။

****

ယန်အန်းယု 'ဝါး' ရိုက်ကူးရေးထဲသို့ ဝင်ရောက်ပြီးနောက် မကြာမီ ရိုက်ကူးရေးစတင်ခဲ့သော်လည်း သူအမြဲတမ်း NGဖြစ်​နေသောကြောင့် သူ့အတွက် သိပ်ချောမွေ့မှုမရှိခဲ့ပေ။ သူ့အနေဖြင့် ပုန်ကန်သော ညီလေး ​မော့လီကဲ့သို့ ကောင်းကောင်းသရုပ်ဆောင်နိုင်လိမ့်မည်မဟုတ်ဟု အစက ထင်ခဲ့သည်။ လက်တွေ့တွင် 'မော့မီ' ၏ စစ်မှန်သော ခံစားချက်ကို ဖော်ပြရန် ပို၍ပင် ခက်ခဲလိမ့်မည် ဟု သူ ဘယ်သောအခါမှ စိတ်ကူးမယဉ်ခဲ့ပေ။

​မော့မီကို ကောင်းကောင်းသရုပ်ဆောင်ချင်လေလေ ဖိအားများလေလေပါပင်။

ဤပိတ်ရက်မှာ

ယန်အန်းယုတစ်ယောက် စိတ်အ​ခြေအနေမကောင်းဖြစ်နေပြီး၊ အထူးသဖြင့် သူကောင်းကောင်းသရုပ်မဆောင်နိုင်သည့် ကိုယ့်ကိုကိုယ် နာကျင်အောင်လုပ်သည့်အခန်းမှာဖြစ်၏။၎င်းကိုမြင်ပြီး ဒါရိုက်တာဖူက ယန်အန်းယုကို နှစ်ရက်လောက် အနားယူခိုင်းလိုက်ပြီး နောက်ပိုင်းမှာ ယီချန်းယန်က ယန်အန်းယုကို သူ့နေရာကို ခေါ်သွားခဲ့၏။

*****

Sမြို့တော် ပေရှင်းခရိုင်၊ သစ်တောဗီလာ၌

ညဘက်တွင် ယီချန်းယန်အိပ်ပျော်နေချိန်တွင် ယန်အန်းယုက ရုတ်တရက် နိုးလာပြီး တိတ်ဆိတ်စွာ ထလာသည်။

သူအိပ်မက်ဆိုးတစ်ခုမက်ခဲ့ပုံရပေမဲ့ ယခုချိန်မှာ ၎င်းကို မမှတ်မိတော့​ပေ။ယန်အန်းယုက မျက်ခုံးမွှေးများကို ပွတ်သပ်ကာ ရေချိုးခန်းထဲသို့ လျောက်သွားပြီး ရေချိုးခန်းမှန်ရှေ့တွင် ရပ်လိုက်သည်။

မှန်ထဲမှာ သူနှင့်တူသည့် မျက်နှာကိုတွေ့လိုက်ရသည့်အခါ ယန်အန်းယုက ဖော်မပြနိုင်သော စိတ်ရှုပ်ထွေးမှုကို ခံစားလိုက်ရသည်။

အခုတလော သူ့ကိုယ်ထဲမှာ ထူးဆန်းသည့်အရာတစ်ခုကို ခံစားခဲ့ရသော်လည်း ၎င်းသည် မည်သည့်နေရာတွင်ရှိသည်ကိုမသိသလို အတိအကျလည်းမသိခဲ့ပေ။သူ့ကာရိုက်တာ "​မော့မီ" ၏ စရိုက်နှစ်မျိုးကြောင့်နှင့် သူ၏ အခုတလော ထပ်ခါထပ်ခါ ဤဇာတ်ကောင်၏ စိတ်အခြေအနေကို ခွဲခြမ်းစိတ်ဖြာရန် ကြိုးစားမှုကြောငံ တစ်ခါတစ်ရံတွင် ခေါင်းမူးလာတတ်သည်။

အမျိုးသားဇာတ်လိုက်မော့မီက သူကိုယ့်သူ စိတ်ပျက်မှု၊ မုန်းတီးမှုနှင့်  လက်တွေ့ဘဝအပေါ်မကျေနပ်မှုများကြောင့် ထိခိုက်​အောင်လုပ်မှု၊ သိမ်ငယ်မှု၊ ကြီးစွာစိတ်ဆင်းရဲမှု နှင့် မိမိကိုယ်ကိုနှိပ်စက်ညှဉ်းပန်းမှုများပင် ဖြစ်ခဲ့ကြောင်း ဒါရိုက်တာဖူ တစ်ခါက ပြောသည်အား သတိရမိသည်။

ခန္ဓာကိုယ်ပေါ်က နာကျင်မှုသည် ရံဖန်ရံခါတွင် စိတ်ပိုင်းဆိုင်ရာ စိုးရိမ်ပူပန်မှုများနှင့်မသက်မသာ​ဖြစ်မှုကို လျော့ပါးစေသည်။ကိုယ့်ကိုကိုယ် ရုပ်ပိုင်းဆိုင်ရာ ဒဏ်ရာရအောင်လုပ်ခြင်း ဖိအားများကို တွန်းလှန်ပေးသည့် နည်းလမ်းတစ်ခုဖြစ်၏။ဥပမာ၊ လူများစွာသည် ဆံပင်ညှပ်ခြင်း၊ ဆေးလိပ်သောက်ခြင်း၊ သို့မဟုတ် တက်တူးထိုးခြင်းနှင့် မူးယစ်ဆေးဝါးများ သောက်ခြင်းတို့ ပြုလုပ်ကြသည်။

၎င်းကိုတွေးပြီး ယန်အန်းယု လက်မောင်းကို မြှောက်လိုက်ပြီး လက်ကောက်ဝတ်ကို ကိုက်လိုက်သည်။

ခံစားချက်ကို ကိုယ်တိုင်ကိုယ်ကျ ခံစားကြည့်ချင်ရုံဖြစ်၍ သူအပြင်းအထန်မကိုက်ခဲ့ပေ။နောက်မှ သစ်သီးလှီးဓားကို ထုတ်ကာ လက်ကောက်ဝတ်ကို အသွားမပါသည့်ဘက်နှင့် ခြစ်ရန် ကြိုးစားလိုက်သည်။

သို့ပေမဲ့ နောက်တစက္ကန့်မှာပဲ ယီချန်းယန်က ရုတ်တရက်ပေါ်လာပြီး ယန်အန်းယုလက်ထဲက ဓားကို လုယူလိုက်​လေသည်။

ချွမ်းခနဲအသံနှင့်အတူ ဓားက အဝေးသို့လွင့်ထွက်သွား၏။ယန်အန်းယုလည်း ယီချန်းယန်ကိုလည်း ကြောင်တောင်တောင် ငေးကြည့်လိုက်မိ၏။ပါးစပ်ကို ဖွင့်လိုက်သော်လည်း သူစကားမပြောနိုင်မီ ယီချန်းယန်ကသူ့ကို တင်းတင်းကျပ်ကျပ် ဖက်လာလေသည်။

ရုတ်တရက် ပြင်းထန်သော စိုးရိမ်ပူပန်မှုတစ်ခုက သူ့နှလုံးသားကို ထိမှန်သွားကာ ယီချန်းယန်အား သူ့လက်မောင်းများကို အဆက်အပြတ်အားထည့်ရင်း ယန်အန်းယုကို သူ့ရင်ခွင်ထဲတွင် တင်းတင်းကျပ်ကျပ်ချုပ်နှောင်ထားမိ​စေ​တော့​သည်။

👥️